رواية ناديه الفصل الخامس والستون 65 بقلم انين الليل

ناديه 

طلبت من سراج ياخذني البيت قيس حتى اشوف شنو مسوي بافراح وحتى اعرف هو عد كلمته 

او لا 

لان بصراحه شنو ما يسوي قيس بافراح الخاينه قليل بحقها وما راح يشفي غليلي وزاد فضولي اكثر لمن سراج 

گلي انو الي بدل مرتضى وخلا يصرف نظر عن خطبته الحنين هو تسجيل مفبرك مسويته نسرين الهديل بناءا

 على طلب افراح واكيد مقابل فلوس

طلعنا انا وسراج وقبلها اخذني للمطعم وگلي يريد يتعشى لان جوعان وطلب عشا خفيف انا اكلت ويا لان 

چنت جوعانه بس چنت دووم اتحاشى اباوعله ما اعرف ليش اخجل منه ما اباوع 

بعد ان كملنه عشا هو دخن جگاره وسالني على نسرين وانا ارتبكت لكن گتله

... ... هي هاي ابنيه ويانه بالكليه وهي الي صورتلي هديل 

وهنا سالني ::شنو المقابل وانا راسا جاوبته ... مقابل فلوس 

بعدها وگف ::وگلي ياالله خلي نروح البيت قيس وتالي اشوف شغلي ويه نسرين

بوكتها چنت خايفه ومرتبكه اخاف يسألها وتگله انا رايحه للشقه وهي مصورتلي ميثاق ولمى 

لو تحچي ويه علاقتي بفيصل 

صدگ انرعبت رغم فيصل چان يعرف عني كل شي وقبل وانا الي رفضت لكن مجرد ما اباوع الوجه سراج 

فعلا انرعب

وصلنه البيت قيس وشفت الوجوه المتعبه مو من كثر الشغل ولا من قلة الاكل لا هالمره التعب نفسي 

شفت بوجوهم الخجل والقهر والخذلان 

واجه قيس وشفته ماخذ بخاطره مني وسمعته وهو يعاتبني لان دزيتله التسجيل ولان انا ظنيت بي انو بيوم 

من الايام راح يغير كلامه وينطي اعذار الافراح ويسامحها

الشي الي شفته انو قيس حتى ما يجيب اسمها انا بصراحه خجلت ما جاوبته لكن طلبت منه اشوفها وهو ما جاوبنه 

لا رفض ولا قبل الشي الي سووا طلع گدامنا 

وراح السيارته انا كل ظني انها موجوده بالبيت اقصد بالغرفه الخارجيه الي دائما عمه شمس تگول قيس يصيحها

 بيها ويظل يحچي عليها ويهددها كله الخاطيري انا وحنين لكن من ركب السياره انا باوعت العمه شمس الي گالت 

قيس ما ندري بي ماخذها وين وشنو مسوي بيها ولا يدلينه بمكانها وحتى محيي ما قبل يخلي يشوفها

رحت ركبت بسيارة سراج الي يسوق وهو ساكت ومشينا تقريبا ساعه او اقل وصلنا البستان بي نخل ومربوط بي 

عجول وصار قيس يمشي گدامنا وهو ساكت وانا وسراج نمشي ورا 

وصلنه الغرفه مالت طين وبيها قفل چبير مربوط بسلسله فتحه انا بصراحه گلبي صار يدك بيني وبين نفسي گلت

 هسه بس تشوفني يجوز تهجم عليه وتضربني لان اعرف بافراح شگد قويه

قيس باوعلي وگلي //ادخلي عمو 

انا دخلت لكن الصوره الي شفتها صدگوني ابد ما راح تروح عن بالي يعني الي صار بيه كوم والي شفته كوم ثاني 

الغرفه هي عباره عن زريبه مال حيوانات وشفت افراح گاعده وقيس محدد رجليها بسلسله وبعدين محدد اديها 

ويمها ماعون بي خبز وطاسه بيها ماي لكن الي شفته قيس شنو مسوي بيها 

قيس حالق شعرها وحواجبها ومچويها بوجهها وباديها وبرجليها كاسر اسنانها چان حلگها مورم والدم يابس على وجهها

الي لونه صاير ازرك

انا من شفتها راسا اتذكرت مياده لمن اخذني الها سراج قبل ما تنعدم مياده بس حالقين شعرها لكن افراح 

قيس مشوهها 

انا خفت بقيت واگفه هي بس شافتني صارت تبچي وعيونها تتوسلني انو اسامحها واخلي قيس هم ايسامحها 

انا صرت ارجف وانا اسمع صوتها وكلامها الي ما مفهوم لان مبين من مكسر اسنانها صايره ما تگدر تحچي 

هي گوه تحچي 

وهي تگلي الله يخليج خلي قيس يموتني الله يخليج 

هو شكم يوم خلاني لا اكل ولا ماي وهاي حرگني شوفي عفيه ابوس رجلج خلي رابطني بس خلي يطلعني 

منا لو ماكو خلي يموتني اساسا انا بعد ما اعيش

المنظر چان قبيح لكن مو بقبح تصرفاتها وافعالها انا صرت ارجف ونفسي لعبت وانا اشوف الماي كله وصاخه 

والخبزه فوگها الذبان حسيت حراره صعدت لعيوني وراسي واختنگت طلعت وانا گوه اگدر اشوف بعيوني

 شفت قيس گاعد ينتظرني وهو يدخن ومبين علي مقهور باوعت عيوني مغوشه بس شفت سراج واگف بعيد  

حسيت بريگي عبالك خشبه صرت مو امشي يمكن اركض وصلت يمه وانا اريد احچي صوتي انبلع ما حسيت 

