رواية ناديه الفصل التاسع والخمسون 59 بقلم انين الليل

السلام عليكم 

الكثير دخل خاص وگلولي انهم يتخربطون بين الاسماء خصوصا رضا وابن اخو 

كان لازم اشوفله غير اسم 

اعزائي ما اگدر اغير بالاسم لان زوج سكنه الي هو اخو رضا سما نفس اسم اخو لان يعرف بسكنه 

تحبه الرضا ولان هو يعرف بيها رغم انها شريفه ومحافظه على اسمه لكن هي تكرهه وتحتقره 

لان اخذها من حبيبها الي هو اخو فراد يذلها ويتلذذ بتعذيبها خصوصا لمن يصيح باسمه وهي تفز 

عبالها اجه واتشوفه 

لذلك حقكم عليه بس انا لازم اسرد الحقيقه كما هي

تشوفون مرات اسمي عمي رضا ابو علي ومرات اسمي باسمه 

ورضا اسمي رضا واكيد انتو تعرفون الشخصيات من خلال سرد الاحداث 

القصه قاربت على الانتهاء اريد همتكم بالتصويت وياريت توصلونها المتابعينكم 

تحياتي #آنيين_الليل 

///////////💖❤️💖////////////

سراج 

الصبح تقريبا الساعه بثمانيه ونص بعد ان اتريگنا طلعنه الصبح انا ورضا ابحدنا لان البنات بسرعه ما باعنه 

ناديه زعلانه وحنين تريد تبقى يم مريم وناديه فهنه ركبن بسيارة رضا وامه بالصدر وهنه وره واحنه 

نباوع الحنين شگد فرحانه لان هي يم اختها

انا وابو علي اجينه بسيارتي انا اسوق وابو علي گاعد يمي ورضا وراي بالسياره ومرات هو يسبقنه 

الظهر نزل رضا للمطعم وانا وابو علي لحگنا لان اشر النه نزلنه واشوف ناديه واگفه بحديقة المطعم 

حتى ما دخلت انا نفخت رضا گلي //شبيك سراج حتى ما تباوع بوجهها 

جريت حسره ورفعت راسي ورديت بحسره :: من الصار الصار مو شويه 

 رضا // حقك الصار لابيدك ولا بيدي ولا بيدها الصار تدبير من ناس ما يخافون من الله باوعلها 

شلون ذبلانه

رديت بحرگه :: وانا رضا وانا 

  رضا // انت الله يساعدك ويكون بعونك 

عافني وراح اتقرب من ناديه وانا اسمعهم // عمو ليش ما تدخلين 

هي مدنگه ......لا عمو ما اريد 

  - - ليش بابا 

رفعت راسها ... ... عمو ماريد ابقى اهنا اريد ارجع للسياره

سحبت نفس من الجگاره واتقربت يمها وگتلها ::ادخلي ما راح نتاخر 

هي فاتت گدامي وشفت حنين جايه وهي تگلها //ناديه ليش بقيتي ما دخلتي 

رضا //منتظرتني مو مثل بعض الناس بذاات 

حنين //هاا عمو رضا قصدك انا البذات 

رضا //هسه مو وكتها بعدين نتعاتب

لگينه رضا حاجز طاوله والبنات وام رضا بطاوله داخل المطعم دزيت النادل لكن رضا سابقني ودازه الهن 

وهنه طالبات ورضا هم طالب النه غدا على ذوقه اكلنه وچان التوتر سيد الموقف وبعدين طلبنه چاي وقررنا 

نروح لمن ما اتقربت ام رضا وگالت

- - - خويه سراج ناديه ابد اي شي ما خلت بحلگها والصبح گوه جبرتها كلت كعكه بس حتى تاخذ علاجها 

هزيت راسي وگلت ::خير ان شالله 

 طلعت لان احس روحي متفرفحه عليها احاسيس متداخله ابعضها بين القهر والكره والحقد والانتقام 

وبين الحب والعطف والاشتياق هاي مشاعري

راح ابو علي للمحل انا بقيت واگف يم السياره وادخن بحرگه ورضا ركب ويا امه والبنات واجه ابو علي 

 بايده علاگتين اتقرب من ناديه وگلها //ندووش هذني الج ما تنطيين ال اي احد منهن اذا تحبيني تاكليهن 

هي ما جاوبت ابو علي باوع الحنين وگال //ولو بعض الناس ما يستاهلون بس ياالله نسوي زين ونذب بالشط 

(وانطاها علاگه )هاج الج هذني

مريم // الك الله يالفقير انا محد بحالي 

رد اخوها//اي والله مريومه من لكى احبابه نسى اصحابه 

مريم //ايي ياخوي النه الله 

انا فتحت باب السياره وگتلها // تعالي عمو امشي انا اشتريلج شنو تردين 

حنين //هاي شبيج مريم هو هذا قابل بس الي عمو رضا جايب من كل شي اثنيين

رضا باوع العمه// بس انا ناسيني 

ابو علي هز ايده //اگلكم لا تخلوني اخذ العلاگه انتم مو اتغديتو انا جبت العلاكه الندووش حبيبت 

عمها وجبتلكم علاگه اتقاسموها بعد كل واحد دگلي اليتيمه عليمن وياالله خلي نتوكل اتاخرنا ورانه شغل

وراح ابو علي انا اتقربت من ناديه فتحت باب السياره واشرت الها براسي تنزل 

  نزلت بدون ما اباوع الها اتقربت منها 

::اكلي حتى تاخذين علاجج واي شي ذبي وراج انتي رحتي ويه ياسر وهو اخذج المكان وبعدين 

اجوي تلاثه خطفوج واجت الشرطه حررتج هذا كل الي صار وياج واي شي غيره تنسينه 

اول مره من الحادث تباوع بوجهي ... ... وانت تگدر تنسا 

بلعت ريكي ما جاوبتها فتحت باب السياره :: اركبي

ودرت رحت ركبت السياره ورضا سالني // شگتلها 

::ما كو شي بس وصيتها تاكل

بقيت اسوق وبالطريق رضا طلب مني هو يسوق وانا خابرت زهراء وعرفت هي واصله البيت كرم وجميله 

ما قابله يسلم عليها ورايحه گبل الغرفتها فهمتها الزهراء وره المغرب تروح البيت هادي وبس توصل ترمش 

