رواية قصة وجدان الفصل الثامن والخمسون بقلم انين الليل
عاصف
من خابرتني امل وبلغتني انو وجد حامل يمكن الوكت يمي اتوقف ما اعرف شكد بقيت ساكت
ما عندي وصف الحالتي بين الي الدنيا كلها ما وسعت
فرحتي وبين الحزن والخوف وليش هالشكل صار وياي
كعدت جوه شجره ابحدي وصرت ابجي وهم ما اعرف ابجي على روحي لو عليها
خابرت امل هي ردت //. ها خويه
:: ام غانم انتي وين
- - يمها ليش
:: خوش ابقي يمها اجي واخذها للطبيبه
امل اتحسست وعبالها انا مجذبها بس صدكوني انا نفسي ما مصدك
فهمتها الامل انو انا اريد اخذها واطمن على الجنين بنفسي وسمعت صوتها وهي تكول
ما اريد اروح ويا
ما رديت عليها كلت خليها تحجي براحتها
ثاني يوم غبشت البغداد بحيث خليتهم كلهم نايمين وانا طلعت بالسياره من وصلت خابرت امل الي گلتلي
- - راحت للمدرسه
اتسوكت ورحت للشقه فتحتلي امل الباب وانا اشوف بوجهها زعل عليه
انا ما حاولت لا ابرر ولا انطي اعذار وامل من شافتني هالشكل ما سالتني اي شي
بقيت كاعد ونسولف الى ان اجه علي وحضني وهو فرحان بوجودي
رحت ويا للغرفه وانطيته مصرف وگتله وانا مبتسم
:: مو اختك الشريره تعرف هذا الشي خلي ابيناتنا رجال الرجال
حسيت بيها اجت طلعت من الغرفه شافتني استغربت وجودي طلبت منها تتحضر نروح للطبيب
كان ابنيتي ابقى اتغدا واحاول اصالحها ونبدي من جديد لكن هي رفضت تروح وياي
ردت اخذها غصبا عنها بس استوقفتني من قسمت بروح امها
طلعت رحت للفندق وبالطريق مريت اخذت ملابس
جديدات بنطلون وقميص ردت اعبر الها انو انا فرحان يمكن ما سايعتني الدنيا
العصر رحت للعياده ولازم حجز لكن انا عرفت احصله بطريقتي دزيت الها تكسي
ودخلت وياها ع الطبيبه وهي ضايجه مني ومن وجودي لكن ما اهتمييت تالي بالتحليل طلع عدها فقر دم
والطبيبه امدت لازم تاخذ العلاج وتاكل زين
رحت للشقه حتى انطيها مصرف هي رفضت المبلغ وكالت بحده وثقه
= انا ما اريد اشوفك واريدك اتطلكني
كلامها اذاني ولو ما حامل يمكن جرمت بيها
خليت الفلوس ع الميز وطلعت بدون ولا كلمه وانا اغلي من الغضب اعرف باامل راح ترزلها كتبت ع الواتساب
:: روحي الغرفتج اريد احجي وياج
ردت عليه= سبق وكتلك ما بيناتنا كلام وخلي اگلك اني حتى صوتك اكرهه
:: ادري بس لازم تسمعيني بدل ما هسه اجي واحچي وياج كدام عمتج واذا انتي جنتي تكرهيين صوتي
مره ف اانا اكرهج الف مره راح اتصل جاوبي
وره خمس دقايق اتصلت هي فتحت النقال بدون ما تحجي اسمع بس انفاسها حاجيتها بدون مقدمات
:: انتي ما تردين اصرف عليج تمام لازم تعرفين انا اصرف على الي شايلته ابطنج سمعت الطبيبه
بيج فقر دم وتحتاجين علاج والعلاجات غاليه فلان الطفل الي هو ابني من صلبي سببلج هذا التعب
انا مسوول اوفرلج العلاج
:: خليج تاكلين وتشربين من راتب ابوج لكن طبيبج والعلاج مني
ردت عليه = ياريت ما تجيب العلاج لان لو ما حرام هذا الي ابطني اوكعه
حاجيتها بعصبيه :: صدكي اموتج وما يرفلي جفن وانتي تعرفيني ما تردينه بلحظة اليولد اخذه واطلكج
واي شي ما اريد منج
:: اما تكولين اكره صوتك وما اريد اشوفك لاتنسيين يامدام انتي لحد هاي اللحظه مرتي يعني محد يمنعني عنج
خصوصا وانتي كاعده ابيتي فيمتى ما يعجبني ادفر الباب برجلي وادخل لكن انا الي ما اريد اشوفج واذا
انتي تردين تتطلكين مني ف اانا اتمنى اطلكج بهاي اللحظه لكن انتظرج الى ان تولدين
:: راح اجي كل شهر اخذج للطبيبه واطمن ع الطفل وهذا الشي اسوي برضاتج وغصبا عنج هذا كل
شي عندي اذا عدج شي گولي
هي راسا سدت التلفون
وصلت للفندق واتصلت رقيه يمكن 15 مره متصله وانا ما جاوبتها بس دخلت للغرفه اتصلت رديت عليها
:: الو
جاوبت بعصبيه // انت وين ما تكلي
:: شبيج تصيحين
- - طبعا اصيح طالع مثل الحرامي محد يدري بيك
:: عدلي الفاظج لا تشوفيين شي بعمرج ما شايفته
رقيه // شوف عاصف هاي اللعبه مالتك انا مليت منها لازم تسوي حل
:: وشنو الحل برايج
- - قسم الايام بيناتنا انا تلاثه وهي تلاثه
:: لا متوهمه انتي يومين وهي خمسه عاجبج اهلا وسهلا ما عاجبج بكيفج
- - شنو انت تضحك عليه
:: لا بس هذا العندي واذا ما عاجبج جاي اكلج بكيفج هسه اخابر مهدي ياخذج البيت اهلج وكل
شي تردينه يوصلج
سديت الخط وياها صارت تتصل اصلا خليته صامت
اتمددت بالغرفه نمت ما كعدت اله الفجر صليت ورجعت اتمددت صارت الساعه بثمانيه نزلت اتريگت
وخابرت ام غانم
:: الو
- - هلا خويه هلا بيك
:: جاهزه
- - اي ان شاالله
:: تمام من ارمش عليج اطلعيلي
- - ليش ما تجي تتريك ونطلع
:: لا ام غانم سبقتج ياالله شويه واوصل
وصلت رمشت هي طلعت صرت اسوق وصرنا نسولف بمواضيع عاديه ع الشغل وع الكاع ردت ننزل نتريك
بس هي ما قبلت گالت // ما اكل شبعانه انت انزل اذا جوعان
جاوبتها :: انا متريك
اخذت الها جاي وانا اخذت كهوه فتحت باب السياره :: انزلي حركي رجليج
نزلنه يم السياره اتنفست بعمق وحجييت :: ام غانم شو لا سالتيني ولا عتبتي عليه
رفعت راسها // عليش عاصف على عرسك لو على ظلمك لليتيمه
