رواية جذبني فمك البني الفصل السادس والخمسون 56 بقلم عبير إدريس

يا سيِّدتي

كنتِ أهم امرأةٍ في تاريخي

قبل رحيل العامْ

أنتِ الآنَ أهمُّ امرأةٍ

بعد ولادة هذا العامْ

أنتِ امرأةٌ لا أحسبها بالساعاتِ وبالأيَّامْ.

أنتِ امرأةٌ

صُنعَت من فاكهة الشِّعر

ومن ذهب الأحلامْ( نزار قباني ) 

________________ 

سيلين : يعني ما راح تتغير بيوم ويقل حبك. 

ادهم : لا اله اذا... 

وسكت ... 

رفعت عيني باوعتله همست.. 

سيلين : اذا شنو؟؟ 

ادهم : اذا اجتي وتين. 

سيلين : وتين منو؟ 

ادهم : بنتي منج.. 

ضحكت.. 

سيلين : شو بنيه . 

ادهم : كتلج عاجبني تصيرلي بنيه منج.

سيلين : ممممم وعود تحبها اكثر مني يعني ؟ 

حجيتها ورفعت تك حاجبي بتحدي.. 

كرص انفي وطبع قبله خفيفه عليه.. 

ادهم : ما يقل حبي وانما اميره من اميراتي راح تشاركني بيج.. 

سيلين : بس اني اغار وكلش هوواي. 

ادهم : هاي بعد بناتي معزتهن تختلف. 

كرصته من زنده حيل ضحك... 

ادهم : اخ يابه شبيج . 

سيلين : شنو تحبهن اكثر مني اغار والله.. 

ادهم : يلا احبج الج اكثر.. 

سيلين : لتقشمر عليه ادهم انت ادهمي وبس ماشي..

ادهم : ماشي ، هسه شنو تقطعين الكيكه اقطعها انه.. 

سيلين : انت .. 

ادهم : ليش ؟ 

حجاها مستغرب.. 

سيلين : اريد السنه بدايتها تكون وياك وكلشي يخصني انت تبديه حتى قطع الكاتو.. 

ابتسم .. 

ادهم : يابه النسوان حيالات ههههه. 

رحت انحشكت بحضنه لف ايده على خصري وكتله.. 

سيلين : ليش حيالات ...

ادهم : ماعرف شنو بيكم سحر او شي غريب يخلينه نتعلق بطريقه جنونيه بحيث تصيرون انتو والنفس نفس المعزه.. 

ماكدرت اصبر صدك بجيييييييت كمت اشهك وابجي من كل كلبي.. 

ادهم : لالا ليش هيج ليش لحظه تعاي ليش البجي ، استغفر الله سيلي مو وياج.. 

رفع وجهي ومسح دمعتي بطارف اصبعه ابتسم واني بعز دموعي ضحكت طفرت دمعاتي على كف ايده.. 

ادهم : هاي دموع حب صح. 

سيلين : شمدريك .. 

ادهم : نسيتي انه دكتور بعلم النفس.

ضحكت.. 

سيلين : لا منسيت هههه 

ادهم : المهم سؤال.. 

سيلين : جواب .. 

ادهم : تعاي كعدي.. 

جر كرسي قربه من الميز وكعدني عليه... 

تقرب كعد على الطرف رجعت ضهري طخ بصدره رفعت راسي وعيني اجتي بعينه همست بضحكه.... 

سيلين : شنو سؤالك.

جاوبني بأبتسامه ذايبه.

ادهم : هسه انتي راح تتمنين شغله تريديها تتحقق بهاي السنه وتدعين تدوملج طول العمر صح. 

مديت ايدي لزمت اصبع ايده الجانت متوسده كتفي... 

سيلين : صح 

ادهم : زين السؤال يكول شنو الربط بين الحب والامنيه.. 

سيلين : مممممم ماعرف انت كول. 

ادهم : فكري .. 

سيلين : ادهم انت كول مابيه افكر.. 

ادهم : الامنيه تتمنين شي بشده وتريديه يتحقق صح. 

سيلين : صح. 

ادهم : والحب اذا اجه بأمنيه هذا شنو ؟ 

سيلين : شنو تره دخت هههه. 

ادهم : يعني هسه انتي من تطفين الشموع عندج امنيه معينه.. 

سيلين : اكيد طبعا. 

