رواية ناديه الفصل السابع والخمسون 57 بقلم انين الليل

سراج 

من رجعت انا ورضا من البصره البغداد انو افكر شلون اوصل الناديه كل الي شفته وسمعته من العصابه 

لكن تصرف امي او وگعتها وعرفت السبب بي افراح خصوصا اتهامها الي بعلاقتي بمياده واعرف محد 

 يتجرأ يتهمني هذا الاتهام اله افراح لكن امي نفت هذا الشي الي انا بالاساس ما انطيته اهميه وخليته على صفحه 

الى ان انتهي من قضية ناديه لكن الي دمرني بلحظه والي تعبني لمن ما امي گالت

انو ناديه چذابه وهي شايفه تسجييل الها وهي من (واحد الواحد ) هاي الكلمه مصيبه لكل انسان عنده غيره 

خصوصا وانا اعرف امي ما تچذب وما تتجنى على اعراض الناس واعرفها تحب ناديه وما تحب افراح  

  بسبب ظلمها للبنات واساسا امي دائما تشوف افراح همجيه ومن نحجي عليها تگول 

هاي عينها فارغه ما مليانه لوهادي يسجل البصره بااسمها هم ما تشبع

امي بعد طلاگ سجى قل سؤالها عن ناديه وحنين لان اعتبرت ناديه واختها هي السبب بطلاگي السجى 

فكرت وشفت انو انا بالوقت الحاضر لازم اكسب الجميع حتى اشتغل براحتي 

لذلك حاولت اطمن امي انو انا راح اترك كل شي واتفرغ الوظيفتي وحتى اتزوج وحتى اطمنها اكثر 

گتلها بس تطلعيين من المستشفى وتصيرين زينه انتي شوفيلي بنيه وانا تزوجها

كان كل همي امي تصير زينه ما احب اقهرها باخر عمرها وبنفس الوقت ما اخلي ناديه بالصوره 

طلعت انا ورضا وصدگوني هالمره خجلان من نفسي ومن رضا الي ما سمع كلام امي على ناديه 

لكن خجلان قامي ابد ما تخلي ابختها ولا تچذب يعني ناديه چان الها علاقه ويه ياسر وعلاقات هواي بالكليه

  بوقتها اتصلت بيه ناديه عن طريق اخت رضا وانا ما اتمالكت غلطت عليها وسديت التلفون 

 صحيح ما مصدك الكلام والاتهام الي امي وجهته الها لكن هيه اكدتلي انو هيه شايفه الها تسجيل 

وهذا خلاني بحيره كلش چبيره

رضا ساكت ما حچى وياي ولا كلمه وصلني البيتي وهو راح اعرفه يريدني اهدا وبعدين يناقشني لكن هو ما 

يعرف بيه غادي نار ونار تحرك الدنيا كلها 

وصلت للبيت وشمرت نفسي ع القنفه مالت الصاله وانا ما مستوعب الي سمعته

::يعني امي وگعت لان سمعت الي علاقه ويه مياده وانا سعيت لاعدامها لان عرفت خانتني 

وامي تعتقد انو بنات عباس هنه بناتي لكن المصيبه لمن تگلي شافت تسجيل الناديه ويه شباب بحفله 

بيني وبين نفسي گلت ::ياويلج اذا يطلع كلام امي صحيح هالمره اقتص منج گدام افراح وبعدين اعاقبها لان 

ضحكتي عليه وهيه اتهمتني وچذبت عليه

چانت افكاري متضاربه وانا كل ما اگول وصلت للحقيقه تطلعلي شغله لكن هالمره الشغله چبيره صدگوني بدون

مبالغه 

ناديه لمن اغتصبها هذا النذل متت من القهر وردت حتى ارميها وارمي روحي طلقه لكن بعدين هديت شويه 

وقررت انتقم الناديه لكن المصيبه كلام امي 

انتبهت الجگارتي الي خلصت وهي بايدي طفيتها ورحت للغرفه طلعت ملابس واخذت حمام وانا اغلي 

من القهر

حاولت اتمدد على فراشي بلكي شويه انام وهذا الشي بعيد عني وانا لحد الان كلام امي باذني اتگلبت

 بفراشي بعدها گعدت وگمت على حيلي وطلعت ملابس بدلت واخذت سويج سيارتي وصرت اسوق اهنا  

قررت اروح المكان اگدر افضفض بي بدون محد يگلي 

اسكت 

افتهمنا 

لا تلح

قررت اروح للكاظميه 

 ركبت سيارتي ورحت اسوق وانا ساكت وصلت قريب المكان وانا اشوف كل هاي الناس 

الي تمشي اعرف بيها هاي الافواج عدها مشاكل وعدها امور عالقه وجايه بثقه لهاي البقعه الشريفه حتى 

تطلب اشياء يمكن احيانا تكون محاله لكن اعتقاد وايمان منهم انو سبب وواسطه الهم بينهم ما بين الله 

لتحقيق ما يريدونه

امشي وانا روحي فارغه وصلت اباوع للقبه الشريفه ودخلت للصحن المبارك وصرت امشي بهمه الى 

ان وصلت قريب الشباك الطاهر وصرت اقرا الزياره ورافع اديه للسما وبعدها اجيت ولزمت الشباك الشريف 

اهنا غلبتني دموعي وهنا حچيت كل الي بگلبي وطلبت اشياء لا يمكن اطلبها اله بهذا المكان الطاهر

