رواية أرض الخناجر الفصل الثالث والسبعون بقلم ايلول
رحت للمعركه
جبت الخوذ والروس
بدم قاداتهم حنيت بيباني
ترجف بالحرب
يم صيتي صيتك وين؟
شغلتك بالحروب تسرفن ارداني.
══━━━━✥◈✥━━━━══
بــدور:: اصرخ بكل صوتي مخروعه ومالحگت اسحل رجلي جرني حييل طيحني بالگاع تسودنت اصررخ حيل وادفر بيه بأثنين رجليَّ بس اريدن افلت روحـــي وأركض للغرفة
من رجلي سحلني النص الهول دفرته حيل وركضت للغرفه مالحكت اسد الباب دفعه حيل وطب وراي ركضت للزاوية ابجي واصرخ وهو شال المفتاح من الباب
وانه أبجي واصيح اعاينله والخوف كاتلني دنك شال بطل الماي من الگاع فتحه اديه يرجفن ووجهه اصفر شرب من البطل وطلع لباب الغرفة مد روحه بس بدون مايطلع ذب ماي على جتفه والماي يسيل بالگاع مصبوغ بدمه.
اعاينله ودموعي تجري واشهك كل ذرة بجسمي ترجف من الخوف، شال راسه عاينلي رديت ليوره اكثر ابجي واحجي بصوت يتراجف
-اطلعع اطلع من بيتنا اخوووتي يذبحونك.
مسح وجهه دايخ كض بالحايط وعاين لداخل الغرفة
اثنينا صارت عيونا على التلفون ركضت گبله شلت التلفون ورديت ليوره بخوف وبساع صحت بصوت يتراجف
-اخاااابر اخووواني اخابرهم يذبحووونك.
عاينلي ودنك يعاين للآكل وغراضي البالگاع كعد يمهن وهو يگول
-ماعندج رصيد.
جر العلاكه بحوش بيها اخذ منها كيكه وعصير وانه ميته من الخوف والوب شلت بطل ماي من الگاع اهدد والبطل يرجف بأيدي
-افشششخك وعلي افشخك.
فتّح الكيكه اكل منها عبالك صارله سنه ما ماكل شرب من العصير واتلفت جر شالي من هدومي الجابهن وهب لفه بأيده وعاينلي يسأل
-منين انتِ؟
-ياااهي مالتك اطلع برررره وحك العباس اخوتي يذبحونك.
-شتسوين ببيتنا؟
-بيتنا هذا.
يحجي وياي ويفتح بقميصه يعاين بجتفه المدمه ويرد يعاين لرجله المشگوگه عاف جتفه وشال البنطرون من رجله رفعه ولف الشال عليها شدّه حييل وخر القميص من جتفه عاين للمچان الدم متخثر فوگ صوابه غمض عيونه ومد اصبعه فوك الجرح يتلمسه ون بوجع، عبالك كاعد ببيت الخلفه ولا چن طاب على بنيه ما مهتملي احجي وحدي ميته من الخوف.
اكثر يوم خفت بيه وضعت ما ادري شني الاسويه اخوي مشردني من الذبح ببيت وحدي تالي يطب عليَّ زلمه مدمه خله الخوف يدبي بجسمي بحيث رجليَّ على الگاع ما ثابتات گد ما خايفه وارجف، غصيت من البچي احاجيه ودموعي خانگاتني
-عليك الحسين اطلع برره ما تستحي؟ حرامي انتَ؟ ترى فارغ البيت وعلي فارغ كلشي مابيه.. عاين عاين اخوي كال هسه راح اجيج وهوه من يجي مسلح يكضك ويكتلك والعباس.
احجي وامسح بعيوني اشهگ وهوه مدنك دايخ مدري شبيه، گال
-بس اسكتي، هم نزل وهم يدبچ عالسطح.
شال راسه يعاينلي وعگد حاجبه يحجي بعصبية
-منو سمحلج تدخلين البيتنا؟ وشلون گدرتي ؟
-ترى بيت اخوووي.
ما اهتم گام على حيله بس ما ثابت دايخ طلع من الغرفة ركضت وراه سديت باب الغرفة وجريت البطانيه والمخده حطيتهن وره الباب وكعدت عليهن ابجي واحجي على وهـــب گـــلبي يخفگ بخوف
ملخت روحـــي بالبجي وولا گمت من يم الباب اظن ساعة مرت وانه على نفس الگعده ما ادري بيه طلع لو وين راح
گمت بخوف ابلعم شلت البرده من الشباچ وعاينت
شفته گاعد على الدرج ساند ظهره على الحايط ومغمض عيونه وبصفه سلاح متچيه على الحايط.
وجهه اصفر باهت وحتى شفايفه احسهن بيض، عاينت لشالي الاسود ملفوف فوگ رجله، عدلت الشال العلا راسي بخوف.
والتفتت فازه على صوت التلفون ركضت شلته من الگاع گـــلبي يدك حييل بس درت صار بوجهي شهگت فازه وهو واكف كدامي وموجهه سلاحه عليَّ رجف التلفون بأيدي اعاينله واعاين للسلاح روحـــي رايحه
- منو؟
-ا..اخوي.
-ردي اذا جبتي طاريي اكتلج ترى.
بلعت ريگ رايحه روحـــي عيوني تبسمرن على السلاح والتلفون يدك بإيدي التهتز كلها أشر من جديد خازرني
-رردي.
مسحت عيوني عاينت للتلفون گـــلبي يددك بخوف فتحت الخط وشلت راسي اعاين للسلاح همست صوتي يرجف
-الو.
-ها حبيبتي شلونج؟
سكتت عاينتله حط أيده على حلكه ويخزر بيه رد وهـــب گال
-ها بــدور
-ها.
حاجيته امسح وجهي بأيدي الترجف گال
-شلونج خوما ضايجة وحدج؟
دنگت مختنگه ودموعي تجري
-عاين
-ها گـــلبي
ماخلاني
السلاح يم وجهي غمضت عيوني ميته من آلخوف
-اخافن وحدي والله اخافن.
بجيت بصوت وهذا شوي بعد ويحط سلاحه بكصتي
وهـــب:: ماضل شي باجر من الصبح انا يمج والله
-بعد ساعة وتجي؟
-لا الصبح اجيج
احجي واعاينله گـــلبي احس يدك براسي گد ما خايفه رد وهـــب گال
-يله بدور اكلي ونامي ولا تخافين خوش
عاينت بوجهه خازرني كوه كاض سلاحه موجوع ومابيه حيل يضل واكف ، وانه كاضه التلفون بأثنين ايديي اريد اگله وهـــب الحگني والخوف من السلاح مسكتني خايفه وهـــب يسد التلفون اريد احجي شي يحسسه انه مو زينه همست صوتي مخنوك
-وهـــب
ووي ما نطقت اسمه الولد فتح عيونه حييل غمضت عيني رايحه روحـــي
-وهـــب البيت بيه قرين.
-خرب روحج وروح القرين حتى انا ضلّ يتراوالي من وراج، يله يابه روحـــي الصبح اجيج.
-وووهب
صيحت ابجي سده بوجهي نزلت التلفون ابجي حيل وصوت شهگتي زارف گـــلبي
-شتصيرين من وهـــب وصيهد انتِ؟
صيحت ابجي
-وووخر تفكتك وووخر .
نزلها وافتر يمسح بوجهه ويحجي بسرعة
-صــيهد شيصيرررلج؟
-اخوووي.
-دخيلك يا محمد صدددك تحجين؟
-والله والعبااس والحسين، اخواني صــيهد ووهب الا يشگونك شك والحسين يعدمونك عدم.