ادهم : وانه اعرفها بس ما متأكد .. 

سيلين : الامنيه البالي وبكلبي حبك يدوم اليه وربي يخليك النه.. 

ادهم : وهذا القصدته اكو ربط بين الحب والامنيه ، تتمنين الحب وبعدين تدعين يدوم.. 

سيلين : يا ادهم احجي هيج من البدايه ليش تفر عقلي.  

ادهم : لازم بين فتره وفتره اخليج تفكرين علمود نسوي اعاده تدوير للأفكار القديمه.. 

سيلين : ههههه.. 

لزم ايدي سحبني ورحنه وكفنه يم الكيكه... 

ادهم : تمني .. 

باوعتله .. 

سيلين : تمنيت... 

من صدك امنيتي جانت تدوم ضحكته واشوفه دائما هيج مرتاح.. 

عيوني بعيونه التلمع حب ويمكن اني هم عيوني تلمع بس مكاعد اشوفها ...او اشوفها بعيونه لان نضراته تعكس مدى حبي وهيامي بيه.. 

ادهم : ربي يحققها .. 

ابتسمت اخذت ايده خليته هو يلزم السجينه واني خليت ايدي فوك ايده التفت عليه عاكد حاجبه بأبتسامه. 

ادهم : غير انتي تقطعيها. 

سيلين : اريد كلشي حلو بهاي السنه يبدي وياك ..

ابتسم ودار وجها على الكيكه كصيناها من بعد ما طفينه الشموع.. 

خليت قطع بالصحون اخذهن وطلع وداهن لنرمان ومريم ، رجع سد الباب خليت الصحن مالته كدامه واني هم اخذت صحن وكعدت اكل . 

ادهم : وكليني انتي لوتيه. 

سيلين : هههههه ادهمي.. 

ادهم : شنو ادهمج انه كل هاي السوالف ماعشتها وياج . 

سيلين : ليش مو اكلنه جكليت سوه. 

ادهم : والجكليت وين يصرفلي وكليني وصيري حبابه. 

سيلين : ههههه انت ابد مو فقير.. 

تقرب مني فرق بين وجهي و وجها اربع اصابع.. 

ادهم : منو كذب عليج وكالج اكو رجل فقير.. 

سيلين : ههههههههه ياخوفي منك. 

ادهم : انه لحد الان مراعي مشاعرج بعدج ماشايفه شي مني.. 

سيلين : اي مشاعري كلش ترفه ضل هيج مثل ما انت.. 

سكتني من خله قطعه صغيره من الكيك بحلكي ... 

اني هم وكلته سولفنه سوالف عاديه بعدين كمت مددت على السرير طلع غسل ورجع مدد يمي.. 

فتحت ايده ونمت ... 

سيلين : ادهمي. 

ادهم : هممم 

سيلين : هم تشتاقلي من تطلع 

التفت عليه صفن بوجهي وكال 

ادهم : بله هذا هم سؤال.

سيلين : احجي الله عليك. 

ادهم : مو بس انه اشتاقلج لا كل حواسي تشتاق وحتى اشيائاتي تخيلي قهوتي ما تحلى اذا ما سميها بأسمج يلا اشربها.. 

سيلين : شلون يعني.. 

ادهم : قهوه ذات الفم البني. 

سيلين : ههههه اويلي عليك ادهم ادري هيه حمره شبيك تخبلت علينه.. 

التفت عليه وصرنه وجه بوجه.. 

ادهم : مو انتي متدرين شسوت بيه هاي الحمره او بالاصح الشفه خبلتني خلتني كل يوم انام واحلم بيها يا ظالمه النفس وتالي حرمتيني منها مدري شكد يمكن سنتين سنه زواجج وسنه علاجج جمعيها ويه عنادج شكد تطلع اوووف شكد صبرت عليج.. 

سيلين : وتالي حصلتها ههههه.. 

ادهم : اويلي يابه اول بوسه خبلتني فقدت يمكن لو مانعتني جان موتج بيومها. 

سيلين : اليشوفك يكول اول مره تجرب طعمها .. 

ادهم : الصدك غير كلشي وياج مختلف. 

سيلين : ليش يعني ؟ 

ادهم : كلشي يجي بتعب وصعوبه بيه لذه سبحان الله. 

سيلين : يعني من الزينات شلعت كلبك. 

