رواية ناديه الفصل الثالث والخمسون 53 بقلم انين الليل

حنين 

من يوم الي فتحت عيوني ع الدنيا وانا اشوف ناديه شايلتني وتخاف عليه ودوم اشوفها تبچي ومن تباوعلي ابرطم 

تجي يمي وتضحك وتگلي ... ... ... انا ما ابچي اتشاقه وياج

ناديه الي اكبر مني بسنه لكن احس بيها مو اختي لا احسها امي واختي وصديقتي اشوفها من اول ما وعيت وهي 

تشيلني وتغسللي ومن كبرت شويه صارت تعلمني على الاشياء الي علمتها الها بيبي منيره الي احبها هواي 

تصدگون ماكو يوم من الايام اشتاقيت او سالت لا على امي ولا على ابوي چنت مكتفيه بحب ناديه وحنان بيبي

 الله يرحمها

وحتى من اشوف ناديه تطلع صورة امي وساعات تسبها وتتفل عليها وتغلط انا ما اشاركها لان اعتبر ناديه هي 

كل حياتي 

ناديه الي ما تقبل تاكل اذا الاكل الي تنطي افراح النه قليل 

ناديه الي تتحمل ضرب هادي واهانات افراح والي دائما تگلي 

... ... لا تهتميين حنين بالاخير راح كل شي يتبدل وفعلا اتبدل كل شي بين ليله ويوم

صارت عدنا غرفه بيها حمام بعد ان چنا گاعدات بمخزن ونسبح بطشت بالبيتونه وصار عدنا راتب وصار 

عدنا تلفزيون وثلاجه وغساله وجربايه انام عليها وملابس حلوه نشتريها وما تاخذها من عدنا افراح 

وما انسى ناديه من چانت تحذرني من عمار ونظراته الحقيره اليه

حسيت من صارت عدنا غرفه وملابس وصرت اخذ مصرف للمدرسه انو كل مشاكلي انحلت بوكتها عبالك صرت 

اميره ما كانت تهمني افراح او بناتها المهم ناديه موجوده وهي الي راح تكون دائما وياي 

چانت ندووش دووم تحثني ع الدراسه وتگلي لازم نحصل على شهاده نستفاد منها

من وانا زغيره چنت احب الرسم ‎ورغم احس بناديه ما قابله ان ادخل اكاديميه فنون جميله لكن انا قنعتها 

چنت من اروح البيبي جميله وهو هذا المتنفس الوحيد النه انا واختي كل اسبوعين نروح البيت عمو كرم الي نحس بيهم 

يحبونه كلهم چنا من نروح نعيش لحظات من السعاده ويه سوالف بيبي الي ما تنمل وحنان عمو كرم وعمه فيحاء 

وچنت اصعد ويه نبأ الغرفتها وهي ما تبخل عليه باي شي اريده لكن ناديه چانت ما تقبل اخذ اي شي اله من عمي كرم

 لو من عمه زهراء او بيبي جميله

1

وبنفس الوكت چنت اشوف نظرات مرتضى وهو يباوعلي من اگعد من اشتغل وياهن بالمطبخ من اكل چان يگابلني 

ومن رحنا سفره وانا ونبأ صرنا نساعد بي هو وياسر حتى يشوون السمج حسيت بنبأ ابتعدت وبقيت بس انا 

هو راسا صارحني وگلي بدون مقدمات وبخجل // احبج واريد اتزوجج

انا بوكتها ما اعرف شنووصار بيه اي ادري هو يباوعلي وادري بي معجب بس هيج يگلي ما جاوبته لكن عيوني وحمرة

وجهي هو كان الجواب ومن رجعنا البيتهم عمه فيحاء گلتلي // ادري باابني يريدج شدي حيلج بس تكملين السادس

اخذج المرتضى 

وعرفت من نبأ همه كلهم يدرون بمرتضى يريدني ومحد امانع بان نتزوج

وصرت من اروح البيت عمي كرم احاول ابقى يم بيبي حتى ما ياخذون عليه نظره انو انا خفيفه وهذا چان طلب ناديه 

وشديت حيلي وفد يوم نبأ گلتلي يتمنى مرتضى يخابرج فهو يگول ادزلها جهاز حتى يحچي وياج لكن انا ما قبلت وگتلها 

:ناديه ما تقبل وراح تزعل عليه هسه خليني انتبه الدراستي

وصرت ادرس رغم ما احب الدراسه لكن ناديه دخلتني دورات ورادت تخليلي مدرسين وانا فهمتها انو لا تخلي ولا 

تتعب لان انا ما راح اجيب معدل قوي وانا اريد اطلع مدرسة رسم وهي فهمت انو انا بس اكمل السادس انخطب 

واتزوج مرتضى لان انا احبه لا شنو احبه انا ما اشوف اي شاب بالدنيا بس هو

چنت اتمنى السنه الدراسيه تخلص باسبوعين 

واول مره اشد حيلي بس حتى انجح وارتبط بمرتضى وحتى اطلع انا واختي من بيت هادي 

  ناديه بوكتها فهمتني مجرد ما انخطب راح نروح نگعد ابيت عمي كرم ومن نتزوج انا ومرتضى نگعد ابيت ابوي 

انا ومرتضى وناديه وبيبي جميله

صرت اقرا الى ان بيوم اجيت من المدرسه ومثل يوميه انتظرت ناديه لكن ناديه اتاخرت صارت الساعه بالاربعه 

نزلت ولگيت افراح گاعده بالصاله گتلها 

عمه ناديه الهسه ما اجت 

هي باوعتلي وگالت //تحچيين صدك بيش هسه الساعه 

جاوبتها بخوف //عمه بالاربعه 

افراح بهدوء //يجوز السياره عطلت 

- ما ادري بس لو تخابرينها

افراح اتصلت مره واثنين وبكل مره تتصل وما كو رد گلبي يوگف باوعتلي افراح وهي تگول 

- جهازها مغلق وين راحت 

جاوبتها //عمه الله يخليج خلي هديل تتصل باماني 

افراح لملمت حلگها // اي روحي صيحيها 

رحت دگيت الباب على هديل فتحت وهي منعسه //هاا شكو 

:هديل عمه اتصيحج

نزلت هديل وامها گالت الها تتصل باماني لكن هديل گالت ما تعرف رقم اماني ظليت اباوع وانا خايفه نزل عمار 

شافنه گال // شكو 

وافراح فهمته // ناديه ما اجت الهسه ونتصل ويطلع مغلق وهديل ما تعرف رقم اي بنيه موجوده وياها بالخط 

عمار سال هديل //ما تندلين بيت وحده وياها بالخط 

هديل گالت //اي اندل بيت اماني لان يم بيت بنيه وياها بنفس الخط گالها ياالله امشي وانتي هم تعالي ويانه

