رواية أرض الخناجر الفصل الرابع والسبعون بقلم ايلول
يَبعد رموش عيني
وجفني والعين وصبيها
ونظرها وهذيچ الأحلام
سنه ماشايفك
بس انتَ موجود
لهسه اشتم عطر من شوفت العام
══━━━━✥◈✥━━━━══
طــروادة:: اضوي على الورقة واگلب بيها المكتوب ما جنت بغفلة عنه وجان ببالي بس رافض اصدگه ورافض حتى افكر بيه ودوم اقنع روحـــي لو شما صار يضل ابوه ما يسويها.
ضويت على النخل ادور ياهي العاف هالورقة هناه ياهو الاله مصلحة يحذرني، رديت اقرأ المكتوب واركز بالخط نفس الخط الكتبلي ورقة ولزكها على باب حوشنه، مسحت وجهي محتار وذكرت اهلي اخافن لا تطلع السالفة صدك وواحد منهم يكض الخنجر رديت اركض
دفعت باب الحوش ومالحكت صحت عليها.
-لااا.
ريـــمه:: فزيت على صوته اعاينله وكاضه الخنجر بأيدي مستغربه من وجوده بحوشنا واحد من خناجر جدي وعليه سواد جن دم يابس، طب كهلان يركض نكث ايدي وطيح الخنجر بالگاع وصيح بوجهي
195
-ليشش كضيتيه؟
وانه بس فاتحه عيني مستغربة
-ما ادري لگيته بالحوش شكو؟
مسح وجهه بحرگه وذب الچفيه من جتافه فوگ الخنجر شاله ومسح المچان الچنت كاضته منه حيل، بأيده ورقة تعقجت گد ما يمسح بالخنجر.
-كهلان حاجيني
جريته من أيده ما فاهمه شي عاين بوجهي يتنفس بسرعة تعبان من الركض، فتح الورقة طبگها مطلع سطر واحد منها يراويني مكتوب "كهلان انتبهه راح يفتحون قضية..."
ومغطي الباقي مديت ايدي اكض الورقة اريد اقرأ باقي المكتوب ما خلاني عاينت بوجهه بعدني ما فاهمه شي گال
-بس ركزي تعرفين هالخط؟
عاينت بالورقة اهز راسي لا
-لا والله.. خل اشوفن شمكتوب كهلان راح تخبلني.
صفن بوجهي ساكت اخذت الورقة من ايده مسح وجهه يعاينلي بتركيز فتحت الجزء الطبكه من الورقة قريتها وشهگت مصدومة احس گـــلبي انعصر ما مستوعبه اقراها وارد اقراها كعدت بالگاع مهدود حيلي
-اششش اششش ريـــمه عاينــي علي اشش
جرّ الورقة من أيدي وكض وجهيّ يحاجيني حطيت ايدي فوگ راسي حسيت حمل كل هالدنيا صار على اجتافي شجاي يصير هزيت راسي گـــلبي ممرود
-لااا جذب جذب ابوي يحب جدي
اختنگت روحـــي مفرفحه بچيت ساده حلكي بأيدي وهو كاعد بمستواي جر راسي على صدره
-اشش فـــدوه اروحنلج ريـــمه شو عاينــي علي بس لا تبجين اسكتي ما اريدن واحد يحس بس انطيني مجال افهم.
شال راسه بفزه من اندك باب الحوش وصوت سلطان يحاجيه
-طــروادة.. خاب شني شكو؟
وكف بساع ضم الورقة والخنجر بالچفيه لفاها وعافها على حافة الشباچ صاح على سلطان
-اجيتك.
جرني من ايدي يوكفني ويمسح بعيوني بس انه رايحه روحـــي اذني تصفر ورجلي يرجفن
-لا تحجين شي بس انطيني مجال افهم خوش.
هزيت راسي اي امسح بوجهي مشه فتح باب الحوش وطب سلطان يحاجيه
-سلامات خوماكو شي؟ شو شفتك اجيت تركض خوفتني.
يحجي وي كهلان شايل ايده وبس لمحني نزل ايده وعاين لكهلان بعتب عباله محاجيني لان دموعي شما امسحهن يردن يجرن على خدي كل ما أذكر المكتوب وافكر بيه يقشعر بدني وجسمي يرجف
سلطان::ها كهلان؟
دار عاينلي ابتسم طك سلطان على ايده يضيع السالفة
طــروادة:: ولك اليسمعك يگول مرتي يوميه جايتكم زعلانه... وعلي ولا محاجيها.
عاينلي سلطان مقهور يسأل
سلطان:: شبيج ريـــمه؟
كهلان:: مقهوره على هاجر وخايفه عليها.
سكت سلطان صافن بوجهي مسحت عيوني ابتسمله گوه على روحـــي وكفوا يمي اثنينهم مد ايده على خدي
سلطان:: أنا يم هاجر لا يضل بالج.
عگدت حاجبي مستغربه
-ها بايت يمهم؟
دنك منحرج هز راسه اي ورد عاين الكهلان مبتسم
سلطان:: هذا الچلب إخذ آخته شلون سلم عليَّ وما رديت عليه.
-يااا صــيهد اخذ رغد؟
هز راسه اي وكهلان ضحك
كهلان:: يريدك تصالحه بس ما يريد يعتذر منك.
ووي حجايته دك تلفونه طلعه من جيبه وبس عاينوا بالاسم سلطان چلب بأيده
سلطان:: بروح ابوك خلني اسمعه شيگلك.
ضحك وجاوبه فاتح السماعة
-الو.
صــيهد:: اكلك انتَ ما تنام؟
-ياهي مالتك؟
-هم صدك اكلك جيب سلطان وتعالوا اعتذروا من عندي!
سلطان رفع حاجبه يعيب عليه وكهلان مبتسم گاله
-انا اعتذر منك شمسوي؟
صــيهد:: ما مسوي شي بس حتى تسوي واهس لسلطان وسليم شبيك رحمة الخالتك الشگرة؟
-انچب.
-كهلان لا تنعثل جيبهم وتعالوا اعتذروا.
طــروادة::ولي عني لا اجي اخذ اختي.
وصيهد سد التلفون بوجهه .. سلطان هز ايده يضحك
سلطان:: فوگ ما هوه الغلطان تعالوا اعتذروا.
كهلان:: ضايج والله لان ما تحجون وياه بس سلطان انتم هم لا تلومونه السواه ابوكم مو هين وخويه حچي بيناتنا لو انا بمچان صــيهد لا وروح ابوي لا اعترف بعشيرة ولا بالخوة بساعتها اكتل ابوك لو مسوي هالسالفة وي اختي.
دنك سلطان متحسر ميت من القهر رد گاله
سلطان:: القاهرتنا ما سولفتوا انتم وولد عمي خليل متفقين بيناتكم وخليتونا كلشي ماندري
-بعد صارت ومو مال تضلون زعلانين.... تصالحوا لان الله يعلم يجوز عدّنا مصيبة اكبر بهالأيام
دار يعاينلي وسلطان يتلفت بيناتنا ما فاهم خفت على كهلان خفت يتورط وردت احد يوكف وياه ومايخليه ضايع بتفكيره وحده مديت ايدي الايد سلطان احاجيه وشفايفي يرجفن مختنگه
-سلطان اكو شي صار ولازم تعرفه
عاينلي كهلان خازرني وسلطان بساع طكه شايل اصبعه بوجهه
-لا تخزرها خلها تحجي، شصاير ريـــمه.
طــروادة:: تعال ليغاد ما اريدن احد يسمع.
كضيت سلطان من ايده مشينا لوره البيت وطرواده جاب الجفيه واجه فتحها يمه راواه الورقة والخنجر يسولفله شصار وشلون لگاهن وأخوي من صدمته سكت كهلان ومد أيده يسند روحه عليَّ بچيت موجعني گـــلبي ليش يوميه اهلنا صادمينه بسالفة.
كهلان حاير بيني وبين سلطان اللي ابد ما نطق وماحجه بس يريد يمشي البيت اهلي واثنيا مچلبين بيه دفعه كهلان يحاجيه
-تسكّت وتنچب ياهو يگول صدك؟ خلنه نفهم السالفة سلطان ابوك مو هين وانا لا اريدن اتورط ولا اريد واحد منكم يتورط لان عنده استعداد حتى يطلع روحه من السالفة يخلي علته حتى بيكم.
گمت من يمهم بساع جبتله ماي غسل وجهه راحت روحه شصار بحاله اخذه كهلان وطلعوا، طبيت جوه حتى النفس خانگني شلت علاوي من كاروكه حطيته بحضني شابگته وابجي مقهوره حييل مقهوره ليش من دون خلگ الله اهلنا شياطين هذا العرفناه والله يعلم بالمضموم .
مدري شلون عيني غفت فزيت وانه احس علاوي ينشال من حضني عاينتله شاله باسه ورده الكاروكه غطاه ودار يحاجيني
كهلان:: لا تخلينه يمج تخنكينه وما تدرين بروحج.
اعاينله ساكته ذب قميصه واجه تمدد جرني من ايدي الصدره حاضني حيييل وانه الخنگه البيه تكسر زلم .
باسني براسي يمسح على زندي
-كافي ريـــمه فـــدوه اروحنلج كافي .
تحركت اضم روحـــي بحضنه اكثر دموعي على خدي كضيت عمــري وياهم ما حسيت بدفو الاهل ولا حنيتهم ولا حسيت روحـــي يوم بأمان، جنت استغرب من اجي لهنا واحس روحـــي بالمچان الصح استغرب واتجاهل شعوري رغم عمــري كله ما لمني دفو وامان مثل بيت عمي.
طول ما انه عايشه ببيت اهلي ما مر عليَّ ليل بدون احلام تخنگ وتخربط نومي واكضيها اتفزز ولا مره نمت مرتاحه غيّر بفراشة.
احسد اخواني جنت ينامون بغرفهم مرتاحين اثاريهم ملوعين مثلي واكثر اهلنا خلوا احبال بأدينا وجر للظيم جرونه.
اشهگ مخنوگه مد ايده يرفع وجهي من صدره ما راضي
-شلعتي گـــلبي كااافي .
-تعبـــت منهم تعبـــت ليش بس احنا اهلنا بهالشر؟ ما بيهم محنه والله اتمنى.. اتمنى اسمع منهم حچاية حلوه اتمنى حضنهم يطمني مو يخوفني اتمنى اهلي مثل اهلك والله اتحسر...أتحسر على حنية الاهل... فوگ كل السووه شوف وين وصلوا هم هوه الكاتل جدي وهم يريد يوررطك ولك والله مليت.. والله مليت بس اريدن أأمن ما يصيبكم شي انتَ واخواني كاتلني الخوف اربعة وعشرين ساعة من وراه امي وابوي.
