رواية ناديه الفصل الثامن 8 بقلم انين الليل

انا ناديه 

الي وعيت على الدنيا وانا شايله ذنب ما الي بي يد وانا زغيره من امشي الناس تباوعلي وتاشر عليه 

ودائما امر من يمهم واسمع يگولون //اي هي هاي !

وناس تگول //لا يمكن اختها يجي الجواب لا اختها ازغر منها هي هاي

وبالمدرسه ياما عانيت لكن بيبي دائما تگلي ما عليج انتي سباعيه ما خليتي حق ابوج يضيع 

چان عمري تلث سنوات وانا نايمه ومتغطيه واسمع صوت بابا وهو يحچي ويه امي

—-مياده تدرين ما اكدر اعوف المحل ولو ما هالعشره الي انطيها الهذا وذاك من جماعتي حتى ياخذون مكاني 

بالمركز صدگي ما اگدر ادير المحل وانتي كل اسبوعين ترديني اوديج الاهلج 

—-اي عباس تعرف بيه اني متعوده على امي واخواتي اني اهنا منو اليه اضوج ابحدي 

بابا //لاتنسين مياده الطريق بعيد وانا عندي دوام والمحل ما اكدر ياموديج يا مرجعج

ماما //عباس وانا هم اضوج انت النهار كله مو يمي والله اضوج 

بابا جر نفس واتحسر وگلها //ياالله يابه كعدي البنات وبدليلهن بين ما اجيب التكسي حتى نروح للسره 

ماما //اي ما اعرف ليش مانروح بسيارتك 

بابا //الطريق بعيد واتعب من السياقه ياالله اتحضري بس امر ع المحل واجيب تكسي واجي

راح بابا وكعدتني امي عبالها نايمه بدلتلي وغيرت الحنين وهي راحت لبست تنوره وقميص 

واجه ابوي الي اسمعه يكلها 

قللي المكياج شويه انتي حلوه بدون مكياج 

هي تضحك وتكله //ههههههه اعرف بيك تغار مني لان احلى منك 

يرجع يحظنها ويگلها //مو تتاخرين راح اشتاقلج 

امي تجاوبه بدلاعه //مو بگدي بس شسويلك ما انتقلت البغداد اقلها اصير قريبه على اهلي وهم هي ونسه وتخبل

وطلعنا وركبنا بالتكسي بابا بالصدر يم السايق وانا وحنين وامي وره دخلنه للسره وبيومها چان ازدحام وگفنا على 

صفحه وبابا راح يشوف السيارات غاب شويه واجه ابوي گلها // ياالله گوه لگيت سياره

ابوي شايل الجنطه بايد وحنين بالايد الثانيه وامي شايله جنطه ثانيه ولازمه ايدي ورحنه بالسياره وصلنه الظهر 

البيت جدي وتلكونه خوالي وخالاتي ابوي راد يرجع بس خالي عدي ما قبل كله بات والفجر اطلع بابا كلهم 

لا ارجع وانام لان باجر عندي دوام 

اتغدا بابا ومن راد يروح صاح الامي وكلها 

من تردين تجين خابريني قبل يومين حتى بلكي احصل اجازه واجيكم

طلعلها فلوس هواي ونزل بوسنا انا وحنين وانا كتله 

—بابا خلي اروح وياك 

لا حبيبتي ابقي يم ماما لان انا عندي دوام 

—اروح البيبي منيره 

بابا //ان شالله مره ثانيه

وباس ماما وصاها علينه وراح وبس طلع لزمتني امي من اذاناتي ولوتهن حيل وهي تكلي 

شنو بيبي منيره احسن من امج حقيره اله اكص السانج 

بيبي امها كلتلها //شبيج ويه البنيه مياده اتخبلتي غير بيبيتها ومربيتها 

امي //اي مربيتها ع الحقد والكره والچذب

بقينا عشر تيام وامي راحت هي وبيبي وخالاتي للزياره والبغداد ورجعت كلش فرحانه واشوفها شلون 

تصرف بالفلوس وتشتري هدايا الخالاتي وبيبي وتشتريلنه ملابس اما هي فتصبغ شعرها وتشتري ملابس 

حلوه ومكياج والملابس الي تجيبهن من نجي البيت جدي تنطيهن الخالاتي ونسوان خوالي

تقريبا تاسع يوم ابيت جدي قررو يرحون للحديقه واجت خالتي وعمو منذر ورحنا واتعشينا ولعبنا 

