رواية جذبني فمك البني الفصل الرابع والخمسون 54 بقلم عبير إدريس

ويميل قلبي اليك دوما ، فأنت الذي عرفتني من داخلي قبل خارجي 🤎

_______

من جنت بين ايديه حسيت كأنما واكفه بين ايادي رجل قيادي يحمل قضيه مهمه او بين ايده مشروع منفرد واستثنائي ، مدرك لاهميه وخطورة مابين يديه متدارك لتلافي الحيره والازمه بالمواقف والايماءات الصدرت مني ... 

بحبه وبحركاته الهادئه كدر يتدارك الموقف ويسحب كل خوف بداخلي ويمتصه رجل يعرف شلون ينجز عمله ، استعمل ويايه كل اساليب واسلحه علم النفس وسيطر على الموقف .... 

من غير الممكن لاي فتاه محرومه عاطفيآ تكدر تسيطر ومتوكع بحبه وتغرق بهواه... 

مجرد حجه ويايه كلام هدأني لكيت نفسي زوجته ورفيقه اله شلون ماعرف كلشي صار بسرعه وبشكل دقيق ... 

رقه وابتسامه نقيه سرق قلبي وجسدي 

قبله تلتها حرب المحبين 

بعدها وضحت الصوره وكشفت عن كميه الشبه الواضح بيني وبين ادهم من حيث المشاعر والاحاسيس .. 

ملئني بالامل وتمنيت حياتي وياه تكون مختلفه .. 

تندمت ما نطيت لعلاقتنه فرصه قبل هذا الوقت... 

بعدما سكرت بالتلذذ بحبه

دخلت برجلي طوعا في شباكه 

اصبحت حبيبته بكل ما تعنيه الكلمه.. 

قصتي ويه ادهم اكبر واعمق من كلمه حبيبين او زوجين ...

مصارحه و تلميحه ذكيه تبعتها مطارده تلتها مراوغه من الادهم، واني بين الحيره والشك وعدم القدره على التيقن ،دعاء مني ولهفه منه تورطت نفوسنا وتداخلت ارواحنا في عالم الحب وتوجت علاقتنه بالزواج.... 

نايمه بحضنه وهمس بأذني. 

ادهم : رحم الله رجلآ تحمل تقلبات امرأته النفسيه فصبر وهون وقدر.. 

ابتسمت وكتله.. 

سيلين : عمري انت اجيتني تعويض رباني عن كل وجع عشته بحياتي ... 

ادهم : اكلج شي متزعلين مني . 

رفعت عيني باوعت بعيونه المتروسه حب ولهفة.. 

سيلين : كول ما ازعل. 

ادهم : من عشت وياج علاقه حقيقيه صح جنت مندمج وكأنما دخل الشهد لجسمي مشاعر واحاسيس كلها تعصف بيه بطمأنينه تتبعها اضطرابات بالتنفس وبكل شي،، بس الاكثر سيطرت عليه مشاعر الحيره و الشك تبعتها تساؤولات مالكيت الها معنى ... 

سيلين : يعني شنو احجيلي واني اجاوبك.. .. 

جر نفس وكال.. 

ادهم : يعني رحيل تبعها عوده فرحيل وعوده خسارات تلتها خسارات ابتعاد قرب مفاجئ تقبل من بعد رفض قاطع ، حرت اريد افسر تصرفاتج ماجاي الكه الها تفسير دوختيني سيلينه. 

مديت ايدي على خده ومسدت عليه بحنيه غمض عينه مبتسم خله كف ايده على ايدي وقربها من شفته طبع قبله.. 

سيلين : ادهم اكو حرب بداخلي وصراع كلش قوي بين القبول والرفض بين الحيره والندم ،ماعرف فجأ تحولت لشخص ثاني ماعرفه لا ارتاح لداخلي ولا اكدر اتقرب من نفسي وافهمها شعور متعب ماعرف شلون اوصفه الك ماعرف .... 

ادهم : حياتج القديمه تركت مخلفات بداخلج خلتج عديمه الاستعداد للتعايش ويايه بصوره طبيعيه .