انا بسرعه لبست عباتي الاسلاميه ونزلت وصعدنا انا وهديل ويه عمار ودلتنا على بيت اماني نزلت انا وهديل لان 

عمار گال //زحمه ما انزلن شوفن جايه لو لا وشنو تگول اتصرفن بشكل عادي

دگيت الباب وانا گلبي يدك طلعت امها سلمت وگتلها //خاله رايده اماني بس گليلها حنين اخت ناديه 

وراحت المره واجت اماني هي تعرفني وتعرف هديل سلمت عليها وسالتها عن ناديه هي اتعجبت وگالت 

:هي كتبتلي مسج ما ترجع ويانه بالسياره راح ترجع ويه ابن عمها 

وسالتني// شنو الهسه ما اجت 

هديل هزت راسها وگالت// اي الهسه ماكو

نزل عمار من شافنه نحچي وهديل گلتله على كلام اماني واماني راوتنا المسج بعد ان جابت موبايلها 

 رجعنا بالسياره وافراح اتصلت وعمار رد عليها ورجعنا للبيت لگيت هادي ورا اجه عمي كرم وعمه فيحاء

ومرتضى ونزل ياسر الي چان نايم فووك بغرفته

الي صار حاولو يعرفون رقم وحده من صديقاتها بس انا ما عندي اي رقم لان بالاساس ما عندي جهاز صارت 

الساعه بالسبعه وهمه ما بطلو يتصلون ع الرقم ويطلع مغلق الي صار انو هادي لزمني موتني ضرب گدامهم 

حاول كرم ومرتضى وحتى عمار يفكونه ما گدروله گلي وهو صاك على اسنانه 

- هسه تگليلي اختج ويامن راحت لا اموتج اهنا

انا بس ابچي واصابع الاتهام كلها اتوجهت اليه بعد ان گالت افراح //اختج سرها عدج انتن اثنيچن النهار كله سووا

حتى ما تنزلن ولا نشوفچن 

هادي لزمني من اچتافي // اشتري عمرج وگولي اختج ويامن راحت 

بس ابچي واهز براسي يعني ما ادري

عافني دخل للمطبخ جاب سچينه چبيره وصار يتهدد عليه ومرتضى وعمار وياسر لازمينه وانا صعدت اركض 

فووك وقفلت الغرفه عليه وهمه صارو يطلعون يدورون وماكو لمن ما كرم خابر عمو سراج واجه وطلب يشوفني 

واشوف بعيونه تساؤل رغم من شفته حسيت بالامان صار سراج يسالني على ناديه واجه عمو قيس هو وشمس 

الي اشوفها تبچي وتضرب على خدها واجت زهراء الي صارت مهمتها بس تدافع عليه وعلى ناديه خصوصا من 

هادي وضربه اليه لو من نوال الي كل ساع تتفل وتغلط وتغم بيه

يوميه صرت اسمع افراح واختها وهنه يتشفن بالكلام وافراح دووم تردد //طلعت ويه واحد قشمرها ونهبها 

:اي صارت عدها فلوس وطارت 

:جابتلنه العار

اما هادي بس يحچي ويسب ويغلط ويگل الكرم //انتم شمخرتوهن علينه بس نحچي خطيه يتيمات وامك تخابر 

قيس يجي هاد على افراح هسه خوش سوون بينا بنات مياده وشوف هاي شوفها شجوه راسها من مصيبه (ايأشر عليه )

منع اذا هو موجود يشوفني لان يموتني فصرت اتحاشا وگال 

 - - - دوام ماكو لان بس نلگاها وشنو ما يكون عذرها راح نكتلها وانتي نشوفلج صرفه نتلاحكج گبل لاتسوينه 

مكسوره اذا ما مسويتها واحنا ماندري

الي شفته انو عمي كرم ما دافع عني ولا عن ناديه بالعكس صار يتهدد انو وين ما يلگاها الناديه وشنو ما يكون عذرها

 ما راح يرحمها بالعكس راح يكتلها خلاص لان جابتله العار وابد ما صار يدافع عني

افراح رجعت بكرهها وحقارتها وخلت كل الشغل عليه بحچة هي تدور على ناديه ومن يجي هادي من الشغل لازم انا 

ما ابقى جوه وبس يشوفني يصير يتهدد ويغلط ويتفل 

وافراح عود تحاميلي تخليني وراها وتكله //. على كيفك لا يرتفع ضغطك عوفها هسه بس نلگى ذيج المصخمه 

ذاك الوكت نشوف شنسوي بهاي

واجت عمتي زهراء طلبت منها تاخذني بيبي جميله يمها وحتى گتلها اگعد بالغرفه مالتها وهي گالتلي راح 

تحچي ويه كرم ونبهتني ما اتقرب يم افراح ولا اراددها لو شما تحچي وتغلط وحتى ما اتقرب ع الطباخ 

واخذ حذري على ما يجي عمي كرم وياخذني البيته انا صرت اجمع بملابسي وكتبي لان اعرف بعمو كرم 

شگد يحبني هو وزوجته ام مرتضى

وانتظرت وما اجه اي احد منهم طلب من هادي اروح وياهم 

ثاني يوم اجت ابتهاج وابرار واشوف هديل واسيل مبدلات عبالك يردن يرحن الحفله باوعتلي افراح وگالت 

 - - - اصعدي فوك ولا تنزلين جايينه ناس مو عوزنا فضايح عاد اذا سالو عليچن نكول ما موجودات

عرفت انو الناس الي راح يجون اكيد حتى يخطبون هديل بس ليش بهالتوقيت واختي ما اعرف عنها شي 

صعدت وما نزلت وانا بترقب يمته تجي عمه زهراء وتگلي ياالله امشي 

گاعده بالغرفه وسادتها عليه واسمع الهلاهل جوه عرفت هديل انخطبت بس مو لازم انزل وابارك الها 

لا هو انا بيا حاال وحتى افراح ما گالت انزلي خليني گاعده احسن الي

صارت عيوني تجري وانا اسال واگول وينج ياناديه وين رحتي وانتي ياعمه يازهراء وين صرتي مو گلتي تخلين 

عمي كرم يجي وياخذني اشو امس اجه وراح واي شي ما سمعت حتى ما دز عليه 

صرت منبوذه من الكل بقيت بالغرفه ما نزلت ولا حتى اتجرات افتح الباب واعرف من. هذا الي خطب هديل 

ثاني يوم نزلت باركت الهديل هي ردت من وره خشمها // شكرا

صرت اشتغل بالبيت بدون ما احجي اشتغل كانما خدامه اكمل كل الشغل واصعد وانا بين دموعي لى اختي الي 

