رواية ناديه الفصل الثاني والستون 62 بقلم انين الليل

ناديه 

اتقربت مني نصره وعمه شمس نصره راسا بس شافتني حضنتني وبچت وگالت 

- - بيبي ناديه باالله وبيج سامحي افراح تره هي مخبله ورعنه وما تعرف تتصرف 

قيس وگف على حيله وحچى ويه شمس بعصبيه // انا مو گلت لاتجي لهنا هي الي شمخرتها وكبرت راسها 

شمس بخوف //قيس هي عمتي بس سمعت بناديه وسراج اجت 

:طلعيها خلي تروح الغرفتها

باوعتلي نصره وهي تگول// بيبي ناديه لاتحطمين العايله مثل ما امج حطمتچن ومثل ما افراح حطمت بيتها 

فدوه بيبي ابوس رجلج لاتنسين افراح هم ربتچن وتعبت عليچن احسبيها امچ وغلطت بحقچ 

قيس بعصبيه //ولج شمس شگلت لو ترديني هسه اكفر بيج وبيها گدام سراج 

سراج گله ::على كيفك ابو احمد (وآشر الشمس تطلعها )

انا بقيت ساكته ما اعرف شنو احچي طلعت شمس ويه نصره الي چانت مقهوره كلش والي گوه تمشي 

والي مصيبة افراح هدت حيلها سراج گله ::اهدا ابو احمد مو هيج الحچي 

قيس //خليني سراج 

سراج ::لا تنسى هاي امك 

قيس بحرگه// امي امي الي ما حسبت النه حساب والي من افراح هلگدوتها الي تريده تسوي وتاخذه ما تقبل 

نحجي وياها ولا ننصحها ولا نصيح عليها كله بايدها واذا بيوم اتجرأنا نحاسبها هي لو ابتهاج تره هاي الي 

تشوفها هسه مكسوره ومقهوره تسوي روحها طايحه ونركض بيها للمستشفى لو تبقى تدك على روحها 

وتلم علينه الناس وابوي مساندها كلمه والثانيه ما الكم شغل ابناتي 

وانا ومحيي نسحك على نفسنا بس حتى نرضيها ومن كبرنا وافراح تزوجت گلنه يمكن تتبدل وثق ياسراج انا 

ما قابل لا على تصرف ابوي ولا على تصرف امي شويه من اتوفى ابوي شويه ها سيطرت لكن طلعت فاشوش 

لا مسيطر ولا ابد

اجت شمس جابت الچاي وهي تگول //من امس لليوم قيس بس جگاير حتى قطرة ماي ما خلى بحلگه 

سراج :: افه عليك ابو احمد لا ما مقبوله منك 

باوعلي قيس وهو يگول //سراج انت تدري محيي وين (وخنگته العبره ) 

سراج هز راسه ::لا وين 

شمس //محيي من سمع بالمصيبه وهو اخذ السلاح وراح يم مركز الشرطه يريدله بس مجال حتى 

يدخل ويكتل افراح

قيس /|اشرب چايك سراج 

::لا ما اشرب اذا مو انت تشرب استكانك 

انا باقيه ساكته بس اسمع لكن ما اخفيكم گلبي يتگطع على عمي قيس وحتى محيي فد انسان مؤدب ويمتلك هدوء 

واخلاق عاليه حرامات افراح وابتهاج اخواتهم وبقيت اسال نفسي ليش افراح واختها ما طلعن مثل قيس ومحيي 

سراج خاط الاستكان وقدمه القيس وگله :: لاتردني ابو احمد 

اخذه من سراج وصار يشرب وگوه لازم نفسه ما يبچي بعدها باوعلي واتقرب مني وگلي 

بابا ناديه انا ردت اجيج لكن سراج گلي انتم تجوني

سراج ::اي ابو احمد ما ردت احد يعرف بالي يصير والكلام الي تحچي احنه الاربعه وبس (يقصد بالرابع عمه شمس )

قيس //طال عمرك سراج (باوعلي قيس وگلي ) بابا ناديه انا ما اگلج افراح زينه لو رجلها خوش ادمي لو بناتها 

مؤدبات لو ولدها اسباع لا افراح اسقط وحده على وجه الارض الكتل قليل بحقها وحبل المشنقه قليل بحقها والحرگ 

قليل بحقها 

- - - شوفي انا هاي صار عمري اكثر من اربعين سنه عايش ويه اقاربنا ويه الجوارين بالدائره عايش باخلاقي 

الناس تاخذني للكلفات ما اقبل بالتجاوز كل ما تجي وهاي شمس (واشر على عمه ) كل ما تجي اساليها شسوي بيها

شمس //الشهاده ال الله ياخذها للغرفه البرانيه مسوينها مخزن ويدخلها ويزوعها العافيه كله على مودج وعلى مود حنين 

وحتى محيي من يجي يحچي عليها ويگللها خافي من الله لا تظلمين بنات عباس حرام عليج

قيس //لكن هي صلفه وما تنرد والي خلاها هيج تسوي اول ما ابوي وامي وبعدين هذا الطلي هويدي