على نفسي اله وانا بالمستشفى والمغذي بايدي واشوف سراج گاعد على كرسي قريب ويدخن 

باوعتله واتذكرت صورة افراح وبنفس الوكت اتذكرت مياده راسا لعبت نفسي 

وكعدت اريد اتقيأ وسراج دنى السله ورفعها وبقى لازمها حتى اتقيا

رجعت اتمددت وبعد ان كمل المغذي طلع سراج ورجع ويا الطبيب الي لزم ايدي وشاف نبضي وفتح عيوني 

بعدها سجلي ابره وگال السراج يجيبها وفهمه بان الممرضه تنطيها الي راح حابها واجت الممرضه وانطتني 

الابره وبعدها بخمس دقايق اجه الطبيب وشافني وفهم سراج حالتي استقرت بس لازم يبعدني عن التوتر 

طلعت گومني سراج وهو يسالني

:: بيچ تمشين لو اجيبلج عربانه 

جاوبته بتعب ... لا امشي 

وگفت وهو لازمني من ايدي وايده الثانيه على ظهري وانا اشوف نفسي بس بالدشداشه الي جوه العبايه الاسلاميه

 صار سراج ايمشيني على كيف الى ان وصلت الباب الطوارئ لگيت سيارته بالباب من داخل ركبت بيها بعد 

ان فتحلي الباب وهو ركب

تمينا ساكتين الى ان وصلت للبيت وفتح النه رضا الباب وسراج دخل السياره بالگراج نزلني واتلگتني سكنه دخلتني 

للغرفه وانا راسا اتمددت لان احس بجسمي كله مكسر نمت وانا كل ساع افز وانا خايفه وانا اشوف صوره مياده

 وبعدها تجي افراح

افز واشوف خاله سكنه تحضني واسمعها تهمهم بايات انا ما اگدر احچي بس كل ما افز احس ريگي عبالك خشبه 

وخاله سكنه تشربني شوية ماي وارجع انام لمن ما الصبح گعدت واندك الباب شفته سراج وهو جايبلي صينية

الريوگ وخلاها بالگاع وگلي 

::ياالله حبيبتي اگعدي تريگي

هاي الكلمه خلتني ارجف حاولت اوگف حتى اروح اغسل هو من شافني وگف وگلي ::اساعدج 

انا بدون ما اباوع هزيت راسي ورحت للحمام الي بالغرفه غسلت وجهي وبقيت اباوع الوجهي واشوف شلون

 جوه عيوني سواد وطگاك على شفايفي مسحت وجهي واجيت گعدت گباله هو باوعلي وشاف الطگاك گال 

الحمد لله طلعت الحراره ياالله اكلي

اخذت صمونه وهمه مسوين بيض تگلا انا اخذت شويه وخليتها بحلگي وانا اتذكر منظر افراح راسا رجفت 

ولعبت نفسي هو گلي ::ناديه جري نفس شهيق وزفير 

مد ايده وانطاني چاي وگلي ::اشربي خلي معدتج تهدأ 

اخذت الكوب وشربت شويه چاي وهو جاب لگمة خبز وگلي فتحي حلگج واكليها 

انا اكلتها گوه بلعتها باوعلي وگلي ::انا عندي شغل لازم اكمله 

باوعتله وانا بالقدره احجي وصوتي بالگوه ينسمع ... سراج اريد اروح البيت هادي

////////////////////////|///|||||||||||||////////|||||||||///////////

سراج

من اخذت ناديه البيت قيس وطلبت تشوف افراح واخذنا قيس هي طلعت وانغمى عليها ما اعرف شنو شافت 

 شلتها خليتها بالسياره لان راسا صخنت اخذتها للمستشفى بالسياره گعدت وما تدري بنفسها اتقيات اتذكرت 

نفس الموقف من چانت زغيره بيوم الي اخذتها تشوف مياده بقيت اسال نفسي :: ياترى شنو شافت وهيج صار بيها

اخذتها للمستشفى نزلت طلبت سديه اجو جابوها ونيمتها بعد ان نزعت عباتها الاسلاميه لان تدمرت اخذوها للطوارئ 

والدكتور كتب الها على. مغذي وابره وبعدها انتبهت واجه الدكتور.شافها وكتب على ابره تاخذها بالعضله 

وطلعنا رجعنا للبيت وبوقتها مريم طالبه من سكنه تنام بغرفة حنين لان بكل الاحوال حنين ما راح تدرس اليوم 

لان تعبانه

وصيت سكنه عليها وانا بقيت بالصاله احس بيها تتفزز وحتى تبچي واسمع سكنه تسمي وتقرا ايات

بعدها هدئت ونامت وانا نمت الصبح گعدت تقريبا الساعه ثمانيه ونص وغسلت واخذت صينية الريوك ودخلت 

چنت اريد افهم منها ليش تخربطت وشنو الي شافته وردت اگللها مو انتي الي ردتي تشوفين افراح بس حتى 

تتشمتين بيها وتتشفيين اشو ما تحملتي او وگعتي 

لكن اشوف تعبها وشلون ترجف ما حاچيتها بس گلت عندي شغل لازم اكمله 

هي بصوتها المبحوح طلبت اخذها البيت هادي

فتحت عيوني ع الاخير سالتها 

::ليش تردين ترحين 

... هيج اريد اروح

نرفزتني من ردها جاوبتها ::انا راح اخذج وارجعج وبعد ترجعين اهنا تگعدين يم اختج على ما تكمل امتحان

 افتهمتي وطلعه ماكو بس تنتبهيين الاختج ومن تخلص امتحان بذاك الوكت عود شنو نريد نسووي

هي گالت ::انا ثقلت عليك بس اوعدك هذا اخر طلب

شفتها رغم انتصارها مكسوره حاولت الطف الجو جاوبتها ::لا ما ثقلتي عليه بس ندووش مو توگعين وتتقياين عليه 