لزمت الشباك ودنيت وجهي قبلته واسمع حاجات الناس وهي تبللها الدموع والرجاء لكن مفعمه بامل 

انو الله سبحانه راح يستجيب ويحل مشاكلهم صرت اشهك وانا مصيبة ناديه امام عيني لا قصة حياتها من يوم 

الي صارت گدامي كتاب مفتوح بكل تفاصيله من اول كلمه واول سطر

صليت وقريت قرآن وبوقتها حسيت براحه طلعت بعد ان خليت كل مشاكلي وتعبي وامالي بيد 

صاحب هذا المكان وهذه الكرامات التي لا تعد ولا تحصى شفت موبايلي يرن باوعت لگيت رضا 

شگد متصل عليه 

رديت هو سالني

: سراج الخاطر الله انت وينك 

::عندي شغل مهم ليش رضا شنو صار 

:ما صار شي بس اريد اطمن عليك 

::ما بيه شي يا صاحبي لا تخاف 

::زين تعالي لو انا اجيلك ونطلع سووا 

:لا انا شويه بعيد من ارجع اخابرك

ما سمعته شنو گال سديته من عنده وطلعت الكربلا رحت للمستشفى وشفت الطبيب المناوب والي سالته عن حالة 

اثير وهو اكدلي انو مو بخير ابد وباي لحظه ينتهي بيني ما بين نفسي اتمنيت انو ينتهي لان خليت ابالي شغله 

ولازم اسويها اهنا انا ردت اشوفه والطبيب گال //لا اتعبه بالكلام هزيت راسي بالموافقه ودخلت وشفت الاجهزه

 بكل مكان بجسمه اجيت يمه واتقربت وگتله ::اثير تسمعني مو 

هو فتح عينه وشفت دمعه نزلت باوعتله وگلت:: قبل لا تموت اريد اسألك ناديه من اغتصبتها كان بارادتها لو 

غصب عنها 

صدگوني خجلت من نفسي وانا اسأله شلون اگله اغتصبتها وشلون اگله بارادتها 

فتح عينه ع الاخيربتعجب وحچى بصوت ناصي گوه ينفهم 

: نا دي ه ف ق يره شر ي ف ه خط يه (ناديه فقيره شريفه خطيه )

اتقربت اكثر وانا ارجف :: شلون اثير مو هي وافقت ع الزواج منك

اثير //اييي ررادت تن قذ نف سها واخت ها (ايي رادت تنقذ نفسها واختها )خطيه انا انا غدرت بي ها ان ا حط مت 

ها خليها (انا غدرت بيها انا حطمتها خليها تسامحني ) تسا م حني

حاچيته بعصبيه ::تسامحك شلون تسامحك ولك انت مو بس اعتديت عليها لا اعتديت عليه وانت هسه انسان ميت 

والضرب بالميت حرام ويكفيني انو انا الي رميتك الطلقه وهي قاتله بس الله ما اخذ روحك حتى يبيض صفحة ناديه 

 وهسه اتمنى ما تموت حتى اطلع روحك بايدي (وخليت ايدي على رگبته اريد اخنگه لكن شفته ميت وينازع بالروح )

 ::انت اضعف من اي حشره واذا كتلتك راح ازغر بعين نفسي ويمكن تنمسح قسم من سيئاتك

خليتله جهاز التنفس وطلعت من المستشفى ورحت الكربلا وانا دموعي تنزل تلقائيا ما اعرف عليمن جاي ابچي 

صليت وزرت ودعيت وبعدها رحت للنجف 

وانا متعب ومقهور زرت وصليت الظهر وانا احس بشعور غريب من اول ما رحت للكاظميه وبعدها الكربلاء 

والنجف احس بهدوء وسكينه ما حسيت بيهن من اول ما ضاعت ناديه

ورحت للمقبره ورجعت البغداد خابرني رضا گلي //انت وين سراج 

::رايح للمستشفى اشوف امي شكو 

:ماكو شي اتصل مره تگلي بمكان بعيد ومره تگلي رايح للمستشفى

جريت نفس قوي ::رضا تعبان وما اليه خلك 

::زين يابه رووح وانا جايك 

::اهوو زعلت مو رضا تعال وراي للمستشفى 

: لا عليمن زعلت جايك

وصلت ولگيت نور ومرت موفق وموفق رايح يجيب غدا انا سلمت وصلت يم امي بست راسها هي سالتني 

:وين چنت 

باوعت الها وگلت ::رحت الابويه 

هي رجفن شفايفها ونزلت دمعه وهي تگلي// سلمتلي علي 

نور اتقربت على امي وگالت //ماما مو سمعتي الطبيب شنو گال ما يريد توتر ياالله شدي حيلج حتى نطلع منا

انا باوعت الها وگلت بابتسامه // شدي حيلج ام سراج لان بس تطلعين من المستشفى راح اتزوج 

نور ومرت موفق// صدوك 

:: اي ليش لا اي شي يرضي امي اسوي 

ولزمت ايدها وبستها واشرت النور تاخذ مرت موفق وتطلع 

ابتسمت بوجه امي وگتلها ::ماما ترديني اتزوج

هي اتحسرت وگالت // اي ماما يوم المنى وانا اشوفك متزوج وعندك جهال 

:: زين يووم واذا اگلج انا متزوج ومتزوج من زمان يعني صار اكثر من سنه 

امي اتفاجآت //شنو انت شتگول 

هزيت راسي وابتسمت ::اي ماما لان انا مشيت بوصية ابوي تتذكريها لكن انتي شككتيني

امي گعدت وگالت //شتقصد سراج 

باوعت الها ::اقصد ابويه قبل لا يموت لمن انتي چنتي كل ما تشوفيني تبقييين تحچيين لان فرطت بسجى ابوي 

الله يرحمه چان يگلج عوفي للولد هو اعرف بمصلحته 

امي // ايي وهاي مصلحتك داير وره...

