رواية مليكه الفصل التاسع بقلم جمانه السعيدي
مليكه...ثاني يوم جان جمعه وهاجر ونورهان نايمات
كعدت الساعه بلسبعه
نزلت جوا اريد اكعد سند حتى نطلع
اصلا اني البارحه مانمت زين بس افكر شلون اروح الاهلي
صارت بلسبعه وعشره
وسند نايم دكيت الباب خفيف
سند...اي كاعد هسه اجي
مليكه..احضر ريوك
سند..لا نتريك بلطريق لا تشغلين بالج روحي حضري نفسج
مليكه...رجعت صعدت سبحت وبدلت
وخليت مكياج خفيف
طبعا نورهان علمتني شلون اخلي مكياج مرتب وحلووو
وبشرتي هوواي فرق عن أول مااجيت
يمكن لان بعمري مامخليه شي على وجهي
بشرتي بسرعه تغيرت على الكريم الي اخلي
انطا نتائج بسرعه
المهم. كملت ونزلت بس جنطت ايد جبت بيه موبايل
وكلنس ومعطر وفلوسي
نزلت لكيته مكمل لبس يلبس بلساعه
سند...هااا شلوني
جان لابس بنطرون زيتوني وقميص كريمي وحذاء اسود
بس طالع يخبل هو اصلا حلووو
مليكه...تمام اوكي
سند...هاي الساعه ارتب لو هاي
مليكه...هاي احلى
خله المحفظه بجيبه وتعطر وطلعنا
صعدنا بلسياره ونطلقنا
قبل لا نطلع من بغداد وكفنا بكوفي وطلبنا ريوك وجاي
المكان كان تحفه يخبل
كنت احس احساس حلووو مااعرف شلون اوصفه
حلو الانسان يحس بقيمته ويعرف هو شيريد والاهم يلكه ناس تهتم بي وتحاول أطيب خاطره
كملنا وطلعنا
جمانه السعيدي
مليكه... انت ليش مهتم تساعدني
سند...لان احنا البشر الله خلقنا حتى نساعد واحد الثاني ونهتم واحد بلثاني
رب العالمين خلق كل واحد من عدنا واكو شي بداخله
يحتاج يكمله بشخص ثاني
مليكه...بس انت انسان ناجح وواصل وشكل وكارزما
وهيبه شلك بوحده مثلي خلصت عمرها ماتعرف راسه
من رجليه
سند...اذا اني كلت شعليه وانتي كلتي شعليه راح نبقى كل واحد بازمه
ومحد يساعد الثاني
بعدين انتي كم يوم وتصيرين من اصحاب الاملاك والفلوس
ويجوز ماتباوعين عليه
مليكه...ولله اكره الفلوس لان كل المشاكل بلعالم من ورا الفلوس
كل الحروب والدمار من ورا الفلوس
سند...لو كل الناس تفكر مثلج جان عم السلام بلدنيا كله
مليكه...تعرف لو امك جايتني بااسلوب احسن
وكايله عوفي حصتج الاخوانج
انتي عندج جدج وخوالج يحمونج واخوانج ماالهم احد
هاي الفلوس هي الي راح تأمن مستقبلهم
اقسم بلله جان عفت كلشي ورجعت
وابصم بلعشره
بس هي تعاملني وكانما اني نكره ومالي وجود
وكانما هي ومحمد ونورهان بشر ويستاهلون كل خير
واني حيوانه مكاني بلحضيره
حتلو اني مو بمستواهم هم ابقه بشر
ورب العالمين يكول
ان اكرمكم عند الله اتقاكم
شوف رغم احنا بيت جدي وضعنا المادي متوسط
بس ولله ناكل احسن اكل ونلبس ملابس ساترتنا
ولله مفضل علينا بنعمة الستر
مرتاحين وماعدنا مشاكل
وامك رغم عايشه بيت فخم وتصرف وتلبس وجايه ورث
خير من الله بس مامرتاحه قلقه وكانما تريد تملك الدنيا
جمانه السعيدي
