رواية أرض الخناجر الفصل السادس والستون بقلم ايلول
اتعنى لمچان الي كعدت وياك
ما الگاك بس رايد اثر منك
بلچن چلمة ضلت ما نگلها الريح
الگاها وتجاوب بالنشد عنك
لو ادور عطر منك بقى علي الكاع
احط نفسي عليه افيششش اشمنك
══━━━━✥◈✥━━━━══
ندى:: احجي مرتبكه وهي رايحه صافنه ولا يمها، تقربت عليها اريد اهزها من جتفها بعدني ما واصلتها ورضا سوه مثل وهـــب نفخ على ايده وعض لسانه بسرعة ضربها راشدي فززها وبتفس اللحظة رجعت هي ضربته بجه يصرخ بصوت عالي جريته منها شلته
-اششش اششش، ماتدري بيك ماتدري.
بــدور:: حيوان انعل والديك من تطكني النوب.
غسلت وجهه بالسنگ ودرت عليها عيونها متروسه دموع وخدها حومر ولا چنه رضا الضاربها، كله من وهـــب يلعب وياه راشديات وعلمه، سكته يناشل ويباوعلها بحقد كعدته گدامي مسحت وجهه بشالي نشفته
-مو عيب تضرب عمه.
وهو لاوي وجهه ومطنكر يباوعلي بغضب ومد ايده ليوره يغمها خزرته
-عيبب
-امداهاا
-تزعل منك ماتخليك تنام يمها بعد، روّح بوسها مايصير يكولون ايعع رضا مو حلو يغلط تقبل يكولون عليك مو حلو ؟
هز راسه ضايج فريته عليها وهي رجعت الصفنتها تقرب عليها باسها بخدها باوعتله عيونها متروسه دموع باسته كالها
-اروح غرفتج؟
-روح چلب بالمحجر مو تطيح
هز راسه اي عافنه ومشه اباوعلها تحسرت ورجعت تباوع للفراغ هم صافنه
-بــدور شبيج؟
دنگت تمسح بدموعها الطاحن تكح مختنگه هزت راسها ماكو شي وگامت غسلت تريد تصعد فوك
-إشربي خافض حرارة كبل لا تصعدين
تحسرت ومشت للثلاجه شربت وصعدت فوگ، ضليت بالمطبخ اشتغل لمن اجوا وهـــب وصيهد جايبين عمّتي صــيهد يحجي ماراضي يمشي بيها بعدها ماتكدر تمشي وحدها
صــيهد:: لو ضاله يمهم اخافن لا يستاحشون؟
ايمان:: تعبانين ومهدود حيلهم يردون يرتاحون انه ما اگومن لو ما واحد يعيني شلعت گلب البنات.
اخذوها الغرفتها وردوا يمي للمطبخ اثنينهم يهزون براسهم يسألون شبيهن سعاد وجده، مشيت بسرعه شديت باب المطبخ الداخلي ودرت عليهم احجي بصوت ناصي وهمه وياي هم يحجون على كيف
-كتلتها جده بنعال صــيهد.
وهـــب:: عليج الله؟
-والله
صــيهد:: عليمن؟ وابوي شبيه؟
-ما ادري هيه تحجي هواي تدردم وكتلتها وابوك اجه يدافعلها جان جده جرته من دشداشته كالتله اكضك واطردك عاد سكت وبقى كاعد.
هز يستغفر
-بــدور وين؟
-صعدت فوك مدري شبيها اليوم من الصخونه حتى عيونها كوه تفتحهن.
بنفس اللحظة حجوا اثنينهم بخوف
-شبيها؟؟
فزيت اباوع بوجهم
-فلاونزه، مصخنة.
صــيهد :: امشي وهـــب شوفها شني شغلك انتَ؟ ماتشوفهن اخذها للطوارئ اذا مصخنه خلي تاخذ ابره.
يحجي بعصبية متنرفز ووهب ماسكت شال ايده يحجس ويهزها
وهـــب:: جا شني انا بطران مو حالي حالك نركض مناه ومناه شدراني بيها مريضة.
خزره صــيهد كل مره وهـــب يسكت بس هالمره لان كلها ضايجة وكلها خلگها ضيك ياهو التحاجيه ينتر بوجهك صــيهد شال أيده خازره ويهدد
صــيهد:: والله لو ما مرتك واكفه.
حجاها ومشه يريد يطلع بعده ماواصل باب المطبخ صاح عليه وهـــب
وهـــب:: شتسوي تكص راسي؟
رجع عليه صــيهد بحرگه وكفت بينهم
-خووويه شسالفه.
واحد خازر الثاني عافنه صــيهد وطلع درت الوهب احاجيه
-شبيك وهـــب شكالك هوه؟
-خيوولي.
-اخوك الچبير شويه احترم.
خزرني شايل ايده وينتر
-ماالج غرض.
-ياااا!
دار وجهه من عندي اعصاب صعد البدور خمس دقايق ونزل طلع من البيت اوي شخط حتى شخط الشخطكم فد مره، اذا ابوكم وليد شمنتظرة شتطلعون؟
ريـــمه :: يفرغ البيت وتحس حتى الحياطين يبجن وياك محد من عدنا مقتنع بس مدري بيا حيل ضالين واكفين على رجلينه يمكن رب العالمين مقوي كل واحد بينا الخاطر الثاني.
ضلن بس جــويريه وهاجر يمنه، كمت للحوش وجوري وياي تساعدني ننظفه دكوا الباب وطبوا سجاد وعبود توه جايبه من الدكتور تعب من يوم وفاة عفره لليوم گلبه يوجعه ووجهه اصفر، اخذه سجاد للدوانيه ول يمه ما يتيهه.
كضينه الحوش انه وجويريه وطبيته للبيت رنـــه كاعده بباب غرفة اهلها سانده راسه على حافة الحايط وتعاين الشمس تلعب بالهول تحط الحجاب على راس، رنـــه تعاينلهم ودموعها يجرن بلا صوت كعدت يمها جــويريه بيتنا الچان حنين والمختنك يجيه فجأة صار يخنك كل روح مابيه
ضلت جويرية يمنه نص ساعة واجه عليها رجلها راحت، وهاجر هم مارضت تضل شويه ومشت .
اخذت صحن شوربه ومشيت للدوانيه بلكن عبود ياكل، متمدد ودموعه يجرن هلو المخده وسجاد يحجي عليه ويلومه خايف على گلبه حطيت الصينية گدامه احاجيه
-عبود كافي فدوه كافي هسه يصير شي بواحد منكم وعلي يموت كهلان.
احجي وانه الما مقتنعه يا كافي والله لو نبجي طول عمرنه ماتبرد نارنه، كعده سجاد يمسح عيونه وباسه براسه يحاجيه يتوسل
سجاد:: يابعد روحـــي عبود بالحسين موتتني جاي تمرد بگلبي.
وعبود مدنك راسه ودموعه يطيحن بحضنه گـــلبي انمرذ اذا اضل ثانية بعد يمهم ينهد حيلي گمت طلعت والغصه خانگتني غسلت وجهي وكعدت يم رنـــه نعاين الشمس كلنه، حسين كاض نستبه كلساع يوكلها شويه، وزهره يمكن بالربع ساعة مية مره باستها، دارت علي رنـــه صوتها مبحوح كوه تحجي تسألني
-كهلان وين؟
-بالغرفة.
دنگت ساكته، اندك باي الحوش وطلع حسين يشوفه شويه ورجع گال
-ريـــمه سلطان يريدج.
مسحت عيوني وطلعت طب للحوش اعاينله بخوف
-صاير شي؟
-لا خويه شني السالفة تعاي اريدن احاجيج.
حط ايده على جتفي يمشي وياي لنهاية الحوش كعد على الصبه وكعدني بصفة دنك وانه اعاين بوجهه مدري شمالني گمت من كلشي اخاف وگلبي ينعصر
-سلطان احجي فـــدوه اروحنلك خويه ترى ماضال عدي حيل والله العظيم گـــلبي يبس.