منذر كال الماما //عكب باجر عندي ايفاد للبصره اذا يعجبج ترحين وياي 

بيبي كلتلها// اي ماما مياده روحي ويه منذر خطيه عباس يارايح ياراد 

امي سالت عمو منذر// تروح بسياره خاصه لو عبريه 

منذر //ليش تسالين 

لان عباس ما يقبل بسيارتك الخاصه اذا عبريه اروح وياك بس اول اخابره 

منذر //لا ما اخذ سيارتي اروح عبريه

ورجعت امي واخذت التلفون للغرفه وبعدين طلعت وخابرت عمو منذر وكلتله 

اي عكب باجر الصبح مر عليه ونروح 

ولمينه اغراضنا وماما كل شويه تخابر الصبح وصلنه خالو عدي للكراج

 خله سيارته اباب الكراج ودخل شايل حنين وامي لازمه ايدي وجنطه 

وعمو منذر هم شايل الجنطه وكفنا على صفحه وخالو كال 

هسه اروحواشوف السره

سمعنا واحد يگل الخالي //اشلونك عدي 

خالي انتبه على الصوت وكال باستغراب // منو هذا سلدار 

اي سلدار اشلونك عدي (واتحاضنو) وهو يكول وين هالغيبه لاتسالون ولا تجوون 

خالي عدي //بهاالدنيا سلدار انت وين ما وين شخبارك 

سلدار //اسأل عنكم انت شلونك الوالد الوالده 

(وباوع الامي گلها )اشلونج مياده

شفت لمعه بعيون امي ردت بزعل — اهلا سلدار 

خالي عدي عرفه على عمو منذر واتسالم ويا وكله على جدو اتوفى من اربع سنوات 

سلدار ابدى حزنه واسفه وهو سال //وين رايحين 

خالو //لا انا جاي اوصل مياده وبناتها للكراج وابو علي يوصلهم ويا للبصره 

سلدار // زين لعد انا جاي اقبط للبصره ياالله الكراسي الكدام محجوزات الكم رووح عدي انا اوصلهم البيتهم

عدي //مو تصير عليك زحمه 

يازحمه- عدي -ناسي احنه متربين سووا 

عدي يكل المنذر / هذا سلدار جارنا تلاثين سنه ابوي وابو اصدقاء وبعدين احنا شلنه 

سلدار // گله النسيبك ابوي وابوك الله يرحمهم قبل لانصير همه جيران واهل 

عدي //اي والله دووم يسولف علينه وعلى خوتهم وجورتهم الحلوه 

سللدار /الحمد لله الله يرحمهم

سلدار ولد شاب ابيض وعيونه ملونات وشعره اشكر وطويل يعني حلو كلش عيونه كبار وكانت عنده منشأه 

بذاك الوكت 

واتسالم ويا خالي واحنه ركبنا بالمنشأه ويانه عمو منذر فضالنه تلث كراسي انا وماما وحنين باول كرسيين وعمو

 منذر من الجهه الثانيه يمه وبقو يسولفون ويضحكون ونزلو العبريه باحد المطاعم بالطريق وامي ما قبلت تنزل

 گالت دايخه ونزلت انا ويه عمو منذر وسلدار راح اخذ الامي سفري وانطا الها حتى تاكل وبعدين صعدنا بالمنشأه

 واجه سلدار جايبنه انا وحنين ككو وجبس اخذناهن منه بفرحة اي طفل من ينطو

امي باوعتله وكالت// موتوه ابو علي وكلهن وشربهن عصير 

منذر جاوب //هو خلاني ادفع يعني فوك ما قبل ما ياخذ كروه انوب راح جاب علاگه للبنات

سلدار //. شلقصه اني مثل عدي انت شتحجي اسألها من چان ابوي الله يرحمه يضربني وين البد كله عد 

خالتي ام حليم تلبدني وامي تجي وتسالها خيه وينه الهذا الي يريد يموتني 

تگلها // انوب هو يريد يموتج لو انتم ما تخافون الله نازلين بي ضرب

سالته —عمو ليش اسمك سلدار 

هو ضحك وكلي //عمو ابوي مسميني انتي منو سماج 

—انا بابا لا لا عمو سراج 

اي وانا هم مثلج سماني ابوي

وصلنه للبصره الظهر وهو ما قبل اله يوصلنه للبيت ورحنا لكينه بابا جاي ومنتظرنه وعمو منذر عرفه 

