رواية جذبني فمك البني الفصل الثاني والخمسون 52 بقلم عبير إدريس

يا _وتيني🤎

عليكِ ان تخبريني ؟؟؟

ماذا يخبأ هذا الفستان ؟؟؟ 

اعدك سأكون وقحاً في الاستكشاف🙈

فانا بكل بساطه شخص فاقد للذكره😍

عندما يشتعل القلب بلهيب حبك النازي

كنت دوما معك مؤدب لكن ارجوكِ لا تطلبي المزيد 

سوف استخدم معك مصطلح الرجال قوامون على النساء ...

سوف انفق عليكِ الكثير من الحب والاهتمام

سوف اغرقك بعبارات الغزل 

سأقدم لكِ الحمايه والامان

سأحتضنك بكل ما اوتيت من قوه 

فأنتي ابنتي الكبيرة المدللة

خاطرة بقلم

عبير ادريس..

________

همس بأذني كلمات اقشعر بدني...

ادهم : يقال اقرب طريق لقلب الرجل معدته

اما انه اقرب طريق لقلبي شفتيكِ بروجها البني .. 

رفعت راسي باوعتله اول مره نتقرب بهيج قرب ابتسمت 

دنك راسه طبع قبله رقيقة بصف شفتي ... 

سيلين : شو انت هواي اطول مني مجنت اشوفك هيج . 

ادهم : من نتقرب تتوضح الصوره اكثر ههههه. 

سيلين : شلون يعني .. 

كلتها ولفيت ايدي حول عنقه.. 

باس ايدي ورجع حجه.. 

ادهم : يعني من ندخل للصوره راح نستكشف كلشي بيها مو مثل من نباوع عليها من بعيد. 

سيلين : ههههه بسمار هذا ادهم. 

ضحك من كل كلبه. 

سيلين : انت شنو متنسى شي ؟؟ 

ادهم : ما انسى حجايتج كلتي من ابتعد عن الصوره يلا اشوف مساوئها وانه اريد اشوفج شنو هاي الصوره وشكد تحمل بيها معاني وشكد كاتمه مشاعر اذا شافت قلمج يرسم عليها راح تتفجر عليج المشاعر البداخلها.. 

سيلين : ممممممم.. 

نرمان : ادهم ماصارت هاي صدك جذب.. 

محاوطني بيده وجاوبها بدون ميباوعلها جان مركز بعيني ويحجي همس كلمه كلمه.. 

ادهم : انه هم مجاي اعرف هذا الصار صدك جذب حلم علم ماعرف... 

لهناك وسمعنه هووووسه ، صوت زلم عالي طفو الديجي ونسمع صوت يصيحون لك لاااااا فهد لااااااا شكو مندري ادهم باسني من كصتي وكال.. 

ادهم : انتظري اشوف شكو واجي لتبدلين ماشي ولتطلعين بره.. 

سيلين : ماشي.. 

عافني وطلع يركض والبنات هم طلعو وراه واني رجعت كعدت مو مال اطلع بنصهم واعرف ادهم ماراح يقبل لهذا كعدت.. 

مشهد المشكله منقول من ايمن.   

واكفين كلنا وسوالف وضحك لهناك طبكت سياره صعب ابن عمي هاشم ونزل من السياره سمعت الولد سلمو عليه ونذكر اسمه التفتت على فهد وشفته شلون النار طلعت من عينه كام فهد مثل الاسد الجريح وركض على صعب يريد يضربه .... 

صعب اسمه الحركي هذا لان كلش وكح وصاحب عركات معروف بمحافظتنه وهمه اطلقو عليه هذا اللقب لان وكحاته بجساره من هو وصغير الجهال يخافون منه ، اسمه الحقيقي هجان....

ركض عليه فهد صارت مجادله قويه بينهم انتهت بضرب هجان لفهد بالاخمس على راسه ، فهد وين يسكت وين يصرفله واحد يضربه طلع سلاحه سحب اقسام جتفوه الولد الموجودين وضل يصيح الى ان طلع ادهم ... صاح عليهم

ادهم : هاي شكو شصاير ؟؟ 

هجان: ماصار شي تجاوز وعلمته الأدب.. 

فهد : لك يا ادب تعلمني عليه ليش انت منيلك ادب نسيت مكاسيرك.. 