وصوتي مخنوك وعيوني من البچي مغوشة طلع من الغرفة اعاين وراه عاف سلاحه يم الحايط وجر سطل الماي من الحمام غسل وجهه ونگع راسه كعد بباب الحمام مهدود حيله شال راسه عاينلي ودنك
-أعذريني انا ما اعرف اكو أحد بالبيت كل ظني البيت فارغ وانجبرت اجي هنا ما اطول بس تخف الهوسه اطلع
مسحت عيوني مختنگه وهوه ماشال عينه بعد وضل كاعد بمچانه مد أيده بجيبه طلع مفتاح الغرفه وشمره على الكاشي
-اقفلي الغرفة عليج.
گمت بساع جريت المفتاح وسديت الباب قفلته
گـــلبي بعده يدك بسرعة رجعت للتلفون اركض اخابر على وهـــب وادري ماعندي رصيد بس بلكن يدك عنده ترميشه ويخابرني مليت وكلشي ماكو، عدن بالاربع ساعات گمت عاينت من الشباج بعده على نفس الكعده
5
رديت كعدت بمچاني معدتني تعصرني عصر من الجوع اكلت شويه وكلساع اگوم اعاينله وارد اكعد أكل وابجي واغلط على روحـــي نگيت على القرين الحد ما شفت الاتعس خل إرتاح هسه.
فزيت مخروعه من اندك الباب
-يبنيه
ضليت ساكته خايفه رد گال.
-بلا أمر عليج اريد مي.
درت عيوني اشوفن بطالة الماي شلت واحد منهن وعاينت للكيك والعصاير اخاف انطي منهن خاف وهـــب يتأخر عليَّ شلت كيكه وعصير وبطل ماي گمت على حيلي وكفت يم الشباچ بعد اخافن افتح الباب شلت البرده وفتحت الشباج عاينلي ساند ايده على الباب وحجه بتعب
-لا تشمرينهن حرام .
عاينت بوجهه بس هوه ما يعاين مايحط عينه بعيني اجه يم الشباچ مد أيده الي حطيتهن بأيده وجريت ايدي بساع اخافن لا يكضني گال
-الف رحمه على والديج.
-أنطيتك اكل وماي لو ما اني تموت والله لا تفكر تكتلني خلي عندك ضمير خوش؟
مدنك وهز راسه اي ومشه كعد يم الدرج رجعت كعدت بمچاني كاتلني الخوف واقل الربع ساعة رد دك الباب نترت خايفه
-شتررريد.
-امشي عليج جدي رسول الله ما تجيبين طاريي يم اخوتج، اعزاز هذول ما اريد اخرب وياهم.
-والله اكلهم حرامي طب للبيت والله واحجيلهم بس يجون
-تعرفيني لو لا؟
-لا
-ولا تعرفين اسمي؟
-لاااا.
-الحمدلله من ماتعرفيني.
سكتت أعض بأيدي لو كايله أعرفك حتى يگلي منو هوه واحجي الوهب شكد غبيه امدداني امددداني، متت من آلقهر ضليت كاعده بمچاني گمت اغفي نعسانه ومن الخوف ما اگدر انامن راسي يروح مناه ويجي مناه
نز جسمي بفزه على صوت طبه قوية مسحت وجهي وگمت متردده وخرت البرده اعاين من الشباج واشوفنه طايح بالگاع على وجهه شهگت ايدي على حلكي وبساع فتحت الشباچ اصيح عليه
-يووولد، يووولد خاايب يووولد.
اصيح وهوه كلشي ماكو لا يحرك ايد ولا رجل درت وجهي متوتره جريت بطل الماي فتحته وطلعت ايدي من الشباج مدري شمالني ميته من الخوف كلشي ولا يمووت يمي وابتلي على عمــري واخواني هم يبتلون.
رشيت الماي ماوصل الوجهه واخاف اطلع من الغرفة ضليت افتر گـــلبي يخفگ واعاين بخوف شسوي واتخيله راح يموت رديت اركض للشباچ عاينت عليه وجهه صار شلون الليمونه والشفايف بيض درت عيوني لسلاحه صار بعيد عنه بلعت ريك خايفه
فتحت الباب وجريت المفتاح ضميته بصدري خاف مثل هذيج النوبه ياخذه ويخليني، شلت بطل الماي وطلعت روحـــي رايحه ورجليَّ يطكطكن اول ما وصلت يمه شلت السلاح بأثنين ايديي خايفه منه وكوه شايلته من ثگله حطيته بعيد ورديت يمه شلت بطل الماي من الگاع فتحته وكعدت بصفه على اركبي حطيت ماي بأيدي ورشيت على وجهه
-يووولد اكعد فـــدوه يووولد
ارش ارش وماكو حتى جفنه مايتحرك ايديي ضلن يرجفن خفت حييل صبيت ماي بأيدي من جديد ترستها وغسلت وجهه امسح عليه بأيدي الترجف بجيت مرعوبه
-يوولد عليك الله فتح عينك، ييييمه .
جريت راسه احطه على رجلي تخبلت واجيب ماي واغسل بوجهه نگعته وهوه ماكو مايفز بچيت اصيح
-عليك الحسين اكعددد لا تموووت يمي.. ولج ييييمه .
طكيته على خده احاجيه وماكو ما يكعد واقوي طكتي حيل اهفه براشدي تردد صوته بكل البيت نزز يعصر بعيونه كيفت وبساع رديت صبيت ماي بأيدي وغسلت وجهه من جديد احاجيه
-ااي عفيه اكعد اكعددد عفيه لا تموووت يمي.
فتح عيونه ذبلانات عاين بوجهي وانه بعدني اترس ايدي ماي وأمسح بوجهه روحـــي رايحه وكاضه وجهه بأثنين ايديي وهو كوه فاتح عينه بعيني وبس انتبهت الروحي جريت رجلي من جوه راسه مبتعده وهو حط ايده بالگاع يستند عليها كعد سند ظهره على الحايط وجر ايده الثانيه البجهة صوابه حطها بحضنه كمت بساع وكفت يم باب الغرفة واعاينله محترك گـــلبي
-عود شيسمونها مصوب وضال يمي تريد تموت وتبليني ماتمشي الاهلك تقلد مراد علمدار انتَ؟ ترى هسه تموووت.
سند راسه على الحايط منتهي مابيه حيل حتىيحجي وين يله گال
- ماضل شي واطلع.
درت وجهي طبيت وسديت الباب طلعت المفتاح قفلته ورديت كعدت بمچاني غمضت عيني مستوعبه السويته وفتحت اعاين الايديي بعدني احس بملمس لحيته عليهن غميت روحـــي وتمددت متغطيه وعيني على الباب ماحسيت من غفيت وفززتني دگته
-يبنيه.
كعدت على حيلي امسح بوجهي
-ها!
-شكراً على كلشي، والله يحفظج الأخوتج اذا مابيها أمّر عليج لا تجيبين طاريي يمهم، انا رايح واعتذر اذا خوفتج.
بقيت ساكته مركزه بصوته شويه وسمعت صوت باب السطح كمت للشباچ عاينت بالبيت ماكو راح رجعت لفراشي اركض ضميت روحـــي ونمت وهم فززتني دگة الباب
وهـــب::ووولج بــدور
كمت بساع فتحت الباب وذبيت روحـــي بحضنه ابجي متذكره كل لحظة خفت بيها البارحة شبگني يبوس براسي ويحاجيني
وهـــب:: شبيج يابعد روحـــي بــدور بويه مو احاچيج
وخرني من صدره عاف العلاليك على صفحة وعاين بوجهي يحاجيني
-شبيج؟؟
-ليشش عفتني ماتدررري شصار بحاالي.
ابجي بصوت واشهگ ردي الصدره خايف علي
-شكو شبيج شصار.
-طب ولد للبيت البارحة مصوب وراد يكتلني والعباس راد يكتلنييي.
احجي من بين دموعي وهوه ولا مصدگني اخذني من ايدي للغرفة يريدني اكعد ويحاجيني جريت ايدي منه
-والله ما اجذب وهـــب تعال شوف دمه ضل بالگاع وعلى الدرج تعااال شوف .
