رواية ناديه الفصل السادس 6 بقلم انين الليل

ثاني يوم ما صدكوا كتبو قطعه البيت للبيع وحتى خلو يم مكتب انا من شفت الي صار وشفت انانية اولادي ضجت 

وانقهرت بعدين كلت 

= اول وتالي كل واحد يرادله بيت خليهم يطلعون ويعتمدون على نفسهم

الي مضوجني بالموضوع من اجتني بسيمه ولولوه وهنه مقهورات لان راح اشيل من يمهم وجده مريم تگلي 

- منو الحيه الي فرقت بينج وبين اولادج

انا طمنتهن وكلت راح ابدي ادورلي بيت بالمنطقه وهنه هم وياي الى ان لكيت بيت بنفس المنطقه يببعد عن بيتنا 

حوالي عشر دقايق مشي 

رحت شفته لكيته بيت جديد مقبط بي غرفه وصاله وديوانيه ومطبخ وصحيات وبي طارمه چبيره قسم مسكوفه 

والقسم الثاني حوش يدخله الشمس اتفاهمت ويه صاحبه ينطيني مهله بس يبيعون البيت هو كلي انطيني عربون 

حتى اليجي علي اكله مبيوع هو راده بهدعش مليون لكن انا فاصلته وصار الاتفاق بتسع ملايين ونص 

رحت بعت سوار عندي وانطيته عربون

وره اسبوعين انباع بيتنا ب 30 مليون رغم قديم لكن مساحته اكثر من 500متر وعلى شارع وبي خدمات 

فلياخذه اكيد يستفاد منه خصوصا بدا الحصار شويه شويه ينفك انا اخذت حصتي الثلث ورحت اتكاتبت وصار البيت

 باسمي وهمه كل واحد اخذ ست ملايين والبنات اخذن كل وحده تلاثه وربع ولان موضي وقعت التنازل عن طريق

 السفاره وبفلوسها طلبت ان انطيهن الابن خالت زوجها حتى يبنيلها البيت

عباس اخذ الفلوس وصار يبني بالبيت وهادي راح اشترى بيت تعبان كلش واشوف الحيره بوجهه لان البيت يرادله تعديل 

حصة سلوى خلتهن باسمها بالمصرف الي اشترا البيت انطانه مهله تلث تشهر

وعباس صار ما يمر ويتحجج بالبناء والدوام لكن الي صار حتى مصرف ما صار يدز النه 

وره اسبوع خابرته وكتله =شنو يمه ليش ما تخابر ما تسال 

- والله يمه بالليل ارجع مهدود حيلي تعرفين الدوام والمحل والبناء 

=الله يرزقك بس تره صار اكثر من اسبوع ما تدزلنه مصرف ليش 

- هاا اي هسه جايكم

بيني وبين نفسي كلت= شبي مو على بعضه وره العشا اجه هو ومياده وسلوى سوت الجاي وصبته واجه هادي 

وبقو يسولفون ع البناء وشكد ما تخلي بي ما يبين 

كتله ==يمه عباس ما طول بناتكم ازغار ومحد يجيكم ابني غرفه وصاله ومطبخ وبعدين من يكبرون جهالكم كملو الباقي

مياده جاوبت قبله // عووع يوميه نبني لا عمه نبني فد نوب منو اله خلك البناء 

عباس //يمه مثل ما كلتي بنيت صاله ومطبخ وغرفتين جوه وفوك راح ابني غرفه وحمام وبعدين اكمل الباقي 

على كيفي لان الفلوس العندي ما يكفن

=يعني ما تبني ديوان للخطار 

مياده //احنا منو يجينا اهلي يگعدون بالصاله واذا اجو اقاربكم يجون عندج خو ما نفتح البيت مضافه 

عباس راد يصحح الموقف //يمه ابني بس خلي اكمل بناء البيت لان الديوان برانيه ومثل ما گتلج الفلوس ما تكفي 

 وافكر اطلع درج خارجي حتى بالمستقبل من اكمل الطابق الثاني اسوي مشتمل واجره

هادي //جا انا شكول 

مياده// وليش محتار ابو ياسر اكعد ويه عمتي اول وتالي البيت الكم 

خزرتها وكلت =تره الملافظ سعد 

مياده بضحك //ياا عمه زعلتي شكايله اني اقصد بعد عمر طويل

محد رد عليها عباس كال /اليوم رحت يم الصايغ اوو سالت على الذهب بيش (مد ايده على جيبه وطلع فلوس وكلي )

