رواية جذبني فمك البني الفصل السابع والأربعون 47 بقلم عبير إدريس

اربعه احرف من فاهك

تصف سعادتي الابديـه ..

​

ادهم

_______

نرمان : يعني شنو مفهمت.. 

غطه وجها بيده تنفس قوي باوعلنه وكال . 

ادهم : خابرتني بدون سلام عمو الحكني وكعت بمشكله وبس انت تكدر تحلها وراها سكتت ضليت اصيح سيلين سيلين حسيت واحد سحب منها الموبايل وانسد رجعت اتصلت انغلق.. 

ايمن : احتمال زوجها لان مانعك منها هيج تصرف من شافها متصله بيك بهيج وقت. 

ادهم : لا اكو شي جبير صاير وياها وهسه اعرفه شنو ؟

كام اتجه للكنتور طلع ملابسه وبدل.. 

ايمن : وين ؟ 

ادهم : نرمان لبسي اي شي وتعاي ويايه. 

ايمن : وين رايح صدك تحجي. 

ادهم : شبيك ايمن شبيييييك.. 

ايمن : هسه انت ليش تصيح غير اريد افتهم منك. 

ادهم : حجيت عبري بوذي مو كتلك البنيه واكعه بمشكله ونختني يعني شنو اوضح اكثر من هيج وانه تعبان.. 

ايمن : وشنو رايح هسه تره ساعه ٣ اله ... 

ادهم : هااا اعوفها تموت يعني والله شنو ساعه ٣ .. 

ايمن : شو انت شويه شويه كاعد تبتعد عن الاعراف والتقاليد شنو سالفتك.. 

غضبت ملامحه وجاوبه متنرفز.. 

ادهم : يعني شسويت بله كلي جوز انه مغيب. 

ايمن : من تروح لبيت بنيه متزوجه بهيج ساعه وانت غريب وتدك الباب تسأل عليها ما راح يسألوك ليش جاي وشنو السبب ،،

هااا شو سكتت شووف لان صعبه والاصعب من تبرر موقف روحتك وتكللهم هيه اتصلت بيه بهيج وقت هلمره توكعها بموقف صعب وموحلو.. 

ادهم جر نفس وكعد على الجربايه خله ايده فوك راسه ويهز برجله.. 

نرمان : والحل شنو شنسوي ؟ 

ايمن: ننتظر يطلع الصبح ونروح انتي تنزلين تسألين عليها كأنما تريدين تزوريها ...

ادهم : ليش كم مره اخذتها ومحد قبل تطلع عبالك متفقين نرمان شنو جانو يكلولج من تروحين. 

نرمان : كل مره حجه شكل لو نايمه لو طالعين واخر مره مفتحولي الباب. 

ايمن : المفروض من ذاك الوقت تتصرف ليش سكتت. 

ادهم : ليش انت مو كبالك وشفتني شلون كاعد اركض بين الاجازه وبين ترتيب وضعي علمود السفر وهيه بلسانها طلبت مني ابتعد اذل روحي الها ليش مو كافي الصار.. 

ايمن : ماعرف شكلك بس اللي اعرفه واكدر اقدمه الك روحتك بهيج وقت غلط. 

ادهم : اعرف متشوفني كعدت وسكتت.. 

طلع ادهم بره وضلينه اني وايمن واحد صافن بوجه الثاني شنو نسوي منعرف. 

ادهم 

مرحبا 

اسمي ادهم من مواليد ١٩٧٩ 

دكتور بعلم النفس البشري... 

انسان طموح بالدرجه الاولى

معروف بالوسط العائلي ولدى زملائي بالرجل ذو الخلق الرفيع ، 

حياتي ارتكزت على خارطه رسمتها وخططت ملامحها من سن البلوغ ،

العلم اولا ومن ثم الحياه ، 

لان العلم مرتبط بالحياه البشريه ، ما فائده العقل الانساني اذا ما تغذى بالعلم .... 

مشيت بحياتي صح ما يوم اذيت ولا ظلمت وبنفس الوقت ما اقبل بالظلم ، ممكن اخطأ هذا الشي طبيعي لان طبيعه البشر خطاء وانه مو نبي مرسل ولا امام معصوم... 

حبيت حالي حال اي شاب وقررت ارتبط بهاي الانسانه الحامله كتله من الهدوء والرزانه والنزاكه ، 

رغم صعوبات الحياه لكن توفقت واخذتها خطيت قصه حب عاديه يعني لا عشت حراره الاشتياق ولا ذقت نار القرب والابتعاد ، 

صح حاربت لكن تكافأت بحبها من بادلتني اللهفه والموده ، رجعت سافرت من بعد ما زرعت بداخلها بذره مني وهيه بنتي مرايم ،

درست هناك وعشت صعوبه مو طبيعيه بين دراستي وبين لهفتي لبنتي ولزوجتي ، 

رجعت مره وحده للعراق بوفاه وضاح الله يرحمه وبسبب تكلفه السفر مكدرت ارجع مره ثانيه ،

ردت الفلوس تكفيني وبنفس الوقت أأمن بيها مستقبل بنتي وزوجتي لهذا طلبت من ايمن يشتريلي بيت ابغداد بنفس المدينه الجانت تحلم اميرتي تسكن بيها ، وباقي الفلوس فتحت مشروع صغير ايمن لزمه من بعد رجوعه من الدوام ، وجنه نسترزق منه،

والدي رغم عندي عملي الخاص لكن جان يدزلي فلوس ابد ماقصر ويايه وجنت اصرف منهن مرات اتضايق ومرات لا تكفيني ، 

طلبت من ايمن اي فلوس يحصلها يودعهن بالبنك ومن رجعت الحمدلله لكيت مبلغ محترم يعني لا انحسب من الاثرياء جدا ولا من الطبقه الفقيره ، يعني وسط ، 

تعينت بشهادتي راتبي كلش زين جنت اصرف نصه ومرات اقل والباقي اودعه بالبنك ، 

مده ٣ سنوات جمعت رواتب مو قليله يعني اكدر اشتري بيها بيت ثاني صغير ،

بنات وضاح قصتهم قصه وعرفتوا كلكم شنو احداثها ومجريات الامور لكن متعرفون شعوري شنو جان واحاسيسي كرجل شرقي بشنو جنت احس بوجود بنات بهيج جمال...

