رواية أرض الخناجر الفصل الخامس والستون بقلم ايلول
لا تگلي الگبر والجفن والتابوت
فكرة موتك ما مقتنع بيها
عدل وتضل عدل.. لو تندفن مرتين
يا محبوب عيني ومي سواجيها
══━━━━✥◈✥━━━━══
عــفراء:: كهلااااان.
رنـــه :: صوتها عصر گـــلبي عصر صرختها من نص گلبها حسيت كلشي من حولي سكن وبس عيوني تتحرك وتتلفت.
يضحك وي منذر مسافه عنه والتفت عليها من صرخت ركضت عليه بكل حيلها يعاينلها ما فاهم شي، عيوني تتلفت بينهم وبين منذر فتحت عيني حييل وانه المح من بين الشجر زلم ملثمة والسلاح بأيدهم يتختلون.
ووي صرخة عفراء ورگضتها رموا علينه بس لمحتها ذبت روحها على كهلان طيحته للگاع .
شمرت روحـــي فوگ شمس بنص الساگيه اليابسه ساده اذني حيييل وصوت الطلق احس يفوت من يم راسي
كهلان:: بس اريدن تهدني واكومن التفگتي، ركض منذر للتفگه رمه عليهم طيح واحد واثنين شردوا دفعتها اصيح بوجهاا
-هدديني ووولج عفره.
-يييييمممه.
دفعتها مني اركض وره منذر اليركض وراهم بسلاحي شلت أيّدي أأشر عليه وأصيح حتى يردلي لا ينكتل اعاين الايدي الصارت گدام عيوني كلها دم وصوت اختي الچان تارس اذني بعد ما سمعته.
ردتيلها اركض واعثر ممدده بالگاع والثانيه بالساگيه ما ادري ياهي المنهن ميته وياهي العدله وصلتها وهيه تصيح
-شمسسس رنـــه.
عبرتها اركض الرنه جريتها من فوگ شمس روحـــي رايحه ترجف بأيدي وتهز راسها
-ماااابيه شي مااابيه شي
رنـــه::حطيت شمس على گـــلبي وهيه تبچي بكل صوتها وكهلان يتلمس وجهي وبطني صرخت ابجي من شفت اديه كلهن دم عبالي منه عاين الاديه فاتح عينه بصدمة والتفت العفراء ركض بكل حييله وطاح على وجهه صررررخت وانه اشوفن دمها يسيل من جوه عبايتها على الگاع حطّ راسها بحضنه وبأثنين اديه كاض وجها
-عفراء عفرااااء خويه خووويه عاينيلي يابعد روحـــي خوويه .
اريدن اكوم على حيلي ما اگدر رجليَّ ماتن اصرخ ما مستوعبه اختي الگدامي غرگت بدمها واخوي يلمها على گلبه مايدري بروحه شيسوي
عفت شمس بمچانها وكمت أركض رجليَّ ما يشيلني الف مره طحت على وجهي لمن وصلتهم
-يمممه يممممه عفره ييييمه.
عيونها فاتحتهن حيييل وتشهگ ، عيونها على شمس مدت ايدها تكض ايدي تارستها دم وبشهگه كوه تطلع منها الحجايه
-شمسس. شمسس، كهلان شمس برگبتك شمس امانه برگبتكم.
-لاا لااا يابعد روحـــي مابيج شي مابيج شي خويه يا حيلي انتِ يا دنيتي مابيج شي.
التفت على ولدنا الاجوا يركضون بسلاحهم صرخ عليهم يرجف
-صيهددددد صيهدددد تعااال ليه صــيهد الحگني.
روحـــي حسيتها تنسلب من گدامي صوتي اريده يطلع ماكو بس فاتحه عيني حييل وصدى صياحهم بأذني احس بروحي اندفعت منها وايدها هدت ايددي جرها منذر الحضنه
-عفرره عفره .
عينها بعيني احس بروحي جاي انجر منها ليوره وعيوني على عيونها شفايفها يتحركن
-شمس.
غوشن عيوني غمضت ورديت فتحت لمحتها بحضن كهلام يركض بيها للسيارة والولد وياه
وهـــب::رررررنه رررررنه عاينيلي
جرني حييل فزيت أعاين بوجهه شال شمس وجرني من معصم ايدي يمشي بيه للبيت .
ندى:: اركض طلعت اشوفنها هي وشمس بأيده يگومها وترد تطيح على أركبها بعدني ما واصلتها وطلعت ريـــمه تصررررخ وتملخ بروحهاا وين اروح الياهي منهن ركضت الوهب بس عافها بأيدي هيه وشمس ومشه يركض ويردد
- دخيلك يا ربّي استرنا دخيلك يا علي دخيلك يا ابو الحسنين
جلبت برنه بس اريد اگومها من التراب فاتحه عينها وتجر نفس بشهگه اديها متلفات دم وريمه يم ياب حوشهم تصررخ وتلطم ورغد بس تريد تسكتها
-رنـــه گووومي رنـــه .
تباوع الوجهي وتلتفت ليوره للــبستان جريتها من ايدها حيل امشي بيها للبيت وشمس ماتت من البجي، باوعت الريمه مملخه روحها بباب الحوش حطت ايدها على حلگها اديها يرجفن
رنـــه:: اششش اششش هسه يجيبونها كهلان كال مابيها شي، كالها مابيج شي خويه مابيج شي.
جرت شمس من ايدي ودخلت للبيت لزمت ريـــمه وي رغد
-ووولج ريـــمه اشش اشش عايشه والله عايشه.
گوه كومناها للبيت منتهيه بأدينه ماتدري بروحها شتسوي ادموعها تجري تفتر بالحوش اديها يرجفن وتعاين الرنه غسلت الشمس تبوس بيها، وبصوتها اليرجف تحاجيها
-اشش هسه تجي ماما هسه تجي.
طلعت بساع من سمعت صوت الولد يركضون للبيوت جلبت بأيد وهـــب اتوسل
-بس گليي عفراء زينه ووهب؟
جر ايده مني يركض هو وولد شاكر وميثم واسمع صوت ســليم يصيح على سلطان
-شيخخخ حيدر جاي يخابر.
سلطان:: لا تررررد لا ترد والله احرك سلفهم لو مو شيخ حيدر.
طلعت رغد متخبله اخذوا بعد سلاح ومشوا يركضون للسيارة صاحت عليه ولطمت على وجها هي وريمه
-حاااااجوني كلي عفررره زينه.
صاح عليها ماندري وركضوا للسيارة ردينه للحوش رنـــه كعدت بباب الهول حطت شمس على رجليها تلوليلها وريمه تنطحن تريد تمسح عيونها ماتگدر من رجفة ايدها
شويه واجت جــويريه جايبه عمتي إيمان ساندتها بكل حيلها عيونها يجرن تلكيتها اساعدها كعدناها يم رنـــه دارت عيونها الها حطّت ايدها على گلبها تگلها
-عمه اختي تصوبت، عمه .. دمها ترس الگاع.
