رواية أرض الخناجر الفصل الخامس والسبعون بقلم ايلول
صلفين ومابينا محنه
وعلى الكرامة نعوف اهلنا
══━━━━✥◈✥━━━━══
رنـــه :: فتحت عيني مصدمة كضيتها من ايدها وهيه متخبله تبجي وترجف كلها، التفتت على بيتهم من سمعت صوت عمتي ايمان وصوت البنات يتصارخن اجتني ريـــمه تركض بس نريد نفهم من بــدور شي
تبجي وتصيح بخبال
بــدور:: الولد هنااه .. الولد هناااه؟ جــويريه راح تموت جــويريه .
-ووولج يمه شكو؟ وولج بــدور شكوو بس حاجيني.
-ابووي ابوي طك جوري الحكينااا صيحي الولد يأخذونها للمستشفى
صرخت تكمز من حلات روحها ركضت ريـــمه تجيب عبايتها محد من ولدنا اهنا مدري وينهم وبدور متسودنه وانه اذني تصفر بعدني ما مستوعبه شي والتفتنا اثنينا على صوت سيارة نعاين وما ندري بيها سيارتمن لمن تعدت الشجر ووصلت بس لمحتهم صــيهد وطرواده ركضت عليهم متسودنه وهوه نزل متعارض صرخت بوجه تررجف
-الحكك الحكك جــويريه .
فتح عينه بصدمة وركض للبيت ما يشوف دربه صياح وهوسه وطرواده يسأل شصار بــدور راحت الاهلها تركض والمح صــيهد طلع من حوشهم شايل جــويريه گوه.
وجها ورجليها مغطايات بالدم وعمتي اسمع صريخها وراه ما تگدر تمشي، ركض طــروادة شغل السيارة هوسه وكلها تصرخ الا انه احس الدنيا غوشت بعيوني چلبت بالحايط اعاينلهم حطوها بالسيارة واجت رغد تركض متخرذله عبايتها بأيدها بس تريد تلحك عليهم صعدت وياهم وفروا السيارة طايرين وعمه كعدت يم السياج تلطم على رجليها رايحه روحهل ما گدرت تضل واكفه على حيله وبدور يمها تبجي واسمع صوت عمي وليد من البيت يصيح
-يطبها مررض يطبها مرض جعلها بالموت.
ركضت ريـــمه العمتي ايمان تحاجيها وتگومها وهيه متسودنه تبجي بحرگة جابتها هيه وبدور يمنه للبيت وردت علي تحاجيني
-وولج رنـــه شمالج؟ گومي.
وبس حطيت عينيّ بعينها دنگت غمضت عيوني امسح وجهي بأيدي الترجف ما اريدن اذكر شي ولا هو نفس الموقف هسه هسه ترد جــويريه وكلشي مابيها.
كومتني ريـــمه طبينه للبيت عمه ماتدري شتسوي من حلات روحها ساعة تبجي ساعة تدعي اجت ندى يمها عيونها رايحه من البجي
""
رغد:: الله يعين گلب صــيهد على ابوي، كاعدات ونسولف بيناتنا واجه ابوي كعد بالهول عاين بيناتنا وصاح على جــويريه
وليد:: گومي صبيلي چاي.
بــدور كامت بساع لان تدري جــويريه گوه تگوم وگوه تكعد صاح
وليد:: تعاااي ولج اكعدي .. شني ولج انتِ بت الوزير لا تحطين ايدج بغرض لا تسويلج سلعه بالبيت عود حاسبه روحج عازله بالمشتمل بت الخايس.
وجويريه تعاينله ساكته گالتله امي
-بناتك كاعدات وهسه يكومن يسولك شني بعد.
دار على امي يغلط ويصيح الا جــويريه تسويه گالتله جوري
-هاي هيه خاله هوه چاي هسه اسويه.
گامت للمطبخ گوه على روحها وهوه صــيهد يمشي لماسه يشرب چاي ومن يتأمر على جــويريه علمود الاكل امي تتعارك وياه البنيه مورمه وكوه تتحرك وين بيها حيل .
ضلت ساكته وسوت الچاي وامي تحجي على ابوي وهوه يردها ويغلط، شويه وجويريه جابت الچاي اعاينلها مدته اله ما اخذه منها دك بأيده على الگاع گدامه گالها
-حطيه هناه
حطت ايدها على ظهرها ودنگت گوه على روحها حطت الصينية وبيها استكان الچاي گدامه صاحت امي مقهوره
-الك بيها ارادة ربي .
ردت جــويريه كعدت يمنه وتغمز الامي عود لا تنقهرين ميخالف سكتت امي وهوه بس شرب الچاي شمره لعبانه روحه دفر الصينية يغلط
-بت الخايسه مسويته من وره خشمج؟ انعل ابوج لا ابو امج.
كامت بــدور بساع لمت الصينية والاستكان وهوه يغلط ويصيح وامي ترده بس كون يسكت كومت جــويريه من ايدها اخذها واروح للمشتمل بعدنا ما طالعين من الهول فشر على امها دارت عليه بغضب شايله أيدها وخازرته
جــويريه:: لا تغلط على امي مره ميته شتردون منهاا؟
تسودن شلون ردت عليه يمد ايده من بيناتنا يريد يطكها وكلنه واكفين بوجهه وامي تحاجيه يغلط ويسب وجوري ترده مد ايده طكني شلون دفعته دفعت جــويريه صعدت على اول ثلث بايات من الدرج وهوه يتعارك ويانه متسودن ويصيح
-انا ترادديني وولج بت الفگر وولج كاتلج الظيم وجبناج هناه سويناج ادميه لنعل ابوج لا ابو امج يا خايسه يا بت الخايسه.
وجويريه تبجي وره ظهرنا وتحجي بحرگه
-والله تروح فـــدوه الامي والترابها لا تغلط عليهاا.
دفعته من صدره وامي جلبت بأيد بــدور وكامت تصيح عليه وهوه افتر بغضب جانت يمه نفاضة جكاير كزاز وثگيله شالها وبكل حيله شمرها على جوري طكها براسها مالحكت التفت عليها وطاحت من الدرج علينا بس نريد نكضها تخرذلنه صارت طيحتها على وجها كضتها بــدور وبس گلبت وجها ولكت الدم مغرگ اديها صررخت .
تسودنه اطك بيها على وجها اريدن تفتح عينها ماكو غدت بأيدي جثة لطمت ندئ متخبله من شافت اهدومها انترسن دم لا بينا نشيلها ولا واحد من الولد هناه ويلحكنه امي تلطم وتصرخ طكت بــدور وصاحت بوجها
-اررركضي اررركضي شوفيلي ياهو من الولد هنااه.
احس مو دقايق يمرن جن سنين من ثگلهن، شالها صــيهد من بيناتنا ما يدري شني السالفة طلعت اركض وراه للسيارة الطريق صار شطوله علينا واخوي الدرب كله رايحه روحه حرف ما نطق وبس وصلنا واخذوها من عدنا وبس شافوا وضعها حولوها عمليات منطينا احتمال الطفل ماتّ ببطنها لان من طاحت صارت طيحتها على بطنها، كعدت على حيلي ابجي وما ادري بصيهد وكهلان وين راحوا ادعي ايدي يرجفن
طلعت أدور عليهم شفته من بعيد كاعد بره مدنك حاط اديه فوگ راسه وطرواده يحاجيه رديت طبيت جوه اتوسل بهذا وذاك بس كون يطمنوني، محد ينطيني حچاية خلوني الوب كهلان جاب صــيهد واجه يمي اعاينله دموعي تجري وهوه مدري شصار بحاله عيونه حمر وحاني ظهره شال راسه عاينلي وتدنى يمي مد ايده يكض ايدي حسيته يستند عليَّ وصوته مخنوك كوه يحاجيني ويسأل شصار بچيت اسولفله واحلفله جــويريه كامت وسوت الچاي بس ابوي الراد يطگها عناد.
تسودن جان كل ظنه طايحه من الدرج هد ايدي ومشه بساع لحگه كهلان وضليت وحدي اقل الربع ساعة وردوا يمي كهلان ماخلاه يروح
امي كلساع تخابر على صــيهد وهوه مايرد كاعد بالگاع مدنك ومتاني ليمت يطلعون ويصيحون بأسمها
طولوا ساعة وماكو اي خبر شوية واجوا ولدنا وياهم مــاسه وريمه صرنا على صفحة والولد يحجون وي صــيهد مسحت عيوني احاجي البنات
-بعدها بالعمليات أظن الطفل مات ببطنها
احجي والخنگه ذابحتني وهنه حالهن مو احسن من حالي گالت مــاسه
-ميخالف فـــدوه فـــدوه بس كون هيه تطلع سالمة
هزيت راسي اي ابجي وايدي على بطني موجوعة
-امي شلونها؟
ريـــمه :: مديت ايدي اكضها من ايدها واحاجيها
-زينه يمنه ماخليناها ترد البيت اهلج لان تتعارك وي ابوج.
