رواية دعني احطم غرورك الفصل الرابع والستون
في مكتب حسين الدمنهوري ،،،،
-يوسف: الورق معاك أهوو اتأكد بنفسك من كل حرف أنا قولتهولك
-حسين بدهشة: مش ممكن ، دول عالم آبلسة .. طيب سيبلي الورق أراجعه كمان مع المحامي
-يوسف: دي النسخة بتاعتك والأصل اهوو ، وهعمل كمان نسختين منهم احتياطي
-حسين: ليه كل ده ؟
-يوسف: عشان نأمن نفسنا ضدهم ، أنا عاوزك تفكر بالعقل ، عاوزين نحمي عيالنا من سيلين وجوزها ونرجعهم لبعض تاني
-حسين: مسألة رجوعهم لبعض دي صعب شوية
-يوسف: مافيش حاجة صعبة بأمر الله ، الورق اللي جالنا عن الصفقات المشبوهة وعن تنظيم رامز لصالة قمار في بيته هيفيدنا أكيد
-حسين: بس لازم نخلي بالنا كويس
-يوسف: طبعااااا اطمن ، أنا نوي أعمــ......
-جانا مقاطعة: اوووه، سوري أنكل حسين ، عندك حد
-حسين: تعالي يا جوجو ده عمك يوسف
-يوسف: مش معقول ، جانا ، انتي اتغيرتي خالص ! أنا معرفتكيش
-جانا: هاي انكل يوسف ، ازيك ، وازي انطي عايدة؟
-يوسف: احنا بخير الحمدلله .. مش تقولي يا سحس ان جانا احلوت اوى كده
-جانا بخجل : ثانكس أنكل ، انا هاجيلك وقت تاني أنكل حسين ..
-حسين: قولي يا بنتي عاوزة ايه، عمك مش غريب ؟
-جانا: كان في شوية papers عاوزين توقيعك
-يوسف مندهشاً : هو انتي يا جانا بقيتي بتشتغلي ؟
-حسين مقاطعاً: بقالها كام يوم بس عاملة شغل جامد
-جانا: ثانكس انكل ، ده انا لسه بتعلم
-يوسف: ماشاء الله ربنا يحميكي
-جانا: عن اذنكو ، اه وماتنساش يا أنكل عندك اجتماع كمان ساعة مع مندوب شركة ((.....))
-حسين: حاضر يا جوجو
-جانا ليوسف: سلميلي يا أنكل يوسف ع انطي ديلة
-يوسف: يوصل ان شاء الله
-يوسف: ايه يا سحس ، مش تقولي ان جانا اتغيرت أوي كده
-حسين: وده هيفرق في حاجة معاك
-يوسف بمكر : يوووووه ، أوي .. ده كده اللعب هيسخن
-حسين: قصدك ايه
-يوسف بخبث: قصدي ....................................... !!!!
...................................
في مكتب سيلين ورامز ،،،،،
-رامز: مش ممكن ، دي رابع شركة تلغي توكيلها معانا
-سيلين: كده الخسارة بقت كبيرة
-رامز: في حاجة مش مظبوطة ، زي ما يكون الكل اتفق علينا
-سيلين: في حد بيلعب من ورانا
-رامز: انا هشوف
-سيلين: اه لو جانا توافق ترجع تعيش معانا .. everything will be better
-رامز: by the way ، انا بلغني انها بتشتغل مع اللي اسمه حسين
-سيلين: what ؟؟؟ عرفت ازاي ؟
-رامز: انا ليا عيوني برضوه
-سيلين: ممم.. كده يبقى قدامي فرصة أعمل معاها بيزنس
-رامز: تفتكري هتوافق أصلا
-سيلين: مش ورايا حل تاني إلا ده
-رامز: اوك
...............
في فيلا يوسف الكيلاني ،،،
-يوسف: ها جهزتي يا ديلة
-عايدة: اه يا جوو ، بقالنا كتير مخرجناش فعلا
-يوسف: اهوو تغيير برضوه
-عز وهو قادم من الخارج: خير يا جماعة ؟ لابسين ورايحين على فين كده؟
-عايدة: خارجين
-عز: ماهو باين ، انا أقصد يعني رايحين فين
-يوسف: النادي ، هنغير جو ، تحب تيجي معانا
-عز: ممم.....
