رواية ناديه الفصل الستون 60 بقلم انين الليل

سراج 

الكل باوعلي وحتى ناديه بعيونها تساؤل وخوف انا وگفت كرم گلي 

خير سراج 

::كل الخير ابو مرتضى عندي شغله لازم احچيها 

قيس //اتفضل سراج 

جريت نفس وگلت ::اكثر من الف مره وين ما چان ومن تصير اتفه واكبر مشكله هادي يگول كله من 

عندك سراج وانا حاب بهاي المناسبه اريد اخلي النقاط ع الحروف

جميله //شمس يمه روحي سوويلنه جاي 

 راحت شمس للمطبخ ولحگتها افراح گلت ::ام ياسر ابقي اسمعي وياريت تصيحون الياسر ضروري يجي 

كرم //غير نفتهم سراج شكو 

:: ماكو شي بس اريد افهمكم شغله واريد الكل يسمعني انا كل الي صار مثل ما گال هادي من جوه راسي اي 

ما انكر كله من جوه راسي

قيس //سراج تره هادي من حچى هذا الكلام مقهور مو قصده

::ابو احمد اكثر من الف مره هادي يگول كله منك مو هسه گدامكم عاد الكلام مو دووم تسمعونه يگول 

انت الي فرضت بنات مياده علينه وانت الي سويت الهن صحة نسب 

ومو بس هادي حتى اختك ام ياسر وهسه صف وياهم كرم ونوال ويجوز سلوى

كرم راد يحچي لكن انا رفعت ايدي يعني اسكت

::ايي ما انكر انا سويت صحة نسب وهسه هم راح اعيده والعينه منك (واشرت باصبعي على هادي وهزيت راسي )

:: اي منك انت هادي لان انت مسجل بالجنسيه عمهن 

:: ما انكر سويت صحة النسب بناءا على طلب عمتي الله يرحمها والمحامي بوكتها كال اذا طعنتو بصحة نسب 

 البنات خوالهن ياخذوهن وبعدين يسوون صحة نسب واذا طلعن بنات عباس راح ياخذون كل املاكهن لان انت

  بالاساس طعنت واتنازلت كل هذا سويته لان ردت احافظ على بنات عباس واحافظ على حقهن الي اتنعمت بي 

انت ومرتك وجهالك 15 سنه

ناديه بحسره ... ... ياريتك ما مسويلنه وماخذينه خوالي ي...

قاطعها هادي //من اكول نغلات محد ايصدگتي شووف بلسان الهلطوله ياريت رايحين الخوالي تريد تروح 

الاهل مياده امها الكتلت ابوها 

ناديه ............ تونه نغلات هسه صار عباس ابونه 

حركت ايدي :: كافي هادي هسه ما افتهمنا انا غلطان بالي سويته لا

هادي //انا ما اعرف المحامي هيج گلك 

:: حقك لان چنت مشلوش بقضية الفصل وشگد لازم تاخذ 

هادي باوعلي ورافع حواجبه //هاا مو چنك تتجاوز وجاي تقتح دفاتر قديمه 

:: انا عمري ما فتحت دفاتر انت الي ما اعرف الوين تريد توصل 

هادي بعصبيه //شوصل خليني ساكت انت ناسي الي سويته 

فريت ايدي ::شنو سويت

هادي //نسيت بيت امي الي قنعتها تكتبه الناديه وانا ما اعرف 

:::هههههههههه والله ضحكتني ليش انت وين عن امك وانا اقنعها وليش سكتت كل هالوكت ليش ما طالبت بحقك

توك اتذكرت انا اگلك ليش كل هالفتره بقيت ساكت 

لان انت بسكوتك استفاديت بگد فلوس البيت مرتين احسبها اذا انت ماخذ البيت اخواتك تلاثتهن الهن حصه 

وياك مو وبعد احسب عدك

:: محل عباس الي اخذته والي سديت باقي فلوسه من الفصل والي مساحته اكبر من البيت وعلى شارع تجاري 

وباقي فلوس الفصل مليته بضاعه راتب عباس الي مرتك تاخذه كل شهر تسوي بي سلف تشتري ذهب الها 

والبناتها 

راد يحجي هادي رفعت ايدي ::خلي اكمل بيت عباس الي ماجره وتاخذ اجاره كل شهر 

:: بيت ناديه الي ماجره هو والمحل وتاخذ اجاره كل سنه وكل سنه تغلي الاجار لان هو بشارع تجاري 

