رواية أرض الخناجر الفصل الواحد والسبعون بقلم ايلول
افحطه الذيب واكسر واهسه بملگاي
واجيبن نابه بأيدي من العرگ دامي
مو صاحب جديدة ومن امس صايود
تايخ جلد قوسي بكثر ما رامي
══━━━━✥◈✥━━━━══
رنـــه :: طبوا حسين وزهره گدامي درت العبود طلع وسد باب الحوش وراه طبيت للهول عاينت لريمه مستغربة كاعده بباب غرفتها ايدها على بطنها ورغد عايفتها وحدها حسين وزهره يگلولها شكو شصاير، وهيه دموعها يجرن
وشمس حايره بيها تشبكها من راسها وتمسح بعيونها
-شسالفة ريـــمه شكو؟
مسحت عيونها مختنگه اشرت الزهره تطب تبدل وحسين ذب كتبه ووگف بباب الغرفة عاگد حاجبه
حسين:: واحد محاچيچ؟
-لاا.
كعدت كدامها احاجيها شكو ردت تبچي وتشهك وتحجي بحرگه على اهلها
ريـــمه:: ابوي وكهلان تعاركوا، يوميه حاركين گلبه يوميه قاهرينه، ضل ما يگدر يوكف على حيله طاح گدام عيني لا يحرك ايد ولا رجل
لطمت على رجليها متسودنه
-يمممه.
طب عبود يحجي
عبود:: يابه بالعباس صارر زين غير خابرتهم وحاجيته بس يكضي المغذي يجيبونه، حتى مو زين على علاوي تقهرين بروحج.
درت العبود مخلوبه روحـــي واحلف بيه
-عليك العباس كالولك زين.
-والله زين هسه شويه ويجون.
گامت ريـــمه من علي ضل يبجي طبت يمه للغرفة وانه مدري شبيه الخوف اكل گـــلبي بس طبيت بدلت ورحت يمها للغرفة حاطه علي على رجليها وتبجي وشمس تعاينلها بضوجه، كعدت كبالها اسأل
-عليمن تعاركوا؟
ريـــمه :: الصبح تعاركوا علمود مــيثم، ابوي گاطع راتبه وراتب بريا مال المعامل ومن جاب فلوس الحصاد ولا انطاه ربع وميثم كل ما يجي يگله عمي اريدن فلوسي يگله بعدين.
اليوم مــيثم يريد يروح للدوام مخابره ابوي گايله لا ما تروح تعال اكرب الگيعان ويَّ الفلح والولد ما گايل شي مخابر ماخذ أجازة ومشه هوه وسلطان يكربرون الگيعان وكهلان بگيعانه يشتغل، للعشرة خابرني راد چاي وخبز جوعانين سوت رغد ووديناه الهم للگاع كاعدين بالصريفة ياكلون ويسولفون واجاهم ابوي شلون عايفين الشغل وكاعدين جار مــيثم رايد يطگه گدام الفلح، وميثم ما مخليه
كهلان ما گادر يسكت تعارك وي ابوي وابوي گدام الوادم يگله انتَ مالك غرض ويصيح اشهدوا كهلان لا من عدنا ولا النه غرض بيه .
وضالين بالساعة يتعاركون واجه ليجاي ميت من القهر ماكو ربع ساعة وخابروه ابوي يريد يسوي ساگيه للبزل بين گيعانه وگيعان كهلان، تسودن كهلان طلع يتعارك وياه وتمرمرنا صياح وهوسه روحـــي طلعت جابوه الولد للبيت يتراجف بس غسل وجهه طاح، يردون يموتونه اهلي يردون يموووتونه.
بچت بقهر وشهگت تدعي بحرگه
ريـــمه:: اللهي بجاه هاي حرگة گـــلبي ما يصبح صبح على اهلي وتفكني منهمم.
سديت حلگها اهز راسي لا
-الدعاوي ترجع علينه لا تدعين.
دنگت تبجي، اخذت علاوي من حضنها لان صغير حيل، اخاف اشيله حطيته بحضني وشمس سندت ايدها على رجلي تعاين لوجهه ودنگت تبوس راسه وتضحك، وريمه هم محترك گلبها على كهلان وهم محترك گلبها على مــيثم .
وهاي اول مره مــيثم يوگف بوجهم وما يسكت لان اكلوا حگه وحگ بريا رغم بريا وميثم حالهم حال الولد ابوهم اله حصه بالگيعان وبالمعامل، غصباً عليهم ينطونه حگه،
وهوه شگد يحترمهم كضه عمره يشتغل ساكت بس همه مو شكول واحد يحترمهم. والنوب الجديدة كل ما يحجون يگلهم اطردكم وهسه مچلب الميثم بس تفك حلگك اطردك من القرية.
صــيهد طالع من الكليه ورايح لطرواده للمستشفى ربع ساعة واجوا طبوا للحوش وياه ســليم وميثم يحاجونه وهوه يگلهم
-مابيه شي والله.
اعاينله وجهه اصفر وروحه رايحه.
داروا يعاينون للساحة على صوت صــيهد فلش باب بيت شاكر ويصيح بكل صوته
-انتَ زلمه وتطرررد مــيثم أنعل والديك.
طلع ســليم يركض وميثم لحگه وكف طــروادة بالباب يعاينلهم الولد كاضين صــيهد وهوه متسودن وشاكر طلعله يحاجيه ويغلط ويهدد
-كلّكم أطردكم اجيب الحكومة عليكم.
وصيهد تسودن يجر بروحه منهم بس يريد يوصله ويصيح بكل صوته
-اشگ حلگك وحلگ الحكومه ووولك تطردمن ؟
ســليم دفعه ودار يتعارك وي آبوه واجه وليد يركض على صــيهد، چلاب وكل خير مابيهم لو بيهم خير چا مايطكونهم شاكر طك ســليم ووليد طك صــيهد، هوسه وصياح وكلمن يغلط بصفحة.
مشيت يم طــروادة كضيته من ايده اسنده
-تعال ارتاح.
مسح وجهه وطب وياي للبيت عاين الريمه وهيه ماتحط عينها بعينه كعد يمها دنك باس علوش ويعاين لوجهه متحسر گالتله بغصه
-شلون صرت؟
عاينله حط ايده وره راسها وتدنى باسها بين عيونها وهيه شفايفها يرجفن متفشله من اهلها عيونها متروسه دموع
-عليمن باچيه؟
وبس گالها هيج دنگت ودموعها جرن مسحهن يحاجيها ضايج مايريدها تبجي، عفتهم وطلعت شمس وياي طبيت للمطبخ اريد اسوي الغده وكل ما اطلع للحوش اسمع هوسه وين يله كضت عركتهم وكلمن مشاله .
وكفت يم الطباخ اعاين لحسين وزهره كاعدين بالهول وشمس بينهم وهمه كلساع واحد بايسها، صبيت الغده واجت زهره اخذت الكاي وكلاصات وحسين شال شمس مشه غسل اديها
-عبود تعال شيل الصينية
عاينلي كاعد بالدوانيه والباب مفتوح حط تلفونه بجيبه واجه
-وحدك اليوم سجاد وين؟
-يم اهله.
حجاها ضايج ادري بيه جاي يجبر سجاد يضل ببيت اهله لان مايريده يتعارك وي ابوه، شال الصينية حطها بالهول ، واجوا طــروادة وريمه يمنا اثنينهم مالهم خلك وگوه ياكلون.
كلهم ساكتين لحد ما حسين گاله
-طــروادة باجر يردونك بمدرستي.
ووي حجايته زهره كرصته مدنگه همه يداومون سوه مختلطه عاينلهم طــروادة بشك وزهره گالتله
-يتشاقه جذب مايردونك.
عبود:: شمسوي؟
حسين:: تعاركت وگالوا باجر لا تجي اذا ماتجيب ولي امرك.
كهلان:: نكضي غده ونشوف عليمن متعارك مو وكتها هسه آكلوا ساكتين .
دنگوا ياكلون سكته بس شمس تدردم وهالطول اللسان ترطن وتصيح .