-عايدة: براحتك يا بني ، احنا زهقنا من الأعدة هنا و...
-عز مقاطعاً: خلاص انا جاي معاكو ، لحظة واحدة أغير هدومي
-يوسف: طيب احنا هنسبقك ع العربية
-عز: ماشي ، وأهي فرصة نقضي جو أسري سوا
-عايدة: فعلا مخرجناش مع بعض من زمان
-يوسف: طب يالا
-عز: ثواني يا بابا
-عايدة ليوسف: مش غريبة شوية ؟
-يوسف: ايه ؟
-عايدة: يعني عز مش بعوايده يروح معانا في حتة ، لأ وكمان النادي !!
-يوسف: سبحان مغير الأحوال
-عايدة: فعلا
-يوسف: يالا بينا نسبقه ع العربية
-عايدة: اوك
..........
في النادي ،،،،
-النادل حسن: منور يوسف باشا ، بقالنا كتير مشوفناش سعاتك
-يوسف: شكراً يا حسن ، هاتلنا بقى عصير كوكتيل ، وشوية كده هات المنيو عشان هنتغدى هنا ..
-النادل حسن: حاضر يا باشا
-عايدة: اوه بليز حسن متنساش الـ ice water !
-النادل حسن: حاضر يا هانم
-عز: اهلا حسن
-النادل حسن: عز باشا ، منور يا فندم
-عز: هاتلي الـ juice بتاعي و.. بابا انتو طلبتوا غدى ولا لسه ؟
-يوسف: لأ لسه
-عز: طب كويس عشان انا نفسي مفتوحة ع الأكل
-عايدة: غريبة
-عز: ايه يا ماما اللي غريبة ، واحد جعان وعاوز ياكل
-عايدة: مممم....
-عز: روح يا حسن وبعد كده تعالى عشان تاخد طلبات الغدى
-النادل حسن: حاضر يا باشا
-عز: انا هاروح اشوف الواد سينو وراجع تاني
-يوسف: روح يا بني
-عايدة: لأ عز في حاجة متغيرة
-يوسف: مش عارف والله يا ديلة
وبينما كان عز الدين يبحث عن ياسين قابل بالصدفة وليد ،،،
-وليد: أهلا بشمهندس عز
-عز:هو حضرتك تعرفني؟
-وليد: مش معقول حضرتك نسيتني بالسرعة دي
-عز: معلش اعذرني ، مش واخد بالي
-وليد: حضرتك أنا اللي كنت مسئول عن رحلة النادي للعين السخنة ، ويومها حضرتك جيت وخدت مراتك وقريبتها وكمان معاك صاحبك تقريباً
-عز: ايوه ايوه افتكرت ، اهلا يا استاذ وليد ، معلش اعذرني معرفتكش وكده ، الدنيا مشاغل والواحد عقله مش فيه
-وليد: ولا يهمك يا بشمهندس ، اخبار المدام ايه الوقتي؟ أصل من ساعة الخناقة الأخيرة واحنا مشوفنهاش لأحسن يكون حد اتعرضلها تاني
-عز باستغراب : خناقة ؟ انت بتكلم عن ايه
-وليد: ايه ده هو حضرتك متعرفش ؟
-عز: أعرف ايه بالظبط ؟
-وليد: كان في حد اتعرض للمدام وطلبت النجدة وانا ساعدتها
-عز: حد مين ؟
-وليد: بص أنا عارف شكله لكن الصراحة اسمه مش متذكره ، بس صاحبك اللي جه معاك الباص ضربه أما عدمه العافية
-عز: ياسين ؟
-وليد: تقريباً هو ..
-عز بلهفة : آآآ.. ع العموم أنا متشكر ع اللي انت عملته ، بس لو سمحت اذا شوفت الشخص اللي اتعرض لجانا.. آآآقصد لمراتي توريهوني
-وليد: اكيد
-عز: بص خد رقم موبايلي وكلمني لو عرفت حتى اسمه ايه ، وانا موجود في النادي النهاردة فلو صادفت وشوفته يا..ريت .. بلغني
-وليد: مافيش مشكلة
-عز: وشكراً مرة تانية
-وليد: العفو يا بشمهندس
-عز في نفسه: خناقة مع جانا ، وياسين كان فيها !! بس ده مين اللي اتعرض لجانا .. وهي بيتجي النادي من امتى أصلاً !!
