رواية ناديه الفصل الواحد والستون 61 بقلم انين الليل

سراج 

طلعنا انا وهادي وكرم بسيارتي حتى ما يگولون اتفق ويه الضابط او خابره ولان اعرف بيهم همه شگد 

حاقدين عليه وعلى ناديه وهمه متاكدين انو انا الي يد بانقاذ ناديه ناديه الي يووم عن يووم تنكشف اليه 

الحقيقه واعرف هاي الناس شگد تكرهها وشگد حاقدين عليها وعلى اختها بسبب الورث

اتصوروا لو ناديه ما عدها شي هي واختها چان هسه عايشات ابيت هادي صحيح يخدمن لكن افراح يمكن 

ما ذلتهن ولا عذبتهن ويمكن حتى زوجتهن الاي احد بس حتى تتخلص من وجودهن 

المشكله انو عباس صاحب فضل على ذوله الثنين هادي وكرم وحتى على افراح واهلها لكن فضله على هادي 

وكرم من چان عايش ومن مات بس هي طبيعه بالانسان ان ينكر المعروف

(لاتباعولي على انه انا ملاك وما عندي طمع وما اتغيرت على ناديه وحنين اكيد انا انسان وعندي جانب خير 

وجانب شر لكن انا عندي اسبابي ان اكون ويه ناديه واختها طيب )- -سراج- -

وصلنه للمركز ودخلنه ولگينه قيس گاعد يم عبد العزيز وهو مدنك ومن باوعلنه شفت قيس وهو بهاي الساعه 

الي راح بيها قبلنه يمكن كبر عشرين سنه فوك عمره سلمنه وگعدنا چان الوكت شارف على الوحده الصبح 

عبد العزيز گال

الله بالخير 

احنه ردينا //الله بالخير 

طلب چايات وگعدنا نشوف قيس عيونه بگصته وصاير نار ودمعته بعينه بقينا ساكتين كرم گال 

: استاذ احنه ندري انو عمار اتجاوز عليك بس تعرف ساعة عصبيه وهو معذور الشغله صارت بسرعه بسرعه 

عبد العزيز هز راسه وگال //صدك حجي لو ما عيون استاذ سراج چان شفت شنو اسوي 

::تسلم يابه عن قضية عمار ما اريدك تقصر 

عبد العزيز //شلون استاذ

باوعت الهادي وگتله :: احچي ابو ياسر احچي كل شي ابالك واذا تريدني اطلع هسه اطلع 

هادي //استاذ مو تشوفها حضرتك تدز علينه وتگلنه لگينه البنيه ونروح وناخذها ويانه وره اقل الساعه تجي 

وتجيب المجرمين وتدخلهم بيتي تتعرف عليهم البنيه وبعدين واحد من عدهم يشوف زوجتي ويگول هايه الي 

انطتنا فلوس حتى نخطفها ونكتلها مو چنها اسمحلي بهاي الكلمه مو چنها شغله مفبركه

عبد العزيز صفن وخزر هادي وكرم وگال //انا طالع والحجي ابو احمد يشرح الكم 

انا هم وگفت :: وانا اجي وياك 

عبد العزيز // لا استاذ لا يسوونها متواطئ وياك افضل تبقى وتسمع 

طلع عبد العزيز واهنا هادي اتقرب من قيس وهو يگله //شكو ابو احمد

قيس باوع الهادي وگف ولزم هادي من ياخة قميصه وهو يگله //اريد اعرف لمن ما مرتك ابيتك وتسوي كل هاي 

المصايب انت وين شنو شغلك ملتهي بس تكرف فلوس 

كرم صار بيناتهم //هاي شنو قيس شنو هالحچي فهمنا شصاير 

قيس هد هادي وهو ايگول //شفهمكم زيان راسكم 

كرم //غير نفتهم ابو احمد شنو

قيس هز ايده //لا وبكل عين صلفه على اساس هو ابو العريف يگل للضابط استاذ مبينه تمثيليه وابنه الهرفه 

يتهدد ولك هادي روح طم روحك انت او ولدك اما هاي الساقطه افراح فانا كتالها وبعدين حسابي وياك انت 

