رواية أرض الخناجر الفصل الثاني والسبعون بقلم ايلول
عشت مصدر رعب ما اعيش مكسور
صوبت الهدف گبل النوايا
قائد على السواتر موتتي تصير
طعم ما اطيح بحلوگ الحيايه
══━━━━✥◈✥━━━━══
مــاسه:: اعاين الاديه والخنجر اليتراجف بأيده وهنه مصبوغات بالدم، يتلفت للديوان نفسه مگطوع، رجفه سرت بكل جسميّ عيوني ما مصدگات وعقلي ما مستوعب ولا اصدك ولا اقتنع اخوي حنين لو الدنيا كلها تگلي وهـــب ذبح بــدور ما اصدگ والله ما يسويها مراهن وي روحـــي متراهنه عليه وهـــب ما يسويها والله يا ناس ما يسويها.
كعدت مهدود حيلي اعاينله وبس متمنيه يجي ويگلي انا ما خيبت ظنج واختج بالحفظ والصون ومابيها شي.
طبوا وراه مــيثم وبريا ومن الديوان طلعوا بيت غانم وعمي شاكر وابوي ووياهم زلم من السلف
كمت ارجف كلي اريد اوصل للباب واحاجيه مالحكت مشه بساع لباب الديوان وكفّ گدامهم يعاينون للدم البجسمه وبأيده وصوت عمي شاكر يخرش بأذني من صاح
-عفييه زلمه وسبع.ذبحتها؟
هز راسه اي كل لحظة تمر تمرد روحـــي حسيت بأيد جــويريه على ظهري وكفت بصفي نعاين عليهم واشوفن وهب من بينهم مد أديه على راضي ابن غانم زلمه معگل وبكد ابوي جره للنص وطكه كله على وجهه يصيح
وهـــب:: انا ما اذبح اختييي اذبح اليتهما بشرفهاا.
ارجف من يمي واعاينلهم صارت ملاخ ولدنا وي ولد بيت غانم وابوي جر وهـــب متسودن، ميثم وبريا ووهب يتهددون عليهم وراضي ابن غانم طايح بالگاع والدم يسيل من خشمه على دشداشته البيضه وولده يهدون على ولدنا والوادم صايره حواجيز بينهم وهب شال ايده ويصيح بحرگه
وهـــب:: تلعب علينا راضي ؟ تريدني اذبح اختي وهي أطهر من مرضعك يا نگس.
مفرفح يحجي وي الزلم بحرگه وابوي وعمي شاكر يردون يملخونه گال للزلم
وهـــب:: خطبوا ورفضناهم حاروا شلون يشوهون سمعة بناتنا يتفقون وي نسوانهم يطيحنهن، اختي طالعه من مدرستها وي بت حسين، امها گرايب مرت علي ومتفقات عليها منوماتهااا حتى هالچلاب يتهمونها شارده ولك نعالها يسوه شاربك والله اموتنك
وركض عليه هوه وبريا والوادم كاضتهم هوسه وصياح وشاكر يطرد ببيت غانم وبس يريد يسد السالفة، بس ولدنا ما سكتوا گطعوا ولد بيت غانم تگطع ناس تجر بناس، ولدنا مو هواي وبيت غانم تارسين ثنيتنا التموا عليهم والمح سجاد طب يركض جان بالدكتور وي عبود بأيده توثية وهد عليهم يركض يفشخ بيهم والولد أخذهم العزم ملخوهم گوه الوادم المتكتره من السلف جروهم على صفحة وركض بريا طلع بره يتلگه شيخ حيدر .
هوسه وصياح وانه عيوني وي وهـــب الدم التارس اديه وجسمه منه من اركز بيه اشوفن من جوه ردن القميص الدم يقطر للگاع ثواني ضل واكف يتهدد ويغلط ومد ايده جلب بأيد مــيثم مالحك يستند عليه طاح للگاع مهدود حيله.
من بين دموعي ركضت للغرفه وجويريه اجت وراي لكيت جده تنوح فوك راس امي وندى تركض بينها وبين رغد صيحت ابجي
-ماذبحهااا يمه ماذبحها گتلج ماذبحهاا مابيها شي بــدور مابيها شي .
اجر بأيدها ابجي ورغد روحها رايحه غطت وجها بأديها وصوت بچيها يمرد الگلب شبگتها جــويريه وانه كمت من يمهن اركض للمطبخ اعاينلهم مــيثم كاعد گدام وهـــب منزعه القميص ولامه حاطه على جتفه على الجرح، وبيت غانم ولا واحد ضال منهم وشيخ حيدر مارضى يطب للمضيف واكف ويحجي وياهم ويصيح بوجهه عمي شاكر، گدام الزلم الواكفه هانه ودار الوهب ينشده على اخته وهـــب گاله بصوت عالي يسمع كل الزلم الوكفه
وهـــب:: اختي بالحفظ والصون، محافظة على سمعتنا وماي وجوهنه، خيوط عبايتها أطهر من دمهم النجس، واليمس شرفها بحجايه انحره جوه رجلها.
وابوي بدال ما يفرح هد على وهـــب يريد يطگه دفعه مــيثم وصاح بوجهه حييل ماراضي، وشيخ حيدر تسودن وعمي شاكر وجهه صار اصفر ويقنع بشيخ حيدر يروح وگاله
-هسه وهـــب يرد اخته للبيت وتنحل ان شاءالله تنحل ماكو شي .
وهـــب:: اختييي ماترد للبيت اذا ما اخذ حگها وازين الشوارب الحجت بيها، وحگها مايرد مناه لمن صــيهد يطلع واشوفهم الامهات شتجيببب.
ووي حجايته فزيت على صريخ رغد وجويريه ركضت للبيت وهمه وراي اجوا واشوفهن حاطات امي بحضنهن ومنگعاتها بالماي وامي مگلبه عيونها ليفوك ضال بس الآبيض مبين صرخت متسودنه ووهب وميثم جروها من بين ادينه شالوها وطلعوا يركضون ركضت وراهم رغد ارواحنا راحت
ضليت كاعده بباب الهول والطم على رجليَّ وجويريه شابگتني وتبجي بطنها توجعها اجت ندى اخذتها للغرفة وانه مكابله الحوش وابجي لا بيه اطلع ولا بيه اطب للبيت، الزلم بعدهم تارسين الحوش بيت غانم ساعة يتهاددون ساعة يخابرون ينكرون ساعة يتعذرون وماتكض منهم صدك، اعاين لباب الحوش طب حسين وبصفه رنـــه مغطايه بالعبايه تمشي ومدنگه وكفت على حيلي امسح بوجهي ايديي يرجفن، طبت للمطبخ وخرت العبايه من وجها تبجي كضيت بأيدها رايحه روحـــي ابجي واحاجيها
-ماذبحها ماذبحها.
هزت راسها ادري صوتها مبحوح ووجها غادي تراب من القهر على اخوتها
رنـــه:: وينها بــدور وين ودوها؟
-ما ادري وين وداها وهـــب، ولج ابووي يصيح اذبحهاا، وهـــب يگله ما مسويه شي وبيت غانم متفقين عليهاا وهوه يصيح اذبحهااا.
-بس گليلي ياهي الورطتها وخليني باجر امسح براسها ساحة المدرسة.
كحيت مختنگه من الخوف العشته صوتي گوه يطلع
-صاحبتها اشواق تصير گرايب مرت علي أبن غانم وولج ما ادري ما ادري ما فهمت شي بس سمعت وهـــب هيج گال، بس شلون بدور تروح وياااها شلون ترضى تروح وياها.
