رواية اوجاع يتيمة الفصل التاسع بقلم جمانه السعيدي
تريكت اني وعمتي لان اني البارحه ماتعشيت
من ورا هذا المسموم
وصعدت بدلت ورحنا اني وعمتي نجاة
طبعا ام حسام صار عدها علم بلموضوع ولاكالت اروح وياكم شلونج خو مامتاذيه حيل
وصلنا للمستشفى اكو بنيه ممرضه كلش حبابه تعرف عمتي نجاة دخلتنا راسا للدكتوره
شرحنالها الوضع وفحصتني
ولله استحيت منها
بعدين كالت ماما انتي مجروحه من جوه بس شي بسيط
هسه اخيطه واكتبلج علاج
خدرتني موضعي وخيطتني ونطتني عصاره وسجلتلي ابر التهابات
وكالت ممنوع الرجال يتقربلج كم يوم لمن تصيرين زينه
مرينا على الصيدليه وشترينا العلاج ورجعنا
دخلنا ولكيناهم كاعدين يتريكون بعدهم
شفت علامة استفهام وكم سؤال بعيون حسام
صعدت الغرفتي ولكيت الشفيه بعدا نايم
وصيت عمتي نجاة توصي لايتقربلي وتحجي علي
وماكعد اله الضهر وعمتي اخذته على صفحه وحجت ويا
بعدين العصر اجونا الاهل والاقارب يباركولنا والبيت هوسه
خطيه عمتي نجاة بقت علمودي
وبليل ماصبر ايريد يطلع يشرب
اني كيفت افتك منه
عمي ماقبل وكام يحجي الناس اتريد اتباركله وهو طالع
اجا نص اليل سكران
ذب روحه على الجربايه ونام حته حذائه مانزعه
اباوع علي واكله نام ان شاء الله ماتكعد
عدا كم يوم وخفت الناس
ونجلاء عزموها اهلها بلسبعه
واني عمتي نجاة حتى لاتكسر خاطري عزمتني حتى لا
احس ماعدي اهل
وعامر ماقبل يروح وياي
حسام كال نوصلج العمتي وبعدين نطلع لاهل نجلاء لان عازميهم
بدلت ونزلت وخليت مكياج خفيف
اكثر شي كحل ومسكاره وحمره خفيفه
وشويه مورد خدود
نزلت ونجلاء اشوفها لاطمه بالمكياج
خاله هواي مكياج بحيث طالعه مو حلوه
هي شكلها حلو بس ماتعرف تتمكيج
حسام يباوع عليه وعليه
حتى لايحرجها شاورها شني هاي المكياج يمعوده امسحي
..جان تكله يا تغار عليه حسام
...ولج يا اغار انتي شفتي نفسج بلمرايه
.راحت خففته شويه
وطلعنا طول الطريق اني ما حجيت اي شي
بس هي تسولف ماتسكت ابد
وصلني العمتي وكال من نرجع انمر عليج وناخذج ويانه
تعشيت يم عمتي
وتفاجئت
جابتلي كلاده ذهب خناقي هديه
كلش حلوووه
بقينا كاعدين نسولف
وبعدين مر عليه حسام ونجلاء ورجعت وياهم للبيت
عامر بلنهار بس يكعدون يضل يتأمر عليه عود شوفوني مسيطر
وبليل حرب اني ويا ما اتحمل يتقربلي لو يلزمني
بس يقربلي اختنك فد مره منه
بس شسوي حكم القوي على الضعيف
فات تقريبا شهرين على زواجنه
وحسام ونجلاء ابد ما احسهم منسجمين
ولاعبالك عرسان جدد
ماكو حب واشياق بينهم
عبالك صار عشرين سنه مزوجين مو شهرين
ما اعرف ليش اني جنت مركزه وياهم
يمكن لان احس اكو نقص بلعلاقه الي بينا اني وعامر
يمكن لان جنت اتمنى حسام يكون بمكان عامر
صح مايتعاركون لكن هي مامهتمه بي وتشاقه ويا تحسيهم مامزوجين
بارده كلش وياااا
غير يطلع الصبح ومن يجي متلهفتله... لا
ولاجنه جان طالع سلام عادي وكلام عادي
ومن يروح للغرفه تبقى كاعده يم البنات اتسولف ماتروح وراه
اما اني صاحبي غضب ونازل عليه
فد يوم انضف بلغرفه
ولكيت بطل من هذا السم الي يشربه
لزمته وشمرته
شني النوب جايبه للغرفه
سبحت اني وبدلت عدي دشداشه طويله وبيها فتحات صدرها تور وربع ردن لبستها ونمت
مااحس اله الضربه وياي كومي كومي وين وديتي البطل
اني بعيوني النعاس يابطل
البطل الي جنت ضامه بلزاويه جوه طلعي احسلج افتهمتي لو لا
اني كتله شمرته
شني جايب هذا المنكر هنا تشرب
..شمرتي اني اليوم اموتج حقيره
شلون تشمري
وكام يضرب بيه كوه خلصت روحي وضربني بلحزام على زندي وصار ازرك
وهو يصيح ويفشر ويغلط وبعدين هجم عليه ضرب
راسا اذكرت ابوي من صار عصبي وكتل امي خفت لايموتني
ماعدا مانع مخبل يسويها فتحت باب الغرفه ولكيت
حسام ونجلاء طالعين على الصوت
بدون وعي صرت ورا حسام احتميت بي ونسيت اني شلابسه من ورا هذا الحقير
..يصيح على حسام انطنياها اموتها صايره واعظه براسي
حسام كام يصيح عليه
ولك انت ماتصيرلك جاره تخبلت تضربها
على شنو تضربها
اني حجيت واني ابجي
جايبله بطل يريد يسكر بلبيت وشمرته ولله ماسويت شي ثاني
. حسام ..كلب انوب المنكر هنا
ولله حرام عليك انصلي ونصوم وانته تريد تنكس بيتنا امشي جوه اني اعلمك طلعت صوتنا
كدام الناس الله لايوفقك
التفت عليه روحي ارجعي الغرفتج
اني اعلمه وسحله ونزله جوه
واني رجعت الغرفتي
اشوف ايدي زركه من ضربت الحزام وتوجعني الله لايوفقك عامر
ايدي توجعني جسمي كله يوجعني
ياربي هذا شنو من بلاء
