رواية كريات الدم السوداء الجزء الثاني الفصل الثامن بقلم زحل شريف
///////سلاسل///////
_صوته اخترق مسامعي حسيت بخطواته
تقدم ناحيتي رفعت راسي اباوعله.
نفس الوكفه والنضرات . اتلفتت
خاف احد يشوفه لو مديحه تطلع وتلمحه
كرر سؤاله بصيغة ثانيه
الباشا::اذا تحبينه كل هذا الحب ليش
عفتي ليش ماانتضرتي يخلص حكمه .
_رافع حاجبه منتضر اجابة. سحبت طرف الشال
مسحت دموعي صفنت ثواني ماردت استعجل بالكلام
حاولت اغيضه . ابتسمت باستهزاء . ورديت مااضن المثلي تنزل دموعها عله رجال .
الباشا::جا لازمه الركن وتنوحين
عليمن .معقوله خربطتي بالعنوان
وعبالج سياج الجامع وجايه تندبين يمه.
_يحجي ونضراته مسلطه عليه. هزيت أيدي.شلون افهمك انو كل الي مرو بحياتي ماجانو زلم . والدليل هذا ثالث زواج الي عكد حواجبه حسيت بروحي جفصت .بس فاجئني كلامه.
الباشا::وهم تردين تطلكين
وهذا دليل العيب بيج.
_عضيت شفتي بقهر .وحجيت بغصه
صح لان تغريني الشوارب وعبالي . ماخلاني اكمل
جرني يسحل بيه . تخبلت ولك عوفني منا الناس وخر
باشا اترجاك لاتسببلي مشاكل كافي عليه ضيعت اختي.
الباشا::ارد اراويج الشوارب شتسوي
حته لا تذبين سوالفج العوج براس الزلم.
كولي انه مال لعب وتفرفر..مو كنالج نخليلج كبر يكبرج واكعدي وانجبي . ولج شوكت مشيتي شلون عرفتي شبسرعه عرستي انتي عندج الزواج مثل لفه الطماطه .
_يحجي ويعت بيه .وصلنه الشارع
انتبه اكو ناس عاف ايدي . وعدل نفسه
نقذني النقال بسرعه طلعته عبالي ثابت
باوعت للاسم فيصل. كلت بكلبي اجيت بوقتك
رديت عليه وعيني للباشا .هلا حبيبي .
فيصل::يفداك حبيبك سونه عيديها
واليرحم والديك .
_بلعت ريكي وانه انعل بحظي
والباشا يباوعلي بااستهزاء وعدم قناعه.
فيصل::الووو سونه تسمعيني .
_اي حبيبي . حجيتها وانشحطت اكح .ضحك الباشا خفت فيصل يسمعه .بسرعه سديت التلفون . رجع دك وهذا واكف يهز بأيده.
الباشا::ها ماتردين عله حبيبج ؟
_عين للنقال وعين اله . وقبل ماافتح خط
خمشه مني . انطاه رفض وحطه بجيبه.
الباشا ::امشي نكسحي صعدي للسيارة.
_حجاها وتوجه للاسواق الي كبالنه
عدلت شالي وتوني اريد اعبر للسايد الثاني
كلت افلت منه . رجع بخطوات سريعه جرني
متوجه بيه للسايرة .
الباشا::طناكيرج مو وقتهن.
_صعدني وطبك الباب.وتلفوني ماسكت .
وهو يغني ويه النغمه .
الباشا::بس تعالو ولو اجيتو جفوفنا انحنيها.
_الكحه جلبت بلعومي احس عيوني طلعن ليبرة.
حاولت احجي ويا بهدوء اترجاك خليني اروح لحال سبيلي شتريد مني .
الباشا::كلشي ماريد غير راحتج .
_تمام اطيني نقالي وخليني اروح.
الباشا::وين ترحين ؟
_للحسينيه لان رجلي راح يجي عليه.
الباشا::يارجل منهم ؟ وانتي ناويه
تطلكين .
_عليك بداعت امك اطيني النقال اترجاك
باوعلي مستغرب تصرفي. شمره عليه
اشرتله افتح الجامه اختنكت راد يسوق . صحت فدوى اروحلك بس جيبلي ماي . باوعلي بشك بس من شاف
وضعي نزل بسرعه .خرب عقلك قفل السيارة شلون بلوه بسرعه راسلت ثابت .كتله بالصار.
ثابت::تمام حاولي تشغلينه
كون ماطلعون السوك لحد مااوصلكم .
_سديت النقال .اجه جايب ماي وعصير
فتح البطل وانطانيا شربت .
الباشا::فتحي الباب وغسلي وجهج .
_هزيت راسي اي غسلت احس بروحي تعبانه كلش . لابيه اجادله ولا اكدر اسكت . باوعلي يريد يخترق تفكيري .
الباشا::ليش تتهربين مني ؟
شسويتلج وهيج كارها لقائي .
_هو يحجي وانه عيني للسوك . اي شكد جنا نتمى
نطلع منا بس اليوم انه متندمه لان حسيت مالنا مكان غيره نبهني من شرودي صوت نقالي يعلن عن وصول
رساله من ثابت نضرات الباشا وترني من كثر مامركز بيه . قريت مضمون الرساله.
ثابت::وين انتم بالضبط؟
_وصفتله المكان.
ثابت::كبالكم انه لاتخافين بس استدار .
_بسبب الازدحام صارت وكفتنا كبال المطعم
الي جنا انه وجويسم نشتري منه
ضليت اباوع . وعباله جوعانه سالني
الباشا::جوعانه ننزل ناكل؟
اجتني رحمه رديت عليه لا جيبلي لفه
لان من امس ماماكله احس هبط ضعطي هز راسه ونزل اباوع طبكت سيارة ثابت فتحت الباب وركضت عليه فتحلي الباب صعدت وانه اتلفت.
ثابت::ها وينه .
_عبر للمطعم .اطلع بسرعه لا يلحكنه
هز راسه تمام وحرك رديت سالته
بس شلون عرف بيه هنا؟
ثابت::مو كتلج . صاير مثل ضلي .
_يجوز . مراقبك.
بس منين يدري اريد اعوف فيصل
حجيتها ودرت وجهي اباوعله بشك .
ثابت::ماردت احجيلج بس
بسبب هاي نضرت الشك لازم ابرر موقفي.
_مافهمت ؟نفخ باانزعاج
ثابت::الضاهر قدر زعلها منج خلاها
تتصرف بجهل وعدم تفكير .
_فكيت حلكي بصدمه. معقوله
هيج حاقده عليه .زين انته ليش مافهمتها
سبب بعدي لاجل هيه ترجع لخوالها وتستقر
قاطع كلامي صوت نقاله ولان يسوق فتح خط
وخلا بيني وبينه ..
