رواية اغفري لي الفصل الخامس والخمسون بقلم أوتار حزينة
يمامه
اجذب اذا اكول اني بخير
لان كلشي بيه يصرخ اني مو زينة
ضامه وجعي بگلبي لان
فراكه ذابحني ودمرني
كل لحظه تمر عليه اشوف روحي جاي تنكسر بعد
اكثر اكلي صار قليل وضعفت كلش
ودمعتي صارت بطرف
عيوني
ابجي بس بعيد عن عيون اخويه كدامه
احاول ابين اني عايشه ومو مهتمه
للصار بس هو جان يعرف
الي بيه بس مايحجي
شي لان يعرف
جوابي شنو
حاولت الهي روحي بشغلي اريد بالي ينشغل
بي بس جذب كدرت ابعده لان هو
ظل ليل ونهار يروح ويجي
كدام عيوني
اذكر كلامه الحلو وضحكته عطره الي من يطب
يفوح بالبيت سوالفه الحلوه
شقاه وياي ووي اهله
كعدته بالصاله ويمامه بحظنه ماشفته بس
حبيب لا ابويه جان وروحي وعمري
ردته سند امان من هالدنيا
بس ماصار هالشي
ولا راح يصير
وهالشي سبب اليه غصه بروحي وگلبي والايام
مشت بس صعبه كلش
يمامه كبرت وصار عمرها ثلاث سنوات ونص
وصارت تخبل وكامت تحجي
جانت متعلقه بي ومانسته لان جنت من اتمدد بليل وهي يمي تشوف صوره وتذكره من هي صغيره جانت ادكله ابه وعلمتها من
كبرت تصيحه بابا لان هو جان هيج وعوضها هو واهله عن ذاك ابوها العار
كل ليله الشوگ اله يتعبني،،، اطلع لفافه الي اخذته من غرفته وخليته بجيبي اشم عطره
واخلي يم وجهي اكول بلكي
اشم ريحته بي وتغفى
عيوني وجنت اغفى واشوفه بالحلم
زعلان ويعتب عليه افز ادور علي بالغرفه
ماكو والخنگه تذبحني
ودمعتي تنزل
مثل كل يوم التهي بيمامه وشغلي
وهو بين عيوني واذكر ذيج الايام الي جمعتنا
سوه يمامه يمي تلعب بالملاعيب منتضر طب
شايل علاكه الصمون سلم
وكعد يمها
كال
«،،،شدكولين لو نطلع اليوم نتعشه بره
ولا دكولين لاا وخلي مانصرف تره طكت
روحي واريد اطلع اني ويا
وهااي ام سنون الفاره
حظن يمامه وكام يدغدغها خربت ضحك
انطاها ايده وكال
«،،هاج عضيني
«،،،منتضر لاااا
بعدني مو مكمله وهي عضته تكزكز خرب
ضحك سحب ايده من عافته وكال
«،،شوفيها شلون نبتت سنونها بجلدي
«،،،حيل تستاهل شكو علمتها على هالشي
«،،اي والله اني الي علمتها واستاهل
خليت الكيك بالفرن سأل
«،،عندج طلبيه
«،،،اي من نطلع نوصلها لام ازاد
«،،تمام
كام وكال
«،،،اكوم اسبح واروح للجم من ارجع اخذج
ونطلع
«،،تمام
اخويه من كعدنا بيت وحدنا واستقرينا كام يعتني بنفسه وبهل الفتره كبر شوارب ولحيه
وطول وضخامه
رغم هو اصغر مني عندي بسنتين بس جان
يبين اكبر من عندي
كملت كلشي ونظفت المطبخ هو طلع رجع
المغرب اخذنا اني ويمامه وطلعنا
ودينا طلبيه ام ازاد وراها رحنا لسوك القلعه القديم
حتى اشتري كم حاجه لشغلي بالكيك
اشتريتهن وبعدين
اخذنا سياره ورحنا لمطعم هو راد يتعشه
بي وصلنا طبينا اله تعشينا وماتاخرنا بالكعده
ردت امشي شويه وافتر لان جنت
مخنوكه كلش ،،، هو شالها من تعبت ومشى بصفي
مشينا مسافه وكفت من شفت
محل يبيع ملابس مال اطفال كتله
«،،منتضر خلي نطب لهذا المحل اريد اخذ
كم حاجه ليمامه
«،،تمام
اشتريت كم قطعه ودفعت
الحساب مشينا اني ويا طلعت هو وكف من
جهازه دك طلعه من جيبه وكال
«،،اهووو هذا حكوم وراح يلزك بس اجاوب
علي
ابتسمت درت وجهي جمدت بمكاني من
شفت مهيب كدامي انصدم من شافني واني
هم انصدمت بس من تحرك خطوه
باتجاهي
تحركت بسرعه ورجعت للمحل كلشي بي
تخربط وتوترت وعيوني
غوركت
منتضر انتبه سال
«،،هاي شبيج يمامه
ردت اطلع من غير مكان مااريد اشوفه
خايفه من رده فعلي وفعله عيوني ظلت على
باب المحل اجه وكف
يمه يباوع عليه
الوجه مطعون وصاير دم منتضر باوع
علي بعدين عليه سال
بغضب
«،،هذا سوالج شي
«،،لاا
جاوبته بصوت طلع يرجف اجنب النظر
اله يمامه شافته صاحت
«،،،،بابا
كامت تأشر علي وتريد تروح علي هو ماظل
تحرك من يمنا بسرعه وراح
«،،يمامه هذا منو
«،،،امشي خلي نرجع
«،،ولج بس فهميني هذاا منو
كمت ابجي وصوتي طلع صفن عليه حجه
«،،هذا هوو مو
«،،امشي منتضر امشي
اخذت يمامه منه لان ظلت تصيح علي طلعت
منزله راسي مااريد اشوفه واضعف
اشرت لسياره تكسي
بس وكفت صعدت اخويه اجه
جايب الغراض صعد وكله العنوان انهاريت
بالبجي وصوتي طلع من شفت السايق صفن
عليه بصعوبه سكتت بس ظلت
شهكه تطلع كل
مشوار
وصلنا طبينا بيتنا كعدت وطلعت نهده گلبي
بجي قوي اخويه كعد يمي
سال
«،،،ولج جاوبيني هذا مهيب الي شفته
«،«اي اي
سكت وظل صافن عليه القهر تارس ملامحه
بعدين كال
««انتي تالي وياج والى متى راح تظلين تعذبين بروحج وبالولد وشوكت تحجين اله
الصدك
صفنت علي بعيون تبجي كمل
«،شوفي روحج شلون صرتي من شفتي
