رواية اغفري لي الفصل الرابع والخمسون بقلم أوتار حزينة
غاده
«،،لييش حمزه لييش هذا بيتي شلون
تريدني اعوفه اني هناك اشوفك
بي وهذا الي مصبرني
على فراكك
«،راح تعوفي غاده
«،،مارااح اعوفه حمزه مااكدر اعوف
المكان الي اشوفك بي
جاوبته بتوسل
«،،،لااا راح تعوفي لان اا
سكت وحسيته كام يرجف صفنت علي
من شفت دموعه نزلت كمل
بصوت مخنوك
«،،،لان انتي طالك
فكيت عيوني وحسيت النفس وكف بصدري
واختنگت الكل انصدم وظلوا
صافنين علي
مشيت خطوه عيوني علي جسمي كله
كام يرجف وحيلي راح
اريد احجي صوتي
ماطلع
هو تحرك بسرعه
فتح الباب وطلع جعفر ومهيب وعمو
لحكوا
تخبلت اريد اصرخ باسمه اريده يرجع بس ماكدرت
روحي راحت مني وانهاريت عمه
لزمتني وصاحت
«،،،وولكم الحكو عليه
حسيت مي بارد صار بوجهي شهكت بصوت
قوي
«،،غاده اشربي شويه ولج راح تروحين من ايدينا
المي كام يوكع من حلگي وفصلت عن الدنيا
بس اسمع صوته كال
«،،انتي طالك
غسلوا وجهي اكثر من مره وعي رجعلي
بس مو تمام جسمي ظل يرجف
ووضعي صار مو تمام
كلت بدموع
«،،،ليييش حمزه ليييش
انهاريت بحظنها ابجي واشهك مو مصدكه
الي سمعته عمو مهدي كال
««،كومي رقيه خلي نرجع
««،عموو ماارجع
جاوبته كمت وكعت هي تلكتني وخرت منها
مشيت لباب هي اجت لزمتني
جعفر وكف بوجهي
كال بقهر
«،،وين رايحه
«،،علي ودوني علي هو مو قصده يطلگني
اعرفه من قهره سوه هيج
الكل سكت صحت
«،عمو خلي يجي الله يخليكم خلي يرجعني
عمو مهدي كام يبجي جعفر سند روحه على
الباب والعيون غوركت صحت
من گل گلبي
«،،حمزززه وينك اارجع
بس هو مارجع ولا رجعني واخذوني من يمه
متهستره وصايره فد مره ماودوني
لبيتنا لا اخذوني لبيت اهلي
لان هو حلف عليهم مايرجعوني
بعد اله
وصلت الهم حالي حال من صار عندي عزه
بلا ميت ادك والطم وملخت روحي
تخبلت لا كدرت اسكت ولا
كدر احد يسكتني
شفت زهره اجت وكفت ين باب الاستقبال
تبجي وحالها حال
صحت بيها اني شاك هدومي وملخه وجهي
«،،،كله منج اااانتي هجمتي بيتي من الله يهجم
بيتج
«،،،،ولج كاافي راح تموتين
ماما صاحت بيه واني روحي مفرفحه الطم
ويلزموني اخويه وخواتي دفعته
اله وصحت بي
«،،عووفني وروح عليها الي بعتني من وراهاااا
حظني يبجي وياي ادفع بي اصرخ
«،ولكم ليييش هيج سويتو بيه حمزه ليييش
طلگتني شلون هنت عليك شلون كدرت
ادكولها وانت وعدتني مايفرگنا
غير الموت
والموت شفته بنفس اللحظه من حسيت الم قوي
ضرب صفحتي ماعطت بس ظهري
تقوس وعرگت
«،،غاده شبيج
النفس راح الكل جان يمي باوعت عليهم كلهم بابا
لزمني وسال بخوف
«،،بنتي شبيج
الالم رجع اقوه وخلاني اعيط والم روحي
والزم بطني
«،ولج شبييج
معاذ صاح
«،،راح اموت
حجيت هالكلام وجسمي مات وكعت بحظنه
هو وبابا اسمع صراخ ماما وخواتي
حسيت انشاليت وركضوا
بيه
بالسياره كمت اذب من راسي والالم زاد
وخبلني كمت الوب من الوجع
الموت شفته بعيوني
وهو هم جنت
اشوفه اله
الي خذلني
وخلاني اوصل لهل الحاله
اخذوني لمستشفى فحصوني وبسرعه
حولني على العمليات لان طلع المصران الاعور ملتهب طبيت منتهيه وعرفت بعدين هو طاك
بطني والله سترني من
الموت
حمزه
عگبت ليم الولد كعدت مخنوك واحس خسرت روحي وگلبي مات من طلگت
غيده
وانه والله ماجنت اريدن اهدها لجن سويت السويته حتى تروح وتعگب لاهلها لان اعرف ذوله الجلاب ماراح يعوفها بحالها اعرفهم نكسين ويكرهوها وخفت عليها لايأذوها
هي وولدي
كلشي راح من عندي حالي مالي جدي الي جتله قهري وقهر ذولاك
وماعندي استعداد اخسرها الها هي هم
ردتها تبعد
تروح يم اهلها لان جنت اعرفهم ماراح
يجوزون
لان هي حرمتي ،،،،، ولا هي
راح تعوف حگي الي اخذو غصب وراح تظل بمشاكل وياهم هي وجعفر وانه اعرفه هذا مغلوب على امره ومايكدر الهم
وهم استفردوا بي وبحالي واملاكي من شافوني
صرت بالسجن وخفت لا هو هم يصير
بي شي واخسره
ولا بيه اسجل املاكي باسمه لان هم اعرف
راح تصير مشاكل بينه وبينهم لان
هم ماراح يعوفوا بحاله
ولا كدرت ادخل مهيب لان اعرفه عصبي وراح
يعلكها على راسهم ووالولد مرتين راد
ينچتل وشفت ابن عمي عباس
شلون سحب سلاحه
ورمى عليه وراد
يچتلني
وهالشي خفت لايصير بيهم وتصير من جوه راسي اردد وي روحي هيج احسن اي خلها
تروح تبعد عنهم
هي وولدي
لجن السويته ذبحني وكام ياكل بيه اختنگت وحيلي راح وحسيت راسي ثكل فد مره وروحي كامت تروح مني
كمت سندت ايدي على الحايط اغمض وافتح الولد جانوا كاعدين من نايمين
ابو هاجر شافني سال
«،،،ابو علي شبيك
مارديت مشيت كم خطوه اذني صوفرت
