رواية ناديه الفصل السابع 7 بقلم انين الليل

اسبوع وبيبي بالمستشفى وعمه سلوى بقت يومين وراحت البيتها ونامت يمنه عمه زهراء لان عمي هادي 

وعمه نوال بالمستشفى انا وحنين نبدل ونروح للمدرسه وعمه زهراء بقت يومين وهم راحت واجتنه عمه سلوى 

وانا وحنين نترقب وخايفات لا نفقد بيبي وعمو سراج ما اجه ولا خابر وانا صرت اعتب على عمو سراج بگلبي 

ليش ما اجه مو گلي راح اجي

سادس يوم اجت عمه نوال وعمي هادي ويا مرته افراح الي بس تخزرني سلوى كالتلهم //منو بقى يم امي 

نوال //بقى عمار وهديل هسه نرجع ما نتاخر

انا رحت اسوي چاي وانا خايفه واباوع الهادي هو ومرته بس يريد يگوم يكتلني اندك الباب راح ياسر فتحه 

وسمعت صوت عمي سراج الي عاتبه هادي لان ما اجه من سمع ابيبيتي وگعت

سلم عليهم وكللهم ::ما حصلت اجازه عدنا طوارئ واليوم دز عليه المدير وانطاني اجازه وبوجهي الكم لكن اني 

رحت للمستشفى وعمار گلي الگاگم اهنا شعجب عايفين المستشفى وجايين خيير 

هادي جاوبه //سراج انت مو غريب اخونه وامي ربتك ويانه

سراج جر نفس ::اكيد هادي هاي ما يختلف عليها اثنين بس افهم مخلين جهال بالمستشفى وجايين شكو 

نوال //الطبيب قرر امي باجر تطلع من المستشفى وفهمنه هي عدها جلطه لان مره چبيره 

سراج ::الحمد لله المهم عايشه يعني حالتها استقرت 

نوال //اي الحمد لله مو اهنا المشكله 

سراج عكف حواجبه ...:لعد شنو المشكله 

نوال //امي يحتاج الها رعايه ولازم نعرف عدمن تكعد 

سراج بابتسامه ::يعني وين اكيد ابيت ابنها

هو ما كمل كلامه وما نحس اله افراح وگفت على حيلها وگالت //شنو شنو تگعد عدنا وان شالله انا اخدمها 

لا ما مقبوله منك سراج المره من توكع بناتها يخدمنها مو الچنه وبعدين بصراحه انا مره كبرت وما بيه 

حييل شيل وحط 

نوال //واحنا عدنا بيوت وجهال يعني هم ما فارغيين وهادي الچبيير ولازم يدير باله على امه خو 

مو بيت ابنها قصر ما شاء الله وتروح تگعد عد النسيب وهي ما قصرت 

افراح تخوصرت //ليش حبيبتي شنو يذكر منها ابنها

سراج وگف :: يواشكم عمي خلي نحجي صدك چذب هاي عمتي من وعيت ع الدنيا وهي گايمه بنفسها لا ساعدتها

چنه ولا بنيه هسه من وگعت هيج حملها ثگل هذا مو حچي 

زهراء//انتو ناسين شغله

الكل باوع الزهراء //شنو 

زهراء // البنات ناديه وحنين وين يبقن 

افراح //هاي هي هنه يگومن ابيبيتهن مو ربتهن وخلتهن على گلبها وفنه الي يحاچيهن

زهراء مستغربه // يعني تردون هالطفلتين هنه للمره الچبيره هذا شلون حچي 

افراح //وانتي شكو ناسيه نص المصايب من جوه راسج 

زهراء//ليش من جوه راسي انا رفضت اتزوج عباس بالضبط مثل ما هو رفض يتزوج اختج ابتهاج ومثل 

ما شافله هادي مياده وعشكه الها تره ما سويت شي غلط ولا كفرت قسمه وما صارت 

افراح// وانتي شكو وتتدخلين بينه احنا عايلة بيت

زهراء بقهر //وهي خالتي ومرت عمي انا ما مدخله بس ذكرتكم بالبنات اليتيمات 

افراح //هو كل المصايب من جوه راسهن خصوصا انديوه 

سلوى گامت على حيلها //كافي افراح كافي شنو عبالج ماندري من اجيتي انتي وهادي وهديتوا على امي 

وضربتو ناديه وهادي دفع امي او. وكعها تره انتو السبب بطيحة امي 

افراح بنتر //ها هاي العرجه (واشرت عليه )گالت الكم مو (باوعت الهادي وتحجي وتاشر بايدها )

هادي گتلك اذبحها لاتسويلنه مصيبه بس انت ما ادري شلازمك

ياسر //يمه شنو هالحچي عيب شنو جايين اهنا تتعاركون 

سلوى //لا غلطانه مو ناديه الي گالت النه الجوارين يسمعونكم وانتم تصيحون على امي والبنات واجو وكلولي 

نوال //سلوى اسكتي خلي نفتهم امي وين تبقى 

افراح //والله انا شايله ايدي لاتحسبوني بالحسبه 

نوال //ها هيج الحجي 

افراح //اي واكثر وانا احجي كدام رجلي مو ورا

سراج ::والله لو متزوج چان جبت زوجتي وهي تداري عمتي ولو اهنا دوامي هم انا داريتها ولا هالمنيه 

هادي //كلام ام ياسر صحيح بناتها الي يدارنها 

نوال //واحنه عدنا ارجال وجهال او وظيفه وما نقبل امي تبقى عد النسيب عيب وقليله بحقنا 