الباشا::وين انته ؟
ثابت::ليش رايد شي.؟
الباشا::انه بالصعده اذا تكدر تعالي.
_وتفاجئت برد ثابت الي
مانكر وجودي يمه.
ثابت::اطلع مناك .سونه وياي رايحين
نسوي الفيزا مالتها حته تسافر.
الباشا::ليش؟ هيج سويتو بيها
وين الحلال والحرام ؟التحجي بي.
ثابت::يابه ترى هيه الي اختارت
بيش تريد احلفلك كتلها . ابقي واخليلكم
مكان انتي واختج رفضت .
الباشا::غيربسببكم .
ثابت::بسببك وبسبب اهلها وحقها
تبعد خلينه واقعين لو باقيه شتقدملها انته
غير تخليها بيت حالها حال العشيقه .
الباشا::انته تفكر بدالي لو شنو
شعليك بالي اسوي . وشمدريك اخليها
عشيقه .
_حسيت ثابت تعمد يحجي كدامي
راد يوضح الامور ويمكن اشارة منه وكأنو يكلي
حته اذاعفتي فيصل لا تردين للباشا . طال الحديث بينهم ونقالي ماسكت سويته صامت وبقيت استمع.
ثابت::ها تفرضها عله ابوك؟
الباشا::مثل ماانته فرضت اختها.
ثابت::اول شيء . انته تعرف
عقدي عله قدر لاجل شنو .
الباشا::هههههه .هاي قنع بيها نفسك
ترى انه الباشا . مو الحجي وتبيعهن يمي.
ثابت::ولنفرض. اعلنت زواجي منها
هم وضعي يختلف .لا عندي منصب اخاف اخسره
ولا اغضب امي وابوي الي تعبو عليه ومتباهين برتبتي.
الباشا:: بغض النضر عن كلامك
الي بينت بي مامعتبرنا اهل الك .
_انتفض ثابت وكأنو حس عله نفسه
جفص بالكلام.
ثابت::اياك يا اسعد تشكك بمحبتي الهم
ومكانتهم لهنا ونخرب عاذرك بكل شي اله هاي.
الباشا::دكلي وين انته هسه.
ثابت::اكمل فيزا سلاسل .
الباشا::يلوك لام اعطوب تفيز
خوش من تكمل خابرني .
ثابت::نلتقي بالبيت.
الباشا::تكمل وتجيبها للشركه
وداعت الحجي مااريد شي
بس اطمن واسالها كم شغله.
ثابت::لا تحاول خلص عوف البت
تستقر .
الباشا::خلص انروح للزوجه الثانيه
نتوسط يمها.
ثابت::ومادامك تدري بيها زوجتي
كاعد تحش براسها ليش ولك هيه عايزه.
_نزلن دموعي عرفت يقصد قدر
بس ليش رافضتني هيج هنت عليها نهى مكالمته
وهو يستغفر . والتفت عليه . وقبل مايحجي رديت
ماكو مشكله خلي يجي افضل حته يئيس مني.
المهم سولفي قدر شبيها.
ثابت::مااضم عليج . صار فترة وضعها مو تمام
كلت يمكن لوحدها نقلنها يم اهلي وتدرين عدنا بنيه
بعمرها وجانت منسجمه وياها . بس بعد ماكتلها انج
راح تجين انقلبت ١٨٠ درجه تحسيها كتله اعصاب وحقد وكره . ومن التقيتو كلت هسه تصب غضبها
بعتب وبجي وينتهي الزعل بس فاجئتني بعد ماالتقيتو
بقت مصرة ماتتواصل وياج.
_ماكدرت اكتم صوت شهكتي
بجيت بصوت عالي . ضل هو يستغفر
كمل كلامه وراد يبرر الها .
ثابت::مو بس وياج .افهمي .
_هزيت راسي كمل.
ثابت::من بعد مادز الي محمود كوامه
كعدنا وجاب ناس وحرجني كدام الشيوخ
اخر شي اقترحو انو ينطوها النص والحجي وافق
رجعت سولفتلها وتفاجئت برفضها واصرت انو تاخذ
الورث كامل حاولنا نقنعها ماتراجعت .
_وصلنه الشركه وهو مستمر يحجيلي.
ثابت::ماكدرت اجبرها والحجي كال
خلي القضيه بيد الحكومه افضل حته لو اطول.
كلت فترة ونقنعها ونحل الامر بالتراضي
_وطارق عرف لو لا؟
ثابت::اكيد امه وصلتله خبر. المهم
شويه شويه بدت تصرفات قدر تتغير
انطوت عله نفسها انه بيتنا مااكدر انفرد بيها
بس بنين وام اسعد يحجولي . عرفت نفسيا تحتاج
طبيب حاولت اقنعها رفضت رفض قاطع وتهمتني اريد اثبت عليها تهمه الجنون حته اضيع حقها .
_هو يحجي وانه دموعي تصب
كام جابلي بطل ماي . كتله لازم اخذها يمي
بعد مااكدر اعوفها لان هيج يمكن تتعب اكثر.
ثابت::دسمعي رباط سالفتي
انتي اتهمتيني انه مسولف للباشا عنج.
_لا موهيج بس استغربت
لان انه ماحاجيه لغيرك.
ثابت::جايج بالكلام لاتستعجلين .
_تمام كمل.
ثابت::طلبت مني ارجعها لبيتي الي محد بي
سمعها الحجي . كال وديها اكيد تحتاج تنعزل
حقها وامر طبيعي تتأزم نفسيتها بسبب الضرف
المرت بي وهاي سلبيات نفسيه خليها ترتاح
كم يوم .
_وبعدين ؟
ثابت::بقت مصرة تبقه وحدها من شفت
حالتها تسوء كلت ماينفعها غير تواجدج فااقترحت عليها انو اجيبها يمج كتلها اخليلكم بيت انتي واختج .
رفضت رفض قاطع . ومن كلامها حسيت حيل شايله
بكلبها عليج ومتهمتج بالتخلي عنها .
_احس روحي هلكت .كلامه مرد كلبي.
ثابت ::ردت ابرر موقفج الها وازيح القسوة
الي تكونت بكلبها . حجيتلها ضرفج بس صدمتني
انو هيه ناقله كلشي لااسعد والمصيبه اجت كالتلي
ترى حجيت للباشا.
_غمضت عيوني بقهر . والحل
شنو ترى عقلي ماكام يجمع.
ثابت::مااريد ازيد همج .
_التفتت عليه يعني بعد اكو شي؟
ثابت::دخل اوصي هل السافل يجيبلنا
غده اكيد جعتي . وبعدين نسولف.
_ماانطاني مجال احجي طلع نقاله وخابر.
ثابت::وين انته . تمام لا بس اذا تجي
جيبنا وياك غده. اي عادي حته لو تتاخر.
