رواية ناديه الفصل السادس والستون 66 بقلم انين الليل

رضا يعوج حلكه // عود اگول اخليك الوحدك خاف تريد تراسل الحوب 

باوعتله :: هاا رضا مو چنك تستهزأ 

لا وروح ابوك وابوي (اتنفس قوي وگلي )هم تدري سراج انا احب ابوك منير شگد اذا اگلك ازود من ابوي ما اتصدك

سالته باستغراب ::هاا وليش ؟

رضا //طيبته ورجولته ورزانته وشلون يسمع ويفصل الموضوع بعقله وتالي ينطي رايه ودومه ما شاء الله رأيه 

سديد وبمكانه 

::الله يرحمه ويغفر له

- - هسه گلي يمته نروح 

اتنفست بحسره :: مو هسه رضا بعد 

- - بكيفك يمته ما تريد انا جاهز 

:: ادري بيك تريد حجه حتى تروح 

هز راسه // اي ليش الچذب هالايام انا صاير مسودن

چنت يوميه اخابر رضا واستفسر عنه واحچي ويه حنين واشجعها ويومي اخلصه بالدوام واروح اشوف امي واكثر 

شي اروح يم رضا للمحل ومرات التقي بولد عمي جميل 

مرات ابقى بالدائره يومين او اكثر ومرات ارجع العصر او بالليل على حسب 

وره عشر تيام رحت البيت ابو طلال وهناك شفت زهراء وسالتها ::شنو الي صار ويه مرتضى وهديل

هي ردت //سراج چنه گاعدين وكلنه مذهولين من سواية افراح لكن فجأه مرتضى صاح الهديل ودخل 

الغرفة الاستقبال وره خمس دقايق ما نسمع بس العيطه هديل تصرخ وهو يضرب بيها ركضت انا واسيل 

ودخلنه لگينا يضرب بيها ويرفس برجلي وهي واگعه بالگاع وتصرخ گوه فكينا هو خله وطلع 

وانا وامي هم طلعنه ورا 

وصل للبيت سد علي غرفته وبالليل اجه كرم وراح شافه والصبح فيحاء تگول مرتضى قرر يطلك هديل 

بس صدگني سراج رغم كلنه ما قابلين علي ياخذها لكن هم مانقبل ايطلگها بدون سبب

جاوبتها ::ما اعرف يجوز لان افراح سوت هذا الشي 

زهراء //شنو سراج ما سمعته شلون ايدافع عنها وشگد غلط على ناديه وحنين لا اكيد صاير شي وشي چبير 

::يجوز ما اعرف 

زهراء باوعتلي //اگلك سراج اشو انا اتصل بناديه وما تجاوبني هم تعرف ليش 

:: اي ام سفر اعرف لان انا گتلها ما ترد على احد بهاي الفتره 

زين الحمد لله اطمنت عليها عبالي صاير وياها شي

هزيت راسي ووگلت ::الحقيقه صاير وياها طلبت مني اوديها البيت قيس حتى اتشوف افراح وبعدها اخذنا قيس وهي

مجرد ما شافتها وگعت وانغمى عليها 

زهراء //اي شمس گلتلي لان قيس مسولف الها 

::بعدها ثاني يوم راحت البيت هادي حتى تودع ياسر 

زهراء باستغراب //تودع ياسر ليش شنو ياسر سافر 

::لا هاجر ما يگدر يبقى اهنا بكل هاي الظروف

هزت راسها وگالت //حقه الله يعينه 

وگفت وگلت ::ياالله انا اترخص 

زهراء// سراج من تروح وتشوف ناديه سلملي عليها وانت هم يا ابن خالي دير بالك  

هزيت راسي ابو طلال گال //وين رايح سراج ابقى اتعشى 

:: اشكرك غير مره 

زهراء //بس انريد مره التجي تجينه مو ابحدك انت ومرتك 

ابو طلال //صدوك سراج شنو انت ما تحس بالوحده اتزوج ابويه انت وحصلك ولد ابنيه مثل سنفوره الحلوه

