رواية ناديه الفصل الخامس والخمسون 55 بقلم انين الليل

سراج 

طبعا من احقق دائما اسجل الوقائع لغايه في نفسي 

انا من سمعت طالبه بالكليه راسا شرگت لان من هوول المفاجأه بلعت الدخان صرت اكح حيل بحيث 

اختنگت وفتح الباب رضا والولد الي جابلي بطل ماي اخذته وشربت شويه وصرت اخذ شهيق وزفير شهيق وزفير 

رضا گلي //ارتاح خلي ايولي 

الولد // استاذ اخذه هسه ومن ترتاح ارجعه

انا هزيت راسي وحركت ايدي بلا گعدت ع القنفه واسترخيت وغمضت عيوني وانا اجر نفس سالني رضا 

سراج انت زين 

هزيت راسي بدون ما افتح عيوني استرخيت وهدئت گلت ::جيبولنه چاي 

الولد دك الجرس وگلهم //چايين بسرعه 

خمس دقايق جابوا الچاي فتحت عيوني واشرت للولد والرضا وهمه طلعو انا باوعت التوفيق گتله 

::استريح 

هو گعد بقلق وطلعت جگاره وانطيته هو اخذها وگلي //شكرا

باوعتله وگلت ::اشرب چايك يابه 

  اخذ الاستكان بعد لن خاطه ودنا الحلگه وايده ترجف شرب الچاي ودخن الجگاره انا سالته ::شگد عمرك 

هو جاوبني// ثمانيه وتلاثين 

::اكيد متزوج وعندك جهال 

:اي استاذ متزوج اثنين وعندي خير من الله جهال 

::زين توفيق انت عندك عايله چبيره وعندك التزامات الهلسبب انت لازم تحجي كل شي تعرفه ولا تضم اي شي 

تره من انريد نعرف شي نعرفه

شفت بنظرة عينه تشكيك من گلت من نريد نعرف شي نعرفه جاوبته 

::اكثر الناس تگول ماكو قانون وفوضى واساسا ماكو حكومه بس خلي اگلك 

اكو ناس ما تحب الظلم لذلك من الصعوبه تبيع ضميرها ومبادئها وما يعصى عليها شي 

(وكفت ورا وگتله ) ::فيا ذكي صير ذكي ولا تتذاكى عليه 

هو بلع ريگه //استاد صدگني ما اعرف هيج راح يصير

  جاوبته بحزم وانا واكف ورا :: وصار وهسه صار لازم تحجي منو هاي الي ودتك تخطف ناديه 

هو باوعلي وگال //استاد انا رجال متزوج وعندي جهال وعندي مزرعه وسياره ومحلات وبيت 

:: ما شاء الله 

: استاد والله كلهن حلال 

::ما علينه بهالوكت انشبش الحلال بالحرام كمل

:اي استاد انا بيت اختي بالبصره بمركز محافظه وفد يوم مريت بيهم جان عندي يمهم شغل وبتت 

والصبح طلعت 

::توفيق احچي الصدك لا تگوم تجيب وتحط ومثل ما گتلك من اريد اعرف شي اعرفه 

توفيق //استاد انا (وسكت ) 

::بابا احچي انصحك احچي

   - - - استاذ تعرف الياخذ اثنين دووم مشاكل وانا چنت اتردد على بنيه بالكليه 

::تتردد تتردد وين 

: الصراحه نروح انا وياها الشقه هي ماجرتها او اخذها الوحده من مزارعي 

جاوبته بتردد ::يعني انت وياها ترحون وهي بعدها ابنيه 

توفيق //استاد انا دووم اروح الها واتونس وياها 

:: اكيد الهيج تسوي بمقابل مو

توفيق هز راسه انا گتله :: كمل وبعدين 

توفيق //بعدين فد يوم انا رحتلها للكليه حتى اخذها چنت كلش ضايج واخذتها المكان مال واحد من صحباني 

والصبح وصلتها للكليه وره تلث ساعات خابرتني 

 – مر عليه رايدتك انا هم رجعت مريت عليها وبهاي الاثناء اجت بنيه وعرفتني عليها 

:: منو هاي 

  - - صديقتها صارت عيني بعينها وانا ما اعرف شنو صار بيه اخذت نسرين ورحنا للشقه وانا 

حتى ما بقيت وياها لان صار فكري ويه البنيه الي شفتها 

::لازم حلوه

توفيق //بعيني احلى وحده 

::افهم من كلامك حبيتها 

  ما جاوبني // ثاني يوم الصبح اجيت يم الكليه وانا منتظرها وشفتها هي والبنات بقيت اباوع الها وسمعتها 

تحچي ويه صديقتها 

اليوم لاتتاخرن كون بالثنتين ونص انتن اهنا 

حتى صديقتها گلتلها //ها اليوم تگولين لاتتاخرون يوميه منو اياخرنه

وراحت وهي تبتسم وتباوعلي 

انا استاد بيومها رابطت هناك وشفتها من طلعت بقيت امشي وراهم بالسياره الى ان عرفت وين بيتهم 

وثاني يوم نفس الشي وهي بس تبتسم وانا ساكت ومسحور بابتسامتها نسيت بيتي وحتى شغلي وما صرت 

اتصل بنسرين الي من تشوفني عبالها جاي على مودها بس اگلها منتظر ولد صديق 

وره اسبوع الصبح انا اباب الكليه هي نزلت اخير وحده من السياره وحاولت تتاخر وباوعتلي وانتظرت السايق 

على ما حرك واتقربت يمي وگالت //مو تشوف نفسك هواي مصختها مو عيب عليك تلحگني وين ما اروح !!