وكل واحد شد على ايدك 

(الصراحه انكسر خاطري على قيس انسان خلوق وما يستاهل الي صارله )

كرم // هسه غير اتفهمنا 

قيس //شفهمكم ما تگلي شفهمكم الرجال جاي يحلها ودي يخليكم تتصرفون ويه بتكم بس وين شلوون اذا مو 

عماار يخلي بصمه ومرتضى ويا ما تنعرفون 

صار يرجف وشفته شلون ريگه يابس انا جبت بطل ماي وانطيته وگتله :: اشرب ابو احمد ان شاءالله تنحل بس فهمنا

هو شرب شويه والدمعه بعينه وگال ابهضمه //شتنحل سراج هاي مصيبه وعار تلحگني انا او اولادي الاخر عمري 

جاوبته :: وجهك ابيض ابو احمد بس على كيفك كل مشكله والها حل

شرب شويه ماي وهادي بس فاتح عيونه ما يحچي من ردة فعل قيس الي باوع النه بكسره وهو يهز براسه اسف 

ويصفك ايد بالثانيه ويگول //الملعونه وطت راسي ما الها اله الذبح 

كرم اجه يمه وگله // استهدى بالرحمن ابو احمد استهدى بالرحمن خلي نفتهم 

قيس //اي هسه تردون تفتهمون بس من ساعه جايين نافشين ريشكم همزين ما جبت وياك مرتضى يسب ويغلط 

على الضابط لان احنه اشراف والناس كلها مرتشيه وتذب ناس ابرياء بالسجن

::قيس عوفنا من هذا الكلام وفهمنا خلي نلگي حل 

قيس//شفهمكم سراج العصابه لازمتهم الحكومه هاي اكثر من اسبوع وامس ياالله استدلوعلى وجود البنيه 

وبكربلا ما خذيها والتحقيق شفته صوت وصوره بنفس اليوم الي لزموهم اعترفو على افراح الولد الله يوفقه 

رادنه نحلها ودي عباله من ترجع ناديه افراح وبناتها ياخذنها بالاحضان وعمها يحضنها بلكي يكسرون عينها

 وتتنازل من تعرف وتگول ساعة شيطان ومي خالف ذوله عمامي وعزوتي لكن وين هادي ومرته السيف 

المجرب اذا ما يغلطون ويعيرون ما ينعرفون

كرم بتعجب //انت تحچي صدك قيس ؟

قيس //لا اتشاقى وياكم 

كرم // يعني ام ياسر دافعه فلوس حتى يخطفونها 

قيس هز راسه //ومو بس هيج حتى يكتلونها للبنيه مفهمه ذوله الهنا (وياشر ع البره ) هي فقيره ومسكينه وهاي مو 

بت اخو الهادي وهي انفرضت علينه وشافت تصرفاتها يوم بعد يوم ويه الولد والابو 

كرم // شنو الابو يعني هادي

قيس //ولك ايي ايي تگللهم انا وبناتي نخدم بيها وهي تطلع من غرفة الابو بحجة عمها وتروح تضحك 

ع الولد ولمن گايلتلها افراح ليش هيج تسووين مو احنا ربيناج ليش تضحكين على الابو وابنه راح افضحج 

على اساس ناديه تگلها علو واحد منهم يكتل الثاني عاد واحد يموت والثاني يروح للسجن وانا اخذ كل شي رجلج 

سجله باسمي 

ولكم متهمه ناديه ويه عمها وتگول هي تدري هو مو عمها وهو هم يعرف هي مو بت اخو

كرم //الله اكبر استغفر الله 

باوعت الكرم باستهزاء وهو ينكت صدره حچيت 

:: هسه تنكت صدرك ليش انت السويته انت وابنك قليل تمشي وتشهر 

كرم //استغفر الله دخيلك ربي 

باوعت القيس :: بس ابو احمد همه عصابه ما عليهم ولا يقدمون مساعده 

رفع راسه // شنو قصدك سراج

:: قصدي همه ما عدهم اخلاق وخطفو ناديه لان هيه مو زينه لا اكيد اكو شي 

قيس // حتى انا اكول وهذا الضابط يعرف بس ما يريد يكول 

كرم // شني فهمونه

قيس // شنفهمك جايين اتطعنون بالرجال وتگلوله مسويها تمثيليه العلمكم الي بكربلا انكتل بعد ما اخذو