ضحكت وباوعت السفر ::انا بكيف سفر تريدني اتزوج لو لا 

سفر // اي عمو حتى الكوص

هزيت. اسي ::ان شالله اتزوج وتشبعين ركص ابو طلال انا جاي اريد اتشكرك لان انت ما قصرت بقضية ناديه 

  وهواي ساعدتني 

ابو طلال /. هاي شنو منك سراج انا اي احد تعزه زهوره اني اعزه وانت ابن اخ وعزيز عليه واني ما سويت 

اله الواجب

::تسلم الله يخليك ما قصرت ونرجعها بالافراح من رخصتكم 

الله وياك شرفتنا 

زهراء //انا بس تخلص حنين امتحانات اجي اريد اشوف البنات وهم لازم ندورلك على مره 

ابو طلال //زهراء خلتك براسها ما بيها مجال

ابتسمت وهزيت راسي ورحت للبيت خابرت رضا ما تجي گلي// شنو نسيت مو علي ونور عزمونه عشا ومنتظريك 

:: اهوو نسيت 

دياالله تعال 

:: لا ما بيه حيل اريد انام انطيني علي 

واعتذرت من علي ونور هالايام ما الي خلك على اعصابي اداوم بالدائره ومو مثل قبل دائما ويه رضا ما احب 

ابقى بمكان واحد فتره طويله ليلتين بالاستراحه بتت يم امي بغرفتها وثاني يوم طلعت من الصبح 

ومن ابقى ابحدي اراقب واتساب ناديه اشوف اخر ظهور والگاها ما متصله من اخر مراسله بيناتنا وحتى جهازها 

الثاني هم دووم اراقبه الگا بالاساس مغلق

ارجع واخابر رضا حتى اطمن عليهن وهو يگلي كله تمام اطمن 

وخابرني رضا گلي الحمد لله حنين كملت امتحاناتها ومتفائله خير 

انا من يمي ارتاحييت وبهاي الاثناء اتصل عليه رضا وگلي انا بالباب رحت فتحتله الباب وشفته جايب جنطه مال 

ملابس استغربت وعكفت حواجبي هو گلي // شنو سراج ما تدري بحنين كملت امتحان 

:اي اعرف 

رضا //چا شمتانيين ما نروح 

اتقربت علي وگتله :: والله استاذ رضا انا ما اشتغل اعمال حره انا رجال مرتبط بوظيفه

رضا // شني سراج مو صار شهر ما اخذت اجازه 

::ايي وهسه رضا شرايد 

قدم على اجازه ياخي واذا ماكو سويلك مرضيه 

:: هاا ممكن تفهمني ليش كل هذا

شني ليش غير حتى نروح للبصره 

هزيت راسي ::ما اريد اروح

رضا // بكيفك بعد اخوك بس وروح ابوك وابوي عد كلمتي 

::يا كلمه هاي رضا

رضا //انت تدري يا كلمه وهم تعرف صويحبك من يگول كلمه بس الموت يمنعه ما يسويها 

باوعتله وانا احك راسي وطلعت جگاره وشعلتها وصرت ادخن اتقرب يمي رضا وگلي 

شبيك ياخوي شصاير

نفخت وما جاوبته رضا گلي //اذا ما تريدها خليها تمشي بحال سبيلها وبكل الاحوال تمشي وياي 

باوعتله هو هز راسه وگال //مو انت ولي امرهن والمسؤول عنهن بكيفك اروح گبلك وانت تلحگني لو نروح سووا 

جاوبته ::نبات والصبح اقدم على اجازه ونروح اذا انطوني 

ههههه وانت من يمته ما ينطوك

::اي احسدني احسدني تره العلمك انا ما ماخذ اجازه كله يوم يومين 

ادري وانا ما احسدك شبيك وياي احس بيك تضوج مني 

::هاا متاكد 

رضا //اي والله متاكد اسمعني بعد اخوك تتذكر من جبنا ناديه للمجروانت ظليت تصيح عليها وتهدد بيها انا بوكتها 