ادهم : لا تعبتيني وردت اكرهج اله شويه خصوصا من شاكستيني بالجامعه. 

سيلين : بيومها تكطعت كل كلمه اكولها اصرف الف دمعه عليك. 

ادهم : شلون نطاج كلبج هيج تأذيني بيومها ردت انجلط والله لو ما ايمن يتلاحك عليه. 

سيلين : صارت بعد لو تدري شكد ندمانه وفشلانه منك. 

ادهم : اذاج هواي وصبرتي هواي واذيتيني الي هم.. 

سيلين : موبيدي كلشي صار مو بيدي. 

ادهم : شوكت تحجيلي شنو شوفج وخلاج تحقدين عليه وتطلقين هذا الكم الهائل من المشاعر الكريهة تجاهي. 

سيلين : ادهمي اني كلت الك ماحب العتب الجارح لان يولد اشياء بالنفس محلوه وخصوصا اذا ثبتت عليك وحده منهن لهذا تغاضى الله يخليك وتجاوز الموضوع. 

ادهم : انتي لو بس حاجيتلي بوقتها جان طلعت حقج من عين السبع واعلمج شلون تكونين حذره وقويه وصبوره بنفس الوقت وتقاومين كلشي صار وياج او مايحتاج تقاومين جان سحبتج منه وخلص..

سيلين : جنت خايفه عليك وعلى مكانتك الاجتماعيه لان هددني بيك قبلها ... 

ابتسم.. 

ادهم : تخافين عليه؟؟ .. 

دنكت راسي وهمست. 

سيلين : اي خفت وردت ابعدك وبنفس الوقت ردت انتقم منك ماعرف وسوس هواي براسي كمت ماعرف الصح وين والغلط وين.. 

ادهم : ماكذبت من وصفتج الصديقه الرائعة والحبيبه الوفيه والزوجه الصالحه ان شاءالله .. 

سيلين : شمعنى اخر وحده كلت وياها ان شاءالله.. 

ادهم : انه دائما صريح وياج صح. 

سيلين : صح 

ادهم : عندي علامات استفهام حول كم شغله معينه ويارب تنحل واطلع غلطان.. 

انداريت نمت على بطني ورفعت نفسي بعكوس ايدي نزل شعري على وجهي مد ايده بهدوء وخر شعري وخلاه وره اذني. 

سيلين : يعني تخاف اعوفك مثلا؟؟؟ 

من هيج سألته بهت وحسيت دكيت على الوتر الحساس عنده او حسسته تره قريت افكارك.. 

جاوبني بهدووء. 

ادهم: ليش هيج فكرتي.. 

سيلين : ماعرف حسيت انت هيج فكرت.. 

ادهم : اكيد لا وعليش تعوفيني مثلا.. 

سيلين : نفرض عفتك فرضيه يعني من باب الغرور احجيها صح سوالف جهال بس اريد اعرف شنو تسوي.

ضل صافن بعيوني حاير عيونه تتنقل من عيني اليسرى لليمنى... 

بعدين كال.. 

ادهم : اليروح الله وياه مانموت وره واحد .. 

سيلين : نفرض صارت شتسوي.. 

لحيت وياه بهذا السؤال ماعرف بوكتها شنو جنت احس من اسأله هيج اسأله.. 

رفع عينه على الساعه واشرلي اباوع التفتت باوعت عليها. 

سيلين : شبيها ؟ 

ادهم : ساعه بيش هسه. 

سيلين : ساعه ١٢ اله دقيقه.. 

ادهم : هاي الساعه اخليها توكف عندج وكل يوم تشوفيها نفسها. 

سيلين : شلون يعني مفهمت.. 

ادهم : حياتج اوكفها ما اخليها تمشي وارجعج للصفر اشوفج شي تتمنين لو ميته وماشايفته احسسج احاسيس ما حاستها بعمرج .. 

سيلين : يعني مثل ما اذاني سامر. 

ادهم :هذا هو مو خوش ادمي انه ما مأذيج عليش تعوفيني وتأذيني...

سيلين : سحبت سؤالي لا تأذيني ولا أأذيك عليمن هالحرب الله يبعدنه ان شاءالله. 

ادهم : غير هاي سوالفج انه شكو.. 

سيلين : المهم اريد اني هم اتغزل بيك. 

ادهم : بعديش .. 