ما اعرف وين طريقها وبين ترقبي يجي عمي كرم وياخذني 

فات تقريبا اربع تيام وما اجت لازهراء ولا عمي كرم 

وحتى اذا اجو انا ما ادري لان ممنوع انزل وهادي موجود

رابع يوم نزلت الصبح شفت هديل هيه وامها وابرار واسيل بايدهن جنطتين واسمع هديل تحچي 

- - - شنو انا وحد ما يسوولي زفه على مود ست ناديه 

افراح //اسكتي هديل ابوج غادي نار 

هديل //اي غادي نار من وره ست ناديه مو من وراي انا ابنيه اريد افرح واتونس 

اسيل //مو عمي كرم گال بس يلگون ناديه يسويلج احلى زفه واحلى عرس بعدين انتي وافقتي شكو هسه جاي تحچين 

افراح //هسه احنه نبقى فلان گال وعلتان حچى ياالله امشن

استغربت وبيني وبين نفسي گلت شنو يعني اليوم هديل تتزوج شبسرعه بقيت واگفه واول مره افراح ما تحچي 

ولا تگلي سوي هيج ولا تصيح عليه هنه طلعن وهي بقت بالبيت وگلتلي 

بس تكملين الشغل اصعدي فووك تره هادي بس يشوفچ يذبحج 

جاوبتها //. عمه شمسويه انا 

- - ما مسويه شي بس اختج سووت استري على نفسج واصعدي ولا تنزلين افتهمتي

ما جاوبتها وبس كملت الشغل صعدت اقرا ورغم انو هادي بطلني من المدرسه وگلي بعد ماكو دوام سواء رجعت 

ناديه او لا لكن انا بقيت اقرا لان عندي امل ترجع ناديه وهم عمه زهراء وعمي كرم ما راح يتركوني 

بيومها مانزلت والبيت سنطه وانا قافله عليه الباب وگاعده وانا متوتره احس اكو شي مانزلت الظهر ولا اكلت 

شي وگلبي متخوف احس اكو شي راح يصير بقيت گاعده لمن ما العصر سمعت حسيت بحركه داخل البيت 

عرفت هديل اجت وراح يجوون ياخذوها البيت زوجها

الصراحه صرت ابچي وانا اگول //ليش ياعمي هسه وكتها اختي ما اعرف شنو صار بيها وانت زوجت بتك 

بعدين اگول //بعد اجت قسمة البنيه الله يهنيها وهمه هم ما سوو اي شي لا حفله ولا اي شي خلي انزل وابارك 

الهديل مهمه يكون هيه بت عمي

وفعلا غسلت وجهي ولبست عباتي الاسلاميه فوك الدشداشه وخليت الشال على شعري ونزلت رحت بوجهي للديوان 

الداخلي فتحت الباب الي كان مردود ع النص الصوره الي شفتها والي ما راح انساها انو انا بقيت بنص الغرفه من 

المفاجأه الي شفتها بهاي اللحظه تكومت دموعي بس حاربت حتى ما ينزلن وانا اشوف مرتضى گاعد بصف هديل 

وكرم گاعد يمهم وغفران ونبأ وشفت ابتهاج وابرار واسيل بوكتها اريد اصرخ وانا اشوف ضحكة الشماته بوجه هديل 

وابتسامه بوجه مرتضى

سمعت صوت هادي وراي وهو يصيح ويگول 

هاي شنزلها يعني اله اطگها طلقه واموتها مو گلت ما طول انا موجود بالبيت ما اريد اشوفها 

افراح ردت بتشفي //شسوي هادي انا گايلتلها لا تنزلين شسويلها ما تسمع الكلام وهنه متعلمات اذا ما يسون مشكله

 ما يرتاحن

اهنا انا بچيت وطاحن دموعي لان كلام هادي وافراح انطاني سبب حتى ابچي جاوبتهم 

:انا جايه ابارك الهديل واصعد 

اتقربت يمهم وگلت// مبروك هديل مبروك مرتضى الله يسعدكم

همه ما ردو انا باوعت الكرم الي من اتقربت وگف ومن سمعني باركت دنك وظل يحرك رجله 

افراح ردت ومن كلامها تطردني //ياالله ما طول شفتيهم وباركتي الهمواصعدي المهجومتج 

بناتي حتى فرحتهن ناقصه من وراچن لاعرس مثل الناس لا حفله

صعدت وانا ابچي حييل لان مو بس شفت الخيانه لا لان انزرع الكره البيت كرم الي چنت اشوفهم ملاذي 

قفلت الغرفه وصرت ابچي حييل وانا اگول

:ليش يامرتضى ليش هيج سويت وياي ليش خليتني احلم وافرح وطلعت انت وابوك اكبر انذال 

وانا اعاتب بناديه واگلها //انتي هسه وين مو گلتي ما تتخلين عني هم تدرين بيه انا جاي اموت الف موته يوميه 

:هم تدرين شنو سوى مرتضى الي ما چنت اشوف بالدنيا شباب بس هو هو فارس احلامي 

:هو الامير الي ينقذني من افراح وبناتها اجه اخذ هديل وانتي ما اعرف وين رحتي سويتي جزء ثاني الافراح 

خاف ما كفاها عار مياده هسه راح يبدي مشوار عارها اليه بيچ

بقيت بغزفتي وبليلتها ابد ما نمت وانا اسمع اسيل وابرار من اجو وشلون ايسولفن ويضحكن

بليلتها بقيت گاعده على حيلي وبس دموعي يجرن وانا اگول 

:معقوله كل الي حلمت بي واتمنيته اعيشه ويه مرتضى هسه صار من حق هديل 

(لاتگولون عليه انانيه اختي ضايعه وانا افكر بنفسي حتى انتو لووعشتوا الي عشنا من ذل وفقر وضيم وجوع 

و حتى من صارت عدنا فلوس انا بقيت مثل ما انا ما اتغيرت خليت كل شي بيد ناديه 

يمكن تنطوني الحق انا چانت احلامي بسيطه اباوع ع تلفزيون وانام على چربايه واشتري من حانوت المدرسه 

حتى لبسي ما چنت اهتم بي ومو اله من الغالي المهم اكل وانام لكن من دخل مرتضى الحياتي حسسني انا بنيه والي 

حق افكر بنفسي وارتبط بانسان يحبني واكون ويا عائله )

ثاني يوم بلشت بالشغل. وانا ساكته او گولي انسانه خاويه مقطوعه عن العالم كانما ا اتحرك ع الريمونت 