بقوه والدنيا افترت بيه شي حار نزل من
خشمي غمضت ووكعت بالگاع
وره مشوار كعدت شفت روحي نايم بالطبابه
مال السجن وخالين اليه مغذي عرفت
ضغطي صعد كلش وضاربيني
ابرتين حتى ينزلوا اليه
كملته ورجعت اجر برجلي
حارسين يسندون بيه
طبيت الولد تلكوني
«،،سلامتك وليدي
الحجي حجه حسيت بخنگه لان اذكرت جدي
اخذوني من عدهم كعدت بمگاني
صافن واحس اني ماراح
اظل طيب لان
طلگت غاده
روحي معلگه بيها ومااكدر بلياها حتى لو جان
بعيده وانه بعيد اريدنها اليه لان
شفت من طلكتها شصار
بيه
ثاني يوم خليت حارس يخابر مهيب ويگله يجي
عليه هو وعمي مهدي ثالث يوم اجوي
كعدت يمهم اسمع
عمي يلوم بيه
لان طلكتها
وعرفت هي متخربطه وطاك المصران الاعور
بطنها من وره قهر السويته
بيها والله سلمها من
الموت
ونيت من قهري عمي كال
«،،،ليش هيج بويه شلون انطاك گلبك اطلك
ام علي
عاينت علي شاف القهر مرسوم بوجهي
وسكت مهيب كال
«،،الضابط كال انت تخربطت بليل وصعد
ضغطك
«،،انه راح اعگب ام علي
حجيت هالكلام وكملت
،،،اشهدكم امام الله انه رجعت غاده محي حسين الى عصمتي وهي بالعده الشرعيه
«،،يالله
عمي صاح وكام باسني من راسي مهيب
كال
«،،شاحجي عليك واني اعرف انت ماسويت
السويته الا من قهر گلبك
«،مااريدها تعرف ضموا هالشي عنها
صفنوا عليه عمي سال
«،،ليش حمزه
«،،خلها بعيده بس تعرف انه عگبتها راح
ترجع للبيت وانت تعرف البله
الي هناك
عمي سكت وهز راسه مهيب سال
«،،شلون حمزه يعني لازم تعرف انت رجعتها
لعصمتك حتى تعرف وترتاح لان
البنيه صارت فد مره من وره
السويته بيها
«،،كلت لاااا مهيب
جاوبته وكملت
««مو هسه تحجون خلوها فتره يم اهلها وانه
اكلكم شوكت تحجون الها انه
عكبتها لعصمتي
سكتوا ماحجوا شي
من حجيت هالكلام حسيت روحي ردت اليه
وضيق صدري فك والايام مشت بيه وزادت
صعوبه لان الشوك الها ذبحني وسل جسمي وروحي وانسليت بعد اكثر من اجه جعفر وعمي مهدي وكالوا اليه عمي صالح اخذ بيتي وكعد بي
وحبوبه طلعت منه وراحت كعدت يمه
وصارت بينهم مشكله جبيره
ومجاوزين على عمي
شفت القهر بملامحه والوجه مطعون سالني
«،،شاسوي وليدي گلي اروح اشتگي عليهم
«،،لااا
جاوبته جعفر حجه باعصاب والعيون
حمر
«،والله ردت اچتل عباس وقاسم لجن ماخلوني
ماخلوني حمزه
حجه واختنگ كلت
«،،عوفهم شيريدون ياخذون خل ياخذون
وانت لاظل بيتك شوفلك غير مكان
اگعد بي وايجاره عليه
سكتت وكملت
«،اي شي تحتاجه انت وعمي مهدي روحو اخذو
من ابو حيدر انه وصيته عليكم وعلى
ام علي
«،،انه مو محتاج غير اشوفك سالم وطالع
من هالشده وليدي
عمي رد بقهر كلت
«،ادعيلي عم
««والله ليل ونهار كاعد ادعيلك واتوسل
برب العالمين يفكك من هالضيجه
الزياره خلصت واجه الحارس كمت
وكلت بهدؤ عكس الغضب
والنار المشتعله
بصدري
«،،كولوا لعمامي وولدهم حمزه يكول الحساب ثگل
وتتلاكه الوجوه
غاده
ماتحملت السواه حمزه وقهره خله المصران
الاعور يطك بطني ردت اموت بس
الله باوع لحال ولدي
وخلاني الهم
كلها يمي اهلي جعفر عمو مهدي رانيه اجت
صايره فد مره حظتني تبجي
وتدعي على عمامها
وولدهم
عرفت منها بيبي من سمعت بي طلگني
متخربطه وواكعه من طولها
وصايره فد مره
مو بس اني انصدمت بالسواه الكل انصدم
والعيون بجت علي وعليه
وره يومين طلعت من المستشفى دمعتي بعيوني اون من الالم ومن وجع السواه
بيه
نمت بالفراش جسد بلا روح والجنت اذكره
واصبر روحي بي صار الي سبب
وجعي وقهري
عيوني على ولدي الي جابوهم اليه نايمين
يمي بالغرفه بجيت بخنگه على
حالي وحالهم الي صار
يكسر الخاطر
عقلي لحد هاي اللحظه ماجاي يستوعب السمعه منه ولا جاي اكدر اصدك هو تخلى عني بهل السهوله
رحت اله تعبانه مريضه ملهوفه علي
ومشتاگه موت اله
وهو استقبلني بروده حتى ماحظني
ولا لمني لصدره ،،،جنت اعرف بي تعبان مقهور
ادمر من وره الصار بس اني هم جنت
مثله وردت شوفتي ترد
اله روحه مثل
ماردت هم شوفته ترد الي روحي
بس هو طلكني واخذ روحي من سوه هيج
ولو ميته بالطريق ولا رايحه
اله وسامعه هالكلمه
ماما طبت شايله صينيه كعدت يمي
وكالت
«،،يله غاده اكلي حتى تصيرين زينه
درت وجهي من الاكل
«،ولج بس اكلي شي والله راح تروحين من
ايدي
جنت مااحجي ساكته بس دموعي تحجي
الي ماكدر لساني يگوله
«،غاده ماما مايصير هيج انتي جاي تعذبين
نفسج وهالشي حرام عليج
ليلى طبت مقهوره وصايره دم من ورايه لان
عرفت بالصار سلمت
«،،شلونج خاله
«،،شلوني وي هالقهر
ردت عليها وكامت تبجي كملت