افراح //ها يعني تردنها براسي لا والله حبيبتي امچن انتن مسؤولات عنها ليش نسينا لمن انطتنا الفلوس اشلون 

ثاني يووم جابت كاتب العدل وخلت هادي يتنازل عن حقه بالبيت 

سلوى //لا ما نسينا ولو ما فلوس امي چان ما وصلتو للوصلتوله 

افراح //حبيبتي غلطانه هذا تعب رجلي وتدبيري

سلوى //والله ما ندري من يمته الي نعرفه اخذ الفلوس حتى يبني البيت راح شارك بيها واحد بمزارع الطماطه 

ورحتوكعدتو سنتين بخرابة موضي وبعدين ما شاء الله صرتو احوال 

افراح //اي حبيبتي بتعبنا محد من علينه 

سلوى //لا والله بفلوس امي الي هسه ما تقبلون تگعدوها عدكم 

افراح //وليش نگعدها تبقى ابيتها واناديه تدير بالها عليها وانتن قسمن وقتجن يوميه بين يوم ويوم وحده تجي تبات يمها

سراج ::يعني تردون ناديه اتبطل حتى تداري بيبيتها 

افراح //اي وشكو بيها شتريد تصير 

زهراء//تره حرام خطيه بعدهي زغيره 

افراح //والله حبوبه اذا كاسره خاطرج تعالي انتي وداريها مو تكولين خالتي ومثل امي 

زهراء //اي اجي واداريها بعيوني

سراج بعصبيه. :: ممكن تسكتن من اجيتوا الهسه الكلام بس للنسوان واحنا نتصنط (دار على هادي )

::شوف هادي مثل ما گلت انا اخوكم اذا ما تثبتولكم على راي صدكوني اخذ عمتي والبنات البغداد وهناك انا اداريها 

ولا تصدگون ابطل بنات عباس من المدرسه ابد هذا الشي لا تفكرون بي نهائي

سلوى گالت //بنات عباس ما يبطلن وهادي يشوفله مره تجي اتداري امي واحنا فوك منها 

سراج ::اي هذا احسن راي 

افراح //ومنو يدفع فلوس المره 

سلوى //. الي يدفعهن هادي من فلوس اجاربيت عباس وفلوس المحلين

من سمعوا كلام سلوى هادي وافراح سكتوا سراج گله ::ها ابو ياسر شتگول 

هادي //شنو سراج ندخل مره غريبه على ام مريضه وبنات زغار لا اخاف ما يصير 

نوال //يعني لا تاخذوها ولا تجيبولهامره شنو الچاره

وهواي كلام بعدها صار الاتفاق بعد جذب وشد بيبي ترجع لهنا وعماتي نوال وسلوى وحتى زهراء يتناوبن 

عليها وعمو هادي 

يوميه يجي يمر وياخذها للطبيب ويجيب علاجها ومسواگنا  

الكل وافق وبعدين طلعوحتى عمو سراج ما بات

بيومها بقت يمنا زهراءثاني يوم چان دوامي عصري وحنين صباحي لان نفس المدرسه يومين صباحي وتلث تيام 

عصري عمه زهراء طلبت اجازه وانا بقيت بالبيت انظف وعدلت فراش بيبي ع الچربايه وعمه زهراء سلگت 

دجاجه واخذت منها الصدر سوت علي شوربه البيبي تقريبا بالعشره اجت بيبي عمي سراج خالها بعربانه

 واجت وياها عمه سلوى وعمه نوال وياسر انا بس شفتها حضنتها وهي تبجي بدموع بس بدون صوت

عمه نوال زمخت عليه وگالت //بس كافي لاتبجيين مو زين عليها 

عمو سراج خزرها وشال بيبي وخلاها ع الچربايه وطلع وصاح النه بالصاله وگال 

:: خلوها بغرفتها ولحد يضوجها او يسمعها شي يضوجها تره بهاي الحالات اهم شي الحاله النفسيه للمريض

راحت عمه زهراء تكمل الطبخ وانا اغسل بالمواعين صار دنيا الظهر وعمه كلتلي 

ياالله ناديه روحي بدلي حتى ترحين للمدرسه 

انا كتلها —-لا اليوم ما اريد اداوم 

نوال كالت //خليها تبقى اليوم وباجر على ما نشوف

سراج كلها:: شتشوفين نوال خلي ناديه تداوم (باوعلي وكلي )

:: اسمعي الكلام وروحي بدلي خلي اوصلج بطريقي هم ياالله ارجع وراي دوام

انا رحت بدلت وركبت ويا بالسياره قبل لانوصل للمدرسه نزل وراح اشترالي نساتل وعصير وانطاهن الي 

وطلعلي مصرف گلي 

:: هاج الج والحنين ضميهن زين 

—عمو هذني هوايه 

هو جر نفس وگلي ::لا مو هوايه (باوعلي )ناديه لو شنو ما يصير لا تركين مدرستج اهم شي دراستج وتحصلين 

على شهاده تدرين الشهاده راح تكون امج وابوج وراح تخليج انسانه ثانيه ومحد يمن عليج اوعديني ناديه 

ما تبطلين 

—عمو وبيبي منو الها

سراج ::انتي الها ولان شاطره وتعرفين تدبرين نفسج اكلج لاتبطلين اسمعيني ندووش اذا بطلتي راح ازعل عليج هوااي 

