رواية ناديه الفصل السابع والستون 67 بقلم انين الليل

من گالت ناديه هالشكل كلامها ما ريحني شنو يعني راح احمي اختي وللابد باوعتلها وگلت 

:: ناديه بلا تهور شنو ناويه تسوين 

... ... ارتاح 

هزيت راسي وجريت نفس كتلها ::ممكن كوب چاي

اخذت الكوب وطلعت تجيبلي چاي بعدها اجه رضا وبعيونه تساؤل انا سويت حركه يعني كل شي ما صار 

هو رد عليه //تحچي صدك 

::ايي رضا 

رضا هز ايده //چا صار عشر ساعات شنو قمة الدول العربيه 

:: هههههههه لعد هاي هي ما طول قمة الدول العربيه كل شي ما نقبض

اجت ناديه وقدمتلي الچاي ورضا گلها //استريحي 

انا باوعت الرضا لان عرفته يريد يحچي گعدت ع القنفه رضا گال //الله بالخير 

ردينا انا وناديه هو گال //انا جاي عليكم دازيني ناس

احنه اتفاجأنه وصرنا واحد يباوع للثاني هو استردف وهو يضحك / اي شبيكم عبالكم جاي اخطبكم هههههههه

انا خزرته رد گال // الصراحه انا دازيني عليكم سكنه وابنها 

ناديه كالت ......خير عمو شبيها خاله 

رضا //ما بيها بس العافيه بس الحقيقه وبما انه انا عمهم والمسؤول عنهم اجيت افاتحكم بموضوع

جاوبته :: رضا مو تشوف نفسك تلف وتدور وشلعت گلبنه ادخل بالموضوع راسا 

چا ما طول هيچ ما تحب اللف والدوران ليش ظال بس اتلف وتدور 

::اهوو انت فد وا......

قاطعني // لا تضوج سراج اطيني مجال واسمعني 

انا جاي اخطب حنين الرضا ابن اخوي ها شگلتو

انا وناديه واحد باوع للثاني واثنينه بوجهنا فرحه

اشرت الناديه بعيوني يعني شتگولين هي راسا ردت ... ... عمو بكيف سرا اقصد عموو سراج 

انا اتفاجأت من رد ناديه باوعت الرضا وگتله :: ابو علي ابن اخوك والنعم منه بس اول وتالي الرأي الحنين 

رضا // حگك ابو نور (ناديه تباوع بتعجب رضا گال ) عمي ناديه لاتخافيين مو عبالج متزوج كل واحد 

اسمه سراج يسمونه ابو نور

هي ردت ... ... ها لا ليش اخاف انا شعليه 

رضا // هسه شگل للولد 

ورثت جكاره وگتله ::تحچي وياها ناديه ويصير خير 

رضا // ان شالله خير حتى انوب التهي بخطبتك 

ناديه باوعتلي وانا گلت بابتسامه :: اي ان شالله ليش لا بس بعدني ما انطيتهم خبر 

رضا يفر بايده // شمتاني صدك چذب سراج

:: ان شالله خلال هاليومين 

رضا //ان شالله انا اروح اگل الهذا رضيو انتم ما عدكم مانع بس بعد موافقتها 

هزيت راسي :: ايي وهم على مود سكنه تتحضر هي والبنات تروح تشوف البنيه ولو احنه متفقين 

  لكن هذا الشي ضروري گدام الناس 

رضا بخبث // ايي ان شالله من رخصتكم 

:: غالي ابو علي

طلع رضا وانا اشوف ناديه شلون متوتره وحتى ضايجه باوعت الها وگلت ... ... روحي سولفي على اختج 

وشوفي رايها موافقه لا

هي هزت راسها بدون ماتحچي انا استردفت :: حتى اذا موافقه انطي خبر الكرم وقيس 

هي عكفت حواجبها ودارت عليه وگالت ... ... شنو كرم يولي هو مو مسؤول عنه 

:: اعرف بس لازم يصير عدهم خبر

... ... انا ما قابله لان طويت صفحت كرم وهادي من زمان وبس تتزوج حنين واطمن عليها راح 

اطوي صفحة قيس وكل اقارب عباس ومنيره 

سالتها ::كلهم ؟

هزت راسها ... ... اي كلهم

سحبت نفس من الجگاره :: بكيفج شي راجع الج بس فهمي اختج احتمال مرتضى ينهى ويكول بت عمي 

