رواية متلازمة الحب الفصل السابع بقلم جمانه السعيدي
امي....اخذت اجازه على السريع وطلعنا
اكو حديقه عامه قريبه على المستشفى كعدنا بيها
خالد...اني مااعرف احجي حجي حلو والف وادور عليج
اريد اكون صريح
اذا اطلب ايدج توافقين
بس اني فقير وكلشي ماعندي
راح انطيج ٥٠٠ الف التعويض الي اخذتهن بلحادث مهرج
واذا توافقين نسكن بيتكم منا لمن الكه شغل زين
ونطلع بيت هااا شكلتي
هناء...من كد الفرحه بقيت ساكته اريد اركز بلكلام
واخيرا اني راح ازوج معقوله الحلم اتحقق وراح ازوج
خالد...هااا شو صفنتي يمكن ماعجبج العرض
بس اني حجيتلج قبل عن وضعي اني ماعندي اهل ولا عندي فلوس ولا عندي شهاده
رجال عامل اذا اكو شغل اشتغل واذا ماكووو
اكول الله كريم
هناء...موافقه وهاي الفلوس خليها عندك
اشتري ملابس حلوات وعطر راقي وروح للحلاق
لان اني ناويه اسوي عرس
احنا بنات عايشات صار سنيين وحدنا
لازم اذا دخلت حياتنا تدخل بشكل رسمي
مااريد احد يحجي علينا وعلى سمعتنا
خالد...ولله حقج اخذي الفلوس واني أدبر نفسي
هناء....لا مااخذهن اريدك تطلع واحد ثاني اتباها بيك كدام الناس
حددنا موعد المهر اني عندي تراجي ومحبس وكلاده زغيره رحت اشتريت حلقه ذهب
وشتريتله حلقه فضه
اجرت بدله وردي ورحت للصالون كتلها طلعيني وحده ثانيه يومين تشتغل ام الصالون بوجهي وشكلي لمن طلعت
حلوه شويه حلوه
لا يصلح العطار ماافسده الدهر
هي هاي خلقتي ام الصالون شراح تغير
المهم عزمت الشارع كله الزغيره والجبيره
لان اني نفسي ماكنت مصدكه
اني بعد كل هذا العمر راح ازوج واخيرا
جبت بدله البيداء طلعت تخبل ولو هي حلوه
اجا خالد وياا ثنيبن من اصدقائه وشيخ يعقد النا
لابس قاط نيلي وقميص ابيض حالق شعره العطر يهف
طالع حلو
قبل وجها كله شعر وشكله تعبان
مبينه اني اكبر منه
المهم عقدلنا الشيخ وصرن البعض وهاي كانت فرحت عمري جمانه السعيدي
بيومها اول يوم يشوف بيداء
تعجب بيها يكول هاي شكد حلوه كانت خايفه منه
لان احنا ماشايفين رجال ولا داخل علينا رجال للبيت ابد
بعدين حجا وياها
بلبدايه خاتله وراي وماترد علي
شويه شويه صارت احسن استلطفته
بس مايفهم كلامها اني كنت المرتجم بينهم
ثاني يوم رحنا عقدنا بلمحكمه
اني اشتريت غرفة نوم مستعمله بس نظيفه
واشتريت ملابس العرس والمكياج
صديقاتي جمعلي فلوس كهدية العرس عدلت شويه من وضع بيتنا ورتبته على العرس
زواجنا كان بسيط يعني ماعزمت ناس بكد الناس الي عزمتهم بلمهر كم وحده من الشارع
اجا خالد بسيارة واحد صديقه
طلعنا بزفه وهورنات من بيتنا
ويانا سيارتين بيهن جماعته أخذنا فره بلشوارع
ورجعنا للبيت
ماشفت احد من اهله لا امه ولا خاله ولا عمه
بس اني شيهمني من اهله المهم احنا ازوجنا على شرع الله
وكدام الناس كلها
ازوجنا اني وياااا
بليلته بيداء بقت تحوس اول مره انام بعيد عنها
كوه هدئته
كنت حاسه نفسي بحلم معقوله اني ازوجت
ولكيت واحد يرضا بيه بكل ضروفي
جمانه السعيدي
