رواية ناديه الفصل الرابع والخمسون 54 بقلم انين الليل

سراج 

نمت بالفندق وگعدت الصبح على صوت رضا وهو يغني ابوذيه انا اتثاوبت وگتله 

:: رضا الناس الصبح تگول يا فتاح ياعليم وانت تغني بابوذيات داخل حسن ورياض احمد 

رضا // ههههه الصبح يعني الفجر الناس تذكر الله تصلي هسه بثمانيه وانت ما گاعد

فزيت من فراشي ورحت اتوضيت وصليت قضا وسالته 

:: هم شفت حنين 

هز راسه // اي توني وديتلها ريوك وانت ياالله اگعد اتريك 

بسرعه شربت چاي واكلت لگمة صمونه وبدلت وانا طالع گلت الرضا:: انتظرني لا تطلع الاي مكان 

رضا //ها وليش شنو خايف بالمثل

::مو خايف بس يجوزهذا عمار شاك بشي او يجوز يراقبني من طلعت وعرف مكان الفندق 

رضا بنتر //ايخسا هو وابو وعمه والله اهنا امدهم تلاثتهم وما يرفلي جفن 

باوعتله وانا ابتسم گتله :: اي عمي مشهودلك مو مديتلك رفيق طول بعرض بذاك الزمن 

رضا جر نفس //لا والله سراج مكسور خاطري على البنيات

اتقربت وگتله وانا اعض بشفتي ::تدري ليش مكسور خاطرك لان انت عانيت الظلم فتحس بالمظلوم 

لكن هم سمعت بعمرك ظالم يحن على مظلوم 

رضا //وهسه سراج شناوي تسوي

نفخت وگتله :: الي خطف ناديه واعتدى عليها باعتبار اعتدى عليه وانا الي يدوسلي على طرف ما افوتها اله 

رضا // ادري بيك والله يساعد گلبك بس هم اريد اعرف شتسوي

اتقربت منه ::انتقم منهم واحد واحد وبعدين (اهنا جريت نفس عميق ) اكتل ناديه 

رضا اتقرب يمي وابتسم ابتسامة تحدي // غير اذا اخليك تفوت عليها 

باوعتله مستغرب ::تكتلني مثلا رضا 

هز راسه وابتسم // اي وداعتك اكتلك وعينك تشوف 

::صدك ابو علي ؟

رضا // اگلك وداعتك وداعة الخوه الي جمعتنا ناديه اذا تطلع عليها بكد الشعره شي مو زين وداعتك 

انا الي اكتلها لكن هي ما الها دخل مسكينه الدنيا لعبت بيهن طوطه حيه

دنگت وحاولت اخفي دمعه ::بس انا انطعنت رضا 

رضا//ادري وانت بايدك اتجازى ويه الي طعنك بس مو ويه ناديه 

جريت نفس :: تعرف شنو ناديه بالنسبه الي ( غرگت عيوني دمع وما سيطرت على نفسي رضا لزمني حضني وگال )

—ابچي سراج ابچي مو على شي ابچي على روحك انت اذا كتلت ناديه صدگني تكتل روحك دقيقه ما تعيش وراها 

باوعتله هو گال //لا تگلي طلگت سجى چي ما سوتلك اعتبار ولا تگلي ما عرست الهسه ما لاگي بت الحلال

 لا ياخوي هاي سولفها على خالك مو على رضا انت تحب ناديه وحبك شي فريد من نوعه مثل عشگي السكنه

ما جاوبته لان ما عندي كلام اگوله مشيت هو گلي //ها شو سكتت 

وصلت للباب باوعتله ::دير بالك على حنين 

:حنين بامانة الله وكفالتي 

:: رضا تبقى اهنا 

هز راسه // : اي وين اروح مو رضا الي يشرد دخيله 

رديت علي وگتله:: ادري بيك سبع ومن ظهر رجال

— وانت رجال وسبع وهذا الگلب الي عشگ وظل يباوع ويداري لا يمكن يكره

هزيت راسي طلعت وركبت سيارتي بالطريق ظليت اردد كلام رضا اليه 

انت تحب ناديه وحبك شي فريد من نوعه 

خابرت قيس وسلمت علي وگتله :: اشلونك ابو احمد اريدك تروح البيت هادي 

قيس //خيير سراج 

:: ما اعرف بس بلكي نحصل على خبر او يردون كفييل اريدك موجود حتى لو عندك شغل 

قيس // تحچي صدك يا شغل هذا هسه حالا اروح

:: بس قيس الحچي ابيناتنا انا هسه الولد خابرني وگلي ضروري تجي لان اكو خبر على ياسر 

قيس // راح اروح واخذ ام احمد وياي بس الله عليك سراج ياسر بي شي 

:: لا وروحه الابوي ما بي بس الخير لكن انا اريدك تكون موجود لان هادي ابد ولا يعرف يتصرف لاهو 

ولا عمار خو كرم بس يعيط ويتهدد 

قيس //اعذرهم سراج الله يساعدهم الصار مو قليل 

جريت نفس وگلت ::لا والله مو قليل

سديته من قيس ورحت الياسر بالسجن ولان طلبت منهم يخلونه بغرفه ابحده دخلت وفتحت جهاز تسجيل وشفته 

چان گاعد بالگاع هو بس شافني رجع دنك اتقربت منه وگابلته وسالته :: ليش كتلتها 

هو باوعلي ورجع دنك زمخت علي 

::احچي ليش كتلتها

هو بقى ساكت وگفت دخنت جگاره ::زين انت مو تحبها ليش تسمعهم يتهمونها بشرفها وتبقى ساكت ناس تگول 

انهزمت ويه واحد وناس تگول الله يعلم بيا ملهى ترگص وناس تگول اي مثل امها مصاحبه الرجال وتجيبه

البيت زوجها وعلى فراشه

تدري بسكوتك حتى انا قشمرت عليه لان عبالي الحزن الي مبين على وجهك لان فقدت عرضك ما ادري 

هذا كله لان انت خاطفها وكاتلها

هو باوعلي وگال بتعب // لا انا ما كاتلها

:: بس خطفتها 

هز راسه //لا ما خطفتها 

رجعت يمه گعدت وصرت ادخن حچيت :: السكوت ما يفيدك بشي كل الادله ضدك انت خطفتها وردت تعتدي عليها 