شحاچيتها 

انا اگلك گتلها عمي ناديه رگبتي گدامج وعلى هذا الاساس البنيه بقت عدله وما موتت روحها هسه من انكشفت 

الحقيقه وعرفنا كل شي صرت ما ادري شبيك

:: ها يعني افهم من كلامك صدك تعقد عليها 

رضا //اي وروح ابوك اعقد عليها وانومسها واسويها ملكه وانت بالذات لا اخليك توصلها ولا تشوفها 

اتقرب مني وهو يگلي //ولك سراج ناديه الصار بيها غصبن عليها وانا ادري بحرگة گلبك وهضمتك بس مو 

بگد حرگت گلبها وهضمتها 

بقيت ساكت هو گلي //تتذكر سراج من اظلن الليل كله گاعد على راك الشط واجر ابوذيات واشرب چاي وادخن 

تدري ليش

باوعتله وگلت ::صدك رضا ما طول انت اتزوجت سكنه او خلي انگول ضمنت ما تاخذ غيرك ليش بعد دووم تسهر 

وبس مواويل وعتابه 

جر نفس وكال // نفس الهاضمك هاضمني لان اول العنگود ما ضگته بس وداعتك مصيبة ناديه وحنين نستني 

الاول والتالي روح سراج نام وارتاح وخلي عينك بعين الله وانا اگلك انت اذا تحب البنيه اخذها والله يحب الساترين 

ما تريدها اتركها ولا اتاملها بشي 

:: ها يعني قصدك انت تاخذها

طك اصبع وگلي //هلا هلا بينت الغيره تره انا من اخذها تلث تشهر وتالي اطلگها واخليها تاخذ احسن واحد 

فريت ايدي :: شلون يعني ؟

يعني هم اعقد عليها بورقه مالت سيد واصدقها بالمحكمه وتالي اخليها ترد الكليتها وبعدها اطلكها وكان الله يحب المحسنيين 

اتقرب مني رضا وگلي //كل عمرها وهي تبچي ومحروك گلبها آن الاوان ترتاح 

 ::الله كريم الله كريم

رضا نام مثل كل مره ع القنفه وانا رحت للغرفه اتمددت وحاولت انام غفيت تقريبا نص الليل والصبح گعدني 

رضا اتريگنا وطلعنا رحت قدمت اجازه وطلعنا للبصره وعلى گولة رضا

روحي مفرفحه عليهم ولاجت 

واتاني طيف محبوبي ولاجت 

بفراگك عليل انا والوجن ولا جات 

واهيمن من يمر اسمك عليه

الطريق رضا مره يغني مره يجر ابوذيات اتغدينا بالمطعم ومن وصلنه گلت الرضا ينزل وانا اجي 

ورا لان عندي شغل 

رضا گلي //من يمته انا انزل ابحدي لو اخليك تروح الشغلك ابحدك 

:: لا رضا شغلي هالمره للدائره 

رضا //خوش چا نزلني اهنا واخذ تكسي 

::ليش خو اوصلك الراس الشارع 

باوعلي بخبث وكال// لا راح اگلهم اجيت الوحيدي سراج يگول عدي شغل 

::ايي وليش ؟

رضا //شني ليش اريد اشوف رد الفعل 

::اووو يارضا صدك بطران 

خلف الله عليك ياالله عمي نزلني 

نزلت رضا واخذ تكسي وانا رحت اكمل شغلي وره تقريبا ساعه او اقل اجتني رساله من ناديه

... ... مو على اساس بس تخلص حنين امتحانات تجي اشو عمي رضا اجه ابحده 

:: ايي لان انا ما حصلت اجازه 

... هاا بس هذا السبب 

::ليش اكو سبب غيره 

... لا بس مجرد اسأل مع السلامه

كملت الشغل وتقريبا الساعه بثمانيه رجعت للبيت وانا جايب عشا وحلويات ولان فهمت رضا ايگلهم وصيت على 