سيلين :صح واعرف متريد تسمع شي عن زوجي السابق ويمكن تضوج بس اريد اكلك شغله عنه جنت كلش امقته بسببها.. 

باسني بشفتي وهمس بصوت حنين ودافي. 

ادهم : سيلينه انه اختلف عن الكل اتقبل منج واسمعج بكل ممنونيه شنو يعجبج احجي اهم شي ترتاحين اعتبريني عمج القديم بس مو دائما والله اموتج بس من تشكيلي من شي مضوجج وتحسين بصعوبه بالنطق لان صرت زوجج عبالج راح اتحسس ممكن اضوج ما اكذب عليج بس اضوج عليج مو منج. 

سيلين : ههههههه عمو كلش احب هاي الكلمه معزتها خاصه بقلبي. 

ادهم : فدوة لكلبج دعوفيهة لكلمه عمو مو جلطيتني بيها .. 

سيلين : ههههه اسمع خل اكلك شغله..

ادهم : هممممم كولي...

حجاها وكام ارتاج على عكس ايده واني صرت جوه نضراته ...يعني سيطر عليه بنضرته علمود يقراني زين قبلها علك ضوه التيبلام.. 

سيلين: حسب ما علمتني انت وقرائتي البسيطه بعلم النفس توضحلي سامر شخصيته نرجسيه ... 

ادهم : شلون عرفتي؟؟ 

سيلين : علاقته بيه جانت كلش مؤذيه يعني مو مثلك هسه ... 

ادهم : يعني شنو وضحي اكثر لان شبجت عندي الافكار. 

سيلين : باوع سامر كل تصرفاته ويه الناس الميعرفوه مبنيه على بئر زائف .. 

ادهم : قصدج مثل التعلق بالسراب تمشين تمشين وتشوفين نقطه داله ومن توصلين تلكين كلشي ماكو ويصيبج الضمأ 

سيلين : بالضبط يعني علاقاته بيه وبأخته كلش مؤذيه ومتسلط ...

ادهم : شنو يسوي او بالاصح تصرفاته من شنو تجي .

سيلين : يعني من يصخر اخته على شي ينتر بيها ميطلب بأدب هيج شي. 

ادهم : علاقته وياج شلونها.. 

نزلت عيني مكدرت اخلي عيوني بعيونه..... 

مد ايده رفع وجهي وكال.. 

ادهم : صارحيني بكلشي احب اسمع بشنو مريتي.. 

سيلين : شوف هو يحس نفسه رجل اسطورة مستنسخ من القصص والروايات ، تشوفه من بره شاب انيق وحسن الهيئه عنده وسامه رجوليه بس ثقته بنفسه مو طبيعيه يحسسني اي انسان ميستحقه يعني دائما يحجي بالفوارق الطبقيه والعلميه بينه اني كذا اني كذا هاي كل ما نكعد او نطلع فد مكان ... 

ادهم : مممم كملي.. 

جريت نفس تنهدت.

سيلين : يعني يحسسني هو فد شي ثمين مو اي وحده تجي تملكه ويصير الها وبس لا يطلب الحب والاهتمام من اكثر من امرأه لان يحس نفسه يستحق هذا الشي.

همس بعكده حاجب. 

ادهم : خانج؟ 

ضحكت بغصه . 

سيلين : انسان متعجرف يحتقر الزوجه التهتم بيه وتلبي طلباته وبنفس الوكت من اهمله يأذيني بالكلام حتى بعلاقتنه الحميميه يعاملني بأستعلاء ويحسسني كأنما بيناتنه مفارقه كونيه ... 

ادهم : شلون هيج حسيتي ؟ 

سيلين : يعني يحاجيني بعقل شارد مثاليته زايده عن اللزوم عنده ذكوريه بفلوسه وسلطته عليه وبشهادته هيج شي يعني. 

ادهم : اوصفيلي علاقتكم الحميميه ؟ 

تفاجأت من سؤاله واستغربت انتبه عليه كال. 