هاج يمه هذني فلوس 34مثقال مال ذهبج لان بصراحه المحل مو مثل قبل الشغل بي وما يخف 

اخذتهن وباوعتله وانا ابتسم باستهزاء =لا والله عباس بس هاي اعرف ليش

مياده / لا تباعيلي اني ما الي غرض لاتخليني بالوسطه 

جاوبتها بحرگه //وانتي منو جابج بالطاري لو الي بعبه صخل يمعمع 

مياده بنتر //شوف عباس كتلك ما اجي لان راح تندار براسي شوف اني كل شي ما گايله وامك تتهمني 

عباس جاوبني //يمه تره مياده ما الها غرض انا ال،،،ة

قاطعته بنتر= لا مو انت هي (واشرت عليها ) وكدامها الحجي مو وراها من كلت تره انت ما تصرف علينه تصرف

 من فلوس ذهباتي صار ابالها انا متاكده ولو تحلف منا الباجر ما اصدكك متاكده مليون بالميه هي ترمت عليك 

وياالله همزين جبتهن انا محتاجتهن بس يا ابني الي شغله مو هلكد وما يربح ما يجيب فلوس34 مثقال جيبه وحده 

(اتحسرت وباوعت الهادي )وگلت 

على كل نعم الله عليك (مديت ايدي واخذت الفلوس بدون ما احسبهن )

= هاك هادي اخذهن ابني بيهن بيتك بس ها من باجر اكتب عليك مستند ماالك بالبيت الي اشتريته اي شي 

ذني الفلوس بمكان حصتك بالبيت 

هادي لمعة عيونه وفرح اخذهن ودنك باس ايدي كتله 

= الله يرضى عليك وعلى اخوك باجر تسويلي ورقة تنازل حك الله البيت يبقى العباس وموضي ونوال وسلوى 

يزيد من سعره الك ينقص تبرون اخوكم الذمه

جاوبو // عمرج طويل يمه 

انا بضحك =ان شالله حتى اغيض بعض الناس لان كاموا يرجفون 

هي باوعتلي بكره وكالت رادت تغيضني 

يا سويتيها صدك وانطيتي الفلوس الهادي لعد منو يصرف عليج وعلى بتج 

عضيت على شفتي وگتلها =ما اموت من الجوع لفه كافي عليه انا وبتي وبعدني عباس اطلبك فلوس ورثي من بيت 

ابوي تجيبهن 

مياده // خو خليهن الابنج مثل ما انطيتي فلوس الهادي

= هادي راح اكتب علي مستند وبعدين الفلوس اريدهن حتى اعيش بيهن انا وبتي

وثاني يوم جبت ورقة التنازل وكتبناها يم كاتب العدل 

--وبنى عمي البيت 

=لا عمج طلع اضرب من عباس ومياده ثاني يوم راح گعد بالخرابه مال عمتج موضي وره ما خابرها بس حتى 

ما يدفع الاجار 

—حييل بيبي عمي شگد بخيل 

=لا هادي مو بخيل طماع البخيله وتموت ع الفلس مرته افراح 

—بيبي والفلوس بنى بيهن

=لا خلاهن ويه واحد عنده مزارع شاركه وبخلال سنه باع البيت الي اشترا واشترى بيت جاهز وبمرور الوكت

صارعنده بدل المزرعه اثنين 

--وانتي بيبي اجيتي لهنا 

=اي اجيت انا وعمتج سلوى قبل لا تتزوج بالبدايه صرت اصرف من الفلوس البقن من حصتي من شفت محد 

صار يجي ويتحججون بالشغل واثنينهم يصيحون ماكو ما عدنا والفلوس اذا ما تشتغل تخلص عاد 

فتحت هذا الدكان لان عرفت بعد محد راح ينطيني مصرف

--ييبي هاي السوالف شكد جان عمري 

=تقريبا سنتين والباقي انتي تعرفي وشفتي وعايشتي 

--اي بيبي صحيح شفته وعايشته وهاي (ورفعت ايدي )هاي اكبر شاهد على الي شفته وعايشته 

=حبيبتي لا تفكرين فكري بنفسج انتي حلوه ومؤدبه تربية ايدي 

= وباجر تكبرين وكل الي مريتي بي يصير عباره عن حلم مزعج كابوس مر بحياتج وصحيتي منه