ومن قاومتك حرگتها ليش ياسر هي مو عرضك 

باوعلي والكسره والتعب مبينات على وجهه بس مو مثل كسرة وتعب گلبي جاوبني وگال 

— عمي سراج اكو واحد يكتل روحه ناديه روحي صدگني ما حرگتها

غمضت عيوني وجريت نفس :: لعد منو الي حرگها اذا مو انت 

هز راسه //ما اعرف انا دزيتلها رساله وهي طلعت واخذتها المزرعة ابو صديقي حاولت اقنعها انو 

نعقد حتى اخلي اهلي امام الامر الواقع لكن هي ما وافقت لذلك قررت اروح اجيب الشيخ والشهود واعقد عليها 

   استغربت :: يعني انت اخذتها حتى تعقد عليها بالغصب 

هو ما جاوبني رديت سالته :: گلي ليش كتلتها لان ما قبلت بيك

هو غطه وجهه بادي اثنينهن وصار يبچي ويشهك حييل انا استغليت هذا الشي وگتله

:: هسه اتندمت لو خايف من حبل المشنقه 

هو بصوت مكسور // علوا هسه تنشقوني اقلها ارتاح 

::منين ترتاح 

:من تانيب الضمير 

::اذا هيج عندك ضمير ليش قتلتها

—. صدكني ما كتلتها ولا دزيت احد يكتلها اكو واحد يكتل نفسه يكتل روحه ناديه هي روحي من الدنيا صدگني 

عمي ما كتلتها 

::ها لعد منو الي خطفها واخذها للمزرعه وقفل عليها الكرفان وبعدين حرگها 

صار يحچي وهو ينحب // عمي صحيح انا اخذتها للكرفان ايي بس تركتها ورحت اجيب الشيخ الي صار من 

رحت گلت اخليها شويه تفكر وامر بالبيت اسبح واغير ملابسي واطلع اروح اخذ الشيخ والشهود واعقد واجيبها 

واخلي اهلي امام الامر الواقع لكن ......

:: لكن شنو احچي 

ياسر //دخلت للبيت وسبحت وانا جاي ابدل خابرني سجاد 

::منو هذا سجاد 

 — صديقي ابن صاحب المزرعه گلي ياسر انت وين الكرفان احترك ولان المزرعه ما چان بيها احد فالفلاح 

الي بالمزرعه اليمهم مخابرهم وهمه جايين لاكيين الكرفان صاير رماد انا ما اعرف شنو اسوي رحت اركض 

وركبت السياره ورحت للكرفان لگيته بس انقاض

جاوبته بعصبيه :: ايا ما تخاف من الله وما حچيت البنيه محترگه وهي بي وانت ما حچيت وخليت ابوك 

وكرم وامك يجيبون ويحچون بت مياده وشردت ويه واحد وتكول طالعه ويه ابن عمي ايا نذل شسويت ولك 

ياسر //هو الي صار كله من امي

::شلون باالله 

 - - - هي ما قبلت اتزوج ناديه اتوسلت بيها لكن هي ما قبلت ...

::عاد انت گلت اخطفها والي يصير يصير

ياسر هز راسه // لا مو هيچ ردت اعقد عليها واخلي اهلي امام الامر الواقع لكن ...

::لكن شنو 

ياسر // ما اعرف شلون الكرفان احترك ياريتني ما عفته ولا قفلت عليها تدري عمي انا الليل كله ما انام بس 

تغمض عيني اتخايلها وهي تدك بالباب والنار هاجمه عليها وهي تستنجد بيه هم تدري اكثر من مره ردت اكتل 

نفسي بس انا جبان 

جاوبته :: ياريت كاتل نفسك وياريت معترف ومبيض صفحتها گدام اهلك تدري انت شسويت شگد حطمت گلوب 

وحرگت احلام ولك انت اكبر جبان وغيره ما عندك

ياسر // صحيح شتكول صحيح انا اكبر جبان 

::اريد اسالك لو ناديه باقيه عدله وتعرف الي سويته وسكوتك بتصورك شنو تكون نظرتها الك شلون راح تشوفك 

 شلون راح تشوف ابن عمها الي على اساس يحبها ويريد يحارب الدنيا على مودها جاوبني 

بقى ساكت ما جاوب گتله :: انا اجاوبك راح تشوفك زغير وزغيز كلش راح تشوفك جبان حسبي الله عليك 

ما تخاف من الله وما فكرت بالعواقب

طلعت وقبل لا افتح الباب سالته 

::ياسر ما طول كل شي بين اريد اسالك وين نقال ناديه 

هو باوعلي باستغراب :: لان اعرف ما دام اخذتها للكرفان وهيه ما قبلت تتزوجك وبيتت النيه تكتلها او 

تاخذها بالغصب اكيد ما راح يفوتك تاخذ نقالها 

  اتنفس بعمق وگلي //موجود بغرفتي 

::اي يعني وين 

:اكو تحفيه على شكل بيت فوك الميز بيها باب ومفتاحها بالجراره

هزيت راسي ورحت بوجهي البيت هادي بعد ان خابرت كرم قبل ما اوصل بشويه وگتله // اسبقني لهناك 

كرم // خيير سراج 

جاوبته بعصبيه :: رووح گدامي شكد تسال

طلعت البيت هادي وانا حامل حقد وكره وانتقام الهذا البيت الي عذب وقهر وظلم واخير شي طعن بشرف البنيه 

ضيعوها الله لا يوفقهم

صرت احچي واضرب على الستيرن ::ياويلك ياهادي اذا انت ومرتك الكم يد بالي صار هالمره اخلي ناديه هي 

القاضي وهي الجلاد وما اخليها ترحم احد

وصلت تقريبا انا وكرم ومرتضى هو وزوجته هديل جايين ولگيت قيس وشمس انا سلمت عليهم والكل مترقب 

افراح مبين عليها كاتله روحها من البچي قيس گلي //سراج صدك الي سمعته معقوله حنين هيج تسوي 

هادي //اي ليش مستغرب وتسوي اكثر ما طول الكل يصيح خطيه يتيمات هسه خوش انوب بلت الولد 

   افراح // مثل امها هجمت بيوت لابو بيوت اهلها وبيت صاحبها وبيت عباس وهسه حنين راح تهجم بيتي

