رواية ناديه الفصل التاسع 9 بقلم انين الليل

ناديه 

چان بابا بيوم الي ما عنده خفاره يطلع للدوام الصبح وما يرجع اله بالليل لان من يرجع يروح بوجهه ع المحل 

ومن يجي يجيب الوارد وينطي الامي الي هي بدورها تحسب وتكله هذني هلكد هو يكلها ضمي نصهن 

حتى اشتري بيهن سلعه للمحل والباقي خلي مصرف الج وللبيت

وامي دائما تتذمر رغم اشوف عدها فلوس وهي ما تطبخ النه دائما بحجة

 حامل وتعبانه وبابا مو دووم موجود ع الغدا ودائما تجيب عشا من المطعم 

بابا اكثر من مره يجيب من بيت بيبي غدا او من المطعم وهي اذا ابوي ما موجود تلتهي تخابر وتسولف وتضحك 

وبس يجي بابا تصير تگول 

ااخ الالم اموتني ما اكدر اتحرك احس بظهري مكسور

على حسب كلام امي وتصرفاتها بهاي الايام تعبت وصارت تراجع الطبيبه تاخذني وياها انا وحنين ونروح 

ومرات چانت توهم ابوي انها راحت للطبيبه بس هي بالحقيقه تروح تقابل سلدار الي صار شي مهم بالنسبه 

الها وانا وحنين تعودنا نشوفه وحتى بابا اتوطدت علاقته بي

ولان ماما ما صارت تروح البيت جدي بسبب حملها فسلدار دائما يمر وهو جايب سلة العنب او الرمان 

او جايب ملابس الي والحنين والماما ويكلها انو هذني من امها دزتها الج وبنفس الوكت امي اشوفها تخابر 

وتوصي بيبي اخاف يخابرهم بابا اتكله اي انا دزيتهن

اشوف وجه امي شلون يتبدل بين الخوف والعصبيه من تسمع كلام بيبي ام حليم 

امي ترد عليها//ماما اخته السلدار تدزهن الي وعباس اذا عرف ما يقبل ويشك 

وكلام هواي ينتهي بقبول بيبي اتكول انا دزيت الهدايا 

چان سلدار من يجي يجيب الهدايا ابوي موجود اوهو يتعمد يكون ابوي موجود ومن يسلمهن ويريد يروح

 ابوي ما يقبل ويلزم بي ع الغدا واذا ما حصل سرى يبقى ع العشا وامي تتافف من وجوده وتكله

شنو عباس ابتليت من وصلنه مرتين تلاثه كل ما يجي تعزمه 

ابوي يكلها //عيب الولد متعني وجايب الشغلات الي يدزوهن اهلج لو من چان ياخذكم ويرجعكم ما يصير 

اقلها تقدير اله ما بيها شي خوش ولد او مؤدب وانتي تكولين رابي وياكم ما بيها شي من نعزمه على غدا على عشا

وبالنهايه امي تقبل وصار يتردد واحيانا يبات بالصاله والصبح يطلع هو وابوي وسرعان ما يرجع بدون السياره 

وامي تصعدنه للغرفه الفوك تقفل علينه وهمه يبقون جوه واذا ابوي عنده خفاره سردار يجي بالليل ويبات وجه

 الصبح يطلع وياويلنه اذا طلعت نفس انا او حنين تنتقم مني تموتني

چنت اشوفها الامي من يجي سلدار شلون مبدله وفرحانه ومن يجي ابوي مغنتبه وضايجه وابوي ينطيها العذر لان 

هي تعبانه والزلال صاعد عدهاوفد يوم ابوي شاف امي كلش ضايجه سألها  

- شبيج ام فضل ليش زعلانه 

امي //عباس اريد منك شي ولا تعتبرني اني ادور وياك طمع بس للوكت وضمان للي ابطني 

بابا جاوبها باستغراب //شنو هاي مياده ليش هالشكل تحجين شنو ضمان وما ضمان

امي //اي احجي ليش نسيت شنو سوون اخواتك على ورث ابوك لو امك امك الي حرمتك من ....