_سده والتفت عليه .
ثابت::المهم حاولت اقنعها كتلها
فكري ترى مالج غير اختج لان انتي مقررة
بس تاخذين حصتج تطلكين مني ف ليش ماتحليها
ويه بيت فاروق بالطيب لان اذا عاندتي يجي يوم
ويطيحون بيج . ومهما كان المرة ضعيفه .
_صح واكيد لان يعرفون مالنه احد
ثابت::بس صدمني كلامها كالت ابقه عله ذمتك مااطلك
ف ردت استفزها كتلها خو مانبقه العمر كله زواج عله ورق اذا هيج نتزوج علني واخليج ويه اهلي تردين تبقين بهذا البيت كيفج.
_سالته بفضول وشكالت ؟
ثابت::كالت بشرط تبلغ عشيرتك كلها
انك متزوجني وتسويلي حفله عرس .
_صفنت شنو ابالج ياقدر
شتخطط اختي لازم احجي وياها.
ثابت::مااعترضت وسايرتها . كتلها
حقج انطيني مجال. ارتب اموري وادللي.
_اي حاول تهدئها واكيد هيه تريد تستفزك.
ثابت::يابه دسمعي .
_رديت بملل وعصبيه. يابه احجيهن
كلهن انته ليش تقسط عليه مثل خايف انقهر.
ثابت::اكيد تنقهرين . اذا تعرفين
طلبت مني اسوي حفله هاي الايام
_ليش؟
ثابت::لان كتلها اختج حزينه
كالت هو انه لان سونه حزنت عله راضي
اريد احتفل هو ابوها شعليه بي .
_كلها راح ترجع لزوجها .
ثابت::كتلها ردت عليه اي ميخالف
نعزمها هيه وزوجها يجون . واذا مااجت
ادزلها تصوير.
_كمت وانه احجي. خلص اخذها يمي
وعود اذا بقت مصرة عله طلبها شكو بيها انته
موكلت رايدها حقها تسويلها عرس .
ثابت::مااكدر .
_التفتت عليه . وانه اسال شنو
ماتكدر تعلن زواجك لو ماتكدر تسويلها عرس
لو ماتكدر تفرضها عله اهلك .
ثابت::لا موهيج . بس مستحيل افرض
نفسي عليها . انتي تفهمين قصدي
صح اريدها واتمنى تتقبلني بس مااقلبها عله نفسي
هيه متخذتني كارت تلعب بي سلاح تحمي بي نفسها
صورة تتباها بيها كدام بيت فارق حته تثبت الهم اتزوجت الافضل من طارق انه من الاساس مفكر
حته لو صار بينا توافق وحبتني ماتمم زواجي منها
لحد مايطلع يجوز الها نفس بي .
_رجعت كعدت كباله . كلامك صح
بس انه متاكده مابينها وبينه شي صدكني.
ثابت::حته لو . هم مااكدر . سلاسل هو مو لعب
اذا فرضتها واعلنت زواجي . واكيد راح اتلقه ملامه
وعتب تعرفين انه متزوج .
_اي وانته هسه يله اذكرت
متزوج جنت فاقد الذاكرة يعني .
ثابت::افهمي يابه . اختج جاي تتصرف
بدافع الحقد . داخله بحاله نفسيه عدائيه
يعني اول وتالي راح تتشافه من هاي الازمه
واكيد اول شي اطلبه هو الانفصال عني بهيج حاله
شنو موقفي اكيد راح اجبرها عله البقاء وياي وانه مستحيل اتقبل هل شي ثقي بالله احبها واريدها واتمنى تكونلي زوجه اخليها بعيني .
_خليت اديه عله راسي
حايرة شسوي . قطع الصمت نقاله.
باوع للرقم والتفت عليه .
ثابت::هذا فيصل .
_اذكرت خليت نقالي صامت مديت ايدي الجنطتي . طلعته ضبطت الصوت وبس دخلت عله صفحته
وقريت الرسائل دك .ضحك ثابت عله النغمه
ثابت::يابه شهل اغنيه الي توجع الكلب.
_تدري كل مااغنيها لشخص يبعد
وشكد صحت بس تعالو .
ثابت::اي دغيريها .
_خلصت الرنه ورجعت من جديد
فتحت خط .
فيصل::وينك ليه ماتردي.
_جان صامت . انه يم ثابت..
فيصل::سونه باالله عليك
حين كلتي حبيبي من كلبك؟
_التفتت عله ثابت . حس بيه محرجه
كام تاركلي المكان . رديت عليه فيصل
اذا رايدني نفذ طلبي .
فيصل::خلص انا موافك .
_متاكد . وبشاير تعرف لو لا.
فيصل::ماعليك منها انا كم يوم واجيك
فكرت وشفت كلامك هو الصح.
_تمام . نشوف .
فيصل::صدكي انا ابيك .
_حسيت بي يريد يسولف
ويتغزل . كتله انه يم اختي يمي.
فيصل::طيب ف اليل نحكي .
_نهيت المكالمه ويا . كمت ادور ثابت
لكيته بالحديقه التفت عليه حجيتله عن فيصل.
ثابت::ارجع واكلج انه اخوج سواء صارت
بيني وبين اختج قسمه اولا ابقه ساندج.
_خلينه انحل سالفة قدر . وهم ماريد الباشا
يعرف لازم ابين كدامه اموري تمام .
ثابت::ليش ما.
_قاطعته. ماصار كم ساعه
انته حجيت . وان عارض اهله
ابقه منبوذة انه والطفل الي يصير منه
وهيج مااضلم بس نفسي .
ثابت::تدرين انه رفضت انو الخال يوفرلكم
مكان من البدايه كلت البنات يحتاجن فترة يتشافن بيها من سلبيات العاشنها والدليل قدر .
_شسوي ؟ بكل وسيله حاولنا
نعيش مثل البشر . وهاي شوفت عينك
حته الغربه الي جازفت بيها هم مارهمت .
ثابت::اشوف تنطين مجال لنفسج
فكري بهدوء .
_قطع حديثنا صوت الباب
عرفت الباشا اجه راح ثابت يفتحله بقيت بمكاني دخل وعينه ادور مجرد مالمحني ابتسم . درت وجهي متهربه
من ضراته توجهنا للداخل .
ثابت::يله يابه تعاي اكليلج لكمه .
_اكلو بالعافيه . انه مااشتهي .
ويه حجايتي كام الباشا.
الباشا::انه طالع ادخنلي جكارة.
_اشرلي ثابت تعاي استحيت ارده
كعدت . مجامله وهو كل شويه مسويلي لفه.
ثابت::ارمي حمولج عله رب العالمين
هو مدبر الامور واكيد يقدم البي صالح الج.
_شلون راح اقنعه .
