 |
رواية دعني احطم غرورك الفصل الثالث والستون بقلم منال سالم
عودة للوقت الحالي ،،،،
في فيلا يوسف الكيلاني ،،،،
-عايدة: حصلت أمور عجيبة النهاردة يا جوو في المستشفى
-يوسف وهو يقرأ كتاباً ما: خير يا ديلة
-عايدة: في واحدة جت اسمها سيلين..
-يوسف: نعم بتقولي مين؟
-عايدة: بقولك واحدة اسمها سيلين
-يوسف: ودي جت ليه ؟؟
-عايدة: طلعت مامت جانا وأل ايه جاية تسأل عليها ، بس جانا طردتها وكانت فضيحة
-يوسف: انتي هتكروتي الحكاية يا ديلة ، لأ احكيلي بالتفصيل
قصت عايدة ما حدث في المستشفى بين جانا وسيلين وكذلك سهير ، بالاضافة إلى زيارة حازم لجانا
-يوسف: حازم !!! وده ايه اللي جابه؟
-عايدة: مش عارفة ، بس أنا استغربت ، والغريب كمان انه يعرف اللي اسمها سيلين دي
-يوسف: كمان يعرفها ، لأ في حاجة غريبة في الموضوع
-عايدة: مش عارفة ، بس حتى أما طلبت أكلمه ع جمب رفض
-يوسف : بس مش ده .. ايوه .. مش ده اللي كان عز اتخانق معاه ؟
-عايدة: مش عارفة
-يوسف: انا هسأل ياسين عن علاقة حازم بعز وهعرف ان كان هو اللي اتخانق معاه ولا لأ .. كمان لازم حسين يعرف بالتطورات دي.
-عايدة: أعتقد أن سهير زمانتها حكيتله
-يوسف: انا مش بتكلم عن اللي ما تتسمى سيلين ، أنا بتكلم عن الزفت التاني اللي اسمه حازم
-عايدة بعدم فهم: اها .. مع اني مش شايفة رابط غير انه عارف سيلين
-يوسف: ده لوحده كفاية انه يخليني أشك ان في (إنَا) في الموضوع .. ششش الوقتي يا ديلة
-عايدة حينما رأت عز : ليه ... أها !!
-عز : مساء الخير عليكو
-عايدة: أهلا
-يوسف: مساء النور
-عز: مالكو ؟
-يوسف: مافيش
عز: طيب أنا أكلت بره ، هاطلع أرتاح شوية عشان نازل تاني، أه ... بالحق أنا خليت دلال الشغالة تجيبلي حاجتي من الفيلا ومشيتها
-يوسف: براحتك
-عز: عن اذنكو
وبينما كان يتجه عز الدين للأعلى وهو يتفحص هاتفه سمع اسم يبغضه فتوقف عن الصعود وانتبه للحوار دون أن يدري كلاً من يوسف وعايدة .... ،،،
-عايدة : بس الغريب ان جانا معرفتش حازم
-يوسف: يا سلام
-عايدة: أه والله ، كانت متفاجئة بيه وهو قال بالحرف انه يعرفها لكن هي لأ
-يوسف باستغراب: أما حاجة غريبة ؟ طب ليه جالها أصلاً
-عايدة: مش عارفة ، بس أنا حاسة ان وراه حاجة من الزيارة دي
-عز في نفسه: راح يزورها !! هي مش عارفاه ؟؟ وأنا مالي بيها يولعوا...
.......
في منزل حسين الدمنهوري ،،،،،
-حسين: كويس أوي يا سهير اللي انتي عملتيه ده
-سهير: اومال يعني كنت أسيبها لوحدها ، وبعدين هي صممت تمشي من المستشفى عشان متشوفش وش المخفية
-حسين: أنا بستغرب الست دي جايبة الحقد والكره ده كله منين !
