رواية سراب الفصل السادس بقلم جمانه السعيدي
سراب....خلصن اليومين بطلوع الروح
لان ابني يغار من اخوي وبس يبجي واخوي مستغرب الكل وبس يبجي
وعمتي تحجي عليه تريد شغل
ورشيد يدخل ويطلع ماعاجبه الوضع لان ثنيبنهم يبجون
واني امتحنت بيهم
اليوم الثالث اتصلت على امي اريد اشوف يمته ترجع تاخذ اخوي لان تبهذلت بسببه
بس ماترد عليه
بقيت طول النهار اتصل وماترد
ياربي وين راحت ليش ماترد واني شلون وضعي هيج
رشيد كان كاعد على اعصابه بذني اليومين
وساكت لان مايصرف شي
رشيد...خلصن اليومين وين امج ترا احنا ماناقصين دوخه
سراب...اي اتصلت بيه باجر تجي
رشيد... باجر تاخذ اخوج ترا بعد مااتحمل صوتهم هو واانمار يبجون
سراب...اي باجر تجي
بقيت اتصل بيه وماترد عليه شكد احاول اخلص شغلي واسكتهم مااكدر
ثنيينهم لازمين رجليه ويبجون
لو يتعاركون أنمار كل شويه وضارب مصطفى يغار عليه
وامي ماترد ومااعرف هي وين صارت
جمانه السعيدي
فات اسبوع وامي ماكوو واني كل شويه مطلعه عذر
ورشيد اكل راسي
مايريد مصطفى بلبيت
ياربي زغير وين اخلي
كمت احاول اخلي ينام من يجي رشيد حتى لا يحجي عليه
المشكله امي ماترد واني مااعرف وين صارت
الفلوس الي خلتهن امي خلصن
واني ماعندي اشتري حليب
ومصطفى اليل كله يبجي متعلم على الممه
كعدت وكمت ابجي ياربي هاي هم تنحسب عليه ام
هي تعرف وضعي وتعرف عيالي بخلاء
ومايهون عليهم كلشي
والنوب حملتني مسوليه جديده
كمت اخلي شويه حليب جياسه وشكر حتى ينام
يكسر الخاطر
ياربي فدوه العينك انطي الناس محرومه مو الامي
اني شحصلت من امي قبل لا هذا المسكين
شهر خلص وامي ماكووو
ورشيد يدخل للبيت ويطلع يغلط عليه
خوب اذا دخل ولكاني اوكل بي
ينجن بلزايد
رشيد...اني شعندي حتى اصرف على اخوج اي كل شويه اطبخي ووكلي
مو اني كاعد على كنز امج تروح تتونس واني اشيل همه
باعي تتصلين باجر تجي تأخذه لا قسما بلله حتى انتي اطلعين من البيت
شنو اني خلفته ونسيته
امج مستهتره اني ليش اشيل مسوليه زواجه واستهتاره
اللج بس باجر اذا مارجعتي اخوج الامج
حتى انتي مالج مكان بيتي
جمانه السعيدي
طلع واني بقيت اتصل وماترد اصلا يطلع خارج الخدمه
بليل حاولت اصالح رشيد واقنعه بلكت الله يهدي
يقتنع هذا الطفل المسكين شنو ذنبه
جمانه السعيدي
سراب....فدوه رشيد خطيه زغير وين اخلي امي ماترد
مااعرف ماتت اندعمت انسجنت
وكته وين وداها انت كلبك جبير طفل زغير وماياكل هواي
ثواب الاهلك اتحمله بس هاي الفتره
بلكت امي ترجع وتاخذه
رشيد....ماكو شوفي امج يمكن راحت تزوج الرابع واجيب وتشمر عليه
هسه تلكينه حامل وراح اجيب بعد واحد
وتعال ربي واتحمل اني ليش اتحمل
امج تريد تتونس خليه تروح تتونس وتحبل وجيب بعيد عني
ترا انتي اني مامتحملج النوب اخوج
الج بس يومين اذا مااجت امج اخذته انتي وياا اشمركم بلشارع
مر اسبوع واحنا على نفس المشكله رشيد مايريد اخوي بلبيت واني مايطيني كلبي اعوفه
خطيه زغير
الحد مااجا رشيد بيوم عصبي مااعرف وياا منو متعارك
دخل وسمع أنمار ومصطفى يبجون ثنيبنهم
رشيد..اني مو كلت اخوج ماااريده بلبيت
سراب...وين اخلي زغير
رشيد...اني هسه اعلمج وين تخلي
طلع وهو عصبي واني بقيت لازمه كلبي بايدي خايفه منه
ساعه ورجع وبيده ورقة طلاكي
رايح مطلكني يم الشيخ وجاي
رشيد..هاي ورقة طلاكج يله اطلعي برا
سراب...ياا طلكتني
رشيد..اكلج اطلعي برا
سحبني بقوه ودفعني بلشارع بملابس البيت
الجهال بس شافو كامو يبجون ثنيينهم راسا سحبهم وشمرهم بلشارع وطبك الباب
سراب...فدوه رشيد وين اروح افتح الباب
رشيد...اني طلكتج خلاص وين تردين ترحين روحي مالي شغل