قاطعتها ::مو اهنا المشكله يا امي ابوي يعرف بيه منو راح اتزوج

امي //تقصد يعرفها المتزوجها 

هزيت راسي ::اي يووم يعرفها وهو الي شجعني اخذها لان عرف بيه احبها 

امي //ها مادام تحبها ليش اتزوجتها بالسر 

::لان خفت عليها هي مطلوبه ثار ردت أأمن عليها وبعدين اعلن زواجي 

امي بتوتر //ومنو هاي انا اعرفها

:: اي ماما تعرفيها 

: منو سراج لا تشلع گلبي 

قربت بطل الماي يمها وهي شربت شويه انا گتلها ::ماما انا اتزوجت الي احبها واريد رضاج عليه 

امي بخوف // ومني هاي سراج 

جريت نفس ::ناديه ماما ناديه 

امي راسا رجفت وصارت شفتها بيضه //. اتزوجت بت مياده ولك شسويت مو انت ومي...

قاطعتها اتقربت وشاورتها ::ام سراج ناديه عندي مو منهزمه ويه واحد لا عندي

تعرفين ليش لان خفت عليها من افراح وهادي يكتلوها وياخذون حلالها هسه افتهمتي يعني الي 

وصلج انا عندي علاقه ويه مياده يچذب لان لو عندي علاقه بمياده ما اخذ بتها 

والي گلولج ناديه مسويه حفله ومن حضن الحضن هم چذب عليج لان هي زوجتي وانا اعرف بكل تحركاتها

صار گلبها يدك واتخربطت امورها انا اتقربت يمها وگلت:: يووم افراح ما تفيدج تدرين رحت الابوي

 وشكيتج يمه گتله امي تحچي على مرتي الي انت گتلي بابا اخذها لان ما تحب غيرها وانتي ماما تعرفين 

بهذا الشي واتهمتيني اتهام باطل 

امي دارت وجهه عني وهي تگلي // اخذت بت مياده كسرت كلمتي واخذتها 

:: اي يووم اخذت بت عباس الطيب الحنون

هي غمضت عيونها وگالت //اطلع سراج ما اريد اشوفك

اتقربت وبستها بايدها وخدها وشاورتها ::يووم ناديه شريفه ناديه حافظت على نفسها وهي تسبح ابيتونه وتاكل 

خبز يابس هي واختها وانتي چنتي تبچيين عليهن ما تجي تبيع نفسها من تصير عدها فلوس اطمني يووم ناديه

 لا مخطوفه ولا ابدا بس انا عرفت بياسر يريد يتزوجها وهاي الچلبه ما قابله خفت يسوي بيها شي واخذتها عندي

امي بخوف //انت تعرف من يدرون هي عندك شيسوون 

ضحكت باستهزاء ::مو همه الي يسوون لان همه جبناء ما حافظو على عرضهم بس افراح هي الي تسوي 

امي //ولك سراج شالع گلبي من انت هلگدوتك ولك ما راح يسكتون 

::اطمني يووم كل شي مايسوون ناديه مرتي وبعدين منين يعرفون بوجودها اله اذا انتي حچيتي وبذاك الوكت 

ياسر وعمار وكرم يصيرون زلم واحتمال ايكتلوني

امي هدئت وگالت // اسم الله عليك 

ابتسمت وبست ايدها :: تخافيين عليه امونه 

امي // اووف منك سراج دير بالك على نفسك ولك ليش هالشكل 

:: ماما حبيبتي الخاطر منير ارضي عني 

   اتحسرت // هو شطلع عينك غيره الله يرحمه شسوي الفاس وگعت بالراس

ابتسمت ::انتي بس ادعيلي وارضي عليه لان انتي هم ظلمتيني وظلمتي ناديه 

امي //تريدني ارضى عليك وهي مقشمرتك وماخذتك بالسر 

::هههه لا يمه اتشاقى وياج ناديه هين عليها تعيش ذليله خدامه الافراح وبناتها بس لا تزوجني بالسر ولا تحضر 

حفلات ويه شباب

 باوعتلي // يعني شنو انت ما متزوجها

هزيت راسي :: ناديه عندي لان خطفها ياسر وانا تقذتها ومثل ما گتلج محد يدري بيها وناديه لو تدري تموت 

ما تقبل نتزوج اله بموافقتج الي اريده منج ما عليج بافراح ومن تخابر لا تجاوبيها وهسه عذرج وياج ممنوع عليج 

الكلام والعصبيه 

امي //ها سراج مو چنك تريد اتعاقبني

اتقربت وبست راسها:: افه عليج ام سراج اعاقبج الله ياخذني اذا افكر اعاقبج بس وداعتج هاي الحيه من 

تعرف هذا الشي راح تشكل عليه جبهه ويكتلوني لازم تعرفين ياامي عقابي الافراح راح يكون عسير اقوى 