كضينه كلنه وكمنه الا حسين ضل كاعد وياكل، وعبود وطرواده يعاينوله متانين ليمت يكضي ويحاسبونه ولا گام من الصينية ياكل على كيف تمنه تمنه، ريـــمه جابت علوش وكعدت يمهم بالهول، اخذت صينية الاستكاين وقوري الچاي كعدت يمهم اصبلهم وهمه يعاينون لحسين عبود كاضله حزام
عبود:: يله شني؟
حسين:: جاي اكل لا تحجي.
ضحكت وريمه تحجي بهمس وتگل الطرواده عوفوه كضينه چاي اريد اغسل المواعين هسه غير يگوم من الصينية عاينلي وشال الكاسه
-رنـــه اكو مرگه.
طــروادة:: گووم گووم كافي.
كام من الصينية غسل وطب للتواليت كضيت غسل مواعين وهوه ماطالع صاح عليه عبود
-تعال لا اموتنك.
اجه كعد يمهم يردونه يحجي گالهم
-من الأخير وحده وي زهره طكته اخوها وياي گتله يابه حاجي اختك شني تطك اختي مارضى يحاجيها كتلته جا شنّي اعاين عليه.
-اشتكي عليه ليش تعارك.
-احنا زلم نجيب حگنه بأيدنه شني اشتكي؟
كضه عبود من اذنه وهوه يضحك ومجلب بأيده مالحك يطكه وكامتله شمس تحميه جبرتهم يضحكون.
بس طــروادة گوه على روحه يضحكلها، حيل انقهر الساگيه السواها شاكر بگاعه من جهة گيعانه تضر زرعنا يصيّر البزل على گيعانه، حاروا شلون يقهرونه .
العصريات اجوا عليه الولد اخذوا ومشوا للگاع .
طلعت ريـــمه يمي تشر هدوم علوش وانه واكفه ارش بالحوش ابتسمت اعاين للحبل يخبل من عليه هدوم طفل عاينتلي تسأل
-شبيج؟
-هدوم علوش شحلاتهن
-ههه، شمس كاضه بدلتها تريد تلبسها اله.
ضحكت والتفتت على فتحة باب الحوش طب عبود وسجاد ضل واكف بالباب گال
عبود:: رنـــه مازن يريد شمس.
تلاشت ضحكتي ودك گـــلبي حيل، طفيت الماطور وطبيت للبيت اعاينلها يم زهره كاضتلها ورقة وقلم وتشخبط.
اخذتها بدلتلها ومشطت شعرها كلساع ابوسنها بخوف ما أرتآح من ياخذونها، حطيتلها هدوم بجنطتها ولبستها الها درتها علي آريد احاجيها بس هيه سبقتني وگالت
-لوح ماما.
عاينت لعيونها مختنگه وهيه تضحك مسحت وجهي احاجيها
-العمو مازن، ترحين؟
-مادن.
دار وجها ومشت الزهره باستها وتحجي وتعدل بجنطتها شلتها شابگتها حيل ابوسها واوصيها
-باجر تعاي خوش؟
طلعت للحوش ابوس بوجها وإديها أخذها عبود كاضها من أيدها وكفت اعاينلها مازن وأكف يم سيارته وهيه تمشي بأيد عبود وبس شافت مازن عافت عبود وركضتله، تلگاها شالها من الگاع شابگها حييل يبوسها بوجها وبأديها ويرد يشبگها على گلبه.
گـــلبي يروّح وياها واضل عبالك مدري شمضيعه بيتنا يصير وحشه وضوجه.
مــاسه:: شكد صعبة من اشوفن ابوي ما رايدلي الخير اجه يصيح ويغلط
-حاجي مــيثم يشتغل بوظيفة بعد شني لاحگنه على فلوس المعامل؟
-حاله حال اخواني حقه هذا ما ماخذ منكم يابه.
شال ايده يريد يطگني جرتني ماريا من گدامه تفل علينه يغلط سديت الباب وراه گـــلبي نار وراه بنص ساعة اندك باب الحوش طلعت فتحته وطب صــيهد اعصاب عاين بوجهي مضيك عيونه
-شبيج؟
-مابيه شي
مدلي ايده بيها فلوس
صــيهد:: هذا حگ مــيثم اجيبه غصباً علّى اكبر شارب.
اخذتهن من ايده وعاين لوجهه احاجيه
-صــيهد جاي يقهرونه والله العظيم ماتدري من يخابرونه شلون يغلطون عليه وعبالك عبد يشتغل يمهم، تالي يگلوله ما الك فلوس يمنه جا وتعبه وشغله؟
مسح وجهه وشال أيده يحطها على راسي
-شحدهم ياخذون تعبه.. لا تبجين وتقهرين روحج سهل كله سهل.
دنگت آمسح بعيوني گال
-وين حور؟
-تطب تشوفها واسويلك چاي؟
هز راسه يله طبيت گبله أشرت الماريا ركضت الغرفتها، وهوه طب وراي وبس لمح حور ضحكلها، كعد على القنفة وحطيتها بأيده باسها يضحك
صــيهد:: ها خالي حور.
وهيه تناغي وتضحك گتله
-تگلك مشتاگتلك خالي وين هالغيبة
-والله يا خالي ملتهين بطلايب اجدادج الچلاب.
ضحكت عفتها بأيده ومشيت الماريا گتلها
-تردين تطلعين؟
-بخاف
-من صــيهد؟
-لا من حالي بخاف يسمعني شس كبمة روح اتخانق معه.
-حتى يحطج ويذبحج عبالج ســليم ترى صــيهد ماتمشي وياه طولت اللسان گبل يحط بيج راشدي ينسيج اسمج.
-ااي دخيلك
ضحكت وجريتها من أيدها كامت للكنتور لبست قميص طويل جابه الها بريا ينزل لركبها حطت الشال على راسها ومطلعه كذلتها مناه ومناه
-ضميهن ضميهن.. تعاي گليله شلونك صيهد
مديت ايدي ضميتهن وجريتها من أيدها طلعنه للهول گالتله
-شلونك صــيهد؟
-هلا يابه شلونج؟
-منيحه.
هز راسه خوش ودنك يلعب وي حور وهيه مجلبه وياي حلفت عليها تخاف من صــيهد طبينا للمطبخ اسويله چاي واجه مــيثم أسمعهم يسولفون يگله
تستمر القصة أدناه
-هد بنيتي لا تكضها.
صــيهد::وعلي اخذها هيه وامها.
طلعت يمهم مــيثم ضحك طك صــيهد يگله
-تمنيت يصير عندك ولد گبلها وهيج وتجي تتخطب يمي اذلك انتَ وابنك.
هز راسه متحلف وشال حور حطها على رجله گالها
-ترحين وياي خالي؟
وحور ضحكت گاله
-تگول اي هاي هيه سهله.
اخذتلهم الچاي شربوا وبس كضه ال حور كل عقله عاتد مــيثم وحلف ياخذها وياه، سويتلها مميه وعدلت شعرها وهيه بأيده
مــيثم:: ليمت تردها؟
-بكيفي ليمت ما مليت منّها أردها.
ضحكت مديتله المميه عاينلي ماعاجبه كض ايد حور ومدها يگلها
-كضي مميتج خالي.
ضحكنا وميثم حط ايده على جتفي يريد بس يضوجه اخذ حور وراح .
طبينه للبيت انطيت الفلوس الميثم وهوه يتجنب يحجي عنهم يمي يخاف لا انقهر واضوج، ما يدري بيه كل قهري من وراه ابوي وعمي شاكر سكتت وعديتها دام اخواني ردوا حگه هاي هيه.
صار الليل وصيهد ما جايب حور والخبيثة هيه لا گالت اريدن امي لا شي، شويه وجــويريه ودتلي صوّر صــيهد گاعد على الچرباية بفانيلته التعلاگه وحور بحضنه ويصور هوه وياها كاتبه
"امج كالتله خليها يمي ما قبل مگابلها وكاعد"
ضحكت مكيفه كتبتلها
-ما بچت عليَّ؟
جــويريه:: باوعتلها تضحك وي صــيهد رجعت كتبت الماسه " لا ولا مهتمه"
عفت التلفون وگمت يمهم حيل افرح من اشوف حبه لشمس والحور وشلون يضحكلهن عبالك مو صــيهد .
باوعلها وشال راسه باوعلي مد ايده على بطني مبتسم
صــيهد:: هسه يصيرن هيه واسينات صديقات.