على سلدار وكله ما قبل ياخذ كروه وهو الي وصلنه ابوي اتشكر منه وكله اله يبقى يتغدا ويانه وبابا خابر ثامر 

العامل الي بالمحل وكله يجيب غدا من المطعم وامي صعدت فوك الغرفتها واحنه هم وياها واجه بابا وراها 

هي حضنته وكلتله //مشتاقتلك مووت 

ابوي حتى ما حچى باوعلي وگلي //روحي بابا اخذي حنين وانزلي جوه

ثامر اجه جاب الغدا وسلدار استاذن منهم يدخل للحمام الخارجي يسبح وهو جايب ويا ملابس اما عمو منذر خابر 

عمي هادي الي گله جايكم انتظروني لا تتغدون 

ونزل بابا وهو فرحان وامي هم نزلت وصارت تحضر بالغدا واجه عمو هادي واتعرف بسلدار الي كال البابا 

سلدار //يمته ما تقررون تسافرون قبل يوم خابروني وانا بالخدمه

واتشكرو منه ورا الغدا راح وعمو هادي ومنذر وبابا طلعو

العصر رن التلفون انا رديت چانت بيبي ام حليم واشوفها متوتره 

گلتلي صيحي امج 

رحت الامي لگيتها نايمه گتلها بيبي تريدج ع التلفون هي رفعته من يمها 

الو ها ماما 

اي اي ليش عصبيه اجي وافهمج

بعدين بقن يسولفن سوالف عاديه وصار بابا كل ما تقرر ماما تسافر البيت جدو ينطي خبر العمو سلدار 

 ونروح ويا وحتى منذر من يجي للبصره صار يجي ويا وصار سلدار صديق للعائله اما امي فصارت لازمه 

التلفون وتسولف وتضحك وكلام همس وهذا الشي كله عرفته من كبرت واستدركت الامور

وفد يووم اجه بابا من الشغل واتعشى وكلتله ماما //عباس باجر اريد اسافر اشوف امي 

ابوي باوع الها باستغراب كللها// شنو هاي مياده ما صار اسبوعين من اجيتي 

جاوبته بعصبيه //ما اعرف اليوم خابرت امي وصوتها ما عجبني اكيد مريضه 

بابا //ما بيها بس العافيه هالايام عدنا انذار وما اگدر اغادر المركز وما الي خلك اغيب ويعاقبوني اينقلوني 

الغير مكان 

امي بعصبيه //جاي اگلك امي تعبانه

بابا //وانا اگلج ما بيها بس العافيه انتي بس لا توسوسين 

امي تخوصرت //هاي لو امك چان ركضت واخذتها للطبيب بس لان امي 

بابا //تدرين بيه احب امج هواي اقلها جابتلي هالاميره الي تخبل 

امي تضرب رجلها بالگاع //ما اعرف انا اريد اروح

ابوي انتفض وكال الامي بعصبيه// شبيج انتي البيت هذا يگرصج يارايحه ياراده ما تگليلي شبيج

امي بنتر ردت علي //شكم مره اگلك اني على اعصابي عايشه اهنا وانت تگلي بس اوگف على حيلي اشيل 

لو البغداد لو يم اهلج يمته توكف على حيلك ما اعرف 

بابا //وانتي اهنا شناقص عليج

ماما //اضوج ما احب المنطقه 

بابا //ليش من اخذتج ما شرطتو علينه اشو بكل شي قبلتوا 

امي كالت //اي مو انا الحماره قبلت بيك بس شفتك ما اعرف شنو صار بيه عبالي من اخذك ما ترفضلي طلب

وصارت امي تيچي وزعلت من بابا ونزلت جوه بالصاله وابوي بقى بالغرفه يدخن جكاير وهو ضايج 

حنين نايمه وانا گاعده اباوع البابا وساكته نزل ونزلت ورا شافها تبچي لزم التلفون وخابر

الو اشلونك سلدار 

اهلا منو 

انا عباس ابو ناديه 

اهلا بيك خير 

لا هيج ردت اتاكد عبالي انت بالبصره 

اي اني هسه راح اطلع للبصره سراي فد ساعه ليش اامرني 

ما يامر عليك ظالم بس ام ناديه امها مريضه واحنا عدنا انذار بالمركز وهي لازم تروح تتطمن

سالدار //صدك تحچي باچر الصبح يمكم اخذها هي والبنات وانت ابو ناديه حاول تجي ويانه 

بابا //ما اگدر صعبه جاي اگلك انذار 

سالار //ولا يهمك بالخدمه اني ابو ناديه خلي ام ناديه والبنات يتحضرن اجي الساعه ثمانيه اخذهم وانا مسجل سرى 

بابا //اي ان شاء الله تلكاهن حاضرات راح ازاحمك 

سالار //لا ما كو اي مزاحمه 

بابا //بس هو رجاء سلدار وما اريدك تزعل انت هم على باب الله او لازم ....