انا بحسره --بيبي هذا للي ينام الليل ويحلم مو انا 

اتحسرت ونزلت دمعه وگالت =والله المريتي بي مو قليل الله يساعدج

وحضنتني بيبي وحنين نايمه بالجهه الثانيه بيبي دائما تحضني لان تدري بيه ما انام ولان تعرف انا شكد اعاني 

من الي شفته والي عايشته وانا بعمر الاربع سنوات 

يوميه يمر عليه الحادث واحاول مثل ما تكلي بيبي اقرا ايات حتى انسى الشي الي شفته والي مريت بي وما اغفى 

اله بعد ان يطر الفجر وانده بيبي للصلاة وانا هم اصلي شويه انام وبيبي تكعدني اروح للمدرسه 

بيومها بيبي ما كعدتني الساعه سبعه لا عطلتني حتى تروح وياي كعدت الساعه ثمانيه اله ربع وانا اعاتبها

 --ليش بيبي هسه ست عفراء تبسطني

=لا تخافين انا رايحه وياج مو كالت جيبي ولي امرج 

اتحسرت —اي بيبي كالت (واختنكت صرت اشهك )كالت جيبي ابوج وهديل تباوعلي وتضحك 

=ما عليج بيها انا اروح واخلي المديره تكسر راسها ياالله تريكي وبدلي

وانا راح ادخل للحمام اسبح 

كعدت جاي اتريك بيبي مسويه بيض وصمون وكوب چاي واندك الباب رحت سالت-- منو بالباب 

::اني

من سمعت صوته فرحت راسا فتحتله الباب وانا اكله 

--هلا عمو 

::ولج ليش ما تكولين منو انت 

--عرفتك ما اكول 

::احم احم منين عرفتيني 

--من كلمة اني 

::هاا يعني اي واحد يكول اني تفتحيله الباب 

--لا عمو صوتك اعرفه 

::تعاي تعاي ليش الهسه ما رايحه للمدرسه

  ارتبكت —- هاا مو 

هو خزرني ::شو هاا ومو كليلي شنو صاير 

طلعت بيبي وانا ركض رحت للغرفه 

=هلا سراج اشلونك عمه يمته اجيت 

كام وباس راسها وهو يكلها ::الله يسلمج انتي اشلونج توني هاي وصلتي

=شعجب جاي صار تلث تشهر ماكو

1

سراج بضحك ::بس لا تكليلي كطعت جاي اخابرج واسال عنج 

=والله صحيح انت ما منك اثنين 

سراج ::هاي شنو انتي امي الي ما فد يوم فرقتي بيني وبين اولادج 

رغم امي مدللتني وانتي بس ترزلين بيه بس ما اعرف ما ارتاح اله يمج حتى ابوي ياعمه شگد يحبج

=الله يخليك ويوفقك شعجب انت مو دوامك ابغداد 

::اي عمه اجيت بشغله للدائره وهسه راجع وكلت امر عليج 

=هله بيك ياروح عمتك اكعد اسويلك ريوك 

::لا هذا ريوك ندوش راح اكل شويه بس اريد چاي بكوبها للمكموعه اگلج عمه هي بس شافتني انهزمت 

صدوك ليش ما مداومه بيها شي 

اتحسرت =هسه اخذها للمدرسه واروح 

::ليش عمه شصاير 

=ما صاير شي المديره تريد ولي امرها

سراج ::هاا معناتها صار شي(وصار يصيحلي بصوت عالي ) ناديه ناديه تعالي فهميني شكو ليش المديره طالبه

ولي امرج شمسويه گليلي 

=على كيفك سراج لاتاخذنه بشراع وميداف 

سراج وهو يحك بشعره ويضحك ::هسه شراع عرفنا الميداف من انا زغير اريد اسالج شنو هو ما تجاوبيني صدوك عمه 

شنو الميداف

اجت ناديه مبدله وهي تكله --الميداف يعني المجداف عمو 

هاا والله زين تعاي (ولزمها من اذنها ) ليش المديره تريد ولي امرج بعدين من يمته تحجبتي 

=السنه انا حجبتها بعد هذا واجب شرعي (بيبي باعتلي )روحي جيبي جنطتج ياالله 

سراج ::اي غير تفهميني ليش المديره دازه عليج 

=هاي هديل بت هادي 

::هديل بت عمها شبيها

=مو صارت وياها بنفس المدرسه وامس ناديه تمشي وهاي صايره تقلد عليها وتكلهن عرجه لان خوالها دعموها 