باوعلي قيس وگال //عمي ناديه مو عبالج اگلج اتنازلي عنها ويروح حقج لا وداعتج وروح عباس انا اخذلج حقچ

منها مربع وهاي 

(لزم شاربه )هذا شاربي مو عليه اذا ما اخذلج حقج والله شاهد وهذا سراج هم شاهد عليه 

اتقرب وبقى واگف وگلي //عمي الانسان ما يسوى شي بدون شرفه افراح خلت شرفي بالطين ولازم اعاقبها 

وعقابي راح يكون عسير صدگي اله اخليها يوميه تتمنى الاعدام وما تحصله

1

— - - وارجع واگلج بكيفج ما اجبرج لان لو انا ابمكانج ما اتنازل عنها الساقطه لو منو يجيني  

وصدگيني ياناديه اذا ما اتنازلتي عنها ما راح ازعل منچ ولا اعتب عليچ لان حقچ انتي واختج الي شفتي 

منها ومن بناتها مو شويه الي شفتي يشيب الطفل عمي انتن قويات واتحملتن افراح وهادي 

افراح مو تستاهل بس السجن لا وداعتج تستاهل الاعدام بالسوته بيچ وباختچ

انا بلا شعور صرت ابچي لان اتذكرت الي سوته بينه اجت يمي عمه شمس وحضنتني وهي تگلي 

:حبيبتي ابنيتي اسكتي لا تبچيين 

صرت اشهك بالبچي واريد اگل القيس ... ... خليها اتعفن بالسجن خليها تضوك الي احنه ضگنا من عارها والتشفي

 بينه لكن ما گدرت احچي حسيت احيانا احنه النساءشگد نصير لئيمات لمن نسوي اشياء ما يتقبلها مجتمعنا شگد نجني

على نفسنا وعلى اهلنه 

شمس جابتلي ماي وانا شربت شويه سراج گال القيس

::خابر محيي خلي يرجع البيته وگفته اهناك ما بيها فايده وان شالله يصير خير 

قيس ساكت ومدنك انا كأنما انلدغت من سمعت كلمة سراج يصير خير وگفت وانا ابچي وامتزجت دموعي ويه

كلامي واگله 

... ... ايي هسه هسه الكل يريد تطلع افراح بس حتى ما تتعيرون مو هي صار عشرين سنه وهي تعاير بيه انا واختي

وهاي امك الي تبچي وتگلي هي ربتج مثل بناتها اعتبريها امچ وغلطت بحقج امي مياده الي كتلت ابوي والي اقرب 

الناس اليه وانا بحاجته سماني بت مياده 

......... تردوني اتنازل عن افراح ليش انتي عمه شمس (باوعتلها ) اتصوري وحده من بناتج وابيتكم موابيت  

عمها ابيتكم تسبح بطشت وبالبيتونه وبالشتا شيصير بيج تقبلين 

من غير من ارجع من المدرسه اصعد للسطح بس حتى اغسل اديه ورجليه بماي ثلج 

والشغل والتعب والتشفي ولمن خلت على الملابس كلور وصرت شهر وانا البس نفس الملابس وساعات اروح بيهن

 ما ناشفات

......... وهواي اشياء وكله اگول مي خالف مي خالف وطلعو كل هاي السنين وهاي المذله وهمه عايشين بخير 

ابوي هي ورجلها ولدها وبناتها وهم مي خالف بالاخير رجع النه حق ابونا والاخذو كل السنين الفاتت ما طالبنه بي 

اتقربت من قيس وگتله ... ... بس عمي الي انكسر ما يتصلح 

هو باوعلي وكال //يتصلح بابا انا اوعدج

تستمر القصة أدناه

باوعت السراج وجريت حسره وانا اتذكر لحظة اغتصابي احس روحي طلعت بچيت حييل وشفت باكيت 

الجگاير مالته ع الطبله اخذته وطلعت جكاره وهمه صافنيين عليه وكسرتها بالنص سويتها نصين وقدمتها القيس

وگتله ... ... هااك صلحها 

هو باوعلي باستغراب رجعت گتله ... ... اختك سوتني مثل هاي الجگاره 

باوع قيس للجگاره وهو عاكف حواجبه خلاها بايده واتقرب مني وهو يگلي

: صدك ما اكدر اصلحها وارجعها مثل قبل بس ثقي ياعمو سواء اتنازلتي او لا اله اخليها الافراح مثل الطفو 

مال الجگاره وراح تشوفين بعينج وتسمعيين باذنج 

شمس اتقربت عليه وگالت //عمه ندووش قيس شمر عگاله وما قبل ايلبسه وانتي ما تقبلينه بالفضيحه

فعلا اشوف قيس لابس بس دشداشه والشماغ الي دائما يلبس العكال فوگه هو هذا لبسه من يرجع من الدوام على اعتبار 

