رواية متلازمة الحب الفصل التاسع بقلم جمانه السعيدي
هناء...رجعنا للبيت واني الدنيا سوده بعيني
مااعرف شلون راح اتصرف
شراح اكول بيداء شلون بيها اني وين انطي وجهي
امداني وامده حظي على هاي القسمه الخايسه
اني شسويت بروحي لو باقبه بلازواج مو احسن
اني حتى الأحلام موزينه عليه اضرني
حتى حلم مثل البنات ماكدر اتحلم
وصلت للبيت اني ابجي وبيداء تبجي
خطيه هي حست مسويه شي غلط بس ما تعرف شنو
مكابلتني وتبجي
بيومها مارجع خالد لليل يله رجع
دخل عادي متوقع ماعرفت هو شسوه
اني شفته دخل واني هجمت علي بكل قوتي مو تكول مره لا عبالك عشر زلم
هو يصيح شبيج شبيح
هناء. ..اضرب بي وهو يدفعني ويصيح شبيج تخبلتي
هناء...بعدك ماشفت الخبال
حقير مسربت ابن شوارع شلون تقرب البيداء
خرمشته من وجها ومستمره اضرب بي بعصبيه
اريد اكله بسنوني اريد اموته هو يدفع بيه لان فعلا مايكدر. ماعليه صرت وحده ثانيه
خالد... منو يمها اختج منو قرب عليها
هناء... ليش تعتدي عليها ولك هاي فقيره
ماخفت من ربك ولك حيوان خنزير
هاي مجازاته لميتك من الشارع كاعد واصرف عليك هاي
تاليتها
دنكت شلت النعال وضربته بي
خالد. هاي شبيج ختولي هاي الخبله منو قرب عليها اجذب
هناء...ماكو غيرك اكبر جذاب واكبر حرامي
حسيت ماشفيت كلبي رغم جاي اضربه وخرمشت وجها
ركضت للمطبخ عندي سجينه توني اشتريتها
اربد اذبحه هذا واحد عار
من شافني جبت السجينه راسا هي ركضه هي طفره
طلع من البيت
كعدت وكمت ابجي شلون بيه ياربي
ازوجت حتى يخف الحمل عليه النوب وكعت نفسي بمصيبه مااكدر اطلع منها
جمانه السعيدي
بقيت كاعده وابجي وبيداء لا اكل ولا شرب بس تبجي
تمددت وخليتها بحظني
مثل الطفله الزغيره
هناء....حضنتها اسفه حبيبتي كلشي صار اني السبب بي
مسحت دموعها
اني ضيعتج وضيعت نفسي وياج
لو ابقى اعتذر منج طول العمر ماانطيج حقج
اعذريني ردت سند اليه واللج بس اني غبيه وماعرف اختار
ردت اتلاحك روحي بلكت يصير عندي طفل
اعيش علموده
تالي خسرت نفسي وخسرتج
ااااه شكد ثوله ماصدكت واحد طلب ايدي راسا وافقت
ماادري جبتلي عله ومرض بيتي
صدكيني ردت رجال بلبيت حتى نحس بلامان
كل عمرنا واحنا خايفين
ضيعتج ياروح اختج ضيعتج واني عايشه عمري حتى احافظ عليج
شراح اكول الامي ابوي ماكدرت احافظ على الامانه
حاسبه نفسي شاطره وماكو مني
طلعت لا شاطره ولا شي بلعكس افشل وحده اني
هذا اول قرار اخذه بحياتي
وطلع اكبر غلطه بعمري
يومين مااطلع من باب البيت
حتى للدوام مااروح ولا اخذت اجازه كلما اشوف بيداء
اموت قهر
شلون جبت هذا النذل يمها وشلون آمنت بي
جمانه السعيدي
غيرت قفل الباب خاف يرجع من وراي قفلت الباب عليها ورحت للدوام
الكل متعجب على شكلي صرت سوده وطالعه لطمة حمه بحلكي وامشي اسحل بروحي سحل
ومااحجي وياا اي احد
بعدها خالد اختفى لا شفته ولا سمعت شي عنه كلشي مااكدر اسويله اني لا حول ولا قوه
بس احجي أفضح روحي كلها راح تكول وين لكيتي ومنيين جبتي وشلون دخلتي بيتج وانتي ماتعرفين عنه أي شي
شلون تعوفينه هو وياها بلبيت وحدهم
عدا موعد الدوره واني متت خوف خدرت دارسين
وشربتها كلت بلكت اتاخرت عليها
بس كلشي ماكووو حسيت اكو مصيبه راح توكع على راسي اكبر من ذيج المصيبه
شلون لو طلعت بيداء حامل شراح اكول كدام الناس
حتلو كدرت اضمها من الناس شلون اضم الطفل
وشراح اكول هذا منيين
شكد دعيت ربي ماتطلع حامل شلون بيه وين اروح
ياربي كل المصايب اتكومن على راسي
شهر ونص فات عرفت بيداء حامل بدون تحليل