بقيت ساكت اباوع الها هي ردت گالت //انت هووي جاي احچي وياك 

انا انتبهت الكلمتها هووي اهنا اتقربت منها وحچيت وانا غادي نار 

   : لو وحده غيرج گايلتلي هذا الكلام چان علمتج 

هي رفعت حواجبها وگالت //هاي فوگها فوگ ما جبتلي شبهه وين ما اروح انت وراي 

هدئت شويه واتقربت منها وانا اشم عطرها اتخربطت كل اموري //اسف واعتذر بس انا اريد احچي وياج

ردت عليه //ما عندي وكت وراي محاضرات 

  - - - بس ضروري احچي وياج 

فتحت عيونها استغلييت الفرصه وانطيتها رقمي وصرنا نحچي بالتلفون ونتشاوف بره وحتى داخل الكليه 

واتطورت علاقتنا 

::تطورت شلون 

توفيق // حب شريف استاد الله وكيلك واتفقنا ننخطب ونتزوج لكن العائق انو انا متزوج اثنين

هي صارت تنطيني اعذار وبنفس الوكت تسمعني كلام حب وغرام وانا حبيتها وقررت لو شنو ما يصير 

لازم اتزوجها وهي وافقت وگالت //. ابوي اعرف ما عنده مانع بس اخوي ما راح يوافق 

 ما وسعتني الدنيا من گالت ابوها ما عنده مانع نتزوج جاوبتها // انتي بس انطيني الضوء الاخضر وما عليج 

امشي على اهلج واليردونه انا حاضر انا اعرف شلون اقنع اخوج

وصرنا نتشاوف 

:: وين تتشاوفون 

استاذ اكثر من مره تكنسل الدوام وتجي وياي 

حكيتوذقنيذ:: كمل 

مره بالليل خابرتني وصرنا نسولف لكن فجأه حسيت اكو واحد اخذ التلفون منها وسمعت صوت مره 

وهي ترزل بيه // ولك انت ما عندك عرض وجاي تضحك على بنات الناس مو عيب عليك يانذل 

جاوبتها راسا گتلها //انا قصدي شريف وحاضر بالي تردينه

ما عرفت هي منو امها اختها انسد التلفون وثاني يوم حبيبتي ما داومت ورجعت.وانا ما اعرف عنها شي باليل 

اجاني اتصال من جهازها نفس الصوت گالت انا امها واريد اشوفك ابحدنا وانطتني موعد ورحت للمكان وانا ما 

اعرفها بالبدايه گلت هاي يجوز مسويتلي فخ لكن انا رحت خصوصا واحنا ما بينه بس كلام 

اجاني اتصال وعرفتني من ملابسي وگعدنا وهي تخزر بيه وتگول

انت انسان فاهم واستر على ما واجهت بنتي طايشه واحنا ناس تعبانيين وشايلين هم بگد الجبال ومن يعرفون 

اخوتها ما يرحموها 

   جاوبتها بخجل // صدگيني بتج احبها ومستعد افديلها روحي 

سالتني //يعني شلون ؟

:الي تامرون بي انا الله فاتحها بوجهي وما عندي مانع اليوم امشي واخطبها 

وسالتني على مؤهلاتي ومن عرفت انا واصل خامس اعدادي وعندي نسوان اثنيين هي هزت راسها وردت 

انت مستوعب الكلام الي جاي تگوله تريد تاخذ بتي وانت عندك نسوان اثنين وجوگة جهال 

فهمتها هي ما الها شغل بنسواني انا اخليلها بيت ابحدها والي تامرون بي انا حاضر

امها جرت نفس وگالت بحزن //يا خاله لو عليه انا اوافق لان ادري ابتي تحبك بس المشكله ابوها واخوها وهمه 

امرهم مو بايدهم 

اتفاجأت من كلامها سالتها // خاله شلون ابوها واخوها وامرهم مو بايدهم چا بايد من 

جاوبتني وهي تتحسر // ابوها خوش انسان معروف ومحترم واخوها هم بس احنه عدنا بالبيت مصيبه وهاي

المصيبه هي امشيه البيت والبي بكيفها 

سالتها //ما فهمت يعني شنو

باوعلي // كل ظني استاذ عبالي بيبية البنيه او عمتها لكن امها ردت عليه وهيه تهز راسها وتتحسر وتلم بحلگها تريد تبجي 

  ::: اي ومنووطلعت 

 امها ردت // ياريت خاله بيبيتها لو عمتها البيتنا بلوه حيه تكرص وتضم راسها 

  حاچيتها // منو هاي شتريد منكم 

- - خاله شگلك احنا عدنا بنيه عايشه ابيتنا والي هي بالحقيقه مو من اقاربنا لكن انفرضت علينه وهاي اللهم ياكافي 

تسوي تصرفات مو حلوه ويه ابني وحتى ويه زوجي على ابو انها بت اخو بس هو يعرف هي مو بت اخو 

وهي هم تعرف هذا الشي

باوعلي توفيق //استاذ انا اتعجبت سألتها شنو يعني مو بت اخو 

هي جاوبتني وگالت //امها مو زينه وصادقت براس حماي وبعدين كتلته الحماي وجابولنه البنات رجلي يدري بيهن 

مو بنات اخو لكن القانون فرض علي هذا الشي بس هاي من كبرت صارت حلوه ومغريه وهي وكيحه فصارت

تسوي اشياء وگدامي 

جاوبته وانا ارجف لان بينت عندي الحقيقه واتضت الرؤيا :: توفيق ما سالتها شنو هاي الاشياء 

توفيق هز راسه //. استاذ سالتها وجاوبتني 

:: شنو 

گالت //اوووف يا خاله شسولفلك تلبس فاضح وتجي تگعد يمه على ابو عمها وتتشاقى ويا ومن يطلع تروح 

ع الولد ونفس الشي 

الى ان فد يوم لگفتها بالغرفه ويه رجلي ومن سالتها جاوبتني عمي تعبان وجاي امرغ رجلينه 

انا عاد گلت اسكت لان شسوي قابل افضح رلي وانا عندي بنات وسكتت ولان بس احچي هذا رجلي 

يگوم ويموتني من الكتل وانا نص عافيه لكن شفت تصرفاتها ويه ابني بعد ازيد وصار الولد يكره ابو 