عليه وهم گتلها تخابر شمس وبحجة جايه تشوف عمتي لان ضروري يكون قيس موجود 

وفهمتها تتصرف عادي وتخابر سلوى ونوال اتكلهن يجن لان كلنه ملتميين ابيت هادي او اي عذر ثاني 

المهم اريد الكل موجودين

بعدها اتصلت بعبد العزيز وفهمته شيسوي واتصلت بجماعه وخليتهم بالصوره وفهمتهم على الخطه 

وصلنه وره الظهر للبصره وخابرت علي المحامي الي لگيته محضرلي شقه وصلنه چنه تعبانيين بحيث نمنا

 بملابسنا المغرب دكت ام رضا الباب وگالت اگعدو صلو دنيا ليل گعدنا وصلينه وبعدها شفت ام رضا گاعده بالصاله 

سالتها ع البنات ردت بالغرفه وگالت رضا طلع يجيب عشا

رحت للغرفه دگيت الباب حنين گالت //اتفضل عمو 

باوعتلها:: حنونه منين عرفتي انا 

مريم جاوبت //لا عمو مو حنين هاي ناديه هي گالت هذا سراج 

هزيت راسي وغمضت عيوني وگلت ::حنين انتي ومريم شويه (اشرت بايدي ) رايد ناديه بشغله

هنه طلعن راحن للصاله وانا بقيت حاولت اباوعلها شفتها مدنگه جريت نفس وحچيت بعد ان طلعت تلفونها 

وگتلها //هاج هذا جهازج وما اريد اسال على الجهاز الي چان عد. جميله بعدين اعرف فلمه 

خليته يمها هي بدون ما تباوع گالت ... ... اريد رقم مرتضى 

::اي هسه ادزه الج بس الي طلب زغير يمج واتمنى ما ترفضيين

ما انتظرت اسمع ردها ::اريد منج تنتظرين الى ان ارمش عليج وبعدها شنو تردين تسوين بالمقطع والمن 

ترسلينه ارسلي  

هي باوعتلي وصارت عينها بعيني وگالت ... ... ليش 

جريت نفس ونفخت :: لان اريد انطيهم فرصه 

  رفعت حواجبها ... ... تنطيهم فرصه ؟

هزيت راسي ::ايي يجوز مرتضى وكرم الهم عذرهم

هي وگفت وگالت ... ... لو كل الناس اعذرهم بس كرم وابنه لا وهم مي خالف راح انتظر منك تتصل 

::زين وبعد اكو شغله ثانيه رضا يجي ويا ضابط انتي ترحين ويه الضابط وهمه ايفهموج على كل شي 

ومن ايسالوج منو الي خطفج گولي 

ما خلتني اكمل راسا جاوبت ... ... ياسر 

::هاا اي ياسر احجي شلون اتصل بيج وكتبلج مسج وطلعتي واخذج للكرفان وبعدين دز عليج ناس وخطفوج

بس هذا الكلام واي شي لا تذكرينه افتهمتي

هي صارت ترجف ونفسها صار سريع ما گدرت توگف گعدت على الگاع وخلت راسها ابين اديها جريت 

نفس وگتلها ... ... افتهمتي ناديه 

هي ما جاوبت حسيت بيها صارت تبچي ردت اطلع سمعت صوتها وهي تگلي 

... وحنين 

هزيت راسي ::تبقى اهنا بعدين انا اجيبها

فتحت الباب رجعت عليها اتقربت يمها گتلها ::الولد الضابط اسمه عبد العزيز رضا يعرفه وهو انسان جدا متعاون 

ويانه وانسان محترم لذلك انتي تسكتين واذا سالج منو خطفج تكولين ياسر الي خطفني وبعدين تسولفين على 

العصابه شلون اخذوج 

باوعت بوجهي وكانها اتذكرت شي گالت ... ... يعني عم احچي على مخابرتي الك

هزيت راسي ::لا تجيبيلها طاري انسيها انا مفهمه العبد العزيز شنو يسالج انا صار لازم اروح 

فتحت الباب ورجعت درت عليها بعد ان اخذت نفس قوي سالتها :: ناديه 

هي باوعتلي وردت بكسره ... ... هاا 

جريت نفس :: من انغمض عيونه شنو لازم نشوف 

هي ما جاوبت دنكت انا رديت عليها :: نشوف سراج وهو يبتسم

اعرف بيها هي بقت تبچي وادري هي مجروحه لكن انا مجروح ومقهوراكثر منها 

طلعت وفهمت حنين اتحضر ملابس الناديه من الي اشترتهن واشوف رضا ابن سكنه ابده يروح وياي 

وهذا الشي عجبني بي لان بصراحه احسه يملك شجاعه وغيره ومحنه مثل عمه طلعت وفهمت رضا 

اذا يجي عبد العزيز يفهم ناديه ولو هو لو ابن اخو يرحون وياها بعدين گتله

:: ابو علي انت ابقى اهنا ورضا يروح ويه ناديه 

رضا //ليش سراج انا اروح ويه ناديه 

::شنو نسيت انت لازم تجيب حنين وتجي 

حنين // عمو من رخصتك انا من اجي اريد تجي وياي خاله سكنه ومريم وحتى رضا 

::اي ابو علي جيبهم 

رضا //عمي من رخصتك انا ما اجي ابقى اهنا متانيكم 

سكنه //اي خويه يبقى اهنا ما طول الشغله بيها مكاره وقال وقلت خلي اهنا لا يلبسون تهمه للبنيه

هزيت راسي وبوكتها زهراء رمشت عليه يعني وصلت البيت هادي 

انا طلعت بالسياره واتصلت بكرم 

::الو اشلونك ابو مرتضى 

كرم //اهلا سراج شلونك حياك الله 

::الله يحييك 

اشلون الوالده 

::زينه احسن من قبل انت شخبارك 

الحمد لله كلنه بخير بس

::بس شنو يا ستار 

امي اجت من بغداد 

:: عليك الله يمته 

صار يومين اجت هي وزهراء ولو تشوفها شلون غسلت مجاديفي 

::ههههه ليش 

 كرم // بعد ما تعرفها العمتك ماقبلت اسلم عليها لا انا ولامرتضى ولا حتى نبأ وحسين بس سلمت على فيحاء 

ومن وره خشمها

::عليمن شتريد 

- - - هاي عمتك تحچي ليش مرتضى اخذ بت هادي 

::صدك عمتي ما عدها سالفه انا حبيت اسال عنك بسما طوول عمتي اهنا اجي واشوفها 

كرم //ليش انت وين ؟

::قبل ساعتين وصلت عندي ماموريه بالبصره وباچر من غبشه راجع البغداد هسه راح اجي اسلم على عمتي 