شمس// تره ياجماعه ما اصدك حنين مستحيل شنو هالفقيره 

ابتهاج //اي احبيبه خوفج من الفقيره 

عمار // ماطوول ماكو اي دليل على ياسر ما علي يطلع انتو لا تخافون 

كرم // واعترافه هو وحنين 

عمار // عادي يگول بسبب التعذيب اعترفت 

افراح //. اي الساقطه بت الساقطه ذبتها براس ابني كله من هادي لاهو كتلهن وطم عارهن ولا وداهن 

الخوالهن لو الدار الايتام وافتكينه منهن

كرم باوعلي //. على كيفج ام ياسر خلي نفتهم ها سراج شصار غير تفهمنا 

باوعت الهادي وقيس وكرم وخزرت مرتضى وباوعتله باحتقار بعدها گتلهم :: تعالوا وياي 

 وگفت والكل مذهول صعدت الدرج وهادي يگلي //سراج شصاير 

وصلت للطابق الثاني سالتهم ::وين غرفة ياسر 

هادي اشرلي عليها وهو يگول //غير اتفهمنا سراج شكو

باوعت وراي صعدت افراح وشمس گلت الهادي //افتحها 

فتحها ودخلنه كلنه سووا شفتها مرتبه چان اكو كرسي گعدت وشعلت چكاره وجهت كلامي القيس 

:: ابو احمد التحفيه هذيج (واشرت )بلا زحمه جيبها 

راح قيس وشالها گتله //مفتاحها بالجراره

فتح قيس الجراره وطلع المفتاح اشرتله افتحها وسط ذهول كل الموجودين فتح باب التحفيه چانت كلش حلوه ومبين

 عليها غاليه وهنا چانت المفاجأه للكل طلع قيس النقال انا اخذته ونزلت وهمه نزلوا وراي كرم گال 

— شنو سراج غير تفهمنا 

طلعت نقال ياسر وفتت ع الرسايل وگتله ::ابو احمد اتفضل اقرا وياريت تقرا التاريخ 

قيس قرا وگال //افه مع الاسف

اجه هادي واخذ النقال وكرم ويا باوعت الهم گتله :: هادي راوي الامه خلي تشوف 

اخذته شمس وقرت وانطته الافراح الي گالت //ايي كله من حنين هي قشمرت ابني 

قيس دار عليها وگلها وهو رافع اصبعه على حلگه //اسسس ولا كلمه گبل ناديه هسه حنين وانتي او اولادچ ساده 

افراح //ايي اساله الهذا (وتاشر عليه )اساله مو هو بايده اخذ حنين لان مقشمره على ياسر يكتل ناديه بس ياسر ابد 

ما كاتلها انا متاكده

باوعت الها :: شلون متاكده 

افراح //اعرفه ابني مو مال كتل 

::: بس مال خطف 

اتقرب هادي وگال //غير تفهمنا 

كرم //ياجماعه اهدوا شويه وخلي نفتهم 

گعدت وشعلت جگاره ثانيه وخليت الجهاز ع الشحن وطلعت التسجيل 

:: اتسمعونه للتسجيل وانتم تحكمون لان حنين اشتكت واتهمت ابنكم بان خاطف ناديه وكاتلها اقصد حارگها

وسمعته الهم الكل اتفاجا بلي سمعه

هادي انهار على ابنه وكرم صاريتنفس قوي وهو عاض على شفته وقيس يباوع وهو يهز برجله 

عمار گال //هذا اعترافه تحت التهديد 

جاوبته باستهزاء ::اي صحيح ياحضرة المحامي بس مو تحت التهديد كاتبلها الرساله وهي كاتبه الصديقتها رايحه 

ويه ابن عمي لا ومو بس هيج انتم نفسكم تگولون البنيه راوتكم المسج استاذ عمار اخوك اعترف وانتهى الامر 

عمار// هو وينه الكرفان 

:: ها شقصدك

عمار //قصدي اصحاب الكرفان انطو خبر للشرطه انو اكو شخص داخل بي وحارگه لو بالاساس اكو بي جثه 

جاوبته :: لا لان ما يعرفون اخوك خاطف بت عمه فما يدرون

  عمار // خلص هذا هو هيه طلعت ويه ابن عمها عزمها على فنجان گهوه وبعدها استاذنته تمر بالسوك 

   وراحت وبعد ما رجعت

   باوعتله وحاچيته باستهزاء :: يعني افهم من كلامك نسكت 

هادي رد وكانما اجا الفرج // اي سراج نسكت 

عمار // ياسر حسب كلامه ما متقصد طلع وصار مس واساسا الكرفان مو مالتنه ولا نندله والمالك الحقيقي 

ما انطى بي بلاغ انو بي احد بعد ليش ينتهم ياسر 

هادي //اي صحيح احنه ما علينه اهل الكرفان همه يتحملون المسؤوليه

جاوبتهم باستهزاء. :: يعني قصدك تبلي ناس غيرابنك وتتهمهم همه الي خطفو بت اخوك وحرگوها مو 

هادي هز راسه // لا مو هذا قصدي قصدي ناديه اتوفت وابني مو قاصد يحرگها واساسا الكرفان محد بينه يندله

 ولا نعرف ناسه يعني صديق ياسر هم راح ينبلي بالمشكله فسدها سراج سدها من يمك الله يخليك 

باوعت الكرم وقيس ::ها كرم وانت ابو احمد اشو ساكتين

شمس گالت وهي تبچي //ايي هسه سكتو وهادي يگول سدوها من عرفتوا ناديه بريئه گبل الكل يگول مثل امها 

شردت ويه صاحبها وبس نلزمها نكتلها لو الضرب والعار والمسبه الي اتحملته حنين 

قيس باسف //الموقف صعب ما نعرف شنگول 

وصلت يم كرم وگتله :: وانت ابو مرتضى اشو ساكت مو انت تگول وين ما اشوفها اكتلها هي وغريمها هسه هي 

ماتت وغريمها تعرفه 

    ما خليته يحچي ::انا راح اروح وانتو دانشو عقلكم 

هادي اجه وراي يتوسل //سراج ابني سدها من يمك

درت وباوعتله وخليت ايدي على چتفه وابتسمت وانا اطمنه :: الله عليك هادي انا للغريب شلون وگفاتي انوبه 

الك صدك چذب اطمن بس هو قنعو يغير اقواله ولازم حنين تتنازل عن الدعوه 

هادي بعصبيه // غصبن ما عليها تتنازل لو ماكو اكتلها خلاص 

ابتسمت باستهزاء :: تؤ هادي هالمره لازم تتوسلون الحنين 

عمار //انا اريد اشوف اخوي اتصور من حق المحامي يشوف المتهم

هزيت راسي :: اي من حقك هسه اروح واخابرك اسويلك مواجهه يمته تگدر تشوفه فيمان الله 

طلعت ورحت للفندق وهناك طلعنا انا وحنين ورضا الي گتله وين ممكن انامن على حنين 

رضا //شنو ما ناخذ.........