هي باستغراب ......منو مرتضى ياكل تبن هالحقير اموتها وما يشوف اضفرها 

اتقربت منها واتنفست قوي ::ممكن تهدين واريد اعرف شلي نرفزج 

هزت راسها ... ... منو گلك انا متنرفزه

اخذت گلاص ماي وانطيتها وگتلها :: اگعدي وهاج اشربي على كيفج عمو شصار 

اخذت الگلاص ... ... ما صار شي بس لان تگول مرتضى ينهى 

:: اي لازم نخلي كل شي گدام عيونه اشربي ماي واهدي 

هي شربت شويه وباوعتلي ... ... مبروك منو هاي سعيدة الحظ

حبيت اخبث :: ابنيه 

هزت راسها ... ... اي اعرف بس منو ؟

:: ما تعرفيها 

... ... هاا لان سمعتك اتگل العمي رضا اخذ سكنه والبنات معناتها نعرفها 

:: لا لا ما تعرفنها بس هي منا اقصد من البصره 

... هاا 

:: ايي شكم مره شفتها وعجبتني خوش بنيه وسالت عنها وهواي حمدولي بيها

... ... الله يتمم بخير 

::عاد كون تقبل 

عكفت حواجبها ... ... ليش ما تقبل وليش ترفض 

:: يعني انا اكبر منها وهي مبينه زغيره 

هزت راسها وكالت وهي تباوعلي ... ... لا اصلا ما شاء الله ما مبين عليك 

ابتسمت ::همزين طمنتيني خفت لا ما تقبل بيه 

هي ما جاوبتني انا كتلها :: ندووش روحي احچي ويه حنين واسمعي منها وشنو ابالها خلي تحچي تمام 

وشنو شروطها تعالي گليلي بس بالاول خليها تفكر

ما جاوبتني چانت شارده اتقربت منها ::هه يي ندووش 

هي انتبهت انا ابتسمت :: شنو وين صافنه 

غمضت عيونها وفتحتهن ...... هاا لا وياك 

:: زين روحي عمو احچي ويه حنين 

وگفت وگالت ... ... هيه يمته نروح نشوفها 

عكفت حاجبي :: منو تقصدين

... ... هاي البنيه الي تريد تخطبها 

هزيت راسي :: ايي على اساس باچر بس هسه طلعت النه شغلت حنين 

رجعت گعدت ... ...لا عادي اثنينهن سووا 

هزيت ايدي :: لا ما يصير اخلص من شغلة حنين وبعدين انتبه الشغلتي مو 

ردت ... ... بكيفك الي تشوفه 

هي وكفت تريد تطلع دارت عليه ... ... مو لازم تگعد ويه رضا وتحچي ويا

هزيت راسي :: اول مره خلي اشوف حنين موافقه لا واعرف طلباتها وبعدين اگعد ويه رضا 

(اتقربت عليها ) ها شتكولين 

هزت راسها ... ... ايي هم صحيح 

طلعت وانا صرت ابتسم احس بناديه ضاجت ومرتبكه لان سمعت بيه اريد اخطب اجاني رضا وهو يضحك 

ها بشر سمسم لو ماش 

:: بعد رضا بعد

رضا // انت عليمن عبالك 

::غير على خطبة حنين 

رضا هز ايده //هههه هي هي ياحنين احچي على سوادينك وخبالاتك ها شحسيت بيها لا تگلي عادي وما 

ضاجت انا شفتها حتى ابتسامتها ختلت 

:: الله كريم الله كريم 

رضا //ان شالله خير 

باوعتله :: انا هم شفتها ضاجت

رضا // وانت هسه ما راكد سراج بعد اخوك على كيفك وداعتك اول وتالي الك وين تروح 

حكيت شعري وگتله :: صدك رضا فد شويه وروح لام رضا گلها خلي تروح تشوفهن بالغرفه 

رضا //تشوفمن ؟

:: حنين وناديه 

ليش عود 

انا بقلة صبر ::هسه انت روح گللها وتالي افهمك

رضاباوعلي وحچى // اكلك سراج حنين بس لا ما ترضى بابن اخوي وروح ابوك اخطفها وازوجها گوه اله 

رفعت حواجبي ولميت حلگي :: هااا وليش يابه 

رضا// اظنه الوليد عاشك شو صاير چنه مثلك مسودن 

خزرته :: رضا احترم شويه ناسي انا عمها 

رضا // وانا هم عمها الولد عاشگها شني ما تشوفه ايصيح لامه وابو 

:: اشبيك رضا خليلي احترام

رضا هز ايده // شوف هذا يااحترام انا مسودن بس ما مبين عليه وابن اخوي هاا (يفر بايده ) هم چنه تسودن وانت

كلش ما باقي عقل براسك 

جريت نفس ::تتصور تقبل 

رضا //ياهي حنين چا ليش ما ترضى ؟

:: خاب يا حنين ناديه

رضا بخبث //ههههه ادري بيك تنشد عليها بس ردت اخبث بس لا تزعل عليه من احچي 

هزيت راسي :: لا ما ازعل 

باوعلي // انت ما تفتهم 

عكفت حواجبي :: شنو يعني ما افتهم ؟

رضا // ادري ساعتين ابحدكم حاچيها گللها شمالك 

جريت نفس ورديت ::ناسي صدمتها خليها براحتها

رضا // لا براحتها ولا هم يحزنون اسمعني الك منا الوره خطبة حنين ماكو وروح ابوك وابوي 

اخذكم للمجر وهناك بالهيمه اعقدلكم واسويلكم ذاك الجو الرومانسي شوف ما اخلي يمكم لا نقال ولا سياره 

ولا احد يمركم وهناك انديوه غصبن ما عليها تجي تحضنك

انا عكفت حواجبي واداري ابتسامتي رضا استردف وهو يهز براسه 

ايي وداعتك وداعتي ليش اتمزمز من كلامي مو انا اگلك اخذكم للهيمه وشلون ذيابه بس تعوي وبگ وحرمس 