اتحسرت. //. ردت اعاتبك واحاجيك بس ادري راح اتكلي الي اسبابي ولو ما عدك اسباب هم محد يطي بروحه
:: شلون يعني ؟
امل // يعني عاصف محد يطلع روحه غلطان وهلماحاجيتك المصيبه اثنينكم اعزاز انت اخوي الما انسى فضله
على ابوي وعلى امي وعلينه ولو ننطيك ماي العين ما نجازيك وذيج بت اخوي طفله ويتيمه وشافت مصايب وعاشت بضيم
حسيت بعبره بكلام امل نفخت دخان الجگاره //. اموله يوميه خابريها واساليها اذا محتاجه شي گليلي
امل // عساك سالم انت رجلها وهي مسووله منك بس اگول عاصف
:: كولي ام غانم
- - انت راح اتبشر بحبالتها
:: شقصدج
- - تكول
:: انتي شتشوفين
- - انا اشوف نسكت وما نجيب طاري الكل احد يبقى بينك وبين روحك على ما الله يطيها ايده وذاك
الوكت يصير خير
:: جنج بكلبي انا هم هيج اكول
- - ادري بيك كل شي تعرف وتحسب الف حساب
:: بس امي امل امي هي المدولبتني
هزت راسها // ميخالف وحتى انا من اجي راح اقلل واكثر عليك مو تزعل
سالتها :: ليش
- - احسن ما تدري شني بضمير الثاني
:: هذا هو ما ازعل انتي وامي تمونن
- - الله كريم لابد الها حل
ادري باامل تريد تسالني عن السبب بس هي ارتأت تسكت لان تدري انا ما راح اگول
واصلنه سفرنا الى ان وصلنه البيتهم نزلت واجه عليه ابو غانم وغانم نزلوني وانا جاوبتهم
:: تعبان اريد اروح ارتاح
همه ما قبلو ابو غانم // وين رايح غداك حاضر
غانم // خالي ذبحتلك هرفي يلوك الحلكك
ابو غانم //. انزل يخوي من زمان ما شايفينك
نزلت يمهم وامل راحت جوه يم بناتها صبو الغدا وابو غانم گل الابنه // فووت صيح الامك خلي تجي ويانه تتغدا
اجت امل بيدها دولكة لبن غانم يكللها// يمه ابوي مشتاقلج تكعدين تاكلين ويا سوا حجته خالي
يكلي صيح لامك خلي تجي ويانه تاكل خالك مو غريب
امل // وانا شعدي غير ابوك.
:: الله يخلي خيمه فوك روسكم
ابو غانم // تعيش الله يحفظك
صرنا ناكل وبعدها جابولنه جاي. شربنا وگفت كلت :: ياالله اسمحولي دايم البيت واهله
طلعت وطلعو وراي سلمت عليهم من ركبت حاجيت امل :: ام غانم عود خابري وجدان
هزت راسها //. ان شاالله بدون ما تگلي وانت هم روح وانشد عليها واتحملها تره المره اول حملها ما تنجرع
وتضوج من كل شي وتصير عصبيه
:: اي ان شاالله اروح انشد من بعيد لبعيد بعد انتي شفتيها
- - حكها عاصف لا تلومها
ركبت سيارتي ورحت للبيت طبعا التلفون ما شفته مخلي صامت دخلت للبيت وصلت الغرفة امي
شفتها كاعدهمتربعه على حربايتها وبيدها السبحه :: الله يساعدج يمه
نفس ردها وزعلها وبرودها // هلا الله يساعدك
بست راسها :: اشلونج يمه
- - نعمه الله يسلمك
:: شني يمه ما تنشديني وين رحت وين اجيت
حركت اديها // شلي غرض كلمن بكيفه اليطلع واليدش
:: هاي جديده كلمن بكيفه
رحت سديت باب غرفتها واتمددت على جرباية وجدان امي گالتلي // كوم شعدك ظال اهنا
:: تعبان اريد انام شويه
- - روح الحجرتك والمرتك
:: مشتاقلج اريد اظل اهنا
- - وانا ما اريدك
اتمددت على الجربايه وخليت ساعد ايدي على عيوني ما كدرت انام درت على صفحتي نمت ما حسيت
اله على صوت رقيه تحجي بعصبيه // هاي انت اهنا وانا ما خليت مكان ما دورت بي عليك
امي // على كيفج حبوبه بدل ما تدورين بكل مكان تعاي وشوفي اهنا تره هاي الحجره بس تنزلين الدرج
- - ما ادري بي نايم اهنا كل مره يجي يسلم ويطلع
امي باستهزاء // سمعت عاصف لازم تخسر المرتك جيفن نمت اهنا وفرد نوب من تطلع وترد اطيها تقرير
كعدت اتثاوبت // يمه مشتهي چاي من ايدج
نزلت امي // ايي هسه اسويلك
طلعت امي ورقيه واكفه متخوصره :: روحي اصعدي فووك ولا تنزلين
ردت بنفس العصبيه :: تره ما ميته على النزله بس اجيت اشوف رجلي وين جان وليش من اجه ما صعد فووك
عضيت شفتي عضه بسيطه :: هو مثل ما كالت امي منا وهيج اطيج تقرير وين اروح ويمته اردن
ويامن امشي وعليمن اسلم
راحت رقيه وامي جابت الجاي وهي تكول // الامر لله انا منين بيه حيل وانت تامر عليه
ابتسمت :: بيج حييل حجيه بس لو ترضيين عني
- - اشرب جايك وروح يم مرتك
شربت الجاي وصعدت فووك دخلت سبحت وغيرت ملابسي ورقيه تباوعلي اريد اطلع هي صارت گدامي
- - وين وين طالع
:: ميلي عدي شغل
- - اي اكعد تلحك ع الشغل
:: اكلج شويه اريد اروح اشوف المزرعه
- - وانا ما اخليك
:: ليش شعدج ؟
رقيه // شني ليش تطلع الفجر بدون محد يدري بيك وترجع تنام يم امك ما جنك متزوج وزوجتك
الها حقوق عليك
:: انتي كلتيها انا حرامي
هزت راسها // اي وارد اكولها انت حرامي بكت كلبي وعقلي واحوالي
:: وهسه شتردين
- - اريدك
:: عندي شغل
خلت اديها على ركبتي // وانا هم عندي شغل
2
اخذتني الغير عالم حب وتفاعل ودلال نسيت بلحظتها حتى تجاوزها واغلاطها وهم اعرف رقيه
تسوي هالشكل مو بس لان تحبني لا وهم حتى تنسيني وجدان بقيت ما طلعت لليل سبحت
ونزلت يم امي لحكتني رقيه // حبيبي شمشتهي تتعشى
:: اي شي لان مثكل بالغدا
- - تدلل وانتي جده شتحبين تتعشين
- - الموجود نعمه