ضحك هجان مستهزء.. 

هجان : مكاسيري لازم نسيت ماضيك الاسود. 

ادهم : هاي شنو صعب فهد ماكو احترام اليه وانه واكف يعني تشوفون الوضع مال مشكله. 

فهد : ليش عزمته اذا ماجنت تريد مشاكل.. 

ادهم : عزمته لان ابن عمي وصديقي وتعرف كلش زين ماعندي خلاف وياهم.. 

فهد : اي طبعا ماعندك خلاف قابل حرموك من ابنك. 

ايمن : كافي فهد لخاطر الله اسكت واتجفى الشر.. 

فهد : يرجعولي سلاحي واروح ماعندي شي وياهم. 

ضيغم : عوف سلاحك يمي بعدين انطياك.. 

عاط فهد بصوت عالي.. 

فهد : ضيغممممم انطيني سلاحي كتلك... 

ضيغم : انطياك بشرط نفوت جوه.. 

كام يتمالخ ويه الولد لازميه اربعه تعبهم كلش ، اخر شي ادهم حجه ويه صعب علمود يهدأ الوضع. 

ادهم : حبيبي امسحها بيه اي اساءه بدرت من فهد.. 

رجع التفت على فهد خزره وكال. 

ادهم : فهد اكيد ما يقصد وراح تنحل المشكله متأكد..

فهد نتر ايده منهم وراح فات للبيت عرفته ميسكت ويضمها بكلبه كلت الله يستر.. 

سيلين 

ماعرف شنو الصار بس اسمع هوسه دخل فهد للبيت يغلي ويتوعد صعد فوك ولحكته ايفين.. 

دخل ادهم للأستقبال سد الباب واجه كعد بصفي .. 

ايده حاوطت كتفي ودفن راسه برقبتي ... 

ادهم : شنو هذا العبق .. 

سيلين : شنو.. 

ادهم : عبق الورد .. 

سكتت وهو يهمسلي همسات دافيه.. 

ادهم : شنو من بشره ترفه عندج 

ماكدرت اتقبل الوضع ولا كدرت احسسه اني تأثرت ماعرف شنو صار بيه حسيت جسمي تصلب واطراف رجلي رجفت تفاجئ من تصرفي ماعرف يمكن حسسته بهذا الشي بس سكت محجه ... 

وره شويه حضني وهمس بأذني.. 

ادهم : اي افكار غريبه وسيئه انفضيها من بالج وعانقيني. 

رفعت عيني باوعت بعيونه الذايبه حب.. 

سيلين : انت تعرف كلش زين بشنو مريت وشنو صار بيه لهذا اصبر عليه .. 

ادهم : اصبر شعندي اهم شي انتي يمي كلشي ماريد.. 

سيلين : اقاربك راحو.. 

ادهم : لا موجودين

سيلين : شو هدوء. 

ادهم : بره بالحديقه كاعدين يم هجان.. 

سيلين : هجان منو ؟

ادهم : ابن عمي هاشم 

سيلين : اخو روايه مو ؟ 

ادهم : اي اخوها. 

سيلين : وليش تعارك ويه فهد ؟ 

ادهم : بدون سبب مجرد شافه صار عصبي تجاوز عليه وصار غلط وهجان متحمل ضربه. 

سيلين : شدعوه ليش هيج. 

ادهم : هاي بعد هسه معليه يابه اريد افهم شغله. 

سيلين : شنو ؟؟ 

ادهم : هذا اللون تره ماكلج اكل.. 

سيلين : الفستان ؟ 

كام يعدد ويهمس.. 

ادهم : الفستان وصاحب الفستان وتحت الفستان. 

سيلين : هاا ادهم. 

عيونه على شفتي بعدين رفع عينه باوعلي. 

ادهم : خو الشفه طيرت عقلي والله حرام عليج صارلي سنين مؤدب.. 

سيلين : مشكلتك والله اصبر.. 

بدون ميجاوبني سحبني لحضنه وقفل ايده عليه كمت احس بنبضات قلبه تدك سريع وهو هادئ حركاته ورزانته من بعيد مسيطر بس لان راسي على قلبه سمعت دكاته المخربطه... 