سراب...زين ابنك شنو ذنبه
رشيد...اني ماعندي ولد يله امشي منا لااطلع انتقم منج
سراب...بقيت اكثرمن ساعه اتوسل بي وكاعده بلباب ومايقبل ادخل
وين اروح ياربي لا فلوس عندي وامي خربت كل العلاقات وياا الاقارب
وهذا ماكو بكلبه اي رحمه
تعبت واني اتوسل بي وابجي ومايقبل يفتحلي الباب
طلعت عمتي على صوت الجهال يبجون
باوعت عليه ودخلت للبيت
رحت وراها البيتهم
سراب...عمه فدوه تعاي قنعي رشيد شمرني اني وابنه بلشارع تقبلين
عمتي...يطبج مرض تستاهلين اشفنا منج بس الدوخه
خل الولد يشوف نفسه يزوج وحده موضفه بيه حظ
ضال يصرف عليج وماكووو
وفوكاها جايبه اخوج وياج
سراب....وابنه موهذا ابنه غير يتحمل مسوليته
عمتي...شنو قحط يزوج ويصير عندا ابدال الواحد عشره
اني كتله يطلكج ويخلصنا منج
سراب...حسبي الله ونعم الوكيل عليكم
الي ماشفت ولا يوم راحه وياكم
الله ينتقم منكم
اخذتهم ورحت البيت خالي تقريبا نص ساعه مشي يله وصلت الدنيا ضهر والجو كلش حار
كلبي يبس من العطش
شايله مصطفى واكود باانمار وإنمار مايقبل يمشي يريدني اشيله
كمت ابجي ولله تعبت تعبت من امي الي دمرت حياتي
مايصير هيج تعذب بيه
لو اعرف ماترجع جان ماقبلت مصطفى يبقى يمي
على الاقل جان اكو بيت لامني اني وابني
حتلو اشتغل خدامه ونص بطني جوع ميخالف هسه
شلون منو يتحملني اني وثنيبن اطفال
جمانه السعيدي
وصلت البيت خالي الدنيا ضهر وحاره
بس دخلت كعدت وكمت ابجي خالي بس شافني وشاف حالي استغرب
خالي...سكووو شبيج
سراب....تعبت ولله تعبت امي دمرت حياتي اول خلتني اعوف المدرسه حتى ازوجني الإنسان بخيل وماكو بكلبه
رحمه
وعافتني حتى ماتسئل عليه يوميه يعيرني الف مره باامي
واني ساكته ومتحمله
نص بطني جوع وكلت ميخالف هذا حضي وقسمتي
تالي جابت مصطفى شمرته عليه وراحت
خالي...مصطفى منو
سراب...اخوي ماتعرف امي ازوجت للمره الثالثه وحبلت وجابت ولد صلاوات عليه
والبيت باعته وسلمت الفلوس الزوجه اخذهن وطلكه
يعني اني هسه لابيت ولا اهل والرجال طلكني
وشمرني بلشارع اني وابني واخوي وين اروح شسوي هسه اكتل نفسي وين اروح
خالي....ادخلي ارتاحي وبسيطه انشاء الله تنحل
دخلت بس زوجت خالي ماكانت راضيه بجيتي البيتهم
حقه همه عائله جبيره وكوه مدبرين امورهم
حتى بيتهم زغير والنوب يجوهم ٣ نفرات
جابولنا اكل تغدينا والجهال نامووو ثنيبنهم
وخالي راح الرشيد يتفاهم وياا بلكت يرجعني
ساعه ورجع كال مايقبل يرجعج يكول مااريده لا هي ولا ابنه
سراب..هسه شلون
خالي..ارفعي علي قضيه
سراب...ماعندي فلوس القضيه تريد محامي شاطر واني ماعندي كلشي منيبن اجيب فلوس للمحامي
خالي...ابقي ذني اليومين هنا واني راح ارجع علي بلكت
يقبل ترجعين
حتلو مصطفى نخلي بدار الايتام
وترجعين انتي وابنج
خالي دز على رشيد اكثر من واحد حتى ارجع والشروط الي يكول عليهن هوووو
بس ماقبل يرجعني يكووول مااريدها ابد
بقيت اسبوع بيت خالي وزوجته كوه متحملتني
حقه كمت اقاسمهم اللكمه الي ياكلونه
قررت اطلع ادور شغل على الاقل اساهم وياهم بلمصرف
سراب...خالو اني راح ادور شغل حتى اصرف عليه وعلى الجهال
خالي...بكيفج
ثاني يوم كعدت الصبح اتريكت وردت اطلع ادور شغل
زوجت خالي...وين
سراب...ادور شغل اني كلت الخالي
زوجت خالي...اخذي الجهال وياج اني ماعايزه دوخه
شمدريني اطلعين وماترجعين مثل امج
سراب....شكد انقهرت من كلامه بس مااكدر احجي
...اي ميخالف
كعدت الجهال غسلتلهم وريكتهم وطلعنا
المشكله ثنيينهم يردون اشيلهم
واني مااكدر
باوعت للسما وكلت ربي بكيفك انت جاي تشوف حالي
الناس ماتقبل ترحمني انت ارحمني برحمتك الواسعه