انا خزرته هو گال //اطلع للصويره 

سألته باستغراب ::وين للصويره ؟

رضا هز راسه //اي انا اعرف وين أأمن بيها

:::وين قصدك ؟

رضا //اوديها يم سكنه 

باوعتله باستغراب ::سكنه سكنه ؟

رضا //ايي سراج سكنه 

حكيت شعري :: وتتصور هي تقبل 

رضا // الك الصافي انت ما عليك يوما ادري بيها ترضى ما اوديها

جاوبته وانا ابتسم :: خلي نشوف اذا ما طلعتنا مصاويب

ضحكنا ورضا گال //افه انا اخوج ياعليه وداعتك عدها ربد تنيمه يمها بالليل هذا كلش بوجهنا للنجف 

صرنا نضحك وبعدها تمينا ساكتين وصلنه باحد الاستراحات حنين ما قبلت تنزل اخذ الها رضا لفات 

وعصير وماي 

وركبنا ورضا هو الي يسوق وانا ركبت يمه وصرت ادير اباوع الحنين الي ما تعرف وين رايحه والمن 

انا چان كل همي اامن عليها حتى ما تضيع مثل ما ضاعت ناديه

وصلنه تقريبا الساعه بالعشره ونص بالليل قبلها انا گلت الرضا يتصل لان صار عندي فضول شلون رضا 

ياخذ حنين يم سكنه 

رضا اتصل بابن اخو وكله //جاي وياي خطار

وصلنه واتلگانه الولد الي حضن عمه ورغم نظرات الاستغراب الي صار يباوعلي بيها خصوصا وهو شايفني

 مرتين لكن عرفت انو نظرة الاستغراب هاي لان حنين ويانه رضا گال الابن اخو //صيحلي امك واختك

الولد راح وره شويه اجت مره لابسه فوطه وعبايه يجي عمرها بالاربعين ولابسه كلشي اسود مبينه حزينه وياها

 بنيه شابه لابسه عبايه اسلاميه وشال دخلن سلمن علينه والبنيه اجت وباسها رضا وهو يگلها // اشلونج عمو 

اما المره فبقت مدنگه احس برضا يريد يگوم يحضنها لكن اتمالك نفسه وهو يسلم عليها 

— اشلونج ام رضا 

حسيت بنبرة صوته بيها رجفه واشتياق هي ردت بعبره وكأنها تريد تبچي وگالت بدون ما تباوعله 

—هلا ابو علي

رضا حمحم وگال //يمكن رضاوي مسولفلج على اخوي (هو اتحسر) اخوي الصدك الي فداني بعمره سراج 

هي مدنگه //هلا بي والف هلا 

 —ام رضا انا ادري بيج انتي گد الامانه لان انتي تعرفين تحفظيها 

هي ما باوعت بوجهه رغم احس بييناتهم گالت //خير ابو علي 

:هاي البنيه(اشر على حنين الي اشوفها مدنگه ومرتبكه ) بت اخو سراج خلي نگول بت ابن عمته جبناها لان

 ما عدها بس الله وسراج وما ايأمن عليها بس يمج

رفعت راسها واتقربت يم حنين وخلت ايدها على چتفها //هلا بيها ابنيتي حالها من حال مريم 

جاوبتها ::مشكوره ام رضا ما قصرتي 

—لا خويه لا تشكرني ان شالله مثل بتي وابو علي يموون البيت بيته 

هو اتقرب وگلها //دايم البيت وراعيه اخذي حنين وما اوصيج عليها وانتي عمي مريومه حنين مثل اختج 

مريم بضحكه خجوله //لاتوصي عمو هم زين اجتني وحده اسولف واتشاقى وياها

اخذت سكنه حنين وصار يسال برضا اشلونه بالدراسه وشاله فلوس وقررنا نرجع لكن رضا الشاب گال 

:شنو ترجعون اهنا تنامون واطلعو من غبشه 

رضا سالني //باچر وين ان شالله 

هزيتله راسي ::الكربلا وبعدين للبصره 

— خير ان شالله 

ردت اضوج رضا شاورته :: هسه خلينه نروح 

— وين ما تشوف الولد كض بينه

جاوبته بخبث :: الولد لو انت 

— دامك تدري عليش تسأل 

وراح رضا جاب فراشات وانا طلعت رحت للحمام الخارجي سبحت وغيرت ملابسي ومن وصلت للديوانيه رضا 

راح للحمام هم سبح ومن طلع لگاني متمدد على الفراش وادخن هو گلي //شنو انطي نفسك مهله راح تموت من التدخين 

جريت نفس وگلت ::ياريتني اموت يارضا 

:لا اسم الله عليك اذا تموت ناديه وحنين يرجعن المثلث الموت هادي وافراح 

جريت نفس هو باوعلي وگلي //نام سراج تبات نار تصبح رماد 

::هي ما شفتها 

ما عليها شي حاول تنام

نمنا من التعب ما درينا بنفسنا لا انا بقيت الليل كله ادخن والوم ويه نفسي ولا رضا بقى يجر ابوذيات 

ما گعدنا اله الساعه بالسبعه غسلنه واتوضينا وصلينه قضا وراها جاب رضا الريوك واتريگنا بعدها 

قررنا نطلع استاذنت من الشاب رضا وگتله 

::عمو اريد اشوف حنين 

:اي عمو صار هسه 

وراح هي اجت ورا وهي مدنگه شفتها لابسه دشداشه عرفت انو مريم مطيتها ملابس واكيد ماخذه حمام هي گالت 

صباح الخير

انا ابتسمت بوجهها وگلت ::صباح النور نمتي 

:اي عمو نمت 

رضا گللها //زين بابا الحمد لله تبقيين اهنا يم خالتج ومريومه مثل اختج 

:اي عمو 

رضا حمحم //هاا ورضاوي هذا السبع 

هي ابتسمت وباوعتلي //عمو سراج وناديه

::لا تخافيين ناديه بخيير 

:يعني عمو تندل طريقها 

جريت نفس وگتلها ::حنونه بابا لو ما مأمن على ناديه ولا گيها ما سويت كل هذا وجبتج لهنا الي ... 