بس تدري هم اخاف منها لان من زمان ما مار عليها 

كرم باستهزاء//زين اتحمل اذا تگدر غلطها ومسبتها

::ايي اجي اشوفها مي خالف 

  كرم // زين سراج اذا بجيه تعال البيت هادي لان راحت تسال على ناديه وحنين 

::ههه وشتلگى 

- - - ما تعرفها العمتك 

:: انا الاعرفها العمتي فد شويه واوصل 

- - بانتظارك 

::جاي بس لا تگلهم خليها مفاجاه الجميله

وصلت البيت هادي وشفت سيارة قيس وسيارة كرم عرفت كلهم موجودين تدرون اول مره احس بخوف لان ما 

اعرف شنو راح يكون ردة فعلهم على الي راح يصير 

دكيت الباب بعد ان ترجلت من السياره وفتحلي عمار الي بس شافني ضحك وهو يگول //هلااا اكتمل العدد الكل متواجد 

سلمت علي ::شنو قصدك 

اقصد بيبي جميله وزهراء وكرم وقيس ومرتضى

::لابربك جميله اهنا لعد خلي افلت 

لزمني عمار// افه عمي ما ادري بيك تخاف تعال تعال خلي نشبع ضحك 

جاوبته باستغراب ::تشبع ضحك ؟

عمار هز راسه // اي جميله طايحه مسبه بابوي وغلط على امي ولو تشوف امي تريد تنفجر بس تخاف من خالي

:: هههههه لعد الله يساعدني على الي راح يصير بيه 

عمار // هو بس انت لو تشوفها شسوت بيه خليها سكته 

وراح گدامي عمار وهو يگول // سراج اجه

انا دخلت من باب الصاله وتلكوني قيس وهادي وكرم ومرتضى واحمد ابن قيس ورحت على جميله الي سلمت 

عليها والظاهر زهراء مدرستها الدور زين هي بس شافتني وهي صارت تحچي 

- - ما اريدك امدااك طاح حظك باالله هذا (اتاشر على هادي )هذا مرته غاسله حظه وجه وگفه انت شمالك 

بعدك ما ماخذلك مره (هزت ايدها ) خاب انت ياهو تسلك عدك هي هذيج المايعه الچنها بريعصي شردت منك 

بليله سوده هههههي هي ياهو تاخذك وانوب صاير شايب

صرنا نضحك وگتلها :: جميله اتمونيين يعني شريد ارد عليج انتي عمتي الوحيده ومن ريحة المرحوم ابوي 

جميله //انچب لا تحچي 

قيس گال //ام كرم على كيفج سراج توه جاي 

جميله //خلي ايولي وانا شعدي ويا 

گعدنا وگللولي //الله بالخير واجت اسيل جابت ماي وعصير سالتها بعد ما سلمت عليه

::عمو بيا صف 

هي جاوبت //السادس 

::هاا ويمته تمتحنون 

بعد اقل الشهر 

شمس //شدي حيلج لاتنسين انتي عايده السنه  

افراح //منين تشد حيلها من يا ضيم من ياقهر 

زهراء //مو حنين بالسادس شنو تمتحن تعيد

الكل سكت ما جاوب 

جميله //شبيكم شصاير هي حنين وين 

قيس جاوبها //عمه حنين مو اهنا 

جميله //چا وين هم انباگت 

هادي بنتر //لا داحت راحت اشتكت علينه تريد تعرف اختها وين عبالك احنه خاطفين اختها 

زهراء //وهسه هي وين

افراح بخبث //معقوله زهراء شمس ما گلتلج شنو ما تخابرج وتنطيج الموجز اول باول 

زهراء //لا ام ياسر هاي هي وساليها لان انا ما فاضيه للقال والقلت بعدين ما اسال شمس بقضايا 

تخص اقاربي زوجي غريب وما اريده يعرف شي ومن اجت وياي امي صرت اتجنب ما اخابر وام احمد 

مرتين خابرتني سالت على امي 

شمس // ليش انا شنو اعرف ومن يمته ما جايتكم 

كرم // قصد ام ياسر قيس ما يسولف عليج

شمس اتاشر بايدها // هذا قيس واسالو ما گايلي شي حالي من حال زهراء اي شي ما اعرف 

قيس // انا ما احب اجيب اعراض الناس 

اسيل //من اجو اخذو حنين عمو سراج وخالو چانو موجودين 

زهراء باستغراب // منو اخذ حنين غير نفتهم 

افراح //يعني ما تدرين حنين اخذوها الشرطه وهناك ما قبلت ترجع بحجة خايفه وما قبلت تبقى عد اي 

احد من گرايبنا وراحت ويه نسيب سراج

زهراء //ياء ياء ياء معقوله 

افراح //اي ليش ما معقوله شنو غريبات عليچن بنات مياده استهترن من لزمن الفلوس بايدهن 

باوعت وگلت :: شنو وين ياسر ؟

هادي/. ياسر فووك ما ينزل من يوم الطلع كلامه قليل واكله قليل 

شمس // حتى من اجينه نتحمدله السلامه ما نزل 

افراح //اي من الشافه الله يساعده

باوعت الافراح وعضيت شفتي وغمضت عيوني الها يعني اسكتي وانداريت العمار گتله

:: رووح الياسر گله سراج رايدك بسرعه خلي ينزل 

شمس باوعت الهديل //وانتي حبيبتي ماكو بيبي جاي بالطريق 

جميله // شني شميسه شتحچيين 

زهراء // يمه شمس تسأل بهديل ماكو بيبي يعني ما عندچ طفل 

جميله هزت ايدها //انهجم بيتچن امهات الزوري اتعوجن بحلوگچن ماكو بيبي كولن ما حبلتي بعد عليمن تتامركن

الكل ضحك جميله باوعت الهديل // ما تحچيين مو سالتج عمتج لو عبالج انحسدج 

هديل //لا بيبي عليمن تحسدوني بس على گولة رضاوي احنه هواي اليكرهونه عاد نحرك گلبهم ابسكتتنه 

جميله //هادي امدااك هي هاي تربيتك (غمته باثنيين اديها )