عشا وراح ايجيبونه دكيت الباب وفتحلي رضا وهو ايگول 

هلا عمي اتفضل فوت هلا بيك 

الكل طلع متفاجئ وناديه بعيونها الف سؤال سلمت عليهم السلام عليكم

الكل ردو واتقربت حنين مني وباوعت الرضا وگالت //ليش عمو من سالتك گلت ما اجه عنده شغل

رضا بابتسامه //اي والحمد لله ما چذبت 

حنين //عبالنه عندك شغل ابغداد مو اهنا 

ابتسمت وباوعت الرضا وگتله //هاك عمي سويج السياره بلا زحمه نزل العشا 

راح رضا جاب العشا من السياره ومريم وحنين خلن العشا ع السفره والكل گعد ياكل اباوع الناديه وجهه تعبان 

وضعفانه 

وهي تختلس اليه النظر وكأنها تريد تعرف وين چنت كملنه عشا وشالن البنات الصحون وناديه هم وياهن يمكن 

تريد تغسل المواعين لكن اعرف هاي حجه سكنه گالت المريم جيبي چاي وراحت مريم تصب چاي انا گتلها

::عمو مريومه جيبيلي الچاي للديوانيه وصيحيلي ناديه خلي تجي 

باوعت الرضا وابن اخو وگلت من رخصتكم 

رحت قبلها للديوان وگعدت ع القنفه وهي دگت الباب وجابت كوبين چاي وقدمتلي اخذت كوب وانا شعلت جگاره 

وباوعت الها وگتلها ::استريحي

بعد ان اشرت ع القنفه الي تقابلني 

هي گعدت بعد ان خلت الصينيه ع الطبله باوعتلها وگلت

:: اريد اعرف مخططاتج للمستقبل 

شفتها استغربت يمكن من كلمة مخططات جاوبتني ...شنو شتقصد

::اقصد مو حنين كملت امتحانات شنو الخطوه الثانيه 

شفت بعيونها كلام وكانما تگلي الخطوه الثانيه انت تفهمني وتوجهني عليها 

انا استردفت وگتلها ::شلون اتعرفتي على نسرين 

هي اتفاجئت انا خزرتها وهزيت راسي ::ياالله احچي

جاوبتني وگالت ... نسرين وياي بالكليه 

سحبت نفس من الجكاره ونفخته ::هاي اعرفها بس اريد اعرف منج انتي ناديه شلون تتعرفين على وحده مثل 

نسرين وليش 

بقت مدنگه وتضم بشفايفها اتقربت منها اكثر ::ليش ناديه شنو السبب 

باوعتلي وبعيونها دموع وگالت ... تريد تعرف السبب انا اگلك الخذلان 

::شنو ؟

سلهمت عيونها وكالت ... ليش متفاجئ لمن ما الكل يتخلى عنك والكلام يصير بايد وحده ما تخاف من الله هي واختها 

وبناتها وع الرايحه والجايه عار ومسبه واخر شي فضحتني بالكليه شنو تريدني اسكت 

::لحظه فضحتج ؟

... ايي ليش زهراء ما گلتلك لمن هديل صارت تحچي عليه لمن طعنت بيه انو انا مو بت عمها وانو امي كتلت 

ابوي لان عاشگه براسه وانعدمت و هادي يعرف انا مو بت اخو لكن لان مسجله بالجنسيه باسم اخو جابني اعيش 

وياهم بالبيت لكن هو ما متقبلني لان شاك بنسبنا

قاطعتها :: فاانتي قررتي تنتقمين منها لان بكل بساطه ميثاق تركج واخذ صديقتج مو لان خذلج بسبب كلام هديل 

بقت ساكته ما جاوبت انا سالتها ::يعني افهم من كلامج انتي حبيتي الميثاق 

هم ما جاوبت اتقربت اكثر وضربت ع الطبله وگتلها :: ليش ساكته ما عندچ رد مو كل هذا الي سويتي لان هديل 