من راحت للمطبخ سالت امي // يمه شلونها رقيه
- - ليش شبيها ؟
:: اكول انتي راضيه عنها هي گايمه بواجبج
امي حركت ايدها تريدني اتقرب منها // شوف عاصف الرجال ياخذ اثنين وتلاثه واربعه بس هاي الفرخه
لا اريدها ولا ارضى لا عليها ولا عليك
:: ترديني اطلكها
رفعت اجتافها // بعد انت بكيفك
:: واخذ خطيتها
- - مثل ما اخذت خطية ذيج اليتيمه
:: ذيج اليتيمه من ايدها ورقيه ما اعوفها ولا اطلگها
- - خووش چا انا امشي البيت مهدي لو اكعد عد بهاء همه اولى بيه
نفخت :: يمه ليش كل ما اجي نفس المواال هذا بيتج بيت ابوي غازي
- - چا من كون تريدني اظلن مالك غرض بيه لا بكلي ولا بدواي ولا بمصرفي
عرفت العناد الي عد وجدان وراثه من امي جاوبتها
:: انا ما الي منيه عليج كاع رجلج وعايشه من خيرها ومو كل ما تشوفيني كاعد ومرتاح لازم نفس الربابه
حاجتني بعتب //. خلف الله عليك هسه صار حجيي ربابه كووم عاصف بعد لا تجي ولا تمرني
اتقربت اكثر :: مو بكيفج اجي واگعد وحتى انام بحضنج
- - شبيك شو من تحچي مقهور ودايخ
شعلت جگاره سالتها :: ما ترحين البت ابنج ؟
- - لا ما اروح
:: ليش مو هلمحاربتني على مودها ؟
امي // محاربتك على مود روحك وياالله روح يم مرتك اتعشى
:: انا ما يحلالي اكل اله وياج
- - روح عاصف انا صار كلامي ربابه
:: خصم الحجي حجيه وحتى اريحج ولا تظليين تاخذينها وتردينها رقيه مرتي مثل ما وجدان مرتي
لا هاي اطلكها ولا ذيج اطلكها
اجت رقيه // حبيبي اجيبلك العشا اهنا لو بالمطبخ
:: يم امي وين ما تريد تاكل اكل وياها
- - ها جده اجيبلج العشا اهنا
— - اي جيبي
راحت جابت الصينيه وخلته كدامي ورجعت جابت الجاي وكعدنا تلاثتنا ناكل اتعشينه وشالت الصينيه
ورجعت اتصب الجاي اجت فرح ورجاء وراهم اجت نهاد ومهدي وبناته دخل مهدي سلم
- السلام عليكم
:: عليكم السلام
- يمه اشلونج
-هله بيك
نهاد // عمه شلونج
- بخير
فرح // شلونك بابا
:: الحمد لله
رجاء// شلونج عمه
- - الحمد لله نعمه بخير
رقيه تسال بمهدي // متعشي لو اصبلك
- - لا اتعشينه
- - زين خلي اصبلكم جاي
نهاد // عوفي انا اصبه روحي ويه فرح وهاجر
امي سالت // چا فرح وين راحت ؟
رجاء // عمه جاي تغسل المواعين
راحت رقيه هي وهاجر صعدن فووك ولحكتهن فرح
صرت اسال بمهدي ع الشغل وهو يكلي مثل ما امرت سوينه امي سالت مهدي
- - اكلك مهدي جا وين اولادك ليش ما يجون
- - يمه بالبيت
- - ليش هاي شكد ما شايفتهم
- -حجيه يستحون
- - منين يستحون
نهاد // من مرت عمهم
امي // ها جا خلي يجوني اشوفهم شو مرت عمهم صعدت هي وحبايبها فووك عود ومن تنزل تلبس الها حجاب
مهدي // يمه باجر اخليهم يجونج بالمضيف تگعدين يمهم وتشوفينهم براحتج
امي // جا خوش طلعت تعرف بالاصول
مهدي يحرك بايده // ليش يمه شبيه انا
- - مابيك شي بس اتذكر شسويت بوجدان جيف نكلك اگعد بالهول انت والولد نسيت مهدي يو اذكرك
ما جاوبها هي سالته // ها مهدي شو سكتت
نهاد // عمه ذيج بتنه ونمون عليها هاي البنيه غريبه وزحمه
- - الزحمه كون البشر يستزحمها من الله وتالي من ابنادم
مهدي // وهسه هي شعوزها بت ابنج شو ابغداد وعايشه احسن عيشه
امي رفعت ايدها بالدعاء // ان شاالله احسن عيشه بس خليها ابالكم الله يحاسب ويبين الحوبه
مهدي // يمه ياحوبه اتدعيين عليه على مود بت سعدي
- - لا ما ادعي اذكر بت سعدي ما شافت كل شي عاشت بلكمتها من غير الغلط والمسبه تكرب كرب
المعزايات ومحد راضي عليها وتروح مشي اتاني الخط وكله ساكته ومن تغلط عليها لو من اتطكها لو من
شككت كتيباتها وخليتها تعوف الها سنه
رجاء // اليسمع عمتي يكول انا گاعده وساكته
- - لا ما كاعده تطبخيين بس ولا مره شفت فريحه ساعدتها لو غسلت الها استكان هسه رقيه تصعد ليفوك
وهي تظل تغسل المواعين وتالي تروح وراها سوالف وضحك
نهاد // كون بخت نا من بختها
- - ان شاالله بختها يعثر كل واحد يحفر وراها
طلعت بره ولحكني مهدي وهو يسالني // امي شبيها
:: شمدريني انا ما جنت اهنا
- - جا هي اليوم من عرسك امي مو الاوليه
بقيت ساكت ومهدي راح هو ونهاد ورجاء البيت بهاء وانا ظليت كاعد بره اكثر من ساعه الى ان طلعت
فرح وهاجر وذهب شافني اجن يمي هاجر كالت // تصبح. على خير عمي
:: اجمعين
فرح // تصبح على خير بابا
:: اوكفي رايدج
- - ها بابا
اشرت الها تگعد ع القنفه البره :: اكلج فرح اتذكرين اول يوم اجت بي وجدان لهنا
- - يمته ؟
:: من جبتها هي وعلاوي من بغداد
- - ايي اتذكر
:: تتذكرين من احنه كاعدين بغرفة حبوبتج وانتي اجيتي تبجيين
عكفت حواجبها // ها
:: ليش مستغربه اجيتي تبچيين گلتي ابوي بعد ما يحبني وجدتي بعد ما تريدني
ابتسمت // اي بابا شذكرك بيها
:: الذكرني هسه حبوبتج الوحدها يعني ما يروح منج نص من تباتين يمها بالغرفه. شو كل شي بيها موجود
- - بابا متعلمه على غرفتي ابحدي بعدين انا من حجييت جنت زغيره واغار
:: فرح انتي تحبيين وجدان
هزت راسها // ليش الجذب اكرهها و كرهتها اكثر من خذتك
:: ورقيه ؟
