رواية جذبني فمك البني الفصل الخامس والخمسون 55 بقلم عبير إدريس

لا أحد يُشبه أحد .

حتى في الإحساس ...

فــهنـآآآك مَـن يُسلّـم باليد ...

 و هنـآآآك مَـن يُسلّـم بالـرووووووح ... 

  أما أنتَى لا تَحتاج سَلام .. فأنتِ السَلامُ لروحـي

ادهم 

مالذي وضعته في قلبي حين أصبح جميع الخلق لا يملئون فراغك عندما تغيب؟؟

سيلي

___________

كاعدين نتريك وايفين مجرد خلت لكمه بحلكها لعبت نفسها وكمزت للحمام كمت رحت وراها اريد اشوف شبيها ساده باب الحمام وتتقيء تكطعت عليها دكيت الباب على كيفي. 

سيلين : افونه حبيبتي ايفين افتحي الباب... 

متجاوب مستمره رحت للمطبخ لكيت فهد مستمر ياكل ولا داير بال عصبت منه على البرود العنده.. 

سيلين : صدك تحجي ؟ 

مدنك ياكل وجاوبني برود استفزني بعد اكثر.. 

فهد : انه شكايل حتى صدك احجي ساكت وكاعد اكل... 

سيلين : ياااا شبيك انت.. 

فهد : شبيه كاعد اكل مسوي شي غلط شفتي بيه شي غريب مثلا ؟؟؟ 

سيلين : شبيها ايفين. 

فهد : شمدريني حالي حالج.. 

سيلين : شو عادي عندك متأثرت عليها.. 

فهد : تلكيها مستبرده وبعدين احسن ما واكفه فوك راسي روحي شوفيها شبيها خلي بالج يمها افضل ما تجاكريني.. 

سيلين : كلشي ماكول غير الله يساعد ايفين عليك. 

فهد : ففتي هاي الضلعه هيه راضيه بكلشي طلعي من الحمره.. 

سيلين : الحجي وياك ضايع فعلا .. 

فهد : عود دوريه.. 

صدك ضحكني من شافني اضحك ابتسم ... 

سيلين : استغفر ربي واتوب اليه.. 

عفته ورجعت للحمام اول ما وصلت فتحت الباب ايفين وجها احمر عيونها مدمعه رحت يمها حضنتها من كتفها ومشينه للهول نيمتها على القنفه مسحت وجها بالخاولي وكعدت يمها.. 

سيلين : شبيج حبيبتي ؟ 

جاوبتني بتعب.. 

ايفين : ماعرف شو نفسي لعبت من ريحه البيض. 

سيلين : خاف حامل يولي.. 

مجرد حجيت الكلمه هيه رفعت عينها باوعت ورايه التفتت لكيت فهد واكف خال ايده بجيوبه وخازرها من شافني التفتت غمزلي وراح صعد فوك.. 

سيلين : شبيه هذا تره موطبيعي. 

ايفين : عفيه سكتي لتحجين شي الله يخليج.

سيلين : انتي شدعوه هيج خايفه منه وترجفين. 

ايفين : سيلين التهي بحياتج وعوفيني بحياتي لا ضارتج بشي ولا انتي ضارتني الحمد لله استقرت حياتج كفي عني. 

سيلين : هاي فوك ما خايفه عليج. 

ايفين : خوفج يعم عليج وعليه لهذا نصيحه من اختج ابتعدي عن حياتي وعن فهد ابتعدي عن فهددددد معليج بيه مثل ما جنتي تحذريني وماسمعت اني هسه احذرج منه وسمعيني...

سيلين : شنو تعرفين وضامته عني .. 

ايفين : كلشي ماعرف .. 

جرت نفس ودارت وجها غمضت عينها ، وره شويه نزل فهد من فوك يمشي سريع وطلع من البيت ... 

اقل النص ساعه رجع اول ما فات وكف فوك راس ايفين متجاهل وجودي اصلا... 

فهد : كومي للحمام كدامي. 

رفعت عينها باوعتله عاكده حاجبها. 

فهد : لتباعين هيج كومي كتلج. 

كامت مشى كدامها وهيه تبعته واني هم رحت وراهم اريد اشوف شنو السالفه وليش هيج يعاملها.. 

نطاها علاكه اخذتها منه وحجه همس بينه وبينها ماسمعت شنو بس هيه تفاجأت مجاوبته اخذت العلاكه ودخلت للحمام... 

ماكو دقايق وطلعت بس اختي ترجف خايفه باوعت على ايدها شايله اختبار حمل اخذه منها شاف النتيجه لو انجن.. 

فهد : هذا اكيد غلط جبت واحد ثاني عيديه.. 

سيلين : شنو السالفه ممكن تفهموني .. 

تجاهل سؤالي واستمر بكلامه ويه ايفين.. 

فهد : ايفين عيدي الاختبار بسرعه. 

ايفين : ماكدر بعد لازم اشرب مي يلا. 

سحبها من ايدها قوي ودخلو للمطبخ اخذ كلاص وترسه من البراد كعدت على الكرسي مال ميز الطعام وهو وكف فوك راسها غصبها تشرب كلاص كامل اخذه منها و رجع ترسه مره ثانيه وهم شربته اربع كلاصات خلاها تشرب.. 

ايفين : ماكدر بعد لعبت نفسي..