هزت راسها خوش، ولدنا شوي وطلعوا لان صارت هوسه وماسه هم راحت ضليت يم رغد مناه لمن كضت العمليه احنا گلوبنا نار، وكفنا كلنه من طلعوا وصاحوا بأسم جــويريه التمينا عليهم وطلعوها النا بسديه حتى يحولونها الغير ردهه گالوا الطفل بالخدج وطمنونه عليه
غمضت عيوني احمد ربي واشكره، نقلوا جــويريه من السديه للسرير من اعاين بوجها اختنك وما اگدر اكض دموعي ورغد حطت راسها على ايدها تبجي بخنگ والممرضة تحجي عليها ما راضيه علمود صحة جوري
شويه وطب صــيهد عاينلها بقهر وهيه تون حلگها يابس وموجوعة وبس فكها البنج تسودنت من الوجع تصرخ ردوا انطوها ابره ونامت، والنوب ما رضوا يضل وياها غير شخص واحد وصيهد ما يرضى يطلع گوه كهلان قنعه.
طلعنه انه ورغد نشوف الطفل بالخدج وهيه عيونها يجرن تعاينله وتبجي مبتسمه وصوتها يرجف
-يا عيون عمتك يمه حبيبي.
مسحت وجهي اعاينله مبتسمه خدوده يخبلن الاسوار العلا رجله مكتوب اسم امه عليه وهوه بعده بلا اسم صورته فيديو، وما خلونه اكثر من هيج طلعنه، رغد ردت يم جــويريه وانه مشيت وي كهلان اللي بالكوه قنع صــيهد واخذه ويانه.
طول الدرب صــيهد ساكت لمن وصلنا القرية ظلمة وبارده نزلنه طب ويانه البيتنا مشغلين اللايت عمتي ايمان كاعده بالهول والبنات يمها وبس شافت صــيهد ردت تبجي وتحاجيه مختنگه
-ها يمه صــيهد.
مسح وجهه وطب للهول دنك باسها براسها وشمس تريده يشيلها جلبت بيه باسها وعافها ما بيه حيل الشي ما يگدر يحاجي امه مختنك، كهلان طمنها وماخله صــيهد يمشي البيتهم اخذه وطب للدوانيه كعدت يم عمه ايمان والتمن البنات بــدور وندى ورنه راويتهن الفيديو عمه تبجي متسودنه.
شويه واجه عليهن وهـــب مشن وياه البيتهم بس صيهد ضل يمنه عفت علاوي بأيد زهره وطبيت يم رنـــه تسويلهم عشه كالت
-جــويريه زينه؟
-خيه بعدها من فكها البنج تسودنت من الوجع مناه راسها مخيط مناه عملية
-تدرين عمي وليد طالع من البيت محد يدري بيه وين الچلب كون كسّر بأديه شلون يطكها.
تحسرت مقهوره احضر وياها الصينية كملناها واجه حسين اخذها الهم ونسمع كهلان يحاجي صــيهد ما يرضى ياكل وصوته مختنگ گاله
-بس اريدن چاي
گمت للمطبخ سويت چاي ووديته بأيد حسين شويه وجاب الصينية بس كهلان ماكل منها، نومنا زهره وشمس وعلوش وردينه للهول نتصنت انه ورنه طب علينا عبود وفز من لگانا حاطين اذاناتنا يم الباب غمانه اثنينا ايده على گلبه
عبود:: هوه نص گلب وعلى ساعة يوگف من وراچن.
درت عليه اعض بأصبعي حتى يسكت هز ايده ومشه الغرفة اهله ردينه نسمع سوالفهم صــيهد حيل مقهور وكهلان بدل ما يهديه يغلط على ابوه ويگله
-انت ابوك ما تگدر تحاسبه بس أنا اگدر.
وصيهد گاله بحسره
-ريت الطاگها مو ابوي.
سكت كهلان وانه اعض بأيدي ما راضيه كون يهديه مو يزيدها وين يله گاله
-هسه خل مرتك وابنك يطلعون بالسلامة وسهله كله يهون المهم همه بخير.
ضل ساكت كمنه انه ورنه طبيت يمها بالغرفة خابرنه رغد گالت
-والله نفس الوضع، الطفل زين بس جــويريه شوي تعبانه تنوجع وبس تبجي.
-سوده عليه هم گالولج ليمت يطلعونهم؟
-والله خيه ما ادري ما گالوا
رنـــه:: اكلج شنو راح تسمونه؟
-سألت جــويريه من صحت رادت تخنگني وصيهد اعصاب اذا اكله شتسميه يذبحني الحد هسه ما ادري.
ريـــمه:: سدينه المكالمة منها تمددت رنـــه بفراشها تبوس بشمس عاينت الشمس مبتسمه
-فطمناها من الملهي گامت تحط اصبعها بحلكها
رنـــه:: اي ولج موتتني النوب من ازاعلها تعاينلي تريد تبجي تكسر خاطري.
تحجي وتبوس بوجها وبأديها، عفتهن وطلعت للغرفة بست علاوي احاجيه
-يروح امك وليدي العاقل.
التفتت على الباب طب كهلان ضايج حيل ويسب بوليد
-ها صــيهد وين راح؟
-تمدد بلكن ينام.
وكف بصفي دنك باس علاوي ورد طلع يم صــيهد ما اخذت عيني نوم كلساع اطلع من الغرفة الحد الساعة ب٣ من الليل طلعت لگيتهم كاعدين بالحوش والدنيا بارده ثلج يدخنون اثنينهم كهلان ساعة يصبره ساعة يصير وياه اسمعه يگله
- هونها صيهد، غير كالولك زينين وصحتهم زينه جا بعد شمالك مقهور.
وصيهد داير وجهه يدخن بحرگه گاله
-ما تهون داگ وجعها بگلبي، ادري ربي يختبر صبري وياهم ليش؟ چيه اهل وما الي سلطه عليهم، كلشي ما اريدن هسه بس كونه مو ابوي والكفل زينب بگاعه ادفنه.
يحجي بغضب ميت من آلقهر رجفت بردانه عفتهم وطبيت للغرفة تلفلفت بالغطه توني انام وبچه علاوي كعدتله اغلط على روحـــي حيل وياي جان نايم وانه كاعده ما استغليت الوكت ونمت، حطيته يمي على الچرباية فتحت الگماط من عنده تمغط يحرك إديه ورجليه وانه ودي اكله ابوس ايده وابوس رجله واحاجيه همس
-انتَ ابني .
واضحك وي روحـــي من أعاين بوجهه عيوني تدمع، وولا خلاني ارجع انام بالخمسة يله عافني غفيتلي ساعة ونص وكعدني كهلان يريد يروح للمستشفى وي صــيهد چلبت وياه وهوه يگلي
-چا وعلي؟
-هسه اوديه يم رنـــه .
هز راسه خوش اخذت علاوي وركضت الرنه كعدتها من نومها فكت عينها گوه
-ديربالج على علاوي راح اروح وي كهلان للمستشفى.
-ماكو شي؟
-لا ماكو، فـــدوه رنـــه مو يبجي وما تكعديله.
مديت ايدها حركت السله مالته هزت راسها اي ورجعت غمضت حطيت ترمز الماي والحليب يمها وكهلان كضاها علي يله بساع بطيتي يله اكضي، لبست على السريع وطلعت وياهم.
شلعوا گلبنه يله خلونه نطب وهيه بس لمحت صــيهد بچت تشهك وجها اصفر وحالها حال مد ايده كضها منّ ايدها ودنك يبوسها براسها ويحاجيها بصوت مخنوك
-الحمدلله على سلامتج.
جــويريه:: غمضت عيوني مختنگه وميته من الوجع، ريـــمه وكهلان سلموا وطلعوا ولحكتهم رغد، ضل بس صــيهد يمي يحرك اصابعه على حواف لزاك الكانونه وما يحط عينه بعيني حاجيته صوتي مبحوح
-صــيهد.. ما.. ماخلوني اشوفنه.
دار وجهه للباب يريد يحجي وبلعومه محتقن وخر ايده من الكانونه الاطراف اصابعي كضهن بين اصابعه يضغط عليهن متحسر
-بس يصير زين يجيبونه يمج.
