رواية زوجه ثانيه الفصل السادس بقلم جمانه السعيدي
بقيت يم اهلي واني محتاره مصيري شنوووو
وين اروح منو راح يفهمني
وورا يومين اجا علي من الدووام
علي يداوم بغداد كل أسبوعين ينزل مره
واحنا بمحافظه من محافظات الوسط
من شافني هيج
حس عليه شي
علي خيتي حبيبتي شبيج شكلج ماعاجبني ابد
فاطمه مابيه شي سلامتك
علي لابداعت امي العزيزه شبيج
فاطمه ما اريد اشغلك ابد مشاكل بسيطه وهسه تنحل
علي اني اريد اعرف هاي المشاكل البسيطه واعيشه ويه اختي
فاطمه حسيت بحنيته عليه وكمت ابجي
علي لا لا ما اقبل تبجين ابد كل مشكله واله حل
فاطمه اله مشكلتي اني ما مرتاحه بيت عيالي
وطارق مايدري بحالي ولايهتم بيه
عايشه خدامه بيتهم
علي لاتضوجين اني اشوف طارق واحجي ويااا
شنو طارق يضربج
فاطمه هو اصلا مايجي للبيت اله كل شهرين لو تلاثه
علي اني احجي ويااااا
فاطمه ولو ادري الكلام ويا مايفيد ابد بس بلكت الله يهدي ولله عايف البيت ومايجي ابد ويعاملني اسؤ معامله
طبعا ورا السقوط راتبنا اتحسن ووضعنا المعاشي
صارافضل بهواي والعلاج كمنا نحصله من الدوله بنص قيمه
لان سوينا دفتر صحي الامي
الي احنه مانعرفه بهاي الفتره طارق جمع كم واحد من امثاله وصارو عصابه من جديد بقيادة طارق
طارق اندل طريق الحرام وبعد مايعوفه ابد
خصوصا الفلوس الي ايحصله من ورا فلوس موطبيعيه
يوميه يصعد سياره شكل
يمكن يعوض النقص الي يحس بي
مرتين راح علي عليهم ومالكه طارق
طارق كام مايرجع للبيت ابد
بس عمي ابو طارق حاجي ويه علي وكايله خليه ترجع للبيت
وعلي كايله خليه ترتاح وترجع
علي رجع الدوامه وماشاف طارق ابد
البيت الي يمنا جان فارغ نزلو بي ناس جدد
ولد ضابط وزوجته وعدهم اثنيين اطفال ولد وبنيه
البنيه عمرها عشر سنوات والولد ست سنوات
امهم اسمها ام حسين
الحايط بينا وبينهم ناصي موكلش عالي
يعني من اوكف يطلع راسي منه
ام حسين صاحت علينا تريد ماي تنضف بيتهم
احنا عدنا حنفيه بلترك وصلنا الصوندا ونطيناها الها
البنيه حبابه وتنحب كلشي
قررنا اني ومريم نطبخلهم عشى ضيافه لان جيران جدد
هاي العاده بعدها اكثر العراقيين يسون اكل للجيران الجدد
يعني طبخنالهم عشى بسيط الجود من الموجود
البنيه اخذت العشى و حيل اتشكرك من عدنا
لليل رجع اجه عمي مره ثانيه
اني راسا اتمددت وتغطيت
وكتله بعدني مريضه
وكتله لاتشغل نفسك بيه يجي علي ويحل هاي المشكله
ضل ايلح بس ما أخذ مني لاحق ولاباطل
المشكله عمي ابو طارق يدفعه عليه
كملت شهر بيت اهلي وعلي كلما ينزل يروح الطارق بس ما يلكا موجود
بيت عيالي عمي ابو طارق يدور طريقه يرجعني بيها
راح تكووولون انتي ليش ساكته
احنا بلنسبه الهم ناس فقره واني محد راح يصدكني
ماليه سند حتى عمي صار بصفهم
بعدين ابو طارق كدام الناس غير شكل ماتبين علي هاي السوالف ابد
بعد صارله ضلع بلدوله والناس تتقرب منهم
عمي حتى خالتي جان يقنع بيها ترجعني
عمي انتي مرتاحه ما ترحين ترجعين جنتج فاطمه