قاطعها ابوي وكلها //لا حبيبتي امي بالذات ما حرمتني لا من ورث ولا من فلوس انطتني ذهبها او ورثها من 

بيت ابوها وصرت اشتغل وفتحت هذا المحل 

امي //اي مو ابلاش شايل البيت وتنطي مصرف احسن من اخووك

بابا //اخوي شعنده راتب وحصار بعدين امي ما چانت تاخذ النص لا مخليلها مصرف يومي ما يجي ربع الي 

احصله من المحصول وهواي ايام ما تاخذ مني مصرف تكول عندي 

امي //اي بس انا اريد تكتب هذا البيت باسمي اريد اضمن حق الي ابطني 

بابا//شتحجين مياده شنو بس حق الي ابطنج صلي على نبيج وخلي يجي 

هزت راسها //اي تكتب البيت باسمي وبس يكبر فضولي اكتبه باسمه

ابوي يحجي بابتسامه //هاا مياده شنو شو موتيني 

اتقربت علي وصارت تمسد على راسه وتمرر ايدها على خده وتحچي بدلال //لا حبيبي اسم الله عليك بس گتلك 

اريد اضمن حقه 

ابوي //ياحق مياده هذا البيت الجهالنه

امي وگفت وتخوصرت وضربت الگاع برجلها //لا هسه تكتب البيت باسمي نسيت شنو سون اخواتك عباس اكتب 

البيت او نصه اخاف عبالك طمعانه بي بس اريد اضمن حق هذا الي ابطني 

ابوي هز ايده //والله عجبه شتحجين شنو نسيتي هذني البنات اخواته وبناتج 

- - اي ادري بس شوفهن هلكدهن وهنه صلفات

ابوي استغرب من ردها // شبيج مياده تره ناديه وحنين بناتنا مو لاگينهن بالشارع بعدين شمسويات وتگولين 

عليهن صلفات 

امي تحجي على كيف وباستعطاف //ما ادري احس بروحي اموت واعوف فضل وانت تاخذ مره وتاذي عاد 

عنده ضمان 

ابوي وهو يضحك //چا المره من اخذها هم تريد بيت باسمي مو باسم ابني والمره بس تاذي ابنج حتى اتاذي البنات

امي بحسره //لا ادري البنات يرحن البيبيتهن منيره بس هذا 

ابوي يضحك ويكول //عمي من تموتين ما اتزوج وراج بعد شتردين 

امي بقلة صبر //اووو انت بطران وجاي تضحك عليه شوف عباس هي كلمه من اجيب هذا البيت يتسجل نصه 

باسمي اذا مو كله واذا ما اتسجله اروح الاهلي وانسى عدك مره 

ابوي //ليش تهددين

- - ما اهدد عبالك البيت اذا سجلته راح انطي الامي ولا چني مرتك تدور وياي الزله 

وصارت تبچي وبابا اتقرب عليها 

- - هاي شبيج مياده انا جاي تعبان وهذا المدير شاد ويانه وما اعرف ياهو منافق عليه ويگله ما يلزم خفاره وعينه

عليه كلش وانتي تلاگيني بعصبيه وتبچيين 

هي حضنته وتگله //انا خايفه وانت تشوف الدنيا والوكت مو خوش 

ابوي وهو حاضنها //دا كافي كافي ان شاء الله اكو محل بس اشتري اسجله باسمج جاي اعامل علي يم محلي

امي //والبيت 

لا البيت باسمي النه كلنه 

امي //زين لعد بس كمل بناءه 

عندي فلوس بس اشتري المحل بالاول واشغله وبعدين اكمل بناء البيت وداعتچ اسوي قصر لعيونج الحلوات 

وحتى المشتمل الفوك راح الغي عدنا خير بعد لويش اناجر

وره يومين شفت سلدار اجه لان امي خابرته وشفتها طلعت من القاصه فلوس وانطتهن اله هو اخذهن وراح وثاني 