ابجي واحجي بحرگه وطب ابوي يتراجف ويصيح
-بووويه والله اذبحهاا انا تحط راسي بالطين والله اذبحهاا.
صرنا على صفحة وهوه طب للبيت شايل الدنيا على راسه ويهدد متحلف، الوادم طشت وحتى شيخ حيدر مشه يشوف الولد ليش الهسه ماطلعوا، وعمي طب للبيت يتعارك وي أبوي ويدفع بيه يريده يكتل بــدور ويحلّ السالفة وابوي حجايه تجيبه وحجايه توديه، وما اهتميت دام وهـــب سوه كل هذا وحجه گدام كل الوادم وبين أختيّ ماعليها عيبه وسمعتها تشرفهم، اطمنت وبالي ضل بس وي امي.
رنـــه:: اروحن مــاسه يعني اكيد بــدور مابيها شي اطمن؟
-اي اي والله لا تخافين وهـــب هذا مايجيسها يعرفها شني ويعرف تربيتهم
هزت راسها اي كضيتها من ايدها احاجيها
-بيكم شي ليش هلكد باچيه؟
غمضت عينها وجرت تفس يرجف فتحت كوه تحاجيني
رنـــه:: شني المو بينا؟ اخوي بالسجن والثاني من دكتور الدكتور شأكثر من هيج بعد؟
-عبود؟ شبيه شكو رنـــه؟
طبطبت على ايدي متحسره
-ماكو شي گلبه يوجعه، يله آنّه رايحه وعفيه لو اجت عمه طمنيني عليها.
هزيت راسي اي اعاين وراها اخذها حسين وتلاكه وياهم بريا يم باب الحوش مشه وصلها، طبيت للبيت عمي وابوي وجده مشوا للدوانيه، كابلت ندى وجويريه كعدت نار بگلبي لمن صارت ظلمة گتلها
-ندى انه رايحه البنات وحدهن عليج الله اول ما يجون خابريني، وديربالج على جــويريه
لبست عبايتي وطلعت لكيت بريا شايل حور ويفتر بيها بالحوش وماريا كاعده يمهم ايدها على خدها، اخذتها منه احاجيه
-بــدور وين عفتوها؟
مشه كعد بصف ماريا وعاينلي
-والله ما ادري وهـــب اظن عافها يم بيت خالتج مدري وين.
سكتت وطبيت للغرفة حطيت حور بمچانها وبچيت ميته من القهر والخوف ومتحلفه ببدور شلون تروح من مدرستها وي اشواق، زين لو وهـــب مالحك وابوي ذبحها
ولو ولو وكلساع اتخيل شغله واموتن من البجي، شويه وخابرني وهـــب رديت عليه مختنكه
-ها وهـــب.
-ها يا بعد روحـــي لا يضل بالج امي زينه.
شهگت ابجي روحـــي رايحه
-وهـــب.
-هاه خويه هاه
-فـــدوه اروحنلك والله دريت بيك ما تحاجيها
-مــاسه بس لا تبجين هسه كله ينحل
-وينها بــدور؟
-مالج غرض، عفتها بمچان امان محد يوصلها لا تخافين
-ليمت تجيبها؟
-ما اجيبها مناه لمن يطلع صــيهد ويصير خير.
مسحت عيوني وهوه صاحوا عليه سديت التلفون منه ووين يله مــيثم اجه ومشيت وياه ب١٢ البيت اهلي شفت امي شصار بحالها روحها رايحه ضلينه ساعة يمها وردينا البيتنا.
"""
بــدور:: اول مره احس روحـــي امر على حافة الموت، عشت كل عمــري لايذه بسد اخواني واخواتي وحتى مواجهة وي صــيهد ما ادخل شارده منعنده اخاف لان ابسط الامور تحز بخاطري اخاف انطك واخاف ينغلط عليَّ وانقهر، ابتعد عن كلشي بس حتى لا يصير شي يقهرني.
اقرب شي الي صديقاتي وشكد ما صارتلي مشاكل ما اقتنعت انُ انه انسانه مالها نصيب من الصداقة.
اول بنات وكفتلهن غدرني وما لمتهن لمت روحـــي لان ما سمعت حچي اختي وضليت امشي وياهن رغم ادري سوايتهن غلط الحد ما سمعتهن يتهمني ويحجن عليَّ يله عفتهن وابتعدت ضليت مده بدون صديقه بس رديت انغشيت من شفت وحده حبابه وفقيرة صادقتها ورغم دريت بيها تعود لمرت علي ابن غانم ما اهتميت گلت هيه طيبه وحبابه شلي غرض بگرايبها.
وطول المده ماشفت منها شي امتحنا ثالث سوه وسجلنا الرابع سوه وداومنا بالمدرسة الجديدة سوه رغم صرت وي رنـــه نفس المدرسة بس ماعفت اشواق ضليت وياها ونكعد فد رحله ونوبات نشتري وناكل سوه ثقيت بيها وحبيتها وانقهر من تتمرض وهيه مثل رنـــه عدها سكر وتتخربط هواي.
وبهاليوم اجت للمدرسة ووجها أصفر تعبانه كل شوي تگلي تعبانه واحجي عليها لان داومت لو غايبه احسن
وصبرت درس اول ودرس ثاني الحد الدرس الرابع تعبـــت حيل دايخة ومچلبه بأيدي طلعنه انه وياها من الدرس للأدارة المديرة رادت تخابر اهلها وهيه ما حافظة ولا رقم وكالتلها بس امي واخواني الصغار بالبيت ما تگدر تجيني حتى لو تخابرينها وخاف تطلع وحدها خاف تطيح بالشارع كضتني من أيدي كالتلها
-ست ميخالف بــدور توصلني
-لا امي مسوؤلية
-ست احنا گرايب جا ياهو يوديني الاهلي سكري صفر وخاف اطيحن.
سكتت المديرة محتاره وطبت المعاونه جانت وحده من سلفنا وناس تعرف ناس كالتلها
-خليها تروح ست النوب تطيح وتعال جيبلك سيارة وأخذها المستشفى.
عاينت المديرة علينه تسأل
-عندج امتحان؟
اشواق:: لا ست.
-بيتكم خومابعيد؟
-لا ست.
تحجي وانه ساكته رغم ادري بيتهم بعيد سكتت سكتت ونسيت حجّي صــيهد وتحذيره نسيت شچم مره وصاني ما اوكف بباب صديقة مو النوب اروحن وياها البيتهم.
اخذت جنطنا وعبينا وطلعنه من المدرسة ساندتها وهيه كلساع تريد تطيح، لمن وصلنا الاهلها تلكتنا امها طبيت وياها حطيناها بغرفتها خايفه عليها وامها تقيسلها بالسكر وتعاينلي گالت
-هاي شوفي لان ما ترضى تتريك هسه اسويلجن ريوك .
وكفت على حيلي شلت جنطتي واحجي وياها
-اي خاله اكتليها تجي بلا ريوك وتخلصها متخربطه عليَّ بالمدرسة.
احجي مبتسمه اريد أرجع للمدرسة وهنه وحده عاينت بوجهه الثانيه وحجن بنفس الوكت
-ووين رايحه، ولا ترحين اكعدي اكعدي
-لا والله اروحن الحك على الدرس الاخير
اشواق عاينتلي بزعل وامها جرت الجنطة من ايدي تحلف
-علي الحسين هم تطلعين اكعدي تريكي وي اشواق وروحي الاهلج.
-اي بــدور فـــدوه هيه مره بالعمر اكعدي نتريك سوه عليج الله لا تكولين لا، نتريك وروحي تلحكين على الحله.
ضحكت مستحيه واجر بالجنطة منها كامت اشواق تحجي
-ازعل منج والله .