-سهير: الشيطان يا حاج حسين أما بيعمي الواحد
-حسين: استحالة في أم تعمل كده عشان الفلوس
-سهير: ربنا يهديها
-حسين: وجانا عاملة ايه الوقتي
-سهير: أعدة جوه في أوضتها ، والحمدلله نامت
-حسين: والبت دينا
-سهير: أعدة معاها .. بس ، بس !!
-حسين: خير يا سهير ، قولي
-سهير: يعني مكنش في داعي انك تفركش خطوبة البت ، الواد مالوش ذنب
-حسين: سهير ، قفلي ع الموضوع ده ، انا مش عاوز أي حاجة تربطني بالعيلة دي
-سهير: ده المهندس يوسف كان صاحبك وأخوك و...
-حسين مقاطعاً: كان .. قبل ما ابنه يعمل عملته السودة ويطلق جانا ..
ثم دق جرس الباب ،،،
-حسين: شوفي مين يا سهير ؟
-سهير: حاضر يا حاج
-سهير: مش معقول انت ؟
-يوسف: ازيك يا سهير هانم ، أقدر أقابل حسين
-حسين: مين يا سهير؟
-سهير: ده ... ده !!
-حسين وهو يرى من بالباب: انت ؟؟؟
-يوسف: مش هتقولي اتفضل يا سحس ولا ايه ؟
-حسين بضيق : استغفر الله العظيم .. عاوز ايه؟
-يوسف: هنتكلم كده ع الباب
-حسين: اتفضل
حكى يوسف لـ حسين عما توصل إليه من معلومات عن سبب الخلاف بين عز الدين وجانا الذي أدى إلى طلاقهم ، ووجود رابط قوي بين سيلين وحازم ، وعن تدمير شركة عز الدين وما توصلت إليه المباحث في تحرياتها عن الجناة ، وعن ترك عز الدين للفيلا وجمع متعلقاته منها وطرده للخادمة .....
-حسين: كل ده مينكرش ان ابنك أذى بنتي
-يوسف: أنا بفهمك اللي حصل
-حسين: والمطلوب مني ايه الوقتي ؟؟ اروح أصقف لعز وأقوله برافو ع اللي انت عملته واديله كمان نيشان
-يوسف: أنا مش بقولك كده عشان تقولي الكلام ده ، انا بس بعرفك بالجديد واننا نحاول نفكر سوا في حل
-حسين: معدتش ينفع
-يوسف: يا حسين .....
-حسين مقاطعاً : اشرب قهوتك اللي بردت ، وشرفت يا يوسف !!
-يوسف: ع العموم أنا مش هستسلم وهحاول أعرف تفاصيل أكتر وأبلغك بيها ، أشوفك ع خير
رغم ردود حسين الجافة وعدم رغبته في تصديق أن ما حدث بفعل مخ شيطاني إلا أن يوسف لن يستسلم في محاولة التوصل للحقيقة ....
............
بعد مرور شهر على ما حدث ،،،،
في منزل حسين الدمنهوري ،،،،
-دينا: ايه يا جوجو ، هتفضلي حابسة نفسك كده في الأوضة كتير
-جانا: سيبني يا دينا
-دينا: تؤ ، أنا هفضل لازقة ، بس بليز تعالي نخرج نغير جو ، ده انتي بقالك شهر مخرجتيش وشوفتي الشارع ، وع طوول سرحانة يا مدمعة
-جانا: يوووه ، سيبيني في حالي
-دينا: No way
-حسين بعد أن طرق باب الغرفة: ممكن أدخل يا بنات
-جانا: ييس انكل اتفضل
-حسين: اخبارك ايه يا جوجو
-جانا: الحمدلله
-دينا: دادي أنا بقول لجانا نخرج نغير جو لكن هي مش راضية
-حسين: ليه يا جانا يا بنتي
-جانا: ماليش نفس
-حسين: لأ يا بنتي ، مش هتفضلي على طول كده
-جانا: بجد ، انا عاوزة أفضل كده ، مش عاوزة اشوف حد ولا أخرج من هنا
-حسين: مش عشان خاطر واحد ندل ميستهلكيش تضيعي عمرك
-جانا: بليز أنكل
-حسين: بصي يا بنتي الحياة تجارب ، ومش معنى ان حاجة في حياتنا فشلت يبقى خلاص الدنيا تقف ، لأ لازم نقاوم ونقوم ونكمل مش نستسلم وندفن راسنا في الأرض زي النعام ، أنا عاوزك تكوني أقوى من كده ..