عاينلي يحجي ماراضي
-شنّي السالفة خويه؟والعباس ماكو شي ردت احاجيج واوصيج، كهلان تعبان وعبود ورنه حتى حسين وزهره اعاينلهم ارواحهم ممروده، كون انتِ تصيرين سباعية وتقوينهم ريـــمه ادري بيج انتِ هم مكسوره بس مالهم غيرج لو كلنا وكفنه وياهم وواسيناهم محد مثلج يگدر يأثر بيهم ويخفف عنهم.
دنگت مختنگه اصبرهم وانه ياهو يصبر گـــلبي المتفتت ياهو يقنعني عفره راحت وبعد ماترد، مد ايده يجرني الصدره شبگته مفجوع گـــلبي وابجي بصوت
-اريد اموووت والله. اريد اموت شلون اصبرهم شحجي شگللهم عفره هاي سلطان عفره يا حچايه التصبرنه على فراگها.
يمسح على ظهري يبوس براسي ويحجي بغصه
سلطان:: فدووه اروحنلج بسج ريـــمه، جا خايبه انا اجيت اوصيج عليهم تالي انتِ التبجين.
-انهدددد حيليي وروح عمي انهدد حيلي.
وخرني من صدره يمسح عيوني ويبوسني براسي
-اسم الله عليج شو عاينلي، عفراء ماتت مغدورة ومظلومة راحت الرب رحيم احن عليها من هاي الدنيا، وكلنا على هالطريق حاس بكل واحد منكم حاس بالوعه البالگلب، بس الحياة تمشي ونتعايش وياهم نصبر ورب العالمين يعين كل گلب اتحمل الفگد هو كفيل يلهمه الصبر، ويا خويه الدنيا دار ممر مو دار بقاء حتى نتحسف عليها.
دنگت ابجي اهز راسي لا
-مايبرد گـــلبي احجي وي روحـــي شگد بهالحجي اريد اگدر اقتنع واصبر ما اگدر سلطان جن روحـــي الميته لو تشوف شصاير بگلبي والعباس احس بكل ساعة تمر شرايينه تتگطع.
ضمني الگلبه روحـــي احس جاي تطلع
سلطان:: اسم الله على گلبج يابعد گلب اخوج وروحه
غمضت عيوني احسهن جمر وخرني من صدره يمسح عيوني
-من ابني مات كلها وگفت وياي بس محد حچايته تجبر كسري گد رغدي لهذا السبب انا اكلج اوكفي وي كهلان احجي وياه قوية خلي يوكف على حيله.
مسحت وجهي كوه صوتي يطلع
-خايفه عليه خايفه لان جاي يدور على بيت علوان.
-لا اا تخافين هذا حگنا وكلنه جاي ندور الچان احنا والچان منذر ولا تگليلي دم يجر دم وماراح تكضي، احنا إصحاب حگ ماخذين عطوه ورايدين حل همه الهدوا يتحملون اليجيهم بعد.
هسه مالج غرض بهذا الحجي كومي البيتج سويلهم عشه وخلي بالج عليهم، محد ينسى بس شوي شوي الواحد يتعود ويتعايش، هسه همه يحتاجونج توكفين وياهم تواسينهم وتسمعين البگلبهم تقوينهم وتصبرينهم ريـــمه مو تبجين وياهم، الگيلهم سبب يرجعهم يوكفون على حيلهم، ترى لو ضلوا هيج ينهدمون.
عاينت بوجهه متحسره عاجزه شحجي وياهم وشلون اواسيهم
-صيري سباعيه بعد اخوج.
گمت وياه طلع وهوه يوصي سديت باب الحوش وراه ومشيت للهول بعدهم على كعدتهم عاينت لرنه وهي كاعده مغمضة عيونها
-رنـــه گوموا صلوا يله، حسين زهره يله كوموا.
مشوا بهدوء ساكتين بس رنـــه ضلت على كعدتها كعدت كدامها لميت وجها بين ايدي حطت عينها بعيني ذبلانها كلها
-رنـــه مجبورين نوكف على رجلينه مجبورين نل قويات الخاطرهم الخاطر اخوانج وشمس .
احجي وهي بس ترمش ساكته جريتها من ايدها طلعت تتوضى، وشمس تمشي وراهم وتدردم عليهم كاضه ريموت التلفزون المغطينه بقطعة قماش سوده، حاطه الريموت على أذنها وتخابر بيه
مسحت عيوني ادعي بگلبي يارب صبرني وقويني.
اخذت الصوبه وطلعت للحوش وكفت يم برميل النفط وجريت الصونده اريد افتح قبق البرميل ما اگدر الدنيا برودتها تدك بالعظم اصابعي يوجعني من البروده، شلت راسي للسما ثانية وره ثانية يكثر ظلامها صوّت الآذن يقشعر الابدان، كلشي بهالوكت يروح لمچانه الطيور تضم روحها بين اغصان الشجر
وحتى دجاجات رنـــه الصارت ماتهتم بيهن چلن على السياج وعلى النبگه جريت نفس طووويل، الهوه البارد يضرب بوجهي، الاصوات البره بدت تقل الحد ما اختفت كلمن مشه البيته
دنگت للگاع الرطبه جريت حديدة صغيرة طكيت بيها قبق البرميل حديد ينضرب بحديد الصوت يدك براسي الحد ما اتحرك وفتحته خليت الصونده وسحبت النفط حطيتها بالصوبة ومركزه وياها لمن انترست سديته واخذتها للهول
حسين وأكف يصلي عفت الصوبه يمه ومديت راسي الغرفة رنـــه لكيتها واكفه تصلي وذموعها يجرن من تسجد وتشيل راسها شمس تمد ايدها تمسح عيونها وتحاجيها
-لنه
وتعاينلها بضوجه، عفتهن ومشيت شغلت الصوبه وطبيت اغسل ايديي ورجلي الصار عليها نفط سديت البيبان والشبابيچ، وطبيت للمطبخ شفايفي احسهن يرجفن ودموعي مچلبات بطرف رمشي مسحتهن اذكر حجي سلطان وكوه اقوي روحـــي .
وكفت اسوي عشه وبالي يم كهلان اشتغل وافكر بيه اذا طبيت للغرفة شحجي وياه شگول.
اخذت صينية العشه حطيتها بالهول يم حسين وفتحت الباب على غرفة البنات
-تعالن تعشن.
دارت عيونها الزهره
رنـــه:: كومي زهره تعشي
-رنـــه كومي انتِ هم موزين عليج تجوعين وحتى توكلين شمس وياج، كوومي يله.
طبيت للغرفة جريتها من ايدها كعدوا يم الصينية وانه مشيت اشوفن طــروادة فتحت الباب على كيف لگسته مشغل الهيتر ونايم يالگاع مطفي كل الاضويه وضال بس ضوخ الهيتر الاحمر، طلعت وسديت الباب
-نايم خلي ليمت ما كعد اسويله عشه.
كعدت يمهم ماتفوت بحلگنه لگمه اذا ما وياها حسره، كل المصبرنه ضحكت شمس، وره العشه ضلوا كاعدين بالهول، رنـــه فتحت شعر شمس وتحجي وياها بصوت مبحوح
-توجعج خاله؟
وهي تحط ايدها على مچان الشكاله وتگلها
-اي
جرتها رنـــه الحضنه تبوسها براسها وبخدودها وتشمها حييل
عفتهم وطبيت للغرفة كعدت گباله حايره اكعده لو لا ضليت بالنص ساعة مكابلته لا بسه اعوفنه ولا بسه اكعده على غفله فتح عيونه عاين بوجهي صافن انگلب على ظهره زفر نفس متحسر مسح وجهه وكعد على حيله مدنك وايده على كصته وعيونه، تدنيت يمه مديت ايدي الايده اوخرها واحاجيه
-كهلان
ميل راسه يعاين بعيوني صوته مبحوح ومخنوك
-اريدن اموت ريـــمه
هزيت راسي لا صوتي اختنك مسحت عيونه
-اسم الله عليك من عمــري على عمرك
حط راسه على جتفي وشهگته مردت گـــلبي وخر يحجي بحرگه ودموعه تجري
كهلان:: ماكسرني غيرها، دفنت امي ودفنت ابوي ما انكسرت هيج بالحسين ما انكسرت وانهد حيلي هييج، انا عفره مووتني مووتتني والله هدديت حيلي بالعباس هدت حيلي
شبگته ابجي
-فـــدوه اروحلك كافي لا يصير بيك شي كلنه بدونك انضيع كهلان يا بعد روحـــي
وخرت منه امسح عيونه دنك حاط ايده على عيونه ويحجي وياي بخنك
كهلان::تگلي لا تبچي علي مردت گـــلبي... ولج انا النمرد گـــلبي انا الكون مو بس ابجي عليج كووون اعمي عيوني يا خويه كون اعميهن
بأيده طك عيونه حيل مرتين وتلاثه اريد الحك اكض ايده ماكو صيحت وجريت ايده حييل خشمه بساع طك دم
-كااافي كااافي راح تموتني
عفته وگمت اركض اطلع كطن حطيته على خشمه امسح الدم وهوه بعده يجري رجفن ايدي ما ادري شسوي
-رررنه رررنه تعااي.