سالار//لاتحجي هذا الكلام احنه ما بيناتنا وانتم مثل اهلي اكو واحد ياخذ من اهله كروه 

بابا//اي بس مو كل مره

سلدار //لا كل مره السياره مالتكم وانا سايق بيها الا اذا معتبرني غريب على مود بعد ما اجيكم للبيت ولا اكل 

ولا اشرب ولا ابات 

بابا بابتسامه //لا يمعود البيت بيتك انت شتحچي ام ناديه اختك قبل ما تكون زوجتي 

سلدار //اكيد طبعا ياالله خويه باجر انا يمكم

ابوي اجه يم امي وگلها سمعتي حضري البنات باچر الولد جيرانكم الله ينطي يجي وياخذكم 

امي ما حچت بابا اتقرب يمها وگللها //ليش زعلانه مو راح ترحين 

امي ما ردت علي رجع بابا وگلها //اي اريد اعرف شبيج ضايجه مو خابرته كدامج 

امي بدلاعه //شنو اروح ويه واحد يعتبر غريب عليه وزوجي باقي اهنا

بابا //لا مو غريب مو اكثر من مره وصلنه واهلج يگولون هو بمثابة اخ وامج تبوسه بخده وتكول هذا  

ابني انا الي مربيته ويه ولدي والولد مؤدب وهو صديقي وتعرفين انا ما ينطوني اجازه 

هي بدلاعه اتقربت على بابا وخلت راسها بصدره وكالت 

تدري بيه ما اگدر افارگك بس اخاف امي يصير بيها شي وانا مو يمها 

ابوي ظل يلعب بشعرها وكلامه صار متقطع //لا تخافين ان شاء الله ما كو شي

امي //ان شاء الله حبيبي حتى ارجع بسرعه لان راح اشتاق الك 

بابا ميلها من صدره ولزم ايدها وكلها // ياالله تعاي نصعد حتى تحضرين ملابس للبنات 

امي بابتسامه //محضرتهن بالجنطه بالاساس ما اطلعهن تعرف كل ما اروح خالهن يشتري الهن شي جديد 

بابا //اي اعرف بس تعاي راويهن الي

امي //لا تعال انت اهنا ارتاح

ودخلوا للغرفه الي بوسط الصاله بيها بوفيه وفوكها فراشات وره ساعه طلعوا وبابا شالني صعدني فوك نومني بچربايتي

ثاني يوم الصبح امي گعدت من وكت وهاي العاده عدها اذا تريد تسافر البيت جدو بالسبعه ونص اجه سلدار بسياره

تكسي وطلع ابوي سلم علي وكله اكيد ما نايم 

سلدار //لا والله ابو ناديه نمت من الساعه 12 بالليل وهسه كعدت جبت سيارة ولد وخليت السكن يقبط 

بابا //والله ما اعرف شگلك 

سلدار //كل شي لاتگول احنا اخوان وشوف خلي مرتك تخابرك يمته ترجع انت ابقى انا اجيبها وياي

وركبنا بالسياره وابوي نزل ع الشارع واحنه كملنه سلدار ما دخل للسره لگى اثنين واگفين واحد اعرفه دائما يلم 

الكروه والثاني انطا سويج السياره واشر الامي ننزل 

نزلنا السكن دار وجهه وراح لان سلدار انطا فلوس واحنا نزلنا ركبنا بالمنشأه الي بالاساس چانت بره وما بيها 

اي راكب

(هي الحوادث في حياة البشر مثيره ولكن هنالك حادثه تصبح هي الشراره التي لايمكن ان ننساها ما دمنا

نعيش على هذه الارض )

—ناديه —

مجرد ما صعدنا امي كعدت وكعدتنا يمها بالكرسي الرابع وهي ساكته مشت المنشأه مسافه وامي گالتلي نامي