جاوبتني بثقه وهي تبتسم // احبها حبابه وخفيفه ع المعده مو مثل وجدان متكبره وشايفه روحها
ياالله حبيبي تصبح على خير
ما استغربت من رد فرح ولان ادري تكرهها وادري هذا كله بسبب رجاء
راحت فرح وانا دخلت للبيت طليت على امي لكيتها متمدده على جربايتها اتاكدت يمها ماي وبستها وطلعت
صعدت الغرفتي سالتني رقيه //اتاخرت حبيبي ؟
:: ما اتاخرت انتي الي ما مكفيج البيت شكبره مسويه الغرفه صاله الج والصاحباتج
- - شنو زعلان لان بتك وبنات اخوك اجن يمي
:: لا ما زعلان بس المفروض تكعدن جوه بالصاله
- - الحجيه تضوج وتصير تحجي عود مره ثانيه من يجن نكعد بوحده من الغرف
استمريت يومين اهنا وخمس تيام ابغداد كاعد بفندق مرات اروح الاكي علي من يحل من المدرسه
انطي مصرف وارجعه للبيت
ومرات من تطلع اجي يم ابو يوسف الي فد يوم سالني // ليش ما تدخل للشقه مثل قبل
جاوبته :: طالبه مني الطلاك لان اتزوجت عليها
- - وانت ؟
:: انا ما اطلك
ابو يوسف رد // عمي لا تزعل مني مرتك بنيه مودبه وبت اصول وصاينتك وانت تحبها وما تريد تطلكها
ما تكلي ليش اتزوجت عليها
هذا السوال الي اي واحد ما قابل على زواجي ايساله الي وانا ابقى ساكت ما اجاوب
كنت مرات اراقب وجدان من تطلع من الدوام او من تداوم الصبح الي عجبني بيها انو وجدان ما فد غيرت
ستايل لبسها لو حجابها نكايه بيه او بس حتى احجي او الفت نظرها حالها حال باقي النساء الي تزعل
من زوجها او الي تريد تتطلك منه وجدان بقت نفس ما هي بنيتي الي ربيتها والي اعرفها
رجعت للناصريه وصلت الظهر لگيت امل وانصاف عدنا بالبيت انصاف ما شايفها من يوم خطبة فرح
وبعد گطعت حتى ما خابرت امي ولا تسال عليها عرفتها زعلانه
دخلت وسلمت على امي امل وكفت وانصاف بقت كاعده حتى ما ردت السلام حاچيتها
:: شني ام احمد زعلانه عليه
ردت وهي مدنكه // عليش ازعل بس انت ملتهي ما ادري بيش اظنك ما تريدنا نجي
:: لا شني ما تجن بيت ابوجن( باوعتالامل ) شلونج ام غانم
- - هله خويه ومرحبا
حجييت بصوت عالي :: تعاي رقيه وينج
طلعت من المطبخ // هاي انا
اجت لابسه برموده نص ردن وهي مبتسمه // هلو حبيبي الله يساعدك
باستني گدامهن وهي تگلي// مشتاقتلك
بصراحه خجلت من تصرفها كدام اخواتي هي ردت // ها عاصف شنو رايد
:: اريدج تدخلين المسواك (باوعت الامل ) ام غانم انتي فوتي دخلي المسواك هاج السويج
رقيه // ليش انا ادخل المسواك خلي ام غانم مرتاحه
امل // تطلعيين هالشكل بهذا لبسج ؟
ردت بتحدي // ام غانم انا ابيتي والي مطلق الحريه شريد البس
امل // اي محد مانعج بس بيتج فووك يم رجلج اهنا بيت امنه وعد ها ولد والولد عده اولاد ومرات يجون
ولد عمنه وما تطلع الهم بالمضيف ومرات يجون ولدنا اولادي واولاد سعاد وانصاف ورجاجيلنه وعيب
يشوفون مرت عاصف هيج لابسه لو تخليلج عبايه تلبسينها لو تلبسيلج دشداشه عريضه
ردت باستخفاف // دادا ام غانم ليش ما خذات من عندي موقف
امل ردت باستهزاء وهي تباوعلي // اصعدي حبابه حضري الرجلج هدوم وحمام جاي تعبان من السفر
امل راحت تنزل الغراض وهي صعدت وانا كعدت يم امي وانصاف الي بقن ساكتات حتى ما سالني على وجدان
اجت امل // هواي جايب عاصف
:: بعد انا متعلم وهم من اروح ما اريد يعوزون شي يمه شسويتن غدا للبنات
- - وصيت جابر يشوي سمج
:: بس سمج طبختن مرك تمن
امي // ياهو اليطبخ انشد مرتك
طلعت كعدت بالصاله واسمع امي تكول // طبختن سويتن شو كبل انت تامر سوون هيج حطن هيج
انصاف // جا يمه انتي ليش رضيتي
امي بنتر // خيبه هو منو درى بي ورضييت خاطب وعاقد وعاد الحاضر والغايب وبيوم عرسه گالي
اجت رجاء // وينجن بنات
انصاف // هلا بيج ام بهاء اتفضلي
طلعت انصاف وهي تباوس برجاء الي اتگلها // مهدي كايل النهوده جايات وهي خابرتني
انصاف // هلا حبيبتي شلونج
- - الحمد لله چا وين رقيه
- - اجه رجلها وصعدت
امل // انا گايمه اطبخ تمن واسويلي مركه
رجاء // اك عدي اموله انا اطبخ بس اليوم اتعطلت على عمتي ابدير بس يبجي
انصاف // يمن فدوه الاسمه ليش ما جبتي اشوفه
- - بعد شويه نلتم كلنه وتشوفينه
صعدت فوك لكيتها كاعده وتسشور شعرها اما اللبس فما احجي عنه بس شافتني عافت السشوار وحضنتني
- - مشتاقتلك هوااي
:: اسمتي ولا كلمه انتي فد وحده
خلت ايدها على حلكي //. هسه لا تحجي بعدين حاسبني عاقبني هسه انا هواااي مشتاقتلك
نمت وياها وقبل ما ننزل للغدا حاجيتها
:: ما ادري رجاء يوميه تجي وتطبخ
- - ليش مو تشوفها كل ما تجي يمنه
: اي يم امي لانهي متعوده عليها اهنا
- - وامك ما يعجبها تاكل اله من ايدها طبخ عمه رجاء يخبل
:: مره ثانيه من تنزلين البسي لبس محتشم يعني دشداشه طويله وردن وحجابج على شعرج
- - عاصف الصبح محد يجي ف انزل هالشكل
:: يصدف مهدي واحد من الولد
- - ما جنت تحجي بس من امل حجت
:: لان ولا يوم شفتج بلبس مو محتشم شنو انتي اشايفتني احد ايمشيني
- - ما قصدي شي بس ما اعرف امل وانصاف احسهن ما يحبني وحتى الحجيه