وبلحظة نسيت وصية اخواني وحجيهم وتحذيراتهم، كعدت وي اشواق بغرفتها وهيه بدلت واجت تراويني فساتينها التريد تلبسهن باعراسهم نسولف ونضحك شويه وطلعت هيه يم امها بالمطبخ دقايق واجت جايبه صينية الريوك مخلمه وصحن جبن حطتها يمي گالت
-المخلمه الج انتِ تحبينها وانه اكل جبن.
-والله عيب بس لا گلتي الامج احب المخلمه وخليتيها تسويها.
-ااي لج غير مخلمة امي تخبل.
طكيتها على ايدها منحرجة من امها وهيه تضحك، جابت الچاي واجت اكلنا سوه ونسولف ونضحك الوره الريوك كمت غسلت وياها ورجعت الغرفتها اريد البس عبايتي وارد للمدرسة گالت
-اوكفي اوكفي بس خل ادور ألبوم الصور حتى تشوفين بنات راضي ابن غانم شلون جانن مّولحات
-ولج اريدن اروح ما الحك خاف الحجي يعوفني ويمشي.
-اكعددي هسه اجيج بس ادوره.
ضليت بغرفتها وهيه مشت الغرفة امها تدور الالبوم، لابسه عبايتي وجنطتهن بجتفي كعدت مستنده على الحايط ومتانيتها بس تجي بطت عليه والغرفة بارده وانه مدري شمالني اريد اضل فاتحه عيني ماكو سندات راسي على الحايط والمخده وره ظهري غمضت عيوني بين ما تجيني، ماجنت ادري وره هالغمضت عين شني المتانيني.
ما فتحت عيني الا على ايد اشواق اعاينلها كاعده كدامي تبجي، وانه متمدده وفوكي بطانيه وبس استوعبت كعدت فازه اعاينلها بأستغراب واحجي بسرعة
-ما اريدن أشوف الالبوم اريدن اروح اشواق راح اتأخر.
كل ظني عيني غفت دقايق مو ساعات.
اشواق:: اذا رحتي للبيت يذبحونج بــدور.
عاينت بوجها مستغربه وايدي ترجف مافاهمه وهيه مسحت عيونها وگالت
-السآعة بالاربعة وربع العصر.
شهگت فاتحه عيوني على وسعهن ما مصدكتها وهيه تبجي وتتعذر
-جبروني والله ماعبالي توصل للكتل هسه سمعت امي تحجي وياهن وواصله للذبح اشردي بدور روحـــي اشردي روحـــي الغير محافظة راح يذبحوونج كلها ملتمه بمضيفكم.
دفعت ايدها ووگفت روحـــي رايحه وما مستوعبه اعاين للساعة البأيدي واعاين للساعة البالحايط ما مصدكه، فتحت الباب وطلعت متعثرة، صارت بوجهي امها وهيه اجت وراي تحجي
-بــدور اشردي يذبحوونج.
بس كضت ايدي دفعتها وطلعت اركض واتعثر اتلفت بخوف وامسح بوجهي ايديي يرجفن واسمع صوتها وراي تصيح
-اشردي بــدور لا تردّين للقرية تنذبحين
مشيت ابجي شسويت بروحي شسويت بأخواني، امشي بساع ما اشوفن دربي رادّه للقرية واتخيل بيا آيد انذبح، يسمعوني لو لا يصدكوني لو لاا، امشي بساع رجليَّه يرجفن ودموعي يجرن وحجيها يدك براسي اشردي بــدور لا تردين للقرية تنذبحين، امشي بساع نفسي مگطوع وكل ذره بجسمي ترجف والخوف يسري وي دمي.
اتلفت على الشارع اغطي روحـــي بالعبايه زين وامشي بخوف حيل وياي حييل وياي يا ما حذرني يا ما وصاني وگال اموتنج لو غلطتي يا ما حذروني وياما علموني انه المارضيت اتعلم وطبيت بيت وحده جنت اظنها صاحبتي
تالي غدرتها انحطت بنص گـــلبي .
ما صدكت عيوني من وصلت للقرية وركضت الايد مــاسه اريدنها تحميني وما گدرت من اديهن جروني وروحي راحت من وهـــب صاح انا الاذبحها چلبت بيه هذا عزيز روحـــي ما اريدن اموت بأيده خل ابوي اليذبحني ولا اخواني.
طلعني للسيارة سحل دفعني حيل سد الباب وافتر صعد ابجي بحرگه وكل جسمي يرجف بس صعد جلبت بأيده غاصه من البجي
-وهـــب وهـــب والله ما سويت شي وهـــب لا تذبحني ابوسن ايدك لا تذبحني والله ما سويت شييي.
وهوه يسوق بسرعة طك الستيرن ودار عليَّ يصيح
-ووووين رحتيييي وين ررررحتي.
-لا تذبحنيييي لا تذبحني ووهب لا تذبحنييي.
كل جسمي يرجف وصوتي مبحوح الخنجر بيني وبينه وكل ما اشوفنه اتخيله على رگبتي صرخت من مد ايده عليَّ حطها وره راسي وجرني عليه يبوسني براسي وانه مجلبه بأيده روحـــي رايحه
-انا اذبحنج بــدور انااا؟؟ تسودنتي؟ بس كليلي وين رحتي هاااه وين رحتي احجي سولفي وووين رحتي ووولج.
ومن بين دموعي وشهگاتي اسولفله واحلف كل يمين وابرر واذكر كل حجي اشواق اسولفه اله وهوه يعاين للشارع ويعاينلي طك الستيرن يغلط ويعاتب
-شلوون ترحين وياااها شلون؟
ابجي ساكته غلطانه ولو شما يحجي حگه هز راسه متحلف ويحجي بحرگه
-لعبه كلها لعبه من بيت غانم سهله سهله بعيني سهله.
عاينتله وجهي غرگان بالدموع عاين لوجهي ورد يعاين للشارع مد أيده على خدي
-لا تبجين والله اگطع نسله اليحجي بسمعتج وجوه نعالج اذبحهم.
-مصدكني وهـــب مصدكني انتَ ما تذبحني.
فتح عينه حيل ورد عاين للشارع
-اشش اشش يابه اسكتي شذبح؟ أسكتي.
مسحت عيوني گـــلبي يخفگ واحس بروحي ما مستوعبه شي من الصار طبك بباب بيت صاير بفرع والفرع هادئ نزل فلت سويج السيارة المفتاح مشكله وياه مشه للباب فتحه واشرلي تعاي، نزلت رجليَّ يرجفن واتلفت بخوف بعدني ما مأمنه وهـــب ماراح يذبحني .
وصلت يمه دار داس سويج السيارة قفلها وحط ايده على جتفي طببني للبيت سد باب الشارع ومشاني وياه للباب الداخلي فتحه وطبينه بيت جديد رد طلع للحوش رفع الچنچ مال الكهرباء واجه يمي للهول شغل الاضويه ومشه للسنك فتح الماي ماصب رد طلع شغل الماطور وانه واكفه واعاينله بخوف بس اريدن أأمن هاي هيه مايذبحني بعد.
تستمر القصة أدناه
فتح الحنيفه البصف ماطور الماي وبس صبت ماي گال
-ذبي عباتج وتعاي غسلي وجهج.
وخرت العبايه من راسي اعاين الايديي بعدهن يرجفن، حطيتها على باب الهول اعاينله بخوف مشيت يمه عاين بوجهي ومد ايده يتلمس خدي المشتعل نار من الراشدي
-انكسرت ايدي كون.