جرتها عمه الصدرها تبجي وتدعي العفراء ساعة ساعة يعدن واحنا دمعتنا مانشفت كلنه ملتمين بالحوش ريـــمه كوه كامت على حيلها اخذت شمس من حضن رنه ودتها للغرفة وردت يمهم،
تلفتت اعاين للبنات كل وحده كاعده بزاويه وتبجي بلا صوت جوري رغد مــاسه بــدور، مسحت عيوني گـــلبي يوجعني اخابر على وهـــب ومايرد بس ردنه واحد يبرد گلبنه .
التفتت فازه على شهگة رنـــه حاطه أيدها على گلبها وفاتحة عيونها حييل تباوع لسياج الحوش بومتين حطن على السياج يباوعن علينه وصوت نعيبهن يقشعر البدن
رنه وريمه نفس الرگضه رگضن عليهن يطردنهن يتراجفن طيرنهن ووحده عاينت بوجهه الثانية.
مشت رنه بسرعة دخلت للبيت من سمعت شمس تبجي وريمه التفتت للسياج من البومتين رجعن حطن مشت يمها مــاسه حاجتها وجابتها ساندتها من ايدها روحها رايحه، گـــلبي انعصر درت وجهي منهن امسح بعيوني وعمتي تطك على رجليها عيونها عل باب الحوش دموعها تجري وتدعي .
فتحت الباب بسرعة من سمعت صوت سيارات سرريع صارت بوجهي اول سيارة سيارة سلطان اشر بأيده ادخلي سديت الباب اباوعلهم انترست الساحة سيارات وكلها ملثمة ومسلحة وادم ما اعرفهم درت الريمه من رادت تطلع لزمتها
-يبقون يحجون ريـــمه زلم وياهم.
-بس اسألهم بس خل يكلولي خل يكلولي عفره مابيها شي
جريتها من أيدها ارجعها يم عمتي بس كعدتها التفتت على صوت بچي حسين وعبود، انفتح باب الحوش ودخل طــروادة شايل عفراء بين اديه مغطيها بعبايتها واديها مشمرات مناه ومناه، محد من عدنا مستوعبه بس نباوعله كعد بالحوش غمض عينه ينود وحااضن راسها على گلبه
رغد::يمممممه عفرررره يييمه.
التمن يصررخن ويملخن برواحهن جريت زهره الصدري حضنتها ابجييي واباوع بوجها روحـــي رايحه التفتت على صوت رنـــه طلعت من البيت تركض تدفع بيهن متسودنه جرت كهلان من صدره تصررخ بوجهه
-مااااتت ماتت عفررره ماتتت، وووولج يممه يممه.
فرفحت رووحها تلووب تلووب جن بشر محترك شبگت على عفراء ضامه وجها بصدرها، اصريخ البنات ولطمهن مثل الصدى بأذني ما مصدگه، وجها الحلو ذابل شفايفها بيض، واخوانها يبوسون بيها متسودنين ومن بين صرريخهن كلهن مسحت دموعي لامه زهره وشمس الصدري وعيوني على كهلان يبوسها بخدودها يرجف ودموعه تجري يگلها
-ريت صوابچ بگلبي
يا عزيزة اخوج يبت امي
طاحت رنـــه على صدر عفراء فاقده جرتها ماريا تطك على خدها وركضت ترش عليها ماي، وبس فزت رجعت تبجي وتصرخ تبوس بوجهه عفراء بعيونها وخدودها واديها وتصيح بصوت مفجوع گلبها
-يييمه عفره ييمه.
انفجعت گلوبنه وانهد حيلنه طبوا سلطان وصيهد يدفعون بينه للهول لان منذر يريد يدخل والبنات بلا حجابات لا مــاسه ولا ريـــمه ولا رغد شعرهن كطعنه وخدودهن تتجاره دم، صيهد جر جــويريه وماسه وهي تصررخ دفعونه للهول وسدوا الباب ضلت بس رنـــه وعمتي ايمان بالحوش يمهم
افتر شايله شمس وگلبي مفرفح والبنات بالهول يصرخن ويلطمن، اباوع من شباك الهول رنـــه انتهت وكهلان يحير وين يبوسها دموعه يجرن دخل منذر ملثم كعد بصف كهلان فتح الچفيه ولطم على وجهه بكل حيل يصيح
-يا بووويه يا عفررره يا بعد حيييلي ووولج عيني ما شبعت من عينج ووولج شلون تعوووفيني يا حبيبة روحـــي يا ضي عيني.
ماد اديه كدامه يوديهن مناه ويجيبهن مناه ويحجي وياها يبجي وكهلان غمض عيونه شابگها وحط راسه على صدرها ورنه انفجعت شعرها تگطع باديها ماتت تلوووب مفرحة وصريخها يمرد الگلب
وعبود حاط اديها على وجهه يبوس بيهن ويبجي ويحاجيها روحه رايحه
-فـــدوه اروحنلج عفره امي انتِ حاجيني.
دخلن نسوان اهل منذر امه واخواته يصررخن ويلطمن طاحت رنـــه بالگاع جراها عبود جنازه بأيده لا تحرك ايد ولا رجل، والولد كوموا منذر وكهلان يردون ياخذونها للمغيسل مسح عيونه كوه يحاجي عبود مبحوح صوته
-سكررها سكرهاا لا تموت رنـــه لا تموت.
هو شال عفراء وعبود شال رنـــه فتحتله باب الهول وريمه ورغد بس انفتح باب الهول طلعن متسودنات يلطمن ويصرخن ركضت وره عبود للغرفه حطها بالگاع ويدور على جهاز السكر يرجف وعيونه يجرن ركضت جبتله ماي من صوت الصريخ ما اشوف دربي رشينه على وجها ماي وجر حبوبها حط قطرات ماي بحلكها بس فتحة عينها كعدها يريد يشربها حبوب وهيه تكوم وتطيح تصيح
-اختيي ماتتت امي ماتت .
عاف شريط الحبوب بيدي يريد يحجي يغص بالگلمه
-شربيها حبوبها.
طلع واني كوه لازمتها
-بس اشرربي الحبايه راح تموووتين رنـــه .
-ماااتتت مااات عفره ماتت ولج يييمه اختي ماتتت
شبگتها ابجي لطمت وملخت وجها اريد الزمها ما اگدر اجتني ماريا تركض نتوسل بيها تسكت وتشرب علاجها فاقده تجر باديها من عدنا تنود وتصيح
-وووولجن عوووفني اختييي اختي ماتت ولج يمه ووولج يمه عفرره ماتت يييييمه .
عفتها بأيد ماريا وگمت للحوش البنات على اركبهن كاعدات ريـــمه وجها وصدرها يصبن دم وشعرها تملخ بأديها جريتها اسد بحلگها واحاجيها
-گومي الررررنه، رنـــه راح تموووت.
اهزها من اديها واحاجيها وهيه ماتسمعني صريخ ونحيب البنات تارس اذني وصوت الولد من بره والهوسه ترجف الگلب
-رررريمه
جريتها من أيدها اوكفها تمشي بأيدي منتهيه، اخذتها الرنه مسحت عيونها ترجف جرت شريط الحبوب من ايدي وكعدت كدامها على أركبها ورنه تنود وبس لمحت ريـــمه عاينت لعيونها وصرخت
-رريمه، ولج ريـــمه عفره ماتت اختنا ماتت ريـــمه .