وهو هم صار دم وظل صافن
عليج بقهر
مارديت كمل
«،ولج والله حرامات تخسري من وره اسباب تافهه
«،،،،تافهه منتضر ليش انت ابن منو اني بنت
منو بنت عواد الگواد واخوك قويدر
المكبسل هذا احنا وانت عرفت
منو اهله وهو شنو
سكت كملت بقهر وگلب ممرود
«،،ولك اني الف مره اريد اخابره اگله الصار بيه
افتحله گلبي واخلي يعرف شنو
المضموم بي واعرفه والله
اعرف بي يكدر يساعدني
ويخلصنا من اهلك
الجلاب بس ماكدرت منتضر ماكدرت
لان اني تراب الگاع وهو نجمه
بالسما
سكتت وكملت بشهكه
««وهم خفت علي خفت لا اخوك يغدره
ون وكال
«،،اخ ولج لو بس يموتون جان خلصنا منهم ومن
صيتهم القذر
ماكدرت احجي بعد لان اختنكت وظليت ابجي
شوفته خربطت حالي وتعبت كلش وماكدرت حتى
انام ولو دقيقه
مهيب
من شفتها جدامي گلبي فز وكلشي تخربط
بيه اندارت،،،، انصدمت والابتسامه اختفت
تحركت خطوه هي مشت بسرعه طبت للمحل
گلبي اخذني الها وكفت يم
الباب جانت واكفه
يم شاب طويل شايل يمامه
مادحكت عليه ولا رفعت راسها الوياها
حجه وياها وعيونه عليه بنتها
صاحتني تريد
تجي عليه
نزلت راسي ومشيت بسرعه من يمهم
عبرت الشارع شلون مااعرف شفت روحي بالجهه
الثانيه اتنفس بقوه ونار صعدت
لراسي
انداريت شفتها طلعت شايله يمامه هو وراها
صعدوا تكسي وراحوا عيوني
ظلت عليهم الما استدارت
بيهم السياره
ماكدرت امشي رجلي ثگلن وراسي هم اخذت
تكسي ورجعت للفندق كعدت بغرفتي
صافن مقهور بعد اكثر لان عيوني شافتها
ونيت من قهري وكلت
«،،،،،منين طلعتي اليه وشجابج هينه
وليش ياربي خليتها تطلع جدامي
ناقص قهر اني
هاي اجيت اريد انسى واغير جو شوف شصار
بيه طلعت اليه وخلتني احترك بناري
الي هي اصلا ماطفت
لا كدرت انام بهل الليله ولا غفت عيوني
ظليت كاعد ادخن جگاره ورة جگاره التعب
والتفكير والسهر هدوا حيلي شفت
روحي بالمرايه من غسلت الوجه
مو هو واثر خيط دم
صاير بعيوني رددت بقهر
كلشي انهجم بيه لاظل گلب ولا ظلت
روح وشلون راح اكدر ارجع مثل الاول مااعرف
كمت احس الدنيا تحاجيني دگلي اقهرك
بعد لو كافي
نزلت راسي ودعي
«،،،ياربي طلعها من گلبي وعقلي والله راح اموت
من قهرها وقهر السوته بيه
بس القهر ظل بگلبي وضميته على امي وابويه
ماردت اخرب عليهم سفرتهم بس هم
حسوا بيه امي سالتني
على الريوك
«،،،يمه مهيب بيك شي
«،،لاا
ابويه صفن عليه سال
«،،صاير شي
«،،لا
«،،اذا تعبان مانطلع لسوگ القلعه
«««لا مو تعبان كملي حتى اخذج
جاوبتها ولهيت روحي بجهازي مااشوف
شي ولا مركز بس ردت ابتعد
عن الحوار وياهم
ظلينا هناك ثلاثه ايام اني الوب اريد بس
ارجع ورجعنا لبيتنا والتهيت بالدوام
ولا كدرت انسى ولا كدرت اعيش
مثل الاول ظلت صورتها
بين عيوني واسمع
صوتها بأذني
وره ايام رجعت من الدوام رحت لبيت اهلي
وصلت وطبيت من المطبخ ماكو احد
مشيت للصاله وكفت من سمعت صوت اختي
ميسون
«،جان گلبي حاس بي هو يحبها حسيت بي
يمه بس كلت ماراح يطول بهل الشي
لان انتي تعرفي يمل من
الوحده بسرعه
«،«ليش هي ولج بس فهميني شبي هو حتى
يروح يحب وحده ارمله وعدها
بنيه
امي ردت بعدين كملت
«،وطلعت لا ارمله ولا ميت رجلها مهزومه
منه وضحكت علينا كلنا وخلتنا
نصدك الي حجته وخلت
اخوج يحبها وهي
على ذمه رجال
ثاني
««كل الصار من وجهي اني الجبتها وخليتها
كدامه
ام ياسين حجت امي ردت
««انتي شمدريج هي مو ارمله
ومهزومه من رجلها واهلها قابل تشمين
گفه ايدج صدگتي الحجته الج
مثل مااحنا صدگنا
طبيت سكتنا سلمت وصعدت لغرفتي كعدت
هناك صافن على حالي ونفس القهر
بعده بگلبي ولا راح
يروح
جنت اسمع اهلي يحجون ومقهورين عليه
لان قهرها بين بيه وانسليت واشوف
قهر فراك بنتها بين بيهم
لان البيت فرغ صار
عبالك گبر
يمامه
شوفه مهيب هيجت الجرح الي ماطاب وظليت
ايام دمعتي بعيوني احاول ماابين
هالشي كدام اخويه
بس صعبه الواحد يرسم الفرح بوجهه
وهو من جوه شابع حزن جنت اسمعه يدعي
على ابويه وقويدر بالموت ولح
بهل الدعاء كلش اسمعه
يكول
راح نخلص منهم ومن عارهم بس يموتون
وانتي تكدرين تحجين كلشي
لمهيب
بنص هذا الشهر المغرب طب علي
الوجه متغير ومااعرف
شبي سالته
«،،،صاير شي
«،،اخوج مات
صفنت علي كمل
«،،قويدر مات هو وسعيد
عبالك واحد دفعني ليوره ردت اوكع لزمني
وكعدني على القنفه دموعي
نزلت صاح بيه
بعيون مغوركه
«««لااااتبجين
غطيت وجهي بأيدي وكمت اشهك بصوت
«««على شنوو تبجين على هذا الگواد اخوج
الي جان يتحارش بيج انتي وذيج
المسكينه الي ماشبعت
من الدنيا لو على
سعيد العار الي
لعب بيها طوبه