حجاها متحسر وجرني من ايدي حتى ادنك يم الحنفيه دنگت غسلت وجهي وايديي
-هسه اجيج.
عاينت وراه طلع وما طول عشر دقايق ورجع شهگت مصدومه وانه اشوفه كله تراب والدم تارس هدومه
-يممه وهـــب.
-اششش مابيه شي هذا واحد اثول دعمني بدراجته
ما اهتم الروحه شال أيده يراويني بيها علاكه مبين بداخلها ماي وكيك وعصاير جرني من ايدي طبينا جوه للغرفة الاخيره جان بيها بوفيه وفراشات عيني على الدم المغطي قميصه احاجيه بخوف وهوه يتلفت شغل المكيف
-وهـــب كلك دم.. وهـــب.
ما اهتم عاف العلاكه بالگاع ودار علي كض وجهي بين اديه ودنك يبوسني براسي وخر يعاين بعيوني
-راح اعوفنج وحدج
فتحت عيني حييل خايفه
-وحدي؟
هز راسه اي كضيت بأيده
-اخافن وهـــب.
-ماعليج شي والله ما عليج شي البيت راح اقفله من بره شويه واجيج خوش بس خليني ارد هسه للقرية واجيج والله اجيج ما إبطي.
يحجي مستعجل وانه الخوف اكل گـــلبي اكل مشيت وراه دموعي يجرن وصل الباب الهول وطلع يعاينلي قفله من بره ركضت للشباج اعاينله طلع من باب الشارع وانه ابجي وراه ميته من الخوف قفل الباب وراح.
اتلفتت ابجي مشيت بساع للغرفه طبيت وسديت الباب بخوف حتى ما اعرف هذا البيت المن لامه العبايه عليَّ ابجي وما اتحرك من مچاني ولمن استوعبت انه وحدي وكاعد ابجي والقرين راح يجيني مسحت عيوني بساع وتلفتت بالغرفة بخوف گمت گـــلبي يدك بخوف قفلت باي الغرفة ورديت كعدت بمچاني بس فاتحه عيني ومانعه دموعي ينزلن.
ساعتين عدن معدتي تنعصر عصر من الجوع جريت العلاكه فتحتلي كيكه وعصير اكلتهن وعيوني يتلفتن مناه ومناه تذكرت آية الكرسي حطيت ايدي على گـــلبي وقريتها حتى تحفظني وأأمن، ضميت باقي الكيكة وگمت فتحت باب الغرفة وطلعت اتجاهل خوفي وما اتلفت غسلت وجهي بالمطبخ واعاين من الشباج الماي انترس والماطور بعده مشتغل الباب مقفول علي ما اگدر اطلع واطفيه عفته ورديت كعدت بالغرفة وكل ما اريدن ابجي اذكر القرين واضم بچيتي.
الحد الليل اعاين لساعتي بهدعش كمت بخوف من سمعت الباب انفتح شلت البرده واعاين گـــلبي يدك بقوة لمحته طب للهول بساع فتحت باب الغرفة وركضتله دموعي بطرف رمشي ذبيت روحـــي بحضنه وشهگت ابجي لمني على صدره حييل
-هاه بــدور هاه شبيج؟
-اخاافن اخذني وهـــب اخاافن والله اخافن.
وخرني من صدره عاف العلاليك البأيده على صفحه ولم وجهي بين اديه يمسح عيوني
-وين اخذج؟ ابوج يفتر على اخوالي يدور عليج.
-ليش ليشش مو كتله ما مسويه شي؟
-لانه مضحكه وعربانه يدفعه شاكر، تعاي.
شال العلاليك ومشينه للغرفة جايبلي هدوم واكل كعد كبالي
-اصبريلي بس خل يطلع صــيهد ارد حگج ساعتها تردين للبيت وانتِ رافعه راسج ويخسى اليحجي عليج.
-بس انه اخافن اضل وحدي
-منين تخافين؟ محد يندل هذآ البيت وانه جاي اقفل البيبان عليج من بره بعد منين تخافين ؟
دنگت اعصر اصابعي بخوف همست
-من القرين والجن.
شلت راسي اعاينله صافن بوجهي اخذله شويه وگال يصوت يخوف
-انا القرين اجيتج بهيئة أخوج.
صرختت بكل صووتي ابجي وهوه يكض بيه ويصيح
-جذذذب جذذذذب ووالله جذذب انا وهـــب خرب روووحج.
ابجي متسودنه
-لا تخووووفني
-بالعباس انا وهـــب صرخي النوب الا اكسر سنونج بحلگج صدك جذب هيج هيه؟
عاينتله اناشغ وامسح بعيوني
-جا ليش تخوفني؟
-لان تمسلتين يا قرين هذا الخابصتنا بيه وين اكو صخام بطلي تصدكين بهاي السوالف لا أطيح حظج.
-اريد ابطل بس ما اگدر احس كل ما ابجي يشبگني.
-خل ياكل تبن لا اوديله گوامه وادگه بفصل يكعده على الحديدة فالتوه هيه يشبگج.
مديت ايدي اكض بأيده مميله راسي على صفحة لان يضحك عليَّ ويحجي هيج بس علمود لا اضل ضايجة
-اخذني وخليني ببيت عمي شامل.
هز راسه لا
-انا ماضال بالبيت اركض مناه ومناه علمود اطلع الولد من السجن وهذا ابوج حجايه تجيبه وحجايه توديه شلون أأمن عليج؟
-جيب امي يمي حتى ما اخافن.
-لا هاي هيه ربحنا
-جا شلون؟
-ماكو شلون صيري سباعيه وحطيها ببالج بس اردج للقرية هسه يذبحونچ، تردين تردين؟
عاينت بوجهه هزيت راسي لا اخذت هدومي ومشيت للحمام اخذ سطل وطلع جابلي ماي من بره سبحت وطلعت يمه بالغرفه بعدني خايفه واتوسل بيه مايروح ويعوفني وحدي
وهـــب:: ما اروحن تعاي اكلي ونامي.
اكلت شويه وهوه هم أكل وياي غسلنه ورديت للغرفة نزل بطانيه من الفراشات عاينتله اسأل
-جا هذا بيتمن؟
-مالج غرض تعاي نامي.
تمددت وحطيت راسي على رجله صافنه ودموعي ينزلن بلا صوت جا ابوي مو دره بيه ما مسويه شي ليش يريد يذبحني، درت اعاين لوجهه وهـــب وسألته بخوف
-وهـــب.
دنك يعاين بوجهي وحرك رجله الجوه راسي
-خاف من يطلع صــيهد ويسمع بالسالفة يذبحني؟
تلمس خدي يهز راسه لا
وهـــب:: يذبحني انا لان خليت اليسوه والمايسوه يحجي بيج وما كتلتهم بساعتها.
-خايفه
تحسر ساكت وجر الغطا علي زين
-نامي اخوج يمج .
جريت نفس طويل وغمضت عيوني تاكل بگلبي نظرات ابوي وحطت الخنجر على رگبتي، دموعي ينزلن بلا صوت الحد ما غفيت وما فزيت الا على صوت دگة تلفون شلت راسي افر بعيوني واتلفت جوه راسي مخده ووحدي بالغرفة التلفون صرصور بصفي يدك مكتوب وهـــب جريته وفتحت الخط صوتي رايح
-الو.
-ها يابه صباح الخير.
-صباح النور ها وهـــب جا ليش عفتني؟
-جا غير عندي شغل شلون اضل مكابلج
سكتت اعاين بالغرفة گال
-بــدور هذا التلفون يضل يمج اخابرج عليج خاف ما اگدر اجيج لان ابوج وعمج شاكر مخلين مرتضى يتبعني وين ما اروحن راح يتسودنون بس يردون يعرفون وين وديتج.