هي باوعتلي وگالت ... ... اسفه عمو 

رديت عليها وانا رافع راسي ::عمو حيييل من يمته ما سامع هاي الكلمه اعتقد اجت عفويه 

هي دنگت ما ردت سالتها ::بيج تغيرين ملابسج لو اصيح الام رضا 

... لا ما كو داعي اگدر اغير

:: زين منتظرج 

طلعت من الغرفه وگعدت بالصاله وانا ادخن اجه رضا وابن اخو گتله 

::اليوم نرجع البغداد 

رضا //اي براحتك يمته 

::انت اتحضر يمته ما اجي الگاك جاهز 

رضا // انا كل شي ما عندي بس تجي نتوكل ونروح

:: ان شالله 

طلعت ناديه شفتها وكفت اجتها ام رضا گالت الها // خاله بعدج تعبانه وين رايحه 

هي گوه طلع صوتها ... ... لا خاله صرت زينه ما اتاخر وهاي حنين فدوه خاله گعديها شلون دراسه هاي

اذا الهسه نايمه 

سكنه //اي هسه اگعدهن 

:: ياالله نمشي

طلعنا انا وياها مشينا بالسياره كسرت السكوت سالتني 

... ... صدك هسه راح تسافر البغداد 

هزيت راسي ::ايي عندي دوام 

... هاا ويمته تجي 

::من تكمل حنين امتحانات 

اتنفست بعمق باوعت الها وسإلتها ::ناديه اكو شي 

... لا ما كو شي

اخذت جگاره ودخنت ::بعد ما يحتاج اوصيج اي شي تحتاجينه اتصلي عليه 

هزت راسها ... ان شالله 

:: وهم ما اريد اسألج شنو عندج ابيت هادي 

بدون ما تباوعلي ... هسه من نوصل تعرف كل شي

وصلنه البيت هادي دگينه الباب فتح عمار الي خزرها انا سلمت وهي دخلت بدون ما تسلم وصلت للصاله دارت 

على عمار ::ابوك وين 

  هو رد بنتر//بغرفته 

 اندارت تريد تروحله للغرفه نزل ياسر وبيده جنطة سفر وهديل واسيل ورا وهنه يبچن ياسر باوع الهن 

وخله اصبعه على حلگه

- - بس ولا نفس ما اريد اسمع اي شي 

شافني ياسر وسلم عليه انا رديت علي وسالته :: شكو ياسر شصاير 

ياسر //ما صاير شي 

:: البنات ليش يبچن 

اسيل جاوبت وهي تبچي // عمو ياسر يريد ايهاجر 

انا باستغراب :: صدك ياسر

هز راسه وجاوبني // اي صدك بعد ما ابقى والمن ابقى 

طلع هادي وهو گوه يمشي وراسه بالكاع وگله 

بابا ياسر تبقى الي انا ابوك وشتريد صار 

ياسر باستهزاء //ههههه من يمتى شريد تگلولي صار انا كل شي ما اريد بس ابتعد عنكم

:: هاي شنو منك ياسر وين مهاجر اخواتك وابوك 

باوعلي وگلي // وليش نسيت تكول امك 

الكل سكت اتقربت علي گتله :: ياسر لا تهرب من الواقع وين تهاجر هيه شنو الهجره لعب

قبل لا يجاوبني هادي گال //زين ابقى ولا تظل ويانه بالبيت انا مستعد اشتريلك بيت باي محافظه 

ياسر // ههههه تشتريلي منين من فلوسك لو من فلوس ناديه واختها لو من شغلك انا اصير اكبر غبي 

اذا صدگتك لو بقيت اهنا 

:: ليش ياسر

ياسر //يا ليش المن ابقى امشي والناس اتاشر عليه هذا الي امه دزت ناس حتى يخطفون بت عمه لان ما تريده

 يتزوجها لو هذا الاخته (ويباوع الهديل ) راح تتطلك وره شهر من زواجها لو هذا الي ابو صار عشرين سنه

 متنعم بفلوس بنات اخو وسووا تجارته منهن ومشغلهن خدامات تالي مرته طلعت رئيسة عصابه مستحيل

 ابقى لان اذا ابقى ارتكب جريمه

هادي بانكسار // بابا انا محتاجك احنه كلنه محتاجيك 

هز راسه وگال // لا متوهم انت بس محتاج افراح تعرفها (وياشر بايده ) افراح الي حطمتني وحطمت ناديه 

وحطمت هديل وحتى حطمتك 

هادي بعصبيه وهو يرجف // انچب هاي امك اذا انت تحچي هالشكل الغريب واليكره شنو يگول

اتقربت ناديه من هادي وگلتله ابرود ... ... شنو هادي تستحي من العار وصرت عصبي ليش ما استحيت 

وانقهرت علينه ومرتك وبناتك يعيرن بينه العمر كله 

باوعلها وگال // انتي مو اخذتي كل شي شكو جايه تتشمتين 

هزت راسها وكالت ... ... لا انتو الوضع الي بي مو مال شماته مال تعاطف انا جايه اسلم على ياسر 

واكله انا ما زعلانه منك دير بالك على نفسك 

ياسر باوعلها وعيونه كلها دموع دنك ونزلت دموعه وگلها

— تدرين ناديه انا جبان واكبر جبان لان ما حميتج ولادافعت عنج بحجة بر الوالدين لكن الوالدين نفسهم 

همه ما يخافون الله ويامرونه بالباطل وياكلون حق اليتيم ويعتدون ع الضعيف ويشمخرون بناتهم ويطغون 

وانا چنت غبي وخايف من افراح افراح الي ظلمتج انتي واختج واحنه ساكتين لكن الله سبحانه اخذ حقج