مجاوبها اعصابه متوتره وعيونه تخزر ب ايفين.. 

فهد : يلا كومي. 

سيلين : انتظر يعني شلون توها دخلت شبيك فهد. 

التفتت عليه رافع اصبعه محذر.. 

فهد : اياج تخلين خشمج بشي مايعنيج التهي بشهر العسل مالتج.. 

سيلين : انت شبيك فهمني كاعد احجي وياك طبيعي ليش تتشنج وبس تريد تتعارك. 

فهد : انتي اليوم وجهج كلش خير علينه اول ماجيتي صارت مغثه وكملت بالخبر التعيس لهذا مو طايق اسمعج. 

سيلين : معليه بحجيك كله لان اسلوبك ماعرف شلون اوصفه بس الفهمته ايفين حامل وانت متخبل لعد ليش ماخذتو احتياطكم وحسبتو حساب لهذا اليوم شو انت متفاجئ وهيه خايفه شكو غير افهم.. 

فهد : مو لازم تفهمين كلشي وتدخلين بحياتنه صح هيه اختج بس حياتها متخصج.. 

سيلين : ماعندي تعليق على كلامك لان الضاهر الكلام وياك ضايع.. 

كام يدردم عليه همس.. 

فهد : ضايع ضايع متعلمه كلمه وجلبت بيها مثل المخبل من يجلب بخرخاشه.. 

هزيت ايدي ورحت للهول لكيت مريم تلعب بالموبايل ومندمجه.. 

سيلين : ها مريومه شدتسوين؟ 

رفعت عينها باوعتلي ابتسمت ودنكت تلعب 

مريم : العب لعبه كلش حلوة تعاي لعبي ويايه.. 

سيلين : هذا الموبايل مالمن.. 

مريم : ها هذا مال عمو فهد . 

سيلين : يدري بيه عندج.

هزت راسها ب اي وكالت. 

مريم : هو كلي لعبي بيه .. 

سيلين : وبابا مو ميقبل تلعبين بالموبايل منعج منه ليش من تجين هنا تتصرفين تصرفات بابا مانعج منها ليش مريومه. 

مريم : بابا كلشي يكلي لا وغلط وعيب عمو يقبل العب ويقبل اطلع وياه بالشارع ونركض وكلشي نسوي ويكلي عادي لعبي.. 

سيلين : وهو منو الصح ولازم نسمع كلامه بابا لو عمو. 

مدنكه تلعب جاوبتني. 

مريم : ثنينهم صح واحبهم بس عمو فهد يونسني ويضحكني هواي اكثر من بابا..

ضليت صافنه عليها وكلبي لعب وبنفس الوكت متت قهر على ادهم اذا سمع يتخبل ويضوج اعرفه. 

انتبهت عليهم فاتو للهول وراحو بأتجاه الحمام ، ضليت كاعده بمكاني وره شويه كبت العطيه بينهم رحت وكفت على صفحه واسمع واتفرج ، ايفين ترجف خوف وفهد يرجف من الاعصاب .. 

عاط بيها بصوت عالي هز البيت.. 

فهد : احنه على شنو متفقين ؟؟ 

دنكت راسها خايفه منه لزم وجها وعصر فكها وكام يحرك بوجها يهز بيه قوي يمنه يسره...

فهد : جاوبي لتدنكين راسج انه شكايل ومن شنو محذرج.. 

عاط بيها . 

فهد : جاوووووووبي من احجي وياج لتصيرين خرسه

سيلين : فهد على كيفك وياها ليش هيج كاعد تسوي. 

مجاوبني ، رجع عاط عليها وشمر الاختبار مال الحمل بوجها عافها وراح كعد بالهول ورجله تهتز ، راحت ايفين كعدت يم رجله بالكاع حضنته برجله وخله راسها بحضنه.. 

ضل يباوع على راسها ، شال ايده يريد يخيلها على راسها ويرجع يجرها اخر شي خله ايده ومسد على شعرها دنك باسها براسها هيه من شافته هيج سوه كامت وحضنته بجت وهو عيونه دمعت بس سيطر على نفسه ، دمعته منزلت بس الرجيف اخذه .. 

حرت شنو هذا التناقض بالفعل شنو راد يضربها شنو حضنها حيره ضليت اتفرج اريد اشوف ليوين توصل وياهم. 

كعدت على رجله ولزمت وجها باسته بخده وهو صافن يباوع بالفراغ الكدامها.. 

ايفين : فهد انت مو يوميه متأذي على علاوي وتبجي عليه مرات وتنام بغرفته اني حبيت افرحك علمود تنسى شويه وتلتهي وبنفس الوقت تبطل حقد وتعيش حياتك وتتغير للأحسن لخاطر ابنك ماعرف بنتك الله شنو يرزقنه نعمه وبنفس الوقت اني تعبت من معاملتك كلت من راح تعرف اني حامل تتغير ويايه.. 

رفع راسه باوع بوجها وكال... 

فهد : انه ما مأذيج بقصد وانتي تعرفين كلش زين وحاجيلج وجنتي قابله شنو الاختلف هسه. 

ايفين : تعبت وانت متسمعني كافي فهد خلينه نعيش وانسى كلشي صار وياك قبل. 

فهد : خصم الكلام الطفل ينزل ميبقه. 

ايفين : فهدد صدك تحجي. 

