رواية جذبني فمك البني الفصل السابع والخمسون 57 بقلم عبير إدريس

ايدك بأيدي وكل صعب نتحمله 💛

فهد _ ايفين 

__

ايفين 

مضى على زواجي سنه وشويه مريت بهواي تحديات وامور حنيت وكرهت وحقدت وتناسيت الاهانه وتعايشت ، ليش لان بكل بساطه ماعندي سند سندي الوحيد اختي وجانت اضعف مني وعاشت تحت رحمه انسان لا عنده ذمه ولا ضمير ، ممكن اكون اني السبب بأذيتها والجانيه وممكن اكون اني الضحيه...... 

ردت اغير هذا الوحش الافعاله مكتسبه من افعال البشر 

ردت اصقله وابرز طيبته وداخله ردت ارجعه لطبيعته لكينونته،،،

خطأنه اني وياه هووواي وممكن يكون خطأنه فادح وحتى مرعب،،،

الظلام خيم على افعالنه كأنما ضباب مظلم كثيف صعب العيش والتعايش بيه...

وكعت بمصيبه وتحملتها شلتها على كتفي ، الكل عاف فهد وتخلى عنه الكل التهى بحياته ونسى هو مريض ولازم يتراقب نسو اكو بنيه يمه وخاف يموتها بدون ما يدري بنفسه... 

بسبب مرضه نسيت حقدي الكره تبدل لخوف عليه خوف من نفسه لايأذي نفسه ، خفت يتمرض اكثر ويتاذى اكثر ..

فهد اشبه بالفلم الرعب القديم من جنه صغار نشوفه ونخاف وبليل نروح نام يم امنه لائذين بيها مرعوبين،

متصدكون من يصيح ايفين بدل ففه شيصير بيه وشلون اخاف يعني ضايج وراح اتحاسب اصاب بذعر كلبي يدك سريع كأنما طفله وتركض خايفه من شي و تريد توصل لبر الامان ... 

اتعرفت عليه وتعمقت بشخصيته انصدمت بالطفل البداخله انصدمت بالحنيه العنده مرات ابجي منه ومرات ابجي عليه . 

شكد يصير عصبي ويريد يضربني وتصعد خبالاته اعلى درجات العصبيه بس يشوف ضحكتي تتلاشى ملامح الغضب وتتبدل بضحكه مكتومه يسحبني لحضنه يطمني ويهديني وهنا اطلق دمعاتي واكوم ابجي بين ايده وبحضنه.. ... 

حياه زوجيه قائمه على الخوف والخداع والمرض 

حياتنه انبنت على اساس رباط مقدس يجمعنه فراش واحد وصحن واحد وحياه وحده المفروض هيج بس الحقيقه هيه العكس تماما حياتنه بيها خوف وبيها خداع وبيها ظلام وظلم...

لكن الكل نسى ايفين هيه طفله عاشت حياتها بالظلام ومحد علمها الى ان غرقت بهذا الظلام وكبرت على الخطأ ومن رادت تصلحه وتعيش اندفنت بنفس الظلام.. 

راح اعرض عليكم جانب من حياتي المتناقضه ويه هذا الانسان البداخله طفل وخارجه وحش كاسر يريد يدمر كل اليحبهم علمود يلتقي بأبنه لان طال الفراق وماعاد يتحمل.. 

جنت نايمه وهو اجه صاحني ونبرته جانت غير عن العاده صوته عباره عن صرخه مكتومه مغلفه بقهر . 

فهد : ايفييييين.. 

كلت بكلبي ياستار وخرت الغطى وكمت فتحت الباب وجاوبته من فوك بين ما انزل.. 

ايفين : نعم..

فهد : وينج انه شنو اتفقت وياج.. 

نزلت على كيفي واجر النفس كوة شلون اقنعه هذا ...

وصلت يمه تقربت عليه وحضنت وجها بكفوف ايدي غمض وتنفس بنفاذ صبر.. 

فهد : لتحاولين بدلي وامشي ليش تعبيني وتتأذين وبالنهايه كلامي يمشي..

ايفين : فهد فهد اسمعني والله اني ماغدرك اصلا اني حبيتك ماكدر اعيش بدونك تخيل مرات تجي ابالي افكار صاير بيك شي والله ابجي بقهر واحس روحي تريد تطلع وتفارقني لان انت بكل بساطه اخذتها لهاي الروح مني..

فهد : تعرفين نفسج شكثر عنيده صايره وانه ما اتحمل هذا العناد ويأذيني..

ميلت راسي عضيت على شفتي بدلال قربت وجهي منه طبعت قبله خفيفه على خده ورجعت حضنته قوي...

عكد حاجبه باوعلي وتنهد...

فهد : ليش وجهج شاحب وصايره نحيله ..

رفعت وجهي باوعتله بعتب.. 

ايفين : من الخوف يافهد من الخوف ارحمني وارحم نفسك وتعالج لخاطري ولخاطر ابنك.. 

فهد : انه مو مريض افهمي همه زرعوا هذا الشي بعقولكم علمود يفرقوني عن زوجتي وابني ويكون التفريق بحق.. 

ايفين : كافي فهد اسكت كل مره تعيد وتزيد بنفس الكلام وبعدين تصير مشكله جبيره .. 