 وقبل لا يجي هادي صعدت وثاني يوم هم نفس الشي وبطلو يجيبون سيرة ناديه او اختفائها 

الساعه بثمانيه بالليل انا چنت اغسل بالطارمه واسيل تقرا بالحديقه اندك الباب واسيل راحت فتحته گلتله 

  — — اي موجود 

راحت اسيل وگفت اباب المطبخ وگلتله ياسر ولد رايدك بالباب

طلع ياسر الي اشوفه حزين وما اله خلك احد ومن فتح الباب راسا دخلت الشرطه للبيت انا خفت وركضت للمطبخ 

واسيل اجت وراي وهي تگول //عمار الحك شرطه شرطه 

طلع عمار ورا هادي ودخلو الشرطه صعدو الغرفة ياسر وناس اشوفهم يفتشون سيارته وهادي وعمار 

يردون ايفهمون منهم همه منو لكن ذوله الملثميين ما يجاوبوهم

واخذو ياسر وهادي خابر كرم وخابر سراج واول مره اشوف افراح اشلون صارت تبچي وتلطم على وجهها 

وهي تگله — هادي اتلاحك ياسر شوف ليش اخذو

انا طاحت دموعي وانا اتذكر ناديه الي صار اكثرمن اسبوعين وهي ماكو صرت ابچي واگول ويه نفسي 

— يعني لو عدنا ام لو اب هم هيج صار حالنه وهاي اول مره اتمنى تكون عندي ام واشتاق الحضن دافي 

احس ويا بالامان صرت ابچي واكول // بابا عباس ليش ما اخذتنه وياك

رحت ع الدرج واسمع هادي يخابر بسراج الي طمنه وانو راح يسوي كل جهده بس حتى يعرف تهمة ياسر 

لكن المفاجأه الي صارت بعد يومين من حادثة ياسر هي الي غيرت حياتي تغيير تام

///////////...////////...//////...////...//////////

سراج 

بعد ان اتاكدت من كلام ناديه بان بيوم اختفائها هي راحت ويه ياسر خصوصا وشفت الكرفان والرساله الي دزاها 

الها لكن جهازها ما لكيته صار امامي انو ياسر هو الي خطفها وسلمها الهذا المجرم الي اغتصبها واهنا انا نسيت 

اي رابطه قرابه تربطني بهادي او ابنه كان ابدي الزمه واخنگه واموته لكن صارت امامي حنين خفت يكون هادي 

وافراح على درايه بجريمة ابنهم لذلك قررت ابعد حنين عنهم حتى لا يتخذونها ورقة ضغط

طمأنت هادي انو انا راح اجي واحاول اعرف شبي ياسر وفعلا رحت البيت هادي بعد ان فهمت رضا وعبد العزيز 

على الي راح يسوونه وصلت البيت هادي تقريبا الساعه سته ونص سلمت عليهم واتوضيت وصليت بالديوان بعدها 

گعدت يمهم وانا اشوف هادي شلون مقهور على ابنه واجت افراح وهي تبچي وتگول //ياسر ما مسوي شي ليش اخذو

وانا صرت اطمنها واگلها 

::لا تخافين ام ياسر كلفت جماعه يعرفولي الجهه الي اخذته

وصار عمار يشرحلي شلون اخذو وما قبلو حتى يحچون 

اجه كرم وبعدها اتصل عليه رضا جاوبته 

::الو اهلا ابو علي

هلا سراج شلونك 

الحمد لله 

رضا //سراج انا جاي بشغله 

جاوبته :: شغلة شنو الو الو (فتحت الحاكيه ) ها رضا انت وين

رضا //بالبصره 

::خير رضا خو ما صاير شي 

رضا //كل الخير شغله عندي انت بشر ما لگيتو البنيه ما عرفتو عنها شي 

  باوعت الهادي وكرم الي ما بين عليهم اي اهتمام جريت تفس ::لا ابو علي كل شي ماكو انت هسه وين بالبصره 

رضا //يم ولد صديق عنده بستان وگلت اشوفه اذا يرهم اخذه الولد المرحوم تعرف همه ما يردون يسكنون بغداد

::بيها الخير اذا تحتاج شي بس خابرني انا بالبصره وعدنا ولد عمتنا يعرفون بالبساتين اذا تحتاج اي شي برسم الخدمه 

رضا // تحچي صدك 

 :: اي. قيس ابو احمد هاي شغلته بالبساتين اي شي تحتاجه لاتستحي گلي وما راح يقصر 

  رضا // ممنون منهم ما احتاجكم مو بعيدين 

   :: تدلل ابو علي ولد عمتي يمي يسلمون عليك 

رضا//الله يسلمك سراج ما تقصر بس 

:: بس شنو رضا ليش سكتت

رضا //شگلك موفق خابرني وگلي ليش عايف المحل واذا ما يعجبك الشغل اتبايعووكل واحد ياخذ حقه 

وانت تدري انا مخلي العامل ومچيك كل اموره وهاي شغله ضروريه الاجيت بيها 

::ما عليك بحچي موفق المحل محلي شعلي ويتدخل انا وياك متراهمين

رضا //اشكرك سراج بعد انت هم صاحب نص ولازم اگلك 

::وانا اعرفك رضا واعرف معدنك اعذره الموفق من يحچي ما يوزن كلامه لا تزعل منه

رضا //صدك چذب چا هو مثل اخوي الزغير 

::ومثل ما گتلك شتحتاج تخابرني صدك يمته ترجع 

اغبش الفجر

::زين الله وياك 

فيمان الله سلمنه 

::عليكم السلام يوصل

سديت التلفون من رضا وصرت احچي :: هذا موفق اخذ حصته شعلي ويتدخل 

كرم //على كيفك يريد يحافظ على حلالك 

اندك الباب وراح عمار واجه وهو يگول // بابا شرطه بالباب رايدينك 

هادي باوعلي انا وگفت وعكفت حواجبي وگتله ::عمار ما گلولك شيردون 

عمار // وياهم ضابط گال رايدين ابوك

نفخت وباوعت الهادي :...هادي ابقى انا طالع اشوف شيردون تعال وياي كرم 

هادي //. لا خلي اروح اشوفهم شنو قابل خايف 

   طلعت بدون ما اجاوبه شفت عبد العزيز هالمره ما مغطي وجهه وصلت يمه 

::اتفضل استاذ 

:انت هادي 

::لا بس اتفضل شرايد 

عبد العزيز بنتر //رايدين هادي وينه

:: موجود بس غير اعرف شرايد منه 

عبد العزيز عكف حواجبه //وانت منو وهيج تحچي 

طلعت هويتي شافها وگال // العفو استاذ رايدين هادي خليل هادي 

::اي اتفضلو ادخلو خلي نفتهم منا ناس وهادي رجال معروف

كرم بعصبيه // شنو يوميه جايين اول مره اخذتو الولد وبعدين رايدين هادي غير نفتهم شتردون 