شكد جنت فرحانه رغم هاي الزواجه اجت على خالد بلوشي كلشي مادفع
اجاني بطوله مثل مايكولون
كنت اهتم بنفسي بشكل مبالغ بي
البس اتمكيج اتعطر اصبغ اضافري
الغرفه تلمع مااريده يشوفني مو حلوه لو جبيره علي
اريد ابقى حلوه بعينه كل الوقت
بعد العرس بااسبوع اني رجعت الشغلي وهو طلع يدور شغل
يوم يشتغل ويومين يكول ماكو شغل
اني ماجنت ادقق على الشغل لان عندي فلوس
وماناقصني شي
اذا يوم يشتغل خالد يجيبلنا كيلو لحم
لو دجاجه لو فاكهه يجيب شي واحد
شكد افرح من اشوفه يدخل عليه بعلاكه
صارت صداقه بينه وبين بيداء كلما يطلع يجيبلها بجيبه نستله مصاصه حلقوم
من تشوفه يدخل تفرح بي حيل
مرن ست اشهر واني كل شهر انتضر اطلع حامل وماكو شي
كل شهر احسب وانتظر بدون فايده
قررت اسوي فحوصات كامله واشوف شنو السبب
هناء....خالد اني اريد طفل
خالد...اي واني شبيدي بعد وكت
هناء...لا راح اسوي فحوصات واذا اني طلعت سليمه
تروح انت تسوي فحوصات
خالد...وقابل اني شبيه شاب بعدني بحيلي
هناء...ميخالف هاي الشغله مالها علاقه بلشباب
ثاني يوم من وصلت للمستشفى قررت اسوي فحص
سويت كل الفحوصات الي اني محتاجتها
كنت منتضره النتيجه على نار
بس مع الأسف طلع عندي عقم
تخبلت شلون اني مايصير عندي اطفال شلون الحلم الي علموده ازوجت مايتحقق
ليش اني اعيش واموت واني ماحاسه بالامومه
ياسمين....شلون عقم يعني اني مو بنتج
امي...اسكتي لان تعبت اعوفج وانام
ياسمين. ...اريد افهم فهميني
امي...اصبري مو جايتج بلحجي
عفت الدوام وطلعت ماكدرت اكمل رجعت للبيت كل عينه شكبرها من البجي
من شافني خالد اخترع من منضري
خالد...هاي شبيج ليش تبجين شصاير
هناء.... اهييي اني مايصير عندي اطفال
بعمري مراح اسمع كلمة ماما
خالد...على هاي تبجين عبالي طردوج من الشغل
هناء...لو طاردني من الوضيفه ولا هاي المصيبه شلون بيه
خالد...انتي ليش مكبره الموضوع
واذا ماصار جهال ترا عادي اني مااريد جهال
هو اني شفت من طفولتي اله اجيب اطفال
شو بطلي كومي لا تبجين اني مستعد اوقعلج اني ماريد اطفال وابصم بلعشره
هناء...اهييي اني اريد اني اريد اصير ام
اني محتاجه اكون ام اريد اطفال
خالد...شنو تعاندين رب العالمين هي كوه قابل بس انتي
آلاف الناس بدون اطفال
يله هسه شنو الأطفال نمونه خل نعيش النفسنا وبس
هناء...خالد ابد ما همه زعلي وكان لا ابالي
والموضوع ماهمه بس اني عبالك نار تسعر بكلبي
شلون ابقى بدون اطفال
شلون مااصير ام حالي حال باقي البنات
صار عندي كئابه حاده وحتى الاكل كطعته
بعدها قررت اعيد التحاليل برا على حسابي بلكت تطلع غلط
عدتهن مرتين وماكو فايده
نفس الشي ابد ماكو امل اصير ام بيوم من الايام
خليت وبطلت رضيت بقسمه الله وسكتت
بس دائما كنت احسب حساب خالد
خاف بيوم يكول اريد ازوج اني اريد اطفال
شلون بيه شلون راح اكدر اتحمل
كلش هذا الموضوع جان قالقني ومخوفني حيل
رغم هو ابد لا يحجي بهذا الموضوع ولا يجيبه على السانه
بطل خالد يطلع للشغل
