رواية ناديه الفصل الثالث والستون 63 بقلم انين الليل

سراج

سألت افراح عن الشخص الي صور او الي فبرك التصوير على انه الناديه فكان جواب افراح هي نفسها الي 

صورت هديل وسالتها عن اسمها فگلتلي اسمها نسرين 

رجعت گعدت وره الميز دكيت الجرس اجه الشرطي كتله :: جيب كهوه 

اجه الشرطي وخلى الكهوه ع الميز اخذت انا ورضا هم اخذ كوب صرت اشرب سالتها

- - يعني انتي فبركتي المقطع وخليتي توفيق يتعرف على هديل عن طريق هاي نسرين 

هزت راسها // ايي 

بصراحه انا ما اعرف مني نسرين لكن بحدسي ومن خلال تجاربي وعملي عرفت بان نسرين هي انسانه وضيعه

ورخيصه وممكن ان تسوي اي شي مقابل الفلوس  

:: وين هاي وشنو وضعها ولا تحاولين تچذبين تره من اريد اعرف شي برنة نقال فااحچي بلا ما تماطلين 

افراح // حتى انا ما اعرفها بس من نناديه هددتني بمقطع هديل بالبدايه لزمتها گطعتها وبعدين افتهمت من بتي 

هي عدها علاقه ويه هذا الولد ورحت شفته وحچيت ويا هو گال انا ما اعرف اي شي بس بعدين اعترفلي 

كال الي عرفتني وقربتني الهديل هي بنيه اسمها نسرين وشفتها وعرفتها هي مو خوش بنيه

:: عاد انتي اتفقتي وياها 

رضا // مو الطيور على اشكالها تقع رحتي اتفقتي ويه وحده ساقطه حتى تشوهين سمعة بنيه شريفه 

   افراح // اي بس ناديه تشوه سمعة بتي انا هم اريد احمي بتي 

:: لا انتي ردتي تحمين نفسج كلتي اسوي التصوير وتشوفه امنه وبعد ما ادور على ناديه (انتچيت ع الميز ) 

:: شنو افراح ما تعرفيني انا لو الف مقطع ولو صدك ناديه منهزمه ويه واحد ما اهدى ولا ارتاح اله اعرف الحقيقه 

واذا غلطانه انا اكتلها بايدي

هي بچت واتقربت عليه // اي سراج انا غلطت واريدك تسامحني وتساعدني مو الخاطر احد الخاطر قيس ومحيي

دخنت جگاره وباوعت الها :: اذا چانت مياده استحقت الاعدام لان قتلت عباس او ساعدت بقتله ولان خانته 

انتي تستحقيين الف مره تنعدمين لان عذبتي وضربتي وسرقتي وصرفتي وشتمتي وعيرتي واتشفيتي واخر

 شي خطفتي وحرضتي على القتل كله مو لان عباس رفضج بالعكس اخذتي هادي ازغر وشهادته اعلى 

ولا لان تكرهيين مياده هذيج انعدمت الى جهنم وبئس المصير 

ولا لان ضربج هادي گدام الناس وطردج او راد ياخذ زهراء او خفتي على ابنج يتزوج ناديه لا كل هذا مو 

صحيح انتي سويتي كل هذا الشي حتى تاخذين فلوس او ورث ناديه وحنين انتي عمتج الفلوس وخلتج تطغين 

ما شبعتي من العندج صدگيني افراح انتي الاعدام قليل بحقج

طلعت من وره الميز وهي لزمت ايدي وباستها وهي منهاره //فدوه سراج ساعدني الخاطر منيره بگبرها 

ابتسمت باستهزاء ::هههه ليش انتي اتحبيها المنيره وليش الچذب حتى هي ما تحبچ لان تعرفچ شنو انتي 

وشنو طينتج بس خطيه بلعت الموس رادت تحافظ على ولدها تالي المسكينه ماتت بالحسره ماكو واحد من ولدها

 لو بناتها يمها وحسب كلامج وكلام هادي بس اثنين نغلات هنه ايدارنها

هي تبچي //ادري انا غلطت بس الله يخليك ساعدني خطيه بناتي او ولدي يمكن ناديه من امها سوت السوته 

زغيره والناس نست الحادث بس انا ولدي كبار الله يخليك ابوس رجلك بناتي يبقن يتعيرن الاخر عمرهن 

::هسه عرفتي مياده من سوت الحادث ناديه واختها چانن زغار وانتي ولدج كبار وبناتچ يتعيرن والله ياافراح كل 

هذوله ما يهموني بقدر ما يهمني قيس ومحيي حرامات ذوله اخوانج

فتحت الباب واشرت للحارس اجه اخذها وهي تبچي بصوت عالي واجه الضابط وفهمته ان ما يقوم باي اجراء حتى

 انا اخابره او اجي وافهمه شنو ممكن يسوي ولا تگولون جاي التف ع القانون لا لان حتى قانونه بالعراق ياخذ 

بنظر الاعتبار العادات العشائريه خصوصا اذا ماكو لا قتل ولا اغتصاب

 (جاي اتكلم عن القانون الحقيقي مو القانون الي يخلي المجرم والارهابي يصير بالاحزاب ويطلع مثل الشعره

 بالعجين ويحاسب الفقير اذا سرق ربع ديناروهو حقه اكثر بهواي من الدوله )

وطلعنا انا ورضا وبالطريق خابرت المحامي

::الو علي 

اهلا استاذ 

::اگلك اريد تشوف بيت نظيف وتاجره لمدة شهرين 

اي استاذ تدلل 

::تسلم ما تقصر

رضا باوعلي وسألني //المن البيت سراج 

:: يعني المن الناديه وحنين ناسي حنين عدها بكلوريا وما بقى شي على امتحاناتها 

رضا //اي والله صحيح بس منو يگعد وياهن 

شعلت جگاره :: تنحل خلي نلگى البيت وسهله وهم ما اريدهن يبقن بالشقه لان ما تعرف شنو راح ايأولون