-يمه واضل وحدي
-انتِ شمالج ليش مستهانه بالسالفة؟ تضلين وحدج ومحد يحجي بسمعتج لو تردين للقرية وابوج الشفيه يذبحج وكلها تكول سوت شي هل ذبحوها.
-وهـــب اخافن وعلي
-لا تخافين بطلي سوالف القرين وما ادري شني وكلشي مايصير، يله انا رايح عفت يمج اكل وخلي المكيف مشتغل حتى لو تبردين لا تطفينه حتى لا يخرب اكلج.
ضليت ساكته شلون ما اخافن ما ادري سد التلفون كعدت ابجي محترك كلبي شيريد مني ابوي بدال ما يحميني متحزم يريد يذبحني ليشش ليش شسويت حتى انذبح .
""
رنـــه :: اويلي من يلتمن يشيبن الگلب، خاف نشد ظهرنا بعبود دكه المرض ويوميه بدكتور، طبيت للدوانيه كعدته من نومه بخوف
-عبود.. عبود
فتح عينه فاز
-سويتلك عصير اكعد اشربه.
فرك عيونه وكعد على حيله عاينلي وعاين للساعة يحجي
-غير تكعديني اروحن للگيعان.
-وينك وين الگيعان انتَ خيولن.
اخذ كلاص العصير شربه ورد حطه گدامي
-لا شلون يولن، حسين كضه دراسه؟
هزيت راسي اي وهوه كام وكف طبك غطاه عافه على صفحة صاح على حسين اجاه يركض وكف يمه خابر على سجاد وهذاك تسودن ما يرضى يخليه يروح للگيعان گاله
عبود:: بويه گيعانه هو بس نحوش البستان لا جاي اكرب ولا اسگي ما علي شي.
سد التلفون منه گتله
-اروحن وياك؟
-لا خويه شني السالفة هسه نحوشهن ونجي.
سكتت محتاره طلع للحوش هوه وحسين، تلاكت وياه ريـــمه ترش بالحوش كالتله
-يا بستان؟ خيولي اكعد عليمن تحوشهن بيش تبيعهن بخمسين مانريدهن.
عبود::شجاجن؟ نضل بلا مصرف؟
ريـــمه:: انا عندي مصرف ضامته شعليك انتَ عبود اكعد.
هز راسه لا ما راضي گتله
-تانيني اروحن وياك.
طبيت للبيت لبست عبايتي وچفوف غطيت وجهي وشمس شافتني تسودنت تبجي تريدني اشيلنها
-خاله نحوش البستان تطككين والله
چلبت برجليه تبجي شلتها وطلعت وزهره وراي تتوسل تذكرني بروحي من چنت أتوسل بعفراء تاخذني وياها للــبستان
زهره:: فـــدوه فـــدوه رنـــه احوشن وياكم اعاونكم والله.
-جيبي چفوف تلكين بالجرارات وجيبي سلال وتعاي.
ركضت جابتهن طلعت يمهم للحوش شايله شمس حسين واكف بأيده چياسه ومتنگب بجفيه وعبود حاط الچفيه على راسه وضاله مفتوحة.
المصبرنا على فراگ طــروادة حجايته من خلوه يخابرنه گال
-انا عايف وراي سباع تربات شامل ما يطيحون.
رغم ندري حجايته بس حتى يصبرنه تشجعنه ومسحنه عيونه ما نبجي ونتاني ليمت يطلع.
ريـــمه ما رضت نروح تحاجيني وتحاجي عبود گتلها
-خلينا نروح عاد نبيعهن ونتسوك ضالين بلا مسواك، والمولد مابيها بانزين نضل ظلمة؟
سكتت ضايجة تعاين علينه كالت
-جا تانوني اودي علي يم رغد واجي وياكم.
-لا خيه رغد بيا حال ملتهيه بأمها ورايحه روحها علمود بــدور، ضلي انتِ بالبيت واحنا ما نبطي والله.
طلعنا وي عبود حسين شال شمس وهيه مكيفه وتصفك عبالك ما ادري وين رايحين نمشي بالبستان عبرنا المچان التصوبت بيه عفراء وانه ماحط عيني على نفس الساگيه ولا نفس مچان طيحتها من يوم صوابها لليوم طرواده حرمها على روحه يبس البستان البيها وسد عنها ساگية الماي ومازرع بيها ابد نعبر من يمها مغبره وچنها مهجوره من سنين.
مسافه مشينا لمن وصلنا يم بستان الباميه واللوبيا عبود كال الزهره
-تعاي اكعدي انتِ وشمس هناه بالفي.
حطلهن جيس كعدن عليه، تحزمت شاده شيله على ظهري فوك العبايه وذبيتها من راسي اخذت السله من حسين ومشيت بمشرب الباميه احوشن وبالي بغير مچان اترس السله وافرغها بالجياس وحسين يحوش باللوبيا وعبود وياي بالباميه كل هالشغل جان طــروادة يسويه وحده يضل من الصبح لليل يحوش مايهون عليه نجي وياه وتصكعنا الشمس.
رديت امشي بمشرب جديد واحوشن اصابع الباميه احطهن بالسله واعوفن الاصابع الكبار حتى ييبسن وناخذه بذور للسنه التجي، امشي مدنگه واللثام المغطيه بيه وجهي خانگني بس لان ما مركزه وياه وبالي مشدوه ما مهتمتله الحد ما فززني صوت بصفي
-اعاونچ بدويه؟
شلت راسي اعاينله فازه واتلفتت اسمع صوت ريـــمه وسجاد واكفين وي عبود ولا ادري بيهمّ جايين عاينتلي ريـــمه گالت
-علوشه وديته يم ماريا
حجتها ومشت يم حسين تحوش وياه اللوبيه وتحجي عليه لان ما يحوش عدل وسجاد يتوسل بعبود يگله اكعد وعاين عليه انه اشتغل بمچانك وهوه ما يرضى.
رديت اعاين بوجهه بريا ابتسم ومد ايده ينزل اللثام من وجهي وبطرف چفيته مسح وجهي
بريا:: تعبانه يا بعد روحـــي؟
هزيت راسي لا گال
-ماكو بعد چف البسه واساعدكم؟
صحت على زهره
-وين الچفوف؟
جابتهن واجت تركض اخذهن منها وصار بالمشرب البصفي يحوش وياي وكل ما اعاينله يشيل راسه يبتسم ويشمرلي بوسه بالهوه
-اسكت بريا مالي خلك.
-عليمن علمود طــروادة؟ ترى يطلع وجاي نشتغلهم على البارد نريد نطيح شاكر وبيت غانم بس اصبرن .
عاينتله اهز راسي لا ومشيت للچياسه افرغ السله اجه وراي سلته بيها تص فرغها وياي وكعدنا بصفهن ريـــمه جايبتلنا ترمز ماي صغير شربت ماي احاجيه
-طك گـــلبي عليه.
-هسه يجيج والله جاي ندور على هذا الاشتكى عليهم بس خل نكضه نشبعه كتل ويتنازل
عاينت بوجهه عيونه تصد بيهن الشمس مضيگهن ولحيته لونها عسلي تلمع ابتسم يعاين بأديه
-لا تعاينين هيج اشتهي اكض خدج واتلمسه.
حجه ودار على صوت عبود من صاح عليه
-گوم من يم اختي خايس
بريا:: ههههه انچب، مرتي مالك غرض.