-دينا: ييس جانا الحياة فيها ups and downs كتير
-حسين مكملاً: بصي يا جانا الضربة اللي ماتموتش تقوي ، وانتي الحمدلله الوقتي وسطينا ، أنا عاوزك تتعلمي ازاي تكوني نفسك ، أزاي تديري فلوسك وتعرفي راسك من رجليكي
-جانا: البركة فيك يا أنكل
-حسين: وفيكي برضوه يا بنتي ، ديوصية أبوكي ليا ، ان جانا تاخد حقها كامل وقت ما تكون جاهزة لده ، وانا شايف ان الوقت خلاص جه
-جانا: بس أنا مش مستعدة
-حسين: شوفي ، انا هديكي يومين كمان تخرجي وتغيري جو وبعدها هتيجي معايا الشركة تتعلمي ، ومنها تضيعي وقتك وتعرفي فلوسك رايحة فين
-دينا: بليز جانا افقي ، ده انا هطق م الحبسة ، بليز ، بليز !!!
-جانا: حاضر يا أنكل
-حسين: ايوه كده يا جوجو .. واطمني احنا هنفضل على طول في ضهرك ومش هنسيبك
-جانا: ربنا يخليك ليا يا انكل
قررت جانا أن تغير من هيئتها ومن شكلها الطفولي الذي كانت تبدو عليه أمام الجميع وخاصة الغرباء ، وأن تتحول إلى فتاة ناضجة أو تحديداً سيدة اعمال صغيرة من حيث الهيئة والطباع ، فقامت بعمل تسريحة شعر جديدة ، واشترت ملابس كلاسيكية جديدة تنوعت ما بين البدل والتيرات والسترات العادية والجلدية والبناطيل المصنوعة من القماش والجيبات والقمصان الحريرية ، حتى أنها بدلت أحذيتها من النوع الرياضي إلى الكعوب العالية ، واشترت مجموعة قيمة من الاكسسوارت التي تدل على الذوق الكلاسيكي الراقي
-دينا: Wow, you.. you look amazing
-جانا: ثانكس دودي
-دينا: بجد انتي اتغيرتي تماماً .. مش ممكن تكوني جوجو اللي أعرفها
-جانا: ها ؟ ايه رأيك لايق عليا
-دينا: sure .. مافيش خلاف ع كده
.......
بعد يومين في النادي ،،،،
-دينا: واخيراااا يا جوجو ، ده انا كنت قربت خلاص أنسى شكل الشارع
-جانا: مش أوي كده
-دينا: يا جوجو يا حبيبتي دادي كان عامل حصار علينا كلنا عشان خاطرك ، شوفتي هو مصدق ازاي انك بس تفكري تخرجي وراح فاكك الحظر
-جانا: يا شيخة .. قولي كلام غير ده
-ياسين من بعيد: وأنا أقول النادي منور ليه ، أتاري دينا أعدة فيه
-دينا: احم .. بس
-ياسين: ده أنا كنت قربت أنسى شكلك يا بنتي ، الحمدلله متغيرتيش ، لسه عندك ودان وبؤ ومناخير، بس اوعي يكون طلعلك ديل
-دينا: احترم نفسك ، جانا أعدة
-ياسين بدهشة : اوووبا ، جانا ، أنا أسف والله معرفتكيش
-دينا: ايه رأيك في اللوك الجامد ده؟
-ياسين: يا بنت الايه يا جانا ، ايه الحلاوة دي ، هما اللي بيقعدوا في البيت بيحلوا كده !