احس بدموعي يمشن بشعري مدري ابجي من وجعي مدري من دورت وجهه من عندي مدري على ابني الي الحد هسه ما شايفته، حاجيته ابجي
-شبيك وياي، شنو مزاعلني؟
جر نفس طويل باوع على الباب ورجع باوع الايدي دنگ حاني ظهره باس ايدي فوگ الكانونه وشال راسه يباوع بوجهي
-اعذريني اول مره ما اگدر آخذ حگج واكسر الايد الطگتج.
حركت راسي شفايفي يرجفن
-والله ما سويتله شي.
هز راسه اي يعصر اصابعي بين اصابعه
-أدري ادري بكلشي.
سكتت عيني بعينه مد ايده يمسح عيوني مقهور ودخلت رغد الطفل بأيدها دك گـــلبي حييل ما هامني شي بهاللحظة غير انُ اخلي على گـــلبي وكف صــيهد اخذه من بين اديها وهيه تضحك وتباوع بوجهه، اجتني بسرعه ساعدتني شوي ارفع جسمي تشيط روحـــي من الوجع بس ما اهتميت بس اريد يخلونه بأيدي
صــيهد يباوع بوجهه ويصلي على محمد دنگ باسه براسه مغمضه عيونه، شلت ايدي مديتها اله
-صــيهد.
جابه واجه يمي حطه بأيدي ولازمه وياي كعد على الحافة يخاف يعوفه بس بأيدي لان ارجف قربته الصدري
يمه يا روحـــي، غمضت عيني ابوسه بخده الدافي گـــلبي يدددك حيل، وما مصدكه ابني بين ايديي.
نزلته من صدري الحضني اباوع بوجهه خديداته يخبلن وصيهد مگابلني مايشيل عينه من وجهه ضحكت من بين دموعي
-صــيهد
شال راسه باوعلي ضحك ومسح عيونه، وانه كاضه ايد الطفل دنك صــيهد باس ايدي وايد ابنه سوه نسى حتى وجود رغد وهيه خانسه بالزاويه اباوعلها تصور بالسكته.
فجأة تذكرها التفت عليها يسألها
-شسميتيه؟
رغد:: من البارحة لليوم الف اسم خطر ببالي متانيه انت ومرتك تقررون.
باوعلي صــيهد يسأل
-كرار؟
هزيت راسي اي زفر نفس حط ايده وره راسي وتقرب يبوسني، عدل حجابي ووخر من رجعوا ريـــمه وكهلان اخذ كرار من ايدي ومشه يراويه الكهلان ورغد تحاجيهم خايفه مايلزمونه عدل كعدت يمي ريـــمه تتحمدلي السلامة وعيونها عليهم مبتسمه
طــروادة:: هلا عمي هلا هلا ببيرغ عراضه من صغره.
صــيهد:: بويه كرار كله عمي ليش ما تسكت؟
ضحكوا اثنينهم وشويه وطلعوا علمود ارضعه بعد ما اخذوه من عندي من شافوه زين للعصر اجت خالتي ايمان حضنتني تبجي بست ايدها احاجيها
-لا تبجين خاله
-كون جعل ايده بالكسر.
رغد شالت كرار خلته بحضنه شكد بچت وهيه تبوس بيه فرحانه ومقهوره عليَّ، بقيت يمي ساعة وراحت واني ثاني يوم الصبح يله طلعوني الخطوه الامشيها تشيط روحـــي بيها وگلبي يفرفح من الوجع ، اريد اصررخ كل ما أمشي.
وصيهد حاير ومقهور طول الطريق يمشي على كيف بالاخص من وصلنا شارع القرية، الحد ما طبك السيارة
بداخل الحوش كلهم واكفين بالحوش وهـــب لازم خروف وسجينه والبنات واكفات يم خاله يضحكن، اجن يركضن مــاسه اخذت كرار وندى ورغد ساعدني انزل ووهب من حماسه حتى يشوف كرار هدّ الخروف وهوه ينطح اجانه يركض، اني ميته من الخوف وهذا اجاني وما اگدر اصرخ بصوت عالي انوجع بقيت اصررخ بس بصوت ناصي صار مدري شلونه صوتي.
صــيهد لزم الخروف والبنات كعدن بالگاع هنه ووهب يضحكون على صريخي، غلط عليهم صــيهد يله گام وهـــب اخذ الخروف ونومه يذبحونه سوه، دخلت للبيت مخلياتلي فراش بغرفة خاله تمددت بيه گـــلبي يوجعني وهنه ملتمات عليَّ بــدور تتعارك تريد تسمي كرار مراد
ندى باوعت للباب شافت الولد بعدهم ملتهين جرتها من كصيبتها گالتلها
-گومي ام مراد گومي لا يسمعج وهـــب ويشگ حلگج، غير مسح حتى القناة الينعرض عليها المسلسل.
ضحكن كلهن وخاله تسويلهن
-اشش اشش صوتجن، گومن رغد مــاسه كومن يمه عاوننهم واشون المعلاك لجويريه.
-ديروبالكم عليَّ اني مسويه عملية.
بــدور:: اني هم مسويه عمليه راح اكل وياج.
ابتسمت وعمه تغم بيها كامن البنات طلعن يمهم وندى تدفيني لبستني جواريب ثخان وخلتلي بعدّ بطانيه بقيت شويه احجي وي خاله ورجعت نمت كعدتني خالة الظهر كومني رغد وبدور غسلت ورجعت لفراشي تلزمني البچيه من اشوفهن حايرات بيه هاي تسوي عصير وهاي تشويلي معلاك وهاي التحضر العلاج.
العصر اجن رنـــه وريمه يمي شمس باست كرار ضحكت اباوع بوجها
-شمس اسمه كرار.
باوعت بوجهي گالت
-كرار؟
-اااي عفيه كرار صح فـــدوه لوجهج
ضحكن البنات مكيفات بيها لان بدت تلفظ اسماء صحيحه كامت من يمي كعدت بحضن رنـــه خجلانه وما طولن شويه وراحن رجعت تمددت بفراشي سمعت صوت خالي وليد صيح على بــدور علمود ملابسه اجت اخذتهن اله وطلعت.
ربع ساعة ودخل صــيهد للغرفة باس امه واجه كعد بصفنا
-شلون صرتي؟
-بس اتحرك انوجع.
تحسر ساكت باوع الكرار نايم گالتله خاله
-اظن يطلع يشبهك اذكر هم يوم الجبتك هيج مدنفش.
ضحك باوعلي ودار يباوعلها
-عمي ما اريدنه يشبهني.
ابتسمت عمه جنها تدري شنو قصده، باوعت لباب الغرفة من انفتح وخالي وليد مد راسه گاله
وليد:: بويه صــيهد تعال امشنا للمرعى خابروني هسه يكولون سبع خرفان ماهنه.
يحجي محترگ گلبه وصيهد يباوع بوجهه كرار ويحرك اصبعه على حواجبه منطي ظهره للباب ما التفت رجع گاله
وليد:: صــيهد.
دنك باس كرار وباوع بوجهي يحجي بهدوء
-موجوعة؟
واني اباوع بوجهه ساكته وابوه فاتح عينه بخزر تفل علينا وطلع رگع الباب وراه حيل، وصيهد غمض عيونه بغضب گالتله امه
-ابوكم وما ودي اعلمكم تقهرونه بس لا تحجون وياه لا انتَ ولا وهـــب خل يعرف روحه غلطان.
بقى ساكت شويه وطلع بالليل اجوا الولد يردون يشوفون كرار وصيهد ما يقبل يطلعه يمهم دخل للغرفه يگول الخاله
-يمه عاينــي لخدوده جنهن مشمش، ســليم يحسده.
-يا يمه كلهم مورم بعده.
ضحكت واسمعهم يصيحون عليه اخذه وطلع صاح ســليم بصوت عالي
-بووويه هذا شسمنه.
وصيهد صاح
-صلي على محمد بالحسين اكتلك
ســليم:: موش خدود بووووياي مال عض.
صــيهد:: طلع الميه يله ورق لا اشك حلگك.
مــاسه:: ماده راسي من باب المطبخ اضــحك عليهم ســليم يريد يلطم وميثم وسلطان وسجاد وكهلان حطوا فوگ كرار كل واحد خمسه وعشرين
ســليم:: خمسة وعشرين مثلهم.
صــيهد:: ميه غير الميه هسه ارميك.
وسليم يلطم الولد يضحكون عليه دار طك كهلان يعاتبه
ســليم:: انتَ مو تگول مرت صــيهد اختي جا ما حطيت مية؟
ضحك كهلان منحرج وصيهد گاله
-لا هوه ادمي ودفع حگ، بس انتَ تباهيت وورقت مية بعد تحمل يطبك مرض.