«،،شوفيها شلون صارت لا اكل ولا تحجي
وخايفه عليها لاتروح من ايدي
ليلى لزمت ايدي وكالت
«««غاده اكلي لخاطر ولدج
حجيت بخنكه وتعب
«،،،شفتي شسوه بيه
صفنت عليه بعيون مغوركه كملت
«،،خذلني ليلى وطلگني الجان منطيني وعد
للموت مايعوفني عافني اني وولده
حجيت هيج وشهگت بصوت قوي ونيت
من وجعتني العمليه لزمتها
ورجعت ليوره
«««ولج كافي راح تموتين من هالقهر
«««خلي اموت ليش ماعفتوني اموت
جاوبت ماما وكملت
«،،لو ميته بالطريق ولا سامعه الي سمعته
منه
«،،غاده اني احس بي هو سوه هيج من قهره
من ولد عمه
ليلى جاوبت ماما كملت
«««اي والله ماسوه هيج الا من وره ذوله الجلاب
عمامه وولدهم لان خاف عليها
وعلى ولده منهم
«،،جان خلاني بيت ليش يطلگني
جاوبت وكملت
«،جان كلشي يكدر يسوي الا الطلاك ماما
ليلى ردت
«،،اكيد هو يأس من حياته لان شاف روحه
انحگم 15 سنه وهاي مو شويه
وفوكاها اذا طلع
راح يكتلوه اهل الولد
كمت اسمع التبريرات اله واني ساكته بس
شي ظل مصيطر على تفكيري
هو مثل ذاك باول
محنه بحياتنا
تخلى عني
بهل الايام ماشفت زهره ولا اجت عليه
اخويه ظل يروح ويجي عليه
القهر تارس ملامحه
وصار فد مرة
من ورايه
اسمع منه نفس الكلام اني السبب كله مني
لو يرجع بيه الوكت والله مااسوي
السويته جنت مااجاوبه
التزمت الصمت ويا ووي اهلي كلامي صار قليل واكلي بالتوسل يله اخلي
لكمه بحلگي
كمت ،،،،انهزم من الكل واسوي روحي
نايمه واني عيوني ماجانت تغفى
بس تبجي الوم بي
واعتب علي
اشوف روحي بذاك اليوم من راد يطلگني
ورفضت وتوسلت بي مايسويها
وماسوها وانطاني
وعد للموت نظل
سوه
وجان ماكو حب بينا شلون هسه كدر يحجيها
وهو يعرف بيه شكد احبه وشلون
تعلقت بي
واني هم اعرفه هو يحبني ويموت عليه
وجان هالشي لازم يخلي مايسوي
هيج بس هو سواها
وخسرني للابد
مهيب
جانت اليوم خفارتي كعدت ادقق بالقضيه مال حمزه اگلب الورق للمره الالف اكول بلكي فاتني شي
قريت هو لكوه مسافه عن من الغرفه الي يكعدون
بيها الولد
اكو ادوات مال زراعه كرك فاسه خرماشه
وحديد هوايه وحده منهن
استعملها القاتل
وضرب بيها
عزيز
دققت بلكشي يخص الجريمه ومالكيت اي
شي يخليني الكي ثغره او الزم طرف
خيط يخليني اعيد فتح
قضيته
ورثت جگاره وفرگت رگبتي بقوه تعبان وماجاي
انام من وراه هو احتل تفكيري
وقهره دمرني
اخذت جهازي ردت اشوف كم صوره للجريمه
دزهن اليه الضابط مال التحقيق
رحت للمعرض گلبت بالصور
صفنت والروح اختنگت
من شفت ذيج ويمامه بحظنها
لا كدرت امسح صورها ولا كدرت انساها
ولو لحظه اني بهذا القهر جانت
تمر خطف من جدام عيوني
وتخلي گلبي ينمرد
والروح تختنگ
بعد اكثر
كلت
«،،امسحهن مهيب ليش خالهن وانت عرفت بيها
هي طلعت مو ارمله ومهزومه من
رجلها
سكتت وكمت اون من قهري
واردد
«،،هاي حوبه البنات الي ضحگتن عليهن
وبجيت عيونهن طلعتيها انتي
بيه وقهرتني مثل
ماقهرتهن
اختنگت ذبيت جهازي وكمت رحت وكفت
يم الشباج ورثت جگاره ثانيه
سحبت نفس طويل
وذبيته بحسره
اذكر ذيج الايام من جانت يمنا وبيتنا
ارجع من وكت ملهوف على
شوفتها
اطب ومن تشوفها عيوني افرح والگلب
يفز وكلشي يتغير بيه
هي من دون كل البنات الي حبيتها ومتت
عليها وهي نفسها الي خلتني
اكرهها واكره صنف
النسوان
حتى بيت اهلي كرهته لان كمت اشوفها بكل
مگان واسمع صوت بنتها الي
تعلقت بيها لان من ريحتها
وحسيتها من صدك
هاي بنتي
كمت اشوف روحي كاعد بالصاله يمامه
بحظني احجي وياها وعيوني
على امها تروح وتجي
من جدامي
اذكرت مره من بدت قصه حبي اني
وياها من رجعت الضحى من الخفاره مالتي
طبيت للمطبخ سلمت على امي وام ياسين
رحت لجوه ادور عليها شفتها
صعدت لفوك
ابتسمت وصعدت وراها مشيت بهدؤ بالصاله
الفوك جان باب غرفتي مفتوح
طبيت جانت تخلي هدومي
بالكنتور حست بيه
واندارت
سندت روحي على اطار الباب وجتفت
ايدي لصدري وكلت
«،،شلونج ياحلوه
«،،،،زينه
حجت واجت تريد تطلع وكفت جدامها
رجعت خزرتني وكالت
«،،ها عبالك حنيت وتريد هم تنگفخ
«،،ههههه
ضحكت وصفنت
بالعيون الي اخذت گلبي
وخلتني اضيع
بيهن درت
وجهي وكلت
«،،هذا خدي اضربي
«،،بلا سخافه سياده النقيب
هم ضحكت وكلت
«،،مو اذبج بالسجن ولج
صفنت بعيوني وخربطت حالي ردت
«،،تكدر مو
سكتت وجاوبت وره لحظه
«،،اي اكدر
رفعت حواجبها كملت
«،،،والسجن هذا گلبي
خليت ايدي علي الوجه تغير وابتسمت
نسيت روحي وتقدمت حجت
بغضب
«،تالي وياك مهيب شتريد تنزل مزروكه عيونك
«،،منج اقبل مو يكلون ضرب الحبيب
زبيب
هم ابتسمت تحارشت