ابتسمت عيني بعينه
-صــيهد شايف نجمة بولاريس التحبها.
عض شفته يهز راسه اي ومد ايده يتلمس طرف شفتي
-انتِ نجمة بولاريس
-لو تصعد للسما وتاخذ صورة وي هاي النجمة هم ما اخليك تسمي اسينات
ضحك طكني راشدي على كيف يحجي
-ليش ولج؟
-حاب اسينات انتَ ميت عليها شوف روحك شلون من تحجي بيها مكسف مكيف.
-جا شني اسينات احلى منج؟ ما تلحگج.
ابتسمت وهوه بحجايتين ضحك عليَّ خابره ابوه كاله بيت غانم هناه دخن كمت وياه اخذنا حور ورحنا البيت اهله، مخبوصين ندى تسوي چاي وبدور كاضه كتابها وكاعده يمها تدعي على بيت غانم عفت حور بأيد خاله ايمان ورجعت يمهن بالمطبخ استفسر
ندى:: غير اجوا وما قبلوا ويبطلون يوميه جايين هسه تصير مشكلة.
ووي حجايتها عله صوت صياحهم وكفنه نسمعلهم صــيهد متسودن وبيت غانم يغلطون ويتهددون وهوه يحلف يكتلهم وهذولاك يصيحون الياخذها انكتله حطينه ادينا على گلوبنا صياح وهوسه وكل الصار بسبب شاكر هوه الگالهم الكم مره يمنا
طردوا بيت غانم ودخلوا للبيت يتعاركون وي أبوهم اثنينهم وهـــب وصيهد
صــيهد:: اذبحها وما ازوجها البيت غاااانم.
وليد:: تاكل تبن وتنچب ياااهي مالتك؟ انا ابوها إنا رضيت انتَ شني وتحجي.
يعت بصيهد متخبل وجده من صفحة تحجي
وهـــب:: وهيه بــدور وينها وين الزواج زعطوطه توها نجحت للرابع تزوجها شني استثگلت خبزتهااا؟
دار على وهـــب يريد ياكلهن
-جدتك بگدها عدها أربع ولد
صــيهد:: بويه عاينلي وروح عمي شامل لو تطلع براسك نخله انتَ وهذاك الخايس شاكر لو تموتووون ما انطي اختي البيت غانم اكتلهم يشهد الحسين.
نكث ايده من ايد ابوه وطلع من البيت ميت من القهر ووهب لحگه ندى گالت البدور
-اصعدي فوگ حتى لحد يحاجيج.
وهي ما گالت لا صعدت تركض شارده وابوها ولا يسكت وجده تگله .
-أيمان تريدها الاخواتها.
وخاله ساكته منهم الحد ما ملوا وسكتوا اجت مــاسه على حور كعدنا يم خاله بغرفتها ونسولفلها شصار وعلى العركه
مــاسه:: يمه ديربالج تقنعين صــيهد.
ايمان:: ياا انه اقنعه؟ تسودنت ازوج بــدور البيت غانم شمالني؟
التمينا نحجي عليهم واجت بــدور مدت فراشها يم امها گالتلها
-يمه وعلي القرين يحضني خليني انامن يمج.
وامها مدت ايدها تسد حلگها وبدور تضحك وتجر بأيدها عيونها مدمعه گالتلها
-بيش احلفلج غرفتي حتى جني بيها.
-قل اعوذ برب الفلق، تبطلين سوالفج لو لااا.
غميتها من تذكرت القرين وقشعر بدني محد سودني غيرها هيه واخوها اهل الجنانوه، النوب مــاسه ضلت تبجي تخاف تروح البيتها وحدها لا يطلعلها القرين
-يمه يكضني
-دهر الدهرج يا بــدور، ولج يمه صلي على محمد وامشي هذا بيتكم صدك جذب.
وكفت لابسه عبايتها وشايله حور ومن صدك خايفه الخوافه من الحجي انهبطت وبدور تگلها
-هوه بالنخلات يلبد يمكم.
مــاسه:: يممممه.
صرخت تريد تبجي وبدور ميته من الضحك طكته خاله على حلگها ودارت علي
-گومي جــويريه وصلي مــاسه وتعاي.
باوعت بوجها رافعه حاجبي
-خاله هوه اني راح ابقى مگابلتج ما اروح للمشتمل الا يجي صيهد ترديني اروح اوديها لو امووت.
دارت عيونها الندى ضحكت وهزت راسها خوش، كامت جابت عبايتها اخذت رضا وراحت وي مــاسه وصلتها ورجعت صفگنالها
-والله بطله وسباعيه ما تخافين.
وهيه مكشرة بوجهنا ومسويه روحها قويه وخرت العبايه ومدّت اديها يرجفن متنه من الضحك
ندى:: رجليَّ ضلن يطكطكن شلت رضا واجيت ركض.
ايمان:: صوج هاي الچلبه بديره
وبدور غطت وجها تضحك وتحضن بأمها ندى ضلت يمنه تسولف الحد ما اجه وهـــب دخل للغرفة يحجي الامه على علي إبن كهلان
-والله يمه رجع الضحكه الوجهه كهلان ومن نگله ابو علي تكضه الضحكه ما مصدك
ندى:: زحمه احنا الهسه ما واصلينه وهـــب.
-جيبيله تراك ابو الخمسه.
-يااا لا زحمه.
ضحك وخاله گالتله
-لحد يجيب هدوم أوصلوه بفلوس
وهـــب:: ســليم الطاك مخلي بگماطه ميه اليوم كهلان يگوم ويكعد يصيح بس ســليم كفو، كتله غير الخمسه وعشرين ماتشوف.
ضحكنا وهوه يغلط على ســليم شلون ينطي ميه ويخليهم محتارين النوب خابر كهلان گاله
-اكلك انا هم بأعتبار عندي ولد شو ما انطيت شي انتَ انا هم ما انطي الابنك.. يله توافينه.
وسده بوجهه يضحك، ضلوا شويه كاعدين يمنا وراحوا هوه وندى الغرفتهم واني من كل عقلي ما اروح البيتنا خفت الحد ما اجه صــيهد مشيت وياه سأل
-جا ليش ضاله غاد؟
-خفت سولفنه بالجن وخفت اجي.
هز ايده يحجي
-تعاي عمي تعاي.
دخلت للبيت حضرت ملابس الدوام واباوعله قراله شويه وضم ملازمه تمدد مخلي ايده فوگ عيونه مقهور وبس يتحسر، بدلت ومشيت تمددت بمكاني شال أيده من عيونه باوعلي ومد أيده يخليها جوه راسي ويسحبني الحضنه ضميت وجهي بصدري احاجيه
-لا تقهر روحك صــيهد .
باسني براسي ساكت شويه وگال.
-مليت وعلي، كضه عمره ابوي مايعرف يتصرف جان شيگله جدي يسوي وهسه شاكر يضحك عليه يتقوه ببيت غانم براسي يزوجهم اختي والله لو يموتون.
تستمر القصة أدناه
-ميخالف هاي هيه دام رفضتهم لا تبقى تقهر بروحك.
سكت متحسر وللا گدر ينام كل ما افز لو الگاه يگلب بتلفونه لو فاتح باب الغرفة وكاعد يدخن، للصبح كعدت لكيته غافي كعدته وركضت سبحت وطلعت مستعجله لازم ملابسه وكاعد بباب الحمّام منتظرني، دخل واني ركضت اسوي الريوك وابدل مستعجله لحد ما طلع هوه شافني بعدني ما مكمله كال
-روحـــي البسي هدومج انا احط الريوك.
باوعتله مستغربه حك طرف حاجبه يحجي
-هوه شنوه كوبين چاي وجبن فضت راحت صارلج ساعة .
عفته يحجي ودخلت للغرفة بدلت طلعت كعدت يمه بالمطبخ صبالي چاي ولزمتني الضحكه مدنگه وبالكوه لازمه نفسي مدلي كوب الچاي يسولف ومدري شلون لمحني اضــحك
-عليمن تضحكين؟
باوعت بوجهه وضحكت بصوت وهو تخبل فتح قبق القوري ورجع الچاي للقوري من كوبه وكوبي والا انتِ تصبين
-والله ما اصب واذا ضحكت شصار حامل اني حامل الضحك زين االي.