روحـــي طلعت ابجي بحرگه وصوت وهوه حاير بيه يجر ايدي من وجهي يبوسهن ويبوس راسي ويلمني من الفراش فوگ صدره
-انا اهلج انا اعوضنج ايام التعبتي بيها ريمتي يبعد روحـــي بسج والله مردتي گـــلبي.
-يردون يحرموني منك والله يسوونها.. يسوونها آهلي يسوونها يقهروني بيك والله يقهروني بيك.
-وحگ عيونچ العاشگهن يخسون يقهرونج وانا بظهرج.
سديت حلگي بأيدي ما اريدن صوت بچيي يطلع بس ما گادره اسكت، بچيت هواي بچيي سنين الحد ما جف دمعي على رموشي هدأت مستسلمه حسيت روحـــي بردت وره كل هالبچي ماعندي حيل حتى احجي ردت بس انامن، وخر شعري من وجهي يبوسني بين عيوني بحسره
-لا تشلين هم شي كله سهل وكله ينحل.
غمضت عيني ساكته ادري بيه شكد مقهور وشكد حازه بخاطره بس ضمها بگلبه من شافني مقهوره، غفيت وحتى من سمعت علاوي فز ما گمت فاتحه عيني اعاين للشباچ وضوه الصبح من بدأ يتخلل من فتحتة البرده البالنص مابيه اگومن من فراشي .
وبس بچه كام كهلان بساع اخذه من الكاروك عاينلي يحاجيني
-جوعان
غمضت عيني ما اريدنه ولا اريد أي احد، اخذه ومشه الرنه جريت الغطا فوگ راسي شوي وطبت رنـــه اخذت الحليب وترمز الماي واسمعها تحاجي كهلان
-شفتها خاف مصخنه؟
وهوه ساكت شايل علاوي يريد يسكته لمن رنـــه سوتله المميه وانطتها اله يله سكت، رديت نمت وللتسعه يله كعدتني رنـــه عاينتلها افرك بعيوني وكعدت على حيلي احاجيها
-ليش ما مداومه؟
-شني ريـــمه غير عطله شبيج انتِ ماعاجبتني؟
هزيت راسي ماكو شي وگمت وياها، حاطه علاوي يمها بالهول شمس تعاين للتلفزون وزهره يمها تدرس درت الرنه اسألها
-كهلان وين؟
-راح للگيعان هوه وسلطان وسليم وسجاد وعبود كلهم راح ينكربون اليوم، اكلج گال اذا بيها حيل خل تكوي قميصي الاسود اظن العصر يرحون للموكب.
هزيت راسي خوش وطبيت للمطبخ اغسل واسويلي چاي اجت وراي رنـــه گالت
-لا جذب گالي ريـــمه مابيها حيل انتِ اكويه.
مسحت وجهي ابتسملها
-جا ليش تجذبين.
-جا اكره الكوي.
-جا ومن تزوجين؟
كشرت بسنونها تضحك
رنـــه:: گتله تكوي هدومك وهدومي ورضى.
سندت ظهري على الكاونتر اعاينلها ومتانيه الچاي يحتر
-تصالحتوا؟
رنـــه:: لا بعدني حاضرته.
غميتها ودرت احضر كلاص وشكر وهيه مشت للثلاجة جابتلي كاسة جبن كالت
-طــروادة اكل منها شويه وضمها الج وحسين صارله ساعة يفتر عليها يريد ياكلها مقهور شلون ما خليناه ياكل ويانه جبن.
-اكلج رنـــه كلشي ولا تحاجون حسين صاحبي بس هوه يدافعلي من تنچلبون عليَّ.
ضحكت تطك ايد بأيد
رنـــه:: ايا چلبه.. ولج اكل تلث بيضات ويريد بعد يگوم جا صرت زلمه
-لا لا حقه گايم يشتغل وي الولد بالگيعان ويتعب والله .
اخذت ريوكي وطلعنا للهول كعدت يم علوش وطب حسين بس شافني صاح
-انا ماتريگت گلتلهم لو وي ريـــمه لو ما اتريك.
-صبلك چاي وتعال.
تربع يمي وصاح على زهره
-زهره چااي چاي.
وزهره چنها رنـــه من واحد يأمر عليها تدردم وتحجي وولا گامت مشت رنـــه صبتله يشاقيني ويشاقي شمس يجبرني اضــحك .
كمت وي رنـــه للمطبخ كضينه الغده وطبيت الغرفتي محتاره اخابر سلطان لو كهلان وانشده شصار خابرت على سلطان ووين يله جاوبني
-شلونك؟
-هلا خويه هلا بيج.
-ردت أنشدك شسويتوا على سالفة البارحة؟
سكت مده يله حجه بصوت ناصي
-الج الصافي لا تدوخين روحج هسه هاليومين تنحل.
-بس كلي يعني راح تسكتون لو شنو؟
-لا يابه سكتنا هواي بعد مو مال نسكت ريـــمه تالي اسولفلج من تكضي.
-خوش.
سديت التلفون منه وجبت علوش للغرفة جاي ابدل هدومه واجتني هاجر شبگتها اشم ريحتها روحـــي ترد وخرتها من حضني كاضه وجها بين ايديي بخوف
-خوما طكوج هاجر.
هزت راسها لا ودنگت العلاوي تبوسه وتبوس اديه فرحانه بيه، عفتها يمه اخذت هدومه وطلعت جاي اغسلهن ودك گـــلبي حيل .. شلون ما فكرت بيها هااجر.
عفت الهدوم ومشيت للغرفة بس فتحت الباب شالت راسها حاطه اصبعها على حنج علاوي تلاعبه حتى يبتسملها، طبيت وسديت الباب وراي وهي تعاينلي مبتسمه فتحت كنتور كهلان ادور على الورقة اثنينهن ضامهن طلعت القديمة الكالوله بيها ضل بالگيعان جبتها وكعدت يمها فتحتها الها عاينتلها عاگده حاجبه بأستغراب
-هجوره
شالت راسها عينها بعيني دكيت على الورقة بأصبعي
-تعرفين هذا الخط المن؟
دنگت عاينت للورقة وردت عاينت لوجهي هزت راسها لا من استغرابها گلت الروحي شبيه شكيت بيها لو هيه جا اجت سولفتلي اخذت الورقة وكمت اريدن اضمها حطيتها بالكنتور وتوني التفت عليها لمحتها تعاين للفراغ ابتسمت عبالك ابتسامة انتصار ردت تعاين بوجهه علي.
وانه حايره ابتسامتها ماجانت عاديه عبالك واحد مكيف قنع المقابل طلعت لزهره جبت منها دفتر وقلم ورديت كعدت يم هاجر حطيتهن گدامها وشلت علاوي حطيته بحضني عاينتلها مبتسمه
-بله اكتبيلي شكد تحبين علاوي.
ضحكت وشالت الدفتر حطته على رجلها تكتب ودارته الي تراويني كاتبة
-احبه بگد ما انتِ تحبيني.
وما اهتميت الكلماتها گد ما مهتمه الخطها يختلف كلشش عن الخط آللي بالورقة.
سكتت مبين مو هيه بس ضلت تاكل بگلبي ياهو اليكتب الكهلان ويريد مصلحته لو يريد يورطه.
وكهلان كل ما انشده يگلي اصبري ودوم يطلع وي سلطان ما ادري وين يروحون وصيهد يشيل روحه ويدگها يشمر حجي على الولد بس يريدهم يتعاركون وياه.
اجت يمنا جــويريه لا معبرتني ولا معبره رنـــه كل همها شمس وابنها بعده ماصاير وهيه تتخطبله كلساع وكالتلها
-اكبر مواليد ابني وتتزوجينه؟
وشمس الفاسقة تضحكلها كالتلها رنـــه
-كليلها لا ايععع.
جــويريه:: ضربتها على ايدها وجريت شمس أبوسها ونعيب على رنـــه
-وولي .. شمس كليلها وولي
وهي بس تضحك وتبوسني مثل ما ابوسها وما تفضل احد على رنـــه من اكلها ختولي تعاي روحـــي وياي تهز راسها لا وتركض تشمر روحها بحضن رنـــه . صاحت ريـــمه
-اكلج هذا شبيه رجلج وي اخواني فوك ماغلطان يريدهم يعتذرون جــويريه ربي رجلج.
ضحكت وهي ورنه كابلني يحجن عليه كرهني بيه
-والله هسه اگول الكهلان تعاللهن كرهني بزوجي.
رنـــه:: أووي عيني خاب صيري خشنه غاثاتني انتِ ونديوه وهذيج الروسيه ام يؤبرني.
ريـــمه:: كلهن اهون من ماريا النوب من ما نعجبها تحجي روسي تخلينه راس يردم براس ما ندري شجاي تغلط علينا.
كاعدات بالحوش فارشين حصيره يم الحديقة وكاعدين نسولف ونضحك ووي حجينا على ماريا صاحت من وره الحايط
ماريا:: يا شرشوحات عم تجرجروا سيرتي.
واسمع صوت مــاسه ضربتها وتحجي عليها
مــاسه:: گتلج اسكتيي خلينا نسمعهن.
ركضت رنـــه فتحتلهن باب الحوش ودخلن يضحكن كومتني ريـــمه وكفت اسلم عليهنّ وماريا تغلط وتكرص شلون نحجي عليها رنـــه بسرعة باعتنا گالتلها
-انه دافعتلج.
وماريا حضنتها وتگلها
ماريا:: مرت خيي الحنونه يخرب بيت قلبي عليكِ.
رنـــه:: اظن سبتني عوودي ولج شحجيتي.
لزمت ماريا تريد تضربها وهي اجت تركض تضم روحها عند مــاسه وماسه رابطتها ربط رجعنا كعدنا كالتلها ريـــمه
-بله خلي اشوفنج شلابسه
مــاسه:: اكلج ريـــمه متعاندات انتِ وياها؟ كل ما نريد نجيكم تريد تلبس مشلح الخايسه.
ضحكت ريـــمه وغمزت الماريا تهز راسها لا
ريـــمه:: مو وياي وي خلاسها.
مــاسه:: يا بويه ياهو هذا خلاس بتنا؟ ما عاش اليخلسها اخلسه هوّه وعشيرته.
ماريا:: سمسم شو يعني خلاسك احكي بسرعة منشان رد.
ضحكنا كلنه وهي ملخت روحها تريد تعرف شنو يعني كالتلها مــاسه
مــاسه:: يعني صگارج.
ماريا:: اووف.. دخيلك وحده اصعب من التانيه.
رنـــه:: ولج يعني مخوفج هيج يعني مطيح حظج باختصار.