ثابت::مادامه عرف حياتج مامستقرة
ويه فيصل ماراح يعوفج فحاولي تحجين ويا بعقل .
_شلت باقي الاكل وسويت جاي
صاح عليه ثابت . دخل خليت الصينيه كبالهم
وكعدت بحيرة وضياع . ابوعله رغم مبين عليه التعب
بس حليان مدري انه ماجنت منتبهتله قبل .كم شيبه بمقدمة لحيته زايدته وسامه .داهم صفنتي ثابت.
ثابت::اي يابه هسه شقررتي.
_التفت عليه . مافامهه عن شنو يحجي. بس الضاهر
راد ينبهني و نضراته خجلتني وكأنو يكلي انتي عله ذمه رجال. رديت بلعثمه . ها ماادري . دنك الباشا يحاول يخفي ضحكته.
ثابت::زين شوكت ناويه تسافرين.
_مامحدده وقت كتلك هو راح يجي.
ثابت::تمام اجيبها يمج افضل .
_اي ماكو غير حل.انتفض الباشا مقاطعنا.
الباشا::يابه كافي تزعطط ترى عيب. وانتي شبيج
مثل الطلي ياهو الي يجي جارج وتمشين بيده.
_وقبل مايحجي ثابت . سبقته بالرد اضن شي يخصني . مو من حق اي شخص يمنعني جيت أخذ اختي وارجع .
الباشا-: المن ترجعين؟
_لرجلي باشا. ليش ماجاي تقتنع
انه هسه متزوجه .
الباشا::لان هذا زواج حاله من حال زواجي بيج
نفس الشي الفرق بالشخص والمكان فقط
لو باقيه يم اختج احسلج . وانه اوفرلج التردي.
_ وفر كلامك ولا تعترض طريقي؟
اختي الها رجال ان قبلت ترجعله خير
وان رفضت هم مالكم عليها حكم . مشكور
وجزاك الله خير وحته لو احتاجيت هم لاتتوقع ادك بابك بيوم لان جربتك لو نسيت السويته بيه.
الباشا::تدرين هسه تاكدت انتي نسخه من سلوم.
_خزرة ثابت .وانه عيوني عليه بتحدي
ضحكت .وانه هسه تاكدت قراري بالعبد عنك
جان صح لان ادري لو شمااسوي راح تبقه تعيرني.
الباش:: تعلمتي كل يوم داگه باب وتطلبين من شخص يحميج متحبين الي يوفرلج كلشي تعلمتي يوميه
معرسه.
_احس كلماته زرفن كلبي .ابتسمت بقهر
اي لان كل الي احتميت بيهم طلعو مو كفو
وجبانيه . جحيتها وكمت اريد اطلع صاح عليه.
الباشا::بالنسبه لاختج جنتنا ومانقبل
تاخذيها لدروبج .
_التفت اباوعله. غمزلي ثابت بمعنى اسكتي.
ثابت::تعاي يابه اختج ماامنعها
منج وانه ثاق بيج واعرف انتي شنو .
_رفعت حاجبي للباشا . هز ايده وكام
خمش نقاله والسويج . ابتعدت من الباب مسويتله
مجال التفت عليه وحجه بنبرة هزة كياني.
الباشا::سمرة. وحق اليالي الي سهرتها
وانه افكر بيج . وحق شوكي وعطشي لصوتج
لندمج وابجيج دم . ضلي امشي بشورهم .
_ضليت صافنه بوجه
غمزلي بمكر وطلع .رديت بخطوات ثكيله
كعدت محتارة وثابت يستغفر .
ثابت::ارتاحي مايهمج كلامه .
_لو اروح للحسينيه
وياريت تجيب قدر.
ثابت::الصبح انه اوصلج ارتاحي اليوم .
_طلع وعافني بحيرتي . طلعت نقالي
خابرت مديحه اطمن عليها.رد بعبرة.
مديحه::احس البيت يريد ياكلني انتي وين .
_هيه تحجي وانه حايرة . لا اكدر اخذها يمي
لان لحد الان مااعرف مصيري . بلعت غصتي
ورديت عليها. بكربلاء خل اشوف الوضع اذا تمام
حته تجين يمي شعدج باقيه لوحدج .
مديحه::ليش ماتردين هنا .ونعيش انه وياج
لحد مايطلع محابس .
_عرفت بقائها بالصعده لاجله
نهيت مكالمتي وياها. وتمددت اكلب بنقالي
لكيت مكالمات من ابو بشاير . باوعت للساعه
الوقت متاخر مو مال اخابرة . راسلته ورا ثواني
دك فتحت خط بعد سلام وسؤال .
ابوبشاير::يخوج انه بالي عندك
ولاتضنين ازعل لو طلبتي منه تبكين بالعراك.
_صدكني محتارة . اختي وضعها تعبان
حجيتله عن قدر ولازم ابقه يمها .
ابو بشاير::خليك عندها لحين ماتكمل امورها
طيب ابيك تروحين لااكرب صراف عشان
احولك مصرف. امانه عليك لاترديني.
_ان شا الله بس اوصل كربلاء
تشكرت منه. وبلغته انو راح اجيبها للحسينيه
ماعارض . ورحب بالفكرة نهيت مكالمتي وانه ادعيله.
غمضت اريد عيوني ترتاح . فكري يجيب ويودي
ومااعرف ليش صورة الباشا ماتطلع من بالي تحسرت
وانه العن الشيطان واستغفر . والي استغربته شعجب
ماحاول يجي من عرف ثابت طلع . كمزني صوت النقال رديت بملل .ها فيصل.
فيصل::كيف حالك .
_وعبالك جاي يستفزني مدري انه
تعبت رديت صاكه عله سنوني فيصل
لاتحاول كتلك الي اريده .
فيصل::وانا كتلك تم.
_تمام من تجي نسولف . انه بيت اختي
وعيب منهم .
فيصل::تمام .
_شمرت النقال وبقيت افكر بقدر
معقوله الي كاله ثابت . اووف يحظي للصبح اتكلب لحد مااجه . بس شربنا جاي طلعنه وباله يم نغمه نقالي ضحكت ترى انه مااعتبرها اغنيه صدكني . هز راسه بتفهم .وهو يربط نقاله بمسجل السيارة وشغل لطميه احس كلماتها لامست روحي وبدون شعور صرت اردد بيها وادك عله رجلي .
واموتن قطرة قطرة &&&&الرسايل كله خطرة
*****************************************
يقارورة دمه الغالي ....
على احبابي انشغل بالي ...
اراقب واني حذره &&&& الرسايل كلها خطرة
_التفت عليه وهو يحجي .
ثابت::الله يبارك بهل صوت يابه عليج بالعافيه
عله هل حنجرة بس سؤال انتو عدكم وراثه .