كرم //يمه شبيج انوب درتي على هادي 

جميله //انت انچب يا طايح الحظ هم تحچي

قيس //عمه استهدي بالرحمن تره كرم خوش ولد 

جميله //لا والله اتعس ولد وطار وما لازم گاعه وانا ما راضيه عنه 

كرم بعتب //ليش يمه 

جميله //انت تدري ليش 

كرم //لا ما ادري گليلي ليش ما راضيه عليه 

جميله //لان كسرت كلمتي

انا باوعت الكرم وگتله // يا كلمه كرم عمتي شنو رادت منك وانت ما سويته الها 

كرم //اووو ياخوي امي تحچي سته بالشهر 

عمتي جميله وگفت على حيلها ولزمت عكازتها ورفعتها بوجه كرم وگالت //طاح خظك يا ما تستحي هسه انا

 تشوفني مسودنه بس مو جديده الك ابن عم دفع امه وخلاها تنشل 

كرم //يمه شكو داعي الهلكلام قسمه وما صارت

جميله //لا مو ما صارت بس هذا ... 

زهراء اتلافت الموقف // ماكو داعي الهذا الكلام شي راح وانتهى اگعدي يمه خلي نعرف انوب حنين 

شصاير وياها 

افراح //لا عيني ليش تگولين شي راح وانتهى خليها تحچي امج چانت تريد حنين المرتضى ومرتضى 

يريد هديل تره ندري امج ليش زعلت وحتى انتي ليش ما بقيتي وحضرتي عرس ابن اخوج وحتى شمس همه

شمس //افراح كرم ما سووا عرس حتى نحضره بعدين احنه بيا حال ونحضر اعراس اصلا عيب 

عليكم السويتو 

افراح //ليش حبيبتي كل شي ما صار ابنيه طلعت من الكليه وراحت ما ندري وين ما ندري 

اندعمت ما ندري انباگت ويجوز ماتت واختها الثانيه هلگدوتها ودخلت مركز وبلسان الهاطوله تگول اخاف 

ارجع البيت عمامي والله اليدري هسه شتسوي ما تسوي وامج مستهضمه ليش مرتضى ما اخذها وتحچي 

گدامي وگدام بتي

قيس //افراح كافي 

افراح بعصبيه. // اگلكم اشو انا بس احچي تگلولي كافي هو شنو الكافي هلگدوتها ومسجله دعوه اريد اعرف 

مصير اختي شنو واخاف ارجع البيت عمي خاف يكتلوني بس هنه معذورات الهن بالوراثه امهن بكد حنين 

وهي اللهم ياكافي 

جميله //وهسه انتي تعيرين شعجب گلتي ناديه انباگت وماتت ليش ما گلتي راحت ويه صاحبها

افراح //خوش تعرفين هي رايحه ويه صاحبها بعد ليش زعلانه لان مرتضى اخذ هديل هذا

 هو (وباوعت المرتضى ) احچي الصدك مرتضى انا لو هادي جبرناك لو جبرنه ابوك على هديل 

مرتضى هز راسه // لا محد جبرني انا حبيت هديل الاخلاقها وشرفها واخذتها 

جميله //ها مريضو تره بعدني ما خرفت مو انت گتلي بيبي اريد اخطب حنين 

مرتضى باستهزاء //ههه وانتي صدگتي انا اخذ حنين

ياسر نزل وسلم وباس راس جميله وكعد ساكت زهراء سالته //. شبيها حنين مرتضى 

كرم //مرتضى بالبدايه انا قنعته ياخذ حنين وحتى امه گلتله شنو تاخذها ناسي امها منيه وشسوت 

  لكن انا قنعته انو هي اتربت عد خالتي وعد ام ياسر وبدل ما يصير حلال عباس للغريب عاد الهم   

لكن بعدين 

زهراء //بعدين شنو كرم 

كرم //بعدين ابني فكر وخصوصا لمن ناديه (ونكت قميصه ) ابني شاف انو حنين مو مناسبه

زهراء //ليش حنين شبيها اشو عمرنا ما سمعنالها صوت لو احد اجه اشتكى منها 

مرتضى //ايي لكن بربج عمه باچر من يصيرون عدي جهال ويسالوهم على بيبتهم لو جدهم لو خالتهم شنو 

جوابهم بعدين احنه شباب ونعرف البنات وحنين مو تمام

ياسر باوع المرتضى وهز راسه وكال 

 - - لا مرتضى ما اسمحلك شنو حنين موتمام انت شنو شفت عليها 

مرتضى حك شعره //ما شفت شي بس المكتوب مبين من عنوانه 

زهراء //عيب هذا الحچي تبقى بت عمك 

مرتضى باستهزاء//ولا يشرفني تكون بت عمي تگدرون تگلولي هسه هي وين مو دايره من مركز المركز 

وهي تشتكي وتگول اخاف يكتلوني يعني عشيره شكبرها وشگدها ما كو واحد يگدر يحميها وليش ترحون بعيد 

هذا عمار واسالو اذا بنيه شابه ودخلت محكمه وگالت اريد احد يحميني ما اريد ارجع الاهلي شنو معناتها

ياسر //ايي بس انا ما اسمحلك تجيب طاريهن حتى لو هذا الكلام صحيح 

مرتضى //ليش ضجت ياسر لان گلت الصدك 

جاوبته ::ها يعني انت ما چنت رايد حنين ابالك تتزوجها بس حتى تاخذ املاكها 

مرتضى //ايي ليش الچذب اخذها واحافظ على حلال عمي وبعدين اتزوج عليها عمي سراج احنه 

شباب وكل شي نعرف واكيد البنيه اذا ما تطلع على امها فتاخذ من اخلاقها 

ابتسمت :: كلامك صحيح رضاوي

كرم اتقرب من جميله وگال // هاا يمه سكتي ما تحچين كلام ابني بي شي غلط تره كلنه نعرف البنات مو بنات

 عباس بس هنه مسجلات بالجنسيه باسمه ومن نوديهن الخوالهن راح ياخذون الاكو والماكو ومو بعيده ايديحوهن 

زهراء وگفت وحچت بعصبيه //عاد انت اتفقت انت وهادي تقسمون الكيكه بالنص ناديه تاخذ ياسر 

وحنين تاخذ مرتضى وبعدين بس يكوشون على حلالهن تتزوجون عليهن 

   ويبقى هنه بنات مياده المنبوذات وانتم تاخذون كل شي وتتونسون بحجة حلال عباس ما يضيع