-جانا: هاي ياسين ، ثانكس.. انتو .. انتو لسه ؟
-دينا مقاطعة: والله فون بس يا جوجو ، ها يا قلبي ، متجبيش سيرة لدادي
-جانا: أها
-ياسين: طمنيني عليكي أخبارك ايه الوقتي
-جانا: fine
-ياسين: وكمان لسانا اتعوج
-دينا: بطل رخامة بقى يا سينو
-جانا: سينو كمان
-ياسين: بس بقى عشان باؤحرج
-جانا: انتو ايه نظامكم؟
-دينا: بصي يا جوجو .. م الاخر احنا معجبين ببعض و...و... ما تكمل انت يا سينو
-ياسين: بصي يا جانا بيقولك كل فولة مسوسة وليها كيال معفن بياخدها!
-دينا: قصدك اني مسوسة؟
-ياسين: يعني أنا اللي كيال معفن ، اسكتي بس عشان أفهم البونية..
-دينا: حسابك معايا بعدين !
-ياسين: اللي أقصده ان لكل جزمة قديمة فردة شراب مقطوعة بتدارى فيها
-دينا: OMG ، watch your language
-ياسين: سندوتش ايه الوقتي بس يا دينا ، والله ما عارف أتكلم بسببك ، اسكتي شوية ...
-دينا: اوووف منك
-جانا: هههههههههههههههههه ، مالكش حل يا سينو
-ياسين: الخلاصة يا جانا ، ان احنا متنيلين بنحب بعض ويا بخت مين وفق راسين في الحلال
-جانا: بس بيقولك امشي في جنازة ولا تمشي في جوازة
-ياسين: ماهي دي مش جوازة بالظبط
-جانا: اومال دي ايه
-ياسين: ده زي ما تقولي بتلبسي حلة في غطاها
-دينا: يوووه ، again
-جانا: خلاص خلاص ، فهمت
-ياسين: طول عمري أقول عليكي دماغ ، ودماغ كبيرة كمان
وبينما هم يتحدثون سوياً جاء حازم ،،،
-حازم: مش معقول ، جانا هنا
-ياسين وهو يقف في وجهه: نعم يا حازم
-حازم: انا مش بكلمك انت أنا بكلم جانا
-جانا: انت مين؟
-حازم: بالسرعة دي نسيتني ؟؟؟
-دينا: احنا ... زي ما نكون شوفناك قبل كده ولا ايه يا جوجو
-ياسين: انت جاي هنا ليه ، مش خلاص فضيناها
-حازم: ما توعى من سكتي يا ياسين
-جانا: عن اذنكو ، يالا يا دينا ولا هتفضلي أعدة
-دينا: Ok. Let's go
-حازم: استني يا جانا ، متمشيش أنا عاوزك
-ياسين: ماهي قاتلك ابعد عنها ، ايه مش بتسمع
-حازم وهو يدفع ياسين: ياعم غور ، أنا سايبلك المكان وماشي
-ياسين: في داهية
تأكد حازم من عدم متابعة ياسين له ، ثم أسرع خلف جانا ليلحق بها وأمسكها من ذراعها بصورة مفاجئة
-حازم: جانا ..
-جانا: اوعى سيب ايدي
-دينا: سيبها يا كابتن انت
-حازم: أنا أسف ، بس .. عاوزك تسمعيني
-جانا: أنا معرفكش أصلاً
-حازم: أنا بحبك ، وعملت كل حاجة ممكن تتخيليها عشان تكوني ليا
-جانا: انت مجنون !
-دينا مهددة : ابعد عنها وإلا هنلم عليك الناس.
-حازم وهو يبعد دينا بيده : شوية كده يا آنسة ، انا عاوز جانا بس
سحب حازم جانا من يدها بكل قوة فحاولت أن تستنجد بأي شخص في طريقها،،،
-جانا: حد يساعدني ، بليز
-حازم: جانا اهدي ، أنا عاوز اتكلم معاكي ، عاوزك تسمعيني وتحسي بيا
-جانا: الحقووووني
وهنا رأها وليد أحد الأعضاء بالنادي ،،،
-وليد: في ايه يا مدام جانا
-جانا: بليز الحقني يا كابتن وليد
-حازم:لو سمحت متدخلش ده موضوع شخصي!