خالتي خليه يارجال خطيه زوجه دووم مو يمه واحنا حابسينه بهل بيت لاطلعه ولادخله حقها تضوج
عمي شني حابسينها لازم تردين نفر بيه
بعدين زوجها على شغله قابل يتونس
خالتي هسه بس تطلع الشهاده مال طارق اخلي ابن عمي يوضفه ويستقر هنا بعد ماكو روحه البغداد ابد
لو يكعد يمها بلكت يصير عدها طفل
هي هم تستقر وتكعد بلبيت
عمي روحي جيبيه وتعاي تتعود بعد ماتكعد بلبيت ابد
وخالتي اجتني مرتين واني كتله بعدني مريضه ما اكدر
كل مره تجيني تنطيني مصرف وجيبلي وياها فواكه وحلويات
تكلي عمج يكول البيت وحش بدونها كلليلها ترجع
كلت بكلبي وحشت علي دنيا
انشاء الله ماتشوف راحه ابد لا بلدنيا ولا بلاخره
امي حالته شويه احسن يعني مستقره بس عايشه على المهدئات
إلى أن يوم كاعدين العصر وكب صريخ قوي بشارعنا
الشارع انخبص
خليت شال على راسي وفتحت الباب صحت ولد زغير بلشارع كتله شكوووو
كال ذولك الناس ابنهم انكلبت بي السياره ومات
باوعت شفت الناس ملتمه بيت عيالي
فاطمه......ولج مريم جيبي عباتي والبوشيه الصريخ طالع من بيت عمي ابو طارق
طلعت اركض وصلت لكيت خالتي املخه نفسها والبنات يبجن والناس ملتمه وتصرخ
لزمت ساره وهزيته كتله شكووو شصار
ساره طارق طارق انكلبت بي سيارته ومات
كمت ابجي وكعدت بلكاع
ساعته مآ اعرف ليش ابجي رغم طارق كان قاسي وياي
يمكن ابجي لان لان منضر خالتي يكسر الخاطر
الابن مهما يخطء يبقى عزيز
واخواته يبجن بحركه
ويجوز ابجي من عدل رب العالمين الي لكالي حل نهائي
المشكلتي الصعبه هاي
يارب احمدك ماكسرت خاطري ولكيتلي حل نهائي وابدي
لان الي مثل طارق مستحيل يطلكني
مو محبة بيه
لان يعرف اني مسكينه ومستحيل اكشف سره
اذا ازوج وحده غيري مراح تسكت راح تفضحه بين الناس
بقيت بيت عيالي لمن خلصت الفاتحه
ورجعت بيت اهلي لان لازم اخلص العدا
على فكره ام حسين جيرانه اجت وراي للفاتحه رغم هي توها ساكنه وماتعرف احد
بس اجت علمودي
هلمره تحررت فعلا من قيودي بعد محد يجبرني على شي
خلص الظلم
صحيح انحبست لحد ماخلصت العدا بس على كلبي مثل العسل
ماكو احلى من الحريه
خالتي اجتني تشوفني
خطيه ممروده مرد على ابنه وحالها متغير
مريم اجو عليها خطابه ولد اقاربنا
كلش خوش ولد وحيد امه
عدا شهادتين وموضف
طبعا مريم تركت المدرسه لمن عمتي ازوجت
حتى تبقى ويه امي
هلمره سئلنا علي هواي رغم هو اقاربنا
بس ميخالف هم طارق واهله الناس حمدتهم
مريم تخبل عبالك بلبل وهسه كبرانه وحليانه اكثر
رحت وياها وجهزته ملابس وذهب ولان وحيد امه سوله عرس يخبل
اما عمي كام مايجينا اله شغله مهمه يله يدخل بيتنا
الحمد لله احنا مامحتاجينه بشي ابد
صارت ام حسين صديقتي المفضله من اضوج اصيح عليها من الحايط ونسولف
ومن اطبخ اي شي ادزلهم منه
جهاله يحبون طبخي ويعيبون على طبخه
تكول حتى ابو حسين يكووول خل فاطمه تعلمج طبخ
نفسها بلطبخ يجنن
اذا تطلع تعوف الجهال يمي يونسوني ماشاء الله كلش اذكياء وشطار بلمدرسه