دارت على ريـــمه اللي مختنگه من الضحك وحتى عيونها مدمعه، شالت ردنها متحضره للحجي وماسه تكض بيها بس شيكضها بعد توها تحجي وماسه سدت حلگها تگلها
مــاسه:: ووولج انه كايله عليج الها حلك ياكل ما الها حلك يحجي اشش اسكتي.
جرت ايد مــاسه من حلكها وتحجي تريد ريـــمه تركز وياها وريمه انتهت من الضحك
ماريا:: لك والله ما بيهز شعره من راسي هالمشرشح خيك..
رجعت مــاسه سدت حلكها
مــاسه:: ووولج مو احنا ينگال علينا الهادئين الخوش وادم اسكتييي.
ريـــمه:: وولج حا شني إحنا مسودنين
رنـــه:: صدك شو انتِ مدري شلون حجيج انتم الخوش وادم واحنا الموخوش؟
وماسه ذبت عبايتها تصيح
-الله اكبر اجينا نشوفهن عاركنا كومن يمه امشنا.
طبطبت على رجل ماريا وتريد تشيل حور ضربتها ريـــمه تضحك وكعدنا نسولف والجهال بنصنا علوش وشمس وحور.
مــاسه وريمه يحجن على تربية الجهال ورنه من يمها تصيح دخيلك يا علي واني كاتلني الخوف اسأل على الولاده، ماريا لعبت روحها من سوالفنا وگامت تلعب وي زهره وشمس يركضن وره بطوط رنـــه وماسه غطت وجها بالشيله عود ماريا بنتها وتگول
مــاسه:: لا خيه لا بنيتي چبيرة الوادم تتخطبها بس هاي هيج تلعب علمود الفريخات تونسهم.
ريـــمه:: اي انه اشهد ..شوفيها زهره أعقل منها.
وماريا تضحك متونسه على البطوط ما تدري اكو وياهن واحد ذكر وينگر لازمه بأيدها عوده وتفتر وراهن وبس وصلته نفش جناحاتها وطفر عليها صرررخت بكل صوتها ووكضت وهوه يركض وراها، كامت ريـــمه تركضلها هيه وماسه، ماريا گلبت الدنيا بالصريخ طردن البطوط لازماتها اثنينهن تبجي بخووف واديها يرجفن مــاسه بسرعة حضنتها جنا نضحك بس من شفنا. بجيها وخوفها انخرعنا.
ريـــمه:: ياا ماريا طردناهن والله يااا.
تبجي بصوت وتشهك متخبله وماسه تحضنها حيل والبنيه ترجف مفزوعه فززونا الولد من دخلوا يركضون كهلان وسلطان وسليم
كهلان:: سلاماااات ؟
راحتله ريـــمه تحاجيه واحنا بس نريد ماريا تسكت
ريـــمه:: البطوط ركضن وراها.
مدنكين ويحاجونها هوه وسلطان بس ســليم صلف ما يدنك گالها
كهلان:: البطوط بچنچ هسه اذبحهن الج واعشيج بيهن ياابه.
رنـــه:: تذبحمن ما سمعتتت.
ضحك يحجون وي ريـــمه يم باب الحوش وماسه حارت بماريا غسلت وجها وگوه سكتتها كعدت بصفها بعد ابد ما گامت من يم مــاسه وجها احمر واديها بعدهن يرجفن راحت روحها تذكرت بيها خوفي من البومه الحد ما هدأت والولد مشوا رجعنا نضحك عليها وريمه تگلها
ريـــمه:: حاطه سماعات ببلاعيمج كل هالصوت منج؟
وهيه تبتسم وتمسح بعيونها سانده راسها على جتف مــاسه
رنـــه:: حيل. وياج انتِ. تحرشتي ببطوطي.
ماريا:: كانوا ادميين وفجأه توحشوا .
ضحكت أخوف بيها على اساس اني شجاعة گتلها
-حقج بس بعد مايعوفج وين ماترحين يركض وراج حتى يعضج.
ماريا:: بكرا لما يجي بريا بخليه يذبحه.
رنـــه:: والله شحدكم انتِ وبريا فنكم الوصلتوهن
جــويريه:: ضمت وجها تضحك بقينا للغروب سوا هنه راحن واني وصلني حسين دخلت للبيت خالتي ايمان كاعده وبدور تسولفلها على مدرستها الجديدة صــيهد نقلها المدرسة بالمدينة ما قبل يعوفها بنفس المدرسة، درت الندى كاعده بالمطبخ يم رضا گالت
ندى:: ساعة السوده يوم الداومت بــدور ذاك اليوم.
-ههههه ليش؟
-عشر مرات سولفتلي شلون الولد دخل للبيت وشلون تخربط وهي ركضت تكعده وتاخذلها شويه تصفن وتكلي حسيت روحـــي بفيلم اكشن.
ضحكت وهي تباوع بوجهي گتلها
-مو سولفتلي هواي وگتلها روحـــي أحجي الندى تحب هيج سوالف.
دخلت بــدور للمطبخ ما تسلم عليَّ تمدّ ايدها على بطني وتحجي وياه
-هلا حبيبي هلا بأبن السبع.
-اكلج بــدور ندى تگول والله احب سوالف بــدور على هذا الولد..
بــدور:: يا ولد علمدار؟
ضحكتا اثنينا وهيه فد متخبله كل ما تحجي تعيب وتصيح مسوي روحه مراد علمدار النوب من بقت تربط حدث بحدث وعرفته ابن سيد عباس تخبلت وتوصي
بــدور:: مو تحجن الصيهد بله وهـــب عادي باجر انه اسولفله.
-صــيهد هم عادي ترى.
گلبت عيونها وتهز بأيدها ضربتها اضــحك بقيت يمهن شويه ورجعت للمشتمل قبل لا يرجع صــيهد سويت العشا وخابرته مطنگر لان سلطان وسليم مايحجون وياه عود جاب رغد يمنا حتى سلطان يجي عليها بس طلع الشغله رجعت البيتها تركض.
شويه ودخل گالب وجهه غسل واجه ياكل عود مسويتله شوربه اكل منها شويه وشال راسه يباوعلي ويحجي
صــيهد::شني فلمج يوم طبخج حلو يوم ما ينبلع
-طبخي ماينبلع؟؟
ذب الخاشوگه من ايده يهز راسه اي ويباوعلي ما عاجبه
-نوبات ما ينشبع منه نوبات يلعب الروح شني اذا مالج خلك لا تطبخين عليمن بعد.
-لا تاكل والله لا تاكل ما عاجبك لا تاكل.
احجي بحرگه واجر بالصينية منه وهوه فاتح عينه حيل خازرني متفاجئ بيه واني مدري شجاني كلمة تگلب نفسيتي گلاب دفع الصينية عليَّ يصيح
-وووولج احجي عدل لا اكسر ظهرج.
شلت الصينية ومدري شبيه بسرعه بجيت
-لا اكسر ظهرك ولا تكسّر ظهري ما عاجبك طبخي المن تزوجتني ؟
دخلت للمطبخ خليت الصينية على الكاونتر رگع وفزيت من دخل وراي دفر الباب رجعت ليوره اباوعله شال ايده بحرگة
صــيهد:: يشهد الحسين هااااي نترتج لو عدتيها حظج أطيحه وعود هم روحـــي الاخوووج.
خازرني ويحجي بغضب ورغم اكره واخاف من هاي عصبيته ما سكتت ابجي واحجي
-لا والله؟ بيتي وبيت ابني هذا انتَ التطلع واحنا نبقى.
فتح عينه بصدمة دنگت اشجع بروحي وهوه افتر يدور شي يكسره مالكه شي ينكسر ضامتهن ومخليه بس استيل عضّ ايده بحرگة
- خرب روحج وروحهم.
-اطلع بررره.
-جــويريه!!!
درت وجهي منه ابجي وهوه تخبل يرزل ويحجي على روحه انطيتج عين انطيتج مجال گلتي هاي هيه ادوس عليه ما تدرين بيه أطيح حظج يابه دروح جنك شعلان.
احجي بگلبي مقهوره منه اخذ تلفونه وطلع رگع الباب وراه حيل غسلت ايدي ووجهي ومشيت قفلت الباب ورجعت للتلفون كتبتله
-عود رحت زعلان هسه انتَ ؟ هاي هيه براحتك خلي كهلان يفيدك والله العظيم.
ما وصلته نص ساعة يله دزلي
-مو صاحية انتِ وعلي.
-اي اني مخبله وانتم بيت شعلان صاحين.
قراها وما جاوب انتظرته للساعة بـ ١٢:٣٠ما اجه واني الوم بروحي على ردودي وياه وأفكر شلون جان لازم أرد بهدوء مو بهالاسلوب، ومن بين افكاري راسلتني ريـــمه كاتبه
-رجلج زعلان شني؟
-ليش شكو؟
-ما ادري اظن راح يبات يمنا يريد كهلان يمه وانه اريدن كهلان مو حجي هذا جــويريه اخذي رجلج وخل يهد رجلي.
-خلو عدكم ما اريده بعد لا يوصل يمنا.
ريـــمه:: ضحكت اهز بأيدي واباوع للولد صــيهد طرد عبود وسجاد من الدوانيه طبوا الغرفة عمتي يگلهم اريدن اكعد وي كهلان سجاد ما يسكت شايل البطانيه مالته واجاه مد راسه للدوانيه گاله
سجاد:: احلف عليك مرتك كاتلتك وطاردتك.
حجاها ودار وجهه يريد يشرد مالحك البطانيه عثرته وكضه صــيهد سحله للدوانيه ونزع حزامه ركض عبود شايل بطانيات اثنين ذب روحه فوك سجاد يحميه وكهلان يضحك عليهم وصيهد يطكهم حيل وسجاد يصرخ وهذا يتسودن يطكه ويگله
-لا تصرخ مثل النسوان.
سجاد:: يبوووووووي.
دمعن عيوني من الضحك طلعت رنـــه تفرك بعيونها فازه عبود طلع شارد ورد سحل سجاد من رجله للهول وكفوا سوا شال القميص من ايده ومدها يراويها العبود يشكيله
-عاين شلون طكني.
عبود:: سوده بوجهي يا خويه... احترك ابيك صــيهد.
صــيهد:: تعال عبود تعال خل اسولفلك سالفة.
عبود:: سولفها للدبه.
صــيهد:: ما اطكك تعال صير زلمه تعال.
عبود:: جا شتسويلي تمسح على ظهري غير كاض احزااام.