كان ياسين يتحدث مع أحد الأشخاص حينما رأه عز الدين من بعيد ،،،
-عز من بعيد: سينوووووو .. ياسين
-ياسين في نفسه : عز ! وده ايه اللي جابه ، مش كان عامل مقاطعة مع الدنيا كلها ، أحسن حاجة اعمل نفسي مش شايفه
-عز : ايه يا عم .. بنادي عليك بقالي ساعة
-ياسين: انت بتكلمني ؟ مخدتش بالي
-عز: ايه الاسلوب الناشف ده يا سينو؟
-ياسين: طب آصلاح نتكلم وقت تاني
-هيثم: صلاح مين ؟ انا اسمي هيثم
-ياسين: هو أنا مخي دفتر مفرقتش كتير صلاح من هيثم الاثنين 4 حروف
-هيثم: طب اسيبكو سوا وأخلع أنا !
-عز: هتفضل منفضلي كتير
-ياسين: هو انا جيت جمبك أصلاً
-عز: لسه زعلان مني أسينو؟
-ياسين: هو انت عملت حاجة تزعل
-عز: الصراحة كتير
-ياسين: طب كويس انك عارف
-عز: ميبقاش قلبك اسود بقى
-ياسين: استغفر الله العظيم يارب
-عز: طب قولي ايه السكة اللي تخليني أصالحك
-ياسين: امشي ياعم الله يكرمك
-عز وهو يقبل رأس ياسين: ده انت حبيبي أسينو
-ياسين: حبيبك! اومال لو كنت عدوك كنت عملت فيا أكتر من كده ايه !!
-عز وهو يمسك رقبة ياسين: خلاص يا عمنا أنا محقوقلك ، وادي راسك كمان مرة ، مووووه
-ياسين: خلاص سيب رقبتي هتكسرها
-عز: صافي يا لبن
-ياسين: رقبتي يا عم انت
-عز: مش هسيبها إلا لما ترد عليا
-ياسين: خلاص يا عم حليب يا قشطة
-عز: حبيبي يا سينو
-ياسين: الوقتي بقيت حبيبك ، ده انت من غيري ولا حاجة
-عز: لا يا راجل ، ده انا عندي أصحاب كتير بس منفضلهم
-ياسين: عليا برضوه ، عد غنماتك يا جحا ، غنمة قايمة والتانية نايمة
-عز ضاحكاً: هههههههههههههههههه يخربيت شيطانك ، والله ووحشني هزارك يا سينو
-ياسين: أل يعني كان فارق معاك
-عز: اه والله ، ده المكتب كان مضلم من غيرك
-ياسين: ليه كنت شغال كشاف نور هناك
-عز: لأ عداد كهربا
-ياسين: بايخة
-عز: هههههههههههه ، ماشي يا سيدي ، المهم بس قولي اخبارك ايه ، ومبسوط في الشغل مع أبويا
-ياسين: الحمدلله جوزاتي اتخربت ع ايدك ، وابوك الصراحة يعني ومن غير زعل
-عز: ماله؟
-ياسين بكل ثقة: من غيري ينهــار
-عز: نهار أسود ، انت عملت للراجل ايه
-ياسين: عملتله restart
-عز: أتاري الراجل باظ من ساعة ماروحتله
-ياسين: ما أنا حطيت الـ touch بتاعتي
-عز بتردد: وأخبار.. آآ.. جانا ايه ؟
-ياسين: بتسأل ليه
-عز وهو يعبث بشعر رأسه: عادي يعني
-ياسين: مش كل واحد راح لحاله
-عز: اه .. بس.. بس
-ياسين: بس ايه
-عز: أصل سمعت طراطيش كلام عن انها جت النادي وخناقة كده حصلت و...