وكف ومد ايده الي كضيت بيها كومني وياه، ردينا نشتغل عبود مشغل بتلفونه قراية مال عملة كربلاء، وكلساع يتلاهدون هوه وبريا لان بريا يشتغل بس يمي لو يگلي
-تعبتي حبيبتي اكعدي وانا اشتغل بمچانچ.
وعبود يشمر عليه حجار، صار الغروب واحنا بعدنا نحوش انصدمنا شكد ما حشنا البستان بعده بيه لمن صار الليل عبود گال
-كافي يابه امشونا نرد.
صفوا الچياس سوه وصوروهن يردون يراوونهن لطرواده من يطلع، غطيناهن وللفجر يمشون عبود وبريا يبيعونهن
بريا شال شمس حطها على اجتافه ومشينا سوه رادين للبيت تلاكه ويانه شاكر گبل ما نوصل الحوشنا صاح يغلط شلون انه وريمه رايحين وياهم وشلون بريا يمشي بصفي
شاكر:: ماكو زلم بعددد ماكو زلممم
سجاد:: شتريد بويه؟ شتررريد.
صيح سجاد بحرگه وريمه كضته تخاف لا يتعارك وياه، بريا نزل شمس حطها بأيدي ومشه وگف بين سجاد وشاكر يحاجيه ببرود
بريا:: استحي الشيب تارس وجهك وانتَ حاير شلون تسويلك عركه وي ياهو الچان المهم تصيح وتجعور بصوتك.
شال ايده شاكر يريد يطكه دفع ايده مايخليه وهوه متسودن يغلط ويسب ودار الريمه يصيح
-المن رايحه وووياهم اذا همه ما بيهم غيره ويخلون اخواتهم كاضات البساتين انا ما ارضى اكسر رجلج.
ريـــمه:: مالك غرض بيه رجلي واخوتي راضين ومحد اله حگ عليَّ غيرهم.
حار شلون يكض ريـــمه تسودن بس يريد يطگها وسجاد يتهادد ويحلف يمين يرميه لو طك ريـــمه كلنا خفنا من سجاد لان ندري بيه مسودن لا صــيهد يلحگه ولا ســليم محد مخبل گده، وعبود بس راد يلم السالفة طبينا للبيت وعبود مشه وي بريا جاب علاوي.
ريـــمه ركضت ركبت اللوبيا وانه طبيت زهره وشمس للحمام اسبحهن، وشمس تريد تلعب بالماي گتلها
-لاا كافي.
غطت وجها بأديها الينگرطن وتسوي روحها تبجي شالت ايدها شافتني اعاينلها اضــحك ردت غطت عيونها وتسوي روحها تبجي، شلتها لافتها بالخاولي
-ووولج جذابه
ابوس بيها واضحك طببتها للغرفه سوالفها تضحك الناصبله فاتحه، وتجبر ياهو اليشوفها يبوسها ماينشبع منها لبستها ومشطت شعرها، عبود جاب علاوي حطه يمي ويحاجيه مبتسم
-علوش عمي حبيبي.
-يكلك امده هيج عم.
مد ايده يطگني ويعيب على علاوي
-چنه فصمه.
-خل يكبر وشوفه شلون يصير چنه العيد
دنگت ابوسنه وشمس كاعده بحضني عاينت بينهم مبتسمه وخانگتني العبره من ريحة اعز أثنين بدنيتي
عفتهم وگمت اتأمل كل صوت ببيتنا حتى هاي الخبصه التصير بوكت الغروب والعشه احبنها، حسين يتعارك وي زهره يريدها تطلع من الحمام بساع وعبود اخذ علاوي وشمس للدوانيه يم سجاد واسمعهم يضحكون، وريمه ملتهيه بالمطبخ، بس صليت ومشيت يمها ضليت اگلي وهيه طلعت خبزت واجت نفسها مگطوع وتعبانه صبينه العشه
كعدنا على الصينية اعاينلها وتعاينلي اثنينا نفكر بيه هسه هو جوعان لو اكل، تحسرت بگلبي نار ومحد تبجي يم الثانية ضالين اقويها وتقويني، وره العشه كاعدين بالهول خابرت مــاسه اسألها على امها وبدور كالت
-والله خيه امي شويه احسن وبدور وهـــب حتى مايرضى يخابرها واحاجيها يگول الوعهم اخليهم يدورون مناه لمن يملون ولا يرضى يگول وين خلاها.
والوادم الرادت تدخل علمود يحلونها وي بيت غانم كالهم لا محد يجي وماتنحل مناه لمن صــيهد يطلع من السجن، وبيت غانم كاتلهم الخوف ولج ساعه ينكرون وساعه يگولون النسوان من يمهن مسويات هيج .
-خوش يسوي وهـــب خل الولد يطلعون احسن
-اي بس ولج اريد اموتن من الخوف على بــدور تدرين ابوي يحلف يذبحها مساع تعاركنه وياه انه ورغد نگله غير ما مسويه شي عليمن تذبحها يصيح لا نزلت راسي وراس عمها جدام الوادم خيبه شاكر يحرض بيه وهوه متسودن.
شلت راسي اعاين لريمه تسمع وياي هزت راسها بحسافة مقهوره.
-اكلج مــاسه ما عرفتي شي ليمت يطلعون؟
-جانت سالفتهم سهله بس غير صــيهد غالط على الضابط
-هاي كل سجن صــيهد يتعاند وياهم لو يطكهم وياكلونها الولد ينسجنون شني السالفة كض اعصابك هيج هيه
-خيه خيولون جا يغلطون عليه واخوي ما يسكت لو مو ضابط
-اندري بأخوج انه.
-خايبه رنـــه لا تحجين عليه.
-يله يابه ماحجيت شي شبيج مــاسه.
سكتت ضايجه سديت التلفون منها وشمس ضلت تبجي تريد هيه تسد الخط رديت خابرتها كالت
تستمر القصة أدناه
-لا تعتذرين عادي.
-خايبه انجبي ياهو اليعتذر؟
-جا ليش خابرتي وحمس.
-هاي شمس تريد تسدّ التلفون بوجهج
-ياااا
-والله حاجيها يله وخل تسده بوجهج.
حطيت التلفون بأيد شمس صاحت على مــاسه
-الوو
مــاسه:: ها شموسه.
وشمس رطنت سريع سررريع كلشي ماينفهم من حجيها ووخرت التلفون من أذنها بعدها مــاسه تحجي وياها وسدّته بوجها وتضحك فرحانه
ريـــمه:: الخايسه تكيف تسد التلفون بوجهه احد
-ههههه ام السان.
دارت ريـــمه تحاجيني همس
-خطيه بريا كل ما ينزل تصادف بأجازته صايره مصيبة ولا يشوفج لا يكعد وياج
دنگت متحسره
-راح تكضي اجازته رنـــه وهوه ماشايف منج شي
-شيشوف شتردين؟
طكتني على ايدي وغمتني
-اقصد تكعدون تسولفون جا شيشوف.
دنگت مبتسمه اهز راسي لا
-والله مالي نفس بشي اشتاگله وودي اكعد يمه واسولف وياه احط راسي على جتفه وأغمض عيني، بس ما أكدر ريـــمه بالي يم طــروادة .
تحسرت مقهوره مثلي واكثر
-ميخالف تكضي ويطلع تهون جا شنسوي.
-الله كريم.
للساعة بالعشرة طبيت للغرفة انوم البنات وراسلني
-نايمه رنـــه؟
-لا
- اريدن احاجيج.
سكتت اعاين لرسالته وديت رساله العبود رغم ما مقتنعه استأذن منه لان نفس العمر ما اعرف استأذن بس من طــروادة كتبتله
-اكلك عبود ماجاي استأذن بس بعد انتَ بمچان طــروادة بريا راح يجي نكعد بالحوش.