رضا //بكيفك سراج وهسه وين نروح 

::البيت كرم 

زين انا نزلني اهنا بالكوفي اشرب گهوه وانت روح ابحدك 

:: ها وليش ما تروح وياي 

- - ياخي هذا كرم بس يعبط بروحه واكتل واذبح واصلخ وانا ما اكض الساني وخاف اتهور 

:: ههههه ما طول هالشكل شلي بيك انا اريد العبهم مصلخ روح للكوفي ونتخابر 

- - هذا هو

باوعتله بخبث :: ايي وانت دير بالك وفكر بالكلام الي گلته الك 

فتح عيونه وفر ايده // ليش محسسني انا اخوك الزغير وتريد تطمن عليه 

انا بابتسامه :: لان اخوي الزغير ما شلع گلبي مثلك 

هز راسه واتحسر // ايي مو هذا البشر هسه انت من صارت ايدك بالدهن انا سيست 

باوعتله :: شقصدك رضا

—قصدي اطمنت على بنات عباس بعد انا ما الي فايده 

جريت نفس ::وداعتك انت الخير والبركه بس انا مثل ما اريد اطمن على بنات عباس اريد اطمن عليك 

رضا // وانا سراج هم اريد اطمن عليك 

باوعتله هو هز راسه وگال //شغلتي تعبانه بس انت ياصاحبي شغلتك ابين اديك لا تضيعها اركن اهنا خلي انزل

نزل رضا لان عرفت ما يريد يتناقش وياي وانا شغلت السياره ورحت البيت كرم قبل ما اوصل خابرته 

::الو كرم 

هلا سراج 

::انا ابابكم انت بالبيت 

ها سراج من يمته انت تخابرني البيت بيتك 

::تسلم ابو مرتضى 

راح افتحلك الباب 

نزلت من السياره وهو فتحلي الباب سلمت ودخلت سالته //شنو ما عندك دوام

  رد // كملنه كل شي والمدير كال لا تداومون 

::خير ان شالله 

راد يدخل للصاله وهو يگلي //اتفضل سراج حياك 

::لا كرم افضل اگعد بالديوان عدي شغله وياك 

 - - - ايي اتفضل هلا بيك

دخلت وگعدنا وانا قدمتله جگاره وانا شعلت جگارتي وصرت ادخن سالته ::شلون عمتي 

هز راسه وگلي //زينه الحمد لله 

::ناديه تريدها تجي يمها هي وحنين 

كرم باستغراب //هاا وين تجي 

::وصتني اشوف الها بيت تاجره فتره على ما تطلع المؤجرين الي بيت ابوها وتگول اريد بيبي جميله تگعد ويانه 

هز راسه //ان شالله يصير خيير

:: اگلك البارحه من وصلت هادي للبيت شفت هديل باقيه وهي تبچي اكيد على امها خطيه ليش خليتوها اهناك الوضع

مشحون والكل مقهور جيبها لهنا ترتاح وتغير جو 

كرم جاوبني بنتر //خلي تولي بت السافله 

باوعتله ::لا كرم ما مقبوله منك هاي مرت ابنك 

كرم // تولي هي وامها 

انا باستهزاء :: اه شبساع صارت تولي مو هاي بت الحسب والنسب مو هاي الواحد من ياخذها يرفع راسه ابين الناس

كرم وهو يفرك باديناته // الصدك خلفت عمي خليل مو خوش خلفه يااخي ما يعرفون يختارون نسوانهم وحده كتلته

وانعدمت والثانيه رئيسة عصابه 

:: بس بنظري رئيسة العصابه احسن من الي تكتل 

كرم // اثنينهن وحده اسقط من الثانيه 

وگفت على حيلي وگتله وانا اباوعله باحتقار ::ياالله انا اترخص 

   هو وكف // وين وين سراج بعدك ما گاعد

::عندي شغل مريت اطمن عليك لان البارحه ما اعرف شصار بيك يمكن من المفاجأه اقصد من مفاجأة افراح فيمان الله 

كرم طلع وراي //دوگف سراج ابقى اتغدا 

::لا شكرا شبعان سلم على عمتي 

 - - الله يسلمك

ركبت بالسياره وانا مو بس حاقد على كرم لا وكرهته لان هو كل شويه يبدل جلده مثل الحرباء بس اكيد ورا سبب 

خابرت رضا ::انت وين 

- - عليكم السلام مو توك نزلتني بالكوفي اشرب گهوه 

::شنو اتغديت 

يمته لحگت بسم الله الرحمن الرحيم توك ذبيتني هسه اروح اكل بالبيت 

انا بخبث ::ها لازم ما تفوت طبخ سكنه 

رضا //امداني اذا افوته 

:: زين انا جايك نروح سووا لان لازم اخلي حل الهاي المراهقه الي من تالي

- - ياهو انا انت 

:: ياالله جايك 

- - صار يابه متانيك 

وصلت ودگيت هورن طلع رضا ركب سلم عليه وگعد سالته :: شنو هاي صار يابه 

رضا //اي چا شگول جاي احس بيك انت ابوي وخايف عليه اسويلي مكسوره 

::هو من ناحية خايف اي خايف ليش الچذب 

شني سراج ما تعرفني خلف الله عليك 

::خلي نوصل ويصير خير

راد يغير الموضوع// اگلك اشو بسرعه رجعت من يم كرم 

:: انغثيت وما ردت اطول لان وراي هواي مغثه 

- - اجاك كلامي 

ابتسمت :: اي والله صدك 

 - - الله يساعدك على ما بلاك

وصلنه وهو نزل وانتظرني اجي وفتح الباب ما لگينه احد بالصاله رضا گال شني كلكم نايمين 