ويجيبلك ذيج الحسبه 

:: وبعد شنو (حكيت خدي ) ها محل عباس الي يجيبلك بگد راتبك عشر مرات انت بهاي السنين الي كعدن عندك 

البنات اشتريت عماره وبيوت اثنين واشتريت سيارة حمل وسويت مشروع الابنك وعندك بالبنك فلوس ما اطمها 

عين الشمس ناهيك عن العد مرتك هذا الي اعرفه والي مضموم الله يدري شگد

افراح باستهزاء //كله هذا من ورث البنات گول ورث الچرخچي وما ندري 

هادي اتقرب مني //شنو انت جاي تحاسبني 

هزيت راسي ::ايي احاسبك مو هذا الي انت بي كله مني  

هادي رفع حواجبه ولم حلگه باستهزاء //ليش الك بالورث وياي وما ادري 

سراج :: هادي تعرفني مو انا الي ادور ورث 

هادي //حاسبهن عليه عبالك شريكي وتگلي كله منك شنو ما خذ ورث ابوك

لملمت حلگي ::شوف هادي انت ما تگدر تاخذ فلس احمر مني اله بارادتي وچنت اگدر بالوكاله العندي 

امنعك تاخذ دينار بس انا هيچ خليتك بمزاجي 

هادي //اوليش هسه ياالله حچيت 

::ما ردت مشاكل لان اعرف بيك انت ومرتك شگد ظلام ويه البنات بالعكس انا خسرت عليك بس حتى تسكت

عن البنات 

هادي //خسرت انت شخسرت ؟

:: هههه سبحان الله كل شي تنسا بس بالفلوس تبيع اهلك بفلس 

هادي //لا باالله شنو خسرت 

:: ليش هادي شكم مره مره سويتلك شغل ونقلتك من مكان المكان ليش ابلاش 

هادي //صحيح بس ما خسرت سويته بعلاقاتك 

:: والعلاقات هاي ابلاش بربك شگد استفاديت من الصفقات الي عقدتهن والمناقصات الي ما يتوقعن اله بذيج الحسبه 

كرم // تره سراج مابيها شي ابن خالك وتخدمه

باوعت الكرم بنص عين :: صحيح ما بيها شي لكن هادي يريد يستحوذ على الاكو والماكو وعنده خير يكفي 

الولد ولده والمشكله سحبك ورا 

كرم // هاي شنو منك سراج اشو رجعت عليه شنو سحبني 

هادي بنتر // لاتظل اتشمر بالحچي انچان من الحلال حلال اخوي وامي وانا اولى بي من بنات مياده 

::وانا ما مشاركك لان عيني مليانه واتصور تعرف بهذا الشي من چانن البنات ازغار

هادي يفر ابايده //وهسه شتريد 

::الي اريده انت جاي تطعن بنسب بنات اخوك وغيرك هم جاي يطعن اصلا اكو واحد يگول انو انا ما 

وصلت مياده للاعدام الخاطر عمتي وعباس لا وصلتها لان انا چانت عندي علاقه وياها وهي خانتني 

ويه سلدار ومو بس هيج لا ويگولون انا ادافع عن البنات لان عندي شك هنه بناتي

الكل باوعلي وقيس گال //استغفر الله 

جميله //ياستار دخيلك ربي ياهو هذا 

درت باوعت على افراح :: ماعلينه عمه انا بس تكمل قضية ناديه اخليها ترفع قضية اثبات نسب جديده 

حتى كل واحد ياخذ حقه 

افراح بتوتر تحاول تخفي // هي شنو نبقى بيك سراج وبنسب ناديه غير نفتهم ناديه وين چانت ويامن

جميله رادت تحچي انا سبقتها ::هاي شنو ام ياسر شنو ويامن مو عيب هذا الحچي 

 افراح // سراج انت تعلمني العيب وتحچي گدام رجلي واخوي او ولدي 

عرفت افراح تريد تفر السالفه عليه :: ام ياسر انا ما اتجاوزت گلت انتي بت اصول وفاهمه ومن يسمعج 

واحد غبي راح يگول هاي اتشمر حچي على بت حماها 

افراح //وانا ما گلت شي گلت وين چانت

هزيت راسي :: ايي صحيح انتي ما گلتي شي يمكن مو قصدج ناديه مخطوفه وبالبدايه اتهمت ابنج ياسر