ادهم : سيلينه اعرف بيج شكد حساسه من هذا الموضوع وانه من اسألج بأعتباري طبيبج الخاص واريد اعرف علمود اكدر اعالجج. 

سيلين : مو صعبه عليك تسمعني ؟ 

ادهم : ابدآ احجي . 

سيلين : يعني ما عيشني مثل ما انت عيشتني بحب حالم وانفعال حار وكدرت تكون قصه رومانسيه خلال ساعه وحده ، هو لا يعني بكل شي يخلق ازمه نفسيه بداخلي اجمل اللحضات يخليني افقد رونقها بذكر موقف عابر اني سويته وماجنت متقصده او ماعندي نيه سوء بس هو يلزمه عليه لزمه ويضل يلوم بيه ادهم خلبني ميمل ابد ينك بكلبي ينك صبح وليل. 

ادهم : ولا جان مبين عليه عجيب ..

سيلين : تذكرتك من كلت الناس متنعرف اله تتعاشر.. 

ادهم : بالضبط ميصير نحكم عن انسان مجرد شفناه مره وحده او حجينه وياه لازم نعاشره يلا ...

سيلين : تخيل هلكد ما ضاغط عليه مااكدر اكمل حوار طبيعي ويه اي انسان بوجوده ارتبك واحسب الف حساب للكلمه يلا احجيها خاف يفهمني بغير قصد... 

تمدد وخله ايده جوه راسي وسحبني لصدره حضنته بيدي وغمضت ضل يلعب بشعري.. 

ادهم : عوفج منه نرجع نحجي بغير وقت ، المهم عندي انتي مرتاحه لو لا ؟؟ 

سيلين : اي هههه. 

باوعلي وضحك 

ادهم : تدوم يابه .. 

سيلين : شوكت تتغده ؟ 

ادهم : والله جوعان هسه واحد ياكل بنفسيه مفتوحه. 

سيلين : يلا لعد .. 

كمت اخذت ملابسي ودخلت للحمام سبحت ورحت للمطبخ بلشت بتحضير الغده هو صار عشا اصلا ههههه طلع من الحمام ينشف بشعره باوعلي وضحك.. 

سيلين : اليوم نضل نضحك لو شنو هههه. 

ادهم: براحتج منضحك عادي .. 

سيلين : لا اضحك اضحك 

ادهم : مريم وين ؟ 

سيلين : يم نرمان بالغرفه 

ادهم : صبيتي لو بعدج. 

سيلين : شويه بعد 

ادهم : اروح يم مرايم بين متكملين اليوم ماشفتها. 

سيلين : ماشي.... 

راح واني سويت زلاطه وصبيت الغده... 

رحت علمود اصيحه لكيته كاعد وبحضنه مريم مغطيه وجها بيدها وتبجي دخلت منتبه عليه جان ملتهي وياها ضليت واكفه استمع الهم... 

ادهم : بابا حبيبتي ميصير تباتين بره البيت شنو انتي متحبيني.. 

جاوبته تشهك 

مريم : اني احبك واحب عمو فهد خطيه ماعنده ابن ويضوج من ما اروح 

ادهم : هو كالج هذا الكلام. 

مريم : اي هو كال من متجين اضوج وابجي عليج. 

ادهم : زين عندي فكره . 

مريم : شنو؟ 

ادهم : اوديج من الصبح وارجع اخذج العصر بس ممنوع نبات بره البيت. 

مريم : توديني كل يوم. 

ادهم : لا مو كل يوم مرتين بالاسبوع. 

رجعت تبجي .. 

ادهم : مرايم انه ربيتج على ضعف الشخصيه والعناد ليش هيج ليش مو احبج انه. 

مريم : احب عمو اريد اروح كل يوم 

ادهم : ميصير .. 

مريم : لعد نعيش وياهم كلنا سوه. 

نرمان جانت تراقبهم وساكته بعدين حجت تعقيب على كلام مريم...