يوم ابوي فتح القاصه وطلع الفلوس واسمعه صار يحچي ويه امي بعصبيه وهو يگلها 

مياده الفلوس ناقصات 

امي //وانا شمدريني بيهن انت ضميتهن على ايدك 

هز راسه // اي صحيح بس المفتاح بالبيت 

- - وشنو اني اخذتهن يعني وشسويت بيهن اشو لا طلعه ولا مشيه 

ابوي بعصبيه // مياده فهميني وين راحن الفلوس

امي بصوت عالي ونتر //شنو انت جاي تتهمني ماخذتهن 

- - اي اتهمج طارن خو ما طارن حاسبهن تلث مرات 

- - شوف انت المن اخذتهن وانطيتهن وناسي 

- - يعني اتشككين بكلامي جاي اكلج انا حاسبهن 

- - وانا ما ادري بيهن

ابوي لزم امي من ايدها // مياده حبيبتي اذا اخذتيهن هنه مالاتج بس گليلي 

امي عتت ايد ابوي //دوخر عني شووف المن انطيتهن وجاي تذب بلاك عليه 

- - انتي جاي تشككيني بنفسي 

- - وانت جاي تتهمني 

- - مو كدامج حسبتهن الفلوس ناقصات مليون وربع

- - ها وانا ماخذتهن ؟

هز راسه // اي منو غيرج عنده مفتاح القاصه 

- - زين ما طوول هيج انا ماخذتهن وراح اروح الاهلي وبعد ما ارجع اوورقة طلاگي توصلني 

ابوي بعصبيه //شنو انتي تهدديني بت الكلب 

امي ردت علي //اي صدك انا بت كلب لان اخذت واحد مثلك

گام ابوي عليها وضربها راشدي وهي صارت تصرخ وتبچي وبعدين وگعت انغمى عليها 

ابوي جاب ماي وغسل وجهه واحنه بقينا نبچي هي گعدت وصارت تبچي وگالت

// هسه تخابر اخوي عدي يجي ياخذني 

ابوي گللها //كافي اسكتي 

هي تبچي وتكول // ما اسكت ما ابقى لو دقيقه 

ابوي جر نفس // اسكتي مياده انا اسف

بس هي ابد ولا سكتت وبس تبچي وثاني يوم ابوي هو سووا الريوك وگعدها ما قبلت تتريك 

واصرت تروح البيت اهلها وابوي يگلها مو الطبيبه مانعتج من ركبة السياره 

وهي تگله //ماطوول شكيت بيه خليني ارووح وطبني طووب 

ابوي حضنها وهو يگلها //كافي مياده اذيتيني وشككتيني بنفسي

هي تبچي وردت علي //وانت اتهمتني ليش اخذ الفلوس اشو انت ما مخليني محتاجه اي شي قبل لا اطلب الشي 

انت تجيبه الي وهذني فلوس المحل الي راح تسجله باسمي يعني فلوسي شلون اني اخذ منهن  

هو حضنها وگلها //يجوز انا مخربط بالحساب انا اسف 

ما اقبل عباس اريد ارووح الاهلي 

گعدي وسكتي گتلج اسف

هي بدلاعه //انت اتهمتني وانا ما اقبل 

ابوي ابتسم // عمي افصلج بس اگعدي ولاتخابرين اخوج السياره مو زينه عليج 

صارت تحچي بدلال // زين راح اگعد بس اريد فصل 

- - حاضر شتردين 

- - اشتريلي اسوارات 

- - مو عندج ؟

امي //اي وبعد اريد همه مو هذني فلوس محلي اشتريلي سوارات حباب سته شفتهن عد الصايغ عراض وحلوات 

ابوي //صار وتدللين شكم مياده عندي راح اطلب من ابو المحل مهله ادبرله باقي الفلوس

ثاني يوم ابوي اخذها واشترالها سوارات ومحبس بقى ابوي يروح للدوام وسلدار يجي ويه ابوي لو يجيب بايده 

هدايا على اساس دازيهن بيت جدي وابوي يلزم بي لو غدا لو عشا

وبوقت الي ابوي خفر چان يجي امي تقفل علينه الغرفه الفوك وتسرگي الباب احنا انام ونكعد الصبح نلكاها نايمه يمنه 