طلعت بدون ما ارد عليها كعدت بالصاله صليت وبعدها صبو الغدا مدو السفره واجو بيت مهدي والولد
جابو السمج وامل ورجاء طابخات التمن ومرك الباميا وكلنه كعدنا امي بين مهدي وبيني واجت رقيه
كعدت يمي والباقي اتوزعو صارو ياكلون ويسولفون اله انا وامي ساكتين بعدها شالو المواعين وراحت
رقيه وفرح وهاجر يغسلنهن وامل جابت الجاي
شربت وصعدت للغرفه وراي رقيه نمت من التعب كعدت العصر رحت للبستان واشوف الزرع توه مسنبل
مريت ع البحيره جبت الها دوه وطلعت شفت جابر بقيت ويا گاعدين رحنه للبيت الي جاي ابني جان
بعيد شويه عن بيوتنا بعده ما كامل جابر كلي //. ياالله عاصف امشي وياي نصلي وشوف شتسويلنه
ام مصطفى عشا
:: لا يخوي شبعان حدي
جابر // ادري حتى احنه هم شوينه سمجه بس امشي نتعلل انت تروح هناك شتلكى بس مهدي حجايه
بعفج وحجايه بديالى
:: ههههه
رحنه صلينه وكعدنا بره انتعلل وام مصطفى خبزت خبز بتنور الطين انا كتلها نريد لبن وخبز حار
هي جابت دولكة لبن وخبز وخيار وطماطه وصرنا ناكل انا وجابر بعدها جابت النه جاي
رقيه عرفت طريقتي ما صارت تتصل وصلت للبيت اجيت يم غرفة امي امل گالت
- - ما دام عاصف مو اهنا ومحد يمنه مهدي خويه اريد احجي وياك بحضور امي ومرتك
مهدي // خير شكو ياستار
- - هي الحجايه مو يمك بس لازم تدري بيها مو باجر تكول محد كلي
نهاد // شني امل شصاير
- - مهدي انت هم تدري ابت اخوك
- - ياهي ؟
- - وجدان
- - شبيها ؟
- - عاصف من يوم العرس لا مار بيها ولا شايفها
مهدي // ياهو كالج ؟
- - انا كبل لا اجي رحت مريت عليها صار تلث تيام البنيه هي واخوها الوحدهم
نهاد // شني اندليتيهم
- - رحت البيت كريم وهمه دلوني اجرولي تكسي ما رضو يجون
نهاد // يا يا شبيهم انوب ذوله
امل // ما النه غرض مهدي هاي البت دمك ولحمك عاصف ما يريدها خلي ايطلكها
مهدي // مرته ولا شاكيه عدي شلون اگله طلكها
امل // الزلمه من اخذ هاي الفرخه وكبلها بشهر اكثر ما مار بيها وحتى مصرف ما يوديلها
نهاد // ليش منين تصرف ؟
امي // راتبها وراتب اخوها تقاعد ابوها
مهدي // جا يمه انتي مو تقبضينه
- - رديته الها كبرت
امل // وهمزين يمه رديتي الها عاصف لا بمصرف ولا بمره وكل شي ماكو
مهدي // هسه شتردين امل
امل //. انت عمها احچي ويا
- - شكله ليش ما تروح المرتك
امل // اي ما بيها شي وكله البنيه هم الها حق عليك
مهدي // امل ذاك اخوج وكليله احنه ياالله ياالله خلينا يرضى ويانه وكله من حدر راس بت اخوج الفقيره
- - مهدي الفرخه بت اخوك دمك ولحمك وغصبا عليك ملزومه بيك
- - لا انا من البدايه تبريت وتالي هي اخذت عاصف هو مسوول عنها
امل // جا يمه انتي احچي ويه ابنج
امي // لا ما احچي متانيه يكمل بيته ويشيل واجيبها هي واخوها يمي
امل // اي بكيفج انا كتلج حجيه وانتي بكيفج
نهاد // جا هي مو تدرس
اناف // شجاب الدراسه ع العيشه على مرت رجلها عليها
امي // رجلها سيس ومحد درى بي
امل // يمه تكسر الخاطر خطيه
امي // شمدريني عبالي ابني يحفظها ويداريها
نهاد // عمه شني عجبه الزلم تاخذ اثنين وتلاثه واربعه
امي // جا خوش مهدي ازوجه وحده ثانيه
نهاد باستهزاء// هههههه. تنشدي يكدر ياخذ عليه
- - ها يمه مهدي شايفتلك بنيه وزغيره وثني مثل عاصف
مهدي // لا حجيه خلي اكدر ع العدي واربي فروخي وهنوب اخذ
انصاف // خصمها يمه اسكتي
حمحمت ودخلت :: ياالله
مهدي // فووت عاصف
:: السلام عليكم
- - عليكم السلام وين جنت
:: يم جابر خير
- - كل الخير تانيناك ع العشا وانت ما اجيت
:: شني وين البنات
امي // بعد وين. قابل بالحصاد فووك
ام غانم // اريدلي استكان جاي
- - تدلل
/////////////////////
وجدان
بعد ما فهمته انو اني ما اريد اشوفه واكرهه هو طلع واستلمتني عمتي امل رزاله وبعدها دزلي
مسج وحجى وياي انو هو غصبا عليه راح يكون مسوول عن علاجي لان اني حامل باابنه
استوقفني جمله كالها الي بعد ان كتله اني الي ابطني ما اريده واتمنى اتخلص منه هو رد عليه
اموتج وما يرفلي جفن
عرفت بان هذا الي ابطني ممكن عن طريقه اتخلص من عاصف واحصل الطلاق
يعني طلاقي مقابل ان انطي الطفل
وقررت انسى عاصف واحذفه من حياتي وانو كل الي يربطني بي هذا الجنين الي بين احشائي
وبمجرد ما يجي للدنيا راح انطي اله بمقابل طلاقي
وقررت لازم انتبه النفسي واخويه ودراستي واحسب عاصف كابوس مر بحياتي وخلص اتخلصت منه
وبيوم الي يريد يمر على عمتي اني ودعتها ورحت للدوام وكتلها عمه سدي الباب وراج حيل
وصار كل همي ادرس وعلي هماتين يقرا ويروح ايجيبلنه الاشياء الي نحتاجها
وبهاي الايام عرفت انو هو ما يهمني ولا حتى اني اهمه بشي
هو عايش حياته وبعد ما اتصل ولا دز مصرف واني نفس الشي صحيح مرات اتذكر اشياء
غصب عني تمر عليه لكن بسرعه احاول احذفها من مخيلتي
لكن صار وياي شي ما متوقعته
الي صار يوم عن يوم اتعلق بالطفل الي ابطني خصوصا اول حركه اله صدكوني بجييت واني
دا احس بي يتحرك كانما ايگلي
ماما اني يمج صرت افرح من يتحرك الزم بطني ما اوصف الشعور الي اني دا احسه