رجل ارمل وعنده طفله وعاش حياة متعبه قضاها بين السفر وبين الاشتياق لحبيبته وبين التصدي للمشاكل العائليه بصبر،

ربي اختبرني بذني البنات وشفت رزق على عيونهم مو طبيعي عدا الترقيات الصارتلي .. 

جنت عفوي جدا وكل فعل اسويه ويه سيلين ينم عن طابع رجولي وفعلا ابوي مجان ابالي لا حب ولا خرابيط ، كلت من بعد ياسه هذا هو قفلت مستحيل راح احب مره ثانيه. 

بس الصار كلبي خاني و دك اقوى من المره السابقه ..

حبيتها 

حبيت عفويتها 

قله حيلتها 

دموعها البين مقلتيها

واحلى شي من اشوفها ما اكدر اتحكم بضحكتي شكد ما احاول اكون جدي وياها ماكدر ...

ارتاحت سريرتي الها وضحكت لرضاها وعفويتها وحبيت هدوئها وتمردها حبيت اختلافها الفكري وعبقريه عقلها ..

حبيتها من تناقشني مو لان انه دكتور تسكت او تكلي اي انت صح خوفا لا افشلها لان انه افوقها بالعلم والمعرفه لا تناقش وتاخذ وتنطي بالكلام الى ان نوصل لنقطه معينه، .... 

صارحتها متحملت اشوفها تضيع من ايدي ولا اتخيل بيوم شخص يلمسها غيري ،

لكن الصدمه من عرفت جابهتني وقابلتني بالرفض القاطع ، اقتلعت كل جذور المحاوله لاسترجاعها اليه او تغيير قرارها بتركنه والمغادره.. 

راحت مني واستسلمت ومشيت بمشوار عملي كأي انسان ميت المشاعر ياكل ويعمل وياخذ قسط من راحه من يحتاجها بس الغريب انه ماكدرت اخذ قسط راحه ليش؟؟؟؟

لان سيلين هيه راحتي الراحت مني 

بكل يوم اتوسل بشخصيه ادهم الرجوليه اريدها تنتفض على الواقع وتتمرد عليه وتكلي كافي اصحى راح تضيع ،

بس مجرد تجي ملامحها كبالي ترخى كل افكاري وتذوب مشاعري ، 

واضل اهذي بأسمها واطاردها بمخيلتي كأنما مراهق وعشق جارته... 

تجي على بالي وابتسم ابتسامات متناثره ، واتخيلها بين احضاني واتعب اكثر شعور محبط قد يؤدي الى الفشل بالحياه.. 

كدرت هاي الانسانه بغضون فتره قصيره تحولني من رجل ضحوك محب للحياه الى رجل عابس الوجه بائس الملامح ، واضافه الى هذا زياده شعوري بالذنب من حسستني بخيانتي لعمتها وعدم وفائي الها... ، 

شنو اوصفلكم حالتي عباره عن : 

حاله نفسيه تائهة تدور في محور مغلق وتعود بيه الى نفس النقطه لارتطم في وحل الذكريات ... 

لدي دفتر من الالام لكن صعب البوح به او السماح لاي شخص بالتصفح وقرائته ...

لأني بكل بساطه رجل والرجل لا بد ان يكون من حديد كيف يضعف ، وكيف يتخلص من نظرات الناس واحاديثهم التي تقلل من الشان بمجرد انك احببت بصدق .... 

نكرتني ونكرت وجودي وحبي وقالت بصريح العباره مساعدتك لي كانت بمقابل خفي واردت مني اشياء غريزيه بهذا كلامها استفزت الشخصيه الغاضبه البداخلي وقررت اردلها الكلام بفعل اقوى منه.... 

كل انسان بينه اكو بداخله عده شخصيات ، منها الطيبه والحنونه والشريره والسيئه والجيده ، بس كل شخصيه تظهر حسب المواقف ، لان احنه بالنهايه بشر غير معصوم...

قررت شنو تطلب مني اساعدها لكن بمقابل وهيه قررت المقابل بدون ما انه احجي ... 

جنت واثق راح ترجعلي وترجع بوضع اصعب من الاول وراح ابدي وياها من سالب عشره تحت الصفر... 

وفعلا رجعتلي اكذب اذا اكول ما فرحت او ما حسيت بأنتصار بداخلي انتصار لرجولتي الجرحتها ... 

وقررت فعلا اساعدها من جديد بس الصار انه ما اتحمل اشوفها سيلين القديمه واعاملها بشعور ابوي اكذب على منو عليهم لو على نفسي لو عليها ؟؟؟

، لهذا كلت اذا عالجتها اقدم شرطي تكون زوجه اليه لان ما مستعد اضيعها من ايدي مره ثانيه.. 

افتريت بالشارع واختلطت عندي المشاعر ما بين شعور الغضب والخوف والحقد وبنفس الوقت فرحان عندي امل راح ترجعلي.. 

وين اروح رجعت كعدت بالباب وطلعت باكيت الجكاير وضليت ادخن ، صفنه تاخذني والثانيه ترجعني ،

اختلط عندي الشعور ، ساعه اضحك وساعه احترك ماعرف شنو من شعور بس اللي اعرفه حسب دراستي لانواع الضحك بعلم النفس.. 

ضحكتي مربوطه بألم شديد يعني ضحك يداهم الالم...

شعور موجع بالفعل ..... 

نرمان

نرمان : ايمن شوفه وين راح ..

ايمن : طلعت بره لكيته كاعد بالباب. 

نرمان : شلون قهر بله. 

ايمن : ماعرف شلون راح تصفى يعني الادهم ميرتاح . 

نرمان : مشلوع كلب  

ايمن : كله صوج اخوج وكولي كال ايمن اذا ما طلع هذا تخطيط من فهد علمود ميسافر .. 

نرمان : هوووواي تتخيل انت ...

ايمن : شوف هاي البطرانه والله اتعجب شلون انتي وادهم مأمنين بيه لج بابه المفروض تقروه وتعرفون شنو هذا. 

نرمان : نعرفه تره اخوك مضطرب نفسيآ وكلشي نتوقع منه يعني اي شي يسويه ماراح يكون غريب علينه...

ايمن : اي وانتو خاليه بنصنه لا تتعضون ولا تعضون اصبع ندم.. 

نرمان : هذا اخونه نعوفه وين صايره. 

ايمن: ما كلت عوفوه وبنفس الوقت لتأمنون بيه.. 