تخرج علي من الكليه وفرحتي ماتنوصف ابد
كمت اهلهل وابجي الحمد لله صار عدنا سند بلدنيا
ودي اصيح ياناس اخوي ضابط
ومريم حبلت وجابت ولد يخبل
شكد اشتاقله ودي يوميه تجي واشوفه
ام حسين صارت وحدا من عدنا تشاركنا بافراحنه ومناسباتنه كلها
حتى الاكل نتشارك بي
خل اوصفلكم ام حسين
سمره وتقريبا طولها ١٥٥سم ملامحها حلووه
اما زوجها طويل وعضلات وشكله حلو وشخصيه
فد يوم اني اخلي الخبز اليابس بلترك البينا وبين ام حسوني
طلعت اخلي الخبز ثاري ابو حسين بلترك عدهم حنفيه عاطله ويصلح بيها
اني بس شفته نشغت وكعدت بلكاع لان الحايط راسي يطلع منه
هو دنك ودخل
اشويه ودزلي اعتذار بيد ام حسين ان احنه اهل وهو موقصده
وقرر يعلي الحايط بينا ويعوف بس نص متر
علمود اني وأم حسين نسولف منه
ناس محترمين ويقدرون الجار وجورتهم حلوه
بعد ماتخرج علي وصار عندا راتب زين
قررت ازوجه
اريدله بت حلال اريد يصير عدنا جهال بلبيت نتونس عليهم
وبدت ادور مره نروح اني وأم حسين ومره اني ومريم
بقينا ندور اربع اشهر
يله لكيت بنيه بنفس المواصفات الي هو يريدها
وفعلا خطبناها وبدينا نجهز
ام حسين ابد ماعافتني نشتغل سوا
بما ان رجلها عسكري من يلتحق تجيني ومن يجي مجاز
ما اشوفها
مرات اسمعهم يتعاركووون
بس ما اسئلها هاي شغلات خاصه بيهم اني ماليه ادخل بيها ابد
قبل العرس باسبوع كعدت على صوت امي تتقيى
لزمتها مصخنه وترجف وتكرمون ترست الكاع بس تتقيى
زين اني بس وحدي بلبيت شلون
خابرت عمي مايرد ابد خابرت عمتي ماكو
الساعه سته الصبح
رحت اصيح على ام حسين من الحايط ماكو جبت حجاره وشمرته على بابهم
ابوحسين نايم وما احس آله صوت قوي على الباب مال الترك
وصلت يمه اجته حجاره ثانيه
عرفت فاطمه محتاجه شي
صحت شكوووو من ورا باب الترك يعني مافتحت الباب احتراما اله
فاطمه... اني خويه الحكلي امي ما اعرف شبيه اريد ام حسين
ابو حسين رجعت وكعدت ام حسين ولج اكعدي فاطمه امها تخربطت
فاطمه اجت ام حسين تركض هااا شكوووو
فاطمه امي ما اعرف شبيه
ام حسين ولج هاي مصخنه وتختض كلها البسي عبايتج
خل ناخذها للمستشفى بسيارة ابو حسين
فاطمه اوكفي ساعديني خل نغير ملابسها
غيرنا ملابسها ولبست عبايتي والبوشيه نزلته على وجهي
وطلعنا لكينا ابو حسين منتضرنا بلسياره
اخذناه للمستشفى لكو عدها التهابات وسؤء هضم مسببات الها هاي الحاله
الجهال بقو وحدهم بلبيت صممت يرجعون خاف يكعدوون ويخافون
واني اخابر عمي يجي يرجعنا للبيت بعد مايخلص المغذي طبعا
ام حسين راح إريك الجهال واخليهم يم الجيران وارجعلكم
خابرت عمي مايرد
ساعه ورجعولي اثنيينهم ام حسين وأبو حسين
خلص المغذي ورجعنا للبيت
فاطمه ما اعرف شلون اشكركم انتم أكثر من اهل
ام حسين لاتشكرينا هذا وجبنا واحنا فعلا اهل
وصلنا وراح ابوحسين شويه ورجع مسوك النا ودز المسواك بيد ام حسين
شكد حاولت ارجعه بس ما قبلووووو
كلتلها خلاص لاتطبخين اني راح اطبخ هاي الدجاجه وادزلكم غدا