عافني وراح كعد على القنفه رحت كعدت بصفه وسندت راسي على كتفه .. 

فهد : معاملتج اليه بدافع شفقه صح.. 

التفت عليه باوعلي وعيونه غركانه دموع تحولت نضراته من الغضب الى الذعر خاف اكله اي وتطلع شكوكه صحيحه ويأذيني ويأذي نفسه...

مديت ايدي ربتت على كتفه مرورآ لشعره ضليت امسدله بحنيه ، مدد على القنفه وخله راسه بحضي وجها جان بأتجاه بطني ، باسني منها وحجه على كيف.. 

فهد : انه كتلت روايه اكثر من مره انه دفنتها بالحياه انه ضيعتهم من ايدي وانتي وابني هم راح تتأذون وتملون وبالاخير تعوفوني وحدي وتاليها لو اموت لو اتخبل .. 

ايفين : لا انت اطيب انسان شفته بحياتي انت حنين وشايل حب بكلبك يحتوي كل الناس بس عندك عيب واحد ياريت تسمعني مره وحده صدكني حتى علاوي يرجعلك.. 

من ذكرت علاوي صكت اسنانه وعكد حاجبه.. 

فهد : شنو اسوي. 

ايفين : تعالج صارح الدكتور بشنو تحس وبعدها يعالجك. 

فهد : انه مو مريض منو كلج مريض الناس تشوفني مريض.. 

مسدت على شعره وحجيت بصوت هادئ.. 

ايفين : انت عندك صفات هوواي حلوة والناس ماشافت وجهك الحقيقي مثل ما اني شفتك .. 

فهد : انه سيء واذيت هواي ناس.. 

حجاها وغطه وجها ميريد يبجي اعرفه تصعب عليه نفسه..

ايفين : مادام بعدك عايش تكدر تصلح الغلط وتتجاهل الاساءه اذا بدرت من احد اتجاهك وتلتفت لكلشي يقلل من قيمه نفسك .. 

وخر ايده وعكد حاجبه ضايج نتر بيه.. 

فهد : وابني شلووون ارجعه فهميني.. 

ايفين : تعالج ورجعه .. 

فهد : ويرجع يلكه عذر ثاني واتهامات جديد ويبعدني عن ابني.. 

ايفين : عمو مو هيج فهد افهم الله يخليك . 

فهد : اذا عاجبج تضلين ويايه وتساعديني تسكتين ولتجيبين سيرته كدامي. 

ايفين : زين سؤال اذا عمو لا سامح الله صار بيه شي وتأذه ماراح تنقهر ولا تضوج عليه.. 

فهد : لا مانقهر تعرفين ليش. 

ايفين : لان شافك تأذيت وماساعدك حفظت الكلام يافهد حفظته بس ليوين تضل تلوم بعمو وتأذي نفسك وتأذيهم كافي عاد تعبت والله تعبت ، لابيه اعاديهم ولا بيه اسايرك اكثر ولا اريد اخسرك افهمني. 

مد ايده على عينه فركها جريت ايده وخرتها .. 

ايفين : مو هيج مردتها مرد شبيك. 

فهد : العصر نروح للدكتوره تنزلين الطفل كلمه زايده ماسمعلج. 

حجاها نزل رجله بالكاع وكمز وكف و بحركه سريعه صعد فوك.. 

دنكت راسي خليته بين رجلي قرفصت على نفسي واجهشت بالبجي بعد ما اتحمل صبري خلص .. 

اصعب ما يمر بيه الانسان يكون ثوبه درع يحميه من المخاطر التحيطه ، ههههه ماعندي بس ثوبي يحميني من خطر فهد ، يعاملني بأدب ويرجع يعاملني بفتور ومرات برغبه واذيه ، 

اغلب الاحيان افعاله ناتجه من ذكاء متقن وتصرفات رهيبه ماكدر لا اصير ضده ولا وياه مرات يلعب بعقلي واشوفه هو صح واحقد على الناس كلها ومن يبتعد واراجع نفسي اشوف لا هو خطأ.. 

نفضت الافكار من راسي و كمت للمطبخ شربت مي تذكرت هو ممتغدي 

واخاف اسأله متغدي بره لا ، اذا سألته يعيط واذا غلست يعاتب ويزعل .. 

وكفت باب المطبخ حجيت بصوت عالي وسريع وعكنشت وجهي مستقبله الرد...

ايفين : فهد اصبلك غده لو متغدي. 

اجاني صوته يرعد مستهزء.. 

فهد : ما متسمم اكيد اريد غده.. 

والله عرفته هيج راح يكول ، وحفظته حفظ اصلا ، حميت الاكل طلعت زلاطه وطرشي وخليتهن على الميز وصبيت ، كعدت انتظره ، شويه ونزل فات للمطبخ يسد بسحاب التراك .. 

كعد باوع على السفره وحجه هو ومدنك.

فهد : ماكو خضره؟ 

ايفين : ماكو خلصت. 

فهد : ليش محجيتي اجيب مو جنت طالع. 

ايفين : نسيت. 

فهد : بعدنه بأولها وبلشنه ننسه اذا تقدمتي بالحمل شتسوين. 

ايفين : ليش هاي شعليها بالحمل.. 

ابتسم نص ابتسامه باوعلي ورجع دنك كال.. 