كل اقواله وهسه ما شاء الله (باوع الهادي ) طگ اصبع هادي انت او ولدك عمركم كله تعيرون بناديه 

وحنين بنات مياده بنات ام الزلم ام المراكز 

الهسه اذكر بثواب ابو سراج لمن وگفن الهن وعيرنهن حتى بناتك ومرتك گالت هادي يگول لا السجن 

ولا الحكم بالاعدام غيرها 

وابتهاج تگلها مرتاحه ع الشرطه تتذكر هادي وانت كرم تتذكر لمن حنين بزاويه وتبچي وانا اجيت 

ثاني يوم جبتهاطاحت عليها 

الله لا يوفقكم (وگف قيس واتقرب يم هادي وكمشه مره ثانيه ) ولك انت حصتي هويدي اكتلها الافراح 

واگعدك للحك شعبالك اخليك عايش ازوعك ماليتك اللهمدتها بالحرام كلها

هادي صار يرجف وكرم گعد على صفحه وانا لازم قيس گتله ::ابو احمد خلي نتصرف بعقل 

باوعلي //يا عقل تهمه ثابته ياعقل دبرتها ويه عصابه مو عصابه هينه هذا جريد كله شغله مخدرات 

وكرستال وخطف 

جاوبته :: مي خالف خلي ننشوف الضابط شيگول 

قيس //شيگول خلي ايگول بس افراح انا كتالها

سلهمت عيوني واتنفست بعمق :: شتريد تسوي سوي بس ما نريد الامور تطلع من سيطرتنا اذا كان على مياده 

فكلنه وافقنا ان تاخذ جزائها لان شاركت بقتل عباس هسه (اتحسرت ) هسه ناديه رجعت ما بيها شي لازم نتصرف ونحاول نلم الموضوع وانتو (اشرت على هادي وكرم ) ياريت تكرمونه بسكوتكم على ما نشوف النه مخرج من هاي المصيبه

قيس // سراج عصابه ومعترفين خاطفين البنيه وقابضيين فلوس الخطفها الحكومه بهاي الحاله شتسوي 

قانون ويتطبق 

:: على كيفك ابو احمد اكيد نلكى حل

دگيت الجرس واجه عبد العزيز دخل وگعد انا گتله ::استاذ اريدك تعرف انت فضلك على راسنا 

وخلي ابالك كلام الجماعه وتصرف عمار ساعة عصبيه وحماقه منهم احنه نعتذر وحاضرين الكل شي 

عبد العزيز //استاذ سراج انت تمون لكن الي صار طلع من ايدي تعذرني الخاطرك انت بس عمار راح 

اطلعه لكن المتهمه راح تبقى واتخذ بحقها كل الاجراءات المناسبه

::شلون يعني ؟

عبد العزيز //يعني استاذ انا اخذت اقوال المتهمين وشرطة كربلاء كذلك اخذت اقوال المجرم قبل ان يموت وانا 

راح اقدم اوراقهم للقاضي وتبقى كلمة القضاء 

::استاذ المتهمه تكون اقارب الضحيه يعني نگدر انحلها بطريقه وديه

هز راسه //ايي حلوها اذا تتنازل عنها بس هم يبقى الحق العام وشغلة المتهمه مو مال حل ودي لان باعتراف العصابه

 دازتهم حتى يكتلوها واذا بتكم اتنازلت اهل العصابه راح يبتزوكم يعني تطلع تعقلوها ايتركوكم هي الي دبرت 

ودفعت فلوس وهمه يبقوون راح تصير بيها اهواي امور خصوصا واحد المتهمين يكول انا برئ ضحكت عليه 

ومن ساله شلون ضحكت عليك يسكت ويكلي استاذ انا عندي جهال وما الي بشغل العصابات 

ومن اتحرينه شفنا صدك ما اله بشغل العصابات

::شقصدك استاذ 

عبد العزيز //يعني رجال عنده مزارع وفلوس وحتى ما عنده مشاكل 

:: وهسه 

- - مع الاسف طلع الموضوع من ايدي خصوصا وانو الجماعه (اياشر على هادي وكرم ) عنده نظره 