واجه شهر رمضان هالسنه اتذكر نهاية الشهر 11وبداية شهر 12 الجو بيها حلو وبارد والنهار قصير والليل طويل 

امي ما صامت لان حسب كلامها حامل ومو زين ع الطفل

رمضان بالبصره حاله حال باقي المحافظات الناس كلها بره حتى قبل التغيير يصلون بالجوامع 

بابا چان ياخذنا العصر اذا موجود البيت بيبي منيره نتفطر هناك لان امي ما بيها حييل تسوي فطور 

لكن اذا عنده خفاره امي تگعد تسويله فطور وسحور هو يگلها /|لاتسوين شي ما بيج حيل افطر بالمركز ويه صحباني 

هي تگله // حتى لو مابيه شنو قابل انت اقل منهم  

ابوي يصير يحضنها ويبوسها براسها ويگلها /|الله يخليج اليه

لكن چنت اشوف حسره بعين ابوي ما اعرف شنو هي وليش 

وچان اذا ما عنده خفاره يطلع وره الفطور ويرجع بالليل يجيبلنه زلابيه وبقلاوه ويطلعنه بره نلعب ويه الجهال وهو 

يكعد ويه صحبانه بره يفرشون بساط ويجيبون الچاي والنومي البصره والحلويات ويگعدون يسولفون 

واحنا الجهال نلعب امي ما تقبل نطلع بس هو يكللها 

خليهن خطيه قابل وين طالعات

احلى ليله هي ليلة (الگرگيعان )عد باقي المحافظات يسموها (الماجينه ) هي ليلة النص من شهر رمضان هاي 

السنه الي وعيت بيها بيبي منيره خيطت چيسين من قماش الي واحد والحنين واحد وطلعنا ويه جهال المنطقه بنات واولاد 

على بيت بيت واحنا انگول

گرگيعان وگرگيعان 

بين اگصير ورميضان 

عاطونا الله يعطيكم 

بيت مكه يوديكم 

هاي مكه المعموره 

ام السلاسل والذهب يانوره 

ياهل السطوح تنطونه لونروح 

الله يخلي (نذكر اسم البنيه او الولد )

بيومها اجو البيتنا وابوي محضر باديه چبيره بيها حلويات وچكليت وشاميه چان عمو سراج موجود بليلتها اجه 

مر علينه واتذكر اجو الجهال وانا وياهم امي طلعت گالت كولو 

الله يخلي فضل (وتاشر على بطنها )

وصارو الجهال يكولون (الله يخلي فضل وبجاه الله واسماعيل ) 

وصارت تنطيهم اجه عمو سراج شالني گلهم گولو( الله يخلي ناديه ) 

الجهال صارو يگولون (الله يخلي ناديه ) اتذكر عمو سراج طلع فلوس وظل ينطي للجهال

وبليلتها كل شويه واجو جهال ويگولون الله يخلي ناديه وهو ينطيهم وابوي يگله //شبيك لان خطيبتك تغار 

سراج ::اي اريد الدعا كله الها 

وكت السحور راح عمو سراج وبابا وانا رحت وياهم البيت بيبي يتسحرون حتى مناك عمو يسافر

انا نمت عد بيبي وابوي رجع البيتنا لان عنده دوام وبقى عمو سراج يسولف ويه بيبي واسمعه يگلها 

عمه اشبي عباس اشو متغير 

بيبي =اي عمه عباس مو بس متغير وتعبان 

سراج ::منين اشو الحمد لله محله من احسن ما يكون تدرين اني قبل اسبوعين جبتله مناقصه الوحده من الدوائر 

وهو جهزها وحصل خير من الله حتى توه گلي اليوم يريد يدفع فلوس محل ثاني اشترا امشي وياي ورحت ويا 

ما شاء الله محل چبير

بيبي اتحسرت ==الله يرزقه تدري بي حتى ما صار ينطيني شي عايشه من هالمحل الي فتحته من البيت 