ماريا واكفه بصفي همست
- قديش بخيل.
-هههه لا ولج خطيه، صــيهد يريد منه ميه.
سليم طلع المحفظة يحسب منها عشرات ويسفطهن فوگ كرار يگله
-عاين ولك ابو خدود انا عمك ســليم الوحيد من اعمامك دافعلك بگماطك مية مناه لمن تكبر لا الك عيديه ولا الك اي صوغة مناه لمن تعرس ادفعلك من مهرك مليون.
ضحكوا كلهم واني بس اريد اگول الميثم جا من صارت حور كلشي ما دفعلها خابرت على مــيثم وخر على صفحة جاوبني والولد صوتهم عالي رجعت للمطبخ گتله
-ولك مــيثم.
-ها گـــلبي ههه شنو هاي النوب شو اليوم ولك؟
-هههه اكلك جا ســليم من صارت حور كلشي ما انطاها.
-وينها حور؟
-هاي بحضن ماريا
-وديها الي.
سديت التلفون اضــحك اخذتها من ايدماريا وطلعت لباب المطبخ انطيتها اله شالها يضحك وهي تضحكله، رجعت لباب المطبخ الداخلي اركض حتى اشوفهم دخل عليهم مــيثم گاله.
-ســليم وين المية مال حور.
وسليم لطم وشگ قميصة غصيت من الضحك خانگه صوتي والولد يضحكون عليه گاله
ســليم:: مو عندها اخوال؟
مــيثم:: اي وكفو منهم بس انت عمها.
ســليم:: عمي انا عمج؟
وحور ضحكتله شال المحفظة وحطها بأيدها يگلها
-فـــدوه الضحكتج شني هاي العيون الحلوه.
وهـــب:: تشبهه عيون بريا.
والتموا عليها يضحكونه ويتداهرون على لون عيونها واحد يگول عيون مــيثم واحد يگول عيون بريا، ويبوسون بيها شالها سلطان يضحك ويحلف تشبهه عيون بريا يتداهرون ومدري شلون طلعت من مــيثم ما منتبهه الروحه اخذها من ايدهم يضحك ويگلهم
مــيثم:: لا عيوني ولا عيون بريا تشبهه عيون عمتها.
كحوا صــيهد وسليم وهوه انحرج راد بس يغير الموضوع شمر المحفظه على ســليم وكهلان بساع حجه بغير سالفة
رجعوا حور وكرار وطلعوا سوا طبيت يم جــويريه وامي اضــحك واسولفلهن على مــيثم وماريا تگلهن
ماريا:: بس حور ما بتشبهه لون عيونا لونن اغمق شوي مو صح.
وصدك همه عيونهم لونها فاتح ازرك، حور غامقات رصاصي، ضلينه شويه كاعدات يمهن نتداهر انه ورغد على حصة اللحم اگل الامي انطيتوا الرغد اكثر من عندي ورغد تگلي انتِ اكثر گالت امي
-ما تنچبن تالي اثنينچن تبوكن من جدرنا.
ندى:: والله صح بعد الظهريات اقفل مطبخنا.
وجويريه غطت وجها صاحت عليها امي
-حالج حالهن انتِ.
ضحكت وبجت بنفس الوقت من الوجع تلوب الحد الساعة بالعشرة اخذت ماريا وحور ورجعنا البيتنا عفتهن بالهول وطبيت للمطبخ احجي وي بريا وانظف گال
-هل يومين انزل، اكلج شسموه ابن صــيهد.
-كرار.
-الخايس صــيهد صار ابو.
-يگول اخابر بريا يجيب صوغة الابني وهوه راد.
-اجيبله خوذة وطلقة.
-هههههه
-اكلج ماريا شلونها .
-زينه.
جر نفس بحسره وحجه بهدوء
-ما عرفتي ليش تحط سجينة جوه مخدتها؟
-لحيت عليها والله كالت متعوده
-ما مرتاح.
سكتت محتاره شويه وسد التلفون نظفت المطبخ وماريا اخذت حور وطبت الغرفتها كنست الهول بالعطله ابد ما اخليها تشتغل لان وكت انه اداوم هيه ما مقصره دايره بالها على حور وناقذتني، مــيثم راد يرجعها للمدرسة وهيه ما رضت كالها معليج انا اخابر امج اخليها توديلي اواراقج ابد ولا رضت عافها على راحتها بس ينقهر من يشوفها مختنگه
نوبات يجيب ورد ويزرعون هوه وياها بالحديقة حيل تعلق بيها اذا طب للبيت وهيه بعدها نايمه يفتح باب الغرفة ويضل يحجي بصوت عالي علمود تكعد وهيه مكيفه وفرحانه تارسين عليها الدنيا.
كامت تاخذ حور يمها حتى بالليل تسهر تتابع مسلسلات وتدير بالها عليها .
طبيت يمهن للغرفة تمددت على جربايتها اعاين وياها على التلفزون متابعه مسلسل هندي fear files رعب يخوف وهيه هم تخاف وكلساع ومغطيه وجها ومدري شجابرها تتابعه.
-دوريه شجابرج؟
-هههههه سمسم شو رأيك انا صايره احكي عراقي منيح مو؟
-اي والله زين يجوز بعد سنة تحجين احسن من عدنا.
دارت وجها علي متحضره تريد تحجي گالت
-سمچ الغده سمچ... تعال مــيثم لهون.
-مو لهون لهنا.
-صح تعال مــيثم لهنا كرمال تشوي السمچة تبع الغده.
-ولج تعال مــيثم لهناه حتى مو كرمان، حتى تشوي السمچة للغده.
مــيثم:: اجيت.
فتح الباب ومد راسه يضحك كعد يمنه شويه وكمنا الغرفتنا عضّ ايده گال
-كله منج.
-هاه؟
-كلّت للولد حور عيونها على عمتها.
ضميت ضحكتي اعاينله يبدل ويحجي بقهر گتله
-اي مابيها شي جا شني ما شايفين عيون ماريا همه؟
-لا يابه زحمه
ضميت وجهي بالفراش اضــحك، طفه الضوه واجه تمدد يمي ضمني بحضنه يحجي على ميلاد وشاكر
مــيثم:: حيل انقهروا الولد هسه بالأخص كهلان احتمال شاكر يطلع.
-ليش؟
-جا ما عليه دليل
-جا شلون الشرطه اخذته؟
مــيثم:: سلطان وكهلان راحوا الجده چم مره بمره وتطردهم ضلوا يرحولها ولا ملوا مناه لمن رضت تشوفهم گالولها شاكر الكتله وبس اشتكي عليه انتِ وهيه تنحل جان اكو ضابط على اساس هوه يخليه يعترف ورادوا بس يخلونهم ياخذونه للتحقيق، اشتكت عليه جده وهل اخذوه، بس مافاد ابد ما اعتف. وميلاد ومرتضى حاطين محامي ويوميه يجددون تقرير، سالفة تعبانه الله وكيلج.
-تونا ارتاحينا من انسجن كون ما يطلع بجاه الحسين.
سكت مقهور عاينت وياه بتلفونه نايمه على صدره وهوه يگلب بالفيس لگه واحد من بيت غانم ناشر منشور كاتب بيه كثرة زلم بلا فايدة ثارهم ما ياخذونه يفزعون عليه.
والتعليقات جهال يصفگوله وذاك من ذاك اللي يلومه ويكتبله عمي انتَ ما وراك چبير مو زحمه هالحجي.
مــيثم صور المنشور وداه بگروب الولد وهـــب اول واحد شاف الرساله غلط عليهم ونشر على الفيس صورة شايب يضحك وفوگ كتب "لفو"
دخت ضلوا واحد يصور للثاني لفيت راسي ونمت عايفتهم بهوستهم، للصبح هم رحت الاهلي يخبل الصبح يمهم صوت طفل يبجي وريحة الچاي المهيل وصوت امي وهيه تناغي كرار وتگمطه .
عاينت لجويريه اضــحك
-شلونج اليوم؟
جــويريه :: ابتسمت اهز راسي زينه بعدني موجوعة بس احسن من اول يوم، ضلت يمي ساعة وراحت، للعصر هم اجت بس تطمن وتروح هيه ورغد وبدور وندى ما عافني ابد بالاخص ندى وبدور لان وياي بالبيت حايرات بيه.
واطير من الفرح لمن ندى تخلي كرار بحضنها تناغيه وتبوسه وتگول الرضا
-هذا ابن عمك
فتحت حلكي مصدومه من كالها
-ما احبه.