—لا عمو كل شي اتحمله بس زعلك لا والله ابقى ما ابطل 

:: لو شنو ما يصير 

— لو شنو ما يصير 

سراج اتحسر ::عفيه بالسباعيه وهسه راح ادخل وياج للمديره وافهمها وضعج

ودخل وياي وفهم ست عفراء على وضع بيبي ويجوز يوم اغيب او اتاخر 

المديره اتفهمت الموضوع وكلتله راح تتساهل وياي وهو بالمقابل انطاها رقمه وكللها 

:: ست هذا رقمي اخاف تحتاجين شي شغله ابغداد اهنا بس اتصلي اني بالخدمه

المديره اتشكرت منه العصر رجعت ولكيت جاراتنا جايات وعمه نوال وسلوى بالبيت بس زهراء رايحه واجت 

بيبي بسيمه صديقه بيبي وكعدت ومن شافت بيبيتي بقت تبچي عمه نوال صارت تشكي وتگول

شلون بالدوام والبيت والجهال 

بسيمه گلتلها //خاله ما عليجن حتى لو ما تجن انا اجي يم ناديه واختها واداري منيره بعيني هي مو بس صاحبتي 

 هي اختي ولو شسوي ما اجازيها

واشوف عمه نوال استبشرت اما عمتي سلوى فاشوفها مقهوره 

ثاني يوم راحت عمه نوال وبقت عمه سلوى الي علمتني اشلون انطي الدوه واشلون اغسل الها واذا ما اكدر وهي 

ما موجوده اتعاون انا وحنين وصارن كل يوم وحده تجي العصر وتروح ثاني يوم الصبح اسبوع وصارت جيتهن 

كل يومين وانا اداري بيبي وره شهر صارن يخابرني ويتححججن ما نكدر وعدنا خطار وابني مريض وبتي تعبانه 

ودزي على زهراء 

لو على بسيمه

وفعلا بيبي بسيمه ما فارگتنا وصارت من اروح للمدرسه هي تبقى يم بيبي وعمه زهراء هم تجي كل اربع تيام 

خمسه لان بيبي جميله هم تعبانه وهي تداري بيها 

اما عمي هادي اول ايام صار يوميه يجي ويجيب ويا مسواك وراها صار كل تلث تيام بحجة الشغل 

 فد يوم اجه وكف بالباب وسالني

- منو يم بيبيتج 

هزيت رغسي ... محد عمو بس انا وحنين وبيبي بسيمه توها راحت 

شنو عماتج ما يجن يباتن 

... ها عمو يجن بالليل 

ثاني يوم العصر خابرني 

الو ناديه منو من عماتج موجوده 

 —عمو محد بس انا وحنين

سد التلفون وره نص ساعه اجه ويا رجال وكلي جيبي جك ماي 

رحت جبت ماي واسمع الرجال يكل البيبي 

- حجيه انتي بعد ما تكدرين تقبضين راتب ابنج المرحوم فلازم تسووين وكاله الاستاذ هادي حتى يقبض راتب اخو

اتقرب يمها هادي وبصمها على ورقه وبيبي بصمت والدمعه بعينها 

بعدها صار هادي يمر علينه كل اسبوع نص ساعه ويروح

بيبي انا داريتها والصراحه عمه زهراء ما قصرت من شافت بناتها ما يجن اله كل تلث تيام اربعه صارت تمر 

علينه يوميه تجي وتسال وتجيب فواكه وتگلي اذا محتاجه شي وساعات تاخذ بيبي تغسل الها وتبدل ملابسها 

اما نسيمه فصارت تطلع بيبي بالنهار للدكان هي وياها

 وسراج كل ما ينزل مجاز يجي ويشوف بيبي ويسال على احوالنه

ونجحت من الاول متوسط للثاني صحيح درجاتي مو قويه لان ملتهيه ابيبي چنت اقرا من وره الساعه 11بالليل 

وابقى الصلاة الفجر لان انا ما انام بالليل من يوم الحادثه المشؤومه

هديل بت عمي هادي رسبت وبيومها محد باركلي انا خابرت عمو سراج وكتله وهو يكلي 

:: عفيه بابنيتي الحلوه شجيبلج هديه 

انا كتله —لاعمو كل شي ما اريد 

سراج ::لا كليلي لا تستحين 

حنين خلت حلكها ع التلفون— عمو اريد لعابه جبيره وحلوه 

سراج ::ها ندووش انتي هم لعابه مثل هاي الزعطوطه لو كبرتي

جاوبته —لا عموو والله كل شي ما اريد 

:: زين انا راح اجيب هديه على ذوقي 

وغاب شهر واجه عمو سراج الضحى وشاف بيبي كاعده ع الكرسي بالمحل ويمها بسيمه هو سلم عليها وباسها 

وهو يتشاقى وياها 

سراج ::اللهم صل على محمد وال محمد عروس منيره عوزج بس رجل هيج وازفج واكول 

عروسه والحبايب زافيها

هي ابتسمت وحركت ايدها الصاحيه ودخل للبيت وهو يدفع بيبي بالعربانه وصاحني انا وحنين اجينه يمه وكل الحنين 

سراج ::هاج ابنيتي الزغيره هاي احلى لعابه وهاج جبتلج هذني همه (علاگه بيها نساتل وجبس وحب )

وانا كلي:: تعاي انتي ولو زعلان عليج لان درجاتج مو هلكد بس ياالله سماح السنه التجي اريد درجات اقوى

 وهاج

طلع علبه وفتحها جايبلي ساعه كلش حلوه ومبينه غاليه لبسها الي وكال ::الله عاشت ايد الجابها والي لبستها 