يحجون ويضحكون طبوا للغرفة وبس طــروادة سد باب الدوانيه طلعوا شاردين ، ردت رنـــه نامت وانه الفضول صابني عليمن متزاعل وي جــويريه حطيت اذني يم الباب اسمعهم كهلان يگله
-شني متعارك وي مرتك؟
صــيهد:: لا
-جا اول تالي تريد تبات يمي.
صــيهد:: هيج بكيفي عاجبني لو بس سلطان وسليم يباتون يمك عادي تكيف.
ضحك كهلان وهذاك يحجي بنتر گاله
كهلان:: هسه شويه ويجي ســليم.
-خل ينام غاد يم اخوه، وانتَ تنام يمي
-شني انامن يمك.. شسمه انا اريدن اكعد وي ابني اشوفنه.
-جيبه يمي خل اشوفنه
مشيت بساع للغرفة شلت علاوي من الكاروك حطيتله عطر خفيف ومسحت حلكه من الرهاويل، طب وراي كهلان درتله گال
كهلان:: جيبيه عمه يريد يشوفه.
-مو تنام غاد.
اخذ علاوي من ايدي يضحك
-زحمه والله يزعل.
-صوج جــويريه متيهته علينه.
كرص خدي مبتسم اخذ علاوي وراح ضل بالي يم ســليم ما ادري اليوم هم يجي هنا لو يرد الاهلي والحد هسه مادريت كهلان وسلطان عليمن ناوين وشراح يصير.
خابرت ســليم گال
-لا خويه راح اردن للبيت يم هاجر اخافن عليها.
سكتت حازه بخاطري نخاف على اختنا من اهلنا يا علي صعبه والله صعبه وتهضم. سديت التلفون منه افكر لمن
غفيت ووين يله حسيت بيه طب للغرفة علوش بأيده نايم عافه بالكاروك ودار وجهه الي
كهلان:: غفينا يمه فزيت مالكيته الخايس.
-صــيهد؟
هز راسه اي واجه تمدد بصفي يحجي عليه
-فزيت على بچي علاوي عاينت مالگيت صــيهد والله ردت اروحن اسحله سحل لاوي وجهه صارله ساعة والا تنام يمي تالي يعوفني ويروح الخايس.
-ههههه خاف جويريه راسلته.
-لا هوه خايس.
جريت تلفوني اشوفن جــويريه لگيتها اخر ظهور كبل عشر دقايق وديتلها رساله
-ها تصالحتوا.
-لا اجه نكمل العركه.
-الله يهديكم.
-ادعيلي انتصر.
-ان شاءالله هههههه.
سديت التلفون ودرت الكهلان مغمض عيونه يريد يرد ينام حطيت ايدي على صدره اكعده
-كهلان.
-هممم.
-سولفلي شصار شراح تسوون؟
-الج الصافي
-ما اريدن صافي يابه سولفوا.
دار وجهه عليَّ جرني من ايدي يضم وجهي بصدره حتى اسكت حركت خشمي على رگبته بالوسط رجف جسمه كله يعصر بزندي رفع وجهي يريد يبوسني
-سولفلي.
احاجيه وهوه يتلمس بطرف شفتي
-كهلان سولفلي.
-الحد هسه ما مسوين شي بس خليناه يعرف الخنجر شاله سلطان ومن نشده عليه گاله ما ادري وين حطيته هسه حاير بزمانه يدور على الخنجر.
-والخنجر وين؟
سكت متحسر ومقهور
-ذبيناه بعد ما يفيد عليه بصماتج واخافن لا كلشي يصير ما اريدن اجازف حتى بإسمج مو النوب ادخلج تحقيق.
-غير مسحتهن.
-سألت ولد بالجنائيات حتى لو مسحته ما ضامن اختفاء البصمات ، وبعدين هوه ما عليه غير بصماتج يعني ماكو اي بصمه الشاكر على الخنجر لو اله جان ما ذبه بحوشنا معناها الخنجر يضرنا ما يفيدنا هسه بس نلكه دليل سلطان وياي لا تخافين.
سكتت صافنه شال وجهي يعاين بعيوني ويتلمس بخدي يحجي بهدوء عبالك يشاورني
-لا تقهرين روحج.. ادري لو شما صار يضل ابوج وما ترضين ينضر لهذا السبب انا ما احجيلج.. بس ريـــمه دام كتل ابوه هذا عنده استعداد يكتل ضناه وما يهتم.
-مو ابوي انا اهلي ماتوا ويتيمه حالي حالكم.
حجيت والغصه خانگتني ضمني بحضنه يبوس براسي
-انا اهلج يا بعد روحـــي ما تتيتمين وانا اشمن الهوه.
سكتت ووين يله گال
- تدرين نوبات اشكن بالبت التجي للگيعان هاجر وارد واكول لا هاجر كصيره وهاي الاشوفنها بالگاع مو بكصر هاجر وجنها جني ماكو بلمح البصر تختفي
- لا مو هاجر انه هم شكيت بيها بس الخط مو نفسه كلش يختلف.
سكت يفكر بالكوه رديت غفيت وكعدت كبلهم من الصبح سويت الچاي وطلعت اخبز لمن كعدت رنـــه وكعدت اخوانها مشوا للمدرسه وكهلان واكف بالباب متاني صــيهد وجويريه ، وشموسه مشت يمه بالباب گالتله
-خالو
شالها من الگاع باسها يرددلها بنفس الكلام وهيه شابگته تضحك ما تدري بحسرة گلبه ولوعته من يگلها
-هلا بعزيزة خالها وهلا بجيتها
هلا بالترد روحـــي ضحكتها
هلا ببت الغالية الفگدتها
هلا يا خالي ومية هلا بجيتج اليه.
وحط وجهه برگتها يجر نفس بشوغة ويگلها
-افيشش يا ريحتج يا معزتج يا خالي.
وهيه تشبگ عليه وتبوسه بوجهه لو تقلد رنـــه وتجر ايده تبوسها اجوه جــويريه وصيهد بسيارتهم ضحك گالهم
-بعد ما اروحن وياكم راح اضل اروح وي مــيثم ومرته ملتزمين وناس نشيطين يمشون من وكت ويحضرون اول محاضره أنتم تسختون.
عدلت حجابي ومديت راسي من باب الحوش حتى اقنع شمس تجي يمي وما تبجي وراه، نزللها صــيهد شالها يبوسها محد من ولدنا يعاينلها اذا ما صفن بوجها واتحسر، طلع محفظته گدامها يريد ينطيها خمسه بس هيه چلبت بالالف انطاهن الها اثنينهن، واجتني شلتها ووكفنه نعاين عليهم ونسلم على جــويريه سوه
لمن راحوا طبينا وسديت الباب اقفله واقفل الثاني اخافن لا تجي امي ما اريدنها ولا اريدن اشوفها.
التهيت بالبيت ووي شمس وعلاوي لمن كضيت وطفيت الغده كعدت بالهول حطيت علاوي گدامي فاتحه گماطة يتمغط وشموسه تاكل حلويات يمي وتعاين للتلفزون النوب جابت الدب مالتها وگمطته مسميته "لاوي" عود علاوي وشسوي العلوش هيه تسوي للدب .
تلفوني بصفي فزيت على صوت دگته وبس لمحتها ندى ابتسمت
-الو.. هلا ام رضا
-هلا ام علاوي شلونج.
-هههه الحمدلله يگلبي انتم شلونكم عمتي شلونها .
-جنا نحجي بيج وخابرتج.
-خير شر؟
-شر.. عمه تگول ريـــمه خربانه لا تجي لا تسأل لا تجيب علوش انشوفه.
واسمع عمه من يمها تگلها
-اي والله جانت خوش ريـــمه خربت.
-عمه والله ولا ملحكه اعذريني.. اليوم العصر اجيبه واجيج.
انطتها التلفون ندى
-ها عمه شلونج
-هلا يمه شلونج علي شلونه شموسه؟
-يا بعد روحـــي يبوسون ايدج انتِ شلونج صحتج؟
-ولج يلگاطعه جا احنا ابعاد عليج؟ لا اجيتن يمنا بالحجه لا اجيتن يمنا بطبخ لا شي شني السالفة؟
-والله حگج وعلي بس عمه ماجاي الحك الصبح همه بالدوام والعصر شو يكضي ركض كلشي ما الحك .
-حگج ما تفاركين كهلان.
ضحكت وتحمست بست شمس وعمه صاحت
-يمصخمه بستيمن هذا كهلان يمج؟
-ههههه لا عمه شموسه هاي شفايتلي لو يمي كهلان هسه.
-انهجم بيتجن انتِ وهذيج بت عمتج يمهم كالبات وجوهحن ولو طلعوا تمنيتنهم.
-هههههههه.
سولفت وياها متوسنه عليها حلفتلها العصر اروحلها سديت التلفون منها ورد دك رقم عاينتله مستغربه يرمش مرتين تلاثة وانه مغلسه كمت للحوش شغلت النت ووصلتني رساله على الوتساب مكتوب بيها
-ريـــمه.
بساع صخنت وخفت والرقم بلا صورة ما ادري ارد لو اغلس رد كتب
-من اول ما شفتك وقعت بحبك انا شب مشورب شو رأيك تتركي زوجك وترتبطي فيي.
ياا يااا هاي ماريا الحيوانيه خابرتها وجاوبتني تضحك
-ووولج هبطتيني
-ههههه ماشاءالله كيف عرفتيني.
-من الشب المشورب وحجيج جا شلون؟ شو كايمه ما تجين يمي ولج حتى انتِ تغيرتي.
سكتت متحسره قلقتني
-ماريا.
-نعم.
-شبيج گـــلبي ؟ ضايجة وحدج؟
-لا بس هيك بيكون منيح ما اجي لعندكن كرمال ما تصير شي اخناقه
-لا اخناقة ولا مخناقة تعاي يمي من تضوجين ماعندي شي.
-غير مره، يله باي
-هلا بيج گـــلبي .
سديت التلفون منها ولا ارتاحيت حسيت بيها شي كلت بعدين انشد مــاسه عليها.
تانيت لمن ردوا من مدارسهم رنـــه مطنگره مشتاقه البريا وماترضى تشيل الحضر عنه والولد كل ساعه يخابر مــاسه ساعه يخابر عبود بس يريد واحد يقنعها تحاجيه.
غلست منها لمن اجه كهلان وتغدوا، خابره صــيهد گاله انا رايح البغداد السيد عباس علمود جعفر مصوب ومسوي عملية ما گدر يروح وياهم مشوا هوه ووهب ووراهم بسيارتهم طلعوا ســليم وسلطان وحدهم.