انا جاوبت عبد العزيز ::اتفضل ادخل 

عبد العزيز //استاذ اسف بس لازم الافراد يدخلون وياي 

هزيت راسي ::اي عادي اتفضل 

ودخلنه ودخلو ويا خمسه امرهم يبقون بالكراج گعدنا بالديوان البره واشرت العمار يصيح الهادي الي اجه

 وسلم انا گتله ::هذا هادي اتفضل شرايد منه

عبد العزيز //استاذ بالحقيقه انا ما رايد هادي 

كرم بتساؤل // ها شو هسه ما رايد هادي اذا ما تريد هادي تريد من ؟

عبد العزيز //رايد المدعوه حنين عباس خليل 

كلنه اتفاجأنه انا سالته بنتر ::شرايد منها 

:استاذ هذا امر (وطلع ورقه ) القاء القبض عليها واحضارها حالا وحتى ما تصير عليه بعملي تبعات انا طلبت 

اشوف هادي وناخذها بكل هدوء

اخذت الامر وقريته :...اي غير نفتهم ؟

:استاذ مو من صلاحيتي احچي انت تعرف فرجاءا جيبو البنيه وخلي ناخذها 

كرم بصوت عالي // شنو تاخذونها او وين ؟

عبد العزيز باوعلي //استاذ هذا امر قضائي ولازم يتنفذ وانت تعرف بهذا الشي 

جاوبته وانا اخزر بكرم :: مفهوم اكيد انت رووح هسه وانا اجيبها باچر الصبح 

هز راسه //اسف استاذ هسه هي مطلوبه ولازم اخذها مخفوره

جريت نفس ::زين ياابني روحو وانا اجيبها وراكم 

وگف عبد العزيز //تعرف هذا قانون وتعذرني 

هزيت راسي ::افهم يا ابني بس هادي انسان معروف واله مركزه الاجتماعي وهاي بنيه يعني صعبه وانت تعرف 

المجتمع والناس 

عبد العزيز //وانا ما اتعديت ولا اسات الادب جاي اقوم بواجبي 

هزيت راسي ::مفهوم لكن قبل يومين اخذتو ابنه وهسه بت اخو مو حلوه گدام الناس ابنيه لاقين القبض عليها 

عبد العزيز //استاذ انا انفذ الاوامر

:: اعرف بابا رووح وهسه انا اجيبها وراك هي تصير اقاربي 

عبد العزيز //زين استاذ الخاطرك بس اريد هويتك اخذها وياي 

سلهمت عيوني واتنفست وگلت ::حقك بابا اتفضل (وطلعت الهويه )نص ساعه وانا يمكم 

عبد العزيز //. استاذ نص ساعه اذا ما اجتني او اتهربت الغير مكان اعذرني راح اخذ كل الموجودين بالبيت 

وراح اخلي واحد من العناصر يتواجد اهنا الى ان تجيبها 

هزيت راسي عبد العزيز راح بعد ان خلى منتسب واكف داخل الكراج

اورحنا كلنه وره هادي الي راح يمشي بسرعه يريد يصعد الدرج وهو يگول

— اله اذبحها البت الكلب شمسويه 

كرم وانا لزمنا وكرم حچى //هادي على كيفك شمسويه يعني ما مسويه شي حتى المدرسه بطلتها منها من يوم 

الشردت بي ناديه بعد شمسويه 

افراح //هادي احنه بيا حال وانت تتهدد ما ندري الولد وين اخذو 

كرم //كلام ام ياسر صدك على كيفك

افراح //حالها من حال اختها خلوها تولي شوف شطلع عليها 

هادي //غير افهم ليش يردونها جليتني قوه بنص الليل لوما سراج الله العالم شصار 

باوعت الافراح :: ام ياسر روحي صيحيها خلي تلبس عباتها وتجيب جنسيتها وشهادة الجنسيه بسرعه 

افراح //ايي انا شمحصله بس التعب وهسه ابني ما ادري بي وين واحنه ملتهيين خلصنه من العرجه 

التهينه بحنينه 

كرم //. يعني انت صدك راح تاخذها

باوعتله وانا عاكف حواجبي :: ما شفته ما راح اله اخذ هويتي وخلاله عنصر بالبيت وتهديده اذا ما اسلمها 

ياخذ كل الموجودين بالبيت يعني اذا ما اخذها تعرفون شنو راح يصير ( باوعت الافراح ) 

بلا زحمه ام ياسر روحيلها ولاتحچيين وياها اي شي

راحت افراح وهيه تدردم وانا ما خليت هادي يحچي راسا گلت ::انا راح اخذها الحنين ومناك اخابركم وتجون 

ابد لا تتهورون 

هادي //هذني اله اموتهن ياالله ارتاح شوف الناس شراح تتقول علينه 

:: راح تطلع وياي اي شي ما راح تتقول الناس والي يسالكم گولو جايين عليه 

كرم //هسه خلي نفتهم يجوز لاگين اختها ودازين عليها 

عمار اتقرب يمي وسالني //شنو عمي تخلونها اتبات بالمركز

ما جاوبته نزلت افراح هي الي جاوبت //اي عادي هنه متعلمات ع المراكز بالبدايه امهن وبعدين ذيج الشارده 

هاطولها مركز يصدها ومحكمه تردها بقت على هاي (وتاشر ع الدرج )

(ما اعرف ليش هالكم مال الكره والحقد الي تمتلكه افراح ضد ناديه وحنين )

اجت حنين وهي خايفه وترجف وعيونها بيهن الف سؤال شافها هادي وراد يضربها لكن انا خليتها وراي وگتله 

وانا انفخ. :: مو وكتها هسه هادي خلي نعرف شكو وبعدين اتصرف وياهن محد ايلومك 

هادي// بنات النعال يوميه فضيحه 

ما جاوبته درت عليها وحاچيتها بزعل :: ياالله حنين وين جنسيتج وشهادتج

هي انطتهن الي وهي ترجف من الخوف اخذتها وركبت بالسياره وهي يمي چانت ترجف وخايفه وتفرك باديها

 ودموعها يجرن بالبدايه ما گالت شي لكن بعدين حچت //عمو انا ما مسويه شي وين ما خذني 

باوعتلها وگلت ::لاتخافين ماكو شي 

حنين //عمو ما تشو.........

