رواية ناديه ( كاملة جميع الفصول ) بقلم انين الليل

ملاحظه زغيره 

انت /انتي الي تقرؤون القصه من تكملون قراءة البارت ضغطه ع النجمه حتى لو ما عاجبتكم واكتبوا تعليق 

انطوني بي مواضع الضعف بيها وانا راح اتقبل اي نقد شرط عدم التجاوز 

تحياتي الكم 

#ناديه طفله اوصلت امها الى حبل المشنقه 

#البارت_الاول 

#انيين_الليل 

❤️💙❤️💙❤️💙❤️💙❤️💙

الظهر اجيت من المدرسه دخلت للبيت من باب المحل وانا لازمه ايد حنين اختي الي ازغر مني بسنه 

بيبي شافتني وكالت 

- - ها شبيج ليش باچيه ضاربتج المعلمه 

باوعت الها بدون ما اجاوب ورحت للبيت هي لحكتني دخلت وراي للغرفه وسالتني 

- - ناديه مو كتلج شكو ليش اتاذيني وما تجاوبيني

جاوبتها وانا اضرب بالكاع برجلي والدموع تنزل على خدي واشيل بگذلتي واخليها وره اذني 

... بيبي بعد ما اداوم ولا اروح للمدرسه لو تموتيني 

 اتقربت عليه وهيه عامفه حاجبها لكن هذا الشي ما منعهارتلزمني من چتفي حييل 

- ليش شصاير 

ما جاوبتها ردت عليه // انتي الحلوه الشطوره هسه انتي بالخامس وبعد شكم شهر تنجحين للسادس وانوب 

تداومين بالمتوسطه

انا والدمعه بعيني --اي والناس تمشي وتاشر عليه 

بيبي بعصبيه ==خليهم يولون ليش اياشرون عليج لان يغارون منج شاطره وحلوه ومؤدبه والشعر الي يخبل 

والعيون الكبار طبعا ياشرون عليج (بيبي الدمعه بعيونها وتتحسر واتكلمت بهدوء )

بيبي حبيبتي ما تردين تفرحين بابا 

جاوبتها --هو الي صار كله من بابا (باوعتلها مستفسره )انتي ليش ما زوجتي وحده من

اقاربج كان ما صار الي صار

طبعا راح تتساءلون شلون ابنيه بصف الخامس ابتدائي وهيج تحچي ويه بيبيتها 

طولوا بالكم وانتوا تعرفون كل شي

 .......... 

مرحبا 

انا ناديه راح ابدي وياكم بسرد قصتي انا متاكده راح تقرؤوها وراح تعجبكم 

البارتات القادمه القصه على لسان جدتي ام ابوي والي نسميها بيبي منيره

من كلت هذا الكلام البيبي لزمتني وحضنتني وكالت 

==بيبي روحي بدلي وبدلي الاختج وتعاليي نتغدا وباجر اخذج للمدرسه 

وشرط بعد محد يحاجيج 

هزيت راسي ... لا ما اداوم ما اريد 

بيبي ==ازعل عليج اذا ما تداومين

من شفت بيبي شلون ضاجت حاولت اغير الموضوع لان انا احبها وما اريد ازعلها حچيت 

—-انا جوعانه هسه ابدل واجي اصبلي غدا انا واختي 

بيبي ==لعد وانا 

بدون ما اباوع الها --عبالي متغديه 

= ليش من يمته اكل اذا انتي ما موجوده 

تقربت منها وحضنتها وكلت 

--بيبي لا تزعلين عليه والله مليت هو انا شنو سويت 

جاوبتني وهي تبوس بخدي والعبره خانگتها ==ما سويتي شي مثل ما كتلج كلهم 

يغارون منج ياالله ياعمري روحي بدلي وتعالي نتغدا

انا واختي عايشين عد بيبي منيره ام بابا بيبيتي الي اصلها من بغداد يعني بغداديه وراح ابدي بسرد قصتها

 لان الها ارتباط قوي بقصتي

بيبي منيره ابوها كان اسطه نجار معروف على مستوى منطقته اسمه (يحيى ) ودائما ينادوله (حياوي )