وتحليل ثاني للموضوع 

قيس باستهزاء وعصبيه //. اي مو همه فهايم 

::ياريت توضح 

عبد العزيز // اقصد استاذ انا چان عندي خلفيه عن الموضوع خصوصا والعصابه ماخذه البنيه الغير محافظه 

فالاعترافات بوقتها يمي وچان لازم اتحرك بسرعه وانا الخاطرك ردتها تنسد وما تتاذون باتهامها الياسر 

لان اذا بقتعلى اتهامها اله يروح بيها وهي اقتنعت انو تتنازل فارتأيت ان اسلمكم البنيه تروح وياكم  

وانا ما اعرف المتهمه موجوده بنفس البيت اتصورت انكم تلاگونها تتحمدون السلامه تفرحون 

من اتشوفوها ويمكن من تشوف تصرفكم راح تراجع نفسها وما تشتكي من تعرف الي صار سوء فهم لكن من 

اجيت وشفت تصرفاتكم واتهاماتكم الها عرفت انتو شكد تكرهوها والمتهمه فعلا دازه عليها ناس

جر نفس قوي وگال //چان بودي اخدمكم لكن مع الاسف الامر طلع من ايدي 

::وهسه عبد العزيز نريد همتك 

:استاذ سراج انت رجل تعرف بالقانون وانا لايمكن اتحايل ع القانون وخصوصا بهاي القضيه لكن الخاطرك 

بما انه انتو تعرفون المشتكيه من جهتي راح اعطل الشكوى ما اقدمها للقاضي منا الباچر الصبح وبعدها تعذروني 

انتو حاولو تقنعون بتكم تتنازل عن مرت عمها

هادي جاوب // تتنازل وغصبن ما عليها 

قيس بعصبيه // كافي لك كافي لا تفك حلگك شنو غصبن ما عليها انا بس اريد اعرف انت من ياطينه ولك 

مره وتنام جواك ما تدري بيها شتسوي ما تسوي هسه تريد ابنيه مخطوفه تتنازل شنو رايك تودي عليها وهي 

تجيك وتبوس ايدك وتگلك صار

 عمي اتنازل وانا الممنونه حتى لو مرتك تخطف اختي (اهنا قيس حچى بعصبيه )كافي جبان خراعة خضره

هادي بتوتر // كلامك مردود عليك 

قيس //انجب لا ه...قاطعتهم وگلت ::كافي خلي نروح نشوف شنو ممكن نسوي بهاي المصيبه 

اباوع الكرم ،گاعد على صفحه ويباوع عرفت جاي يباوع ع المقطع اتمنيت بهاي اللحظه ناديه موجوده 

وهي تشوف ذلة هادي هو وكرم اللئيم وگفت وگتلهم :: ياالله ياجماعه خلي نروح

عبد العزيز دك جرس اجه الشرطي گله //طلعو عمار (باوعلي ) وهاي الخاطرك استاذ سراج والا لو ما انت 

چان خليته يعفن بالسجن 

جاوبته ::تسلم ما تقصر وان شاء الله مردوده الك بالخير 

طلعت وانا اباوع الكرم وهو گاعد شلون وجهه ينطي الوان ويتغير بين التعجب والاحتقار گتله 

::كرم كرم ما تروح 

هو باوعلي ما حچى رحت يمه :: شبيك كرم شو مو على بعضك امشي للبيت خلي نحاول نلگى حل

هو ما جاوبني بس باوع الهادي بازدراء وطلع بدون ما يحچي هادي ركب وياي هو وعمار وكرم راح ويه قيس 

كان السكوت هو سيد الموقف وصلنه واترجلت من السياره قيس طلع راسه من الجامه 

گلي //سراج بلا امر عليك خلي شمس تجي بسرعه

انا ما جاوبتهم عمار طلع المفتاح ودخلنه لگيت عمتي جميله وزهراء ما موجودات بس شمس وهديل تبچي سلمت 

وگتلها :: ام احمد قيس يگول خلي تجي بسرعه 

هي باوعتلي بدون ما تحچي ولا كلمه وهادي ساكت وياسر ما موجود اتذكرت بلحظه جريمة مياده والي اللحد 