اصيح وصوتي يرجف وهوه رجع راسه على ترج الچربايه هادئ ومشمر اديه مناه ومناه اجت رنـــه تركض شهگت بخوف وهي وأكفه بالباب ركضت علي اخذت الكطن من ايدي وخلت ايدها وره راسه رجعته ليگدام حتى يدنك كمت للتلفون ايدي ترجف احجي وي رنـــه واخابر على سلطان
-الو..الو سلطان تعال اخذه للمستشفى تعال .
كهلان::مابيه شي.
سديت التلفون من سلطان ومشيت يمهم بساع مد ايده على ايدي كوه يحجي
-مابيه شي.
كعدت على اركبي جريت ايده مسحت الدم منها ورنه بعدها مخليه كطن على خشمه وبأثنين اصابع ضاغطه على خشمه من فوگ على غفله وصفنت دار عيونها الها حاجاها دنگت عيونها متروسه دموع گـــلبي يدك حييل وتذكرت عفراء العلمتها وعلمتني من احد ينزف خشمة تضغط عليه خفيف من فوك وتنزل راسه حتى لا يرجع الدم الحلكه، جانت تحب كل سالفة تخص الطب.
طب حسين للغرفة حط الحجاب على راس رنـــه كالها
-سلطان اجه.
وخرت رنـــه على صفحة وطب سلطان عاين للگطن المتروس دم وعاين الكهلان
-شبيك؟
-مابيه شي.
دار عيونه الي يسأل
-ضغطه صعد؟
هزيت راسي لا ودنگت ساكته كعد گباله يحاجيه وكهلان مدنك
-تگوم اخذك للمستشفى؟
-لا مابيه شي والله
حجاها وزفر نفس متحسر عاين لباب الغرفة زهره واكفه بصف حسين وشمس مچلبه بهدومها فتحلها ايده اجته بساع وتعاين للدم
-خالو اووه؟
شبگها يشم ريحتها كل حيله وخرت هيه تعاين بوجهه وتسأل
-خالو اووه؟
هز راسه لا يعاين لوجها عيونه حمر ووجهه تعبان رجع راسه ليوره على تاج الچرباية وهيه على صدره مسحت عيونه بردنها وتدنت باسته فوگ عيونه
-يابعد روحـــي ياخالي فـــدوه اروحنلج.
ضحكت وشبگته تبوسه وماده لسانها تعاينلي چيه مره تشاقت وياها عفراء وكالتلها تكتلج بس ترحين لخالو. عفنه سلطان يمه وطلعنه سألتني رنـــه شبيه حجيتلها دنگت ميته من القهر ودموعها يجرن ضل سلطان يمه بالساعتين يله راح .
رنـــه :: تموتني واحسها تحط سجين بگلبي من تگلي -اين ماما
سكتت وهيه نايمه بحضني ودهره فراشها وراي كل يوم گيل لا تنام اسمعها تناشغ الحد ما تغفى.
شالت راسها شمس من المخده مدت ايدها تمسح دموعي
-لنه.
-ياروح رنـــه يا ضي عينها وكل دنيتها.
-بيج اووه؟
-لا.
تعاينلي بشك عدها كل واحد يبجي معناها مريض مديت ايدي جوه راسها وجريتها الصدري حجت وياي الحد ماتعبت وغفت، وانه عيوني يجافيها النوم اختنگ واموت احيرن وين اروح گمت طلعت للحوش بنص البروده احس عظامي يرجفن بس گـــلبي نار كعدت على الصبه اعاين للظلام بس اريد اشيل التفكير من راسي ما اريد افكر بيها ما اريد اتخيل اي شي لا اتخيل جسمها وهوه مغطه بالتراب ولا اريد اتخيل ايامي بدونها بس غصب عني كل هالافكار تسكّن عقلي، يعدي الوكت ودموعي تجري على خدي، اذكر فاتحة امي وفاتحة ابوي واقنع بروحي ميخالف هن للأربعينين واتعود على فراگها مثل ما تعودت على فراگ اهلي.
انفتح باب الهول وطلع طــروادة لف الچفيه على وجهه يتلفت لمن شافني اجه عليَّ حاني ظهره كعد بصفي ومد ايده على جتفي جرني الصدره ساكت اشم ريحته وچن شامتها احس روحـــي بحضنها همست صوتي مختنك
-مرتين تيتمنا
حرك ايده على زندي متحسر غمضت عيني روحـــي رايحه باسني براسي بشوغة
كهلان::رنـــه فـــدوه ديري بالج على روحج ترى ماضل ييه حيل بعد.
حجاها والتفتنا اثنينا على صوت رسالة وضوه تلفون يم قفص الطيور ظلمة ومحد منعدنا منتبهه، عبود كاعد على حيله ومن انتبهناله گام اجه يمنه دناني طرواده عليه وكعد عبود بصفي مد ايده يكض ايدي ويفركها بين جفوف اديه كاله طروادة
-شلون صرت عبود؟
-الحمدلله.
سكتنا ثلاثتنا الوكت يمرّ بثگل ونسمات هوه بارده تخفگ بالوجه،كام طــروادة وكف كدامنه
-گوموا ناموا
جراني عبود من ايدي وكفني وياه وحاط ايده على جتفي طبينه للبيت سوه عبود باسني برغسي وراح للدوانيه وطرواده اجه وياي للغرفة قاس السكر وضاج من شافه بعده مرتفع غطاني عدل ودنك باس شمس يله طلع .
حطيت راسي يم رگبتها اشمها الحد ماغفيت وكعدتني هيه تبوس بوجهي فتحت عيوني لگيتها گدامي هيه وريمه وزهره كمت وياهن ريگت شمس وطلعنه للحوش كعدت وهي تلعب بحضني وريمه ترش بالحوش
-ريـــمه طروادة وين؟
-بالدوانيه ضل كاعد للصبح گبل شويه يله غفه.
هزيت راسي خوش واندك باب الحوش راحت ريـــمه للباب وبس گالها انا بريا فتحتله الباب، عاينتله بتعب سلم عليها وشال راسه يعاينلي
ريـــمه:: تفضل خويه.
طب للحوش مدنك ومنحرش نزلت شمس من حضني ومشت عليه شالها مبتسم باسها واجه وكف كدامي
-شلونج؟
-الحمدلله
كعد بصفي وشمس بأيده يحاجيها ويبوسها، ريـــمه اخذت زهره وطبت للبيت، مد أيده على جتفي يحضني سندت راسي على جتفه وجريت نفس طويل اريد ابجي يمه واشكيله واكله گـــلبي شبيه من وجع.
نزل شمس من حضنه تلعب گدامنه وداني الصدره اكثر باس راسي متحسر
-رنـــه.
غمضت عيني ساكته اذا احجي دموعي تجري مد ايده الثانيه يمض ايدي ويمسح عليها
بريا:: ادري لو شما احجي وجع گلبج ما يخف بس خليني اكلج هيه رافعه راسها بيج دوم خليج قوية وعافتلج منها أثر وذكر عافتلج شمس تحبينها وتديرين بالج عليها مثل ما عفراء دارت بالها عليج ودافعتلج .