نرمان : خلينه وره الادهم ونشوف شيصير.. 

ايمن: تعاي نشوفه خاف احجي وياه ويعيط بيه .. 

نرمان: حيره اعصابه تلفت من وين يتلكاها والله خطيه ...

مجاوبني لبست روب فوك ملابسي وطلعنه اني وياه وكفت وره الباب وفتحته شويه لان اعرف اترزل اذا طلعت يمهم ايمن عنده عادي بس الادهم ميقبل... 

ايمن : هاا شفكرت شنو راح تسوي؟ 

تنهد ادهم وجر نفس طويل... 

ادهم : ماعرف اول شي نروح لبيتهم واطلب اشوفها واذا رفضوا استعمل القوه وياهم.. 

ايمن : يعني شنو تسوي ؟ 

ادهم : اشتكي عليهم اريد اشوف ليش ميخلونه نشوفها وقاطعيها من اهلها غير اكو سبب وسبب قوي.. 

ايمن : مادري هذا سامر مو سهل. 

ادهم : ماجنت اتصوره هيج نذل.. 

ايمن : بس مبين فقير 

ادهم : انت هم فقير.. 

ايمن : تقلد مو؟ 

ادهم : لا

ايمن : شصار بينكم ليش هيج وصلتو لطريق مسدود وعود انتو علاقتكم وصداقتكم حلوه وخصوصا سيلين تحبك وتعزك هوواي ...

ادهم : ماعرف نامت كعدت ساوتني بتماره ليش ماعرف لا الله ليكذبني اني اجي بعدها بمرتبه.. 

ايمن : ههههههه من يا ناحيه. 

ادهم : بالكره طبعا. 

ايمن : وعلى شنو حارك دمك يمعود عوفهن ذني مدري شلونهن.. 

ادهم : لتحجي عليها دير بالك. 

ايمن : بعدك تدافع. 

ادهم : وليش هيج شسوت حتى تنذم. 

ايمن : تره حجتلي نرمان.. 

ادهم : وان يكن انه ماعرف اسبابها شنو او ظروفها افهم يلا اقرر احاسبها. 

ايمن : والحساب يثكل ساعتها مو ؟ 

ادهم : عفيه عليك. 

ايمن : اعرفك ذيب .. 

حجاها وضربه على ضهره...

مجاوبه ادهم ، تعبت من الوكفه دخلت جوه ردت انام راسي كام يموتني ، 

مجرد خليت راسي على المخده غطيت بالنوم مكعدت اله على صوت المنبه يدك براسي كمت راسي يفتر طفيته وطلعت من الغرفه البيت هدوء باوعت بغرفهم مموجودين اتصلت على ايمن يدك يدك ويفصل جريت نفس بضجر خليت الفون على الرف بالمطبخ وسويت ريوك لان بالعشا ما اكلت زين وراسي يوجعني بسبب قله النوم واني ممتعوده لا على سهر ولا على مغثه اكلت شلون مجان وبلشت انظف علمود اخلص من وقت قبل لا يرجعون الولد والتهي وياهم .... 

بلشت بغرفتي كملتها ورحت على غرفه مريم لكيتها نايمه سديت الباب خطيه اكعدها كملت باقي البيت وضلت غرفه ادهم بلشت بالسرير شلت المخاديد علمود ارتب الفرشه باوعت جوه مخدته ثوب نسائي من اشيله شهكت ياااااا هذا ثوب سيلين اللي لبسته بحنه ضيغم وبمهرها ، 

خرب بيومك شجابه هنا جوه مخدتك رجعته بمكانه علمود ما احسسه اني عرفت محبيت احرجه واحنه بينه طبع ابد ماعدنه تطفل واحد على الثاني ونتدخل بخصوصياته اله فيهدان مدري منين يشمشم ويعرف الاخبار ويجي ها وها .... 

كملت ترتيب غرفته ورحت للمطبخ اسوي غده باوعت الساعه بعد وكت مو مال اسوي غده هسه ارجع انام لو شسوي حرت اكثر ، رجعت اتصلت على ايمن جاوبني. 

نرمان : صباحو هاي وينكم.

ايمن : كاعدين بالسياره كبال بيت سيلين. 

نرمان : شعدكم هناك مو كلتو اجي وياكم . 

ايمن : مو ادهم كال اشوف سامر يطلع للدوام يلا نروح خاف يمنعنه نشوفها  

نرمان : هاا هم صح وهسه عبرت ساعه تسعه شوكت يطلع الافندي. 

ايمن: ادهم يكول مرات يجي متأخر حسب محاضراته يعني ميطلع من وكت .. 

نرمان : بلغوني بأي شي جديد تمام. 

ايمن : صار يابه صار.. 

سديته وكعدت افكر شنو الصار وليش سيلين اتصلت بأدهم وهيه اللي رادته يبتعد والله حيره صارت ساعه وحده ونص اجوي الولد واني جنت بالمطبخ ...

ادهم 

تنهيده تتبعها حسره

انين روح

لم اعد احتمال سياط الألم والملامه التي تضرب روحي وجسدي كل يوم اي ألم واي فقد اعاني منه ياالله...

سؤال يدور في رأسي كل يوم ولم اجد له جواب شافي 

الى متى اعاني وامثل الراحه بأبتسامه مزيفه ودموع محتبسه ،

متى ستزاح الستائر المغبره عن حياتي متى سأعيش دور البطل الحقيقي وليس الثانوي سئمت من التمثيل المتواصل بالامبلاه ،

بغضت المجاملات كما كنت سابقا سئمت من التقيييد بتلك العادات ، 

يا الهي ماهذا التغييرر 

ايعقل ان ابدل الدين بالدنيا 

ايعقل ان اتمرد على العادات وعلى بر الوالدين واتخلى عن كل معتقد اتعقدت به يوما ما ... 

اي سفينه استقلت واي ربان قادني 

اين سنرسو انا وانتي الى المنفى ام الى اين ؟؟؟ 

في طيات حياتي تكمن جزر الاميرات ف اين ذهبتي وتركتي خلفك الكثر والكثير من المتعه وحياه السلاطين. 

كنت متلهف لامنحك حياه تشبه الملكات كما منحت الحياه لاميرتي الصغيره وجعلتها اميره تشبه اميرات ديزني .. 

هنالك كتله من المشاعر في جوفاء الروح وكذلك تمرد لا يمثلني ولا يمت بصله لمبادئي.. 