نرمان : ادهم خوش اقتراح ليش ما نرجع نعيش سوه شو ذاك البيت فارغ وهو بيتك وانت شلت فلوس ابويه ورجعتهن اله يعني بيتك بأسمك ليش عايفه وكاعد ايجار وذاك اكبر واحسن. 

جر نفس طويل وكال. 

ادهم : لو اخويه ادري بيه على كلبي ليش ماكعد وياه بس انتي تدرين الصار ماكو داعي اعيد.

نرمان : ماعرف بس فكر بيها خصوصا انت تريد تسافر. 

من كالت هيج شهكت وانتبه عليه رفع راسه باوعلي عكد حاجبه وكال 

ادهم : شبيج ؟ 

سيلين : شنو تسافر وليش. 

ادهم : مو بلغتج كتلج اريد اخذ اوراقج اكمل كلشي واسحبج. 

سيلين: ماسافر ادهم. 

ادهم : صدك تحجين ؟؟ 

سيلين : اي صدك. 

ادهم : شوفي سيلين اكو شغله محد يدري بيها واول مره راح احجيها انه من جنت مسافر ادرس وكلت ماكدرت ارجع للعراق لان فلوس ماعندي والتكلفه عاليه مال سفر ، بوقتها ضيغم فتح ويايه موضوع شراكه بمشروع هناك منه رأس المال وانه اشتغل وياه من صارت عندي فلوس شاركته بالنص يعني هسه انه وياه شركاء اريد اسافر هم الزم شغلي وهم عندي فرصه اشتغل بشهادتي بمكاني الصحيح لهذا لتحاولين تستفزيني وتخيريني بينج وبين السفر لان ما راح اختار ... 

سيلين : ادهم ماكدر اعيش بغربه ما متعلمه . 

ادهم : ليش منو عندج هنا علمود تبقين اذا انه ومريم اجينه وياج ؟؟؟ 

سيلين : وايفين شلون ؟ 

ادهم : يعني شنو اعطل اعمالي علمود ايفين وهيه مستقره ويه زوجها قابل راح تعوفيها بالشارع بيتها ومأمنين عليها.

سيلين : ماعرف خليني افكر..

ادهم : تقبلي الموضوع مو تفكرين لان ما يحتاج تفكير واصلا محسوم .

سيلين : ليش هيج تحجي ويايه ادهم. 

ادهم : سيلين شنو سالفتج ؟ 

سيلين : ماكو شي تعال اكل صبيت الاكل وهسه برد. 

دنك على مريم شاورها وباسها من راسها نزلت من حضنه وكام طلع للمطبخ كعد ياكل واني كعدت كباله.. 

ادهم : اكلي 

سيلين : شبعانه شويه لاخ اكل. 

دنك ياكل كمل وكال الحمدلله راح غسل ايده واجه سألني . 

ادهم : اكو جاي 

سيلين : هسه اسوي 

ادهم : لا تتأخرين اريد اطلع.

نزيت وكتله... 

سيلين : وين؟ 

ابتسم. 

ادهم : بلشنه حساب ههههه 

سيلين : لا بس هيج سألت. 

ادهم : اي سألي ليش لا.. 

سيلين : ساعه بيش ترجع.. 

ادهم : هههههههه استلم تريدين ماروح عادي نضل سوه شتكولين ؟؟

حجاها وغمز 

سيلين : ادهم 

ادهم : رايح رايح هههههه.. 

طلع واني رتبت المطبخ وغسلت الصحون كملت رحت توضيت صليت المغرب والعشا ولو فاتتني وتأخرت بس احسن ما اترك ... 

بليل ساعه عشره نشفت شعري لان بيه رطوبه واضوج انام وهو رطب طفيت الضوه ومددت بفراشي... 

ماكو نص ساعه توني اغفه واندك الباب صحت منو اجاني صوته. 

ادهم : ادهمج.. 

ضحكت... 

سيلين : تعال ... 

فتح الباب علك الضوه وباوعلي عاكد حاجبه مبتسم.. 

ادهم : شو هنا يابه .. 

سيلين : لعد وين اروح؟ 

ادهم : هههه صدك تحجين. 