اني زغيره وعشت حياة مامستقره
بس اعرف السعاده مو بلفلوس السعاده براحة البال
اكو هواي ناس اغنياء ويملكون فلوس واملاك
واذا تمرض كل فلوس الدنيا ماتدفع عنه لحظه ألم وحده
سند...انتي منيين اجيبين هذا الحجي تحجين عبالك
عمرج ١٠٠ سنه
مليكه...شفت اشكال بهاي الدنيا وتعلمت
اكثر واحد يعلمك دروس بلحياة الحرمان
الحرمان معلم محد يكدر يوصل القدره بالتعليم
سند...اي ولله صدك
مليكه...وصلنا البيت جدي الساعه ١١ ونص طبعا اني انطيتهم خبر حتى يحضرون غدا محترم السند
ويكرمونه بلضيافه ويرفعون راسي كدامه
نزلت اني قبله ودخلت اول واحد لا كأني جدي حضنته
وضليت اشم بي شكد مشتاقتله
وبعدين بيبي
جدي..طلع حتى يستقبل سند
بيبي...يمه مليكه صايره حلوه
مليكه...بيبي احنا ماعايشين لو شايفه بغداد تخبل والحياة عدهم حلوه مو مثلنا
بيبي..بلعافيه دخلت سلمت على زوجت خالي وبنات خالي
وحتى ابن خالي المعوق دنكت على وبسته شكد فرح بيه
طلعت من بيتنا البيت خالي سعد مشتاقه النرجس
دخلت بس زوجت خالي كاعده والبنات نايمات
سلمت عليه ودخلت عليهن اهوس ورفعت الغطا
خوب نرجس نمت فوكاها وخنكته
نرجس...شبيج تخبلتي عود راحت البغداد تعقل تخبلت بلزايد
مليكه...ولج اشتاقيتلج مو عبالك اسبوع عبالك
صار سنيين ماشايفتكم
نرجس...اللج وحشه ولج تعاي شو صايره حلووه
شكلك مرتب شكووو
مليكه...ماكو شي بس الحياة هناك تختلف ونضاميه
مو مثلنا هنا هوسه
نرجس...عيوني كامت تحجي بلنضاميه عو تبغددت
مليكه...اكعدي صحصحي وتعاي وراي
مليكه..اجيت اطلع من الغرفه صاحت عليه منو جابج
مليكه...سند جابني
نرجس...سند منو اخوج
مليكه...لا مو اخوي
نرجس...لعد منو سند
مليكه...تعاي اعرفج علي اني رايحه الحكيني
جمانه السعيدي
رجعت لكيت جدي كاعد يسولف على سند وبيبي كاعده كباله لابسه نضارته وتتفحص شكله
مليكه...هااا شفت جدوو شكد حلوو
سند...ضحكت اي جدج حلووو
جدي...الله يبارك بيك مليكه بس تحجي بيك وبااخلاقك
سند...الله يسلمك انتم الاحسن
بيبي...انت خوش ولد ماطول شعرك مزينه هيج مو مثل ولد هالايام تكول عرف ديج
سند...ضحكت ودنكت ضحكت من بساطتهم وطيبتهم
مليكه....راسا شفت نرجس اتاشرلي
طلعت...هاا شكووو
نرجس...ولج هذا منيين حصلتي يجنن شوفي الجسم والعضلات بشرفج اريده
مليكه...هو لعابه وتردي
نرجس...يعني خل انسق ويااا انطيني رقمه الله عليج
مليكه...مايفيدج ملاكم
نرجس..انتي شعليج اني وياا نتلاكم خلي ينتصر عليه
اروح ابدل واجي عرفيني علي
مليكه...راحت نرجس بس اني ضجت هي جانت تتشاقا
بس اني اذا فكرت لحظه ممكن سند يحجي وياا غيري
اضوج تعلمت علي ويمكن حبيته
اكثر انسان قرب عليه وفهمني هوووو
شويه مااحس اله بنات خوالي كلهن مجمعات
واكلن كلبي بلاسئله
...ليش هو الي جابج
....تحبي
...يحبج