ع الكرسي انتي واختج 

هي تركتنا وراحت كعدت باول كرسي اجيت يمها —ماما جوعانه 

امي باوعتلي وخزرتني وهو كلي //اي عمو هسه شويه وانزل واشتريلج

انا كعدت ورى امي ما رجعت يم حنين الي نايمه امي گلتله 

يمته لحكت تجي من بغداد 

بس خابرني شغلت السياره واجيت فارغ 

وليش چان ممكن ننتظر للعصر 

انتي بيج تنتظرين انا ما اگدر افتهمتي 

هي تبتسم وهو يگول// فدوه اروح الهاي الابتسامه الخبلتني وما خلتني اندل طريقي

مشى بالسياره وگف يم محل ونزل جاب لفات وعصير ونستله وحب وانطاهن الي وهوگلها //شنو اجيبلج 

ماما //ما اريد شي 

وگف وهو مبتسم ويگلها متاكده ما تردين شي

هي تباوعله ومبتسمه نزل جاب صينيه بيها لفات وچاي صارو ياكلون وبعيونهم كلام ونزل حاسب ورجع وامي گالتلي 

اسمعي ناديه مو تگولين الابوج رحنا بالسياره ابحدنا اموتج تره كليله السياره اتاخرت وقبطت وبعدين عمو 

نزلنه يم بيت جدو من نزلو الناس هذا اذا سأل افتهمتي 

جاوبتها —اي ماما بس ليش تموتيني

اتقربت مني وهي تمسد على شعري //لا حبيبتي ما اموتج بس تسمعين كلامي اشتريلج لعابه حلوه 

—وتاخذيني المدينة الالعاب 

ماما //واخذج مدينه الالعاب 

رجع سلدار وهي گلتلي //روحي يم حنين عفيه بالشطوره

ورحت وبقت السياره تمشي وبعدين نزل على منطقه بالطريق بيها حشائش وما بيها ناس وگف السياره وگال 

ياالله انزلو شويه اهنا العبن 

امي نزلت ويانه وگالت //اگعدن اهنا والعبي انتي واختج 

وهو نزل بساط فرشه النه انا وحنين واشوف راح رجع البردات ع الشبابيك ودك هورن 

امي كالت /\ناديه ديري بالج على اختج انا شويه ونازله افتهمتي

وصعدت بالسياره وانا وحنين بقينا جوه هي تلعب بالتراب وانا بايدي لازمه خشبه شفتها يمي وصرت اخطط

حنين گلتلي 

اييد لئابتي (اريد لعابتي ) وصارت تبچي

رديت عليها ... ياالله هسه اجيب اللعابه صعدت وفتحت باب المنشأه لان كان مردود ودخلت اجيب اللعابه باوعت

شفت امي نايمه بالكرسي الاخير هي وسلدار وهمه ..................حتى ما حسوا بوجودي

بوكتها رجفت وضليت اباوع بدهشه وانا واكفه صافنه رجفت وحسيت انو الي جاي تسوي امي عيب خصوصا 

وانا اشوفه شلون نايمه بالاخير انا ارتعبت اخذت اللعابه ونزلت فحطانه عبالك عندي سباق ماراثون نزلت وانا 

اشوف حنين جاي تلعب 

انطيتها اللعابه وبقيت كاعده وانا استرجع الي شفته وارجف واغمض عيوني واحرك راسي لان الصوره 

كانت مقززه 

ما احس الا سيارتين لاند كروز لون زيتوني اجت يمنه ونزلو من كل سياره تلاثه اثنين شايلين بنادق واحد بصفحته 

المسدس همه يباعولي انا واختي اتقرب واحد لزمني من چتفي گلي 

منو بالسياره وانتو اهنا شتسوون

انا اتذكرت الي شفته بوكتها ما اعرف شنو تهيألي گمت اصيح ماما ماما واصرخ شرطه ماما شرطه 

نزل سلدار وهوومرتبك لا والله يرجف وهو يعدل بملابسه من شافهم خاف اتقرب علي هذا الي يخوف ولزمه 

من ياخته // شتسوي اهنا وليش راد البردات جايبلك ك......