وانا اطگلي طلقتين تلاثه بوياي وداعتك جو رومانسي هي خايفه وانت حاضنها بعد شتريد

سالته //وليش كل هذا 

اريدك ترتاح ياخوي 

اتحسرت ::ان شالله 

خوش چا انا خلي اروح اودي سكنه تشوفهن 

::اي خلي تسويلها اي عذر بس لا تجيب طاري الخطبه 

  هز راسه وگف // اي صار

راح رضا وانا احس بگلبي فرحان رضا غاب ربع ساعه ورجع گلي 

سكنه من امباغتتهن لا گيتهن يبچن 

هزيت راسي :: معناتها موافقات 

رضا //عليك الله 

:: اي وداعتك 

شلون عرفت وياهي الراضيه 

اشرتله باصابعي يعني اثنينهن واخذت النقال الي چان ع الطبله وخابرت كرم راسا فتح خط عبالك متانيني

  - الو 

::الو اشلونك ابو مرتضى 

   - هلا سراج اشلونك 

:: الحمد لله بخير عمتي شلونها 

  - تسال عنك 

::: بس كون تسبني 

- - ههههه بعد انت التعرف عمتك المهم انت شلونك سراج

:: انا بخير اگلك ابو مرتضى باجر بالليل انت موجود ان شالله 

—— اي سراج خيير 

::كل الخيير جاي اريد اشوفك واشرب يمك چاي 

—- هله بيك شنو انت بالبصره 

:: لا باچر اجي عندي شغل بالدائره 

كرم // سبحان الله انا اريد اخابرك اگلك عندي موضوع وياك

::خير ان شالله 

كرم // اي كل الخير بعد باچر من تجي بحيل الله ونسولف 

:: ان شالله سلم على عمتي وعلى مرتضى والولد

ما خليته يرد سديت التلفون بوجهه باوعت الرضا وانا اشوفه مستغرب گتله وانا ارفع حاجبي 

:: جيبلنه فراش شنو انت ما تعبان 

اي هسه 

:: اگلك عود هذا ابن اخوك خلي ينام بغرفته لايجي يمنا

رضا // ها وليش 

:: لان اكيد هسه هو متوتر ويفكر بعد يجي اهنا خطيه ينحرج

هز ايده رضا وگال // ما طوول هيج كل شي تعرف بامور الحب ليش ساكت كل هاي السنين 

نفخت وانا بقيت احرك باصابعي على رجلي :: مو ساكت رضا مخطط الكل شي وخال اسوأ الاحتمالات 

بس دگة افراح الحقيره ما خليتها بحساباتي مع الاسف غلبتني 

رضا //لا تلوم بروحك كل شي متوقعين منها بس هاي المصيبه لا (اتحسر رضا وگال )

خلي اروح اجيب فراش كافي انگلب الماضي لان كلش يوجع

طلع رضا وانا احچي بصوت ناصي ::اي الماضي كلش يوجع لا ن كله مرار وضيم 

وجابلنه رضا فراش بقيت ادخن وافكر وكل شويه اباوع للواتساب وهي كانما تراقبني بعدين 

كتبت الها :: ليش ما تنامين

هي ما جاوبتني رجعت كتبت:: نامي ندووش ولا تفكرين 

خليت الجهاز متصل وبقيت متمدد على فراشي وادخن وصلتني رساله لكن ما حاولت افتحها اله وره فتره شفتها راده

... ... انت ليش ما تنام مو جاي تنصحني نامي ولا تفكرين انا هم اگلك نام ولا تفكر

حسيت من كلامها مقهوره مني صرت اسال نفسي معقوله تحبني وتريدني انا ما اتذكر اي اهتمام 

منها بس اتذكر حزنها ومن عاتبتني لان اتزوجت سجى وانا بوكتها اتناسيت الامر بسبب زحمة الحياة 

كتبت الها 

::انا راح انام واتمنى هسه انتي تغمضين عيونج وتنامين لا تجاوبين بس فكري بشي تحبينه وانا هم راح افكر 

بشي احبه واحاول اغمض عيوني

ها ندووش سويتي مثل ماگتلج

ما ردت عليه عرفتها غمضت عيونها بقيت صاحي للفجر اذن اتوضيت وصليت بعدها نمت گعدت على صوت رضا 