_رديت بخجل. اي عمتي صوتها حلو
قدر اخذت شكلها . وانه صوتها.
ثابت::صوت قدر كارثي . فد شي خيالي
تحسيها مله متمرسه . تقرء بدون تلكئ
_باوعتله متفاجئه مافهمت يعني
صوتها حلو ؟
ثابت::بس مو بقوة صوتج .
_نزلن دموعي . تدري ولا مرة كالتلي
ولا انه سامعتها جانت تطلب مني اغنيلها .
ثابت::يجوز ماجانت منتبها لصوتها
الحجي اكتشفها . بالصدفه تردد هل قصيده.
وحيل حاب يسقلها انو تقرء للاهل البيت يكتبلها
ابيات ويكلها احفظيهن.
_وطول الطريق هو يحجيلي عنها .
شكد مشتاقتلها .
ثابت::ان شاالله عكب باجر اجيبها .
_وصلنه . ماقبل يدخل وياي تعذر لان مامترخص
من ابو بشاير . نزلني وراح . دخلت اجر بروحي
همزين اكلنا بالطريق . لان الثلاجه تصفر بدلت ملابسي
وكمت نضفت الحسينه وعزلت الساحه وشغلت الثلاجه
للعصر طلعت زرت ومريت للسوك وشكو شي تحبه
جبته اعزل بالمسواك ودموعي تصب . كمت جبت نقالي وطلعت الطلميه اشتغل واردد بيها .قطع صفوت استماعي مكالمه من ابو بشاير . مسحت اديه ورديت.
هله بيك عمي .
ابو بشاير::كيف احوالج . ان شاء الله طيبه.
_سالته عن ام بشاير .
ابو بشاير::بخير مادامك بخير
اله مانزلت للصراف.
_باجر ان شاء الله بس افرغ
ابو بشاير::وش رايك احولهم لثابت.
_براحتك . سلم وسده . ثاني يوم
سويت كم اكله وخليتهن بالثلاجه
احضر واتخيل نكعد انه وياها وناكل .خلص اليوم
عيني للساعه احسب الدقايق وكل شويه اتصل بي
اسأله وين وصلتو.
ثابت::قريب ان شاء الله
اقل الربع ساعه احنه يمج .
_سديته وضليت افتر مثل الطفل
حايرة شسوي .اندك الباب طلعت بلهفه
فتحته ودموعي تصب. واكفه بكامل اناقتها
رغم السواد الي محدد عيونها بس حلوة تباوعلي برود
ثابت::السلام عليكم.
_سلم وهو يغمزلي .جريتها لحظني
دقايق وانه حاظنتها تمنيت لو بس ترفع ايدها
وتبادلني الحظن . بلعت غصتي بوستها . وابتعدت مسويتلهم طريق . دخلو ..
ثابت::ياالله . اللهم صل على محمد وآل محمد.
_كعدو بالصاله . ركضت جبتلهم ماي
وخليت القوري عله النار . حضرت صينيه
خليت بيها معجنات . صاح عليه.
ثابت::تعاي يابه قابل احنه ضيوف.
_نزلت الصينيه كباله . وكعدت عيني لقدر
مشطت المكان بنضراتها. كسر الصمت
وهو يحجي عن اثاث الصاله .
ثابت::الخليج يحبون الجلسات الارضيه
بس عاشت ايدهم حلو هل دزاين.
_اي عكس بيتهم هناك كل اثاثه حديث.
ثابت::المهم انه زاعلان عليج .
_خليت استكان الجاي كباله
وانه اباوعله بتسال.
ثابت::ماحبيت هل تصرف
موحلوه بحقي تخلين ابو بشاير يحولج مصرف.
_تعذرت منه وفهمته . انو هو اصر رغم رفضي.
ثابت::وبعدين فيصل ليش مايدز.
_انطاني من اجيت .
ثابت:عله العموم اذا تحتاجين كليلي
وان حاسبتني غريب فلوس مهرج
عندي شوكت ماترديهن كليلي .
_هزيت راسي اي. والتفت لقدر الي ماجنها
ويانه . قلقني وضعها تصرفها يثبت عكس ماتوقعت
جنت اضن تمثل عليه مثل ماجنا نسوي بسليمه
كام ثابت يريد يروح . باوعتله عاكده حواجبها .
ثابت::كومي قدر خل انزل غراضج يابه.
_كامت لحكتهم . نزل جنطة ملابسها
وتفاجئت بالمسواك الجايبه. باوعتله بزعل
ترى انه اسوكت من امس .
ثابت::زيادة خير يابه .
_دخلت قدر تجر بجنطتها .
وهو سد الصندوك . اتقدم عليه .
ثابت::مااكدر اوصيج عليها لان هيه اختج
بس تحمليها ترى تعبانه كلش.
_بعيني . لان هيه اختي
وفوك راسي لان هيه مرتك.
ثابت::الله يوفقج . ممنون .
_يحجي وياي وعينه لداخل البيت
التفتت لكيتها واكفه تباوعلنه .ضحك وسلم وراح
طبكت الباب ودخلت اعزل بالعلاليك واحجي
هسه وين اودي حرامت يخرب.
قدر::وين اخلي ملابسي .
_التفتت عليها . وكل ضني تريد تستفزني
ضحكت . ترى راح ثابت وسليمه بالسجن .
قدر::مافهمت ؟
_يعني هاي انه وانتي انجمعنا ومايحتاج
نمثل ولا احد يكدر يجبرنا. اخذج ونبعد .
قدر::منو كالج اريد ابعد ترى زواجي
منه راح يكون رسمي.
_كعدت واشرتلها تكعد . شوفي
لو تمثلين عله الدنيا كلها بس انه لا لان اعرفج .
ردت وهيه تشمر الشال من راسها
قدر::غلطانه اصلا انتي الي ماعرفتيني.
وهسه كليلي وين ارتب غراضي مؤقتا طبعا.
_شنو براسج.؟
ضحكت وهيه تاشر عله راسها.
قدر::عقل .
_وين تردين توصلين بعقلج؟
قدر::للمكان الي استحقه .
_خوفتني نضراتها. ونبرتها خاليه
من الرحمه . هزيت راسي تمام . فهميني.
قدر::ايام وانتي تفهمين ماكو داعي احجي.
_انعوفهم ونعيش انه وياج
حته ورثج يولي .
قدر::هذا الكلام جان قبل . تعرفين شنو
جان يعني كان فعل ماضي .
_وانه رجعت ونكمل الي جنه متفقين عليه.
قدر::مارجعتي عله مودي .
سونه عفتيني اول ماصحتلج فرصه
رجعج ابوج . وهسه من شمرج فيصل تردين.
_قاطعتها بغصه. ماشمرني واعتقد ثابت شرحلج
السبب . بس يااختي مادام انتي مقررة واذا الي بالج
بي مصحلتج الله يسهل امرج .