-وليد: بس أنا شايف المدام مش عاوزة تجي مع حضرتك
-جانا: انا مش عارفة ده مين أصلاً ، بليز كابتن ساعدني
-حازم: ابعد أحسنلك
-وليد وهو يحرر يد جانا من قبضة حازم: مش قاتلك تسيبها يبقى تسيبها
-حازم وهو يلكم وليد : يبقى انت الجاني ع نفسك
-وليد وهو يصد اللكمات: آااه ، طب خد دي
وقفت جانا تشاهد الخناقة وهي مرعوبة وتبحث بعيناها عن دينا التي أسرعت لتطلب المساعدة من ياسين ،،
-دينا وهي تسحب ياسين من يده : ياسين ، تعالى الحقنا بسرعة !!
-ياسين: في ايه تاني ؟
-دينا: حازم خد جانا بالعافية
-ياسين وهو يسرع الخطى : وده حصل أمتى
-دينا: ليه حالاً واحنا خارجين بره النادي
-ياسين: طب مدي بسررررعة
وبالفعل وصل ياسين إلى حيث تتواجد جانا واشتبك مع حازم الذي كان مازال يتشاجر مع وليد
-ياسين وهو يلكم حازم في وجهه: مش انا قولتلك ابعد عن جانا
-حازم وهو ملقى على الأرض : يا ياسين سيبني بس ، افهم
-وليد: الأخ بيعاكس المدام
-حازم: آآآه .. بعاكس مين ؟
-ياسين: مش مكفيك اللي عملته قبل كده ، جاي تكمل هنا
-جانا بعدم فهم : عمل ايه ؟
-ياسين بحدة: دينا ، خدي جانا وامشوا الوقتي ، يالااااااااااا
-دينا: اوك .. يالا
........
في شركة عز الدين الكيلاني ،،،،
-عز هاتفياً: تمام أوي ، احنا داخلين الصفقة دي
-المتصل: ............................
-عز: لأ جاهزين ، متقلقش
-المتصل: .....................
-عز: تمام ، تمام ، على معادنا ان شاء الله
-المتصل: .........................
-عز: أه اكييييد هحضر ، هههههههههههه ، انت عارفني ، اوك سلام !
-عز للسكرتيرة: أ. ريم تعاليلي حالاً
-ريم : حاضر يا فندم
-عز: بصي يا أ. ريم ، الملفات دي أنا خلاص رجعتها فوديها لشئون العاملين ، والمجموعة دي تروح قسم الحسابات ، أه ومتنسيش تبلغي رؤوساء الأقسام بإن عندهم اجتماع كمان ساعتين
-ريم: حاضر يا فندم
ثم رن هاتف عز الدين برقم ما ،،،،
-عز: روحي انتي الوقتي يا أ. ريم
-ريم: حاضر
-عز: الووو ، اييه يا عم الشريف ، فينك ، عاش من سمع صوتك
-شريف الصائغ: موجود يا عز باشا
-عز: خير ؟
-شريف الصائغ: أنا مش عارف أبلغ حضرتك ولا لأ بس ..بس
-عز: في ايه ؟
-شريف الصائغ : اصل المدام كانت مبلغاني إن...
-عز بدهشة: المدام ؟؟؟
-شريف الصائغ: يعني من حوالي شهر كده اتصلت بيا المدام وقالت ان سلسلتها اتقطعت وعاوزاها تصلح وقالت هتبعتها مع الشغالة بس موصلنيش حاجة
-عز: نعم بتقول ايه ؟
-شريف الصائغ: هي كانت موصياني مقولش لحضرتك لأحسن تزعل وكانت طالبة يتعمل دلاية بحرف زيادة بس مقالتش الحرف ايه ، وبعد كده طلبتها ع تليفون الفيلا بس محدش رد ، فأنا ....