وهو محترك گلبه وينتر
-چا تضحكينن عليَّ؟؟
گام من الريوك زعلان صبيتلي چاي اضــحك اكلت وگمت بسرعة غسلت ودخلت للغرفة لبست عبايتي واباوعله بطرف عيني رتب قميصة ومشط شعره شال ملازمه وملازمي. دار باوعلي ومشه بدون ما يحاجيني مشيت وراه للسيارة صاروا بوجهنا مــيثم وماسه بسيارتهم هم رايحين للكليه.
عبالي كهلان اليوم هم ما يداوم فتحت الباب الگدام اريد اصعد گال
-واخوج وين يكعد وره؟
-اخوي يداوم اليوم؟
هز أيده ضايج صعدت وره ووكفنا بباب بست خالي شامل نزل من السيارة دك الباب وصاح
- عمي علي صيح الابوك
اباوعله من الجامه واضحك، طلعله كهلان گاله
-جيب علي خل اشوفنه
كهلان:: دفعت دلاعه اله؟
-بعدني.
-جا ماتشوفه.
ضربه صــيهد يشاقيه بس ضربته توجع رجع كهلان جاب علي مگمط وصيهد بس يباوعله ويضحك
صــيهد:: عمي من هسه تدور فلوس انتَ؟
كهلان::بوس عمك بويه.
-واصله وااصله.
ضحكوا اثنينهم ورد كهلان طب للبيت وده علي واجه اخذوا الطريق كله يسبون بشاكر وبيت غانم ومتحلفين بيهم، دخلنه للجامعه لكينه مــاسه وميثم منتظرينا صفيت وي مــاسه ومشينا سوه تحجي على بــدور
مــاسه:: والج الليل كله شابگه مــيثم ما اخليه يتحرك مناه لهنا يگلي شبيج گتله النخل ملتم على بيتنا والجن يفتر بينهن، خطيه بقى يقرأ على رأسيّ قرآن
-والله هاي بــدور بيها كتله تسوه عمرها يوميه خارعتنا .
جاي نحجي وخابرتنا رنـــه ما مداومه اليوم الكسولي صايره تموت على الغيابات
-ها رنـــه .
-اكلج خابري صــيهد خلي يحاجي كهلان ناسي تلفونه هناه خاف عباله طايح منه وضايع.
-يا يله هسه اخابره يحاجيه.
رنـــه :: سديت التلفون من جوري وگمت طلعت من الغرفة ريـــمه واكفه يم السنك گالت
-ادري بيج ليش ما داومتي.
دنگت ساكته اعاين للساعة صارت بالتسعه واجه مازن جايب شمس طلعت للحوش وعبود تلگاها طبت تضحك فتحتلها ايدي
-هلااا هلااا بروحي .
اجتني تركض شبگتها ابوسها واشم ريحتها الترد الروح طبيت للبيت شايلتها صاحتلها ريـــمه
-يمه هلاااا.
نزلتها راحت الريمه تبوسها وتسولف وتأشر على هدومها دوم من تروح لازم مازن يرجعها بهدوم جديدة وفلوس بجنطتها وعلاگة حلويات.
كعدنا بالهول وهيه وعلاوي گدامنا تخبل تخببل من تدنك تبوس علاوي لو تمسح على راسه بأيدها الصغيرونه وتگله
-دادا.
عفتها وگمت للغرفة من دك تلفوني استغربت شعجب مخابر هيج وكت شدراه ما مداومه
-الو
-الو.. ها حبيبتي شلونج؟
-الحمدلله انت شلونك؟
-ليش ما مداومه؟
-شدراك؟
-جنت احجي وي عبود وگالي
-ماعندي شي اليوم وهم تانيت شمس ترجع.
تستمر القصة أدناه
-رنـــه
-ها عيني
-ابوسن عينج.. عاينــي الليله انا يمكم.
-صدك بيش الساعة
-يجوز اوصلكم بتلاثة الصبح لا تگولين لان ما اريدن الولد يدرون ويجوني للگراج اخافن عليهم انا أأجرلي سيارة واجي.
-يله خوش ما احجي ديربالك على روحك بريا.
-صار حبيبي.
-بريا
-ها گـــلبي
-احبنك يا روحـــي .
جر نفس طويل وانه وي كل حجايه اگولها گـــلبي يدك حييل گال
-اموتن عليج بدويتي.
سديت التلفون منه حجيت بس الريمه بعدنا نسولف واندك باب الحوش فتحته وطبت ميلاد وياها هاجر
-خيرر؟
عاينتلي بطرف عينها وطبت للبيت مشيت وراها وكفت ريـــمه خازرتها وهيه ولا مهتمه دنگت شالت علاوي وباستها تحاجيه
-ها جده عزيزي
وريمه ترجف مدت اديها جرتها منها
-جيبيي ابني.
حطته على گلبها بخوف وامها خازرتهاا هزت راسها خوش
ميلاد:: ما اجيت علمودج رجيت اشوفن حفيدي.
رنـــه:: حفيدج؟؟؟
ضحكت مستهزئه وهي عيونها دم. هزت راسها متحلفه عافت هاجر يمنه وراحت، اعاين لهاجر عيونها ذبلانه عينها بعين ريـــمه تعاينلها الحد ماطاحت دموعها ومدت ايدها الريمه سادتها بقوة
اثنينا نعاين الايدها ورخت اصابعها وفتحتهن ايدها ترجف وبوسها جيس نايلون صغير وبيه ماده مثل الخمره مال العجين ريـــمه فاتحه عينها حييب وهاجر شهگت تبجي
ريـــمه:: شگالتلج هاااجر؟ امي شگالتلج؟
وهاجر تشهگ وانه احس اذني تبخ حرارة كلشي مافاهمه وريمه كعدت على حيلها روحها رايحه وهاجر تأشرلها بجت ريـــمه تصيح
-شگااالتلج تريد تموووت ابني؟؟
وهاجر هزت راسها لا وحطت أيدها بصدر ريـــمه تأشر عليها وتشرحلها اخذت علي من أيدها غاص من البجي
-اششش عمه اشش يا روحـــي .
اعاينلها ميته من البجي وهاجر دموعها يجرن وتشرحلها جرت ايد ريـــمه وتكتب عليها بأصبعها، شبگتها يبچن اثنينهن حطيت علي بفراشه وكمت احاجيها
-ريـــمه.. هاجر شسالفة كافي جيبي هاي البأيدج هسه اروح اوكله الها بالعباس.
وخرت ريـــمه من هاجر تشهك وتمسح بعيونها اخذت الجيس من ايد هاجر موديتها ترشه بغرفة ريـــمه، مسحت عيون هاجر گالتلها
-جبرتج؟
هزت راسها لا وتأشر تشرح انُ هي بس گالتلها رضت
-ليش رضيتي؟
دنگت هاجر متحسره بيها شي ما ترضى تگوله حتى لريمه گالتلها
-ببالج شي هاجر؟
هزت راسها اي
-احجيلي هجوره احجي يا روحــي لا تخليني ميته من خوفي عليج.
ابتسمت مسحت عيونها وأشرتلها لا حطّت ايدها على صدر ريـــمه بمعنى تطمني ولا تخافين
-امي تأذيج راح تسوي بيج مثل ما سوت بيه.
وهاجر تأشرلها لا وتحذر وحده منعدنا تحجي أشرت تريد ورقه وقلم كمت جبتهن الها كتبت وشالت الورقة تراوينا
-انه العب عليهم مايلعبون عليَّ ما يگدرون.
كزبر جلدي اعاينلها مسحت وجها ورجعت تكتب شالت الورقة تراوي ريـــمه كاتبه
-لا تخافين ما اخليها تسويلج شي.
ريـــمه:: ما خايفه على روحـــي انه خاايفه عليج هااجر خايفه عليييج.
ميته من القهر جرت ايد هاجر تبوسها وتبجي وهاجر ضمت روحها بحضنها هادئه شويه ووخرت رجعت تكتب
-مايصير بيه شي انه لا تخافين.
بس شيقنع ريـــمه كامت هيه وهاجر فتحت الجيس بالحوض وفتحن عليه الماي ضلت يمنه لهدعش يله راحت
وريمه كضتها تبجي ميته من القهر.