خزرتها وغمضت عيوني وفتحتهن يعني اسكتي وصلنه ودخلنه للدائره وهي خايفه صرنا نمشي واشوفها مرتبكه 

بمشيتها اتلكاني عبد العزيز سلم عليه وانطاني الهويه ودخلنه الغرفته هو طلع وانا وحنين بقينا اتقربت منها 

وگتلها بعد ان فتحت الثلاجه وطلعت بطل ماي وانطيتها :: هاچ اشربي 

هي اخذت البطل ورادت تحچي انا غمضت عيوني وهزيت راسي

هي شربت ماي انا حاچيتها :: حنين انا بعدني القاعده الي ماسكج ؟

هي بچت وگالت //عمو والله انا ما مسويه شي 

جريت نفس ::اعرف بابا بس اريد افهمج كل الي سويته هذا على مودج انتي وناديه واي تصرف ارعن منج راح 

تتندمين علي طوول عمرج وراح تبقيين تحت رحمة افراح ويضيع حقج وحق اختج 

حنين //عمو شصاير فهمني وانت تعرف طريق ناديه ؟

ابتسمت وهزيت راسي ::اذا انتي تساعديني ايي راح اعرفه باسرع وقت ممكن 

حنين صارت تشهك //عمو والله ما ادري بيها والله 

::اعرف بابا اعرف انتي اكيد تردين تساعديني حتى نلگى ناديه 

هي صارت تحچي بكلام متقطع //عم عمو انا اري اريد اختي 

اتقربت منها وگتلها ::لا تبچيين واسمعيني زين

هي رفعت راسها وانا اشوف شلون تمسح دموعها بايدها عبالك طفله وصرت افهمها شلون تتصرف وشنو تگول 

بعدها خابرت كرم :: جيب هادي وتعال بسرعه الوضع ما يتحمل 

  كرم // شصاير سراج 

 :: مو مال تلفون بسرعه تعال

يمكن نص ساعه واجو هادي وكرم وعمار دخلو لگوني انا وعبد العزيز همه سلمو هادي گال 

—. سراج شكو شصاير 

عبد العزيز وگف وگال //استاذ انا طالع راح اكمل الاجراءات وانت فهم الاستاذ 

هزيت راسي :: زين انا شويه واصيحك 

طلع عبد العزيز باوعت الهم وانا اتحسر ودخنت جكاره هادي سالني 

 — يمعود سراج شكو فهمني اشو انت مو على بعضك

جريت نفس ونفخت ردت العب باعصابهم كرم گلي //سراج ياخي احچي شكو 

وگفت على حيلي ورحت سديت الباب وگعدت باوعلي كرم //سراج گول 

لملمت حلگي وعضيت على شفتي وگتلهم ::شتردون تعرفون 

هادي //سراج شكو 

كرم //گلنه شضام علينه 

باوعتلهم وجريت نفس وگلت ::مصيبه ومصيبه چبيره 

هادي //شكو سراج شصاير

   اتنفست وانا الموبحلكي :: حنين 

هادي بنص عين //شبيها بت القندره شداهره 

نفخت وگلت ::حنين متهمه وحسب اعترافات ابنك ياسر انها هي ويا قاتلين ناديه 

الكل گام من مكانه وهمه متفاجئين هادي صار يتلعثم //سراج انت شتگول 

كرم //جاي تتشاقى انت هو هذا هم حچي 

هادي //هاي هيه بت الزفره تهمت ابني

جاوبتهم ::لا اصلا بعدنا ما فاتحين وياها موضوع ولا اي احد حاچي وياها لو نص كلمه لان لو حاجيه خلص 

كل شي ينتهي 

عمار //چا منو الي اعترف 

باوعتله وانا انفخ :: اخوك ياسر ابنك ياهادي معترف انو ماخذ ناديه بالتعاون ويه اختها حتى يتخلص منها 

هادي //وانت تصدك 

:: ابنك الي معترف 

عمار //اكيد تحت التهديد والتعذيب 

انا باستهزاء::وهم بالتعذيب گلوله احچي على حنيين

هادي صار يرجف // وهسه سراج ياسر وين 

هزيت راسي ::للاسف حتى انا ما قبلو اواجهه 

عمار //زين عمي وما عرفت ليش هو هيج سووا 

::اي عرفت يگول لان چنت اريد اتزوجها واهلي رافضيين هذا الزواج بعدها قررت اخذها واعقد عليها وفعلا

 طلعت وياي من الكليه واخذتها وهي ترفض تتزوجني سجنتها بمكان وحنين چانت تعرف لان سمعتني احچي 

وياها بعدها اجت وكالتلي راح تفضحني

حاولت ابرد الموضوع بس حنين گالت تروح ناديه تجي الف وحده اتخلص منها وانا الوريثه الوحيده اخذ بيت بيبي 

وانطيك حصتها من بيت ابوي ومن المحل ونتزوج وانا طمعت وقتلتها 

هادي خله ايدي على وجهه وكرم ظل فاتح عيونه وسالني // سراج تحچي صدك 

:: شنو شفتني اتشاقه انا بيا حال 

كرم //. وهسه سراج 

دخنت جگاره وصرت انفخ بالدخان // هسه الضابط راح يحقق وياها واحنه ننتظر لان ما قبل اكون موجود 

اثناء التحقيق 

كرم // كل هذا يطلع من ياسر 

هادي //لا مو منه من هاي الحيه حنين الي عبالنه فقيره ضحكت ع الولد 

عمار //اي ومثل ما امها كتلت عباس وعدمت سلدار هم راح تعدم ياسر 

هادي بخوف // لا شنو ابني برئ 

وگفت ورحت صوب هادي :: ابنك حارك ناديه وهو معترف انو اخذها من الكليه 

كرم وگف على حيله //افه ليش ولك حركت المسكينه 

جاوبته باستهزاء ::ها كرم هسه صارت ناديه مسكينه

كرم بتوتر //شمدريني سراج الكل كالو شارده 

هادي اتقرب عليه وگلي بترجي //وهسه سراج الچاره شنو انت تدري اب ابني ما يسويها 

جاوبته ::والله ياخويه ما ادري انا مثلك بس اذا ثبتت الشغله على ابنك تره يروح بيها 

اهنا هادي انهار ولزمني وصار يتوسلي // سراج ابني انت تعرفه الياسر ما يسوي هيج شي ياسر فقير 

ما يسويها

اتحسرت :: ادري بس هو معترف 

هادي // وشلون يعني الولد ضاع 

::على كيفك هادي خلي نشوف الچاره ويه حنين وشنو كلامها واعترافها 

عمار وگف وگال //الكلبه اله اكتلها واشرب من دمها 

هزيت راسي ::اي على مود واحد اعدام والثاني سجن اذا مو اثنينكم اعدام

كرم اتقرب من عمار وزمخ علي //انجب عمار خلي ......