سراج باستغراب ::تحچين صدك 

بيبي =اي والله كله من وره الحيه الجانيها ابيته تدري كل ما يجي يتشكى ما عندي ومحتاج وهالتشوفه ما 

يتفطر اله عندي لان هي حامل وما تگدر تسويله اكل 

سراج ::زين عمه وهذني البنات وهي شتاكل 

يجيبه جاهز الها والله يمه سراج گلبي لاعب

اتقرب منها وگلها ::لا عمه شنو هالحچي انتي مره مؤمنه بس انتي تحبي العباس ابنج الچبير وترديله الزينه 

بيبي بچت وگلتله ==وانت ابني الزغير يمه سراج حتى ما يسولف وياي يگعد ويگوم سالفته بمرته ولا چني امه 

خو هادي ابد ولا يمنا افريحه غيرته ومن يجي وهو واگف ها يمه شلونج ويروح

سراج باسها براسها ::اووو حجيه وانا وين رحت توج تگولين انت ابني الزغير 

بيبي =اي ابني الشالع گلبي الي اريده يتزوج گبل لا اموت 

هو بضحك ::شاتزوج حتى تغيرني عليج 

لا عمه سراج صدك ليش ما تتزوج

حسيت بي يباوعلي ::بعد وكت 

يا شنو بعد وكت 

::وداعتج يصير عمري اربعين واتزوج 

ياا چا ميته وشبعانه مووت

::اذا ميته الله وياج واذا عدله انتي تزفين مرتي انشاء الله عمرج طويل 

ياالله عمه راح اروح (ومد ايده على جيبه )

بيبي ==اوگف شتطلع مو كل ماتجي 

سراج ::وغصبن ما عليه كل ما اجي 

باس ايدها وراسها ودنك عليه وغطاني وهو يگول 

::شوفي البراءه تخبل 

بيبي تگله ==تصدك امها تكرهها وجاي تكرهه بيه لان تحبني

سراج گال ::مي خالف عمه تبقى بتها 

وراح عمو سراج وانا ابدي اگله ابقى 

الصبح الساعه بالعشره اجت امي واخذتني بيبي گلتلها 

خليها يمي استاحش ابحدي 

امي جاوبتها //لا عمه احتاجها انا ثگيله يمكن بيه تووم ما اگدر اتحرك اامر عليها

بيبي =زين يمه بس هاج هذا غداهن 

لا عمه ابوهن يجي ويجيبلي ويتغدن وياي خلي يفيدج فطور لو اگلج خلي العباس من يجي يتفطر يمج مابيه جيبي 

هذا وحطي ذاك

وطلعنه وامي لازمتني من ايدي الي حرگتني بيها وهي طول الطريق تگلي 

شنو سالتج بيبيتج لا تضمين عليه شي تره ايدج الثانيه احرگها 

انا جاوبتها ......ما سالتني لان بقت تسولف هي وعمو سراج وانا نمت 

شتسولف عليه مو 

ما سمعت ماما نمت

وصلنه للبيت وگلتلي// حبيبتي ندو انا ليش اگلج شنو سالتج لان بيبيتج شريره ما تحبني وتريد تتخلص مني وما تحبكم 

خزرتني وگالت //مو صحيح 

انا خفت منها وهزيت راسي

اجه بابا وره الظهر وهو محمل علاليك وجايب ويا غدا وفواكه ومخضر بس خلا العلاليك غسل وبدل ورجع للمحل 

واتفطر ابيت بيبي ورجع للمحل بالليل الساعه تسعه اجه للبيت وامي كله لازمه التلفون وتخابر 

ثاني يوم بابا طلع الصبح وكلها

كعدي البنات يتريگن انا سويت الكم جاي واكو جبن وبيض بالثلاجه 

هي كلتله //هسه نبقى نايمين عود من اگعد اسويلهن 

راح بابا ورجع وره الظهر هم جايبلنه غدا امي من شافته ارتبكت 

عبالي عندك خفاره 

جاوبها لا باچر اليوم اتبادلت ويه ولد صديق

هو غسل وبدل واجه فتح القاصه واخذ الفلوس خلاهن بعلاگه وگلها 

تبادلت ويه ابو محمد لان ابو المحل اتصل بيه گلي جاييله ناس ع المحل اذا ما اريده حتى يتفاهم وياهم 

