رواية كريات الدم السوداء الجزء الثاني الفصل السادس بقلم زحل شريف
_____بنين _____
_من بعد كلام مريم الكل باوع لثابت
منتضرين تبرير .التفت اسعد لاريج .
اسعد::روحي هسه اجي .
_بدون جدال دارت وجها وراحت
كامت امي جرت مريم وهيه ترزل بيها.
وفية::تعرفين الموضوع وتعمدتي تثيرين مشكله.
مريم::خاله شنو يعني اشوفه يخابر
ويتراسل واسكت ..
_ركضت وراهن .دفعتها امي للغرفه.
وفية::متاكده هو مفهمج عله كلشي.
واكثر من مرة سمعته يحجي وياج وشرحلج
وضع البنيه .
مريم::اي وسكتت وكال ساعدتها
وكل مرة عذر يوم تسال عن اختها يوم
عله اوراق يوم عن ابوها بس تخلص اليل
مراسله مصختها .
وفيه::ولا تكليلي انتي غيرانه.
مريم::اكيد غير زوجي.
وفيه::شوفي ولج .سوالف
الحيايه ماتعبر عليه . وساكته عنج بمزاجي
بس مال تعلكينها بينهم لا والله انسى العمام والخوال.
_قطع حديثهن صوت ابوي
الي ارتفع طلعت اركض وامي اجت وراي.
ابواسعد::يعني تكسر كلامي.
اسعد::يابه مو هيج بس غلط الي
جاي يصير . ترى البنت طفله وماتعرف تصرف
وهيج تنضلم واختها خطيه .
ثابت::اختها وضعها اهون يمكن يوم يحنون خوالها
ويتقبلوها بس هاي اذا بقت راح ترجع لنفس المكان.
_تقدم اسعد وهو يسال.
اسعد::وينها .
_ضل ثابت مدنك .كرر سؤاله اسعد .
اسعد::مايحتاج تفكر ترى الاجابه سهله.
ثابت::ماااندل مكانها. تواصلت وياي
علمود اكمل اجراءت جوازها لااكثر.
اسعد::تمام .اكيد راح تلتقي بيها
لاجل اوارقها خو الجواز ميطلع اذا ماتحضر هيه.
ثابت::كملنا وخلص .
_هز راسه بتمام وطلع.
ضل ثابت واكف ساله ابوي.
ابو اسعد::شرادت البنيه.
ثابت::رادت تزور ابوها . وتطمن عله اختها.
ابو اسعد::كل الي سواه وهيه بعدها تحن عليه.
ثابت::يبقه ابوها. ومن رايي تفكيرها صح
لان الشخص الوحيد الي بقالها . يابه هنه هسه
مثل التايهات زرع ماله اصل .
ابو اسعد::الله يتولاهن برحمته.
شلون راح ترتب زيارتها لابوها .
ثابت::الخال رتبها . بس كلي شلون افلت
من اسعد اكيد راح يضل لاحكني.
ابو اسعد::هسه شكو مجلب للبت .
_ضلو يتناقشون . عفتهم ودخلت غرفتي
ايام والوضع متوتر بين ثابت ومريم
انضف بالحديقه ودخل اسعد مايشوف كدامه
شويه واسمع صوته ارتفع . سديت الماي وركضت للصاله .
اسعد::وينها .
ثابت ::شبيك موعود شنو هيه جداحه
وتسالني عليها شمدريني وين .
اسعد::كتلك بس اطمن عليها .
ثابت::اطمن بخير وادعيلها بالتوفيق.
_ضحك مستهزء . هز راسه بتوعد وطلع.
وهيج خلصوها . كل مرة يرجع ثابت وهو يشكي لابوي
من اسعد الي يفتر ورا .اليل كله هو كاعد بالحديقه
بس مبين عليه التعب سويت كهوى واخذتها وطلعت يمه رفع راسه باوعلي . ابتسم اشرلي اكعدي ونزع السماعه من اذنه عرفت يسمع اغاني. اخذ الكوب شرب.
اسعد::اييي عشتي والله.
_بالعافيه. حاولت اخلق حديث بينا
سالته صدك شنو ناوي تسمي ابنك ؟
اسعد::هههههه . اريج مسويتلها
قائمه مال اسماء .
_ضحكت . رد وهو يتحسر.
اسعد::ابالج اسم .
_لا بس حبيت اعرف . حجيتها وترخصت
من يمه . مرت فترة وحالته الصحيه تعبت
مرة ضغطه مرة نسبة دمه تزيد . كالو بسبب التدخين
حاول ابوي يخلي يخفف اخذ اجازه من دوامه .بيتنا كله قلق عليه . امي وابوي يخلصوها دعاء .
وفية::عين وصابته .
ابو اسعد::ربج الشافي .
_دخلو هو وثابت يداهرون.
ثابت::يابه شكو لاحكني
مرتي انته ترى زودتها .اسحلك والله.
_ضحك ابوي واشرلهم اكعدو
كعدو جنهم طلاب. واحد يخزر بالثاني
حاول ابوي يغير السالفه ومولي كوى كاتم ضحكته.