شني سراج ماتگعد الساعه فوگ التسعه 

فتحت عيوني واتثاوبت وگعدت گلت وانا نعسان ::صباح الخير 

صباح النور شلقصه بس انا وسكنه گاعدين الكل نايم 

باوعتله بنص عين هو رد عليه //شبيك سراج ما جاي اچذب عليك كلكم نايمين بس انا گاعد

::وسكنه رضا شنو نسيت 

    بلع ريكه // لاما نسيت خلي اروح اجيب الريوك 

رحت للمغسله غسلت ورجعت لگيته جايب الريوك گيمر عرب وبيض وصمون حار باوعتله هو گلي 

- - گعدت الصبح رحت للفرن جبت صمون حار وبطريقي جبت گيمر 

:: اي والله ابو علي خوش ريوك تسلم 

- - بالعافيه ان شالله اجيبلك ريوك عرسك

:: ما بيها مجال اذا ما تخلي بيها ان 

- - عمي شگلت غير اريد افرح بيك خلي اسكت واتريك احسنلي 

اتريگنا وشربنا چاي ورحت غسلت وحاچيت رضا :: صيحلي ناديه اذا گاعده 

رضا // وحتى لو ما گاعده اگعدها 

بقيت ادخن ورضا شال الصينيه عشر دقايق اجت ناديه وكالت ... ... صباح الخير 

رديت عليها بدون اهتمام :: صباح النور اكعدي 

هي گعدت سالتها :: البارحه نمتي

تستمر القصة أدناه

هزت راسها ب(ايي) بدون ما تجاوب بعدها گلت ::الحمد لله وحاچيتي حنين 

... ... ايي حاچيتها 

::شنو كان ردها 

... ... تگول بكيف عمو سراج 

:: هاا ليش مو بكيف عمو رضا 

هي باوعتلي بتساؤل جاوبتها :: لان حنين دائما تگول عمو رضا هو ولي امري

فرت ايدها ... ... ما اعرف بعد هذا كلامها 

:: معناتها موافقه 

باوعتلي ... ... شلون عرفت 

:: مبينه لو ما موافقه ما گالت بكيف سراج وانتي ناديه 

هي بتوتر ... ... انا انا شنو 

:: انتي موافقه رضا ياخذ حنين 

... ... همه خوش ناس طيبين

هزيت راسي وگتلها :: روحي صيحيها وتعالي انتي وياها 

راحت اشوفها متاخذه مو على بعضها حسيت بنشوه فرح يعني معقوله ضايجه لان اريد اخطب 

اجت حنين وهي مدنگه كالت بخجل //صباح الخير 

انا ابتسمت ورديت :: هلا بحنونه الحلوه اگعدي يابه 

گعدت وناديه بقت واگفه گتلها ::اگعدي ليش واگفه

گعدت ناديه انا گلت :: الله بالخير

ردن // الله بالخير 

:: حنين بابا اتصور ناديه گالتلج انو رضا جاي عليج يحب يرتبط بيج شنو رايج 

حنين كحت // بكيفك عمو 

:: اي اعرف انتي موافقه ؟

بكيفك عمو

:: رضا خوش ولد وشاريج ما شاء الله ابن عائله وامه خوش انسانه او عمه رضا 

ناديه جاوبت ... ... هو هذا اهم شي بالموضوع 

عكفت حواجبي وباعتلها ::يعني شنو ؟

ناديه تباوعلي وكانها تتحداني ... ... يعني مستحيل ننسى فضل عمو رضا علينه وياريت ابن اخو يطلع نفسه

جاوبتها وانا اخزر بيها :: فعلا رضا اخ وعزيز وابن اخو خوش ولد ومتربي والاهم من هذا كله هو يعرف 

كل شي يعني ما ضمينه علي شي 

باوعت الها واتقربت على حنين ::ها عمو حنين نگول مبروك 

بقت ساكته ما جاوبتني :: ههه يعني اعتبر السكوت علامة الرضا 

حنين // عمو بس عندي شروط لازم اكولهن وبحضورك وحضور امه وعمي رضا

هزيت راسي وانا اباوع الناديه :: اكيد اي شي ابالج احچي لا راح نجبره على تنفيذهن ولا اجبرج تتنازلين عنهن 

ناديه باوعت الحنين وهي تتساءل بوجهه عن الشروط انا گتلها 

:: ناديه اتركي حنين تگول شنو ابالها والي ايحب كل شي يقبل وكل شي يسوي حتى يرضي حبيبته 

دنگت حنين وناديه باوعتلي وگالت ... ... حتى من اتم خطوبتج حنونه نروح نخطب العمو سراج

حنين باوعت واتساءلت //صدك عمو 

ناديه جاوبت ... ... ايي صدك ليش عجبه شنو 

حنين //شبيج ناديه بس ما مصدگه عمو يتزوج وهو بهالعمر 

انا باوعت باستغراب ::ليش شايفتني شايب 

ناديه بعصبيه ... ... غبيه وتبقين غبيه

حنين اشرت بايدها //لا عمو مو قصدي بس من الفرحه ما متوقعه تخطب وتتزوج 

جاوبتها :: انا گلت الناديه احتمال البنيه ما توافق لان اني اكبر منها بس اشو ناديه شجعتني وگالت 

ما مبين عليه شايب 

حنين// والله انت شيخ الشباب نيالها الي تكون من نصيبك 

:: شكرا الهذا الكلام الحلو 

حنين // عمو انت ياهو مثلك علوا تخطب وتتزوج ها سوي حفلتين حفلة خطوبه وحفلة زواج 

::وليش باالله 

  حنين بفرح // حتى نشبع غنا ورگص 

ناديه خزرتها انا گلت :: ههههه هاي انتي مثل سفر بت زهراء تگلي اتزوج حتى نشبع لگص 

خابرت رضا وگتله :: ابو علي جيب رضا وتعالوا كلكم رايدكم

حنين رادت تگوم انا اشرت الها :: لا ابقي راح يصير الكلام وجها لوجه 

دقايق واجه رضا ويا سكنه وعمه ومريم سلمو ورضا اشوف لمعه بعيونه وهو يباوع الحنين گعدو

انا گلت :: الله بالخير 

الكل رد باوعت الرضا وگلت :: ابو علي خويه ولا تهون اختي ام رضا انتم اتقدمتو وخطبتو حنين 