-عز مقاطعاً: انت متأكد م اللي بتقوله ده ؟
-شريف الصائغ: اه يا باشا
-عز: طب ركز معايا كده الله يكرمك ، الكلام ده كان من أمتى بالظبط
-شريف الصائغ: ما أنا قولت لحضرتك كان تقريباً من شهر
-عز: ممم......
-شريف الصائغ: مقولتيش يا باشا ، السلسلة موجودة عندك
-عز: ايوه ، هبعتهالك .. سلام دلوقتي يا شريف
...........
Flash Back لما حدث قبل يومين ،،،،
◘◘◘ في مكتب يوسف الكيلاني ،
طلبت الخادمة دلال رؤية المهندس يوسف الكيلاني لأمر ضروري ، استقبلها المهندس و...... ،،،،
-يوسف: ممم .. السكرتيرة قالتلي انك دلال اللي كنتي شغالة في فيلا عز ابني
-دلال: ايوه يا بيه
-يوسف: خير
-دلال: والنبي يا بيه ترجعوني الشغل تاني ، أنا معرفش البيه عز ليه مشاني وأنا مش لايقة شغلانة تانية اوكل منها عيالي
-يوسف: ليه هو مكنش بلغك انه انفصل عن مراته ؟
-دلال: يالهوووي ؟؟؟ هو طلق الست جانا
-يوسف: لأ مش معقول متعرفيش
-دلال: والنبي ما اعرف يا سعت البيه ، أناكنت مفكراه انه استغنى عن خدماتي عشان عشان.....
-يوسف: عشان ايه ؟؟؟
◘◘◘ قصت دلال للمهندس يوسف ما قامت بفعله ،،
-دلال: والله يا بيه ما كنت أعرف ان ده كله هيحصل
-يوسف: عاوزة تفهميني انك كنتي بتعملي ده لله في لله ؟
-دلال: الصراحة .. لأ
-يوسف: ايوه خليكي كده صريحة معايا واحكيلي بالتفصيل عن كل اللي حصل
-دلال: حاضر يا بيه
حكت دلال عما قامت بتدبيره بالتعاون مع دارين للايقاع بجانا وتخريب حياتها ، وكيف تخلت عنها دارين حينما طردها عز الدين من الفيلا ،،،
-يوسف: منك لله يا شيخة ، عملولك ايه عشان تعملي ده
-دلال: الله يخليك يا بيه سامحني
-يوسف: اسامحك ؟؟ ده انا هسجنك ، ان ماكنش هوديكي في داهية
-دلال: أبوس ايدك يا بيه ، ده انا عندي عيال غلابة عاوزة أربيهم
-يوسف: وماخوفتيش على عيالك دول وانتي بتخوني الأمانة وبتدمري بيت الناس اللي مشغلينكم عندهم
-دلال: والله ماكنت أعرف يا سعت البيه
-يوسف: اللي غلط لازم يدفع تمن غلطه
-يوسف للخادمة دلال : كملي وايه تاني تعرفيه
-دلال: أعرف ان الست جانا كانت رايحة لعيادة دكتور بتاع نسا
-يوسف: تعرفي اسم العيادة ايه
-دلال : ايوه يا بيه ، سمعتها وهي بتقوله لسواق التاكسي
-يوسف: قولي بسرعة ...
.............
◘◘◘ في عيادة طبيب النساء ،،،،
-يوسف: كان في حجز يا آنسة باسم جانا عاصم من حوالي شهر
-الممرضة: مدام لو سمحت
-يوسف: أنا أسف
-الممرضة: وحضرتك بتسأل ليه ، المعلوماتدي خاصة
-يوسف وهو يعطيها بعض المال : دي بنتي وعاوز أطمن عليها
-الممرضة: طب ثواني ، حضرتك قولتلي الاسم ايه
-يوسف: مدام جانا عاصم
-الممرضة بعد بحث استغرق دقائق: اه فعلا جاتلنا واحدة باسم جانا عاصم
-يوسف: الحمدلله .. طيب الدكتور موجود ممكن أقابله ؟
-الممرضة: والله هو قدامه نص ساعة ويجي ، وزي ما حضرتك شايف العيادة مليانة و....