ام حسين فرحت تكول الجهال يحبون طبخج
امي نامت نومته بلغرفه الثانيه ونضفت غرفته
سويت برياني ودجاج ودزيتلهم غدا
شويه واجتني ام حسين
ام حسين فاطمه راح يطردوني من البيت من وراج
تخبلو على الاكل الجهال يكولون من يسوك بابا
دزي المسواك الفاطمه تطبخ النا
فاطمه الف الف عافيه على كلبكم
اجا يوم العرس وكانت فرحتي شكبرها
عرس اخوي الوحيد التمت الأقارب والاصدقاء
كانت حفله تجنن
وصار عندي اخت بلبيت
صحيح مريم ماعايفتني كل أسبوع تجي وتبات عدنا ليله
بس زوجه مايقبل يوميه يجيبه
ومتعلق بابنه من تجي يبقى بس يخابر عليه
الحمد لله زهره زوجت اخوي حبابه وخلوقه
والبيت صار بي حس
ويوميه نجتمع اني وأم حسين وزهره ونبقى بس نسولف
حسيت نفسيتي صارت احسن حتى وجهي صار يخبل
شباك غرفت امي صاير على الترك
سمعت ام حسين وأبو حسين تعاركووو بس هلمره عركه جبيره
الساعه ١٢ بليل
شويه وندكت الباب طلعت لكيته ام حسين تبجي
فاطمه ياستار شبيكم انحسدتو عين الي ما صلت على النبي
دخلته وجبتله ماي شبيج شكووو
ام حسين اني ماعاجبته ويوميه يهددني يزوج عليه
خلي يزوج بس يخلصني اي شي اسوي مايعجبه
فاطمه سهله وبسيطه ولاتضوجين مايزوج عليج ابد
نامي وارتاحي وباجر يصير خير ان شاء الله
شويه وندكت الباب
فاطمه منووووو
ابو حسين اني ام حسين يمكم
فاطمه اي يمنا خليه الليله ترتاح وباجر ترجع
ابو حسين لا خليها ترجع للبيت اني راح اطلع
فاطمه ماكو داعي تطلع الدنيا ليل خليها يمي وباجر ترجع للبيت
ابوحسين ازعجناكم
فاطمه ماكو اي ازعاج ان شاء الله
رجعت فرشت فراش يمها وكمنا نسولف
فاطمه احجيلي شلون تعرفتو انتي وابو حسين وزوجتووو
ام حسين لاتعرفنا ولاشي امي وامه صديقات وخطبتني
هم من عائله زينه وافقنا عليهم
فاطمه تحبي
ام حسين طبعا غير زوجي
فاطمه تسويله الأشياء الي يحبه
ام حسين مثل شنووووو
فاطمه يعني من يلتحق بلجيش كل شويه تخابري
ام حسين لا هو يخابر بليوم مره يسئل على الجهال
فاطمه.....يعني ماتخابري وتكلليله مشتاقتلك
ام حسين ولله بطرانه
فاطمه ليش بطرانه موتكولين احبه
ام حسين هو يدري احبه ومشتاقه بعد عليمن مخابرته
فاطمه هم يضربج
ام حسين لا ابد صار ١١ سنه متزوجين ولايوم مد ايده عليه
بس يصير عصبي ويصيح عليه
فاطمه هم عنده علاقات
ام حسين لو عنده علاقات ما كال ازوج جان يروح يتونس ويرجع عليه
بعدين هو متدين كلش ولايفوت فرض ما يصلي
فاطمه ماينطيج مصرف
ام حسين لاولله نص الراتب اليه
فاطمه زين ليش ماترضينه
ام حسين شلون ارضي
فاطمه تلبسين اله وتتمكيجين وتتعطرين
وتتنتضرينه
ودلعينه يعني هو يغيب ويرجع يلكاج نفس وضعج
ام حسين يا مكياج اني مامشتريه مكياج بس مكياج عرسي
فاطمه يااا ليش شني قصتج انتي راح تضيعي من ايدج
بعدين صارلي سنه اعرفج لاشفتج رحتي صالون ولاغيرتي لون شعرج
ولا تلبسين اشياء دلع حلوووه
دشاديش قصيره
اني وياج باجر نبدي خطه جديده
شكرا لزيارتكم عالم روايات سكيرهوم