(دار على ابو ) تگدر تگلي هادي هسه افراح وين انا اگلك قيس ساجنها بزريبه حيوانات ومانع تشوف الشمس 

صارن هديل واسيل يبچن واتقرب هادي ولزمه من اديه وهزه وهو يگله //ولك متشمت بامك 

ياسر //امي منووامي الي خلصتها اوامر وعياط منو امي الي تحاسب ع الفلس اذا صرفنا منو امي الي ما خلتنه 

رجوله گدام الناس لو الي جابت النه العار الي شمخرت بناتها وهاي تاليها بتها اتطلگت وره شهر من زواجها 

وما نعرف السبب انت اخر واحد تحچي وتدافع الها تدري ليش لان ما خلتك اب ما حسينا بوجودك وهسه ما 

شاء الله سمعنا صوتك وانت تدافع الها

هادي //شنو تريدني اكتلها حتى ترتاح 

ياسر // ياريت اقلها نحس بيك صدك رجال 

::عيب ياسر شنو هالكلام 

هادي //لا سراج خلي خلي يحچي بلكي ناديه ترضى علي

ناديه ما خلتني اجاوب اتقربت من هادي وگالت 

... ... شوف هادي انا الانسان الوحيد الي راضيه عنه واحترمه واقدره رغم الي سوا بيه هو ياسر 

وگلتها واگولها تنازلي عن افراح مو الخاطرك ولا الخاطر اي احد تنازلي عن افراح الخاطر ياسر وقيس 

هديل // ليش انتي اتنازلتي ابلاش اخذتي محلنه والبضاعه البي 

ناديه باوعت الهديل بنص عين ... ... منو هاي التحچي هديل حبيبتي اسكتي احسن الچ

عمار بعصبيه //ليش تسكت شلازمه عليها كولي مو انتي بسلامة سراج صرتي ضابطة تحقيق وهواي تعرفين امور 

ناديه جاوبته ... ... انا ما اعرف شي اسال ابوك واسالها 

انا باوعت الناديه ::ياالله ناديه نروح 

هي ردت ... ... اي سراج نروح( واتقربت من ياسر ) وانت ياسر دير بالك على نفسك انسى كل شي وابدي حياة جديده 

هز راسه وگلها //اتمنى تسامحيني

هي ابتسمت بعدها راحت اتقربت يم هديل وگلتلها ... ... وانتي هدوله نصيحه نصيحه اخذيها من وحده تكرهج 

لا تصيرين مثل افراح لان تندمين ( حاولت تحچي بصوت مسموع )انا راح اطلع من حياتكم ولا كانما اعرفكم لان 

بصراحه معرفتكم طاعون ما يجيب بس الامراض 

عمار باستهزاء //والله حقج صار عندج السان وتحچيين

اشرت على نفسها ... ... انا الي عندي السان واعرف احچي مو اليوم من عمري تلث سنوات ما ختلت بصف امي 

وعشت مثل الحشره لا وكلكم تعرفون انا الي طلعت حق ابوي وانت زلمه مشورب واگف ومتباهي بعملة بامك 

عمار اتقرب منها //امي اشرف منج 

جاوبته باستهزاء ... ... اكيد اشرف مني بعد الي تتقاول ويه عصابه خطيره اكيد اشرف مع الاسف عبالي اشوف 

ناس غير ناس متغيرين مصدومين متندمين لكن اكو ناس بيها وما تطغى (باوعتلي )ياالله سراج امشينه

مشت خطوتين دارت عليهم ... ... ها واعتبارا من هاللحظه تنسون وتحذفون من ذاكرتكم ناديه وحنين 

عمار // اي طبعا ما يشرفنا

هي ضحكت ... ... هههههه هاي الكلمه تسال بيها ابوك واختك ياشاطر ياالله سراج 

عمار //اختي اشر... قاطعته 

... ... لاتستعجل على كيفك

اتقربت من هادي وگلتله ... ... راجع نفسك واستغفر ربك ولملم البقى من عايلتك واتذكر لو تنطي كل املاكك 

الناس ما راح تنسى الي سوته مرتك وهاي انا ابسط مثال بت اخوك بالجنسيه مكتوبه وشگد عندي فلوس واملاك

 وما نسيتو انا بت مياده شوف انت ومرتك شنو حصلت اخر شي ابنك سندك راح يعوفك ويروح وهو ما متندم 

عليك اصلا يريد الفكه منكم والله ياهادي تكسر خاطري رجعتلي محل يسوى مليار وبيت يسوى مليار وبعد حق 

ابوي من بستان قيس مو عبالك ناسيته

عمار //ما شاء الله طلعتي حاسبه كل شي 

باوعتله ... ... بعض ما عندكم يمكن ماخذه جينات الطمع منكم 

عمار // ما شاء الله وسراج وراج وين ما ترحين گايدته وراج 

باوعتله وما حچيت رد علي هادي وگله //انچب لو ما سراج چان اخوك ينسجن اقل شي خمس سنين وامك اذا 

مو اعدام مؤبد 

هادي اتقرب عليه وگلي //احسبها عليه سراج عمار طول عمره زعطوط

هزيت راسي وابتسمت ::ادري بي ابو ياسر لذلك ما رديت علي (باوعت الناديه وگتلها ) ياالله 

الكل صار يباوع الناديه بحقد ما عدا ياسر يباوع الها وهومقهور يمكن على نفسه او عليها هي مشت وصلت يم الباب

دارت باوعت الياسر وهي تگله ... ... دير بالك على نفسك 

انا وصلت يم ياسر وحظنته وگتله :: انت ضريت ناديه هواي وضريت نفسك لكن الي شفعلك چانت نيتك سليمه