طلعت سكنه من الغرفه الثانيه وگالت //الله يساعدكم 

ردينه عليها //هلا الله يساعدج 

رضا گال //خو ما اتغديتوا 

لا ناديه والبنات نامن وحتى رضا اجه ودخل للغرفه نام

جاوبتها گبل ما يحچي رضا :: زين حضرينه الغدا بلا زحمه (درت صوبها ) كلنه سووا 

صار هسه بين ما تغسلون وتبدلون 

دخلت للغرفه وبوجهي للحمام سبحت وغيرت ملابسي ورضا لگيته لابس دشداشه وگاعد بالصاله هو وابن اخو

اجيت وسلمت هي جابت السفره

 ورضا راح دك الباب //عيني خواتين اگعدن اتغدن

سكنه گالت //انا ندهتهن وگعدن هسه يجن 

رضا وكأنه اتكهرب //غير ايساعدنج 

:ماعندي شي

طلعت مريم وحنين واشوف رضا شلون يباوع الحنين لكن بنفس الوقت ما اريد حنين تنجرح يكفيها جرح مرتضى

هنه راحن للمطبخ يجيبن الاكل وناديه هم طلعت وگالت ... ... مساء الخير 

ردينا //مساء النور 

بقت واگفه رضا گللها //اگعدي عمي ليش واكفه 

هي جاوبت وهي مدنگه //خلي تجي خاله والبنات 

مريم // احنا اجينا خو هم گولو انا وحنين ما اشتغلنه نگلنه الغدا كله 

رضا //ولا تنسن المواعين مو تغلسن

مريم //اكيد نغسلهن قابل انت تغسلهن 

رضا عمها جاوبها //مو هسه يغسل هن من يتزوج تطلع كل هذا الدلال من عيونه 

جاوب رضا وهو يباوع الحنين //اي من اتزوج اساعدها خو مو كله عليها

رضا //انا خوك من هسه غاسله حظك 

  - - - لا عمي بس المساعده ما بيها شي خصوصا اذا چنت احبها ووتحبني

گعدنا متقابلين وكأن كل واحد. عنده كلام يگوله بعيونه رضا مقابل سكنه وحنين مقابله رضا وانا گبال ناديه وصرنا

 ناكل واحنا ساكتين حتى سكنه الي ما تعرف تاكل وتستحي الخاطر البنات صارت تاكل ويانه

عرفت اكو ناس شگد ما شايله حزن وضيم لكن تسحك على نفسها وتبين هي مرتاحه وسعيده وهذا الشي شفته بسكنه

وانا جاي اكل اراقب بناديه الي كوه تاكل اللگمه وگوه تبلعها وعيونها مليانات دموع كملت وكلت ::الحمد لله 

رضا //شني هاي اشو ما اكلت 

::الحمد لله اكلت وشبعت 

حنين وگفت // عمو هسه اجيبلك الچاي 

باوعت وگلت ::لا ابقي اكلي اريد انام شويه تعبان

مشيت وكفت اباب الغرفه ودرت عليهم :: اتحضرو بالليل كلنه نروح المدينة الالعاب 

حنين من فرحتها صرخت وطفرت وصفگت بايدها //صدك عمو 

::اي صدك كلنه نروح محد يبقى ياالله انا اروح ارتاح  

رحت للغرفه واتصلت بقيس وفهمته بالليل راح افتح موضوع ويه ناديه وگتله 

:: ارتاح ابو احمد ايحلها الحلال وانا وصيت عليها محد يوصل يمها ولا واحد يحاچيها

سمعت قيس وهووصوته متعب ومهضوم طفيت النقال ونمت گعدت الساعه بالسبعه ونص ورحت اتوضيت 

وصليت ولگيت الكل مبدل و منتظرني وحتى رضا جايب عشا سفري ركبنا انا وابو علي ابحدنا وهنه ركبن ويه 

سكنه ورضا انا اتثاوب يمكن لان گعدت من النوم ورضا گاعد يمي گتله 

:: هسه شيصير لو انت ومرتك وجهالك طالعين للحديقه وتتونسون 

باوعلي //شبيك سراج خالني براسك

:: ما بيه شي تمني انت اخوي اتمنى اشوف جهالك 

رضا // ليش انا على الاقل عندي ولد ويمته ما اريد ادز علي واشوفه بس انا ابودي اشوف جهالك انت 

::ايي بدل بدل 

رضا //وانا هم اگلك بدل بدل

وصلنه دخلنه للمدينه وسكنه ماخذه وياها بساط حتى نگعد علي ورضا جاب العشا وترمز الماي وترمز الچاي صدك 

سفره انا صحت الحنين ومريم انطيتهن فلوس وگتلهن :: روحن العبن باي شي يعجبجن 

اخذتهن حنين وراحت يم ناديه ورجعت تكول 

عمو سراج ناديه ما تقبل تروح ويانه

رديت وانا اتقصد اسمعها :: لا خلي ناديه اهنا انتي ومريم روحي وانت رضا روح وياهن 

رضا //اي عمي اروح بس واگفه نطيتهن فلوس وانا موجود 

:: اسف واعتذر انت ادفع ومن تحتاج اخذ منهن لان متاكد حنين ما راح تخلي ولا فلس بجيبك 

رضا //ههههه عود ارجع اخذ فلوسهن

مريم //ياا ولا ننطيك بس دگيت النه صدرك وتگول عيب تنطيهن وانا موجود 

ابو علي //عمي اخذهن ومن تحتاج تعال اخذ مني 

راح رضا ويه البنات واشوف الفرحه بعيون حنين باوعت الناديه وگتلها :: الحگيني رايدج 

باوعت السكنه ورضا وگلت :: من رخصتكم رايدها بشغله ضروريه 

رضا //اجي وياك 

::لا ابقى ما اتاخر

رحت امشي وهي تمشي وراي التفتت شفتها تمشي على كيف والعرج مبين برجلها رجعت عليها وگتلها 