قدر::جنت عبالي حاسبتني اختج
بس من شمرتيني ودرتي وجهج عرفت لازم اواجه الدنيا وحدي . ف من هسه حته لانضل نعيد كلمن يمشي ورا مصلحته.
_تحجي بعصبيه. وجها انطعن صار احمر
قطع حديثنا صوت نقالي . كمت عبالي فيصل
واتفاجئ بمديحه رديت وانه احاول ابلع عبرتي .
اجاني صوتها تبجي ها شبيج ؟
مديحه؛:ولج امس اجاني صاحب البيت عله الاجار
كتله طلعنه منه الرجال ماكل شي نقلت باقي الغراض لبيتكم وسلمته المفاتيح.
_اي خوش جا عليمن تبجين
عله ذكرياتج ويه الجريذيه.
مديحه::ام اعطوب غير تخليني
اسربت .
_سربتي.
مديحه::اليوم ولن بابكم اندك طلعت والكه
واحد لابس قاط وبيده اوراق .
_اختصري. بدون وصف.
مديحه::طلع محامي دازته سلوم
كال عندي وكاله والبيت انعرض للبيع
والشراي يريده فارغ. خفت اكله يبلغها انه كاعده بي
اطاني مهله اسبوع.
_ضليت اصفن . معقوله تبيعه.
مديحه::الووو تسمعيني .
_شبيج بت الكلب مو شكيتي اذني
اي سمعت .
مديحه::وشراح تسوين.
_روحي خل افكر اشوفلي جارة.
سديته والتفت لكيت قدر واكفه تباوعلي
بعدم رضا . حاولت افهمها الصار .حجيتلها
عن مديحه ترى امها ماتت وضلت لوحدها و. قاطعتني
قدر::اكيد تحنين عليها لان ربيتن سوى
خو ماتخلينها بالشارع. وهذا شي راجعلج
بس لحد ماارجع للبصرة يله تجيبها يمج.
_مو هيج . ترى هيه ماتعرف عني شي.
قدر::هههههه . اول وتالي تعرف
والدليل اجيتي من ماتت امها وكفتي وياها.
_ماجادلتها . عفتها تحجي وطلعت برا
احس بروحي اختنكت . خابرت ثابت كتله
عله سالفه سلوم .
ثابت::ابوج الله يرحمه. مسوي تنازل
قانوني لو هيج.
_ماادري . السالفه كلها عد محابس.
ثابت::تمام باجر اشوف الموضوع.
قدر شخبارها.
_تحسرت . وحجيله الدار بينا.
ثابت::ميخالف حقها تزعل .
_نهيت مكالمتي . ودخلت وهيج مرن كم يوم
وهيه رافضه تسمع مني . مديحه اكلت كلبي تلح
كتلها اجي واشوف المحامي. افتر بالغرفه اعزل
بملابسي كلت اخذها تزور. طلعت لكيتها تخابر
انتضرتها تكمل . طولت عبالي ويه ثابت
بس لفت انتباهي كلامها .
قدر::اي هو انه كتله . يجيبهم كلهم .
_ركزت بكلامها.
قدر::بوسلي دانبي . هههههه .
شكرا باشا .
_تفاجئت شلون تحجي ويا بميانه
التفتت شافتني . هزت راسها بتساؤل.
كتله نروح نزور.
قدر::اي بس خل اترخص من ثابت.
_ضليت واكفه يمها بفضول .خابرته.
قدر::اريد اروح ويه سونه نزور.
_مدري شحجه وياها بس تعابيرها
ادل عله انزعاج . سدته والتفتت عليه.
قدر::يله بس منين ناخذ عبي .
_نشتري حرامات صلاه. قفلت الباب
طلعنا وطول مااحنه نمشي هيه دموعها تصب
زرنا وكملنه كتلها نكعد بمطعم ملينه من البيت .
قدر::تمام .بس خل اخذ كم حاجه منا
_وكل مااريد ادفع عنها ترفض.
قدر::كتلج عندي فلوس.
_سالتها بدون قصد منيلج ..
قدر::جا ثابت المن اريده.
_ضحكت. مجامله . وحاولت احجي وياها
يعني بس علمود الفلوس .
قدر::انصحج تشغلين عقلج
بشي يفيدج.
_سكتت . بفشله. بس تصرفاتها
ابد ماعجبتني. رجعنا وهيج خلصتها وياي
حاولت اتجنب الحديث وياها جاي انضف
وصاحت عليه تلفونها ابأيدها.
قدر::سونه ثابت يريدج.
_مسحت اديه بملابسي
واخذته منها. رديت هاخويه.
ثابت::يابه راح انضايقج شويه
باجر جايين انه والاهل حته نخطب قدر
بصورة رسميه .
_باوعتلها . هزت راسها اي
رديت عليه. هلا بيكم . بس لو تخليها بعد يومين
اهيئ الديوان مال الحسينيه اكيد تباتون هنا خو ماترجعون بيومكم .
ثابت::تمام . متفقين.
_مشيت متوجه عليها . حطيت النقال بيدها
ودرت وجهي بزعل .
قدر::اذا ماتكدرين اخلي يسويها
بيت الباشا.
_بلعت غصتي . ورديت لا حياهم
بس عتبي عليج ليش ماكتيلي .
قدر::ترى عادي . انتي هم ماكتيلي
من تزوجتي فيصل.
_صح . هاي هيه . الله يوفقج .
حجيتها . وطلعت برا بجيت لحد ماتعبت
دخلت للديوان طلعت ضيم كلبي بي نضفته
ثاني يوم هيه نضفت البيت . ماخلت بردات وجراجف
صافنه اسوي كيك لو اجيب من السوك . اندك الباب استغربت منو يجينا طلعت واتفاجئ بشاير وابوها وفيصل . رحبت بيهم . دخلو .
ابو بشاير::كلنا نسويها مفاجئه.
_داركم عله كولتكم . واحنه ضيف
عرفتهم عله قدر . انعزلو فيصل وابو بشاير بالديوان
ضلت بشاير كاعده وعينها لقدر . وهاي ولاجنها تشوفها
ركضت لنقالي خابرت ثابت.كتله اجو
ثابت::هو انه ترخصت منه
بس شعجب مابلغنه بجيتهم.
_مااعرف. المهم اهلك خو مايضوجون.
ثابت::لا يابه عليمن.
_سديته وطلعت .حضرت اكل
ثاني يوم التهيت اعزل البيت
كملت البرا ودخلت لكيت قدر وبشاير
داخلات بنقاش حاد .
قدر::والدليل زوجج اتزوجها.
بشاير::الضاهر انك ماتعرفين
سبب زواجه منها.
_ردت انهي نقاشهن بس قدر .