 الله وياك ومن توصل طمنه عليك

هديل اتقربت من ناديه وهي تكلها بترجي //يعني انحرمنا من شوفة امنا وهسه يسوري يريد ايهاجر ناديه الله يخليج

قنعي يبقى والله ما نتحمل انفارگه ابوي ورا يموت 

شفنه هادي يبچي واسيل گاعده بالزاويه تبچي الموقف محزن خصوصا وياسر چان احسن واحد ابيت هادي وما يشبه

 احد بيهم

ياسر گال //محد يثنيني عن قراري لا يمكن ابقى واذا بقيت فافضل الموت اذا تجبروني باسم الرحمه والانسانيه 

صدگوني انتحر وما يهمني شي

هادي فز وگال // لا بابا ياسر سافر وروح محد ايلزمك المهم تبقى عايش 

ياسر //اي عايش يا عيشه هاي ولكم انا متت من يوم الي انخطفت بي ناديه يوميه ادعي على نفسي بالموت 

هديل تبچي وتگله // اسم الله عليك يسوري مو كافي امنا والي صار بيها 

ياسر //ايي امنا امنا افراح ام ياسر (عض على اصبعه وگال ) الحچي ضايع

اتقرب من ناديه وگلها // انتي جوهره واحسن من بيت هادي كلهم شوفي هذا اليبچي هسه عليه 

(اتقرب منه ) بابا طوول عمرك راح تتندم لان ضيعتني وما خليتني اخذ بت عمي لان حضرت امنا ما تقبل 

وهددتني گدامك تحرگها وما اتزوجها الي وانت شنو ردك عليها ولا شي بالعكس ساندتها وانت تگلي 

ياسر اسمع كلام امك تره رضا الله من رضا الوالدين

- - - زين انت ليش ما رضيت منيره وهي دووم توصيك بناديه وحنين ليش عبالك اخرس واطرش 

وانت تشوف ظلم مرتك وبناتك وانت تسمع استهزاء عمار وسكوتي ليش ما حچيت ما گلت امي وصتني 

على بنات عباس اذا امهن خطئت فهنه ما الهن ذنب ليش ما گلت عليهن خطيه 

(باوع ياسر الناديه واشر عليها) تدري بيها هاي اصيله وفعلا بت حلال لان ما هان عليها تسجن مرتك 

رغم هي ما تحبني ورغم انا ساعدت بخطفها لكن ما هان عليها توسل خالي قيس وشمرت عگاله راحت اتنازلت 

باالله بشرفكم هاي لو ناديه هيج مسويه انتو شنو ردة فعلكم مع الاسف بابا ضيعتني وضيعتني للابد

هادي اتقرب من ناديه وگلها //وانا هسه اتوسلج قنعي ياسر يبقى واقبلي يتزوجج والله اخليلج هذا البيت وما اخلي 

اي احد يمر بيج حتى اسجله بااسمج 

ياسر //فات الاوان بعد ما يفيد لا توسل ولا بچي

هديل //تدري ياسر من امي تعرف راح تتخبل وراك 

هو سكت ما جاوب

طلعنا وانا اشوف ناديه عيونها تدمع ما عرفت عليمن گتلها 

::ست بعد رايده ترحين المكان 

هي حست انو انا ضايج واستهزأ هزت راسها وگالت ... ... رجعني للبيت 

::صار عمتي وتدللين 

هي ما ردت ولا حتى ابتسمت باوعتلي وگالت 

... ... سراج اريد اشوف اخوي

باوعتلها باستغراب وانا اضرب ع استيرن السياره سكتت ما جاوبتها هي استردفت سراج ... ... سمعتني مو 

وگفت السياره على صفحه وجاوبتها بنتر ::اي مو بس خلي اگلج انتي مو شايفه جاي تتآمرين وتفوتين زايد 

وجاي تخلطين بالاوراق وجاي تحتارين شنو تطلبين وشنو تحچين

  ردت ... ... هاي شبيك يعني شي مر بخاطري واتمنيت اعرف عنه فد شي شكو شلي حصل 

::لا ست العفو ما حصل شي بس ممكن اتفهميني وين الگه اخوج وحتى لو فرضا لگيته شنو اگله 

(نفخت وحاچيتها ) ناديه الخاطر ربچ اطلبي طلب معقول

صارت تبچي بسكته لكن غلبتها شهگتها حاچيتها ::كافي بابا لاتبچيين

هي زادت بالبچي اخذت كلنس واتقربت ورفعت حنچها وصرت امسح بدموعها وهنه ينزلن باوعت الها لا اراديا 

حسيت بنفسها وحتى بگلبها يدك وانا اگلها ::كافي ياروحي لا تبچيين 

صدگوني ما دريت بنفسي من حچيت هاي الكلمه هي يمكن ما انتبهت گالت 

... ... تدري من شفت دموع هديل واسيل وكسرتهن على ياسر اتمنيت اجرب شنو يعني البنيه عدها اخ

جاوبتها ::امسحي دموعج راح نوصل للبيت 

سقت السياره بالطريق اخذت الها بطل ماي گتلها ::اشربي وغسلي وجهج لا تصخنين وانا وراي سفر وبعدين 

تشوفج حنين هالشكل اكيد راح تخاف 

هي اخذت بطل الماي وشربت منه وغسلت وجهه سالتها ::انتي ليش اخذتيني البيت هادي 

هي طلعت نقالها وراوتني رساله من ياسر كاتب الها //ناديه انا قررت اهاجر واتمنى اسمع منج كلمة مسامحتك 

ولو انتي من حقج تكتليني ترميني بطلقه وكل هذا اعرف ما يشفي غليلج لكن انا الي جاي اكتبلج انسان منتهي 