ندى:: ياا ليش؟
-عمو صــيهد يبوسه ما يبوسني.
لزمته ندى تعلم بيه وانه جريت تلفوني اراسل صــيهد
-وين انتَ؟
-بالمشتمل؟
-تلكه حلويات بكنتوري جيب منهم وتعال انطيهن الرضا گله انا جبتهن الك وبوسه.
-شصاير؟
-ماصاير شي بس ضاج من كرار لان شافك شلون تشيله وتبوسه وانتَ ابد ما بايس رضا.
-شنّي السآلفة؟
-شبيك هسه؟ شكتلك.
فتحها ومارد قفلت التلفون وذبيته يمي ضايجه وبسرعة گـــلبي انعصر مدري شبيه حتى لو شي ما يسوه اضوج عليه انقهر وگلبي يوجعني عشر دقايق ودك باب الغرفه ندى عدلت حجايها ودخل. بأيده حلويات باوع الرضا ابتسمله وهو كاعد يم امه ويباوع الكرار اللي بحضنها
-هذا ياهو رضا عمي.
ورضا يباوع عليه ساكت لمن گال تعال يله مشه وكف يمه دنك باسه براسه وانطاه الحلويات ضحك رضا ودار الامه گالها
-اجذب عليج احبه.
ضحكت ندى ورضا اجاها يركض باس كرار، باوعلي صــيهد مبتسم درت وجهي من عنده شويه وطلع، بعده ما يحجي وي ابوه، وهو من يدخل للبيت يغلط عليهم اثنينهم وعلى خالتي ايمان ويسب بيه يحرك بگلبي ردت بس اصير زينه حتى أروّح للمشتمل واخلص.
بالليل بــدور مدت فراشها يم راسي خاف احتاج شي قريبه عليَّ وخاله ايمان بمكانها وبس يفز كرار تتجه على ايدها وتزحف يمه مابيها حيل توكف، تعلعلت نومتها وياي
ايمان:: نامي يمه نامي انه يمه.
رجعت راسي على المخده غطيت حتى وجهي الدمعه بطرف عيني وما ادري عليمن ماكو شي واضح ولا سبب بس احس بروحي اريد ابجي، بقن دموعي يصين وحدهن، خاله نومت كرار ورجعت لفراشها اقل الساعة وسمعت صوته يحجي همس
-يمه.. يمه كاعده؟
-ها يمه ها تعال.
بقيت جوه الغطا واسمعه دخل للغرفة باسها يسأل علينا گالتله
-لا نعمه زينين.
اسمعه يتحسر ووين يله خاله كالتله
-ليش ما تكعد يم مريتك؟ شو تطب تشوفها وتطلع بساع.
حاجاها مقهور
صــيهد:: مو هيه مادري شمالها بساع تضوج وتنقهر اوخر عنها حتى لا أقهرها.
عضيت ايدي بقهر اني بسرعه اضوج غير انت تدوس ببطني احجي وابجي وبعدين تذكرت احنا اصلاً ما تعاركنا ليش زعلت وشبيه الحجايه تبجيني، گالتله خاله.
-نص النسوان هيج وره الجياب مو هينه الحباله تاخذ نص الحيل والعمليه ومناه سوايت ابوك البت تعبانه كون انتَ تكعد يمها تحاجيها تدير بالك عليها تشوفك معاونها على وليدكم اذا من هسه تحس بروحها وحدها شلون ما تضوج.
-شسوي شگللها كل حجاياتي يقهرنها
-لا شمالهن يقهرنها يا حبيبتي يا بعد گـــلبي شمالهن يقهرن؟
-الله كريم.
-مساع تبجي هيه.
-ليشش؟؟ ياهو وياها؟
-وحدها وألله.
وبس حجتله رجّعت أبجي اقهر بروحي مدري عليمن شويه وحسيته وكف وخطواته قريبه علي وخر الغطا من وجهي وصار الضوه اللي يم كرار على وجهي باوعلي ومد ايده يتلمس عيوني
-عليمن تبجين؟؟
مسحت عيوني ساكته
-حاجيني موجوعه ؟
هزيت راسي لا وهو ما يدري شيسوي درت عيوني الخاله ايمان تمددت بفراشها منطيتنا ظهرها وهو حاير وياي كل شوي ويگلي شبيج واسكت مابيه شي ماكو شي ينحجي، الحد ما سكتت باوع البدور تشخر بصوت ناصي گال
-انامن يمج؟
باوعت بوجهه مقهوره
-اخاف من العمليه.
-ما انامن اضل كاعد بس اتمدد بصفج بين ما تنامين.
هزيت راسي اي جر البطانيه وتمدد بصفي بدون فراش خله راسه وياي على نفس المخده قربت وجهي الرگبته وهو حاضني من صدري ويهمس بأذني
-لا تضوجين من عندي، اوخر عنج اخافن لا تنقهرين.
-بس تصيح تعبتني وتغلط على شنو بله؟
-ليمت غلطت؟
سكتت امسح بعيوني كام عقلي يجيب سوالف قديمة ويخليها براسي مد ايده يمسد على شعري وباسني بگصتي
-صــيهد
-گلبه الصيهد
-ابقى يمي الحد ما انام.
-صار.
غمضت عيوني وهوه ايده لو يحضني بيها من صدري لو يمسد على شعري الحد ما. غفيت الصبح مالكيته للساعة بالعشرة اجه حاجاني من الباب تعبان مشه سبح ورجع كعد يمنا ماخذ بكلام خاله بقى يمي ساعة ويشاقي رضا وانطاه تلفونه يلعب بالالعباب شويه وراح.
بقى كم يوم هيج الحد ما بدأ الدوام اخذلي أجازه خاله ابد ماقبلت اروح للمشتمل رغم صرت احسن وشلت الخيوط بس ما قبلت كالت يضل بالي وما اگدر كل شوي اجيج، بقيت يمها رغم حجي خالي وليد يغثني من الولد مو هناه ، صــيهد بعده ما يحجي وياه، وهو يروح ويرجع ومره وده بــدور على كرار باسه وخله بالكماط فلوس ويحاجيه
-جدي يا بعد گـــلبي، اعز من ابوك
يسمع بصيهد وصيهد مغلس ما يرد عليه لحد ما خاله گالتله كافي لا يصير بيها ذنب عليك رد من ابوك يحاجيك، رد يحاجيه بثگل وعلى گد السؤال مقهور منه حيل.وگاله
-السبع خرفان انا بگتهن وبعتهن حگ ابني ومرتي الجا ماتوا بسوايتك.
ضحك يفر بسبحته ويگله
وليد:: ههههه عرفتك انا يله فـــدوه الكرار فـــدوه .
وخاله تتحسب عليه وتحجي عليه بس مو گدام الولد ما تريدهم يقللون من احترامه تگول ابوهم لو شما يصير واجبهم يحترمونه.
""
رنـــه:: طلعت الحياة حلوه بدون بيت شاكر، طــروادة محد يقهره، وريمه تضحك للهوه وكاضينها غــزل اثنينهم انه وعبود كلساع نكضهم بمچان هيه تگله يا بعد روحـــي وهوه يگلها يا بعد گـــلبي.
اموت من الضحك من اسمعهم واشوفن ريـــمه شلون تستحي چن اول مرّه يحاجيها ونوبات شمس يمهم وهوه يريد يشبگ ريـــمه لو يبوسها ما ترضى تگلهم
-عببب.
وطرواده يتسودن عليها يشلع خدودها گد ما يبوسهن، كلشي حلو بس القاهرني بريا كال اجي وما اجه كضت العطله وداومنه وهوه يوميه يگول هذا الاسبوع هاي اليومين شلع گـــلبي عفت التلفون وطلعت للهول طــروادة توه راد من الگيعان وملتمين بالهول ساند ظهره على الحايط وماد رجليَّه زهره تمرغ بيهن وشمس شابگته.
ريـــمه كاعده يمه وعلوش بحضنها
وعبود مدري شعجب متيه سجاد وكاعد يمنه اليوم يگلب بتلفونه ويحجي ويانه .
كعدت يمهم حسين صاح على شمس
-ياهو تحبين رنـــه لو خالو.
وهيه تشبگ طــروادة حيل وتصيح
-خالو
ضحك طــروادة يشبگها وانه اگلها
-شمس جا وانه؟ خاله الاحبنج؟
وخرت راسها من صدر طــروادة سوتلي بوسه تضحك كالها
طــروادة:: تحبينها؟
-اي.