هو راسا گلهم وهو خايف //لا استاذ فاهمين غلط وياي زوجتي وذني بناتي واهلها خابروني (نصه صوته )

امها توفت وهي حامل ما گتلها وهسه تخربطت عليه ما اندل مستشفى اتخربطت وبقت تتقيأ عبالي الگا ناس اهنا 

احد يساعدني مالكيت حاولت انيمها على ظهرها بلكي ترتاح 

ساله نفس الشخص //انت منين جاي

من البصره استاذ تگدرون تصعدون وتشوفوها بس اكلها تلبس عبايتها ولو ما تكدر تكعد 

وصعد واحد الي خال مسدس ويا ثاني لازم بندقيه وامي تصيح //اااخ الحكوني يمكن طرحت وديني للمستشفى 

وصار سلدار يتوسلهم وين المستشفى 

باوع ابو المسدس وگل للويا //اصعد رووح دليهم وارجع

احنا ركبنا وامي تصرخ والرجال وكف يدلي بسلدار الي تشكر منهم والرجال كله ابقى وياك وهو گله 

لا الف شكر ما قصرتو

وفعلا اشوف سلدار اشر الامي تبقى نايمه بالسياره ومشى وبعدين دخلنه للمستشفى وهناك نزلنا للطوارئ احنا 

واگفين وامي وسلدار ويانه ودخلت امي على طبيب هي وسلدار واحنه بقينا بره وانطاهه ابره وطلعنه وراح 

سلدار اشترالنه عصير وكيك وشاف لعابات زغار اشتراهن وانا وامي وحنين بالسياره امي هالمره هادئه وتبتسم

بوجهي كلتلي

ندو حبيبتي مو تحجين تكولين اجو شرطه ديري بالج تره يكتلوج ويكتلون حنونه وياخذون لعاباتج وبعد ما 

نروح المدينة الالعاب 

انا هزيت راسي سلدار اجه وجايبلنه العصير واللعابات 

كلللها //لا ناديه حبابه ما تحچي وانا شنو تريد اجيبه الها 

هي گالتله //انا راح اخذها المدينة الالعاب واشتريلها بدله حلوه

انا اكتفيت اهز راسي وانا كارهه الشي الي شفته رغم ما اعرفه اسمع امي تگله 

ليش جبتنا للمستشفى راح علينه الوكت 

احسن يجوز الرفاق امشيين ورانه واحد هسه من شافونه دخلنه للمستشفى اتاكدو من كلامنا 

تدرين خفت گلت بس لا ياخذونه للمنظمه ويحققون ويانه 

امي رفعت اديها //ياريت ماخذينه

سلدار بنتر //انتي شتحچيين يستدعون اهلج ورجلج 

امي بكل هدوء وابتسامه //علوا اهناك اگلهم اهلي جبروني وهذا حبيبي احبه واريدكم تطلكوني من رجلي 

وتزوجوني اله 

سلدار بضحك //تدرين يسوونها ويخلون اخوج وعمج يوقع ويجبرون رجلج يطلكج 

جرت نفس قوي وكالت //ياريت ياريت بعد ما بيه الصبر خلص ما اكدر اعيش بدونك 

سلدار //بس على جمالج يكتلوني وياخذوج الهم

وبقوا يسولفون ويضحكون ويگللها وهو اياشر على بطنها 

ديري بالج علي تره هذا نص مني ونص منج

ما عرفت شنو يقصد وصلنه البيت جدو ومجرد ما وصلنه امي خابرت بابا وطمنته وبقينا ابيت جدووانا

اشوف بيبي 

تگل الامي //مياده ما تجوزين لمن ما اتجيبيلنه مصيبه ليش جايه ويه سلدار 

امي //ماما شنو اجيت بكيفي رجلي وداني ويا وبعدين عبريه وبناتي ويانه

بيبي//تدرين اخاف وما بيه هبطه ثانيه كافي المصيبه الصارت النه 

امي جرت حسره //كله من رجلج هو الي ظلمني

بيبي بعتب //رجلج حتى ما تگولين ابوي 

امي //اي ما اكول تدرين ليش لان اكرهه الله يحرگه بنار جهنم 

بيبي بنتر //انتي مو هسه من يومج صلفه 

امي //لا مو صلفه بس انتو ظلام

بعدين سكتن ورجعت امي تسولف وتضحك بقينا ابيت جدي وخلصتها لازمه التلفون وطلعات ويه خالاتي 

ورحنا للزياره واشوف امي من تروح تزور تروح ابحدها وتتاخر بالرجعه ومن ترجع تكللهم انتم وين صار 

ساعتين ادور عليكم

فد يووم امي وخالاتي انعزموا على حفله عرس وقرروا يرحون لكن خالتي داليا گالت جاي تدرس بيبي گالت الها 

خلي الجهال يمج 

انا حبيت اروح گلت الامي —ماما اريد اروح اشوف العروسه 

امي كالت بنتر //انچبي ما ترحين 

انا حاولت اساومها بعقل جاهل گتلها —زين اكول البابا ....