وهل اجيت اخذ الفلوس ونتكاتب فهمته يبقن عليه 750 الف وهو راد كفيل 

امي //وهسه شلون 

بابا //انحلت اول البارحه مرينه علي انا وسراج وهو يعرف خالي منير وسراج كفلني يمه

امي //زين لعد رووح واكييد تتفطر يم عمتي 

ابوي //اي بعد معروفه بيوم الي انا اهنا فطوري يم امي وبيوم الخفاره انتي تسويلي الفطور والسحور بس اليوم 

ما سويتيلي 

امي //اليوم تعبانه كلش يمكن الزلال صاعد عندي

راح بابا ودفع فلوس المحل الثاني وبقن بذمته فلوس وراح اتفطر يم بيبي واجه بالليل نام حتى ما گعد يتسحر 

ولا طلع ويه صحبانه گعد شويه چان كلش تعبان اجه نام والصبح باسنه وگل الامي 

مياده ريگي البنات مو تنسيهن 

امي //شبيك عباس 

يمكن فلاونزا راسي كلش يوجعني 

لا تروح اطلب اجازه اخذ مرضيه 

لا ما اگدر ابو حسين لزم ابمكاني وهذا المدير خالني براسه

امي // زين انتظر خلي اسويلك شي تاخذه وياك 

هز راسه // لا اصلا ما اشتهي عود اتفطر ويه جماعتي 

زين اني اخابرك واطمن عليك 

لا لا تخابرين للمديريه مو يمي التلفون 

انت خابرني يبقى بالي عليك 

لا تخافين

امي تحچي بخوف // عباس جاي اگلك خابرني الظهر والعصر وبالليل ماكو انا اخابرك 

ابوي // شبيج مياده هلكد خايفه عليه 

 اتقربت منه وحضنته //طبعا ليش اني شعندي غيرك وهسه مو تنسى كل ساعه خابرني

زين يابه تدللين نيالي كل هذا حب

اي شعندي غيرك 

چا ليش حارمتني 

هو اني غير الطبيبه تگلي مو زين عليج لان طفلج نازل

هز راسه // مي خالف نصبر على ما يشرف ولي العهد صدك مياده عود وره الفطور خلي البنات يطلعن يلعبن ابابنا ويه الجهال 

  هزت راسها //. لا اخاف عليهن عباس 

  شعليهن اشو الناس كلها طالعه لا تخافين ما عليهن شي  

مي خالف بس انت اخذ علاج واذا ثگلت عليك افطر وبعدين اقضي 

الله كريم مع السلامه 

الله وياك مو تنسى اتطمني تره تدري بيه اظل بقلق عليك 

ان شاء الله ريگي البنات

ياا شكم مره توصيني شنوگاطعه بيهن 

لا بس لان انتي تعبانه 

هسه بس يگعدن اريگهن 

دنك عليه وباسني وهو مصخن حييل وباس حنين وراح وهو يكح بقت جوه ما صعدت گعدت الضحى وحنين 

بقت نايمه نزلت لگيتها لازمه التلفون وهي تحجي تگول 

اي توه خابر يگلي راح انخمد بالدائره وافطر واضرب ابره 

اي خلي العصر اتاكد واني اخابرك 

(وصارت تبتسم )واني همه بس تره اني اكثر

هي ما انتبهت الي وهي تخابر انا رحت غسلت وبيني وبين نفسي فد شي يگلي قصدها بالي ينخمد بابا 

والي تخابره سلدار

چنت دائما اتذكر الي شفته بنهاية المنشأه من نزلوني انا وحنين اتذكره وارجف ما اعرف ليش رغم بذاك الوكت ما 