-كافي ريـــمه ختولي هسه عليمن تبجين
-ولج تفتر وررراي شتريد شترريد؟
-والله لو ترضين ارورح اكتلها خوش كتبه تتوب بعد حتى ما تعاينلج.
كعدت يمها مسحت عيونها
-كافي الخاطر شمس حارت شلون تسكتج.
مسحت وجها ودارت باست شمس ضليت يم علوش وهيه طبت تسبح، طلعت حطت كحل حتى بلكن ما يبينن باچيه، تالي اول واحد انتيهلها حسين بس طب للبيت گالها
-شني ريـــمه ياهو وياج.
-رنـــه .
دار علي يحجي
-شبيج وي ام علي ولج.
-اطيح حظك انتَ وياها.
ضحك وطب للغرفة يبدل تانينه طــروادة لمن اجه. من الدوام عاين عليها مستغرب
-شبيهن عيــونج؟
-شبيهن حاطه كحل.
سكت صله وكعد بالهول ماد رجليَّه شمس بحضنه وعلي بصفه وزهره صاعده على رجليَّه تعصرهن، وانه وريمه نصب الغده .
للغروب خابرت بريا اطمنت عليه گال
-نامي ومن اوصل اخابرنج تطلعين اشوفنج.
-اي خوش.
وكل ساعة تعدي تخوفني ضليت كاعده ل١٢ طــروادة طلع يريد يروح الشغله عاينلي مستغرب من لگاني گاعده بباب المطبخ اكل، طلعت وراه ريـــمه
-ليش كاعده.
ريـــمه:: جوعانه مو هيه ما تعشت اليوم.
-ها يله اكضي ونامي حتى باچر تداومين ماجو غياب بعد.
هزيت راسي خوش، فتح باب الدوانيه يتأكد عبود وسجاد نايمين يله طلع الشغلة ريـــمه وراه سدت الباب واجت مبتسمه
-وولج ما نمتي؟
-لا والله ما گدرت متانيه يوصل.
ركصت حواجبها تضحك
-هيج يسوي العشك يسهرج.
ضحكت اغم بيها كمت غسلت ماعوني وطبيت يمها للغرفة اسولف وياها بلكن الوكت يكضي شويه وغفت طكيتها
-اكعدي سولفي وياي.
-ولج هسه علي يگعد ويسودني خليني انامن شويه.
-يله نامي نامي.
عفتها وطلعت تمددت بفراشي گمت اغفي وخابرني
-الو
-ها عيوني نمتي؟
-لا بعدني ليمت توصل.
-ربع ساعة
-يله خوش.
سديت التلفون وگمت مشطت شعري عفته مفتوح وحطيت عليه شال لفيته برخاوه مشموه اطرافه على اجتافي، حطيت عطر ومدري شبيه گـــلبي يدك بسرعة عبالك اول مره راح اشوفنه.
اخذت تلفوني وطلعت بالحوش الدنيا گمره، النجوم يلمعن والگمر صاير بالوسط الجو بيه نسمة هوا بارده،
اعاين للسما مبتسمه دنگت افتر بالحوش واعاين لدجاجاتي نص على الشجرة ونص على حايط السياج چالات ونايمات.
شويه ودك تلفوني
-ها بريا
-ها عيوني اجيت انا جاي امشي بالشارع.
-يا ليش ما جبت سيارة؟
-اجيت بس نزلني على الشارع .
-وينك بعدك بعيد
-لا هاي راح اوصل
-اطلعلك؟
-تعاي.
سديت التلفون گـــلبي يدك بقوةة ومشيت فتحت باب الحوش اعاين من ضوه بلوجكتر بيت عمي شاكر لمحته وصل جنطته السوده بجتفه ولبسه العسكري، عاين على بيتنا ابتسم طلعت من باب حوشنه ومشيت اركض شاف حجابي ما مرتب صاح
-لااا ضلي يمج
بس انه ما وكفت مسافه بيني وبينه انه بالظلام وهوه بالضوه وحتى مايخليني اوصل يمه للضوه ركض مثل ركضتي ضحكت لحد ما وصلت الحضنه صوت دگة گـــلبي عااالي حييل ، شبگني بأثنين أديه على صدره
بريا:: يا بعد روووحي.
وانه بأثنين أيديي شابگته أتنفس بقوة كلي لهفة وشوگ وهو يمسح على ظهري ويبوس راسي ويلمني بحضنه حييل لمة عاشگ مشتاگ، حسيت كلشي حوالينه شاركني فرحتي الليل اللي غطانا عن انظار الكون النجوم والگمر اللي محاوطاتنا مثل الحرس، ونسمات الهوه اللي تمر علينا بس مو بينانن، ما گدرت تدخل بيني وبينه.
اسمع صوت دگة گلبه وي دگة گلبي أشبهه بالعزف يتفاوتن بين دگة گـــلبي وگلبه ثانية.
رفعت راسي من صدره اعاينله لم وجهي بأثنين اديه ودنك يبوسني براسي وخدودي وانه مچلبه بأيده مبتسمه وإيدي ترجف
اشتاقتيتلك حييل.
-اروحنلج فـــدوه يابعد حيلي.
حط أيده على جنفي حاضني ومشينا سوا وكفنا يم باب حوشنا صرت گدامه ايدي بأيده يعصر اصابعي بين اصابعه، يعاينلي مبتسم وصافن بعيوني، شال أيده اتلمس خدي ووخر شعري لوره أذني
-ضليتي سهرانه ؟
هزيت راسي اي
-خفت انام ومن تتصل ما اكعد.
ابتسم يحرك ابهامه على خدي
-اااخ يابه هنياالي بالعباس هنيالي بيچ.
رفعت اكتافي بخجل اضــحك، وهوه تقصد يرفع ايده من وجهي الراسي طيح الشال، وتلمس شعري من كذلتي نزلها على طول شعري وعيونه تتبع ايده
بريا:: انا مستعد هسه اذب جنطتي واگابلج واكعد للصبح أعاين لعيونج، بس انتِ وراج دوام روحـــي نامي رناتي.
هزيت راسي اي
-انتَ جوعان؟
-لا والله، هسه اروحن بس اسبح وانامن.
-خوش.
احجي واعاين بوجهه تدنئ يمي ودنك يبوني من خدي بلعت ريك مرتبگه وانه احس بنفسه الدافي ونغزات شاربه تمشي من خدي الاذني قرب روحه اكثر جر نفس من شعري باسني وابتعد
-اسب كهلان هسه؟ بدل ما اشبگچ وانامن ضال اشبگ بالمخده؟
طكيته على ايده ضحك كرص خدي يحرك رگبته مناه ومناه
- يله طبيّ نامي.
وخرت اريد اسد الباب واجت ببالي دك گـــلبي بساع وردت عاينت لوجهه حطيت ايدي على اديه استندت عليهن ورفعت روحـــي دنگلي وبسته بخده ضحك ودار منطيني الخد الثاني هم بسته ووخرت احس بوجهي يبخ حرارة
حط أيده على خده يجر بالبوسه من خده لشفايفه وميت من الضحك غطيت وجهي بأيدي وسديت الباي اضــحك واسب بيه واسمع ضحكته من وره الباب
-روحـــي نامي رناتي.
-تصبح على خير
-وانتِ من اهل الخير حبيبي.
مشيت لفراشي ارگض بست شموسه وزهره وتغطيت مبتسمه بسرعة غفيت، كعدت الصبح على طگات شمس گوه فتحت عيني شبعتني راشديات ومن تأكدت كعدت دنگت تبوسني، شلتها وطلعت طــروادة توه راد من الشغل وكاعدين بالهول هوه وريمه وعلوش بقفهم مسويتله ريوك صبحت عليهم احاجيه
-بعدك ما نايم شلون تداوم؟
-ما اداوم اليوم اريدن اكضي الگيعان.
طــروادة:: عاينتلها اشوفن امها بعيونها فتحتلها ايدي
-تعاي خالي.
رنـــه:: گليله خل اغسل وجهي واجي.
رطنت عليَّ ومشت وياها غسلت واجتني، يا ريحتها يا شبگتها محد صبرني على مصيبتي غيرها
-فـــدوه اروحنلج يا خالي يا بعد روحـــي.