متزوج من نفس منطقتهم مره اسمها (خاتون ) ما شايفتها بس بالصوره الي ابد مو واضحه لكن يسولفون عنها 

جانت حلوة ودائما يوصفوني اشبهها

صار عدهم اربع جهال اثنين بنات منيره والثانيه جميله واخوانها ازغر منها منير وجميل 

ابوها البيبي يعني (حياوي )اتعرف على تاجر من اهل البصره التاجر شاف شغله قنعه يجي يشتغل عنده

بالبصره بتصنيع (اللنجات )

الي هي عباره عن سفن خشبيه يستخدموها البحاره لصيد الاسماك 

والتجاره كانت مشهوره بذاك الوقت بمنطقة الفاو الي كان ولا زال

ميناء العراقي البحري 

تردد حياوي بالبدايه صحيح هو نجار او أسطه ومعروف انو شغله 

نظيف لكن هو يصنع ابواب وشبابيك وديكورات وشناشيل بس ما 

مشتغل بتصنيع اللنجات يعني ما يعرف اشلون يصنعهن لذلك فهمه للتاجر البصري انو هو شاطر بتصنيع الابواب 

والشبابيك ما يعرف بشغل اللنجات التاجر قنعه وصار الاتفاق يجي للبصره بالبدايه ابحده 

واذا عجبته الشغله يجيب زوجته واطفاله ويستقر

وافق حياوي واجه للبصره لان حسب ما تگول بيبي چان زوجته خاتون الي هي امها مبذره وشنو يحصله تصرفه

 على نفسها واخوانها وهمه صح سكنة بغداد لكن ابو منيره ما عنده بيت ملك رغم شغله چان كلش زين والسبب

اخوان مرته

هو وافق على عرض التاجر واجه للبصره ابحده وبمجرد ما وصل اتعرف على اسطه هادي ابو خليل 

الي جان يشتغل عد نفس التاجر 

حياوي بسرعه شرب الشغله وصار يعرف شلون يصنع لنجات وصار

 اسطه وقرر يستقر بالبصره هو وعائلته رغم عدم موافقة زوجته 

لان هي بالاساس بغداديه وبعمرها ما معتبه البصره ولا شايفتها

حياوي قنع زوجته يستقرون بالبصره ولان الشغل ماشي بذاك الوكت نهاية الخمسينات اجه ابو منيره هو وزوجته 

وبنات اثنين الكبيره بصف الثاني الابتدائي والثانيه سجلت بنفس السنه الي اجو بيها

 واولاد اثنين ازغر من البنات بالبداية التاجر انطاهم بيت يسكنون

بي بالفاو كان بيت طين سكفه عمدان وسعف نخل سكنو تلث تشهر بس من اجه الصيف ام بيبي رفضت 

تبقى بالفاو بسبب (الشرجي )يعني الحر والرطوبه الي تتميزبيها منطقة الفاو لوجودها على الخليج

لذلك حجي هادي من شاف جدي اشلون متحير لان خاتون صارت تسوي مشاكل ويوميه تگله 

رجعني البغداد ما حبيت العيشه اهنا

وحياوي ما يقبل ابو خليل شافلهم بيت اجار يمه داخل مدينة البصره وصارو جيران همه وبيت ابو خليل

 بيبي كانت بالابتدائيه من صارت بصف الاول المتوسط بطلت من المدرسه بارادتها

ولان بذاك الوكت كان قله الي يسجلون بناتهم بالمدارس ويبقوهن

منيره حلوه بيضه كلش وعيونها ملونات ومو كلش طويله وشعرها كان مائل للون الاشقر 

من بطلت من المدرسه تعلمت تضرب ابر والي علمتها جيرانهم مسيحيه قابله اسمها مريم وكانت صديقه الامها 

ومن تروح الام زياره للجده تاخذ

 بتها وياها وهناك تعلمت بيبي منيره تضرب ابر وحتى تعرف تولد نساء لكن ما اشتغلت قابله