كرم بنتر //احچي عدل شنو تردين حلال عباس يبقى المن البنات مياده الي ما نعرف منين ما منين 

قيس گال //هسه احنه جايين نشوف عمتي ام كرم وسراج هم خوش صدفه اجه وشي راح وانتهى 

جميله. ابتسمت باستهزاء // شني هي عمه الي راح وانتهى هسه حنين عرفنا دربها بس ناديه وينهي

هادي //خاله ناديه انقبرت ماتت عساها بالحرك الف مره شنو انتي جاي تغلطين عليه ومشبعتني 

مسبه انا واحد من الناس شحصلت من عباس بس الفضيحه اريد الملمها ما تنلم اول ما مرته 

وانوب هذني النغلات

انا اسمع واباوع الزهراء واضحك عليهم وعلى عقولهم هذوله مچذبين الچذبه ومصدگينها ولكم 

مو ياسر انا طلعته 

مو لگينه النقال بغرفته بس مي خالف ظلو همبلو هانت سهله اهنا رن تلفون كرم هو رفعه وصار يحچي

الو 

ايي انا اتفضل 

اي نعم امي جميله يحيى اتفضل أمر خدمه 

هاا 

شنو

اتقربت من كرم وانا اگله ::شكو كرم شصاير 

باوعلي ويگله استاذ خليك وياي سراج يگولون لازم اجي للمركز بنا...

ما خليته يكمل اخذت التلفون وجاوبت:: الو نعم 

::اني اخو شكوليش رايدين جميله 

رديت بنتر //انت الي منو وشرايد 

:: ايي اني سراج ومنطي رقمي ليش ما اتصلتو

:: ها يمته 

:: ما سمعته خير 

:: ايي 

:: ايي 

:: هاا 

:: جايين هسه ابني انت لا تتخذ اي اجراء يمن القضيه اقصد منو الضابط الخفر 

:: انطيني ايا 

:: الله يساعدك استاذ 

  :: الله يخليك احنه جايين ما اوصيك دير بالك عليها

هادي اتقرب مني //شكو سراج 

ما جاوبته طلعت تلفوني ::اوو متصلين وما سمعته 

فيس// شكو سراج 

::ياجماعه الشرطه قابضيين على عصابه ولاگيين ناديه 

جميله //اگعد يابخت گلللوش

الكل اتفاجأ باوعت الافراح شفت الخوف والربكه على وجهها 

هادي بعصبيه //عليمن تهلهلين بس كون تطلع هي اله اذبحها 

::هسه مو وكت الحچي خلي نروح انشوفها ياالله 

قيس وگف وگال ياالله شمنتظرين خلي نروح 

::كرم تروح 

هاا ايي ايي اروح ليش لا

::وانتي عمه امشي لان انتي الي مقدمه البلاغ باختفائها (درت على افراح )

انتي وام ياسر وزهراء امشن ويانه 

افراح بتوتر //لا لا انا شسوي اروح 

اتقربت يمها وگلت ::ام ياسر لازم مره تروح ويانه كل شي يصير 

  افراح تبلع ريكها // لا ما اروح اخر عمري ادخل مراكز 

زهراء //انا اروح ويه امي

هادي راح للغرفه وطلع بايده مسدس //وانا بس اشوفها اكتلها بايدي العار بت العار 

افراح صارت تعيط //يبووي شمحصلين من بنات مياده بس التعب والعار هادي لا تضيع نفسك 

هو باوع الها //شنو اضيع نفسي هاي قضية شرف ست تشهر واطلع هذا اذا سجنوني

اشوف افراح سكتت وكانها تريده يكتلها حتى ما تنفضح جاوبته 

::على كيفك هادي خلي نفتهم وين چانت منو خاطفها منو وراها 

باوعلي ::بربك سراج تريدني اسالها 

ما رديت گتلهم ::انا راح اروح اليعجبه خلي يجي ياالله عمه 

هادي //ما اروح البت الساقطه بس اروح ارميها 

كرم //خلي نفتهم منها وين چانت وبعدين سوي الي تشوفه

طلعت وزهراء وجميله اجن ويانه واجه هادي ركب وياي بالسياره وكرم ومرتضى بسيارة عمار 

وقيس وابنه احمد وحسين ابن كرم 

وصلنه للمركز واحنه ساكتين وهادي بس يسب ويغلط ودي الزمه واشمره من السياره 

جميله //كافي خاله خلي نفتهم مو يكولون عصابه خلي نعرف البنيه وين چانت

هادي //خاله احنه ابختج كل وحده تشرد من اهلها الحكومه تكول چانت مخطوفه حتى الناس 

ما تتقول عليها بس هنه اكثرهن شاردات ويه صحبانهن 

زهراء //ها وانت تعتقد بت اخوك شارده ويه صاحبها 

هادي // لاتگولين بت اخوي شبيج زهراء هذني نغلات 

زهراء//بس انت بالجنسيه عمهن ولي امرهن 

هادي دار عليها //عمه العماهن اگلج ارتكب جريمه بس اشوفها فرحانيين جايين عشرين سياره 

نزف بت الزنا الدايحه

انا ساكت ما جاوبت لان اعرف اذا اجاوب افقد اعصابي وانا من كثر ما اكره هادي ومرته 

وكرم صار يعجبني اشوفهم وهمه ذليلين ومتعذبين وگابعين بالعار لان يستاهلون ولان همه عار 

خصوصا وانا سمعت باذني كرم واتفاقه وياهم ياخذ حنين المرتضى وياسر ياخذ ناديه 

  جريت نفس واحچي ويه نفسي :: انا الكم ياحقراء

وصلنه ودخلت وياي جميله وزهراء وهادي انتظر كرم وعمار ومرتضى انا دخلت وقيس وابنه 

اجو وياي وصلت يم عبد العزيز الي اهل بينه وگام من وره الميز وگلي //اتفضل استاذ اهنا 

انا جاوبته ::لا انا اهنا مواطن عندي قضيه شوف شغلك ابني 

دخل كرم وهادي ومرتضى وعمار سلموهادي كال //وينها الهاي الحقيره 

عبد العزيزباوعله بنص عين جاوبه //العفو انت شتعود الها

باوعتله وگلت:: استاذ ذوله عمامها وانا ابن خال ابوها وهاي بيبيتها 

عبد العزيز //الحجيه جميله يحيى 

جميله //ايي اوليدي انا هي 

باوعلي عبد العزيز // استاذ الحجيه من قدمت الشكوى انطت رقمك وانت انطيتنا رقم ابنها گلت في حال ما 