وهذا الشي ايشرف اي عايله اتناسب ناس مثلكم اجاويد 

رضا // عشت سراج والله انت اخ ونعم الاخ

:: رحم الله والديك البنيه موافقه وعدها شكم شرط وهذا من حقها مو 

سكنه جاوبت // اي والله ما طلبت غير حقها 

:: وبالمناسبه الله شاهد اتفاجأنه انا وناديه هسه گالت عدي شروط حتى احنه ما نعرفهن 

رضا //لا عمي عادي الي تطلبه حاضر

:: اكيد هنه مو شروط تعجيزيه بس قبل ما تحچي حنين انا عدي شرط وهذا الشرط ما يقبل تغيير 

لا بمرور الوكت ولا بتغيير الحال

رضا باستغرايب // شنو سراج 

ورثت جگاره وگفت سحبت نفس ونفخت الدخان وگلت :: هاي حنين ابوها عباس الي مات مكتول وامها مياده 

الي بسبب ظروف او قلة تربيه (اباوع الناديه ضاجت وحنين اتفاجأت من كلامي) سوت الي سوته وقتلت عباس 

بمشاركة عشيقها وانعدمت سامعين بالقصه مو 

الكل ساكت انا رديت ::خويه ام رضا سمعتي بيها

سكنه //خويه ساعة شيطان واخذت.جزائها وانسدت صفحتها 

ما رديت عليها :: وانت عمي رضا سمعت مو 

هز راسه وگال //اي عمي اعرف وانا مست......

قاطعته:: دقيقه بابا بعدك ما سمعت شرطي وانتي بابا مريم 

مريم بذهول //اي عمو سمعت

::تمام يعني انتو عرفتو او چنتوا تعرفون مو لذلك من تتزوج حنين الى ان تموت ممنوع منعا باتا اي احد يجيب 

طاري امها او ( اتقربت من رضا ) يارضا بيوم تتعاركون تتضاربون تزاعلون او حتى لا سمح الله تتطلگون ما 

ينجاب اسم امها لا بخير ولا بشر حنين امها منيره وابوها عباس فلو صادف سمعت لو بالشقى افهم الكلام رضا 

وخلي ابالك لو بالشقى مسمعيها كلام عن مياده ثقو لو عدها عشر اولاد اطلگها

:: انا من انطي حنين انطيها الرجال يصونها ويخاف عليها ويحبها مو الواحد ايطلع مراجله بالكلام امچ هيچ 

وفعلها هيچ وسوت فلان شي انا هذا شرطي واعتبرو ساري المفعول مدى العمر 

رضا //والله ياسراج ما طلبت شي بالعكس هذا مو شرط هذا لفت نظر والرجال الي ما يصون كرامة مرته 

لاخير البي 

:: وانت عمي رضا خلي اسمع رايك 

رضا جاوب //مثل ما گال عمي انا حاضر انت ما طلبت شي

:: الحمد لله هسه بابا حنين احچي 

حنين مدنگه گالت // اول شي اكمل دراسه 

— وثاني شي ناديه تسكن ويانه 

قبل لا يجاوبون اشرت وگلت :: اكيد الدراسه تكملين بس ناديه هسه مو وكتها

سكنه // ياا خويه سراج شني مو وكتها چا يمته اگلك خاف حنين راح تصير مرت ابني تره ناديه بتي 

وحتى من تنخطب تنخطب مني 

هي باوعت بمرار وهي تلم بشفايفها والدمعه بعينها انا جاوبت :: هذا هو اليخطبها الناديه يخطبها من ام رضا 

:: ها رضا 

صار والف صار

باوعت الحنين :: اسمعي بابا تره هذا رضا خوش زلمه وادري بي راح ايصونج ويسعدج 

اتقربت عليها وبست راسها وگتلها:: الف مبروك 

سكنه هلهلت وانا اباوع الناديه وهي بالگوه لازمه نفسها اجه ابو علي وباس راس حنين وهو يغمزلي 

ياالله خلي انكمل حتى نخطبلك 

سكنه // صلوات على محمد وآل محمد گللوووش صدگ خويه

جاوبتها :: اي ان شالله بس خلي نزوج الشباب بالاول 

سكنه // بوجودك ان شالله تزوج ولد ولدهم 

باوعتلهم :: اليوم بالليل نروح انا وناديه 

الكل باوعلي باستفسار انا استردفت :: نروح البيت كرم حتى نخلي عدهم علم هذا الشي لازم يصير 

رغم انو ناديه ما موافقه

حنين //حتى انا عمو ما اقبل ارجوك لا تروح الاي مكان 

::ما يصير بابا لازم يصير عدهم علم 

حنين //احنه مو گطعنا كل شي وياهم بعد على شنو 

::الظروف الي يمرون بيها تحتم علينه ننطيهم علم بالشغله وما اريد انطيهم مجال يتقولون

ابو علي // كلام سراج صحيح وبمكانه اكيد هو يعرف اكثر من عدنا 

:: تمام بالليل كلنه نروح بعدين افهمكم ع التفاصيل 

باوعت الرضا شفته ضاج وحتى عرك گتله وانا ابتسم ::لا تضوج رضاوي حنين الك وما تصير الغيرك 