اتذكر ما خلتني اكمل دارت عليه وهي تبتسم وكالت //حبيبتي ندوش تردين ترحين وياي صار هسه انتظري 

اهنا وانا بس اكمل تبديل اجي ابدلج

انا فرحت بهذا الانتصار وبقيت كاعده بالغرفه بيدي اللعابه الي اشتراها الي سلدار واجت امي وانا مدنكه ع اللعابه

 ولزمت ايدي ومررت عليها سجينه حاره نار انا صرخت وشاغت روحي وهي تگلي 

شلونها حاره مو عود گلي الابوج حتى الحرگه تصير بعينج والسانج

انا صرت اصرخ لان الحرك قوي وايدي موتتني وابچي طلعت وقفلت عليه باب الغرفه وگالت 

اي نفس ما اسمع ارجع واعرف شغلي وياج

وعافتني وراحت وانا الحرك يسعر بگلبي اريد شي ايبرده ماكو بس ابچي والحرك اذاني وانا اشوف شلون 

جلدي انصلخ ما اعرف يمكن انغمى عليه فتحت عيوني بحضن خالي حليم وايدي مضمده 

رجعت للبيت ولگيت امي گاعده ع القنفه وتهز برجلها وتعلج وخالي يگلها 

غير تنتبهين على بناتج 

امي //شسوي اذا هي عبالك قرده انتجت ع الطباخ وخلت ايدها بحافة الطاوه زين ما وكع الدهن عليها چان 

هسه ميته

خالي //الزمي هاي عصاره وابر لازم المضمده تغير الضماد وتضربها ابره 

امي //ان شاء الله 

واخذني خالوا ونيمني ع الچربايه وطلع وانا اون من الالم اجتني امي وگالت 

ها نداوي شلونها السچين زينه مو هالمره بيدج مره الثانيه بلسانج فد نوب لو تموتين لو تخرسين سمعتي 

هاي جرة اذن (ولزمت اذني حييل )مره ثانيه اموتج خلاص

عرفت بعقل الاطفال الي جاي تسوي امي شي غلط واذا احچي راح اموت 

خفت وغطيت راسي وانا ارجف من الخوف بقيت بفراشي انحصرت اريد اروح للمرافق طلعت شافتني بيبي گالت 

جوعانه اسويلج لفه 

امي گالت //لا ناديه ما تاكل مو زين عليها

رحت للمرافق وانا ابچي لان جوعانه من طلعت بيبي تگلها //ولج خطيه جارمه بالبنيه ليش 

امي //احسن حتى ما تفك حلگها وتحچي مو تتحداني 

بيبي //هي شنو گالتلج وانتي تخبلتي عليها 

امي //ما گالت شي بس گالت خلي اروح وياچ واني ما قبلت ظلت تلح تلح من چويتها سكتت بعد ما تفك حلگها 

بيبي //بس خطيه ماما 

لا مو خطيه انا الخطيه كله تعلوم حبوبتها عبالها اسكت ما تدري اموتها وما يرفلي جفن

بيبي//مياده ليش هيج گلبج قاسي 

ردت //من الخير الشفته من ابويه تذكرين لو اذكرج 

بيبي // اسكتي لا تحچين زايد ناقص كافي الله الستار 

شافتني واگفه خزرتني وگالت //ياالله گدامي روحي انطمري

وره عشر تيام ابوي خابر امي وگللها سردار راح يمر ياخذكم باچر تحضري 

امي اشوف الفرحه والابتسامه وهي تگله //ليش ما تجي انت تاخذني شنو ابيش ملتهي

الصبح بدلنا واجه علينه سلدار واخذنا وهو يكللهم السياره مقبطه والعبريه منتظرين 

ورجعنا نفس الشي ابحدنا وقبل ما ننزل امي شالت فلوس وانطتهن اله هو ما قبل گلتله 

لا هاي التقبيطه انت اخذتنا وجبتنا 

ومستعد يوميه اخذكم واجيبكم

بقينا ويا بالسياره وهو كل شويه ينزلنا ويبقى هو وياها بالسياره واسمعها تگله 

اصطبر كلها شكم شهر وبعد ما افرط بيك

وصلنه وابوي ما قبل اله ينزل سلدار الي اعتذر لكن ابوي اصر علي يتغدا وساله يمته سراك سلدار كله باجر 