:: ليش ما تخلين القالب 

هي بدون ما تباوعلي ... ... نسيت 

هزيت راسي ونفخت :: بس هذا الشي المفروض ما تنسينه 

... ... خليها تولي ما صار يهمني

ما رديت عليها لان ادري بيها نفسيتها تعبانه شفت مكان معزول عباره عن مصاطب وبي قليل ناس رحت گعدت 

على مصطبه واشرت الها تگعد بصفي هي گعدت وهي مدنگه انا طلعت جهاز التسجيل وخليت السماعه باذنها وشغلته 

وانا احس بانفاسها تطخني واسمع دگات گلبها الي صارن متسارعه وهي تسمع كل اعترافات افراح وهي فاتحه عيونها وتباوعلي وتسمع وهي مذهوله من الي تسمعه وعادت التسجيل مره ثانيه بعدها انا گتلها

::هذا التسجيل واعترافاتها انتي سمعتيها وهم سمعتي توسل ورجاء قيس الامر بايدج والقرار الج محد راح يتدخل الي 

تشوفينه سووي ومحد راح يزعل عليج او ايلومج 

هي بقت تباوع وتحرك برجلها انا استردفت ::ولو عندي عتب عليج لمن لزمتي الجكاره وكسرتيها 

هي رادت تحچي رفعت ايدي يعني اسكتي ::وبعد اريد اعرف منو هاي نسرين وليش تتعرفين على وحده مثلها 

هسه ما اريد منج اي توضيح ترجعين ترتاحين وبعدين اتقررين شنو تسوين وتوضحيلي كل شي ما اريد اسمع شي 

 من اي احد اريد اسمع منج انتي وبس مفهوم

بقينا ساكتين هي مدنگه وانا ادخن بالجگاره بعدها وگفت وهي هم گامت من المكان باوعت الها وگلت 

::وهاي مالت ماصار يهمني خليها تولي ما اريد اسمعها 

وصيت علي المحامي يشوف بيت وياجره مؤقت 

هي باوعتلي باستفسار هزيت راسي وجاوبتها ::نسيتي بعد اقل الشهر امتحانات حنين وين تمتحن خو ما تبقن 

بالشقه ابحدچن 

هي جاوبتني ... ... وبالبيت منو يبقى ويانه 

::تنحل ان شالله انتي لا تشيلين هم ياالله ما تردين تتمشين شويه

هزت راسها يعني لا مشينا نريد نرجع گالتلي ... ... اريد اروح البيت هادي 

::ان شالله باچر اخذچ بس شتسويين ترحين 

هي باستهزاء ... ... اكيد ما مشتاقه الهم

رجعنا وانا اشوف رضا وسكنه واحد بعيد عن الثاني ويسولفون بشغف من شافني رضا اجه عليه وهو يسالني 

ها بشرو اتحررت فلسطين 

انا ضحكت وگتله ::شيحررها الريل

ناديه بقت ساكته راحت گعدت يم سكنه وانا ورضا وگفنا على صفحه وهو ايگلي 

شنو الاخبار 

:: ما كو شي بس سمعت التسجيل واي ردة فعل ماكو وطلبت مني تروح البيت هادي 

رضا. // ايي اخذها سراج لا تلومها تره هي جاي تتخبط بسبب الي صار بيها 

جريت نفس وهزيت راسي :: ايي باچر اخذها واروح 

باوعت الرضا ورفعت حواجبي وانا اگله :: خو هالايام انت شابع بالاجواء الرومانسيه

رضا بخجل // هاا لا ياخوي يا اجواء صدك چذب 

:: ايي حقك ما شايف عيونك شلون فاضحاتك 

باوعلي رضا // وانت سراج 

:: ليش من احچي وياك راسا اتدورها عليه 

رضا //لان انا قنعت بنفسي وقنعت خلي نگول بقسمتي لكن انت ياصاحبي لا تظل وره سراب والماي 

يمك لان اثنينهن نفس الشي 

::شقصدك رضا

رضا // اقصد السراب الي تركض ورا هو الماي الي ما تشرب منه 

ابتسمت وهزيت ايدي :: والله هالسكنه خلتك تتفلسف 

رضا // هاي حقيقه سراج انتبه النفسك ولا تضيع حلمك 

 راح يم ناديه وحجى وياها // عمو ما نروح انا وياچ نركب بالالعاب 

هي ابتسمت وردت ... ... لا عمو ما الي خلك 

سكنه // ليش حبيبتي شويه روحي اتفرهي

هي جرت نفس ودنكت بقينه ساكتين واجه رضا ومريم وحنين وصل يمنا وسلم وهنه ورا ضايجات انا 

سالته :: ها اتونستو خو ما شلعن گلبك 

جاوبني //گوه جبتهن خلصن فلوسي وحنين انطتني فلوسها ويگللي روح جيب من عمي رضا 

رضا //هههههه چا ما اجيت واخذت 

هو بعصبيه // ايولن ما ينطن وجه

رحت يمه وگتله:: على كيفك لاتضوج الشباب من يشوفون بنات لازم يصجموهن 

هو بنفس عصبيته // غير اشرب من دمهم 

مريم //كله من عمو سراج ودا ويانه رضا لو انت جاي ويانه احسن 

:: ها ليش شسوى 

مريم //حسره علينه نتنفس هو يركبنا واله يركب ويانه ولازم نمشي بصفه ومانشتري شي اله انگله 

اتقربت من حنين ::وانتي حنونه

حنين بتوتر //انا انا شبيه عمو 

::شو ساكته ما تحچين 

باوعتلي وابتسمت //انا اهم شي ركبت بالالعاب تدري بيه اعشق شي اسمه مدينه العاب حتى لو مرجوحه 