جريته من أيده للهول اريدن ارويه الدم كلشي مالكيت شلت عيني للدرج البارحة جانن قطرات الدم على البايات وعلى كاشي الهول
وهـــب:: كافي بــدور شلعتي گـــلبي ترى جاي اكلج ما اگدر اردج للقرية بهالوكت شسالفه؟
درت عليه امسح بعيوني وهوه ضاج جر ايده من ايدي وطب للغرفة غسلت ومشيت وراه اعاينله بزعل لان جذبني فتح العلاكه طلع منها صمون حار واجبان وترمز چاي وكلاصين
وهـــب:: عاينــي وي مرتي وابني ماتريگت واجيت جوعان علمود اتريك وياج.
-وهـــب.
عاف الترمز وشال راسه يعاينلي بنفاذ صبر
-رجعني وهـــب فـــدوه ابوسن ايدك ردني للقرية والله راح اموتن من الخوف.
وهـــب:: وعبالج انا مرتاح من عايفج هناه وحدج؟ عيني غافيه شايف النوم؟ بس شني الطالع بأيدي؟ اردج للقرية المن الابوج اليفتر ويدور بس حتى يذبحج گبل لا يطلع صــيهد من السجن؟ انتِ ليش تزيدين نار گـــلبي؟
مسحت دموعي اريدن احاجيه عافني وگام طلع بره بجيت مختنگه ربع ساعة وگمت وراه لگيته كاعد بالحوش يدخن ضليت واكفه يم باب الهول وصحت عليه
-وهـــب.
شال راسه عاينلي وطفه الجكاره
-تعال نتريك.
اجه يمي حط ايده على جتفي يمشيني وياه ساكت كعدنا تريكنا ضل يمي شويه وراح وبمجرد طلع ركضت للغرفة وقفلت الباب الوكت يمر مثل السم مخلصتها ابجي وخايفه واذا طلعت من الغرفة اموتت من الخوف وأرد اركض
بس هوه گام يخابرني هواي ويطمن ويحلفلي كضت ماضل شي حتى عيوني ورمن من البجي لمن انهد حيلي يله گالي اليوم اجيبن صــيهد واجيج روحـــي راحت خفت منه
-خاف يكتلني
-انچبي
-اكلك بس كلي ليمت تجي الم غراضي
-لميهن
-يله خوش
وهـــب:: سدّيت التلفون منها ميت من التعب عاينت الميثم يعاين بالفيديو مال الحرامي الراد يبوگ المكاين وهدوا عليه الولد هوه الاشتكى عليهم على اساس عابر والولد رامينه كضيناه ثلاثتنا انا وميثم وبريا كتلناه نريده بس يحجي مبين واحد موديه وكلنا چنا ظانين بيت غانم وهاي هم لعبة منهم تالي طلع شاكر الشفيه متفق وياه ووي بيت غانم وكلشي صار اتفاق بأتفاق صورنه اعترافه وحاجينه شيخ حيدر وسجلنه فيديو للمديره حجت بيه شلون خلت اختي تطلع وي صاحبتها وتانيت ابو البنيه لمن رد من دوامه جان ملتحق ورحتله للبيت سولفتله على بنته ومرته وسوايتهن وهو زلمه خير تسودن، ماضل غير يطلعون الولد.
وگطعوا گلوبنه لو ما شيخ حيدر ما يطلعون مشينا اخذناهم يعاينلي بخزر ونتر اول ماشافني
-اختك وين؟
-موجودة تعال خلني احجيلك السالفة كامله الحجيته الك هاي هيج نقطه ببحر.
درت للولد ســليم وسلطان محتار احجي على ابوهم يمهم خافن مايرضون نحط الفيديو بالكعده ونطلع چذبه ونذالته گدام شيوخنا گلت الصيهد
تستمر القصة أدناه
-اصعدوا وياي بس انتَ وكهلان خلني اسولفلكم.
كهلان:: صاير شي؟
-اصعد وآنا احجيلكم .
درت البريا احاجيه
-آخذ الولد انا راح اخذ صــيهد الاختي.
سلطان:: لا يابه نجي وياكم
هزيت راسي خوش صعدوا وياه وانا وياي مــيثم وصيهد وكهلان سولفتلهم بالسيارة شيكضهم بعد غير صاروا عليه هتلر ياهو التكضه يذبح ويصلخ كالهم مــيثم
-إحنا مرتبين كلشي صــيهد يرحم اهلك لا تخرّب شغلنا الشي الوحيد القالقنا ولد عمي شاكر لا يزعلون علينا لان مايدرون بالفيديو ولا يدرون بسالفة ابوهم.
صــيهد:: خل يزعلوووون خل يزعلون اذا ما دست ببطن ابوهم وكسرررت ظهره.
وهـــب:: ضليت ساكت وهوه يريدله واحد يحاجيه حتى يچلب برگبته وياكله، طبكت السيارة دار علي متسودن
-اختك هناه؟
-اي جا وين اوديها؟ محد يندل هذا البيت وسيد عباس عايف مفتاحه يمي جبتها.
ضل خازرني ودار الكهلان يگله
-جاااي تسمع وين عايفها الخايس وين عايفها.
كهلان:: ميخالف جا وين يوديها غير ابوك شايل خنجرة ويدور عليها؟
عفته ومشيت من بريا طبك وراي ونزلوا سليم وسلطان فتحت الباب وكهلان وميثم يحاجونه اجه وراي يفور طبيت گبله للبيت
بــدور:: گـــلبي دك بخوف بس لمحته اشرلي براسه وحجه
-صــيهد وراي.
عاينت وراه طب صــيهد وجهه مايكصه السيف وانه رجليَّ يطكطن من الخوف. شفت الولد طبوا وراه وبس لمحوني ضلوا بمچانهم بس هوه اجه علي يمشي بساع گلت راح يطكني الحد ما لمحته فتح ايده بچيت ومشيتله اشهگ چن درب طويل بيناتنا مو خطوتين يا من يوصلني الايده
وبس وصلته لمني الگلبه بكل حيله دفنت روحـــي بحضنه ابجي بخوف
-ما سويت شي صــيهد والله ماسويت شي رادوا يذبحوني ماسويت شي
-اششش انعل والديهم والله انعل والديهم.
وخرني من حضنه كاض وجهي بأثنين أديه يعاين بوجهي عيونه حمر دنك باسني بين عيوني وردني الصدره يحجي بخنگ
-غير اموتن لو صارلجن شي اموتن، يا بعد حيلي
وهاي اول مره اسمع حجايه منه تعبر عن خوفه وراها بلحظة عصر ايدي قوي ووخرني من حضنه خازرني وحجه من بين اسنانه
-چم مره محذرج ما تطبين البيت صاحباتچ؟
چلبت بأيده اشهگ
-ما اعيدنهااا والله بعد ما اعيدنها.
كهلان:: صيهدد هدهااا.
صيح عليه وصيهد ما مهتم ينتر بوجهي بغضب جرني وهـــب من ايده وهوه افتر بحرگه متسودن صاح
-جيبي غراضج وتعاااي
جرني وهـــب للغرفه عاينلها ملمومه، شال المخده ذبها على النضده وشال غراضنا گال
-يله تعاي
طلعت وياه كاضه بعبايتي صعدت وياهم وهب كاعد بصفي ويمه مــيثم، ويتعاركون بالسيارة وهـــب مايرضى اطب البيت اهلي الا يرد حگي وصيهد يگله تطب واشوف ياهو اليحاجيها گالهم كهلان
-تضل يمنا مناه لمن تكضي الكعده وتنحل.
صــيهد:: تحرم علي شوفت امي اذا ما حركت بيوت بيت غانم.
وهـــب:: اهوووه يابه ماتسوي شي اذا ما تكضي الكعده شيخ حيدر متحلف بيهم وشوف شراح يسوون بيهم.