«،،،ماجاي ابجي من قهري عليهم
««،لعد شكو هالدموع
«،،،ابجي لان ماخله بگلبي حنيه حتى اكول
علي الله يرحمه
«،،،الله لاايرحمه ويوما لابوج الگواد
جاوبني كعد صاير نار والوجه دم حجه
بقهر
«««ولج ااريد اترحم علي اريد انقهر علي
اسوي عزه واكول اخويه مات
بس لا لساني يكدر
يكلوها ولا اريد
اوكف بعزاه
«،،شلون ماتوا
«،،انكس موته
جاوبني وكمل
«،،رايحين مكبسلين وشاربين و نازلين
على شركه مال صيرفه يريدون يبوكها شايفتهم
دوريه جايين يريدون يعتقلوهم اخوج رامي
عليهم وذولاك ضاربي هو وسعيد وكاتليهم
بمكانهم
«،،،وانت شمدريك
«،،جنت اخابر ولد صاحبي من المنطقه خابرني
وگلي عليهم
«،،،وابوك شصار علي
فر ايده ورد
«،،شيريد يصير علي راح دفنه وسكت
عادي عنده لو نموت كلنا
مايهتم
سكت وكمل
«،،والله مرات اكول خلي نحلل النسب مالتنا
خاف هو خاطفنا وهذا مو ابونا
الحقيقي
ساكته دمعتي بعيوني اريد ادعيله
بالرحمه بس من اذكر الجان يسوي ييه
اني وحنين ماتطلع من
حلگي
منتضر ظل يلح عليه احجي لمهيب
قصتي ورفضت اكثر من مره اخر شي تعاركت
ويا وبعد ماحجه وياي ولا
فتح الموضوع
غاده
لا كدرت اعيش من بعد مااخذوا مني
ولاحسيت بطعم الحياه وهو
بعيد عن عيوني
حتى روحي ماظلت بجسدي راحت ويا وظلت
يمه ظل بس الگلب يدك بصدري
وهم جان موجوع من
فراكه
يوميا اشوفه وياي بالغرفه احجي ويا
واعتب علي واسكت مااريد
ازعل خياله
ااخذ قطعه من هدومه احظنها واشمها
بنفس طويل وابجي بخنگه واكول
شوكت تطلع وتاخذني
لحظنك لان تعبت
كلش والدوه
انت
وطلع وجنت اريد هذا اليوم من گل گلبي دعيت وتوسلت برب العالمين واني ساجده وخاله
راسي على الكاع ابجي واتوسل
بي يطلعه من
هالشده
من سمعت بي اجه وواكف يم بابنا مشيت
اله ملهوفه بس شفت روحي بذاك
اليوم من رحت اله بنفس
اللهفه وهو استقبلني
بروده وطلگني
رجلي ثكلن ودموعي نزلت گلبي يريد ياخذني
اله وكرامتي توكفني بمكاني
وعرفت هو بعد ماطلگني وره يومين رجعني لعصمته و تخبلت وانهديت بي ورفضت
ارجع اله لان اني مو لعبه
بايده
بيبي اجت هي
وجعفر وعمه رقيه حجوا ويا ورفضت
ارجع اله جرحي جان جبير واي كلام مجان يطيبه
حسيت اكو شي انكسر بيه من جوة
والوجع والالم والقهر انعاد
بقصه ثانيه وجان
هو نفسه سبب
هالوجع
سمعت هو مشتكي على عمامه وولدهم
وذابهم بالسجن
وبنى حايط عالي وخله اسلاك شائكه
داير مداير البستان مالته عزله
عن البساتين مالتهم
خله حدوده مفتوح بس من يم عمه مهدي
ورجع المحلات بأيد جعفر وموسى
وبايع اثاث البيت وصابغه
وماثث اثاث جديد
هالكلام عرفته من ماما لان رانيه جانت
تتصل عليه هي وعمه رقيه ومااجاوب يتصلن
عليها يسألن عليه ويحجن
اخر الاخبار
كلها شدت ظهرها بي بس اني ماكدرت اشد
ظهري بي لان خذلني باصعب
موقف بحياتنا
كاعده بغرفتي وحدي ولدي نايمين يمي
جهازي دك جان هو سويته صامته وذبيته
رجع اتصل مادرت بال دز رسايل
مافتحتها طفيته وخليته بالجراره
وره مشوار ماما طبت شايله جهازها
كالت
«،،حمزه يريد يحجي وياج
نترت بغضب
«،،مااريد احجي وي اي احد
فشلت لان صوتي جان عالي واكيد سمعه
حجت ويا
«،هي ماتكدر تحجي وياك
سكتت بعدين كالت
«،،يكول اذا ماحجت ويايه راح اجي عليها
فزيت وصحت بغضب ارجف
من اعصابي
«،،،لااا يجي ولا اريد اشوفه والله اذاا
شفته بعد هنا الا ااسويها واذب روحي
بالشط
تخبلت ورحت جريت الجهاز من ايدها
وصحت بي
«،،سمعت حمزه والله اذااا شفتك هنا
مره ثانيه الا اذب روحي
بالشط واسويها
والله اسويها واحرگ گلبك مثل
ماحرگت گلبي
ماما اخذت الجهاز من ايدي وسدت الخط
صاحت بيه
«،،شبيج اانتي تخبلتي
«،،اااي تخبلت ماظل عقل براااسي
ولدي كاموا يبجون هي شالت عمار وصاحت
صبا اجت اخذت علي طلعن من
يمي كعدت ابجي
رجعت وياها بابا كال
«،،،انتي ليش ماجاي تعرفين الحاله الي جان
بيها رجلج وهي الي خلته يحجي
هالكلمه
«،،،انتوا ليييش ادفعون علي
سالت بدموع وكملت
«،،بس فهموني ليش كلكم واكفينا ويا
تخافون منه موو
بابا تغيرت ملامحه للقهر وجاوب
«««لاا لان هو مو مثل مااجنا اول مره وانتي
تعرفين هذا كلش زين
سكتت كمل
«««بنتي كبري عقلج واعرفي رجلج ماجان بوعيه
من طلكج وهم ماظل على كلامه
رجعج وره يومين لذمته
لان وعي رجعله وعرف
هو غلط من سوه
هالشي
رحت كعدت منزله راسي ابجي رديت
«««واني مااريده بعد وكولوا اله خلي يطلگني
«،،،ولج ماما فكري بولدج ذوله بعدهم صغار
ومحتاجيج الج وولابوهم
مارديت وظليت ابجي ظلوا يحجون وياي
واني رافضه ارجعله او احجي
ويا بالتليفون
بليل اني كاعده بغرفتي صافنه على ولدي