سيلين : ادهم شبيك ضجت.. 

ادهم : عليش اضوج ليش انتي سويتي شي بس خربتي السهره.. 

سيلين : هسه اسوي جو وترجع ههههه.. 

التفت عليه رافع تك حاجب معاجبه. 

سيلين : عبالك جذب.. 

حجيتها وبسته.. 

ادهم : متفيدج بعد وخري. 

سيلين : هاي شنو تره شقه. 

ادهم : مو الشقه يترجم حقيقه. 

سيلين : لا شنو السالفه. 

ادهم : عقلج الباطن مادام هيج فكر راح يسيرج هو وكولي كال ادهم. 

سيلين : كول ياالله ادهم .. 

ادهم : ياالله.. 

حضني حيل باسني براسي وكال.. 

ادهم : اخاف عليج هوواي واحميج بروحي من كل شي يأذيج اسندج بوكت توكعين واربت على كتفج اهدأج بوقت تخافين ودائما رددي بداخلج عباره سيلين لتخافين ادهمج وياج.. 

سيلين : فدوه رحتلك ادهمي .. 

من بعدها تبادلنه احضان تبعتها قبلات ، وفشلت اكمل استغرب مني همس.. 

ادهم : بيج شي.. 

سيلين : ماعرف.. 

ادهم : تمام براحتج..

اسناني صكت اطرافي نملت ماعرف شصار بيه هو انتبه عليه عكد حاجبه مستغرب سألني. 

ادهم : بردانه اطفي السبلت. 

سيلين : ماعرف يمكن بردت.. 

التفت على الميز سحب الريمونت طفى السبلت وجرني لصدره لفني بالبطانيه من كل جهة ونمت غفيت ، كعدني وقت الاذن . 

ادهم : سيلينه سيلينتي.. 

سيلين : همممم. 

ادهم : كومي نصلي ورجعي نامي. 

سيلين : ادهم نعسانه. 

ادهم : مجرد تتوضين تصحين كومي حبيبي.. 

سيلين : مابيه حباب عوفني  

مد ايده جوه راسي ورجلي ورفعني من الجربايه مشى بيه للباب.. 

ضحكت.. 

ادهم : اوديج هيج للحمام لو انتي تمشين. 

سيلين : لا اني امشي نزلني.. 

ادهم : يلا لعد كدامي.. 

ابتسمت ، اخذت الروب لبسته وطلعت للحمام هو تبعني التفتت عليه سد الباب بهدوء كلشي يسويه بهدوء وثكل.. 

دخلت للحمام غسلت وجهي من بقايا المكياج وتوضيت ، رجعت للغرفه فرشت سجادته وخلفها سجادتي ، صلينه اني وياه بعدها بلشنه بالذكر الصباحي.. 

اوله شكر الرب على اعطائنا عمر جديد ويوم جديد ... 

( الحمدلله الذي احيانا بعدما اماتنا واليه النشور، 

الحمدلله الذي عافاني في جسدي ورد علي روحي، واذن لي بذكره) 

بعدين كررنه قراءه ( لا اله الاالله الملك الحق المبين ) ٣٠ مره ( فوائد قائلها في اليوم الواحد ينال الغنى وزوال الفقر ويطرق باب الجنه)... 

بعدها تسبيحه ( اشهد ان لا اله الا الله وحده لا شريك له الها واحدآ احدآ صمدآ لم يتخذ صاحبة ولا ولدا ) كل يوم نكولها ١٠ مرات ، كتب الله لقائلها في صحيفه اعماله الكثرمن الحسنات ومحى عنه الكثير من السيئات وزاده درجات وحفظه في ذلك اليوم من شر الشيطان والسلطان ولا يبتلى بمعصيه في ذلك اليوم.. 

اما من احتاج لعنايه الخالق ومن منا لا يحتاج لعنايته ، قول ( لا اله الا الله حقا حقا ، لا اله الا الله ايمانا وصدقا ، لا اله الا الله عبدا ورقا ) ١٥ مره باليوم قائله لا يرد من عنايه الخالق حتى يدخله الجنه.. 

كملت تسبيح نعست بعد مكدرت لميت سجادتي ورحت تمددت تغطيت وضليت استمع لصوته وهو يرتل اجمل سور من القران الكريم ...

غفيت بدون ما ادري...