هي قاطعتني بفرح //. يعني عمو انت تعرف مكان ناديه ( اتقربت وحضنتني ) بروح عباس ومنيره 

تعرف وين هيه 

حكيت شعري وبستها بگصتها :: اي اعرفه بس بالوقت الحاضر انا مأمن عليها بمكان محد يندله الي اريده منج 

لا تفكرين بشي مو زين ناديه بخير (باوعت المريم ) حاولي تحصليلها كتب السادس اعدادي ما بقى شي ع الامتحان

رضا //انا عمي اجيب الها كتب وحتى ملازم 

::اشكرك ابني الله يخليك 

اتقربت من سكنه وگتلها ::خويه ام رضا الامانه جبال ما حملتها واذا تشوفين روحج متضايقه او عندج ادنى ما شك 

انا مستعد هسه اخذها وما يكون خاطرج اله طيب 

هي ابتسمت ابتسامه باهته //لا خويه شتحچي هايه مثل بتي وابو علي جابها خلص ما الي كلمه

بصراحه اتعجبت من ردها رحت يم حنين وبستها وشلت فلوس انطيتها وگتلها 

::من ترتاحين اطلعي ويه عمتج ومريومه واشتري كل شي يعجبج 

هي اخذت الفلوس وبرطمت وگالت //عمو اريد ناديه 

انا هزيت راسي وجريت نفس ::مو انا القاعده مالت الهرم الي لازمچن اتاكدي باسرع وكت راح اخليج 

تشوفين ناديه 

حنين //عمو اريد ناديه الله يخليك

رضا //حنين شيگلج گلبج على ناديه 

حنين دارت //والله رغم خايفه بس گلبي بارد 

هزيت راسي وابتسمت ::هذا هو گلبج صح لا تخافين وهسه روحي ويه مريم واسمعي كلام عمه ام رضا 

حنين هزت راسها //اي عمو 

راحت حنين وبوجهها الف سؤال لكن شفتها مطمئنه حچيت :: رضا(باوعت ع الولد ) تعال رايدك وانت ابو 

علي فهمها لام رضا على كل شي

اجه رضا وياي وطلعنه گتله:: عمو ما اوصيك تدير بالك عليها 

: ابعيني ولا يهمك 

::انا خليت عمك يم الوالده حتى يفهمها قصتها وانا هم اريد افهمك ليش جبتها لهنا 

جاوبني //عمي شلقصه بدون ما تگول تره الدنيا ما تگاطعت 

::بس يهمني تعرف حتى تكون بالصوره واذا ما تگدر والله تره اعذرك وما ازعل منك

رضا الشاب //انت شتحچي چا گول احنه مو زلم 

ابتسمت ::كفو منك ومن تربيتك 

وصرت اسولف اله على ناديه وحنين الى ان وصلت لمن ضاعت ناديه ولگيناها واشوف رضا الشاب مثل عمه

 اخذته الحميه وگال //اجي وياكم الهذا الچلب (يقصد المجرم ) وانا اقرره وبعدين اشوف شغلي ويه الانذال الويا 

:: يعني تعتقد ويا ناس ؟

الشاب //اهه اكيد اذا مو ابن عمها فواحد من عايلتهم او خوالها بس عمي( وباوعلي )...

    :: شنو احچي ؟

الشاب // تعتقد خوالها وره عشرين سنه جايين يدورون ما اتصور 

باوعتله :: ما فهمتك ؟

الشاب //الناس من تصير عدها شغله تمس شرفها تكتل وتمشي اقصد يكتلون بتهم وبمثل ام ناديه فضيحه 

والمره انعدمت يعني اهلها ما يفكرون يوصلون الناديه 

باوعتله :: وليش 

الشاب //لان همه اكيد شالو من المنطقه حتى بس الناس تنسى جريمة بتهم يرحون يفتحون على نفسهم باب 

            خصوصا ويعرفون بيك انت موجود واسم ومنصب يعني بكل الاحوال ما راح تعوفهم 

هزيت راسي ::هم صحيح 

الشاب //اي وحتى اهل سلدار صدگني ذوله شيلهم من القضيه لكن ما يمنع يبقى الشك 

::اگلك رضاوي لو داخل قانون ضباط مو احسن 

هو ابتسم //اي ردت ضباط بس امي ما قبلت گالت اوحيد واخاف عليك 

اجت سكنه وگالت //ها يمه تقلد عليه 

اتقرب يمها وحب راسها //لا بس عمي سراج گال لو داخل ضباط گتله امي ما ترضى تگول اوحيد

رضا ضحك //انا خوك اوحيد البيت الطين 

الكل ضحك لكن كلنه الواگفين ضحكتنا بمراره لان كل واحد شايل هموم وعباله مصيبته اكبر مصيبه 

بعدين قررنا نروح ورضا وصى ابن اخو 

انتبه الامك واختك ودراستك 

ان شالله عمي 

— وما اوصيك البنيه امانة الله وامانتك 

— لاتوصي حريص

بعدها سلمنه عليهم وطلعنه اشوف رضا ما مستقر ويجر نفس باوعتله 

::لو ادري ماخذ حنين البيت زهراء هاي شبيك متخربطه امورك 

هو باوعلي بعتب //ليش عود انت خويي ليش دومك داگرني 

:: ياداگرك غير انت عبالك مراهق 

رضا بحسره //دگول مفطوم ولگى امه 

  سالته :: هلگد تحبها ؟

اتحسر وسكت انا استردفت 

::من صحت الرضا خليتك يمها حتى تسولف وياها 

رضا //اي هي هاي الردت روحي 

::بس الى متى رضا هي ما متقبلتك لان كتلت اخوها 

باوعلي وبعيونه دموع //وداعتك الفكت الچفن

::اگلك عود ليش مسميه ابنها رضا 

هو جر حسره وگال //مو هي بس ذاك الظلمنا 

::تقصد اخوك الله يرحمه 

هو //ايي سما رضا يگللها حتى من يصيحوله يفز گلبج 

::الهلدرجه حق...ما كملت  

   باوعلي وهز راسه // واكثر 

:: تتصور هو حبها واخذها

رضا //بس هي ما تحبه وچانت تتحمل منه اشكال الضرب والمسبه واخر شي سما على اسمي حتى يعذبها 