اعرف هو شنو بس مجرد ما اتذكره اباوع الايدي الي حركتها الي 

انا اكلت جبنه وخبزه وشربت چاي وهي بقت تخابر وتسولف وتضحك اتذكر خابرها ابوي وهو يكللها دز العامل 

الي بالمحل يجيبلنه غدا خلي ناديه تاخذه منه

واجه العامل وهي طلعت اخذته منه داز دجاج وكباب ومعلاك 

يعني غدا وعشا امي اخذت العلاكه وانطتنا كل وحده لفه وطلعت تفاحه وكالت ياالله اتغدن هي اكلت المعلاك 

والباقي ضمته العصر بابا خابر گللها انطيني ناديه 

انا اخذت التلفون وهي تباوعلي وتخزرني 

الو بابا 

سمعت صوته كلش تعبان گتله الو 

اتغديتوا 

... اي بابا يمته تجي 

باجر الصبح حبيبتي ديري بالج على اختج 

... زين بابا گل الماما نطلع وره الفطور نلعب بالباب 

اي گتلها وهسه هم اگلها انطيني امج

اخذت التلفون وهي تخزرني وتتوعدني بنظراتها 

ها عباس 

هاي شبيك گتلك اي اطلعهن مو وصيتني الصبح 

لا مو عصبيه بس تسأل ابتك عبالك هي بت شريچتي وما اوكلها تره كله الغدا هنه كلنه شويه ضميت للعشا 

لا لاتدزه عليمن اصلا اني اشرب حليب واكل فواكه والعشا الهن المهم وره ما تفطر خابرني حتى اطمن عليك 

اطمني مياده بس افطر اخذ علاج 

شنو عدكم

اي راح اخذ براسيتول وكبسول 

اي بس المهم خابرني 

ان شاء الله 

ها وبلكي تاخذلك اجازه ترتاح بيها 

بعد خليها الاجازه ع العيد حتى اطلعج انتي والبنات 

بكيفك على مود صحتك حبيبي انت دير بالك زين

وسدت التلفون وهي تباوعلي اجت يمي ولزمتني من گصيبتي وصارت تعت بيه 

... انا شكم مره گايلتلج لا تطلبين من ابوج شي ما طول ما سمعتي كلامي اليوم ماكو طلعه ومن يجي باچر تگليله 

طلعنه انا وحنين ولعبنا افتهمتي 

انا هزيت راسي (يعني اي )لان لازمتني من ايدي الي حركتني بيها وكانما تگلي راح احرگج مره ثانيه 

انا رحت گعدت بالصاله لازمه لعابتي وهي گاعده ع التلفزيون صار الفطور بابا اتصل هي ركضت 

هاا حبيبي اتفطرت 

بالعافيه 

اخذ علاج 

ليش ما تشوف احد بمكانك يجي وانت تجي ترتاح 

زين ادثر ونام

سدت التلفون وراسا خابرت وهي تبتسم وتكله //تعال اوكف براس الشارع وبس تطفى الكهرباء تعال ودك الباب تمام

بوكتها الكهرباء دائما تطفى وماكو مولدات خصوصا بالليل كانو يطفوها على حسب مزاجهم ساعتين تلاثه خمسه 

مثل هسه الفرق بيها قبل ساكتين لكن هسه نحچي 

امي راحت للمطبخ وخلت الاكل الي دزا بابا بيد العامل بالفرن مال الطباخ وهي راحت للحمام سبحت وبدلت 

واحنا نباوع ع التلفزيون خلتنه شويه دجاج وسوتلنه عصير وگالت 

اگعدن اتعشن وما اسمع نفس

بقينا ناكل وهي صعدت فووك الغرفتها وره شويه نزلت وهي خاله مكياج وعطر وتعلج گعدت يمنا وهي ساكته 

طفت الكهرباء وشغلت اللايتات واندك الباب هي طلعت قفلت باب الصاله وراحت رجعت علينه وگعدت يمي وهي تگلي 

انا تعبانه راح اصعد انام انتي تبقيين اهنا يم اختج لو تردين تنامين ادخلي الهاي الغرفه من يندك الباب راسا اصعديلي 