يتمنه الموت بكل لحظه انسان ثقل بالهموم والخجل

من قريت رسالة ياسر ما عقبت وصلنه للبيت ودخلنه رضا من شافني گلي ::ها سراج نروح لو نتغدا 

سكنه جاوبت // وين رايحين اتغدو وتالي اتوكلو

جاوبتهم:: والله اكل ام رضا ما يتعوض 

— — تسلم خويه هسه دقايق واصبن

رحت غسلت اديه او وجهي ورجعت گعدت بالصاله واجه رضا جابلنه الغدا وگعد ياكل ويانه وبس كملنه جابت 

النه الچاي انا گتلها :: والله ام رضا انتي ذهب لا يعتگ ولا يصدأ

—— رحم الله والديك خويه 

::لا والله ما اجامل انتي احس بيچ من نسوان گبل 

رضا //والله صدك هسه انت هم شايف وحده تطبخ وتصب چاي وعباتها على راسها

سكنه صبت الچاي وما عقبت على كلام رضا باوعتلها وگلت ::من رخصتج صيحيلي للبنات 

راحت صاحت الهن واجن ناديه وحنين وراهن مريم باوعت الهن او وجهت كلامي الرضا ابن سكنه 

::اسمعني عمو رضا انا وعمك راح نسافر البغداد ويجوز نطول لان انا من زمان عن الدائره البنات بامانتك انت 

وامك المسؤول عنهن بغيابي واي شي يطلبنه ويحتاجنه اتوفره الهن اريدك باچر تروح انت ومريم ويه حنين تشوف

بيامدرسه تمتحن 

ً

رضا //صار عمي 

:: الله يخليك ما قصرت 

باوعت الحنين ::وانتي حنونه ما اوصيج ادرسي وخلي بالج ويه الدراسه ولازم تنجحين 

حنين //ان شالله عمو 

::ها واي شي تحتاجينه تطلبينه من خالتج ام رضا

هزت راسها حنين وصلت يم ناديه غمضت عيوني وجريت نفس وگتلها ::اي احد يتصل ممنوع اتجاوبين لا كرم 

ولا بيت هادي ولا قيس وياريت اتغلقين جهازج 

هي باوعتلي تستفسر انا هزيت راسي وحاچيتها ::اكو اشياء الواحد ياخذ بيها قرار من ذاته بدون محد اياثر علي 

هي ردت ... ... ولو ما فاهمه قصدك بس هذا هو راح اغلق الجهاز ومن احتاج شي اخلي رضا يتصل بيك

اتقربت يمها وگلت ::وماكو طلعه الاي مكان الى ان اجي 

هزت راسها بالموافقه رضا گلها //عمو ناديه اسمعي كلام هذا المسودن وانتي عمي حنونه ازعل عليج الا ما تنجحين 

حنين بابتسامه //كل شي ولا زعلك عمي رضا 

:: ممنون منج حنين انا ازعل عادي بس المهم رضا ما يزعل 

حنين //لا عمو بس عمي رضا م(خلت كف ايدها على حلگها وعيونها رفعتهن ليفوك )ما اعرف شلون اوصلها للفكره 

خلي اگول بي طيبة اهلنه 

ناديه باوعتلها ... ... ليش همه اهلنه منيلهم الطيبه

محد جاوبها لان ندري بيها مجروحه ومقهوره على نفسها وعلى دراستها انا شلت مبلغ وانطيته الرضا ومبلغ ثاني 

انطيته السكنه وگتلها :: هذا مصرف للبيت والبنات 

وطلعنه انا ورضا وسافرنا البغداد بالطريق رضا صار يحجي شعر عن الحب والعشك گتله 

ها ياصاحبي شلونك 

رضا جاوبني //ياصاح گلبي تره تايه تره وهايم 

وما يدري يمته الفرج ياصاحبي ياصاحبي وهايم 

تدري بخويك مثل الحرامي صفى 

لاله اكل لانوم مسودن بالهوى صفى 

وانت صرت مثلي عاشك تره وهايم

ضحكت ::الله عليك يارضا هالايام ايدك بالدهن 

باوعلي //لا وداعتك 

::ابو علي احس برضا ومريم يعرفون انت متزوج امهم 

رضا //صدك لو گالوا عليك ثعلب ما تفوتك فايته شلون عرفت 

::والله حدس صدك مو

هز راسه //ايي صدك من چان اخوها يجي ويضغط عليها ويضربها الجهال يجون يحچولي انا گتلهم تردون خالكم 

ما يجبر امكم گالو اي ما نريد امنا تاخذ رجال غريب لان سامعين بخالهم ايگلها بس تاخذين اوديهم الاهلهم وتصير 

عدج جهال وتنسين كل المرار المريتي بي وهمه متعلقين بامهم عاد انا قنعتهم وفهمتهم راح اعقد على امكم 

وحتى لو يموتها ما تاخذ اي واحد لان هي متزوجه

:: عفيه عليك يعني يعرفون بيك متزوج امهم 

رضا هز راسه //عاقد عليها عقد صوري 

::واخوها قنع 

رضا //ظل يجي ويحچي وتالي بس صار رضا بالمتوسطه سكت من بحده 

باوعتله وانا ابتسم ::سكت لو انت سكته 

رضا //هسه عوفنا وگلي شراح تسوي

:: ههههه كل مره انت تبدل بشنو 

رضا //لا تغشم روحك 

::لا صدك بشنو رضا 

رضا //باخر بيت بالدارمي 

عضيت شفتي وگلت :: خليها هسه اريد اداوم وانت هم شوف المحل من زمان عنه بس گلي من كبرو

ما طالبوك تطلك امهم

رضا //لا ابد لان يعرفون زواجنه ع الورق 

::بشرفك رضا 

باوعلي //ها سراج شقصدك 

::ما قصدي شي تره سكنه حلالك لا عيب ولا حرام 

   نفخ // تصفه سراج انت گلي البارحه ناديه شبيها 

::والله ما ادري دخلت وشافت افراح وطلعت مخترعه 

رضا //بشرفك يعني شمسوي بيها قيس

::والله ما سالتها الناديه هسه خلي ......