::ولو اخوك بس شگد حاقد 

رضا //ايي ونذل وحقير 

::الله يساعدك 

رضا //لا گول الله يساعدها شكثر اتحملت عذاب (هو راد يغير الموضوع ) اگلك وين نروح

::الكربلا 

:شنو المجرم صحى لا 

::من اول امس بدا يصحى بس انا ما خليت احد يحچي ويا 

:شناوي تسوي 

::رضا خلي نوصل وبعدها يحلها الحلال 

:والنعم باالله

قريب الظهر وصلنه الكربلا گلت الرضا خلي نروح نزور ورحنا زرنا وصلينه وطلعنه اتغدينا حسب طلب رضا 

وبعدها رحنا للمستشفى انا احس نار تطلع من گلبي وتصعد لعيوني رحت بالبدايه للطبيبه الي طلبت اخذ عينه من ناديه 

وسالتها هي جاوبتني 

استاذ بهيج امور لازم ناخذ عينه من المجني عليها والجاني 

  :: ليش ؟

الجاني دائما يكون انسان ملوث مو بس بعقله لا حتى بدمه واحنه من اخذنا العينه خفنا يجوز المجرم بي ايدز 

انا صرت ارجف لكن الطبيبه طمنتني انو هو ما بي هذا المرض اللعين وبالتالي ناديه هم ما انعدت 

بعدها رحت شفت الطبيب المسؤول عن علاج المجرم والي گال 

هو استعاد وعيه لكن حالته الصحيه مو تمام 

::يعني شلون 

الطبيب //يعني لازم يبقى بالمستشفى لان ضربته قويه وبمكان قريب من القلب اصلا هو بقى عدل بمعجزه اضافه

 الى انه عنده تشمع بالكبد وهذا كله آثر على حالته الصحيه

::تشمع بالكبد 

الطبيب //اي بسبب تعاطي الكحول وعنده سكر وضغط فاانا اگلك الاعمار بيد الله 

::اريد اشوفه واحچي ويا ضروري 

الطبيب //اي استاذ بس اتمنى ما اتعبه بالكلام 

::ها يعني يگدر يحچي 

الطبيب //اي يگدر لكن لازم ما يتعب 

::هنه شكم سؤال ان شالله ما اتعبه

طلعت من يم الطبيب وصلت يم غرفته وشافني عصام الي اجه وسلم عليه وانا سالته 

گال// مثل ما امرت مانعين الزياره اصلا محد يوصل الهاي الغرفه 

 دخلت للغرفه ورضا راد يدخل لكن گتله ::اريد ابقى ويا ابحدنا 

رضا //سراج ما اوصيك على كيفك ولا تتهور وتضيع حق المسكينه

جريت نفس قوي دخلت للغرفه وانا اشوف الاجهزه بكل جسمه باوعت للملف شفت اسمه اثير اتقربت يمه وگلت 

وانا اضرب على خده ::اثير اصحى اكيد انت جاي تسمعني خلي اگلك انت انسان منتهي هسه اريد اعرف منو الي 

وداك حتى تخطف ناديه 

شفته حرك ايده 

::اسمعني ولك محد ينقذك لان اهل البنيه عرفو كل شي فانت ميت ميت بس حرامات انت تموت والي وصلك 

الهلمواصيل يلعب بالفلوس ومرتاح

هو جاوبني بتعب و صوته مبحوح //انا ردت اتزوجها لو ما اجت الشرطه 

انا بغضب ::ليش اغتصبتها 

اثير بكلام متقطع //بالبدايه همه طلبو مني لكن هي من سولفتلي على حلالها واملاكها طلبت منها الزواج 

اوخفت تكلب عليه 

::عاد انت اغتصبتها 

هو بقى ساكت انا گتله ::عوفنا من هذا كله وجاوبني منو الي گلك اخطفها

ما جاوبني رديت علي گتله ::انت ما تعرفها والدليل اتفاجأت باملاكها لاتحمي احد لان محد راح يحميك منهم 

فاعترف احسنلك 

صار نفسه عالي //بالبدايه گالو ثاار 

::رادوك تكتلها 

ايي رادوني اكتلها 

::وليش ما كتلتها

هو جاوبني واحس بريگه ناشف //لان انتظرت منهم اشاره بس همه اول ايام ما اتصلووانا 

عرفت عنها كل شي بعدين اتصلو بيه انا زيدت المبلغ عليهم حتى اتاكد من كلامها 

همه گالوا بكيفك ما نزيد فلس على الاتفاق اكتلها بيع اعضائها مشكلتك لكن هي گدرت تقنعني اخذ 

نص املاكها ونتزوج بس انتو اجيتو

هو من گلي نتزوج ردت اخنگه ::منو وراك گلي احنا راح نعرفه بس انت سهلنه المهمه 

اثير //انا ما اعرف بس واحد اسمه جريد هو الي اتفق وياي 

::يعني مو جريد الي طلب تخطفها 

اثير // لا لا هو اساسا ما يعرفها بس واحد طالب منه يشوف احد يخطفها 

اتقربت منه وگتله وانا اصك على اسناني ::تدري ياكلب لو ما مغتصبها يمكن اسامحك لكن هسه الثار 

صار شخصي بيني وبينك 

اتقربت منه ردت اخنگه هو يباوع بعيونه طگطگت اصابعي وگتله

:: مو انا الي اكتل واحد اساسا ميت بس صدگني مجرد ما اعرف انت اتشافيت ذاك الوكت بايدي اقتص منك حتى ما 

اخليك توصل للسجن بس ادعي ربك تموت حتى ما تطيح باديه 

من ردت اطلع سمعته دمدم بكلام رجعت اتقربت منه هو گال //ناديه شلونها 

ردت انقض علي واموته حچيت ويا

::شوف ولكً اله اخليك تتعذب بگد ما اتعذبت ادعي ربك ياخذ امانته وهناك تتحاسب لان انا ما راح ارحمك