فهد : اي صدك واليوم تنزليه. 

اتغير كلامه ونبرة صوته قست.. 

ايفين : واذا ما نزلته شتسوي. 

خزرها صك على اسنانه ضيق عينه، وكال 

فهد : تعرفيني ما حاجه اكول..

سيلين : يعني انت بدال ما تفرح تريد تأذيها ليش وفوكاها تهدد بيها كدامي. 

وخر ايفين من حضنه وباوعلي.. 

فهد : هاي انتي بعدج هنا .. 

سيلين : اي وين رحت بعدني اتفرج على المسرحيه. 

فهد: وان شاءالله عجبتج. 

سيلين : لا معجبتني بس اريد افهم كلها الغاز. 

فهد : بين قوسين ماريد اصير اب من جديد واربط نفسي بيه عندج اشكال بقراري ست سيلين..

سيلين : ليش؟؟؟؟ 

فهد : سألي زوجج الدكتور هو يفهمج. 

سيلين : شعليه ادهم ليش كلشي يصير وياك كلت ادهم.. 

عاط بيه بحيث خرسني .. 

فهد : موووو اعرفه راح يلزمني من ايدي التوجعني ويعرف نقطه ضعفي ولدي ومنا يحاربني لهذا ماريد لزمه عليه.

صفنت عليه هذا شجاوبه بله. 

سيلين : تره ادهم مو هيج ماكو بطيبه كلبه انت ليش هالكد حاقد عليه. 

فهد : ماكو بطيبه كلبه وياكم بس وياي اقسى من الجلمود.. 

سيلين : انت اتقرب منه وشوف ادهم شنو 

فهد : ههههه باع هاي جايه قبل كم يوم وعرفته انه مو بس اخو انه صديقه وعلاقتنه اقوه من علاقتج بيه بس هو دمرها بيده .. 

ايفين جرت وجها وخلته يباوعلها. 

كامت تهمس كلام بينها وبينه وهوو يغمض بصبر اخر شي عاط متحمل. 

فهد : انه اب سيء .. 

ايفين: بالعكس انت اب زين وراح تشوف.. 

فهد : لا تتأذون وهوواي هم وبعدين ياخذوكم مني مثل ما اخذو راويه وعلاوي.. 

ايفين : اني ما اسمح لاي واحد يفرقنه عنك كافي فهد الله يخليك كافي.. 

فهد : اليوم الطفل ينزل ميبات برحمج. 

ايفين : حرام عليه اقتل نفس. 

فهد : اذا مترحين توكعيه انه اوكعه بطريقتي ...

ايفين : وتالي فهد. 

لزمها من زندها هزها حيل. 

فهد : انه مو جايبلج زفتت ليش ماخذتي منه. 

ايفين : اريدك تتغير وتبتعد عن المشاكل اريد احتويك وارجعك لنفسك .. 

فهد : انتي راح تكونين سبب ثاني بدماري واذا صارت يا ايفين ادفنج.. 

ايفين : متصير بس توعدني تغير افكارك وكلشي ينتهي وانت تفهمني زين شنو اقصد...

خزرها يعني سكتي لان اني واكفه... 

هزت راسها وكامت للمطبخ وكفت يم البراد تشرب مي رحت وكفت يمها حجيت بصوت ناصي علمود ليسمعنه.. 

سيلين : شنو البينكم ، علاقتكم مبنيه على شنو وشلون هيج صرتي تحبيه وحبج لايمن وين راح ووووو هواي تساؤولات احجيلي عقلي راح يوكف.

ايفين : سيلين للمره الالف احذرج تركي حياتي ولتنبشين بيها تره تخسرين هووواي التهي بيتج ورجلج وعوفيني احارب وحدي اسلم اليه والج يابنت ابويه.. 

سيلين : الكم ايد بعذابي صح.. 

صفنت بوجهي دنكت راسها بعدين باوعتلي تنهدت وطلقت زفير حاد همستلي... 

ايفين : للمره المليون اكلج لتنبشين بحياتي تخسرين هواي واولها ادهم.. 

عافتني وفاتت دخت خلتني اضرب اخماس بسداس.. 

كلش ضجت طلعت موبايلي اتصلت على ادهم يدك لحد ما يفصل عرفت بعده باالاجتماع دزيتله مسج.. 

( ادهمي راجعه للبيت اني ومريم اتصلت ابلغلك الضاهر مشغول لهذا كلت انطيك خبر باي ) 

دزيتها ورحت للهول لكيت مريم وحدها وهمه صاعدين فوك اسمع صوتهم بعدهم مستمرين بالنقاش الحاد.. 

سيلين : مرايم عوفي الموبايل وامشي نروح للبيت .. 

رفعت عينها عاكده حاجبها. 

مريم : مااا تونه اجينه وعمو يريد يطلعني.. 

سيلين : مرايم بلا عناد كومي نروح ورايه غده شوكت اسوي حبيبتي. 

تلعب بالموبايل ولا مهتمتلي ولا يمها.. 

مريم : روحي انتي وبابا من يخلص دوامه يجي ياخذني. 

سيلين : مررريم بلا عنااااد كومي كتلج تره ضجت. 

مريم : اهووووووووووووووو . 

سيلين : ليش تعيطين مو عيب انتي مو تكولين لازم نحترم الكبير شو انتي ما تحترميني. 