سبقتني بردها .
قدر::شوفي يا اخت بشاير
شكلج مايوحي انج غبيه.
_رفعت راسها بشاير تباوعلها .
قدر::ترى لحد الان سونه ماباديه
بترتيب حياتها ويه فيصل وهل شي خلي
جوى خط.احمر اصفر بلون وجهج .بعد كيفج
بشاير::وان كان هم ابكى انا الزوجه
والحبيبه.وماضن اختك بجمالي ولا .
_قاطعتها قدر.
قدر::لا هنا لازم تباوعين عدل وتقارنين
بينج وبينها . اذا ردتي تحجين بالجمال فهيه اجمل منج
بهواي وازغر بهواي .وحسب نضرات فيصل الها عرفت.
_ركضت جريتها وانه احجي. تعاي ماضل وقت
خل انشوف شراح تلبسين .
قدر::شوفي ولج . هاي الجنها صوله ام الباكله
لاتخليها تقلل من قيمتج .
_يمعودة عوفيها .دفعتني ودارت وجها
وهيج خلصنها هيه وبشاير مناكر عبالك شرايج .
حاولت ابعدهن عن بعض . رغم ملحتها عله فيصل
انو يدخل لوحده من الغرف بس هو رفض بسبب وجود قدر احس المكان مثل القنبله بالحظه تنفجر الساعه
تركض كملت كلشي .صاحو عليه .
ابو بشاير::ناكصكم شي تبون شي.
_شكد يخجلني بكرمه .تشكرت منه ودخلت لقدر
واكفه كبالها ودموعي تصب احس بيها جاي تنتقم من روحها طلعت ملابسها محتارة شتلبس .التفت عليه
فرحت عبالي تسالني . بس خاب ضني .
قدر::روحي بدلي وحاولي تكشخين
لان حته جناينهم جايات .
_نوب وترتني .
سالتها بخجل يعني حته مرة الباشا.
قدر:كلهم وياريت تضبين شريجتج وتحذريها
لاتجفص لان مااضمن اعصابي ترى اسحلها.
_هزيت راسي اي. وطلعت مالي غير ابوها
هو ينقذني لان اعرف راح تستغلها فرصه
وهمزين تفهم كلامي.
ابو بشاير::ناديها الي.
_كتلها ودخلت ابدل لبست صايه
اشترتها الي ام بشاير مناك اباوع لروحي
شوكت افرح بلبس ليش الحزن مكتوب عليه
رتبت وجهي بشي خفيف لفيت شال وطلعت . لكيت قدر مكمله يربي جمالها يصفن ابتسمت .لنضرات بشاير الي الغيرة واضحه عليها . دك كلبي ويه دكت الباب
قدر::تعاي سونه استقبليهم
_جرتني . وهيه تحجي.
قدر::ديري بالج ادنكين . لو تحسسينهن
انتي اقل الكلام يصير وياج يطلبوني منج
مهري..... ويسويلي حفله .
_هزيت راسي مسايرتها . فتحلهم الباب
ابو بشاير . ارتبكت من دخلن مجموعه نساء وبنات . تقدمت وهيه تجرني تعرفني عليهن اباوع شلون تحجي وياهن . وصلت لوحده شايه بيدها طفل .
قدر::وهاي اريج ام راغب . زوجة الباشا.
_سلمت عليها بتوتر نقذني ثابت وهو يصيح.
ثابت::يابه سوولنا مجال ندخل
وبعدين كملن تعارف.
_دخلتهن قدر بقيت انه واكفه
استقبلت ابوهم وامهم والبقيه .
التفت اريد ادخل وكفني صوته .
الباشا::ترى العريس عمي.
_حاولت اتمالك نفسي بس خانتني
دمعه نزلت .تقدم عليه رجعت وانه اتلفت.
الباشا::وفري دموعج . للوجع الحقيقي.
_عفته ودخلت . لكيتهن كاعدات
رحبت بيهم وركضت اجيب الضيافه
اجت وراي . وياها بنيه بعمرنا .
قدر::هاي بنين اخت الباشا.
_ابتسمت مجامله . تقدمت البنيه حظنتني.
بنين::احله من الوصف بهواي
فدوى لله شهل جمال والحسن .
_بوستها .عمري عيونج الحلوات
يله شيلو وياي الصواني.
قدر::عمو ابو اسعد كال تعالو كلكم للديوان.
_هزيت راسي اي . كوميهن انتي
طلعت وانه تبعتها . مندمجين يسولفون
سكتو بدخلولنا . وبعد مشوار تعارف .بده الاب.
موجه كلامه الي .
ابو اسعد::اضن ياسلاسل تعرفين
سبب زيارتنا الكم .
_هزيت راسي اي.
ابو اسعد::وهاي احنه نطلبها حسب الاصول
رغم همه بينهم عقد . ف يابابا كولي الي تردو.
_ضليت اتلفت. ونضرات الباشا ربكتني
شكد احتاجيت شخص يكون منا يحجي عني
يشرط ويتشرط بفخر . نبهني سؤاله .
ابو اسعد::ها يابه . اختج شرطت انتي الي
تكونين ولي امرها.
_حسيت . وجهتلي ضربه . بلعت غصتي
ورديت بثكل. عمو انتو ماقصرتو وانه ممنونه
منكم وجيتكم هاي تثبت معدنكم الطيب
بالنسبه الي غير كلمه من ثابت يتعهدلي بيها
كون مايتخلى عنها بيوم ويراعي يتمها تدري
وضعنا حجيتها وغصيت الموقف صعب حيل .
ابو اسعد::ولخاطر دموعج
انه اتعهد امام ربي وبهاي الحسينه وكدام الكل
اكون اب واهل الها بس بشرط ماتعصيلي كلمه
وترضي الله وزوجها .
_التفتت عليها . تقربت تحجي بهمس.
قدر::مهر وغايب وحفله.
_هل شي انتي طلبي . انه استحي.
قدر::تبقين ثوله.
_حجتها ورفعت . راسها.
ضحك الرجال وعرف طلبها.
ابو اسعد::بلغني ثابت بطلبج وهذا حقج.
_بشاير تباوعلي.وهمه كلهم عيونهم عليه
ضليت ابلع بريكي . اخر شي ختمها الباشا.
الباشا::خلص خلونه نقرء الفاتحه.
للبركه لان همه عاقدين.
قدر؛:ومن ضمن طلباتي
العقد يصير بالمحكمه.
_هز راسه ابوهم . باركولهم . كمت وانه احجي
يله هسه ارتاحو بين مايجهز العشى .
ابو اسعد::انه اروح ازور منو يجي وياي.
اياد::انه . ومولي.
مولي::تحجي عني شكو .
_ضلو يتناقشون طلعت متهربه من
نضرات الكل . احس صدري ضاك
غسلت وجهي اجن وراي هيه وبشاير.