«،شايل هم ليله عرسنا شراح تسوين بيه
الخدود اشتعلت نار ودارت وجهها ضحكت
وكملت
«،،راح انگتل وانزل لامي بتك عين
«،،وخر خلي اطلع
وخرت اشرت الها بأيدي
«،،تفضلي اميرتي الحلوه
فاتت من يمي وردت مبتسمه
«،،سخيف
«،،ههه تره انتي تحبين هالسخيف
وكفت بالصاله الوجه يضحك غمزت
وسالت
«،،بله مو تحبيني
سكتت بعدين ردت
،،،كتلك انت تستاهل اني احبك
گضبت گلبي وكلت
«،،يمه گلبي
هزت راسها ونزلت تضحك
شفت وجهها بالجامه
والقهر زاد مانقص
رحت كعدت ولهيت روحي بقضيه حمزة وهم مالگيت شي الصبح خلصت
دوام طلعت ،،ورحت لسيارتي
جهازي دك طلعته من
جيبي جان رقم غريب
جاوبت
«،،الو منو وياي
«،،،انت النقيب مهيب محمود
جان صوت رجال جاوبته
«،،اي نعم تفضل رايد شي
سكت بعدين كال
«،،اني يعني اريد احجي وياك
بموضوع مهم
گلبي گلي هالموضوع يخص حمزه كلت
«،اي تفضل اسمعك
هم سكت وحسيته تردد بعدين رد
«،اني عندي معلومات يمكن راح تخليك تعرف
شي يخليك تبرئ حمزة من
هالجريمه الي صارت
ووكعت
براسه
سالت بلهفه
،،احجي اسمعك
«،،سيدي اني راح احجي بس مااريد اي
احد يعرف اني حجيتلك الي اعرفه لان اخاف
على روحي واهلي من المشاكل الي
راح تصير
«،،وحك هو الله ماراح اجيب طاريك جدام
اي احد بس احجي الي تعرفه
هم تردد بعدين كال
«،،عزيز مو بس جان متعارك ويا لا جان هم متعارك
وي واحد يصير صديقه ومقرب اله كلش
وتشارك ويا بشغل واكل
علي فلوس مو قليله
سالته بسرعه
«،،زين اهله يدرون بي من تعارك ويا
«،،لا گلي مااكدر احجي لان راح اسمع الملامه
من ابويه واخوتي لان كالوا اليه
لاطب بهاي الشغله
«،،هذا الحجي شوكت صار
«،،وره عركته وي حمزه بكم يوم
«،،انت متاكد من هالكلام
«،،اي سيدي
«،«زين ليش ماحجيت ماكلت هلكلام بالتحقيق
«،،لان هو گلي على عركته وي رشيد واني وره يومين سافرت للهند حتى اتعالج من مرضي
وقبل اسبوع رجعت
«،،محد كلك عزيز انقتل
«،،اي عرفت بس شاريد اسوي واني هناك
وكاعد اضرب گيماوي
سكت بعدين كمل
«،،سيدي اني اخذت رقمك من جعفر كتله محتاجه
بشغله واريده يساعدني والولد انطاه
اليه وماكتله بهل السالفه ولا اريده
يعرف انت تعرف الدنيا
شلون صارت
واني رجال مريض مااريد اتاذه ولا
اهلي يتاذون من وره اهل
ذاك الي هدد
عزيز
«،،زين محد شافهم من تعاركوا
«،،لا حسب معرفتي لان لو احد شافهم جان
اجه وكال هو تعارك ويا
«،،انت كلت هو اسمه رشيد
«،،اي اسمه رشيد جميل
«،،وين ساكن
انطاني العنوان كتله
«،الي اريدك منك هسه ماتحجي هالكلام
لاي احد خلي بيني وبينك
««تمام بس سيدي كتلك مااكدر اجي اشهد
«،،اعرف بس اذا رادك القاضي تشهد يمه
وبشكل سري لازم تجي
سكت بعدين كال
«،،اذا محد يعرفني اي اجي واشهد
«،،بارك الله
شكرته واخذت اسمه وعنوان بيتهم حفظت
رقمه سديت الخط بسرعه اخذت قوه
والقينا القبض على شريكه الخوف شفته
بعيونه وكام يرجف من اعتقلنا بغرفه التحقيق
ماطول بأيدينا وأعترف
هو الي قاتل عزيز
وجان يعرف هو متعارك وي حمزه ومهدده
بالقتل وجاي علي بحجه يحجي
ويا على الفلوس وغادره
بستان حمزه من
جانو يتمشون
بي
القضيه رجعت انفتحت يس ماحجيت شي
خليتها بيني وبين نفسي ورحت لحمزه ابشره
بهل الشي كعدت بغرفه امر السجن
انتظره طب كمت بفزه
مبتسم وفرحان
كلت
«،،،ااابشرك لگيت الي قتل عزيز
حجيت هيج ورحت حظنته بقوه جسمه كام
يرجف وخرت صافن عليه مذهول
سال بصوت مخنوك
«،،،صدك مهيب
«،،اي والله وروح خالتي لكيته ولك گضبته
وحققت ويا واعترف حمزه
اعترف هو الي
ماخذه لبستانك وقاتله هناك
«،،يعني راح اطلع
«،،اي اي راح تطلع ماراح ظل هنا
«،،يااارب لك الحمد
صاح ونزل للگاع وسجد كعد بمجانه يردد
بعيون مغوركه
«،،الف الحمد لله والشكر
كعدنا حجيتله الصار وشلون خابرني الولد
وبلغني بهل الشي ساكت ويسمع
سال
«،،،اهلي عرفوا
«،،،،لا مابلغت احد كلت الا اكمل كلشي
يله اكول لجعفر وعم مهدي
«،،لاتحجي اي شي
صفنت علي من رد هالرد كمل بملامح كلها
غضب
«،مااريد اي احد يعرف اني طلعت برائه
خلها الما اطلع حتى تصير
مفاجأه
افتهمت شيقصد كمل
جاز على سنونه
«،،وذيج الساعه راح يبدي الحساب
«،،واني عند عيناك واريد الرجال الي يندك بيك
شلون مااخيسه بالسجن
جنات
جنت كل شهر انتظر الفرحه الجبيره الي
تفرح گلبي وتخليني اعرف اني
مابيه شي واكدر
اصير ام
بس هي ظلت اشهر تجيني وهالشي قهرني كلش
وخله دمعتي بعيوني كلت اني
مثل اخويه عاگر
وماراح اصير
ام
وزاد قهري من ام ارشد ماعافتني بحالي ظلت
كلما تجي يمي تنغز بيه بالكلام