سيلين : شنو شبيك . 

ادهم : غير تجين تنامين يمي . 

سيلين : هاا ادهم سالمين. 

ادهم : دتعاي اشوفج شغله وبعدين نامي 

سيلين : اجلها لباجر نعسانه حباب. 

ادهم : تجين لو اشيلج 

سيلين : ههههه شنو السالفه. 

ادهم : روحي كدامي للغرفه بين ما اغسل واجي. 

سيلين : ماشي.. 

راح يمشي بثكل ، كمت رحت لغرفته باوعت على السرير فارش سيت نوم لونه زهري كلش حلو وبصفه عطر ضحكت معناها يريدني البسه ومبين مشتريه جديد لان اني ماعندي منهن ... 

سديت الباب وبدلت حبيت افرحه وما اكسر فرحته بيه كافي الصار واصلا اني اريد اعيش... 

وكفت كبال المرايا وبلشت ارسم شفتي باللون اليحبه جان حاطه على الميز ضحكت من شفته محضرهن كلهن ههههه وردي وحمره بني يلا قمه الاناقه ...

دخل واني ارسم بالروج وكف ورايه مبتسم 

تقرب مني حاوط خصري وهمس بأذني ...

ادهم: اعشق طول رقبتج والعروق البارزه بيها . 

سيلين : ممممم

ادهم : تعرفين انه معجب بيج كلش هواي ... 

سيلين: اعرف...

ادهم : تعرفين مرات بشنو اشبهج.... 

رجعت راسي على صدره شدد لزمته على خصري همست.. 

سيلين : بشنو؟ 

ادهم : اله اغريقي..... 

ضحكت .. 

سيلين : مسامعه بيهم .... 

ادهم : ليش همه هواي ... 

قرب شفته من بشرتي طبع قبله رقيقه قرب انفه شم جلدي ومشه ببطئ باتجاه ركبتي ويرتفع لأذني صعودا لشعري ويرجع مره ثانيه لركبتي ، غمضت اقاوم روحي ما اريد اضعف بعدين صارت شفته على اذني وهمس يعدد ... 

ادهم : ابولو ، ارتميس ،اثينا، آريس ،افروديت ،

هيرا ،هيدز ، ديميتر وبعد هوواي تحبين اعددهم الج .

. 

جاوبته بروح خدرانه احس كوه واكفه ابين اني مسيطره بس لا فاقده كلشي ... 

سيلين : لتعدد بس كلي اني المن اشبه من ذوله... 

ادهم : افروديت .. 

سيلين : شمعنى .. 

ادهم : هذا اله الحب والجمال.. 

سيلين : مممممم حلوو.. 

ادهم : بعدين اشرحلج عنهم واحد واحد.. 

سيلين : ادهم دماغي تعب هواي صارت بيه معلومات.. 

ادهم : اريدج بعد وبعد تفوقيني بكلشي اريدج قويه بالف رجال.. 

سيلين : متخاف مني .. 

ادهم : الصراحه .. 

سيلين : اي .. 

ادهم : اهابج .. 

سيلين : ليش ؟ ومن شوكت..

ادهم : ليش عوفيها احتفظ بيها لنفسي اما من شوكت من يوم الكدرتي تسيطرين على حركاتج وتعابير وجهج وكمت ما احزرج....... 

سيلين : ممممم 

ادهم : هسه معليه شنو هذا الحسن. 

التفتت عليه صرت بين ايديه حاوطني بحنيه وحضني بقوه حسيت عظامي راح تتكسر.. 

همست. 

سيلين : انت كلش ضخم واني ضايعه يمه يعني بين قوسين اني قزمه.. 

دنك راسه وهمس بأذني.. 

ادهم : قاري مقوله جدآ عجبتني وحسيتها تنطبق عليج.. 

سيلين : وهي. 

ادهم : انتي لستِ قصيره انتي ك ورده لم تأخذ حقها من ماء الحياة جيدا لذلك لم تطول كثيرا... 

سيلين : ههههههه هاي شنو حبيت. 