ودمعتي بعيوني الباب اندك
انفتح طب بابا
كال
«،،تفضل ابو علي
كمت بفزه وصحت
«،،،،بابا مااريد اشوفه
هو طب ووكف يباوع عليه نترت بي
«،،،،اطلع مااريد اشوفك
«،،بنتي مو هيج الحجي الرجال اجه يريد
يحجي وياج اكعدي انتي ويا
وحاولي تسمعي
«،،مااسمعه ولا اريد اشوفه
جاوبت بغضب وخزرته كملت
«،،،اطلع حمزه روح ولاتخليني اسوي شي
بروحي واخليك تشيل ذنبي
طول العمر
«،«غاده ااسمعيني
«،،شاااسمع
عطت بي ماما طبت كملت بدموع
«،،اسمع نفس الحجي اني مو بوعي وجنت
خايف عليج مو هذا الي تريد
ادكوله
سكت كملت
«،،،انتوو كلكم ماااتعرفون اني بشنو جااي
احس
خليت عيوني بعيونه وكملت
بخنكه
«،،غصه صااارت هنا
خليت ايدي على گلبي وكلت
بصوت مخنوك وابجي
بشهكه
««بيه غصه بس الله يعرفها وبلكي تموتني حتى اخلص من هالدنيا الي ماشفت
منها غير بس الاذيه
رد علي بقهر
«،،،حگج والله حكج علت عليج واعرف بروحي
شسويت
نترت بي
««وراح تسوي حمزه لان انت ماراح تكدر تنسى
السواه اخويه بيك
صفن عليه كملت
«،،،من اخذتني ولحد هاي اللحظه واني ادفع ثمن
غلطه معاذ وعشت وياك خايفه لاتروح
تسمع كلمه من احد وتروح تذبحه
واخسرك الك واخسره
اله
اختنگت ماما كامت تبجي رددت
««،،وخسرتك من وره هاي الكلمه وانت خسرتني
هم من وره كلمه واكلك اني وياك
بعد مستحيل نرجع سوه لان
اني تعبت من هاي
العيشه واريد
ارتاح
«،،طلاك ماراح اطلك غاده
«،،لااا راح اطلك حمزه لان اني بعد مااريدك
ولا اكدر اعيش وياك بنفس
المأساه
«««غااده انه مستحيل اعوفج ولج روحي
معلكه بيج
حجها واختنك
درت وجهي منه وجاوبته
«،هذا الكلام بعد مايفيد واذا انت صدك
تخاف الله طلگني وخليني
ارتاح
«،ولج لاتخبليني خليني راكد غاده وهالجلمه
مااريدن اسمعها من حلكج لان
تذبحيني من تحجيها
مادرت بال رحت كعدت تجاهلته ولا رفعت راسي
ولا باوعت علي
بعد
كال
«،ااسمعيني زين طلاك ماراح اطلك لو تطلع روحي
ماراح اعيدها هالجلمه وندامه
لان حجيتها بذاك اليوم
ولو ميت ولا
حاجيها
«،،لا اسم الله عليك
ماما ردت علي كمل
«،لااا والله ياعمه لو ميت ولا هالعذاب وانه
الي جبته لروحي وهو المتعوب
والمتعذب يظل طول عمره
هيج والموت اله ارحم
حجه هالكلام وطلع من يمي بابا لحكه ماما
صفنت عليه بس ماحجت شي
لان الكلام الي كلته كدامهم
دك بعظمهم
جنات
واكفه كدام المرايه اشوف بطني الي كامت برزت
شويه وظهر عليه اني حامل مبتسمه
وفرحانه كلش
خليت ايدي عليها ودعيت الله تمر شهور الحمل
على خير واشوف ابني بحظني
تماره طبت تبجي وتحجي افتهمت
ادريس ضاربها كدتها من
ايدها طلعت علي
جان بالصاله يلعب بعصبيه بالمكعبات ابتسمت
لان شفته يشبه ابوه كلت
«،،شبي الحلو مالتي وليش مزعل اخته
««هي وكحه تخربط المكعبات من اصفطهن
«،،لااا ماما هو
جاوبتني تشهك اخذتها وكعدت يم ادريس
وهي يمي كلت
««هسه اني اسويلكم احلى عماره
«،،مااريدها تلعب ويانا
««لا مايصير هاي اختك وخطيه شوفها
شلون كامت تبجي وزعلت منك
صفن عليها كملت
«««انت تقبل احد يضربها
هز راسه بلاا كملت
«،،،لعد انت شلون ضربتها
«،،،،مو هي ماتخليني العب
««مو هي ماعدها احد تلعب ويا بس انت
سكت يباوع عليها هي مبرطمه والعيون
مغوركه كلت
«،،،انت اخوها الوحيد ولازم تخاف عليها
وتخليها تلعب وياك واذا سوت
غلط علمها بهدؤ مو
تضربها
هز راسه ابتسمت كلت
«،،،يله بوسها وكول الها اني اسف
كام اجه ليمها واحد حظن الخ باسها وهي
هم باسته كلت
««يله خلي اسويلكم اطول عماره بعقوبه
ارشد
اجيت من مجلس ابويه وطبيت بيتي رحت
للمطبخ اسمع ضحك ولدي
وجنات
مشيت بهدؤ وكفت باب الداخلي دحگت
كاعده هي وياهم بالگاع والمكعبات مطشره
ومسويه برج شكبره كالت
شوفوا هاي اخر قطعه والله اليستر
منها
خلت القطعه ولدي يمها وجان البرج يتلايم
ويوكع
«،،لااااا
ادريس صاح وضرب كف بكف تماره خربت ضحك وكامت تلم بالقطع هي حجت بزعل
«،،،رااح التعب
بنتي شافتني وصاحت
«،،بابا
اجت عليه شلتها ادحك لجنات ومبتسم
سالت
«،،،هاي شبي البرج عبالك المهندس مو شاطر
ادريس ضحك وجاوب يأشر عليها
«،،،،ههه اي
كعدت يمها وتربعت كلت
«،،،خلو الشغل اليه هسه اسويلكم برج خليفه
الا يطخ بالسما
«««ههه قصدك بالسگف
جاوبتني تضحك رديت
«««ههه هو هذااا
«،،،يله عيني شوفنا شلون راح تضبطه
«««افاا والله اضبطه واسوي عشره مثله
«،خلي نشوف مو ادريس
هز راسه خربان ضحك
«،،تتراهنين
سالتها
««اي اتراهن بس شنو الرهان
«،،،بعدين اكلج
«،،،تمام
بديت اصفط المكعبات وسويت اعلى برج
كملت وكلت