خربطت علاقتج بميثاق

هي باوعتلي وگالت ... ايي ليش انكر بوكتها ميثاق راد يخطبني وهم چنت متاكده ما راح يوافق من يعرف بقضية 

مياده لكن چنت اريد اوصلها اله مثل ما هي مو مثل ما وصلتها هديل 

::چنتي اتحبي 

بقت مدنگه انا زمخت عليها ::چنتي تحبينه مو 

هزت راسها وگالت ... ... انا ما حبيته لكن فكرت بنفسي وفرحت من شفت نفسي مرغوبه حالي حال اي 

ابنيه وهم اتمنيت ارتبط بشخص بس حتى اخلص من افراح وظلمها لكن هو طلع جبان

::ها يعني حبيتي 

هزت راسها ... ... ولا عمري حبيته لكن حالي حال اي بنيه من يجي واحد مثل ميثاق استاذ وشاب ويعرض 

عليها الزواج ليش ما توافق خصوصا وهي اتشوف اقرب الناس الها اتخلو عنها 

:: منو تقصدين 

... الكل 

::وانا منهم 

جرت نفس وباوعتلي وردت ... ... انت اولهم 

:: انا ما اتخليت انا ابتعدت لان شفتج انتي ما تطيقيني

... ... بس على اساس انت القاعده الي لازم تلزم بينه حتى لو احنا ما نريدك 

وگفت وگتلها :: عاد انتي ما قصرتي رحتي على هاي نسرين ولعبتي لعبتج

... ... انا طلبت من نسرين تساعدني حتى اكشف كل واحد على حقيقته ميثاق گلي انو لمى بت اصل وفصل 

وابوها وامها معروفين وانا كاستاذ الي اسمي وسمعتي ما اگدر ارتبط بوحده امها مو زينه وحاول يستغلني 

لان انا بت مياده وعباله انا مثلها ولمى راوتني ايام اسود من الليل بالحچي والعار والاستهزاء گدام الطلاب 

ودزتلي واحد عبالها انا رخيصه واستسلم بسهوله 

وهديل شوهت سمعتي وهي تمثل دور الشريفه والكل مصدگها 

سراج انا ما اخذت اله حقي من كل واحد ظلمني ونسرين ساعدتني مقابل فلوس

:: هاي كلها مو اعذار والي سويتي اكبر غلط 

... ... لا سراج الي سويته هو الصح العين بالعين والسن بالسن والبادي اظلم مثل ما همه اتشفو بيه وهانوني وحجو 

عليه باشياء ما صايره بس لان امي مياده انا اتشفيت بيهم وهنتهم باشياء ملموسه وطلعتهم على حقيقتهم 

هزيت راسي :: مي خالف بس يبقى الي سويتي غلط ومجازفه 

... ... لا مو غلط لمن تشوف نفسك تمشي والكل يباوع عليك وياشر لا وبيهم عباله انت فد شي رخيص ومتاح 

اذن لازم اصير مثل ما انت علمتني اخذ حقي بايدي

رديت عليها ::واخذتي ؟

... ... ايي اخذته واخذته مربع بس لو ما هاي الحقيره افراح والسوته بيه 

:: شلون اخذتي مربع

... ... انا صحيح انطيت النسرين فلوس بس بعد ما كشفت ميثاق ال لمى وكشفت لمى الميثاق انا استرجعت 

كل فلس انطيته النسرين وبعدها قطعت علاقتي بيها نهائيا 

رجعت المكاني وطلعت جكاره شعلتها وصرت ادخن اتنفست بعمق وسالتها :: وفيصل ناديه 

باوعتلي وانا اشوف الارتباك والتوتر على وجهه خزرتها بلعت ريكها ودنگت 

رجعت عدت السؤال :: جاوبيني وفيصل 

هي عضت شفتها واتحسرت وگالت

... ... فيصل احسن انسان واشرف واحد رادني على سنة الله ورسوله رغم منصبه ويعرف بقضية امي بس 