هديل تريد تسولف الي صار ناديه رايحه ومحاجيتها وحده لازمه بالثانيه

ومتضاربات والمديره تكول اله يجي ولي امرها وهاي ما تقبل تداوم وانا بالشافعات قنعتها

سراج باوع الناديه ::اي مو هي بكيفج اسمعيني ندوش اموتج اذا بطلتي وياالله امشي اخذكم واروح اتفاهم ويه 

المديره 

=لا عمه انا اروح 

:: شنو انتي شتحجين ترحين انتي ويومين وهم هديل تتعارك وياها ياالله امشي (اتقرب عليه وكعد وگلي وهو يبتسم )

بس كون كتلتيها لهديله كتله زينه 

—اي عمو مشعت شعرها وهي هم مشعتني بس انا عضيتها

سراج طك اصبع ::عفيه هيج اريدج لا تسكتين عن حقج 

=انت شلون بيك مو چنك جاي تجسرها 

سراج ::لا عمه ناديه لازم تتعلم تاخذ حقها بيدها ما طول هي على حق

شفته دنگ وهو يلم بحلگه وبيبي حضنته وگالت 

= الله يخليك النه وما يقسي گلبك 

:: يقسى على الناس كلها بس على ام عباس وبناته لا

عرفت عمي سراج شگد يحب ابوي ورحنا اخذنا سراج هو كعد وره يمنا انا وبيبي لان السياره بيها السايق او واحد 

ثاني اني ما اعرف عمو سراج شنو يشتغل بس الي فهمته هو ضابط وين ما اعرف 

وصلنه للمدرسه ويه دكت الجرس ودخلت انا ويا وبيبي والسايق والثاني هم دخلوا ورانا بامر منه 

كانت اكو طالبات طالعات وصارن يباعن عليه هو كل للشرطي المكلف بحماية المدرسه ::اريد اقابل الست المديره

الشرطي كله ::اتفضل استاذ 

هو باوعلي كلي:: ابقي اهنا لا تدخلين وانتي عمه تعالي

(وكال للشرطي الي ويا )شيل جنطتها

شفته من سد الباب والشرطي شال جنطتي وانا ابتسم وابين نفسي للبنات يعني هذا انسان مهم وشفت العامله ام نور 

اجت وباوعتلي وهي تبتسم كلتلي// ها شو اهنا 

--مو بيبي وعمو جايين

دخلت ام نور وطلعت جابت ماي وعصير بعدين دكت الجرس ودخلت ام نور. رجعت كلتلي المديره تريدج 

دخلت وكفت بالباب هي باوعتلي وكالت 

- حبيبتي ناديه ما عليج باي وحده بالمدرسه شنو يصير وياج تعالي بلغيني 

لو بلغي ست فيحاء المعاونه انتي بنيه مؤدبه وشفت درجاتج بالسادس

يعني خلي مهمتج بالحياة بس تدرسين حتى تحصلين شهاده تفيدج لاتخلين اي احد ياثر عليج او ينتقص منج ومن الي 

سويتي لان الي سويتي شي محد يسوي بس الابطال وانتي بطله بس هم لازم تنسينه 

ومن تتذكرينه افتخري بي (بعدين باوعت السراج وكالت )

الي عدها هيج عم وهيج بيبيه والله يكون احسن واحد افتهمتي

انا هزيت راسي 

- ياالله روحي للصف هسه اخلي ام نور تاخذج وهديل اعرف شغلي وياها

درت اريد اروح صاحني سراج وطلع فلوس وكلي هاي مصرف الج وانتظريني هسه جاي وراج 

طلعت وبقيت منتظره هو اجه گلي :: اسمعيني ندوش ما اوصيج انتبهي على نفسج وديري بالج اي شي يصير 

تلفوني عد بيبي (بعدين جر حسره وگال )

اروح اني هسه ندو 

هزيت راسي --اي رووح 

اشو ما كلتيلي:: الله وياك 

-الله وياك بس 

::بس شنو

--خايفه من عمو هادي 

::ما عليج بي ما طول بيبي وانا موجودين ما يهمج بي انتي ديري بالج على نفسج وعلى اختج 