ادهم : انه هم حبيت.. 

سحبني من ايدي ومشينه بأتجاه السرير كعد رحت كعدت يمه.. 

لزم ايدي وقلبها ومرر اصبعه يرسم على باطن ايدي برقه .

سيلين: ههههه اغار لتسوي هيج.. 

شالها ومررها على وجها ولحيته باسها وحضنها بين كفوف ايده تقرب طبع قبله رقيقه على خدي.. 

رفعت راسي باوعتله شلون يتأمل ملامحي كأنما عنده امتحان مهم ولازم يركز بيه.. 

عيونه تتوزع بين وجهي وشفتي نزولا لرقبتي .. 

سيلين: ادهم حرجتني تره. 

ادهم : شمسوي اغمض عيوني ماباوع .. 

سيلين : والله نضراتك تحرج اكثر من لمساتك.. 

ادهم : تريدين احرجج بيها ماعندي مانع. 

سيلين : يوووو .. 

ادهم : كولي حبيبي وسماح ما اخجلج.. 

سيلين: يعني تعوفني اروح انام بغرفتي. 

ادهم : لا عيني صيحيلي ادهم ماريد تغيرين شلون لوتيه..

سيلين : هههههه 

تمدد وحضني اني هم حضنته. 

ادهم : انتي هواي حلوه 

سيلين : بس بعيونك اصلا اني شكلي كلش عادي 

ادهم : عادي صح بس جدا مميز عندي . 

سيلين : شمعنى؟ 

ادهم : بيه جاذبيه تخبل. 

سيلين : انت هم حلو. 

ادهم : منيلي مجولح . 

سيلين : مجولح بس تخبل .. 

ادهم : ههههه ... 

خلصت ليلتنه بعتب وغزل واشتياق والحمدلله كدرت اتقبله ونوعا ما تخلصت من افكاري القديمه .. 

ثاني اليوم الصبح كعدني ساعه ٨ 

ادهم : سيلينه سيلي حبيبي .. 

سمعته يضحك ضحكه خفيفه فتحت عيني باوعت شعره مهوس وعيونه منتفخه مال نوم.. 

همست. 

سيلين : صباح الخير.

ادهم : صباح الحب والجمال يلا كومي. 

مطيت جسمي وكتله. 

سيلين : مو بعد وكت .. 

ادهم : عندي اجتماع واريدج تجين ويايه.. 

سيلين : وين ؟ 

ادهم : عدنه مجموعه تتكون من طلاب وطالبات كذا جامعه يعانون من عقد نفسيه قديمه واحساسي يكول همه متشاركين بنفس الالم لهذا جمعناهم سوه نريد نعرف اذا تناقشو بيناتهم شنو الحلول المطروحه ، وهل همه كانو ضحايا المجتمع او الاهل او نفسهم... 

سيلين : ادهم ما اكدر احضر.. 

ادهم : ليش حبيبي.. 

سيلين : اتكأب عفيه. 

ادهم : ماعرف براحتج بيج حيل تسويلي كلاص جاي

سيلين : هههههه اي ميخالف..

ادهم : يلا بين ما اسبح لتتأخرين. 

سيلين : ماشي.. 

فات للحمام سبح واني حضرت الريوك خليته على الميز طلع من الحمام جنت منداره اطلع بالكوابه اجه حضني بلهة وكال.. 

ادهم : عيون ناعسه وشفتان ممتلئة لونها بني بطعم الكاكو يا من اذابت فؤادي من اثر عضات اسنانك لها وانتي تقرأين وتداعبين خصلات شعرك المتدلي على كتفيك الجميلتين ...

سيلين : هاي شنو هههههه

ادهم : احبج ملهمتي وفاتنتي وجميلتي عروستي احب كل ما فييك حتى ذالك العيب الخلقي الجميل بخدك الايسر عندما تبتسمين ... 

سيلين : ممممممم اليوم كله كالب على الفصحى. 

جان واكف ورايه رجع حضني بقوه وهمس. 