كل المبادئ تسقط امام نضره من عينيك السوداويتين... 

وكل الحروف تنحني خجلا امام ثغرك اذا لوحت لكِ من بعيد وابتسم. 

منذ ان ذهبتي تحجر الدمع في عيني واصبح النعاس عدو ليلتي تجمدت عقارب الزمن واضللت طريقي.. 

اذن المؤذن الله اكبر الله اكبر. 

استعذت ربي منك ومن نفسي ومن وسواس التمني قمت وتوضأت وفرشت سجادتي اقمت فرض صلاتي قضاء لاول مره قضيت صلاتي بتركها متعمد.. 

اي حب هذا الذي ابعدني عن الدين واخذني من الدنيا . 

ايعقل اوقعتني بشرك التمرد؟؟؟؟

مرت الساعات ثقيله بغيابك 

واي غياب ياسيلينتي اي غياب.... 

اليوم انا دكتور مضطهد وكلي امل سوف يأتي يوما واستريح من مبارزه الدنيا لتأتي وتزيحي غبار التعب عن كاهلي... 

سألعب بخصلات شعرك واستلذ بنفحات عبق عطرك ، سأترك قهوتي واشرب من رحيق فاهك البني فانه الاشهى والألذ ويوم ما سأستعين به كمنبه لاستيقاضي صباحآ.. 

نرمان : ها ادهم كملت صلاه ؟؟ ادهم الوو وين صافن.. 

التفتلي ونزلت دمعه منه مسحها بخشونه ايده. 

ادهم : كملتي كلشي علمود نروح .. 

نرمان : ايمن كال سامر مطلع من البيت لهذا رجعتو..

ادهم : شسويله نروح ونشوفها. 

نرمان : خاف تصيرلها مشكله.

ادهم : مو هيه بنص مصيبه ومتأكد متأذيه يعني شكد انتضر بعد ، كل ما اريد انزل ادك الباب واخوج يجلب بيه متنزل ومتنزل.. 

نرمان : يلا امشي نروح ونرجع وبلكت هاي كلها وساوس والبنيه مابيها شي بس اتغده اول...

صفن بوجهي وتغيرت ملامحه حسيته ضاج ....

نرمان : كلت شي غلط؟؟

ادهم : يعني ترجع تستقر من جديد ويه زوجها قصدج ؟ 

نرمان : اي ليش انت ماتتمنى هذا الشي الها.. 

ادهم : اكذب اذا كلت اي . 

نرمان : تحجي صدك؟؟

ادهم : طبعا.. 

نرمان : زين ليش اذا تحبها غير تتمنى سعادتها. 

ادهم : والانتفاضه البداخلي شلون اهدئها انطيني حل شلون ارجع طبيعي مو ردت اسافر وماضل غير بس اسبوع ورجعت جددت الامل بداخلي شسوي فهميني اكذب عليج اذا كتلج اريدها ترتاح وهيه بعيده عني وبحضن رجال ثاني ماكدر ماكدر مجرد اتخيلها دماغي يفتر و اتعب عقلي صار يرفض يفكر بحلول علمود يهدي كلبي ، تضارب وحرب بينهم وانه الخسران ... 

نرمان : لازم تسيطر على نفسك تره مو حجي هذا. 

ادهم : عوفيني وروحي بدلي وانه راح اطلع كدامج. 

هزيت راسي وهو كام طلع من الغرفه رحت لميت السجاده مالته وخليها على الميز باوعت دفتر صغير وفوكاه ورقه راسم بيها فم وكاتب جواه عباره... 

يوما ما سأترك قهوتي واشرب من رحيق فاهك البني فانه الاشهى والألذ ويومآ ما سأستعين به كمنبه لأستيقاضي صباحآ سأقبله بكل ما اوتيت من قوه وان انقطعت انفاسك نبهيني.... 

ادهم يوسف عمران...

يا الله يا الله شكد يحبها اخويه مريض صار خلص ماعاد يسيطر على نفسه ولا على انفعالاته تاه وتوهنه وياه.. 

جريت نفس قوي وطلعت من الغرفه رحت غيرت ملابسي وبدلت لمرايم طلعنه جان كاعد بالسياره صعدنه ليوره وسألته. 

نرمان : ايمن يجي ..

ساكت خال ايده على حلكه وصافن . 

نرمان : ادهم ادهمممممم ..

انتبهلي كال . 

ادهم : وياي.. 

نرمان : اي وياك. 

ادهم : شنو كولي.. 

نرمان : ايمن يجي لو اصعد ليكدام.. 

ادهم : لا يجي راح يجيب جكاير ويرجع. 

نرمان : هاا زين.. 

مريم : انطيني موبايلج العب 

نتر بيها ادهم وخزرها بالمرايا.. 

ادهم : هووواي صايره متمرده.. 

دنكت راسها رادت تبجي حضنتها واشرلته بيدي يعني شبيك على كيفيك خزرني ودار وجها اجه ايمن صعد ورحنه لبيت سيلين وصلنه يم الباب نزل ادهم وطلب مني انزل ... 

نمشي ويوصي بيه شنو احجي وشنو اكول.. 

نرمان : ماشي..

ادهم : يلا سباعيه.. 

ضربني على كتفي برهاوه ايده يتصنع القوه وهو داخله هش... 

جريت نفس وتقدمت بخطوه متردده خفت اتفشل صار كم مره اجي ويفشلوني صعبه عليه اعيدها مره ثانيه بس لخاطر ادهم لو يكلي شمري روحج بالنار اشمرها وما ابالي.. 

دكيت الباب انتضرت عشر دقايق ضبط يلا انفتح الباب عبالك رايحه فد مقابله مهمه .... 

بهاي العشر دقايق ادهم واكف على اعصابه لو بيده يعبر الباب ويفوتلها...

طلعت بنيه صغيره سلمت عليها وسألتها على سيلين ..

_ ماكو سافرت.. 

نرمان : وين سافرت؟ 

_ ماعرف 

تقرب ادهم عاكد حاجبه سألها مستفسر .. 

ادهم : ويامن سافرت؟؟؟ 

_ ويه اخويه 

ادهم : ابوج امج وين؟ 

_ عمو انت شتريد اكلك مسافرين. 

ادهم : حبيبتي صيحيلي واحد جبير اتفاهم وياه واذا مقبلو انه واكف هنا ما اتحرك اذا ما اخذ خبر عنها.. 