 بخطفها وبعدين العصابه اعترفو ياسر ما اله يد بالموضوع وهسه لازم نعرف الراس المدبر حتى هادي 

وكرم وقيس ايگاوموهم عشائريا وهم لازم فصل من غير مقاضاتهم بالقانون مو هيج عمار باعتبارك 

محامي وتعرف بالقانون وانا هم اعين واعاون 

عمار //ايي اكيد لازم نعرف منو وره العصابه

هي صار وجهها ينطي الوان وراحت صارت وره عمار 

جميله باوعت الهادي وگالت //بعد شيريد هادي هسه ايدور علبا ويگعد ويطالب بفصل 

هادي //هذا يافصل خاله اليسمعج مشمع چيسي 

جميله //ليش مو جديده عليك گبل سرفنت رداناتك على فصل عباس واخذته وكملت فلوس المحل 

والباقي اشتريت بيهن سلعه صلوات جاي ايكد عليك صار عشرين سنه 

هادي //وبعد خاله شعدج لان انتي وابن اخوج خوش حاسبيلي

جاوبته ::هادي انت تعرفني انا ما ادور فلوس 

هادي //ايي طبعا ما تدور لان ابوي الله يرحمه ما قصر ويه ابوك اشتراله محل وشغله 

هزيت راسي :: والله صحيح ما ناكر هذا الشي بس ابوي رجع الفلوس وگدامك مثل ما ابو قيس 

رجع البستان وانت اخذته 

هادي //اگلك سراج مو جاي تفووت زايد هسه انت شتريد

:: انا ما اريد شي بس حبيت اوضح اشياء جانت غايبه عن بالك واخواتك ما يعرفن بيها انا ياهادي يا ابن عمتي 

من سويت صحة نسب سويته بطلب من عمتي وحتى انت ما تطعن بنسب البنات وياخذوهن خوالهن 

وبعدها ايقاضونك وتخسر الاكو والماكو 

جريت نفس :: هسه انا مضطر اروح وابقى على اتصال ويه الجماعه اذا يستجد شي 

قيس //وين وين رايح سراج غير نفتهم شنو راح يصير 

:: مضطر تروح عندي واجب وضروري اتواجد ياالله فيمان الله

رحت امشي اندك الباب لان انطيت اشاره الرضا وراح حسين ابن كرم ايفتحه ودخلت حنين وهي تگول 

- - السلام عليكم 

الكل اتفاجأ بجية حنين وهي لابسه عباية راس فاتت على ناديه وباوستتها وهي اتگلها

- - ادري بيج ترجعين وما تكسرين بيه 

وفاتت على جميله وحضنتها وبوستها وجميله صارت تبچي وزهراء فتحت اديها تريد تحضنها لكن حنين 

باوعت الها بعتب وراحت الباب الصاله وكالت

- - فووت عمو رضا اتفضل كلهم متجمعين 

هادي وگف وگال العمار //اطلع اتشكر من الرجال وخلي ايروح 

حنيين //اوگف وين يطلع لا انا اريد عمي رضا يجي 

هادي باوعلي //خو امبين من تصرفاتها والسانها مال وحده دايحه 

قيس// شنو هالالفاظ هاي هادي ما تستحي

كرم وگف وحچى بعصبيه وهو ايفر بايده // ليش يستحي هي ما خلتنه اعتبار من عافتنا وراحت ويه رجال 

غريب لاعرف ولا ولف 

اتقربت حنين من كرم وگالتله وخاله عينها بعينه //هذا الغريب الي تگول عنه بوكت ما چان عمي هادي اخو 

ابوي گاعد يغلط ويسب ويضرب بيه ويتفل عليه وما يقبل انزل اذا هو موجود وانت واگف تگول وين ما الگاها

الناديه عدله ميته اذبحها هذا الي تگول عنه غريب راح هو وعمي سراج يدورون حتى بالمگابر ماخلو حتى 

بالصحراء يم البدو وبالسجون وبكل مكان لو نسيت عمي كرم نسيت بعز القهر والمذله والعذاب انت زوجت ابنك 

ما فكرت بكسرتي وقهري ودموعي على اختي

هديل اتقربت منها وگالت وهي تجر بكلمتها جر //هو هذا القاهرج لان مرتضى ما قبل بيج واتزوجني راح اتموتيين 