تاكل وياي وتسولف تترس البيت بسوالفها وساعة الياخذها عمها اكرهه اطب للبيت وحشه ويخنك، كمت من يمها لمن إجه ســليم
ســليم:: گول موخوش ادمي اجيتك من الصبح
-هههه كفو
-خاب هذا بريا البارحة نزل نكربه ويانا.
-هاي هيه، تانيني اجيب تلفوني واجيك
اخذت غراضي وطلعت وياه للگيعان شاكر سوه ساگيه حتى يخرب گيعاني وسليم اقترح اسوي ساتر بيني وبين گيعانهم حتى لا ينضر زرعي بالبزل، صح ياخذ من كاعي مساحة بس اهون من ما يصير البزل عليها.
وصلنا للگيعان ســليم متفق وي شفل بدأ يشتغل الساتر
واجوا وليد وشاكر متسودنين
شاكر:: ياهو الگاالك تحط ساتر؟
-گيعاني بكيفي
وليد:: مصدك روحك گيعااانك شو ماتعرف تحجي انتَ.
عفتهم ومشيت اذا اضل يدوسون بگلبي گوه يخلوني اطگنهم وزحمه من وكفت الولد وياي، ضل سليم يتعارك وياهم واجاه وهـــب يعاونه بالعركه .
وخرت عنهم لنص الگاع، الله يعين ابوي شلون صبر عليهم وتحمل كل حقارتهم، كعدت اعاين للوادم كلمن ملتهي بگاعه واجه علي ابن غانم يتمشى وكفت مالي خلگه
-السلام عليكم الله يساعدك بويه.
-عليكم السلام.
تلفت عاين للشفل اليشتغل
-والله گلت كون يحطله ساتر بينه وبين گيعان عمامه احسن.
-اي.
الخبث تارس وجهه ذاك هوه يصيح آلامه وابوه تلفت يعاين شاف وليد وشاكر صعدوا سيارتهم وراحوا گال
-والله يا عمي الله يعينك عليهم.
-الله يعين الجميع.
هز راسه اي يريد يحجي وخايف يتلفت شاف ســليم ووهب بعدهم مسافة علينه گال
-عمي ديربالك على روحك هذول الاخو ما يسلم من شردهم مو الدور انتَ تريد تسلم منهم.
مسح على لحيته مايحط عينه بعيني
-يا اخو الما سلم منهم؟
-اكلك الاخو ما يسلم منهم اعبرلك جاي.
-اهاه تعبرلي.
دار وجهه لمن الولد وصلوا گال
-يله بويه انا رايح كون تعتاز شي انا عمك وجريب عليك بس گول.
-الله لا يعوزني.
گلب وجهه ومشه، ضل حجيه براسي الولد وياي ما متيهيني لمن كضه الساتر يله ردينا للقرية
ويالتسعه بالليل طلعت للــبستان اسگيه لأخر مره حتى وراها ايسبه واحرثة للحنطه.
اتمشى يم الساگيه المسحاة على اجتافي الليل ساكن ماكو غير صوت الماي وهوه يجري بالساگيه يمشي واتبعه من مچان المچان ، وصوت التربه من افتح العبرة عليها ويوصلها الماي عبالك تتنفس وينطفي لهيبها.
كعدت يم الساگيه غسلت أيديي ووجهي وحچاية ابوي ترن بأذني
-حبّ گاعك وأشتغل بيها من كلّ گلبك، تحبك وتنطيك گد تعبك.
للوحده يله كضيت سگي سديت الماي عنهن وتمشيت اريدن ارد اوصل لمكاين الماي حسيت روحـــي لمحت سواده تركض بين النخل مديت ايدي على اللايت شغلته وضويت على النخلات ماشفت شي وبس طفيته لمحتها ركضت ماشغلته بعد ظنيت مثل كل مره طنطل.
لمن وصلت للمكاين يله شغلته طفيت المكاين ومشيت للبيت وكفت گدام باب الحوش مستغرب الورقة الملزوگه على الباب جريتها أعاين بيها مكتوب
-لا تنام ضلّ بالگاع.
تلفتت مستغرب اعاين مناه ومناه ماجو احد طبيت للبيت والورقة بأيدي شني لا تنام شني ضلّ بالگاع غسلت وخابرت صــيهد اسولفله
صــيهد:: خاف واحد من الولد
-ما ادري اذا صدك اطيح حظهم مو شقى هذا انا ما صدگت اليوم اجازة حتى انامن.
-هسه اجيك.
ريـــمه:: فزيت على صوته مستغربه فركت عيوني احاجيه
-ها كهلان.
شغل الضوه عاينلي ومدلي ورقه فاتحها
-تعرفين هذا الخط المن؟
اخذتها من ايده هزيت راسي لا قريتها مستغربه
-هذا ياهو كاتبلك هيج؟
-جا لو ادري ما انشدج على الخط.
ابتسم آخذها من ايدي واندك باب حوشنه كمت وراه.
طبوا صــيهد وسلطان يضحكون عليه اخذوا الورقة منه يگلوله
-اذا ماطلعوا ســليم ووهب وبريا ردوا لمقالبهم.
سلطان:: مقالب طايح حظها هاي.
طــروادة:: گبل لا اجي شفت سواده تركض بسن النخلات لا هي بشر لا هي جن سواده وتتحرك كلشي مايبين منها ومن اشغل الضوه عليها تختفي.
طكه صــيهد يغلط عليه ويگله
-سودنتنه انتَ ابو الطناطله.
ووي حجايته دك تلفون سلطان كالهم
-سليم
رد عليه وبساع سد التلفون وگالهم
-حراميه جاي يبوكون بمكاين الماي.
سلاحه چان سانده على الحايط ووي حجايته لكف السلاح وركضوا اخذوا روحـــي ضليت الوب بالحوش لتلاثة يله ردوا طب كهلان عيونه حمر
-هااا؟
-ماكو شي.. مالحگنه عليهم
غسل اديه ورجليه باله مشدوه ويفكر
-مابيكم شي الولد مابيهم شي؟
-لا والله ماكو شي
طب للغرفة حيره تجيبه وحيره تاخذه گال
-مو حراميه ولا نيتهم يبوكون المكاين،لان همه اثنين والمكينة خمس زلم يله يگدرون يشيلونها، ما ادري شني غايتهم وليش بوكت جيتهم انحطت هالورقة على باب حوشنه.
مسح وجهه بحيره وللخمسة يله عينه غفت ونام خابرت على سلطان بالي يمه اتأكد مابيهم شي ردت عليَّ رغد گالت
-جاي يسبح.
-مابيه شي؟
رغد:: گمت على حيلي ماخذه التلفون وياي
-لا والله مابيه شي
-خوش جا اخذوا راحتكم
-هلا بيج ريـــمه.
سديت التلفون منها وطبيت للمطبخ اسويله ريوگ التفتت من طلع من الحمام المنشفه على اجتافه اجه يمي باس خدي يحجي
-ما نمتي انا اسويلي ريوگ.
-يجوز عاجبني اتريگ وياك
ضحك حاضني من خصري يبوس خدي ويتحرك وياي وين ما اروح
-سلطان وخر جيب الصينية
مشه جاب الصينية حطينه الريوك سوه وكعدنا نتريك گال
-عكس البشر احنا نتريك وننام.
-غير انتَ هذا وين چنت اذا من تلاثة رجعتوا من الگاع انتَ ووين رحت سلطان.
ابتسم ودنك
-كاعد يم الشط.
عاينتله ساكته وهوه من يحجيها بأبتسامه، كضينه الريوك وگمت للمطبخ غسلت ومشيت يمه للغرفة ضمني بين أديه حييل
-نمرشه
-سلطان.
-نمرشتي
-سلطاني.
اهتز صدره يضحك لان اقلده بكلشي، غمضت عيني مبتسمه احمد ربي واشكره، غفيت ومن كعدت مالگيته كمت للبيت نظفت وطبخت طفيت الغده ومشيت الاهلي عطله اليوم كلها كاعده
لگيت صــيهد شايل شمس وواكف بالمطبخ والبنات وامي كاعدات سلمت عليهم وهوه يگل الشمس
-انتِ احلى نجمة بسلفنه.