سكت صــيهد ميت من القهر، طبينا للقرية ونزلونا بباب بيت عمي شامل
كهلان:: تعاي بويه.
عاينت الصيهد اشر طبي، مشيت وره كهلان طبينا للحوش زهره اجته تركض باسها شابگها وهيه تبجي وتبوس بيه كبل كالها
-شمس وين؟
-بالغرفه يم البنات.
-صوتج خل اشوفنها من تشوفني شتسوي.
يحاجيها مبتسم كرصها من خدها ومشه طب للبيت ضليت واكفه بالحوش اسلم على زهره وغسلت ايديي ووجهي اسمع صوت شمس بچت طبيت للهول شفته واكف بباب غرفتهم والبنات گدامه. رنـــه واكفه على حيلها وريمه كاعده بالگاع علوش بحضنها يبجي
ريـــمه :: بادن رجليَّه بعد مابيه حتى اوكف على حيلي شمس مشتله تبجي وتناشغ وهوه عيونه خازراتنا انه ورنه، شال شمس من الگاع باسها وأشر الرنه تطلع تحاجي بــدور الطبت وصافنه عيونها مورمه من البجي
طلعتلها رنـــه وهوه يعاينلي بغضب، كعد على حيله گبال شمس مسح عيونها يحاجيها
-اشش ها خالي كافي حبيبتي .
دار وجهه بــدور تبجي بحضن رنـــه صاح على زهره
-تعاي اخذي شمس اغسلي وجها.
اجت زهره بساع شالت شمس من گدامه وكف واجه يمي سد باب الغرفه عاينتله بخوف على رنـــه ما سلم شمنتظرة انه؟
دنگ الحضني اخذ علاوي وحطه على صدره يجر نفس ويشمه حييل
-علي بويه حبيبي.
همست مختنگه
-كهلان.
حط أيده على حلگه وعاينلي خازرني
-اششش.
فتحت الباب رنـــه عاينلها ورد عاين بوجهه علاوي طبت للغرفة گالتله
-الله يساعدك الحمدلله على السلامة
مدت ايدها اله ما سلّم عليها عاين الايدها ودنگ يعاين العلاوي يبوس بيه
رنـــه:: طــروادة اسمعنا وبطل تتسرع.
طــروادة:: سدي حلگج واطلعي بره لا تدخلين.
رنـــه:: اتدخل لان اعرف السالفة كلها ومثل ما عــفراء تدخلت وحجتلي وفهمتني انه اتدخل واحجيلك .
-ررررنه.
صيح بنتر فز علاوي بأيده وبجه ورنه هم فزت وردت ليوره ذب علاوي على فراشه ووگف مشه للكنتور اعاين وراه گـــلبي ممرود اخذ هدومه وطلع للحمام غطيت وجهي بأيدي ابجي لا هو متعارك وياي ومصيح ومعاتب لا هو ما سامع ضل ساكت موووتني من القهر .
سبح بدل ومشه للگعده من التمت الوادم.
جــويريه :: گـــلبي متگطع عليه وماصدگت من گالوا اجه تالي ماقبل يدخل للبيت لا يريد يشوفني ولا يشوف خالتي الا تخلص الكعده ويرجع حگ بــدور باوعت الخاله ابجي وايدي على بطني وهي حالها اخس من حالي طاك گلبها على بــدور وصيهد هزت راسها تصبرني
تستمر القصة أدناه
-ميخالف يمه جــويريه هسه يكضي طلابته ويجيج بيج حيل تكومين وي اخياتج؟
هزيت راسي اي گمت للمطبخ وي ندى ورغد يباوعن من الشباك اجو الشيوخ وشيخ العشيرة وشيخ حيدر وعالم شگد ترسوا السالحة ودخلوا للديوان واكفه يمهن وايدي على بطّني صايره حركتي ثگيله شويه واجن مــاسه وماريا
مــاسه:: وينهااا وين بــدور ؟
تحجي بلهفه وخوف گالتلها رغد
-غاد ببيت عمي شامل.
عافت حور وماريا ومشت بسرعة البيت خالي شامل ، وكفت وي البنات يم الطباخ ندى ماقابله
ندى:: روحـــي اكعدي ماعدنا شي.
رغد:: والله انه راح اطكن واموت اريدن اعرف شسووا شيحجون
ندى:: شايفه هاي الحديده مال شباج المبرده من يمها تگدرين تشوفينهم ذاك اليوم من طلعنا بره شفت.
رغد:: وعلي؟ رايحه اعاين تجين وياي جــويريه؟
هزيت راسي اي اني هم عندي فضول اشوف وماريا تريد تجي ويانا بس حور لازمتها مشينا اني ورغد واثنينا نريد نباوع والفتحة صغيره بس نسمع صوتهم بوضوح صوت صــيهد عالي متخبل لان علي وراضي اولاد غانم موجودين والشيوخ يسكتون بيه دفعت رغد اريد اباوع ادفعها وتدفعني بلا صوت اشرتلها على بطني عود الخاطر طفلي غمتني ووخرت على صفحة خلّتني اباوع يخوف الديوان متروس زلم معگله اخوالي اثنينهم كاعدين وولدنا كلهم
وكالوا ابو البنيه اشواق الضحكت على بــدور هم موجود مرته تعود المرت علي ابن غانم بس هوه حيل يكرهم ربي ما قصر خله المنهم وبيهم يشهد ضدهم.
حجه وهـــب السالفه وخالي شاكر وخالي وليد يسكتون بيه وبيت غانم ينكرون كهلان وصيهد وسليم متسودنين يردون يكتلون بيت غانم وكلساع واحد مسكتهم لمن ابو اشواق كالهم اهلي متفقين وياهم يقصد مرته وبنته وكالهم مو سالفة بس نسوان مثل ما علي وراضي يگولون لا همه على علم بكلشي صار.
وگام وهـــب فتح فيديو ماكدرنه نشوفه بس نسمع صوته رجال يعترف شاكر شلون علمه يجي للگيعان وشلون يشتكي على الولد، گب الديوان بالصياح والهوسه ووادم تصيح على وادم وولد بيت خالي شاكر يباوعون الابوهم مصدومين طردوا بيت غانم من الديوان ومايخلونهم بالعشيرة يسوون بيهم كتاب ويذبونهم، اسمع واسأل رغد شنو يعني وهي تشاورني تفسرلي
-راح يطردونهم من العشيره حييل.
ورجعوا حجوا بخالي شاكر المتخبل واباوع ولده مصدومين مايدرون شيسوون سلطان وسليم وسجاد، بس مرتضى يصيح ينكر ويدافعله وكل شوي يهد على وهـــب وميثم لو يغلط على بريا ويگله انتم جبرتوا يگول هيج، طرده الشيخ من الديوان طلع يغلط ويسب وخالي شاكر حط راسه بالگاع يمسح بلحيته حجوا بطلعته من العشيره صــيهد ما قبل
-ولد عمي شلون ارضى تذبهم؟
وسليم وسلطان متخبلين يباوعون الولدنا بخزر مصدومين وخلصت كعدتهم بطرد بيت غانم من العشيرة وشاكر رزلوه ومايدخل بأي مضيف الهم ولا يخصه بأي كعده تصير بالعشيره .
مشينا بسرعة دخلنا للبيت خايفات العالم بدت تمشي وبس السيارات حركت كبوا ولد بيت شاكر وي ولدنا كلهم متخبلين ســليم يصيح بحرگه
ســليم:: ووولك متفقين علينااا ووولك كلكم متفقييين؟
وسلطان من صفحة يصيح
-بكلشي وياكم شلوون تخططون من ورانااا؟
صــيهد:: تدافعوله؟ اخر خياااس يريد اختي تنذبح سجنا ولعب لعبته؟
تخبل ســليم هد يريد يضربه وكهلان لازمه وهوه بحرگه يصيح
ســليم:: واحنا وووين جنا مو وياك مووو وياك مسجونين وماكلين تبننن؟
وشيخلصها بعد طلعت خاله وجده يحاجنهم خاله ترش عليهم ماي تبجي بس تريدهم يهدون راح يتذابحون ســليم نتر روحه من ايد كهلان ومشه وسلطان وسجاد لحكوه زعلانين.