شبگتها يبچن وكوه شربتها الحباية، شلت شمس اسكتها فرفحت من البچي گـــلبي راح يوكف من الصريخ اني الماعشت وياها هواي ولا اعرفها من زمان ما مستوعبه موتها شلون اهلها واخواتها يقتنعن شلون رنـــه تقتنع، عبالك الوكت يركض جابو تابوتها للدوانيه اني الجنت اصبرهن والزمهن تخبلت شكد الدنيا صغيره الصبح ببيت اهلها وتضحك،
الصبح تارسه الدنيا بضحكتها شلون بلحظة صارت بتابوت.
ملتمين على تابوتها صرريخ ولطم حسين بكل حيله شابگ التابوت هوه وعبود وكهلان حاط راسه على التابوت ويبجي جسمه كله يهتز، صريخ رنـــه من بينها كلها متلوع عمت عيونها كد مالطمت على وجها.
شمس جرت روحها من أيدي تبجي وتدفع بيه هديتها مشتّ لكهلان تطك على جتفه شال راسه من التابوت شبگها وبچه حييل ووي بچيه الصريخ عله يحومن على التابوت ريـــمه ورنه وزهره مايدرن شلون يوصلن العفراء ويشبگنها.
تسودنوا من طبوا الولد يردون يشيلون التابوت جلبت رنـــه بأيد كهلان تصررخ
-لااااا يمه ييييمه لا
وعبود الجان ماطالع صوته تخبل لطم لططم الحد ماطاح على ارگبه يبجي بصياح
-يا خوووويه يا ام شمس يااا خوويه.
شالوا التابوت من بيناتنا جلبن بيه البنات يصرخن متخبلات جانوا يردون ياخذونهن بس اثنينهن ريـــمه ورنه طاحن ممرود گلبهن والولد مارضوا كالوا الكهلان يموتن بس تاخذهن، اخذوا خالتي ايمان وجده وام منذر، مشوا وعيونه عليهنّ.
ريـــمه كعدت وطلعت تركض وراهم متسودنه ورجعها ســليم ورنه ولا كعدت طلعت اصرررخ ماتت اجه عبود يركض يمسح عيونه بظهر ايده بس يريد يشوف دربه شالها من بين النسوان وطلع يركض بيها جريت عبايتي اركض وراه روحـــي رايحه ومالحكت بيهم بسرعة أخذوها للمستشفى.
رجعت ابجي گـــلبي مطحون طحن والبنات يبجن دشاديشهن مشگگه من صدورهن وشعرهن مگطع الوجها مايجري دم مطگع من اللطم .
والنسوان يحجن علينه
-كومن كومن البسن اسود وكضن بيتچة اذا كلجن تتلاطمن ياهي السباعية التوكف بفاتحتها؟
بس ويامن تحجي عفراء ام للكل وحنينه حتى على الموحنين ،
يدخلن للبيت نسوان ما اعرفهن يبجن ويتصارخن عليها.
كامت مــاسه كوه على روحها غسلت وجها وحاجت البنات رغد ماكدرت توكف على حيلها لا هي ولا ريـــمه التجري دم من وجها وصدرها طكنها على وجها النسوان ورشن عليها ماي يردنها تستوعب وهيه كوه تتنفس. تتمايل بايدهن ترجف
وزهره وشمس من مالكن واحد من اهلهن راحن الريمه يبجن مجلبات بيها تخبلت شبگتهن تصرخ
-ووولج ييمه رباب ييييميه ييييمه انهدم بيتنا يمه عفررره يا يمه.
اخذت شمس من ايدها الطفله راح تموت كد مابجت انطيتها الماريا احاجيها
-اخذيها للغرفة نوميها فـــدوه البنيه راح تمووت.
اخذتها ومشت حايره اسكت ياهي منهن رغد لو جــويريه لو بــدور مــاسه اخذت زهره غسلت وجها وتحاجيها بس هيه غاصه من البجي، غير لو النسوان يعوفن ريـــمه بحالها كل شويه وحده غاسله وجها وتكلها كومي وهي فاقده مو بوعيها ماتدري بروحها شتسوي ومن دخلت هاجر تبجي كابلتها ولطمت الحد مانهد حيلها
مشيت وي مــاسه هي راحت لبيتهم واني البيتنا اخذنا هدوم سود ورجعنا سبحناهن ولبسناهن الاسود لمن جابوا رنـــه عبود وسجاد، تلگتها ريـــمه شبگتها بباب الهول يبجن النسوان الجانن يحجن علينا ويردنهن يكومن يوكفن على حيلهن بجن وياهن محد منهن كدرت تحجي لمن كامت من بينهن حجيه جبيره عرفتها بيبة منذر جرتهن من اديهن تحاجيهن وتحاجي رنـــه الرايحه روحها
-اخيوتج مناه بت اختج هل نشف ريگها من البجي جا اذا انتِ تطيحين ياهو اليوكفهم على حيلهم، شدي حيلج يبعد امج. واوكفي بفاتحة اختج، محد يگول هالبت حگها وخسرت أخيتها لا يجده وداعتج كلها تصيح مابيهن خير وماوكفن بفاتحتها، من هسه تطيحن جا يمه باجر وعگبه ياهو اليلطم وي النسوان ياهو اليتلگي المعزيات؟
تحجي وياها وهيه تنود رايحه روحها ودموعها يجرن اخذتها ريـــمه تسبحها ولبستها اسود وبس طلعت للهول سانده ايدها على الحايط عيونها مورومات ووحده منهن من لطمت عليها صار فصها الابيض كله احمر تطگع، تريد تحجي ماتگدر تتلفت تدور مسحت عيوني احاجيها
-تردين شمس؟
هزت راسها اي وكعدت مهدود حيلها جابتها الها ماريا حطتها على رجليها وشبگتها مغمضة عيونها وتجر منها نفس بقووة دموعها تجرري.
وهـــب:: يا كسرتنا الچبيرة، يا لوعة گلوبنه، مو بس اخت كهلان هاي اختنا كلنا هاي المايوم كدرنه نحط عينه بعينها، الموت مو الها بعدها ماشايفه من عمرها شي
مابينا سبع ومابچه عليها صــيهد المايوم نزلت دمعته غطه وجهه يبجي، بيا حگ تنكتل، حمت كهلان وهوه يتمنى لو يرد الوكت وهوه الطايح بمچانها.
للفجر يله دفنه وبريا كلساع يخابرني اجانه للنجف راد يلحك علينه گبل الدفن ما گدر، وره مادفنه ردوا اهلنه وضلينه يم كهلان ومنذر انا وصيهد ومازن
صــيهد مد ايده على جتف كهلان يحاجيه
صــيهد:: شد حيلك كهلان.
مد روحه على تراب گبرها شابگه يبوس التراب ويصيح بلوعه
كهلان:: اااااخ يا بووويه، يا كسرتي ياااايمه.