ابو اسعد::باجر عرس ابن اخو ابو اجواد
لازم نحضر .
_كبل باوعت لامي اموت عله اعراس
بيت عمتي ام اجواد عيالها بالريف
واعراسهم تخبل . ردو الولد
ثابت::منو من ولدهم حسب علمي كلهم متزوجين.
ابو اسعد::ماعرف منو منهم
بس اعتقد زواج ثاني.
_ويه كلمة ابوي اجت مريم وكبل
سالت .
مريم::منو هذا ؟ الي زواج ثاني.
_واكيد مولي مايعديها سلامات رد بضحك.
مولي::ثابت .
مريم ::اي شكو بيها .
_ماهتمو لكلمتها وكملو سالفتهم بس الضاهر
هيه جان ابالها غير شي ردت مقاطعتهم.
مريم:::بالنسبه الي ماعندي مانع
اذا ثابت تزوج بس بشرط.
_التفتو عليها مستغربين
خزرها ثابت بس تجاهلت نضراته وكملت.
مريم::يخليلي بيت وحدي
وارجع اكمل دراستي..
_باوعلها رافع حاجبه .
اسعد ترخص وكام لبيته مولي ضل مدنك
يريد بس عذر حته ينسحب وعبالك نقاله
راد ينقذه واجته مكالمه كام بحجة يرد عله الاتصال.
مولي::ها اي اي جايك.
ابو اسعد::روح انته شوف شصار من شغلة
الجماعه ورجعلي خبر.
_طلع ثابت ونضراته لمريم بتوعد.
ضلينه انه وامي وحده تباوع لثانيه رادت
امي تكوم منعها ابوي وهو يوجه كلامه لمريم .
ابو اسعد::طلباتج مشروعه
وكل بنت من حقها بيت وتكمل تعليم
بس مافهمت . هل تنازل عن زوجج شنو معنا.
_وجودي جان كلش اوفر اريد اكوم وخجلانه
نقذتني الصينه مال الاستكاين شلتها وكمت
من كثر ما الموقف صعب احس وجهي
اشتعل نار . غسلت وانه احجي بكلبي معقوله ماتحبه زين شنو الي جبرها اذا ماتحب ثابت صوتهم عالي اسمعهم بوضوح .ابوي يحجي وياها.
ابو اسعد::رغم غلطج
هو عاملج بااحترام ومامقصر وياج.
مريم::عمو موهيج قصدي ترى هيه كلمه.
ابو اسعد::اها وهاي انتي كلتيها
كلمه وهو ماراد يكسر كلمتي ولخاطري
تقبلج وسكت وانتي كررتي الغلط .
_اخذني الفضول اسمع .
ابو اسعد::ولان الكلمه تمس الكل
ماردنا سمعتنا وسمعت بناتنا تتشوه.
مريم::وانه عرفت غلطي
واعتذرت منه وحلفت وحاولت اصحح
البينه بس هو . لحد الان ما جاي يكدر يسامحني
ترى انتو ماتعرفون بلي بينا ثابت معاملته الي كزوجه بس كدام الناس .
ابو اسعد::وهذا اقل عقاب.
لان اعتبرج زوجه وكال بفترة مراهقه
وغلطت وجل من لايخطئ بس كررتي الغلط بنقالج
الي زوجج مايعرف عنه .
_نزلت دموعي
وانه اسمع ابوي شلون يحجي بحركه.
مريم::ترى ماعندي شي بي
مجرد ردت اتسلى وهو مانع عليه
التواصل حته بااختي .
ابو اسعد::لهنا وعدا العيب
اسمعي يابه. العليه سويته وبريت ذمتي
من خطيتج . بس مااجبرة يتحمل عدم احترامج.
مريم::كتلك زله لسان وكلمه مامقصوده.
ابو اسعد::والكلمه الي تقلل من شأنه
اكص لسان راعيها. ثابت الي اله كلمه
بديوان الزلم مااقبل ولا اتقبل ولا اسامح
خلي ابالج ولدي كلهم بكوم وهو بكوم
يعني انه وام اسعد لا مفكرين نطيح ونكعد عد اسعد ولا يخدمنا اياد ولا مولي يدارينا .. كبرتنا عنده وهو ابنا الجبير. خصم الكلام هسه او بعد سنه هو يتزوج
عاجبج تبقين ورب العالمين يهدي سركم .
مريم::يعني فعلا مقرر يتزوج.
ابو اسعد::اعتقد عذر مشروع
حته تطلبين الطلاك . كولي موخوش انسان تزوج عليه
وهيج محد راح يلومج . وان شاء الله تجيج قسمه الي
تسر خاطرج وتكملين تعليمج وتعيشين حياتج.
مريم::لا والله اذا هيج من هسه اطلك .
ابو اسعد::هذا شي راجعلج
بس انتي ماصار دقايق من كلتي
ماعندي مانع يتزوج.
مريم::اي كلت يخليلي بيت واكمل دراستي.
ابو اسعد::لكل حادث حديث.
كومي خلص كلامي وياج . بس نصيحه
اذا الج راده بزوجج ووفعلا ندامانه حاولي
تصلحين الخراب البينكم.