«،،وهذااا اعلى برج بيج يابعقويه
«««هههه والله ضبط
«،عجل شلون شعبالج يابه اني بس حجي
صفنت عليه وردت مبتسمه
««لا والله انت مو بس حجي قول وفعل
شيخ ارشد
««،راح اصير مغرور
«،صير يلوك الك الغرور
گلبي انلعب بي من شفت النظرات وسمعت
الكلام كامت وكالت
«،،اليوم سويتلكم تراب الملوك راح اروح
ارتب تعلوله حلوه ونكعد نشوف
فلم كارتون
مشت من يمنا وراحت للمطبخ كمت رحت بدلت
ورجعت شفت البرج واكع
وولدي يلمون بالمكعبات
ويخلون بالصندوق
شغلت التلفزيون وكعدت كلت
««يله شتريدون ياكارتون تشوفون
««هذا بابا
ادريس اشر على كارتون جان مال سمجه
اسمها نيمو شغلتها الهم كعدو يتفرجون
شفت جنات تاخرت كمت
ورحت اشوفها
وكفت يم باب المطبخ من سمعتها تحجي
بضوجه
«،يمه كتلج بيتي اجرت لاخو اسماء وعيب
مني اطلعه منه بحجه اريده لابتسام
سكتت بعدين ردت
««مااكدر لان سويت ويا عقد خمس سنين
اي والله شبيج يمه شنو اني جاي
اجذب عليج يعني والله
مااعرف انتي شبيج
وياي ذاك اليوم تريدني ابيع سيارتي
وانطي فلوسها لمهند والله
شنو حتى يروح
يتعالج بتركيا
وهو عنده راتبه واجاه فصل من قائد
طبيت شافتني ارتبكت بعدين كالت
«،اروح لان ارشد اجه
سدت الخط سالت
««خير جنات صاير شي
«،،ها لاا
جاوبتني هالجواب واندارت تخلي فواكه
بالماعون كلت
««جنات تره اني سمعت الكلام
سمعتها ذبت حسره التفت عليه حجت
««اذا سمعته ليش تسأل شصاير
ابتسمت وجاوبت
««لان ردتج انتي تحجين اليه
««ارشد مااريد احجي بهل الموضوع لان
والله اضوج منه واحس بروحي
راح انغث بعد اكثر
اذا حجيت
بي
««اذا بيها مغثه الج خلي تولي السالفه
سكتت ورجعت ترتب التعلوله من كملت
شلت الصينيه ورحنا للصاله كعدنا
بالگاع ناكل وندحك
للفلم
«««ارشد
«،،ياعيونه
جاوبتها شفتها مرتبكه حجت
««اني يعني مااريدك تحس بروحك غريب
لان ماردت احجيلك الي يصير
بيني وبين اهلي
««واني ماحسيت بهل الشي
صفنت عليه كملت
«،،شوكت ماشفتي روحج محتاجه تحجين الي
بكلبج راح تلكيني كاعد هالكعده
واسمعج بگلبي
وعقلي
عيونها غوركت ضحكت وكلت
«««ام دمعيه لاتبجين
ابتسمت وجاوبت
««،ماراح ابجي
«««عاشت ايدج على تراب الملوك والله
طعمه فد شي اكلت كاستين
وبعد اريد
«««اكل الكاسه مالتي
«،،،،لاا يابه مااريد
«««ليش بله
سالت رديت اضحك
«،،،ولج ياهو الي يشوفني يگلي سمنان
«،،ههه بهاي اكلك صدك بس تدري
لايك الك كلش
««بله صدك
«،،اي والله وصاير يعني حلو بعد اكثر
حجتها بخجل ضحكت وجاوبت
«،،صاير شيخ صاك مو بله وراح يبدي
الزحف
عكدت حواجبها وجاوبت بضوجه
«،،استقر عيني
«،،،ههههه
خربت ضحك ولدي دحكوا عليه مسحت
لحيتي ادحك الها الوجه يضحك
سالت
«،،تغارين يبعدهم
«،،اي ليش مااغار مو انت رجلي ابو ولدي
«،،لااا اليوم اني مدلل جثير وكاعد اسمع كلام
اول مره اسمعه
ابتسمت وردت
«،ويلوك الك الدلال شيخ گلبي
««ولج صعدت الحماوه من الحلاه وهل الكلام
الحلو
سهرنا سهره حلوه وراها ولدي ناموا تمددت
اني وياها هي نايمه على ايدي
صافن عليها ومبتسم
كالت
«،،ارشد اريد اروح اخذ للولد ملابس صيف لان
ماعدهم
«،،،،اي
«««وها هم اريدك تفكر تخلي ادريس بروضه
حتى يتعلم المواد الاوليه مال
صف الاول
««اي
«،،وها اا
سكتت من شافت النظرات كلت
«،،عوفج من الولد شويه والتهي بابوهم
ابتسمت وجاوبت
«««مقصره اني وي ابوهم
«««لاا بس اني طماع واريد بعد اكثر
«،«عيوني الك كول شتريد
غمزت وكلت
««اريدج الج
بستها بلهفه واللهفه جانت متبادله بينا كل لحظه
تمر عليه واني وياها احس بروحي
اني بالجنة
حمزه
كاعد بالغرفه الثانيه وصافن على حالي
انه بمجان وغاده وولدي
بمچان ثاني
وانه السبب بهل الشي تسرعي هو الي خلاني
اخسرها واسمع الكلام الي
سمعته سبحتها بأيدي
اسبح واستغفر ربي واريدن منه يلم شملنا
لان طگت روحي من الفرگه
حبوبه
طبت اجت ليمي كعدت القهر مبين
بملامحها ذبيت حسره
وكلت
«،«يمه انه شسويت بروحي
«««انه مااريدن الومك لان اعرفك من سويت هيج
جنت مو بوعيك وجنت خايفه عليها
من ذوله ولد بطني
وبزرهم
«،،،،خبلوني يمه ماخلوه عگل براسي لا هم
ولا الصار بيه يأست من رحمه ربي
وكلت ليش اخليها على ذمتي
انه انتهيت وعمري
كله راح اخلصه
بالسجن واذا
طلعت راح اموت على ايد بيت متعب
ماردتها تظل ماردت يمه
ولدي يخسروها بعد
ماخسروني اليه
حجيت هالكلام وغديت دم كملت
«،،ولو ادري فرج الله قريب والله مااحجيها
والعباس مااحجيها لان سمعت
منها كلام اول مره
اسمعه
«،،خير يمه شحجت
«،،اخ يمه ااخ حجت وكالت هي جانت عايشه
بخوف وياي من ورة اخوها وتعبت