كليلي الباب يندك مو تكولين منو لان خاف حرامي ويبوكج افتهمتي

انا من سمعت كلمة حرامي ظليت ارجف كتلها 

... خلي نصعد فوك انام انا اخاف 

لا نامي انتي واختج بالغرفه اهنا هسه تجي الكهرباء واگعدي ع التلفزيون زين 

انا هزيت راسي وانا خايفه دخلت انا وحنين الي كانت ساكته ما تحچي كلامها قليل من تريد شي تطلبه مني رغم 

احس امي تحبها اكثر مني 

اتغطيت بالبطانيه وحاولت انام وانا حاضنه لعابتي

حنين /ناتيه تولفيلي قثة ليلى والتئب لان احاف من التلمه (ناديه سولفيلي قصة ليلى والذئب لان اخاف من الظلمه ) 

انا اهنا اخذت دور الام الي تحاول تهدأ طفلها من يخاف وگتلها وانا حاضنتها 

...لا حبيبتي لا تخافين انا يمج بعدين وين الظلمه وهذا الگلوب مشتغل (اقصد ع اللايت ) 

عفيه ناتيه ثولفيلي قثه

...صار

وصرت اسولف الها قصة ليلى والذئب باوعت الها نامت وانا ابالي الاكل الي امي صعدت لان بعدني جوعانه گلت 

ما طول حنين نامت خلي اصعد اگل الامي جوعانه اريد دجاج 

واخذت اللايت وطلعت من باب الصاله وصعدت الدرج ما خفت لان سمعت اكو جهال يلعبون بره بس مو هواي 

يمكن بسبب الظلمه او بسبب البرد صعدت وبيدي اللايت وشفت باب الغرفه مردود باوعت اريد اكلها ماما جوعانه 

لكن الي شفته ربط الساني

شفت امي وهي لابسه بدله قصيره وكاعده بالكاع بحضن سلدار الي ياكل ويوكلها ويمد ايده على صدرها 

ويبوسها بقيت صافنه بهذا المنظر الي شفته والي خلاني ارجف من سمعت سردار يكلها 

كومي ميمي كومي اركصيلي 

وهي ترد علي بدلال 

لا اخاف على ابنك 

هو يتحسر ويگلها تره ما بقى عندي صبر كافي السنين الضاعت من عدنا 

هانت بس اجيب يحلم ارجعله اتطلك وكل شي ينتهي

وصاروا يتبادلون القبل ويضحكون انا خفت لا تشوفني امي نزلت ورجعت اتمددت يم حنين وبقيت ابچي ما اعرف 

على شنو او ليش لكن حسيت انو امي جاي تسوي شي غلط 

اجت الكهرباء وانا بقيت بفراشي ما اتحركت هالمره اجت على وكت سمعت اصوات الجهال بره وحسيت امي

 اجت باوعت النه وراحت للصاله فتحت التلفزيون وقفلت باب الصاله من بره وشفتها طفت ضوه الطارمه لان 

كان يبين انعكاسه جوه الباب واكيد صعدت

انا بقيت اكثر من ساعه متمدده وخايفه من الي شفته رغم مو اول مره لكن اليوم خفت اكثر 

تقريبا الساعه عشره اندك جرس الباب واندك مره ثانيه وثالثه بصوره متواصله حسيت بامي فتحت باب الصاله 

وجابت الصينيه وفتحت الضوه شفتها لابسه دشداشه بيت طويله وبيدها هوست شعرها والجرس يدك وهي گالت 

بصوت مبين علي النعاس لكن ما يخلو من الخووف انا كعدت ورحت وكفت اباب الصاله وهي تسال

منو منو بالباب ؟

اباوع شفت وره الباب واكف سردار وهو منكب بشماغ انا بقيت اباوع الامي وهي تسال مره ثانيه 

منو بالباب 

وصوت ابوي مبحوح من الفلاونزا وكوه يحجي وهو يگلها 

افتحي مياده انا عباس.... 

شكرا لزيارتكم عالم روايات سكيرهوم