اذكر مره كالتلي اكسر ظهرك لو كسرت خاطر رنـــه .
غطيت وجهي بأيدي روحـــي محترگه حرگ شهگت ابجي
-ما اگدر انسى بريا اختي هاي من هسه مشتاگتلها شيصبرني على فراگها شيصبرني
-انتِ انسانه مؤمنة بقضاء الله وقدره، راح تصبرين وتقوين روحج الخاطر بتها وخاطر اخوانج.
غمضت عيني دموعي تجري لمني الصدره بأثنين أديه
-كافي بچي رنـــه عيوني انتِ.
فتحت عيوني الشمس من اجت ومدت ايدها اله شالها الحضنه وعبرت من عده الحضني تمسح عيوني وتشبگني تعاينله بزعل ابتسملها ويحج وياي
-عبالها طگيتج، شمس خالو ديري بالج على خالتج.
درت عيوني اله شابگه شمس واعاينله اريد احجي صوتي مبحوح
-راح تلتحق؟
دنك هز راسه اي درت وجهي منه زفرت نفس بحسره
-من البارحة جان لازم التحق بس ماگدرت اعوفنج وانا ادري بيج تعبانه بالي يضل يمج
عاينتله بحيره وخوف
-عايزه وجع گلب انه بريا؟
مد ايده يحضن خدي ويمسح دموعي
بريا:: اروحنلج فـــدوه، والله ماعليَّ شي وكل يوم اطمنج وعلي ودوم ما اطفي تلفوني اشتريت صرصور حتى شحنه مايكضي حطيت بيه رقمي الثاني.
دنگت ساكته گـــلبي يوجعني بعد مابيه اصبر على شي مهدود حيلي نزل ايده على حنجي يرفع راسي
بريا:: ها رنـــه اروحن؟
عاينت لعيونه الخوف ياكل بگلبي
-واذا مارجعت؟
-وحگ عيــونج الاحبهن ارجع، وهالمره ما ابطي عشرة ايام واجيج.
دنگت اهز راسي خوش الخنگه ذابحتني جر ايده مبتعد من دك هورن سيارة بره طلع يشوفه، شلت شمس ومشيت وراه عاينت من فتحة الباب وبس شفته ماسن لميت شمس على صدري حييل ومشيت للغرفة كعدتها كدامي گـــلبي يدك حيل
-شمس عاينــي لا ترحين البيت جدو كليلهم اريد رنـــه خوش؟ كليلهم اروح الرنه ابجي عليَّ شمس .
احجي بلا ما اثمن حجايتي واجر بوجها اريذ تعاينلي وهي مافاهمه شي جريتها الصدري من حسين فتح باب الغرفة هزيت راسي اسأل
-شكو؟
-بدلي الشمس يردونها.
عاينتله وشابگه شمس حيل طبت ورانه ريـــمه جرتها من ايدي
ريـــمه:: منذر تعبان طــروادة راح يروح يشوفه ويريد ياخذها وياه.
رجعت ليوره اعاينلها بخوف والله خايفه خايفه انحرم منها وانه ماضلي من عفراء غيرها، اعاين الريمه رتبت شعرها ولبستها حطتلها عطر وباستها حيل مشت وي ريـــمه لباب الغرفه ودارت علي شايله ايدها
-لنه رووح
طلعت وي ريـــمه غطيت وجهي ابجي يارب انت اعلم بحالي وتدري محد يصبرني على فراگ اختي غير بتها وريحتها لا تحرمني منها.
مثل السم احس الوكت ثگيل وبالكوه يعدي للساعة بثنتين يله اجه طــروادة رشمس وياه اخذتها منه شبگتها ابوس بوجها درت عليه اسأل
-شبيه منذر؟
وخر الچفيه من وجهه يحاجيني
-مابيه شي ضغطه صاعد
-ماكالك خلي شمس يمي؟
عاينلي هز راسه لا ومد ايده بجيب الدشداشة طلع علاكه سوده ومدها الي كوه يحجي
-گال هذن مال عفره خل رنـــه تضمهن الشمس من تكبر.
اخذتهن من ايده وطبيت للغرقه بس فتحتهن بچيت ذهبها لفيتهن وضميتهن مدري شلون الوكت يعدي الولد اجوا على طــروادة يردونه يطلع للــبستان وللگيعان بس هوه مايرضى، كاعد لو بغرفته لو بالدوانيه صافن ويدخن.
الساعة ب١١ بالليل نومتها هيه وزهره وكمت للتلفون اشوفن بريا ليمت يروح وديتله رساله اسأل دقايق ورد
-حبيبتي بالوحده اطلع نامي ولا يضل بالج وين ما اوصل كل ساعتين تلاثة اوديلج رسالة.
سكتت تمددت بفراشي ايدي على گـــلبي ادعيله، للوحده الا ربع وانه كاعده وديتله رسالة
-رحت لو بعدك.
-هسه راح اطلع ليش مانايمه.
-خايفه عليك.
- اطلعلي الباب الحوش جايج.
مسحت عيوني لبست حجابي والقمصله ومشيت متحسره لباب الحوش فتحته ومديت راسي اعاين اسمع خطواته لحد ما مشه بالضوه يله شفته بلبسه العسكري وفوكهن قمصله وجنطته بجتفه جرني من ايدي الصدره ضميت روحـــي حيل أشم ريحته واحلفه
-ديربالك على روحك عليك العباس ولا تطفي تلفونك ترى يوكف گـــلبي من الخوف.
وخرني من صدره لام وجهي بسن اديه يعاين لعيوني
-اسم الله على گلبج لا وعلي ما اطفي تلفوني وكتلج هالمره ما ابطي بساع ارد.
حطيت ايدي فوگ ايده اعاين بوجهه رد جرني الصدره
-ديربالج على صحتج وكل يوم قيسي السكر رناتي فـــدوه اروحنلج لا تشلعين گـــلبي.
ضميت وجهي بصدره اول مره هلكد ما اريدنه يروح حسيت بروحي محتاجه يضل يمي بس ما بالايد حيله، لا هو الوده يعوفني ولا انه الودي اوخر من صدره حسرته تطلع من نص صدره يبوس راسي ويجر نفس بشوغة وخرت من دك هورن سيارة التفت يعاين لبيت عمي شاكر سليم واكف يم سيارته يريد يوصله للكراج،
مد اديه اثنينهن يلم القمصله عليَّ عدل
-يله يا روحـــي مع السلامه
- اخذت شاحنات؟ والتلفون الثاني؟
-اخذت اخذت كلشي واخذت هدوم دافيه ولفات للدرب لا يضل بالج كلشي ماخذ.
هزيت راسي خوش حط ايده وره راسي دناني اله باسني بكصتي حيل وراح درت وجهي بساع للحوض اخذت ماي بماعون ووگفت بالباب صعد بالسياره واجاهم وهـــب صعد وياهم، عيونه عليَّ شال ايده يسلم شمرت الماي وراه اعاينله لمن راحوا.
سديت باب الحوش ومشيت بعدني ماواصله باب الهول وطلع طــروادة بسلاحه حطيت ايدي على گـــلبي .
-وين رايح؟
لمحت ريـــمه وراه ووي حجايتي دكوا الباب الولد صــيهد وميثم وسلطان
طــروادة:: نامن هسه نجي.
حجاها وطلعلهم روحـــي راحت ضلينه بالحوش للفجر يله ردوا للبيت على اساس واحد مدليهم على مچان حمزه ابن علوان بس مالكوه وردوا، صليت وتمددت بفراشي لگيته مراسلني
-نامي حبيبة الروج إنّا صعدت بالسيارة وراح انامن دام الدرب طويل.
-بالسلامة من تكعد طمني، وخل بالك على روحك.
وديتها ونمت آحلامي من يوم فاتحتها مزعجه الحد هاليوم حلمت بيها مبتسمه ووجها حيل حلو ولاول مره افز وگلبي ما معصور مثل كل يوم عاينت لتلفوني واصلتني منه رسالة يطمني بيها. عفته وكمت للهول الولذ ثلاثتهم كاعدين وشمس بينهم تلعب، ريـــمه وزهره اعاينلهن بالمطبخ.