دنكت راسها مغضبه ...

عفتها وكعدت خليت ايدي على راسي حسيتها ضاعت بعد منكدر نسيطر عليها ولازم ابلغ ابوها يشوفلها حل ، لهناك واسمع عيطه فهد.. 

فهد : جنه متونسين منين طلعتي فكره الجهال كتلج ماريده ينزل يعني ينزل لو اشوفج العجب.. 

ماعرف شنو تحجي وياه لان صوتها ناصي بس صوت بجيها اسمعه ، انتهى الخلاف بنزلته من الدرج سريع وهيه نزات تركض وراه وصل باب المطبخ صاحته بصوت عالي. 

ايفين : بداعه علاوي اوكف لتطلع.. 

كمت وكفت باب المطبخ اريد اشوف ليوين يضلون هيج .. 

من حلفته بأبنه وكف ناطيها ضهره دنك راسه راحت حضنته من ظهره.. 

ايفين : عليك الله لتسوي بيه هيج اعرف طبعك صعب وماراح تلين ابد ومتسمعني بس انطينه فرصه نعيش انطي فرصه للطفل يجي للدنيا بلكت يكون سبب بسعادتنه الحقيقيه افضل ما عايشين بالمجامله والضحك على العقول بالتمثيل.. 

التفت عليها وجها احمر مغضب من العصبيه رفع اصبعه بوجها مهدد.. 

فهد : سمعي كتلج ينزل وانتهى الكلام لتلحين وتجربين حظج وياي....

ايفين : ليش ليش اريد افهم تره ما راح اعوفك مثل ما روايه عافتك. 

سحبها من ايدها ودفعها على الكاونتر.. 

فهد : انه ما كايل لتجيبين سيرتها كدامي ولتحجين بيهااااا. 

ايفين : هيه السبب بدمارك وانت راكض وراها وتريد تكتل ابني وتحرمني من الامومه لان ست روايه عافتك.. 

لزمها من ركبتها .. 

فهد : فهد يخلف ويربي ويسويه رجال ويجي غريب ياخذه ويصيحله بابا مثل ما صار ويه علي ، تلحكين تغدريني بأول فرصه توكع بيدج وتتزوجين وتاخذين ابني ليش انتي شنو فرقج عنها بشنو تختلفين كلجن نفس الطينه ماعدكم وفه للرجال والدليل بعتي ايمن وحبيتي اخوه. 

صفنت بوجهه ونزلت دمعتها حجت بهدوء. 

ايفين : انت تعرف كلش زين السبب وليش عفته لهذا لتدوس على الجرح لان بعده ما طايب ، مو تشوفني تعايشت وياك واريد اساعدك معناها اني موزينه لو بعت ايمن.. 

عافها فرك وجها بثنين اديه ، فتح باب المطبخ وطلع التفتت عليه شافتني انصدمت...

ايفين : عبالي رحتي 

سيلين : لا موجوده استمع للمهاترات مالتكم..

ايفين : مهاترات شنو شبيج انتي ... 

سيلين : حجيكم عباره عن حرب كلاميه واحد يستفز الثاني بالكلام حواركم جان خارج عن ادبيات الحوار...

ايفين : شلون يعني كلام عادي انتي متتعاركين ويه عمو ..

سيلين : لا مو بهيج طريقه كلامكم عباره عن تهديد وغلط بينكم وماكو اي احترام وفوك هذا تريدين تسوين طفل منه على شنو تسوين طفل وين جايبته بنص هذا الجو المشحون بطاقات سلبيه... 

ايفين : كلام عادي قابل سبني لو ضربني.. 

سيلين : من يكون الفعل مبني على الباطل تصير مشاكل بين الطرفين وعند المواجهة ينفضح كلشي لان الكلام يخرج عن اطار العقل ويستهتر كل طرف بالطرف الثاني وانتي وفهد فقدتو الحجج المنطقيه بتصرفاتكم لهذا التجئتو للمهاترات وهاي اسوء من الضرب خليها ابالج..... 

ايفين : دكتور ادهم ممكن تعوفني بحالي.. 

هزت ايدها وفاتت وصلت للدرج رحت وراها جريتها.. 

سيلين : تعاي شو انتي هواي متغيره ..

التفتت عليه مغمضه عينها حجت بنفاذ صبر.. 

ايفين : شسويت يعني. 

سيلين : شسويتي شنو اختج الكبيره اني ماكو اي احترام اليه من تحجين ويايه احجي بأدب بعدين الدكتور الماعاجبج هو رباج وعلمج لو نسيتي.. 

ايفين : ما نسيت بس رجعي لشخصيتج لان صايره كوبي بيست من الدكتور ادهم.. 

سيلين : هووواي متغيره خوش غاسل دماغج فهد. 

ايفين : وليش متباوعين من جانبه جوز هو صح ودكتورج غلط.. 

سيلين : مو اكلج غاسل دماغج لهذا ميفيد احجي وياج واتعب نفسي. 

ايفين : شوفي اني احب عمو وما انسه فضله بس مو معناها افضله على فهد. 

سيلين : وايمن ؟؟؟

ايفين : ايمن راح بعد والله يوفقه. 

سيلين : شو سهله عندج . 

ايفين : تزوجت اخوه هل من المنطق افكر بيه برأيج حتى لو جنت احبه. 