بعدين انطاني مجموعة علاليك وكلي هذني الج انتي واختج 

اخذتهن وبيبي كلتلي بس بصوت ناصي وكوه افهمه 

=ضميها للساعه ومو احد يطلبها منج

رحت للغرفه وانا فرحانه بالهديه وفتحت باقي العلاليك لكيته جايبلي صداري اثنين مال مدرسه وقميصين

وحجابات اثنين وحتى حنين هم مثلي بعدين سراج كعد شويه وراح جاب غدا ورجع وصار يوكل ابيبي وما خله 

بسيمه تروح اله تتغدا وره الغدا سويت چاي وهو سالني

:: ندوش اشو محد اجه 

جاوبته —عمو يجن عماتي بالليل ويرحن الصبح 

حنين —انتي ليش تچذبين عمو صار يومين محد اجانه بس ياسر ابن عمي هادي من الباب جاب مسواك وراح 

بسيمه //اي والله خاله البنات كل تلث تيام اربعه يجن يشوفن امهن والمحتاره بيها ناديه وانا هم اساعدها بس 

تعرف العمر اله حوبه 

سراج ::يعني نوال وسلوى ما يجن جاوبي ناديه بدون ما تنطين اعذار

بسيمه جاوبت //خاله الصدك يجن بالليل والصبح يرحن ومو دووم بس زهراء الله ينطيها دووم تجي وتغسل الخالتها 

وتغسل ملابسها 

سراج عض على شفته وگال ::ام ناجي الي اريده منج تديرين بالج ع البنات الزغار خطيه ما اريد احد يغثهن 

بسيمه //لا لاتخاف كلمن ملتهي حتى محد يسالهن اكلتن شربتن

سراج اتحسر ونفخ نفخات متواصله وطلع من جيبه فلوس وانطاهن لام ناجي وهي تكله 

جا كل ما تجي تنطيني 

سراج ::مي خالف انا مثل ابنج 

بسيمه //والله هالوكت البزر ما ينراد شوف عمتك شكد تعبت على ولدها وبناتها وشوفها هسه مخلينها بيد بنيه 

زغيره لا حول الها ولا قوه عود يجون يشوفونها وهمه المانيين نسو تعبها ونسو شلون وصلتهم 

وراحت بسيمه وبقى سراج يم بيبي الي اسمعها تحجي ويا وكوه افهم كلامها 

==تدري هادي جاب كاتب العدل ونقل راتب البنات يمه واجار بيت المرحوم ما شفنه منه شي من يوم الوكعت 

وحتى المحل 

سراج ::عمه انتي ارتاحي الراتب والاجار اول وتالي الهن انتي بس ديري بالج على نفسج حتى هنه يبقن 

عايشات بكرامه 

بيبي بچت وگالت ==عباس امنك عليهن وانا هم راح اامنك دير بالك على بناته وخصوصا ناديه

سراج حضنها :: لاتبجين عمه انتي تدرين بنات عباس معلكات بروحي 

ومسح دموعها وانتظر شاف محد اجه خابر عمي هادي گله 

:: شنووهاي ابو ياسر عايفين مره مريضه وبنات زغار وانتم محد يسال عليهن 

:: شنو دزيت ياسر انت ابنها ونوال وسلوى بناتها هاي انا من الصبح الهسه حتى ولا واحد بيكم 

اتصل واطمن 

:: ها بسيمه تره بسيمه مره غريبه ياخي انت ابنها مر عليها وشوفها 

:: ابو ياسر اذا انت ما تجي اروح ابات بالفندق وباجر ارجع البغداد 

:: زين منتظرك

وبقى سراج يم بيبي بالليل اجت عمتي سلوى وشافت عمو سراج موجود وهو عاتبها 

:: ليش سلوى هسه ياالله تجيين تره عمتي خطيه 

سلوى //شسوي سراج انا هم بيت ورجل وجهال 

:: بس هذا ما يمنعج تسالين على امج 

سلوى //انا كل ما تصيرلي فرصه اجيها ما مقصره 

:: يعني لو ما ناديه يمكن عمتي انشمرت بدار العجزه 

سلوى //ليش تحجي هيج روح حاجي ابنها

دخل عمو هادي وكال //ها سلوى شبي ابنها 

سراج ::هادي ما يصير مخلين عمتي على ناديه تره طفله وما تكدر الها ابحدها 

هادي //مو ربتهن وانا ما مقصر جاي اصرف عليهن واجيب الدوا وكل شي شايله على راسي 

بيبي حجت وكالت بتعب 

==لا ما صارف من جيبك راتب ابوهن واجار بيتهن والمحل

عمتي سلوى فتحت عيونها متفاجئه وعمي هادي راد يغير الموضوع كال السراج 

امشي نتعشى بره 

سراج ::لا والله مثكل بالاكل وهسه ام ناجي قبل ما تروح سوت شوربه العمتي 

سلوى //زين ما طول اهنا انتو باقيين انا اروح 

هادي// وين وين سراج يروح يبات وياي بالبيت انتي ابقي يم امي

سلوى باوعت // والله ابو ياسر انا راح اجي الامي يوميه ساعه العصر اغسل الها واغير ملابسها اي شي ثاني ماالي

 دخل بي لان مو احنا علينه التعب وانت تاخذ راتب البنات واجار البيت والمحل عاد اخذهن يمك بغرفه

ما يكلفنك شي بس عينك عليهن 

هادي بعصبيه //هو هذا الفالحات بي شنو محتاج الراتبهن لو الاجار بيتهن كل ما بالامر امي بعد ما تكدر تقبض 