مريم::هو شكوكي تعبني
كتله غلطت وحلفت اله بس ماجاي
يصدك بيه .
ابو اسعد::حاولي ترجعين ثقته بيج.
_دخلت مريم لغرفتها .وابوي طلع .
اجت امي والقهر واضح بملامحها
احس نار واشتعلت بكلبي حرامات . ثقتنا بيها وثابت الي يستحق افضل النساء وشكد ناس انطو بناتهم
وحته الخال كاله اختار اي وحده من بناتي
بوقتها ثابت كله ماريد اخسرك خاف اكتلها وتزعل.
ضلينا انه وامي نتصفن .
وفيه::جنت مخططه
مازوج ثابت اله وحده تليق بي.شكد شفت بنات
وشكد ناس انطتنا . بس ماجانن يعجبني .
_كسرت خاطري تحجي وتمسح بدموعها
رديت مهونه عليها،. قسمته شبيدج انتي.
وفية::لا موقسمته بس ابوج
قسمها اله .
_حته انه وقل لا نخطبها
جنت دوم اكلها كون ناخذج لثابت
بس تدرين هيه من البدايه مارايدته
وتفاجئت من قبلت .
وفيه::تروحله فدوى ونذر
وروح ابوي لو يبقه اخر يوم بعمري هم ازوجه.
_قدر_
_تم العقد وثابت طلع يوصل الشيخ
للباب صاح عليه ابو اسعد .
ابو اسعد::تعاي يابه .
_طلعت وانه امسح بدموعي
اشرلي اكعد كعدت كباله . باوعلي
وهو يستغفر . مد ايده قدملي ضرف
باوعتله بتساؤل.
ابو اسعد::اعتبري مهر .
_بلعت غصتي . ورديت
ماكو داعي عمو ترى زواجنا بااتفاق
والمهور للعروس الي تجهز نفسها وانه مااكون عروس.
ابو اسعد::ميخالف هذا مني وان شاء الله
نكدر نحل الامر بينج وبين بيت فاروق .
_خله الضرف عله التخم وكام
ابو اسعد::سجلي رقمي واي شي
تحتاجي لاتترددين . الله شاهد متألم لضرفج
واتمنى ربي يقدرني واكدر اامن عليج .
_كمت وانه تشكر منه
سجلت الرقم . توجه للباب ورجع باوعلي .
ابو اسعد::صدك نسيت اسالج
الابيات الي كتبتها الج حفظتيها؟
_لا والله عمو مااكذب عليك
لان ماقريتها بس مرة والورقه بقت يم
بنين بس حيل عجبتني عاشت ايدك.
ابو اسعد::احب اكتب لاهل البيت
بس يخوني التعبير . مرات يجي ابالي
الكلام والكه نفسي مرتب قصيده واردد بيها.
_قطع حديثنا . دخول ثابت.
ثابت::ها يابه نمشي.
ابو اسعد::اي انه هم عندي كم
شغله لازم اخلصها. يله يابه ديري بالج عله نفسج
وعود راسليني ادزلج الكتبته .
_هزيت راسي اي. طلعو
قفلت الباب وراهم وانطيت الاذن لدموعي
بجيت بصوت عالي. وماعندي غير العتب
واول مابديت باامي ليش هيج سويتي بيه
المن جبتيني للدنيا المالي بيها احد . حته راضي الي نفرض عليه اب هم رافضني لو خليتنا بيت فاروق والكسرة الاقوى سونه . الي اختفت بس حته تتخلص مني . احجي واعتب لحد ماتعبت كمت توضيت وصليت وهيج يوم بعد يوم احس نفسيتي كلش تعبت
مامنتبها لحالي ولا مباوعه للمريا اخلص النهار افتر بالشركه مثل المجنون . سمعت صوت الباب كمت بعجز فتحته ودرت وجهي راجعه لمكاني استوقفني سؤاله .
ثابت::لحظه اوكفي .
_التفتت بملل . وهو ينضرلي بخوف.
ثابت::ليش هيج وجهج .
_هزيت راسي بمعنى شبي
وانه اتلمس وجهي . تقدم عليه يريد يلزم ايدي بعدت .
ثابت:تعاي يابه شو كعدي خل احجي وياج
ليش هيج .وجهج انتي مريضه.
_شبيه غير افهم
ثابت::عبالك ميت وجهج
عيونج محاوطها السواد ولونج
شاحب انتي مامباوعله بالمرايه.
_هزيت راسي لا وكعدت كباله
بملل وعدم اهتمام.
ثابت::انه تركتج
تختلين بنفسج كلت اكيد بعد العقد امنتي
وضمتي مااتخله عنج وكل ضني هل شيء يريح اعصابج .
_قاطعت كلامه وانه اسال
شوكت تكمل دعوة الورث؟ عكد حواجبه
مستغرب تصرفي . درت وجهي لدولكة الماي
الي صارلها يومي عله الطبله جريتها شربت
ورجعتها وهو ينضرلي . كام متوجه للمطبخ .
ثابت::كملت اجراءت الدعوى
بس كلت احجي وياج قبل ما نبدي.