_ اففففف... 

تأفأفت وطبت تركض.. 

ادهم : شفتي بله ؟؟؟ 

نرمان : شفت شفت شكد نتحمل بعد والله على اعصابي دكيت بابهم بس لخاطرك جيت.. 

ربت على كتفي بحنيه بدون ميجاوبني.. 

طلعت امه وصلت يمنه سلمت وكالت تفضلو وعيب واكفين هنا ومن هالحجي ادهم اختصر الحديث الممل بكلمه. 

ادهم : سيلين وين ؟؟؟ 

_ سافرو مو بنتي كلتلك. 

ادهم : اعرف كالت بس وين خارج العراق داخله وساعه بيش سافرت.. 

_ لا خارج العراق وطيارتهم طارت ساعه اربعه العصر.. 

ادهم : شلون بالاربعه العصر وخارج العراق وهيه ساعه ٢ ونص اتصلت بأختي . 

_ هاا والله مادري بعد جوز تأخرو بالمطار.. 

ادهم : حجيه يرحم والديج احجي الصدك ولتعبيني وتخليني اقدم بلاغ وتصير محلوه لا بحقي ولا بحقكم..

_ ابني وداعت نضر عيني ماعرف انت على شنو تحجي واذا متصدكني اصيح ابوهم يحجيلك. 

ادهم : العفو حجيه مو قصدي بس انه خايف عليها اخر فتره مو طبيعيه جانت. 

_ اي صح واحنه هم لاحضنه وسامر كال اخذتها للطبيب وطلع عدها خدر بالاعصاب لهذا اتركوها ترتاح واني هم عفتها براحتها لا تشتغل ولا تتعب وقبل اسبوعين اجرو بيت وكال بعد السفر نشيل علمود يعالجها هناك كال تحتاج هدوء واجواء خاصه.. 

ادهم توتر وعضلات وجها رجفت ضيق عينه وكال.. 

ادهم: اجرو بيت وين هذا البيت ؟؟ 

_ بمنطقه __ بس بعدهم مكاعدين بيه.. 

ادهم : وين هذا البيت يرحم اهلج انطيني عنوانه مضبوط .  

_ ما اندله بالضبط لان كال بعدني ما مأثثه ومن اكمله نكعد بيه وهسه هو مسافر .. 

ادهم : سألي الحجي بروح موتاج.. 

_ اصيحه الك وانت تفاهم وياه خاف عبالك اكذب . 

ادهم : العفو بس احتمال هو عنده خبر ..

هزت راسها وفاتت صاحته اجه يلبس بنظارته..

سلم على ادهم وتصافحوا.. 

ادهم : حجي بيت سامر وين محتاجه بشغله ضروريه.

_ هو مسافر شتسوي بعنوان بيته. 

الام جاوبت.. 

_ هم صدك انت ليش تريد العنوان اذا هو مسافر ..

حاوطوه لادهم وخلوه يدور بدائره مغلقه..وحار شنو يجاوبهم.. 

_ ابني فوت تغده يمنه. 

ادهم : مشكور حجي بس اي خبر تعرف عنهم بلغني يرحم اهلك.. 

_ بعيني هو كال من يوصل يتصل بينه من رقم واليوم اول يوم سفرته وننتظر انطيني رقمك اي شي اسمعه ويستجد ابلغك بيه. 

ادهم : اي والله ياريت.. 

ردله الرقم وتبادلو الارقام ورجعنه للسياره.. 

ادهم ضرب على القمريه مال سياره ٣ ضربات سريعه واشر لايمن ينزل .. 

ادهم : انت سوق مالي خلك. 

نزل ايمن بهدوء وراح صعد وادهم هم صعد .. 

ايمن: ماحصلتو شي.. 

ادهم : هئ(لا ) 

ايمن : هسه وين نروح 

ادهم : لبيت اهلك. 

ايمن : شعندك رايح هناك ؟؟ 

ادهم : اشوف فهد 

ايمن : هههههه صدك تحجي. 

ادهم : انت تشوف وكت شقه هسه. 

ايمن : راح ترجع تخلي ايدك بيد فهد ...

ادهم : ماعندي حل ثاني انطيني حل مو افتر راسنه انه وياك من البارحه لليوم نفكر انت وصلت لحل لا انه وصلت لحل لا.. 

ايمن : والحل يم فهد برأيك ؟؟ 

ادهم : هويته تسهل النه هواي امور وعنده معارف ونوصل الهم اسرع. 

ايمن : وتصير مطلوب اله للمره الثانيه.. 

ادهم : عسما الف اهم شي ارجعها. 

عاط ايمن بعلو صوته.. 

ايمن : انت شنو متتعلم من الراح مو كشفلك عن انيابه وبعدك مصدك بيه صام اذنك ومغمض عينك عن حقيقه فهد وبعدك مأمن بيه والله عنده حظ.. 

ادهم : يبقه اخويه عجبك وان ما عجبك واخوك الجبير من واجبك تحترمه وبعدين اذا ايفين بيها حظ جان اجتي وكالت يابه تره فهد يهددني عجلو بزواجي برأيك انت ما جان وكفنه وياها وخلينه حد لفهد.. 

ايمن: والله كمت ما اعرفلك طبع مره تكلي عدها سر جبير ويهددها بيه ومره تكلي هيه باعتك .. 

ادهم : كل الاحتمالات وارده وصرت اشك حتى بنفسي.

ايمن : لعد شنو سر الثقه الناطيها لفهد. 

ادهم : ما ناطيه ثقه بكد ما متعاطف ويه حالته. 

ايمن : راح تخسر هواي واذكرك. 

ادهم : عند الله ميضيع. 

ايمن : بس ويه فهد يضيع 

ادهم : كلمن يعمل بأصله شعليه بيه. 

ايمن : براحتك بس انه ما انزل وياكم. 

ادهم : انزل صارلك شكد مقاطعهم مو انت تكول تروح مره تجي عشره بدالها...

ايمن : مالي نفس اباوع بوجهم تصدك تلعب نفسي. 

ادهم : ماعرف سوي اللي يعجبك وتشوفه صح.. 

وصلنه لبيتنه نزلنه وايمن ضل بالسياره دكينه الباب فتحتها امي.. 

سلمنه عليها ورحبت بينه دخلنه للبيت جان فارغ مابيه احد.. 

نرمان : وينهم لعد. 