ام كرار داىما تجي وتسال عني تكعد ساعه وتروح وبهاي الساعه تجي تطبخلي شكم اكله لان
تعرف اني ادرس
وعمه امل يوميه تخابرني وتجيني كل شهر تاخذني للطبيبه طبعا هو يكون موجود حتى يطمن على حال الطفل
منتبهه النفسي والاكلي واخذ العلاج بوقته
علي كمل امتحان واعرف يتمنى يروح البيت جدي لكن اني فهمته انو بعد ما يصير يروح لان عاصف
اتزوج وزوجته موجوده فاانت ما راح تاخذ راحتك لان اكيد راح تنحرج من وجودها وهي تنحرج من وجودك
خابرت ام كرار وطلبت منها انو علي يجي يمهم يومين تلاثه يغير جو وهي رحبت وكالت انتي هم تعالي ويا
اني اتشكرتها واعتذرت لان لازم ابقى اقرا امتحاناتي ع الابواب
وبدت امتحاناتي وبطني صارت تكبر وهنا انتبهن عليه بنات مدرستي واجن سالني
جاوبتهن باقتضاب ما يخلو من الخجل = اني اتزوجت بعطلة نصف السنه وحملت
استغربن ليش بلا حفله ولا عزمتهن ولا حتى خبرتهن
رديت = اتزوجت ابيت جدي بالناصريه وما حجييت لان استحي
ومشت اموري واني ذابه نفسي ع الدراسه مرات احس بدوخه ومرات بتعب لكن اكول كله ينتهي مجرد وقت
وكملت امتحانات الحمد لله وصرت منتظره النتيجه طلعنه انا وعلاوي الي نجح وراح للمتوسطه
رحنه نتمشى ونغير جو ودخلنه مطعم ورجعنه واني شويه مرتاحه وثاني يوم طلعنه رحنه البيت ابو كرار
بقينه عدهم لليل ورجعنه عمو كريم
وهالشكل عشت حياتي لا هو يسال علينه ولا اني صرت اهتم الوجوده
اجت عمه امل شافتني وصارت تبوسني وهي تكول
فدوه صايره تخبليين
ابتسمت = عمه لان كملت امتحانات
رفعت ايدها بالدعاء // ان شاالله تنجحين
= الله يسمع منج
- - وشلونج ويه الحمل
لزمت بطني = الحمد لله
ثاني يوم رحنه للدكتوره هو موجود من شافنه اجه سلم على عمتي وسلم على علاوي واني دايره
وجهي ولا كاني اشوفه وهو نفس الشي دخلنه ع الطبيبه فحصتني وشافت بطني وسالتني على
حركته بعدها سالتني كالت تردين ترحين للسونار
لا اراديا هزيت راسي بالنفي سالتني ليش
= ما اريد اعرف جنسه
- - لويش ؟
بقيت ساكته هي ردت // افتهمت
طلعنه وكالت // الحمد لله امورج زينه طفلج زين تبقيين ع العلاج
هو رد :: دكتوره ما تودينها سونار
- - لا ما يحتاج بالوقت الحاضر امورها كلها عال العال وما شاء الله هي ملتزمه بالعلاج فما تحتاج السونار
صارت تكتب علاج // راح نكتفي بهذا العلاج وما اوصيج الاكل الصحي
هزيت راسي = ان شاالله
- - ما اوصيج تنتبهيين الصحتح ما اريد توتر والحمد لله سادس وامتحنتي
= دكتوره بعد النتيجه
- - ابد لتفكرين بيها انتي بطله وامتحنتي وشنو ما تجيج النتيجه والمعدل هذا هو
ابتسمت وحاجيتها = جاي تنطيني جرعة امل
- - لا مو جرعة امل هاي حقيقه لازم الكل يعرفها روحي جيبيلي العلاج وتعالي
طلعنه وعمه تضحك اتكول // من تكليلها جرعة امل ردت ا كول هاا
ابتسمنه راح جاب العلاج اريد ادخل لان السكرتيره كالت منو عنده علاج هو يريد يجي وياي اخذته منه وكتله
= ماكو داعي هاي بس اهل العلاج يدخلون
دخلت والدكتوره اشرت على العلاج وكالت // شهر القادم اشوفج
طلعت ورجعنه ويه عمه الي كالت // ما تردين شي اجيبلج
= لا عمه ما اشتهي اريد ارجع ارتاح
من رجعنه بالطريق شاورت عمتي الي طلبت من السايق ايوگفنا يم كشك يبيع فلافل والسايق
ما قصر كال هذا احسن وانظف واحد بالمنطقه انطته عمتي فلوس ونزل جاب النه ورجعنه للبيت
وعمتي انطته زايد على كروته دزينه علي يجيب ببسي وصمون حار
اتعشينه واني جاي اتصفح بالنقال لمن ما كتبو الان ترفع درجات السادس الاعدادي
لفرعيه العلمي والادبي
صرت ارجف وكلش خفت اصلا ما كملت عشا وعمتي من عرفت صارت تدعي واني ابد ما حصلت
ع الموقع لان لوود كلش قوي
بقيت الليل كله ماكو نتيجه ادخل البيانات وماكو تقريبا الساعه تسعه الصبح اندك الباب عمتي نايمه
كلت منو
ابو يرسف رد // عمو اني افتحي الباب
خليت الشال على راسي فتحته شفت عاصف بوجهي وهو يگلي :: صباح الخير
دخل بدون استئذان باوع شاف عمتي نايمه بالصاله كال
:: اموله امل شو اكعدي
هي كعدت وحاجته بنعاس // هلا خويه صباح الخير
:: باركي البت اخوج نجحت وجابت معدل 81
صرت عبالك سعفه بس ارجف انربط الساني وعمتي تكول // صلوات على محمد وآل محمد گلللللللووش
هو عيونه يلمعن وجهه مبتشر وهو يگلي :: الف مبروك تستاهلين
حسيت على نفسي گعدت بزاويه باب المطبخ وعيوني انملن دموع ما اعرف شجاوب اخيرا نجحت اخيرا
عمتي اجت يمي وحضنتي // حبيبتي عمه لا تبجيين الله ما ضيع تعبج ولو ما الحمل يجوز جبتي اكثر
اتحسرت وكالت وهي تباوعله// ولو ما صار الصار يمكن هسه انتي جايبه الميه بس شنكول الحمد لله والشكر
بقيت صافنه ما احجي عمتي لزمتني من ايدي // احچي لا تسكتيين
جاوبت بعبره = اريد اروح الامي
هو رد :: ياالله بدلو خلي نروح
استغربت كلامه عمتي اجت يمي وتبتسم متامله // ياالله عمه بدلي وخلي نروح
= لا ما اروح ويا
عمتي // شبيج حبيبيتي
= ما بيه شي بس ما اروح ويا انتي اخذيني
نفخت وگالت // استغفر الله