من عقاب مياده

بست راسها بعد ان اخذت منها وعد ما تحچي وطلعت من الغرفه او وصيت نور گتلها 

::لا تخلين امي تحچي بالتلفون مو زين عليها ( وشاورتها) خصوصا ويه افراح مرت هادي 

هي هزت راسها ومن طلعت شفت رضا واگف خابرت موفق وگتله 

::موفق عندي واجب دير بالك على امي وممنوع عليها الزيارات والتلفون

موفق //اعرف سراج الطبيب گلي 

:: تمام انت دير بالك عليها واي شي تحتاجونه بس خابرني فيمان الله 

موفق //الله وياك ( اتقرب مني ولزم چتفي ) سراج 

::ها موفق شكو

موفق //الله عليك لا تزعل مني انت اخويه الچبير وتمون عليه سامحني لان رفعت صوتي وايدي 

::ما صار شي حبيبي احنه من يومنا انت الامي وانا الابوي انت بس دير بالك عليها 

   - - ان شالله بس لازم تفهم انو امي تحبك شنو تحبك تموت عليك 

  هزيت راسي :: ادري 

  موفق // وانت مو بس اخويه انت بمثابة ابوي 

لملمت حلكي هو اتقرب وحضني وشهك انا حاچيته :: لا موفق اني الي اسف لا تبجي حبيبي اني اخوك وابوك وصديقك 

 هالايام هواي انشغلت عنكم اسف ودير بالك على امي وما اريد اي توتر بسته

وطلعنه انا ورضا الي سالني // وين چنت 

::رضا تعبان ومالي خلك اريد اروح للبيت ارتاح 

:چا المن گتلي تعالي للمستشفى 

::مو انت زعلت عليه وكل شويه وتتصل 

رضا //عمي متاسف .........

اتصل نقال رضا هو رد 

هلا ام حسين شلونكم 

اه يمته وهسه وين انتم هسه 

زين زين احنه جايين 

باوعلي رضا عرفت صاير شي گتله بخوف وتوتر ::شكو 

رضا //ناديه گاطعه شريان ايدها وهسه هي بالمستشفى متلاحگينها بس بعدهي فاقده

من سمعت بلحظتها اتخبلت درت السياره بدون ما احچي صرت اسوق بسرعه جنونيه وانا گلبي يدگ

كل شويه اگله ::رضا خابر 

ورضا يخابر واخته تگله بعدهي ما انتبهت وجاي تنزف وانا اگله 

::ما تعرف ليش هيج سوت

رضا بعصبيه //انوب تريد تعرف ليش سوت انا اگلك من اهانتك وسبك الابوها شنو نسيت 

اتحسرت وگتله ::حقي رضا من الي سمعته لا تلومني 

رضا هدا وگلي //الله كريم بس على كيفك لا تگلبنه اطبگ وخليني انا اسوق

ونزلت اتبادلنه الاماكن وصار رضا يسوق وانا افكر بناديه واحچي ويه نفسي 

:: يعني تردين تنتحرين لان غلطت عليج اووف من اول يوم صرتي بي انا اتمحنت بيج شلتج بروحي 

وخيالج ما فارگني تنتحرين والمن اتركيني 

انتبهت على اتصال ام حسين رد رضا وهو ايگلها// اطيني ابو حسين 

:الو هلا بيك ابو حسين

:اي گلهم عادي هسه يجي عمها 

:ان شالله على وشك نوصل 

وسدا رضا الي گلي //الطبيب مصر لازم تقرير شرطه وانا گتله هسه يجي عمها ويتفاهم وياهم 

رغم خوفي على ناديه بس ما اعرف ليش گلبي بارد 

تمينا ساكتين وانا ادخن بالطريق اتصل عليه عصام الضابط المكلف بحراسة اثير جاوبته

::الو 

:: هلا عصام خير 

  :: يمته 

  :: زين يابه تعبناك ويانه 

:: فيمان الله 

باوعت الرضا وانا ابتسم گتله ::اطبك على صفحه 

هو باوعلي متعجب طبك ويسالني //شصاير سراج

ما جاوبته تزلت ونزعت حذائي وسجدت على التراب سجدت لله حمدا وشكرا 

من كملت رفعت ايدي للسما وانا ادعي ::كملها يارب ويانه بحق محمد وآل محمد 

بعدها وگفت ودرت صوب بغداد وسلمت على الامام الكاظم رجعت صعدت ورضا مذهول هو ساق

وانا دخنت جكاره گلي //فهمني سراج 

باوعتله ودمعه بعيني :: رضا اثير مات 

رضا بفرح //احترگت صفحته وما ردت الچلب 

هزيت راسي ::اي رضا وانا سجدت لان الله ما خيب ظني 

جر نفس //اعرف سراج الله يستر عليك مثل ما طلبت ستر اليتيمه

وصلنه المستشفى العماره التعليمي وهناك رحنا وشفنه الطبيب وگال

: تبقى اليوم بالمستشفى على ما تستقر حالتها وتطلع 

رحنا البيت رضا الي ما قبل حتى ادخل واشوفها لان گلي:: انت مخبل ما تلزم اعصابك واحنا بمستشفى خلي 

نروح نرتاح

:: انا ابقى خاف يحتاجون شي 

رضا يحرك باديناته // ما يحتاجون اي شي حالتها مستقره وباجر تطلع امشينه

وبقت يمها ام حسين وصلت راسي كلش يوجعني هاي اكثر من يومين ما نايم 

گتله رضا اريد چاي هو دخل للمطبخ راح يجيب چاي ما حسيت اله رضا يگعدني 

:اگعد سراج اتريك 

فزيت لگيت روحي نايم بملابسي بالصاله ورضا مغطيني باوعت للساعه شفتها بثمانيه الي اتذكره طلبت 