رضا // شكو سراج ليش سكتت 

::لا ولا شي 

رضا //لا اكو شي بس انت ما تريد تگوله الي 

::رضا ناديه تريد تعرف شي على اخوها 

رضا صفك ايد بالثانيه //صدك چذب شبيها هاي هذا يا اخو استغفر الله

اخذت نفس من الجگاره :: مسكينه انقهرت من شافت بنات هادي يبچن على اخوهن 

رضا بعصبيه //اي اخوهن اخوهن الشرعي سراج اترك السالفه وهي ناديه ليش تريد تعرف شي على اخوها 

شنو قصدها تريد تعيش ويا تريد تفتح دفاتر قديمه لو تجيبه يعيش وياهن 

::والله ما ادري شگلك رضا 

رضا //لا تگلي واگلب صفحه ويكون بمعلومك بس تخلص حنين تجي عليه وتجيبلك جاهه وتخطب ناديه مني 

لان انت راح تصير ابوها واخوها وزوجها وكل شي

اتحسرت وضربت الاستيرن بايدي ما جاوبته بقينا ساكتين وحتى من نزلت الدار الاستراحه هو ما قبل ينزل انا

 جبتله كوب چاي وركبت وصرت اسوق ورضا يمي بقى ساكت انا كل ظني يريد ينام الى ان وصلنه البغداد

هو گلي //ذبني يم البيت 

وصلنه البيته نزل وقبل ما احرك السياره استدار عليه وگلي 

شوف سراج الك منا الى ان تخلص حنين امتحان ثق باالله اذا ما تعقد على ناديه وتاخذها 

صدگني وروح ابوك انا اعقد عليها واتزوجها 

////

سراج 

من سمعت كلام رضا نزلت النظاره من عيوني وباوعتله باستغراب هو هزلي راسه وگلي 

ايي مثل ما سمعت اذا خلال شهر ما عقدت على ناديه وجبتها البيتك وروح ابوك اعقد عليها واخذها 

::شبيك رضا شنو هالحچي 

رضا //هو هذا الحچي البنيه وثقت بينه وطلعت ظهرها ورانه والتاليه شني سراج 

نفخت وگلت ::الله كريم

رضا//والنعم باالله سراج البنيه تايهه ما تعرف شتسوي جاي اتطلعلك كل ساع شغله حس بيها تره الصار هي 

ما الها يد بي انت جاي اتعاقبها بشي هي ما مسويته وما راضيه علي وصار غصبن عنها 

ما اتحملت حچيت ويا بنتر ::ولك رضا تعرف شنو هي حلم حياتي وراح مني تعرف ورده داريتها تالي واحد نذل 

مايسوه نعال يقطفها ويشمها ولك رضا ناديه مو بس اتحطمت ناديه حطمتني وياها

رضا بعتب //صرت ولك خلف الله عليك نزلني خلي اروح 

ما جاوبته نزلته ورحت للبيت وانا ما اعرف ليش ضجت من كلام رضا 

گعدت بالصاله واخذت جگاره شعلتها وانا صافن كملت الجگاره ودخلت اخذت حمام وبعدها طلعت اتمددت على 

فراشي فتحت النقال ورحت ع الواتساب شفتها متصل الان هي راسلتني وكانما منتظرتني

... وصلت 

::ايي هسه توني 

... الحمد لله على سلامتك 

::الله يسلمج

بقينه ساكتين بعدها سالتها 

::خو ما صخنتي 

...لا الحمد 

::زين الحمد لله ديري بالج على نفسج ومثل ما گتلج ممنوع تتصلين باحد مفهوم

هي ما جاوبتني رديت عليها:: ناديه مفهوم 

...ان شالله 

:: واذا تغلقين الجهاز بعد احسن 

... ... واذا احتاجك شلون اراسلك 

::عود من تحتاجيني افتحي الجهاز وراسليني 

... تمام 

:: وديري بالج على اختج 

...اي صار 

::حاولي هسه تنامين ولا تفكرين 

... شتتصور اگدر انام 

::ايي منا وهيچ اتعودي تنامين

بقت متصله وما جاوبتني وانا اباوع للمحادثه غفيت الصبح گعدت رحت للدائره ورجعت رحت البيت 

اهلي حتى اشوف امي شفتها وطلعت رجعت للبيت ما اتصلت برضا ولا هو اتصل بيه وصار هذا روتيني 

يوميه العصر اتصل بسكنه وابنها واطمن على وضع ناديه ودراسة حنين

وبدت الامتحانات وخابرت حنين بالليل على نقال رضا وفهمتها لازم ما تخاف ولازم ما تقرا الاسئله

 كلها لا تقرا سؤال سؤال وتجاوب ع السؤال الي تعرفه والي ما تعرفه اتركه بالاخير تفكر بي ومن ترجعين 