 قطع الكلام دخول عبد العزيز واجه وگعد وره المكتب وگال //الله بالخير 

الكل رد كرم ساله //استاذ سمعنا من سراج ونريد نسمع منك 

عبد العزيز دخن جگاره بعد ان قدملي وقدم للجماعه الي وياي وگال 

— ما ازيد كلمه على الي گاله استاذ سراج وهسه كملت التحقيق ويه البنيه

كرم// هي وين 

اشر عبد العزيز //انا الخاطر استاذ سراج ما وديتها للزنزانه هي بهاي الغرفه لكن ما گدرت اخذ منها لا حق ولا 

باطل كله ردها ما ادري وما اعرف 

كرم // وهسه 

عبد العزيز //هسه انا الخاطركم گلت اوديها وياكم بعهدة استاذ سراج وباچر هو يجيبها للقاضي لكن هي ما قبلت 

وگالت اخاف من (فتح الملف اليمه وصار يدمدم بكلمات ). اي اخاف من هادي وابنه ومرته يقتلوني فسالتها ترحين 

البيت عمج الثاني (واشر على كرم ) مو حضرتك عمها 

كرم هز راسه // ايي انا ابن عم ابوها 

  عبد العزيز // هي رفضت وگالت اروح ويه كل احد بس ويه هذا عمي ما اروح لان 

اخاف على نفسي

جاوبته ::بس استاذ بنيه وشابه صعبه تبقى اهنا تعرف المجتمع وخصوصا هي ما ثابته عليها التهمه وعمها رجال 

معروف انت اكيد ما تقبلها اله 

:صحيح صدگني استاذ سراج لو وضعي يسمح اخذها البيتي يم زوجتي واخواتي 

:: تسلم ما تقصر 

كرم //اخابر قيس 

:: اي خابره

عبد للعزيز //العفو اذا هذا التخابره اقاربكم فما اوديها ويا لان هي ما قبلت گالت ما اروح ويه اي واحد 

من اقاربنا اتصورو حتى گلت الها ترحين ويه استاذ سراج هيه ما قبلت (احم احم ) وباعتبار احنا مكلفين 

بحمايتها فاذا كان هذا الرجل من اقاربكم لا اتعبون نفسكم 

::: خلي اخابر علي المحامي 

كرم //. توديها ويه علي !

هزيت راسي :: ايي لعد اخليها تبات بالتوقيف

خابرت وفتحت سبيكر رد عليه //. الو ياهلا استاذ سراج 

:: اهلا بيك استاذ علي انت وين 

  - - انا عندي قضيه بغداد بعد يومين ارجع خيير استاذ اكو شي 

   :: لا تسلم عبالي موجود كلت امرلك للمكتب 

  - - تشرفنا عكب باچر يمك 

   هزيت راسي وانا الملم بحلكي :: ان شاالله فيمان الله 

وسديته من علي بعد ان گعدت ع القنفه عبد العزيز گال //انا مضطر اوقفها 

جاوبته بنتر :: لالا انتظرني شويه ( واتصلت برضا فتحت سبيكر ) 

::الو رضا انت وين 

رضا //هلا سراج انا بالفندق 

::رايدك تجي هسه رضا تگدر لو اشوف غيرك 

رضا //جاي سراج ان شالله لگيتو البنيه 

باوعت الكرم وهادي وعضيت على شفتي :: اي لگيناها 

 — زين بالخير جاي انت وين

دليته وكلي مسافة الطريق باوعت العبد العزيز وسالته :: يمته تقدمون اوراقها للقاضي 

عبد العزيز //استاذ خلي يكتمل التحقيق 

عمار //بس احنا من حقنا انشوف ياسر 

عبد العزيز ولا كانه سمع كلام عمار باوع عليه وجاوبني //استاذ سراج انا يجيني امر انفذه اي شي اخر ما اتدخل 

بي وتعرف لو ما حضرتك ما چان بالاساس فهمناكم بالقضيه الحين اكتمال التحقيق

جاوبته ::طبعا انا اشكرك وانت ما قصرت بس لو تدلينه وين ياسر 

 — العفو هذا واجبنا صدگني ما الي علم بمكانه و بس اعرف اي شي اخابرك 

اجه رضا وسلم علينه وانا اشرت الكرم وعمار وطلعنه بالباب ويانه رضا الي فهمته گدامهم وهو گال 

— هذا هو البنيه بامانة الله وامانتي 

كرم گله //وين تاخذها للفندق 

رضا عك حواجبه // مع الاسف عليك ابو مرتضى اخذها للفندق ليش ما عدنا بيوت خويه اخذها يم عمامي 

بحمايتهم على ما يكتمل التحقيق

عمار گال //مجرد ما تاخذها منا الحگم واشرب من دمها 

رضا رد باستهزاء// لا بهاي انت غلطان وليدي (باوع الكرم ) خويه ابو مرتضى علم ابنكم البت عدي وداخله 

على الله وعليه ما اطيها اله تنشال هاي (وآشر على رگبته )

كرم باسف //اعذره ابو علي 

— معذور خويه هذا اوليد بعده زغير وماخذه طيش الشباب 

اجيتهم :: ياالله خلي نكمل الكفاله

دخلنه وعبد العزيز سال رضا عن اسمه الرباعي ولقبه ومحل سكنه وگله

— حجي البنيه بعهدتك تره متهمه بالتحريض فدير بالك اذا شردت انت واستاذ سراج تتحملون المسؤوليه 

عمار شكك بالموضوع وگال //اول مره اشوف متهمه بقتل تطلع كفاله 

عبد العزيز رد //لا هي بعد ما ثابت عليها شي من يثبت ذاك الوكت لو منو ما يجي ما يكفلها وكل هذا الخاطر

استاذ سراج لان گال اقاربي ودوم تصير بالتحقيق لو ترجع الاهلها لو احد يكفلها لكن من تثبت عليها 

التهمه تنحجز يمنا

:: شكرا وما قصرت ويمته ما تريدها ابوعلي يجيبها 

دك الجرس واجه شرطي وعبد العزيز گله //اخذ حجي رضا خلي يوقع بعض الاوراق وبس يكمل رجعه 

يمي عندي شغله ويا 

بقينه گاعدين وانا اسال بالضابط ::مو لازم نشوف ياسر حتى نوكله محامي 

هو رد //بس نكمل تحقيق كل شي يبين وذاك الوكت خلوله محامي تره للعلم شغلته مال محامي ومحامي شاطر

انا اتشكرته وباوعت الجماعتي نروح وگف هادي الي بين علي الانهيار على ابنه وكرم سلم على عبد العزيز بس 

عمار بقى گتله :::ياالله عمار 

عبد العزيز باوع العمار وحچى. // تره اذا عبالك تنتظر الحجي فمن دگيت الجرس وقع الورقه واخذ البنيه 