ادهم : الحمد لله على النعم اولها انتي واوسطها انتي واخرها انتي .. 

سيلين : ههههه 

ادهم : ضحكي بعد احب ضحكتج.. 

سيلين : ليش .. 

التفتت عليه حاوطني بأيده توزعت نضراته على وجهي مرورا بشفتي ابتسم وكال.. 

ادهم : من تضحكين احسها تطلع من كل كلبج مابيها كذب ولا تصنع.

سيلين: شلون عرفت. 

ادهم : من الغمازه التحفر خدج ههههه.. 

سيلين : خوش تركز شديد الملاحظه دكتور ادهم. 

ادهم : ههههه لا مو على كل شي انتبه..

سيلين : لعد ؟ 

ادهم : اباوع على اليعجبني بس ... 

سيلين : ماشي باوع بس سؤال.. 

ادهم : وهو ؟ 

سيلين : شوكت منتبه عليه عاظه شفتي واقرا 

ادهم : حييل هوواي .. 

سيلين : صدك اصلا ما اتذكر مسويتها. 

ادهم : شمدريج انتي مندمجه تقرين ومتدرين بنفسج .. 

سيلين : هههههه شديد الملاحظه مثل ما كتلك. 

ادهم : كلششش. 

حجاها ورفع حاجبه. 

سيلين : تريك تره الاكل برد. 

كعد على الميز وسحب ايدي.. 

ادهم : سويلي لفه. 

سيلين : اسوي ليش لا. 

ابتسمت وسويتله لفه وصبيت الجاي.. 

سيلين : هاك.. 

ادهم : اكلي منها. 

سيلين : ماريد بعدين اتريك اكل انت. 

ادهم : هئ( لا ) انتي اول 

سيلين : يعني ضروري. 

ادهم : جدا. 

عضيت من اللفه وجر ايدي البيها اللفه وعضها .. 

ابتسمت...

سيلين : تعرف بشنو ذكرني هذا الموقف. 

ادهم : بشنو ؟ 

سيلين : من رحنه زياره وجنت مخطوبه وضلت شويه من اللفه مالتي والعصير كعدنه نتغده وانت عفت كل الاكل واكلت لفتي. 

ابتسم مقهور وكال...

ادهم : بس شكد لذيذه جانت اطيب لفه ماكلها بحياتي.

سيلين : ياالله عليك انت شنو 

ادهم: وين الجاي؟ 

رفعت الكوب بيدي. 

سيلين: هذا 

ادهم : شربي . 

سيلين : هههههه شطلعت هاي. 

ادهم : اي والله شربي. 

شربت وقدمته اله اخذه وشرب من نفس المكان الشربت منه. 

سيلين : ليش هيج تسوي. 

ادهم : احب انتي شعليج اني وحبيبتي 

سيلين : اي صدك اني شعليه. 

ادهم : مادام ماعندج شي اخذج لففه ويه مريم هم تغيرين جو وهم عينج عليها .. 

سيلين : عادي اروح. 

ادهم : اي والله اكون ممنون. 

سيلين : لا يمعود شسويت لتهولها .. 

ادهم : راح ابدل لتأخريني عيني. 

سيلين : اي هسه اكمل بسرعه .. 

رحت كعدت مريم بدلت الها وبدلت .. 

مريم : وين راح نروح. 

سيلين : لعمو فهد 

مريم : هيييي صدك.. 

سيلين : اي صدك تتريكين 

مريم : لا هناك نتريك يم ففه. 

سيلين : ههههه يلا يم ففه نتريك. 

ضحكت والله عليك سوالف فهد. 

سيلين : ولج هذا بابا كاعد يدك هورنات ثبرنه امشي نطلع هههه. 

مريم : يلا .. 

لزمت ايدها وطلعنه وصلنه لبيت فهد وففه صف السياره ادهم والتفت عليه ...

ادهم : ما اتأخر قبل الظهر انه يمكم. 

سيلين : ماشي منتضريك مع السلامه 

حجيتها ونزلت . 

ادهم : الله وياج سلميلي.. 