حنين ابتسمت وهزت راسها //لا ابد مرتضى حقه يدور على بت الاصول امها وابوها معروفين ابنيه محد جايب

بسيرتها انا جاي بس اوضح

قيس گال //انا طالع ادخل الرجال للديوان البره وابقى يمه 

كرم //مو جاب حنين هذا هو الله ويا بعد شعده باقي 

ناديه وگفت وگالت ... ... لا عمو قيس عمي رضا يجي اهنا

هادي //مو چنچن بنات عباس ماخذات راحتچن تعزمن بالزلم ابيتي 

ناديه بدون ما تباوع الهادي ... ... بس هالساعه وراح نطلع من بيتك لان ما يشرفنا نگعد بي

قيس //ما يصير عمي ناديه يجي اهنا ابيناتنا رجال غريب ...

قاطعته... ... هذا الغريب الي تگول علي ما خله مكان اله ودور بي عليه وتالي اخذ اختي على عاتقه 

افراح // اي اخذها يشبع بيها 

حنين صارت ترجف رادت تحچي ناديه رفعت ايدها ومشت وصلت يمها وخلت اصبعها على حلگها وگالت 

... ... مو هي الي يشبعون بيها الزلم واتصور تعرفين قصدي

افراح دفعت ناديه // انچبي ولج مو ما ندري بيج وين ما وين چنتي وجايه تسربتين علينه شعدج من هبيه 

ها بت مياده شتردين تطلعين عليه لو على بناتي ما شاء الله عدچن عصابه تشتغل الچن وكلها زلم حوك 

حنين بابتسامه //اريد اعرف انتي شبيج خايفه عبالك انتي المخطوفه مو ناديه 

افراح //ها سمعتو سمعتو شوف شجوه راسهن بيش يردن يبلنه عمي الله يستر منچن

قيس /=خلي اطلع اتشكر من الرجال وادخله للديوان البره عيب يجي يسمع مناكرنه 

 راح قيس ورجع وهو يگول //اتفضل اتفضل ابو علي اتفضل انت والوياك 

دخل رضا ويا سكنه ومريم سلمو

جميله وزهراء ردن السلام وزهراء لزمت ام رضا من ايدها وگلتلها //اتفضلي خيه هلا بيج 

ام رضا //بعد روحي اجينه نسلم الامانه 

جميله// كثر الله خيرج يا بت الاصول

سكنه//حجيه ما سوينه اله الواجب من جاب ابو علي حنين ما اخذها البيته خلاها عدي انا ومريم 

وهاي ابنيتكم اجتكم سالمه ان شالله وهي ابنيتنا واحنه نستاذن 

ناديه ... ... لا خاله انتظري انتي وعمي رضا رايدتكم 

الكل باوع قبل محد يحچي اندك الباب راح قيس ورجع وهو يگول //الضابط بالباب يريد يشوف ناديه

هادي //اووو هاي الطلابه ما تخلص كل ساع جايينه ناس شكل خاف الفضيحه محد درا بيها 

رضا وگف وگله //كلامك مردود ابو ياسر ناديه وحنين مثل بناتي واذا باقيين ابيتك لان البنات 

رادن هذا الشي وانا اول واحد اعرف باختطاف ناديه وادري بابنك هو الخطفها وجاي انا واهلي اسلم 

الامانه الاختها واطمن عليهن ونروح صحيح انا غريب عنهن بس مثل ما انت ابو ياسر عمهن 

انا ان شالله هم عمهن

حنين وگفت وحچت بثقه //عمو رضا انت مو بس عمي لا عمي او ولي امري 

هادي خزرها وراد يحچي لكن قيس اشر بايده يعني اسكت وگال //والنعم منك ابو علي زلمه معدل واخ عزيز 

راح قيس وگال // اتفضل حضرة الضابط 

دخل عبد العزيز وهو يگول //السلام عليكم 

الكل رد //وعليكم السلام 

اتقرب سراج وگله// خير استاذ 

عبد العزيز //اعذروني ياجماعه بس لازم اكمل التحقيق واريد ياسر اشوفه

هادي //اي حياك اتفضل بالديوان البره 

:لا حجي افضل اهنا هو شكم سؤال الست ناديه وياسر واروح 

ناديه جاوبت //اتفضل استاذ 

ست هم تتذكرين اسم او علامه او اي شي سمعتي من العصابه من خطفوج 

... ... ايي استاذ اتذكر من خطفني ياسر 

عبد العزيز //ست ناديه بلا كلمة خطفني لان انتي اتنازلتي عنه كملي 

... ... اي استاذ هو اول واحد اجه اخذني من الكليه ياسر وانا ركبت ويا لان ابن عمي وساكنين بنفس البيت 