شويه واندك بابنه طلع حسين فتح الباب وطب شاكر وكف طــروادة بسرعة شايل أيده گاله
-ضل يمك لا تطب البيتي.
وكف بالحوش دك عوجيته بالگاع بأيده دفتر شمره لباب الهول گاله
شاكر:: هاي مخاسير الفاتحة اريدنهن.
دنگ طــروادة شال الدفتر شمره بوجهه گاله
-يم سلطان امش اخذهن منه.
يعاين علينه بحقد وشال أيده يهدد
شاكر:: عاين ولك خلني احل طلابتك بفصل وي بيت علوان لا ينكتل واحد من ولدي ساعتها انتَ وولد عمامك اطردكم مايصل واحد بالقرية
ابتسم طــروادة ومشه عليه وكف گدامه وريمه تطكطك بأصابعها بخوف وعيونها بس على كهلان خايفه عليه مو على ابوها گال
-الينكتل هذا يومه، مو انتَ هيج گلت على عفره؟
طلع سجاد من الدوانيه جان نايم وفز على صوتهم سكت طــروادة ميت من القهر وسجاد جرول ابوه يطلعه من بيتنا ويتعارك وياه، انسد باب الحوش وراهم كعد طــروادة بالگاع مقهور حاجاه عبود وكام يمسح وجهه بطرف الچفيه رد كعد بالهول زهره كاضه ايده من صفحة وشمس تروح وتجي بحضنه.
اجوا عليه الولد طلعلهم للحوش رادوا بس ياخذونه وياهم للگيعان مايرضى يوصل، ملّوا وراحوا وراهم بساعة اجه شيخ حيدر ومدري شمالني بساع اخاف احس اي واحد يجي يريد ياخذ شمس كلت اهل منذر ودوه عليها.
طبوا للدوانيه عشر دقايق واجه حسين اخذها ضليت كاضه گـــلبي بأيدي اعاين عليهم من فتحة الباب
طــروادة مدنك الچفيه على راسه مفتوحة شمس كعدت بحضنه مستغربه وشيخ حيدر يحجي وياه ويواسيه
-وانتَ گلبك قوي وتعلمت دفنت امك ودفنت ابوك ووكفت على حيلك الخاطر اخوانك وحلالك مو صح؟
وهو مدنك مختنك ويهز راسه لا
طــروادة:: ولحسين اهون موت امي وابوي اهون من اختي چن شلعت روحـــي شلع.
- لا تحجي هيج طول عمرك تحمد ربك وتشكره على كلشي يصير وياك وتدري هذا مصير وقدر مكتوب، وكلها على هالدرب خلك سبع لا تطيح وتشمت الوادم بيك، اصبر والله يجزيك على كل صبرك، اذكر قوله تعالى ( وبشر الصابرين الذين اذا اصابتهم مصيبة قالوا انا لله وانا اليه راجعون )
يحجي وياه وشمس تدنك تريد تشوف عيون كهلام وتشبگ براسه على صدرها وتعاين لشيخ حيدر بزعل، مد أيده على جتف كهلان يريد يحاجيه وشمس عبالها جاي يطكها مدت ايدها حرت جفيته وطيحت عگاله
طــروادة:: لاا خالي عيب.
وبساع شال العگال ورده على راس شيخ حيدر وهوه مبتسم گال الطرواده
-عمي هاي عليها فصل.
طــروادة ::حاضرين.
مد أيده كرص خد شمس گاله
-الفصل طايح الخاطر عيونها.
وخرت من الباب متطمنه من حسيته محد موديه على شمس، ضل يمه ساعة يله راح، وطرواده هم ماراح للگيعان والولد كلساع يجونه ويرحون ملوا منه للعصر هم اجوه كالوله منذر بالبستان يله راح وياهم وچني ادري بيه من راح يروح ياخذها وياه سبحتها ومشطتها ابوسها واشمها واوصي
-مو تضلين غاد كليلهم اريد رنـــه .
ادري بيها ما تفهمني بس من خوفي احجي اكه عليها طــروادة اخذها
-يرجعها لو تبات يمه؟
كح مختنك
-باجر يجيبها.
هزيت راسي خوش ودرت وجهي امسح عيوني غير لو گـــلبي يقتنع هذا ابوها وهذا حقه، رد طــروادة للبيت ماعدت غير ربع ساعة واجت سيارة غريبة مانعرفها حسين حاجه طــروادة وگاملهم
طــروادة:: طلعت مستغرب زلمه چبير بالعمر وواحد بصفة اصغر منه نزلوا اثنينهم الزلمه الچبير كوه يمشي يتجه على عوجيه وأيده ترجف رحبت بيهم ما اعرفهم بس احسن بروحي چن شايفهم مدري يشبهون احذ اعرفنه
بعده الزلمه ما واصلني وشال ايده الترجف يأشر عليَّ ويحجي
-انتَ وليد شامل؟
-اي حجي وصلت.
فتح ايده دموعه يجرن تدنيت عليه كلشي مافاهم شبگني يبجي كضيته من ايده اسنده وامشيه للدوانيه وانا حتى ما اعرفهم منين طبوا للدوانيه عفت عبود يمهم وطلعت اخابر صــيهد
-اكلك زلم اثنين اجونه ماعرفهم تعال بله.
سديته منه ورديت يمهم الزلمه الثاني گال
-بويه انا حيدر إبن محسن
أشر على ابوه وكمل حچيه
-محسن اخو شعلان.
عاينت بوجهم مستغرب الحجي گال
-انا من يوم الطلعت من هالقرية وحالف ما اردلها، طلعت منها شاب اصغر منك، اصغر اخوتي انا،ومن يومها حلفت ما ارد وانساها، بس ذاك اليوم بالزيارة وكعد يمي شويب اخذتنه السوالف وعرفته مناه من الديره نشدته على بيت شعلان گالي شعلان مات والله ماهز گـــلبي بس ساعة الگالي شامل مات موتني.
غطه وجهه بچفيته يبجي، ما اذكر شي عنهم عاينت بوجهه صدك يشبهه شعلان، كعدت بصفه
-لا تبجي حچي.
حيدر:: والله يا عمي انا مارضيت اجيبه ابوي تعبان بس بعد ماگدرت اوكف بوجهه، ابوك جان يجينه للنجف وماجان راضي على ابوه لان ظلم اخوته اكل حقهم وطردهم من القرية.
محسن:: چنت اكله عمي لا تجي ابوك يعاديك وصدك عاداه دولبه كرهه على كرهنه وشوفه اليوم يوم الوكفلنه وجاب ربع منّ حگنا
طــروادة:: والله يا يابه إنّا تعذرني ماجاي أذكرك
-حگگ ماشايفنه انتَ بس انا صوركم عدي ابوك جان يجيبهن الي كل مايجي ويگلي عمي هذول وليدتي هذا كهلان وهاي عفراء.
دنگت ملچوم گـــلبي، لمن اجه صــيهد سلم عليهم وكتله عليهم وبينت جيتهم بس يشوفونه ويرحون كام حيدر وي صــيهد طلعوا للزرع وضل الحجي كاعد يسولفلي والحرگه تارسه صوته
-شعلان دمرنه موت اهلنه وماخله واحد من عدنا على حاله طلعنه من القرية بطرك هدومنه شاردين ونحلف لا نردلها ولا نلفي غيرنه لقبنه وعشيرتنه بس كون نفتك منه ومن شره، عدن چم سنة يله ابوگ لكاناه واحجيها الك ماچنت راضي واتعارك وياك كل ما يجينه اكله بويه عوفنه فكنه من شر ابوك، بس مارضى وضل ورانه بين مده ومده يجينه ويشوفنه وين كاعدين لا عدنا بيت ملك لا وظايف ومتبهذلين يتعارك وي ابوه علمود حگنه وجاب اليگدر عليه دوم يبيع من الحلال بدون ما ابوه يدري ويجيبه النه مناه لمن شعلان دره كالي ابوي عاداني دره بيه اجيكم.