درت وجهي منه مرد گـــلبي وصيهد وخر عنه كعد ليغاد ويعاين عليه يبوس بتراب كبرها ومن بين دموعه يگلها
-خوويه عفره خويه يابعد رويحتي ولج اموتن بدونج انا ولج اموتن يالحسين اموتن عفره خويه يا گـــلبي يا حيلي شلون اعوفنج هناه شلون اهدنج وارد يا بووويه اررريدن امووتن يااا يمه.
كام صــيهد مسح وجهه واجه يمه يحاجيه مختنك
صــيهد:: كهلان يابعد روحـــي كوم كافي
-شحجييي لو بتها اجه يوم ونشدتني عنها شگللها امج ماتت بمچاني امج حطت روحها كدامي وانكتلت، ولكم اختي اختي هاي انا وياها فد نفس شلون اعوفنها شلون اوكف على حيلي وانا حيلي أنهد بطيحتها.
منذر حط أيده عل جتفه اثنينهم يبجون يعين گلوبكم ويصبركم بجاه علي، وخرت من يمهم احاجي بريا من خابرني لحك علينه كابله كهلان يبجي وبدال مايصبره غطه وجهه يبجي وياه.
مازن اخذ منذر وراح السيارته واحنا ضلينه مكابلين كهلان مايرضى يگوم من يمها ماد روحه وي تراب گبرها
بريا:: شد حيلك كهلان.
كوموه هوه وصيهد ساندينه ردينه للسياره وعيونه على گبور أهله شفايفه يتحرك وبس الله يدري يا چلمة الوصفت وجع گلبه.
گبل صلاة الظهر يله وصلنه للقريه نزلنه الجادر مبني مارضى فاتحتها تصير عد أهل منذر، نزل من السيارة صــيهد سانده تلگاه عبود شبگ عليه يبچون بنحيب يفجع الگلب، لمن اجاهم شيخ حيدر وحاجاهم يصبرهم.
ندى:: دوي البچي والصريخ براسي حتى من غفيت احس بعده يتردد بأذني، من الاربعة الفجر گمنه عزلنه الحوش اني والبنات وقفلنه كناتير البنات للظهر واكفين بالمطبخ اني وماسه وجويريه نشتغل كالوا اجه كهلان النسوان طلعله يتصارخن ويبجن باوعت من شباك المطبخ بالحوش طلعتله رنه والنسوان سانداتها شبگها بأثنين اديه وهيه تصررخ مفرفحه
خله راسه على جتفها يبجي جسمه كله يهتز
ومن شاف شمس بأيد ريـــمه اخذها شابگها على صدره عيونه حمر مورمه ودموعه على خده يبوسها ويشبگها بحيره مايدري شيحجي وياها، ودوها الولد المنذر من رادها.
البنات جابن رنـــه للهول يلطمن وينعن، درت عيوني للشباك ولدنا مابيهم واحد مالابس دشداشة سوده وملثم بس عيونهم طالعه. وحمر كلهم بچوا على عفراء
مسحت عيونها مــاسه تشتغل وتحجي وياي
مــاسه:: بريا اجه، راح عليهم للنجف واجه هسه وياهم.
-همزين بلكن يحجي وي رنـــه شوي يصبرها والله خايفه لا يصير بيها شي سكرها ماجاي ينزل.
دنگت عيونها يجرن
-مو زين ما ماتت.
سكتت وكمنه سوه للهول نلطم وياهن اخوات منذر وامه محزمات بعبيهن ومفترات بالهول يگولن ويلطمن جان شكد عدهن مشاكل وياها بس بچيهن ولطمهن مبين ذاك هوه من صدك ملچومات عليها .
وبلطمهن سودنن ريـــمه ورنه اديهن وصدرهن ازرك من اللطم هنه ورغد وجويريه. والنسوان يگولن ويلطمن گالت ام منذر وهي تگول
-شالت بت اليفرضون ماتانت الوعديه
وعليها دلال اهلها اصبحت مچفية
يگولن ويلطمن وي الگوله كل حيلهن
وبس سكتن لطمت عمتي ايمان وهيه كاعده روحـــي فرفحت من البچي على نواعيها تلطم بأيد وحده على صدرها والنسوان واكفات كدامها يتلاطمن ويردن وياها
-اكعدي يم هلا جيناج خطار
اجيناج وكعدنه بعتبة الدار
اكعدي يم هلا جيناج خطار
طبينه الحجرتج مالگيناج
حنينه الكعدتج والحچاياج
دكتورج يبتي ضيع دواج
بلياها ما اريدن البيييت
لطمن حييل اخذت رضا وكمت بس يبجي بهذلني شفت وهـــب جايب شمس اخذتها منه وانطيته رضا، ام منذر رادت شمس خليتها بحضنها اخواتها كعدن يمها يحجن وياها وشمس كاعده بحضنها تلعب.
كمنه نصبلهن چاي من سكتن كلمن كعدتلها بصفحة وتسولف، زهره نايمه على رجلين رنـــه وهي مدنگه تمسح على راسها دموعها يجرن عمتي ايمان مدري شحاجت ريـــمه وخلتها تكوم اجت يمنه للمطبخ صوتها مبحوح من الصريخ وگلبها يوجعها اخذت صينية الاستكاين ومشت گدامي توزع للنسوان وانه اخذت صينية وطلعت وراها تونها نوزعلهن چاي واسمع ميلاد كاضه خالة منذر وتكلها
ميلاد:: خيه هيه النهار كله هنا غير لو تهود ببيتها؟ كل طلابه صارت تلكين عفره من الصبح كاضه الباب وتحط روحها بحجي الزلم هل طاحت بيها ونكتلت تيتمت بتها هاي عاينلها تكسر الگلب. شحصلتي هسه احسلج هيج؟
اباوعلها مصدومة بحجيها ايدها مجبره حاطتها بحضنها وايدها الثانية تأشر وتحجي فزيت من ريـــمه شمرت الصينيه وهجمت عليها تصرخ وتملخ بيها كضيناها اني وماسه
-يااا ررريمه رريمه.
وهي متخبله ملختها تصررخ وتدفع بيها
ريـــمه::اطلعييي بره اطلعييي لا بارك الله بيج من ااام الله ياخذج الله ياخذكم ويفكنه من شرركم
جرتها حيل تدفع بيها للباب وامها تمد ايدها تطكها حييل وانه وماسه بنصهن بس اريد افرغها دفعتها بقوة بره الهول وصرخت
-اطلعيي بررره اطلعي سحاره من وراكم ماتت من وراااكم.
جرينه ريـــمه نسد بحلكها والولد على صوت الصريخ طبوا يصيحون ويخزرون وهيه لفت عبايتها وطلعت متخبله، والنسوان حارن شيحجن وشيغلطن على ريـــمه .