والابو يكره ابنه گلت خلي اواجهها واگللها ورحت حاچيتها

ومن واجهتها ضحكت وگالت 

اي وشتردين 

انا گتلها //ابتعدي عن زوجي هذا گدام الناس عمج 

هي جاوبتني گالت //انتي گلتيها گدام الناس بس بالحقيقه هوموعمي 

عاد انا گتلها //زين وابني 

هي ردت //ابنج هذا يحبني يعني شسويله 

ومن فهمتها هذا الي تسوينه حرام وراح افضحج هي ضحكت واتقربت مني وگالت 

انتي الخسرانه لو الابو لو الابن واحد منهم يكتل الثاني وبعد خلي اگلج ع المفاجئه الچبيره

  توفيق باوعلي // انا استاد سالتها شنو بعد 

گالت عدنا بيت اشترينا بكل فلوسنا وبعنا ذهبنا انا والبنات والعدنا والما عدنا لان بشارع تجاري وردنا نخلي 

الاولادنا تصدك ضاحكه على رجلي ومسجله باسمها 

::وانت صدگتها 

توفيق //اي استاد خصوصا وانا اشوفها مره چبيره وتعبانه ومقهوره على نفسها وعلى ابنها

    :: عاد انت انتخيت وگلت اتساعدها تخطف ناديه 

توفيق //لا استاد بالبدايه انا ما عليه بس ردت اخطب هديل وگالت مستحيل ابوها لو اخوها يوافقون وبالتالي اذا 

هذا وافق الثاني ما يقبل وراح يتكاتلون وانا راح اخسر ابني وزوجي وناديه راح تاخذ الاكو والماكو ونصفى من 

كل شي خسرانيين 

عاد هي گالت اذا تريد تتزوج بتي لازم نتخلص من ناديه 

انا شكيت لكن هي گالت انت ما اريدك تكتلها ولا تخطفها اريدك تدليني على واحد يخطفها وانت ما عليك انا اتفق 

وانا انطي الفلوس

دخنت جگاره ::ايي وتالي 

توفيق // عاد انا فكرت وحبي الهديل عماني وما ردت اخسرها وشفت ليث 

::حبك الهديل لو للفلوس 

توفيق //لا استاد والله واسأل ليث انا اصلا خسرت من جيبي 

نفخت ::ما علينه شسويت 

:شفت ليث وخليته يتواجه ويه ام هديل 

::وبعدين 

شافته وتفاهمو بس اختلفو ع السعر 

::: ههههاي تريدني اصدكك ليث يخطف على مود الفلوس 

توفيق هز راسه //. ايي استاذ هو يگدر يخطفها وليث هذا الما عايز يبيع ابو بالف 

::شگد طلب منها 

توفيق //بالبدايه خمسه وعشرين مليون بس هي صارت تحلف ما تگدر اتدبر اله عشره

::شلك بيها توفيق توك تكول يبيع ابو ابالف يطلب خمسه وعشرين ليش 

توفيق //صحيح استاد اي بس ليث عرف من عدها السالفه 

:: ها وهي سولفتها نفسها 

: لا استاد هي گالت تريد تحمي ابنها لان تضحك علي 

:: بس هواي خمسه وعشرين

: لان طلبت منه ما يخطفها هو لا يشوف واحد من الي يعرفهم كون من غير محافظه هذاك الي يخطفها 

وياخذها هناك يتخلص منها عاد ليث گللها خمسه وعشرين وهي گالت ما تگدر تدبر بس خمسطعش 

وبعدين صار الاتفاق عشرين 

:: وانت شگد چانت حصتك 

: والله استاد انا ما اخذت ولا فلس اصلا شگد خسرت 

:: كله لان تحب هديل 

توفيق مدنك //اي والله احبها 

::كمل وتالي

:تالي صار ليث يراقبها واتفق ويه واحد من اهل كربلا انا ما اعرفه وصارو يراقبوها وبيومها شفت ياسر 

  :: اوكف منو ياسر 

   - - - ابنها واخو هديل الي يحب ناديه وهيه تضحك علي 

   :: وين شفته 

    شفتها اخذها من الكليه وجابها للكرفان واحنا وراه بعدها هو خطفها وخابروني گالوا جيب عباية راس

  اخذوها ليث وهذا الي من اهل مربلا والله استاذ لا ادري وين اخذوها ولا اعرف شسوو بيها 

::وبعدها شفت هديل 

: لا ام ياسر طلبت مني ما اتصل لان خبرو الشرطه باختفائها وخافت يجوز يطلبون الموبايلات

::وبعدها بدلت شريحتك 

: اي استاد حسب امر جريد اقصد ليث 

:: ليش 

: الظاهر اتعارك ويه الخاطف 

::زين انت بهاي الايام هم شفت هديل هم قابلتها 

توفيق // استاد هديل ما تدري بكل هذا الاتفاق الي صار بيني وبين امها وامها گالت بس تنسد القضيه ثاني يوم 

اروح اخطب هديل ونتزوج

   :: ومنين تعرفون انسدت القضيه لو بعدهي 

توفيق //. من ليث عده هواي معارف 

باوعتله ::كل هذا الي سويته لان تحب هديل 

: اي والله وهم امها خطيه رادت تحافظ على بيتها وعلى ابنها 

:: اريد اسالك انت تحب هديل وهذا الكلام اذا صار يضر بيها وبامها 

توفيق //استاد هديل ما الها شغل انا اتحمل المسؤوليه 

::بس راح تنسجن شتتصور هديل تنتظرك

توفيق يهز براسه ويتحسر // ايي استاذ تنتظرني لان امها گالت انت ما تنسجن ليث هو يلبسها اذا صار وانكشفنا 

::وهسه انت انكشفت شتتصور هديل وامها راح يبرؤونك 

توفيق //استاد هديل ما تدري بكل هذا الي صار يعني ما الها علم بي صدگني 

::زين توفيق انت الله منطيك وعندك اثنيين نسوان وهاي صاحبتك الي بالكليه واكيد علاقات هواي غيرها شمعنى 

حبيت هديل وجاي تدافع الها

  دنك ورفع راسه وجاوبني // استاذ امنية حياتي اكمل دراسه لكن ابوي بطلني بحجة الشغل وتالي عمري 18سنه 