رد :: بدلن راح ااجر تكسي واجي وياكم اتصور هذا الشي ما يضوجج ست وحدان
طلع وعتي نترت عليه // عمه شبيج شجرالج
= ما اريده لا يجي ولا يروح
- - والله من شفت الفرحه بوجهه كلت راح تتصالحون
رحت بدلت وهو غاب يمكن ربع ساعه ورجع طلعنه اني لبست كيلوت وقميص وعباية راس
وما اخذت اي شي وياي ركبنه انا وعمه وعلوش وره. وهو ركب ين السايق
اني ركبت ورا وعمتي وره السايق مره هو بالنص مره يغير مكانه اتصلت ام كرار وهي فرحانه وتباركلي
واتصلت خاله شيماء
وعمو ابو كرار
ارد عليهم بهدوء وكلهم يسالوني شنو قراري بالتقديم واني ارد بعد افكر شويه
هو طلب من السايق يتوقف حتى ننزل نتريك وكف يم مطعم دخل هو وعلي قبلنه واحنه وراهم علي رجع
( ) تعالو اهنا
كعدنا بس انا وعمه وعلي عمتي سالته// علاوي جا وين عمك
( ). يتريك ابحده
- - لويش ؟
(. ) يكول حتى تاخذون راحتكم
دز صينية مشاوي وجاي وجبن يعرف بيه احبه اكلت شويه وبعدها كملنه طريقنا وصلنه الكربلا مثل كل
مره زرنا ودعينه وصلينه وبعدها واصلنه سفرتنا للنجف وهناك اخذنا النفس الفندق حجز الي والعمتي ويانه علاوي
وهو اخذله غرفه ابحده
كال :: غسلو وارتاحو وبعدها نزور
غسلنه وارتاحينه وبالليل رحنه نزور ورجعنا اتعشينه ورحنه للفندق رغم عمتي اتوسلت بيه حتى نتسوك بس اني تعبت
هي اخذت علي وراحت واني بقيت بالغرفه واعرف بي هو هم موجود وبكل حركه عبالي اجه لكن هو ما اجه
الصبح رحنه للمقبره واني وصلت يم قبر امي وهناك صرت ابجي واعاتبها على حالي
كعدنا ساعه وراها عمتي اجت وكالت // ياالله يمه گومي الشمس والحمل مو زين عليج
ركبنا بالسياره ورجعنه حتى بدون ما يزور اهله
الطريق كله ساكتين نزلنه اتغدينه بمطعم وبعدها واصلنه سفرتنا الى ان وصلنه هو راح واني اتمددت
بالصاله وعمتي سالتني // كون بيج شي
= لا عمه بس تعبانه
- - من كعد ت السياره روحي اسبحي واتمددي على فراشح
بالليل اندك الباب اجه ابو يوسف وجايب ويا علاليك كومه كال // الحجي خلاهن الكم
عمتي فتحتهن هو جايب فطاىر وىبيتزا من نفس المطعم ومشاوي وبركر عصاىر وفواكه بس جايب هواي
اندك الباب وراحت عمتي فتحته اجه ابو كرار وام كرار واولادهم طلع هو رايح وعازمهم عدنا
فرشنا بالصاله وصرنا ناكل كلنه سوا بعدها كعدنا وعلي ويه اولاد عمو
عمه امل سالتهم // شنو شلون عزمكم عاصف
ام كرار // خابر كريم كله ولو انت زعلان عليه روح البت اخوك احتفل وياها
كريم كال //. طلع جايب النه عشا
ام كرار /. عاد الشهاده ال الله عاصف هو بكل شي يفتهم بس هم خلي انعذره ضايج منا مرته
تريد تتطلك ومنا انت كريم ما تحجي ويا
كريم // وما احجي ويا اذا ما يطلك رقيه. ينسى عده ابن عم اسمه كريم
ام كرار // صارت امر واقع شنو يطلكها
كريم // لعد ليش من كتله خلي نخطبها الك كال هي بس وحده متربعه بكلبي لو اخذها لو اظل
بدون زواج ومن لحييت ياهي كلي وجدان تالي وجدان اخذها لا عرس ولا زفه ولا غرفة اخشاب
شو هب جب الولد اتزوج رقيه
ام كرار // كريم مو وكت هذا الحجي
كريم // يمته وكته هاا يمته
اندك الباب راح علاوي ويا ابن عمو فتحو الباب ابو يوسف كال // علي صيحلي احد جبير
راح كريم ورجع يكول // ظلمته العاصف داز كيكه
فتحناها كاتب عليها :: مبروك النجاح
وداز كيك انواع وعصاىر وحتى كرزات
خليناهن وسوالف وضحك بعدها عمو كريم سالني // شراح تقدميبن بابا
= بعدني ما مقرره اشوف
- - ان شاالله شنو ابالج قدمي
= اريد شي ايفيدني بالمستقبل
- - اي حقج بابا
راحو وعمتي بقت يومين اجه عليها غانم وراحت واني بقيت بالشقه منتظره التقديم وصار قراري اقدم تربيه انكليزي
او اداب انكليزي او ترجمه رغم مليت كل الاستماره بس خليت ابالي شنو ما يطلعلي اغير للانكليزي لان بهذا
الوقت اللغه شي مهم وايضا اكدر ادرس او اترجم او حتى ادرس خصوصي بالبيت
اتخطييت الشهر السابع ودخلت بالثامن. اموري زينه وصلت نص الشهر الثامن تقريبا الساعه 11 بالليل
كنت نايمه ع الجربايه حسيت گلبي يدك بوقتها نايمه على ظهري كعدت وكلبي عبالك مكينه
اتمددت على صفحتي ما كدرت كعدت على حيلي افترت بيه الكاع والنفس بي وما يضيق عليه
حسيت هذا الشي مو طبيعي صرت اخذ شهيق وزفير شهيق وزفير ريكي يابس عبالك خشبه
بحيث ما اگدر ابلع ريكي حاولت اتنفس لكن بدون فاىده
خليت التلفون بيدي وكلت اذا استمر البعد ساعه ما الي اله اخابر ام كرار
خصوصا واني قبل يومين يم الطبيبه وطمنتني
بقيت بنفس كعدتي الى ان هدات شويه اتمددت واحس اكو نغزه بكلبي ،
غفييت الصبح حسيت على علي وهو يكلي ( ) شعجب الهسه نايمه
فتحت عيوني = ما عندي شي علووش
( ) الساعه اهدعش
ابتسمت = عادي حبيبي اتريكت
( )لا ما اشتهي
= زين لعد هاك
فتحت الجراره = روح جيب صينية تمن وعليها نص دجاجه
، ) تمام
راح علي واني احس بنفس النغزه جاب الغدا بالكوه جبرت نفسي اكلت شويه والعصر اخذت اوراقي
ورحت اني وعلي وهو يسالني وين رايحين
الى ان وصلت الطبيب قلبيه حجزت يمه وبعدها حاجيت علي