سيلين : صح وياج بس ليش هيج اذيتيه.. 

ايفين : كتلج حياتي لتنبشين بيها علمود حياتج ما تنهدم لتخليني كل شويه اعيد وازيد بالحجي.. 

صعدت الدرج وكفت على رابع بايه والتفتت عليه كالت. 

ايفين : راح انام اذا عجبج تضلين اهلا وسهلا تروحين سدي الباب وراج لان تعبت اريد ارتاح.. 

عافتني وصعدت ، غصيت بقهرتي عيوني دمعت شنو اخلاقها شنو تصرفاتها شكد متغيره صدك لو كال ادهم صايره نسخه من فهد.. 

منين اتلكاها منها من مريم الحمد لله والشكر.. 

ضليت كاعده على القنفه واهز برجلي ، شويه ودك موبايلي باوعت ادهم. 

سيلين : الو هلو ادهم. 

ادهم : هلو سيلينه شلونج. 

سيلين : زينه الحمدلله 

ادهم : شنو رجعتو للبيت قريت المسج  

سيلين : اتصلت عليك ماجاوبت عرفت بعدك بالاجتماع لهذا دزيت مسج ومرجعت لان مريم رفضت . 

ادهم : زين تسوين ، انه جاي بالطريق ربع ساعه واوصلكم من اتصل طلعوا.. 

سيلين : ماشي.. 

ادهم : شبيج احسج ضايجه. 

سيلين : مابيه. 

ادهم : عليه سيلينه حافظج. 

سيلين : من ترجع نسولف.. 

ادهم : ماشي 

سيلين: ننتضرك. 

ادهم : مع السلامه 

سيلين : الله وياك.. 

سديته وكعدت انتضره وفعلا ربع ساعه اتصل عليه رفضته والتفتت لمريم.. 

سيلين : يله مريم بابا بالباب.. 

باوعتلي ودنكت على الموبايل. 

مريم : بس اكمل هذا الكيم. 

سيلين : كملي اني راح اطلع وابلغ ابوج ... 

عفتها وكمت وصلت باب المطبخ طلعت تركض كدامي فتحت باب الشارع وصعدت بالسياره وره ، طلعت ، نزل الجامه جان لابس نضاره شمسيه حرك حواجبه وابتسم ، ضحكت ورحت صعدت.. 

سيلين : الله يساعدك. 

ادهم : ويساعدج يابه شلونكم .. 

سيلين : زينين الحمدلله شلونه الاجتماع . 

ادهم : مريح نوعا ما .. 

سيلين : شو نوعا ما ليش.. 

ادهم : انهضمت على الشباب شلون عايشين حياه ويفتقرون لابسط مكونات العيش والله هضيمه يسمونه بلد النفط..

جريت نفس قوي وكتله. 

سيلين : الغرب متنعمين بخيراتنه .. 

ادهم : فعلا. 

التفتت عليه سألته. 

سيلين : جوعان .. 

ادهم : تغديت 

سيلين : هاا ويامن.. 

التفتلي ابتسم ورجع يسوق ...

ادهم : من خلص الاجتماع جابولنه اكل وتغدينه ويه الطلاب....

سيلين : مممم بالعافيه اكو طالبات هم. 

ادهم : اي مو بلغتج. 

سيلين : اي وشصار. 

ادهم : افسر اسألتج غيره لو مجرد حوار عادي .. 

سيلين : اكيد حوار عادي ليش اغار يعني

ادهم : انه هم كلت عليمن تغارين 

سيلين : اي.. 

ادهم : سؤال.

سيلين : جواب. 

ادهم : شبيج ضايجه من خابرتج. 

سيلين : بعدين .. 

فهمني يعني ما اريد احجي كدام مريم لهذا سكت.

وكفنه يم البقال والتفت عليه. 

ادهم : راح انزل اجيب كم شغله واجي .. 

سيلين : تمام...

نزل وقفل الابواب..

اول ما نزل تقربت مريم مني شاورتني. 

مريم : ماراح تحجين لبابا صح.. 

التفتت عليها . 

سيلين : ليش انتي سويتي شي غلط علمود يستوجب ابلغ بابا .. 

دنكت راسها وهمست.. 

مريم : اي سويت. 

سيلين : شنو سويتي. 

مريم : رفعت صوتي عليج. 

سيلين : وبعد 

مريم : ماسمعت كلامج. 

سيلين : وبعد 

مريم: عاندت ولعبت هواي بالموبايل. 

سيلين : وبعد 

مريم : هذا هو. 

سيلين : تذكري زين 

مريم : ماكو والله. 

سيلين : لتحلفين اول شي وثاني شي اتفقتي ويه عمج على ابوج وهذا اكثر شي قهرني منج. 

مريم : لا وين ما سويت هيج. 

سيلين : بلا كذب مو كلتو راح نطلع ونغلق الاجهزه ويخابر بابا يمل ويروح. 

مريم : صح

سيلين : مادام عرفتي نفسج غلط ما راح احجي انتظر انتي تصلحين هذا الخطأ 

ضحكت وصفكت بيدها وكالت.. 

مريم : شكرا سيلين. 

سيلين : بس هذا مو معناه تتمادين بالغلط اكثر . 

مريم : لا . 

سيلين : عفيه.. 