ويعاين لجوري مبتسم وهي ترفعله حاجبها گالتله امي
-جــويريه نجمة السلف وشمس احلى نجمة بسلفنه جا يمه انه شني؟
-انتِ الگمر مال قريتنا.
وامي غطت وجها بالشيله وتسوي روحها مستحيه تقلد على جــويريه اخذله شويه يمنا وراح وده شمس ومشه وي الولد كعدت يم امي ورضا يفتر علي ويگل الندى
-اتفل على عمه؟
ندى:: خايب يمه لااا شمالك تسودنت؟
-خل اتفل؟
رغد:: تعال رضا تعال اذا ماعضيتك وكطعت لحمه من ايدددك تعال.
اجه يركض ظم روحه بحضن امي وامي تغطيه بالشيله وياها وتصيح
-ولي رغد ووولي
-خلل اعضه جيبييه.
وهو يصرخ ، نضحك متونسين مص ساعة واجه وهـــب متسودن ويتعارك وي ابوي واحنا ما فاهمين شكو
وهـــب:: عليمن تسجنونهممم عليمن.
يصيح بحرگه يتراجف وابوي واكف گدامه ويغلط عليه عته من ياخته يصيح
-ياهي ماالتي انا غير همه رامين على الززلمه.
وهوه متسودن صاحت عليه امي طب للمطبخ غسل وجهه اديه يرجفن دار علينه عاين بوجهي وعاين لجوري وامي رايحه روحها تحاجيه شكو
وهـــب:: الشرطة اجت للگيعان اخذت صــيهد وسلطان وطرواده وسليم.
فتحت عيني مصدومة وايدي على گـــلبي وامي صرخت متسودنه
-يممممه .
وهـــب:: بس على كيفج وي روحج هسه يجيني مــيثم ونروح نشوف عليمن.
حجه وي امي وطلع للحوش لحكته ميته من الخوف
-وهـــب.
التفت علي والتلفون بأيده مستعجل ومحترك گلبه
-عليك العباس ماتعرف ليش اخذوهم؟
عاين للمطبخ ورد عاينلي
-واحد مشتكي عليهم على اساس رامين سيارته هسه خل اروحن واشوف شكو.
طلع مستعجل واحنا بيتنا انگلب جده وابوي يحجون وأمي تبجي وجويريه ايدها على بطنها وتلوب كعدت يمهن بالمطبخ ايدي على خدي وگلبي يدك بخوف اسمه ابوي من الهول يصيح
-يطبهم مرض ضحك عليهم كهلان وها ورطهم.
ومن جده مارضت على حجيه خابر على عمي شاكر يريد يسأله وهو مايرد عليه ضلينه بنار نلوب للغروب اجه وهي گال حطلهم هدوم واكل، عاينت بوجهه جوري بساع بجت وكفت يمها احاجيها وأصبرها
-عليمن تبجين هسه يلكون حل والزلمه يتنازل يطلعون شسالفة.
مسحت عيونها وغسلت وجها ميته من القهر عفتها ورحت البيتي احطله هدوم بس طبيت وحدي بجيت كل ما نكول كضت هاي هيه تجينا مصيبة .
وهـــب جاب هدوم الطرواده ميت من القهر ريـــمه تبجي هم اخوانها وهم رجلها.
اخذ غراضهم وراح هوه وميثم وبريا.
ابوي كلساع يخابر على واحد ومشه على الزلمه المشتكي عليهم حتى يتنازل بس عمي شاكر ما مهتم موتني من آلقهر، الثاني يوم انه يم اهلي وكلنه ملتمات بغرفة امي
غير كون يگولون اي هاي هيه وراح تنحل ماكو
الولد ثلاثتهم يركضون مناه ويجون مناه تالي كالولهن للثنين يجوز يتنازل ويطلعون گطعوا گلوبنا طب وهـــب مهدود حيله يسب بيهم وبشاكر وجده تغلط عليه ماراضيه نتر بوجها يصيح
وهـــب:: خيووولي تلفون ماشال وخابر عليهم ولد اثنينهم ما مهتملهم .
واشيه:: ومرض المرررضك شعليه شبيذه شني رئيس الوزراء هوه وبتلفون يطلعهم.
شال تلفونه وگام ميت من القهر طلع من البيت، ثاني يوم كعدت جــويريه
-گومي داومي وهـــب مــاسه خابرت تگول تروح ويانا .
جــويريه:: مالي واهس.
-گوومي گومي اذا تردين غيبي باجر مو اليوم باجر رجلج يطلع ولا تداومين .
گامت گوه على روحها مشت تبدل، اجت مــاسه مالها خلك هم ضايجة
مــاسه:: ما يطلعون اليوم؟
-لا خيه بلكن باچر.
-استغفرالله ، بيت عمي شامل متسودنين امي رحت يمهن اثنينهن يبجن ريـــمه ورنه.
سكتت محتارة ما بأيدي شي بين ما بــدور بدلت وطلعت وجويريه هم اجت بــدور راحت وي الحجي المدرستها وجويريه وي مــاسه وميثم للكليه.
لبست عبايتي ورحت البيت عمي شامل فتحلتلس الباب ريـــمه عيونها مورمه طبيت سلمت عليها اباوسها واحاجيها
-شمالج هلگد باچيه؟
دنگت مختنگه طبيت وياها للبيت حاطه علاوي بالهول وشمس كاعده يمه عاينتلي بقهر
-احنا نتبهذل بلا طــروادة
-بلكن باجر يطلعون
هزت راسها اي تمسح بعيونها مقهوره
-گوه قنعت رنـــه تداوم اليوم اجه بريا اخذها يله رضت تروح، ومناه شمس وين ما تفتر وصاحت خالو، تريده ما تكليلي شلون ما ابجي.
-ميخالف خيه الله كريم جا شنسوي.
تحسرت بحيره، صليت يمها مناه لمن ردوا من دواماتهم طبت رنـــه سلمت عليها گالت
-جا ليش بــدور ما مداومه اليوم.
-لا خيه داومت.
-ماشفتها ماطلعت من الصف هواي.
-هم ما رضن يداومن گوه قنعتهن.. يله ريـــمه انه رايحه فـــدوه لحد تبجي ان شاءالله باجر يطلعون.
هزت راسها اي طلعت كوه كاضه دموعي اصبرهن واهونها بس هس مو هينه وتوجع الگلب، طبيت للبيت اساعد ندى بالغده صارت ب١٢:٣٠ صاحت امي
-رغده شوفي بــدور كونها نامت خل تتغده يله.
ندى:: بعدها ماجايه عمه.
-يمممه.
شلت راسي عاينت للساعة
-هسه تجي يمه شنّي السالفة.
احجي وامي متسودنه طلعت من غرفتها ابوي كاعده بالهول هوه وجده يعاينون اخبار صاح عليها
-لا تخبصينه هسه تجي.
ووي حجايته دك تلفونه نصه التلفزون ورد سلم ونوب گاله
-شلون يعني ماطلعت حجي؟
بووويه بتنا وديناها وياك شلون ماطلعتلك.
رجفت ايدي بخوف وامي كعدت مهدود حيلها طب وهـــب ميت من التعب وانصدم بصياح ابوي
-شكوو؟
مسحت وجهي اهز راسي ما ادري ما ادري، طب للهول ابوس سد التلفون ويصيح وبس شاف وهـــب صاح عليه
-ووولك بوويه ولك آختك ماهيه بمدرستها
وهـــب:: شني اختي ماهيه شجاي تحجي انتَ؟
واشيه:: يمه يمه تصخك وجهنااا يمه
وهـــب:: اسكتيييييي
صيح بكل صوته ودار على ابوي متسودن روحـــي راحت من الخوف الحجي يگله حتى المدرسات طلعن وبدأ دوام المدرسة الثانية ويتكم ماطلعتلي.
ركض وهـــب للسيارة مثل المسودن لطمت على وجهي بخوف صخام الصخمني ووين راحت بــدور وين رراحت
امي تخربطت وندى حارت بيها وانه لبست عبايتي ورحت الرنه اركض وابجي تلكني اثنينهن متسودنات
-ررنه رنـــه متأكده بــدور ما مداومه اليوم؟
-والله ما ادري ماشفتها ماشفتها طلعت موه وحده بفرصة الدرس الثالث وماشفتها.