اما اختها جميله فوصلت للسادس ابتدائي وهم بطلت واتعلمت مهنة الخياطه 

كانت علاقة بيت ابو منيره علاقه طيبه ويه كل الناس وكانو يسمونهم

 (بيت البغدادي ) وخصوصا علاقتهم ويه بيت ابو خليل بحكم انو

ابو خليل وابو منيره يشتغلون بنفس الكار

ابو خليل عنده اثنين ولد وبنيه وحده من كبرت البنيه تزوجت ولد 

من اقارب ام خليل والاولاد خليل يشتغل ويه ابو والثاني اسمه

 ابراهيم هو معلم وبذاك الوكت المعلم مثله مثل الوزير انسان محترم ومقدر من الناس كلهم

كان ابراهيم يراقب منيره ولو هي ما تطلع اله نادرا ومن يتزاورون 

همه وبيت ابو خليل كان يحاول يعطل نفسه حتى يشوفها وهي كانت

 تبادله نفس النظرات الى ان فد يووم الصبح طلعت تكنس بالباب بعد ان طلع ابوها للشغل اتقرب ابراهيم 

وسلم عليها //اشلونج منيره

هي عدلت عبايتها وردت علي ==اهلا استاذ ابراهيم 

//هاي شنو ليش تسميني استاذ

==لان اسمع الكل يصيحوك حتى خاله ام خليل 

ابتسم //اي الكل بس انتي لا 

هي ابتسمت بخجل ==وليش عود 

بدون ليش 

==لا ما يصير 

زين راح افهمج انتي هم سامعه وحده تكل الزوجها استاذ

هي اتفاجأت من كلامه الي خلاها تطير من الفرح بداخلها اما ابراهيم تركها وراح حتى بدون ما ينتظر ردها

او ردة فعلها 

كان هو فرحان لان صارحها المنيره الي كان يحبها بكل جوارحه 

وصارو منيره وابراهيم يلتقون بالليل من وره السياج ينطيها كتاب بي قصيده او قصة حب ويكلها اتخيلج البطله 

وبعدين جابلها دفتر مذكرات واقلام ملونه كللها 

— هذا دفتر مذكرات اتكتبين بي كل شي يخصنا وانا هذا هم دفتر اكتب بي كل شي اشعر او احس بي

تبادلوا الرسايل والصور وكان حبهم عذري ما بي اي شائبه 

منيره كانت سعيده خصوصا بعد ان فهمها ابراهيم انو راح يفاتح امه حتى تخطبها

ابو خليل هو وابنه كانوا يجون المغرب وياهم حياوي كان شغلهم متعب لكن بي ارباح خير من الله كدر ابو منيره

 يجمع ويشتري البيت الي استاجره رغم رفض ام منيره الهذا الشي هو فهمها العقار الشي الوحيد الي ما يخسر

 صاحبه وبعدين من يصير عدهم فلوس راح يشتري بيت ابغداد

قنعت خاتون ومشت حياتهم بالمنطقه او ويه الجوارين 

وبيوم كانو بيت ابو خليل كاعدين بالطارمه يتعشون وام خليل فتحت الموضوع ويه زوجها 

ام خليل /هادي الولد كبرو وانت شو ساكت اجه الوكت الي لازم نزوجهم ونفرح بيهم 

هادي //ام خليل علوا شنو انا ما اقبل ياالله همتج الخير وايد (وايد يعني كثيير )

 والحمد لله بقت همتج تشوفين بنات الحلال

ام هادي ضحكت وكالت /انا خليل اعرفه حاط عينه عليمن بس ابراهيم

 كل ما اكله يكلي بعده وكت عاد انا شفت خوش بنيه لابراهيم 

ابراهيم //يمه عرسوا الخليل وادور انا انتي مو تكولين خليل حاط عينه

على ابنيه (باوع الخليل وربت على جتفه ) وداعتك ابو الخل لو تصير بت شاهبندر هم نجيبها