رجعت راسي على الكشن وعيني على الجامه اباوع على ادهم شلون يختار المخضر والفاكهة بعنايه مدروسه ضحكت وبنفس الوقت حسيت بأنتمائي لهذا الرجل ، هاي صفه جديده مشتركه بينه اني هم هيج اختار من جنت اتسوك بيت امي.. 

كمل وتقدم بأتجاه السياره فتح الجنطه واجه الولد شايل الاكياس خلاها بالجنطه باوعت بالمرايا بيد ادهم بطل غسل ايده ،ومشى بأتجاه سله المهملات شمر البطل بيها واجه صعد.. 

دار مفتاح السياره وكال 

ادهم : تأخرت عليكم مو . 

سيلين : لا عادي .. 

حجيتها وابتسمت تقرب من اذني شاورني.. 

ادهم : ابد ما مرتاحلج... 

ابتسمت بضعف ردت ابجي مجرد باوعت لملامحه المهتمه... 

سيلين : احجيلك كلشي بس نوصل.. 

مد ايده ربت على خدي وكرصه ، رجع يسوق وصلنه للبيت نزل قبلنه فتح الباب دخلنه وهو دخل الاكياس... 

رحت للمطبخ قبله لكيت نرمان تطبخ سلمت عليها التفتت عليه ضحكت.. 

نرمان : شنو هالخيانه عايفيني وحدي .. 

سيلين : ههههه جنتي نايمه وطلعنه.. 

نرمان : اي كعدت الصبح اباوع وحدي ماكو احد عاد خابرت ادهم كال وديتهم لبيت فهد.

جريت نفس طويل وزفرته عكدت حاجبها وكالت. 

نرمان : اكو شي احسج ما مرتاحه. 

سيلين : ماكو شي بس تعبانه. 

نرمان : ها الحمدلله .. 

قطع كلامنه دخول ادهم ..

ادهم : حبيباتي ملتمات هنا.. 

ضحكنه. 

نرمان : اليوم ايموني راح يجي . 

ادهم : صدك شوكت ..

نرمان : قبل ساعه خابرني كال شويه واطلع...

ادهم : يوصل بالسلامه ان شاءالله. 

نرمان : ان شاءالله . 

سيلين : اغير ملابسي واجي.. 

ادهم هز راسه مبتسم ونرمان ضحكت.. 

ابتسمت ورحت لغرفتنه غيرت ملابسي بتراك خفيف يناسب جو الصيف... 

وكفت كبال المرايا مسحت وجهي من المكياج ورتبت شعري انفتح الباب فات ادهم.. 

تقرب بهدوء حضني قوي اني هم بادلته الحضن.. 

ادهم : اليوم حبيبي مو على بعضه وضل بالي.. 

سيلين : اي والله اريد احجيلك لان راح انفجر.. 

وخرني من حضنه باوعلي عاكد حاجبه بقلق. 

ادهم : خيرر؟؟ 

سيلين : نكعد واحجيلك.. 

سحبني بهدوء من ايدي وصلنه للسرير كعد كعدت يمه..

ادهم : احجيلي .. 

سيلين : شوف حبي _________________ حجيتله كلشي حتى تصرفات مريم... 

كلش ضاج دنك راسه وغطه وجها بيده...

سيلين : ماردت احجيلك خصوصا على مريم بس فكرت لازم تعرف علمود تدارك الموقف قبل لا يتأزم.. 

حرك ايده بطريقه تبين ضايج او مأيس من شي.. 

ادهم : مريم مو مشكله اسبوع امشيها عدل المخوفني فهد شلون وياه شسوي واغيره انه لو اعرفه تغير وهاي تصرفاته مو تمثيل ويه ايفين جان حاربت الدنيا ورجعتله ابنه بس متأكد اول ما يحصله ياخذه ويختفي نيته يحرم روايه من ابنها ولو اموت ما اصير سبب بتفريق ابن عن امه...

سيلين : ماعرف اكو بينهم اسرار كلش جبيره.. 

ادهم : اعرف اعرف كلشي واضح وبعدين ينكشفون..

سيلين : شنو راح تسوي. 

ادهم : ماعرف حرت كومي هسه نصلي ونخلي حمولنه على رب العالمين هو يحلها.. 

سيلين : ونعم بالله.. 

طلعنه اني رحت للمطبخ وهو راح للحمام يتوضى.. 

سيلين : ايمن يلحك عل الغده. 

نرمان : لا وين زين اذا وصل بالاربعه. 

سيلين : هااا 

نرمان : اي ،سيلين عندي موضوع اريد اخذ رأييج بيه..

سيلين : شنو ؟ 

باوعت اتجاه الباب انتضرت ادهم يطلع من الحمام وراح لغرفتنه يصلي راحت سدت باب المطبخ و جرتني من ايدي كعدنه على الكراسي... 

سيلين : يلا احجي شكو... .. 

نرمان : باعي اكو دكتور ويانه بالجامعه اسمه مسلم كلش خوش ولد وحباب بخطوبتكم طلبني من ادهم. 

سيلين: اي كلش زين وين المشكله.

نرمان : المشكله بهجان ابن عمي هاشم. 

سيلين : هجان شبيه وشعليه هو 

نرمان : ماعرف منين سامع واتصل بيه يهدد ارفض وكتله اذا ما رفضت شنو تسوي يكلي اخربها .. 

سيلين : اوكفي اوكفي هجان شجابه عليج وشمدريه.. 