بالليل بدت النسوان شوي تخف عفت البنات ينظفن اريد اروح للبيت تعبانه بس اريد اسبح اخذني وهـــب احجي وياه واسأل على الصار، بساعة الاخذوا بيها عفراء للمستشفى بيت علوان شردوا من بيوتهم وولدنه حركوها
جانوا ثلث ولد واحد من بيت علوان والانكتل اصلاً حتى مو من عشيرتهم واحد طايش صاحب ابن بيت علوان وهاد وياهم، والثالث محد يعرفه منين بيت علوان ودوا على عطوه وعشيرتنا مارضت الا يسلمونا ابنهم.
سبحت ورجعت لبيت عمي شامل مــاسه وماريا يقنعن بيهن ياكلن ولا رضن لحد ما خالتي ايمان عاطت بيهن وخلتهن ياكلن شويه ويشربن چاي كعدت يم جــويريه بأيدها حور بنت مــاسه صافنه عيونها من البچي مورمات
-تباتين هنا جوري؟
جــويريه:: درت عيوني الها اهز راسي لا اريد اروح للبيت اريد اكعد وحدي وابجي الحد ما يخلّص حيلي.
يتيمه من كل صفحة ومحد الي غير عفراء والموت لحكني عليها، شبقالي؟
وديت حور لماريا عيوني تروح الرنه لفتت عيونها لكل مكان كل شويه تلفتت فازه عبالك شخص صاحلها، لبست عبايتي وطلعت للحوش
على صفحة كاعدين ولد لابسين اسود وملثمين بچفيه درت وجهي ماعرفتهم ولدنا لو لا بسرعة سمعت صوت وهـــب وراي
-ها خويه؟
-وصلني لبيتنا.
هز راسه خوش ومشينا سوه بس وصلني للمشتمل وراح سديت الباب ودخلت ابجي بصوت شمسويه بحياتي شمسويه وماييقالي عزيز، محد وگفلي مثلها محد دافعلي كدها، انهد حيلي وانكسر گـــلبي والله انكسر گـــلبي .
لطمت على رجليَّ ابجي وسمعت الباب انفتح مسحت عيوني اباوعله دخل حاني ظهره فتح الچفيه من وجهه خلاها على اجتافه واجه مدنك كعد كدامي اباوع لعيونه ودموعي يجرن حجايه ماطلعت من عندي جراني الصدره شهگت ابجي بگلب مفجوع
-ماتت عفراء صــيهد ماتتت احن بشر عليَّ روحـــي جاي تحترررك
-كافي اشش جوري عاينيلي
وخرني من صدره لام وجهي بين أديه ويمسح بعيوني نار بگلبي ما تنطفي يريد يسكتني وهوه الدموع تارسه عيونه وصوته خانگته العبره كوه يحجي
صــيهد:: جوري عاينــي كومي اسبحي وصلي حتى تقريلها قرآن، انتِ والبنات كون تصيرين قويات وتصبرن أخواتها.
-ما اگدرر والله ما اگدر جن ماتت امي مرتين گـــلبي يوووجعني صــيهد گـــلبي يووجعني
جراني من ايدي الصدره يبوس راسي ويحجي اريد الزم دموعي ما اگدر تعبـــت حييل تعبـــت كل يوم يفارگني عزيز كل يوم گـــلبي ينصدع
-اشش اسم الله على گلبج جوري وألله موتيني كاافي بچي عيــونج نمردن، تعاي گومي.
جرني من ايدي للحمام گـــلبي معصور عصر، سبحت وطلعت لكيته فارشلي السجادة وهو سجادته كدامي صليت وقريتلها قران واسمعه گدامي يدعيلها صوته خانگته العبره
-أللهم ابدلها داراً خيراً من دارها، واهلاً خيراً من اهلها وادخلها الجنه وأعذها من عذاب القبر ومن عذاب النار اللهم عاملها بما أنت أهله ولا تعاملها بما هي أهله.
لفّ السجادة وگام ضمها ورجع يمي صدقت وشلت راسي اباوعله تقرب يبوس راسي ويحجي
-راح اروحن الكهلان شويه ونامي خوش؟
هزيت راسي اي باوع لوجهي متحسر وكام طلع شويه وگمت تمددت بفراشي فاتحه الشباك الدنيا مثل الثلج بس گـــلبي نار ماتبرد.
غمضت عيوني عاجزه اعبر عن وجع گـــلبي ساعتين عدن واجه سد الشباك غطاني وتمدد مخليني على گلبه ومن حسرتي عرفني بعدني كاعده تحمحمت اريد صوتي يطّلع واسأله
-شلونه كهلان.
زفر نفس بحسره
-الله يصبر گلبه وگلب اخوته .
-امين يارب أمين.
مدري منو خابره من الولد جر التلفون يحجي وياه وينتر
-هذا شاكر عل گـــلبي هسه اكتله يشهد الحسين كلساع وحاط روحه بسالفة غير عدنا فاتحة ويهود ملطلط.
عمي بالحسين وين مايرحون وين مايشردن الگاهم تكضي الفاتحة لو لا حمزة ابن علوان اكتله اكتله والچان وياه منذر يعرفه بس خل شوي يصير زين واشوفن شلون مايگول منين.
يحجي ويهدد شويه وسدّ التلفون غمضت عيوني اريد اشرد للنوم تعبـــت ماكدرت أنام تحركت گـــلبي يوجعني شلت راسي اباوع بوجهه التفت يباوع لعيوني همست صوتي مخنوك
-عفراء هي الوصتني احتمي بيك هي الگاات لوذي بسد قوي ومحد يگدر يوصلج ، تدري حتى من احجي عليك يمها تگلي اخيي اعرفنه يعشگج بس مايعرف شلون يبين عشگه.
جر نفس طويل ودار عيونه من عندي وبأيده رجع راسي الصدره متحسر دموعي جرن سكته وهو يحجي
صــيهد:: من جنت صغير معادي الكل ولد عمامي وبناتهم كلها اعاركها واكتلها الا عفره جنت اخافن منها رغم انا اكبر منها بس ما اگدرلها تطك بيش مايحلالها، وهم لان عمي شامل يتسودن عليها كلشي ولا واحد يحاجيها هذا كهلان اذا بچاها يطرده من البيت ودوم يگول محد عزيز مثل بناتي راحتله عزيزته اليوم .
مسحت عيوني ساكته مدري شلون غفيت وفزيت بس تحرك كعدت على حيلي اباوعله شغل الضوه باوعت للساعة بالاربعه
-وين رايح؟
-اصلي واروحن البيت عمي.
هزيت راسي خوش وكمت وياه صليت ولبست عبايتي طلعنه سوه الجو بارد ثلج وبعدها ظلمة جر ايدي بأيده يمشي ويحرك اصابعه فوگ أصابعي لحد ما طلعنه من السياج يم الجادر لكينه الولد كاعدين يشتغلون اللي يلم القزانات واللي ينظف من يم الجادر عاينت الكهلان كاعد على كرسي لابس دشداشة سوده والچفيه على راسه مفتوحة مدنك صافن بالگاع جن كبر عشرين سنة ليگدام.
عبرت من يمهم دخلت للبيت توهن البنات كاعدات ويشتغلن سكته باوعت الرنه نايمه بالهول يم عمتي ايمان وبحضنها شمس وزهره سألت ريـــمه عليها باوعتلي عيونها منفخة وكوه تحجي
-البارحة تخربطت أخذوها للمستشفى سكرها ماجاي ينزل.