-ياسين: اها .. والمطلوب؟
-عز: يعني بطمن
-ياسين: لأ اطمن يا عز جانا بميت راجل رغم انها الوقتي بقت .. بقت
-عز: بقت ايه ؟؟؟
-ياسين: متدوؤش
-عز: والخناقة دي كانت مع مين
-ياسين: يهمك تعرف
-عز مدعياً عدم اهتمامه : آآآآ... لأ .. عادي
-ياسين بخبث: كانت مع الزفت حازم
-عز بحدة: نعم ؟ حازم ؟؟؟ هما بيتقابلوا ؟؟؟
-ياسين: حيلك حيلك ، مالك سخنت كده ليه ، جانا معدتش تخصك
-عز: بس برضوه ، دي..دي كانت مراتي و.. وسمعتها من سمعتي
-ياسين: الكلام ده كان زمان ، لكن الوقتي انتو منفصلين
-عز: بس محدش يعرف ده
-ياسين: اللي معرفش هيعرف ، وبعدين كفاية حازم والشلة القديمة هما بيقوموا بالواجب مع اي حد
-عز: انت بتشوف حد منهم
-ياسين: لأ ، أنا قاطعت الكل بسببك ، أصل الصراحة معرفتكم كانت ..كانت
-عز: كانت ايه؟
-ياسين وهو يتحسس قفاه : بلاش لأحسن انت ايدك طويلة
-عز: ايوه كده اتعدل
..........
في مكان أخر بالنادي ،،،
-لوجي: مالك يا ياسمين؟
-ياسمين: ماليش
-لوجي: انتي بقالك فترة متغيرة وأنا ملاحظة ده ، حتى دونا معدتش بتجي زي الأول ، وحازم بعد وأخد جمب برضوه
-ياسمين: عادي
-لوجي: لأ مش عادي ، احنا كنا ليل نهار سوا ، وفجأة الكل فركش
-ياسمين وهي ع وشك البكاء: أنا مخنوقة يا لوجي
-لوجي: احكيلي يا سمسمة يمكن أخفف عنك شوية ، مش احنا friends
-ياسمين: عارفة يا لوجي لما تكوني مش قاصدة تأذي حد وبعد كده .. بعد كده آآآ
-لوجي: قولي يا سمسمة ع اللي مضايقك بصراحة وانا promise مش هاقول لحد..
حكت ياسمين لـ لوجي عما قامت به مع دارين للايقاع بين عز وجانا ،،،
-لوجي بحدة: بقى كل ده يحصل وتخبي عليا
-ياسمين: انا مكونتش عارفة ان هيحصل divorce .. افتكرت بس انها لعبة وكده
-لوجي:حياة الناس لعبة يا ياسمين
-ياسمين: ما انا والله مش كنت أعرف
-لوجي: بجد انتو مش أصحاب انتو .. انتو.. مش عارفة أقول ايه
-ياسمين: صدقيني يا لوجي انا ضميري بيعذبني ع اللي عملناه مع عز
-لوجي: كويس ان لسه عندك ضمير ، ده عز أقرب حد لينا مش عمره اتأخر عننا تقوم الطعنة تجيله مننا احنا
-ياسمين: بليز لوجي ساعديني أنا حاسة بالذنب
-لوجي : يااااه كمان حاسة بالذنب ، بجد أنا ندمانة ان عرفت ناس زيكم
-ياسمين: لوجي بليز forgive me
-لوجي: أسامحك؟ سوري ، انتو حتى خبيتوا عليا عشان عارفين اني لا يمكن كنت اوافق ع حاجة زي كده .. بس أنا مش هسكت عن اللي عملتوه لازم عز يعرف ده
-ياسمين: I am ready to tell Ezz ، بس بليز مش الوقتي
-لوجي: اومال امتى ؟
-ياسمين: رايحة فين يا لوجي
-لوجي: انا ماشية ، مش يشرفني أعد مع people like you
-ياسمين: لوجي.. لووووجي .. please wait .. اووف بقى ، ايه اللي هببته أنا ده.
.........
-عز: تعالى أسينو اتغدى معانا ، ده الحاج والحاجة بنفسهم هنا وهما أكيييييد هيوكلوك
-ياسين: ايه ده بجد .. طالما فيها مام يبقى هلم بينا
-عز وهو يتذكر جانا : مفجوع .. زي ناس !
-ياسين بخبث: ناس مين ؟
-عز: هه .. ولا حاجة .. يالا بس
-ياسين: ديلة حبيبة قلبي منورة النادي والله
-عايدة: ياسين ، مش معقول ، ازيك يابنب
-يوسف: انت بتعاكسها قدامي كده عادي
-ياسين: مش أحسن ما أعاكسها من وراك وتزعل
-يوسف: انا كان كده ماشي !
-عز: اتلم ياض دي امي
-ياسين: وهو في في حلاوة امك
-عز: وله .. ها !!