هذا الوكت وناديه وحنين يدفعن الثمن انا گتلهم :: اهدو وارتاحو شويه والصبح اجي ونشوف شنو ممكن نسوي

طلعت شمس وانا طلعت وراها انا دگيت هورن واشرت الكرم الي نزل وركب وياي سالته 

:: ليش مرتضى ما تاناك وتارك مرته ورايح للبيت 

هو ما جاوب ولا حچى اي كلمه وصلته گلي // انزل بات يمنا 

:: لا رايح عندي شغل ولازم الصبح اسافر 

هو ما گال شي وكانه يگلي سافر لاتبقى انا استردفت :: لكن المشكله ما اگدر اسافر واترك هادي وقيس 

بهاي المصيبه

كرم جاوبني بصوت مخنوك //بكيفك سراج انت ما قصرت 

باوعتله ::شنو كرم شبيك قابل انا غريب تره الي يصير عليكم يصير عليه 

هز راسه انا گتله :: تصبح على خير 

ما ردعليه وكانما جاي يعاقب نفسه چنت اتمنى ادخل واشوفه هو وابنه شيحچون لكن ما گدرت درت السياره 

ورحت للشقه دخلت ولگيتهم كلهم گاعدين

///////////////////////////////////////////

ناديه 

من انخطفت بنفس اللحظه شكيت بياسر هو الي خاطفني ومن اسمع باثير ايگلهم اكتلها چنت اظن ياسر يريد هذا 

الشي حتى ينتقم مني وما ينفضح وبعدين لمن صرت احچي ويه اثير وگلي شغلة ثار صارو گدام عيوني خوالي 

خصوصا وانا اتذكر خالي عدي لمن يگول وين تروح مني ناديه اكتلها اكتلها

وحتى اهل سلدار هم اجو على بالي لكن ابد ما اجه على بالي افراح صحيح ادري بيها تكرهني وادري بيها تكره 

اختي وتتمنى نموت لكن ما اتوقعت افراح تسوي هالشكل تروح تودي عليه مجرمين ايقتلوني زين وين تعرفهم 

وشلون شافتهم وانا ادري بيها ما يهمها هادي لكن هي تحسب العمو قيس الف حساب

الشي الي قهرني بالموضوع موقف كرم معقوله هلگد چان يكرهنا معقوله كل حبه ودفاعه عنه چان بس حتى

 ياخذ حنين ويحصل على فلوس ابوي ابوي عباس الي ما حسن الاختيار والي رخى الحبل المياده وخلانه ضحيه

 من احنه زغار والهسه تدرون من يعيرونه بامنا شنو يصير بينا ما نگدر نرد لان حتى لو لازمين على الناس 

عار الدنيا كلها ما نگدر نرد لان امنا خاينه وقاتله وانسجنت وانعدمت وجابت ولد بالحرام

اهنا فكرت وگلت ... ... هسه اخونه من امنا وين وشلاعب بي الوكت هم مثلنه لو شنو صار بي

تدرون صار عندي فضول اعرف عنه شي لكن الوضع مو مال اسأل هو انا بيا حال ناسيه نفسي شنو انا 

انا بين قوسين (انسانه معيوبه ) ويمكن كل شي ممكن يتصلح اله هذا الشي

قبل ما اعرف انو مرتضى اتزوج هديل چنت مقرره بس اجي اطلب من مرتضى يعقد على حنين حتى 

اطمن عليها وتتزوج وتبعد عن عار هادي وافراح وبعدها انا انهي حياتي بايدي

لكن المصيبه الي فاجاتني وخلتني اعيد حساباتي انو مرتضى طلع خاين يمكن ما تقل خيانته عن خيانة الي 

دزو عليه يخطفوني من عرفت انو افراح وره الصار ما اچذب عليكم بيني وبين تفسي فرحت وفرحت حييل 

وحسيت لاول مره ماكو احد احسن من احد يعني مثل ما يگول ابو المثل ( كلنه بالهوا سوا )

وبعد هادي ما يعير بينه ويگول نغلات ولا هي ولا اختها ولابناتها وامها يمكن هذا الانصاف الوحيد 