حديد انا قابله 

ابو علي //چنچ على مدينة العاب كل اسبوع 

ناديه ...... لا عمو رضا اعتبارا من باچر حنين بس تدرس ناسين عدها بكلوريا 

رضا //اي والله صدك ياالله خلي نتعشى حتى نرجع ها عمو حنونه شتگولين 

حنين //والله لو بايدي ابات اهنا

خزرتها ناديه وهي دنگت رضا گال //ان شالله بس تكملين امتحانات يوميه اجيبج لهنا 

الكل باوع الرضا الي ما انتبه الكلامه سكنه گالت //ايي كلنه نجي نتونس هاي الگعده ترد الروح لو ما حاره 

::لو نار وبيها العاب يصير ثلج على گلب حنين مو هچي حنونه 

هزت راسها //ايي عمو

ام رضا فرشت السفره وخلت ببسي وعصير وكباب وصمون وفطاير وفواكه گعدنا اكلنه وصار رضا ينكت 

الكل يضحك چذب لان الكل بگلبه جرح بعدها جمعن الاغراض وقررنا نرجع انا باوعت السكنه وگلت 

:: ام رضا انا راح اثقل عليج عكب باچر نرجع وياكم انا والبنات يبقن يمج وبعدين وصيت المحامي يشوف بيت

 واريدج تجين انتي ومريم وياهن على ما تخلص حنين امتحانات 

سكنه باوعت الابنها وگالت //بعيوني خويه ذني بناتي الله شاهد

:: بس تظل مشكله 

رضا // شنو سراج 

::احتمال يتعارض امتحانات حنين ويه امتحانات رضا ومريم 

رضا جاوب // لا عمي احنه نخلص قبلهم هي تبقى يمنا تقرا وتحضر روحها للامتحان وبعدين تجي 

حنين //انتو نسيتو اهم فقره 

::شنو هي

حنين جرت حسره وگالت //نسيتو انا غايبه من المدرسه ويجوز فصلوني 

رضا هز ايده وگال //ههههه سراج موجود ويفصلونج مو بالحيف من اول يوم راح للمديره وجابلج اجازتج 

وحتى بطاقتج جابها 

حنين بفرح //صدك عمو 

ابتسمت وهزيت راسي هي لا اراديا اجت يمي وحضنتني اباوع الناديه خزرتها بس هي ما اهتمت وحتى رضا 

احس بي ما قبل

بعدها رجعنا للشقه والكل راح الغرفته انا اتقربت من ناديه وگتلها 

:: لازم تفكرين زين وتتخذين قرار ولازم تعرفين شنو يكون قرارج هذا الشي راجع الج 

ما جاوبتني انا رحت اخذت دووش ومن طلعت شفت هادي متصل عليه مرتين انا رجعت اتصلت بي 

::الو ابو ياسر

هلا سراج جاي اتصل 

::اعذرني بالحمام ما سمعته 

معذور سراج 

::ها ابو ياسر آآمرني

سراج اريدك تحچي ويه ناديه الله يخليك تره راح انجلط اسمي وسمعتي بايدها 

::يعني شسوي هادي 

احچي وياها قنعها گلها عمج خطيه ما تقبلين اسمه يصير بالحضيض 

ابتسمت باستهزاء :: ان شالله احاول 

لا سراج مو تحاول بروح امي وابوك حاچيها 

::مي خالف تدلل

مشكور ما قصرت دوخناك بمشاكلنه 

::لا ولا يهمك احنه اهل 

اعتمد عليك سراج 

::الاعتماد على الله بس هذا عمار خلي يلزم السانه 

- - ما عليك بي بس الله يخليك سراج قنعها 

:: ادلل ابو ياسر 

فيمان الله 

 :: الله وياك

طلعت وگعدت بالصاله اجه يمي رضا وابن اخو وبقينا نسولف بامور عاديه ما حاچيته بموضوع حنين 

اخير شي نمنا بالصاله ع القنفات

الصبح گعدت على صوت ناديه وهي تگلي ... ... سراج اگعد 

انا عبالي احلم فتحت عيوني اشوفها واگفه وتباوعلي اتثاوبت ودرت وجهي هي ردت گلتلي 

... ... اگعد سراج الساعه راح تصير بالتسعه ناسي ورانا شغل 

درت وجهي ولگيت نفسي نايم ع القنفه نهضت ورحت للحمام 

بعدها گالت ... ... تتريك لو نروح

جاوبتها بتعب :: اتريك 

... ... زين بين ما احضرلك الريوك انت بدل

احسها اليوم اكثر هدوء ونفسيتها مرتاحه رحت بدلت واجيت للمطبخ جابتلي كوب چاي وجبن باوعتلها 

:: شنو محد گاعد 

هزت راسها ... ... لا خاله سكنه گعدت صلت ورجعت نامت 

:: ليش ما جبتي كوب چاي واتريگتي 

...... سبقتك 

انا اكلت شويه صمونه وجبنه وشربت الجاي گتلها ::ياالله

طلعنه وهمه نايمين وركبنا بالسياره گتلها :: امبين عليج ما نايمه 

ردت بدون ما تباوع ... ... شلون عرفت 

::مبين من عيونج تعبانات 

... ... اي ما نمت الليل كله وانا اسمع كلام هاي الحقيره 

:: وشقررتي 

... ... اروح البيت هادي

درت وجهي عليها :: ممكن اعرف ليش 

... ... من توديني راح تعرف 

جريت نفس :: هادي البارحه خابرني 

 باوعتلي انا هزيت راسي :: يگلي خلي ناديه تراجع نفسها انا عمها لا تفضحني 

هي ما ردت وانا غيرت طريقي من بيت قيس البيت هادي حسب طلبها وصلنه ودگيت الباب وفتحت اسيل انا 