الصبح كعدت فارغه الغرفه ماموجود مديت ايدي على الموبايل لا اراديا خابرته ماعرف ليش ... 

رن رن رن جاوبني. 

ادهم : صباح الحب. 

سيلين : ههه صباح العافيه انت وين ؟ 

ادهم : كعدت عندي كم شغله اقضيها واجي. 

سيلين : هاا 

ادهم : لازم اشتاقيتي ؟ 

سيلين : ههههه اي انفزعت من شفتك مو يمي. 

ادهم : اسم الله عليج اكمل كم شغله واجي ما اتعطل. 

سيلين : تمام انتظرك بلهفه.. 

ضحك وراح حضنت موبايلي بفرحه ، كمت بدلت ملابسي وطلعت للمطبخ لكيت مريومه ونرمان كاعدين.. 

سيلين : صباح الخير ياحلوات. 

نرمان : صباح الخير وكل عام وانتي بألف خير.. 

ضحكت مشيت الها وهيه هم مشتلي تحضانه بوستني وهمست بإذني.. 

نرمان : استعجلوا نريد وتين عنونيه. 

سيلين : ههههه قابل هيه بيدي. 

نرمان : الله يرزقكم ان شاءالله بنين وبنات.. 

سيلين : امين حبيبتي ويسعد بختج ان شاءالله. 

تنهدت وكالت..

نرمان : الله كريم كعدي تريكي اصبلج جاي.. 

سيلين : براحتج ..

رحت كعدت كامت مرايم حضنتني وكعدت بحضني .. 

مريم : البارحه عيد ميلادج.. 

سيلين : اي هههه. 

مريم : صرتي جبيره هواي.

سيلين: ههههه اي.. 

نرمان : سيلين تدرين اليوم شنو ؟ 

سيلين : شنو؟ 

نرمان : كومي بدلي تره ادهم جاي بالطريق.. 

عكدت حاجبي جاوبتها مستغربه. 

سيلين : ليش وينه ادهم.. 

نرمان : عبالي تدرين المهم مادام ماكايل اذن مسويها مفاجئه ، وصاني تتريكين زين وتبدلين وتنتظريه.. 

سيلين : يعني متحجين مو ..

نرمان : ابد. 

سيلين : ليش مو احنه صديقات والفضول قاتل. 

نرمان : حبيبتي عيشي المفاجئه بحذافيرها احلا.. 

سيلين : هههه تمام تدرين نرمان انتي واخوج صرتوا عشق بالنسبه اليه. 

نرمان : هههههه اخويه حقج بس اني شكو... 

سيلين : انتي معزتج متقل عن الادهم بس بالحب هو اكثر هههه 

نرمان : اكيد هو اكثر واذا كلتي غير هذا الشي راح تكون مجامله ..

سيلين : بس صدك احبكم هوواي. 

نرمان : حبيبتي واحنه هم نحبج هوواي ونتمنى نشوفج فرحانه وسعيده دائما. 

سيلين : شكرا حبيبتي.. 

نرمان : كومي بدلي وعوفج من الحجي يلا راح يجي ادهم. 

سيلين : ماشي ، بس اغسل الصحون اول. 

نرمان : لا معليج منهن اني اغسلهن استعجلي يلا يلا.. 

تحجي وتدفع بيه واني اضحك. 

فتت للحمام سبحت ورحت للغرفه بدلت لبست بنطرون وقميص رهمت وياهن حجاب وجنطه وحذاء ، الالوان جانت بين البني والبيج ... 

كملت وكعدت انتضرته باوعت ساعه تسعه وربع ، اقل عشر دقايق اتصل عليه. 

سيلين : الوو انت وين من الاخير ههه. 

ادهم : بالباب طلعي.. 

شلت جنطتي وطلعت امشي واحجي وياه رحت للمطبخ لوحت لنرمان بيدي يعني رايحه ... 

دزتلي بوسه بالهوه وضحكت بادلتها الضحكه وطلعت.. 

سيلين : وين رايحين. 

ادهم : تعاي ونسولف.. 

سيلين : مممم جيتك.. 

فتحت الباب جان بالسياره كاعد شافني ابتسم.

رحت صعدت التفت على الكشن الوره مد ايده شال باقه ورد خلاها بحضني.. 

سيلين : هاي شنو ههه. 

ادهم : بيه من ترافتج لهذا جبته. 