كعدت خاله على حيلها تبجي وتصيح
-يييمه صــيهد يييمه ضعنه خلافك ووولك يمه.
مسح وجهه يرجف وكهلان يحاجيه بهدوء مشه الامه دنگ عليها شبگته تبجي مهدود حيلها باس أديها وراسها
-ووولك يمه ولك يمه يردون يذبحون اخيتك.
صــيهد:: اگطع نحره اليوصلها .
وخالي وليد مد ايده على صــيهد يريد يسلم عليه التفت صــيهد شاف محد من الولد بقى بس وهـــب وكف على حيله ودفع ايد ابوه خازره
صــيهد:: انتَ لحد يا وكت تضل حجايه تجيبك وحجايخ توديك؟ تريد تذبح بــدور بس لان شاكر گالك اذبحهااا؟
صيح يوجّهه محترك گلبه وابوه يگله
-غير فضحتنااا.
وهـــب:: بعده يصيح فضحتنااا؟
تخبل افتر يدور شي يضربهم بيه صــيهد گوم امه گالها ادخلي جوه عبالي راح يجي هوه هم، بس ما اجه اخذ وهـــب ومدري وين راح سندنه خاله ايمان وهيه رايحه روحه ترجف بأيدنه وتحجي بسرعه
-يمه عباتي جيبنها اليه
ركضت ندى جابتها الها
-خاله وين رايحه
-اشوفن بــدور
-اخذيني وياج.
وندى ورغد وماريا كلنا مشينا وياها البيت خالي شامل لكينه البنات كاعدات بالهول مــاسه شابگه بــدور على گلبها وبس شالت راسها ولمحت امها بچت واجتها تركض وخاله كعدت بالباب مهدود حيلها حضنتها واثنينهن يبجن عبالك صار سنة متفارگات وعلى بچيهن كلنا نبجي كومتهن ريـــمه كعدنا بالهول وبدور نايمه بحضن امها ما تريد توخر منها وكل شوي تبوس ايدها سولفنا الريمه ورنه
ريـــمه:: واخواني وين راحوا؟
رغد:: والله خيه ما ادري رجلي اخابر عليه حتى مايرد وحتى اخواني مدري وين مشوا؟
رنـــه :: يجوز راحوا يكتلون اشواق.
غمتهها خاله وهيه توزع ابتسامات تريد تغير جو وتضحكهن كالتلها
-ولج بــدور سحلتها الج سحله تسوه عمرها.
وبدور بس عيونها تجري مختنگه بقينا يمهن شويه ورجعنا للبيت بس خالتي بقت يم بــدور ماتگدر تعوفها مــاسه وماريا راحن البيتهم ورغد بقيت يمنا بس رضا يفتر علينا وجده تمشي وتدعي نموت گالتلها رغد
-جا جده ادعي الروحج بدل ماتعبانه وتدعين علينه.
باوعتلها خازرتها ومشت الغرفتها بغضب للساعة ب١١ يله سمعنا صوت الولد بالحوش كمنا بسرعه نباوعلهم ملتمين ولدنا كلهم ومحزمين وبأديهم سلاح خليت ايدي على گـــلبي خايفه كالت رغد
-راح يدكون بيت غانم.
يخوف شكلهم من كلهم ملثمين ولازمين سلاح، بعدهم يسولفون ويتفقون ودخلوا ولد خالي شاكر هم بأيدهم اسلاح صفنوا الولد بيهم ومشوا كهلان وصيهد يردون يحاجونهم ســليم شال ايده ودار وجهه منهم وحجه وي سلطان وسجاد متجاهلهم خلوا الولد صافنين طب وهـــب گال
-ضلن بالمطبخ ولحد توكف يم شباچ.
مشوا للــبستان سوه اقل الربع ساعة وانحرك الجو بالرمي يخوف صوت الطلق ميتين من الخوف ورضا يصفك مكيف ضربته ندى
ندى:: غير يكعد ابن وهـــب التفاگ.
رغد:: وين الحسين وتكضي على خير يابه تخبط بطني من صوت الرمي.
1
صار الرمي مگابل وزاد خوفنه على الولد، وما خلصت الحد ما مخابرينهم كايليلهم الشرطة راح تجي اجو للبيت بساع ضموا السلاح وماكو اقل العشر دقايق اجت سيارات الشرطة عبالك صحبانهم سلموا عليهم وراحوا ووراهم اجتهم ناس ماعرفهم ولتلاثة من الليل احنا مخبوصين عالم تجي وعالم تروح الحد ما فضت.
مشوا جابوا بــدور وامهم للبيت وأكفه على صفحة واباوعله دخل هو لازم امه من جهه ووهب من جهه خلوها بفراشها وبدور تعدللها بالمخده باوعتله اني طاك گـــلبي عليه وهو ولا شال عينه وباوعلي انطحنت طحن درت وجهي من عنده دخل خالي وليد للغرفة وبدور بسرعة چلبت بايد صــيهد خايفه من ابوها وهو وكف بباب الغرفة وشال أيده يحجي بحرگه
وليد:: عاينــي ووولج مدرسه بعد ماكو ما توصلين باب البيت خزيتينا بالسلف بس عمت عين الزلم المابيهم خير ويحشون رجلج.
دار عليه صــيهد هز راسه اي
صــيهد:: يشهد الحسين البيت افجره بيكم لو حجيت حجايه وياها تداوووم واكص شاربه اليحاجيها.
دخل للغرفة بحرگه وشال ايده ضرب صــيهد راشدي وصيهد دفع ايده متخبل ويصيح بحرگه صار وهـــب بينهم وخاله تحجي وي صــيهد تريده يسكت جره وهـــب اخذه وطلع بره ووليد صاحت عليه امه يله طلع من الغرفه ويغلط ويحجي بنتر كال الامه
-كله منج جانت يمي مره خليتيني اطلگها واضل مكابل الحياطين ياهو بحالي ايمان الملتهيه بجعولتهاا؟
وجده تغلط عليه وعلى سعاد ورجعت على خاله ايمان شلون ماتخلي خالي وليد ينام يمها بالغرفة كالتلها
ايمان:: ما يوصل يمي انتهت من ساعة الاخذ عليَّ سعاد وليد آنتهى يجي للغرفه هذا فراشه وينام بغرفته بس انه وياه اخووه.
بقوا يحجون ويغلطون عليها فتّحت ايدها البدور وباوعتلي
-روحـــي يمه جــويريه روحـــي يم رجلج وسديلنه الباب وراج .
هزيت راسي خوش طلعت وسديت الباب مشيت للمشتمل تلاكه وياي وهـــب يمشي ويحجي وي روحه كد ماتعب هالفترة الليل ماينامه، باوعت وراه سد باب الحوش ودخل للبيت، مشيت للمشتمل سمعت ماي الحمام مفتوح .
دخّلت للغرفة حايره شنو الاسويه ازعل لان تجاهلني وابد ماباوعلي لو اسوي الموضوع عادي واعديها مسحت وجهي محتاره كاعده على طرف الچرباية التلفون بأيدي شلت راسي اباوع من انفتح باب الحمام اجه المنشفه على اجتافه وبعده اعصاب بقيت على كعدتي الحدّ مادخل للغرفه سد الباب وعاينلي مضيك عيونه هز راسه يسأل وحجه بهدوء ينشف شعره بأطراف المنشفه
-شو كاعده؟ لا بوسه لا حضن لا الحمدلله على السلامه.