سلمت عليها وناديه ما سلمت سالتها الاسيل

::ابوج اهنا 

اسيل وهي مدنكه //ايي اتفضلو

ناديه باوعتلي وبوجهه شبه ابتسامه يمكن من ادب اسيل الي راحت قبلنه ودخلنه للصاله ولگينا هادي وعمار گاعدين 

ومبين عليهم الاحباط انا سلمت وهمه ردو بعد ان وكفو گعدت وناديه بقت واگفه گالت ... ... وين ياسر 

عمار اتقرب منها وگللها وهو يعض بشفته //ها ناديه جايه تتشفيين 

هي ما ردت على كلامه ... ...اريد ياسر وهديل حتى تعرفون لويش جايه

هادي گال الاسيل صيحيهم وراحت اسيل واحنه بقينه ساكتين لان هادي عبالك بغير عالم اجه ياسر وهديل الي 

مبين عليها چانت تبچي اشوف ناديه خزرتها وگالت 

... ... انا جمعتكم لان بعد انتو عرفتو امكم المصون هي الي انطت فلوس على مود يخطفوني او حتى يكتلوني 

واعرف الكل يگول ياريت گاتلينج وما مفضوحين

اتقربت يم هادي وگالت...... ... هادي سمعني صوتك شعجب ساكت انا بت مياده الي كتلت عباس او شاركت 

بكتله ويه سلدار لان تحبه وما گدرت تنسا بس مرتك متقاوله ويه تلاثه تدري واحد منهم مواعدته تزوجه هديل 

(اهنا هديل صار وجهها الوان هي استردفت وهيه تباوع الهديل ) لكن هدوله تحب مرتضى واتزوجته

عمار اتقرب يمها // احترمي نفسج شنو متقاوله ويه تلاثه 

ردت باستهزاء ... ... ليش ما تدري حضرة المحامي 

عمار خله اصبعه على حلگه // اسسسس لا تقارنيها بامج

باوعتله بتحدي وحركت ايدها ... ... شنو انت چنت تعرف هي متفقه ويه عصابه يخطفوني 

اذا تعرف يصير غير كلام واذا ما تعرف فالمجتمع يا استاذ ما يرحم واولهم انت

اتقربت اسيل وهي تبچي وتگلها //عفيه ناديه الله يخليج سامحي امي 

باوعت الهادي ... ... وانت هادي شتگول شو ساكت

هو باوع الها ودنگ ردت گلتله ... ... ايي خلي اسمع منك شتگول ياحضرة المدير ما اعرف المدير العام 

هادي جاوبها // ناديه عمو انا اتصلت بسراج وادري بافراح غلطت بس انتي ما تقبليلي بالفضيحه 

هزت راسها وگالت ... ... لا ماكو فضيحه حسب كلام عمار شنو يعني مره تكرهني ودزت عليه عصابه 

حتى تكتلني وهي هسه بالسجن شي طبيعي واعتيادي

هادي // الصدك هي غلطانه وتستاهل تبقى بالسجن لكن الخاطري وگدام الناس لا تفضحيني انا صحيح 

قسيت عليج لكن الله عاقبني اترجاج عمو ناديه لا تحطميني 

باوعتله وابتسمت باستهزاء ... ... عممو تدري هاي اول مره اسمع منك كلمة عمو 

هو دنك وسكت هي جرت نفس وگالت ... ... طبعا انا ما يهون عليه تنفضحون ياالله مو مشكله اتنازل 

وتدلل بس اذا اتنازلت شنو المقابل

هادي باوع الها هي هزت راسها ... ... جاوبني عمي شنو المقابل 

هادي // هيچ صار الحچي تدورين مقابل 

 هي ابتسمت ...... عمي هذا الشي اتعلمته منك ولو ما طالعه مرتك متفقه ويه المجرمين جان هسه انت وكرم 

مگاومهم وحتى تاخذ فصل لان خطفو بت اخوك وهاي مو وحده حي الله ابنيه مؤدبه ومثقفه وتدرس هندسه 

يعني ما تقبل اله تاخذ عني فصل ذيج الحسبه 

وانا بصراحه مثلك ما اتنازل اله بمقابل انو انت ترجعلي حقنا انا واختي

هو باوع عليها بانذهال هي هزت راسها ... ... اي حقي انا واختي محل ابوي الي اخذته بفلوس فصله وسجلته باسمك 

واذا تگلي اخذته بمكان البيت الي انطته الي بيبي فانت صار سنين تاكل بايجار البيتين وايراد المحل الثاني انا هذا

 طلبي اذا توافق اتنازل عنها بعد ان اخذ عليكم كلكم تعهد ما تتعرضولي انا وحنين ولو بعد ما كو داعي للتعرض 

لان مرتك المجرمه هي الي حاولت تخطفني وتكتلني ومثل ما امي خريجة سجون صارت مرتك ام بناتك واولادك

 هم نفس الشي ويجوز امي انعدمت لكن اذا ما اتنازل عن مرتك يجوز تنحكم سجن يعني راح تبقى بالسجن سنين 

فانت بكيفك وانا هسه اريد اسمع قرارك

عمار بعصبيه // شنو ولچ انتي بكيفج وبعدين لا تقارنين امي بامج شوفي ولج تتنازلين وغصبن ما عليج 

لا احسب الله ما خلقج 

ما جاوبته دارت على هديل وسالتها ... ... ها هديل قابله على كلام عمار 

هديل سكتت ودنگت ... ... ها هادي هسه شگلت اخابر المحامي 

عمار //متعجبه عدها شكم نعال على راسها ما تدري بلحظه افرها عليها

ضحكت ... ... هههه وشمتاني ليش ما فريتها ليش خليت امك هاي يومين بالسجن وهسه هادي يكلي 