عبد العزيز //مفهوم بعد ان تركج ياسر 

... ... بعد ما قفل الكرفان دعمو يمكن بالسياره بس حتى ينفتح واخذوني خلوني بالجنطه مشت شويه السياره 

بمطبات وبعدها طلعني واحد گلي لا تحچيين بس تطلعين نفس اذبحج

:شنو سلاحه 

... ... سچين خلاها على رگبتي وبعدين اهنا بصفحتي والثاني عنده مسدس

نزل ياسر الي مبين علي التعب والقهر صارت عينه بعين ناديه الي صارت تباوعله وترجف وانا 

اعرف ليش ترجف 

اما ياسر باوعلها ودنك وصل يم الضابط بدون ما يسلم وگف عبد العزيز سأله 

:ياسر انت من طلعت بت عمك من الكليه وهي ركبت وياك چانت تعرف الجهه الي ما خذها الها 

هو هز راسه وگال بدون انتباه //لا عبالها اوصلها للبيت 

:ومن طلعت ليش قفلت عليها الكرفان 

ياسر //خفت تشرد 

عبد العزيز //زين ليش تركتها ورحت

ياسر اتحسر //رحت اجيب الشيخ واثنيين شهود حتى يعقدولنه واخلي اهلي امام الامر الواقع 

عبد العزيز //انت ما عندك علم بلي خطفوها 

ياسر //انا الحد هسه ما مصدك هي عدله عبالي محترگه بالكرفان 

عبد العزيز //يعني ما تعرفهم 

هز راسه وگال //لا ما اعرفهم 

جميله صارت تهمهم وتكله //هاا كرم شو طلعو ما يردونها

عبد العزيز سأل ناديه //هم سمعتي اسم احد من ذوله الطلعوج من الكرفان 

ناديه بسرعه ردت ... ... اي استاذ واحد توفيق والثاني جريد 

والثالث 

هي باوعتلي ورجفت انا ابتسمت بوجهها وهزيت راسي 

هي بتلكؤ ... ... الثالث اسمه اث اثير 

عبد العزيز //على كيفج جيبولها ماي

زهراء جابت گلاص ماي وشربتها عبد العزيز سالها //من تشوفيهم تعرفيهم 

هي هزت راسها وگالت ... ... ايي ايي اتذكر وجههم خصوصا اثير 

عبد العزيز //زين ناديه هسه اذا اجيبهم تتعرفين عليهم 

هزت راسها... ... ايي اتعرف 

عبد العزيز //رجاءا الكل بمكانه لحد يتحرك (نادى بالجهاز ) دخل المجرمين

دخلو توفيق وجريد انا صرت وره افراح بحيث ما انطيها مجال ناديه بس شافتهم صارت تاشر عليهم وتبچي

... ... اي همه ذوله ايي همه همه 

الضابط وجه كلامه للكل //باعولهم هم تعرفونهم او صادفتوهم من قبل (واجه يمهم )وانتم ارفعوراسكم 

خلي يشوفونكم زين 

افراح بوكتها مدنگه وهديل گاعده بصف مرتضى ومبين عليها التوتر

توفيق صارت عينه بعين هديل خزرها وعض على شفته وهي نزلت راسها وبعدين باوع شاف افراح وگال

: ايي سيدي هاي المره الي اجرتني حتى اخطف البنيه 

الكل انذهل من كلامه عبد العزيز حاچا بعصبيه // وينها اشر عليها 

توفيق //هاي سيدي هاي 

عبد العزيز //انت متاگد

صار لغط وكلام واستفسار وعياط عبد العزيز گال //اششش ولا كلمه لا هسه اجيب قوه واخذها للمركز گدام الناس 

رجع عبد العزيز سأل توفيق //توفيق انت متاكد 

توفيق هز راسه //ايي سيدي متاكد واسال جريد بس ما چنت اعرف هذا بيتهم 

عبد العزيز //ها جريد شتگول باوع الها زين

جريد //هي سيدي هي هاي جابها الي توفيق واتفقت وياي دفعتلي خمسطعش مليون بس حتى اخطف 