لاتفكرين انا جاوبت او لا ابدي اقري الامتحان الي بعده

هي گلتلي //انو ناديه مفهمتها نفس كلامي 

واتذكرت توصياتي الناديه من امتحنت الثالث 

وعرفت رضا هم مخابرها وسألت حنين گتلها ::رضا من خابرج هم حچى ويه ناديه 

هي ردت //لا عمو بس گال سلميلي عليها 

سديته من حنين وانا اعاتب بنفسي ::شبيك سراج ليش متغير على رضا

ما چان عندي جواب وره اسبوع خابرني رضا// الله يساعدك سراج 

::هلا ابو علي 

رضا //انا خوج يااعليه شبيك ليش زعلان عليه 

::لا ما زعلان 

رضا //چا خوش انا الزعلان تانيني جايك انت وين 

::بالدائره 

يمته ترد للبيت 

:: فد ساعه

خوش ساعه وخمس دقايق وانا يمك لو تطردني 

جريت نفس ::بيتك رضا 

—تسلم ابو نور

حاولت الطف الجو ::ههههه ليش مو قمر 

رضا // ياالله هم زين من ضحكت چنت خايف منك فيمان الله

رجعت للبيت واجاني رضا عبالك موقت جيتي اجه جايب ويا غدا سالته ::منين هذا الغدا 

رضا // منين يعني لو من المطعم لو من اختك الله يطيها 

اشرت ع الغدا ::وهذا منين 

من ام حسين اختك 

::زين صبه على ما ابدل 

رضا //حاضر عمي 

التفتت ::هاا رضا منيت

رضا // اي منيت شني ما تاخذلك مره وهي تطبخلك وانا اجي يوميه اتغدا عدكم 

::هاا انت ما خايف عليه تريدني اخذ مره حتى تجي تتغدا 

هز راسه //اي ليش الچذب 

رحت غيرت ملابسي وغسلت ورضا خله الاكل ع الطاوله وگعدنا ناكل وبعدها سووا جاي وصب الكل واحد كوب 

سالني // صدك سراج منو ينظف بيتك ويغسل المواعين 

::هههه وانت منو ينظف بيتك ويغسل المواعين

رضا //انا جيرانه مره فقيره ورجلها مريض تجي هي وابنها يوميه تنظف البيت وتغسل الملابس وتكويهن 

عكفت حواجبي :...ابنها شيسوي يجي وياها ؟

احسن هي وابنها سراج 

::اي فهمت قصدك انا هم تجي مره يوميه من اطلع الصبح تجي وبس تكمل تروح 

رضا باوعلي // لاتگلي اغسل المواعين 

::لا عوفهن لا تغسلهن

قدملي جكاره وهو هم اخذله وحده وصرنا ندخن سالني //شبيك سراج 

باوعتله ::شبيه رضا ما بيه شي 

ها سراج مو چنك ضايج مني 

:: لا ليش انتي شمسويلي واضوج منك 

هزراسه // لا سراج ضايج وزعلان 

:: هاا وليش ياحضرة المحلل 

رضا // عمي انا رجال فقير مخلي التحليل والتحقيق الك بس صدك سراج ليش ضايج مني

هزيت راسي ::لا رضا متوهم 

وداعتك اعرفك اكثر من روحي انا اگلك ليش ضايج چيفن گتلك اذا ما تاخذ ناديه انا اخذها 

باوعتله ::رضا ممكن تغير الموضوع 

ما طولك هيج وضايج ومقهور وزعلان چا ما اتحرك شنو الكاظك 

::انت شبيك رضا ما تگلي

رضا //اسمعني هاي ضوجتك وشيلة خشمك وما تخابر ولا تنشد واخر مره گضيتها ولك او ولك وانا ساكت 

لان اعرفك انت تريد ناديه وحسيت من كلامي انا اتجاوزت على شي يخصك 

ردت احچي هو اشر بايده //خلي اكمل اسمعني ياصاحبي العشك والحب مو بس كلام ولا بس افعال لا الي يحب

 يتقبل الي يحبها بكل مساوئها وناديه ما بيها مساوئ الي صار مو بيدها وغصبن عليها اعتبر كل شي ما صار واعتبرها

رايحه للكليه وداعمتها سياره وماذيتها 

  لزم چتفي // سراج ناديه طلعت ظهرها وراك ومن تتخلى عنها راح بايدك تكسر ظهرها

جاوبته وانا ادخن :: ها واذا انا ما اعقد عليها انت تعقد عليها 

رضا هز راسه وگال // ايي اعقد عليها واعنزها واخليها تاج على راسي وراسك والي ايجيب طاريها ادفنه وهو عدل 

بقيت ساكت هو اتقرب عليه وگلي // ادري بيك يا صاحبي لو بيدك تطگني طلقه لان تحبها بس الصار غصبن عليها 

واليحب ياصاحبي ينسى ويغلس عن هواي شغلات سراج ناديه بحاجتك ياخوي

باوعتله رغم عيوني بيها دموع لكن ابتسمت على كلمته ياخوي تالي طلع من جيبه فلوس وگلي 

هاك هذا وارد الشهر 

باوعتلهن ما حچيت گلي //ها سراج يمته نروح 

::وين رضا ؟

وين يعني نروح الاحبابنا الي متانينه 

:: رضا يجوز هذا الكلام ما اله صحه 

رضا فر ايده //شلون يعني ؟

اتحسرت :: يعني يجوز ناديه ترفض وما تقبلني وتعيش حياتها عادي 

رضا عكف حواجبه // وليش ما تقبلك باالله 

::ناسي انا اكبر منها وهي تسميني عمو

رضا //خاب تسكت لدالي عدك شي من معزتك تسميك عمو بعدين شنو هاي اكبر منها وداعتك تبين ازغر منها بهواي 

من كثر الضيم المرت بي

سراج انا من حچيت وياك جابتني غيرتي ورجولتي وانت سمعت باذنك شنو گال ذاك الچلب اثير گبل لايموت 

ويزيدك فخر انت كتلته واخذت ثار ناديه منه وفضحت افراح

هزيت راسي :: الله كريم 

والنعم باالله ماكو اكرم منه انا راح اروح 

:: وين رايح ابقى هنا شويه ونطلع

الفصل السادس والستون من هنا