بدت عليها اعراض الحمل نايمه مل الوقت وبس تخلي شي بحلكها تتقئ
وهسه شلون بيه راح نفضح اني واختي
وشماتتنه اكثر من المحبين وين انطي وجهي
حتى مااكدر اكول اني حامل لان جاي اطلع وارجع للدوام والناس تشوفني شلون حامل وين بطنج
ياربي لاتحيرني اكثر مااني محتاره وين اروح اني وهاي المسكينه
بدت بطن بيداء تكبر واني بلضيم حالي شلون راح اواجه الناس وشراح اكول
تالي عمري راح اصير علج بحلوك العالم
بعد ما وصلت بيداء للشهر الرابع قررت اعوف البيت
واطلب نقل من هاي المستشفى
اروح اي محافظه ثانيه محد يعرفني بيها منا لمن اجيب بيداء ساعته ارجع واكول اني تعالجت وحملت
واسجل الطفل باسمي ماكو غير هذا الحل حتى اكدر احافظ على سمعتنا كدام الناس
بلبدايه طلبت نقل شكد مقهور هذا المستشفى صار اكثر من عشر سنوات ادوام بي وكل الي بي يعرفوني
ويحبوني ويساعدوني شلون راح اعوفه
سئلوني ليش راح تنقلين كتلهم زوجي لكه شغل بغير محافظه وراح ننتقل ونستقر هناك
من حصلت النقل رحت ادور سكن بمحافظه الي قررت اعيش بيها
لكيت مشتمل زغير كافي علينا
الجوارين كلهم كتلهم زوجي لكه شغل بغير محافظه وراح ننتقل نسكن هناك
من اجن يودعني ضميت بيداء خاف يشكن بوضعها
اخذت بس كم حاجه الضروريات وقفلت بيت اهلي
ورحنا اني وبيداء
ولد سايق عرف اخذنا
نسوان وحدهن يتغربن بلولايات البعيده
محد بحالهن ومحد يسئل عنهن
اكو اكبر من هيج وجع
اول شي ودعت المستشفى واني ابجي
وهسه جاي أودع بيت اهلي والذكريات الحلوه
ولله الاحساس الي جاي احس بي محد يتحمله خساراتي كثرت من يوم عرفت خالد واني خساراتي كثرت
شنو من بشر لعنه خوما لعنه
وصلنا بليل نزلنا غراضنا وكعدن وحده تباوع على الثانيه
لعبت بينا الدنيا لعب
ومانعرف بعد شنو المضموم
جمانه السعيدي
عدلت المشتمل ورتبته ثاني يوم رحت جبت مسواك
وطبخت سبحت بيداء رتبت الفراش
اليوم الي بعده بديت اداوم بلمستشفى
وتعرفت على البنات
طلبت اشتغل بردهة الولاده اريد اتعلم على الولاده
لان مااكدر اولد بيداء بلمستشفى
راح يطلبون اوراقها وساعته شراح اكول
قبل اكو تشدد بلمستشفى مو مثل هسه
بديت اتعلم شويه شويه والشي الي مااعرفه اسئل عنه
اني زينه بسرعه اتعلم
خمس اشهر واني ماكو وحده تجيب اذا ماادخل وياها
سهله عمليه التوليد وهم اني عندي خبره بشغله هواي
قررت اني اجيب اختي بلبيت
والطفل اسجله باسمي لان اني عندي عقد زواج
راح يمشي الحال
كلما تكبر بطن بيداء اخاف اكثر اخاف عليها
خاف ما تتحمل الولاده هي من الدوره تبجي شلون بلولاده
جهزت شغلات الطفل كلها ملابس ممه كاروك مندر
كلشي جهزت ماناقصنا شي
جبت ابر خاف يصير عسر بلولاده ابر صناعيه
جبت ادويه ومسكنات
خايفه كلش خايفه عليها خاف افقدها شلون بيه
منا لمن وصلت للشهر التاسع
اكلت ٢٥ يوم من شهرها
كعدتني بليل تبجي تبجي من بطنها عرفت عدها ولاده
خدرتلها هيل شربتها كمت امشي بيها
اخليها تسوي حركات تسهل الولاده عليها
تصرخ من الالم تصرخ وتخاف تريد تنهزم من البيت
بسبب لالم
اخير شي من اشتد الوجع عليها كانت تملخ بيه
عضتني حيل ايدي كام يجري منها دم حتى من شعري سحبتني تضرب بيه
واني ماكو على الساني غير يارب ارحم حالها وحالي
وسهل عليها الولاده يارب
يارب مالنا غيرك ارحم حالنا
سهل عليها الولاده ياالاهي
يارب ماكو احن منك على عبادك وهاي مسكينه
لا حول ولا قوه انت اعرف بيها مني
انت تعرف حالها وحالي ساعدني يارب
شكرا لزيارتكم عالم روايات سكيرهوم