سيلين : يوصل.. 

دكينه الباب وره عشر دقايق مصلوبين يلا فتحها فهد النوم بعينه باوعلي بنص عين وكال..

سيلين : صباح الخير شنو ساعه يلا تفتح 

فهد : عبالي حرامي وما فتحت..

سيلين : هههههه ليش الحرامي يدك الباب. 

فهد : اي تطورنا كلشي تغير.. 

سيلين : والله عليك سوالف وين ففتك. 

حجيتها وفتت 

فهد : نايمه .. 

سيلين : اسفين على الازعاج كعدناكم. 

فهد : بعد كعدت عليمن الاسف.. 

حجاها وشال مريم يبوس بيها.. 

سيلين : شكد صريح انت. 

حك كصته مغمض نص عين وكال. 

فهد : ماعرف اجامل. 

سيلين : هههههه لتجامل عيني. 

فهد : مرايم حبيبه عمها اشتاقيتلج هوووواي.. 

مريم : مو بكدي عمو. 

فهد : اليوم شلون اونسج ماخلي مكان ماوديج .

مريم : بابا راح يجي ياخذني.. 

فهد : بكيفه هسه نطلع ونغلق الموبايلات بعد ميحجي..

مريم : هههههه عمو خاف يزعل 

فهد : نراضيه بوسه. 

مريم : هههههه متفقين. 

سيلين : مينلام بيك ادهم . 

فهد : انتي سكتي وسويلنه كهوه .

سيلين : شو صارت بالعكس غير انت تضيفني. 

فهد : اريد اشربها من ايدج.. 

حجاها رافع حاجبه نزل مريم من ايده راح للكاونتر طلع الكهوه والدله خلاها على الكاونتر.. 

سيلين : خو انت سويها بعد عليمن. 

فهد : هسه شطالب منج متكليلي .. 

سيلين : راح اسوي ريوك نتريك وبعدين نسوي كهوه 

فهد : بكيفج.. 

جر كرسي وكابلني وكعد.. 

فهد : شنو راح تسووين. 

سيلين : اي شي يعجبك.. 

فهد : كلشي من ايدج طيب . 

سيلين : ههههه غير لوتي .. 

ضحك .. 

مريم : مرايم اليوم افرج فر .. 

ضلت تضحك مكيفه بيه...

طلعت بيض وجبن وخليت الطاوه على النار وبلشت اكلي.. 

فهد : هاي شنو راح تسوين بيض. 

سيلين : اي 

فهد : شلون راح تسويه

سيلين : بيض عيون. 

فهد : اني اريد خشم. 

سيلين : ويييع فهد شبيك انت. 

سكت وكل شويه حاجي على شي وناطي رأيه اخر شي زهكت. 

سيلين : شنو السالفه ؟ 

فهد : اذا مضوجج اكوم.. 

سيلين : من رأيي روح كعد ففه بين ما اكمل واصيحكم .. 

كام واجه وكف بصفي .. 

ضل مركز بوجهي باوع لشفتي ..

سيلين : سالمين شبيك. 

فهد : شفتج شبيها ؟

سيلين : شبيها ؟

ضحك وراح وصل باب المطبخ صحته. 

سيلين : تعاااااال شنو قصدك بله. 

التفت عليه غمزلي ضحك وراح . 

كلش ضجت منه شعليه هو وليش يتدخل.. 

كملت الريوك ودزيت مريم صاحتهم اجوي شافتني ايفين طارت بينه. 

ايفين : هلووووو احلا صباح هذا. 

سيلين : ههههه شلونج خوش نوم هذا.. 

ايفين : سهرنه البارحه نمنه متأخر.. 

فهد : خصوصيات هاي يابه لتحجين بيه..

سيلين: شكد بلا اخلاق انت شبيك..

فهد : انه .. 

سيلين : اي انت

فهد : شوفي ففه اختج شتكول.

ايفين : معليه حلوها بينكم

 كعدنه نتريك وهو ومريم بس يسولفون عبالك صارلهم سنه ما متشاوفين ..