تكون متواجد (واشر على هادي ) يعني الاستاذ ما اله شغل

هادي راد يحچي انا رفعت ايدي ::اتركنا من هذا الكلام وفهمنا شنو صار 

عبد العزيز // اجتنا معلومات عن عصابة سرقه وخطف وبيع اعضاء سوينا كمين وقبضنا عليهم وبعد التحقيق 

عرفنا طريق ناديه 

جميله //وينها يمه اريد اشوفها 

عبد العزيز //حجيه ان شاء الله بالحقيقه من اعترفو عرفنا انهم خاطفيها وماخذيها الغير محافظه 

::ليش 

يگولون الناس الي ودوهم يطلبوها ثار. وچان لازم يقتلوها اهناك لكن الشرطه داهمتهم

::هاا وهي وين هسه 

عبد العزيز //استاذ سراج انا اخذت بنظر الاعتبار اسمك ومركزك ومن اخذنا اقووالها عرفنا بيها هي طالبه 

بكلية الهندسه ومبين عليها بت ناس واهلها تعبانيين عليها لذلك انا خليتها بغرفه ابحدها 

قيس // الله يطول عمرك ابني 

عبد العزيز //تعيش وبصراحه انا على اساس اخذ اقوالها لكن من سالتها اول سؤال هي رغم البنيه مصدومه لكن 

مجرد ما جاوبتني انا ما كملت التحقيق واتصلت بحضرتك ومن ما جاوبتني اتصلت بالحجيه عن طريق ابنها

سالته ::شنو السؤال وليش اتفاجأت 

:استاذ سراج سالتها منو خطفج وتعرفين هذوله 

هي گالت اي الي خطفني وسلمني للعصابه هو ياسر هادي ابن عمي واذا تتذكر استاذ ياسر اطلقنه سراحه لعدم كفاية 

المعلومات لكن باتهام البنيه اله لازم افتح التحقيق مره ثانيه 

جميله //شني ياسر خاطف ناديه لا ما يسويها

زهراء //اوگفي يمه موناديه من طالعه من الكليه گايله الصديقتها رايحه ويه ابن عمي معقوله ياسر هو الي خاطفها 

هادي //خلي تولي تتبلى على ابني 

سالته ::زين العصابه شنو كانت اعترافاتهم 

عبد العزيز //استاذ اعترفو بالخطف لكن لحد هسه ما گالو منو الي دزهم واذا ما يحچون بصراحه ياسر موقفه 

راح يكون صعب جدا راح اقبض علي حسب اتهام ناديه اله

جميله //يمه حضرت الضابط اريد اشوف البنيه 

هادي بعصبيه //يا بنيه هاي تتبلى على ابني وتردين تشوفينها اهنا ادفنها وما يرفلي جفن

عبد العزيز //شوف ابو ياسر انا الخاطر استاذ سراج ساكت القضيه چبيره والعصابه الي خطفت بت اخوك 

خطيره كلها تهريب سلاح وبيع اعضاء وحشيشه وهسه انت جاي اتهدد بت اخوك بالقتل 

هادي //اي اكتلها لا تنسى انا ولي امرها 

قيس باوع العبد العزيز //استاذ انت ابن اصول وابن عشاير ومثل ما گلت الشغله چبيره خلي انشوفها ونعرف منها

عبد العزيز هز راسه // اي حجي انا دزيت عليكم حتى اخليكم بالصوره ومن محاسن الصدف وجود استاذ سراج 

هيه ايهنا (اشر على باب ) 

حك خده الضابط //وانا الخاطر وضع استاذ سراج وحتى وضع البنيه تركتها بمجرد ما سالتها اول سؤال

 وسمعت ادعائها خابرتكم فلا تتهورون وتخلوني اتخذ غير اجراء 

شوفوها البتكم ولاتنسوون هي بنيه واصله للسن القانونيه وحتى اختها هم انا راح اطلع وانتظركم وياريت 

مو كلكم اتدخلون عليها راح اكمل التحقيق ويه العصابه وانتم حاولو تحچون وياها بهدوء

طلع زهراء باوعت// شنحچي هادي تتهدد عليها وابنك الخاطفها وكرم انت تدري وساكت 

هادي بعصبيه //اي ضحكت على ابني مثل ما امها ضحكت على اخوي وخبلته 

جميله// هاي طلعتو كلكم فقره بس عباس ضحكت علي مياده وناديه ضحكت على ياسر 

وحنين على مرتضى موتوكم تكولون ردتو تزوجون ياسر الناديه وحنين المرتضى حتى ما يروح حلال 

عباس شو طلع ياسر بايگها چا ما اتزوجها

گامت جميله ورفعت العكازه بوجه هادي // شوف ولك هادي اذا تجيس شعره من ناديه صدك اشهد عليك واگول 

مبيتين النيه اتكتلونها وتكتلون اختها وتاخذون الحلال وكلكم اطلبكم للشهاده واولكم قيس وسراج 

زهراء //سراج اشو ساكت ما تحچي 

هادي // كل هذا الي احنه بي سببه سراج 

باوعتله باستهزاء :: ها وليش 

هادي هز راسه //اي انت السبب من هنه زغار انت رحت طلعت الهن صحة نسب وبعدين ما وگفنا على حلال 

امي وذهبها وتالي امي سجلت البيت باسم ناديه وهسه ناديه تتهم ابني بان هو خاطفها وهي الله اعلم چانت ويامن 

واختها دايره على حل شعرها من مكان المكان

باوعتله وضحكت (هههههه ) وما جاوبته صحت ع الشرطي 

:: يا ابني تعال اخذ الحجيه والحجي اشرت على قيس اخذهم يشوفون ناديه 

وانتي زهراء روحي وياهم شوفيها 

 اجه الشرطي وراحو ويا وبقى هادي ايحرك بايده // شنو انت بكيفك ناسي انا ولي امرها 

::كلامك مردود عليك لان ادري تبقى طول عمرك غبي

هادي باستغراب // شنو ؟ 

:: ياشنو امس سديت قضية ابنك وهسه من تروح وتشوفك وانت تتهدد تعند بالزايد وابنك يروح بالرجلين

 ما سمعت الضابط من يكول عصابه خطيره انا من دزيت قيس دزيته بلكي يقنعها تتنازل عن كلامها 

كرم //وانا ليش ما خليتني اروح اشوفها

باوعتله وانا ابتسم : : انت اتعس من هادي نسيت كلامك من اشوفها بريئه مذنبه اذبحها واغسل عارها لو 

من خابرتني گتلي غصبن ما على ياسر يتزوجها وانتم متفقين من البدايه مرتضى ياخذ حنين وياسر ياخذ ناديه 

ما اعرف شنو تفكيركم ولا الوين تردون توصلون 

كرم //اي لان ...