وكفت على حيلي ورحتله حضني حيل يبوس برگبتي واني ساكته لا حضنته ولا حجيت رغم ميته من شوگي اله بس مدري اني صايره كلشي يأثر بنفسيتي مدري حقي انقهر وخرني من حضنه لزم وجهي بين أديه آبتسم يحرك إبهامه على خدي
-زعلانه؟
رفعت عيني اباوع بوجهه هزيت راسي اي كرص خدي يحجي
-عرفتج، كليلي ليش زعلتي؟
-منتظرتك وميته على ما تطلع واشوفك تالي انتَ حتى ما دخلت وسلمت عليَّ ومن جبت خاله اباوعلك متجاهلني ماتباوعلي.
مشه وكف يم المرايا يحجي بجديه
صــيهد:: ما ردت اشوفن احد لمن تكضي هالهوسه ، وما تجاهلتج مساع بس ما عاينتلج لان نظرة وسلام من بعيد ما يكفيني انا اريدن سلامنا مشابگ الحد طكة الضلوع.
رفعت حاجبي ما مقتنعه باوع بوجهي ونزل عيونه البطني كعد على طرف الچرباية وأشر بأيده
-جيبي بنتج وتعاي.
مشيت وكفت كدامه خله ايده فوك بطني مبتسم وشال راسه يباوع الوجهي ضحك ودنك يتلمس بطني ويحاجيها
-بابا اسينات.
ضحكت ضحكه طويله وهو يگلي
-شبيج ام اسينات.
-صــيهد؟
شال راسه يباوع الوجهي مختنگه من الضحك گتله
-ولد مو بنيه.
فتح عينه حييل وضحك
-هلا بأخو اسينات.
-بأحلامك وألله بأحلامك.
وكف على حيله ومد أيده على ركبتي جرني جوه جتفه ويجعص بوجهي حييل صرخت أدفع بأيده
-مو هيج صــيهد مووو هيج.
-غير مشتاقلج؟
حضنته مبتسمه
-حتى اني والله كلش اشتاقيتلك فد حسيت روحـــي بلا اهل من انتَ انسجنت.
جان يضحك ومن حجيت سكت شلت راسي من صدّره اباوع بوجهه صفن وسأل بجدية
-حاسبتني أهل؟
هزيت راسي اي وهو يباوع لعيوني بدون اي ابتسامه تحسر ودنك باسني بين عيوني عبالك خليته بمسؤولية صعبه.
تمدد واني امرغ بظهره حيل تعبان واقل العشر دقايق وغفى تمددت بمكاني منطيته ظهري اخاف لا مايدري ويضربني ببطني هستوني غمضت عيوني وتقرب يمي يحضني ويضم وجهه برگبتي غمضت عيوني مقشعر بدني شكد مشتاقتله حضني حييل يهمس بأذني
-الله يقدرني وما اخيب ظنج بيه.
حجايه كافيه تخليني انام والابتسامه على وجهي عرفت كلمتي شكد اثرت بيه بحيث نام وفز وهي على باله، وهم بعدني ماغافيه ودك تلفوني صوت رساله جريته اباوع بيه من ريـــمه كاتبتلي
-جــويريه اذا كاعده ردي
-ها ريـــمه ؟
ريـــمه :: عاينت بالتلفون محتاره كتبتلها
-صــيهد يمج؟
-اي نايم ليش كولي؟
-ها خوش ماكو شي عبالي وي كهلان.
-لا خيه اول ما خلصت الهوسه اجه سبح ونام.
-ها خوش اخذي راحتج.
ريـــمه:: طفيت التلفون كوه اجر نفس حيل مخنوگه لا من اخواني لا من رجلي ما ادري بيه وين راح ولا دخل للبيت، واخواني هم ما اجوا ولا وصلوا يمي يمكن عبالهم جنت ادري بالولد متفقين على ابوي.
غسلت وجهي اعاين للسما فجرية وماضل شي على الصبح وهوه ولا بين ضليت كاعده بالحوش ايدي على خدي الجو الصبح يصير بيه خيط بروده يكرص مسحت على زندي متحسره بس لو اعرف وين راح شلت راسي من سمعت صوت هاسكي ينبح بعيد.
كمت على حيلي فتحت باب الحوش ومديت راسي اباوع شفته اجه يمشي ملثم المسحاة على جتفه وهاسكي يركض وراه يريد يلعب وهو ماله خلك وخرت من الباب وبس طب عاينلي ودار وجهه
-وين جنت؟
ماحاجاني مشه للحوض ذب الچفيه من وجهه ورفع ارداناته وكعد على الصبه غسل اديه ورجليه حايره شلون ابرر شلون اشرحله انه ما سويت شي وكلشي صار غصب عني مو ذنبي كام على حيله طب للبيت مشيت وراه للغرفة سديت الباب اعاينله دنگ يم علاوي باس ايده عاين بوجهه ووگف ياخذله هدوم قفلت الباب وشلت المفتاح صرت على صفحة دار عاينلي ذب الهدوم على الچرباية وكعد على الطرف
-خليني احجيلك.
-شتحجين؟
مسحت عيوني محترگه حرگ والله مليت مليت وانه يوميه ابرر يوميه انحط بموقف يتعبني اكثر من الگبله
طــروادة:: ضل شي ريـــمه ما سوته؟ بله ليش سحرتي امي بيمن مأذيتج شو تحبج اكثر من بناتها؟.
يحجي بحرگه بجيت اهز راسي لا خل يعرف كلشي إنه مسويته خل يعرف كلشي مره وحده مو يمه اصدمه بسالفة، من بين دموعي حجيت اشهگ انه الموتت اخوانك ببطن امك بسبب امي هيه الودتني وانه الجنت اشربها سحر بلا ما ادري بروحي وعمي شامل لو ما انه لاحه عليه يصالح ابوي ويروح وياه للصيد جان الهسه عايش.
احجي ودموعي تجري العبره خانگتني وهو مدنك ايده على راسه ويحجي بحرگه
-الله أكبر عليها الله اكبر.
شال راسه يعاينلي فاتح عينه حيل
-ابوي همه ودوج تقنعينه لو من وحدج؟
هزيت راسي لاامسح بعيوني
-عفراء كالت لان جانوا متزاعلين وما اگدر اجيكم كتله تصالح وي ابوي يعني من وحدي محد موديني.
حط ايده على كصته ضايكه الدنيا بعينه وانه دموعي مانشفت حگه اذا هسه كال روحـــي الاهلج والله ما الومه، حجيت مختنگه
- عاين والله العظيم ما جنت ادري بروحي والله ما جنت ادري.
هز راسه بحرگه يحجي
-سهله يا ميلاد سهله يصير خير.
مشه يريد يطلع سد الباب وراه عايفني بحيرتي وقهري لا هو مصالحني ولا هو گايلي ما اريدنج روحـــي الاهلج عافني بنار ومشه لف راسه ونام بالهول كوه عيني غفت وما كعدت الا على صوت علي وي فزتي فتح باب الغرفة عاينلي بعصبية
طــروادة:: صارله ساعة يبجي.
وخرت الغطا ومشيت العلي
-ما ادري بيه.
حطيته بحضني ارضعه عاينلي بنفس النظرة يحرك روحـــي واموت من اشوفنه يعاينلي هيج كارهني وما مهتملي
-كهلان.
شال راسه يعاين لعيوني
-اذا ما تگدر تعاينلي اعوفن علي يمكم واردن الاهلي.
-وين تردين؟
-الاهلي.
-فنج الوصلتي الباب البيت الا أكسر رجلج.
دار وجهه وطلع عايفني بجيت ضايعه مادري شني الاسوي، اجت يمي رنـــه هم مطنگره وميته من القهر تغلط على بريا
رنـــه:: ولج كبل ساعه ملتحق وانه ما ادري لا اجه ولا سلم يگلي انقهر من اودعج.