من رضا چاي باوعتله وگلت ::يعني انا نمت وما دريت بنفسي 

رضا هز راسه //ايي وخليتك بنومتك بس غطيتك لان اعرف من اندهك بعد ما تنام

اتثاوبت وحكيت شعري وگفت رحت للحمام وغسلت واتوضيت صليت قضا ورضا جاب الريوك گعدت اتريگت 

رضا يباوعلي وانا ساكت شربت چاي وشعلت جگاره باوعت الرضا وگتله 

::ابو علي حتى انا متعجب من هدوئي 

رضا باوعلي وگلي //والله سراج اريد اسألك وما اعرف شلون

جريت نفس :: الدنيا ضاگت بعيني وانا اسمع كلام من امي واتهام خطير ما اعرف اجي لهنا ارميها واتخلص منها 

ما اعرف بوكتها صرت مخبل مثل ما تگول عليه رحت الابو الجوادين وشكيت عنده حالي وانا مقهور ومهموم 

وبعدها رحت الهذا الچلب اثير شفته وسالته ورغم هو بالرمق الاخير بس جاوبني بشي ردت اعرفه وبعدها 

زرت كربلا ورحت للنجف زرت امير المؤمنين ورحت للمقبره بچيت يم گبر ابوي لان اول مره احس بنفسي 

عاجز ومخذول

رضا بفرح //وهسه جاي اشوفك مرتاح 

::اي احس الله استجاب دعائي 

:الحمد لله وهسه سراج 

::يصير خيير يا الله امشي 

   رضا بخبث // وين 

::امشي رضا لا تغشم نفسك.

ركبنا السياره ورحنا للمستشفى وهناك دخلت على الطبيب الي گال //تطلع ما بيها شي بس ديرو بالكم عليها 

تمر بفترة كآبه قويه جدا 

واجت ناديه ركبت بالسياره هي وام حسين وانا من شفتها صرت ارجف ما حاچيتها وصلنه ام حسين الي باست

ناديه وتوصيها 

:ديري بالج على روحج ياعيني الدنيا ما تسوه وانتي هيج تسووين برويحتج چان راح شبابج حرامات 

وهاي تباعلها متفاجئه وابد ما ردت عليها 

وصلنه ع الشارع العام القريب من الكاع اشرت لام حسين تنزل سقت السياره واحنا ساكتين حتى رضا ما حچى 

وصلنه يم مطعم گتله ::انزل رضا جيب جگاير 

رضا //خو خلي ننزل ناكل شي ونشرب چاي 

هزيت راسي ::لا ابو علي اذا تريد انت انزل اكل انا ما اشتهي

هو نزل وانا بقيت بالسياره وناديه وره اباوعلها بالمرايه وهي خاله راسها ع الجامه ومغمضه عيونها مبين عليها

  الكسره والشعور بالخذلان مجرد ما باوعت الها اتذكرت كلام امي من تگول من حضن الحضن 

ردت احچي وياها لكن ما چنت اعرف شنو رد فعلها خصوصا وانو الطبيب گلي محاولة انتحار لان عدها 

كآبه شديده

هي ساكته وانا من داخلي مقهور لكن اكابر اجه رضا جابلي جكاير وجاب ماي و عصاير وكيك ونستله 

فتح الباب وخله يم ناديه علاگه وگللها // بابا هذني الج 

هي حتى ما انتبهت اله انا اخذت بطل ماي وشربت بعدها دخنت جكاره وتمينه ساكتين ما نحچي الى ان وصلنه 

للصويره هو باوعلي متفاجئ جاوبته

::ابو علي لو نامنها اهنا لو ناخذ ذيج الامانه منا ونشوف غير مكان 

رضا بعتب //افه شنو تامن شنو تاخذ انت راعي بيت امشينا 

ادري برضا فرحان لان اجه لهنا وصلنه قريب البيت گتله خابر هو هز راسه گلي //امشي ما عليك

وصلنه ورضا نزل اشوفه اتصل ودقايق ورضا الشاب فتح الباب وسلم على عمه اجانه رضا وگال 

ياالله سراج انزل (وفتح الباب الناديه ونزلها )دخلنه بالديوانيه گعدت وهي هم گعدت بلا مبالاة للي يصير 

حتى ما حاولت تسأل ورضا گعد گبالها وگال 

      - - عمو ناديه احنا مرينه اهنا البيت اخ... ابن اخوي بس ارتاح شويه وبعدين نروح

ما جاوبت ولا كأن الكلام اموجه الها واندك الباب ودخل رضا ورا حنين الي شافتني وانتبهت شافت ناديه 

الي مدنگه اهنا حنين صرخت 

ناديه بس شافت حنين وگفت وكأن روحها ردت حضنتها حييل واحنه طلعنه لكن انا رجعت ردت اوصللهن رساله 

باوعت شفتهن متحاضنات ويبچن گلت

::عمو حنين ناديه رجعتها الج صاغ سليم مثل ما وعدتج شوفيها كل شي ما بيها وهي من ثاني يوم انا لگيتها 

بس خليتها عندي حتى أأمن عليج لان خفت احد اياذيج مو هيج ناديه

هي باوعتلي وما ردت چانت عيونها مليانه بالدموع اما حنين فبس تشهك وتبچي 

طلعت للطارمه لگيت رضا واگف وبعدها بشويه اجه ابن اخو وهو شايل بساط ومخاد فرشهن حتى نگعد 