ومااجاوبها
ارشد انتبه عليه وجان يعرف الي بيه اخر
مره من اجتني كال من جنا
متمددين بغرفتنا
«،،هذا الشهر ارتب وضعي واخذ اجازه
احجز ونطلع لتركيا واخذج لاحسن مستشفى حتى نشوف شنو وضعج
سكتت وعيوني غورگت قرب مني
لزم خدي وكال
«،،ليش هالدموع يبعدهم كلهم
رحت لحظنه وكمت ابجي لمني بي وحجه
«،،لاتبجين والله دموعج غاليه عندي
دفنت وجهي بصدره اشهك بخنگه
وخر وردد
«،كافي يايابه والله جاي تعبيني من اشوفج
هيج تبجين ومقهوره
«،،اريد اصير ام
جاوبته بشهكه صفن عليه بملامح كلها قهر
رجع حظني ورد
«،،والله راح تصيرين ام وشوفي هاي طيبه
گلبج وياي ووي ولدي شلون ما الله
راح يجازيج عليها بفرحه
جبيره
على اساس هالشهر نسافر بس صار عنده
شغل بالمصرف اجلها شهر الخ
بهل الايام هي جان لازم تجي بس مرت
اربع ايام مابينت توترت وصار عندي قلق لان ابدا
ماتتاخر عندي
كلت خلي انتظر كم يوم بس اعصابي تلفت
هو شاف وضعي سال
«،،،شبيج جنات صارلج جم يوم مو على
بعضج
«،،ارشد هاي مااجت صارلها اربع ايام
«،،هي يعني تتاخر عندج
«،،لاا هاي اول مره تصير عندي
«،،يالله
صاح وبين علي الفرح لزمت ايده خايفه
لا تجيني وانقهر ونفسيتي تتدمر
«،،ارشد شلون اذا اجتني
«،،لا بأذن الله صرتي حامل
«،،يارب يارب
جاوبته وكمت ابجي تمارة اجت ليمي
تباوع عليه وعيونها غورگت
ادريس عاف اللعب
وهم اجه وكف
يم ابوه
صافن عليه
«،،مابيه شي
حجيت تماره كامت تبجي وحظنت رجلي
ابوها شالها وكال مبتسم
«،،هسه اني المن اسكت انتي تماره
رحت كعدت افرك ايدي من توتري اجه ليمي
كعد هي بحظنه ادريس رجع
يلعب بس عيونه
علينا
«،،،جنات اهدأي وخليها يم ربج
«،،ماجاي اكدر ارشد خايفه كلش
«،،،،هذا التوتر مو زين عليج لازم تهدأين
جاوبني وسال
«،،،هو هسه مايبين اذا سوينا تحليل
«،،مااعرف بس خلي نروح اسوي تحليل شدكول
«،،اي العصر اوديج
خلينا الجهال يم اهله وطلعنا من وكت
رحنا اني ويا للعياده سحبو اليه دم وكعدنا بره
ننتضر النتيجه التوتر زاد
وي خوف ووجع
صار بمعدتي
«،،،جنات اهدأي
حجه وياي ولزم ايدي الجانت ترجف
الوقت مر عليه ثكيل وخله وجع المعده يزيد
وره مشوار صاحو اسمي كلت
وگلبي يدك سريع
«،،ارشد روح شوفه انت رجلي بعد
ماتشيلني
كام وطب لجوه عيوني ظلت على الباب
اريده يطلع واقره وجهه طلع
وره دقائق الوجه
يضحك كلشي
فز بيه وخلاني
اكوم قرب
مني وخله عيونه بعيوني وكال
«،،شفتي الله اله حكمه بهل الشي
لان جان يريدني اني اصير ابو ولدج
«،،حاامل
صوتي طلع بشهكه هز راسه انهاريت كعدت
وغطيت وجهي وكمت ابجي
بشهكه
كعد يمي وكال
«،،عفيه دموع بالفرح والحزن اشوفهن
بعيونج
باوعت علي مبتسم وفرحان كلش
كلت
«،،ارشد مو مصدكه اني حامل
«،،لا صدكي لان انتي اخذتي،،،
اشر على روحه باشاره اوكي
حسيت خدودي اشتعلت نار هو ضحك
وكمل
«،،واني شلون اخذت مهره اصيله وراح
تجيبلي مهر اصيل مثلها
رجعنا اني ويا الورقه بأيدي مال التحليل
فرحانه وابجي من فرحتي وهو
نفس الفرحه بوجهه
وعيونه
وصلنا طبينا سوه لبيت بس صرنا بالمطبخ
حظني لصدره وكال
«،،ياكبر فرحتي بهل الخبر الحلو
حظنته وكمت ابجي كام بوجهي
وعيوني يردد
««،ولج كافي بجي وافرحي اانتي حامل
وراح يجيني منج جاهل
حجه هيج ووخر مني راح سجد وطول
منظره خلاني احس ربي من
صدك عوضني بي
وجان عوض
حلو
كام ظل كاعد رفع ايده يدعي بعدين
مسح وجهه باوع عليه شفت الوجه صار
دم كام اجه ليمي سالت
«،،فرحان
«،،اي فرحان لان انتي فرحانه
والفرحه طشت يم الاهل والكل عرف بيه
اني حامل بس هو فرحته
جانت اكبر
حمزة
مهيب ركض بقضيتي وسوه مثل ماطلبت
منه ماحجه اي شي لاي احد من اهلي والحمد
لله ماطولت وطلعت افراج هو جان
وياي خطوه بخطوه وماعافني
ولا لحظه
العصر طلعت ويا صعدت بسيارته من صعد كتله
«،،وديني للمركز الي انت ادوام بي حتى اشتگي
على عمامي وولدهم واريدك
اجيب قوه وتعتقلهم كلهم
وانه وياك
«،،ادلل
جاوبني كملت بحقد
«،،وخليهم يضكون من نفس الگاس الي انه
شربته
«،والف عافيه عليهم هالگاس والصدمه
رد هالكلام وكمل
«،،خلي اخذك لبيتنا تغسل وترتاح وبعدين
نروح على ذوله الجلاب
«،،لاا وديني على ام علي
هز راسه وحرك كال
««،اويلي شراح يصير بأمي من تسمع بيك
طلعت والله لا تتخبل
من الفرح
سكت وكمل
«،،وشراح يصير بجعفر وعم مهدي من يشوفك
طالع من السجن برائه
«،،راح يتخبلون
اي ولك هاي فرحه جبيره وتمنيت والله
اطلعك بزفه بس انت ماقبلت
اكول لاحد
««خليها مفاجأه حتى اشوف حالهم شلون راح