الي راح اتشكر علي سراج

جريت نفس وحچيت ويه نفسي ... ... هاا ناديه بس هذا الشي الوحيد الي تتشكرين علي سراج 

... ... ايي بس هذا سراج تركنا باعز لحظات الحاجه خلانه بمهب الريح افراح وبناتها يلعبن بينه بكيفهن 

... ... لا لا ناديه لا تصيرين ناكره للجميل هو خلاج عد هادي لان ما يگدر ياخذچن عنده وبصفته شنو ياخذچن 

ويمكن لو مخلي المحامي بوكت لمن بلغتن ينطيچن الحلال چان هادي بالف حيله وحيله نهبه منچن لا تظلمينه السراج 

... ... لا اظلمه واظلمه مو هو الي اتزوج سجى الي ذلتنا

... ... وييي اتذكرين سجى الي بس رجع طلگها 

... ... ايي وبعد ما اجه يسال علينه ويشوفنا 

... ... وچ مو انتي رفضتي وجوده بحياتج انتي الي تركتي وما قبلتي اعتذاره ولا رديتي على رسايله 

... ... ايي وهو ما صدك حتى يبتعد وما نعرف عنه شي 

... ... اشبيچ حرام عليچ ما سمعتي عمي رضا شنو يگول اتخبل بس كون يلگاج مو هو ما مخلي مكان ما 

مدور بي عليج

نزلت دموعي وانا اگول ... ... شلفايده اجه متاخر 

... ... المهم لو ما سراج ما عرفتي منو خطفج كافي ناديه تلومين بسراج كافي سراج هو القاعده الي لزمتج 

انتي وحنين من اول ما صارت حادثة ابوج 

  ................ سراج الي عرض نفسه للموت والي اخذج سوالج العمليه ولو ما هو چان انتي هسه مقعده 

ويجوز افراح سامتج وموتچ

......... سراج الي حفظ حلالج وحلال اختج الي عرض نفسه للموت بس حتى ينقذج لاتصيرين ناكره للجميل عيب 

وهسه ما تعرفين لو ما هو ما چان عرفتي انو افراح وره اختطافچ وحتى لو عرفتي هادي ايجبرج تتنازلين 

كافي الي صارلج شي ومواقف سراج شي ثاني 

...... ... ايي بس هو ما يباوع بوجهي وكلامه وياي كله بعصبيه 

... ... هاا ناديه ما تدرين ليش

نزلت دموعي وصرت اشهك واجت حنين حضنتني ومريم وياها بعدين اجت ام رضا وگالت 

ميلن عن ابنيتي (وحضنتني وهي تمسد على ظهري وتگلي )

  - - - لاتبچيين ياروحي دموعج عزيزات 

انا زدت بالبچي هي گالت //دياالله ابچي وارتاحي وتالي اسكتي وگولي الحمد لله والشكر وسلمي امرج ال الله

حسيت براحه من كلام ام رضا مسحت دموعي وگلت ... ... الحمد لله والشكر 

جابتلي حنين مااي وشربت شويه وام رضا اخذت بايدها شويه ماي وغسلت وجهي وهي تباوعلي وتگلي 

||هذني الخرز لاتخلينهن يوگعن 

حنين اتقربت وحضنت ام رضا وصرنا اثنينه بحضنها مريم گالت 

||ما هذا ياقووم اني اشم رائحة خيانه

ام رضا هزت ايدها وگالت المريم //دا تعاي لا تغارين الله ودالج اثنين اخوات بعد شتردين 

مريم //وشلون اخوات يخبلن من الجمال 

صرنا تلاثتنا حاضنيين ام رضا واول مره احس بغلاة الام واهمية وجودها بحياة البنيه 

دخل رضا هو وعمه وشافونه رضا باوع وگال //والله زين خو انا بعد ما صرت الحصه 

ام رضا //يبووي منكم اختك بصفحه وانت بصفحه 

باوعت مريم وگالت //هاي شبيك رضا خربت الدراما

رضا //الله عليج مريم امي هم خلت شيلتها على خشمها ونعت 

مريم // لا ليش الچذب هالمره ام رضا صارت مدنيه درجه اولى كله اسوكتي حياتو ولا تبچين قلبوشتي 