_شنو هم عندك شرط جديد
خاف تريد تعلن زواجك بيه.
ثابت::لا بس لازم تفكرين احتمال
طارق مايقبل بهل شي . وهيج تخسرينه
كأاخ وانتي كلتي انو منتضرته يطلع ومستعده
توافقين اذا تقدملج .
_رجع كعد كبالي . رديت .
وانه ماراح اخذ كل شيء بس الي يكفين
كسكن وعيشه . مبلغ اكدر اخذلي مكان حته
لو ٥٠ متر وافتحلي اي مشروع اعيش منه
حته لو اسواق من داخل البيت .
ثابت::اذا هيج مايحتاج دعوى ومحاكم
خو نحاول نحجي وياهم . واكيد هل شي
يرضيهم .بس خلي ابالج حصة امج هواي كلش.
_سكتت محتارة. رد
ثابت::حسب معرفتج بطارق
شتكولين. يكدر يفرض عله امه
واهلها او بيت محمود انو ينطوج .
_مااعرف.زين ليش ماتاخذني اله احجي ويا ونشوف.
ثابت::تمام مو مشكله
بس اريدج تفكرين وتحسبيها عدل
يعني انه متاكد اذا حجيتي ويا راح يكلج
انتضريني اطلع وانه انطيج حقج .
_اكيد.
ثابت::والبشر مامضمون وقابل للتغير
شنو موقفج اذا طلع وغير كلامه اقصد
امه اتاثر عليه يجوز هسه ماحاس بفقد والده
بس من يشوف امه والفراغ الي بحياتهم واكيد راح يستلمو حجي انو السبب بموته هيه امج.
_صح لان بيت حجي احمد
قبل لايصير كل هذا جانو رافضين وجودنا.
ثابت::اذن لو تخطين وتخلين ابالج
احتمال تخسرين طارق . لو تنتضرينه
وهو ومروته بعد مانعرف السجن مرات
يصلح الانسان . ومرات نتفاجئ انو هل شخص
تغير وصار كتله من القسوى والجحود .
_وانه ماعندي استعداد لخسارة
اضمن ربح مكان يلمني افضل ماابقى
اكل بروحي ندامه امشي بالدعوى
حجيتها وكمت متوجه للغرفه.
ثابت::هسه تاكدت عقلج بعده
شغال .
_التفتت عليه. دنك خافي ضحكته.
ثابت::جيبي نقالج جبتلج رقم جديد.
_ومنو كلك اريد اغيرة
لو هذا ضمن شروط العقد .
ثابت::لا بس حبيت اغيرة وهم هاي الشرايح
بيها خدمه اتصال مجانيه. حته انه اخذت وحده.
_وانه ماحابه اغيرة .
ثابت::تمام براحتج يله محتاجه شي .
_لا بس . ردت اعرف سونه هم تتصل بيك.
ثابت::اي قبل فترة سالتني عنج
وعن ابوها.
_ردت اكله انطيني رقمها
بس عزت عليه نفسي . دخلت للغرفه وطبكت الباب
دفنت وجهي بالمخده مانعه صوت صرختي بجيت لحد ماصدع راسي . تغير تفكيري وكل شيء بيه كلبي قسى
وملاني الحقد صرت احسب الايام بس حته تكمل دعوة الورث مقررة ابعد عن كل الناس مااريد اشوف بشر
اي شلي بيهم وهم مستنكرين اصلي . وعبالك انه اختاريت اكون بت راضي . يجي ثابت ويمل من الكلام.
ثابت::هل سكوت يمرض ياقدر
كل شيء بالدنيا نصيب وانتي افضل من هواي
بنات مشرده حمدي ربج انو وصلتي النه .
_شوكت تسافر سونه .
ثابت::سافرت . من كم يوم .
_رفعت راسي باوعتله مصدومه
يعني سوتها وعافتني . ليش ليش،لو بس جايه اشوفها
خاف عبالها اكلها اخذيني .جان كتلها ماتروح وياج.
ثابت::لا لا مو هيج ثقي باالله
هيه اكثر متاذيه عليج . بس ماردنا
نخرب الي .
_قصدك انه خراب
شنو الي .
ثابت::يابه مو هيج بس مااكدر اكلج
والله لمصلحتج وحفاظا عليها مااكدر اكول اكثر من هيج لا تلومينها اختج تعبت وتاذت وتحطمت .
_بهاي صح . انتو حطمتونا
هسه عرفت ليش جانن بنات الصعده
ورافضات التعاون وياكم لان يدرن مارح تحموهن
ولا توفرولهن سكن او عيشه يضيعن ويتشردن .
ثابت::هذا موعذر لتقبل اعمال اجراميه.
_بالعكس اصلا هسه عذرت مديحه
انضمامها للنصافات . لان اهل الصعده
موفريلها بيت كاعده مأوى لامها هيه وامها
هسه انه واختي شستفادينه ؟ غير الضياع
وتشردنا .
ثابت::ماالومج بس صدكي نقذتو نفسكم
لان سليمه كانت ناويه غير شيء.