--ان شاءالله 

::شجيبلج وياي مره لوخ من اجي 

--ما اريد شي بس لاتحجي هيج 

::هههههه مو تدرين لهجتي هيج ياالله اريدج الاولى لو ماكو اشوي على اذانج بصل 

انا لزمت اذاناتي وكتله-- ما راح تشوفهن لان اتحجبت 

باوع البيبي ::عمه انا راح اروح وهاي الايام عندي انذار وشغل الراسي ما اگدر اجي اي شي تحتاجين خابريني 

=تسلم ياروح عمتك

رحت للصف وبالفرصه البنات وبدن يسالني منووهذا الصاك وهذا الحات وهذا اليكتل والي يخبل 

وانا بتباهي اكلهن —عمو واسمه سراج 

انا ما شفت هديل ورجعت وانا فرحانه ومتباهيه ولكيت بيبي جايبه غدا من المطعم عرفت عمو سراج كايللها لان 

يدري بيه احب الكباب الشوي ويه التمن وره الغدا انا كفيت المواعين وغسلتهن وخليت الملابس بالغساله ورحت اتمددت 

انا دائما انام وره الظهر وبيبي تروح للمحل تكعد بي

فزيت وانا عبالي احلم على صوت بيبي وهي تگول ==شبيك جاي هاد انت ومرتك على كيفك 

وصوت عمي هادي يكلها// هاي العايقه اله اذبحها والحگها بامها وينها 

بيبي==والله ما تجيس شعره منها شنو باكلكم بشربكم رووح ربي بتك ياالله تجي تتهدد على اليتيمه 

هادي /،اي انتي من وعيت ع الدنيا وانتي بس تدافعين العباس عباس اشتغل عباس حط عباس جاب وتالي خوش 

حصلها هسه انوب تدافعين عن بته

=اي ادافع وادافع وانت مو صاحب فضل علينه 

هادي //منو صاحب الفضل لاتكليلي سراج 

=اليوم وباجر وعكبه هو سراج ابغداد وما عافني ولا عاف بنات عباس مو مثلك 

هادي //ليش انا شسويت قصرت مو انتي كتيلي البنات انا اخذهن واربيهن وما شاء الله طلعن ابدع من امهن 

=عيب عليك تحجي هاي عشر سنين لا بفرح ولا بحزن اجيت لو فرحتهن بجكليته 

هادي //ليش عايزات اشو كله صار الهن

=وانت ما قصرت فلوس الفصل لا والله فصلين بجيبك والمحل الثاني الي ما تهنه بي 

هادي //ها نسيتي المحامي والكعده وجيب الشيخ الفلاني ورد الشيخ العلاني 

==اادري ومحسوبه انت حسبت حتى استكان الجاي الي شربو عدك الناس 

هادي //اي احسب انا منين اجيب شنو شعندي 

=وانا ما جاي احاسبك حضرت المهندس بس لم بناتك من ناديه واختها هنه ابحدهن لايجن ولا يمرن بيكم 

بعد ليش هالكره انت ومرتك هاي الي چنها حيه مزوهره

افراح //اي الحيه المزوهره احسن من ذيج الحلوه ام عيون الخضر 

هادي بقى يصيح //والله اسمعيني نكرهن ونكرهن ونكره الكاع اليمشن عليها ولو بيدي چان موتتهن ودفنتهن بس 

انتي واكفه بعيني 

=الله يطيح حظك يانذل ولك ذني بنات اخووك 

هادي//ههههه منو يكول بنات اخوي انتي فرضتيهن علينه والله المفروض ما نجنيهن نشمرهن بدار الايتام 

=مو بكيفك ذني بناتنا وانت بدل ما تاخذهن وتربيهن تجي تتشفى 

وتروح هو منو الي جاب امهن غيرك وادري ليش مو لان حلوه لا 

جان عندك مصلحه ويه منذر

هادي //انا جبتها انا جبتها مو بت اختج استنكفت منه وما خذته 

=وهسه شتريد تره اذا اكو واحد خسر فهو عباس وبناته انت ربحت وهو كل شي ما شاف عاشها تعب بتعب 

وخله ذني اليتيمات الناس تلطم بيهن 

هادي //هنه يتيمات وهيج لو ابوهن وامهن موجودين شسون 

=خاف الله ما مسويات شي بتك هي الي اعتدت على ناديه

هادي //لا انتي رحتي وفريتيها على مود هاي الساقطه بت السكط

=كافي هادي واطلع انت شتريد 

هادي // شنو شريد بتي دازه عليها المديره ومرزلتها على مود هاي وانتي رايحه ما تكولين هاي بت ابني رايحه تعدين 