هو ابد ما اهتم وچان مستعد يحارب الدنيا على مودي 

انا احس بروحي صارت نار طلعت جكاره ثانيه ودخنت :: ما طول هيج تشوفينه ليش ما وافقتي تاخذينه 

هي ردت ... ... لان اكيد مثل ما عرفت كل هاي المعلومات عرفت ليش رفضته وهسه هم اگلك انا رفضته لان 

متزوج ما حبيت اكسر گلب انسانه المجرد انا ارتاح او افرح لان اول وتالي ماكو شي يدوم

سحبت نفس من الجگاره وصرت اكح هي شالت گلاص الماي وانطته الي اخذته وشربت وانا اباوع الها وهي خاله 

اصبعها وتعض بي عرفتها متوتره گتلها 

:: ناديه رغم الچ حق بكل الي سويتي ومثل ما گلتي البادي اظلم لكن صداقتج النسرين اكبر غلط لان نسرين 

وامثالها جراثيم اذا ما تمرضج وتموتج فهي توصخج

ردت وهي مدنگه ... ... شسوي ما چان گدامي حل ثاني چنت افتر بحلقه مغلقه 

:: ليش ما اتصلتي بيه 

... ... ليش انت ما تدري 

::ادري بحقارة افراح وچان كل همي يوصلج حقج انتي وحنين لكن هم تدرين شنو نسرين وين 

هي ساكنه ويامن نفسه فيصل الي خطبج مستگعدها افتهمتي ناديه

هي سكتت ما جاوبتني صفنت وسالتني ... ... انت شلون عرفت كل هذا الشي وانت ابغداد ؟

جاوبتها باستهزاء : منو كال كله ابغداد لا اجيت اكثر من مره 

هي بتعجب ... ... هاا !

هزيت راسي ::اي ورحت شفت نسرين

ارتبكت وگالت ... ... هاا اي وهي وين

:: شوفي اگدر اسجنها بس المثل نسرين جسره تگدر كل شي تسوي وتجر رجلج بالتحقيق 

وتفضح اهواي امور لذلك اكتفيت بلوي اذاناتها 

... ... هاا زين تسوي 

باوعتلها مستغرب ::اشو كل ما احچي ها او اي شنو ما عندج بس هاي الكلمتين 

... ... ها لان اتفاجأت

اتقربت من الطاوله وانا اباوع الها :: ناديه تطوين صفحة نسرين الى الابد وتنسينها مفهوم 

شفتها هدأت بعد ان سمعت مني الجمله الاخيره ... ... ايي مفهوم 

:: وكافي تعضعضين باصبعج 

هي باوعتلي وخرت اصبعها من حلگها شفت بعيونها الف سؤال وسؤال بادرتها 

::شنو ناويه تسوين بعد ما كملت حنين امتحانات

هي راسا جاوبت ... بكيفك

::شلون يعني بكيفي! 

... ... يعني الي اتشوفه انا راح اسوي 

باوعتلها هي ردت ... ... قصدي انا وحنين نسوي 

::وين تبقن اهنا لو تفضن واحد من البيوت 

... انت شتشوف

استعدلت بگعدتي :: هو ما وارده اكو بيت ملك وتكعدن اجار 

... ... بس انا ما اكدر اروح اگعد ابيت ابوي انت تعرف 

هزيت راسي ::زين ابقو اهنا واخلي علي يعرض البيت للبيع ويشوف بمكانه بيت 

... ... بكيفك مثل ما تريد

باوعتلي وگالت 

... ... سراج ليش ضايج انا كل الي سويته ردت احمي اختي ونفسي 

::وحميتيها ناديه 

باوعتلي ونزلت دموعها وكالت ... ... راح احميها سراج راح احميها وللابد وراح تشوف وشرط 

بعد محد ايكللها بت مياده

الفصل السابع والستون من هنا