واكفين بباب المطبخ نحجي بهمس والتفتنا على فزتها هي فزه وهي كعده على حيلها ركضتلها ريـــمه لزمتها من ايدها وهي تتلفت ما مستوعبه جرت نفس وخلت ايدها على عيونها سندت راسها على جتف ريـــمه تبجي بلا صوت
مشت يمها رغد حاجتها وسكتنه كامت غسلت وصلت، دك الباب وهـــب راحت مــاسه حاجته گالها
-رنـــه كاعده؟
-اي
-بريا يريدها.
مشت مــاسه حاجت رنـــه وخلت العبايه على راسها من تمشي كوه تخطي الخطوه بس طلعت من باب الهول واكفين كهلان وبريا كدامها، شبگها بريا حيل وهي بچت وصرخت ممرود گلبها ومبحوح صوتها
-ررراحت ااااختي، هسه صدك تيتمت، ماتت اختي برريا ماتت اختي.
بكل حيله شابگها وضام وجهه بجتفها نزلت للگاع ونزل وياها كعدوا كدامها هوه وكهلان واجاهم عبود يمسحون دموعها ويبوسون بأيدها خايفين عليها بريا لام وجها بين أديه ويگلها
-تردين تموتين روحج حاجيني رنـــه يا گـــلبي؟ غير تديرين بالج على صحتج قصص وروايات عراقية كرار صلاح مو عفره آمنت شمس عندج؟ ها حاجيني جا لو طحتي ياهو الها
وهيه مدنگه تبجي جراها كهلان الصدره يبوس راسها مغمض عينه ويگلها
-ارحمي بحالي كضه حيلي لو صار بيج شي انتهي.
طاير گلبهم عليها بس يردونها تصير زينه وتشرب حبوبها، جابت الحبايه ريـــمه شربها كهلان باس ايدها كوه يحجي مبحوح صوته
-ديربالج على روحج فـــدوه اروحنلج.
گومها بريا من الگاع عدل العبايه على راسها باسها بين عيونها يوصّي بماسه عليها،دخلت للهول خلت شمس بحضنها تسكتها وشمس اول ماتفز تبجي تريد امها ورنه تبجي وياها وتگلها منين اجيبنها الج منين اجيبلج امج.شبگتها تبجي
وجن الوقت يركض بدت العالم تجي خبصه وهوسه واخر يوم بالفاتحة يالختمة صار الحجي كله بشمس وين راح تبقى ووين راح تروح ام منذر تكلهم عندي وإحنا ساكتين ومسكتين رنـــه التحلف لو تموت ماتنطيها كالتلها ريـــمه
-اسكتي هذا حجي مالنه شغل بيه، عفراء گدام منذر موصيه كهلان شمس تضل عده مالج شغل باللي يحجن.
وهي ترجف وتشبك شمس حييل .
رنـــه :: كل ساعة تمر وكل يوم يعدي مايقنعني خلصت الفاتحة وانه بعدني اتمنى روحـــي بحلم هسه افز والكه اختي بعدها گدام عيني ماتعوف بتها، ربت ايتام وماحسستنا احنا بلا ام شلوم هسه عافت بتها تتيتم
واكفه يم شباج غرفة أهلي شايله شمس الدنيا العصر السماء من الغيم لونها رمادي وبدت تمطر، الولد يتراكضون يلمون غراض الفاتحة يردون يودونهن اعاينلهم يشبلون بالغراض وواحد يصيح على الثاني.
قطرات المطر تنزل بثگل وجن السما تشاركنا بوجعنا
وشوي شوي المطر يزيد.
اباوع لجامة الشباچ كل قطرة مطر تطيح عليه تخلف وراها صوت خافت يشبهه دگة گـــلبي التعبانه
وتنزل قطرة المطر على طول الجامه عايفه وراها خط طويل يشبهه دموعي وهن ينزلن على خدي.
زهره:: رنـــه
درت وجهي التفت عليها كاعده يم بوفية امي جاره رجليها الصدرها واديها على اركبها تعاينلي والغصه خانگتها همست بغصه
زهره:: بعد هاي هيه دوم ما نشوف عــفراء؟
أعاين بوجها هي حجتها وانه الخايفه اقتنع بيها لا شلون شلون بعد ما اشوفنها ما اريدن احجي ولا اصدك اختي راحت، كعدت بالگاع نزلت شمس من ايدي وفتحت ايدي الزهره شهگت واجتني تبجي ضمت روحها بحضني، شابگتها وعيوني لباب الغرفة بعدني اتأملها تدخل بعدني بكل صوت اسمعنه اگول هاي عفره وكلشي صار مو حقيقي.
وخرتها من صدري على صوت اخواني الطبوا للبيت يبجون فتحت باب الغرفة اعاينلهم كعدوا كدام عمتي ايمان ثلاثتهم يبجون جلبت بالحايط دايخة وكعدت على حيلي بباب الغرفة كهلان يطك رجله بحرگه حاط الچفيه على عيونه ويبجي
كهلان:: نهدد حيلي عمه نهدد حيلي دفنت اختي شيصبر گـــلبي عمه شيصبررر گـــلبي
شبگته تبجي وياه وعبود وحسين نفسهم انگطع من البجي وعمه تحاجي كهلان وتوصيه
-يمه اذا انتَ هيج ياهو اليصبر اخوتك؟ يمه كهلان .
ودارت على عبود تحاجيه تريدهم يسكتون بس محد يفهم مو بأيدنا شلون نسكت واحنا خسرانين مو بس اختنا، امنا وكلشي حلو بحياتنا خسرناه بلحظة راحت من بين ادينه.
عبرت شمس من يمي تمشي وتحجي
-خالو.. خالو.
شال راسه مسح عيونه بطرف الچفيه وفتحلها ايده تضحك شبگها مغطي وجهه ويبجي وصاح بلوعه
- يا بووووويه.
ايمان:: يا يمه كهلان تسودنت؟ اسم الله الزهره اسم الله
طبوا الولد يحاجونه صــيهد وبريا وسلطان اخذوا شمس من ايده يحجون وياه كمت كوه اشوفنهم مسحت عيوني اريد اركز بيهم من التفت سلطان على ريـــمه وگالها
-لبسي شمس قمصله منذر يريدها.
شهگت مجلبه بالحايط اريد اوكف على حيلي واخذها منهم ما گدرت ضليت كاعده بمچاني فاتح ايديي الها واصيح
-تعاااي شمس تعاي محد ياخذهاا محد ياااخذها.
جرتها زهره بساع من ايد سلطان وجابتها الي ضميتها الگلبي فاتحه عيني حيل وهي تبجي كام كهلان كوه يمشي كعد كدامي هزيت راسي لا
-كالتلي عدددج كالتي شمس امانه بركبتكم.
غمض عينه حيل يبلع الغصه الخانگته يريد يحاجيني هز راسه اي ومد ايده يمسح عيوني
-محد ياخذها منج ابوها يريدها باجر الصبح يجيبها.
