رواية معالج الروح الفصل التاسع بقلم جمانه السعيدي
معين تنرفزت من امي وطلعت اتمشى
مااعرف هي ماتحبني اصلا لو شنو معقوله وحده تحب ابنه هيج تعامله اصلا خالتي تجي مشتاقتلي اكثر منه
من عافتني لليوم لا يوم اجت غسلت ملابسي ولا قرتني دروسي ولا طلعتني المكان
ولا اشترتلي ملابس مدرسه ولا سمعت بيه مريض وعافت كلشي واجت خلتني بحظنه
اهم شي نفسه ورجله وبته حتلو تعرف بيبي مهتمه بيه
بس هي وين دورها
ليش شمرت حملي على بيبي وشردت وكانما ماصدكت
رجعت للبيت لكيته ماكو راجعه الببته حتى ماانتضرت ارجع حتى أطيب خاطري بكلمتين
وكانما تكول خلي يزعل يضرب رأسه بلحايط
من رجعت بس دخلت البيت بيبي حضنتني
بيبي...لا اضوج حبيبي اني مقصره وياك بشي حرمتك من شي
معين بست ايدها وراسها ...ماكو غيرج بلدنيا وحده طيبت جروحي انت اهلي وناسي
لو ما انتي ماكدرت اوصل وانجح الله يحفظج ويطول عمرج
الصبح كعدت الساعه ٨ تريكت وسبحت وطلعت البيت مروه عندي كامرا اخذته وياي وشتريت طوبه بلطريق
دخلت لكيت ام مروه ماكو بس ام ساره
معين...صباح الخير
ام ساره...صباح الخير
معين...مروه كاعده
ام ساره...البارحه نامت من وكت والهسه نايمه
معين...من المشهي الي اخذته يخليه تنام وتسترخي
صعدت دكيت الباب مروه مروه
ماردت عليه
دخلت لكيته رايحه بسابع نومه جمانه السعيدي باوعت الساعه بلعشره اله ربع
معين..مروه مروه
ردت عليه وهي مغمضه عيونه اريد انام انعس
معين..اكعدي صحصحي ماكو نوم
مروه..بس شويه
معين...الي يشوفه نايمه شكد شكله بريئى بس تكعد تطلع
الوكاحه كله
معين...ماكو نوم يله اكعدي شمرت الغطه عنه وطلعت
رحت للحمام فتحت الماي بلحوظ خليته يملي ماي دافي
اكثر من دافي شويه
ورجعت عليه شلته وهي نايمه
ودخلت للحمام نزلته بلحوض الماي الدافي زين الأعصاب
السفليه
نزلته وهي كاعده يعني الماي مغطي من الخصر وجوه
مروه...هاي شنوو هاي شنو ليش هيج
معين...حتى تصحصحين
مروه...انت حيو
معين.. راسا سديت حلكه كبل لا تكمل غلط
هاي اخر مره اسمعج تغلطين فهمتي لو لا اذا مخبله على نفسج اني مااسمحلج تغلطين عليه
مروه...ليش هيج والماي حار
معين...حتى تسترخي اعصابج من الصبح
مروه...انعس اريد انام مااعرف شبيه من امس واني بس اكل وانام
معين...مابيج شي هو هذا الوضع الطبيعي
مروه...خلاص صحيت طلعني الماي حار
معين...عشر دقايق
مروه...هواي عشر دقايق
معين...هسه يخلصن اليوم لازم نشتغل بهمه
مروه...خير هم امي موجوده وتشوفنا انت جنك ماصدكت
معين...امج البارحه كالت اريد تصورلي عشر جلسات
بكامرا حتى ادزهن الدكتور باامريكا
مروه...ماااا مااااا اخذ جلسات البارحه رجليه يوجعني
معين...واني اكول نستمر بلتمثيله ونصور حتى الدكتور يقتنع احنا ماشين صح
اذا شاف التمارين كله صحيح واني كتبت تقرير ان انتي
وياا هاي التمارين كله ماعندج تحسن
راح يكله خلاص هي اخذت العلاج المناسب
ماكو داعي اجيبه الامريكا
مروه...ولله ضجت جنه صارت صدك اني جاي اسوي التمارين يمكن انت تضحك عليه
معين...اني شنو مصلحتي اضحك عليج وليش اصلا اتعب نفسي وياج اخذ الفلوس وادير وجهي