-انا لو هيه؟
وشمس تحتار بيني وبينه نضحك ونسولف متونسين على سوالفها وهيه تعاينلي من جوه ليجوه خلته يلتهي واجت من حضنه الحضني شبگتني تبوس بيه ضحكت احرك بگلب طــروادة
-تحبني ما تحبك.
ضحك گال الشمس
-گليلها بعد سنة تكضين سادس تتزوجين ويضل الحب بس الخالو.
تلاشت ضحكتي أعاين بوجهه وشمس كامت من حضني الحضنه يضحكون كلهم وهو يبوسها ويدغدغها شال راسه لاعب علاوي وانه على نفس النظرة
-طــروادة.
عاينلي مبتسم ما بباله شي بلعت ريك مختنگه.
-شمس تروح وياي
-وين؟
عگد حاجبه ما فاهم دنگت امسح وجهي ورديت اعاينله سكتوا كلهم حتى شمس.
-احم.. من اتزوج غير تبقى يمي.
ابتسم رفع شعره بأيده ماخذ الموضوع بضحك بس انه مدري شبيه انطحن گـــلبي .
-وين تروح؟ وهاي انتِ يمها يوميه تجين تشوفينها.
-لا يعني تضل عايشه يمي ما افارگها هيج قصدي يعني انتَ تدري من ياخذها قصص وروايات عراقية كرار صلاح عمها اضل ضايعه وافتر لمن ترد واسمع حسها بالبيت يله ارتاح شلون اروحن ليغاد وعود باليوم اشوفنها ساعة.
وخر شمس من رجليَّه مضيك عيونه.
-شبيج؟
مسحت عيوني احجي وصوتي مختنك
-خليها تعيش يمي.
-هوه شنو التعيش يمج شلون يصير؟ وانتِ مو بعيده يوميه تعالي ساعتين شوفيها وهيه تجيج بعد عليمن؟
دنگت محترك گـــلبي مدري شجاني طاحن دموعي بحضني صيح ضايج
-عليمن تبچييين؟
ريـــمه:: صوتك ، شسالفة رنـــه ؟
گمت من يمهم للغرفة واسمعه يحجي بحرگه وي ريـــمه وعبود
-شلون عقلتها شمس تعيش غاد؟ غير هذا بيتها بيت امها؟ عوفج من هذا كله هم يجيني مازن يگلي يابه انا عفت بت اخوي يمك على يا اساس عايشه يم بيت عمك؟
عبود::ماصار شي هاي هيه لا تصير هسه فهمت ما يصير كافي.
طــروادة:: انا ما مصيح علمود شي بس عليمن تبجي ويصعد سكرهاا؟
عافهم وطلع ضميت روحـــي بالغطا ابجي والله ولا اگدر انه اروحن للمدرسة اريد بس الوكت يكضي حتى ارد للبيت واشوفنها حاجتني ريـــمه وراها اجه عبود يحجي وانه ساكته
ثاني يوم الصبح مبدلين نريد نروح للمدرسة وطرواده يعاينلي بحيره گال
-قستي سكرج؟
هزيت راسي اي فتح محفظته انطه لحسين وزهره كل واحد ربع ومدلي الف مصرف مال يومين اصرف خمسميه واضم خمسميه لليوم الثاني.
مديت ايدي اخذه منه جرني الحضنه شبگني وباس راسي
-والله ما بودي اصيح عليج بس حرگتي گـــلبي
بسته بخده احاجيه بس بداخلي مقهوره وادور حل
-ماضايجه منك.
ودانه عبود المدارسنا كوه الوكت يمشي وهالمره ابد ما جنت شاطره رغم اسمي جان يندرج وي اشطر بنات الصف هالسنة گوه دبرتها مالي واهس ادرس لمن ريـــمه شافت درجاتي وضلت تحجي وتعاتب
-جانت عــفراء تتباهه بيج وبشطارتج شجاج؟
ساعتها احس گـــلبي انمرد گمت ادرس اكثر وهيه تدرس حسين وزهره حتى لا يلهوني، ضل بالي يم بريا موتني الحد ما گال.
-باجر بالاربعه يمكم.
-العصر الفجر؟
-العصر
-هلا بيك.
سكت شويه وگال
-صارلج مده ما عاجبتني ضايجه؟
-لا.
صاحوا عليه سد التلفون وراح، طلعت بالحوش لگيت ريـــمه تعاين البيت اهلها ميلاد تتعارك وي فرح، رغم فرح ابد ما تجي البيتهم من عزلت الهسه .
نسمعها تصيح على فرح ام السحوره وتريد تطكها وفرح ما تقصر هم لسانها طويل وتغلط وتدعي، اجه ســليم صاح على امه وهيه دارت عليه تتراجف وتغلط
ميلاد:: دايحين وابوكم كاتله الظيم ما بيكم خير عاوني حتى اطلعه چلاب.
ســليم:: تعاي تعاي جا مو مرتضى معاونچ ليش تعاركين مرته.
وكفت گدامه طكته مدري شلون يجي من گلبها وتطكهم هيج وتدعي عليهم بكل هالحقد، عافها ومشه وهيه تغلط وراه وتدعي التفتت وشافتنا اثنينا فاتحات الباب ونعاين عليها حطت عينها بعين ريـــمه وسوتلها سهله طبت للبيت سدينه الباب ريـــمه تدعي ابوها ما يطلع
-دام ما اعترف ومالكوا دليل يطلع همه ليش استعجلوا لو لاكين دليل گبل لا يسوون الدعوه.
-دوروا مالكوا هوه بس الخنجر ومستحيل عليه بصماته عود الضابط گايللهم يمي ويعترف سهله وشفتي شگد تعبوا يله قنعوا جده تشتكي عليه .
عاينت الريمه ساكته وهيه حيل مقهوره اريد اكلها كون يموت گبل لا يطلع واخافن لا تنقهر بلعتها وسكتت، طبينه للبيت اريدن بس الوكت يكضي ويجي باجر احس ساعة ساعة الحد ثاني يوم العصر الساعة ب٣ خابرني گال
-هسه ســليم ووهب راح يجوني.
-وليمت تجي لبيتنا؟
-اول ما انزل عليكم اشوفنج يله امشي الاهلي.
-خاف زحمه.
-لا، هوه كهلان موجود؟
- اي هسه راح يجي من الگيعان.
-يله اسوي روحـــي متخربط يم بابكم حتى يطببوني البيتكم وتسويلي اكل واشوفنج.
ضحكت وريمه تغمزلي سديت المكالمه منه سويتله اكل وسويت چاي هدرته وعفته مبدله وافتر بالحوش وشمس وزهره يلعبن گدامي كلساع احن الالعابهن واريدن امشي العب وياهن من اعاين للحلقة بأيدي اكعد.
طب كهلان للحوش وهاسكي وراه بدأ يتعلم عليه ويتصرف نفس هاسكي المات بس ما صار بنفس المعزة ،
غسل ودار وجهه عاينلي حاطه شال على راسي بس شعري مفتوح مبين من جوه الشال درت وجهي منه مستحيه وريمه تحمحمت عاينلها ومشه يمها اسمعها تحاجيه سكت.
شويه وسمعتهم يدكون هورنات بباب بيتنا طلعلهم كهلان وانه وريمه نعاينلهم، ابتسمت بس شفته نزل من السيارة ضحك سلم على كهلان ووگف گدامه يحجي وياه وكض بأيده يميل يريد يطيح للگاع كضه كهلان والولد التموا عليه يگلوله
-شبيك.
بريا:: دخت رجليَّ ما يشيلني.
كهلان:: ســليم وهـــب شيلوه ودوه الغرفته خلي ينام يرتاح.
شال راسه عاين الكهلان وسليم ووهب كل واحد كضه من رجل وايد مددوه وشالوه يمشون بيه البيت اهله وهوه يعاين ليوره وكهلان يصيح وراه .
-خل يسوولك لبن حط عليه ملح واشربه هسه تصير زين.
بريا:: مالك غرض.
-يطبك طحيل ضل.
ريـــمه طاحت بالگاع تضحك بلا صوت وتلطم على رجليها ركضت للباب الثاني اعاين وراهم شايلينه وهوه يعاين ليوره على باب حوشنا كسر خاطري طب طــروادة للبيت وكفت ريـــمه مختنگه وتمسح بدموعها كلساع تريد تضحك وتكض روحها كال
-طبعاً هذا عنده فقر دم اكلهم غاد كلاوات وهل يدوخ.
ريـــمه:: اي خطيه والله.
نقذني صــيهد من خابره ومشاله ركضت للتلفون توني اكضه وخابرني متحلف بكهلان ضحكت
-اوديلك اكلك؟
-وديه ما شفتج عاد اكل من ايدج.