يلحكني السره الصبح 

ابوي كله تبات يمنا ما بيها مجال بالليل بقو يسولفون ويضحكون وبات بالصاله الجوى والصبح امي 

گعدت سوت ريوك ابوي شاف الحرك تخبل وسال امي گلتله وكيحه انتچت ع الطباخ والطاوه حاميه 

وحركتها زين ما وكع الزيت وصلخ جسمها

ثاني يوم اخذني بابا البيت بيبي هو وامي الي من شافت الحرك گالت 

- -مو مال طاوه امي اكدتلها انو احتركت بالطاوه 

من يومها امي منعت روحتي البيبيتي اله وياها ومن ابوي سألها ليش امي جاوبته

لان بيبيتها تشيشها عليه وتخليها تگول كلام ما صاير 

شنو هالحچي تره امي تحبج وتحب بناتي 

لا عباس متوهم شوف گدامي تگول هاي مو حركة طاوه وطباخ 

(وتصيح الناديه تكلها منو چواچ گولي لا تخافين موبعيده امك لان تكرهني تعلم بناتي يگولن عليه كلام ما صاير )

بابا //لا مياده شنو هالحچي 

اي لا تتعجب تعالي ناديه (وفتحت عيونها بغضب )گلي البابا شلون احترگت ايدج 

ابوي حضني وهو يگلي /روحي حبيبتي ماما شويه تعبانه من الحمل ان شاء الله تجيب اخ ويشيل اسمي 

وبعد ماكو حمل اله اگضيها انا وياج ونسه

امي بدلاعه //شنو عباس ما تشبع 

بابا //اكو واحد يمه گمر ويوكله عسل ويشبع هذا اله حمار 

امي ضحكت وگالتله //بس حبيبي خليني اروح كل اسبوعين تلاثه الاهلي لان امي تعبانه وداليا تدرس 

ومرت حليم ما تلحك ع الشغل والجهال 

بابا //انتي تروحين وتعوفين المگرود محد بحاله 

ماما //مو جاي اعوضك حبيبي

وصار سلدار كل اسبوعين ياخذنه ونبقى عشر تيام ويرجعنا بابا راح ويانه مرتين وصلنه ورجع ويه سلدار ومن 

نريد نرجع نرجع ابحدنا وسلدار يجي للبيت ويبات ويطلع هو وبابا ويروح للمحل صارو اصدقاء لكن من يجي 

سراج سلدار يروح ويغيب على ما سراج يرجع البغداد وانا اشوف امي دووم تحچي على بابا لان مصادق

 سراج وتگله // شنو هو دائما يتدخل ويتمسئل هو شعلي

بابا يگلها /مياده تدرين بسراج اكثر من اخ صحيح هو ازغر مني لكن درس وتعب على نفسه وما شاء الله جاي 

يترقى بوظيفته 

ماما //مو بزوده عباس مو تگول خاله واخو مرت خاله واصلين 

بابا//وهو هم ذكي بس انتي ما اعرف ليش تضوجين منه 

امي بدلال وهي واكفه ورا وتحضن بركبته //لان اغار منه تدري بيه اريدك بس الي 

ابوي دار عليها وگلها //وج لا تتعايرين نعلتي سلفه سلفاي انا كلي الج

وماما صارت بطنها چبيره وفد يوم اتخربطت الطبيبه گالت الها عندج زلال والحركه مو زينه عليج 

وحتى السفر مو زين عليها امي صارت ما تروح البيت جدي لان تتعب من الطريق 

الي صار اذا بابا خفر امي تقفل الباب الرئيسي وتصعدنه فوك او تنزلنه بالغرفه الجوه و تقفل الباب علينه

وتحاچيي بامر 

وهي تخزرني وتتوعدني //نامي ما اسمع نفس نامي لا يجي الحرامي يحرك عينج والسانج ويذبح حنين بالسچين

انا اغطي وجهي من الخوف وانام الصبح افتح عيوني واشوف بابا وهو يحضن بيه 

وينزلنه انا وحنين ويا نتريك لان ماما تعبانه من الحمل ولازم ما ناذيها 

الى ان اجه شهر 12 سنة 2000 كانت نهاية لسنه مضت وبدايه لاحزان لاتنتهي وحادثه لازالت لحد هاي اللحظه 

اعاني منها

/////////////////////