فردوس : اخوج اخذ مرته وطلع يتغده بره وابوج بالشغل وبس انه وزمن فوك...

نرمان : حلوو غداوات هههه. 

فردوس : الغده معجبه وطنكر استاذ فهد 

نرمان : ليش شمسويه 

فردوس : دولمه اجه من الدوام وكبل على الجدر كشفه شافها وعاط هاي شسمويه كتله شمسويه كال شنو بس تمن مكمط رحت يمه كتله شنو تمن مكمط يكلي اكو واحد يلف تمن وتعالو اكلوه .. 

نرمان : من يومه خبل معليج بيه اصلا تخبل هسه ناكلها مادام من ايدج كلشي طيب. 

فرودس : كتله ذيج مرتك وتسويلك باوعلي صفح وصعد فوك وره ساعه نزلو يابه وين كالو نتغده بره كتلهم بالعافيه. 

ادهم : يعني يتأخر هوواي شكد صارله من راح.. 

فردوس : مصار هواي اقل نص ساعه. 

ادهم : راح امدد بالغرفه من يجي صيحيني.. 

فردوس : شكو صاير شي. 

نرمان : لا علمود علاج فهد .

فردوس : هاا زين 

رتبنه الاكل على الميز لهناك وفات ايمن يضحك شافته ماما شهكت وفتحت ايدها حضنته وهو شبكها بيده ضل يبوس براسها بعدين كال. 

ايمن : شميت ريحه دولمه وسطرتني وكلت لازم انزل ..

فردوس : اي هسه الاكل مالتنه صار بيه طعم والله يا امي ضعنه بلياكم جنتو ونيسنه وسلوتنه بلبيت.. 

ايمن : نرجع ان شاءالله بس يراد وكت. 

فردوس : الله ليوفق بنات تماره كله بسببهن. 

نرمان : ماما كافي. 

فردوس : شكلت قابل 

ايمن : مجرد تجيبين طاري ايفين لو امها تكلب معدتي اذا تريدين ابقه يمج لتذكريهن...

نرمان : شعجب دخلت للبيت...

ايمن : ادهم خابرني كال تعال طالعين وجيت. 

نرمان : زين تسوي حتى نتغده سوه..

رحت للغرفه صحت ادهم علمود يتغده. 

نرمان : يلا صبينه 

ادهم : ماريد. 

نرمان : اصيح فردوس عليك توكلك غصب وتعرفها .. 

ادهم : جيت يمعوده بس روحي. 

نرمان : لتتأخر 

ادهم : ماشي.. 

رجعت للمطبخ وبلشنه نتغده وادهم ما اجه اله ماما راحت ضلت تزن فوك راسه يلا اجه لازمته من ايده كعد يلا كعدت بعدين كامت وكفت فوك راسه . 

فردوس : اكل يلا . 

ادهم : اكل امي بس اكعدي استريحي. 

كعدت وعينها عليه غصبته ياكل .. 

نرمان: يراد اخذج ويانه للبيت علمود توكليه شلع كلبي 

فردوس : ضعفان على يا مال هيج حارك روحك .. 

ادهم : اكوم لو شلون؟؟ 

فردوس : لا اكعد سكتنه..

تغدينه بهدوء رفعنه السفره وسوينه جاي ادهم اخذ استكانه وطلع بره وايمن رجع للبيت علمود ليشوفهم من يرجعون..

صارت ساعه خمسه العصر وكلنا كاعدين بالهول اجه فهد اول ما فات من الباب صاح. 

فهد : خطارررر اليوم اخوتي الاعزاء هنا.. 

كمت بوسته وهو دنك على ادهم بوسه.. 

فهد : هاا يول مهموم شبيك. .

ادهم : اكعد احاجيك . 

كعد ورفع بنطرونه. 

فهد : وهاي كعدت كول.. 

ادهم : اريد تلكالي سيلين. 

فهد : ليش ضايعه ؟ 

ادهم : لا 

فهد : رجعو خطفوها. 

ادهم : شبيك مخبوص انتظر افهمك 

فهد : هلمره رجل امها لو رجلها. 

ادهم : راح اركعك بالنفاضه اذا مسكتت. 

فهد : مممم مبينه السالفه جبيره سولف اسمع. 

ادهم : خابرتني بليل وكالت متورطه وبعدين انغلق الجهاز واليوم رحنه سألنه كالو مسافرين من ساعه اربعه العصر وهيه خابرت ساعه ٢ ونص وعرفت عدهم بيت مأجريه اريد اعرف البيت وين واذا مسافرين فعلا او كذب.. 

ادهم يحجي وفهد لو يحك عينه لو يحك انفه ضيق عينه وكال...

فهد : وانت منو كلك انه فهد هولمز واحلها .. 

ادهم: لتستهزء شوف شنو تكدر تسويه بلغني.. 

فهد : ماتنحل ومكي .. 

ادهم : مكي منو؟ 

فهد : واحد ويانه بالدوام هواي يصلي اخاف منه.. 

نرمان: هههههههه خرب 

فهد : ههههه اي شبيج يشور بيه بس احاجيه لو اداهره يسمطني بدعاء و تجيني عقوبه . 

ادهم : كافي سخافه انتبهلي ... 

فهد : منتبه بس انت مدري شتسولف خابرتني ساعه كذا وانغلق ورحت الصبح وكالو مسافره العصر وهيه خابرت بليل وبطنه طبت بطن بطتكم كولها خمس مرات. 

ادهم : انت احد كايلك قبل شكد تافه وصاير سخيف.

فهد : لا اول مره اسمعها منك واعتز بهذا المديح. 

ادهم : هسه احجي جد كافي عاد لتخلني اندم اجيتك.

فهد : راح تخلي ايدك بأيدي . 

ادهم : شنو رأيك انت؟؟ 

فهد : بس دينك ثكل دكتور شوكت توفيه ؟؟؟ 

ادهم : اطلب عيني ما اعزها عليك. 

دنك فهد وشخط الطبله بسويج السياره بعدين رفع راسه مضيق عينه كال. 

فهد : اريد روايه وابني هذا دينك غيرها ماريد. 

ادهم : كتلك تزوجت . 

فهد : تطلكها وترجعها وبوكتها ميضل بركبتك اي دين. 

ادهم : راح تساعدني لو لا. 

فهد : روايه اول .

ادهم : لتضوجني فهد تره تعبان.. 

فهد : كيفك ترجع روايه اطلع سيلين من جوه الكاع خلال يومين . 