طلعت وانا احس بروحي طلعت ردت ارجع اموته لكن مو انا الي اكتل انسان ميت 

طلعت شافني رضا ما حاچاني اجه عصام وصيته :: تدير بالك واي احد يجي يسال احجزه مره رجال حتى 

لو طفل احجزه افتهمت 

عصام گال // من يوم الي وصل للمستشفى محد اجه وسأل عنه

:: والبيت الي داهمنا 

     —- استاذ عرفنا هو ماجره من واحد عنده معمل طابوك گايله يريد يشتري معمل بالمنطقه 

      حسب كلام صاحب الملك والرجال ما عنده مشاكل

          :: هذا هو واي شي يصير بلغني

طلعت انا ورضا ومرينه ع الدائره وهناك عرفت انو همه مداهميين بيت اثير وعرفت انو هو متزوج وعنده اثنين 

اطفال وحسب كلام زوجته انو هي ما تعرف عنه شي ولا وين يشتغل وهو اساسا ما يمر بيهم اله كل شهرين 

ينطيهم مصرف ويدور وجهه وما تعرف وين يروح

لاگين ابيته جهاز نقال وشريحتين محترگات لكن همه عايديهن وجايبيلي اسماء الي يتصل ما شفت بيهم اسم جريد

لكن اكثر اتصالاته برقم واحد اسمه ليث والثاني اسمه توفيق اذن اكيد جريد اسم حركي او اسم ثاني اهنا اخذت 

الموبايلات وكتبت رساله الاكثر رقمين اتصل عليهم قبل الحادثه ما اتصلت اكيد يعرفون هذا مو صوته

::اسمع زين مو انا الي تاكلون حقي اريد عشرين مليون واذا ماكو افضحكم وعليه وعلى اعدائي 

المفاجأه انو الرساله ما وصلت ال ليث يعني اكيد مغير رقمه نفس الرساله دزيتها التوفيق ونفس الشي 

هم ما وصلت وصرت على يقين هذوله همه الي ويا والي سهلوله خطف ناديه

صار لازم نتحرك بسرعه ولازم يداهمون الوكر وفعلا رجعت للبصره بنفس اليوم وانا اسوق 

تقريبا الساعه بالاربعه الفجر 

اتصلت بالمسؤولين الي انطو الايعاز ان يداهمون وكر جريد وصلت للبصره بالسته الصبح

رحت للفندق لان اشوف رضا كلش تعبان وقتت التلفون ع الساعه تسعه الصبح من گعدت اتصلت وعرفت 

مداهمين المكان ولاقين القبض على ليث وجماعته وهناك لاگين اسلحه وكراتين مشروبات وهمه راميين 

على الشرطه ومتصاوبين اثنين واحد خطر والثاني برجله وهنا صار لازم اشوفهم واهم شي التقي بليث الي 

عرفت بي هو نفسه جريد

من رحت اريد اشوفه كان كلبي وعقلي سابقات رجليه وشفته لزمته من ياخته چان ولاخايف ولا مرتبك اكيد 

مطمن انو اكو ناس تحمي وتغطي على جرايمه حاچيته 

:: شوف خاف عبالك فلوسك لو معارفك لو حتى الي تشتغل الهم يطلعوك لا غلطان لان القضيه الي جاي احقق 

بيها قضيه شخصيه تهمني انا 

ما عليه بالسلاح ولا بالمشروبات هو سؤال واحد تجاوبني علي منو الي دزك تخطف ناديه وليش سلمتها الاثير

جاوبني بكل ثقه // ياناديه ويا اثير 

انااتقربت يمه وبنفس بروده ::تماام الظاهر انت متعلم على ناس اذا ما اعترفت يتركونك راح اعيدها للمره الثانيه 

والاخيره الي بيني وبينك شي شخصي انت متعدي على شي يخصني فكر داورها بعقلك يجوز اكو جماعه وراك

 تطلعك من تهمة حيازه الاسلحه وحتى ضرب الشرطي يگدرون يدورونها وحتى كراتين العرگ لان اعرف اكو 

هواي جهات تستفاد من واحد مثلك كل هذني ما علي بيهن الي اريد اعرفه منو گلك تخطف ناديه

باوعلي //استاذ ما اعرف على شنو تحچي 

وصلت يمه ودخنت گتله وانا ابتسم وانفخ الدخان بوجهه ::وداعتك ما مستعجل بس باچر اذا مو بعد ساعتين 

انت من بحدك راح تعترف

طلعت من يمه وانا اغلي ورحت على المسؤول بالدائره وحچيت ويا 

هذا ليث الظاهر مسنود من جهات معروفه او غير معروفه ما ادري كل الي اريد اگوله ممنوع تقدمون اله 

اي مساعده اي جهاز نقال ثق باالله اذا ادري واحد من العناصر متقرب لو يم الغرفه الي موجود بيها ليث

هو او حتى توفيق راح ازعل هواااي وما راح اسكت

بقيت گاعد بالمكتب بعد ان وصيتهم شنو لازم يسوون التوفيق وليث 

رضا گلي// ما اعترفو

   نفخت الدخان :: لا تستعجل يعترفون 

رضا //بس خاف ذوله مسنودين 

  هزيت رسي :: اكيد هذا الشي منتهيين منه بس هالمره ما اخليهم ينفذون صدگني ثار شخصي الي 

بيني وبينهم 

رضا //الله يستر منك سراج

ابتسمت ::مني لو منك رضا مجاهد وما تهاب الموت 

ابتسم رضا وانا اتثاوب وادخن 

بقيت بالدائره واجه المدير گلي //استاذ انت روح ارتاح وانا اهنا اباشر القضيه بصوره شخصيه 

::اعرف بيك ما تقصر لكن احب ابقى اذا ما عندك مانع 

لا لا ابد استاذ اهلا بيك

طلع المدير وبقيت انا ورضا الي سالني 

::رغم انت ازغر منه وحتى رتبتك لكن الكل عنده طوارئ 

ابتسمت ::مو انا رضا مو انا ڤيتامين واو 

رضا //شنو هذا ڤيتامين واو

غمزتله وانا الملم حلگي :: عليك الله ما تعرفه شحال لو ما انت من فلاح بسيط الى انسان مجاهد والك وزنك 