زوجني وحده كل همها تحبل وتجيب حتى تلزمني بالجهال بعدها اخذت الثانيه الي صار بيناتهن سباق منو تغيض 

الثانيه واذا هاي حبلت الثانيه لازم تحبل وابد ماكو اهتمام بس هاي گالت والثانيه سوت وبس نريد هذا وجيب ذاك  

 وانا عندي خيير ما محتاج وصرت ادور غير سوالف وعندي علاقات هواي وچنت اصرف وما تهمني الفلوس 

واتعرفت على نسرين لو خلي نگول هي اتعرفت عليه رغم چانت قمه بالسقوط لكن انا رجال اتونس وارتاح وما ابخل 

عليها بشي بس الصدك استاذ مل هذا مو بعيني امنية حياتي اتزوج ابنيه مثقفه ومكمله 

 الى ان اتعرفت على هديل الي نستني كل شي استاد هديل حبتني الشخصي مو على مود فلوسي چانت رقيقه وناعمه 

وعينها مليانه ومؤدبه وحتى حبها الي وتعلقها بيه مو على مود شي لا لان تحبني علمتني هواي اشياء

:: على كلامك مؤدبه ومرتبه انت مو تعرفت عليها عن طريق هاي الي وياها بالكليه 

توفيق // تقصد نسرين استاذ ( هز راسه ) صحيح لكن انا مجرد ما كتلها اتركيها ولا تمشيين وياها 

هي ابتعدت عنها اصلا تگول هي بغير كليه 

جريت نفس :: زين توفيق انت تعرف هديل وين هسه 

توفيق باستغراب //ابيتهم غير 

اخذت نقالي من ع الميز وهزيتله راسي وسويت باصبعي اسكت واتصلت وفتحت الحاكيه

::هلا كرم اشلونكم 

الحمد لله (وجر حسره ) اشلونه ياسراج 

:: خيير كرم شصاير 

شنو سراج ما تدري 

::بعد شبيدنا ابو مرتضى الي صار صار انت شلونك العراريس شلونهم

كرم // شبيهم زينين وفرحانيين 

:: وهديل شلونها اقصد على مود اخوها

كرم //ساعات تبچي ويسكتها مرتضى 

:... طمنها كرم حقها خايفه على اخوها 

كرم // شطمنها بربك سراج ( اهنا انا سديت الحاكيه )الولد حارك البنيه شطمنها 

 ::مو انت اول واحد صرت تحچي وتجيب وتحط وتغلط وخلي الزمها هسه اتبدل الحچي

كرم بحسره // تدري بيه سراج بنات عباس احبهن على معزة ابوهن الله يرحمه لكن من سمعت هي طالعه 

ومو ويه الخط راسا صارت گدامي مياده وخيانتها صدگني انقهرت على عباس بگبره وتعرف العرض غالي 

ردت اغير الموضوع ::اي مفهوم بس هاي طمنها على اخوها خطيه عروس ومكسور واهسها 

كرم باستهزاء//ما عليها شي تبچي شويه وبعدين تنسى تبقى تسولف وتضحك

::انطيني اياها انا اطمنها انت ما اعرف شلونك صاير حچايه تجيبك وحچايه تاخذك 

كرم //هديل هديل هاج عمج سراج يريد يسلم عليج 

(فتحت الحاكيه ) الو 

::اشلونج عمو هدوله

هديل // اهلا عمو انت شلونك 

::اني زين عمج كرم يگول بس تبچيين على ياسر ومرتضى هم شكالي يگول دووم زعلانه على اخوها ولا چنها عروس

هديل //عمو خايفه على ياسر 

::ما علي شي بابا لاتخافيين اهم شي ديري بالج على زوجج انتي عروس ومرتضى حقه يشوفج فرحانه 

:عمو بعد الي صار والي سوته ناديه منو اله خلك يفرح 

::صحيح كلامج بس هذا زوجج وحقه عليج والي عرفته نتي تحبينه قبل ما تتزوجينه اي غير لازم تدارينه

:عمو بعيوني 

:: ادري بيج انتي حبابه وتحبينه المرتضى 

هديل //اي عمو انت هم وصي عليه 

::ان شالله بس يسوي اي شي يضوجج بس خابريني 

:تسلملي 

::انطيني عمج 

::هاا كرم انت رووح صبر هادي ومرته 

كرم //والله ما ادري شگلك سراج 

::مثل ما گلت العرض غالي من تحتاج شي اتصل عليه

:انت هسه وين 

::بالدوام يعني وين 

:وحنين 

::ما ادري بعد هي شغلتها يم القاضي ياالله فيمان الله

وسديته من كرم وانا اباوع التوفيق واگله //ها يابطل شفت حبيبتك 

توفيق مستغرب ويگلي // لا استاذ مو هيه هديل مستحيل تخوني تحبني 

رفعت اچتافي :: انا ما ادري بس هيه اخوهاياسر وبت عمها ناديه واتصور انت تعرف صوتها 

توفيق بعصبيه //بت الكلب الساقطه هي وامها اله افضحهن 

::هههههههه شتفضحهن اصلا انت المتهم الرىئيسي 

توفيق // لا لا استاد انا مو المتهم ولا خطفت ولا حركت الكرفان المتهم جريد الي سمه روحه ليث من تالي 

وام هديل واثيروحتى هديل

وگفت وصلت يمه لزمته من ياخته باثنيين اديه وحصرته على الحايط گتله 

:: شوف ولك انت گلتها هديل ما تعرف شي امها هي الي اتفقت وياك اذا صادف وجبت اسم هديل على السانك 

ياويلك ثق اله اعوقك ما اخليك اعرج لو اعمى لو اسگط ايدك لا وداعتك اخليك حالك حال المره افتهمتني مو 

توفيق //استاد بس هي ...