-شعلان مات وولده ورثوا كلشي منه شاكر ووليد نفّس الطينه .
هز راسه اي يمسح بوجهه
-خليل ونضال هم متوفين صدك؟
-اي.
-إلى رحمة الله
-شعجب كل هالمده مانشدت على ابوي .
دنك متحسف ويهز راسه بقهر
-شلت وضيعت روحـــي عليه حتى لا يضلّ يجيني
-ليش ؟
-ماتدري جدك شسوه بيه، شعلان اخوي واعرفنه واعرف شيگدر يسوي خفت على ابوك هل وخرت عنه وبعد لا نشدت ولا وصلت، ولو ما صدفة الشويب بالزيارة وگالي شامل مات والله چا ما اجيت.
دنكت اهز راسي ااي
-انتَ اصغر من شعلان؟ هوه مات انشط منك.
-ما متعوب، كضه شبابه ونسه واحنا نركض بالحلال والگيعان نسرح ونشتغل مايعدي موسم اذا احنا ما زارعين بيه والحلال عينك وماتشوف على گد ما چثير اليضيع منه ماندري بيه كل هذا جان بتعبنا وشعلان يتشرط ويتأمر وابوي وياه ضدنه تالي خوش جازاه شعلان خوووش جاززه.
طك ايد بأيد متحسف ماكو ربع ساعة واجوا وليد وشاكر يتراجفون ويتعاركون عبالهم جايين يدورون حگ وكيعان
وهـــب:: غير هذا الجد جا شعلان؟ اعاينله شحلاته جنه نستله نازك الخاچيه مسفطها وحاطها يمه والسنسله مال الساعة مچلبه بالطرف وحتطها بجيب الستره طكيت ســليم احاجيه
-اتعلم شلون تكشخ مو تلبسلي وردي
ســليم:: مالك غرض، اكلك ولك هذا الحچي ينكرط مايبدلون ويانه ياخذون شعلان ويخلولنه هذا؟
-انچب اسكت خل نفهم.
درنه عليهم طــروادة روحه بخشمة وعلى ابسط شي يصيح طرد ابوي وشاكر وانا وسليم نعاينلهم ولا تحركنه جانوا مستاهلين ينطردون اكلوا الوادم بكشورهم الگيعان النه والقريه قريتنا، عبالك الوادم جايين ياخذونهن منهم كمنه فازين من طــروادة اختنگ يكح يريد يجر نفس ماكو صــيهد ايده بساع رجفت مرتبك
غسلنه وجهه وكعد بباب الدوانيه كوه يتنفس
صــيهد:: على كيفك بس على كيفك ماكو شي كهلان شسالفة خويه، ماكو شي، اخذك للمستشفى؟
هز راسه لا عمنه حيدر واكف ويانه ويحاجيه بهدوء
حيدر:: شبيك يابه حرگت گلبك عليمن؟ خلهم يحجون وحدهم احنا عايزيلهم؟ احنا ابوي تعب اشتغل كلشي لم عتيك اشتغل بفرن اشتغل بالتيتي ماضلت شغلها ما اشتغلها وبس كبرنه جازيناه ونمدله الدرب فلوس، وولدي وولد اخوتي مامنهم واحد ما مكمل دراسة ومتعين اربعه عدي وكلهم على اجتافهم رتب،وولد علي اخوي وولد وينان اخواتي كلهم موظفين وشايفين خير من الله، لا جايين على فلوس ولا على گــيعان. لو ما شامل عزيز مالفينه ولا اجينه.
وكف صــيهد يحاجيه
صــيهد:: أمسحها بوجهي عمي وكهلان ترى تعبان ماصارله چم يوم من اخته توفت وهل يتعب بسرعة وخلگه ضيك لا يصيّر بخاطركم.
وهب::سكت حيدر وابوه كاعد مايگدر يكوم تعبان بس فتح عينه بقهر من سمع صــيهد وصاح الكهلام كام كعد يمه وجهه اصفر
محسن:: اعذرني جدي كهلان لو ادري تنقهر جا ما اجيت.
طــروادة:: لا يابه لا تحجي هيج جاي لبيتي انتَ مالك غرض بيهم وجيتك على عيني وراسي
زفر نفس متحسر شال ايده يأشر علينه ويگله
-ولد عمامي كلهم تربية ابوي
التمينا كاعدين يمه سوالفه حلوه وماينشبع منها وأكثرها على عمي شامل شويه وگال
-واشيه عدله؟
صــيهد::اي اصيحها تريد تشوفها؟ انتَ عدك مره لو لا؟ يعني مرتك عدله ميته ماتزوجها؟
حيدر::ها عمي صــيهد اوكف اوكف جا امي غير تگلب الدنيا ماتشوفها مره چبيرة تغار لهذا عمرها لو كعد بباب البيت وتعدت من يمه حجيه من نسوان السلف وسلمت عليه احسب بيتنا انگلب والزعل صار بفلس.
وهـــب:: ضحك صــيهد وجدي محسن مبتسم يهز راسه اي مكيف بيها وبغيرتها گال
محسن:: واشيه ما تموت اذكر امي الله يرحمها تكضها بالشط تشبعها ماي تطلع تتلامض ولا الها غرض.
سلطان:: جا جدي طلع السبب من اهلك أمك وابوك مراوينهم نجوم الظهر هل عادوا امجادهم بينه.
ضحك يسولف على امه وعلى سوالف جده ورد بسوالفة العمي شاكل كلنه نسكت ونستمع بأهتمام اي سالفة تخصه احنا ماسامعينها گبل تهمنه
جنه عبالنه كره جدي وعمامي العمي شامل بس لان مايشبهم ولان دوم على حگ طلع الموضوع اكبر من هيج ولا مانرضى على ظلم ابوه وما مشه وياهم بالباطل وساعد عمامه.
چلبنه بيهم مانريدهم يرحون بس مارضوا تعشوا ومشوا.
""
مــاسه:: كاعده بالحديقة حور بأيدي اطلعها الظهريه علمود الشمس صافنه على الورد وفكري بعفراء ابتسمت لان ما الها غير الذكر الطيب صح كسرتنا وكلنه تأذينا على فراگها بس عافت بكل العرفها اثر طيب ماينسي
التفتت على صوت ماريا، حاطه على اجتافها شال صوف واجت كعدت بصفي تسند راسه على جتفي گمت احسها بنتي الاولى وحور الثانية درت عليها اسألها
-ماريا شتتذكرين من عفراء ؟
عاينت لعيوني مبتسمه ويذت تتعلم كل جملة بالبناني تخلي بسها چم حچاية عراقية
-كلّ خير، اتزكر لمّا رحنا على الحج ببيتهم
-الحجه مو الحج.
- اي قالتلي احسبيني امك او خيتك متل مابتحبي وليمت مابتحبي آجي لعندك واسمعك وبعد وصتني عخواتي قالت هنه حنينين بس بدون وقت ليتعودوا.
ابتسمت اكرص خشمها
-احجي عراقي حلو بحلگج.
-بدي اتعلم من شان بريا يبطل يتضايق من وجودي.
-جذاب ترى شايفه من يجي ويلكاج نايمه كبل يجيني يگلي شلونها خوماضاية شبيها ماريا ليش الهسه نايمه.
ابتسمت مكيفه واخذت حور من ايدي تبوس بيها حيل تحبهم وتتمنى الحچاية الحلوه منهم بس همه من موقف الجواز والهويه الهسه مبتعدين عنها.
اجه مــيثم جان عده دوام لكانه كاعدين گدامه ماريا بساع خلت حور بأيدي تدري بيه من يجي يبوسها، وكفت اسلم عليه وهيه طبت للبيت باسني وباس حور
-احجي وي ماريا مــيثم.
هز راسه اي طبينه للبيت صاح عليها
-ماريا، كلاص ماي.
كعد على القنفة حور بأيده والعلاكه بصفه طلع منها بدلات اثنين وحذه العمرها وحده چبيرة
-هاي حلوات؟
-يخبلن هاي الثانية المن؟
مــيثم:: الشمسنا.