نرمان : هذا كلشي يخصنه ومرتبط بينه يعرفه متعرفيه بعدج. 

سيلين : يبووو يعني هم مخبل. 

نرمان : ولج هذا قصته قصه شحجيلج.. 

سيلين : احجي اسمعج ومتأكده ما راح اتفاجئ لان الشفته والسمعته ميخليني اتفاجئ بعد...

نرمان : باعي قبل اسبوع جنت متمدده بفراشي اجاني مسج من رقم غريب فتحته مكتوب.. 

نرمان شلونج. 

كتبت 

منو؟؟؟ 

صعب وياج صعب. 

اتفاجأت منين جاب رقمي كتبلته.. 

كتبتله 

هلو هجان شلونك بس منين حصلت على رقمي. 

دز 

انتي تعرفيني كلش زين ميصعب عليه شي. 

_ اي اعرف كول محتاج شي 

_ من الاخير انطياج مسلم رفضيه.. 

_ شنووو وانت شمدريك. 

_ كلشي ادري رفضيه نرمان بدون مشاكل.. 

_ ليش غير افهم 

_ انه رايدج 

_ هههههه لتضحكني عفيه. 

_ متشاقي وياج قبل عندج ميانه وياي حتى اشاقيج هسه. 

_ لا بس انت تعرف واني اعرف انت المن تحب وعليمن متت قبل.. 

_ اعرف والكل يعرف ولتنسين شلون حرموني منها.. 

_ هسه تزوجت وراحت انسى افضل. 

_ بسبب اخوج عبالهم انه مثله ومثل سوالفه عمي خاف ينطيني بنته وفرقنه جور وظلم وجدي جان الظالم الاكبر .. 

_ هجان اني معليه بالماضي مالتك ومعليه بمستقبلك رجائا عوفني بحالي. 

_ متتزوجين غريب .. 

_ انت شنو دخلك اذا عندك ثار ويه فهد وتريد تنتقم من خلالي طلعني من لعبتكم لان مو حمل مشاكل وتعرف كلش زين اذا سمع فهد يموتك وميخليك ترتبط بيه.. 

_ هو انه اريد اموته ، انتي عليج ارفضي افضل لان راح تتعبين هواي ... 

_ اطلع من حياتي ولتدخل بيها وحتى ترتاح راح ارفض مسلم وانت هم مرفوض لان مو اني ارتبط بواحد يحب بنت عمي لحد الجنون ومن تتركه مجبوره يجي ينتقم من اخويه بيه 

_ ما انتقم والله انه رايدج لهدوئج واخلاقج والصراحه ماريد اخذ بنيه خارج اطار عائلتنه.. 

_ ماكدر هجان اذا قبلت بيك ملاك تموت. 

_ لعد انتي ليش ما متي من اخذت ضيغم.. 

_ ضيغم ماضي قديم وتزوجت قبله ونسيته لهذا ما الي حق اضوج لو انقهر منها...

_ براحتج فكري ورديلي خبر موافقه. 

_ ههههههه هجان انت صدك تحجي اكيد مو صاحي.. 

_ بطلت شرب من زمان لا عبالج سكران .. 

_ هجان لتخسر صداقه وثقه ادهم حرامات.. 

_ هو لان ماريد اخسره اريد ارتبط بيج وارجع علاقتنه بعمي.. 

_ وعمك ميقبل متأكده.

_ لا يقبل فكري نرمان. 

_ ماعرف ما اكدر انطيك كلمه هسه لا ماعندي قناعه ولا واحد بالميه 

_ انتظرج نرمان لتخليني اصير همجي وانهي عليج. 

_ هجاااان.. 

اخر شي كتبلي 

_ الامر من يمي محسوم ضلت يمج فكري تصبحين على خير بنت العم.. 

وهذا كل الصار شسوي سيلين شسوي. 

سيلين : يبووووو جنه بفهد صرنه بثنين.. 

نرمان : واذا فهد سمع يحركنه والله. 

سيلين : تكليلي ادري ادري.. 

نرمان : تعبت والله. 

سيلين : خليها على الله وشوفيلج يوم مناسب وكعدي احجي ويه ادهم حلوها بيناتكم.. 

نرمان : اي لازم انطيه خبر.. 

انفتح باب المطبخ ودخل ادهم مبتسم.. 

ادهم : اختي ومرتي عدهم اسرار ها يابه.. 

نرمان : ههههه لا حبيبي شغله حجيتها لسيلين. 

ادهم : براحتكم يابه بس اتفاجأت الباب مسدود حسيت عاقدين اتفاقيه ضدي هههه. 

نرمان : ههههه لا يابه شسالفه. 

ادهم : صار الغده .. 

سيلين : انت مو متغدي وماريد وبالك عنك. 

كعد على الكرسي البصفي وكال. 

ادهم : جعت ومن شفت وجهج انفتحت شهيتي شلون.

سيلين : حقك اكل بالعافيه. 

تقرب مني وهمس. 

ادهم : تعرفين اليوم شلون صبرت روحي بالاجتماع ونطيت المحاضره بكل حيلي..

سيلين : شلون ؟ 

ادهم : الصبح التقطتلج صور ابالي هووواي وضليت اتفرج عليهن هناك كل شويه تجيني صوره كدام عيني وبعز ضوجتي واستماعي للمشاكل المطروحه رغم تقهر بس داخلي يبتسم فرح.