:: كمل ليش سكتت لان تدري بياسر خطفها الناديه وعبالك حرگها وانا سديت الموضوع من يمي بس الي ما تعرفه 

سديت الموضوع بعد ما عرفت ماكو جثه يعني ياسر ثابته علي تهمة الخطف بس ما نعرف ليش حرگ الكرفان 

وانتم كل واحد يحچي شكل وتغالطون بنفسكم

اجه قيس وجميله وزهراء كرم سالهم //ها ابو احمد شصار 

قيس جر نفس // شصار البنيه متهمه ياسر بخطفها 

هادي بعصبيه //تاكل نعل شنو متهمه ياسر 

جميله // نعم الله على ياسر خوش سووا سوايه 

كرم //يمه شنو هالحچي هنه ......

قاطعته جميله ||ها ولك هنه شنو نغلات لا والله ياسر النغل

هادي وگف واتقرب يمي وگال بعصبيه // اسمعوني زين هسه تتنازل عن اتهامها الابني لا ادخل واخنگها بايدي

عود خلي انسجن اقلها اطلع بعين الناس سبع وغسلت عاري 

جميله //خايب انجب غسل عاره فنك تسويها ياالله ذيج هي منو لازمك بس انا راح اشتكي هسه عليك انت وكرم

 واولادكم اگلهم هددو يكتلونها وكلكم اخليكم بالسجن تتهدد هويدي ما تروح الابنك الخطف البت وباعها ع العصابه

زهراء //يمه على كيفج مو هيج الحچي 

جميله //وغمه البنيه تريد تموت وانتم محتارين بياسر وهسه خفتو على ياسر خاف تاخذه الشرطه ويحبل 

هادي // غصبن ما عليها تتنازل حقها طلقه اگول هي شردت ويه ذول ومن لزمتوها خافت واتهمت ابني 

وعدي بدل الشهود ميه

زهراء اتقربت على هادي ورفعت اصبعها // على كيفك هادي وروح ابوي اذا ياسر اله ايد بخطف ناديه 

هسه اخابر رجلي واخلي يخابر معارفه وياخذون ياسر ما راح تلگاله مكان وعود خلي اشهودك الميه يفيدونك 

هادي // جاي اتهددين زهراء 

اتقربت اكثر // هالمره مو بس اهدد هالمره افعل وما اخاف من اكبر واحد

قيس // على كيفكم استهدو بالرحمن وانتي زهراء انتي وعمتي هم على كيفچن م......

جميله تهز بايدها. // شعلى كيفنا ابو احمد (اتقربت من هادي ) وانت هادي شويه خاف من الله كافي ما شبعت 

سنين وانت تاكل بورث اليتيمات ومشغلهن خدامات المرتك وبناتك وتالي البت ضايعه وانت تجيب وتحط 

واستعرست البتك خاف تبقى محد ياخذها وهسه تتهدد اذا ما تتنازل فنها التنازلت انا الاشتكي على ابنك كافي 

خلو ولكم ما شبعتو الله ابين عيونكم

جاوبتها :: بس عمه اذا تبقى مصره على اتهامها ومثل ما سمعتي عصابه خطيره تره ياسر يروح بالرجلين 

وانتي ما تقبلين هو هم ابن ابنچ 

جميله //ما طوول خايفيين احچو وياها بالعيني واغاتي مو تتهددون وهذا يكول اذبحها وذاك يگول حگها طلقه 

هادي // وانتي تدافعين الهن چانت دايحه ما ادري وين ما وين ومن لزموها اتهمت ابني اكتلها واروح بيها سجن 

شگد باقي بعمري اروح اعدام ولا اخليها تعيش وابني يگضي حياته بالسجن

عمار //انتو هسه جايين تتناگرون هي متهمه ياسر وهسه راح يصادقون اقوالها واكيد ما راح ترجع ويانه 

وما تبقى اهنا مو تشوفونها واگفه ولازم انقنعها تتنازل عن ادعائها 

جميله //ايي خلي تبقى انا اظل وياها هي ما تريد تبقى عد اي احد تگول بعد ما ادخل اي بيت 

هادي // ايي تريد تديح مثل اختها من نگول كله منك ياسراج الشغله تصير بيها زعل

هزيت راسي وگلت :: هذا هو هادي انا چان لازم اشيل ايدي من اول ما لزمو ياسر لكن مي خالف احنه بيها 

قيس // سراج مو وكت زعل البنيه مصدومه 

هادي // وصدمتهم عساها بالموت بت الساقطه رايحتلي ويه جماعه وتگول ياسر خطفني 

جميله //اي دعي عليها كلمن اوليده وبنيته بحضنه بس اليتيم محد اله 

قيس //عمه اليتيم الله اله

اجه عبد العزيز وگال //ها ياجماعه شتفقتو وياها 

قيس //والله حضرت الضابط البنيه مصدومه وانت عدك خلفيه عن الموضوع 

عبد العزيز //صحيح لكن العصابه باعترافهم الصريح گالو انو الي دزوهم حتى يخطفون ناديه مو ياسر

الكل باوع وفرحان عبد العزيز هز راسه //ايي مو ياسر واصلا ياسر ما عنده علم كل ما بالامر همه 

راقبو ياسر من طلعت ويا وبعدين خطفوها 

وانا اخذت اقوالهم وهاي بصالح ابنكم اتصالحو ويه بتكم وخلوها تغير اقوالها وانا اتصلت برضا الي اتكفل حنين 

 وانطيته علم انو لگينه المفقوده وصار لازم تجي اختها وتتنازل عن الدعوى

كرم //استاذ اشو تاهت علينه مو اول ما اخذتو حنين گلتو ياسر تهمها هي ويا ......