قاطعته ::هي ابنيه حالها حال البنات تحب وتنحب يجوز تتزوج الي اتحبه او لا اسمعني زين هسه البنيه تزوجت 

ومن تفك حلكك محد يعتقك افتهمت

هو دنك وسكت رديت سالته :: افتهمت توفيق 

هو هز راسه وهو مدنك //اي استاد بس هاي امها ما اخليها ترتاح بسيطه 

::هاي اذا طلعت انت منها عود ذاك الوكت بكيفك 

دگيت جرس واجه عنصر اخذه ودخل عليه رضا وگلي //شني سراج صار اشكثر ويه هذا الناقص 

حررتوفلسطين يو بعدكم 

باوعتله وانا انفخ هو اتقرب يمي وگلي //شكو سراج

جريت نفس ودگيت جرس وكتلهم ::جيبولي ليث 

رضا //اي هسه غير تفهمنا 

خليت ايدي وره رگبتي واتثاوبت ::اتضحت الامور ابو علي اتضحت

اجه العنصر. وهو جايب ليث وانا داير وجهي ع الحايط وگتله:: فك الكلبچات واطلع 

 سمعته فكهن وطلع درت على ليث وگمت من مكاني هو واگف ::انت ليث لو جريد 

هو ساكت ويباوع وما مهتم عبالك مو متهم انا طفيت الجگاره ولزمته ضربته بخشمه راسا صب دم بعدين بعينه 

ما انطيته مجال شبعته كتل ورفس بحيث زورگته بكل مكان حاول رضا يفكني لكن انا صار گدامي هذا المجرم نسيت

 كل شي بس اختطافه الناديه صرت اضرب اضرب الى ان اتمدد بالگاع ورضا گلي

:لايموت ابين اديك خلي نفتهم 

رديت وانا الهث ::ياريته يموت 

گعدت على الكرسي وانا فحطان جابلي رضا ماي شربت ورضا راح الليث وگعدا وانطا ماي باوعتله وحكيت 

رگبتي گتله ::بدون لف ودوران لان توفيق اعترف اشگد انطوك حتى تخطف ناديه 

هووباوعلي وهو ساكت اتقربت يمه وحچيت :: شوف ولك انا خلگي واااااسع والله منطيني صبر لكن بهاي القضيه 

بالذات خلگي ضيك واي صبر ما عندي صدك اخذك للكرفان واحركك صدگني احركك لو اربطك بسياره وامشي بيك

والا اگلك لا ليش هيج (وكانما اتذكرت شي باوعت الرضا )

::ابو علي هذا عباله انچذب علي تدري شلون خلي الكلبچات بايده وغطي وجهه وخل اخذه المزرعتك وهناك 

نربطه بالحبل (اتقربت منه )انزلك بنص البير وانت مكلبج هي ليله (واشر بايدي ) وداعتك الصبح تقر 

على ابوك جيبه ابو علي 

رضا اتقرب منه //مثل ما سمعت هاي القضيه شخصيه واحنا على مودها بايعين ومخلصين وداعتك هذا الي اشوفه 

  ) وياشر على نفسه ) عندي كتلة واحد مثلك مثل ما اكتلي چلب اجرب فاحچي احسلك 

هو باوع وجاوبني //استاد كله من توفيق هاي مو شغلتي 

من سمعته طگطگت اصابعي ::ادري انت شغلك كله ع الثگيل مخدرات عرگ سلاح بس هم الفلوس حلوه

:استاد قشمرني توفيق 

::لا مثل ما گتلك الفلوس محد يكرهها گلي ولك شگد قبضت 

بقى ساكت اتقربت علي ضربته على علبا يم رگبته من وره :: لا تسكت جاوب بالتي هي احسن 

هو حچى //استاد انا طلبت خمسه وعشرين بس همه دفعو خمسطعش وانوب اتفقنا على عشرين 

::بس هواي مو هواي 

هز راسه //اي استاذ هواي لان رادو نخطف ونودي الغير محافظه وهناك نكتلها 

:: وليش هالجرجره خو اخطفوها واكتلوها ودفنوها

ليث //استاد احنه ما علينه بالبدايه عبالنه نساوم عليها بعدين عرفنا شغلة ثار 

::وليش صبرتو هلگد ما كتلتوها 

ليث //اختلفت النيه استاذ 

::هاا وشلون ليوثي لو تريدنا نسميك جريد 

هو دنك وگال //استاذ بالبدايه عبالي نخطفها ونساوم عليها طلعت البت مطلوبه ثار 

::اي وشنو يعني بعد اسهل تنكتل وهذا هو ؟

استاذ النقل من محافظه المحافظه مجازفه ولازم اامن الطريق ولازم اشوف واحد يگدر يگوم بهاي المهمه 

::ايي وشفت اثير مو 

ليث هز راسه سالته :: انت تعرف اثير 

ليث // اي استاذ اانا اعرف اثير من زمان 

حچيت باستهزاء ::اي اكيد تعرفه صاحبك وعندك شغل مشترك انت ويا 

هو دنك جاوبني// استاذ شفت اثير وطلبت منه نخطفها ويخليها يمه على ما يجيني الامر واخابره ويصفيها

::ايي وشنو صار 

:الي صار استاد الدزوني اخطفها بنفس اليوم غلقو الجهاز وصارو يحجون وياي كلمتين ويرجعون ايغلقونه 

:: شيحجون وياك 

— انتظرو لا تنفذون اثير صار بشك ويخابربعدين فهمته اكيد همه يردون ايبردون السالفه وبعدين شنو يگلونه 

انفذ عاد همه وره تلث تيام خابروني گالو لاتتصلون لمن ما احنا نحاچيكم انا هم فهمت اثير وگتله ما طوول همه 

يدفعون ننتظر وكل شي بحسابه 

وره تقريبا اسبوع اكثر خابروني گالو عدنا ظروف جبرتنا نغلق النقال طلبومن عدنا انصفيها

:: يعني اتقتلوها 

هز راسه. // اي استاذ نكتلها انا خابرت اثير الي اشوفه ما مهتم ورد عليه ابرود گال هسه هو مو يمها

عنده شغل 

انا رفعت حاجبي ::هاا وشنو شغله 

:ما قبل يگول بنفس اليوم العصر خابرني وگال اريد خمسين مليون ياالله اكتلها وهاي سالفة الثار خليها 