كنت احسه مان عليه لان قبل يزوجني واني اكبر منه ومو حلوه والنوب مااخلف
طبعا مني السبب كنت اضغط على نفسي حتى ارضي
كنت احرك روحي حتى هو يبقى وياي ومايزعل مني
لو يعوفني بدا يستغل هذا الشي الصالحه
كام يتحجج
ساعه يكول حاره ساعه يكول منتضر صديقي يجيبلي
شغل ساعه يكول اني اليوم تعبان
اتكل عليه بكلشي حتى مصرف اله خاص ياخذ مني
عبالك مامزوجه
ولا غيرت شي بحياتي بلعكس اجتني مسؤليه جديده
خالد يريد مني مصرف
مرات انقهر واتعارك وياا واكله اطلع للشغل
ومرات اكول يله اسمه رجال بلبيت على الاقل مااخاف مثل قبل
الصراحه زواجي كان أكبر غلط ارتكبته بحق نفسي
لا حصلت جهال ولا عرفت اختار صح
وكل الوقت قلقه خاف يعوفني ويزوج غيري
وشلت مسؤليته على راسي
[جمانه السعيدي](https://www.facebook.com/groups/3108934652754333/user/100024475266488/?__cft__[0]=AZUzsVkfah2xoHVkU2LF4iRP4U-fnbGBKRcg59NvP_WbsTbwke1CAM_delMDNBYhXCiiZuCegG4SbhdMCYMAVRAH2BpCCJYs9m1P4ab8xeZzANbLt_HmiU4WJmBfm1kmS2DJxFSfozE943D3jnpoBWkqaGtkNLXvYeVeaEnhyXcFYicvAgxb8BApRSBm5-WsCweuvKF_qIKx1h7Y6L6dcYME&__tn__=-]K-R)
هناء...خالد يخلص كل الوقت نايم بلبيت مايطلع مرات يطلع العصر شويه ويا جماعته ويرجع نص اليل للبيت
بيداء بعمر ١٥ سنه يله اجتها الدوره اول مره
خلصتها بس تبجي يومين وهي تبجي من الالم وتخاف من منضر الدم والوجع
من بعدها اني كمت اخلي تقويم ااشر علي موعد الدوره
حتى استعد الها
لان الحد ما وصلت الهذا عمرها بعدها من تجيها الدوره
تبقى تبجي وتنهار فد مره
تكطع الاكل تبقى لازمه بطنها وتبجي
اني انطيها فولتارين مهدء واخلي جيس مي حار على بطنها يومين من كل شهر ادخل انذار بسببها
يعني تعيط بصوت عالي وتنهار تبقى بس تبجي
كمت ااشر موعد الدوره حتى احضر نفسي علمودها
رجعت مره للبيت لكيتها نايمه مو من عوايدها تبقى نايمه الحد موعد رجعتي من الدوام
لان اني الساعه ٣ الضهر يله اوصل للبيت
ومالكيت خالد موجود
اجيت اكعدها مثل الخدرانه
هناء...بيداء بيداء ليش نايمه حبيبتي شو اكعدي
اجيت ارفع الغطه عنها لكيت اكو دم على ملابسها وعلى الفراش
شنو هذا الدم
هناء...بيداء حبيبتي شنو هذا
البنيه ماتكدر حتى تفتح عيونها خوفتني باوعت للتقويم
بعد ١٢ يوم الموعد الدوره
يعني معقوله هلكد تقدمت عليها
ايجوز عدها خربطه بلهرمونات لان تاكل حلويات هواي
حتى هليام سمنانه ووزنها زايد اكثر من قبل
كوه كومتها من مكانها جان تكول اخ اخ اوا يوجع
كلت الها اي ماما كل مره يوجع هسه اجيبلج حبايه
واحضر جيس مي حار
تعاي اغسلج بلاول اخذتها للحمام غسلتلها ولبستها حفاظ
وهي تتالم
بس اني متعوده على هذا الوضع
انطيتها حبايه فولتارين وجبت جيس مي حار كتلها الزمي على بطنج الحد مااحضر الاكل اليوم يمكن مااكلتي
اني اطبخ بليل لان ارجع تعبانه بس احمي الاكل وناكل
حميت الاكل وصبيت جبت الصينيه
لكيتها نايمه
يااا هاي شبيها اليوم ليش بس نايمه
شكرا لزيارتكم عالم روايات سكيرهوم