هو رجال معروف انا من سمعت ما عقبت واشوف سراج صار يحچي ويا بدون ما اسمع شي 

باوعلي سراج وگلي ::ياالله نمشي 

طلعنه ورادت عمه شمس تطلع ورانه لكن سراج گلها ::ابقي ام احمد هذا بيتنا

وطلعنا ركبت بالسياره وهو صار يسوق وهو ساكت بعدها باوعلي وگال ::راح اوصلج للشقه وانا عندي شغل 

بدون ما اباوعله گلت ... ... وديني البيت هادي 

::بعدين هسه ترجعين للشقه 

... ... وانت وين رايح 

::عندي شكم شغله اخلصهن وارجع 

جريت نفس لان احس بي زعلان عليه لان كسرت الجگاره گتله ... ... انت ليش هيج تسوي

هو بدون ما يباوعلي جر حسره وگلي ::شسوي 

... ... ليش هيج متعب نفسك وياي 

هو ما جاوبني تم ساكت وصلنه للعماره الي بيها الشقه وگلي ::انزلي 

قبل لا انزل اجه عمي رضا وفتحلي الباب وهو مبتسم // روحي بابا يم خالتج واخواتج 

نزلت بدون ما احچي وانا متاكده سراج ما حرك السياره اله اتاكد من دخولي للشقه

/////////////////////////////////////.///////////////////////////////////

سراج 

من رجعت نص الليل للشقه رجعت وانا كلش تعبان فتحت الباب وصارت عيني بعين ناديه هي بس باوعتلي 

نزلت راسها 

وبوقتها رضا راد يعرف شنو صار لكن انا كان اهم شي عندي الزم الفراش وانام وفعلا بس غيرت ملابسي وخليت

 راسي ع المخده ما حسيت اله على اتصال اول مره ما جاوبت ولا حتى شفت منو الي متصل لكن ثاني مره 

گعدت واخذت الموبايل ولگيت قيس الي جاي يتصل عليه جاوبته وانا منعس

::الو 

صبحك الله بالخير سراج 

::هلا ابو احمد 

گعدتك من النوم 

::لا عادي آامرني 

والله جاييك اريد اشوفك انت وناديه 

فركت عيوني وتثاوبت ::ها ابو احمد لا احنه فد شويه وجاييلك

باوعت شفت رضا نايم وطلعت لگيت الكل نايم بس ام رضا الي صبحتها بالخير وگتلها تروح تنده ناديه لان اريد 

احچي وياها 

هي گالت //ايي خلي احضر الكم الريوك واتريك انت وهي واحچي وياها

جاوبتها :: 

ام رضا // خويه البنيه ما جاي اي شي تاكل واسمها تبچي البنيه مجروحه وكل شي مو زين صاير وياها 

دير بالك عليها وساعدها ما طوول اخذت شغلتها هيه واختها على عاتقك

دارت تمشي راحت گعدت البنات مريم وحنين الي طلعن وحنين اتقربت مني وهيه تتثاوب // شنو عمو انت ما تنام 

جاوبتها ::لا نمت وشبعت نوم روحي گعدي ناديه 

حنين //خاله سكنه گعدتها وهي ابد بسابع نومه 

::روحي گعديها حنين نريد نروح عدنا شغله ضروريه 

حنين //صار هسه اكعدها

وراحت حنين ورجعت وهي تگول// كعدت وتگول هسه تبدل وتطلع 

باوعت الحنين ::روحي جيبي الريوك 

ودخلت لكيتها بعدهي بفراشها وحنين جابت الريوك وانا طلبت منها تتريك وياي بالبدايه ما قبلت لكني 

اصريت عليها وثلمت خبزه ودنيتها من حلگها شفتها گوه تلوچ بيها 

اباوع الها اشوف ناديه الانسانه المحبطه المخذوله والمجروحه جرح ابد ما يندمل

طلعت انتظرتها على ما غيرت ملابسها وركبنا انا وياها بالصدر اسوق وهي صافنه وبصفناتها كل شويه 

وتنز بخوف وترجع تصفن ودموعها ينزلن على خدها 

اعرف بيها خايفه ومقهوره وكفت السياره وفهمتها لازم تبطل بچي لان الدموع ما تسوي شي

وصلنا انا وياها البيت قيس وهناك

 هي ما اتحملت صارت تبچي وهي تتذكر الي صار بيها من افراح وبناتها 

بصراحه انا قيس كلش احبه واحترمه هذا الرجال شگد ما اتكلم عنه مو بحقه انسان خيير والنعم منه من 

شفته وهو مدنك وذاب عگاله وزوجته تكول ما مخلي بحلگه لو قطرة ماي وفعلا چان يحچي وريگه ناشف 

چان ابدي اساعده لكن هالمره القرار بايد ناديه واهنا انا فكرت انو ناديه لازم اتقرر هذا الشي من ذاتها بدون ان 

اي احد يضغط عليها لذلك انا فهمت قيس انو احاول اعطل القضيه قدر المستطاع بين ما نشوف قرار ناديه واهنا