على صفحه انا گتله اكيد انت مخبل شنو خمسين مليون هو رد عليه اذا ما تنطوني الخمسين مليون بايدي 

راح اسلمها للشرطه 

انا حاولت اهدئه وخابرت الجماعه گتلهم بطلبات اثير لكن همه رفضو وگالو بعد ما يدفعون ولا فلس 

 رجعت خابرت اثير گتله ما يهمنا تقتلها اووتاخذ اعضائها تبيعهن

سالته ::يعني انت دفعت الاثير فلوسه ؟

ليث //استاد دفعت مليونين وتلاثه وره ما يكتلها لكن اثير بقى يتهدد واسوي وكلكم اصفيكم 

:: زين ليث جاوبني هو اثير يعرف الجهه الي ودتكم على ناديه حتى تقتلوها 

هز راسه //لا استاد اثير وياي يعرفني بس انا وعن طريقي اتعرف بتوفيق 

   

دخنت جگاره ::اي وبعدين 

ليث // استاذ انا اعرفه الاثير مجرم وكل شي ممكن يسوي لان هو صار يهدد انا گلت التوفيق خلي نغير الشرايح 

::ليش شكم شريحه عندك ؟

باوعلي انا استردفت:: يعني رجال بكل هذا الشغل والمخدرات والحشيشه والعرك يغير شريحته بهالسهوله 

:استاد هاي الشريحه مو دائما استخدمها شريحتي الاصليه اخلي بيها كل الارقام وبعدين الي اريد اخابره وما اريد 

يتصل بيه على شريحتي اخلي وحده جديده 

::مفهوم وبعدين

ليث //انا گلت خلي اثير يبرد شويه واكيد هو راد يساومنه لان نقلناها من محافظه المحافظه ثانيه لان حتى لو بدلت

الشريحه اثير يعرفني ويندل مكاني 

::انت تعرف هذوله الدزوك حتى تخطف ناديه 

: استاد انا اعرف توفيق يعني هو الي عرفني على ذوله الگلولي اخطفها 

::يعني توفيق هو الدلال بس انا اريد اعرف من جابهم الك

ليث //توفيق گلي شغلك وياي انا ومن اجاني حتى نتفاهم اجت ويا مره 

::توفيق انت تعرفه والمره تعرفها 

ليث //بالبدايه چانت مبوشه حتى وجهه ما شفته 

انا باستغراب ::شنو مبوشه شلون 

ليث وهو ياشر بايده على وجهه //استاذ لا بسه بوشي وعبايه لكن انا گتلها اشوف وجهج ونتفاهم هي گالت ما 

يصير انا رديت عليها باستهزاء

وگلت شنو انتي من الله ما تخافين وتستحيين تخافين من الناس لكن هي فهمتني الي بيناتهم ثار ومثل ما حرگو

گلبها لازم تحرگ گلبهم

::همه منو ؟

:والله ما اعرف استاد 

::المهم شفت وجهه 

اي شفته مره چبيره عمرها يجي نهاية الاربعينات 

::ما عرفت اسمها 

:من سالتها توفيق گلي شغلك يمي 

:: يعني هو توفيق الي اشترك وياكم

هز راسه // توفيق مجرد واسطه بيني وبين هاي المره الي تكول كل اهلها يعرفون بالي تريد اتسوي 

ولان تخاف عليهم ما تريدهم يصيرون بالصوره 

::مفهوم بس ما جاوبتني ليش ايسمونك جريد يعني العصابچي يسمي روحه اسم مال شقاوه 

:استاذ ابوي سماني جريد على اسم عمه بس خالي اخذني وطلعلي جنسيه وسماني ليث 

اتقرب رضا ودك على چتفه //انت بسوايتك هاي مو ليث لا انت جريدي وجريدي نگس 

دگيت جرس واجه العنصر اخذه للمجرم وانا خابرت عبد العزيز ورضا يباوعلي ومذهول 

:ياهمه العدهم ثار غير خوالها واهل سلدار 

باوعتله وجريت نفس:: لا ابو علي على كولة رضا ابن اخوك الناس طوو صفحة بتهم وابنهم من عدمتهم الحكومه 

لان ما يردون يفتحون دفاتر على نفسهم 

رضا //مو هليگلك ثار 

::اي ثار وثار چبير وقديم 

: //يعني عرفتها المره 

هزيت راسي ::اي رضا عرفتها

      - - - ياهيه سراج ؟ 

باوعتله وانا لازم ظهري وانفخ وگتله ::افراح مرت هادي 

رضا گام منمكانه عبالك انلدغ //انا اخوك افراح ام ياسر 

::ايي ام ياسر 

:يامنعولة الوالدين ليش سوت هاي المصيبه 

هزيت راسي وبوكتها اجه عبد العزيز گتله 

::اخذ اقوال توفيق وليث واي احد يجي يسال همه ما موجودين تره ليث مبين علي مسنوود

عبد العزيز //لاتوصي حريص 

::يعني اطمن

عبد العزيز //اكيد استاد ابو علي (اشر على رضا ) سولفلي القضيه وانا بطبيعتي اكره الظلم 

وصلت يمه وربتت على چتفه :: يعني اعتمد 

هز راسه //. انا مو اقل منكم يمكن كل انسان عنده غيره لازم يسوي كل الي يگدر علي بس حتى ايبيض 

صفحة البنيه لان انظلمت والمجتمع اكيد راح يظلمها اذا ما طلعت الحقيقه فااعتمد استاذ وانا وياك بالي تريده 

:: كفو منك وصدك اخو اختك واريدك من اخابرك تطلعهم كشف دلاله وتلقي القبض على كل اسم يجيبونه 

طرف بالقضيه وخليني بالصوره اول باول

:: هسه استاذ ؟

::لا من اخابرك يجوز باچر بعد اسبوع يجوز شهر على حسب 

- تدلل استاد 

::مشكور واريد ياسريطلع

باوعلي عبد العزيز هزيتله راسي وگتله وانا اباوع للساعه :: جيبه اهنا فد ربع ساعه وانا اروح البغداد 