_سؤال وتجاوبني بصراحه.
ثابت::اكيد.
_يعني انه لو ما الي حصة من امي
جان شنو مصيري . خو ليش نروح بعيد
هاي اختي . استنكفتو منها وبعدتوها بكل وسيله.
ثابت::لا مو هيج بس هيه رادت تبعد.
_ولو مارايده تبعد وين تودونها
شلون تساعدوها. وهيه ساعدت ابنكم.
ثابت::الخال جان مامن الكم مكان
بس ياقدر الى متى . افهمي يعني تبقون العمر كله
بيت مقفول بابه عليكم مثل السجن . ترى انه الي ماقبلت وكتلهم عوفو شغلت البنات يمي.
_مديحه وامها وين .
ثابت::الام ودوها لدار العجزة
لحد ما نميز حكم مديحه وبلكي تطلع.
_ومن تطلع وين تروح.
ثابت::اكيد ترجع لبيتها.
_قصدك ترجع لنفس المستنقع.
حجيتها ومشيت منطيتي ضهري وهذا حديثنا
كل مايجي صرنا ضدين واتحجج بالكلام حته اثتبتله
هم استغلونا . تعبت كلش بحيث صرت مااشبه نفسي
وحاولت جاهده اتخلى عن عقلي اكل بدون جوع
اسبح ماامشط شعري صلاتي الي اقضيها بكسل
ومرات اغلس عنها .وشكد حاول يطلعني اقترح عليه ياخذني للبيت اليم رفضت سالته يمكن وجودي معطل شغلك هنا حسب علمي هاي شركه.
ثابت::لا نقلت كل شيء لغير مكان.
_وهيج ايام . حاولت اشغل نفسي
اطبخ بس بدون فايده مااشتهي اكل
وهو كل جيه يجي محمل مسواك.
ثابت::ترى بنونه كلش مشتاقتلج
وحلفتني . اكلج تتصلين بيها.
_تعرف بيه يمك.
ثابت::لحد الان ماسالتني
بس عبالها اتواصل ويه خوالج.
_يعني ماتعرف بيك مخليني
بالشركه . اكيد . سكت شويه ورد.
ثابت::تردين اوديج الها عبالج خايف
لو مستعر منج .
_تجاهلته كلامه . وسالته محاوله اغير
الموضوع. اكلك صدك
اجه بيده صينيه مال اكل باوعت
عرفته من اهله وكل ضني ثواب. كعد وهو ياشرلي.
ثابت::يله يابه ترى انه مااكلت بالبيت.
_نزلت بدون شهيه اكل ومبين حديثنا.
كتله هذا طبخ ام اسعد .
ثابت::اي .اليوم ذبحنا فده.
_رفعت راسي متساله.
ثابت::للباشا لان صار عنده ولد.
_وكفت الكمه بلعومي
يعني عايش حياته ومتونس
واختي الي تغربت وضاعت ومااعرف اذا مرتاحه
لو لا يعني .طلع كلامها صدك من كالت ينساني
ثابت::ها صفنتي .
_هزيت راسي ماكو شي وكمت
مضاهرة بالاشباع .
ثابت::بدون زحمه عليج استكان جاي.
_اتحرك وهو نضراته تتبعني
وماعرف ليش الحقد ترس روحي
شرب جايه وطلع . قرب معود اعلان الورثه
مااعرف احساسي خوف لو شنو نبهني من صفنتي.
ثابت؛:لحد البارحه حجي احمد دز ناس
كال نتراضه بمبلغ وتتنازل عن الحصة المقررة.
_رديت بحيرة . انته شتكول؟
ثابت::مااكول هذا حقج وانتي اعرف
خاف اكلج اقبلي وبعد يومين تلوميني.
_قطع حديثنا صوت الباب كام فتحه
دخل الباشا .سلم وكعد بتعب باوعتله
حيل متغير ومبين عليه مريض .
الباشا::ها يابه شنو قررتي.
_رد عليه ثابت.
ثابت::لحد الان مااتخذت اي قرار.
الباشا::تردين رايي .
_هزيت،راسي اي.
الباشا::عدى انو هيه حصتها شرعا وقانونا
همه مدانين الج بديه . حته وان كان
فاروق دفعها بالغلط فهو انحسب قتل غير متعمد.
_نزلت ادموعي . بس هو ضربها
وقسى وياها.
الباشا::خلص يزيدون المبلغ يعتبروها ديه.
_سكتت . ضلو همه يتناقشون باامور عملهم
وماعرف ليش رغم الباشا مابذر منه غير الاحترام
بس انه جنت احاول اغثه. كمت وانه واسالهم
بخبث تردون عشه . رفع راسه ثابت باوعلي متفاجئ.
الباشا::لا يابه انه شويه واروح.
لا تعبين نفسج .
_رديت متجاهله نضرات ثابت
عندي عجين كباب عروك بس جيبو صمون..
الباشا::هههههه نقطة ضعفي
اكيد ماافوت الكباب .
_بسرعه حضرت كلشي
طلع ثابت جاب صمون كليت وهو
حضر زلاطه . كعدنا ناكل اباوع للباشا يكاله
بدون صمون عبالك مقبلات.