ناديه واكتلها 

افراح صارت تصرخ وتلطم على وجهها وتگول // چذاب سووتهاعليه نديوه الساقطه تريد تبري نفسها 

اتقربت منها حنين وگالت // اششش لا تغلطين على اختي انتي الساقطه

صارت ترجف وتگول // ايي هي من البدايه كله من سراج هو الدبر هاي الخطه يكرهني لان شفته ويه مياده 

جميله //انچبي ياخاينه تحتارين وين تذبين سمج 

هادي صار يرجف ونفسه عالي وگال //مبين چذب كله چذب 

 افراح //نديوه چانت وياهم يلعبون عليها وهسه من لگوها الشرطه دارتها عليه

عبد العزيز // ليش داروها عليج هاي فوك العشر نسوان ليش ما گالو على وحده منهن

افراح //هي ناديه دافعتلهم بس حتى تلبسني تهمه اتفقت وياهم جذب ما خاطفينها عبالها احد يصدگها

صار عمار ومرتضى يتهددون ويصيحون ويغلطون عبد العزيز گال //مضطر انهي التحقيق واكمله بالمركز 

وهسه الحجيه تجي ويانه

قيس صافن وكرم واگف ما يعرف شيحچي ومرتضى اتقرب من حنين وگال// هاي انتي واختج فبركتي هاي كلها

بس لان ما اخذتج ياكلبه ياساقطه يا بت الساقطه

اجه كرم يم ناديه وهو يگلها //شگد دفعتي الهاي التمثيليه عبالچن نصدك لو عبالج ابني يطلك هديل ويجي ياخذ

اختج يابت مياده الشريفه 

بعدين كرم باوع الهادي وگال // من چنت تگلي ذني مو بنات عباس ما اقبل بس هسه لا والله صدك كلامك 

ذني نغلات وملگطات اتلگط

حنين اجت بصفي وناديه باوعتلي انا هزيت راسي يعني دزي المقطع والي ما چنت اتمنى احد يشوفه بس تصرف 

مرتضى وابو خلاني اوافق ناديه على السوته 

شفتها كتبت شي ودزته 

همه ما انتبهو للمقطع 

ناديه وگفت وكالت ... ... ياالله حنين خلي نمشي لان ما يشرفنا نبقى بهيج مكان 

عمار اتقرب وهو يحچي //وين وين شنو ملهى تدخلن يمته ما يعجبجن وتطلعن بوكت ما تردن ممنوع تتحركن منا 

ناديه باستهزاء... ... ها ومنو يمنعنا 

عمار ياشر على نفسه //انا امنعج واطيح حظج وحتى اكتلج ومحد يطالبني بشي

اتقربت ناديه وگالت باستهزاء ... ... امنع امك واختك اذا تگدر

هو رفع ايده ايريد يضربها انا لزمته ناديه باوعت للضابط وگالت 

... ... حضرة الضابط انا اشتكي على افراح لان هي دبرت امر خطفي بالتعاون ويه هادي وكرم 

وچانت نيتهم يكتلوني وبعدين يدبرون حادث الاختي ويكتلوها حتى يستولون على املاكي وگدامك احملهم 

المسؤوليه همه اوولدهم اذا صار بيه او باختي شي فهمه المسؤولين لان هددوني وهددوا اختي وگدامك 

وبحضور شهود واولهم انت

عمار //حضرت الضابط نگاومك عشائريا اذا تتخذ اي اجراء 

عبد العزيز اتقرب من عمار //انت تجاوزت عليه وعلى شغلي وهددتني تهديد صريح وجاي اتساومني حتى ما 

اگوم بواجبي (دار ع الشرطي ) 

ياابني القي القبض على هذا الشخص وعلى هاي المتهمه (اشر على عمار وافراح ) 

عمار //نروح وياك عادي بس ياويلك اذا طلع كلامهم چذب

عبد العزيز //امشي لك اتهدد ضابط اثناءقيامه بواجبه هسه اشوفك الياويلك على اصولها 

قيس وگف يم ناديه وگال // هسه اسمعوني زين اذا ثبت على افراح سوايتها انا كتالها

هادي راد يحجي قيس جاوبه بعصبيه وهو يرجف من المفاجأه 

: هادي انت تنچب انت او ولدك اذا ثبت افراح الها يد بگد الشعره اكتلها بايدي خلاص

وبعدين اشوف شغلي وياكم امشي حضرة الضابط انا جاي وياك 

انت منو حجي 

قيس //انا اخو هايه المتهمه

راحت افراح وعمار وقيس ما احس اله هديل واسيل اتقربن من ناديه ولزمنها من شعرها بعدين اسيل صارت 