خليل ضحك وسكت لان هو بطبيعته خجول وهادئ وقليل الكلام 

الام //لا بت شاهبندر ولا ابد ناس نعرفهم ويحبونه ونحبهم واحنه وياهم مثل الاهل وانا كلت نخطبها الخليل 

وهو تبين حاط عينه عليها من ازمان (باوعت لبراهيم )

وانت ابراهيم اخذ اختها اذا ما عندك وحده جوه ابطك

ابراهيم بضحك //لا يمه يمكن انا هم حاط عيني على وحده غرت من خليل 

ام هادي //زين جا كلي مني حتى اشوفها تصلح النه لو لا 

ابراهيم //دخلي نعرف الرايدها خليل ياهي وتالي انا 

الاب// صدك ام خليل مني هاي النعرفها ويريدها خليل شو صار النه 

ساعه نحجي وهوا ساكت

ابراهيم //يبه غير عريس يستحي كلينه مني هاي الي يريدها ابو الخل 

الام وهي فرحانه//والله هادي خليل يريد يخطب منيره بت جيرانه 

الاب //بت حياوي 

ام هادي //اي هي وانا اعرفهن ربيناهن على ايدنا خوش بنات وردت

 جميله ل ابراهيم بس شو اهوه يكول عده وحده جوه كتره ما نجبره

ابراهيم اتفاجأ بكلام امه بقى ساكت ومستغرب وكوه يبتسم وبعدين راح الغرفته ويحجي ويه روحه

يعني خليل اخوي يريد حبيبتي زين وهي مو يوميه بالليل انا 

وياها نتشاوف من وره السياج والصبح بحجة تكنس الباب يعني

معقوله منيره تدري بهذا الشي وساكته لا ما تدري لكن هسه

شراح اتسوي من تعرف خليل يريدها وانا لا يمكن افكر اخطبها

حتى لو رفضت اخوي 

شراح يكولون عليه استغفر الله ياربي رحمتك

كانو ابراهيم وخليل خوتهم حلوه ابعمرهم ما واحد رفع صوته ع الثاني

لذلك ابراهيم من عرف باخو يحب منيره ظل محتار واجه خليل يمه 

ابراهيم راد يتاكد من شي وهو يعرف لا يمكن اخو يضم عنه شي 

خليل /:شبيك ابراهيم ليش كمت من يمنا 

ابراهيم /:مابيه شي تعرف تعبان من الدوام 

خليل /:الله يساعدك

ابراهيم /: اكلك خليل بت عمي حياوي تعرف انت تحبها ورايدها 

خلبل /:لا والله ما تعرف تدري بيه اطلع غبشه وارجع المغرب

بس الصراحه انا رايدها من اول ما شفتها من جنا زغار وهمه حطو يمنا 

ابراهيم /:هاا يجوز البنيه ما تقبل

خليل /:بكيفها ما اجبرها اذا ما تريدني بس امي سالتني وكالت اريد 

اخطبلك انا كتلها بت عمي حياوي الجبيره

بقى ابراهيم يومين وهو يفكر ويشوف الفرحه بعين اخو وعرف حتى لو منيره او اهلها رفضوا خليل هو بعد ما يكدر 

يخطبها ويتزوجها 

اصلا مستحيل بعد يفكر يرتبط بيها بوكتها ابراهيم صار بامتحان صعب وصعب كلش راد يكل الامه لكن خجل 

اخاف اخو يعرف 

بقى ما راح للدوام وجان يروح للترك الي وره بيتهم وبيت منيره يكعد لكن ما يخليها تشوفه يحس بوجودها واكثر

من مره شافها وهي تطل على بيتهم 

راح ابراهيم على امه وكللها

- يمه روحي البيت عمي حياوي بالبدايه جسي نبضهم على جميله يوافقون ينطوها الي اذا وافقوا اخطبي منيره الخليل 

الام// وليش خو اخطبهن اثنينهن 

ابراهيم //يمه لا تنسين خليل مو مثلي انا عندي شهاده واذا ما ينطوني معناتها ما ينطون الخليل ما اريد اخوي ينحرج 