سيلين : ادهمي كلبي راح ينفجر من كثر حبك والله. 

اكتفى بأبتسامه ساق السياره بجنون غير عن كل مره راحت الرزانه وراح الثكل ضحكاته وفرحته كأنما رجع طفل بس كبير.. 

اني اضحك على ضحكاته سكتت ما سألت ولاقيدته ، ماحسيت اله واحنه واكفين كبال المحكمه ، التفتت عليه. 

سيلين : هاي شنو ؟ 

ادهم : نعقد غير. 

سيلين : تدري ناسيه. 

ادهم : انه تقصدت اخرته حتى بيوم عيدميلادج نعقد وبهذا التاريخ نحتفل كل سنه بأحلا مناسبتين الاولى ولادتج للدنيا وهاي من حسن حضي والثانيه ارتباطنه الروحي الجسدي وهذا حضي الاكبر.. 

سيلين : والله حضي الاكبر الجمعني بيك.. 

اخذ ايدي بيده حضنها بكفوف ايده ولثمها بقبله وصلني حبه من خلالها.. 

ادهم : ننزل. 

سيلين : ننزل.. 

نزل واني نزلت وراه ، تقدمت خطوه وتذكرت اخر مره اجيت لهذا المكان شلون جانت حالتي وجنت بقمه الخوف والخضوع والرهبه وهسه وين شكد فرق اجيت قويه كلي ثقه بنفسي ، احب كلشي وكلشي اشوفه لونه وردي.. 

هو حس عليه بيه شي ما ضغط عليه ولا سألني لزم كف ايدي ومشينه لداخل المحكمه بكل خطوه ادعي الله يديمنه سوه وما نفترق ... 

هو جاي قبلي ومكمل كل الاجراءات ، مجرد دخلنه للقاضي وعقدنه ، القاضي كام وسلم على ادهم وباركله اعتقد لان عرفه دكتور احترام اله كام.. 

جان اسلوبه ويانه يختلف كلش هواي عكس من اجيت اني وسامر من عقدنه ما تعاملوا ويانه هيج فعلا الانسان يفرض احترامه على الناس بهيبته وثكله واخلاقه واخر شي علمه.. 

كمل العقد باركلي ادهم واني هم باركتله رجعنه للبيت هو راد نروح مطعم نتغده بس اني رفضت لان جنت كلش تعبانه ماعرف شبيه غفله اتعب وجسمي ينمل .. 

دخلنه للبيت باركت النه نرمان وضلت تهلهل وتكمز اول مره اشوفها تهلهل وهيج فرحانه ، تقرب منها ادهم باسها براسها وحضنها ، عفتهم ورحت للغرفه بدلت تأخرت شويه يلا طلعت من طلعت لكيتهم ماكو رحت لغرفه المكتب كلت اكيد هناك توني افتح الباب سمعته يكللها لنرمان..

ادهم : لتحجين بسالفه الاطفال كدامها وتنبهيها .. 

نرمان : ليش اكو شي اني ماعرفه.. 

ادهم : سيلين مو لازم تصير حامل هسه لا من مصلحتها ولا من مصلحه الطفل. 

نرمان : غير اكو سبب.. 

ادهم : نرمان انه مريضي ما احجي بحالته لاي احد عاد زوجتي .. 

نرمان : واني اي احد ليش ادهم تزعلني منك وبعدين اذا ماعرفت يضل بالي عليها وانت تعرفني شكد احبها على الاقل احجيلي نتشارك بالهم. 

سمعته يتنهد..

ادهم : سيلين جانت مدمنه ، والحمل بعد الادمان جدا خطر اقل شي لازم ننتظر سنه او سنه ونص بعد التعافي. 

نرمان : هووواي..

ادهم : احسن ما يجي طفل عقله بيه خلل ونضل متعذبين بيه طول حياتنه. 

نرمان: هم صح زين هيه تحسها صارت زينه. 

ادهم : ماعرف بس الادمان ترك بيها هواي مخلفات منها... 

سكت.. 

نرمان : شنو ليش سكتت؟ 

ادهم : صعب احجي بيها كدامج والله ما اكدر لتضغطين عليه اكثر...

نرمان : ادهم احجيلي تعبتني قابل راح احجيلها او انطي سركم لاحد قابل متعرفني انت.. 

ادهم : سيلين فاقده الرغبه ..