 صار لازم اتحرك

الشي الي قهرني لا يمكن انضربت من عنده طلقه هو لمن ناديه اخذت الجكاره وقسمتها نصين وگالت القيس 

انو افراح هيج خلتني الكل اكيد عبالهم بسبب الاختطاف او الخوف هيج صارت نفسيتها لكن انا بس 

اعرف شنو قصدت ناديه وعبالي راح تنهار وتحجي لكن الحمد لله ما حجت اي شي

طلعنا وتمينا ساكتين ولو عندي عتب وياها لكن ما ردت اضغط عليها بالطريق طلبت مني 

تروح البيت هادي ما اعرف تريد تروح تاخذ اغراضها او تريد تروح تتشفى وتتشمت 

بعد ما ادري الله العالم لكن انا كان عندي شغل فما وافقت گتلها :: بعدين اكمل شغلي واخذج بايدي

هي سكتت لكن وجهتلي كلمتين هزت كل مشاعري وهي تگلي ...... انت ليش هيج تسوي وياي 

انا ما جاوبت وصلت للعماره واتصلت برضا وبعدها دگيت هورن هو طلع وناديه فاتت للشقه ما حركت السياره 

اله اتاكدت منها هي صارت داخل الشقه

كعد رضا وسلم وگلي //ها يا صاحبي 

جريت نفس ::شهنا رضا الامور اتعقدت 

رضا بابتسامته المعهوده //ما اتعقدت الامور انحلت وناديه وحنين راح ياخذن حقهن وانت ترتاح وهنه 

هم يشوفن طريقهن 

باوعتله ::تتصور انا ارتاح ؟

رضا هز راسه //اي ليش لا انت لازم ترتاح (باوعلي ) سراج لا تسبح عكس التيار لازم تواجه التيار حتى لو ايغرگك

::والله جاي تتفلسف انت وين وانا وين 

رضا //ههههههه هو انا الفاهمك 

::شفاهم رضا 

رضا //بعدين سراج هسه وين رايحين 

::اشوف افراح 

رضا باستغراب //بروح ابوك 

::اي وروح ابوي 

رضا //سراج ليش تاخذني وياك 

باوعتله ونفخت // لان انت اخوي وصاحبي وانت گلبك على بنات عباس مثلي وزايد (باوعتله واغمز ) 

هسه انا گلبي عليهن لان هنه بنات ابن عمتي وابوهن صاحب فضل عليه ولان هم ابوي وصاني بيهن بس انت 

ليش هلگد متعاطف وياهن 

رضا جر حسره وگال //لان ما يحس بالظلم بس الي انظلم وانا ظليمتي ما تقل عن ظليمتهن الفرق انو انا انظلمت 

من كبرت بس هنه المسكينات من هنه زغار الى ان كبرن ،

جاوبته :: كلامك صحيح بس مو هذا السبب 

رضا هز ايده // اووووه اشتغل سراج بالتحقيق تخلي انشوف هاي الباتعه شتحچي وذاك الوكت سهله 

عكفت وجهي :: ياهي الباتعه 

رضا // على گولة عمتك جميله افريحه مرت هويدي 

جاوبته :: هههههه صدك والله. (باوعتله ) وانت 

رضا // انا شبيه 

:: ما بيك شي بس اريد اعرف انت شضام عليه ،

هو ما باوعلي انا رديت علي ::ما طول سكتت يعني ضام مو.هسه اريد اعرف شضام

رضا بنتر //لا مو مو هسه انت اترك عنك شضام عليك وخلي نشوف حيزبونه شتگول 

باوعتله بنص عين ::اي بدل بدل بس وين تروح وداعتك اول وتالي اعرف كل شي وانت الي راح تگوله الي

وشنو هاي يابه حيزبونه 

رضا بضحك //هاي اسم الدلع طلعته حنين المرت عمها 

:: هههههه والله ياحنين بس تدري احلى فقره من دخلت البيت هادي وهي لابسه عباية راس

رضا // اگلك هي طلبت هيج تلبس هنه خوش ابنيات على گولة ......

عوجت حلگي ::ليش سكتت گول على گولة سكنه خو انت هالايام ما شاء الله بنص الخير

هز راسه رضا وما جاوبني انا رديت حچيت ويا وگتله ::شوف رضا شگد احبك يمكن اكثر من روحي بس احب

 ابوي منير اكثر منك شوف وروحه الابوي بس اكمل من افراح واعرف الي اعرفه اذا ما تصارحني بكل شي ثق 

باالله اروح اخطبلك مره واعد عليها وغصبن ما عليك تاخذها لان اخلي سكنه هي التخطبها الك لو ماكو تفهمني 

بكل شي وشلون اشوفلك ناس عراكه يعني اذا تبدل يطگوني طلقه ويخطفون لو سكنه لو مريم على اعتبار هنه اجن 