هزيت راسي لا ابجي واشبگها حيييل
-والله باجر يردها فـــدوه اروحنلج رنـــه لا تلوعين گـــلبي .
جرها من أيدي گـــلبي فرفح ريـــمه لبستها قمصله وشبگتها تبجي وتعاين السلطان بخوف كالها
سلطان:: تسودنتن ريـــمه؟ باچر يردها غيرر بته؟
اخذها سلطان وطلع جرني كهلان الصدره بچيت بحرگه ماتطفي النار البگلبي لا البچي ولا الصريخ طفاها.
البنات ضلن يمنه حتى لا نستاحش ونستفگد عفره بس جذب بكل لحظة تمر هي على بالنه اعاين لكل زاويه بالبيت الها ذكرى واثر .
ريـــمه:: اقوي روحـــي وانه اضعف وحده بيهم اخواني زعلانين من عدي شلون طردت امي بس حجيتلهم الحقيقه حجيتلهم شلون تحجي عليها وهي بفاتحتها سكتوا اثنينهم مقهورين منها حيل.
عفتهم ومشيت للغرفة اشوفن هاجر كلنه نصرخ نصيح ونلطم نعبر عن حزنه الا هيه تكضيها بس دموعها تجري
مسحت عيونها وكعدتها احاجيها
-ســليم ينشد عليج.
مسحت عيونها لفت الشال على راسها طلعتله للحوش مشيت للمطبخ اعاينلهم ضمت روحها الحضنه تبجي وهو كعد كدامها يحاجيها ويمسح بعيونها آخذها وراح
بيتنا انطفت ضحكته انتهى، رغم محد عافنه البنات ويانه والولد وي كهلان وعبود.
لليل الساعة بهدعش يله البنات راحن وضلت خاله أيمان يمنه فرشتلها رنـــه بالهول وفرشت يمها هيه وحسين وزهره، عيونها على الباب وتبجي بالها يم شمس بس حلفوا آلصبح يجيبونها.
كضيت المطبخ وطلعت اسمع حسين يحجي وي رنـــه ضوه الهول طافي وهو يشهگ ويحاجيها
حسين:: حتى من اغمض عيوني اشوفنها، رنـــه عايني احس شلون لعبالك انا بحلم والله ولا مصدك عفره راحت للدوم.
شبگته رنـــه واسمع صوت بچيها المختنك، طبيت الغرفتها
جبت جهاز السكر واجيت يمها
-رنـــه جيبي ايدج خل اشوفن السكر.
جريت ايدها وحسين مسح عيونه ودار مغطي وجهه قسته ووجعني گـــلبي من لگيته بعده اربعميه جبتلها الحباية وكوه شربتها
-شبيج رنـــه؟ تردين تموتين روحج.
ردت راسها للمخده متحسره غطيتها وكمت للغرفة صليت ابجي على السجادة ربي صبرنه على فراگها عين گلوبنه اللهي.
التفتت من فتح باب الغرفة طب مدنك سد الباب وكعد يمي تمدد وحط راسه على رجلي ساكت حط ايده على عيونه واعاين لدموعه يطيحن مناه ومناه دنگت ابوسه بكصته وصوتي مبحوح
-كهلان.
شهگ وضم وجهه ببطني يبجي ويحجي بصوت مخنوك
-ما اگدر ما اگدر اعيشن بدونها گـــلبي هاي، تؤامي احس دافن روحـــي جوه التراب والله احس دافن روووحي. يا عفره يا خويه يرويحتي.
دنگت اشبگه وابجي ماعدي حجايه تواسيه وتصبره، ساعة وحسيته غفه وخرت رجلي منه فز كمت بس جبته مخده وغطه ورجعت يمه نمنه بنفس المچان للصبح كعدت مالكيته كمت طلعت للهول رنـــه مسويه ريوك وكاعده يم عمه ايمان
-صباح الخير
-صباح العافيه
-شلونج رنـــه قستي السكر؟
-اي قاسه كهلان من كعد بعده مرتفع.
حجتها ودارت وجها تزفر نفس مختنگه ساعة واجن بناتنا كلهن يمنه وراهن بشويه صارت هوسة بره حوشنه وكفنه مافاهمين لمن جابوا كهلان شايطه روحه ويغلط، أبوي يريد يحلها وي بيت علوان بفصل چيه كايلين ننطيكم نسوان فصل تسودنوا الولد وخابروا شيخ حيدر سدّ السالفة وكالهم ما النه وي بيت علوان كل حل الا يسلمونه حمزه لو يضلون طول عمرهم شاردين يجي يوم ونلكاهم.
مسحت عيوني احجي بگلبي هسه صرت تدور حل وفصل جا ماحاليتها من الاول كل الصار بسببك كله من كعداتك بمضايف الوادم خليت الزعاطيط تغلط عليك وكبرت السالفة الحد ماصارت دم بدم تكتلت ولدهم واحنا نكتلت شمعة بيتنا، هذا التردونه هذا اليرضيك ارتاحيت هسه .
ومدري منو الخابر صــيهد على اساس اندلوا مچان حمزة ابن غانم بساع بساع ركضوا لسلاح ومشوا خلونه كاضين كلوبنه ساعتين وردوا مالاكينه واجتهم وادم للمضيف درت الرنه تلوب وتطكطك بأصابعها
-مو كالوا الصبح يجيبون شمس وينها وينها صار الظهر.
ايمان:: رنـــه يمه هسه يجيبونها بس على كيفج وي روحج .
بس طب كهلان للبيت وكفت كدامه دموعها يجرن
-وين شمس؟
طلع تلفونه من جيب دشداشته السوده أيده ترجف خابر على منذر ومد ايده الثانية يمسح عيونها كاله
-ها منذر خويه ماتجيب شمس؟ اي والله يرحم والديك.
سد التلفون ضمه بجيبه وكض وجها بأثنين أديه
-هسه راح يجيبها لا تبجين.
هزت راسها خوش طلع من لگه البنات يمنه عاينت وراه كعد بالحوش على الصبه ظهره علينه مدنك ولاف الچفيه على راسه مشيت كعدت يمه بساع مسح عيونه
-كهلان.
شال راسه يعاين بوجهي عيوني احسهن نار والحجايه تخنگني
-مالنه غيرك بعد فـــدوه حلوها ما النه حيل يموت وآحد منكم.
جرن دموعي الخنگه ذابحتني مد ايده يمسح عيوني وكوه يحجي
-الكاتبه الله يصير، الله كريم.
اجت يمنه رنـــه فتحلها ايده كعدت بصفه وجرها الگلبه باس راسها ويشمها بشوغة ضلينه كاعدين لمن منذر اجه جايب شمس وبريا جابها منه فتح باب الحوش كاضها من ايدها وبس لمحت كهلان ضحكت واجته تركض تصيح
-خاالو.