بس اني ماشي على الاتفاق بينا وانتي اذا انسحبتي
من هذا الاتفاق اني ابقه مستمر اجي
ومراح ابطل لان هذا شغلي
مروه... يمكن جاي تضحك عليه
معين ..على اساس انتي نتنياهو واضحك عليج ماعندي شغل وعمل غيرج
عفته وطلعت صحت ام ساره
ام ساره...نعم
معين...تعاي جيبليه تراك تغير ملابسه وساعديه
ام ساره...صار
معين رجعت للغرفه وام ساره اخذت تراك
سمعته تكول خل اسبح فد مره
فتحت شبابيك الغرفه وهويته جمانه السعيدي وبقيت انتضرها
شويه اجت سابحه ومبدله ولافه منشفه على راسه
معين...ام ساره ممكن اجيبليه ريوك والعصير
مروه...اذا مثل عصير امس مااريد
معين....روحي ام ساره مالج علاقه بيه
مشطت شعرها وخلت معطر
ام ساره جابت الريوك
مروه تعال وياي
معين...شكرا اني قبلج سبحت وتريكت مو مثلج كسوله
فتحت الكامرا وضبطته عليه وهي تاكل
مروه...ليش اصورني
معين...ايجوز تبقى ذكرى
مروه...يمعود اي ذكرى
بقيت منتضرها كملت واجت ام ساره أخذت الصينيه
طلعت الطوبه شمرته عليه ماكدرت تلزمه ضربته براسه
مروه...اي ليش هيج
معين...شلته وشمرته عليه لزمته ورجعته عليه بعصبيه وكانما تضربني بيه
لزمته وشمرته عليه لزمته وضربتني بيه بس اني لزمته
بقينا هيج مناوشات عشر دقايق بلاخير شمرته عليه
وضربتني براسي
معين...اخ ليش هيج شكد عنيفه
راسا طكته ضحكه ضحكته تخبل وصوته يجبرك تضحك من تسمع ضحكته
اني راس كمت اضحك
اول مره هاي الغرفه يطلع منه صوت ضحك
قبل كله عياط وغلط
معين...قربت وبديت اسوي حركات رجليه اصعدهن وانزلهن
مروه على كيف لان من امس يوجعني
معين...تمام
مروه ...اني اريد اسئلك سوال
معين...اي تفضلي اني مستمر بلتمرين
مروه...شدعوه هلكد ذابح نفسك وتشتغل بهمه وصدق
ليش ماتمشي امورك شلون مجان وراح تاخذ نفس الفلوس
معين...اولا الرسول الكريم محمد ص يكول رحم الله من عمل منكم عملا واتقنه
بعدين الي يشتغل بذمه وضمير الله يبارك بعمله
هاي شغلتي شغله حساسه مو مال اشتغل شلون مجان
لان أرواح الناس مو لعبه
بعدين المريض يثق بيه ويسلمني نفسه ليش اني اخون هاي الثقه
اكو قصه راح اقصه اللج عن الامانه
اكو واحد قديما عايش بلريف يبيع حليب عندا بقره يحلبه وياخذ الحليب للمدينه يبيعه
يحصل مبلغ يكفي هو وعياله يوم واحد
بس يوصل للسوك الحليب بسرعه ينباع لان الناس تثق بي
بدا الشيطان يوسوسله
ليش ماتضيف ماي على الحليب محد راح ينتبه وراح تحصل فلوس اكثر
معين دفعته طلعته خارج الغرفه وخليته تلزم المحجر وتوكف ماكانت منتبه لان اندمجت وياا القصه
وكفت واني كمشته من ضهرها
مروه...اي كمل ليش سكتت
معين...فعلا جاب ماي ضاف على الحليب وراح للسوك
باع وحصل مبلغ اكثر من كل يوم لان الناس عدهم ثقه بي
وماشكو هو خال شي للحليب
رجع فرحان بالمبلغ الزايد نص الطريق لان هو عايش
بلريف ويروح يبيع الحليب بلمدينه
تعب حيل
معين دنكت وكمت احرك رجله حركت المقص ارفعه وارجعه وهي تبقى مستده على رجل وحده بس بنفس الوقت اني ساند جسمه خاف توكع
مروه...اي كمل شصار
معين...لان الطريق طويل تعب حيل ونام جوه الشجره
مايحس اله قرد نزل من الشجره واخذ جيس الفلوس