فهد : يكولون الحامل تنسى لان طفلها يشاركها بكلشي حتى عقلها. 

ايفين : وانت منين عرفت؟ 

فهد : تابعت حمل روايتي اول بأول وجنت اروح وياها للدكتوره وجانت تنسى هواي وعرفت بسبب الحمل.. 

من يذكرها وجها يتفح وعيونه تلمع مبين يحبها اصلا من يذكر اسمها يتغير مو ذاك فهد ، وكل يوم لازم يصير موقف يذكر مرته وابنه .. 

فهد: مضجتي صح.. 

حجاها وكرط خياره.. 

جاوبته ومثلت اللامبالاه...رفعت كتفي وكتله....

ايفين : من شنو اضوج.. 

فهد : لان اهتميت بحملها وجنت متلهف على ولادتها وانتي ماريد منج طفل. 

ايفين : زين ليش متريد مني ؟ 

رفع عينه باوعلي.. 

فهد : لان انتي متحبيني تحبين ايمن.. 

ايفين : انت هم تحب روايه متحبني.. 

فهد : اي متساوين بعد شكو. 

ايفين : واني محجيت شي ولا طالبتك بشي انت حجيت. 

فهد : عليمن محتفظه بالطفل اذا كارهتني. 

ايفين : مكارهتك انت يتصورلك. 

فهد : تريدين تقنعيني نسيتيه بسهوله..

ايفين : تكدر يوم واحد متذكر روايه كدامي. 

دنك راسه وكال. 

فهد : لا 

ايفين : ليش لازم اني اتحمل وانت لا رغم اني ابد مذكرت ايمن كدامك ولا عاتبتك غير بالبدايه من قهرتي وحركه كلبي وبعدين كعدت بيني وبين نفسي كلت لا احترميه واحترمي مشاعره انتي صرتي مرته عيب تفكرين بأخوه واصلا حرام رغم اني عشت عمري ماعرف العيب ولا الحرام وتعلمته من عمو.. 

فهد : قهرتيني تعرفين تأثرت.. 

ايفين : ماريدك لا تنقهر ولا تتأثر اريدك تتعالج وابنك يرجعلك وحتى اذا رجعت مرتك واني عفتني عادي اهم شي تكف اذيتك عن الناس.. 

فهد : وهذا الراح يصير.. 

مجاوبته بس نزلت دمعه جانت مجلبه بطرف عيني شكد حاولت احافظ عليها متنزل بس غدرتني ونزلت مسحتها جريت نفس ، وكعدت اكل.. 

كمل اكل دفع الكرسي وكام. 

فهد : راح انام نص ساعه اكعد الكاج مبدله ومتحضره .. 

هزيت راسي صعد فوك واني ضليت كاعد اشعر بالاسف عليه وعلى نفسي هذا الاكدر اقدمه ماعندي غير الاسف علينه وعلى حياتنه العايشيها.. 

صعدت فوك فتحت الباب جان متمدد يكلب بالموبايل اخذت ملابسي وطلعت رحت للحمام غسلت وجهي باوعت بالمرايا هاي شنو شصاير بيه اني ليش هيج حاركه نفسي وعلى شنو وياريته مقدر هذا الشي جريت نفس وقررت خلص انزل الطفل واعوفه وانهي هاي السخافه كلها ..

فتحت البوري مديت ايدي ترستها مي وكمت اشمر على وجهي بشكل هستيري اغسل وابجي وارجع اخذ مي اشمره على وجهي واشهك ، سندت ايدي على المغسله ضليت اتنفس سريع انتضرت اهدأ سديت البوري اخذت الخاولي نشفت وجهي وبدلت ملابسي لفيت الشال شلون مجان وطلعت نزلت جوه بالهول كعدت انتضره ، بس شنو جسمي كله يرجف ضليت اهدأ بنفسي اريد افكر صح واي قرار اتخذه كون اطبقه بدون ميأذيني واروح بالرجلين .... 

وره نص ساعه ضبط من تفكير وحركان دم نزل مبدل واخر كشخه ، شافني اشرلي بيده وكال. 

فهد : يله.. 

جريت نفس هزيت راسي وطلعت وراه صعدت السياره ، مشينه وثنينه ساكتين الطريق كله فقط انفاسنه تتعاتب.... 

وصلنه للعياده مال دكتوره صف السياره بالكراج قبل لايفتح الباب وينزل كال.. 

فهد : استعجلي ننهي هاي المهزله.. 

مجاوبته فتحت الباب ونزلت مشى ومشيت وراه يعني انت انسان من دم ولحم على غفله تموت ليش هيج تسوي ليش شنو هالتكبر والغطرسه والنفسيه المتعاليه ...

التفت عليه عاكد حاجبه عبالك سمعني بشنو فكرت .. 

فهد : يله متمشين.. 

سرعت خطواتي صرت بصفه وصلنه للعياده اول ما دخلنه حجزلي وسرايه جان رابع وحده ، كعدنه بالانتظار بيده الكارت ومدنك راسه لان اكون نسوان كباله كاعدات ، بس شنو اكلونه اكل بعيونهم ماعرف شنو المميز بينه اعتقد الاكثر فهد لفت نضرهم لبسه وشكله وحتى ثكله يعني اليشوفه يشبع من هيبته اذا حكم على المظهر الخارجي.... 