-ياسين: خلاص ياعم ، عاوزين ناكل يا ديلة ، هتطلبيلنا ايش ؟
-عايدة: انت عاوز ايه يا سينو
-ياسين: ما بلاش
-عز: يا عم قول متكسفش
-ياسين : والله ما أنا مكسرلكم كلمة ، عاوز فراخ وجوز حمام ورز بالخلطة وسلطة وشوربة وصينية بطاطس وملوخية وطبق خضار مشكل .. آه والبيبسي بس يكون دايت
-عز: البيبسي دايت !!!
-ياسين: انت عارف عشان الحموضة وكده .. واما أخلص هشوف التحالي
-عز: كمان تحالي
-ياسين: ده انا هفتان يا جدع وداخل ع أيام سودة
-عز: ماشاء الله ده انا شايف طالعلك كرش اهوو
-ياسين: الله اكبرررر ، انت هتحسده ، اهوو ده الحاجة اللي بربيها
-يوسف: خلاص يا عز سيب ياسين ياكل اللي هو عاوزه
-عز: ما أنا اللي هدفع
-ياسين: ما انت بتدفع من جيب أبوك مش من جيبك
-عز: لم نفسك ياض
-عايدة: يوووه يا ولاد هتفضلوا كده لحد أمتى
-ياسين: حوشي يامه ابنك عني
-عز: كمان خليت ديلة أمك
-ياسين: آااااااه وان كان عاجبك
-عز: وماله ياخويا
-لوجي من بعيد: عز .. عـــــــــــز
-ياسين: الله مش دي لوجي
-عز: اه هي ، مالها
-ياسين: مش انت معنتش بتكلمها هي والشلة
-عز: ايوه من فترة
-ياسين: اومال بتنادي عليك ليه
-عز: مش عارف
-ياسين: طب روح شوفها عاوزة ايه
-عز: ياعم كبر منها ، أكيد عندها حوار فكسان عاوزة ترغي فيه عشان ترجع الود القديم
-لوجي: بليز عز .. I need to talk to you ضروري
-عز: سوري لوجي مش فاضي
-لوجي باصرار: الموضوع مايستناش
-عز بحدة: انتي مش شايفاني أعد مع عيلتي ؟؟؟ لوسمحتي امشي الوقتي
-لوجي: عز بليز لازم تسمعني ، الموضوع بخصوصك انت وجانا
-عز: جانا ؟؟؟
قام عز الدين بسحب لوجي من يديها وابتعد بها عن المكان الذي تجلس فيه عائلته ،،
-عز: خير ، هاتي اللي عندك
-لوجي: الأول عز انا مش عيزاك تزعل مني ، والله انا مش كنت أعرف باللي حصل
-عز: انتي هتضيعي وقتي ، قولي عندك ايه وخلصيني
-لوجي : look ، أنا عرفت إن ........................................ !!!!!
قصت لوجي على عز الدين ما عرفته من ياسمين وما قاموا به من مؤامرة للايقاع بينه وبين جانا
-عز بغضب شديد: أه يا ولاد الـ...... ، بقى تعملوا كل ده وتقوليلي مش قصدك
-لوجي: اقسم بالله ما كنت أعرف
-عز وهو يشعر بالندم : حرام عليكو خربتوا بيتي ودمرتوا علاقتي مع مراتي ، والأسوأ من ده كله خلتوني أشك فيها بعد ما كانت وثقت فيا ..
-عز بحرقة بعد أن تذكر فعلته :ده.. أنا ده..أنا قتلت ابني بايدي .. قتلته قبل ما يجي الدنيا وفرحت بموته .. ليييييييه .. لييييييييييه عملتوا فيا كده ؟؟؟؟
-لوجي: I am sorry عز بجد سوري
-عز: اسفك ده هيرجعلي ايه ؟؟؟ حسبي الله ونعم الوكيل فيكو، أنا مش هسيب حقي أنا وجانا .. مش هسيبهم يتهنوا بحياتهم بعد ما دمروني
-لوجي: أنا مستعدة أتكلم مع جانا وأفهمها اللي حصل و...
