رواية إبن دار الايتام كامله جميع الفصول بقلم جمانه السعيدي
اني قصي مواليد ٩٠ من وعيت للدنيا واني بدار الايتام
مااعرف اهلي منووو
وهل اني ابن حلال او ابن خطيئه ما اعرف
المهم اني ابن دار الايتام
حتى اسمي ما اعرف منو الي سماني
بس اعرف اسمي قصي وبس
الصراحه اني حاب اسمي حيل
من عمري عشر سنوات واني افكر بمصيري ومستقبلي شنووو
عندي طموح
ودائما افكر اريد اشتغل واعتمد على نفسي
كنا ندرس بدار الايتام مراح اكللكم اني من الاوائل
بس كنت كل سنه انجح والحمد لله
والكادر التدريسي يحبني
ابد ما كنت مشاغب
بلعكس احب الكل واساعد اي واحد يحتاج مساعده بدون تردد
كنت احافظ على ملابسي وشغلاتي
ونضيف كلش
احنا نحصل لبس شتوي بلموسسه ولبس صيفي
يعني ناخذ ملابس نلعب ونام بيهن
وملابس للدوام
ملابس الدوام ناخذهن من تبدي المدرسه
اني كنت كلش احافظ على ملابس
منا لمن يزغرن عليه انطيهن للازغر مني
صحيح اني بدون ام واب بس اني كنت حريص اعلم نفسي على النظام
احب الترتيب والنظافه
لذالك الكل بلموسسسه كان يحبني
والمدرسين يضربون بيه المثل بلترتيب والنظافه
بلعطله يبدون المسولين بدار الايتام يعلمونا على بعض الحرف
كل واحد شحاب يتعلم
اني كنت احب اكون بلمطبخ
احب اتعلم الطبخ
لا تتوقعون اني لان بلمطبخ سمين اني جسمي كلش حلووو
صحيح همه بلمطبخ ماكنو يطبخون النا اكلات خاصه
او اكلات مكلفه
بس كانو يطبخون على المسواك الي يجيهم
طبعا احنا عدنا طباخين اثنيين بدار الايتام
كل واحد يطبخ اسبوع وياخذ اجازه اسبوع
اني ثنيينهم مصادقهم
الصراحه مصادقهم حتى يتحملوني واكدر اتعلم طبخ
وكنت كلما الكه برنامج طبخ طالع بلتلفزبون
اتابعه
صحيح الي يطبخون بلتلفزبون عدهم شغلات ماعدنا
بلمطبخ
بس كنت اراقب طبخهم
والبهارات الخاصه بكل اكله
وشنو الأكلات الي متحتاج هواي وقت
والطباخات الصحيه
الحد ما يوم اجتني الفرصه حتى اثبت مهارتي بلمطبخ
بيوم الطباخ كان كلش مريض هنا كان عمري ١٢ سنه
ابو حميد الطباخ الكان مسول عن الطبخ لهذا الاسبوع
بيومها اني كتله اني راح اطبخ بمكانك
كال مراح تكدر لان الكميه جبيره
كتله اكدر واذا شي صعب عليه انت تساعدني
اولا قررت التمن ما يكون ابيض اريد اقسمه اتلث اقسام
اطبخ قسم ابيض وقسم اصفر وقسم احمر
اولا اذا قسمته راح اكدر اسيطر علي
وثانيا راح يكون شي مميز
الصراحه الطباخين ما يتعبون نفسهم
التمن يوميه ابيض يعني طبخ مال جفيان شر
اني شفت الشيف الي بلتلفزيون يكول اذا تطبخ كميه جبيره
من التمن يكون قياس التمن بكد المي
ولازم مايكون التمن ناكع وقت كلش هواي
بديت بلتمن طبخت الاصفر حمست البهارات وخليت
التمن وحركته ويه البهارات مثل الحمسته
وبعدين خليت قياس المي
رجعت طبخت الابيض وعفته يتهدر ورجعت طبخت الاحمر
الاحمر طبخته على طريقه البزل
يعني طبخت التمن ابيض وبزلته
وحمست معجون وبصل وضفته اله وحركته بعدين هدرته
اما المركه كانت مركة عدس صفره
سويته تخبل
بيومها كان الكل متعجب بلطبخ الكل يصيح شنو هذا الطعم
رغم هي مركه عاديه يعني مركة العدس حتى الأعمى يعرف يطبخها
جمانه السعيدي
بس الكل كال الطعم يجنن
ولمن عرفو اني طبخت حتى المدير اجاني وكال
شنووو هاي المواهب الدفينه
عفيه انت راح تكون احسن شيف بلعراق
الكل كان مستطعم بلاكل وفرحان
اله ابو حميد ما عجبه الوضع
يمكن حس اني راح انافسه
او يمكن حس بلغيره هو الصراحه يعرف يطبخ
بس ما يريد يتعب نفسه
يعني يطبخ شلون مجان
من يومها وابو حميد كلما اجي يمه بلمطبخ
ما يقبل اطبخ يخليني اغسل مواعين
لو اذب الزباله
ما يقبل أقرب للطبخ
اما الطباخ الثاني ابو علي لا كان يعوفني اطبخ براحتي
واساعده
منا لمن وصل عمري ١٨ سنه صرت طباخ محترف
من كملت ١٨ سنه صار شكلي حلووو
اني طويل طولي ١٧٥ حنطاوي
عيوني كبار
ورموش كثيفه
رشيق وطويل
شعري اسود وثخين وسرح
الكل كان يكول نضراتك حلوووه وعندك جاذبيه
كلما اباوع بلمرايه اسئل نفسي نفس السوال
ياترى اني اشبه منوووو
اشبه امي لو اشبه ابوي
ياترى شنو الضروف الي خلتهم يتركوني هناااا
على الأغلب اني ابن خطيئه
لان مستحيل اكون ابن حلال واهلي يتخلون عني بسهوله
وارجع واستغفر ربي واكووول
اني ابن نفسي اني ابوي وامي واهلي
اني راح اكون انسان ناجح
ومراح اعيش بلماضي ابد
جمانه السعيدي
لمن تميت ال ١٨ كنت انتضر حياة جديده
بلنسبه اليه كلشي مجهول بيه ما اعرف راح اكدر اعيش
واحافظ على نفسي لو لا
كانت سياسة الدار
بعد سن ١٨ يكون الولد بلغ السن القانوني
ويكدر يطلع يشتغل ويعيش نفسه
بعد الدوله ما مسؤله عنه ابد
خصوصا هم بدار الايتام يعلمونا حرف
يعني بكيفك
تريد تتعلم حداد او نجار او ميكانيكي او كهربائي
انت تختار الشي الي تحبه
صحيح كان عندي طموح اطلع واشتغل وتصير عندي هواي فلوس
بس كنت خايف
لان اني ما اعرف العالم برا شنووو
وراح اكدر اقاوم لو لا
وراح الكه شغل وسكن بسرعه لو شنو راح يكون مصيري
ما اعرف
الكل كان ضايج عليه بيوم ردت اطلع من الدار
الحمد لله تركت سمعه طيبه
ومكانه حلوه بكلوب الناس
جمانه السعيدي
اخذت ملابسي بجنطه وستلمت اوارقي من الدار
هاي الأوراق كلش مهمه
لازم احافظ عليه حتى اكدر امشي واشتغل برا براحتي
طلعت من الدار ووكفت بلشارع
وبقيت عيني على الدار
خلصت عمر بيه ١٨ سنه مو قليلات ابد
بقيت واكف وما اعرف شلون لو منيين ابدي
بس لازم ابدي واعتمد على نفسي
مشيت وكلت( توكلت على الله )