وگف وحضني وگلي //طال عمرك عمي 

باوعت الهم وگلت ::ياالله ابو علي امشينه عندي شغله مهمه

سكنه //ما تتغدوون 

::تونه بسم الله خلصنه ريوك 

ردت الطف الجو باوعت الرضا وحنين :: مو تخلصونها واحد يباوع للثاني چنكم واحد ما شايف الثاني 

رضا // خليهم ياخوي ليش تغار روح اخطب وگابل خطيبتك 

:: هههههههه انا اغار من بتي 

رضا // اي اضحك بس انا من تخطب راسا بنفس اليوم اخليك تعقد وتتزوج

سكنه // ليش شنو هو وحد 

رضا هز راسه //اي وحد يجوز البنيه تشرد منه يجوز هو يشرد منها 

جاوبته بابتسامه :: ها ما طول هيج على گولتك بنفس اليوم اعقد واخذها للمكان الي گتلي علي 

سكنه //ياا وين هذا 

رضا // عمي انا وحنين نروح وياكم 

رضا // لا شني لزيتو ما ناخذكم هذا المكان مسوي بس السراج ومرته وهي شلون مره الله يهنيك 

بيها ويتمم الك بخير

:: مشكور (وگفت ) ياالله امشينه لو تريد تبقى 

رضا // لا امشي وياك 

:: زين حنين ورضا ابقو بالديوانيه وگعدو سولفو بكل شي اتفاهمو وخلو واحد يتعرف ع الثاني اكثر 

رضا // الله ربكم بعد شتريد رضيو 

:: ياالله امشي اتاخرنه 

طلعنا وركبنا بالسياره ورضا گلي //وين رايحين سراج

:: هيج نفتر 

رضا // عليك الله وانا صدگتك 

:: ادري رضا ما بقى عدي كلام اگوله 

  رضا $ذ چان خليتني اسولف والله الباچر الصبح ما اسكت 

:: رضا اريد ناديه تفكر 

- -بيمن تفكر 

:: بكل شي رضا بكل شي 

— - ياالله عمي اندري الوين تريد توصل

:: هسه اذا ما يعجبك انزل ارجع يمهم 

رضا // لا شلقصه 

:: ادري بيك ما تشبع عيونك من سكنه 

رضا بحسره // غير كون الله يهديها عليه 

:: ان شالله بعد انت گلتها هذا قدرك وانت راضي بي 

رضا // اي والله راضي وقانع

رحنا انا ورضا نفتر بالسياره وصلنه السوك البصره وهذا مشهور بي كل شي ينباع الباله والجديد والاشياء الغريبه 

وكل هذا بس حتى اخلص الوكت بعدها خابرت علي المحامي واتفقت ويا يعرض بيت عباس للبيع وبنفس الوكت 

ايشوف بيت ابمكانه وبعدها رحنا صلينه ورجعنا دخلنه مطعم اتغدينا وبعدين رجعنا للبيت انا خابرت رضا گتله 

افتح الباب لان اعرف هيج وكت ناديه تنام ما حبيت ادك هورن يجوز تگعد

فتحلنه رضا الباب ودخلنه للديوان انا بس وصلت اتمددت ونمت ما گعدت اله المغرب توضييت وصليت وبعدها اجه 

رضا گال// عمي نصب العشا 

انا هزيت راسي وگتله :: لا ما اشتهي انتو روحو اتعشو وانت رضا ما تتعشى 

جاوبني وهو متمدد // لا سراج هواي اكلنه 

:: رووح عمي وشويه جاي وراكم

هو راح وانا رجعت للمغسله ومشطت وبعدها گلت الرضا ::ياالله گوم ورانه روحه 

هو گام وراح سبح ولبس دشداشه بعدها رحنا للصاله لگينا البنات بالمطبخ سلمنا واجت مريم جابت الچاي وقدمته 

النه وهي تگل الرضا // صلوات على محمد عمي انت العريس 

هو بضحك،// صدك بعد عمج 

مريم // شنوواچذب عليك

رضا /. فدوه البتي ( واهنا طلعت ناديه ) اله ازوجج واحد يشبه سراج بس مو تگولين علي شايب وچبير 

سكنه بتساؤل // ياهو الشايب سراج ؟

رضا // ايي يگول خاف هاي الاريد اخطبها تگول عليه اكبر مني وما تقبل 

مريم // تره صدگ يا جماعه عمي سراج چبير بس ما شاء الله ولا مبين علي

رديت على مريم :: هسه مريم خصم الحچي شتگولين توافق لو لا 

مريم //شحدها ما توافق غصبن عليها توافق شنو هي تحلم بواحد مثلك 

باوعت الناديه وگلت بابتسامه :: ندووش ليش واگفه ما تگعدين 

هي جاوبتني ... ... منتظره تخلصون كلام

مريم // ما عدنا شي جاي نسولف على خطبة سراج 

هزت راسها ... ... ايي الله يتمم بخير 

جاوبتهم :: هسه اتركونه من هذا الكلام باچر او عگبه ترحون وتخطبولي البنيه (باوعت الناديه ) ندووش

اتحضري وخلي نروح 

هي ردت عليه ... ... رووح بس انت انا ما اريد اروح

درت عليها وخزرتها وگلت ::لا لازم ترحين ضروري روحي بدلي بسرعه 

هي رادت تحچي اشرت بايدي هي راحت (باوعت الرضا ) ::وانت رضا حنين تبقى وياكم ومن انطيكم 