وتصفين عليها مرتي راحت تكلها المديره انقلي بتج شنو كايله للمديره على بتي

=ما كلت شي بتك كلها تشكي منها وامها تملي براسها على بت عمها حرام عليكم عوفو اليتيمات بحالهن 

افراح //انتي بس كادره عليه لان شريفه وهاي نديوه اله اموتها قبل لا تجيبلنه كسرة عين عليمن تطلع 

= حتى اكسر ايدج اذا مديتيها على ناديه انتي لا تحجين ربي جهالج وما الج غرض 

هادي // لا الها غرض وتكسر راسها الهالكلبه

انا انقهرت على بيبي وعلى نفسي اجيت ابجي --عمو انا ما سويت شي بتك كاعده وتصنف عليه 

افراح //انجبي بتي احسن منج ياتربية الشوارع 

باوعتلها وكلت --انا مو تربية الشوارع انا كاعده بالبيت واصلي واخاف 

من الله بتج الي يوميه لازمتها مدرسه وهي تخلي مكياج 

افراح //شوفها هادي شوفها شلون تتبلى على بتي هذا كله تدريس امك 

--لا بيبي ما الها غرض عمو انت رووح للمدرسه واتاكد 

لزمني عمي هادي وصار يضرب بيه وافراح ويا وهي تكله //عوقها هادي عوقها لاتجيبلنه فضيحه مثل امها

انا صرت اصرخ وحنين وياي تصرخ اجت بيبي وهي تكله= ولك عوفها ياحقير عوفها يانذل تمشي ورا كلام مرتك 

سحبته مني وضربته راشدي وكلتله =تره مرتك اسقط من مياده تف عليك يانذل

هو من شاف بيبي هيج سوت راسا بدون شعور دفعها وكعت بالكاع وطلع ما انتبه وافراح تباوع النه بتشفي وطلعت ورا 

اتقربنا انا وحنين على بيبي هزيناها ماكو عبالك خشبه وبس فاتحه عيونها صرنا نصرخ التمو علينه الجوارين 

وشالها جارنا ومرته واخذوها للمستشفى وانا وحنين رحنا وياها واحنا نبجي الطبيب سال كال شبيها

جيرانه كاله // الحجيه مره جبيره وهذني بنات ابنها يتيمات وما نعرف الي صار 

سمعناهن يتباجن واجينا نركض لكيناها طايحه بالحوش 

الدكتور باوعلي وانا ابجي سالني //وانتي بابا منو ضاربج 

بعدني ما مجاوبه اجه عمي هادي وابنه ياسر واجت عمتي سلوى 

انا سكتت وهادي هو وياسر راحو ويه الطبيب بعدين اجه كرم ويا زهراء بت بيبي جميله والكل يسالني شلون 

طاحت وانا اخاف اكلهم عمي هادي دفعها انا لازمه ايد حنين واگفين على صفحه واناشغ من كثر البچي 

وسلوى لزمتني وتهز بيه وتبچي وتكلي

تستمر القصة أدناه

- ولج شبيها امي ليش طاحت 

انا وحنين نبچي واجه ياسر ابن عمي هادي ويگل السلوى 

- عمه عوفيهن ما تشوفيهن شلون مصدومات وخايفات 

سلوى //مو اريد اعرف امي ليش طايحه ومغمي عليها 

ياسر //عمه هسه شويه ويطلع المفراس والطبيب يگلنه بيبي شبيها

وطلع هادي من يم الطبيب وسلوى سالته //ها ابو ياسر امي شبيها 

هادي يباوعلي ويخزرني ويحچي //جلطه امي صابتها جلطه 

سلوى//امي مابيها شي امس خابرتها 

هادي //الجلطه ما تعرف بيها او ما بيها مره چبيره والمر بيها مو قليل

اجت عمه نوال ولاگتهاسلوى تبچي اشو راسا لزمتني وضربتني راشدي وهي تگلي

/ ولج شسويتي الامي وصابتها الجلطه اعرفج حيه مثل امج 

حنين استهضمت عليه كالت #لاتضربيها ما الها شغل شوفي اخوج ومرته الي دفعوا بيبي 

نوال //دفعوها لازم مسويتلها مكسوره

انا صرت ابچي وارجف من الخوف اجتني زهراء وكالتلها 

- نوال حرام عليج ليش تضربيها ما تشوفينها شصاير بيها على بيبيتها 

نوال //ها هاي من التحجي والله ما عرفتج من يمته صرتي تدافعين 

زهراء //عيب نوال هذا الحجي مثل ما هي امج هي خالتي وبمثابة امي 

نوال //ما عرفناج من لمن رفضتي ابنهاوخليتيها فشلانه وتالي اخذ ذيج العايقه وهسه جاي نحصد الثمار وجايه