ارتفعت ايده لشعري وتوغلت اصابعه بين خصلات المقدمه لان جنت مسويه تسريحه مفتوحه ، اخذ ايدي وخلاها على ركبته ارتبكت والاحساس عندي صار مضطرب اطرافي ارتخت وانهارت قواي همس همسات ذوبني بيها. 

ادهم : كأن بين احضاني حوريه من حواري الجنه عندي رغبه في تقبيلها بكل نشوه ماعرف تسمحين او لا مره وحده نعتبرها تجربه. 

رافعت راسي وهمست. 

سيلين : غمض. 

ادهم : ليش ؟ 

سيلين : غمض ومعليك. 

ادهم : غمضت .. 

غمض وبسته بخده قريب شفايفه تنفس بهدوء و انفاسه جانت حاره تعكس دواخله ابتعد وتركني حسيته يريد يسيطر على الوضع ...

همس بصوت بيه بحه.. 

ادهم : انتي تجين يم النار وتكولين سيطر ... 

سيلين : انت طلبت. 

ادهم : وانتي ماخليتيني..

سيلين: هسه موزين تره كلش كريمه وياك اني. 

ادهم : عمي هاهيه عاشت ايدج .. 

سيلين : تريد شي لو اصعد ابدل ....

تقرب يمي ولزم ايدي. 

ادهم : قبل يكولون اذا تريد حياتك تصير حلوه من ترتبط اكل شي حلو سامعه لو لا. 

سيلين : اي سامعه. 

ادهم : ها زين لعد لازم ناكل شي حلو قبل لا تصعدين. 

سيلين : مثليش . 

دار وجها باوع على المكان البيه علبه الجكليت سحب وحده فتحها وقسمها بالنص وحده خلاها بحلكي والثانيه قدمها اليه اخذتها .. 

ادهم : يلا وكليني.. 

سيلين : ممممم .. 

خليتها بحلكه لزم ايدي باسها وبعدين باس اصبع اصبع.. 

ادهم : احب ايدج واحب ترافتها بس لتخلين صبغ اضافر .. 

سيلين : ليش مو حلو 

ادهم : صح حلو على ايدج بس نفسي متحبه. 

سيلين : خلص ما اخلي بعد. 

ادهم : يلا روحي بدلي كافي ههههه. 

سيلين : ماشي .. 

مشيت حتى اروح جرني من ايدي رجع حضني للمره العاشره ضحكت. 

سيلين : شلون يعني ماروح 

ادهم : والله مادري ماودي ترحين. 

سيلين : هسه اروح لو ابقه. 

ادهم : يلا روحي. 

سيلين : زين عوفني اريد افوت. 

ادهم : يلا روحي هههه.

طلعت من يمه ورحت لغرفتي بدلت .. 

تمت خطوبتنه رسميآ بحضور المقربين والحمدلله ماصار شي موزين ، لكن الصار وعكر صفو ايامنه فهد ومشكلته ويه هجان زادت ماقلت يوميه تهديدات ويصيح يريد يروح يرجعله الضربه.. 

معروف بفهد حسب ما سمعت عنه وحجولي اذا سحب الطلقه متبات بمسدسه يعني اليدوسله على طرف او يحس بأهانه منه يضربه طلقه برجله لهذا الكل كتفه واخذو السلاح منه بس وين يسكت ، ضل يهدد وناس تدخلت وصارت مشكله كلش جبيره حضرو عمامهم واولاد العمام وصارت كعده بس هجان ماحضر بيها.. 

وهاي تفاصيل الكعده.. 

هاشم : فهد انت ابني مثلك مثل هجان وتعرف كلش زين سبب المشكله الصارت انت السبب الاكبر البيها بنتي مارادت تستمر وياك يعني غصب تغصبها عليك تره ميصير وانه قاطعت اخوي بسببك لان يدافعلك دائما وكلمن كعد بمكانه ليش يوميه تسوي مشكله وترجع تعيد وتزيد بالكلام افهم روايه متريد ترجعلك وهجان ما اله دخل بمشاكلكم.. 

فهد : مو مشكله بنتك انه هم ماريدها اريد ابني رجعوه .. 

هاشم : انت خسرتهم بسبب تصرفاتك كم مره كتلك عدل من نفسك وبطل سوالفك العوج ماسمعت وهاي نتيجه افعالك. 