قاطعه عبد العزيز واجه يمه وحچى بهدوء //حجي احنه الخاطر استاذ سراج اتخطينه هواي امور هسه شي 

واحد امامكم تتصالحون ويه بتكم انا من جهتي اخذ اقوالها واقوال المتهمين واحقق بالموضوع وانتم بكيفكم 

ها شتگولون

قيس //اي هذا هو بارك الله بيك 

دك الجرس واجه شرطي گله //جيب البنيه 

اجت ناديه والكل باوع الها بقت واگفه وزهراء راحت يمها وشدت على ايدها 

عبد العزيز //ست ناديه انا اخذت اقوال العصابه واستجد بيها امر واتمنى من تسمعينه تاخذينه بنظر الاعتبار 

واحنه كلنه وياج انتي ضحيه وصاحبة حق وانتي اتفاهمي ويه اهلج وشنو تردينه راح يصير ويجرالج

اتقربت منها وگتلها ::عمو ناديه الحمد لله على سلامتج 

هي باوعتلي وما جاوبت گتلها ::بالتحقيق العصابه الي لزموهم اعترفو انو ياسر ما خطفج وهمه ما يعرفونه 

هي ردت بصوت مكسور ... ... لا عمو ياسر هو اجه واخذني من الكليه وداني المكان بعيد وقفل عليه الكرفان 

     باوعتلها وهزيت راسي :: ايي صحيح وهو ما نكر يگول لان امه وابو رافضين يتزوجج هو راد ايخليهم امام 

  الامر الواقع

      جميله // چا كرم مو تگول متفق انت وهادي شو طلع هادي ما يريد ياخذها الابنه 

   باوعت العمتي وگتلها :: عمه مو وكت هذا الكلام (رجعت حاچيت ناديه ) وهسه انتي لازم تتنازلين عن 

ادعاءج على ياسر وحتى هم الجماعه يتحركون على المجرم الرئيسي 

هي باوعتلي انا هزيت راسي وگتلها :: ايي اكو مجرم ومجرم خطير ولازم نعرفه حتى نقتص منه

كرم // ايي ولازم نعرفه منو هو وبايدنا نكتله 

جميله هزت ايدها وحچت باستهزاء //خو انت بس اكتل هذا واموت ذاك وياهو يخليك تكتله 

كرم // لا يمه هالمره اكتله وبايدي لان اتعدا على عرضنا 

جميله //ههه هي هسه صارت عرضكم هادي هم يريد ايعرفه على مود ايگاوم عشيرته وياخذ فصل منهم

عبد العزيز // بابا ناديه القضيه قضيتج وانتي راح تبقيين الضحيه والمشتكيه يعني ما تنسد الى ان تاخذين حقج 

جرت نفس وهزت راسها وگالت ... ... ايي استاذ الي يگول علي عمو سراج وبيبي جميله انا اسوي 

عبد العزيز //تمام 

ناديه ... ... بس انا اريد حقي من المجرمين وخصوصا الي دزاهم حتى يخطفوني

عبد العزيز //الچ حق عشائري وحق قانوني هسه افهم منج انتي متنازله عن ياسر 

هي هزت راسها بدون ما تجاوب والكل جر نفس وقعت وطلعنه اخذتها البيت هادي زهراء گالتلها 

  - - خلص ندووش كل الي راح لازم تنسينه اليوم لازم نشوفج ناديه القويه النچره الي تطلع حگها من حلك السبع

جميله //والله لو ما سراج ناديه وحنين ميتات من زمان 

ناديه گالت ... ... ايي ميتات اصلا هو الي موتنه 

زهراء //شبيج ناديه شنو هالحچي 

ناديه ... ... مثل ما تسمعين تركنا خدم الافراح وهادي واحنه عدنا فلوس بگد الدنيا 

زهراء رادت تحچي لكن انا سكتتها وگلت ::زهراء سدي الموضوع الجرح چبير

وصلنه البيت هادي وهمه ورانه ما نزلنه انتظرناهم نزل عمار فتح الباب ودخل قبلنه اكيد راح ايگللهم دخلت 

عمتي جميله وزهراء وياها ناديه وانا انتظرت هادي وكرم فهمت هادي يلزم اعصابه لان القضيه بعدهي 

وهم لازم نعرف منو الي دز على ناديه حتى يخطفوها وحتى ياخذ حقه منهم بالعشاير والحكومه لان باعتباره 

ولي امرها

دخلنه لگينه بس شمس گاعده وتحضن بناديه وتبچي وسلوى واگفه ونوال ولا كانه وجود ناديه ايهمها جميله باوعت 

- - ها انتن اهنا 

نوال من وره خشمها // اي خاله اجينه نشوف العروس وين چانت 

سلوى باوست ناديه وجميله غمت نوال وگالت العمار 

اعمير صيح الامك ماتجوز من سوالفها تخلي الناس گاعده وتروح تنام وانوب علمت البنات

هادي گال الابنه //روح صيح امك واخواتك 

جميله// اي صيحهن خلي يتحمدن السلامه الناديه 

دخلت افراح وبس انا ادري بيها شگد خايفه سلمت وباوعت الناديه وهي تگول //الحمد لله على سلامتج 

ناديه ردت ابرود ... ...الله يسلمج 

اجت هديل وگفت يم مرتضى واسيل سلمت گالت السلام عليكم 

ردينه جميله گالت //شمالچن ما تسلمن على بت عمچن وحاببنها واتحمدن الها السلامه

هنه ظلن بوگفتهن جميله گالت //مو من احچي تزعلون واطلع اكره افراح وهادي 

بنات ما اسلمن على بت عمچن هي هاي التربيه ما علموجن السلام ال الله 

  لو افراح الله يچرم الي يگول ناديه چانت تخبز فووك السطح تحچي من وره خشمها

هادي //ليش يسلمن هي بالاساس مخليه العمها اعتبار مو گدام الضابط بلسان الهاطوله تگول الي يكول علي 

سراج وبيبي جميله انا اسوي بعد يا عم يابت عم انا بس فالي الفضايح من بنات مياده وارجع واگول كله هذا الي 

صار والي راح يصير كله من جوه راسك ياسراج

قيس بنتر. // كافي هادي شنو من جوه راس سراج هاي فوگها عايف بيته وشغله وملتهي وياكم 

من سمعت كلام هادي رديت :: +ياجماعه ماطول الكل موجودين اكو شي اريد اوضحه 

الكل باوعلي يردون يعرفونه وحتى ناديه بين عليها الخوف

//////////////////////

شكرا لزيارتكم عالم روايات سكيرهوم