= اسمعني علاوي البارحه كلبي كلش صار اياذيني واجيت لهنا اشوف شنو السبب اياني واياك احد يعرف
رد بخوف ( ) شبيج وجد ؟
ابتسمت = ما بيه شي بس اني لان حامل اجيت لهنا ماشي
(. ) اي ان شاالله ماكو شي
دخلت ع الطبيب وشرحتله الحاله هو اخذلي تخطيط قلب وطلب مني سونار واشعه وبعدها گلي
- - انتي هسه بنص الثامن يعني اتحضري بعد خمسه وعشرين يوم ولازم تولدين ونكمل الشهر الثامن
وناخذ فد اسبوع عشر تيام من التاسع
= ليش دكتور ؟
- - ما اكذب عليج انتي عندج تعب بالقلب بس صدگي مو شي خطير لكن احنه نخلي كل الاحتمالات
امامنه فبما انه انتي حامل فيفضل تولدين بعمليه
هزيت راسي // هسه بوجهج تاخذين كل هاي الاوراق والطبيبتج اني كتبت الج علاج تستمرين علي
حبايه قبل النوم وقبل موعد الولاده بيومين تجيني تمام
= تمام
صرفت العلاج ورحت للطبيبه كانت مسافه عنه من شافتني استغربت حجييت الها وهي شافت السونار
والتحليل والتخطيط وقرت الورقه الي كتبها الها هزت راسها وگالت
- - لا تخافيين وكلام الطبيب صحيح بعد. عشرين يوم او اكثر تدخليين مستشفى
وانا وهو نكون موجودين اهم شي لا تخافيين ولا تفكرين
= ان شاالله
- - مجرد ما ترجعلج نفس الحاله تراجعيين الطبيب تمام
= بلي
رجعت للبيت وره يومين اجت ام كرار وهي جايبه جنطه سالتها = شنو هاي
ردت // عاصف جابهن گال ملابس للطفل
= خاله اني ردت ادز عليج ونروح نشتري
- - ماكو فرق هذا ابو وفرحان بي
ما عقبت بقيت ساكته لان ما اريد احجي هي فتحتهن وكالت // جيبيلي جنطه او علاگه
= المن ؟
- - حتى احضر ملابس للطفل وانتي هم لازم تحضريلج ملابس احنه نحضر كل شي بجنطه بس
ندخل بشهر السابع
= اي اني مخيطتله بايدي شغلات ومحضره الي ملابس
- - دا تعاي جيبيها للجنطه وخليها كبال عينج
مجرد ما كملت عشرين يوم راجعت الطبيب ورحت الطبيبتي الي قررت بعد يومين ادخل للمستشفى
وصار لازم انطي علم وهنا فكرت اروح اولد ابحدي لكن اكيد لان عمليه يطلبون الزوج او الاب
خابرت عمتي امل وطلبت منها تجي باجر لان عكبه لازم اروح للطبيبه وهي خطيه اجت
دووم اسال نفسي عمه امل لو جانت تعرف بلي سوا ابويه هم تحبني هالشكل
وما كنت الكى جواب لان بيبي تعرف وعاشت كل الضيم والقهر الي سببه ابويه الها لكن رغم هذا الشي
اعرف بيها تحبني بس هم اعرف هي تحب عاصف اكثر
بتنا والصبح بالسبعه كعدتها هي اتفاجات شافتني مبدله سالتني // شني عمه وين رايحه
= عمه اليوم ادخل عمليات
ردت باستغراب // شني ؟
= مثل ما سمعتي وامشي للمستشفى ومناك خابري عاصف لان لازم يجي ويوقع
عمتي اتفاجات // انتي شتحجيين ؟
سولفت الها الي صار وهي لامتني ليش ما بلغتها وهم صارت تحجي عليه // الى متى تبقيين بعنادج هايه
حياتج هذا عمرج شلون تتصرفين مو بحدج
وصلنه للمستشفى طبعا اختاريت مستشفى اهلي لان اعرف بعاصف اول وتالي يحجزلي بمستشفى اهلي
عمتي خابرت عاصف وكان هو موجود بغداد وخابرت ام كرار الي اجت وما اتاخرت
اني اخذت فلوس من رواتب بابا واخذت العقد وكتلهم هسه يجي زوجي ويوقع
دخلت الغرفه متمدده على الجربايه وعمتي يمي مليانه خوف عليه لمن ما اجه عاصف وهو يسال بخوف
:: شكو ؟
عمتي ابتسمت بوجهه // ماكو شي خويه كلبها وجعها وراحت للطبيب وكللها لازم تولدين بعمليه
جاوب بذهول :: يمته ؟
امل //. هسه منظرينك اتوقع
حاجيته بهدوء = عاصف
اجه يمي فاتح عيونه يباوعلي شفت الخوف بوجهه كتله = اني راح ادخل عمليات وهاي الدنيا موت وحياة
ام كرار // لاتفاولين على نفسج كل الناس تسوي عمليات شنو عجبه
اتنفست بعمق = عاصف اريدك توعدني الطفل من يصير اذا اني ما موجوده تنطي الام كرار
تربي واعرف تحسبه مثل ابنها وعلاوي تاخذه يمك على ما يطلع هشام اوعدني عاصف
راد يحجي رفعت ايدي = ولو انت ما وفيت ب وعدك الي بس اريدك توعدني مثل ما وعدت امي
رد بهدوء وخوف :: مابيج شي تسوينها وتطلعين
= انت اوعدني
:: اطمني اوعدج
كلهم طلعو بقى بس هو اتقرب مني ابتسم بحزن
:: انتي ما بيج شي انتي دووم تتصرفين من راسج ليش ما خابرتيني
ردت احجي هو خله ايده على خلكي :: لا تحجيين اي شي المهم اريدج تطلعيين بالسلامه وتربين ابنج
وتكبرينه وتخلينه احسن واحد احسن حتى مني
اتقرب وباسني براسي :: كل الي صار بيناتنا تبقيين انتي اغلى شي عدي وانا خليني اولي (ابتسم )
المهم هذا البطل يجي ويحلي ايامج
= خابر بيبي خلي تجي
طلع وعمتي وام كرار اجني بعدها اجو اخذوني الردهة العمليات كان هو يمشي وياي اباوع بس
هو موجود الى ان وصلني للبوابه
فتحت عيوني شفته كاعد على كرسي اتنفست حجيت بتعب
= وين الطفل ؟
رد :: موجود
= راح تاخذه
:: مو انتي ما تردينه
= منو كال ما اريده جيبه خلي اشوفه
:: هسه انتي نامي
= وينه عاصف
ابتسم :: وداعتج موجود وما بي شي بس انتي ارتاحي
فتحت عيوني شف بيبي وعمه امل وانصاف وام كرار وعاصف جابت الممرضه طفل وكالتلي
هذا ابنج اليستاهل تعبج
خلته بحضني وسط صلوات بيبي وكل الموجودين وما عندي شي احجي يوضح مشاعري
شكرا لزيارتكم عالم روايات سكيرهوم