خطيه اذا ما وافقو نسحب نفسنا ونخطب اي وحده اشو الديره مليانه بنات 

ام خليل //كلامك صحيح انزين باچر ان شالله اروح وافتح موضوع ويا امهن ولو هي متكبره بس احجي واشوف 

ردها واشوف شيكلون 

ابراهيم // لا يمه شني متكبره بس اهيه المره بغداديه ومثقفه مو متكبره 

ام خليل/ / واحنا شبينه شعايزنا 

ابراهيم ابتسم غصب //. هسه يمه روحي وشوفي

وراحت ام خليل البيت حياوي وفتحت موضوع بوكتها بيبي منيره صار

وجهه وردي وهي تقدم الضيافه لام خليل الي تكلها

يوم تقدمينها من يجن الحبايب يباركن 

هي خجلت وطلعت وكل ظنها جاي تخطبها ل ابراهيم

ام منيره كالت // اام هادي دادا يصير خير يجي ابوها وافاتحه بالموضوع

بالليل اتفاجات منيره من سمعت امها تكل الابوها 

خاتون /:شنو ابو منير مو شايفها واكفه نزوج الزغيره كبل الچبيره 

حياوي /:لا حبيبتي هي صدوك ام خليل جتي تخطب جميله ل ابراهيم

 بس ابو خليل فاتحني بالشغل كال نريد منيره الخليل

اهنا منيره غوشت عيونها وهي تسمع امها تكله 

ابو منير ما ننطيهم خلي يشوفون غيرنا 

حياوي /:ليش خاتون بيت هادي خوش ناس اوادم هاي شكم سنه ما

 سمعنه عليهم حجايه اوولدهم دره مالت الله لو من ترحين البغداد شلون تشيلني بالصلوات 

ام منير /:شنو حياوي وملتهم 

حياوي /اهووو هاي شبيج خاتون شنو تره ربنا واحد ونبينا واحد 

وبالبصره تشوفين شيعي ماخذ سنيه وسني ماخذ شيعيه هايه محلتنا 

شكد بيها هيج ناس ما عدهم تفرقه احنا يسمونه بيت البغدادي بيت 

ام هيبت بيت المسيحي وبيت فهد يسمونهم بيت الكويتي وغيرهم

 والله هاي الناس طيبين من يمته احنه نفرق

ام منير /:بس انا ما اقبل صحيح خوش ناس لكن اخاف اياذون بناتي 

حياوي /:خاتون تحجين صدوك شنو اياذون بناتج ليش احنه شمسويلهم

ما شفتي العام من جميل اندعم بالماطور شلون ابراهيم شاله وصار

يركض بي على ما وصله للمستشفى لو لمن منير تعارك بالمدرسه 

وضربوا شلون خليل لزم الشارع وضرب الي اعتدوا على منير وبعدين 

اهل الولد المضروب كاومو بيت هادي وفصلوهم من جيبهم حتى ما فكو حلكهم ويانه وكالوا ابنه تعارك 

چان يحامي الابنكم لو اخذوا فلس من عدنا  

اسمعيني خاتون مخلص الحجي الناس اوادم واحنا اهنا غربه واستقرينه جاي نحصل خير من الله والي

انعرفه احسن من الي ما نعرفه يابت الحلال

ام منيره /: حياوي اني اشوف بناتي يتزوجن ابغداد احسن 

حياوي //خاتون لا تشوفين ولا ابد شنعرف من بغداد هاي سنين احنه اهنا الله فتحها علينه وانرزقنا والناس 

خيره هسه اصيح ع البنات واخذ رايهن اذا موافقات نتوكل على الله

خاتون // مي خالف خلي نفكر 

حياوي // لچ شنفكر هاي القسمه الي اجتي للبنات كل هاي الناس راح تحسدهن ابراهيم ما شاء الله معلم وخليل 

اسطه مال لنجات

وصاح حياوي للبنات واجت جميله ابحدها اما منيره بقت بالغرفه متمدده وتبجي بسكته وبينها وبين نفسها تكول 