وخطبن

رضا باستغراب //عليك الله سراج واهون عليك ؟

هزيت راسي ::ايي تهون وتهون وانا حلفت بروح ابوي 

هو جر نفس قوي ونفخ وگال //الله كريم بس بالاول عدل امورك

وصلنه للدائره ولگيت عبد العزيز منتظرني رغم هو لازم يكون ابيتهم لان كان خفر بس هو ارتأى ان ينتظرني ويعرفني

 ابديله الي رحب بينه بعدها طلبت ان اشوف افراح الرجل جابها للمكتب وهو طلع شفتها الافراح وهي منهاره 

  بوكتها اتذكرت مياده وشلون كانت ما مهتمه عكس افراح

من شافتني اجت عليه وهي تگلي // خويه سراج باالله وبيك والله انا ما مسويه شي 

انا باوعت الها وگعدت وره المكتب وانا اخزر بيها بعدين گتلها :: اگعدي ام ياسر 

هي گعدت ورضا چان واگف اشرتله طلع بطل ماي وخلا گدامها انا بقيت ساكت وهي ما اعرف اوصف حالها بين 

الخوف والانهيار گتلها ::ام ياسر بلا لف او دوران احچي يمكن اگدر اساعدج 

هي شربت شويه ماي //سراج انا ما مسويه اي شي همه ايچذبون

::بشنو ايچذبون ؟

افراح //انا انا ما وديتهم ايخطفون ناديه 

دگيت الجرس واجه الشرطي جايب توفيق هي بس شافته صار وجهها ينطي الوان وهو صار يخزر بيها انا گلت 

::ها افراح اتصور هذا هم ما تعرفينه 

هي مدنگه وهزت راسها وگالت كانما اتشاورني //لا منين اعرفه 

توفيق راسا جاوب //اتچذب استاذ هي الي اتعرفت عليه عن طريق بتها والي وعدتني اتزوجها اليه بس 

تتخلص من ناديه

رفعت حواجبي وسالته ::بتها مني ؟

توفيق //استاذ هديل انا احبها وهي هم تحبني وهي عرفت بالعلاقه وگالت مستحيل تتزوجها لان ناديه ما راح توافق 

وراح تقرا براس ابوها واخوها وتفر على بتي السالفه واحتمال يكتلونها 

   جاوبته باستهزاء :: وانت صدگتها 

توفيق هز راسه //اي استاذ صدگتها لان انا احب هديل واريد اتزوجها والله على سنة الله ورسوله

:: زين ليش ما تقبل ناديه تتزوجها خو اذا تكرهها تزيحها من طريقها مو 

توفيق //اي استاذ تگول ناديه تكرهنا وما تريد النه الخير وهي كله بايدها وهاي (اشر على افراح ) هاي 

فقيره لا حول ولا قوه 

::ما جاي افهم المفروض ناديه تكون لا حول ولا قوه مو هاي

توفيق //استاذ هي فهمتنا انو ناديه مو بت حماها وهي انفرضت عليها وحتى البنيه تعرف هذا موعمها 

لذلك البنيه مسويه علاقه مو شريفه ويه عمها لا وهمه ويه ابنها 

افراح صارت تحچي بتوتر //چذاب لا تصدگه 

هو عبالك ما سمعها //ومو بس هيج استاذ مخليه عمها يسجل بيت باسمها وهذا البيت مشتري بذهب مرته وبناته

شعلت جگاره وگتله ::زين اريد اسالك 

توفيق //اي استاذ 

::هي تگول انت چذاب وانت تگول هي استغلتني لان عرفت بيك تحب بتها ذكرني شنو چان اسمها 

توفيق //مني استاد 

::بتها شنو كان اسمها 

هديل 

:: اي هديل انت من اجيت للبيت اول امس شفت هديل موجوده

توفيق هز راسه // اي استاذ شفتها وخزرتها لان شفتها لابسه حلقه او واگفه يم ولد عرفته زوجها 

:: ها يعني هديل اتزوجت 

توفيق //اي ضحكت عليه هي وامها واتزوجت 

:: يعني افهم من كلامك انت خطفت ناديه مو على مود تقبض فلوس او تساوم خطفت ناديه على مود هديل

توفيق //استاذ انا ما خطفت صدگني هي هاي اليمك (اشر على افراح ) اجتني وطلبت مني اتخلص منها بالبدايه

 رفضت بعدين هي صارت تبچي وتتوسل وراح تهجم بيتي اذا ما اتخلصني منها بعدين گالت عرفني على واحد يگدر

يخطفها عاد انا عرفتها على جريد اقصد ليث 

:: هاا وكل هذا سويته بس حتى تتزوج هديل 

توفيق //اي استاذ احبها ومن شفت دموع هايه وسولفت على ناديه شلون لاعبه بيهم ومخليتها هي وهديل خدامات

 ويوميه كاتلها رجلها وياساعه الابو يكتل ابنه انا اتعاطفت وگلت خلي اساعدها

::يعني تريد اتفهمني انت ما قبضت فلوس من هايه الي تگول عليها (واشر على افراح )