يصير من يشوفوني جدام عيوني
«،،زين هسه مااخابر جعفر ابشره بطلعتك
«،لاا خليها لليل
«،تمام
وره مشوار وصلنا شارع بيت اهل غاده
شفت روحي من اجيت هاد عليهم واخذتها
غصب وراها عرسنا انه وياها
وشلون تعاملت
وياها
«،،هذا بيتهم
حجيت مهيب وكف يمه نزلت اعاين اله
رحت دگيت الجرس وره مشوار
الباب انفتح جانت امها شافتني
شهگت وصاحت
«،،حمزه
«،،شلونج عمه
كامت تبجي تباوع عليه وعلى مهيب كال
«،،خاله حمزه طلع برائه
«،صدددك
صاحت بفرح وتفاجأت بيها من اجت حظتني
تبجي بصوت قوي جنت عدالي
راح تكرهني لان طلگت
غاده صبا اختها طلعت شافتني تفاجأت
ورجعت بسرعه لجوه
عمتي وخرت تمسح بدموعها تردد
«،،،الف الحمد لله والشكر
ابوها طلع مذهول عيوني راحت لزهره
طلعت وراه تبجي
ومذهوله
جان هاي اول مره اشوفها تقربت عليه
درت وجهي منها وكفت بمچانها
بعدين رجعت لجوه
كلها طلعت الا هي لا شفتها ولا اجتي كعدت
بالاستقبال ابوها گبالي كاعد هو
وامها مهيب يمي
كلت
«،،وين غاده اريد اشوفها
ليش تسأل عليها
«،،ابوها رد وكمل
«،انت مو طلكتها شكو جاي هسه تريد
تشوفها
امها عاينت اله بعدم رضى ذبيت حسره
وجاوبته
«،انه صح طلگتها لجن عگبتها لعصمتي وهي
بعدها بالعده الشرعيه
«،«شنوو
صاح وكام امها سالت
«،،،صدك هالحجي
مهيب جاوب
«،،اي خاله ثالث يوم من الطلاك هو رجعها
«،،انت تحجي صدك
ابوها ساله
«،اي واني جنت الشاهد ووياي عم مهدي
صفن عليه امها كعدت تبجي كلت
«،،عم انه والله ماحجيت هالجلمه الا من خوفي
عليها وياريتني مو حاجيها لان بنفس
اليوم شفت الموت بعيوني
كعد والوجه صار دم امها حجت
«،،وهي هم شافت الموت من طلكتها والله
باوع لحالها ولحالنا اني وابوها
وولدك وطلعت سالمه
من هالشده
سكتت ابوها سال
«،،بس فهمني انت ليش طلكتها
«،،اسباب هوايه خلتني اسوي السويته
كول يأست من رحمه الله وماردتها تظل تنتضر
واحد محكوم علي بالموت
سكتت وكملت
«،وهم من وره خوفي عليها لان انت تعرف شسوه
عمامي وولدهم بيها
هز راسه كملت
«،،انه الف مره كتلها ارجعي لاهلج وهي تعاند
وماتقبل وكامت تجاتل بيهم من وره
حگي وحلالي وانه اعرفهم نگسين ويكرهوها كلش
ومن خوفي عليها حجيت هالجلمه لجن
تندمت وكمت اموت
حجيت واختنكت درت وجهي من صفنوا
عليه ابوها كال
«،،جان خليتها بيت وحدها
«««ماراح يعوفها بحالها لان تظل حرمتي
واملاكي كلها تحت
تصرفها
سكت كملت
«،،هم مو هامهم هي الي يهمهم الي املكه
اعرفهم راح يشدون وياها وهي
تعرفها ماتسكت لاحد
وخلي الي املكه يروح فدوه الها
بس هي مايصير بيها شي
ولا ولدي
محد حجه ظلوا ساكتين كلت
«،،انه اعرف بروحي غلطت وغلطتي جبيره
لجن والله ماظل عقل براسي من
الصار بيه وكمت مااعرف
شلون افكر او
شلون اتصرف
«،،ليش هو الصار بيك قليل
امها ردت بقهر وكملت
«،جبل مايتحمل الي تحملته
سكتت وهم سكتوا بعدين كلت
«««اريد اشوف ولدي
«،،اي هسه اجيبهم الك
مهيب كام وكال
«،،راح انتظرك بره
«،،تمام
طلع من يمنا امها راحت لجوه ماجنت
متوقع هي راح تجي لان اعرفها هي هسه
مكسوره من عندي وجرحي جبير
بگلبها
كمت بفزه من طبت امها شايله عمار وصبا
علي كبران مو ذاك الصغير الي
عفته بالگماط عاين
عليه بعدين
دار روحه
گلبي انمرد لان ماعرفني وعيوني غورگت
امها حجت ويا تبجي
هذاا بابا شوفه اجه عليك انت
واخوك
اخذته منه حظنته لصدري كام يبجي
رددت
«،ولك انه ابوك
كمت ابوس بي بلهفه عمي كال بقهر
«،استغفر الله ياربي
اخذت عمار وحظنتهم اثنينهم مو مصدك
انه طلعت واخذتهم
لحظني
هو ماسكت ظل يبجي ويسحب روحه مني
امها اخذته مني كعدت عمار
بحظني اعاين
اله ولاخوه
يصيح
«،امه امه
«،،اريد اشوفها
حجيت بخنكه عاينت لابوها كام وكال
««هسه اصيحها
طلع من يمنا عاف الباب مفتوح وره لحظه سمعتها
صاحت
«،،،ماااريد اشوفه گله هالكلام وخلي يروح
امها كامت وطلعت شايله علي وسدت الباب
ونيت صافن على عمار
«،،اخ يابويه والله ماراح ترضى ولا تسامحني
على هالجلمه الي طلعت بحاله
يأس
الباب انفتح هي طبت غاديه نار ابوها
گضها كال
«،،ولج بس اهداي
جرت روحها منه وصاحت بيه
«،،انت شنو بكيفك اطلگني وبكيفك ترجعني
صبا اجت اخذت عمار من عندي وطلعت بي
قربت تخزر بيه وكالت
««،لعبه اااني بأيدك
«،،لا والله مو لعبه ومن غلاتج بگلبي سويت
السويته خفت عليج غاده
خفت لايأذوج واخسرج
«،وانت ماخفت عليه ماكلت هاي شراح يصير
بيها من حجيت الي حجيته
سكتت وكملت بخنكه
«،،متت من قهرك والله رجعني للحياه
لخاطر ولدي
«،،غاده كولي يأست وسويت السويته