وانت اخذه بايدك سلمه الاهله وگلهم لان انا عزيز عندك واترجيتك اتطلعه وبلغني اول باول 

- صار استاذ بس اگدر اسأل ليش 

:: السببين الاول حتى يطمئنون وما يحاولون ايسوون شي ايبرئهم والثاني انا متأكد ناديه من تعرف الحقيقه 

ما تقبل ياسر ينسجن خصوصا لا هيه ولا اختها اشتكن على ياسر

— مفهوم استاذ 

وگفت وصلت يمه گتله 

::تسجيل ليث وتوفيق موجود ولو توفيق بخزره يعترف 

- هذا هو اعتمد 

::هسه وصيلنه على چايات وربع ساعه وجيبلي ياسر 

- صار استاذ 

رضا باوعلي //طلعت ياسر ليش مو امه الي ودتهم يخطفون ناديه 

::امه رضا هذا غبي ارعن ما يدري

جابولنه الچاي شربنه وگتله ::رضا روح انتظرني بالفندق اشوف ياسر وامرلك نروح 

رضا //وين نروح

::البغداد غير 

— بكيفك 

انا ردت امازح رضا لان اشوفه مذهول :: تريد نمر بالصويره ما عندي مانع 

رضا باوعلي واتحسر //ليش للصويره خو نروح للمجر اقرب

وطلع رضا وجابو ياسر الي من شفته ما ادري شسوي ابدي اكتله احرگه بدون ما احچي ويا لزمته من ايده وهو 

يباوعلي وانا ساكت لكن البركان الي بداخلي يحرك ياسر واهله حاولت اهدي بس بنفس الوكت اذكره بالي سواا 

جريت نفس وگتله ::ياسرهسه انت راح تطلع 

هو باوعلي بذهول انا هزيتله راسي وگتله ::ليش متعجب راح تطلع 

ياسر // بس انا ...

قاطعته :: انت شنو بابا انا سويتها من يمي وكافي اصلا ما لگو بالگرفان اي شي يدل على وجود بشر 

بي من احترك اطلع عمو وانسى 

ياسر بعدم مبالاة // انسى شانسى 

:...حاول ولو الي سويته ما ينسي

طلعت من يم ياسر وخابرت هادي گتله 

:: الو هادي 

- هلا سراج بشر 

::اسمعني ابنك بعد نص ساعه يجيكم كلمه زايده تصيح علي ما اريد انا سويتها من يمي 

هادي بفرح //صدك سراج

::صدك هادي بس دير. بالك لان ابنكً جاي يمر بفتره صعبه انت دير بالك علي لا تسمعونه اي حچايه ولا تلومه

اتعامل ويا ولا كانه شي صاير اقتهمت لان من تصرفاته مستعد حتى ينتحر هادي انا لازم اروح البغداد عندي 

دوام ما اريد ابين بالصوره تصير عليه مسؤوليه 

هادي //يعني شنو ؟

::يعني سكرت ملف القضيه كلش فلا تجيبولها طاري 

هادي // وحنين 

:: اشبيها حتين 

  - - مو مشتكيه نا اعرف مطلوبه 

  :: من يمي راح اسدها اطمن 

- صدك سراج

:: ^شنو اچذب عليك بعد نص ساعه ابنك يمك فيمان الله 

هو بفرح صاح على مرته - افراح افراح ياسر راح يطلع 

اسمعها // صدك هادي منو گلك 

- سراج يگول سديتها من يمي 

جاوبته. :: ياالله لازم اروح ما اريد ابين بالصوره 

هادي بفرح // الله وياك ما اعرف شلون اشكرك 

:: شتشكرني ناسي هو ابنك وبيبيته منيره يعني مثل ابني اهم شي مثل ما وصيتكم اسكتو

- - بس تبقى سالفة حنين 

:: يمي هادي ما عليك انتو اتصرفو ولا كأنه شي صاير

رجعت فتحت الباب على ياسر الي اشوفه منهار گعدت يمه وگتله 

:: ياسر الي سويته جريمه مو بس بحق بت عمك جريمه بحق نفسك 

باوعلي ودنگ //عمو صدك ما لگيتو شي بالكرفان 

هزيت راسي :: اي وداعتك 

- - يعني عدله 

:: الله اعلم المهم انت تروح وتحرك هاي الصفحه السوده الي بحياتك وتبدي من جديد

باوعلي وعيونه كلها دموع وندم // تتصور اگدر ؟

:: بعد انت بكيفك انت غلطت ولازم تتحمل نتائج غلطك 

هز راسه ودگيت الجرس واجه عبد العزيز الي گتله 

::انا مضطر اروح البغداد وانت گوم بواجبك فيمان الله

طلعت ومريت على رضا الي لگيته منتظرني وطلعنه بالسياره ما نعرف وين رايحين لان كل واحد بينه يتمنى 

يروح المكان الي رغم قربه لكن من الصعوبه نوصله لكن بالاخير قررت اروح البغداد

////|||||///////////////////////////////////////

ناديه 

من النذل اغتصبني انا مادريت بنفسي اله وانا بحضنه وهو نايم فزيت وانا اشوف نفسي شلون صرت انسانه 

منتهيه ما الي وجود لان فقدت اغلى شي بقيت احارب واحافظ علي شفت نفسي انسانه مغتصبه محطمه 

فتحت عيوني وانا اتمنى اكتل هذا الحقير

بقيت ارجف واباوع بالغرفه ا يد اشوف شي اقتله بي باوعت شفت على جهته موبايل بدون تفكير اخذته 

راسا انطيته صامت وبلمح البصر صار گدام عيوني رقم سراج 

ولان اعرف هو الوحيد الي يگدر يجي وينقذني بدون اي تفكير كتبتله رساله وگتله انو انا مخطوفه وبس 