وراح جاب صينيه بيها چاي انا كل همي اعرف شنو جاي يصير وناديه شتحچي ويه حنين رضا صبلي چاي 

وصب العمه شربت الاستكان وگفت ورحت للديوان دگيت الباب ودخلت شفتهن گاعدات يبچن وناديه تباوعلي 

وبوجهها الف سؤال رسؤال خزرتها وگلت :: اليوم نبقى اهنا وباچر ترحن وياي البيتي

ما اجاني جواب انا رديت :: حنين عمو اخذي اختج وروحي عرفيها على ام رضا ومريم 

حنين لزمت ايد ناديه واخذتها وانا رجعت گلت الرضا ::تعال اهنا ابو علي حنين وناديه فاتن جوا 

دخلنه للديوانيه ورضا بوجهه تساؤل انا گتله ::الليله انبات اهنا والصبح نروح البيتي 

رضا //بكيفك سراج 

اجه ابن اخو وگال //من رخصتكم امي تريد تجي تسلم عليكم

اباوع الصاحبي اتخربطت اموره هزيت راسي ودخلت سكنه 

بكل ادب ولابسه عباتها وهي سلمت علينه //اشلونك خويه سراج 

باوعت الرضا وگالت بصوت مختنك //اشلونك ابو علي 

انا وگفت ورديت عليها :: هلا ام رضا والله سوينه زحمه عليكم 

:لا خويه بيتكم هذا شنو زحمه 

::الله يخليج احنا بس اليوم نرتاح وباچر اخذ البنات واروح

هي گالت // لا وين البنات يرحن خليهن اهنا 

:: كثر الله خيركم يرحن وياي بالبيت 

رضا الشاب گال //من رخصتكم اسمحولي احچي 

باوعناله وگتله:: اتفضل 

: انا اشوف البنات يبقن اهنا وانت وعمي روحو كملو شغلكم وبعدين يرجعن لا تنسوون المتهمين منكم وبيكم 

ومن تاخذ البنات يمك راح يحقونك ويجوز يگولون انت سويت كل هذا الشي حتى تورطهم لا تنسى غريمك 

حيال وخبيث لا تصير من صاحب حق الى محقوق

  باوعتله وهزيت راسي :: صحيح كلامك بس انا گلت اخذهن البيت عمتهن ويه بيبيتهن 

:لا عمي هم نفس الشي وانتم بكيفكم 

::يعني انزاحمكم 

ام رضا // ابد اي مزاحمه ماكو انوب تعودنا على حنيين خليها اهنا تدرس خطيه 

ابو علي //ها جبتولها كتب

ام رضا وهي مدنگه //كلش بنفس اليوم رضا راح جاب كتب وملازم 

:: بارك الله بيكم والله ما اعرف شلون نجازيكم 

ام رضا //مجازاتنا على رب العالمين المهم تطلع براءة البنيه المگروده 

::ان شالله تطلع وعن قريب 

رضا // وما دام هيج انا راح اجيب عشا من المطعم وكلنه نگعد وناكل سووا

جاوبه عمه //مال كلنه نگعد ايي بس امك (ويباوع الها ) لو شيصير ما تگعد ويانه 

سكنه ابتسمت ودنگت ورضا گال //لا عمي تگعد بس اكل ما تاكل (باوع الامه )يمه سوولنه شعريه بس مو 

مريم وخلطوا لبن

هي ابتسمت وهزت راسها وهو طلع بعد ان استاذن وگال // البيت بيتك 

على اعتبار رضا يعتبر عمه هو ابو البيت 

انا ما حاولت ادز على ناديه وحنين گلت خلي ياخذن راحتهن ولو اعرف وحده ما تحچي للثانيه عن عذابها لان 

كل وحده ما تريد تسولف الي جره عليها حتى ما اتاذي اختها 

اجه رضا بسرعه وهو جايب بس فواكه وگال بعد نص ساعه ويجيبونه وراي

انا اتمددت وخليت ايدي على عيوني ورضا وعمه گعدو يسولفون على كيف لان عبالهم نايم اندك الباب وراح

 رضا وره عشر دقايق گال اتفضلو العشا جاهز رحنا واجت مريم سلمت على عمها وهنه خالات السفره وحنين

 ومريم يجيبن بالصحون ورضا يتناوش منهن بصراحه سفره عامره رضا جايب مشاوي ودجاج ومبين هنه

 طابخات تمن وحشو وشعريه حلوه وكاستر وفواكه ولبن واهم شي خبز البيت الحار گعدنا رضا ابو علي  

وانا ورضا على جهه ومقابيلي ناديه وحنين ومريم اما سكنه گعدت مقابل رضا وابد ما اكلت انا صار عندي 

فضول شاورته:: ليش ما تاكل ام رضا

گال //تستحي ما تفك حلگها وتاكل گدام احد 

بيني وبين نفسي گلت هم اكو نساء بهاي الاخلاق بزمنه هذا 

صرت اكل واخزر بناديه الي بنفس الوكت تخزرني بس خزرتها اليه بحزن وخذلان وخزرتي بقهر ونار 

تحرك الاكو والماكو 

ابو علي سال حنين //عمو حنونه صدك رضاوي جابلج كتب وملازم وصرتي تقرين 

حنين وهي مدنگه //ايي عمو 

مريم گالت //احم احم

ابو علي //ها مريومه غرتي 

مريم //الصراحه ايي 

رضا //عليج الله غرتي من حنين 

مريم //لا عمو مو من حنين بس هو رضا صحيح جاب الكتب والملازم بس اسالها منو يساعدها بالدراسه 