««،واااني ليش مايأست
صاحت بيه وكملت
«،،ليش ماأيست من رحمه الله وظليت اشجع
بروحي واكول باجر يعرفون القاتل
الحقيقيه وانت تطلع من
سجنك
«،،الصار بيه جبير
«،،بينا حمزه
جاوبت واشرت على روحها بغضب وكملت
بدموع
«،،اني جنت وياااك بهل المصيبه وشلتها وياك
صح انت جنت جوه بالسجن واني
بره بس هم جنت بسجن
جبير لان انت
ماكو
غصت واختنكت عتبت وعيونها
بعيوني
«،،ليش حمزه ليش كلتها مو انت انطيتني
وعد للموت ماتحجي هالكلمه
«،،اعرف والله اعرف اني انطيتج وعد بس
الصار بيه كسرني غاده وانه والله
ماكدرت اظلن عليها وعكبتج
لان ماظلت بيه روح من حجيتها
ردت اموت من كلت
هالجلمه
امها گضتها وحجت
«،ماما هو صح تسرع بس انتي اعذري الصار
بيه مو شويه
ابوها كال
«،بنتي الرجال تعب من الصار بي وحجه الكلمه
بحاله يأس
سالت بنتره غضب
«،،شنو فرقك عن ذاك
سكتت وشهكت بصوت كملت
«،،،گلي شنو فرقك عن ابن خالي هذاك
عافني باول محنه صادفتنا وانت
هم تخليت عني من وكعنا
بمحنه
«،،ولج انه ماتخليت الا من خوفي عليج
فرق جبير بيني وبينه
«،،لاا ماكو فرق لان اني كاعد احس بنفس
الوجع
ردت وكملت
«،،روح حمزه وبعد ولاتجي عليه ولا تفكر
بيوم اني راح ارجع الك
«،،ولج انتي حرمتي شلون اعوفج انتي
وولدي
«،،تريد ولدك ااخذهم
جاوبتني بروده وكملت
«،،،بس قبل لاتطلع لازم اطلگني
«،،،مخبل انه حتى اعيدها لهل الجلمه
،،،ااااي وغصب ماااعليك ادكولها
صاحت بيه وكملت
«««راح اطلگني حمزه غصبا ماعليك لان اني
بعد مااكدر ارجع الك
«،،كافي غااده
ابوها صاح بيها وكمل وي امها
«،،اخذيها للغرفه وخلوني وحدي وي ابو علي
مشت من يمنا تبجي بشهكه امها لحكتها
من سدت الباب ابوها حجه
«،اكعد ابني
كعدت مقهور وغادي دم كعد اگبالي
وكال
«،،بنتي واعرفها من تزعل زعلها يصير ثكيل
«،،اعرفها وحگها والله حگها
جاوبته وكملت
«،،انه علت عليها لجن والله مو بأيدي الصار
«،،اعرف وهسه اريد منك تعوفها يمنا منا الما
تبرد وتنسى السويته
هزيت راسي باي ترخصت وطلعت من يمهم
صعدت يم مهيب حرك وطلعنا
ذبيت حسره كال
«،،هونها وتهون
«،،ولك ماتهون لان مااجت عليه ولا فرحت
بشوفتي
جاوبته بغصه رد
««حگها علت وتخليت عنها وهي اجتك روحها
مفرفحه عليك
««،ولك ماظل عقل براسي خوفي عليها
خلاني اسوي هيج
«،هي تعرف
رد عليه وكمل
«،،انت سويت هيج من خوفك عليها وهالشي
الي بيها زعل وعتب جبير خلها
ترتاح يم اهلها وتنسى
السويته ببها
وهي ترجع
الك
«،،مااظن لان كلت جلمه انه منطيها وعد
للموت مااگولها
ابتسم ورد
«،هذا كلام واحد مو واثق من حب مرته
سكتت كمل
«،يول انت سويت الاضرب وسامحتك
ماتريدها تسامح على جلمه
كلامه جان صح ودعيت الله تبرد وتسامحني
حتى ترجع لحظني هي وولدي
«،،هسه عاد راح نبلش وي ولد عمامك وولدهم
برنامج الصدمه
وصارت الصدمه من وصلنا للمحلات مالتي بسياره
الدوريه ويانا سيارتين شرطه
قاسم طلع شافني انصدم ورجع
ليوره من صدمته
عباس طلع وراه وكف بمچانه مذهول
ناصر وعقيل اخوه جعفر اجوي
من يم المحلات الثانيه
رجليهم ثكلت
من شافوني
ابتسمت وكلت
«،،،شلونكم يالحراميه
محد حجه من عدهم كملت من
مشيت الهم اخزر بيهم
«،،عدالكم ماراح اطلع
«،،حمزه احنا
قاسم حجه صحت بي بخبال
««،،،ااانتو حراااميه وناقصين غيره
مهيب گضني كلت
«««انه ولكم ااانه تاكلون حالي ومالي تاخذون
بيتي بالگوه
الشرطه حاوطتهم كملت
«،،حسابكم ثگل واجه وكت الدفع ولو تموتون
لو تبوسون رجلي هاااي
ضربتها بالگاع وكملت
«،،ماراح اطلعكم من السجن والا اخيسكم
بي
«،،اعتقلوهم
مهيب صاح اعتقلوهم يصيحون عباس
هددني بالقتل مهيب تخبل
وراح عته من هدومه
وصاح بي يكزكز
من غضبه
«،،وولك والله لا العب عليك الصونده بس
توصل للمركز اني مو نقيب مهيب
اذا مااخذت حگ حمزه منكم
مربع
دفعه وصاح
«،،ااخذوهم وخلوه هذااا بالمنفرده اجي
اني اعلمه شلون يهدد جدام
الدوله
الشرطه شالت ولد عمي قاسم كام يتوسل
بيه هو وناصر وعقيل ولا درت
بال ولبستهم لبس القندره مهيب
صاح
«،،اخذوهم للمركز
طلعو بيهم واحنا رحنا للبستان مالتي ويانا
سياره شرطه وصلت بيتي نزلت اعاين اله برنو طلعت شافتني انصدمت وعگبت لجوه اسمعها
تصيح
«،،،صالح االحك حمزه عگب وويا الشرطه
طلع هو وفاضل مرتبكين كلش ومذهولين
اجه عليه
«،،هلا حمزه هلا وليدي شنو طلعت من السجن
اجه يريد يحظني رجعت ليوره وخزرته
كتله
«،،حدك هينه
وكف بمچانه فاضل اجه
وكف يمه سال
«،،،شنو انت طلعت
ابتسمت وجاوبته باستهزاء
«،،لا بعدني بالسجن