-عز مقاطعاً: بس بقى كفاية لحد كده ، ابعدوا عننا بقى ، مش عاوز أشوف حد فيكو تاني .. وهحقي هعرف ازاي اخده من كل واحد آذاني وأذى جانا
-ياسين: مالك يا عز ؟ زي ما يكون حد اداك ع نافوخك
-عز بضيق : انا ماشي
-ياسين: استنى يا جدع انا ملحقتش آكل حاجة
-عز وهو في قمة غضبه: ابعد عني السعادي يا ياسين
-يوسف: حصله بسرعة يا ياسين شوف ماله ، اوعى تسيبوه وهو كده !!
-عايدة: استر يا رب في ايه اللي حصل ؟ ماهو كان جاي النادي معانا ومبسوط
-يوسف: من ساعة ما البنت دي جت تحكي معاه وهو وشه اتقلب
-عايدة: اكيد البنت دي قالته حاجة تضايقه
-يوسف: ماتستبعديش !!
........
في منزل حسين الدمنهوري ،،،،
-حسين: الجميل اخباره ايه ؟
-جانا: تمام يا آنكل ، انا خلاص جهزت الـ files وعملتلك تقرير باللي فيها و..
-حسين مقاطعاً: انتي هتيجي معايا بكرة المؤتمر
-جانا بتردد: أنا؟؟ why ؟
-حسين: مش انتي الوقتي بتدربي
-جانا: ييس
-حسين: يبقى لازم تعرفي نظام المؤتمرات ماشي ازاي عشان تتعلمي اكتر
-جانا: بس انا معرفش حاجة عنها
-حسين: عشان كده بقولك لازم تيجي معايا
-جانا: بليز آنكل بلاش ، خليني أنا أهتم بشئون الشركة وانتظرك في المكتب
-حسين: يووه يا جانا ، مش أنا مديرك ؟
-جانا: ييس
-حسين: ده بقى أمر مباشر من مديرك ولازم يتنفذ
-جانا: اوك يا آنكل
-حسين: ايوه يا حبيبتي ، فرحي قلبي
-جانا: كل ده عشان هاجي المؤتمر
-حسين: لأ عشان شايفك بقيتي احسن من الأول ، وخرجتي بره مود الاكتئاب اللي كنتي جواه
-جانا: اها
-حسين: مش عاوزة حاجة مني ، انا رايح أنام
-جانا: ثانكس أنكل ، هخلص بس أخر حاجة وهنام برضوه
-حسين وهو يقبل جبينها : طيب يا بنتي ، تصبحي ع خير
-جانا: وانت من أهله يا آنكل
-حسين: وبالمرة اشوف البت دينا في اوضتها بتعمل ايه
-جانا: اوك يا انكل .. اشوفك ع خير
-حسين: تلاقي كل خير يا جوجو
ظلت جانا شاردة للحظات تتذكر كيف كانت حياتها مع عز الدين ، ورغماً عنها سقطت بضع قطرات من الدموع خاصة حينما رأت السلسلة التي كان قد أهداها لها ،،،،،
-جانا: هونت عليك يا عز بعد كل اللي كان بينا ، هونت عليك تكدبني وتصدق غيري .. يستحيل أرجعلك تاني ، انت خسارة ان الواحد يفكر فيك ، بس..بس.. هو يمكن كان معذور ماهو كل حاجة كانت ضدي برضوه، لألألألألأ .. برضوه كان لازم يصدقني .. ده موت الحاجة الوحيدة اللي كان ممكن تكون رابط بينا، حتى..حتى انه كان فرحان فيا لأ.. مش ممكن ، أنا ايه اللي بهببه ده مش لازم أفكر فيه ، مافيش حد يستاهل دموعي ، أو يستاهل ان أضيع عمري عشانه ، خلاص عز ده كان صفحة في حياتي واتقطعت بكل ما فيها !! أنا لازم أكون أقوى من كده ومانهرش بسهولة . لازم أواجه الدنيا كلها وأبقى أقوى من عز نفسه !!!!!!!
..............
في غرفة دينا ،،،،،
-دينا هاتفياً: ها وبعدين
-ياسين: هو أنا بحكيلك قصة قبل النوم
-دينا: أووف منك
-ياسين: يابت سيبني أتغزل فيكي شوية
-دينا: احنا اتفقنا ع ايه !
-ياسين: أنا عيل وبرجع في كلامي
-دينا: والله ؟؟ عيل ! طيب أنا مش برتبط بعيال
-ياسين: لا وحياة أبوكي
-دينا وهي متفاجأة بدخول والدها الحجرة : د..دادي !!!