من هالشي لان كل فتره
تنحجي هاي
السالفه
«،،حگها يمه
ااي حگها لجن انه وين حگي وينه يمه
وليش ماجاي ارتاح ليش ياربي الطيب بهل
الدنيا ماله حظ
«،،حظك يم ربك وليدي
«،،شسوي يمه انه اريدن ارتاح واعرف راحتي
يمها وهالكلام الي سمعته منها
خوفني مو غيده الي
اعرفها جانت
وحده ثانيه
سكتت من اختنگت وكملت
«،،سمعت بيه طلعت ومااجت مااجت يمه
ورفضت تشوفني حتى ابني
مااعرفني ولكم والله
اني مو جبل
بشر من لحم ودم وانهديت من هالقهر
التعب جاس گلبي واخذ حيلي
«،،كافي يمه والله قهرك راح يموتني
جاوبتني وكامت تبجي رددت بقهر
«،،شاسوي ياربي وشلون راح تفض وياها
«،،تفض على خير بس كول يالله
«،،ياالله يارب والله مارايد منك غير بس
تعاين لحالي وتعگبها لحظني
هي وولدي
«،،،الله يعكبها لحظنك ويبرد نار گلبك
انت وياها
«،،امين يمه امين
رديت عليها لجن غيده ماعگبت رغم رحت
الهم اكثر من مره واهلي هم
وهالشي تعبني وقهرها
زاد بگلبي
مهيب
كاعد بالدوام صافن على الحاسبه
مااشوف شي ضباب بعيوني
واحجي وي روحي
««،اني شلون صرت غشيم
وسلمت گلبي لهيج وحده شلون
مادورت وراها ولا
سالت
وليش صدكت بكلامها بسهوله واني الحذر
وادور وره الناس حتى اعرف
اني المن جاي اعاشر
عشت وياها كذبه خطره وبنيت دنيا من وهم وركضت وراها مثل عطشان
ويشوف السراب مي
وشلون راح اكدر اطلعج من راسي واني بكل لحظه
اسمع صوتج بي اشوفج گبالي وصرتي
اليه مثل السم الي كاعد
يمشي بجسمي بطأ
ومااعرف شوكت يگتلني
كرهت ضعفي وثقتي الي انطيتها الج ولعنت
روحي لان رگضت وراج وسلمت الج
گلبي
جهازي دك جان ولد يشتغل وياي حجيت
ويا وسديت الخط رجعت اريد
اكمل شغلي
بس ماكدرت اسوي شي هي مصيطرة
على تفكيري اشوفها بذاك
اليوم باربيل ووياها
الشاب
زين هذا منو اني شفت رجلها واخوها وابوها
هذا شيصير منها هو بي
شبه منها يصير
اخوها الثاني
ايدي راحت للحاسبه كتبت اسمها عكدت
حواجبي من ماشفتها بالبيانات مال
البطاقه الوطنيه بس ابوها
واخوها الي شفته
بذاك اليوم
وهذا الي شفته باربيل وطلع اخوها
زين هي ليش مو مسجله بالبينات وشلون
سوه الها بطاقه واني شفتها بعيوني شنو مرت عليه وهي مزورة وشلون ازوجت
وعقدت
ردت اذكر اسم رجلها ماذكرت بس اسم الاول
سعيد رجعت بذكراتي لذاك
اليوم اني شفت خلقهم مابيها نور ومبينين
مو خوش اودام وشفتهم شلون
كاتليها بس اني سالتها
لحيت عليها
تحجي ادكول اي شي يخليني اتصرف
وياهم وماحجت سكتت
واكدت كلامهم
بس من شفت هي مو مسجله بالبيانات گلبي
لعب والشك دخل اله كمت اروح
واجي يم المكتب مالتي
ادحك للصور احس القصه مو هيج وارجع
اردد اذا مو هيج ليش التزمت
الصمت
دورت بسجلهم ماعرفت وين ساكنين دكيت اسم
اخوها قادر عواد اريد اعرف اي
شي عنه فكيت عيوني
من عرفت بي انقتل بسطو مسلح عيوني
صارت على اسم الثاني اي
ويا اسمه سعيد كاطع
«،،،،هوو هذااا
صحت مذهول من الي عرفته كتبت اسمه
طلعت البيانات مالته ماشفت
اسمها بسجل عائلته
سألت روحي
شنو الموضوع لا بسجل اهلها موجوده ولا
بسجل رجلها
الشگ زاد مانقص وكلت اكو شي هي ضامته
عليه ولازم اعرفه كلت لازم
اروح لاربيل اشوف
جماعتي هناك
هم يكدرون يوصلوني الها وسويت هالشي
خابرتهم ودزولي موقع ،،، الفرن والبيت الي ساكن بي اخوها من الصبح طلعت عليهم
وصلت ورحت لبيتهم وصلت نزلت
رحت ليم الباب
دگيته
گلبي يدك سريع ووضعي كله مخربط
انفتح وشفتها انصدمت ورجعت
ليوره بعدين دارت
وجهها والخلقه
تغيرت حجت
بصوت يرجف
«،،،،انت شتريد وليش جاي عليه
«««انتي ليش مو موجوده بالبيانات مال اهلج
او رجلج
تفاجأت بس بعدين ردت
««مااعرف
«،،يمامه احجلي الصدك اني احس بيج
ضامه عليه شي وجبير كلش
««الي عرفته هو هذا المضموم وهسه روح منا
وبعد لاتجي عليه
رادت تسد الباب خليت ايدي وطبيت خطوه
لجوه اخوها طلع من جوه شافني
اجه بسرعه يدحك
عليه وعليها
كلت
«،،ااريد احجي وياك
«،،ماعدنا حجي وروح منا مهيب
هي نترت بيه بعيون مغوركه
اخوها كال
«،،تفضل جوة
«،منتضررر
صاحت بي وخزرته كملت بغضب
«،لااا مايطب جوه وروح مهيب ولا تظل
ادور وياي
«،،،ليش ماادور يمامه شنو الي ضامته عليه
«،،،كلشي مو ضامه
«،ولج لااجذبين تره عرفت انتي ماعندج
بيانات عند الدوله وجنتي تمشين
بهويه غير بنيه
«،،هاي البنيه تصير اختي
صفنت على اخوها من رد هالرد هي
جرت ايدها بقوه تخزر بي
حجه وياها
«،،،كافي تضمين علي وخلي يعرف الظلم الي
جنتي عايشه بي
«،،،لااا منتضر لااا
ردت علي بخنكه بعدين دحگت عليه وكالت