مشالها بساع شبگها شالها من الگاع يبوسها يشميها ويگلها بصوت مبحوح
-هلا بعزيزة خالها وهلا بجيتها
هلا بالترد روحـــي ضحكتها
هلا ببت الغالية الفگدتها
هلا يا خالي ومية هلا بجيتج اليه
غطه وجهه يبوسها حييل مسحت دموعي نزلها اجت تركض الرنه شبگتها تبجي وبريا عيونه تارسها الخوف يعاينلها بقلق، طلعوا لمنذر يم باب الحوش ضلينه كاعدين بمچانه انه ورنه ونسمع سوالفهم وخفنه من سمعنه كهلان اعصاب ويصيح على منذر
طــروادة:: تعررفه ياهو كلي احجي ليش مخليني افتر.
منذر:: محد يكتله غيري انا كتاله
-من بيت علوان؟
-لا الحط صواب بعفره حتى مو من عشيرتهم.
-منذر لا تسودني كلي ياهو احجيي.
عله صوته يتعارك وياه ومنذر مايرضى يحجي جانوا ملثمين كهلان ماشايفهم، منذر من ركض وراهم عرفهم هوه حمزه ابن علوان وصحبانه اثنين كل واحد من عشيره لا النه عركه وياهم لا النه ثار وياهم جهال وغشهم ابن علوان، واحد كتله منذر بساعتها بس الصوب عفره مالاكيه لايرضى يحجي ويگول هوه منين ومن يا عشيره خاف لا يحلونها بفصل.
تعاركوا منذر وكهلان واحنا ارواحنا رايحه نخاف لا ياخذ شمس راح والولد كلساع جايتهم وادم وهوسه الحد يوم السابع.
چن ردت الفاتحة من جديد صوت القاري يلچم الگلب فارشين مداد بالساحة للزلم، والنسوان بالدوانيه وبالهول فرفحنه من البجي.
ام منذر واخواته يشبگن بشمس ويبجن ورنه تلوب بخوف ورره ماكضت القراية كالتلها
-يمه رنـــه شمس آخذها عدي.
جرتها رنـــه منها بساع شالتها وتمشي بيها للغرفة صاحت وراها واخوات منذر يعاركن ويصيحن يردن ياخذنها كوه.
تعاركنه وياهن يصيحن بصوت عالي اجوا وهـــب وسلطان يحجون ويخزرون لان صوتنه عالي وبس كنالهم على اهل منذر اجاهن مازن من باب الهول حط ايده على حلكه خازرهن وصاح
-اشششش.
بساع سكتن كلهن اشر براسه يله لبسن عبيهن وطلعن حرف ماحجن، اخذهن وراح والنسوان كلمن تحجيلها بصفحه الحد ماراحن وضلن بس بناتنا وخالتي سعاد حتى تنقل كل سالفة الامي
كالتلها ندى
-يله امشينا نرجع للبيت
سعاد:: خليني هسه كويعده يم ايمان اجي وياها.
ندى:: خليت العباية على راسي رافعتلها حاجبي
-عمتي تبقى هناه تبات ماتجي كومي خل نرجع للبيت هسه يجي عمو ويريد عشا.
خزرتني ماراضيه والبنات من وراها رغد وماسه يسولي ااي اي عفيه اخذيها كامت بغضب لبست عبايتها وطلعنه تدردم .
دخلنه للبيت ركض رضا يلعب وهي دخلت الغرفتها وتركع بالباب غميتها
-اووي صخونه لتلفج.
ووي مااني رافعه ايدي طلعت درت بساع شايله ايدي ادعي ومسحت وجهي مالي خلكها تحجي الرجلها ويغثني من يغلط عليَّ وعلى رضا
وكفت بباب المطبخ تحجي تحجي تريد بس تغثني كالت
-راح ياخذون نسوان فصل ماتخافين على رجلج؟
درت عليها واني اغسل بأيدي
-يااا واني عبالي جذب هالحجي ياا ياا جا عمه انتِ خافي على عمو وليد لان قبل شويه سمعته هوه وعمو شاكر يتفقون كل واحد اله مره لان هنه اربعه والاثنين البقيه وحده لسليم وحده لعبود هههه يله لا تضوجين انتِ هم اجيتي على شرچ مابيها شي اذا تزوج عليج .
خزرتني بغضب تغلط وتسب درت وجهي منها جذب بجذب غير الولد تخبلوا وماقبلوا بسالفة الفصل وسدوها بس هيه غثيثة وبس اجت جده للبيت تعاركت وياها تكلها
سعاد:: انتِ انتِ الترردين وليد ياخذ الفصليه عليَّ.
وجده كعدت بالهول مالها خلك روحها وتباوعلها بطرف عينها اخذتلها ماي شربت وشالت ايدها تحذر وتحجي بحرگه
-خايبه عاينــي سعيده ام الزلم يكون ماسديتي حلگج الا اگطع مريچيبي على راسج يا جليبه يا بنيت الچليب.
وسعاد كعدت متربعه بياب الغرفة تلعلع وتغلط. وادري بيها مريچيب تقصد بيه نعالها، باوعت للنعوله بباب الهول كلهن خفاف ركضت على ابو انظف شلتهن كلهن وخليت شحاطة صــيهد الثگيلة مره وهـــب باگها منه وبقت يمنه
جده ساكته تدخن بزاوية حلكها لان ماعدها سنون كدام تعض بيهن الجكارة، وسعاد بعدها تلغي وتهدد احرك واذبح اذا يتزوج عليَّ، اباوع الجده كامت بهدوء طلعت بره الهول لزمت شحاطة صيهد خلتها وره ظهرها ورجعت دخلت تمشي على كيف لمن وصلت يم سعاد وطلعت الشحاطة من وره ظهرها وخفگتها على راسها وعلى ظهرها تغلط وتسبب وسعاد تصررخ
ركضت عليها گـــلبي صاير هلكده منها واسوي روحـــي الزم بجده
-لااا لااا جده لااا
وامد ايدي عل سعاد اكرصها بكلّ حيلي وصعدت على رجلها على اساس جاي احميها وادوس عليها حييل وجده عبالها صدك جاي احميها سطرتني بالنعال على راسي خلتني ما اندل دربي منين
وخرت من يمهن ايدي على راسي دخلت للمطبخ غسلت وجهي اريد بس افك عيني هاي شلون تحملت كل هالدك بالنعال وبعدها صاحيه، اجه عمي وليد يركض فرغها من امه وهي تلعلع بصوتها وجده حطت ايدها بصدره ودفعته تغلط تريد تطرده
التفتت من اجن رغد وماسه وجويريه وماريا حطيت ايدي على حلكي حتى مايحجن كالت مــاسه
-ياهو الجاي يتعارك؟
-سعاد وواشيه تعاركن بالنعال.
بسرعة من الباب وراحن دخلت بــدور يمي صوتها مطبك ومصخنه كعدت بالمطبخ تلعب وي رضا، واني اشتغل واحجي وياها ألتفتت عليها من ماجاوبتني اباوعله لازمه رضا من ايده وصافنه بالفراغ
-بــدور
حجيت وهي حتى مارمشت بلعت ريكي بخوف. وعليت صوتي
-بــدور... بــدور
شكرا لزيارتكم عالم روايات سكيرهوم