عمي اتنازلي اسمي وسمعتي خلص فرها وطلع امك 

عمار // اعلمج وين تروحين مني انا الج 

ما اهتمت الكلامه ... .... هادي خلي اسمع ردك ما عندي وكت اخابر المحامي لو اطلع منا انت بكيفك 

ياسر // ايي ناديه خابري المحامي خلي يجي (باوعله هادي وعمار ) 

  ياسر گال // انتي ناديه ما طلبتي غير حقج

الكل سكت وهي ما باوعت بوجه ياسر جاوبت ... ... مي خالف ياسر بس اسمع من ابوك

هادي هز راسه وعمار واگف يخزر بيها وناديه اتصلت ... ... الو استاذ انا استاذه ناديه تگدر تجي 

... ... زين وجيب وياك ورقة بيع وشرا 

... ... تمام منتظرتك ياريت تستعجل ي البيت هادي تندله مو

هادي باستغراب //. ليش بيع وشرا خو تنازل 

... ... لا هادي انت ما اتنازلت عنه انا امشتريته منك بالحقيقه وانت قابض فلوسه 

هادي بتعجب // مشتريته مني يمته انا قبضت منج فلس ؟

جاوبته ابرود ... ... مشكلتك تنسى مي خالف اذكرك ناسي ايراده هاي صار اكثر من سطعش سنه واكثر 

كله بجيبك وبجيب مرتك يعني انت حضرتك قابض فلوسه مقدما

عشر دقايق او وصل المحامي وبسرعه هادي وقع لكن اشوف القهر بعيونه والشهود انا وياسر 

لكن المفاجأه انو اخذت على هادي وصل امانه ب700 مليون دينار في حالة اذا ما وافق يدور المحل 

باسمها واسم حنين 

راح المحامي الي گلتله اسبقني للمركز على مود اوراق التنازل عن افراح

باوعت وكالت وهي تبتسم باستهزاء ... ... هدوله انتي واسيل وبنات خالتج ماكو داعي بعد تتشفن وتعيرن بينه 

انا وحنين لان صرنا كلنه بالهوى سووا من ناحية الامهات بس انتي اضرب مني بهواي امور 

( اتقربت منها وگلتلها ) شغلة نسرين ما راح انساها الج فلا تتهورين

وراحت يم ياسر وگلتله //تدري كلش زين انو المحل حقي ورجعلي وممكن هسه ما اتنازل عن امك لكن التنازل 

عن افراح كله الخاطر عمي قيس والخاطرك انت ياسر لان انت ما تستاهل اله كل خير صحيح غلطت بحقي

 لكن انت ما چنت تقصد

هو دنك وشفت دمعه نزلت من عينه باوعت وگالت 

انا راح اتنازل عن افراح وبعد تنسوون بيوم من الايام اتعرفون بنات اسمهن ناديه وحنين 

عمار //اي نخليجن دايرات على حل شعرچن

جاوبته باستهزاء :: ليش انت من ضاعت شسويت كلفت نفسك اتدور عليها 

... ... سراج اتركه وخلي نروح نتنازل عن المتهمه ام حضرت المحامي 

 وطلعنا انا وناديه وركبنا بالسياره وسالتها :: من يمتى متفقه ويه علي المحامي 

هي باوعتلي ونزلت عينها ... ... مو انت گتلي القرار بايدج وفكري فكرت واتخذت القرار 

:: هاا بدون ما انا اعرف 

... ... انت اول وتالي كل شي تعرف وهسه اريد اروح البيت قيس 

:: مو لازم نروح للمركز 

... ... صحيح بس انا گلت العلي ينتظرني وديني البيت قيس 

::صار عمه بخدمتج

اول مره من الحادث اشوفها ابتسمت ودنگت وصلنه البيت قيس وهي سمعته التسجيل وگلتله 

... ... عمو انا راح اتنازل الخاطرك بس تضمنلي اختك وبيت هادي ما اياذوني 

قيس //انوب فوگها اياذوج اليوصلج انتي واختج اشرب من دمه 

... ... انا راح اخذ عليهم تعهد وحتى على افراح 

قيس //حقج عمو

... ... وبعد شغله اتوصلها الهادي وكرم اعتبارا من هاللحظه ينسون احنا بنات عباس لو يعرفونه 

انت عمو ابو احمد على عيني وراسي لكن انا المسؤول عنه منا ورايح هو سراج وسراج وبس 

ولو انا واختي بالغات بس هاي اعراف وتقاليد يعني ما الهم شغل بينه واذا سراج ما يقبل اضطر 

ادور على ابن مياده ونروح نعيش ويا

ابتسم قيس بمراره وگال //والنعم من سراج لو ما هو اللحد هسه ندور وافراح وياسر يضحكون علينه

وطلعنا انا وسراج وقيس اجه ورانه بسيارته صرت اسوق وادور ومن ردنا ننزل فتحت الها الباب وكتلها 

 :: صارن هواي انوب تدورين على ابن سلدار وتعيشين ويا

ورحنا للمركز وصار التنازل وحتى اتنازلت عن توفيق وجريد والي قيس گال راح اگاوومهم بتهمة خطف ناديه

 وجريد ما يطلع من السجن لان متهم باصابة احد رجال الشرطه اثناء المداهمه وهم حيازة اسلحه وشغلات ممنوعه 

جابو افراح للغرفه وهي شافت ناديه طبعا نفس الحقد موجود بعيونها ويمكن زايد لكن هي اتقربت واخذت ايد

ناديه وتريد اتبوسها ناديه نتلت ايدها وگالت الها ... ... ما يشرفني تلزمين ايدي لان انتي انسانه نكسه