رضا //ها سراج جاي تصنف عليه هذا الفلاح سبع كتل رفيق بوكت اكبر واحد يرجف من اسمه 

::لا والله رضا مو هذا قصدي اقصد الي صار انو كل امورنا ما تمشي اذا ما عندك هذا الڤيتامين 

— بروح ابوك سراج شنو هو 

::الواسطه رضا الواسطه ياما راحت بيها ناس مظلومين ورفعت ناس وضيعين 

رضا صفن // اي والله صحيح الله يساعد الفقير والماعده واسطه 

:: بعد هذا قدرنا 

رضا //يعني ناديه لو ما انت چان راحت بالرجلين

غيرت الموضوع لان ما اريد اجيب اسمها رضا عرف بيه ما اريد بموضوعها بعدين اتمددع القنفه وغفى 

وانا بقيت فاتح النقال واباوع الصورتها من هي زغيره او ويه عمتي واهنا اتصلت زهراء 

انا رديت ::الو 

زهراء بعصبيه //سراج صدك الي سمعته ناديه ياسر خاطفها وحارگها 

رديت عليها بهدوء ::ايي زهراء 

زهراء صارت تبچي //الكلب الحقير ابن الكلبه اكيد هي ماكو غيرها افراح 

::انتي منو گلج

- ام مرتضى وتگلي بالبدايه متهم حنين سراج حنين وين الله عليك سراج برد گلبي 

::لا تخافيين على حنين باسرع وكت اجيبها تشوفينها بس اهم شي ما اريد عمتي تعرف بشي 

- لا سراج ما گلتلها صدگني تنجلط 

::اعرف انتي ديري بالج على نفسج 

زهراء //معقوله سراج انت ما مهتم الموتة ناديه 

انا حاچيتها بنتر ::عساها بالمووت افتهمتي زهراء عساها بالمووت

زهراء //. سراج شضام عليه احچي 

:: ما ضام شي شنو ابتليت من صرت گرايب عباس 

فز رضا على صوتي واخذ النقال وصار ايگللها //خويه زهراء ما عليج بسراج عدنا شغل بعدين نخابرج 

زهراء //انت منو

—انا رضا صاحب سراج 

زهراء وهي تبچي //هلا بيك ابو علي اعذرني

رضا يباوعلي //صار خيير خويه ناديه بخير لا تخافيين بس ديري بالج احد يعرف تره كل السوينا يروح حرامات 

زهراء //تحچي صدك رضا الله يخليك 

رضا //چا شگلنه على كيفج تره احنه بمصيبه چبيره بس نشوف دربنا نجي ونفهمج انتي لا تخافين البنيات بخير 

هسه خويه راح اگلج فيمان الله بس ما اوصيچ السمعتي تدفينه تره وداعتج يروح حگهن واحنه نبتلي 

زهراء بفرح // لا توصي حريص ومشكور وما قصرت

باوعت الرضا بعتب هو گلي //المثل زهراء ما ينخاف منها 

جريت حسره وگلت ::ما بقى عندي ثقه باي احد نسيت كرم 

— سراج لا تعتب على گرم حگه 

عكفت حاجبي وسالته:: حگه بشنو 

رضا //بكل شي انا وانت لو يصير بينا هذا الشي چنا سوينه مثل كرم وازود 

عاتبت رضا ::ليش ما صار بينه الي صار بكرم 

رضا //اي صد......قطع كلامه دگت الباب واجه واحد سلم علينه هو باوعلي وگال

استاذ سراج ليث جاي يصيح ويگول شنو تردون احچي 

رضا باوعلي وگلي// شسويتله ؟

حيله بسيطه اتعلمتها من رحت ايفاد (باوعت للولد وگتله) ::اريد توفيق 

رضا //سراج ايگلك ليث 

  :: خلينه نستوه ع الاخر

دك الجرس وطلب من العنصر يجيبون توفيق واجه توفيق الي مبين علي الخوف توفيق لابس دشداشه 

    وشويه تارس جسمه ويجي عمره خمسه وتلاثين طلبت منهم يفتحون الگلبچات 

باوعت للولد والرضا اشرت همه طلعو اتقربت منه وگتله ::ها توفيق بس كون ارتاحيت 

توفيق بخوف //استاد والله ما مسوي شي 

انا ابتسمت باستهزاء ::لا بروح ابوك لعد منو الي مسوي 

توفيق //استاد انا ليث جاري ودوم اسير علي

حكيت خشمي وحچيت ::هو ليث من ناحية جارك جارك بس جريد صاحبك 

من سمع باسم جريد هو ارتبك انا گتله 

::انت شگد غبي ما ادري فطير باقي على اسمك الحقيقي يعني التهمه الي جاي انا على 

مودها واحقق بيها بس انت المتهم الرئيسي لان المتهم الثاني اسمه جريد وجريد هذا محد يعرفه لان ما اله 

اوراق ثبوتيه فالتهمه لابستك لابستك وصدگني هاي اعدام لاتنقص ولا تزيد 

ها وكلهم يطلعون براءه لان ليث عده جماعته واصلين وراح يتدخلون بس انت ابد ولا واحد راح يطالب 

باطلاق سراحك

توفيق //ليش استاذ انا شمسوي وشنو هاي التهمه 

دخنت جگاره ::اختطاف طالبه وتوهيم اهلها بان هي احترگت داخل الكرفان 

هو فز من مكانه كانما انلدغ وگال 

لا استاد انا ما الي دخل هو ليث اقصد جريد انا بس جبت عبايه واخذت السياره رجعتها كل الي سووا ليث 

::يعني افهم من كلامك انو ليث هو الي خطف ناديه 

لا استاد ليث هو الي جاب الي يخطف ناديه ويبعدها عن البصره كلها

::شوف توفيق انت مبين عليك فقير ارعن او خلي نگول ما تعرف تتصرف انا اريد اعرف منك ليش خطفتوا ناديه 

ومنو وداكم اسمعني لا تحامي الكل احد اليوم انت يمي كلمن يگول ياروحي لذلك يابطل اعترف احسن الك حرامات 

تنعدم وتشيل جريمة غيرك 

توفيق بلع ريگه // استاذ انا انضحك عليه اتقشمرت 

::منو قشمرك 

استاذ بنيه چانت ويه ناديه بالكليه 

الفصل الخامس والخمسون من هنا 

شكرا لزيارتكم عالم روايات سكيرهوم