الراتب ولا تاخذ الاجار رحت درته منها الي شنو اريد استغني منه

سلوى ما جاوبت وخلت وراحت وهادي هو وسراج الي حاول يهدي بقو يسولفون وبعدين اجه ياسر ابن عمي 

انا بقيت يم بيبي وهمه راحو للديوان واجه ياسر كال اريد بس بطانيات ومخاد انا طلعت بطانيات واشوف ياسر 

يباوع عليه بنظره ما ارتاحيت الها 

  بقيت انا وحنين يم بيبي بعد ان قفلت باب الغرفه علينه من الداخل ولبسنا بجامه طويله

 جوه ملابسنا هاي جانت تعليمات بيبي حتى لو لابسات دشداشه طويله من نريد انام لازم نلبس بجامه جوه الملابس 

ومانروح للمدرسه اله نلبس جوه الصدريه ستريج

وبقينا هذا حالنه عماتي وعمي صارو يمرون كل اسبوع ساعه ويرحون وانا معتنيه ابيبيتي اكلها وعلاجها وملابسها 

وحتى حمامها وعمو سراج يجي كل شهر لو كل عشرين يووم يجي ليله يجيب النه هدايا ويكعد يم بيبيتي ويروح 

ومره او مرتين اخذ بيبي للطبيب حتى يشوفها

بعدها بفتره صار دوامي انا وحنين نفس المدرسه لان حنين نجحت للاول متوسط اختي بدت تكبر حتى صار 

الي يشوفها تبين اكبر مني وحلوه انا خابرت عمو سراج وكتله على دوامنا هو ما جاوبني 

وره اسبوع اجه وگلي :: احسن شي انقل حنين الغير مدرسه ويصير دوامچن مغاير

انا ما قبلت وكتله —لا عمو اختي وياي نروح ونرجع سووا بس بيبي من نروح منو الها 

سراج خابر ام ناجي ومن اجت كللها ::من نداوم تبقى يم بيبي او تشوف وحده تبقى يمها براتب ام ناجي ما قبلت 

وكالت انا ابقى يمها من يداومن البنات

وداومنا بيوم الي اهنا ام ناجي اداوم وبيوم الي يجيها خطار او ما بيها حيل اغيب وهيج على ما كملنه السنه 

ونجحنا اثنينه 

اجيت فرحانه لان نجحت وما اضم عليكم بنفس الوكت متشمته ابهديل الي رسبت وصرت انا بصف الثالث 

وياسر ابن عمي بصف السادس علمي

مره اجت عمه نوال وبيبي جميله وزهراء وافراح هم اجت شافتها بيبي جميله وكالتلها 

شبيها بتج طلعت ساقطه بالمدرسه شنو شعوزها 

افراح اتداركت الموقف لان الكل ضحك على كلام جميله گالت 

خليها ترسب بدل السنه اثنين اول وتالي تجيها احسن قسمه ابوها مهندس ومعروف وامها انا 

(واتباوع البيبي منيره بتحدي ) انا عمه الي ما گالوا بالعرض لوله 

 قابل يجيها واحد جان بالسجن لو سايق سياره بعدين احنا ما انتبهنالها كل اهتمامنا بياسر

زهراء // زين تسوون خلي يشد حيله ويطلع معدل 

افراح //ان شالله مهندس مثل ابو 

جميله //جا هم ديري بالج على بناتج خليهن يقرن 

افراح //عمه شكد بطرانه اول امس شمس حاچتني على هديل گالت تريدها الابنها 

جميله هزت ايدها //منين يصير براسهن حظ اذا من هسه تتخطبيلهن

بشهر التاسع غفيت الفجر وكعدت الصبح يمكن الساعه ثمانيه رحت سويت ريوك وفورت حليب البيبي 

واجيت اندها حنين چانت نايمه

اجيت يمها وقربت حلكي الاذنها دائما هيج اسوي حتى تنتبه ندهتها 

... بيبي بيبي ياالله اكعدي حتى اخذج اغسلج

ندهتها ماكو استجابه خفت واحس ريگي نشف وگلبي صار يدك رجعت هزيتها من جتفها بيبي ما فتحت عيونها

 لزمتها من ايدها بارده ثلج وايدها عبالك خشبه صرت ارجف عرفت بيبي بيها شي اتقربت يمها خليت اذني على

گلبها كل شي بيها چان ساكت بقيت اندها بخوف 

—بيبي اكعدي بيبي عفيه اگعدي

ما صرخت بقيت بس اشهك على كيف وانا اتخايل مجموعة صور كدامي من انا عمري اربع سنوات كعدت بالكاع 

يم جربايتها وبقيت انود ودموعي يوكعن بلا شعور لزمت التلفون اتصلت بعمو سراج وانا ارجف 

هو رد كلي ::اكيد ندوش الحلوه تصبح عليه 

انا بس اشهك عرفني كلي ::شبيج ناديه شبيج احجي 

جمعت بقايا صوتي المختنك وكتله 

—عمو بيبي منيره ماتت 

هو كلي ::انتي شتكولين

انا بصوت متقطع —اي عمو ماتت ماتت وعافتني تعال عمو لا تتركني تعال انا محتاجتك 

سراج :: انتي وين فهميني 

—يمها بالغرفه 

منو يمكم شلون عرفتي بيها ماتت 

—عمو ندهتها ما تجاوبني وجسمها ثلج وكلبها ما يدك

سراج ::ناديه اسمعيني بابا اصرخي لمي الناس عليج خابري عمج وانا جاي 

—لا تعوفني عليك الله 

سراج ::لا تخافين جاي حبيبتي لا تخافين باباتي 

نزلت التلفون ورجعت يم بيبي اتمنى تبقى وما احد يعرف بيها ماتت ندهت حنين وانا ابچي 

—حنين حنين اكعدي بيبي ماتت

حنين فتحت عيونها مخترعه باوعتلي وتشوف بيبي ع جربايتها صرخت بدون وعي من صرخت حنين انا هم 