سكت كملت اعاين للبيت
«،،شلون الكعده بيتي ياصالح
«،،انه عمك شلون ادگلي صالح
«،،،ماظليت عمي عگب السويته
جاوبته رد بتوتر
«،،انه جنت خايف على فلوسك وحلالك
وسويت هالشي
«،،كتلي خايف
جاوبته بنفس النبره وكملت
«،،،،لجن انه ماشفت هالخوف بعيونك من
انحكمت 15 سنه
سكتت كملت اخزر بي وكاره شوفته
هو وذاك
«،،،ماخفت الله من سويت السويته انت
وذولاك ماكلت هذا يتيم
شلون نأكل حگه
«،،انه مااكلت حگك
«،لاااا اكلت
صحت بي ولميت قبضه ايدي بقوه كملت
«،،ااكلتوا حرام وان شاء الله يصير دود بطنك
انت واخوك هذا وولدكم
مارد عليه نزل راسه كلت
«،،والي اخذتو مني راح اخذه من عيونكم
والا اخليكم تعرفون انه منو
وشأكدر اسوي
«،،اخذووهم
مهيب صاح فزو صالح كال
«،،حمزه شتريد تسوي تخلي ابن خالتك يعتلقني
واحنا عمامك اخوه ابوك
«،،انتو مو عمامي ولا اتشرف لا بيكم
ولا بولدكم
جرو من يمي يصيح ويتوسل بيه برنو
اجت عليه تتوسل ووكعت
يم رجلي
سحبت روحي ليوره وكلت بغضب
«،،لمي هدومج ولي من بيتي
مهيب وكف بيني وبينها ونتر بيها
«،،تحركي يله بسرعه لمي سلابتكم واطلعوا
من البيت
««حسبي الله عليك يبن علي
حجت بحقد وكملت
«،،كلنا وليت وخلصنا منك
«،،ولاااا كلمه
مهيب صاح بيها وكمل
«،شتريدين نشيلج ويا رجلج وولدج
صفنت علي مذهوله كلت
«،،زيدي بالكلام وخلي گلبي يحقد بعد
اكثر
«،،تحررركي
مهيب صاح بيها مشت تتعثر ماطبت لبيتي
راحت باتجاه بستانهم مهيب
حجه
«،،،ااخذوهم وخلوهم وي ولدهم
القوه اخذت عمامي وطلعوا من يمنا ظل
مهيب وشرطيين يمي طبيت
للمجلس تخايلت جدي
كاعد بمچانه
عيوني غوركت ودعيت اله بالرحمه رحت لغرفتي
انه وغاده طبيت تفاجأت من شفتها
فارغه والاخشاب ماكو
«،،،وولك صدك حمزه طلع
سمعت صوت جعفر طلعت شافني اجه
عليه بسرعه حظني وكام
يبجي
وخر
موسى طب وراه عمي مهدي شافوني
اجوي عليه حظنوني اسمع
بجيهم
الفرحه طشت بين اهلي الي يحبوني وكلها
التمت يمي وجان ناقصهم وناقصني
الغاليه مالتي الي زعلها
طول وخلتني بحسره
شوفتها
عرفت من جعفر قاسم بايع غرفه النوم مالتنا
حتى يشتري الها وحده ويزوج
بيها كلت فدوه
الها
بس ترضى عليه اجيبلها اغلى غرفه
نوم
مهيب
ارتاحيت وجسمي المشنج فك من حمزه
طلع برائه ورجع لبيته كاعد
وي الولد قائد كال
«،،،والله ماتعرف شكد فرحت لحمزه من طلع
برائه
«،،الفضل لله بهل الشي ولهذا الرجال
الي حجه ضميره
جاوبته حسين رد
«،،تصدكون اني ايأست من قضيته كلت
هذا انتهى وراح يخلص عمره
كله بالسجن
«،،ربك رحيم يسد باب يفتح ابواب
قائد رد ورثت جگاره اخذت نفس
طويل وذبيته صفنت بالدخان وشفت خيالها بي
ذبيت حسره وغمضت عيوني
«،،مهيب اريد احجي وياك بموضوع
«،احجي اسمعك
جاوبت قائد تردد بعدين كال
«،،اني مااريد افتح جروحك بس اعتقد
ام يمامه ضامه بعد شي بگلبها
«،سد السالفه
جاوبته بنتره حسين كمل
««،يول بس تاكد من وو
كمت اخذت الجهاز مشيت لحكوني قائد
گضبني وكال
««وين رايح يمعود
نترت بي
«،،للگبور السود تجي وياي
جريت ايدي منه ومشيت مالحگوني طلعت من
الكافي صعدت سيارتي وكمت افتر بالشوارع اون من قهري
واردد
«،،ولك شضامه بعد اكثر من السمعته زين
اذا اكو شي ليش ماحجته من
سالتها ليش ظلت ساكته
وماجذبتهم
شفتها بذاك اليوم جدام عيوني ماحجت
ماجذبت الكلام الي سمعته اذني
وخبلت عقلي
اني الي تدربت على ضبط النفس واعرف
شلون اتصرف بالمواقف الصعبه
انهاريت فقدت عقلي
من عرفت هي مو ارمله ومهزومه من رجلها
جنت اريدها تحجي ادكول اي شي يخليني
اوكف وياها للنهايه بس ماحجت
وذبحني سكوتها
وهذا حالي ظليت لا اكدر اسمع طاريها ولا
جاي اكدر انساها
تعبت من التفكير والسياقه ورجعت لبيتنا
طبيت مهموم والقهر جاس كلشي
بي وسحگني ذبيت روحي
بالفراش وهم بالحلم
شفتها
وره جم يوم امي رادت تروح لاربيل هي
وابويه يريدون يشوفون عيونهم يم دكتور جاي
من الاردن وهم يظلون هناك يغيرون
جوه حجزت الهم واخذتهم
للمستشفى الي يدوام
بيها هذا الدكتور
وصلنا وفحصوا ابويه ضغط عينه جان صاعد
انطه قطرتين ولازم مراجعه كل شهر
يتابع الحاله مالته امي غير الها
المناظر
طلعنا من يمه ورحنا للفندق ارتاحينا
هناك وتعشينا عفتهم يرتاحون ونزلت اتمشى
رحت مسافه بعيده عن الفندق
وكفت ورثت جگاره
ادحك على ملابس
معروضه بمحل
درت وجهي گلبي فز من
شفتها طلعت من محل مبتسمه
شافتني والعيون التقت
والابتسامه
اختفت
گلبي اخذني الها تقدمت خطوة هي
بسرعه تحركت ورجعت
شكرا لزيارتكم عالم روايات سكيرهوم