توفيق هز راسه وگال //والله يا استاذ خسرت من جيبي بس مع الاسف ضحكت عليه 

::لكن هذا الشي ما يعفيك من المسؤوليه 

توفيق وهو مدنك //ادري بس كدامك استاذ انا اعرف شلون اخذ حقي منها ومن بتها 

:: زين شنو يثبتلي كلامك صحيح مو احد دازك دافعلك فلوس حتى تتهمها هذا الاتهام الخطير 

- - - منو دازني مثلا 

رضا //. يجوز ناديه دافعتلك حتى هالشكل تحجي 

- - - لا استاد انا ما عايز فلوس حتى ناديه الي ما اعرفها تدفعلي انا انضحك عليه 

  :: شنو الدليل 

 - - - رقمها ورقم بتها موجودات بجهازي تكدرون تاخذونه وتشوفون من يمته انا وبتها بيناتنا محادثات وسوالف وحتى بيني وبين هاي شكد اتصالات 

 باوعت الافراح //. هو هذا الي راح نسوي حتى كل واحد بيكم ياخذ جزائه 

دگيت الجرس واخذو توفيق وانا رجعت وره المكتب ورثت جگاره وباوعت الها وهي مدنگه

:: هاا افراح كافي لو اجيب جريد 

هي جاوبت //چذاب انا ما سويت شي ولا اعرف ذوله هي ناديه ...

::ها ناديه شبيها ؟

افراح بخوف //هي انطتهم فلوس وگالت الهم يحچون ويتهموني 

بقيت ادخن وانا ساكت وهي گاعده ومدنگه وگفت وگتلها ::چان ابودي اساعدج الخاطر ابو احمد لان 

هو عزيز عليه بس اذا انتي ما تردين اتساعدين نفسج بعد انا اسحب نفسي

باوعتلي بترجي وگالت// فدوه سراج الله يخليك ساعدني 

هزيت راسي وگلت :: ايي غير اسمع الحقيقه غير افهم ولو انا كل شي فاهم وكل شي اعرف بس اريد اتاكد 

هي باوعتلي باستغراب هزيت راسي واتدنيت يمها وشاورتها 

::ايي اعرف كل شي اعرف من اول ما عرضتي نفسج على عباس وهو رفضج تتذكرين

هي فتحت عيونها وكانما واحد شمر عليها ماي ثلج وانا كملت 

::ها اگلج بعد عباس چان يحب زهراء وانتي تحبينه ومن رفضج انگلب الحب الى كره ولعبتي على هذا الطلي 

هادي وما اعرف شلون اتزوجتي واتشمتي بعباس من رفضته زهراء بعدها عرضتي اختج ابتهاج على عباس 

ولان چانت مو حلوه واستهزأ بيها ورفضها لكن قبلها هو صاحچ وگلچ هو رفضچ فشلون تسمحين النفسج 

تتخطبيله اختچ صدك عود ليش ردتي ياخذ اختچ ؟

ما خليتها ترد لزمت الكرسي وگفت ورا :: ما علينه بعدين اتزوج مياده وانتي حقدتي اكثر 

لان هي حلوه وزغيره وصارت الكل بالكل زاد كرهج 

هي جاوبت //لا لان عباس گاللها انو انا چنت احبه وهو رفضني فصارت اتسمعني كلام 

::هاا وهذا السبب الي خلاج تحقدين علي وعلى بناته 

هزت راسها //ايي حقدت وزاد حقدي لمن بيوم وفاته كتلني هادي گدام الناس ودماني وطردني من وره ناديه 

وحنين قررت ما اخليهن يتهنن لا هنه ولامنيره

رضا حچى ما صبر /|عااد اشتغلتي 

هي باوعتله //ايي من رفضني عباس حسيت بكرامتي انهانت وعرفت هو رفضني على مود زهراء 

وقررت اخذ هادي بوكتها هادي چان بالمعهد وساعات يجي ايمر علينه وهنا بديت اسوي ويا علاقه كأي شاب 

وابنيه وامي ساعدتني 

::ها شلون

افراح //فد يوم اجه وما خلينا ايروح بات عدنا وانا رحت يمه بالليل وبمعرفة امي وعلى اساس دخلت 

وشافتنه سووا ...

من يمي خجلت من رضا قاطعتها ::مفهوم ضغطتن علي حتى يخطبج ويتزوجج

  هزت راسها // ايي صحيح 

::بس هادي الي صار بي وتصرفاته مال واحد اثول خصوصا وره وفاة امه

هي سكتت ما جاوبت انا گتلها ::افراح احچي خلي الگالج عذر لا يجي الضابط ويقررچ وتنفضحيين 

هي باوعتلي انا رديت سؤالي ::افراح هادي انثول من وره وفاة عباس بس صار لايحل ولا يربط وره وفاة امه 

هزت راسها //اي صحيح الاحداث تسارعت وهو دخل كلية هندسه وانا خفت يشوف بنات ويا ويعوفني عاد ......