همستله.. 

ايفين : هم عندك معجبات . 

التفت عليه حرك وجها عكده حاجبه وحركه بشفته ماعرف شلون اوصفها بس المهم معناها وشنو يعني ، حركات وجها ترجمت رده فعله بأنه مامتهم.. 

دار وجها واني سكتت... 

صوت الاطفال هذا يصيح ماما والثاني شايله ابوه وتره لفهد.. 

العياده مال دكتوره النسائيه بصفها عياده دكتور مال اطفال ومكان الاستراحه مشترك للمراجعين مال الدكاتره.. 

مديت ايدي خليتها على رجله الصارت تتحرك بصوره سريعه.. 

دار وجها على الجهة البعيده عني وخله ايده على حلكه جر نفس قوي ، اخر شي متحمل طلع بره وكف ، وصل سرايه طلعت صحته اجه ويايه ، سأل السكرتيره اذا يصير يدخل هو او لا .. 

فهد : يصير ادخل وياها.. 

_ اي يصير بس لازم عندك مشكله؟؟ 

فهد : اي عندي مشاكل. 

_ يعني تكدر الدكتوره تساعدك بيها. 

فهد : اكيد.. 

_ شنو نوع المشكله علمود ادخل ابلغها. 

فهد : انه ابلغها افضل عليش احرجج. 

_ لا ماكو اي احراج كول لان لازم انطيها خبر.. 

دنك وصار بمستوى كعدتها همس بصوت ناصي وحاصرته الضحكه. 

فهد : ما اخلف هذا سبب كافي.. 

حجاها ورفع حاجبه... 

_ اي هسه ابلغها .. 

فهد : انه ابلغها ارتاحي انتي.. 

حجاها واندار على الباب فتحها اشرلي افوت فتت وهو فات وسد الباب ، .. 

فهد : مرحبا دكتوره. 

اني هم سلمت...

جاوبتنه بوجه مبتسم.. 

_ اهلا تفضلوا.. 

كعدنه ، سألتنه بأبتسامه. 

_ شنو مشكلتكم ياعرسانه الحلوين.. 

ردت احجي اشرلي بأصبع ايده الجانت على رجله يعني سكتي. 

حفظت كل حركاته اغلب الكلام بينه كدام الناس بالحركات سواء بالايد او الوجه وكلهن هو علمني عليهن ومتفقين كل حركه شنو تعني..

 يعني بين قوسين سياسه فهديه ايفيه... 

فهد :المدام حامل واريد تشوفيلنه وضع الطفل بلا امر عليج.. 

باوعتله مصدومه وهو ردها بضحكه دفينه.... 

_ تدللون تفضلي ماما ... 

كامت من مكانها توجهت لمكان السونار واني على كعدتي مصدومه بيه ليش يلعب بأعصابي ... 

اشرلي يعني كومي كمت واني اتلفت عليه مددت على السديه اخذتلي سونار وكالت... 

_ الوضع تمام الجنين حالته كلش زينه بس وضعج انتي تعبان ديري بالج على نفسج وهسه عليج شهرين.. 

ردت اجاوبها شفت فهد واكف وراها 

فهد : دكتوره ممكن اسمع النبض.. 

التفتت عليه وضحكت.. 

_ الضاهر هذا مو اول طفل الكم.. 

ابتسامته اختفت وتحولت ملامحه لغضب.. 

انتبهت عليه ضاج تأسفت منه..

_ اسفه اذا كلت شي غلط تصورت عدكم طفل قبل لهذا تعرف...

تداركت الموقف من جاوبتها.. 

ايفين : لا هذا اول طفل النه... 

_ هاا الحمدلله تصورت رايحلكم طفل .... 

سمعتنه صوت نبض الطفل ورجعت الضحكه لوجها من شفته ضحك فرحت وبجيت بنفس الوقت يعني ابني راح يضل ويايه ابني راح يعيش واخيرا راح يصيرلي سند بهاي الدنيا.. 

خلصت الفحص وحجت ويانه وصتني على بعض الامور بخصوص حالتي وكتبتلي علاج اخذنه الوصفه وطلعنه.. 

اول ماصعدنه السياره التفتت عليه..

ايفين : ليش حركت اعصابي صارلك يومين اذا جنت تريد الطفل شكو خبصتني انزله.... 

حرك السويج وكال .. 

فهد : هسه قررت .. 

تنهدت جريت نفس وسكتت مجاوبته رجعنه الطريق كله ساكتين وصلنه للبيت صف السياره ونزلنه دخلنه للبيت اختنكت ماعرف شبيه احس الدنيا بوسعها ضاقت عليه... .... 

صعدت فوك بدلت ملابسي ورحت مددت على الجربايه... 

انسد باب المطبخ عرفته طلع... 

ضليت افكر اجتي افكار جهنميه ابالي...

منها اخذ علاجه اضمه او اتلفه وهو بصعوبه يحصله وهذا العلاج هو سبب دماره متأكده كم مره بحثت عن اسمه وعرفت مساوء هذا العلاج صح يخليه يهدأ ويرتاح وقت قليل لكن بمرور الزمن يدمر اعصابه... 