-غير ارميكم.
-خاب ولي
-أيا خايسه
-هسه شتگول؟
-خوش بس اضل كاعد يمكم
-اكعد بنصنا.
-إنّا وسجاد
-ههههههه.
طلعت من محادثته وكتبت البريا
-بس انوم شمس وزهره وتعال.
-هاي هيه حبيبتي.
نومتهن وكمت بساع سبحت طلعت لكيت ريـــمه كاضتلي العطر والحمره هزيت راسي لا
-ما احط حمره
-ليش
-لا خيه اختي مادايره سنتها يا حمره هاي.
-يله بكيفج بس عليج الله لا تقهرين روحج وتضيعين هل ايام بس هنه يضلن ذكرى ما تنسي.
رفعتلها حاجبي مبتسمه
-مجربه حضرتج.
-هههه اي اذكر كلشي بفترة خطبتنا
ضلت يمي لمن مشطت شعري وخابرته كال جايج، طلعت للحوش وريمه الخبيثة طفت الضوه تريد تسوي اجواء ليليه وي الگمر والنجوم.
ضليت واكفه يم الباب لمن اجه فتحته اله عاينلي مبتسم ومدلي ايده حطيت ايدي بيها يسلم عليه ويحط شفايفه على خدي، طب للحوش كعدنه على الصبه گال
-عود ليش ما تخلوني اطبن البيتكم؟
-وين اكعدك يم عبود وسجاد بالدوانيه لو بالهول تراقبنه ريـــمه .
التفتنا اثنينا على شباچ المطبخ من صاحت
ريـــمه:: هاي انه اراقبكم منااه.
مادتلنا دولكة ماي وكلاص ضحكت وكمت اخذتها منها وبريا يگلها
-كون يطلع رجلج ويكضج يفكنه منج
-لو رجلي هناه تحلم تكعد بصف رنـــه يخليك تحاجيها من فوك السياج.
كعدت يمه وهوه يتعارك وي ريـــمه هيه تگله
-امشي وولي
وهوه يصيح
-وولي عاب هالشكول.
ضحكت وسدت الشباچ مد أيده على جتفي حضني يدنيني يمه حطيت ايديي على رجله وسندت راسي على صدره باسني بشعري وتلمسه يسأل
-هستوج سابحه
-اي
-علمودي؟
-لا چنت وصخه وسبحت شني علمودك
-ههههههه كليلي اي شخسرانه
ابتسمت ساكته ايده تمسح على زندي برخاوه يلمني على صدره حييل ويبوسني بشعري
-ليمت توصلين السادس وتكضينه.
-ماضل شي سنتين ويكضن
-هواي الله يصبّرني
شلت راسي من صدره اعاين بوجهه
-استاهل تصبرلي!
عاين لعيوني مبتسم ومد ايده يكض وجهي من حنجي ويحرك بهامه على طرف شفتي
بريا:: اصبرج العمر كله
ضحكت ورجعت الحضنه لمني بأثنين اديه على صدره ضلينا ساكتين مده وگال
-رنـــه اكو شي صار وخلاني بقلق.
وخرت من حضنه اعاين بوجهه
-شصاير.
تحسر بحيره
-البارحة بالليل جوعان سويتلي اكل ومشيت اشوفن ماريا بلكن تاكل وياي لگيتها نايمه ردت اتشاقه وياها واكعدها بس جستها فزت بخرعه هي فزه وهي جرت السجينه من جوه مخدتها
-ياااا
-وعلي النوب ضلت ترجف شبگتها احاجيها وهيه شلون السعفه تتراجف ورايحه روحها احاجيها اكلها شبيج ماتسولف بجت الحد ما راحن عيونها يله ردت نامت والله مردت گـــلبي من امس لليوم افكر بيها وهسه مالها خلك من كعدت الهسه ضايجة.
-عوفك من هذا كله هسه ليش حاطه سجينه جوه المخده؟
مسح وجهه متحسر ومقهور
-ما ادري گتلها منين خايفه ماترضى تسولف تضل ساكته.
سكتت اعاينله ضايج ومحتار
-ماخليت مــاسه تحجي وياها؟
-سألتها تگول انه هم لكيت السجينه وشلتها ضميتها وثاني يوم رديت لكيتها حاطتها جوه المخده.
أعاين لوجهه محتاره جرني من ايدي يردني الصدره وطلع عبود يكح بالجذب گاله
بريا:: لو تكح للصبح.
عبود:: بووويه شابگهاا؟
وبريا يضحك وبأثنين اديه يجر بيه الصدره وعبود يصيح
عبود:: أرميك اليوووم.
-ارميني هم ما اعوفنها.
ضحك وكف يمنا شويه ومشه للبيت وبريا شكد لمح شگد عاين سويت روحـــي ولا افهم گال
-مو راح اروحن وهم هالاجازه كلشي ماكو.
-مو كعدنا سوه وسولفنا شكد ومن يطلع طــروادة اسويلك عشه.
احجي وهوه عيونه على شفايفي
-شبيج عليج الله.
-ما والله.
دفعت ايده من وجهي ذكرت حجاية جويريه كالت سنتين هواي اذا من هسّه باسج مو خوش سالفة وهوه يكض بأيدي ويحاجيني على كيف يكسر الخاطر چنه يتيم.
بريا:: بس كليلي ليش؟ شبيج.
-كسرت خاطري والله
-يا الله اجانه الخير
-شرايك أسويلك لفة؟
دفع ايدي يصيح
-كرررهت اللفات عمي اعتقيني ساعة السوده يوم الوكلتيني لفاتج.
-ها بريا هسه صارت مو خوش
ضحك يمسح بوجهه
-لا اشاقيج.
كمت وياه من راد يروح وكف بالباب يعاينلي مبتسم
-احبنج تدرين؟
هزيت راسي اي
-وانه هم احبنك.
-يمن اروحنلج فـــدوه.
شبگت الباب وسندت راسي عليه اعاينله وهو استند على الدنگه ويعاين بوجهي مبتسم .
لمن رد عبود يكح غماه بريا وراح، ضحكت وطبيت للبيت ثاني يوم بس داومت مشيت الصف بــدور ادور على اشواق مالكيتها رديت ومتحلفه بيها عده اليوم هادئ عبود من باع محصول البستان تسوگ هواي ترس الثلاجة وذلنه كلساع وگال انه أصرف عليكم .
ثالث يوم هم داومت وبالفرصه رحت لصف بــدور ادور اشواق والگاها مداومه وكاعده على الرحله تاكل جبس طبيت للصف بلا احم ودستور طكيتها وجريتها من الرحله للگاع ومالحكت اكتلها زين فرغنها البنات واخذنا للأدارة گبل سولفت للمدريرة على سالفتها والمديرة تخزر بيه خلتها تطلع كالت
-ادري بالموضوع واهل بــدور اجوني للبيت وحجيت وياهم ما اريدن تجيبين طاري السالفة يم اي طالبه.
هزيت راسي خوش وطلعت من يمها تخاف لان تتحمل مسوؤلية طلعتت بدور، رديت للبيت ضايجة طالت حييل ليمت يطلعون
وشمس تفتر وتصيح خالو لو تشيل هدومه لو تحاجي علاوي عود تدري بسه ابنه تطبطب على بطنه وتگله خالو هاه خالو.
للعصر كاعده يم ريـــمه بغرفتها انه وشمس وهيه تگمط بعلاوي مقهوره وتحجي على آهلها
-صاير شي ريـــمه؟
عاينتلي وهزت راسها اي
ريـــمه:: ولج اجتني الصبح تفحص سحرها مشتغل لو لا مثلت عليها بس عرفتني جذابه ردت تگلي يطلع رجلج من السجن ما الج ضله يمه انا الاحجيله.