رحت اتوسل لحسين حتى يوديه گال
-اكعد غاد بنص النخلات واكله.
-لا تصير چلب حسين جا بريا يحبك.
حسين:: خيولي الحبني والضل هسه ميت عليه انا؟
درت وجهي منه زعلانه بس هيج ينجبر يسوي الاريده اجاني گال
-يله عمي يله.
حطيت الصينيه بأيده اخذها وراح، طبيت يم ريـــمه بالغرفة علاوي يبجي حاطته بحضنها تسكت بيه ضحكت گالت
-هاي گد ما ضحكت على بريا ابني هسه راح يبجيني
-هههه، ها عمه علاوي شبيك حبيبي؟
وكفت تهزه بين اديها تريده بس يسكت ماكو شلع گلبها بالساعة ضل يبجي الحد ما نام اديها تگطعن.
ثاني يوم اجه بريا واكفه يم باب الحوش گـــلبي يدك بقوة فتحتله الباب طب مبتسم
-السلام عليكم
-عليكم السلام
شال راسه عاين بالحوش مناه ومناه شاف محد موجود جرني من ايدي الصدره يشبگني حييل عيرت ايدي على ظهره اجر نفس براحة شكد مشتاگتله وشگد خفت من طول يله نزل وخرت من صدره من حسين صاح
حسين:: هاااه هاااه سالمين.
عاين لحسين يضحك كاض ايدي يعصرها بين اديه وگال لحسين
-هم انت عرفت حضي.
حسين:: هناه راح اكعدلك اصورك الطرواده بس تتجاوز الخطوط الكهربائية.
ضحكت وحسين يغمزلي
حسين:: انا بظهرج فنه التعده الخطوط.
بريا:: ادري عمي شمخلف ؟ منين هاي خباثتكم.
حسين:: تعلمناها من شاكر
يحجي همس ويتلفت لا ريـــمه تسمع، ضحك بريا كعدنا بالحوش نسولف وحسين يروح ويجي يمنا وشمس وزهره يلعبن گدامنا عاين بوجهي يسأل
-شقاهرج؟
دنگت ساكته جريت نفس متحسره مد ايده يرفع وجهي
-شبيج رنـــه؟
عاينت بعيونه اريدن ابجي وهو متاني احجي سولفت ودموعي يجرن مد ايده يمسح عيوني، محتار.
بريا:: انتِ مو بعيده عليها هذول احنا ضلي يمها ثلث ساعات من انا بالدوام باتي يمها شگد ما تردين.
هزيت راسي لا مدنگه ودموعي تطيح بحضني
-انه جان عبالي طــروادة يرضى تعيش يمي ببيتكم.
-حگه رنـــه لا تلومينه ما يصير النوب نفتح علينا باب ويردون اهل منذر يداعون بيها.
سكتت بس دموعي يجرن وهوه هم محتار مثلي ضل يمي ساعة وطلع، لليل الساعة بالتسعه خابرني
-بعدج ضايجة؟
-لا.
-همم جذابة.
سكتت أشخبط على الدفتر.
-رناتي
-هممم.
-حاجيت كهلان گتله ابني بيت بصف بيتكم الحايط على الحايط ونحط باب بيناتنا تطلعين وتطبين عليهم وشمس بينج وبينهم يرضيج هيج حجي حبيبي؟
ذبيت القلم ومسحت وجهي اركز وياه
-شلون يعني
-مو تردين شمس وياج بنفس البيت ؟
-اي
-اي ابنيلج بيت بصفهم كلش حايط على الحايط ولا تحسين بروحج بعيده عنهم وما تطلعين من الحوش وتفترين يله تطبين الهم لا احطلج باب بيطن الحوش گبل تطبيلهم خوش حجي هيج ترضين؟
-وكهلان؟
-رضى والله حاجيته گبل لا احاجيج.
ضحكت مكيفه
-بريا
-خاب يا روح بريا.
-والله العظيم اموتن عليك
-يا بويه
اجت شمس للغرفه وبس شافت التلفون بأيدي واضحك ركضت علي جرته من ايدي وحاجته كلمتين وسدته بوجهه تموتني من الضحك
گمت يم ريـــمه شاطت روحها من علاوي بس يبجي اخذته وراحت الخاله ايمان خاف ممتون شويه وجابته يناشغ ينامله ساعة ويگعد يبجي بصريخ عبالك مكروص نفتر بيه اثنينا بس نريده يسكت ماكو
شوية وضلّ يتقيئ مختنگ تسودنه خابرت كهلان ميته من الخوف وريمه ترجف كلها، بساع اجانه اخذه من ادينه غسل وجهه ويسأل. شصاير. وريمه تبجي
-بس يبجي موتني ومن رضعته تقيئ اختنك بأيدي جا مات.
-كومي بدلي خل ناخذه للعيادة.
كوه كامت غسلت وبدلت اخذوه وراحوا گـــلبي نار للغروب يله اجوا جايبيله علاكت علاج وايده الصغيره معلكين بيها كانونه گـــلبي انطحن عليه حطته ريـــمه بحضنها تبجي وزهره تبوس بأديه شيب گلبنا الليل ما نمناه من گد ما بچه، للفجر غص وسكت صرخنا متسودنين وكهلان جره من ادينا وركض بيه للسيارة وعبود وسجاد طلعوا وراه يركضوا.
تسودنا نصرخ وراهم. اجوا الولد يتراكضون سلطان شبگ ريـــمه يحاجيها وهيه ملخت روحها تلطم على وجها
-ابني مااات ابني ماااات.
يخابرون على الولد وماكو راحت ارواحنا يله سجاد رد على سلطان ونسمع صوت علي يبجي بنفس الصريخ جراها سلطان
-هاااي اسمعي اسمعي صوووته.
كمنه بساع لبسنا عبينه عفت حسين يم البنات ومشينه وي سلطان وسليم للمستشفى لكيناهم بالطوارئ علگوله بخاخ وكالوا مابيه شي علمتوه تشيلونه وهسه تعاجزتوا منه تعوفونه بالگاع طبعاً يبجي.
وكهلان وريمه يعاينوله بقهر اثنينهم شويه وطلعنه ردينا للقرية نايم حطيناه بفراشة طلع كهلان يم الولد بالحوش ضليت كاعده يم ريـــمه الدمعه مانشفت من خدها للصبح گوه داومت عيوني يغمضن وحدهن ومن رديت لگيته على نفس الحاله تفتر وهوه بين أديها يبجي سودنه العصر اخذوه للعلويه نشرت عليه وقرت عليه رجعوا شويه اهون ما يبجي مثل اول يوم.
بــدور:: شكد توسلت برنه تنتقل وياي اضوجن وحدي ولا رضت اداوم وكل ما وحده تريد تصاحبني اذكر اشواق وابتعد وهيه هم من تشوفني جني معقده تعوفني وتروح، تلعب روحـــي كوه اكضي الدوام. رحت للحانوت كبل لا يعزل اشتريت الرضا وطلعت امشي وي البنات وهوستهم ابو الخط يوكف بالركن يگول حتى ما يكضني الازدحام
جاي امشي بنص الشارع ووكفت بلعت ريك گـــلبي يدك حيل لمحته واكف يم سيارة وبصفه بنيه حلوه لابسه عباية وتعاين بوجهه دار باتجاهي شافني وحاجاها عاينت عليَّ وانه ضاله واكفه بنص الشارع مدري شمالني
عبرت من يمي بنيه وياي بالصف حاجتني
-ها بدور شبيج؟
عاينتلها مرتبكه هزيت راسي ماكو شي والبنيه وصلت يمي وگبل شبگتني
-بــدور حبيبتي شگد مشتاقتلج.
وخرت منها اعاين بوجها اول مره اشوفنها.
-شلونج حبيبتي.
-شعليج؟ ما اعرفنج انه شني مشتاقتلي؟
كرصتني من ايدي مبتسمه نفضت ايدي منها خازرتها همست
-الج امانه يمي اجيت أرجعها حبيبتي
اعاين بوجها ما فاهمه،جرتني من ايدي لصف الحايط طلعت من جوه العباية علاكه مال هداية صغيره مدتها الي مبتسمه
-هذا شالج اخوي حب يرجعه الج وكلش شكراً لان ساعدتيه هوه ما يگدر يحجي وياج لهذا السبب اني ساعدته.