طلعت علبه الاشرطه جانت بيها تقريبا عشره اخذتهن ونزلت جوه تلفتهن كلهن بالمي

 بس شنو الخوف البكلبي مينوصف اذا اجته الحاله بليل والعلاج ماكو شنو راح يسوي بيه بس الريحني لان حامل ميكدر ياذيني... 

وتمنيت يتعالج من صدك واخلص وهو هم يخلص... 

انتضرت جيته بليل تأخر كلش ... 

اجه بوقت غير متوقع اصلا ايست راح يجي جانت ساعه وحده ونص سويت روحي نايمه فتحت تك عين واراقب علك لايت الموبايل فتش الاغراض مال مجر حسيته صار عصبي من طلع المجر وطشر الاغراض بالكاع ، صاح بصوت عالي ....

فهد : ايفيييييين علاجي ويييييين كومي اعرفج كاعده.. 

جر الغطا مني وراح علك الضوه اجه يمي شالني من ملابسي انرفعت عن الجربايه. 

ايفين : شنو ياعلاج ماعرف على شنو تحجي. 

فهد : انتي عليمن تضحكين داكلج علاجي وين طلعيه احسلج تره أأذيج.. 

ايفين : اني اصلا ما ادري على شنو تحجي اذا انت علاجك ما تدري وينه وناسي اني اتذكر..... 

هدني وتوجه للغرفه دورها مكان مكان ويا مجر يفتحه يطشر الاغراض البيه ... 

ايفين : جوز جوه وانت ناسي.. 

فهد : ماناسي انه متأكد ضامه هنا بس ادور واشوف شنو تاليتج.. 

كمت وكفت يمه التفت عليه.. 

فهد : لتتظاهرين بالغباء وعود متدرين طلعيه احسلج تره اعصابي بدت تتلف.. 

حجيت وياه متوسله بكلامي وملامحي ونبره صوتي.. 

ايفين : فدوه فهد فدوه لعينك اترك هذا العلاج والله دمرك هو السبب يخليك تنام هواي وتهلوس وتتعب عوفه مو تكول صارت عندي كأبه بسببه.. 

عاط بيه بعلو صوته. 

فهد : انتي شوكت تبطلين دور الزوجه الصالحه تره انتي انكس مني لهذا لتتلونين .. 

ايفين : اي اني موزينه انت زين وانت عاقل بس اهدأ..

فهد : تضحكين عليه انتي.. 

ايفين : تعبت انت ليش ربطتني بيك اريد افهم. 

فهد : اهوووو راح نمثل دور الزوجه المخدوعه تره دافنيها سوه ايفين .. 

ايفين : استغفر الله ربي..

نترني من ايدي حيل .. 

فهد : قابل كفرت وتستغفرين.. 

ايفين : فهد شتريد شتريد 

كعد على الكرسي واني كعدت على الكرسي المقابليه...

ردت احجي رفع ايده مسكتني. 

فهد : لا تحجين ولا تشرحين اي شي ولتطلعيني المهذب ابو الشرف انه اسق****** تمام وما اتغير انطيني علاجي كتلج..

ايفين : من انت لا تريد تتعالج ولا تريد تعيش مثل البشر والاهم متحبني اتركني اروح خلصني تره تعب.. 

كام ودفع الكرسي مالته واجه وكف على راسي انحنى فوكايه لزمني من وجهي قوي . 

فهد : مو كتلج يجي يوم وتملين وتعوفيني مو كتلج راح تخونيني.. 

جاوبته بنبره هادئه لان اذا صيحت وهو عصبي يتخبل بالزايد.. 

ايفين : لتحاول ما راح تحاصرني وتمللني واكلك اي ولا عصبيتك ترعبني ، ايفين تغيرت هوواي كامت متخاف من هذا الوحش لان عاشت وياه بنفس القذاره... 

لزمني من معصمي كومني ودفعني على باب الكنتور رفع ايدي ثبتها بيده بقوه تسمرت بمكاني.. 

فهد : شرحيلي كولي انه ماريدك وراح العب عليك واتفق وياهم ضدك ونضربك من جديد احجي احجي اسمعج مادامج صرتي سبعه و ماتخافين...

ايفين : تدري شنو شعوري هسه من اشوفك هيج تسوي اتأسف على نفسي وعليك وعلى الطفل عبالي تتغير وتفرح من تسمع راح تصير اب اثاري طلعت غلطانه وغلطي جبير مايغتفر.. 

فهد : انتي هواي شايفه نفسج تره اكدر اجيب نسوان بأرخص الاثمان بس انه ردت عقلج وياي وبس لا عبالج محبه بيج. 

ايفين : ادري بيك متحبني وادري اني مجرد لعبه عندك اعرف بس انهيها تعبت... 

حجيتها وكمت ارجف ماريد ابجي وينقهر عليه .. 

فهد : لعبه و كل يوم تسأليني منين رايح ومنين راجع وشك وفضول ، تعاي صدك اليوم ماتريدين تعرفين وين جنت وتشبعين فضولج.. 

ايفين : جنت اسأل لان اخاف اضل وحدي مو علمودك يعني. 

فهد : انتي تحبيني ليش تنكرين. 

ايفين : لا انت متريد احد يحبك واذا حبيتك راح تاذيني اعرف لان انت تأذي كل التحبهم ، مادام اني اداه بيدك تحقق انتقامك من خلالي خليني هيج لان ما راح تأذيني وكم مره كتلك احبك متصدك شسويلك ...