فهد : عمي بنتك لو تصعد للسمى اجيبها سحل وارجع ابني واحرمها منه مثل ما حرمتني صار سنوات وكول كال فهد وابنك وين ما اشوفه اعوقه وعود تعال توسل. 

هاشم: يعني انه جيت حتى انهي الخلاف لو نزيده. 

فهد : ماعندي حجي وياك الحجي ويه ابنك والثار من بنتك انت اطلع منها. 

هاشم : شنو احنه مو بعينك انت متستحي.. 

حجايه منا حجايه منا كبت عركه وما وصلنه لحل.. 

وره يومين سمعنه فهد رايح للمنطقه الساكنين بيها بيت عمه ومراقب البيت الجوارين يعرفوه على خلاف وياهم لان بيت عم ادهم واهله بنفس الفرع لهذا مبلغين ابوهم بوجود فهد ، امهم بدون محد يدري طالعه لفهد وحاجيه وياه متوسله بيه ، سمعت يكولون واكعتله دخيل دم يلا راجع للبيت... 

ثاني يوم هم صارت كعده حضرو بيها اولا العمام والاصدقاء المقربين علمود يحلون هذا الخلاف ... 

من بعد كلام هوواي ومشاحنات فهد كال . 

فهد : يعتذر مني كدام الكل يلا اسامحه.

وفعلا جابو هجان واعتذر بنص الكعده من فهد لان هو الضربه اول ، فهد شال السلاح مال هجان الضربه بيه وشمره بالكاع وداس عليه ، هذا الفعل معناه اهانه للشخص الحامل هذا السلاح... 

وراها فهد نزل فديو مسجل بيه الصار واخر شي وجه كلامه لابن عمه كايل بيه انت بزود النسوان فلتت مني وعفيت عنك.. 

وبهيج انتهت هاي المشكله.. وانطوت الصفحه وهاي حادثه من خبالات فهد.. 

نرمان.. 

بمهر سيلين ادهم عزم الدكاتره اصدقاءه ويانه بالجامعه وبيومها واحد من الدكاتره حاجي ويه ادهم عليه بنهايه الحفله واجه فاتحني بالموضوع.. 

ادهم : كاعده ؟ 

ابتسمت وكتله. 

نرمان : اي تعال 

ادهم : اريد احجي وياج بموضوع. 

نرمان : كول اسمعك. 

ادهم : تعرفين دكتور مسلم ؟ 

نرمان : ابو الجغرافيه. 

ادهم : اي 

نرمان : شبيه ؟ 

ادهم : طلبج مني. 

نرمان : يعني شنو 

ادهم : خطبج شبيج. 

دنكت راسي وهمست. 

نرمان : انت تعرف جربت حضي مره وحده وما تهنيت ماريد اكررها مره ثانيه. 

ادهم : وليش يانرمان تره المات ميرجع وانه كدامج شكد انقهرت وتأذيت على ياسه الله يرحمها بس الحياه لازم تستمر برضاتنه او غصب عنه..

نرمان : صح كلامك بس حب المرأة يختلف عن الرجل المرأه ماتكدر تنسى التحبه بسهوله ...

ادهم : حقج بس فكري انطي مجال لنفسج لتجاوبين هسه. 

نرمان : سدها الله يخليك ماريد والله 

ادهم : فكري الج يومين ورجعيلي خبر. 

نرمان : اعرف قراري ما راح يتغير بس مع هذا افكر لخاطرك. 

ادهم : انتظر ويارب جواب يفرحني. 

نرمان : ههههه ماشي يا عريسنه. 

ادهم : ياعريس من يوم المهر ماشفتها حتى على الاكل متكعد هاي متجوع...

نرمان : لا تره تاكل بس من انت طالع هههه. 

ادهم : ماعرف ليش هيج كاعد تسوي بيوم المهر حسيتها فرحانه كلش وحتى تجاوبت ويايه ليش هسه ابتعدت مادري. 

نرمان : انطيها فرصه ادهم ميخالف شويه شويه تتعود عليك اهم صارت الك. 

ادهم : اول مره احير بمقابيلي وماعرف شلون اتصرف وياه اخاف اتقرب وتنفر مني واذا ابتعدت راح تكبر الفجوه وحاير .. 

نرمان : الله كريم اهم شي لتستعجل ولا تندفع..

الفصل الثالث والخمسون من هنا 

شكرا لزيارتكم عالم روايات سكيرهوم