يمي معمل طابوك ليفوك مكتوب كلمة( الله ) بلون اصفر ولا تحاول تتصل تره ايكتلوني

بوكتها چنت ادري انو بعد الي سووا بيه اثير مصيري الموت لكن اهم شي يعرفون انو انا انخطفت 

والي خطفني ياسر 

بعد ما كتبت هاي الجمله وشفتها وصلت حذفت الرساله ورجعت النقال المكانه چنت احس بحراره بكل 

مكان بجسمي 

وهو نايم ما منتبه وانا اترقب كل حركه يتهيأ الي سراج اجه وراح ينقذني الى ان فعلا اجه وسمعت اطلاق نار 

ما حسيت بنفسي اله وانا ابيت رضا ويمي سراج والي شفت الكراهيه بعيونه

وكان ابده يكتلني لكن راد يعرف الحقيقه وقررني بدون ما يباوع بوجهي وهذا الشي ذبحني اكثر مما انا مذبوحه 

ومحطمه حچيت كل شي اعرفه حتى يفهم انو انا كنت ضحيه الابن عمي ياسر 

اعتقدت انو الي يدور ويبحث عليه هو سراج ويا عمي كرم لكن اتفاجات وانا اشوف عمي رضا هذا الرجال 

الغريب وهو موجود ويه سراج لا واخذني للارض مالته وهو الي نقذني من شمرت نفسي بالماي بعد ان حسيت 

خلاص سراج ما يشوفني اله نكره ما الي وجود فقررت انهي حياتي لكن سبحان الله انكتب لي عمر جديد 

على ايد عمي رضا

واسمعه شلون يحچي على سراج ويگلي هو متخبل الى ان لگاني وفعلا من سمعت كلام رضا باوعت السراج 

وانا اشوف التعب البادي علي وعيونه شلون تعبانات واشوفه بس يدخن ويتمنى يكتلني خلاص اول مره اخاف من 

سراج وانا اشوف تظرات الغضب بعيونه وچان ابد ما يباوعلي ولا يحچي وياي اله اذا راد يسالني او يستفهم على 

شي يخص خطفي

وما انسى شلون اتقرب مني وهو شايل المسدس يريد يكتل نفسه وانا اشوف الاصرار بوجهه انو فعلا مستعد

 يكتل نفسه ولا يسمع احد ايعيره بيه ما عرفت سبب هذا الشي وما عرفت ليش ما گلي اكتلج 

وما انسى لمن صار يهزني من عرف الي خطفني ياسر وهم ما انسى كلامه اليه لمن يتوعدني يكتلني ويدفني 

اذا يطلع كلامي چذب

اهنا انا ما شفت بي سراج الحنين الي دائما يسأل علينه ودائما چان يوصي كرم يدير باله لا شفت 

سراج الاحمق العصبي الي يريدني اطلع چذابه حتى يلگاله عذر يكتلني ويرتاح

انا بقيت ابيت رضا بعد ان راح هو وسراج بقيت يم اخت رضا ام حسين هاي الانسانه الطيبه العفويه الي 

دارتني وما فارگتني وبالليل تنام يمي بنفس الغرفه بس لو تدرون وين تنام 

تنام داخل يم الباب وزوجها بره هم يم الباب 

ام حسين مثل اخوها طيبه ما حاولت تسالني على شي او يجوز چانت تعرف بس ما رادت تحرچني 

چانت تگعد وتسولف وياي واكثر من مره رادت مني اطلع واتمشى بالكاع لكن انا رفضت اطلع 

من الغرفه حدي للحمام تصدكوني اذا اگلگم حتى ما اشتهي اسبح لان چنت اخجل من نفسي

  بااخر جيه لمن اجه يسالني عن الحقير انا طلبت من عمي رضا يجيبلي حنين رغم انا طلبت من رضا 

لكن جنت اقصد سراج الي شفته يباوعلي بعتب لان ما طلبت منه 

بعدها بيومين او اكثر خابر وسالني على اسم المجرم الي خطفني ويه اثير وگلي اسمه جريد 

انا فزيت وگلت ايي ايي اسمه جريد 

بعدها ما عرفت شي عنهم

  بقيت مترقبه واتمنى اعرف شيسوون وهم اريد يجيبولي خبر عن حنين ويلقون القبض على جريد وياسر 

ومن تنعرف الحقيقه انا الي راح اطلب من سراج يقتلني ويخلصني لان انا بصراحه ما صرت ذيج ناديه الي افكر 

شلون اتخرج مهندسه واطلع انا واختي ومرتضى نعيش ابيت ابوي لا 

صرت بقايا انسانه محطمه اهم شي اموت لكن بعد ان يعرفون الحقيقه وأأمن على حنين عد مرتضى

 واخليها تعيش وتتزوج اما انا اذا سراج او هادي ما كتلني فانا انهي حياتي بايدي وهذا چان قراري

خصوصا وانا قررت اخابر سراج واطلب منه اشوف حنين ولو للمره الاخيره كان رده مفاجئ اليه 

اجتني ام حسين وره الظهر وهي تگلي 

خاله اللاوين حابسه روحج امشي اطلعي شمي هوا رب العالمين 

باوعتلها وگتلها ... ... خاله اتصلي بعمي رضا اريد احچي ويه سراج 

هزت راسها. // اي صار وتددللين 

اتصلت هو ردعليها // الو اشلونك خويه ابو علي 

- اگلك هاي البنيه تريد عمها تحچي وياا 

 - اي هسه دقيقه

انطتني التلفون وانا راسا حچييت. ... ... الو سراج ااريد اشوف حنيين 

چان رده صادم :: وبعد يابت الكلب شتردين تتامرين بت القندره ما اريد اسمع صوتج

سد الخط وياي وانا ما بين عليه شي لان ما صرت اهتم الاي شي وقررت ان انهي حياتي بايدي 

 بس اعرف شسوو وشنو الي صار واثير شنو كال

لكن بعد فتره عرفت شي گلب كل هاي الامنيات والموازين صرت اريد الموت اي لكن مو هسه 

  لا بعد ان انتقم من كل واحد ظلمني 

شكرا لزيارتكم عالم روايات سكيرهوم