ابتسمت وعيوني من وحذها تدمع تحسر بقهر عافها على صفحة، وحط حور بصفه على القنفة اجته ماريا بأيدها كلاص ماي اخذت من أيدها يعاين بوجهه مد أيده الها يريد تخلي ايدها بأيده ويسلم عليها بس هيه عبالها يريد تبوس ايده كضتها بأثنين اديها ياستها وحطتها على كصتها عاف الكلاص على الطبله وجرها من ايدها الحضنه
-لا يا روحي مارايد تبوسين ايدي
باسها براسها وهي عبالك متانيه الساعة اليشبگها بيها بساع بچت بصوت تشاهك جنها جاهل وضايع من اهله. مغطيه وجهه بأثنين اديها وهوه حار بيها يشبگهر ويبوسها
-روحـــي انتِ ماريا حبيبتي شبيج ؟
شال راسها وجر اديها من وجها عيونها حمر تناشغ مسح خدودها وباسها يضحك
-شبيج؟
وهي ساكته ضل يحجي وياها ويشاقيها وخابروا بريا حجوا وياه كل باله يم رنـــه وشمس يخاف لا ياخذون شمس وتتخربط رنـــه .
بس مطمنين لان منذر حتى بالسيارة من آخذوا عــفراء للمستشفى موصيه شمس تضل عد كهلان ومنذر راضي جاي ياخذها تبات يمه ليله ويرجعها، كمنه صبينه الغده وره الغده راح مــيثم يشوف طــروادة لان صاره مده يختنگ لو على غفلة يتخربط ويحيرون بيه، كلهم بفراگها تمرضوا، من اعاين لحسين وزهره احس حتى همه متغيرين وكل هذا وانه فكري برنه ماضل غير يومين للمدارس وهيه لا الها خلك ولا واهس شلون راح تداوم ما ادري.
خابرني بريا گال
-اكو قميص اسود معلك راح يجي عليه سليم انطيه اله.
-وينه الاسود ياهو منهم.
-بس هوه معلك.
-يله خوش.
سديت التلفون منه حضرت القميص وطبيت للمطبخ اشتغل نسيت حور وماريا بالحوش شويه وسمعت الباب اندك غسلت ايديي ومشيت اخذت القميص وطلعت توني وصلت باب الحوش وتلاكت وياي ماريا فاتحة باب الحوش اشرتلي على الباب وتحجي بضوجة
ماريا:: هيدا الشرشوح بدو ياكي.
ووي حجايتها طك الباب حييل وصاح
-بت الچلاب ياهو الشرشوح، تعااااي اطلعي تعااالي لانعل والديييج .
الباب مفتوح وهوه يطگه كل حيله مايگدر يطب للبيت لان محد من الولد هناه ويصيح بصوت عالي وماريا فكت عينها كلها
-ليكي شو قال؟ يسبني هالمشرشح؟
طبت للهول والله عبالي راح تروح تبجي وانه ركضت للباب مديت ايدي بيها القميص واحجي
-هذا القميص خويه.
جره من ايدي وشمره لبعيد منطيني ظهره ويفور ويصيح
-صيحيلها الهالسكط اشك حلگها اشوفن شلون تغلط.
-ماقصدها ماعبالها انتَ عبالها ووهب.
احجي ودرت وجهي على صوت ماريا فتحت عيني مصدومة هاي هيه؟ واكفه بباب الهول ايد على خصرها والإيد الثانية شايلتها تأشر بيها وتحجي سررريع وصوت عالي جنها وحده من المسلسلات تجر الحجاية جر وخلته مايلحك على السانها
ماريا:: لك عم تسبني؟ ااي روح روووح من هون روح لامك يلي عرفت تولد ماعرفت تربي هالمشرشحة، قاتلي حالها على القيل والقال ونقل الاخبار مم تم لتم
لمّ حالك وروح قلها ترجّع تربيك بدل شرشحتها بينت النسوان بلكي يطلع منك شي بيشبه البنادمين.
الطم على خدودي وهيه مدري منين طلعت وين الصوتها ناصي الفقيرة صارت جنها واشيه تعد وتصف ونص الحجي مانلحك نفهمه ، وهو متسودن بس يريدها تطلع اجت رغد تركض بس نريد نلم السالفة هوه يصيح بكل صوته اتمنى واحد من الولد موجودين حتى يگدر يطب للبيت يغلط ويسب دفعته رغد خازرته
-وشني تريد تطكها بيا حگ.
يفور يفور ويغلط وهيه ترد الغلطه بعشره وچلبتله شرشوح منتف مابتستحي، اجه مــيثم بساع صيح عليها خازرها وهيه ماساكته تدافع وتحجي بحرگه وسليم من الباب يحجي ويغلط وميثم يحاجيه بهدوء يريد يفهم شي بس ســليم شيسكته نتر بحرگه
-ساقطة كل تربيه ماعدها.
وميثم بنفس اللحظة شال ايده طكه راشدي ودفعه من صدره
-امشي مناه يا خايس
خاز مــيثم بغضب شال العلاكه من الگاع وعاين لماريا بخزر متحلف دار وجهه ومشه، وميثم بساع طب للبيت كض ماريا من زندها ومشه بيها للهول رغد اشرتلي اركضي وهيه راحت لبيتها.
ركضت وره مــيثم مكعدها گدامه يعاينلها بغضب وهيه مدنگه وجها احمر كالها
-شهالغلط؟
-ماهو بلش يشتم.
-اششش هالمره صارت وبعد ماتنعاد ماريا ماعدي وحده تطول لسانها هيج، وتوكفلي بالباب تلعلع لا تعيدينها.
دنگت ساكته ودموعها يجرن كام من يمها بعصبيه بذل ومشه للگيعان وهيه طبت للغرفة مشيت وراها توها تريذ تبرر
-اشش غلطانه لا تكليلي هوه بدأ الولد اجه بالباب وانتِ كلتي عليه شرشوح وسمعج.
-ما انا لما فتحتلو الباب قلتوا أهلين قام يقلي بنت الروسية الصفره اكسرلك ظهرك لما توصلي على الباب .
وانا ماحكيت بس قلت عنه شرشوح شو فيا؟ هو يحكي عادي ماحده يحاسبوا وانا احكي تطالعوني مو منيحه ولساني طويل.
-اكعدي لج النوب شرشوح هذا مسودن لا تحطين روحج براسه يفجر البيت بينه بس حتى يكتلج.
-مفكرني راح خاف ابن المشرشحة.
مدنگه ترطن وحتى ما افهم حجيها ضلت تحجي بالروسي مبين غلط من نبرة صوتها
-انجبي ترى اعرف روسي
ضحكت تهز راسها لا تدري بيه جذابة، حجيت الوهب حتى يلوم ســليم ومايخليه يحط راسه براس ماريا تالي وهـــب لگاها سالفة نصب على سليم بيها.
داومنا اول يومين رنـــه ماترضى تداوم وراها بيومين يله داومت كوه على روحها مالها خلك اي شي
جــويريه:: ايام تعدي واني وحدي استذكر كلّ لحظاتي وي اي شخص فقدته وادونهن بدفتري، دخل للغرفة وباوعلي ضايج عباله اكتب غير شي كعد مقابيلي يياوع الوجهي ورغم الدفتر مفتوح گدامه ماباوعله كتله
-اكتب مواقفي وي عفراء حتى ابقى أقراهن دائماً.
هز راسه خوش ويباوع لوجهي
-اذا تردين ترحين غادي يم مرت وهـــب وبدور عادي روحـــي.
هزيت راسي لا ما اريد مدنكه اكتب حسيته مسح على راسي شلت عيني اباوعله
صــيهد:: ما اريدن تضلين وحدج كاضيتها بجي.
-لا لا والله من انقهر اكوم اقرالها قرآن بدل ما ابجي
-عفيه احسن
دنه الهيتر يمي ومشه بدل وكعد على الچرباية طبكت دفتري ضميته ووگفت احاجيه
-جوعان اسويلك عشه؟
-اذا بيج حيل بس چاي ما اشتهي.