الباشا::عاشت ايدج .
_بالعافيه. تدري ماجنت احبه
بس من سوته سونه واكلت بوقتها
تفاجئت بالطعم ومن يومها اتبعت نفس الطريقه.
الباشا::الاكل عله النفسيه وانتي نفسيتج طيبه.
_حاول ثابت يغير الموضوع
ثابت::اكلك شنو صار بموضوع
راضي؟
_رفعت راسي. اباوعلهم اريد اتاكد اذا المقصود نفسه.
الباشا::اعتقد المحامي مقدم تقارير
بحالته . واذا التمييز لصالحه يطلع.
_بعد العشه والجاي ترخص الباشا.
وقبل مايطلع التفتت موجه كلامه الي.
الباشا::لا تخافين اي قرار احنه وياج
يله اودعناكم . وان شاالله تعزمينا بيتج .
_اكيد اسويلك اطيب امدخن . هم سونه علمتني.
باوعلي وهو مبتسم . بس نضراته ربكتني وعبالك
يعرف الي يدور بالي . هز راسه بأايجاب وطلع عفتهم بالباب ورجعت شلت الاستكاين.
ثابت::قدر عوفي الي ابيدج وتعاي
_التفتت عليه . شكو.
ثابت::شوفي يابنت الناس لحد الان
احنه مابذر منا غير الخير وياج مقدر حالتج
وعاذرج بسبب الي انتي بي. بس مو معناها اسكت
عن تصرفاتج المتعمده .
_قاطعته. خير شسويت .
ثابت::تعرفين شنو اقصد
ياريت ماتخلطين الامور وتخلين
الحقد يفقدج انسانيتج.
_ترى ماجاي افهم عله شنو تحجي.
ثابت::لا تحاولين تشوهين صورتج
بعيني اترجاج وتخليني اغير نضرتي بيج.
_ليش انته شايفني بصورة حلوة
ماجنت اعرف . اسمع اخر همي تفكيرك ونضرتك
هنه ايام ونخلص ولا خلف الله عليكم ترى اقل واجب مساعدتكم الي .
ثابت::تمام خير ان شاء الله
_حجاها ودنك اخذ سويج سيارته وجكايرة
وطلع . ومن بعد هل يوم انبنا بينا حاجز والكلام صار شبه معدوم بينا يجي عله كد السؤال شمحتاجه ويروح. مليت افتر مثل المجنون اليل كله مانمت افكر باجر شلون راح اواجه فاطمه وبيت حجي احمد فزيت كوى افتح عيوني.
ثابت::استعجلي يابه هم ياله.
_زين ميصير المحامي هو الي يوقع بدالي.
ثابت::ميصير لازم تحضرين يم كاتب العدل.
_بدلت وطلعت باوعلي . من فوك ليجوى
ثابت::قدر روحي البسي الجبه الجبتها الج
ورتبي وجهج .اكو مثل يكول تعده عله عدوك
جوعان ولا تتعده عريان. القصد لاتخلي المقابل
يعرف حالتك النفسيه او ضعفك تماثل بالقوى
_بدون مااجادله رجعت للغرفه بدلت
طلعنه وطول الطريق هو يحاول يخفف
من توتري .
ثابت::ابد لاتبينين ضعفج . اعبري من يمهم
وانتي رافعه راسج .
_وصلنه نزلت وعيوني ادور بين الناس
دخلنه المحكمه . صار كبالنه محمود شهكت بخوف
التفت عليه ثابت متفاجئ وجه نضراته وين اباوع
تقرب لزم ايدي عاصرها قاصد يطمني ماتوقعت اشوف فاطمه نفس وكفتها وجنت مفكرة بعد موت فاروق راح تنكسر وحسبت اشوفها محنيه والحزن مهدم جبروتها
بس ابد مامتغير منها شي . نبهني من شرودي ثابت.
ثابت::ها يابه شوصيتج لاباوعيلهم
_كعدنه مقابيلهم . كام ثابت
حجه وياهم رجع يمي سالته شنو
ثابت::ماكو شي بس اكدت عليهم
قبل التوقيع يسلمون المبلغ لطرف المحايد بينا.
_صاح الموضف بااسمي كمت اتلفت
دخل وياي ثابت . سلم هويتي باوعلها كاتب العدل
كاتب ::تمام اخذ راحتك انته.
_طلع ثابت . اشرلي الموضف اكعد
كعدت اعصر بااديه . وتافجئت بكلام كاتب العدل.
كاتب العدل::بابا انتي متاكده من تنازلج
اكو احد غاصبج مهددينج .
_رديت بتوتر . لا لا .باوعلي بعدم قناعه.
نزل القلم من ايده . ورد.
_عندج علم بالاملاك الي بالتركه
اقصد الي باسم زوج والدتج؟
_مااعرف بس ادري اكو اله املاك.
اتجاهل كلامي واشر للموضف اليمه
يسد الباب . وكاله انطيها ماي. اخذت البطل منه
واديه ترجف اتلفت بخوف . حجه بنبرة هادئه.