-حسين: بتكلمي مين ؟
-دينا: ده..دي ..
-حسين: هاتي التليفون
-ياسين وهو مازال ع الخط: في ايه يا دودي ؟
-دينا: دادي ... آآآآ... !!
أخذ حسين الهاتف المحمول من دينا ليستمع إلى من تتحدث ،،،
-ياسين مكملاً: أبوكي ده عامل زي.. زي.. مش عارف اقولك ايه بس هو شبه الواد العفريت المبقلظ ده اللي مرسوم ع كيس البوزو بتاع زمان اللي كنت بجيبه بعشرة صاغ ، مافيش مكان أشوفك فيه إلا وألاقيه هوبا بقى قصادي .. نظام أنا قرينك آزواوي ، اوعي يا بت يكون معاكي زي علاء الدين المصباح ده وبتدعيكه عشان يطلعلي منه الجني ويقولي بصوت قوي........
-حسين مقاطعاً: شبيك لبيك وهكسر ايديك ورجليك ده ان مكنش كل حتة فيك !!!!
-ياسين ضاحكاً: هههههههههههههههه عملتيها ازاي دي يا أروبة ، بتقلدي صوت ابوكي
-حسين: ما أنا أبوها !!!!!
-ياسين هو ينظر لشاشة التليفون : مين .. فين ؟؟؟ ازاي ؟؟؟
-حسين: يومك اسود
-ياسين بفزع: غطيني يامه وصوتي !!!!
-حسين: أه لو مسكتك في ايديا الوقتي !!!
-ياسين: أنا... أنا..أسف يا عمي ، حصل لبس في الخطوط، قصدي تداخل في الموضوع ، يوووه ،في عطل فني ، الشبكة وقعة .. مش ده بيت عبد المقصود
-حسين: استنى بس عليا ، أنا هجيبك !!
-ياسين: لقد نفذ رصيدكم برجـــاء غلط الخط .. تيييت ، تيييت ، تيييت !
-ياسين لنفسه: روحت في داهية يا سينووو ، البت دينا زمانتها اتفرمت ، ألف رحمة ونور عليها !!!
-حسين لدينا: كنتي بترغي مع مين ؟
-دينا: مــ...مــ..ما
-حسين: انتي هتمأمأي ؟؟؟
-دينا: آآآآ.. آآآآ
-سهير متدخلة: يا حاج حسين تعالى الأكل هيبرد
-حسين: استني اما أشوف بنتك كانت بتكلم مع مين
-دينا: my friend
-سهير: يوووه يا حاج بعدين ، أكيد واحدة من أصحابها
-دينا: آآآ..ييس .
-حسين: عليا برضوه؟ ده صوتها شبه الرجالة
-سهير: تكونش البت صاحبتك دي اللي اسمها روفيدة
-دينا: آآآه هي ..هي صوتها تخين شبه الـ boys
-حسين: عليا برضوه ؟؟؟
-سهير: أما أناعملالك حلة محشي انما اييييه هتاكل صوابعك وراها
-حسين: بجد ؟ طب هخلص المحشي وراجعلك يا دينا
-دينا: الفون يا دادي
-حسين: لأ انا هخليه معايا عشان أشوف روفيدة صاحبتك دي
-دينا: بس.. بس ..
-حسين: من غير بسبسة
-دينا: اوك دادي
-دينا في نفسها: دادي مش stupid عشان يصدق ، ربنا يستررررر
.............
ظل عز الدين يتجول بسيارته طوال الليل في شوارع القاهرة ، شارداً فيماحدث ، نادماً على تسرعه وظلمه لجانا ، حانقاً للظروف التي جعلته يتسرع في ازهاق روح بريئة بدون قصد بل والأسوأ أنه أظهر الشماتة في وقتٍ كان من المفترض فيه أن يقف بجوار زوجته يساندها .. كيف ستقبل به جانا مرة أخرى ، كيف ستسامحه على ما فعل وهو أول من تخلى عنها وظن بها السوء بل وقتل بيده الرباط الذي كاد أن ينبض بينهما فيربطهما سوياً للأبد .. مهمة مستحيلة بالنسبة لعز لكي يعيد جانا إلى أحضانه ..