وكهلان يضحك عليهم وصيهد يخابره يگله ادعمهم حتى نتصالح سودنه، للعصر من راح للگاع حاجيت رنـــه مارضت تجي وياي اخذت علاوي وشموسه ومشيت البيت عمي وليد
تلاكت وياي جــويريه توها طالعه من المشتمل تمشي وايدها على بطنها ضحكت متانيتها لمن وصلت يمي باوستها وطبينا للبيت سوه ووي طبتنا سمعنا عمه تصيح
-صلوات على محمد.
ورغد تضحك وبس لمّحت ايدها على بطنها ضحكت احجي
-حامل؟؟؟؟
عيونها متروسه دموع ووگفت تريد تبجي تهز راسها اي
شبگتها اضــحك فرحانه وعمتي ايمان كاضه ايد ندى الگاعده بصفها ورضا بحضنها عاينتلها خافن ضايجة شفتها تضحك وتحجي وي رضا وتگله راح يصير عندك ابن عمه تشبعه كتل.
وكفت تسلم علينه هيه وبدور كعدنا يمهن فرحانه من كل گـــلبي الرغد وسلطان درت عليها احاجيها
-شوف سلطان ولا گالي.
رغد:: ولج ما يدري ما گايلتله باجر من يجي اسولفله.
جــويريه:: ما يصير تگليله گدامنه اريد اشوفه شيسوي.
ضحكنا وندى تگلها
-عود تصورلنا.
كمت من طلعت جده من غرفتها سلمت عليها وهيه كالبه وجها وتحجي "مابيجن خير"ومالحكنا نكعد من طب عمي وليد اخذها ومشه للديوان رديت كعدت يمهن وكلنا مركزين وياهم صوتهم عالي. اقل الربع ساعة واجه ابوي متسودن يصيح ويغلط
اجوه عمي وليد وجده كمنا كلنا للمطبخ واكفين ونسمعلهم ضلت بس عمه كاعده مابيها حيل تگوم ابوي يغلط ويصيح على جده
-تحطين حصة المرعى بأسمه ياهو گااالج؟
وعمي وليد متسودن ويصيح
-حگي هذاا حگي كله بأسمك.
وجده تغلط عليهم اثنينهم وتصيح بحرگه
-عمت عيونكم الفلوووس كمتوا واحد ياكل الثاني علمود درهم.. وليد باجر ترد حصة المرعى بأسمي.
هوسه وصياح طاحت جده تدعي عليهم اثنينهم ابوي غلط عليها ونكث عباته مشه للبيت وهيه تسودنت جلبت بعمي وليد تريد تطگه شهگنا كلنه مصدومين من دفعها بنتر ويصيح بوجها
-اطلعييي بررره شخليتولي انتم؟ كضيت عمــري مداريكم تالي كله صفه الشاكرر وهسه متندمه على حصة المرعى هيه لو بيها خيررر وتسوى ما حطيتيها بأسمي.
وجده تسودنت تصيح بحرگه وشگت دشداشتها تلطم على صدرها
-تطررردني ؟ تطردني من بيتي ووولك وليد انه امك تطردني.
وعمتي ايمان تصيح عليه ماراضيه
ايمان:: تسودنت وليد؟ ياااا.
وليد:: تطلعين لو احرك البيت عليييج؟
جرت شحاطتها شمرتها عليه طكته بوجهه تتراجف وگامت تغلط ميته من القهر طبت الغرفتها تلم اهدومها وعمه ايمان تتعارك وي وليد وتصيح على جده
-عمه صلي عليه محمد، عمه ماالج غرض بيه.
وهوه مدري شجاه تسودن هد على عمه يريد يطگها ركضن رغد وبدور وكفن بوجهه يحمن أمهن، شمس ضلت تبجي خايفه مديت ايدي اكضها وشايله علاوي حاجيت جــويريه
-خيه انه رايحه البيتي.
هزت راسها خوش تطكطك بأصابعها اخذتهم ومشيت واسمع صوتهم وصياحهم وراي وبيتنا هم هوسه وابوي يصيح اجت رنـــه تركض سولفتلها عفت علاوي بالغرفة ورجعت يمها بالحوش اعاين وياها من الباب اجت جده وجها احمر من الحرگه وحاطه على راسها جنطة سوده مال هدومها وصوت بتوتها يخرشن بأيدها كضت عمرها ضامتهن هسه بالعركه لبستهن تمشي وتدعي على وليد اعاين وراها راحت البيت اهلي وگبل ما تدك الباب طلع ابوي وبدل ما يمدلها الدرب ورد نتر بوجها يغلط ويطرد بيها تسودنت مصدومة گـــلبي يوجعني ذكرت من سووا نفس السالفة مثلوا علينه هسه صارت صدك وعمي وابوي طردوها.
واكفه بباب بيت اهلي تتعارك ويَ ابوي واجه كهلان عاينلها صاحت عليه وتلطم على صدرها
-خااايب طــروادة اهلاه خاايب اخذوا حلالي وطردوني.
عاينلها وهز راسه خوش وخرنا من الباب طب للحوش وسد الباب بدون ما يحاجيها عاين علينه غسل وطب جوه حتى ما يسمعها.
ردينا للباب نركض وحسين طلع كعد گدام الحوش يعاين عليها تكابلوا امي وابوي واثنينهم يطردون بيها تفلت عليهم تدعي من كل گلبها
واشيه:: عسى ما تلفاكم عااافيه.
وابوي رگع الباب بوجها حييل ورنه بساع بچت تشهك وتحجي
رنـــه:: خطيه سوده بوجهي .
وانه اعاين ساكته ذبت جنطتها وكعدت بالگاع طلعت تلفونها من جيب دشداشتها وصاحت على حسين
-تعال خاايب تعال ليه اطلعلي اسم فيصل خابره يجيني.
راحلها حسين يركض خابرلها على إبن اخوها كالتله
-تعااال اخذني بساعك.
سدت التلفون وحسين اجه من يمها مقهور ماكو ربع ساعة واجاها آخذها ورنه غسلت وجها وكلساع تذكر شلون جده احترگ گلبها تبجي عليها حطيت ايدي على ايدها احاجيها
-مو تضوجين من كهلان لان ما جابها هنا لا تنسين شلون اتفقت وياهم هذيج المره.
هزت راسها لا وتمسح بعيونها
رنـــه:: اصلاً حتى لو راد هوه يجيبها هناه انه ما ارضى جا شلون انسى من غشتنا؟ بس انقهر اكولن خاف من نكبر هم يصير بينه مثلها؟
- كلمن يحصد زرعه ويتجازه بنفس الأفعال، تعاي.
اخذتها وطبينه للبيت عفتها يمهم بالهول ومشيت للغرفة لگيته فاتح الشباچ وكاعد يدخن منطيني ظهره مشيت ساكته كعدت وراه على حافة الچرباية تانيته يحجي ومن ضل ساكت گتله
-اجه فيصل ابن اخوها اخذها.
هز راسه خوش جر نفاضة الجكاير اعاين الايده وهيه تضغط على گطف الجگاره بقوة جعصها بالنفاضة وردها المچانها مسح وجهه بأثنين اديه ورد يعاين من الشباچ، گمت من مچاني كعدت يمه وحطيت ايدي على ظهره اعاين بوجهه يرمش بثگل رموشه رمش يشبگ رمش
ويمسح أيد بأيد مقهور ويصبّر بروحه دار وجهه علي عاين بعيوني مختنگ وگوه يحاجيني
طــروادة:: والله لو حنينه البيت يرخصلها بس اخافن عليكم منها، وخايف لا ابوي ما راضي عليَّ چيه عفت امه.
دنگ متحسر يمسح بوجهه حيره تاخذه وحيره تجيبه رد گال بغصه
-ما گدرت اضلن اعاينلها لو ضال دقيقة اجيبنها يمنه.
-سويت العليك وجبتها مره شصار؟ طلع كله اتفاق.
-وتدرين ليش اجت هذيج المره حتى تخليني اوقع على فد ورقة ويزورون ياخذون الگيعان گبل لا ندري بيهن گيعانه بأسم ابوي .
هزيت راسي اي
-لا تنقهر مالك غرض انتَ سويت العليك هيه الغلطت.
احجي وهوه ولا يمه حيل مقهور والحد الليل گلبه ما انطاه خابر صــيهد سولفله وهذاك من يمه يتهدد وگاله بس اردن اروح اجيبها، يله اطمن وسكت
تونا نريد ننام وخابره بريا چلبت بأيده افتحلي السماعة خل اسمع شتحجون
-شني؟
-خل اسمع مو خاف يحجي على رنـــه حتى افتنلها.
هز ايده ورد عليه بدون ما يفتح السماعة يسلم عليه وانه اكرص بأيده لو اشلع من شعرها وهوه كلساه وفاز وصاح
-اااخ.
ويشيل ايده يريد يطگني اضــحك بوجهه ينزلها وارجع اشلع بيها لمن مل وفتح السماعة مسحت على ايده وبستها هز ايده يضحك واسمع بريا يگله
بريا:: ومشچاخ كضيتها علي اخ ما اخ شني؟
-جاي يطلعون شوك من رجليَّ قابل مرتاح مثلك انا؟ البسطال ما يطيح من رجلك.
-خاب مطككات متروسات فرگاسات.
-يطيبن يطيبن شني ليمت تنزل.
-والله بعدنا اكلك كهلان حبيبي
-هاه؟
-مرتي وين؟
- غرض عود من تحطها ببيتك گول مرتي.
-خاب رحمه الابوك هذاك الطيب وانتَ تشبهه ما توديلها التلفون على ساعة ووگف گـــلبي موتتني من التحقت الهسه حاضرتني.
-تريد تدرس .
طكيته خازرته واشاور بيه
-گله هسه اوديلها التلفون خطيه مشتاگلها.
حك حاجبه ما عاجبه وبريا يريد يبجي وكضاها يا بعد روحـــي يا بعد گـــلبي وانتَ الطيب مثل ابوك وانتَ السبع والحنين الماكو منك وانه مناه اجرجر بكهلان واقنع بيه اخذ التلفون ومشه الرنه گمت وراه اضــحك وكف بباب غرفتها ودار علي يسكتني وگفت بصفه اسمع صوتها مستغربه اول مره اسمعها تقرأ هيج صوتها حلو وخانگته العبره، كهلان سد الخط من بريا وضل واكف يسمعلها، وهي تقرأ بخنگه
- فرگتك ذلتي وشوفك يفرحني
كلام الشامت بفرگاك يجرحني
يريت الموت اخذ روحـــي ويريحني
اذا انساك الله لا يسامحني
اخاف اشتكيلك وأعذب دليلك.
شهگت مختنگه وردت تقرأ وذاك هو صوتها خانگته الدموع
-يريت الموت أخذ روحـــي ويريحني.