الاشاره تجون 

رضا // ها وليش نروح كلنه سووا ونخصمها 

:: مثل ما سمعت انا وناديه نروح وراح اتصل بيك وانت افتح خط وسمعو الكلام الي يدور ابيناتنا 

رضا // تمام مثل ما تريد

دقايق واجت ناديه وهي لابسه عبايه اسلاميه مبين عليها ما الها خلگ اي شي تسوي گعدت گبالي وانا طلبت من 

حنين ومريم هم يلبسن ويجن وفعلا لبسن بسرعه انا وگفت وگلت بعد ان باوعت للساعه 

:: هسه انا وناديه نروح وانتم ورانه مباشرتا تمام 

رضا //اي صار 

:: بس اكو شي (واتقربت يم حنين ) اسمعي بابا وانتم هم اي شي تسمعونه من حق حنين ترد علي واذا 

ما يعجبج تردين هذا هو براحتج

حنين // ان شالله عمو 

::ياالله ناديه خلي نمشي 

هي صافنه اصلا ولا يمنا اتقربت منها وگلت ::ناديه ناديه 

هي كانما فزت انا گتلها :: ياالله خلي نروح 

ناديه وگفت بدون ما تحچي چان مبين عليها التعب والقهر والانتكاسه رحنا وركبنا بالسياره وصرت اسوق 

وانا ساكت بعدها گلت :: مبين عليج زعلانه لان راح انروح البيت كرم

جاوبتني ... ... ايي لان همه ما يهمونه بشي 

:: صحيح بس ما اريد اخلي الواحد مجال لو يفك حلگه بكلمه 

باوعتلي وگالت ... ... الظاهر تريد تنهي كل شي قبل لا تخطب (هزت راسها وگالت ) هم حقك انت ما قصرت

تعبت ويانه وآن الاوان ترتاح منه ومن مشاكلنه 

جريت نفس وگتلها :: هو اكيد الكل شي نهايه وفعلا تعبنا مثل ما تگولين انا هسه اطمنت على حنين بعد عندي 

بس انتي

هي باستهزاء ... ... بعد وكت ليش هسه تسأل 

:: هاا بعد وكت ليش انا قصرت بشي 

 جاوبتني بعتب ... ... لا لا ابد انت بكل شي ما قصرت بس بشي واحد 

:: الي هو 

جاوبتني بعصبيه وهي ترجف ... ... ما قتلتني الهسه ليش ما قتلتني وريحتني

ما جاوبتها ولان اعرف بيها گلبها ينزف وتكابر حامله هموم الجبال ما تحملها قبل ما نوصل گتلها 

:: اسمعيني ناديه لازم تبينيين ناديه القويه وشنو تسمعين ما تتنرفزين او تضوجين 

جاوبتني باستهزاء... ... اتنرفز واضوج المثل حالي يتنرفز ويضوج 

:: ناديه وما اريدج تحچين خليني بس انا الي اسولف تمام

ما جاوبت وصلنه البيت كرم فتح النه الباب ابنه حسين ودخلنه للديوان البره قبلها اتعمدت اخلي الباب مردود

وكتبت الرضا :: احنه بالديوان البره 

واتصلت وخليت النقال بايدي

دخلنه ولگينه الكل موجود قيس وابنه ومحيي وكرم ومرتضى وعمار الي شفته واگف لان انا وصيت قيس ايجيبه 

البيت كرم هو وهادي الي كانت حالته صعبه للغايه وعمتي جميله گاعده ع القنفه وام مرتضى وشمس سلمت 

ورحت على عمتي جميله بست راسها وناديه ما سلمت بس راحت حضنت جميله وگعدت واسمع جميله تگلها

—- اشلونج بيبي زينه 

ناديه هزت راسها وگالت ... ... الحمد لله 

جميله // ليش ما تخابريني 

ناديه سكتت ما جاوبت قيس گال //مساكم الله بالخير 

ردينا كرم باوع الناديه //اشلونج عمو ناديه 

هي باوعتله باستهزاء وما ردت انا حچيت ::اي ابو مرتضى من خابرتك گلت عندك حچايه

كرم //اي والله وهم زين اجيت وجبت ناديه وياك وابو احمد هم اجه عدنا شغله نريد نحلها وطلب 

يم ناديه ويمك 

هي رادت تحچي انا خزرتها وسكتت :: اي اتفضل ابو مرتضى اسمعك

كرم // ابو احمد ولا يهونون الجماعه اجه وجاب هادي وعمار وهله بيهم واحنه نبقى اهل واخوان 

لكن انا وابو ياسر اتفاهمنا هديل وابني ما اتوالمو ومثل ما دخلنه بالمعروف نطلع بالمعروف وهادي 

الرجال يگول كل شي ولا واحد ينجبر على وحده ما يريدها ًوالدنيا قسمه ونصيب 

عماار //هاا ومن يمته ما يريدها غير نعرف السبب

قيس اقترب منه وگله //اهدا بابا كلنه نعرف السبب وابوك يگول هذا هو مرتضى يطلك هديل وما نطالبه 