رضا //لا باالله 

مريم //وداعتك هاي امك مو هينه تعرف لغات

وضحكنا كلنه وعمي رضا گال //انا خوك عز الله رحنا بالرجلين 

گعدنا نسولف وعمي رضا كل ساع وگال الابن اخو //سراج اتاخر 

وابن اخو يرد //عمي اروح الحگه

بعدها كتبلي سراج انهم ما شافو المقطع وانا رديت خليهم براحتهم ليش مستعجل

عرفت سراج سامع من كرم او ابنه شي عني وهذا الشي مضوجه ورادهم يشوفون المقطع لكن 

انا اتمنيت يشوفونه وهمه ما متوقعينه 

تقريبا الساعه بالثنتين ونص اجانه سراج چان مبين التعب والاجهاد على وجهه سلم وردينه لكن انا ما اعرف 

من اشوفه ليش ادنك وصوتي ما يطلع عمي رضا گله //ها سراج شنو الاخبار 

هو يتثاوب ويگول :: ابو علي تعبان ما اگدر افتح عيوني خلوني انام

وراح للغرفه يمشي بتثاقل وعمي رضا لحگه اختلس النظر المشيته المتعبه 

واحنه رحنه الغرفتنا وبقت خاله سكنه ورضا ابنها بالصاله

الكل تقريبا نام اله انا ما انام اله يبزغ ضوه الفجر قبل چنت من اخلي راسي ع المخده يتراوالي مياده وسلدار 

وهمه يخنگون بابوي هسه صار يتراوالي اثير وهو يغتصب بيه ساعات اطفر من مكاني وساعات اهومش 

باديه حتى ابعد هذا الكابوس عني وبس دموعي هي الي تعرف ليش انا هيج اتصرف لان محد يعرف بالي 

صار بس سراج وعمي رضا

الفجر طلعت اتوضا شفت رضا نايم بالصاله يمكن باقي يباوع ع التلفزيون وعرفت خاله سكنه 

راحت للغرفه الثانيه تنام اتوضيت وصليت ونمت ع الساعه تسعه گعدتني حنين وهي تگلي 

نا ديه اگعدي عمو سراج رايدج  

فتحت عيوني وانا ارد على حنين ... ... نعسانه خليني انام 

 - - لا اگعدي شوفي شيريد وارجعي نامي

عدلت شالي وطلعت حنين باوعت حتى مريم ما موجوده جاي امسح بعيوني لان من اتثاوبت دمعن هو دك الباب 

ودخل انا بعدني امدده رجليه ع الچربايه وخاله عليهن الچرچف گعد ع الحافه بدون ما يباوع الوجهي گلي 

::مبين بعدج ما تنامين اله وره الفجر 

ما جاوبته رجع گلي ::اگعدي اتريگي وخلي نروح 

سالته ... ... وين ؟

هو اتثاوب :: قيس اتصل وگال اريد اشوفكم انت وناديه وانا ما حبيت يجي اهنا ويندل مكانه 

   سالته ...... يعني شنو ؟

  :: اخذج ونروح نشوف شيريد ولو انا اعرف شيريد 

باوعتله گلي ::ياالله گومي اتريگي وبدلي 

... ... لا ما اشتهي هسه ابدل ونروح 

هو وگف وراح فتح باب الغرفه وگال الحنين ::جيبي لهنا

ورجع گعد حنين جابت صينيه وانطتها اله اخذها خلاها بالگاع ع الحصيره وگلي 

::ياالله خلي نتريك انا وياج

گعد وانتظرني انزل من الچربايه انا ما اعرف ليش صار گلبي يدك اتقربت صرت اخوط بالكوب على كيف

 بدون ما اباوع بوجه سراج سمعت صوته وهو يگلي ::ايي وبعدين 

انتبهت الكلامه رجع حاچاني :: اتريگي وخلي نروح

حسيت بايده يم حلگي وهو مسويلي لفه زغيره رفعت راسي شفته يباوعلي صارت عينه بعيني گلي