 تخنك بيها وهنه يگولن //شعبالج انخليج عايشه اذا امنا صار بيها شي 

احنه وگفنا واجت زهراء تريد تفكهن لكن سبقها ياسر الي لزم اسيل ضربها راشدي فر راسها وگل المرتضى 

: الزم مرتك لا اطيح حظها 

جميله وهي اتغم بيهن //منين اتطلبنها هديتن على البت بنات افراح

بهاي اللحظه اتاكدت الدنيا دواره وصارن بنات هادي يتعيرن بامهن مثل من چانت ناديه وحنين يتعيرن بمياده 

هديل حضنت مرتضى وهي تبچي وتگله //الحقيره دارت السالفه على امي عبالها ما اعرف وين چانت وشتسوي 

تريد تطلع نفسها شريفه وكله لان اتزوجتني 

جميله //خايبه دا انچبي اتزوجها انتي ماخذتمن ابن باشا عيان كله مريضو ابن اكريم نمونه الغليج ع الطبيج 

تتبكبك غايرات چي ما خذها ام حلك

ناديه ما اهتمت الكلام هديل اتقربت من هادي وهي تعدل بحجابها وگلتله 

شوف هادي هالمره ما يشفع عدي لا عم ولا اب اذا اعرف مرتك لو انت لو ابنك الكم يد بخطفي ما يشفي غليلي 

اله الاعدام لو ادري انطي الاكو والماكو 

هادي وگف وگال //اتهدديني بت الكلب 

ناديه ... ... واهدد عشره من امثالك

هادي //مو بيدچ على امچ گ...

قاطعته وگالت باستهزاء... ... ايي انا مثل امي بس مرتك مثلمن رووح اتلاحگها لان راح تصير 

مثل مياده ام المراكز 

هادي //اتخسين شيجيبج الاظفر مرتي 

... ... اكيد ما اوصل الها لا انا ولا امي اقلها امي چانت عاشگه واحد وانجبرت تاخذ ابوي وبقت ويه صاحبها 

بس مرتك الي تعرف عصابه باكملها

هادي // شوفي ولج اذا طلع الج لو هيج بالهوى يد اذبحج انتي واختج 

جميله // خايب اهويدي عليمن تتهدد دروح شوف مرتك واتلاحگها 

ناديه اشرت لام رضا وكالت ... ... ياالله خاله ما النه مكان اهنا اختنگت 

رضا گال // ياجماعه البنات بالحفظ والصون عدي 

كرم اتقرب من رضا // لا لهنا وكثر الله خيرك احنه نبتصر ابناتنا

ناديه وهي تباوع الكرم باستزغار ... ... انتو انتو منو. (هزت ايدها ) ومنو بناتكم من يمته احنه بناتكم احنه بنات 

مياده ومنا لمن ما نسوي صحة نسب ذاك الوكت النه گعده وياكم وكلمن ياخذ حقه 

كرم يهز بايده // والله زين طالت وشمخت ما اتوقعتج هيج 

... ... نسيت ابوس اديكم واگلكم انا مسامحه افراح وابنها على الي سوته عفيه ليش بس تخطفني خليها 

تخطف اختي هم وياي

كرم // منو گال هي موديه ناس يخطفونج يجوز انتي رحتي وياهم من ذاتج 

هزت راسها ... ... يجوز ومن تطلع الحقيقه شتريد تسوي لا تقصر 

كرم راد يحچي ياسر گال //حجي رضا اخذ البنات وياك هنه بامانتك 

حنين گالت //لا اعتبارا من اليوم عمي رضا هو المسؤول عنه

محد جاوب وطلعن ويه سكنه ورضا ومريم والكل ساكت بقيت انا اباوع وهديل تبچي وهادي گاعد على صفحه 

كرم واگف وجميله وزهراء وشمس وحده تباوع بوجه الثانيه وسلوى تبچي ونوال ساكته جميله گالت 