::ليش سكتي 

رضا // مبينه سراج عاد اشتغلله هي وامها بالسحوره مو صحيح

افراح عضت شفتها وگالت //ايي لان عمتك من مات عباس ومياده انعدمت طلبت من هادي يتزوج زهراء 

ويسكنون بالبيت يمها حتى زهراء تدير بالها عليها وتربي بنات عباس 

::وانتي من سمعتي اشتغلتي مو

هي جاوبتني //انا طول عمري وانا اسمع كلمة مو حلوه ما تفتهم ما تعرف تحچي مبهذله دومهم يفرقوني من 

مياده الحلوه الانيقه ودووم اسمع نوال وسلوى يعيبن عليه ويگولن الامهن شنو هاي مرت هادي رغم ما يبننها

 گدامي اكثر من مره اسمع البنات ايگللها شوفي الهادي وحده مثقفه حلوه بس هي مالت الله منيره ما چانت تقبل

 لكن من اتوفى عباس وانعدمت مياده وهي رادت تزوج زهراء الهادي انا اهنا مو بس حقدت عليها وكرهتها

رضا //عاد انتي اشتغلتي 

افراح //انا ردت احافظ على زوجي وعلى بيتي 

::شلون 

افراح //انا ما سويت بس الهادي خليته ما يشوف احد احلى مني وما يسمع بس كلامي 

::واضح 

رضا //يعني سويتي طلي ما يندل دربه 

هي ردت //انا ردت احافظ على بيتي مو من حق اي واحد يعرض علي الزواج بس حتى يحافظ 

على بنات اخو ويجوز هنه مو بنات اخو لان مياده حبلت بولد مو من عباس واعترفت بلسانها

::هاا يعني انتي خليتي هادي ما يردلج كلمه وانتي الي زرعتي بنفسه انو البنات مو بنات عباس 

اتقرب رضا وگلي //مبينه سراج والا اكو واحد عده غيره يخلي بنات اخو يسبحن ابيتونه ويگعدن 

بمخزن لو ما سحر قوي وقوي كلش 

باوعتلها ::هاا افراح شو سكتي ؟

هزت راسها //ايي انا ما مسؤوله اربي بنات مياده ومنو يگول هنه بنات عباس

::لا انتي متاكده منهن هنه بنات عباس ولان هنه بنات عباس انتي كرهتيهن لان عباس رفضج وفضل عليج

زهراء ومن رفضته بقى رافضج وتالي اخذ مياده الحلوه الزغيره الدلوعه مو

هي دنگت ما جاوبت گتلها ::بعدها انتي اجنج اثنين خدامات وانتي وبناتج گاعدات وهنه ايخدمن لا وفوگهن 

وياهن ثروه اجار بيتين وراتب وايراد محل وفوگ كل هذا المحل الي اخذه هادي وكمل افلوسه من فصل 

عباس واشترى البضاعه الله عليج كل هذا ما ترس عينج وانتي تكرفين بالخير سلف وذهب وبيوت وعماره 

وسيارات وخدامات كل شي ما مكلفاتچ بس لگمتهن الي ياكلنها من فضالتج انتي وبناتج يعني انتي عشتي ملكه 

رجال ما يردلج كلمه وفلوس وخير 

زين شنو خلاج تسوين هاي الجريمه وتشوفين ناس يخطفوهن ولا تنكرين لان الكامرات بمزرعة جريد مصورتج

 فاعترفي احسنلج لان الانكار ما يفيدج

افراح من عرفت الكامرات مصورتها صارت ترجف وگالت //هي ناديه هي الي جبرتني هيج اسوي 

::ناديه شلون وليش ؟

افراح // طغت وشافت نفسها بفلوسها 

هزيت راسي وباوعت الها باستهزاء :: تؤ هاي خليها على صفحه ولا تبررين اشياء ما صايره احچي 

الصدك احسن الچ الموقف ما يتحمل اتچذبين

بقت ساكته ما حچت اتقربت يمها وشغلت المقطع الي بي هديل هي شافته صار وجهها ينطي الوان باوعتلي جاوبتها 

:: يمكن هذا هو السبب ؟

هي صارت تعصر بايدها وبلعت ريگها بصعوبه انا حركت راسي جاوبت //هي رادت تبتزني وتفضح بتي ان......