:: فكي حلگج واكلي ياالله 

اضطريت افتح حلگي واكل اللگمه وخله ثانيه بحلكي اخذتها وحاچيته :: انا اكل انت اتريك 

اكل وهو ساكت بعدها گام وگلي :: ياالله غسلي وبدلي حتى نروح

طلع واجت حنين شالت الصينيه وانا دخلت للحمام الي بالغرفه غسلت لكن ما غسلت شعري لان ما الحك اجففه 

بدلت لبست دشداشه نص وفوگها عبايه اسلاميه ولفيت شالي عدل دخلت حنين ومريم وهنه ايهزن بايدهن 

باوعت الهن واتساءلت بوجهي يعني شكو 

مريم //الله عليج ما لگيتي غير هذا اللبس تطلعين بي 

... ... وليش شبي 

حنين // مابي شي بس طالعه ويه واحد مثل سراج وهيج تلبسين 

... ... انتن بطرانات

طلعت شفته گاعد بالصاله ويه عمو رضا وابن اخو انا كلت ... ... صباح الخير 

عمي رضا گال //هلا بهالصباح شلونج بابا 

هزيت راسي وكلت ... ... الحمد لله 

سراج نفخ وكال :: ياالله نمشي وانت رضا ما اوصيك دير بالك 

رضا //لاتوصي حريص انت هم دير بالك على ابنيتكً

سمعت نفسه عالي طلع قبلي وانا رحت للمطبخ سلمت على خاله سكنه وهي ابتسمت وعدلت شالي 

وگلتلي //ديري بالج على نفسج

طلعت لگيته واگف اباب الشقه من شافني مشى قبلي وركب بالسياره وصلت هو اتقرب فتحلي الباب الي يمه 

ما حبيت اركب بالصدر وبنفس الوكت اتحاشيت ان اسمع منه كلمه تضوجني گعدت بالسياره وهو شغل التبريد

 وصار يدخن وانا خليت وجهي على الجامه وصرت اباوع للشارع كل ما اصفن ابحدي اتذكر اثير وشلون 

اغتصبني وراسا انز من مكاني وانا خايفه وگلبي يدك واصير ابچي طبعا هذا الشي يصير عندي لا ارادي

انا اهنا صافنه واتذكرت الي سووا اثير نزيت من مكاني وصار گلبي يرجف وعيوني انملت دموع هو انتبهلي 

وگف السياره باوعلي وكأنما عرف شنو بيه لم قبضة ايده وضرب استيرن السياره وانطاني منديل ورقي وگلي

:: امسحي دموعج 

اخذت المنديل وصرت امسح بدموعي لكن هنه ينزلن غصبن عني نفخ وحاچاني بقلة صبر 

::وتالي تبقيين تبچيين جبتي حياتج بس دموع شنو الي صار او شنو الي اتغير كافي اتركي البچي وفكري

 شنو راح تسويين

مسحت دموعي وصاح على رجال يبيع ماي گله ::انطيني بطلين ماي 

اخذ بطالة الماي وانطاني واحد گلي 

::غسلي وجهج واشربي شويه ياالله لان اتاخرنا ع الرجال 

انا شربت شويه واخذت شوية ماي بايدي وغسلت وجهي وهو يدخن جگاره سالته رغم 

اعرف الجواب ... ... وين رايحين 

هو بدون ما يباوعلي ::البيت قيس رايدنه 

... ... والي يريدنه مو لازم هو يجي 

::انا ما اريده يتورج على مكانه ويصير قال وقلت

هزيت راسي وصلنه ونزلنه انا ويا وهو يباوع الوجهي بعدين دگ الباب وطلع احمد ابن قيس سلمنه ودخلنه للديوان 

لگينه قيس منتظرنه وهو مدنك ويمه نفاضه مال جگاير مليانه شفته وهو صاير بارود 

دخل سراج وگف واتسالم ويا وانا هم سلمت هو گلي //هلا عمو هلا بيج 

گعدنا صاح //احمد جيب چايات 

بهاي الاثناء انفتح الباب وشفت عمه شمس جايه وياها نصره ام افراح الي اتقربت مني

/////////////////////////

الفصل الثاني والستون من هنا 

شكرا لزيارتكم عالم روايات سكيرهوم