كعدت على حيلي بالحوش ابجي والطم على رجليَّ
ريـــمه:: هسه تجي هسه تجي وين ترووح رغد كومي.
-ووولج ماهيييه اختي ماااكو.
لطمت على وجهي گـــلبي ممرود ورنه مچلبه بأيدي گمت. وياها ساندتني توصلني البيتنا واجه مــيثم جايب مــاسه وجويريه من الكليه نزلن متخرذلات من شافني جلبت بأيد مــاسه احاجيها والدمع خانگني
-بــدور بــدور ماردت من دوامهااا.
-يييمه شلون ماردت رغد شجاااي تحجين؟ شلون ماردت؟
مــاسه:: اصيح مصدومه ورغد رايحه روحها طبينه للبيت امي ضغطها صاعد ومتخربطه وعمي شاكر يتعارك وي آبوي بالهول وجده تلطم على رجليها وتدعي على بــدور
كل حيل ماضل بيه لمن صارت بالثنتين وبدور مابينت ولا الولد بينو يدورون عليهاا وبيتنا انگلب صريخ وهوسه ماخليه ايه ودعاء يعتب عليَّ ابجي وادعي رايحه روحـــي.
مشيت للبيت تلكتني ماريا تبجي لان حور ضالّه تتقيئ
كعدت بالگاع غطيت وجهي بأيدي وبچيت بصوت خايفه حيييل خايفه على اختي.
كعدت ماريا كدامي
ماريا:: لك مــاسه شو في شو صار ليش عم تبكي.
عاينت بوجها اشهك
-بــدور.. بــدور ماردت من دوامهااا يدورون عليها وماكو.
شهگت ايدها على حلگها گمت كوه على روحـــي غسلت وجهي واخذت حور غسلتلها وحطيتها بحضني أسكتها وادعي كون تعدي على خير ووين ماجانت بــدور ترد.
نص ساعة عذت نومتها وگمت كوه احجي
-ماريا رايحه اشوفن اهلي واجيج
هزت راسها خوش، لبست عبايتي وطلعت عيني بالگاع وافكر وين تروح، ردت تروح للمحل وصارلها شي، وهـــب يدري بسالفة المحل اكيد راح ودور غاد، جا وين راحت.
وصلت يم سياج حوش اهلي واسمع صوت زلم وصياح فتحت باب الحوش وانصدم بزلم يم باب الديوان غطّيت وجهي بالعبايه ومشيت للمطبخ رجليَّه يرجفن تلكني البنات يتباجن
-هااااه؟
لطمت رغد على رجليها تشهك وكوه تحجي
-كل السلف دره بــدور ماهيه ووولج عمي فزع الوادم علينه صخاام بوجهي صخااام بوجهي يعير ابوي وولج وكف گدامه ويگله الله اليدري ويامن شردت
چلبت بالحايط دايخة وممرود گـــلبي، فزينا على صياح وهـــب رد ولكاهم تسودن يتعارك وي عمي شاكر وابوي يطكه ويغلط عليه طببه ابوي للهول. دفعه حيل وطكه راشدي يغلط
-ووولك سودت وجهناا اختك ووولك ما تاخذون حجايتي بطلوووهن كتلكم بطلوووهن خل يرتاااح صــيهد هل شررردت اختك.
كعد وهـــب ايده على گلبه وكوه يتنفس وعمي شاكر ومرتضى طبوا وراه يغلطون
شاكر:: لو بسااابع سما تجيبونها وتذبحونها سمّعتني وولك وهـــب سمعتني.
وهـــب:: اطلععع برررره اطلع برره.
كاضين الباب كلنه نبچي وهوه كوه وكف على حيله اجوه مــيثم وبريا ويحجون واب ابوي ميثم يگله
-انتَ شدريت البنيه اندعمت انخطفت شعرفت وصحت سودنت وجهناا؟
شاكر:: انتَ تاكل تبن وامشوا ما تلفون للبيت لو ما لگيتوها بخنجر ابوووي تذبحهاا وليد سمعتني يووو لا بخنجر ابوي تذبحها.
وابوي يهز راسه اي متحلف تعارك وياه وهـــب والولد اخذوه وطلعوا يدورون ، والهوسه والصياح بيت غانم وبيت حمود وبيت جبر كلها ملتمه بثنيتنا الچلب شاكر طش الخبر بالسلف ويحرض بأبوي على ذبحها، امي رادت تموت ماتوكف على حيلها حتى لو اثنين كاضينها ترجف وتطيح.
لا ضل حيل ولا ضل دمع تمنيت بس صــيهد موجود هذا الاخفن منه تمنيته بهالساعة موجود حتى يشگ حلگ اليحجي بطارينا وبسمعتنا.
صارت بالخمسه واختي مابينلها أثر وظبت ميلاد تلعلع
وتدعي على بــدور
-شردت شررردت وسودت وجوهنااا ما ينگدرن بناتج ايمااان ما ينگدرن.
وامي طايحة بالفراش مابيها حيل حجايه بس دموعها يجرن طلعت من الهول للمطبخ اشهك بس اريد اجر هوه فتحت عيني مصدومة وانه اشوفن بــدور طبت للحوش متلفلفه بعبايتها وجنطة الكتب بجتفها وعيونها يجرن محد وراها بس سمعت صوت عمي شاكر صاح
-وووولج وووين جنتي؟
اجت تركض شبگتها بكل حييل ابجي واجن رغد وندى يركضن وهيه تضم روحها بيناتنا تبجي صرخت كاضتها بكل حيلي من طب ابوي ومد أيده جرها من حجابها والخنجر بأيده
-بووووويه عوووفها عوووفها يااابه.
نصرخ ونجر بيها وهوه متسودن وعمي شاكر يطك بينا
حط الخنجر بأيد شاكر وجر عگاله يطگنه بكل حيله وعمي شامر جر بــدور من عدنا گدر ياخذها من بسن ادينه تسودنا نصرررخ ونكضها بس نريد نجرها رد آبوي عليها بساع حطّ الخنجر على رگبتها غطيت وجهي صرررخت بكل صوتي وهوه يصيح
-التدنى منچن اذبحها ويااااها... وين جنتي ووولج وووين جنتي.
اعاينلها ترجف بأيده مثّل السعفه واحنا محددين نخاف لا نجرها لا يسويها ويذبحها شهگت اصرخ من طب وهـــب وصاح على ابوي
وهـــب:: عووووفها، انا الاذبحهااا.
ومد ايده بكل حيله جر بــدور من شعرها فتحت عيني اشهك
-وووهب.
طكها راشدي على وجهاا حيل. طاحت من ايده للگاع ركضت رغد متسودنه طكته وملخته. تصرررخ
-وووولك وهـــب ووولك اختك هااااي اختك
جرها ابوي طكها وعمي حط الخنجر بأيد وهـــب وطكه على جتفه
-اغسل عااارك سودت وجوهنااا.
صريخنا يجسب التايه بس محد خير وفزعلنا، بريا وميثم ما ادري وينهم محد بين، دنك وهـــب للگاع شال العبايه حطها على راس بــدور وجرها يطلعها من البيت صرخت متسودنه اريد اطلع اريد الحگها وابوي وعمي يطگونه بكلّ حيلهم من بين ادينا اخذوووها.
طلعوا وقفلوا باب المطبخ علينا
-مايسووويها ووهب ما يسويها .
ارجف ما مقتنعه كلشي يمر مثل الحلم ركضنا الامي من طلعت من الغرفة تزحف على اركبها سوده بوجهي تريد تنطق اسم بــدور ما تگدر
-ييمه يمه والله ما يذبحها وهـــب ما يگدر يطكنه ما يگدر يطك وحده من عدنا شلون يذبحها
-ب.. بدور.
رغد فلشت الباب وطب ابوي بصونذه يطكها وهيه ما تتنازل تغلط عليه تسبه وتشب شاكر ركضتلها احميها نص ساعة عدت مثل السم علينه مدري شلون الوكت يمشي بين بجينا وصريخنا
ركضت اجيبن ماي اريدن اغسل وجهه امي طاحت الدولكه من ايدي مكسورة فاتحه عيني بصدمة وانه اشوفن وهـــب طب للحوش قميصه كله دم والخنجر بأيده متروس دم.
شكرا لزيارتكم عالم روايات سكيرهوم