-يجوز صدك ينقهر.
2
هزت راسها لا تريد تبجي حاضرته مقهوره عاينتلي تسأل
-هم حاجاج طــروادة؟
تحسرت اهز راسي اي اسولفلها
-اموتن من يعاينلي هيج بكرهه رنـــه
-مو كتلج كلنه هيج شويه وننسى ونفهم انتِ مالج ذنب ميخالف هسه يوم يومين ويرد كلشي مثل ما جام
-جا وگلبي؟
صفنت بوجهي محتاره صاح عليها ومشت بساع رديت علوش لكاروكه وكمت طلعت يمهم اسوي الريوك حتى يمشون المدارسهم وهوه يمشي للكليه ضاع وكته كله وكلساع يخابر على واحد ياخذ منه معلومات ويدرسهن، سويتلهم ريوك اكل كوه على روحه ومشوا كلهم.
طبيت أنضف وشمس وياي لو تشيل مخده لو تلعب بالمكناسه عاينتلها بقهر شكد محتاجه امج بهالوكت توكف بظهري واطمن هيه تبريني گدام خالج كضيت تنظيف البيت وكعدنا بالهول تكيف على علوش تلعب وياه للعشرة اندك باب الحوش لبست حجابي وطلعت
-ها؟
سلطان:: ها ريـــمه.
فتحتله الباب طاك گـــلبي على شوفتهم طبوا هوه وسليم وهاجر سلمت عليهم مختنگه وهاجر طبت العلاوي وشمس تركض عاينت بوجهم ابجي
-جا خويه انه ياهي مالتي وما تجون تسلمون عليَّ؟
ســليم:: والله شفتي شصار بينا نركض مناه ونرد مناه ما ملحكين
مد ايده سلطان يمسح عيوني ويسأل
-شلونج علاوي شلونه.
-الحمدلله بخير، تعالوا تفضلوا اسويلكم چاي.
اريد امشي گدامهم جرني سلطان من ايدي
سلطان:: لا خويه هنا اجينا نشوفج ونروح مانريد نطب.
-زعلانين حتى من كهلان.؟
ضحك ســليم يهز ايده مقهور
ســليم:: هذا عود الخير والخوش زلمه، ولج يراوونا حنطه ويبايعونه شعير، احنا اتفقنا سوه على بيت غانم وفيديو المديره وحجي الزلمه ابو صاحبة بــدور وجيب الخطه وودي الخطه وشنحجي وشنو انگول تالي لمن تصير الكعده نطلع احنا نايمين ورجلينه بالشمس اولاد عمنا متفقين بيناتهم، هسه ابونا سالفة غمه احجوا گولوا ليش تخلونه ننصدم گدام الوادم حالنه حال الغريب.
ميت من آلقهر يحجي عليهم كلهم
-مو عاين عبالهم اذا دريتوا ماترضون يحجون بابوي گدام الوادم.
سلطان:: خو طبعاً ما نرضى احنا شني موقفنا گدام الوادم ترى يشوفونا حالنه حال ابوج مذنبين والولد لو خاطرنا يهمهم جا حاجونه وحلينه سواية ايوي بيناتنا مو گدام خلگ الله.
دنگت ساكته گـــلبي مفرفح عليهم من آلقهر گال سليم
-وين ابن اختي لا طلعلي لا تلگاني بهوسه.
أبتسمت امسح بعيوني ضحكولي اثنينهم يغيرون الموضوع طبيت للبيت لكيت هاجر حاطته بحضنها وشموسه مكابلتها
-شمس اجوا اخوالج.
عاينتلي تضحك
-خالو؟
-اي خالو ســليم وخالو سلطان.
حطت ايدها بالگاع وگامت جنها عجيز السوار ضاك بأيدها وشعرها صاير ثخين وناعم بعده مفتوح ما ممشطته تخبل طالعه ودشداشتها ألحد اركبها تمشي وتضحك وهمه بس شافوها ضحكوا واثنينهم دنگوا فاتحيلها اديهم ركضتلهم كضت كل واحد من ايد شالها سليم يبوسون بيها وهيه تشبگ هذا وتشبگ هذا مخبلتهم.
درت الهاجر احاجيها
-شلونج هجوره؟ امي خوما تحاجيج.
وهيه مدنكه تعاين بوجهه علاوي وتضحك هزت راسها لا
-جيبي علاوي خلي اخواله يشوفونه.
اخذته منها وهيه گامت وياي طلعنه للحوش حاطين شمس بالگاع وكاعدين يمها تبوس سلطان ســليم يگلها جا وانا تبوس ســليم سلطان يگلها وانه خبلوها.
وكف ســليم اخذ علاوي من أيدي خايف كوه كاضه ضحك
-هلا خااالي هلااا ولك شو لا تتلگانه لا تهوسلنا.
سلطان شال شمس واجه يم ســليم باس علاوي يضحك
-يعني شيهوسلك.
ســليم هز علاوي بأيده وغناله
-اريده يهوسلي هيج، خااالي انا ابن اختك وانخاني گبلك طايح تلگاني من صغري الشر رباني خااالي هاااه هاااه هاااه. خااالي.
طكه سلطان يضحك وما طولوا يمي شويه اخذوا هاجر وراحوا طبيت للبيت كضيت الغده لمن اجوا خابرته رنـــه تشوفه يجي لو نتغده مارد عليها خابره عبود گاله تغدوا.
وهو لثنتين ونص يله اجه صبيتله غده اكل ساكت بس سكوته مو على خير مبين ذاك هوه ما راح يعديها، مشه للگيعان واخذ ملازمه وياه فايته امتحانات هواي، ومن يرد للبيت على گد شوفة علاوي وشمس ويروح الحد ما رنـــه طكت روحها كالتله
-شو انه مشلوع گـــلبي عليك وانتَ من اجيت الهسه حتى ما تعاينلي شمسويتلك؟
عاينلها مضيك عيونه
-شمسويه صايره جذابه جاهل انا وتضمن عليَّ هيج سالفة شلون أأمن بيجن بعد ما تضمن عليَّ شي.
سكتت رنـــه مرتبكه والنوب كالتله
-عفراء مارضت نحجيلك.
دنك مقهور وساكت ورنه تلوب كعدت يمه تحاجيه مختنكه
-لا تزعل علينا والله ريـــمه ماعليها هاي كله من امها.
ضل ساكت مدنك يلعب بأسوار شمس وهوه بأيدها تحسر ورنه جرت ايده باستها
-طــروادة عليك العباس حاجيني والله اختنگت من تدير عينك مني.
عاينلها متحسر حط ايده وره راسها وجرها الصدره باسها وشبگها ساكت اخذله شويه ومشه للگيعان وهم مارد مناه لمن صارت ب٢ طب للبيت عاينلي وعاين لكاروك علاوي ما حجه اخذ هدومه ومشه سبح وطب مره ثانيه للغرفة اخذ غطه ومخده وطلع ضميت روحـــي بالفراش ابجي بلا صوت مختنگه وگلبي مفرفح
ساعه وكمت من فراشي فتحت باب الغرفة عاينتله نايم بالهول على الزوليه شامر قميصه بصفه وضال بس بالفانيله الداخليه ماد ايده بصفه على المخده مچاني هذا ويريد يحرمني منه.
تدنيت يمه بخطوات بطيئه دموعي امسحهن ويردن على خدي كعدت بصفه على أركبي
-كهلان .
فتح عيونه يعاينلي مسحت دموعي مختنگه
-تعبـــت لا تعاقبني على شي مو ذنبي.
احجي وصوتي مخنوگ كوه ينسمع بأيده الثانيه رفع البطانيه تدنيت تمددت بحضنه وايده جوه راسي ضميت وجهي بصدره ابجي
-والله ما جنت آدري.
-اششش، ريـــمه اشش اسكتي.