راسا طفر
وكام يصيح على القرد ويتوسل بي يرجعله الفلوس لان قوت عياله شلون راح يجيب اكل لعياله
القرد فتح الجيس وكام يشمر درهم علي ودرهم بلنهر القريب لمن خلص الجيس
شمره الجيس فارغ علي وراح يطفر من شجره الشجره
هذا الرجال بدا يعد الدراهم الي شمرهن علي القرد
لكاهن بكد الفلوس الي يبيع بيهن كل يوم ولا زيادات ولا ناقصات
رجعهن للجيس وضحك تعرفين شكال
مروه...شكال
معين...كال فلوس الماي للماي وفلوس الحليب للحليب
الفلوس الي شمرهن القرد بلماي كانن الزياده الي حصل عليه
من الغش بلحليب
وقرر بعد هذا الحادث مايغش احد ابد
لان هو رزقه محدد من رب العالمين
واذا حاول يزوده بلغش وخداع الناس راح رب العالمين ياخذ منه هاي الزياده بشي ثاني
يمكن بمرض يمكن فلوسه تروح واحد ياخذهن منه
الرزق الحلال ماكو احلى منه
مروه...انتبهت اني واكفه وجاي اسوي تمارين
ياا اني شلون وكفت خاف اوكع
معين.. اني لازمج ماتوكعين
يله نحرك الرجل الثانيه بحركة المقص
مروه...مااكدر
معين...صار ساعه تعيدين هذا التمرين وهسه ماتكدرين
طلعتي قويه
مروه...لا اني
معين...يله اني لازمج لزمته ايد من ضهرها وايد اصعد بيه رجله وانزله بحركة المقص
مروه...كافي تعبت
معين...بس عشره بعد وكافي
كملنا شنو رائيج ننزل شويه باحديقه الشمس تخبل
مروه...لا تعبت
معين...بس تكعدين شويه
مروه...يله شويه مو هواي
معين ...شمرت الطوبه قبلنا وشلته نزلته
كعدت على الكرسي
معين.. تعاي نلعب
مروه...شلون اللعب اني كاعده على الكرسي
معين...اني اشمر عليج الطوبه كل مره تلزميه الج طلب
واني انفذه
واذا مالزمتيه اني اطلب وانتي تنفذين
مروه...خلاص موافقه جمانه السعيدي
معين...باعي تجي بعينج بخشمج مالي شغل انتبهي
مروه...تمام ترا اني احكامي قاسيه
معين...موافق
اول مرتين شمرت عليه الطوبه خافت وضمت عيونه ووجه
معين...هااا اني الي طلبين
مروه...كمل هلمره لازم اصده
معين...شمرته عليه على كيف اني اريده تصده
لزمتها وكامت تصيح هي هي ههي كمشته اليوم شيخلصك مني
معين...بعد لمن نكمل اللعبه يله
شمرته عليه ماكدرت تكمشه
رجعت شمرته على كيف كمشته
مروه... كافي تعبت بلاول اني احكم عليك
معين...جبت الطوبه خليته بحضني وكعدت كباله
مروه...الحكم الاول تكلب دقله او جمبقله بلحديقه
معين...وملابسي شلون يتوصخن شلون ارجع للبيت
مروه...انت قبلت التحدي
معين...والحكم الثاني شنو
مروه...من تخلص جمبقله تفتح الماي وتبلل نفسك
معين...شكد خبيثه شلون اطلع بلشارع
مروه....هاا انت الي بديت وتريد تلعب
معين...زين اسمعي احكامي التلاثه لان اني اتلث مرات
اخذت الجوله منج
مروه....اي اسمعك بس مو حكم مااكدر علي
معين...الحكم الاول اخذج تتعرفين على بيبي وتشوفين اني وين عايش حتى تغيرين جو
من سمعت الحكم ابتسمت
الحكم الثاني اعزمج نطلع نتريك بمطعم بمكان حلو وهادء
مروه...الله احكامك كله حلوه
الحكم. الثالث تبطلين تحجين بسلبيه وتضحكين ضحكه حلوه مثل ضحكت الصبح
مروه...راسا ضحكت بصوت عالي
معين..الحكم الثالث تنفذ
مروه....واني بطلت من كل احكامي انت سبقتني
موافقه على احكامك