فهد : لتخافين مجرد ارجع ابني ومرتي راح اتركج وتحصلين حريتج بس بشرط تنطيني ابني. 

ايفين : شكد اناني انت شكد كلبك قاسي تريد تعيشني نفس ماعيشتك زوجتك انت انسان مريض متناقض ... 

ضربني راشدي... 

ايفين : اطلع برررره وعوفني يله اطلللع.. 

كمت ارجف وابجي.. 

حجايه مني حجايه منه طلعت من الغرفه نزلت الدرج سريع وصلت رابع بايه واخلصه نزل قلبي وكف كبالي يرجف من الاعصاب . 

فهد : وين رايحه. 

ايفين : لاختي اريد اعيش كاااافي تعبت.. 

فهد : شمسويلج انه وتعوفيني شمسوي.. 

ايفين : انت مينعاش وياك خلص صبري تعبت. 

فهد : اسف ... 

اول مره يحجيها اول مره يغلط بحقي ويتأسف ...

باوعت لعيونه المنتظره جوابي بلهفه كلبي يتألم شفقه على حالته ، ليش الناس يكولون عليه قاسي القلب وخصوصا اهله وخبيث وماعنده وفى حرت وياه حرت...

ايفين : تترك علاجك وتتعالج يم دكتور مضبوط يلا استمر وياك.. 

عاط بيه بصوت عاااالي.. 

فهد : انتييييي تريدين تذليني لو شنوووووو.. 

ايفين : لتكابر انت داخلك نظيف واصلا تحبني احجيها هيج صعبه عليك تعترف.. 

فهد : لا مو صعبه بس انه فعلا ما احبج. 

ضحكت مستهزئه.. 

ايفين : عليمن مخليني يمك اذا متحبني شوف داير مدايرك منو بقالك غيري منو تحملك غير ايفين منو احجي منووو ، امك وينها ابوك وينه اخوتك وينهم اخواتك ويييين زوجتك حبيبتك وينها مو تزوجت ونستك وعاشت حياتها ، اني ضليت يمك اني تحملتك بكل مساوءك اني اني.. 

كمت اضرب حيل على صدري ... 

من الاعصاب البيه والرجيف الاخذني رجليه كامت متشيلني حسيت بدوار فقدت توازني وكعت من الدرج .. 

وسط ذهول وصدمه وألم يمزق احشائي ماكدرت اتماسك اختلطت دموعي بنضراته الخايفه والمصدومه...

تقرب مني خايف يلزمني حجه على كيفه.. 

فهد : تحسين بوجع تأذيني احجي ففه تأذيتي... 

ايفين : فهد طلكني.. 

فهد : انتي شبيج اليوووم.. 

ايفين : لتصيح طلكني .

فهد : ما مسويلج شي حتى اطلكج وماطلك اذا ما رجعت علي ، تكدرين تكومين لو اشيلج.. 

ايفين : مابيه شي وكعه خفيفه. 

فهد : جذابه تأذيتي بس تكابرين. 

ايفين : مثلك انت هم تكابر. 

تربع بالكاع واخذ راسي خلاه بحضنه . 

بدأ يربت بحنيه على راسي ويحجي.. 

فهد : كتلج ماريد احبج لان الاحبهم أأذيهم قبلج أذيت روايه وانتي هم راح تتأذين.. 

ايفين : عوفني لعد.. 

حجيتها وغصيت بدمعتي.. 

فهد : انتي كلتي محد بقالك يعني انتي هم راح تعوفيني. 

ايفين : ياالله فهد فهد فهد اسكت اسكت انت متفهم شنو اقصد ولا راح تفهمني بيوم لان بكل بساطه تسمع عقلك وبس . 

صفن بوجهي تنهد وكال.. 

فهد : اطلب منج اخر معروف وروحي لحال سبيلج.. 

رفعت عيني باوعت بعيونه وكتله...

ايفين : شنو؟؟؟ 

فهد : اريد مساعدتج بعمليه بيها خدعه بسيطه وديري بالج ترفضيها.. 

ايفين : واذا ما سويتها شتسوي.. 

فهد : يعني كمتي تعانديني وتتمردين عليه مو ففه. 

كمت من حضنه صعدت الدرج وصلت للنص وكفت وكتله. 

ايفين : مستحيل بعد اعيش حياه الانتهازيين ولا يعجبني انتمي الها كافي الصار كافي تعيش شخصيه المكروه والمنبوذ تغير ارجع لحياتك القديمه علمود مره هيج تسوي بروحك تره عيب عليك.. 

من كلت هيج تحلفلي كام واني ركضت كملت الدرج وصلت للغرفه قفلتها قبل لا يوصل ضل يدفر بيها ويسب ويغلط... 

رحت للميز لكيت موبايله كبالي اخذته واتصلت على عمو ادهم... 

رن رن جاوبني. 

ادهم : الو فهد 

ايفين : عمو الحكني راح يموتني .. 

ادهم : ياستار شكو احجي.. 

ايفين : عمو اني خاتله بالغرفه الفوك وفهد متحلف يأذيني الله يخليك تعال .. 