بااي شي 

وليدي عمار الصار شي چبير واي واحد ما يقبلها على نفسه 

عمار لاول مره اشوفه مكسور هز راسه وهو يعض بشفته // هذا هو طلگوها عد السيد وانا امشي باجراءات طلاگها 

(لزم ايد هادي ) ياالله بابا امشينه

انا وگفت ::اوگف عمار من رخصتكم عدي شغله وياكم كلكم 

قيس // خيير سراج 

:: كل الخيير بس بالاول اريد كرم يكمل كلامه 

كرم // احنا ياسراج كلنه اهل والصار صار واحنه عمو ياناديه ظلمناج لان ما چنه نعرف الحقيقه وهسه الفات مات 

واحنه نبقى اهلج 

وانا ياسراج ما طولك موجود اريد ارجع واطلب منكم كلكم لان احنه كلنه اهل احنه غلطنه ولازم نصلح غلطتنا والي 

تطلبه ناديه احنه حاضرين وحنين ابنيتنا ونريد نرجع ناخذها الوليدنا مرتضى

ناديه باوعتلي وانا عضيت شفتي يعني لا تحچين باوعت الكرم وگلت ::اي ليش لا بس مع الاسف اجيتو متاخرين 

كرم // ها سراج شتقصد 

:: اقصد حنين انخطبت او وافقت وانا جاي انطيكم علم 

كرم بعصبيه //هذا شلون حچي 

هزيت راسي وحاچيته ابرود :... اي كرم هو هذا الحچي

كرم // بس احنه عمامها واولى بيها 

طگطگت اصابعي ::منو گلك هي سلعه معروضه للبيع يمته ما تريد اتعامل عليها ومن ما تعجبكم ما تشتريها ......

كرم //هذا شلون حچي سراج 

جاوبته ابرود ::هو هذا الحچي ليش هسه حنين حلت بالعين مو چانت بت مياده مو ابنك ما يريد ياخذها لان خاف 

اصدقائه ايگلوله ابوها منو وامها وين وشلون ماتت وخالتها شنو مو انت وابنك متفقين ويه هادي وافراح 

على اساس ياسر ياخذ ناديه وابنك ياخذ حنين حتى تتقاسمون حلال عباس وبعدين تزوجون ولدكم عليهن 

هسه من مرتضى ايطلك هديل يرجع ياخذ حنين ليش شنو الي تغير بالموضوع

كرم // سراج ماكو داعي الهذا الحچي 

:: لا اله داعي مو انت الي تصيح ناديه عدله ميته اذبحها وادفنها ليش هسه شبدل رايك 

مرتضى اتقرب مني // اسمعني سراج حنين بت عمي وانا اولى بيها انهى واخذها 

عمار // وليش انت تاخذها انا الي اخذها انت ما تشوف اضفرها

وگفت على حيلي وحچيت باستهزاء :: والله زين وين چنتو عمي مهاجرين لو نايمين بالسبات الشتوي وهسه گعدتو

حنين دخلت وگفت الكل اتفاجأ هي حچت //هيچ صارت حنين عمله نادره والزلم تتعارك عليه (وصلت يم مرتضى )

منو گلك يااستاذ مرتضى ايشرفني اخذ واحد مثلك خاف عبالك طلگت هديل ممكن تاخذني لا تدري ليش لان 

انت بكل بساطه مو السلطان سليمان وانا جاريه بقصرك وممكن باي لحظه تطلبني اسمعني كل شي ممكن 

انسى لكن كلامك من تكول اخاف على سمعة جهالي هذا الشي الي ما انسا

——- شنو الي اتبدل وغير رايك تره انا مثل ما انا حنين بت مياده لا انا بت زهراء ولا بت شمس ولا حتى بت 

افراح شنو من تاخذني ما راح يسألوك منو امها وشلون ماتت اما انت ياكرم لان ما يجي بالساني اگلك عمي 

عمري ما انسى تشفيك بيه بيوم الي اتزوج ابنك هسه ردتني من ردتواتطلگون 

هديل لو من عرفتو محل عباس الي چان ماخذه هادي رجع النه تره الكيكه دسمه مو

كرم بعصبيه // انچبي ولج صدك الا گالو تربيه سزز 

ناديه وگفت ... ... بهاي الك حق ما چذبت وما طوول تربيتنا سزز ليش تردون تاخذون من عدنا وابنك 

وابن هادي يتعاركون علينه 

عماار // انتي بالذات لا تحچيين لان انتي اساس المصايب 

ناديه بنتر ... ... لا احچي واحط اصابعي بعين اكبر واحد بيكم

ولج (واتقرب منها عمار يريد يضربها انا لزمت ايده لويتها ورا وگتله ) :: هسه بس ملختها بس مره ثانيه اذا اتقربت

لو بنفس راح اكسرها واحملك اياها واسوي بيك عاهه طوول عمرك 

عمار // هنه بنات عمنه ونحچي وياهن انت بصفتك شنو لو تريدلك لطعه 

::ههههههههه لك احچي عدل مو انا الي ادور فضايل واسأل ابوك اما انا شنو صفتي فهاي حقك تسال بيها

ولان بكل الاحوال البنات صارن مسؤوليتي اما صفتي شنو فاانا خطيب ناديه واليوم عقدنا انا وياهه

///////

الفصل الثامن والستون من هنا