-خل تحجيله كونها مره خل تحجي الا يشگ حلگها
هزت راسها لا الدمعه بطرف عينها
-هيه تهددني لان تدري كهلان لوّ درى انه الشربت امج سحورة امي مايعاين بوجهي بعد ويردني الأهلي .
شمس:: خاااالو.
فزينا على صوت شمس ودرنا للباب اثنينا واشوفنه واكف على صفحة وفاتح عيونه بخزر.
""
بــدور:: ساعة ساعة احسب وانه وحدي وميته من الخوف وهـــب رد خابرني العصر جاوبته ابجي بلا صوت واقنع بروحي هيج القرين ما يجيني
-جاي تبجين.
-اي والله.
-والله شليتي حالي بدور ليش تقهريني.
-تعال يمي انه خوافه والله خوافه.
-جاي اركض بسالفة اخوج غير اريدن اطلعهم من السجن.
-ليمت يطلعون.
-يومين ثلاثة ويطلعون.
سكتت مدنگه دموعي يجرن وهوه مقهور
-بــدور حبيبتي
-هاه
-منين تخافين؟
-من القرين.
-انعللل ابوج لا ابو القرين شجلبتي؟
خنگت صوتي ابجي وهوه ينتر بصياح شوي ورد يحجي على كيف
-أقري قرآن واقفلي باب الغرفه وهوه مايجيج
-هوه مثل الهوه يطب حتى لو الباب مقفول.
-وعلي راح اجيج بس حتى اكتلج اخليج تتمنين القرين جايج ولا انه.
-تعال ردني للقرية خل يذبحوني
-اكلي تبن
حجه بهدوء سكتت امسح بعيوني
-ثمني حچايتج خل يذبحونج شلون بله؟
-آسفه
سكت يستغفر ورد گال
-عندج اكل؟
-اي، بس انتَ ماتجي يعني؟
-اي جاي افتر رايح للصحراء وهذا مرتضى وابوج وراي اريد اوصل المچان مگطوع وانزل اكتل مرتضى كتله تشفي الگلب، يله ديربالج على روحج.
-الله وياك.
سديت التلفون ابجي واحجي وي روحـــي بحرگه انه احبن ابوي ليش هوه دوم ما حبنه ليش يتمنالنه الذبح
عضيت ايدي ميته من القهر لو ما رايحه وياهاا كل هذا ماصار وهسه انه بحضن امي بدل ماضاله هناه كاتلني الخوف ونار بگلبي مسحت عيوني وگمت طلعت من الغرفه مديت ايدي للسطل البالحمام غرفت منه ماي بأيدي
غسلت وجهي بالماي البارد قطرات الماي تفززني وهي تنزل على وجهي كأنما توصل الگلبي وتبرد الجمره البيه
شلت راسي فازه اعاين للدرج من حسيت روحـــي سمعت طكطكه بالباب أهتز جسمي بفزه وانه اسمع صوت السرگي مال باب السطح، حديد يحتك بحديد يروح ويجي وشوي شوي صوته يقوى دليل على قرب فتحه، وانه عيوني متبسمره على الباب والصوت الخلفه، فزيت وركضت گبل لا ينفتح بشوية طبيت للغرفة سديت الباب وقفلته ايديي يرجفن
واسمع صوت باب السطح من انفتح وانرگع بالحايط حيل فاتحه عيوني بخوف وصوت دگة گـــلبي عاليه مركزه بكل صوت بره الغرفة ثواني وسمعت احد يون وصوت خطوات تنجر بثگل روحـــي راحت وبلحظة تحركت يدة باب الغرفة شهگت بخوف ورجعت ليوره مغطيه حلگي بأيدي واليده تروح وتجي بقوة بس يريده ينفتح انطك الباب حييل وواحد صاح
-خرررب.
كتمت صوتي حييل وامنع دموعي ينزلن واحجي وي روحـــي بحرگه
-كتله يجي القرين يجييي ماسمعني
واعض ايدي واكولن الروحي
-القرين مايحجي.. يجوز هذا يحجي.
بجيت بخوف ماگدرت وركضت للتلفون اخابر على وهـــب فاتحه السماعة الخارجيه ما ادري بيه صوته هيج عالي گبل كالي
-ليس لديك رصيد كافٍ الرجاء قم بتعبئة رصيدك
وانه تخرذلت بس اريدن اسد التلفون ورد الباب اندك حييل وصوت واحد يصيح
-منو هنااااا.
بجيت بصوت اشهك وجسمي يرجف
-روووح روووووح يمه روووح.
- منوانتِ دخيل الحسين منو انتِ؟؟؟
-يمممممه.
صرخت ابجي بكل صوتي وهو يدك الباب ويحجي ويقرأ معوذات وانه تذكرت حجايه وهـــب ومن بين بچيي اصيح بصوت عالي
-قل اعوذ برب الفلق.. قل أعوذ برب الفلق، بسم الله الرحمن الرحيم الله لا اله إلا هو الحي القيوم لا تأخذه سنة ولا نوم له ما في السماوات وما في الأرض .
وارجع أعيدها من جديد واخربط واصيح بصوت عالي وهوه يتعوذ ويصيح بصوت اعلى من صوتي صرخت ارجف من دك الباب حييل وصاح
-اذا انتِ مو من الجن اريد مي.
-يمه يمه يمه ولج يمه الحكينييي
ابجي والطم على رجليَّ ميته من الخوووف وسمعته صاح
-ااااخ، اااخ يابه، مي اريد مييي.
كتمت صوتي بأيدي ارجف واسمعله اريدن افرزن واقنع روحـــي هذا بشر مو القرين ربع ساعة عدت ابد مانطق بعدها كمت على حيلي وكفت رجليَّه يطكطكن امشي خطوه خطوة والرجفه مآخذه حيلي وكفت يم الشباچ وخرت البرده على كيف واشوفنه زلمه ممدد بباب الغرفة ايده كلها دم والگاع اليم جتفه متلفه بدمه.
رجعت ليوره بخوووف گـــلبي يدك حيل حسيت روحـــي شايفه هذا الوجهه بس ما اذكر وين اطكطك بأصابعي واعاين للتلفون بس اريدن وهـــب يخابرني ماكو روحـــي طلعها وديت عاينت من الشباچ وهوه على نفس النومة بلعت ريك بخوف اركز بيه اريد اذكر وين شايفته.
هدومه السود متروسات تراب والدم متلفهن لان جاي يتطبع على الكاشي وييبس على ايده، درت عيوني اعاين للماي كضيت البطل بأيدي ومسحت وجهي بخوف متردده وخايفه تدنيت يم الباب أيديي يرجفن غمضت عيني وفريت المفتاح فتحت الباب بخوف متردده
مديت راسي اعاينله گـــلبي يدك حيل بشر هذا بس ما ادري ميت لو عدل وبمجرد فكرة شخص يمي وميت تاخذ روحـــي
بلعت ريك امسح بوجهي وطلعت على أطراف اصابعي صوت دگة گـــلبي سابقني تدنيت يمه دنگت حانيه ظهري أعاين بوجهه اريد اركز بيه يتنفس لو لا مضيكه عيوني وادنك اكثر عيوني مركزه وي عيونه مايتحركن ركزت وي صدره كل حيلي توني امد ايدي اريد اتلمس گلبه ومالحكت اشرد
خمشني من رجلي بأيده الكلها دم ..صرررخت بكل صوتي .
شكرا لزيارتكم عالم روايات سكيرهوم