ضحكت وكتله. 

سيلين : الله يحفظك اليه وتضل هيج فرحان دائما. 

ادهم : ربي يديمج اليه عمر وعافيه. 

سيلين : هههه شكرا...

ادهم : عفووا ...

كمت ويه نرمان ساعدتها بصب الغده دك موبايل ادهم .. 

ادهم : الو هلو ايمون حبيبي شلونك ، اي منتضريك ها ليش خوما بيه شي يلا باجر على كيفك وين وصلت اي زين بعدك بالبدايه فر سيارتك وارجعله سلملي الله وياك. 

نرمان : ها شنو . 

ادهم : خابره ابوي جايتهم بضاعه وطلب منه يرجع 

نرمان : خطيه زين خابره قبل لا يجي لهنا.. 

ادهم : اي بعده ما ماشي هواي باجر يجي.. 

نرمان : هله بيه.. 

ضلينه نسولف صبينه الغده وكعدنه ناكل بهدوء ، كملنه اكل رفعنه السفره ونظفنه البيت اني ونرمان ، دخلت سبحت ورحت نمت بصف ادهم جان نايم فاقد ميدري بالدنيا شكو هههه.. 

كعدت المغرب لكيته كاعد قبلي هو ميضل نايم لهيج وقت ابد كمت توضيت صليت ورحت للمطبخ احضر للعشا... 

حضرت كلشي والتمينه ساعه ٨ تعشينه نرمان كملت قبلنه وانسحبت من السفره تبعتها مريم ضلينه اني وادهم كمت صبيت جاي اليه واله كعدنه نشرب باوعلي من فوك الاستكان.. 

سيلين : هههه شنو هالنضره الجريئه . 

جان مخلي عكس ايده على الطاوله والثانيه بيها استكان ، نزل ايده بهدوء خله الاستكان بالصينيه ابتسملي وكال.. 

ادهم : شنو رأيج نعيش ليله مجنونه ملابسج تكون من اختياري ونختمها بحب .. 

سيلين : ممممممممم براحتك. 

ادهم : راح اروح قبلج واسبقيني. 

سيلين : تمام.. 

حجيتها وابتسمت. 

راح للحمام بعدين للغرفه واني رفعت الصحون وغسلتهن رتبت المطبخ ودخلت للحمام فرشت اسناني وغسلت وجهي وايدي ، رحت للغرفه بيدي الخاولي انشف بوجهي باوعت شموع على الطبله الوسطيه وكيكه وعصاير ثنين درت وجهي لكيته كاعد على السرير بجانب فستان لونه بني مائل للقهوه.. 

سيلين : شنو هاي الاجواء اكيد اكو مناسبه. 

ادهم : اكو بدلي وتعرفين 

سيلين : اطلع وبعدين اصيحك. 

ادهم : يصير اغمض. 

سيلين : لا ميصير . 

ادهم : يلا راح اطلع مو تتأخرين عليه...

سيلين : لا هههه 

طلع واني بدلت وكفت كبال المرايا رتبت وجهي وخليت مكياج بسيط بس الحمره قويه جانت ورفعت شعري بطريقه حلوه....

كملت ودكيت الباب على كيف فتحها وفات.. 

سيلين : شنو واكف وره الباب. 

مجاوبني حاير وين يباوع ... 

سيلين : انت عيونك وحدها تتغزل.. 

ادهم : بالضبط من كتلج هيه صلفه متصدكين.. 

سيلين : مو صلفه وانما تحب بشغف. 

همس ... 

ادهم : وجهة نظر صحيحه يأخذ بيها..

جنت واكفه يم ميز المرايا اخذ عطر رشلي بخات خفيفه وقرب انفه يستنشق ...

اني هم اخذت عطره ورشيتله قربت انفي استنشق..

ضحكنه على خبالاتنه..

لزم ايدي ومشينه وكف يم الكيكه وكال .. 

ادهم : كل عام وانتي بالف خير وردتي.. 

سيلين : وانت بالف خير بس شنو المناسبه. 

ادهم : باجر عيد ميلادج شنو نسيتي. 

ضحكت وحكيت كصتي.. 

سيلين : هو ضل ابالي عيد ميلاد الصارلي نساني حتى اسمي.. 

حجيتها وجسمي رجف فرحانه على متفاجئه خليط مشاعر صار...

ادهم : ننسى الراح وعلينه بالقادم اسمعي اسمعي.. 

سيلين : شنو هههه. 

همسلي بشعر من قصيده و ويه كل كلمه تتبعها ابتسامه ولمعه بعينه شنو من حب يحبني هذا الرجل...

ادهم : يا سيدتي

لا تضطربي مثل الطائر في زمن الأعياد.

لن يتغير شيءٌ مني.

لن يتوقف نهر الحب عن الجريان.

لن يتوقف نبض القلب عن الخفقان.

لن يتوقف حجل الشعر عن الطيران.

حين يكون الحب كبيراً..

والمحبوبة قمراً..

لن يتحول هذا الحب

لحزمة قشٍ تأكلها النيران... ( نزار قباني )

سيلين : يعني ما راح تتغير بيوم ويقل حبك. 

ادهم : لا اله اذا... 

وسكت .... 

الفصل السادس والخمسون من هنا