- - - شو گاعدين ما ترحون تلحگون المره شمتانيين 

كرم // اي هسه رايحين انتظرنه الخواتين على ما راحن 

جميله //الزم گاعك كرم مو هيچ الحچي 

كرم //شلونه بعد تردينه سنين وانتي تگولين بنات عباس يا طلابة بنات عباس هسه ما شاء الله بنات عباس يمشن 

على حل شعرهن راحن ويه ناس غربه

زهراء //ها كرم وين تريدهن يبقن اهنا مو شوفة عينك شسوون بيهن البنات من غير الغلط والعار لو عدك ابيتك 

كرم //زهراء انتي لا تدافعين عنهن زلم شكبارنه خلنه وراحن الله اعلم شيسون 

جميله //الي تريد تسوي شي ما تنكظ لو عدها عشرين اخو وميةعم والف ابن عم هم ما يكعونها بس انت ما 

ادري شبيك انگلبت فد گلبه ع البنات شصار شبعدلك 

كرم //اوو يمه انتي ما تدرين بشي

جميله // والله انتم ما تدرون شني عمي گاعدين اهنا تتهددون على البنات تلاحگو الفضيحه 

هادي //اذا صار شي على افراح نديوه واختها حصتي اوذرهن وادفنهن هالچلبات 

زهراء //على كيفك هادي شنو اي شي يصير نديوه حصتي اكتلها وادفنها تره ما صارت حرام عليكم 

هديل //انتي من زمان تدافعين الهن لان تكرهينه

زهراء //ليش ما ادافع تعالو لگلولي هنه شمسويات اشو من هنه زغار اول ما خدامات الخالتي الله يرحمها 

بناتها وابنها شمروها وهنه يخدمن وتالي خدامات الك هادي انت ومرتك وبناتك شنو الي سونه تره حرام عليكم 

كرم //لا مو حرام هذني كتلهن حلال 

شمس //ليش كرم 

كرم // ها ما تدرن ليش شنو ناديه وجهها وجه وحده مخطوفه 

زهراء// شبي وجهه 

كرم //باوعوله زين المخطوفه خايفه تبچي هاي ابد انوب السانها شطوله وتحچي بثقه

اتدخلت ::يعني تقصد هي ما مخطوفه 

كرم //لا ما مخطوفه شوف وين چانت 

هادي //ايي هاي مثل امها كاتله عباس وكل شويه طايحه من الحزن علي وماخذينها للمستشفى 

شمس// مو ياسر هو الي اخذها من الكليه 

هادي //ايي وتركها وراح شمدريني ما مواعده وره ياسر تلاثه اربعه

مرتضى //وحتى جية حنين والضابط مو طبيعيه ماكو ضابط يجي للبيت ويحقق

زهراء //ليش نسيت معرفته بسراج 

كرم //لا ما نسينه بس صحيح مثل ما گال مرتضى جيتهم مو طبيعيه 

هادي // خصم الحچي انا كتال ناديه واختها 

كرم // وانا وياك هذني ظلتهن عار 

زهراء اتقربت وگالت //خاف من الله هادي عندك بنات ومرتك طايحه بشده 

وانت كرم لا تذبون حچي وانتم ما شايفين بعيونكم تره الله سبحانه بالمرصاد

حچيت ::انتو اشو باقيين اهنا وتحچون وتشمرون بالكلام امشو خلي نفتهم هاي التمثيليه منو مسويها 

هادي //ايي وراح اتصل على ارفع المستويات شنو انا شويه 

كرم //هادي لا تتهور امشي خلي نفتهم وبعدين نتصرف لا تفضح روحك 

هادي //ليش بنات مياده ما فضحني ما ادري وين چانن 

كرم //گلتها بنات مياده ومياده معروف تاريخها

كتبت الناديه:: بعدهم ما شافو المقطع 

جاوبتني ... ... ادري على شنو مستعجلين خليهم براحتهم 

:: صحيح كلامج ردت اشوف ردة فعلهم شنو من يشوفون المقطع خصوصا كرم الي باع نفسه للشيطان

... ... ولاتنسى مرتضى الحقير 

طلعنا وكرم گال المرتضى // ابقى انت اهنا يم زوجتك 

انا ركبت سيارتي وهادي ركب ويه كرم انا گتله ::لا تعالو كلنه نروح بسيارتي احسن

الفصل الواحد والستون من هنا