 تدافعين عود شوفوني

زهراء //شگد عيب وما تعرفين تحچين كافي نوال تره كبرتي عيب هذا الحچي 

نوال //شنو قصدج 

زهراء //قصدي واضح انتي جنتي تحبين كرم ومن انا رفضت عباس انتي رفضتي الكرم لان استحيتي توافقين 

على اخوي وانا رفضت اخوج 

نوال //صدك صلفه وما تستحين 

واجت سلوى وصارت تهدي بنوال وتكلها //مو وكته هذا الكلام

وطلع هادي وكال// كعدتنا اهنا ما منها فايده وحده بس تبقى يمها 

نوال بقت وبقى ياسر كال اظل بالحديقه يجوز يحتاجون شي لكن عمي هادي كله 

ابقى ساعتين وارجع اي شي ما يحتاجون

1

عمتي سلوى اجت ويانه البيت بيبي هي وزهراء وكرم ومن دخلنه انا وحنين واحنا نرجف اجت جيرانه ام جاسم 

وسالت على بيبي وكالت العمتي //سمعنا ابنها يتعارك وياها وضرب البنيات وهي صارت تصيح ومن طلع ابنها 

شويه والبنيات كلبن الدنيا بالصياح انا ما اصدك مرته ما سمعتهن وهنه يصيحن

سلوى تباوعلي وانا مدنكه ومن راحت ام جاسم سالتني سلوى وزهراء 

وانا سولفت الهن على كل شي صار 

وصرت ابجي وانا اكلهن شلون هديل تقلد على مشيتي 

زهراء كلتلي// ما بيها شي مشيتج والمفروض ما تتعاركين وياها تجين وتحجين البيبيتج 

جاوبتها --انا ما اتعاركت بس هي كامت تشاور بيهن وتضحك عليه وبعدين كامت تصيح 

عروج /وهنه يردن وراها /دكوله تنكه 

والله عمه انقهرت وانا اشوف البنات شلون يضحكن عليه رجعت عليها كتلها 

هديل ليش تعيبين عليه انا مو بت عمج 

هي ردت عليه// ولي ولج انتي مو بت عمي انتي امج وحده ساقطه

... انا ما اتحملت ضربتها وهي كمشتني من حجابي طيحته ومشعت شعري واخذتنا المدرسه المراقبه للمديره الي 

ضربتنا كل وحده مسطرتين وكالت ما تداومن اله يجي ولي امرجن هي جاوبت المديره 

اي ست بابا مهندس هادي باجر يجي ويتفاهم وياج

... انا من رجعت بيبي شافتني ضايجه وباجيه صادف اجه عمو سراج مر بينه وراح هو ويه بيبي وما اعرف شنو

كال للمديره 

... المغرب اجه عمي هادي كمشني وطاح بيه ضرب ومرته تغلط عليه وحتى عضتني شوفي

وطلعت زندي 

صارت عمتي سلوى تبجي هي وعمه زهراء وكالت 

هسه اخابره واخابر هاي الحقيره مرته

لكن عمه زهراء كلتلها //لا سلوى خالتي بين الحياة والموت اسكتي وشوفي شيصير وبذاك الوكت عود احجي 

سلوى وهي تبجي //شيصير يعني زهراء 

زهراء //نسيتي خالتي جلطه ولازم هادي ياخذها البيته وهذني يرحن وياها من تحجين افراح شراح تسوي بناديه 

وحنين هي امج وصاحيه وما تخليهن يوصلن الهم وما مفتكات منها هسه من صارت امج بحاجة واحد يدير باله عليها 