بشاير::وش ناوي تعشيهم .
_سبقتني بالرد
قدر::شيء ميخصج.
_غمضت عيوني مالي حيل
دهرتجن . روحي بشاير انتي يم النسوان.
قدر::لا طبخين هسه اخلي يجيب من المطعم.
_حجيت بدون ماباوع الها.
ترى حاسبه حسابي . خليج يم اعيالج
وانه اكمل ركضت للفريزطلعت الحم ذبيته عله النار اشتغل وعيوني تصب كل شويه بشاير جايه ذابتلها كلمه.
بشاير::اكولج يعني بيها مجال انك تخلفين
بنت تشبه اختك.
_ماكدرت اتجاهل ملحتها.رديت بعصبيه
خوات فيصل ماقاصرات وحته امه بلكي تطلع
بنتي او ابني عليهم..
بشاير::ماحبهم مسمومين.
_ومدري شبيه. جاريتها بالكلام
رديت وانه اطفي الطباخ. وانه شعلي بيج
ترى الي يصير هو بزري خو مااخذ رايج.
بشاير::هههههه . شوكت تفهمين
_التفت فازه من صوت قدر.
قدر::اشوف لو تفهمين نفسج
وتتقبلين الامر هواي احسن. اطلعي
لا اشويج بدال هذا الدجاج .
_تحجي وتاشر بالعلاكه البيدها
سالتها شنو هذا.
قدر::دجاج متبل جابه ثابت
بس نشوي.
_كملنا صلو وابوهم اجه من الزيارة
توجهت للديوان . كتلهم شتكولون لو انه والحبايب
نتعشه لوحدنا وانتو هنا.
ابو اسعد::بارك الله بيج يكون افضل.
_وخلصنها اسئله وبشاير ماقصرت
بتزغيري. كدامهن . بس عجبني اسلوب امهم.
وفيه::مايربط الرجال بالمرة غير الجهال
مهما كان حبه الها .
_كوى كملن عشى . عفتهن ينكلن بالمواعين
وطلعت خابرته. رد
فيصل::هلا وغلا.
_تعال اخذها لا اطلعها الك جثه.
فيصل::طيب عله مهلك خلص ناديها لي.
_دخلت بلغتها. منا هيه ومنا مرت الباشا
الي تحجي بطرف خشمها . دنكت شلت الوليد
بوسته يربي شنو هل جمال.
وفيه::الله يرزقج بولد الي يعوض غربتج.
_اسلوبها طمني عله قدر .لليل انتقلنا يمهم
بعد مافيصل اخذ بشاير وطلع. كاعدين وابوهم
سوالفه حلوه . اباوع لثابت خلصها خزرات للباشا
تالي كام وهو يجرة ويا . لثاني يوم حضرو نفسهم
يرجعون وتفاجئت بقدر كالتلهم.
قدر::انه ابقه لحد ماثابت يكمل امورة.
ثابت::تمام براحتج.
_طلعن النسوان .
وابوهم واكف يحجي ويه ابو بشاير
التفتت فازه من قربه عليه.
الباشا::حاولي تتخلصين من هذا الطلي
لاتخليني اخلصه من الدنيا.وبشاير
_حجاها وطلع . ودعونا دخلت اجر انفاسي
كوى . اتقبلت تصرفاتها ودعيت تستقر بحياتها
رغم قسوتها عليه . بس فرحت الها.
قدر::تحمليني لحد مايجهزلي البيت.
_اترجاج ترى البيه كافيني.
قدر::انتي الي حطيتي نفسج بهل ورطه
_احس خلصت طاقتي صرخت
ليش تحجين وكانو ماتعرفين .ولج ايام اتختل
بين الحاويات . انام وعيوني مفتوحه . حته سياج الجامع ماحماني .
قدر::وجان عندج فرصه.
_اششش اسكتي عفيه
الفرصه الج والف الحمد الله. ونعم الله عليهم
اتقبلوج بس انه بنضرهم راقصه بت ليل .
قدر::الانسان هو يزغر نفسه.
المهم شوكت تسافرين.
_عله اساس ماتدرين. يله راح اغشم روحي
واكلج مااسافر واحتمال اطلك من فيصل.
قدر::تمام يعني تجين لحفلتي.
_هزيت راسي اي. وكمت اريد شي ابرد روحي بي
ومالي غير الاخ الي الدنيا انطتنيا. خابرته رد برحابه.
ثابت::هلا بسلاسل.
_شور عليه .
ثابت::وياج بالي تردي .بالمناسبة
لكيتلج بيت ١٠٠ متر ومرتب وهم قريب عليه.
_انته اعرف . بكيفك.
ثابت::بالنسبه لفيصل حجيت ويا
والولد ماعاجبني احسه مهزوز . بس ابو بشاير
كال كم يوم وتعال عندي كلام وياك.
_ خلينه نشوف ابو بشاير شيكول
الرجال مابذر منه غلط. وماريده يزعل مني.
ثابت:: بس انتي لازم تحسمين امرج
يعني لو كال تبقه وهذا شرطج.
_مالي حيل اريد حياة هادئه
اريد ارتاح وبشاير مو هينه.
ثابت::الله يسهل امرج.
_دخلت لكيت قدر نايمه.
قفلت الباب وتمددت غفيت وانه مقررة انهي
ارتباطي بفيصل. وارجع للبصرة واجيب مديحه
عندي واعيش . بستر. فزيت عله صوت بجي
انخمش كلبي طلعت افرك بعيوني لكيت ابو بشاير
مدنك وفيصل حاظن بشاير يسكت بيها اعبالي امها ماتت سالت بخوف شصاير. التفتو عليه نضرتهم
تخوف .كامت وهيه تجرة وياها دخلت للغرفه المخصصه الهم وطبكت الباب حيل .كام ابوها واشرلي
اتبعه طلعت اتعثر دخل للديوان كعد واشرلي اكعد
ابو بشاير::انا ماحبيت اكدر خاطرك
كلت تخلص خطبة اختك واكلمك.
_شصاير.
ابو بشاير::كبل مانجي العراك
تمرضت بشاير . وعبالنه مرض عادي
_هزيت راسي اي.
ايام واهي تراجع كل مانسال تكول
التهاب امعاء اكثر من مرة تطيح وينقلها فيصل
للمشفى . اخر شي امها اصرت تاخذها للدكتور.
_بلعت ريكي وكل ضني تطلع حامل.
ابو بشاير::بعد الحاح . منا جا فيصل
وصدمنا انو مكتشفين عندها ورم . اخر فحص
اكد انو خبيث والضاهر من زمان وهيه ماكانت تدري
لان الدكتور كال منتشرة بكثرة حالتها متأخر والاعمار بيد الله