قاطعتها ::مو گتلج كل شي ادري لاتماطلين بكلامج المقطع اله اكثر من سنه شنو اتذكرت ناديه تبتزج افراح احچي

 لاتدورين وتلفين مو بصالحج تره والله لو ما قيس ما اجي چان اخليچ حالج حال جريد واثير يمكن توفيق حكمه 

اخف بس اخليج مثل ذولاك الچلاب 

فاحچي خلي افتهم ولا تبررين سوايتج

هي جرت نفس وگالت // ياسر ياسر راد يتزوجها وانا ما وافقت لكن هو گلي اذا ما اخذها اكتل نفسي 

::وانتي طبعا ما قبلتي لان الهسه حقدج على عباس انووب تاخذين بته 

هزت راسها //. لا مو هذا السبب بس منو يقبل ياخذ بت وحده امها كتلت ابوها هي وصاحبها وانوب اعترفت 

بلسانها هي حامل منه الكل يخاف ومحد يقبلها على ابنه وياسر متخبل يريدها

:: عاد انتي كلتي لازم انتقم منها 

- - لا انا بالبدايه ردت اقنعه ياخذ بت اختي ابتهاج 

::ما علينه شصار 

افراح //ياسر يوميه يجي يتوسل بيه لكن انا ما اريده ياخذ ناديه اكرهها مو بيدي وهي لازمه عليه وعلى بتي لزمه 

::لا هي لازمه على بتج 

افراح //ايي مو راح يكولون هاي تربية امها 

::لا مو هاي بس انتي شفتي بتج الي امها وابوها موجودين والي تصرفون عليها ومدللينها شوف شلون تتصرف وهاي

 اليتيمه والي طول عمرها خدامه شلون مربيه نفسها مو

هي سكتت ما جاوبت حاچيتها ::افراح لكن كل هذا الشي مو سبب قوي او خلي انگول هذني اسباب ثانويه 

 يعني لا تقنعيني انتي اتزوجتي هادي وبعدج تردين عباس لو حتى حاقده علي وحتى لو على مود اختج 

فااختج اتزوجت وصار عدها اطفال وزوجها ما يخلف الها كلمه والفضل سحورتج انتي وامج 

  فاانتي چان ممكن اتسايسين ياسر او حتى اتسويله سحر وتبعدينه عن بتچ انا اريد اعرف السبب 

الحقيقي الي خلاج تجازفين وتأجرين ناس يخطفوها لازم اكو فد شي قوي خلاج تسوين هالشكل

بقت مدنگه ما جاوبتني انا حاچيتها :: جاوبيني افراح لا تبقيين ساكته اريد اعرف ليش سويتي 

هالشكل يمكن الگالج عذر 

هي باوعتلي وحچت بتعب // يعني سراج ناديه الي طول عمرها خدامه الي والبناتي وعرجه تتزوج وهي عدها

مليار من غير حصتها بالمحل وبيت ابوها 

::ها يعني انتي ردتي يتخلصون منها على مود افلوسها زين على فرض اتخلصو منها كل الحلال راح يصير

 الحنين يعني انتي هم راح تتخلصين من حنين

افراح // حنين فقيره وما تتحمل وبسرعه تصدك فنخليها توقع تنازل وكل شي يصير الهادي 

ابتسمت باستهزاء //قصدج الج 

هي ما حچت انا رديت عليها 

::زين كل هذا افتهمته منين جبتي صورتها الناديه الي راويتيها الامي وهي سهرانه ويه جماعه

رضا گال بعصبيه //اتخسى اذا توصل الاظفر ناديه بالشرف شنو انت ما تعرفها 

::على كيفك رضا خلي افتهم 

هي باوعتلي انا گتلها :: افراح من اريد اعرف الشي اعرفه ما انتظرج انتي تگولينه الي لكن انتي انكشفتي ليش 

فبركتي مقطع ودزيتي الامي 

هي ما جاوبت گتلها :: اذا ما تجاوبيني انا راح ادز مقطع بتج القيس والهادي والعمار والياسر

هي راسا جاوبت //لان عرفت بيك ما راح ترتاح اله تلگاها ومنا اثير هددهم فاانا گلت خلي احچي ويه امك 

واشوه سمعة ناديه حتى هي تجبرك ما تدور عليها 

:: ليش متاكده انا ادور عليها 

هزت راسها //لان اعرفك ما ارتاحيت ولا هدالك بال الى ان لگيت الي كتل عباس 

جاوبتها ::مو انتي تكولين چان الي علاقه بمياده وسعيت باعدامها لان خانتني ويه سلدار وحبي البنات عباس لان 

عندي شك هنه بناتي

هي دنگت انا گلت بعد ان جريت نفس قوي :: لكن انتي ياافراح قشمرتينا وضحكتي علينه اكثر من مياده 

باوعلي رضا وفر ايده يعني شلون باوعتله وحچيت 

:: هاي بقت لازمه اعصابها وهي تبين انو تكرهن وانو ناديه فعلا شردت يعني ما حاولت تبين هي تحبها او  

خايفه عليها بالعكس كل شويه اتذب حچايه تاجج الوضع

جاوبتني //سراج انا خفت على ابني ياخذ ناديه خفت تكتله مثل ما امها كتلت عباس 

:: زين جاوبيني منو هاي الي بالتصوير 

افراح //هاي هي نفسها الي صورت هديل 

هزيت راسي ::اي مني 

افراح //وحده ايگلولها نسرين

//////////

الفصل الثالث والستون من هنا 

شكرا لزيارتكم عالم روايات سكيرهوم