رديت على عمار بنتر وصوت ناصي ::امشي مو وكت تهور تره البينه مكفينه

رجعنا للبيت وبالطريق فهمتهم اي شي لا يحجون عن الحادثه هادي گال 

— اي لا تحچون افراح تطگ وتموت 

 ما ادري اضحك ما ادري استهزأوصلنا للبيت واتلگتنا افراح وبعيونها الف سؤال دخلنه للصاله ولگيت 

مرتضى وهديل انا اشرت المرتضى جيب ماي 

هو اجه وسلم علينه وافراح تگول // ها شنو وين اخذو حنين وياسر ما كو خبر منه

انا شربت الماي وگتلهم:: انا رايح عندي ولد بلكي يعرفلي طريق ياسر

  كرم // شنو سر ياسر موجود ما سمعته من كال بس يكتمل التحقيق يرادله محامي 

  :: ابو مرتضى هاي دهاليز ودروب محد يعرفها 

عمار //اجي وياك 

::لا ابقى بس اعرف شي اخابركم واذا ما الگى ارجع البغداد احاول مناك بلكي الگى احد يفيدني

هادي //ما النه غير ولد جميل 

جاوبته بعدم اهتمام ::ما يسوون شي 

كرم //كلام سراج صحيح يخافون على مناصبهم 

هادي // كله من هاي العاهر ورطت ابني 

عمار //انا ردت الحگها واكتلها خلاص 

كرم// شنو هالحچي هذا هسه احنه شنعرف خلي ننتظر سراج بلكي يحصل خبر وبعدها الله كريم

:: انا رايح 

هادي //تعبناك ويانه 

:: لاتحچي هيچ هادي احنه اخوان وياسر عزيز عندي ( تعال عمار رايدك ) 

طلعنه انا وعمار باوعتله :: شوف عمار ما اقبل لا احچي گدام ابوك ولا كدام امك ياسر معترف 

هو الي خاطف ناديه وراد يتزوجها بالسر ويخلي اهلك امام الامر الواقع لكن هيه ما قابله فما متحمل 

قافل عليها باب الكرفان وحاركها بس اني عندي شك باتهامه الحنين المهم هذا الكلام ما اريد امك تسمعه 

او تعرف بي تره ما تتحمل انت تشوفلك محامي شاطر حتى نروح ونوكله قضية اخوك

عمار // ان شاالله 

:: هسه من يسالوك گللهم عمي سراج انطاني عنوان ولد ممكن يفيدنا بقضية ياسر وراح يسالوك ها شفته 

بعد انت من يمك احجي وخلي گلبهم يبزد خطيه كلش متاثر عليهم الله يساعدهم وهذا ياسر ما اعرف ليش 

هالشكل سوا شنو السبب 

المهم عمي عمار مثل ما وصيتك تشوفلك محامي زين وتنتظر مني تلفون

تقريبا الساعه 12 وصلت للفندق وهناك شفت رضا سالته على حنين گال// بالغرفه الثانيه واخذت الها عشا 

رحت دگيت الباب وگتلها ::افتحي الباب بابا انا سراج 

هي فتحته وهي متفاجئه اتقربت يمها وگعدت ع الچربايه وهي تسالني 

:عمو سراج شكو ليش اخذوني الشرطه وطلعني عمي رضا وجابني اهنا 

ابتسمت وحاچيتها //انا طلعتچ حتى ما ترجعين البيت هادي

هي غورگن عيونها //عمو سراج اختي وين 

هزيت راسي ::موجوده بس لازم نعرف الحقيقه باعيلي حنين انا سويت كل هذا الشي بس حتى احميج 

وحتى اطلع براءة ناديه وحقها الي اريده منج ولا لحظه تشكين بيه 

حنين //يعني عمو انت لگيت ناديه 

  حكيت خدي ولملمت حلكي :: تگدرين تگولين عرفت طريقها بس الباقي عليه اعرف منو الي 

خطفها واذاج واذاها

هي بچت بحرگه جاوبتها ::لا تبچيين بابا كل شي راح يكون تمام لا تخافيين 

هي ردت //عمو ما اريد ارجع البيت هادي 

ابتسمت بوجهها :: ما ترجعين اخذيها كلمه ما ترجعيين اصلا انسي شي اسمه بيت هادي وهسه ياالله بابا 

نامي وارتاحي وباچر هم راح تبقيين اهنا والعصر نروح 

حنين //عمو نروح الناديه 

هزيت. اسي :: لا بابا بس اوعدج اوعدج عن قريب راح نروح سووا الناديه 

— گول وروح منيره وعباس 

نفخت واتحسرت :: وروح منيره وعباس بس الي اريده منج لا تبچيين 

هي مسحت دموعها بايدها وهزت راسها من ردت اطلع هي گالت 

 — سراج انت القاعده الي لازمني انا واختي لا تهدنا تره نضيع 

اول مره احس بكلام حنين كلام انسانه ناضجه انسانه كبرها الوكت خمسين سنه مقهوره وبنفس الوكت خايفه 

درت عليها وابتسمت وهزيت راسي 

رجعت للغرفه لگيت رضا متمدد وانا گعدت على چربايتي اتصلت بهادي

::الو ابو ياسر 

— ها سراج بشر 

::ان شاء الله خير باچر الصبح يمك خبر على ياسر 

هادي بفرح //صدك تحچي سراج 

::اي وداعتك شنو اچذب عليك باچر الصبح اروح ع الولد ومناك انا اجيكم 

هادي //ما اعرف شلون اشكرك سراج

::ما بيناتنا احنه اخوان المهم نتلاحگه 

:اي والله انا مستعد الكل شي بس ابني ما يضيع مني من وره بت مياده 

   ابدي ارگعه بالكاع على گولة اهل الجنوب بس گوه لزمت نفسي :: ياالله انا ارتاح شويه والصبح انتظر مني تلفون 

    هادي // ان شاء الله اگلك سراج ما تجي تبات يمنا 

:: عندي شغل هادي رايح ويه جماعه اشوف شنو ممكن نسوي تصبح على خير 

— وانت من اهل الخير طال عمرك ما قصرت

الي خلاني متعجب انو الكل محد سأل على حنين كل همهم ياسر وحتى اتناسو موضوع اختفاء ناديه 

وعرفت السبب 

لان غياب الاب والام جعلهن يكونن غريبات ابين اهلهن الدرجه انو ما همهم موت بنيه شابه محروكه 

وتناسو التهمه الي اتوجهت الحنين صار كل همهم يتلاحگون ياسر قبل فوات الاوان 

/////////...//////

شكرا لزيارتكم عالم روايات سكيرهوم