فتح الباب كهلان بساع ألتفتت علينا حاطه صورها هيه وعفراء سوه ودموعها يجرن وبس لمحتنا حطت الصور على گلبها تبجي بصوت مردت روحـــي مرد
شبگها كهلان على گلبه بچت بلوعه وتحط الصور على گلبها حيل
-اااخ يا يييمه.
باسها براسها رايحه روحه ويضمها الگلبه بكل حيله
كهلان:: رنـــه يا بعد روحـــي بويه .
رنـــه:: اريدنهااا... اريدنها طك گـــلبي ... طك گـــلبي عليها ما نسيتها والله ما نسيتها لحظة ما نسيتها اريدن امووت.
اختنگ بس شابگها ما يگدر يحاجيها عاينت للصور البالگاع امسح بدموعي بس اريدن اركز بيهن شينساها هي تنزاح من البال؟
ضل شابگها الحد ما سكتت وخرها من صدره وانه لميت الصور كض وجها بين اديه مسح دموعها وباسها براسها گوه يحاجيها
كهلان::انا اقوه من اشوفنج قوية وتضحكين بس لو بچيتي والله ينهد حيلي يا بعد روحـــي
رنـــه:: هزيت راسي اي بست ايده اخافن عليه اخافن لو شافني بهيج حال ينكسر اخوي السبع، عاينتله وعاينت الريمه تريد تكض دموعها يمي بس ما تگدر گتلهم
-هسه راح انامن روحوا .
كهلان:: كون تردين تبچين؟
هزيت راسي لا جريت الغطا على شموسه غطيتها عدل ودرت الكهلان احاجيه صوتي مبحوح
-لا والله هاي هيه چانت جمرة بگلبي ومن بچيت بردت.
عاينلي بقهر صافن بعيوني
-ريتها بگلبي ويسلم گلبج.
-اسم الله عليك لا تگول هيج
بست اديه اثنينهن وتدنيت الحضنه غير گـــلبي ينطحن لو صار بيه شي، گوه قنعته هوه وريمه يله عافاوني ومشوا ريـــمه ضمت الصور بالكنتور گبل لا تطلع، گمت تمددت بفراشي بين زهره وشمس حسيت بزهره كاعده من مناشغها، وسكتت ماردت احاجيها وهيه تضم روحها من تريد تبجي، عدت بالساعة وانه كاعده وصافنه بالسگف
ردت ريـــمه فتحت الباب على كيف وشغلت الضوه
-هاه؟
ريـــمه:: ها بعدج كاعده؟
-اي مو مساع نمت شويه بعد ما گدرت انامن.
هزت راسها خوش تعاين بوجهي
-رنـــه بريا خطيه كلساع يخابر على كهلان يريد يحاجيج الغي الحضر وحاجيه عفيه وألله خطيه.
درت ادور على تلفوني شلت الحضر منه
-هسه احاجيه
-عفيه السباعيه
طلعت وسدت الباب وراها خابرته رفضني ورد خابر
-الو.
-هيج هيه رنـــه؟
سكتت اسمعله وهو يحجي بقهر
-والله طلع صدگ گلبج قوي هاي چم يوم صار ما محاچيتني ولا اهتميتي ولا هزيت شعره من راسج وانا اكضي الليل الوب على صوتج.
-ياهو الغلط.
-انااا يابه انااا بس مو هيج بعيد عنج وتحضريني يعني شلون ارضيج من انتِ حاضرتني؟
ينتر بحرگه سكتت وهو يحجي ويعاتب
-عادي اضل اسبوع شهر ما محاچيچ عادي موو؟
-جا عادي تلتحق بدون ما تگلي ولا تسلم عليَّ؟
سكت من عندي واسمعه يسب روحه بصوت ناصي شويه ورد حاجاني بهدوء
بريا:: اموتن من اودعج ...اضعف اتمنى اعوفن دوامي وارد يمج.
-قهرتني.
-حگج وانا اعتذر
سكتت زفرت نفس بحسره
-رناتي.
-همم.
-لا يضل بخاطرج والله ما تنعاد .
-خوش..ليمت تجي.
-ابطي بعدني.
-ماكو شي غير.
-لا والله ماكو شي بس هاي بعد يحتاجونا مو وكت إجازات هسه.
-ديربالك على روحك فـــدوه گـــلبي حاسني انتَ بمچان خطر وجاي تچذب عليَّ.
ضحك وسكت مده يله رد گال
-لا لا ما يمنا شي لا تفكرين بيه، يله حبيبي نامي باجر اذا گدرت اخابرنج.
-خوش.. بربر.
-هاه يروحه.
-احبنك .
-يابعد گـــلبي اموتن عليج.
-تصبح على خير
-وانتِ من اهله.
سديت التلفون منه ارتاح گـــلبي من تصالحنه يوميه اكضي الليل افكر بيه.
ضل كل يوم اذا ما يگدر يخابر يوديلي رساله يطمن ويطمني عليه.
""
رغد:: شيخلصها طلايب ابوي وعمي، جده سجلت حصتها بأسم ابوي حتى تخليه يطلك سعاد تالي گلب عليها وطردها حتى هيه، وبس اجوا الولد من بغداد راحوا عليها يردونها، اخوتها ما رضوا ولا هيه رضت ترد وياهم اجه صــيهد شايط اتعارك وي أبوي وابوي ما يتحاجه عبالك قصر بأسمه ياهو اليكضه وگاله
-اذا ما عاجبك اطلع بررره.
هز ايده صــيهد ميت من القهر
صــيهد:: والله ما ادري شگلك... ما تخافون الله انتم شضال بعمركم باجر وراكم حساب وكتاب.
شال ايده يريد يطك صــيهد ما خلاه دفعها وابوي يحجي بحرگه عافه وطلع ميت من آلقهر ضلينه كاعدين يم امي بغرفتها وجويريه مكابلتنا الجذابه تگول عصبي اخافن منه لمن امي گالتلها
-انهجم بيتج ذاك اليوم اجاني يگلي يمه صلفه گامت ما تخاف .
ضحكت تگلها
-لا والله خاله اخاف بس شسوي امثل ما اخاف وهم مطمنه لان حامل ما يگدر يسوي شي.
غمتها امي تضحك وندى تگلها
-يگدر يگدر مثلاً يعضج العضه ما اتأثر بالطفل مثل الضرب.
ورضا نط من يمه گال
-بيبي بابا عض ماما منااه وماما طكته هناه.
اشر على زنده ورد اشر على خده وامي فتحتله ايدها راحلها كعدته بحضنها تنشده وندى غطت روحها بالشال وتصيح
-يبوووي يا فضيحتك يا وهـــب
ايمان:: امك تطك ابوك؟
-اي
-صخام الصخمني، ابوك يبجي؟
-اي وانا اسكته .. اكله .. اكله يله يله ميخالف، حتى انا طكتني
-يماااي يمه تكتلكم حيل جده؟
وهوه يعاين الامه يضحك وهيه تعض بأصبعها هز راسه آي وندى تأشرله اكضك كالتله
ندى:: انتَ فد واحد أفتيني
رضا:: بعد اذا تطكين بابا..
-اي شتسوي؟
مد اديه يشرح بذمه وضمير
رضا:: اجيب تفكه مال عمو وارميج.
كامتله ندى تريد تعضه وامي ضامته منها ضحكنا وهيه تحلف ما طاكه وهـــب وابنها يجذب النوب شويه وكالت -عمه نتشاقه والله ما طاكته صدك
ايمان ::لا لا ابني ضعفان من الدگاگ عمت عيني عليه.
رغد:: ضحكت اكض بيها ما اريدنها تطك رضا لو تعضه، ضليت يمهم للغروب يله رحت للمشتمل عبالي بييت اهله ما ادري بيه جاي طبيت للغرفة لگيته مطفي الاضويه ونايم كعدت يمه اعاين بوجهه مبتسمه .
مديت ايدي أتلمس خده فتح عيونه صايرات حمر ابتسمت عيني بعينه
-صح النوم.
شال اديه يريد يشبگني ماخليته
-گوم وكت صلاة.
كعد على حيله جرني من ايدي الحضنه
سلطان:: شكد صار متاني تجين المن عايفه تلفونج هناه؟
-مو عبالي انتَ يم اهلك.
-لا رديت من زمان.
وخرت من حضنه وجريته من ايده طلع غسل وتوضى صليت وطبيت للمطبخ اسوي العشا وافكر بيا طريقة اگله انه حامل وراح يفرح لو ينقهر ويتذكر غيوثي، عاينت للعشا ومدري ليش اجوا ببالي ســليم وسجاد وهاجر طلعت من المطبخ للهول كاعد يعاين بالتلفزون
-سلطان.
-ها گـــلبي.
-شتگول تخابر ســليم وسجاد يجيبون هاجر ويجون يتعشون هناه؟
-شني العشه؟
-حميسة لحم وبتيه وهسه راح اگلي طماطه وزلاطه ولبن وخضره خير من الله.
كعدت يمه خابر ســليم گاله وهذاك ما مصدگه يگله
ســليم:: خاف تريد تاخذ قميصي الجديد
-شني شكله؟
-مربع وعنده اذانات من تكضهن يطوط يعني هوه قميص شني شكله؟
-ولك اقصد لونه.
-اسود جا شني وردي.
-ما اريدنه ببداية محرم جبت اثنين الله لا يعوزني جيب هاجر وتعال.
-ههههه يله هسه اجي.
سد التلفون منه يضحك وخابر على سجاد
-تعال اتعشه هناه.
سجاد::واعوفن عشه من ايد ريـــمه؟ وافارگ وجهه عبود حتى اجي اكابل وجوهكم انتَ وسليم ؟
-يا طايح الحظ جا اذا توصل اكسر رجلك.
سده بوجهه يضحك كمت للمطبخ اكمل العشه شويه واجوا هاجر وسليم اجتني للمطبخ تركض سلمت عليها مبتسمه صايره حيل حلوه دارت وجها عاينت للهول شافتهم ملتهين ردت عاينتلي وغمزت حطّت ايدها على بطني تضحك.
-شدراج؟
جرت ايدي وبأطراف اصابعها كتبت بباطنها"ريـــمه"
ضحكت هزيت راسي اي وهيه مكيفه
-بس سلطان بعده ما يدري حايره شلون اگله.
كعدت يمي على الكاونتر سديت الباب اشتغل واسولف وياها وهيه تأشرلي واذا ماعرفت قصدها تكتب على ايدي بأطراف أصابعها، حطيت الزلاطه يمها تثرمها الي وفززتني من طكت ايدها على الكاونتر عاينتلها أشرتلي تضحك وحاطه أصبعها على راسها وأشرت على بطني
-لكيتي طريقة اگول بيها السلطان؟
هزت راسها اي وجرت ايدي كتبت
-احتاج دفتر وقلم.