صرخت اندك الباب وراحت حنين تفتح والتمو الجوارين ما اعرف البيت انملى نسوان وجيرانه خابر عمي هادي

واجه هو وياسر وعمار وافراح وبناتهم 

واجن عماتي وزهراء جايبه بيبي جميله وكرم وصار البچي والنسوان يگولن

// الله يساعدها الهالطفله شلون موقف 

عماتي من الفشله سكتن وراد هادي يسوي الفاتحه ابيته ومرته كالت 

- - لا اهنا البيت بي طارمه چبيره ومو كلها الناس تندل بيتنا 

غسلوا بيبي واخذوها بيبي نسيمه كالت// انا اروح وياها صاحبة عمري وهي مذممتني اروح وياها واخذ ناديه وزهراء

انا اتذكرت شي رحت للكنتور فتحته وطلعت فلوس انطيتهن العمو هادي گدام عماتي وانا اشهك من البچي 

 ... هاك عمو هاي بيبي تگول فلوس دفنتي والكبر والفاتحه

ركبوني بالسياره وصعد ياسر وانا وزهراء وبيبي نسيمه بسيارة عمو كرم واسمع مره تكول 

- - الله اكبر المن نكبر ونتعب ونربي مره مريضه محتاره بيها طفله ومره غريبه وابنها وبناتها يمها ما يعرفون 

بيها من ماتت واجو تالي الناس حالهم حال الغربه شلون وكت

صعدنا وبيبي نسيمه تنعي وتبجي وانا ابچي حيل واگول 

— بيبي شلون بيه انا واختي 

اشوف كرم وياسر يبچون وصلنه النجف بتلاثه العصر وزورو بيبي الي چانت ما تروح للزياره لكن من اتوفى بابا 

چانت دائما تروح وتاخذنا وتگعد تعاتبه وتگله =عباس الحمل ثگيل وانا مره چبيره ما بيه اشيله

وصلنه للمكبره شفت من بعيد عمو سراج واكف بصف قبر بابا وهو لابس نظاره انا من شفته بلاا شعور ركضت 

وحضنته وانا اصرخ هو حضني واسمع صوته مكسر من البچي 

سراج ::بس بابا لا تبچيين اششش گولي الله يرحمها 

انا اشهك ::عمو بيبي راحت شلون بيه وبحنين

ودفنو بيبي وعمو سراج كال الزهراء:: اخذيها بعيد 

من كملوا الدفن اجاني وحچى وياي بعبره وهو يمسح دموعه 

 ::ياالله ناديه روحي سلمي عليها هي تسمعج روحي احجي وياها 

انا ركضت وصلت يم گبرها گتلها— بيبي ليش عفتيني انا واختي شلون منو بقى النه يحبنا ويدارينا 

اسمع ام ناجي تكول وهي تبچي //الچن الله 

صرت ابچي ما اعرف شگول اجت ام ناجي وكالت

— لا صيري سباعيه كلنه وياج هذا عمج وعمتج زهراء وعمج كرم وابن عمج ياسر وانا كلنه يمج لا تخافين ياالله

حبوبه عمج سراج من الدوام وجاي وتعب من الشمس والوگفه امشي خلي نرجع

رحنه من المگبره سراج بسيارته واحنا بسيارتنا من طلعنا وكف سراج وگال الياسر خلي ناديه تجي تصعد 

خاف تنعس تنام وره 

واجيت گعدت يمه وهو مشغل قرايه وانا ابچي وهو اعرف بي يبچي من وره النظاره باوعلي ونصه التسجيل وگلي

:: كافي بچي انتي مو زغيره واعرف بيج انتي بطله لازم تتهيئين الهواي اشياء راح تصير ولازم وفاة عمتي 

كبرتج عشر سنين فوك عمرج افتهمتي بابا لازم تكونين قويه 

:: الي اريده منج لو شنو يصير ما تركين دراستج ولا تفكرين اتركيها حتى لو انا ما موجود حتى لو ميت 

ومدفون مثل عمتي لا تركين دراستج وحتى لو تعبرين السنه بسنتين انتي شجاعه وسباعيه وما ينخاف 

عليج افتهمتيني

... مو اول شي صعب ايمر بحياتج نسيتي الحادث لو نسيتي من اندعمتي

انا ما جاوبت وهزيت راسي وبالطريق نزلنه للمطعم غسلنه وهو جاب اكل وكلي 

:: اكلي هاي اللفه ياالله بابا 

هزيت راسي :: تاكلين لا تزعليني منج 

جاوبته ... كل شي ولا زعلك 

:: لعد اكلي اني اشتريت الهم عشا بس اعرف بيج ما تاكلين

صرت اكل ودموعي ينزلن قسمتله نصها هو اخذها وصار ياكل 

بالليل وصلنه لگيت عماتي وجهالهم نايمين انا دخلت الغرفة بيبي وبقيت اصرخ 

وفززت النايمين كلهم

سوو فاتحة الزلم بالحسينيه واحنا ابيتنا واجه جدو منير هو وزوجته وجدو جميل الي ما شايفتهم 