...شلون انتي وياا كاعدين بيت واحد
...عندا فلوس
...خاف يقشمر عليج لان سمع بلورث
...راح يخطبج
مليكه. .بقيت صافنه ومااعرف شجاوب
راسا زوجت خالي كالت تعالن ساعدني خل نصب الاكل
كلهن راحن واني بقيت بمكاني
اجا جدي وكال تعاي وياا البنات
مدينا السفره واجو خوالي ثنيينهم وجدي وبيبي
وكعدنا ناكل
شكد سئلو سند اسئله وهو يحجي عبالك يعرفهم من زمان
اخذ راحته بلكلام وياهم
وجدي يخلي لحم كدامه ويكله اكل
العائله كله حبت سند
مو بس اني وبنات خوالي ذبحن نفسهن يردن يتعرفن علي
من كملنا اكل وجبت الجاي
كلهن مبدلات ولا بسات حجابات
دخلن سلمن علي وحده وحده واني عرفته عليهن
كعدن وكامن يسئلنه اسئله
وهو يجاوب ويضحك
حتى زوجت خالي ناظم دخلت سلمت علي
جمانه السعيدي
أخذنا الحجي والضحك لمن صارت الساعه بلاربعه
سند...يله مليكه ورانا طريق
جدي...ماتباتون اليله هنا وباجر اطلعون بعدنا ماشبعنا
من مليكه
سند...المره الجايه انشاء الله
اني سعيد تعرفت عليكم شكد حجت مليكه عنكم بس ماكدرت توصفكم اليه
انتم ناس طيبين والنعم منكم
جدي حضن سند وباسه ووصا عليه
جدي...دير بالك على مليكه
سند...من عيوني
بيبي....انت خوش ولد بنيتي بامانتك
سند....تدللين حجيه
مليكه...جدي انطاني مصرف ونطوني صندوق رطب
اخذ وياي لان اني كلش احب الرطب
صعدنا بلسياره وودعتهم وطلعنا ونرجس اتاشرلي
الرقم وتخلي ايدها على اذنه
عود رقم سند حتى اخابره
ولله لو تموت ماانطيه رقم سند
بس طلعنا من النعمانيه
سند...اهلج محبوبين وطيبين اني سعيد تعرفت عليهم
مليكه.. هااا يعني مادوخوك بحجيهم
سند..بلعكس حبيتهم وحبيت طريقتهم بلحجي
مليكه...عود كرر الزياره
سند...اكيد مو علمودج لا علمود جدووو
وصلنا للبيت الساعه بلسبعه المغرب دخلنا مالكينا اي احد
سند اتصل بامه
طالعه هي ونرهان يتعشن برا
مليكه..بس ابدل واحضر العشى
سند..اني هم اريد اسبح وابدل
مليكه. طلعت كبه من المجمده كليت وكليت طماطه
وحميت الخبز وكعدنا ناكل
اتصل ضياء كال يوم الأحد نروح للتسجيل العقاري نوقع اوراق
مليكه.. تمام
كملت وصعدت انام لان حيل تعبانه
جدي اتصل يطمن عليه
طمنته وصلنا بلسلامه وحجبتله على المحامي
أكد عليه اقرا الاوراق قبل لا اوقعهن
قفلت التليفون ونمت
ماكعدت اله بثمانيه الصبح
نزلت جوا لكيت سند جاي من رياضة الصباح وداخل يسبح
رحت احضرله الريوك قبل لا يطلع
طلع...صباح الخير
سند..صباح الخير
مليكه..حضرت الريوك تعال نتريك
سند.. اجيت
مليكه....كعد وكال الاسبوع الجاي عدنا دوري باربيل
مليكه...اوكي اتمنى اشوفك شلون تتلاكم
سند...لو بغداد جان اخذتج وياي
مليكه..يله على الجايات
سند...بعد يومين اسافر الاربيل حتى اتمرن قبل البطوله
مليكه..عود اتصل طمني عليك
سند.. اكيد
شكرا لزيارتكم عالم روايات سكيرهوم