رضا //اهوووو هي مساله وانا ما چنت موجود صرتي نيوتن براسي 

رضا //عبالي غرتي من حنين 

مريم //لا عمو بالعكس اصلا فرحت چنت وحده وانوب صرنا اثنين وهسه تلاثه فله يعني انا الافوز

رضا //عليمن ؟

مريم تباوع الاخوها //على واحد بعين امه بس هو وبس لان سبع هسه احنه تلاثه والمثل يگول الكثره تغلب القوه 

سكنه //خايبه عاب شكلج تغديله فدوه ونذر 

مريم //يمه بس لا تنعيين عيب من ناديه وعمي سراج باالله حنين اخذت ع الدراما 

رضا خزر مريم وگلها //مريم عمي ما اقبل هيج تحچيين ويه امج 

رضا //عمي اتركها ما على المجنون حرج

وتمينا نضحك لكن انا وناديه بقينا واحد يعاتب بالثاني بعيونه لمن ما رن موبايلي باوعتله شفته كرم حاچيتهم

::راح ارد ما اسمع نفس 

وخليت اصبعي على حلگي اشاره للسكته وفتحت الحاكيه 

::هلا ابو مرتضى 

كرم //الو هلا سراج شلونك 

::الحمد لله 

اگلك سمعت الوالده متخربطه 

::اي والله كرم منو گلك

هادي 

::بس هادي ما خابرني 

لا سراج ام ياسر متصله بالوالده واختك راده عليها 

:: اي والله كرم انا چنت بالدائره وخابروني من المستشفى بس هسه الحمد لله زينه 

الحمد لله اگلك سراج 

::گول كرم 

على مود حنين 

::شبيها حنين ؟

يعني باقيه يم الرجال الغريب مو تشوفها قليله بحقنا

رديت علي باستهزاء :: ابو مرتضى البنيه هي طلبت تروح عد احد غيركم بعدين انتم عمامها انا بصراحه سويت 

العليه طلعت ياسر ( وصرت اباوع الناديه الي صارت ترجف من سمعت باسم ياسر ) 

ياسر الي خطف ناديه وحرگها ما اعرف كتلها ما اعرف يندل مكانها طلعته الخاطر هادي 

لان شفته شلون راد يموت على ابنه 

كرم // اي والله سراج كثر الله خيرك وانت تعرف البزر غالي 

::اعرف غالي والدليل محد ذكر ناديه وگال اموت وراها وين راحت شنو سووا بيها تدري ليش كرم

  - - - سراج مو وك...

قاطعته وانا اتنفس :: لان ناديه يتيمه ما عدها ام مثل افراح ولا عدها اب ما يرتاح اذا ما يلگاها 

كرم // بس احنا ما قصرنا 

انا رديت باستهزاء ::انتم انتم منوكرم ؟

كرم //احنه سراج نسيت شصار بينا 

::لا ما نسيت بالنسبه الهادي گدامي كل شويه يكمش حنين يگطعها وانت كل ساع تطفر وتگول وين 

ما احظى بناديه اكتلها وسوايتك لمن زوجت مرتضى الهديل اشهد ما باالله تعبت

حاچيته بنتر :: لك كرم رضا الي تگولون عنه غريب تعب ودور اكثر منكم

كرم // شنو سراج تعيرنا لان احنه استنجدنا بيك نعرف انت بحكم علاقاتك تگدر تعرف النه طريقها 

::وعرفته وتالي كلكم گلتو سد القضيه انت ياكرم حتى ما سالت على امك الي طلعت زعلانه من بيتك واختك 

الي سافرن بالليل حتى ما انتظرن الصبح 

كرم جر حسره // اي لان امي واختي رادن مرتضى ياخذ حنين تعرفها حنين سراج لو لا حنيين بت مياده 

واخت ناديه ومو انا الي فرضت علي يتزوج هومرتضى گال ما يشرفني اخذ وحده ما اعرف اختها وين ما وين 

وامها اللهم يا كافي

هزيت راسي وانا اباوع الناديه الي فكت عيونها ع الاخر وحنين مدنگه وبس تبچي جاوبته 

:: اله حق مرتضى بكلامه وهسه كرم خلي اگلك انا الخاطر عمتي بگبرها طلعت ياسر وبعد ما عليه بحنين وناديه

يمته ما تلگاها الناديه اكتلها 

كرم // لا شنو اكتلها بس الگاها اخلي ياسر غصبن ما علي يتزوجها 

:::هههههه

كرم //ليش تضحك سراج

::اي والله اضحك لان اشوفك واثق من نفسك تجبر ياسر ياخذ ناديه ليش ما تخاف علي لاتنسى ناديه حالها حال 

حنين يعني امها مياده فه اكيد ياسر حاله حال مرتضى راح يگول ما يشرفني اخذها 

- - هي خلي تطلع ما ميته وشوفني 

::ان شالله ومثل ما گتلك انا بعد ما عليه بحنين الرجال رضا اخذها على عاتقه وهي بالاساس مشتكيه تريد تعرف 

مصير اختها وهذا حقها فمن يطلبها القاضي عود انت ذاك الوكت اخذها البيتك رجعها البيت هادي انتو عمام وبيناتكم

كرم //سراج انت ما قصرت تعبت ويانه ان شالله نجازيك بالافراح وانا راح اجي اشوف الوالده 