_. ترى اذا اتنازلتي بعد ميحقلج
اطالبين بشيء والاملاك الموجوده مو مال واحد
يتخله عنها لسهوله ممكن اعرف السبب .
_ماكو سبب بس انطوني مبلغ
واتفقنه . هز راسه بأاسف ورد.
_زين هذا الولد زوجج مقتنع بالامر.
_كال كيفج هو انه مارايده بس المبلغ المحتاجته.
_ممكن تحجين حته اساعدج
شكد انطوج .
_ !!!! هذا الي اتفقنه عليه.
_اقل من التفاليس منطيج
احجي لاتخافين ليش قبلتي
وزوجج شلون وافق.
_من كثر ماربكني بااسئالته
ماحسيت اله انه مسولفتله كلشي
بسرعه كام ردت اكوم اشرلي ابقي .
طلع شويه ورجع انخبصو الموضفين اليمه
اتملكني الخوف ضليت بس اباوع بعيوني
_شوفي انه مااكدر احجي ويه زوجج
انتي فهمي بعدين . بس راح احاول ااخر
زوجة فاروق يمي واكيد الي وياها مايعوفوها
وانتو طلعو من المحكمه .
_ليش يعني مافهمت .غير انكمل لان همه كالو مانسلم
المبلغ لحد ماتوقعين .
_بابا خلي ابالج هذا حقج
ورب العالمين قاسمه الج لاتفرطين بي
هل الفلوس تفيدج تحميج من جوع وحاجه
تامنين مستقبلج . بيها بالفلوس تكدرين تخلين حمايه
تحرسج مو رجال مسوي عليج فضل بعقد شيخ.
_هو يحجي وانه ادموعي اتصب.
_حته لو مااخذتي الحصه كلها
بس لازم يعوضونج بمبلغ يسوى التنازل.
اذا صار حجي بينكم كليلهم ماجنت اعرف بالاملاك
الي بااسم ايوب .واطلبي مبلغ زين.
_صفنت من عدد الاملاك الموجوده
اكثر من بيت.محلات ومشاريع .
_يله مسحي دموعج وكومي بسرعه مثل مافهمتج
بس يدخلون انتو اطلعو من المحكمه .
_طلعت تلكاني ثابت يسال بقلق
وهمه يباوعون . صاح عليهم الموضف
دخلو اشرت كلت لثابت خل نطلع .
ثابت::لحظه غير نكمل .
_امشي بسرعه وبعدين افهمك.
باوعلي مستغرب تقرب مخلي ايده
عله كتفي يمشيني منبين الناس
طلعنا متوجهين للسايرة صعدت وبس تحركت السيارة
مسافه عن المحكمه وتلفون ثابت دك رفضه وهو
والتفت عليه يسال.
ثابت::يابه فهميني شصار .
_خنكتني العبرة . ماكدرت احجي نزلن دموعي
ضل يستغفر طبك كبال اسواق نزل جاب ماي
ثابت::شبيج معوده . خلص ارتاحي
اهدي .
_وصلنه وانصدم بالباشا واياد
واكفين بالباب مال الشركه . تلكونه بقلق.
الباشا::مو ندك عليك ليش ماتجاوب.
_دخلنا وهمه يتسالون وتلفون ثابت ماسكت
رد برود .
ثابت::نعم حياك الله اخي الي عندك سوي
خل ابالك انه مااتهدد .
_سد التلفون والتفت عليه قبل مايسال
جاوبته . مااتنازل حصة امي اكثر مما كالو.
ثابت::خو من البدايه كتلج .
_بلعت ريجي بخوف ونضراتي ادور بينهم
توقعت راح يعترضون ويلوموني .فاجئني اياد بكلامه.
اياد::حقها ومحد يكدر يجبرها
خلص شيردون يسون يسون والله اوكفهم
عله تك رجل .
الباشا::بس بعد ميصير تبقه هنا
انقلها لذاك البيت .
_قطع حديثهم نقال ثابت
ومن كلامه عرفت الحجي المتصل.
ثابت::ها يابه لا لا ماكو شي
يولون حجي مو من حقهم البنيه ماجانت تعرف
بقيمة الاملاك الموجوده اي بلغ عمامنا للاحتياط.
_ضلو يتناقشون عفتهم ودخلت للغرفه
الخوف والندم اخذ من حيلي كعدت اديه عله
راسي محتارة . مااعرف شراح يصير .صاحو عليه
طلعت لكيت مولي سلمت عليه .
ثابت::تاخذها لذاك البيت وحاول
بيت جبار مايشوفوك من تنزلها .
_شكد حاولت اكتم شهكتي
بس موقفي بين زلم غربه محتارين باامري
غلبتني ادمعوعي بجيت بونين طلعو الولد للكراج .
ثابت::هيج شايفتني ضعيف
ومو اهل لحمايتج .
_باوعتله بتعب . رديت بصوت مخنوك
لا بس اكيد ماراح يسكتون محمود من زمان يكرهني.