چنا انا وحنين نكعد ونبچي من نسمع الملايه تقرا وبيوم ثالث 

انا لازمه اختي وكاعده على صفحه والملايه صارت تحجي عن الموت والرهبه وعن بر الوالدين وبعدين گالت

- - الله يساعدها الهاي الطفله تخيلوا شصار بيها وهي تنده بيبيتها وما گعدت

الكل باوعلي من اشرت عليه الملايه بين مقهورات عليه وبين نظرات كره وهاي النظرات شفتها بعين عمتي نوال 

ومرت عمي افراح وبناتها هديل واسيل من وزعنا الثواب وراحت الناس اجه عمي هادي اوولده ويا جدو منير

وعمو سراج وعمو موفق اخو السراج 

صاحوني جدو منير حضني وظل يبچي وگل الهادي 

- - دير بالك عليهن ما بقى الهن احد الله وانت 

عمي هادي صار يبچي وهو يگول //بعيوني خالي لاتوصيني بنات اخوي او وصية امي

ثاني يوم الصبح راح جدو منير اخذا موفق وبقى سراج الي راح واتسوك

گال العمه زهراء:: اطبخوا لان جايين عليه اصدقائي 

وصارت زهراء وعمه سلوى وانا هم وياهن نطبخ ومن كملنه وصبينه واتغدو وراحو صارن نسوان 

المنطقه يجن ويجيبن قطع قماش اليه وبيهن ينطني فلوس وبيهن يوجبن عماتي وافراح وهذني اقارب ازواجهن 

وجوارينهن

بالليل كعدنا واجو ناس على عمو هادي ومن طلعو اجو يمنا سراج وهادي الي گال 

لمي ملابسج وملابس اختج وباچر تجيين انتي وحنين ويانه للبيت

شفت افراح ما قابله وسلوى ساكته ونوال گالت //اي بس قبل لاتاخذهن نريد ذهب امنا وفلوسها

الكل باوع النوال وافراح ردت عليها //ياذهب هذا مو عمتي قبل ما تتوفى قسمته بيناتجن 

نوال //صحيح بس امي هم صار اكثر من عشر سنين وهي فاتحه هذا المحل وين فلوسه

سلوى جاوبتها //ليش نوال امي عايشه ع الهوى تاكل وتشرب وتطلع وتروح واحنه ولا واحد ينطيها شي بالعكس 

دووم نجي ناخذ منها انا وانتي وهادي دووم من نحتاج نجي نطلب منها وتنطينا 

نوال //وراتب عباس واجار بيته وشغل المحل وينه 

سلوى //راتب عباس صار سنتين عد هادي هو واجار البيت 

- وقبلها

هادي //نسيتي حادثة ناديه وشكد عمليات صرفنا عليها كومه فلوس 

نوال //صرفت من راتب ابوها مو منك ونعرف منو شال فلوس العمليات 

هادي //انتي گلتيها راتب ابوها انتي ما تسالين عنه لان هذا للبنات 

سلوى //نوال كافي شبيج

نوال وكفت وبعصبيه تحچي //لا ما بيه شي بس فسرولي طفله بكد رجلي تروح للنجف ويه امنه تدفنها لان بقت 

يمها ولان امي مذممه ناديه وزهراء الي يروحن وبالتغسيل زهراء وبسيمه هم مي خالف 

شكو من تطلع تقفل باب غرفة امي 

الكل باوعلي وهادي يتوعدني وكلي //صدك ولج

نوال بعصبيه // اي صدك ومن اجت عود فتحت الغرفه اكيد بيها شي 

اتقرب مني هادي وهو يكلي //ليش قفلتي الغرفه 

جاوبته:بخوف //لان بيبي كلتلي من اموت اقفليها وافتحيها على ايدج 

نوال //ها سمعتو يعني اكيد بيها شي فلوس وذهب وهذا من حقنا 

افراح //اذا بيها يعني انديوه تندلهن 

ناديه —انا الي عندي انطيته العمو فلوس الدفنه والگبر والفاتحه

سراج وگف وحچى بعصبيه :: يعني عمتي حتى بموتتها ما كلفتكم شي باالله ما استحيتو امكم صار تلث تيام

 متوفيه وانتي يانوال تحققين تردين تعرفين وين الذهب ليش ما اجيتي وبقيتي يم امج المريضه وداريتيها وسالتيها 

على ذهبها وفلوسها بدل ما نصبتيلج محكمه وجاي تحاكمين بطفله 

نوال //انا ما مطالبه بشي مو الي الحق حق

سراج ::والله ما اشوف حق اشوف باطل وامج لو تدري بيج امينه وتدورين على حق چان ضمت فلوس دفنتها 

والفاتحه عندج مو عد طفله زغيره 

نوال //وانت شكو وتتدخل احنه بناتها وهذا ابنها انت شعليك 

سراج ::انتي من يوم يومج وقحه وخبيثه لا عليه ونص لان انا هم مثل ابنها وبالعكس انا امر بيها واسال عنها

اكثر من هذا ابنها ومنج واتصور كلكم تعرفون بهذا الشي 

نوال //كل هذا الشي ما يهمني اريد فلوس امي وين

سراج اشر بايده ::ذيج غرفة امج مفتوحه روحي دوري انتي واختج واخوج والي تلكونه اخذو

هادي //هاي شنو سراج شنو هالحجي 

:: ليش هادي انت قابل على كلام اختك 

افراح //وليش ما يقبل عمتي انطت الهادي فلوس ذهبها الي باعته العباس وكلتله هاي حصتك من البيت وخلته يوقع