حط وجهه بشعري يجر نفس ويلمني الصدره غفيت بحضنه وما فزيت الا على ايد رنـــه كاضتها الضحكه
-عبود طلع وشافكم هيج شعرج واخوي مصلخ فضحتونااا
تحجي همس ماتريده يسمع بس هوه فز شردت رنـــه طلعت بره وانه وخرت من ايده جرها يعصر بيها منمله كمت اركض للغرفة ناسيه ابني لكيته بعده نايم سويتلهم ريوك ما ادري بيه صالحني هاي هيه لو بعده زعلان مشوا الدوامهم هوه گال للعشرة وارد علمود الكيعان.
وهم سليم وسلطان بس شافوا الكل مشه الدوامه جابوا هاجر واجوا يمي فرشتلهم بالحوش وسويتلهم چاي اتونس من يجون يلعبون وي شمس وعلوشه بعدنا كاعدين وطب كهلان الولد بساع كاموا يردون يرحون ذب ملازمه واجه يمهم
كهلان:: اكعد شي سلطان؟ ســليم شسالفة.
سلطان:: لا خويه لا شسالفه ولا هم يحزنون احنا غريبين عليكم.
-لا تضل تمسلت انا اعتذر وحگكم تنقهرون بس مو مالت زعل، ســليم ما تحجي انتَ.
اعاين بينهم اخواني حيل حازه بخاطرهم وهوه متحركن بس يريد يصالحهم الله هداهم وسكتوا كعدوا سوه سولفوا وانه كاعده واصبلهم چاي گـــلبي خفگ بخوف من عاينلي بساع عرفت نظرته هزيت راسي لا دار عيونه الهم
-لا كهلان
حجيت بصوت يرجف عاينولي وعاينوا الكهلان مستغربين كالهم
كهلان:: خويه المره يردّها رجلها واذا ماردها رجلها وما گدر عليها يردونها اخوتها، امكم لا رجلها يگدرها ولا اخوتها يگدرونها وانا مليت ساكت على سوالفها الخاطركم اليوم اريد اشكي وأنتم تحطولها حد.
راحت روحـــي هذا الشي الوحيد الماردت يصير ادري شنو البعد هالموقف يعاينوله ما فاهمين شي وهوه سولفلهم على سحر امي سديت اذني ابجي بخوف مو عليها والله مو عليها خايفه على اخواني صدمتهم اكلت روحـــي اكل وهوه يحجيلهم بقهر شلون سحرتني من واني طفله وشسوت بيه يعاينون مصدومين جرني سليم من ايدي
-ريـــمه صدك هالحجي ررريمه.
مسحت دموعي اعاين لكهلان واخواني مفرفحين ووگفوا مفزوعين من حجالهم سالفة العرس هم تسودنوا كالهم
-بس ردتها تكف شرها عني بعدها تجي البيتي وتهدد مرتي وبعدني ساكت الخاطر عيونكم بس لهنا وكافي.
ركض ســليم للبيت وركض سلطان وراه عاينتله ابجي
-شسووويت؟
كهلان:: غلطت وضليت ساكت الحد هسه ميلاد ينرادلها واحد يلوي اذنها.
كمت اركض اخذت عبايتي وطلعت البيت اهلي بعدني ما واصله الحوش واسمع صياحها وغلطها عليهم وصوت ســليم متسودن ويصيح طبيت للبيت وهيه بس شافتني عافتهم واجتني تركض يردون يلحكون عليها ماكو طكتني بساع تغلط وتسب
-ووولج تردين تسودنينهم عليَّ؟؟؟
جراها سلطان حيل دفعها يصيح بوجها
-لا تطگينهااااا.
وهيه بس تريد تكضني جرني ســليم من ايدي حييل يتراجف طلعني من البيت
-ســليم فـــدوه لا تحركون گلبكم سليم.
-امشيي ردي لبيتج لا تجين، امشييي.
نتر بصياح مشيت ودموعي تجري طبيت للبيت عاينتله ابجي جرني من ايدي الصدره
-اششش ريـــمه كافي سكتي هواي لو حاجيه من الاول جا امج ما طغت هيج.
-اخاااف على اخواني والله اخاااف عليهم.
باسني براسي ويمسح بعيوني وهاجر تعاينله بخوف علوش وشمس يمها، ضليت كاعده بالحوش وإسمع هوسة اهلي ومن اجه ابوي بيتنا انگلب بالصياح
وللعصر ســليم اجه يمنه وحتى هاجر ماخلاها تروح ماله خلك روحه حيل مقهورين ومتفشلين من كهلان بس هوه يحجي وياه وكلساع يوديله علاوي لو شمس مايريده يضل مقهور وسجاد حاس اكو شي كلساع يسألون هوه وعبود شكو شصاير والولد يسكتون.
ضل سليم يمنا بس جاب هدومه واجه وهاجر يمي بس مقهوره تريد دفاتر الرسم، الحد الساعة ب١٢ اجه ابوي عليهم يتعارك ويغلط يريدهم يمشون وياه للبيت مارضوا لا ســليم ولا سجاد صاح على هاجر سليم گاله
-ما تجي ما تريدكم ما ترررريدكم موتونا كرهنا ارواحنا من وراكم.
وابوي چن متحمل عليه شال ايده وطكه على وجهه مرتين نكز سجاد يريد يطك ابوي دفعه سليم خازره مايرضى وهاجر ركضت بساع الابوي كضته من ايده خزرها سليم ماراضي وانه گـــلبي فرفح من مشت وي ابوي والولد طبوا للدوانيه ميتين من القهر
درت عيوني الكهلان يفتر بحرگه گوه كاض روحه جر الجفيه لفها على وجهه
-ليمت ترد ؟
هز راسه مايدري
طــروادة:: عجيب كرهه بعض البشر وين يوصلهم اهم شي بحياة الانسان لمت ولده وبناته عليه وهمه من حقدهم خسروا حتى هاي .
مشيت للگاع مشغل المكاين متأخر هواي على الگاع اجه يمي صــيهد ضايج لان الولد زعلانين عليه
-يابه اعتذر منهم وصالحهم.
صــيهد:: انا أعتذر تخسى والله.
-جا شنّي الاعتذار يشور؟
گلب وجهه ماراضي ويدخن بقهر رد گال
-هسه شدعوه عليهم يزعلون ترى ابوهم مايسوى واحد يزعل علموده.
-لا يابه حگهم استغفلناهم جان المفروض نحجي نلمح مو نصدمهم.
فرك وجهه ضايج وكام على حيله يدخن
-رايح انا عود باجر اتعارك وي سلطان وهوه هيج نتصالح.
هزيت ايدي اضــحك مشه للقرية وانا ضليت اسكي وياي هاسكي للساعة بتلاثة الدنيا ظلمه تكتل وهوه خبصني ينبح يريد يركض واصيح عليه يوكف شغلت الضوه اشوفن وين ينبح واشوفنها مره بعبايه سوده كلشي ماينشاف منها حتى عيونها مغطايه وبس ضويت عليها ركضت باتجاه النخل
-اووووكفي.
ركضت وراها ومالحكت بيها صارت بين النخلات واختفت اتلفت والضوه بأيدي بس اريدن ارد اشوفنها ماكو فص ملح وذاب عشر دقايق ضليت ادور بيّن النخلات وماكو شويه وطفت مكينة الماي ركضت عليها ادور يمها وما اشوفن احد اضوي مناه ومناه وماكو تدنيت يم المكينة. بحيره والكه فوگ البوري ورقة بيضة وملزوگة شلتها اتلفت فتحت الورقة أضوي عليها واقرأ المكتوب
"كهلان انتبهه راح يفتحون قضية قتل شعلان شاكر اللي قتله بس يريد يورطك عاف خنجر بحوشكم لا تكضه حتى لا يصيرن بصماتك عليه
شاكر هوه القتل شعلان"
شكرا لزيارتكم عالم روايات سكيرهوم