توقف عز الدين بسيارته أسفل منزل جانا ، ظل ينظر بعينيه إلى الأعلى متمنياً أن يراها ولو للحظة من نافذة حجرتها ، لكن للأسف كل شيء مظلم أمامه حتى الضوء بغرفتها ، هو بات يعلم أن الطريق إلى قلبها الآن واستعادة حبهما يحتاج إلى معجزة
-عز لنفسه: أنا أسف يا جانا.. سامحيني ، والله غصب عني ، أنا أسف اني..اني كدبتك وصدقت غيرك .. أنا أسف اني ضيعتك من ايدي ، بس والله لسه بحبك، لسه حبك جوايا ، انا بقالي شهرين بتعذب في غيابك عني ، وبفرح لما بسمع أي خبر من قريب ولا حتى من بعيد عنك ... وحشتني يا غالية ، وحشتني يا كل عمري .. يارب ساعدني وخليني أعرف أرجعها تاني ليا !!
ثم عاد عز الدين إلى فيلته ، فوجد والده بانتظاره ،،،
-يوسف: ايه يا بني اللي اخرك كل ده بره
-عز: بابا
-يوسف: مالك يا بني
-عز : ماليش
-يوسف: ايه فاكرني مش هعرف ايه اللي مضايقك
-عز: بابا انا... أنا ...
-يوسف: انت ايه ؟
-عز: أنا لســه بـ....
-يوسف مقاطعاً: اعذرني يا بني ع مقاطعتك بس انا كنت عاوز أقولك حاجة ، كان ممكن أسيبك كده من غير ما تعرف ، بس.. بس انت برضوه ابني وسعادتك تهمني
-عز: آآآآ.....
-يوسف: أنا كان بقالي فترة بجمع معلومات عن اللي حصل بينك وبين جانا
-عز: هه ... بابا أنا كنت عاوز أقولك ....
-يوسف مقاطعاً: متقاطعنيش ، اسمعني الأول وبعد كده أنا هسمعك
-عز: بابا أنا....
-يوسف مكملاً: أنا عارف انه كان من الصعب عليا أصدق ان جانا تكون بالأخلاق دي ، أو اني أسكت عن ظلم انسان بريء حتى لو كان اللي ظلمه هو ابني .. المهم ده الورق اللي أنا جمعته عن جانا في اليوم المشؤوم
-عز: بابا..
-يوسف: والشغالة دلال اعترفت بانها سرقت السلسلة وهدوم جانا عشان....
-عز مكملاً: عشان يعملوا فيلم عليا ويخلوني اصدق ان جانا جاينة وعلى علاقة بحازم صاحبي
-يوسف: انت عرفت؟
-عز: أيوه يا بابا عرفت كل حاجة ومن غير ورق ، قلبي كان بيقولي ان جانا بريئة واني ظلمتها ، بس غروري منعني اني أعترف بده
-يوسف: قصدك انك ...
-عز: انا لسه بحب جانا يا بابا وعاوزها ترجعلي
-يوسف: ترجعلك ؟؟ معتقدش ، اصل .. أصل جانا الوقتي
-عز: مالها جانا؟
-عايدة مقاطعة: بتحكوا في ايه كل ده ؟
-يوسف: هه مافيش يا ديلة ، بنتكلم في الشغل ، صح يا عز
-عز: ايوه يا بابا ، أنا قايم بقى لأحسن تعبان
-يوسف: طب اعمل حسابك انت اللي هتحضر المؤتمر بكرة بدالي
-عز: ليه يعني ؟
-يوسف: عندي اجتماع مع مدير شركة الـ((....)) ومش فاضي أروحه ، وكل رجال الأعمال هيكونوا موجودين فيه ، فمش معقول محدش فينا يروح
-عز: ربنا يسهل
-يوسف باصرار: أنا بأكد عليك تروح مش هاعيد كلامي ، أنا أبوك ورئيسك في الشغل
-عز: طيب حاضر !
ثم صعد عز الدين إلى غرفته بينما ظل يوسف وعايدة يتحاوران ،،
-عايدة: كنتوا بتكلموا في ايه يا جوو
-يوسف بخبث: لسه بيحبها يا ديلة
-عايدة: بجد يا جوو
-يوسف: أه والله .. بس لازم عز يتعلم ازاي يحافظ ع بيته
-عايدة: قصدك ايه؟
-يوسف بمكر: قصدي اني هسويه ع الجانبين لحد ما يقول حقي برقبتي ......... !!!!