::هلا بيك بس الطبيب مانع عن امي الزياره من تصير زينه انا اخابرك لان احتمال اسفرها 

كرم // الهلدرجه عمتي تعبانه سراج 

:: اي كرم ادعيلها 

^الله يشافيها بس سراج ياريت تحچي ويه امي ترجع ذاك اليوم خابرت رجل زهراء بس ردت احچي وياها

 وهي بقت بس تغلط وتسب

::ان شالله ما تشوفني اله جايبها وجايك 

والله ياريت 

:: فيمان الله لان عندي شغل 

الله وياك 

سديته من كرم وسط ذهول ناديه لان عرفت مرتضى ترك حنين بدون شعور وگفت وگالت 

... ... هسه تاخذوني البيبي جميله

حسيت بصوتها بي بحه عرفت ارتفعت حرارتها اتقربت منها وهزيت راسي وگلت ::ان شالله هسه 

هي بعصبيه ... ... ايي سرااج اخذن ...بدا صوتها يتقطع وانا شلتها خليتها بالسياره ورضا وسكنه اجو 

وياي ولحگنه 

رضا بسيارةً ابن اخو اخذتها للعياده الي شار بيها عليه رضا ودخلناها للطبيب الي كتب الها على ابر ومجموعة

 حبوب وگال // سوولها كمادات تخفف من حرارتها

هي اخذت ابره ورجعناها واخذناها للغرفه ولگيت حنين كاتله نفسها من البچي وصلت يمها وگتلها 

:: لا تخافين حرارتها مرتفعه مثل كل مره ما بيها شي 

اجه رضا يمي وگلها // عمي حنين كافي بچي اهم شي تنزل حرارتها طيحلها كمادات

بقيت الليل كله وانا گاعد بالديوان لان ما اگدر انام تقريبا الساعه بالثنتين ونص طلعت بالطارمه ورضا 

طلع وراي وهو يگلي // ما عليها شي لا تخاف 

سكتت وانا امسح بوجهي واباوع الرضا وگتله ::رضا خايف عليها 

— ليش سراج 

باوعتله هو هز راسه // اي سراج ليش 

ما جاوبته بقيت ساكت اجت حنين طلعت من الديوان باوعت الها باستغراب هي گالت

  - - - عمو عبالي انت بالديوان 

::ليش حنين شصاير 

  - - - عمو ناديه تريد عمو رضا  

::هسه حنين روحي بابا خليها تنام وترتاح الصبح اجي انا ورضا اشوفها شتريد 

  - - - عموناديه تريده العمو رضا هسه

انا حسيت بشي من الغيره ليش ناديه تطلب رضا وما تريدني رضا جاوبها 

   - - - حنونه عمي شلون اجي ام رضا نايمه هي ومريم يمها 

   هزت راسه // خاله ام رضا من صحت ناديه وطلبتك هيه ومريم راحن للغرفه الثانيه 

باوعت الرضا وگتله ::ابو علي انده رضا خلي يسويلنه طريق اشوف ضيمي 

هو ابتسم وگال //ها سراج صرت تحچي مثلي بعدين هي ناديه موديه عليه انت شعليك وتجي

خزرته وهو ضحك ودار راح للديوان ويحچي ويگول//الي ايساله يگول ما بيه شي مو مسودن ههه هي 

وراح رضا نده ابن اخو. الي گعد وفات گدامنا للداخل وگال //اتفضلو ما كو احد 

رحت انا ورضا للغرفه وحنين ويانه لگيتها گاعده وگفت وانا اسالها ::ها شكو 

بدون ما تباوعلي گالت وصوتها بعده بي بحه قويه 

... ... عمو رضا اريد اروح البيبي جميله

انا ردت احچي رضا جاوبها // هسه مو زين عليج السفر 

... ... بس انا لازم اروح

   هز راسه // ان شاالله عمي صيري زينه وناخذج ونروح 

... ... لا عمو الله يخليك هسه اروح اصلا انا زينه شوفني (وتمد بايدها )

اتقربت يمها وگعدت على طرف الچربايه رضا طلع انا گتلها ::لا تلحيين تصيرين زينه واخذج 

هي بدون ما تباوعلي ... ... بس انا ضروري اروح 

:: بالوقت الحاضر لا 

... ... ليش 

::لا بصالحج ولا بصالح حنين هسه الناس تعرف انا لگيتج 

... ... بس انا لازم اروح البيبي جميله 

:: ليش

... ... عدها شي يخصني ويخص حنين 

::اي بعدين اروح واجيبه 

... ... عم اذا ما تاخذوني اروح ابحدي 

جريت نفس ورديت :: انا اروح اجيبه شنو هو 

... ... امانه واريد عمي رضا هو يجيبها 

::لازم انا مو گد الامانه مو

شفت دموعها وگعن ع اللحاف اتقربت اريد احضنها گلبي يرجف عليها حاچيتها 

  :: لا تبچيين اذا الامانه ضروريه هسه اروح اجيبها 

جاوبتني وهي تشهك ... ... ايي ضروريه 

:: زين ارووح اگللها ناديه تريد الامانه هاي جميله تفضحنا وانا ما اريد احد يعرف 

هي باوعتلي وتمسح بدموعها 

... ... لا انت روح وفهم عمه زهراء اتگللها ناديه تسلم عليج وتگلج بروح منيره وعباس انطيني الامانه

//////////////////////////

الفصل الثامن والخمسون من هنا