تحجين والله ما استبعد افراح تموتهن

وصارت زهراء تباوعلي وتبجي وسلوى تكلها 

اي صحيح مكتوب عليها التعب مثل امي 

زهراء //صحيح خلي اروح اسويلهن لكمه ياكلنها

وراحت زهراء للمطبخ وكلت بيض وطماطه وجابت خبز وكالت 

ياالله عمه حبيبتي اكلي انتي واختج ونامي ياالله ماما ياالله 

انا رحت غسلت وحنين همه واجينه ما اشتهي اكل بس حنين اكلت وصارت تغفي وهي ع الصينيه اخذتها على فراش 

بيبي ونيمتها وانا اشهك من البجي رجعت للصاله واسمع عمه سلوى تكلها

مرته تضرب بناديه وتعير وهو يضرب بيها ليش منو جاب مياده غيره هو منو طار حتى بس عباس يتزوجها وهو 

يدري بمرته تريد تزوجه اختها 

زهراء //سلوى الي صار صار بعد ما يفيد الحجي 

اي والله صدك هسه انتي لو ماخذه عباس ما صار الي صار تدرين بي شكد يحبج 

زهراء بحسره //ادري بي وهذا الشي جاي اعاقب نفسي علي 

سلوى //اذا تحبينه ليش ما اخذتي

زهراء //والله مو بس احبه واموت علي لكن امي امي ما قبلت كالت لا شهاده ولا وظيفه راح تتاذين وكل 

شي ما تحصلين حاولت اقنعها ما اقتنعت وزوجتني واتطلكت وهو عاقبني ما قبل نتزوج لكن 

سلوى //لكن شنو زهراء

بيوم الحادث لاگاني گلي // زهراء محتاجج اريد احجي وياج لان كلش تعبان 

انا المصخمه ما وكفت فد خمس عشر دقايق كتله عباس ان شاء الله بس ارجع من بيت شمس لان كلش مريضه

هو كلي// انتظريني لا ترحين اجيب السياره وانا اوصلج 

وراح انتظرته بالنص ساعه ما رجع گلت اكيد مرته تعاركت ويا ومنعته يجي اخذت تكسي ورحت البيت شمس 

شنو سلوى عبالج ما احاسب نفسي على الغلطه الي غلطتها بحق عباس لا والله يوميه احاسب نفسي عليها انا ظلمته 

وظلمت نفسي وحقها نوال من حجت لكن انا ما بيدي اي شي وهاي هلتشوفين يوميه متقدملي واحد وانا ارفض 

(وصارت عمه زهراء تبجي وعمه سلوى تكلها )

كافي زهراء هذا مسجل ومكتوب 

زهراء //اي مسجل مسجل احب عباس وامي تحرمني منه

وصارت تبجي بحرگه افتهمت انو عمه زهراء چانت تحب ابوي 

وبيبي جميله منعتها تتزوجه وهي تحبنا وتحن علينه لان تحب ابوي

رحت للمحل فتحت الباب الداخلي وفتحت الضوى واخذت نقال بيبي لان اندل وين تخلي 

واتصلت على رقم عمو سراج حاجاني والنعاس بعينه 

::هاا عمه وصلت شنو جنتي نايمه وحلمتي بيه واتذكرتي تتصلين 

انا بچيت بعبره ...عمو سراج بيبي طاحت وبالمستشفى 

هو احس بي تفاجا بصوتي وهو يكلي ::هااشتكولين 

انا ابجي --بيبي بالمستشفى

::ندوا حبيبتي فهميني شبيها بيبي

  صرت اشهك ... عمو بيبي طاحت واخذوها للمستشفى والطبيب كال عدها جلطه

عمو انا خايفه على بيبي 

سراج ::لا تخافين بابا انا ما راح اتركج انتي صيري سباعيه وانا راح اجي ندو حبيبتي لاتخافين زين 

انا صرت اشهك واكله --اي زين 

جر نفس وكلي ::لا مو زين اشو امسحي دموعج ياالله وكافي براطمج يرجفن وفهميني شنو السبب بيبي وكعت 

اكيد مقهوره من شي

انا خفت اكله --لا لا ماكو شي 

رد عليه ::ما طول جاوبتي بخوف يعني اكو احد مزعلها واكيد لا انتي ولا حنين مو 

--لا عمو احنه شلون نزعلها 

::لعد هادي على مود بنته مو 

اي عمو بس عليك الله مو تكله تره يموتني 

هو رد بعصبيه ::اكسر ايده اذا يمدها عليج انا باسرع وقت راح اجي 

صرت اشهك --اي عمو تعال الله يخليك محتاجتك انا

//////////////////

الفصل السابع من هنا