-يوسف وقد أعطاها مال أخر : معلش أصل الحالة مستعجلة
-الممرضة: طيب انتظر هنا ، وهدخلك أول ما يجي
وبالفعل قابل يوسف الطبيب الذي تولى الكشف على جانا ،،،
-يوسف: حضرتك متأكد
-الطبيب: ايوه يا فندم ، أنا عامل سجل بأسماء الحالات اللي بكشف عليها عشان أتابعها ، والمدام جاتلي وكانت حامل في أول شهر ، وكتبتلها ع مقويات وفيتامينات وطلبت منها تعمليلي شوية تحاليل عشان أقدر أتابع حالتها
-يوسف: متعرفش حضرتك هي راحت تعمل التحاليل دي فين ؟
-الطبيب: والله أنا كتبتلها ع اسم معمل بتعامل معاه ، بس الصراحة مش متأكد إن كانت هي راحتله ولا لأ ..
-يوسف: طب معلش ممكن اسم المعمل ده
-الطبيب: اه ممكن ، اتفضل ..
-يوسف: شكراً كتير يا دكتور
-الطبيب: العفو ، تحت أمرك
......
◘◘◘ في معمل التحاليل ،،،،
-يوسف : كان في تحاليل اتعملت هنا باسم جانا عاصم
-مسؤلة المعمل : التاريخ امتى حضرتك؟
-يوسف: من حوالي شهر تقريباً
-مسؤلة المعمل : مممم شهر .. طب لحظة من فضلك
-يوسف: اوك
-مسؤلة المعمل بعد دقائق : اه يا فندم ، فعلاً في تحاليل باسم جانا عاصم ، بس هي مجتش تستلم نتيجة التحاليل
-يوسف: معلش أصلها تعبانة
-مسؤلة المعمل : الف سلامة عليها ، اتفضل
-يوسف: شكراً يا بنتي
◘◘◘ في محل مصوغات اللؤلؤة ،،،
-يوسف: انت متأكد يا شريف
-شريف الصائغ: اه يا يوسف باشا ، زي ما أنا شايف حضرتك قدامي
-يوسف: يعني هي كلمتك عشان السلسلة ؟
-شريف الصائغ: ايوه وانا حتى جبتلها الدلاية اللي عاوزاها بس هي مقالتليش ع الحرف اللي هحطه فيها
-يوسف: طب انا عاوز منك خدمة يا شريف
-شريف الصائغ: رقبتي يا باشا
-يوسف عاوزك تـ............................................
-يوسف في نفسه: كده أنا جمعت طرف الخيط ، جانا سلسلتها خدتها الشغالة عشان تصلحها ،وشريف الصايغ كان عارف بده ، وعز بيقول لاقاها في النادي، والشغالة سرقت السلسلة والهدوم ، جانا في نفس اليوم راحت للدكتور وعملت التحاليل ، وحازم يعرف سيلين ، ودارين على علاقة بحازم ، وشركة عز ولعت برضوه في نفس اليوم .. يعني .. يعني ... ده معناه ان ........... لأ مش معقول !!!! ◘◘◘
....................
عودة للوقت الحالي ،،،،
رن هاتف المهندس يوسف برقم ......،،،
-يوسف: ايوه يا شريف
-شريف الصائغ: كله تمام يا باشا ، عملت اللي قولتلي عليه
-يوسف: تمام يا شريف ، شكراً يا بني
-شريف الصائغ: على ايه يا باشا ، انا بلغت عز باشا باللي حصل مع مدام جانا ، يعني مجبتش حاجة من عندي
-يوسف: ربنا يجازيك خير يا بني
-شريف الصائغ: أنا في الخدمة !
-يوسف في نفسه : أنا لازم أبلغ حسين فوراً بكل اللي وصلته ، لازم يعرف الحقيقة عشان نتصرف سوا ، استحالة أخلي اللي اسمها سيلين دي تدمر حياة عز وجانا ، يستحيل ........................... !!!