نرمان : قصدك ***

ادهم : اي .. 

نرمان : ليش ؟ 

ادهم : بسبب الادمان يقتل الرغبه عد المدمن لهذا تمثل عليه مندمجه بس انه احس واعرف. 

نرمان : وهذا الشي اله علاج لو لا. 

ادهم : اله علاج بس اريد اعالجها بالخارج مو هنا ورحلتي ويه علاجها الضاهر طويله يانرمان. 

نرمان : لهدرجه سيلي متدمره. 

ادهم : ما مبقي بيها شي صاحي الكلب . 

نرمان : لا اله الا الله قهرتني والله. 

ادهم : لتحجين كدامها اي شي لان يأثر على نفسيتها وماريدها تتراجع ابد خلينه نوهمها تعالجت وحياتها طبيعيه بس هيه مو طبيعيه تره. 

نرمان : صح اني هم مرات انتبه على تصرفاتها عدها هفوات طفوليه 

ادهم : بالضبط وهيه وين جانت هيج ماكو بثكلها ورزانتها.. 

نرمان : لعد شلون راح تعوفها وتروح يا ادهم راح تضيعها مثل ما ضيعت ياسه قبل. 

ادهم : انطيني حل انه اريد اعالجها هناك اخذها مراكز زينه وبنفس الوقت اريد استقر تعبت هنا. 

نرمان : ماعرف انت فكر بيها من كل النواحي يلا تتصرف. 

ادهم : الله كريم ايمن خابرج. 

نرمان : خابر تأجلت جيته لاسبوع الجاي. 

ادهم : ليش ؟؟ 

نرمان : بابا عنده شغل ومقابل يرجع.. 

ادهم : يوسف اخ من يوسف تعرفين من يوم العقد لحد الان اتصل عليه مايجاوبني وشكد انهضم.. 

نرمان : يتعود وبعدين يتقبل ليش اكلك سوي طفل بلكت يحن مثل ما تقبل ياسه بولاده مريم. 

ادهم : وانه اخلف علمود يرضه عليه اريده يرضه لشخصي مو علمود بنتي او ابني.

نرمان : لتنسى انت بالزواجتين حاربتهم وبدون رضاتهم تزوجت. 

ادهم : لهذا ما مرتاح يانرمان لا ويه ياسه ارتاحيت وتوفقت ولا ويه سيلين مرتاح. 

نرمان : حاول تصلح الامور لان انت ماغلطت ولا سويت شي حرام بالعكس انت ساعدت بنيه وانتشلتها من الضياع وحميت سمعتها

ادهم : ابوج يفكر هيج. 

نرمان : الله يهدي النفوس. 

ادهم : امين. 

سكتوا تسحبت على كيفي دخلت لغرفتي ارجف من السمعته ردت اتخبل شنو صدك اني لهدرجه مريضه وكاعد يمثل ويسايرني علمود اتعالج ماعرف ماعرف ضليت افكر افكار سوده ، سديت اذني وكعدت بالكاع يم الجربايه ، بعدين كمت شمرت روحي على السرير قرفصت ونمت ... 

او بالاصح انهزمت من حياتي.. 

صار الغده كعدوني لبست رداء الابتسامه الكاذبه او المجامله ورحت كعدت يمهم تغديت طبيعي وتجاوبت وياهم... 

وره الغده كعدنه كلنا بالهول ، وبلش ادهم ويه مريم علاجها علمود يرجعها لمسارها الصحيح.. 

بلش وياها بمحادثه ابويه من القلب للقلب بمفردات بسيطه سهله مفهومه لامس بيها كل مشاعرها... 

بعدين ركز على صفاتها الايجابيه وضل يكرر شنو اكثر شي يحبه بيها ...

حجه وياها محاضره عن التحلي بالصبر... 

وحسن التواصل مع الاخرين اخر شي كال ... 

ادهم : انتي كبرتي وصار عندج فكر خاص ومشاعر خاصه ربما ما تتوافق ويه مشاعري وافكاري ربما انه غلط وانتي صح احتمال انه خليتج تعانين من الحرمان الالكتروني بس السويته لمصلحتج لان جنت خايف عليج مو بخل مني ابدا اخاف على عيونج الحلوه وعلى وجهج لايذبل ويصير موحلو لهذا منعتج.. 

هزت راسها بالايجاب وهو استرسل.. 