ادهم : قفلي عليج الباب ابد لا تفتحيه اله اوصل زين.. 

ايفين : عمو بسرعه راح يكسر الباب عليه فدوه .. 

ادهم : جيت لتخافين عوفي الخط مفتوح بين ما اوصلج. 

ايفين : تمام تمام .

سيلين : لحظه اجي وياك. 

ادهم : بسرعه انه كدامج طالع. 

ركضت للغرفه لبست وحتى ماعرف شنو لبست طلعت اركض صعدت حرك السياره يمشي سريع واحس السياره عبالك سلحفاه. 

التفتت عليه وكمت استعجله. 

سيلين : بسرعه عفيه استعجل .. 

ادهم : ماشي ١٠٠ شكد بعد. 

سيلين : عفيه ادهم زيد السرعه الله يخليك. 

ادهم : ماكدر قابل خط سريع وبكيفي هسه يطلعلي واحد صفح ويصير حادث لاسامح الله صبري هسه نوصل.. 

ضليت اردد ايات بكلبي هلمره كلشي حافظته طار من راسي.. 

طلعت روحي يلا وصلنه اول ما صف السياره نزلت ركض على الجرس دكيته. 

ادهم : لحظه عندي مفاتيح. 

سيلين : اي زين عندك لان متأكده ماراح يفتح. 

ادهم : اعرف.. 

دخلنه للطرمه فتح باب المطبخ ونسمع صوته يهدد ويتوعد اذا متفتح.. 

صعد ادهم واني صعدت وراه لكيناه صاير نار من الاعصاب بحيث ما حاس بينه من دكينه الباب ولا من دخلنه ،،،حضنه ادهم من ضهره وسحبه من الباب كام يرفس بيده ويدفع بأدهم.. 

ادهم : شبيك راح توكعنه صدك جذب اهدأ خلينه نحجي..

فهد : انتتتتتت شجابك هاااا شذكرك بيه.. 

ادهم : تعال اكعد وخلينه نحجي رجل لرجل ... 

فهد : اموتها اليوم انت مشفتها شلون تعيرني انه بحالها الادبسز فوك ما رضيت بيها وسويتها مره . 

ادهم : تعال اكعد وفهمني شكو ليش هيج صرت. 

فهد : انت من ضمن الاسباب الوصلتني لهذا الحال لتغشم روحك... 

ادهم : يا سالفه الماتخلص رجعنه فهد رجعنه. 

فهد : ليش انه شوكت نسيت حتى هسه اتذكر انت نسيت وعشت حياتك اكلك اي صحيح بس انه ميييييت ميييت ماعايش رجعولي ابني تدمرت حرام عليك موتتني حس بيه كول هذا اخويه اساعده اوكفله انت ظالم انت حرامات تنحسب على ملائكه الرحمه لك انت ماعندك رحمه ماعندك ضمير وين غيرتك على اخوك وينها...

ادهم : انت شمدريك شنو جاي اسوي علمودك شمدريك شلون كاعد انازع علمود ارجع ابنك واخليك تشوفه بس متأكد راح تاخذه وتحرمه من امه واذا صارت ادمرك فهد. 

جر خشمه مثل المنشول 

فهد : اي احرمها منه واضوكها لوعة الفركه واخليها تتخيل شكبره صار وانسيها ضحكته ومن تطلع تريد تشتريله تحير متعرف قياسه سمين ضعيف طويل قصير .. 

ادهم : انت تسدد ضرباتك القاسيه على ارق مخلوقه رب العالمين خلقها لك المفروض تحتمي بيك مو تحتمي منك انت بغبائك ضيعتها وراح تضيع ايفين هم.. 

فهد : هههههه ايفين مخلوقه رقيقه ونقيه دسكت عمي هو انت غير متدري بيها.. 

قاطعت كلامه ايفين من فتحت الباب وعاطت .. 

ايفين : بطنننننننننننيييييييي عمو الحكلي بطنيييي..

ركضت عليها حضنتها لزمتني حيل من ملابسي وتبجي.. 

ايفين : سيلين لحكيني راح اموت طلعيني منا اريد اخلص سيلين الله يخليج خلصيني اموت اذا ضليت هنا فدوه والله راح اموت... 

فهد : تموت حياله كلشي مابيها تضحك عليكم.. 

ادهم : معليك انت ارتاح وانه اخذها للمستشفى.. 

فهد : هههه بابه هاي تمثل انه اعرفها كلش زين. 

سيلين : انت اسكت اختي مريضه نسيت انت نسيت. 

فهد : اختج شكبر اسمها. 

حجاها مستهزء.. 

ادهم : سيلين لبسيها اي شي ناخذها للمستشفى . 

فهد : مابيها شي شبيك انت.. 

نتر بيه ادهم.. 

ادهم : متشوووفها متأذيه وجاي تتلوه انت ماعندك كلب خرب بضميرك اذا عندك ضمير مو من احجي لو اتصرف تطلعني ظاااااالم وهاي سوالفك تفرج عليهن زين واحفظهن علمود من اخذها منك تكول ظلمني ما خلاني اموتها واخلص عليها بخبالي.. 

خنس فهد ضل ساكت دخلنه للغرفه لبستها على السريع وطلعنه نزل ادهم قبلنه صعدتها بالسياره و صعدت يمها نيمتها بحضني مثل كل مره وصلنه للمستشفى من الطوارىء للفحص نركض منا ومنا اخذولها سونار ... 