 وبعدين قسمت الذهب على بناتها حتى البالخارج ودته الها بيد ابن خاله رجلها او وصت بالبيت وتركت هادي 

يعني لو تحسبها البنات اخذن اكثر من هادي حصه بالبيت وحصه بالذهب

اتقرب سراج من افراح وكلها ::ليش ام ياسر عمتي انطتج كلاده ام الليرات ومحبس وسوار وانا وابوي وامي شهود 

يعني ما كلتي الرجلج عليهن 

افراح //ها اي عمتي الله يرحمها انطتهن الي هديه 

سراج ::لا مو هديه اجيتيها وكلتيلها هادي ما كفت فلوسه ويريد ينطي البيت المقاول وشالت الج الذهب ونطتج ايا

ليش تنكرين 

واسمعوني زين اي شي بقى فهو الناديه وحنين 

هادي //لا شتكول ماالهن باي شي لان ابوهن توفى قبل امي

سراج ::هم صحيح كلامك 

هادي //ياالله بابا ناديه كلينه وين ضامه امي الفلوس والذهب 

—عمو انا الي بيبي دلتني عليهن انطيتهن الكم بعد ما اعرف وهاي الغرفه وفتشوها 

هادي بنتر //ما ناخذ الاذن منج وياالله حضري نفسج انتي واختج ترحن ويانه

افراح //هادي خليها وره السبعه اهنا نسوي الثواب وبعدين يرحن فد نوب 

هادي //خوش 

نوال //ولازم نعرف الاثاث والسلعه الي بالمحل شلون نقسمهن

اشوف سراج يباوع النوال باستهزاء وصار الاتفاق نوال تاخذ النضده مال الفراشات والتلفزيون وسلوى تاخذ طخم القنفات والثلاجه وعمو هادي ياخذ المجمده والسلعه الي بالمحل والكنتور والجربايه الي والحنين 

سراج گللهم ::اشو كل واحد اخذ حصه وما فكرتوا حتى تنطون صدقه عنها 

سلوى جاوبت //الثلاجه راح انطيها بثوابها الناس ايتام يمنا 

هادي //هاي شبيك سراج مو نسوي ثوابات اكيد من فلوس المحل

وبقينا انا وحنين بالبيت تبات يمنا عمتي سلوى وبالسبعه جبنه ملايه وسوينه ثواب بيبي وبالليل صعدت انا وعمه

 زهراء جمعنا ملابسنا وكتبنا وفتحت الميز واخذت البوم الصور وضميته ويه كتبي واخذت نقال بيبي خليته 

عندي بعد ان وصاني عمو سراج دووم اخلي صامت ومحد يشوفه عندي وگلي اكثر شي راح تكون ابينه رسايل 

ولازم ابلغه بكل شي يصير وياي وما اضم علي اي شي ورجع وصاني لازم ادير بالي واضم النقال

حتى محد يعرف بي ورحنا ويه عمي هادي بعد ما سراج وصلنه بسيارته والطريق كله يوصي بيه وبحنين 

وحسيت بي كانما بجى لكن ما يبين هذا الشي انا ما صبرت بچيت وكتله

— تدرون كل الي احبهم بالنهايه اتخلو عني وعني انا بالذات 

هو باوعلي وگال 

:: كل الناس تتخلى عنج اله انا ولازم من تشوفيني بعيد لازم تنطيني العذر وتعرفين كل الي اسوي على مودج

انتي واختج 

::الي اريده منج ولازم تعرفينه انو انتي واختج راح تتاذن وراح افراح تتشفى بيچن لكن خلي امامج شي واحد 

::هو لازم تتحملين وتتحملين وتتحملين حتى لو اتعبين لازم تبقيين بالمدرسه انتي واختج وتحصلين ع الشهاده الي 

انحرم منها ابوج لان اتحمل المسؤوليه من هو زغير والي انحرمت منها امج بسبب تهورها وجهلها 

::انا وياج ما اتركج اله يتوقف هذا (واشر على گلبه )وهسه لا تبچيين اي شي اي شي تردينه بس اكتبيلي مسج 

ثاني يووم يكون عندج انا هسه بس اوصلكم اروح

بقيت ساكته هو گلي 

::ما كو الله وياك 

— الله وياك عمو

باوعلي وكلي :: ندووش رايده شي 

سلامتك 

::: اكيد 

هزيت راسي جاوبني :: اذا تردين سلامتي تتحملين وتصبرين وتاخذين وصيتي

وصلنه ونزل عمو هادي وافراح الي مبين عليها متنگه وابنه ياسر وهديل همه دخلو للبيت وعمو هادي وگف نزل 

سراج بعد ما نزل جنطنا وكال الهادي  

سراج ::هادي ذني امانة المرحوم دير بالك عليهن 

هادي //شبيك سراج ذني بنات اخوي قابل اشمرهن بالشارع 

وسلم علينه سراج وبعيونه يوصيني ادير بالي على نفسي وعلى اختي

ودخلت البيت عمي الي اخر مره شفته يمكن جان عمري خمس سنين ونص لمن اتعرضت الحادث بقيت بي اسبوع 

انا وبيبي وحنين كان حدنا بالبيت للهول والحمام ما نتخطا الاي مكان ثاني 

دخلت وانا متردده وبكلبي خوف 

خوف من المستقبل ومن الناس الي راح اعيش وياهم