ثابت::وعيونج اذا ماخليته يتعذر عن كل
تصرف واذيه سببها . مااكون رجال . مسحي دموعج
يله مولي منتضرج وانه وصيته يتسوك شتردين كليله
واذا تخجلين انزلي انتي للاسواق وتسوكي .
_حالتي والموفق . خلني اتقبل قربه
تقدم لمني لحظنه مثل اب يطمن بنته
بجيت بصوت عالي. ليش انه هيج ليش ماعندي اهل .
ثابت::بغض النضر عن وجودي بس شوفي الباشا
الي عايف شغله واكف بالباب . اياد وهو يتوعد
مايخلي احد يجبرج . الممرض مولي وهو فرحان
راح انطي السيارة هسه يفر البصرة بيج بحجت
انريد نتسوك.
_ابتسمت بحزن . ابتعد وهو يباوع بوجهي
نضرات ماعرفت افسرها . بسرعه لميت
ملابسي و قبل ماوصل لباب الصاله وكفتني كلماته
الي حجاها بهمس ويمكن بدون ماينتبه .
ثابت::قدري الثابت . انتي.
_التفتت عليه اريد افهم . دنك متجاهل
نضراتي . طلعت مولي بالسيارة صعدت .
مولي::اكلج نروح لمول ..... خوش بي شغلات.
_ضحكت . فعلا كلام ثابت
فرني الاسواق كلها . لحد ماتصلو بي
مولي::اكلج ردي بدالي كولي .
_غصيت من الضحك . اشرتله لا.
مولي::سهله تحتاجيني . اله اضربج ابرة
_لحد ماوصلني للبيت . احس فطست من الضحك
نزلني ونزل الغراض دخلت البيت نضيف بس وحشه
ايام وهمه مناوشات كلام ويه بيت حجي احمد
كاعد كبالي وعينه بالحاسبه . دك نقاله رد بنزعاج.
ثابت::ها شكو .
_مادري شكلوله . سده النقال وشمرة
بصفه تاخر الوقت خجلت اسال شوكت تروح
شال غراضه وكام لوحده من الغرف ضليت
اصفن تالي مليت كلت ادخل انام شسويله
لميت الصاله وتوجهت للغرفه استوقفني
حديثه يحجي بصوت هادء اخذني الفضول
اتسمع مرة يحجي همس ومرة لا خليت راسي
عله الباب .
ثابت::لا يابه بعيوني شتحجين انتي .
_منتجه عله الباب وبالي يجيب ويودي
اي اكيد زوجته. لالا خو يروحلها بس
ميه بالميه صاحبته .سكت شويه ورجع كمل .
ثابت::اها اي زين تسوين بخدمتج
بس انطيني خبر شوكت وانه اجيج.
_غمضت عيوني
حيل وكأنو اريد اشغل كل حواسي للسمع
ماحسيت اله الباب انفتح وبحركه سريعه
توازني جرني مدخلني للغرفه من الفشله ماعرفت شسوي ضليت مغمضه. حسيت طبكني عله الحايط
انفاسه بوجهي .يحجي وهو يمرر اصابعه عله خدي .
ثابت::تدرين استراق السمع حرام
_ماتجرئت افتح عيوني
ثابت::ليش تتجسسين عليه.
_هزيت راسي بنفي.
ثابت::فتحي عيونج .
_اريده بس يبتعد محاصرني
عبالك لازمله حرامي . من فشلتي بجيت
جرني لحظنه وهو يضحك .
ثابت::شبيج يابه لاتموتين .
_دفعته وطلعت
لحكني يحاول يخفي ضحكته .
ثابت::وهذا محمود دازلنا كوامه.
_يعني شنو .
ثابت::لا تشغلين
بالج كعدي عندي موضوع وياج.
_كعدت وهو يحجي.
ثابت::راضي مريض وبسبب حالته افرجو عنه الضاهر ايامه معدوده والاعمار بيد الله بس حسب ماعرفت صاير بي تدرن.
_رديت بعدم اهتمام . اي شنو يعني مفهمت.
ثابت::كلت لازم ابلغج . خو مهما كان.
_قاطعته .ولا يكون ولابيوم اعتبرة اب.
ثابت::حقج مالومج.انه بلغتتج
حالج حال اختج.
_وهيه شكالت.
ثابت::اكيد تخلف عنج لان عاشت ويا
طفوله ويجوز بيوم التمست منه حنان
وهيه غريزه بالفطرة ماتكدرة تكره ابوك او امك
حته وان كانو قاسين عليك. تردين الصدك تفاجئت من كالت ايام واجي
_يعني راح تجي. عله موده
ههه شفت . اذن مامعتبريني منهم بحيث
سافرت وتركتني بس من سمعت باابوها مريض اجت.
ثابت::هواي امور ماتعرفيها
ومااكدر احجيلج بس ماعافتج اله لاجل مصلحتكم.
_هو يحجي . وانه دموعي تنزل
مشتاقتلها رغم حيل شايله بكلبي عليها
غمضت اتخيل شكلها معقوله تغيرت هسه
وشكد ماتخيلت صدمني الواقع ابد مو سونه
شخصيه ثانيه امراءة كامله بشكل وقوة عجيبه
نضرات ثابته رزانه .