هزيت راسي اي وهو يگلب بملازمه ماله خلك شي سويتله چاي ورجعت يمه طاب الملازم ومتمدد كعد على حيله اخذ الچاي من ايدي شربه اباوع الوجهه ضايج
-بيك شي احس ضايج؟
دنك هز راسه لا شويه ورجع گال
-غثني منذر وغث حتى طــروادة مايرضى يگول ياهو الچان وي حمزة ابن علوان كل ماحجه وگال انا الكاه وانا اكتله، جا شني احنا مو خوش زلم غير ثارنا واحد وتحجي.
يحجي بحرگه وسبهم اهل منذر وبيت علوان وشاكر وابوه وبيت غانم غلط عليها كلها، خلص الچاي اخذ الكوب ومشه للمطبخ غسل ورجع تمدد تغطه وخله ايده على عيونه وبعده يحجي عليهم واني اباوعله ساكته وخر ايده من عيونه باوع بوجهي حجه بهدوء
-طفي الضوه وتعاي.
گمت طفيت الاضويه وقربت الهيتر يم الچرباية من جهتي لان ابرد تمددت بحضنه راسي على ايده
-باجر تداومين
-لا ما الي واهس
-تداومين جوري ماكو ما الج واهس.
سكتت انطيته ظهري اباوع الضوه الهيتر حضني حيل ويحجي وياي مشاور
- كافي تقهرين بروحج اضوجن كل ما أشوفج ضايجة.
-صــيهد.
سكت يمسح على شعري بلمسه هادئة عكس لمشاته الچانت تگطع شعري
-عفراء ليش چانت تسميك ابو الحلوات؟
سكت فترة طويله واني من فضولي وبس اريد موضوع يخصها احجي بيه گال
-ما ادري بس اظن لان مره شافتنه انا وكهلان نعاين على مسلسل النبي يوسف من زليخة ردت بت.
نتشاقة هوه يگول الممثلة زليخة احلى من اسينات وانا اكله اسينات احلى شلع گـــلبي گتله انا اعرف بالحلوات انتَ ماتعرف هيج حجيتها اثاري عفره كاضتها عليَّ.
-هههه فـــدوه الگلبها جنت كل ما اشكيلها من عدك تگلي شبيه ابو الحلوات.
-اكلج اسم اسينات حلو من تصير عدنا بنيه نسميها اسينات؟
درت وجهي عليه
-هاي لان تحبها تريد تسمي عليها
-ههههه كله من عفراء
-كشفتك الي
-الله اكبر شمسوي
-ابو الحلوووات.
-شگولن عليج أم شمس
ابتسمت الطاريها والعبره خانگتني كل ذكرها طيب وكل سالفه تخصها بيها كلمة حلوه.
رنـــه :: كل يوم يعدي اگول اي هسه اتعود بس ابد ماتعودت ولا تعلمت بعده نفس الوجع وبريا مزودها عليَّ عدن اخمسطعش يوم وهوه مانزل بس يحجي وياي كل يوم وكل ساعتين تلاثة يودي رسالة انا زين لا يضل بالج مايمي شي، ويسأل على السكر اللي بهذلني واذا نزل ينزل للميه وتسعين ويرجع يصعد .
شمس تاخذ التلفون من عندي اذا يخابر وتبقى ترطن عليه يگلها
-بوسيها شمس خالي بوسي رنـــه.
-بوسه؟
-اي بوسيها.
-بوسه؟
-ولج اي.
-لنه؟
-اي بوسي خاله رنـــه
-بوسه؟
-لا خالي بطلنه لا تبوسينها.
وخرت التلفون من اذنها وسدته بوجهه تحب هيه تسد المكالمة ابتسمت وجريتها الحضني ابوسنها
-شموس شمسي گـــلبي .
-دلبيي.
جريتها ابوسنها حييل اخذتها وطلعنه وطرواده بس يشوفها يحير شلون يبوسها ولون يحضنها، لحيته عاليه والاسود ماذايه والچفيه ماتطيح من راسه، الكيعان والبستان مايوصلهن الولد يركضون عليهن، مناه لمن رد شيخ حيدر اجاه يله يضل يروح للگيعان.
وكل يومين تلاثة بالليل ياخذن اسلاحهم ويمشون يدورون على بيت علوان، منذر ياخذ شمس من عدي تبات يمه ليله ويرجعها مره من اجه شفته شكد متغير حتى من يمشي حاني ظهره طلعوا اخواني كايليله رنـــه من القلق والخوف سكرها يصعد تخاف لا تاخذ شمس منها گال
-وصيتها هاي شلون اخذها منج؟
-والله اموتن بدونها محد مصبرني على فراگ عفراء غيرها.
-عدج تضل لا تخافين خويه.
مسحت عيوني اخذتها وطبيت للبيت كل يوم سعدي ويقترب من يوم الاربعين گـــلبي ينعصر شلون عدن شلون مشن ما ادري، اخذ كوستر كهلان كل بناتنا ومرت خالي جعفر وبتها، ومنذر وحده جاب اهله
وعسى لا رحت ولا وصلت گبرها عسى ماشالني رجليَّه ووصلت يمها نار نار بگلبي يس اريدن اشبگها اريد احط گـــلبي على گلبها ماكدرت اشبگ اختي ما گدرت اشبگها.
شمس تفتر بيني وبين ابوها واخوالها تمسح دموعنه واحد واحد ماتدري عليمن نبجي ماتدري عليمن مهدود حيلنه ويا عزيز البالگبر.
كضت عمرها تعارك على هذا المچان كل مانجي للمكبره وكالت هنا ادفنوني يم اهلي اخافن، وطرواده يتعاند وياها يگلها لا هذا كبري.
لطمت وبجيت الحد ما انهد حيلي كومونه من يمها كوه علينه زرنه الامام علي عليه السلام وردينا للقرية ايام تاكل بالگلب تعدي وتاخذ من العمر ضل گـــلبي وفكري يمه الحد ما الساعة بثنتين بالليل صورلي روحه بييت اهله
-رديت رناتي هسه وصلت
-الحمدلله على سلامتك
-الله يسلمج يابعد روحـــي .
عفته يغشل ويرتاح اجت يمي ريـــمه تطكطك بأصابعها
-ها؟
ريـــمه :: دنگت ساكته ما ادري وكتها لو لا رديت اعاينلها اول امس تخربطت واخذني سلطان لان كهلان بوكتها يمه وادم.
-رنـــه أنه حامل.
شهگت وكعدت على حيلها ايدها على حلكها
-عليج الله؟
-اي والله.
-يمه الف الحمدلله
شبگتني تبوس بخدي فرحانة احاجيها مرتبكه
-كهلان ما يدري واحس مو وكتها احاجيه ماله خلك ومريض
-لا وكتها وكتها احجيله احسن.
ضليت كاعده يمها ومحتاره الحد مانامت كمت الغرفتي تانيته للاربعه يله اجه تعبآن حييل تانه الصلاة صله ويقره قرآن وره كل فرض صلاة يهديه العفراء ويضل على السجادة يفكر بيها.
شويه واجه للچرباية تمدد درت وجهي عليه مد ايده يتلمس خدي
-ليش بعدج كاعده؟
-بطيت انتَ.
-صــيهد ومنذر جانوا يمي وهل بطيت.
سكتت اعاين بعيونه دناني الصدره شبگني وغمض عيونه سكتت ماكدرت احجي مدري شبيه متردده.
الصبح راحوا للدوام ما ادري باب الحوش ضال مفتوح شمس يمي اكنس بالحوش واضحك وياها، درت على فتحة الباب شمرت المكناسة من أيدي وبساع شلت شمس من الگاع حطيتها بباب الهول وسديته درت وجهي عليها
-خيرر شعدج؟
شالت حاجبها تضحك
ميلاد:: ريـــمه ماعرفت اربيج حسافه طالعلج لسان.
اشرت على الباب ارجف اريدها تروح هزت راسها اي مبتسمه وهي تحجي
- طــروادة يدري بيج انتِ الشربتي امه وموتيها؟
شكرا لزيارتكم عالم روايات سكيرهوم