ادهم : النقاش وياك عقيم وصوجي اجيت وطلبت منك تساعدني ..

فهد : انه هم حقي اريد ابني ومرتي ، انت ضكت لوعه سيلين والمر العشته وهيه كدام عينك وانه صار سنين لا شايفهم ولا سامع صوتهم رجعوهم اليه والله ما أأذي احد بيكم وكدام عينك اضل هنا واذا سويت شي اخذها مني ولتخلوني اشوفهم..

حجاها ومسح وجها سريع كأنما يتلافة نزول الدمعه. 

ادهم : وشنو تسوي بشراهتك . 

عكد حاحبه فهد مستغرب...

فهد : اي شراهة تقصد. 

ادهم : تفهمني كلش زين. 

فهد : هااا قصدك شراهة حميميه .. 

ادهم : اختك كاعده. 

فهد : وشكايل .. 

ادهم : المهم انسى هذا الموضوع البنيه تزوجت وخلص.

فهد : يابه تغيرت هاي ففه واسألوها ، ففه ففتي تعاي .. 

نرمان : عود ليش تصيحلها ففه. 

فهد : ههههههه والله قبل جنت اصيحها بأسمها بس هيه حلو تركص مثل فيفي عبده.. 

ادهم : ليش فيفي تعرف تركص خرب حضك.. 

فهد : المهم الهدف واحد الكل يشتغل لاسعاد المواطن .. 

اجتي ففته سلمت علينه وراحت وكفت يمه احنه عباله يتشاقه ونسيه اصلا يريد يسألها. 

فهد : ففتي انه عنيف وياج. 

ايفين عينها علينه وعلى فهد معرفت شنو تحجي و وين تودي وجها.. 

ادهم : كافي اسكت لحيت تره. 

فهد : غير تريد دليل اجيب وحده من الشارع واشهدها اي غير مرتي. 

اجتي ماما شايله صينيه فواكه وخلتها على الطبله. 

فردوس : والله ثبرتنه ثبر بس انت تزوجت .. 

فهد : انتي اعرفج ليش لاجه ويايه. 

فردوس : اي مو عندي عداوه وياك. 

فهد : اي فعلا. 

فردوس : وليش غير انت ابني حالك حالهم. 

فهد : مو همه ياكلون تمنج المكمط انه ما اكله لهذا تضوجين مني ...

فردوس: عابت لهذا الراس جنه طبك انت يايوم عاجبك العجب . 

فهد : ليش مو ففتي البارحه سوت مخلمه تخبل كلها اكلتها. 

فردوس : ففتك حضها كاعد ريت عندي ربع حضها علمود يكعد وياك. 

فهد : هاي الضلعه انتي شتحجين .. 

فردوس : الله يهنيك شنكول. 

همس ادهم بصوت ناصي 

ادهم : ففه ام الخطط انتي شيسوي بيج. 

نرمان : هههه اي والله توني حجيتها بكلبي.. 

ادهم : نشوف تاليها وياه شلون .. 

فهد : ها هسه شكلت روايه مقابل سيلين . 

ايفين عكدت حاجبهة وحجت ويه فهد. 

ايفين : ليش شبيها سيلين ؟؟؟ 

فهد : ماعرف سمعت مخطوفه .. 

حجاها مستهزء وايفين كامت تدك وتلطم واني واهم صافنين على هذا الزوج الخبل لانعرف صدكهم من جذبهم ولا نكدر ننقهر ونتفاعل وياهم.. 

فهد : كملتي ؟؟ 

ايفين : اختي وين احجوو؟؟ 

باوعلها فهد ضام ضحكته. 

فهد : منو علمج على هذا التمرين بس لا هم خبله جنتي وادهم عالجج وانه تورطت بيج.. 

ادهم : كاااااافي انت متمل .. 

فهد : متمل يعني شنو متمل .. 

نرمان : ادهم كوم نروح هذا اخوك ناويها علينه اليوم..

ايفين : وين رايحين اختي شبيها متطلعون اذا متحجولي شكو.

نرمان : وهسه تذكرتي عندج اخت دروحي بابا نامي وتغطي زين.. 

ايفين : عمو الله عليك شبيها سيلين فدوه لعينك ابوس ايدك حاجيني. 

فهد : توسلي بعد ذليها لروحج يالخبله مو كتلج مخطوفه اخذيها مني .. 

من هيج كال كمز عليه ادهم لزمه من قميصه .. 

ادهم : تعرف مكانها مو وانت عندك علم عبالك غبي من كاعد كبالك لو رايد منك تخدمني بس راوغتك علمود تحجي هاي الحجايه وحجيتها فعلا كول وينها وين اخذها. 

فهد : هاي شبيك خاف عبالك متفق ويه سامر عليك . 

ادهم : مو خايف وانما متأكد ..

فهد : وشبيه تخبلت اخلي ايدي بيد هذا الخبل واخليه يلزم عليه لزمه ويبتزني بيها بعدين. 

ادهم : احجي شلون عرفت سيلين مخطوفه شمدريك. 

فهد : توقع من واحد يداوم ب _____ وهاي شغلته 

ادهم : بداعه ابنك عزيز كلبك ساعدني اذا تكدر.. 

فهد : ايباااه شكد توسلت بيك وكتلك ساعدني تتذكر ولك حتى بجيت كدامك وماهتميت. 

ادهم فقد اعصابه كام يصيح. 

ادهم : ولككككككك انت مررررررريض والله مريض لو جنت صاحي ما اخليها تروح وتعوفك افهم هيه متريدك هيه باست الايادي علمود انت تتركها انه شكو انه شعليه. 

فهد : كتلك راح اتعالج ومرتي وابني بأمانتك ساعدني انه غلطت . 

ادهم : زين اذا رحت تتعالج شلون حالتك شخصوها تحتاج ٣ سنوات علاج وانت طلعت بأقل من ٣ اشهر معاناها كذبت عليهم اوهمتهم انت تعالجت لهذا شخصت حالتك انت سايكو وهسه تأكدت شلون تريد اخليها عندك شلون. 

فهد : لو انه سايكو مثل ما كلت جان اذيتك واذيت نرمان واذيت ابني انه تأذيت منكم انتو اذيتوني. 

ادهم : هو هذا انت تظلم وتصيح مظلوم شبيدي عليك انه شبيدي . 