گـــلبي يدك حيل وبكل كلمة تحجيها يصير وهـــب گدام عيوني حجيت وياها بنتر
-وانتم جايين من بغداد ليجاي علمود تردولي شالي؟
-لا حبيبتي اختي متزوجه هنا واجينا نشوفها مرينا نرجع شالج طبعاً من اول ما جعفر تحسن اجه يرجع شالج ورحت وياه للمدرسة اللي بقريتكم گالولي انتقلت .
سكتت اباوع لوجها وارفع راسي اباوع الاخوها مدنك ما يباوعلنا احذت العلاكه منها حجيت بهدوء
-هوه ما يسوى ترجعونه والله.
-اخويه ما قبل گال البنيه ساعدتني ولو ما هيه احتمال اني ميت.
-ما سويت شي.
بقت تباوع بوجهي ساكته تذكرت خواني من اطلع وياهم ويتلاكه وياهم شخص يعرفونه يگلوله
-ما تتفضل ويانه
كتلها
-تتفضلون ويانا على الغده؟
-لا حبيبتي مشكوره فـــدوه الگلبج
هزيت راسي خوش مشيت. واباوعله ابد ماشال عينه علي اخته تمشي بصفي عجبتني عبايتها حيل سوده وهيه شكلها كله عبالك مبين علويه مدري شلون هيج يبين عليها گتلها
-عبايتج حلوه منين؟
ضحكت تباوعلي ونمشي سوه
-تستاهلينها.
-تسلمين، لا كليلي منين حتى اگول الامي
-ما اعرف اسأل امي واذا اجيت لهنا آجي واكلج
سكتت وصلنا النهايه الشارع سيارة الخط وره سيارته عاينتله لابس بنطرون وقميص اسود منزل عينه درت وجهي ورحت للخط وبس وصلت للبيت گلت الندى وجويريه
-خاب هم اجه مراد علمدار.
اثنينهن عاينن بصدمة خوفني
-والله معليه هوه اجه.
حجيتها وشردت صعدت فوك خايفه، بالليل گلت الامي لا تكعديني من وكت جمعة خليني ارتاح، عافتني للعشره وكعدني رضا نزلت جوه ارطن عليهن للعصر گالوا اجوا بيت سيد عباس صحت
-اهوه هسه يجي صــيهد بعصبيه ماااي چاااي.
ووي حجايتي طب وهـــب خازرني جرني من جتف دشداشتي للغرفة روحـــي راحت دفعني ونتر
-سيد جعفر هم اجه لمدرستج بعد؟؟؟
هزيت راسي اي بخوف
-امس.
فتح عينه بصدمة وانه اسولفله كلشي بالحرف الواحد. طلع من الغرفة رگع الباب وراه حيل ضليت اطكطك بأصابعي واجت رغد يمنه ندى تسولفلها وكلهن خايفات، راحت رغد تتصنت عليهم من الباب لان كاعدين بالدوانيه مو بالمضيف وكفت يمها خايفه من صــيهد مدري شبيه
اسمعهم يسولفون بالعشاير والثارات النوب رد سيد عباس گال
-صــيهد انا جايك اليوم ولاول مره اطلبك.
صــيهد:: سيد انتَ تأمر ما تطلب صدك چذب اشرب چايك.
سيد عباس:: لا يابه ما اشرب چايي خلني احجي انتَ صاحبي وعزيز عليَّ واولاد عمك كلهم الله يشهد حسبة ولدي وانا ما ناوي نضل بس صحبان رايد اطلب ايد كريمتكم الابني جعفر اناسبك على سنة الله ورسوله.
عاينتلي رغد تلطم على خدها وانه اسب بيهم وهيه تسد بحلكي
-ووولج ساده يشورون.
صــيهد گالهم
-اتشرف بيكم سيد لو عندي تگبع وتاخذ بس اخواتي متزوجات.
جعفر:: مو كلهن ! انا اجيتك من الباب شاري نسبكم ومتمنيه وهاي گدام ابوي وعمي انا حاضر بالتردونه.
سكتوا كلهم وشوي وصيهد اعتذر منهم ما راضي تشكروا منه وكاموا يطلعون دفعتني رغد تشردني ركضت للدرج صعدت فوك عشر دقايق وسمعته صاح بكل صوت
-بدورررر.
ماتن رجليَّه مسحت وجهي ونزلت اركض البنات يحجن وياه ووهب واكف وراه وهوه يعاين للدرج خازرني اشر بأيده
-تعااااي.
رغد:: بس حاجيني صــيهد بس كلي ياهي مالتها هيه؟
نزلت البايات رجليَّه يطكطكن بس وصلت الثالث بايه مد ايده عتني من جتفي جلبت بالمحجر كضته رغد خايفه خاف يطكني
-لو جذبتي اعدمج.
هزيت راسي لا ارجف وعيوني من الدموع مغوشه.
-من جنتِ ببيت سيد عباس اجه احد للبيت؟
شلت راسي من وجهه اعاين الوهب الواكف وراه هز راسه لا رديت اعاين بوجهه صــيهد نتر بصياح
-احجيييي.
-لا.
عتني حييل ينتر
- لا تچذبين علي منين يدرون عندي اااخت؟
بچيت مچلبه بأيده ارجف وهوه ياخذني ويجيبني جره وهـــب دفعه ووكف گدامي حاميني صاح بوجهه
وهـــب:: اذا اكو واحد غلطان انا مو هيه، انا الوديتها للبيت وعفتها بوحدها وسيد جعفر من متصوب شارد البيتهم مايدري بيها وبس عرفها اختي ضلت قافله الباب عليها وهوه طالع من يمها، كالتلي ولد مصوب دخل علي وانا ما صدگتهاا، ما مسويه شي حتى تحاجيهاا.
جر وهـــب من ياخته يغلط ويصيح بوجهه بچيت بخوف وهمه يتعاركون بنص الهول طك وهـــب على وجهه ورغد بينهم بس تريد تحيز بيناتهم يغلط ويسب متسودن ووهب ما يتنازل ويصيح جا وين اوديها وابوك راد يذبحها.
رد طك وهـــب مره ثانيه ندى واكفه على صفحة تعاين لوهب وتبجي ورغد تصير بينهم ويدفعونها بأخر مره دفعها صــيهد طاحت كاضه بطنها وتصرخ يله فكوا عركتهم وصيهد طلع من البيت يتراجف، ورغد كالت الوهب مابيه شي جذب، بجيت الحد ما تعبـــت تعاركوا من وراي وانه ما مسويه شي .
للعصر وفزيت على صوت طفل يبجي نزلت جوه لكيتها ريـــمه وبأيدها علاوي ناط من البجي وابوي يگلها
-محسود هذا الفرخ.
امي حطته على رجليها دهنته بزيت زيتون وهوه ميت من البجي.
ريـــمه:: گـــلبي انمرد بس اريدنه يسكت اخذته من عمه ورديت للبيت كهلان حاير بيه وياي ما ندري وين ناخذه وين نوديه الحليب يرضعه مناه ويتقيئ مناه ، مكابلته وكاعده ابجي عاجزه .
للغروب واجت هاجر يمي وجها اصفر وبأيدها ورقة مسحت عيوني واخذتها من ايدها فتحت عيني على وسعها وانه اقرأ المكتوب
-سمعت امي تحجي وي وحده وانطتها اسمج وإسم علاوي.
صرخت متسودنه وألطم على وجهي اريدن اروح عليها وهاجر كاضتني ما راضيه تخبلت خابرت كهلان اجه علي سولفتله ابجي وهاجر تأشر براسها لااا تحجون حاف تنعرف هيه الگالتلنا خافت، اخذناه ورحنا الساده
حطيته على گـــلبي . ابجي وينك وين السحر يا روحـــي ووين وين العذاب ليش يمه ليش ابني شنو ذنبه.
ومثل ما رحنا رجعنا كلشي ما تحسن يغص بين ادينا كهلان تسودن هد على اهلي وتعارك وي الولد كالهم امكم سحرت ابني
اسمع صوت خواني وعركتهم وي امي وهيه تدعي علي وعليه وتحلف ما مسويه شي كضه حيلي ورنه مكابلتني تبجي وياي. ابني انتهى صارله يومين حليب مايضل ببطنه، الروحي ما توسلت بس ميخالف اتوسل الخاطر ابني.
غافلت كهلان وطلعت البيت اهلي دموعي على خدي طبيت للبيت بس هاجر كاعده على بايات الدرج فتحت عينها بصدمه مت شافتني حاجيتها صوتي مختنك
-هاجر امي وين؟
اشرت على الغرفة مسحت عيوني ومشيت فتحت الباب وبس صارت عيني بداخلها شهگت فاتحه عيني بصدمة وگلبي حسيته دك براسي .
شكرا لزيارتكم عالم روايات سكيرهوم