-اجيبلج من بدور؟
أشرت على روحها ونزلت من الكاونتر اخذت سلطان ومشت البيت اهلي بساع خابرت امي وحاجيت بــدور گتلها انطيها كراسة الرسم وقلم، جابتهن واجت كعدت يمي بالمطبخ وسلطان ضل يفتر يريد يعرف شتسوي وكل ما يدخل للمطبخ تأشرله اطلع وبس شلع گلبها شالت ايدها بعصبيه وتهز اصبعها تهدد ضحك وطلع عاينت وياها
اول رسمه مجرد تخطط وتضلل بدون ملامح شجرة التين والساگيه ويمها اثنين كاعدين كضت تضليلهن وفهمتها انه وسلطان كتبت عليهن نمرشة سلطان.
بدت الرسمه الثانية بنفس الطريقة بدون ملامح فقط تخطيط وتضليل عن يوم زواجنا، كملتها وصبيت العشا گتلها
-تعاي بعدين نكمل.
كعدنا نتعشه وسلطان مچلب السليم
-خل نخطبلك
ســليم:: زوج قشمر وامشي بدربكم؟
-نشوفك.
كضوها يتناگرون وبس كضينا العشه انطيتهم الچاي ورديت للغرفة يم. هاجر سوتهن اربع رسمات، وحده من بدينا نلتقي جوه شجرة التين والثانية يوم زواجنا والثالثة متمسكين بأدين بعض وحاطين روسنا على اجتاف بعضنا واحد ساند الثاني والاخيرة حامل بطنّ چبيرة وسلطان گدامي.
عاينتلهن مبتسمه وفرحانه كتبتيلي
-لو بغرفتي ارسملج رسم واضح
-لا لا هذن كلش حلوات فد فرحت بيهن وعلي.
شبكت اصابعها ببعض وحطتهن جوه خدها، جريتها بستها، طلعنه يم الولد بالهول للعشرة واندك باب الحوش كام سليم فتح الباب وطبوا صــيهد ووهب ووياهم كهلان طلع سلطان هم وانه ادعي اي يارب يتصالحون طب صــيهد لا سلم عليهم ولا شي وكفنا بالمطبح نعاينلهم وهـــب سلم عليهم وهوه حطله مخده وكعد بالهول جر الريمون يعاين للتلفزون طبوا وراه، سلطان واكف وگاله
-مو جاي اعاين للأخبار ليش درته.
عاينله صــيهد گاله
-نوبه الك ونوبه الي.
وضحكوا اثنينهم متذكرين طفولتهم وكف سلم عليهم گالهم
صــيهد:: والله ما قصدي استغفلكم بس ابوكم داس بگلبي
كهلان:: هاي هيه يابه صارت وراحت سدّوا الموضوع.
ارتاحيت من تصالحوا وكعدوا سوه يسولفون سويتلهم چاي وضلينه كاعدين انه وهاجر بالمطبخ احجي وياها وهيه ترد علي كتابه، ووين يله مشوا وسليم هم اخذ هاجر وراح.
طبگت الرسمات ضميتهن ومشيت بساع سبحت وطلعت لگيته بالغرفه متمدد فتحلي ايده هزيت راسي هسه
-بس خل امشط شعري
نزل ايده يعاينلي وين ما اروحن گـــلبي يدك حييل ومدري شبيه مرتبكه مشطت ومشيت للكنتور كاتبه على كل ورقة رقم، اخذتهن وكعدت كدامه
كعد على حيله يعاينلي مستغرب
سلطان:: شعندج؟ صارلج ساعة تلوبين هههه سولفي.
ضحكت متوتره آمسح بوجهي مديتله اول ورقة فتحها وبس لمحها صاح
-الله وين رديتني احلى أيام بعمري.
ومركز بالرسمه مبتسم يسأل
-هاي هاجر رسمتهن؟
-اي.
حط ايده على كصته يضحك ويعاين بالرسمه شال راسه عاين بوجهي
سلطان:: جنت من اجي واشوفنج ارد لفراشي ما انامن احسن روحـــي طير يفتر بسما وحده اكضي الليل اعيدن بسوالفج واضحك كل ما اذكر ضحكتج يكزبر جلدي لو ذكرت لمسة ايدج.
-يمه يا بعد روحـــي لا تبچيني سلطان خلني اكمل.
ضحك ومد ايده يكرص خدي طبك الرسمه عافها يمي
-يله كملي.
مديتله الرسمه الثانية مال العرس متردده فتحها عاينلها مبتسم ومتحسر وبساع مديتله الثالثة فتحها وضحك
-صدك انا وصلت الموت شلون ضليتي ساندتني وما عفتيني؟
-اكو واحد يعوف روحه.
-اويلي على گـــلبي
غمض عينه وميل راسه يضحك وانه گـــلبي يخفگ. ومن الحماس ايديي يرجفن عاين الاخر ورقة بأيدي گال
-وهاي؟
ضليت كاضتها واضحك جراها من ايدي يعاينلي بشك مبتسم فتحها وبس لمح المرسوم ضحك بفرح وجرني من ايدي الحضنه
-والله شكيت وعلي شكيت
شبگته الدموع تارسه عيني وهو يضم وجهه برگبتي يبوسني حييل فرحان، ومن فرحته بساع خابر ســليم وسجاد يگلهم راح تصيرون اعمام سجاد هلهل ورزله
-يا خايس محرم
سد التلفون منهم فرحته تسوه عمــري بس مثل كل مره لازم ابوه يحط روحه بالنص خابره گاله امشي للگيعان عاينلي بقهر اخذ غراضه وراح.
نمت وهوه للفجر يله اجه بعد الصبح ما كعدته مشيت الاهلي اجيبن خبز منهم لگيت بــدور مبدله وتبجي السايق ما جاي وهيه مدرستها صارت بعيده لازم تمشي على وكت كعد وهـــب يوديها گالها
-جا عليمن تبجين؟
بــدور:: مسحت عيوني ساكته غير متأخره جا عليمن ابجي، طلعت وره وهـــب صعدت بالسيارة يغلط على السايق گتله
-بعد ما اريدنه دورولي غير سايق.
-والله ما ادور هذاك صــيهد هوه النقلج هوه يدورلج.
درت وجهي منه اعاين من الجامه اريدن ابجي لمن وصلني للمدرسة فتحت الباب اريد انزل گال
-باجر اشوفلج سايق.
-بالحله تجيني غير؟
هز راسه اي ، سديت الباب وطبيت للمدرسة معتزله رغم البنات من اول ما داومت رحبن بيه بس چز گـــلبي من الصداقات ضليت بعيده احسن
كضيت الدوام وطلعت وي الهوسه كاتلني الجوع وأفكر بالغده شطابخات اليوم آمي وندى، نزلت من الدرج الشارع متروس سيارات والبنات هوووسه وكلمن تدور على سيارتها.
تمشيت واتلفت ادور على وهـــب ماكو مضيگه عيوني ومبهذله شايله شويه من طرف العبايه حتى لا تتلعوس بالشارع الكله طين عود غاسلينه.
وكفت يم الحايط وأدور مركزه.. فزيت فاتحه عيني على وسعها من شفت مراد علمدار واكف بعيد يم سياره لابس اسود بأسود وعلى اجتافه چفية خضره اعاين عليه بصدمة وگلبي يدك بخوف تذكرت البيت وخوفي منه وهوه دار وجهه عاين لبعيد
درت على صوّت البنيه من گالت
-ها بــدور بعدج ؟
-اي حبيبتي متانيه اخوي.
هزت راسها خوش شلت راسي اعاين عليه مالگيته تلفتت ادور ماهوه
وهـــب:: ها الثوله
درت عليه فازه
-امشي.
مشيت بصفه وكلساع التفت واقنع روحـــي هوه والله ما مشتبهه نفس الوجهه، بس شجابه من بغداد وهمه گالوا گبل چم يوم مسوي عملية، وشيسوي يم مدرستي. هزيت راسي لا. مو هوه بس هاي من گد ما عدت سالفته على البنات وسويتها سالفة والي حلب وموعت اذاناتهن ضليت ياهو الاشوفنه عبالي هوه.
صعدت وي وهـــب اضــحك على روحـــي ومتحلفه بس اوصل آسولف الندى توه وهـــب حرك السيارة طلع من شارع المدرسة وجر تلفونه گلب بالارقام عاينت وياه
مكتوب سيد جعفر خابر عليه وحط التلفون على رجله دك دك ووين يله رد عليه
-الو.
-السلام عليكن يابه
جعفر:: عليكم السلام ورحمة الله هلا وهـــب
-اكلك هذا انتَ هنا شفت سيارتكم؟
-هاه أي انا شسمه اجيت علمود ولد اخذ منه غراض الابوي.
-مع الاسف عليك سيد تجي ليجاي وما تمر بينا؟
-والله وهـــب مستعجل.
-تعال عمي تعال غداك يمنه
-وأصل والله
-سيد لا تشلع گـــلبي ترى اخابر سيد عباس تعال يمعود.
سكت منحرج راد بس يسدها وما يجي وهـــب لح عليه ووگفله على الجسر لمن شاف سيارته ورانه يله رد مشه التفتت عاينتله ورديت عاينت الوهب احجي
-احس بيت سيد عباس يقلدون مسلسل مراد علمدار مو صح؟
التفت عليَّ عاگد حاجبه
-شبيج خويه شگاعد تمسلتين؟
-هذا مو ذاك اليوم گلتوا تصوب وسوه عمليه رحتوله شكو هسه يفتر غير كون يضل شهر نايم بالفراش.
عاينلي ضحك ودار يعاين للشارع ويسوق شوي شوي تلاشت ابتسامته ودار وجهه فاتح عينه بصدمة
-بــدور!!!
بلعت ريك مرتبكه وهوه بساع حط ايده على كصته يعاين للشارع ويرد يعاينلي خوفني صاح
-هاي من گتيلي اجه ولد مصوب للبيت ما جنتي تچذبين؟؟؟؟
مسحت وجهي خايفه هزيت راسي اي صاح
-ابن سيد عباس؟؟؟
-اي شعليه انه لا تصيح عليَّ كتلك وما صدگتني.
مد ايده جرني من زندي يصيح بحرگه
-سوووالج شي؟؟؟
چلبت بأيده ارجف
-لااا والعباااس لا ضل يصيح علي انتَ شجابج البيتنا النوب درى انه اختكم طلع ضل كاعد على الدرج وانه قافله الغرفة على روحـــي وعلي وكالي لا تكليلهم، اخوانج اعزاز وخاف اخرب وياهم.