ادهم : ماكو اوامر بعد من نحجي ويه الاكبر منه ولا ننتر عيب .. 

ضلت تهز راسها ساكته .. 

كلامه جان يتصف بالحكمه والتحكم بالعواطف ، بحيت كبح كل نغمه سلبيه بعقل بنته. 

استمر على هذا الحال يوميه محاضره شكل وياخذها يطلعها واشتره الها تاب فرحت بيه كلش بس حدد الها ساعه معينه تلعب بيه وفعلا سمعت كلامه وبطلت تمرد وبطلت تطالب بتذمر تروح لبيت عمها بس مع ذلك ادهم ياخذها ساعتين ويرجع هو وياها .... 

اني ما بينت سمعت ولا عاتبت ولا حجيت احتفظت بالسمعته لنفسي كمت اتحفظ على تصرفاتي اكثر ويوم عن يوم ابين اني طبيعيه مثلهم بس اني العكس تماما كتله تناقضات وغضب دفين على ساعه انفجر.. 

وبيوم بليل جنت بغرفتي كاعده سمعت اغنيه لام كلثوم.. 

اسمها سيره الحب. 

طول عمري بخاف من الحب وسيرة الحب

وظلم الحب لكل اصحابه

وأعرف حكايات مليانة آهات

وأعرف حكايات مليانة آهات ودموع وأنين

والعاشقين ذابوا ما تابوا، ذابوا ما تابوا 

طلعت اتبع الصوت جاي من غرفه المكتب مال ادهم استغربت اليوم سهران وما اجه نام يمي..دكيت الباب على كيفي صاح تعاي. 

دخلت لكيته عالك ضوه خفيف والدخان يتطاير من جكارته... 

شافني ابتسم تقدمت يمه اول ما وصلت سحبني من خصري وكعدني على رجله بسته بخده وسألته..

سيلين : ليش تدخن احنه شنو اتفقنه.. 

ادهم : اترك وعد بس مو راسن انطيني صبر.. 

سيلين : شنو عندك وهيج مسويها مدخنه.. 

جر نفس قوي وهمسلي.. 

ادهم :انت كبيره مو بكد مريم حتى اقنعج بشي مومقنع صح.. 

سيلين : صح وهذا الاريد اسمعه منك.. 

ادهم : احيانآ نتظاهر احنه بخير ومابينه شي بس الصح اكو منغصات تنغص علينه حياتنه ، ونسكت علمود لا نثير شفقه الناس علينه ، نضرات الشفقه يا سيلينتي تقتل. 

سيلين : شنو بيك غير اعرف. 

سحب دخان من جكارته ونفخه بعيد عني.. 

ادهم : بيه هواي وماعاد اتحمل وجع اريد ارتاح اريد من يسمعني ويعالجني فعلا تعبت.. 

سيلين : لتحجي هيج عفيه احنه كلنا مرتبطين بيك اذا انهاريت البيت كله ينهار وينهد.. 

ادهم : معليج مني بس اريد اوصيج تديرين بالج على نفسج ومرايم بين ما اروح واسحبكم. 

سيلين : ادهم يعني مصر تروح. 

ادهم : حبيبتي مستقبنله كله هناك حتى شغلي هنا صفيته ضل بس البيت وكاعد بيه فهد .. 

سيلين : واحنه وين نروح بهاي الفتره. 

ادهم : راح افصل البيت الفوك الكم والجوه لفهد وايفين. 

سيلين : اي افضل 

ادهم : شسوي رغم عني راح اعوفكم.. 

حجاها ومد ايده مسح قطرات العرق عن وجهي.. 

سيلين : صايره هواي احتر. 

ادهم : طبيعي صوج العلاج .. 

سيلين : شوكت اخلص من العلاج تعبت .

ادهم : تخلصين حبيبتي هو شي بسيط يعني ميخوف.. 

باوع لشفتي غمزلي .

سيلين : شكو؟ 

ادهم : تدرين اللذه تجي من اللوعه..

سيلين : ههههه ها بلشنه ادهم... 

ادهم : يلا سكتت.. 

قطع حديثنه اتصال فهد جاوبه ادهم وفتح مايك.. 

ادهم : الو فهد.. 

ايفين: عمو الحكني راح يموتني...

شكرا لزيارتكم عالم روايات سكيرهوم