«،،،،مهيب روح والله اني ماافيدك
«،،،ولج بس احجي كولي اي شي يخلي گلبي
يبرد من يمج
«،،،اسمعني اليه وعوفك منها
«،منتضر لاا
مادار الها بال وكمل وياي
«،،خلي انطب جوه واني احجيلك قصتنا
هي مشت من يمنا بسرعه تبجي
طبيت هول صغير كعدت هو كعد گبالي
الحزن تارس ملامحه كال
«،،،اني جنت اريد اخابرك احجي وياك وافهمك
الصار بيمامه بس هي ماقبلت
وحلفت عليه مااتواصل
وياك ولا اكلك
انت الشفته بذاك اليوم كله صار
غصب ماعليها
«،،،،احجي اسمعك
«،،،،يمامه مو مثل ماعرفت هي انهزمت من سعيد
لام مارادته بس ابويه عقد لها وهي مو موجوده
عكدت حواجبي سألته
«،،،شنو مو موجوده وشلون عجل اجتي
يمامه الصغيره
«،،يمامه الصغيره مو بنتها
«،،شنووو
صحت مذهول كمل
«،يمامه بنت اختي الي ماتت واسمها حنين
كمت لحيلي مصدوم وصافن علي كال
«،،اني عندي خوات اثنين يصيرن تؤوم يمامه
الي انت عرفتها وحنين الي ماتت وهي تولد
بنتها
«،،ولك ااانت شجاي تحجي يعني هي
هي
سكتت هو كام وكال
«،،،يمامه بعدها بنيه لان هي انهزمت قبل
العقد بيوم بس ابويه ماحجه هالشي
لسعيد من الله لايرحمه
لا هو ولا اخويه
وابويه وياهم
حجه بقهر ووجه مخنوك وكمل
«««ابويه جان يريد ياخذ مهرها وما حجه
لسعيد هي انهزمت الا وره
ماعقد الهم
كلمه هي بعدها بنيه صيطرت على عقلي وخلتني
اصفن علي مذهول سالته اريد اتاكد من الي
سمعته
«،،يعني هي مو مزوجه
««،لا كتلك بعدها بنيه ماقبلت تاخذ سعيد
اخذت يمامه وانهزمت بيها وسوت هالقصه
حتى تحافظ على روحها وتكدر تعيش
هي وياها
«،،،،اااخ يابه
صحت من گل گلبي وحجيت بخنكه
«««ولك هي هيج واني سلمتها الهم بأيدي
«««انت ماجنت تعرف لان هي ماحجت الك
«،،،،زين شلوون ولك فهمني الصار بيها من اخذوها
سكت بعدين كال
«،،بعد مااخذوها من يم بيت المره سعيد ماقبل
ياخذها راد فلوسه وابويه وذاك الي
انگبر بگبره جابوها لهنا
حتى يبيعوها لواحد
اسمه ابو جون عنده ملهى وانت تعرف
بعد شراح يصير بيها لو بايعها
اله بس هي صارت سبعه
وكدرت تنهزم منهم
«،،اخ ولج اااخ
صحت وضربت الحايط بوكس صحت
بجنون ادحك للغرفه الي
طبت بيها
«،،ولج ليييش ماحجيتي ليش،يمااامه
هو رد
«،،الفرق الي بينكم ماخلاها تكدر تحجي لان
اهلنا عارات وانت ابن ناس
ونقيب بالشرطه
صحت بخبال
«،ووولك يافرق طز بي هالشي وطز باليحجي اني
مايهمني اي احد الي يهمني هي
سكت بعدين كعدت ارجف من غضبي واتمنى
اگضب ابوها واسوي نصين
كال
«،،،،اروح اشوفها
«،،ااريد احجي وياها
هز راسه وراح لجوه رجع ورة مشوار هي
وراه وحالها حال كايده
يمامه من شافتني اجت تركض
وذبت روحها عليه شلتها وحظنتها لصدري
كلت بصوت مخنوك
«،،هلا يابه هلا بالغاليه
كامت تبجي بحظني توخر ادحك عليه بعدين
ترجع تحظني من شافتها شسوت كعدت
تبجي كلت
«،،،ليش هيجي يولي
سكتت ماعرفت شاحجي بعد الي عرفته
وصدمني صدمه عمري ردت
«،،مهيب اني ماافيدك
««،بكيفج انتي ادكولين اني ماافيدك
جاوبتها وكملت
«،،،بكيفج انتي يمامه تخليني احبج وبعدين
ادكولين اني ماافيدك
اخوها اجه اخذ يمامه وكال
«،،اني كاعد بالمطبخ
طلع من يمنا كلت بقهر والغضب
تارس گلبي
«،،،فهميني اني جان شصار بيه من اعرف بروحي
اني سلمتج بأيدي الهم ورحتي بالرجلين
ماردت كلت
«،،جان خليت مسدسي براسي وجتلت روحي
والله اسويها يمامه بس اعرف اني
السبب بضياعج من
ايدي
««انت مااذيتني اني اذيتك
«،،لااا اذيتج وأذيت روحي من دورت وراج متأخر
صحت بيها وكملت بعصبيه
«،،،جان المفروض بنفس اللحظه ادور وراج
مااعوفج ولج بس ااخ منج ااخ
سالتج وتوسلت بيج تحجين
بس انتي ماحجيتي
«،،جنت خايفه عليك منهم
«،،مخبله ااانتي تخافين عليه وانتي تعرفين
اني منو وشاگدر اسوي الهم
نترت بيه باعصاب وكملت
«،،احجي فهميني اني شكو شاد رتبه اتباهى
بيها جدام الناس
«،،،اني كلشي مااريد منك بس تعوفني
بحالي وانساني وشوف وحده
تلوك الك وتكدر ترفع
راسك بيها
«««صعبه والله)
دحگت عليه كملت
«،،صعبه اعوفج وانساج
اني عرفت بيج انتي مو ارمله ومهزومه
من رجلج وماكدرت انساج تريدين
هسه انساج واني عرفت بيج
بنيه ومحد گاضبج
جاوبتني بشهكه
«،،افهم اني وياك راح نتعب من هالفرق
«،ولج طززز بي هالفرق طز باليحجي اخلي
رجليه ،،،، بالي يحجي ويجيب
طاريج بكلمه
يمامه
جنت خايفه من هاي اللحظه يدور ورايه ويعرف
المضموم وهاي عرف وتخبل وهذا واكف كدامي يرجف من غضبه ويحجي بأعصاب
«،،منو يكدر يحجي وياج كلمه غير اشگ حلكه
واخلي القندره بي
««،اهلك ماراح يرضون بيه
«،،مااعليج بيهم اني الي راح ازوج مو هم