فهد : وانه هم شبيدي عليك انت حير بمشاكلك ولتوصل يمي. 

ادهم : مشكور على الخوه 

فهد : اللي انت بعتها من زمااااان.. 

حجاها وجرها بنفس طويل.... 

ادهم : امشي نرمان امشي.. 

اخذ السويج والموبايل وطلعنه..صاح فهد 

فهد : تعشو وروحو.. 

مجاوبناه رجعنه للبيت والطريق كله ساكتين قبل لا نوصل سألته. 

نرمان : لعد ايمن شلون رجع .. 

ادهم : تكسي يادكتوره تكسي يعني هاي يرادلها سؤال. 

نرمان : ادري شبيك متتحمل مني حجايه

ادهم : لان سؤالج غبي مو مال دكتوره وانه بيا حال تسأليني ايمن شلون رجع. 

نرمان : وانت كل متضوج وتختنك تصب جام غضبك عليه.. 

ادهم : اسف الله يخليج عوفيني لتحجين اي شي ماضلت عندي اعصاب واراعي مشاعر احد ولا صبر...

نرمان : حقك سكتتت.. 

رجعنه للبيت وادهم راح وين ماعرف ، انتضرت لليل صارت الوحده وهو ماكو وين يلا رجع وكبل دخل غرفته.  

اجه ثاني يوم والثالث والرابع واي خبر عن سيلين ماكو وانتصل بابوه سامر يكول محد متصل بيه ..

البيت توتر ادهم فقد اعصابه وماضلت عنده لا قوه تركيز ولا يكدر يفكر صح ، سألو عليهم بالمطارات وبالكوه يلا قبلو ينطونه معلومه وبواسطه صديق ايمن دبرها النه وكل يوم يروحون لاهل سامر وماكو نفس الشي.. 

وره اسبوع ضبط اجه فهد دك الباب فتحته اله فات وايمن دخل لغرفته ... 

فهد : شبيه اخوج شاف سعلوه.. 

نرمان : تعرف شبيه لهذا معليك بيه. 

فهد : معلينه اخوج وينه. 

نرمان : الادهم 

فهد : اي ادهمج وين ؟ 

نرمان : بغرفه المكتب. 

فهد : ماشي. 

راح فتح الباب وفات بدون ميدكها.. 

فهد : شلونك دكتور . 

ادهم مرجع راسه ليوره ويدخن ويادوب مبينه ملامحه من الدخان التارس الغرفه مسويها مدخنه. 

فهد : مبين الوضع متأزم.. 

نرمان : فهد ابد مو وكتك 

دار وجها باوعلي غمز وعض شفته ، راح كعد على الميز وخله ايده فوك رجله. 

فهد : لكيت اثرهم. 

انتفض ادهم غضب وصاح. 

ادهم : ويييين ؟؟؟ 

فهد : روايه وين ؟؟؟ 

ادهم : سيلين وين؟؟؟؟؟ احجي..

فهد : روايه بيا دوله ؟؟ 

ادهم : سيلين بيا مكان ؟؟ فهد اترجاك ساعدني. 

فهد : انت اول. 

ادهم : اطلع بره. 

فهد : راح تنتهي وتصير بخبر كان. 

ادهم : منو قصدك ؟؟؟؟؟؟ 

فهد : سيلين

ادهم : جذاب احجي شبيها. 

فهد : اوديك عليها هسه بس المقابل تنطيني مكان روايه. 

ادهم : عمك يندلها انه ما عندي علم هيه وين...

فهد : اتصل بيه كدامي واحجي وياه اريد اشوف 

ادهم : عبالك اكذب هسه اتصل... 

اتصل ادهم على عمو جاوبه.. 

_ هله ادهم شلونك. 

ادهم عينه على فهد ويحجي بالموبايل. 

ادهم : هله عمي انه بخير انت شلونك. 

_ اسأل عليك بذات وين ما وين. 

ادهم : تعرف الدنيا تلاهي وماعندي وكت اطلع خارج بغداد بس وعد اجيك بأقرب فرصه..

_ هله بيك كول محتاج شي. 

ادهم : بس ردت اسأل روايه شلونها. 

_ شذكرك بيها ؟؟ 

ادهم : هيج اجتي على بالي بصياغ الكلام وسألت. 

_ فهد يمك مو ؟؟؟ 

ادهم : عمي فهد ماعندي علاقه بيه انه كاعد اسألك عنها. 

_ روايه بخير ولحد يسأل عنها مرتاحه .. 

ادهم : ان شاءالله مرتاحه.. 

انتهت المكالمه ب مع السلامه.. 

ادهم : ها فهد صدكت ماعندي اي خبر عنها. 

فهد : شكد لئيم هذا عمك. 

ادهم : سيلين وين 

فهد : طالع بيها للشمال بس وين بالضبط ماعرف..

ادهم : لعد شلون ساومتني وانت متعرف وشلون عرفت بيها راح تموت.

فهد : ردت استفزك علمود تدليني على روايه.. 

ادهم : يعني تلعب بأعصابي. 

فهد : منكم نتعلم دكتور 

ادهم : اطلع برررررره.. 

ضحك وطلع .... 

مرت الايام واسبوع يجر اسبوع ومر شهر وحالنه ميتسولف وحتى ايفين تأذت على اختها كل يوم تخابر تبجي وتسأل عنها وبيوم كاعدين على اعصابنه والتوتر ماينوصف بسبب ادهم لافقد اعصابه وفقد السيطره على نفسه ميعرف شنو يسوي و وين الصح سيلين اخذت عقله وراحت. 

اندك الجرس مال البيت طلع ايمن وره شويه عاط .. 

ايمن : ادهممممممممم هاي سيلين.... 

طلعنه نركض وادهم سوده عليه طلع حافي من نوصل للباب شامريها بالكاع وخربانه لا ايد ولا رجل ، شالها ادهم ودخلها للبيت نيمها على القنفه ودخل ايمن شايل بيده ورقه خلاها بيد ادهم. 

اخذها ادهم بيد ترجف .. 

ادهم : هاي شنو ؟؟؟؟ 

ايمن : وكعت من سيلين من شلتها. 

فتحها ادهم واحنه وكفنه يمه قريناها مكتوب.. 

لو تجيب بروفيسور بعلم النفس هم ميكدر يعالجها 

موفق دكتور..

هذا ثمن خيانتكم 

شكرا لزيارتكم عالم روايات سكيرهوم