والجواب الجاره متقدمه وحملها مهدد بالاسقاط لازم تنام على ظهرها وممنوع الدرج لو الحركه القويه ويرادلها مداراه.. 

اخذنها ورجعنه للبيت بالطريق كامت تبجي وتشكيلنه. 

ايفين : اليوم رحت للدكتوره جان كلشي مابيه وكالت وضعج كلش زين بس هسه وكعت من الدرج يمكن هذا السبب.. 

ادهم باوعلنه بالمرايا عاكد حاجبه محجه شي اني هم سكتت لان شفتها تعبانه مو مال احجي وياها والوم بيها.. 

وصلنه للبيت دخلنه جوه فرشتلها بالغرفه الجوه واني فرشت يمها ضلت تبجي واني امسد بشعرها سمعنه صوتهم يحجون او الاصح يتعاركون...

ادهم : غير افهم ليش تريد تأذيها هيج شنو عدوتك ولك هاي يتيمه خاف الله بيها. 

فهد : هيه متريدني اعرفها وطلبت منك تفصلها عني وانت كالعاده ماراح تقصر صح. 

ادهم : اذا ضليت هيج اسحبها منك ما اتحمل اخليها تتأذه واتفرج من بعيد...

فهد : انت متدري بيها تخوني هاي. 

ادهم : تخونك ؟؟؟ 

فهد : اي تخوني بفكرها .. 

ادهم : استغفر الله دخلت بفكرها وعرفتها تخونك انت شنو من بشر.... 

فهد : تحب اخوك بعدها لهذا متريدني.. 

ادهم : عوفها اخذها يمي وانت تزوج التعجبك وهم اكسر ركبتها وتعال يا ادهم خلصها وتعال يافهد احقد وطلع سمك على ادهم.. 

سكتووو... 

بليل كلش من بعد ما شبعت ايفين بجي نامت اني هم غفيت حسيت على الباب انفتح دخل ضوه خفيف من الباب باوعت هذا فهد سويت روحي نايمه تقرب منها كنبص مد ايده على شعرها بعدين دنك باسها فتحت عينها وهمست... 

ايفين : عوفني فهد ...

حجه وياها بصوت متوسل...

فهد : ايفين انتي مصدر قوتي وانتي ذراعي الايمن وراحتي تحملتي الاكثر واحتضنتيني هاي المشكله البسيطه تعوفيني بيها وتروحين . 

جاوبته بصوت مبحوح..

ايفين : منو كال راح اروح .. 

فهد : ادهم كال راح اخذها منك ... 

ايفين : وانت شنو رأيك.. 

فهد : ما اتحمل تتركيني اموت والله. 

ايفين : تتعالج اذا بقيت. 

فهد : اي اتعالج بس مو هسه من تسترجعين عافيتج نروح انه وياج حتى تتأكدين انه اتعالج صدك مو اضحك عليج. 

ايفين : يعني شكد بعد. 

فهد : وره ولادتج وعد رجال اتعالج.. 

ايفين : ماصدك وكمت اخاف منك والصراحه بعد ما أأمن اغمض عيني لحظه بوجودك... 

فهد : والله وداعت علاوي نهشتني نار الغيره كمت اشوف ايمن بعيونج تخبلت سيطرت عليه الغيره وكلت هاي تضحك عليه وماحبتني بيوم واهتمامها بيه بداعي الشفقه لان متحبني ولا راح تحبني بيوم لهذا تخبلت عليج وكملتيها من اخذتي علاجي ولو ما لاكي شريط بالسياره جان موتج بيدي وما شفتيني هيج هادئ..

ايفين : اذا كتلك حجايه هسه تصدكني؟ 

فهد : اي اصدك. 

ايفين : وروح بابا وماكو اعز منه عندي بالدنيا ومستحيل احلف بروحه كذب، احبك يافهد وماخنتك حتى بالفكر ومساعدتي الك بدافع حب لا بدافع شفقه ولا اي شي من البالك.. 

فهد : متأكده احجي الصدك وريحي كلبي.. 

ايفين : حلفت بروح بابا بعد شتريد اكثر. 

باوعت عليهم ثنينهم يقهرون كلبي بجه عليهم شكد جنت ضايجه من فهد كسر كلبي وتغيرت نضرتي عنه.. 

رفعها من رجلها و راسها شالها بين ايده.. 

ايفين : وين ماخذني.. 

فهد : تنامين يمي ماكدر انام بدونج..

ايفين : موزين عليه الدرج شلون راح انزل الصبح. 

فهد : انه انزلج . 

حجاها وباسها اتجه للدرج بعد مادري بيهم .. 

ايفين ... 

وصلنه لوسط الدرج قبلني بعنف مصحوب برغبه وجنون واثاره ممزوجه بخوف الفقد ، جنت بوسط اذرع قويه محتضنتني وشفاه مؤلمه تقبلني ماعرف يريد ينتقم من نفسه بيها لو من القدر.. 

عندي رغبه قويه احتضنه واعالجه لكن !!!!!!! 

الفصل الثامن والسبعون من هنا 

شكرا لزيارتكم عالم روايات سكيرهوم