««مهيب اني مااكدر اخذك افهم الله يخليك
راح اتعب واتعبك وياي
«««هذا الحجي سامعه من قبل ومااريد اسمعه
مره ثانيه لان اني قفلت عليج ومن زمان وجنت اعرفج ارمله وهسه قفل بعد اكثر من عرفت
بيج انتي بنيه
«،،يعني شنو
«،،يعني اخذج اخذج يمامه لو غصب
جاوب بثقه ووكمل
«،،،ولا تخلين بالج تنهزمين مني اطلعج لو جنتي
جوه الگاع وشفتي اني شلون
كدرت اوصل لباب
بيتج بسهوله
سكت وخله عيونه بعيوني وكمل بتهديد
«،،يمامه اني لحد هسه جاي اتعامل وياج
بگلبي لاتخلين عقلي يدخل
لان راح تشوفين
واحد ثاني
منتضر اجه وكف يمي گله
«،،اني رايد اختك على سنه الله ورسوله
وباجر لو عگبه اني راح اجي وجايب وياي
مشايه جبير اعقد عليها وبنفس
اليوم ترجعون وياي لبغداد
حتى نجهز لعرسنا
«،،هي الك ماتصير لغيرك
صحت باخويه
«،«منتضر انت شكاعد تحجي
اتجاهلني وكمل
«،،اتشرف بيك انت واهلك وهلا بيكم شوكت
مااجيتوا
مشيت من يمهم ابجي رحت كعدت بالغرفه
مااعرف شبيه مره افرح لان عرف
الحقيقه ومرة انقهر لان اعرف
اهله ماراح يقبلون بيه
مهيب
ماجنت اريد اروح من يمهم لان السمعته خلاني
اريد اظل وبنفس اللحظه اعقد عليها
واخذها بس ماردت اسوي هيج
ردت اجيبلها مشايه جبيره وارفع راسها جدام
اخوها وجدام الناس ردتها تفرح
بهل الشي واني افرح
وياها
طول الطريق افكر بالي سمعته من اخوها الوم
روحي لان مادققت بسالفتها بنفس
اللحظه
عقلي ماااستوعب ولا جاي اكدر اصدك ابوها
جان يريد يبيعها لابو ملهى ولوما
تصير سبعه وتنهزم منهم
جان ضاعت واني
ضعت وراها
وانتهيت
الغضب ترس صدري وحلفت الا اعتقل ابوها
واخلي الكيبل يلعب علي اريد انتقم
منه ومن السواه بيها
اطلع هاي السنه وشويه على جلده واخلي
يصير عبره لكل واحد گواد يتاجر
بشرف بناته
وصلت اهلي بسرعه لان دست بالسياره طبيت
للمطبخ ابويه كاعد يشرب جاي
يمه امي وام ياسين وميسون
سلمت كعدت يم اختي
وكلت
«،«يابه اني اريد اخطب
يالله
امي صاحت بفرح هو كال
««يوم السعد هذا بس منو الي تريدها
«،،يمامه
صفنوا عليه صاحت
«««ولك انت شجاي تحجي
«،،يمامه طلعت مو مزوجه
«،،شنوو
ميسون صاحت مذهوله ابويه
سال
«،وهاي بنتها منين جابتها
حجيتلهم قصتها الي سمعتها من اخوها تفاجئوا
وظلوا واحد يدحك للخ امي سالت
«،،ولك يمه انت شجاي تحجي شنو توم ويمامه
مو بنتها بنت اختها
«،،يمه اني جنت يمها وعرفت كلشي
«،،هي حجت الك
«،،لا هي ماقبلت تحجي اي شي اخوها الي حجه
وعرفت منه هي شجانت ضامه عليه
«،،استغفر الله ياربي شلون واكفه بينا الدنيا
ومجاي تنگلب بينا مااعرف
ابويه حجه كلت
«««يابه اني اريد اخطبها
سكت امي كالت
«،ولك يمه بس اصبر خاف السالفه مو هيج
«،،لاا هيج يمه واكلج لو يمامه اخذ لو
ماازوج طول العمر
ابويه دحك عليه وكال
«««فكر زين ابني انت عرفت اهلها منو يعني هذا
نسب ولازم تفكر بهل الشي كلش
زين
«،،يابه اني مايهمني لا نسبها ولا منو اهلها
الي يهمني هي وبس ومن راح اخذها
نسبها راح يصير بأسمي
اني
سكتت وكملت
«،وهي اصلا متبريه من ابوها هي واخوها لاتريد
تعرفه ولا تريد تشوفه
الكل سكت كلت
«،،يمه يابه الي اريده منكم ماتاخذوها بذنب
اهلها هي مالها ذنب ولا صوج
الله بلاها بهيج اهل
وانتو شفتوها شسوت اليه وشلون انقذتني
من الموت اكثر من مره شفتوها شلون
شريفه ومحافظه على
روحها
«««اي والله شفنها وعاشرنها ثكيله وصاحبه
اخلاق
اختي ردت وكملت وي امي
«««يمه انتي مو تعلقتي بنتها وبيها ماظليتي
تبجين عليهن من راحن من يمج
«،،اي بجيت وفراگهن حرك گلبي وعتبت عليها
هوايه وطلعت سالفتها سالفه
عگدت حواجبي وسالت
«،يعني شنو ماراح تجون وياي اخطبها
سكتوا كمت لحيلي وكلت بقهر
«،،هاهيه لاتجون اني اروح بنفسي اخطبها
واخذ وياي جماعتي
«،،هسه الا هي
«،،اااي يمه الا هي
جاوبتها بغضب وكملت
«،،شوفي حالي حتى تعرفين ليش الا هي
دحگت عليه بقهر كملت وي ابويه
«،،شوفني شلون صرت من وراها انسليت يابه
لا جاي اكل مثل الاول ولا جاي
اكدر انام
«،،ابني بس فكر زين
«،،فكرت يابه واعرف بروحي اني ماراح اكدر
اخذ غيرها ولو ما طلعت بنيه لا
ارمله وعدها بنيه اخذها
سكت يدحك لامي ميسون حجت
بتوسل
«،يابه كول اي وخلي نفرح بي
سكت وطول بعدين سال
«،،هسه اذا ردت تخطبها عليمن تروح
«،اروح لاخوها الكاعده ويا
««شدكولين ام منير
««شاكول واني جاي اشوف حاله شلون
صاير من وراها وشوفه كام يرجف من اعصابه
لان ماقبلنا ياخذها
«،،يعني شنو
سالها ردت
«،،يعني هاهيه ابو منير نروح ونخطبها اله
شكرا لزيارتكم عالم روايات سكيرهوم