باوعت للضابط وگلتله ... ... استاذ اريد تعهد بعدم التعرض الي واولهم هايه وبعدين تاخذ على بيت هادي كلهم 

سووا الضابط التعهد ناديه باوعتلي ... ... طلعني اختنگت 

طلعنه وقيس لحگنا وگللها //ناديه اوگفي عمي

هي دارت علي وهو اجه وباسها براسها وگللها //السويتي بس بنات الحلال والاجاويد يسوونه وصدگيني اخذلج 

حقج وراح تسمعين وتشوفين بعينج شلون حقج راح يوصلج مربع (رفع ايده بالدعاء ) 

 الله يستر عليج مثل ما سترتي شيبتي

ابتسمت وگلتله ... ... لا عمو بعدك شباب وراسك دووم يظل مرفوع انت ما تستاهل يصير بيك الشي المو زين 

جر حسره وگلها // بارك الله بيچ يابنتي 

ركبنا بالسياره وصلنه للشقه والكل چان منتظرنه گعدنه وناديه ساكته حنين جابت النه ماي ومحد اتجرأ سالها 

شربت الماي وگالت

... ... العصر نرجع البيت خاله ام رضا لمن ما المحامي يشوفلنه بيت 

(باوعت لام رضا ) ... ... خاله راح انثقل عليج 

ام رضا جاوبتها //تنچبي شنو تثقلين عليه اكو بنات يثقلن على امهن 

رضا گال //ايي هاي ام رضا جبتيها بالصميم

اتقربت سكنه وكالت // الله شاهد عليه ما عدي وياچن حاجه لو طمع بس ما افرقچن عن مريم 

اتقربت حنين وحضنت ام رضا وناديه گالت ... ... ياالله خلي نتغدا حتى نتوكل 

سألتها :: شعجب ما ترحين تمرين على جميله 

... ... مو هسه خلي كل شي يستقر وبعدين امر على كرم (باوعتلي )صدك سراج التسجيل اريد منه تلث نسخ

::اي صار هسه انقله من الرام وبعدين تدزينه واتساب 

... يصير 

:: اي واحد يگدر يسوي بس خلي نروح الابو البرمجيات يضبطه النه احسن 

... ... اشو ما سالتني المن ؟

باوعتلها بنص عين ::لان ادري واحد الكرم والثاني الهادي والثالث القيس بس هديل راح تتاذى 

هزت ايدها وعيبت ... ... منين من هادي الطلي على كولة عمي رضا لا ما يسويلها شي لان يخاف على منصبه

اتغدينا ورحنا انا وياها ونقلنه التسجيل وهي دزته بنفس اللحظه وبعدها رحنا للشقه ومناك سافرنه وهم ركبنا

 انا ورضا ابحدنا وهي راحت ركبت ويه ام رضا وحنين ومريم بالطريق رضا سالني 

شبيك سراج 

سحبت نفس من الجگاره وگتله :: مهموم رضا 

رضا // الله لا يجيبلك الهم الحمد لله الله نصر ناديه وكله ابفضلك

جريت نفس وگتله :: رضا ناديه لا تتصور مرتاحه اتفكر الكل شي لكن ما گالت ارجع الكليتي 

اشوفها محبطه وكارهه الحياة 

رضا // لاتلومها الشافته والمر بيها مو شويه 

هزيت راسي واتحسرت :: كلامك بمكانه بس تشوفها شلون تحچي وتتصرف بخذلان ومراره

رضا //اگلك وما تزعل 

باوعتله ::شنو رضا 

رضا //كله منك 

:: ها كله مني شلون يابه 

رضا // انت سراج شگد تعبت وشگد ضحيت وسويت وعرضت نفسك للموت وهواي اشياء كل هذا ليش

::شقصدك ابو علي 

رضا // قصدي سويت هذا الشي ليش لا تگلي على مود عباس 

انا غمضت ونفخت بقلة صبر :: شقصدك رضا 

رضا // انت سويت هذا الشي كله على مود ناديه لان تحبها شني تحبها انت تعشگها ومن زمان بعد ليش تغالط 

نفسك انت زلمه جسر وشجاع بس بمالت ناديه لا والله اسمحلي اگلك بمالت ناديه اغم وجبان

باوعتله وگلت ::اه هذا منو اليحچي رضا الضيع حب حياته الساكت هاي سنين بگد عمر ناديه 

رضا // هههههه من گلك انا ساكت ومنو گلك ضيعته لكن اكو امور ما نگدر نحچيها 

::رضا لا تضرب مثاليات 

رضا // خاب يا مثاليات ولك ادري بيك اتحبها ومن تشوفها كل امورك تتخربط صارحها واتزوجها 

وانسى الصار ما طول محد درى بي واعتبره چنه ما صاير

:: ما سويت هذا الشي انت ليش فرطت بحبك 

رضا //انا ما فرطت بحبي ولا ضيعته انا حجرته وسجنته وياي طوول العمر 

باوعتله هو هز راسه وگلي //سراج انا مو مثلك اركض واهومش واشتغل واعرض نفسي للموت وانا 

ما اگدر اگلها احبج انا من احجي افعل 

هزيت ايدي :: رضا انت مخبل شايف نفسك من تشوفها تظل ترجف

رضا // اي ارجف شوگ الها لان 

    ؛؛ ليش سكتت لان شنو 

      جاوبني بهدوء// حلالي وما اگدر اخذه

وگفت السياره وعكفت وجهي :: شنوورضا شگلت حلالك يعني شنو 

جر نفس وگلي // يعني ياعاشگ ومن تشوفها چنك سعفه يرجف كل شي بيك مو انا الي اخلي عشگي واضيعه 

من ايدي وهو گدامي انا مو مثلك عايش 

ع الوهم اي سكنه حلالي ومن زمان سكنه ياسراج مرتي

//////////////////////////////