هد ايدي وطك الستيرن بحرگه ميت من القهر متفشل من بيت سيد عباس لان استخدم بيتهم بدون ما يستأذن وهمه مأمنينه يمه ومحترك گلبه شلون ضليت وي ابنهم وحدي وگتله وما صدكني، كلساع يعض اصبعه مرد گـــلبي .
لمن وصلنا للقرية الولد يمشي ورانا ووهب اعصاب وما طبب السيارة للحوش صفها بره گدام سيارة ابن سيد عباس متقصد نزل والولد هم نزل اشرلي وهـــب انزلي ويعاين للولد يشوفه يشيل عينه عليَّ لو لا، نزلت امشي للبيت بساع رجليَّه يطكطكن واتلفت عليهم شفته مدنك وابد ما عاين لمن وهـــب مشه يمه سلم عليه بثگل مو مثل من خابره.
فتحت باب الحوش صار بوجهي صــيهد فتحت عيني بخوف وهوه يريد يعبر يطلع وبس ركّز بعيوني جرني من ايدي لبطن الحوش عاگد حاجبه
صــيهد:: شني شمسويه؟
-ما مسويه.. ما مسويه شي .
-جا عليمن فاكه عيــونج؟
-فززتني.
عاينلي ما مقتنع وانه بس اريدن يهدني حتى اشرد سمع صوت وهـــب عافني وطلع ركضت الندى الطم
-ما تدرين شصاررر
-ييميه شكو.
-ووولج هذا مراد علمدار اجااانه
-يمه شيسووي يمه صدك تحجين منو وياه شنو يمثلون يمنه؟
لطمت على رجليَّ اصيح
-وووولج لا علمدار ابن سيد عباس
ووي حجايتي غمتني حييل ردتني ليوره
ندى:: طاحظج خلستيني
عفتها وصعدت شارده بدلت وضليت فوك خاف النوب صــيهد يدري بالسالفة ويجي يحاسبني وانه ما مسويه شي، صاحت علي امي ونزلت وي ندى اسوي الغده، وهـــب يجي يمنا ويروح وجهه ما يكصه السيف وحتى من رضا شلع گلبه نتر بيه.
وبس تغديت شردت فوك نمت بعد ولا نزلت الحد الغروب اجت ندى كعدتني گالت
-اكعدي يله علمدار راح.
-ههههه، شلون تغميني؟
شالت ايدها غمتني من جديد
-علمود تصحصحين
كعدت على حيلي اريد اكضها واعضها ما لحكتها شردت جوه، نزلت وراها ختلت بظهر وهـــب وهوه يعاينلي بطرف عينه جرني من إيدي للغرفة
-سولفيلي كلشي ولا تجذبين جعفر شعده يم مدرستج؟
-والله العظيم ما ادري شني انه اجذب ؟
-لا امي التجذب
-ترى وعلي انه احجي كلشي بس والله ما ادري شعليه انتَ عفتني بهذاك البيت وكتلك طب ولد للبيت ما صدكتني وزعلت تذكر؟
دنك حاط أديه فوگ راسه
-اطلعي.
عفته وطلعت مقهوره من شفته ضايج من عندي أخذله يومين يله رد يحاجيني طبيعي وما اجرلي سايق هوه ضل يوديني ويجيبني اسبوع عدل اتأكد الولد ما جاي علمودي يله اجرلي سايق.
""
ريـــمه:: گـــلبي نار اشوفن سلطان وكهلان يردون يسجنون ابوي بس ما يردون السلف يدري بالسالفة اخواني يمردون گـــلبي تنداس سمعتهم من وره ابوي.
ضلوا يتفقون بيناتهم وحتى انه مايرضون يحجولي من الصبح للعصر اطكطك بأصابعي وكلساع اعاين من السياج گبل الغروب اجوا سلطان طب البيت اهلي وكهلان اجه يمنا عاينتله بخوف مرتبكه
-ها؟
-كل خير .
مشه غسل ووراه بربع ساعة سمعت صوت سيارة الشرطة انخمش گـــلبي بخوف اجت رنـــه تركض تعاين وياي وهمه طبكوا بباب بيت اهلي وطبوا للبيت طلع كهلان وتلاكه وياه مــيثم وولد عمي وليد التموا كلهم واسمع صريخ امي گـــلبي .يددك حيل خايفه مدري شبيه
والولد ما فاهمين شي يحجون وياهم همه وعمي وليد وسليم يريد يتعارك وياهم لان ما فاهم السالفة اقل العشر دقايق وطلعوا حاطين ادين ابوي وره ظهره وبلا چفيه وعگال بس بالدشداشة ومدنگين راسه صعدوه بالسيارة ســليم ومرتضى يتعاركون وياهم ما فاهمين شي وامي تصرررخ والولد يحاجون الضابط بس گالهم علمود قتل شعلان ومشوا سلطان وكهلان جابوا الولد ماعدا مرتضى واجوا للحوش طبيت للهول ارجف كلي بچيت ساده حلكي وين وصلتنا وووين وصلتنا وشسويت بينا وبروحك.
رنـــه تتصنت عليهم سلطان وكهلان يسولفولهم تسودنوا بس ســليم فاتح عيّنه بصدمة كلها تحجي الا هوه عافهم وطلع ، ركض وراه وهـــب، يابه حيلي انهد عليهم وامي گلبت الدنيآ بالصريخ وصيهد يتعارك وي كهلان يريده ينطيهم الخنجر بس كهلان ما يرضى لمن گاله مرتي كضته واكيد بصمات شاكر مو عليه من انطيه انا بس مجازف بمرتي مو اكثر يله سكت.
ومر اليوم مثّل الحلم هوسه الناس كلساع تجينا تسأل على ابوي والولد يگلولهم ما ندري صاير غلط باوراق مال تزوير گيعان ما يردون يجيبون سيرة كتلت جدي وتصير على لسان كل السلف.
ثاني يوم من الصبح أمي ومرتضى راحوا حطوله محامي ومشت الاخوالي تفزعهم وادري فزعتهم مو خاليه كله بفلوس، اسبوع عده على سجن ابوي تسودنت امي شلون ســليم وسلطان وسجاد ما تدخلوا وشالوا اديهم حارت شتسوي تجي لباب بيتنا من تدري ســليم وسجاد يمي تدك الباب ويطلعولها
تملخ ســليم وتطكه تغلط محترگ گلبها وهو يهز راسه خوش ويگلها
-يوم الالج وهم تنسجنين.
طكته بأيدها على حلكه انشگت شفته من محبسها گـــلبي چوته بعمري ما تخيلت امد ايدي عليها هيج واوصل الهالمرحله ركضت ابجي دفعتها منه عتيتها من صدرها طكيتها ودفعتها للگاع اصرخ والطم على وجهي
-اشتررردين اشتردين ضل بشر ما كتلتوه ضل واحد ما لوعتوه شتردين منهم؟؟؟
فاتحه عينها حييل
ميلاد:: ولج تطكيني ريـــمه ؟ تطكيني؟
-بس عوفينه عوووفينه كرهناكم والله والله كرهناااكم.
جرني ســليم ما راضي سد حلگي حييل خازرني ودفعني لللحوش
-طبي جوووه.
رنـــه:: جريتها الحضني وهيه ترجف وتبجي بحرگه غسلتلها واسمع دعاوي ميلاد موتتهم من القهر مشت وهمه طلعوا ما يدرون وين يرحون گد ما قهرتهم.
اخذت ريـــمه وطبيت جوه تبجي محترك گلبها ما سكتت لمن اجه طــروادة مسح عيونها يصبرها ويوصيها ما تدخل بس هيه كل قهرها وخوفها على اخوانها وعلى هاجر.
اول ايام هوسه ناس تجي وناس تروح وراها صار هدوء ميلاد واخوانها بس يردون يطلعون شاكر ما گدروا وليد خنس، والولد يرحون ويجون علينا .
بدينا امتحانات نصف السنة وبريا بعده ما نازل كل ما يخابر اسولفله الاخبار تعلم يوميه يريد اخبار جديدة گتله
-كضت بعد عم الهدوء لا عركه لا سالفة كلشي ماكو.
-هههه راحت العركات وي شاكر.
-الحد هسه محد من السلف يدري بيه هوه الكتل جدي عبالهم علمود تزوير اوراق الگيعان.
-احسن يابه.
ضليت احجي وياه شويه وسديته كملت دراسه ومشيت امتحنا اخر امتحان ودي اكضي وما ودي گـــلبي يوجعني سنة عدت سنة مرت وانه ما شايفتها يا وجع گـــلبي عليها.
گبل دورة سنتها بيوم مازن اجه على شمس وهيه بس شافته بچت لان صارله مده ما جايها شالها يبوس بيها ويحجي وي الولد جان ماخذ ابوه ومسافر لان مريض تبهذلوا حيل من بعد منذر.
اخذها وراح ل١٢ من الليل يله ردها.
جن الليله فاتحتها مو دورت سنتها نشف دمعي على خدي وطلعنا الفجر للنجف كلمن بسيارته ضلوا بالقريه بس سلطان ورغد وجويريه وصيهد. وميلاد ومرتضى.
اموتن من اوصل گبرها اموتن من اريدن احاجيها واسولفلها واشكيلها شكد گـــلبي تعب بدونها.
جرتني ندى تريد تكومني وعمه ايمان تحاجي كهلان وعبود اثنينهم ملثمين ودموعم تجري بلا صوت بس حسين شابگ گبرها ويبجي بحرگه.
وشمس تفتر علينا تمسح دموعنا واحد واحد ومن ما نسكت تضم روحها بحضني شبگتها ابجي
-حااجيني حاجيني عفره حاجيني بردي نار گـــلبي والله احطن بتج بحضني واشمها بلكن احس بيج ووولج اريد اموتن تلوع گـــلبي .
جرني كهلان الصدره وغطه عيونه بالچفيه يبچي، جرونا جر من يمها نمشي ونتلفت على گبورهم كلهم اعزاز، كهلان من يگابل گبر منذر يصفك ايد بأيد وادموعه. تتجاره.
اخذونا للأمام علي زرنا وبالليل ردينا الاهلنا وصلنه الفجر غسلنا ونمنا للعشرة الصبح يله فزيت بعدها كلها نايمه گمت اريدن اغسل توني طلعت للحوش واندك بابنه حيل واسمع بدور تصرخ
-ررررنه ررررنه.... رررريمه.
ركضت للباب متخرذله بس فتحته صارت بوجهي بدور بطرك دشداشتها واديها كلهن دم تتتراجف نفسها مگطوع ووجها اصفر تصيح مفزوعه
-جــويريه ... جــويريه .
شكرا لزيارتكم عالم روايات سكيرهوم