= اكيد جميله ما راح توافق على ابراهيم وانا اكللهم ما موافقه على خليل وسنه سنتين يتزوج خليل وانا يخطبني 

ابراهيم اي هو هيج 

بقت متمدده لمن اجت امها وكلتلها // شنو شبيج ليش الهسه نايمه لو تفكرين بخلاوي 

هي انتبهت على كلام امها مسحت دموعها = ماما ياخلاوي راسي يوجعني بردت واريد انام 

خاتون //ها هسه صار ياخلاوي على كل اختج جميله كالت الابوج انتي موافقه على خليل وهي هم وافقت على ابراهيم 

منيره بذهول =ماما انا ما كايله الجميله موافقه جميله جميله 

جميله /:ها شبيج تعيطين شكو 

منيره =انا يمته كايلتلج موافقه على خليل 

جميله //بدون ما تكولين ابراهيم دز امه خطبتني وخليل دز ابو وحجى ويه ابوي مبينه انتي مستحيه 

تكولين موافقه وانا وافقت على ابراهيم وكلت البابا انتي موافقه

اهنا منيره عرفت ضاعت احلامها وللابد من وره غباء اختها وصار من المستحيل لو تفكر مجرد فكره لو بالاحلام 

ممكن تتزوج ابراهيم خصوصا وهي تسمع اختها جميله شلون تسولف علي وشكد تحبه من لمن جانت زغيره

حبست دموعها وقررت توافق على خليل لان ابوها انطى الموافقه وصارت الخطوبه والزواج بخلال شهر 

هي ما شافت خليل اله مرتين او تلاثه ولان ابو كله لازم هو الي يسگم غرفة اخو وغرفته نفس الموديل

اما جميله فجانت فرحانه وابراهيم كلها لازم تتعلم تنزع العبايه هو معلم وبذاك الوكت كان السفور بس للناس 

المثقفين وكانما ابراهيم جاي يعاقب منيره على شي هي ما الها بي يد 

وتزوجو بيوم واحد كان زواج غريب الكل فرحان لكن اثنين كانو حزينين 

كان خليل طاير من الفرح ومنيره گوه لازمه نفسها ما تبچي ومن سالوها بنات المحله ليش تردين تبجيين كلتلهم 

= ما متعوده افارك امي واخوتي

وجميله بالعكس فرحانه وتضحك وابراهيم جان مختنك وهو يشوف حلم حياته ضاع من ايده وهو يسولف على نفسه ويكول 

- ياريتني كلت الخليل احبها المنيره لا تاخذها ياريتني ما ضيعتها وكسرت كلبها

واتزوجو بنفس البيت وكل واحد بيهم فهم نفسه انو الي صار امر واقع ولازم يتعايشون ويا 

منيره جانت تتحاشى ابراهيم ونظراته خصوصا وهي تشوف خليل شكد يحبها ويحترمها وفرحان بيها وكلمتها 

ما تصير عنده اثنين فهمت نفسها انو خليل زوجها الي لازم تحبه وتحترمه

خليل شاب طويل يتمتع بعضلات وهاي مو بسبب الرياضه لا بسبب الشغل لان كان يشيل خشب ويرفع ويصعد ويدك 

هو ابيض لكن بفعل عمله بالشمس اخذ وجهه لون السمار جان مؤدب ومتدين ويحب منيره الي چانت حلم حياته 

وبيوم الي صارت من نصيبه قرر يسوي كل شي حتى يسعدها وهي هم قررت تگوم بواجبه او واجب عيالها 

چان خليل شغله متعب للغايه يكعد الفجر يصلي ويروح للفاو يباشر شغله

 وايام يبات بالشغل وجان بس يوم الجمعه يكعد من الشغل لذلك يوم الجمعه ياخذ منيره ويونسها ويشتريلها 

شغلات ويغديها بره

ومنيره بالمقابل هادئه وصوتها ما يطلع مرتبه ونظيفه ومدبره حالها حال نسوان قبل عمها وعمتها يحبوها وخليل طاير بيها 

وهي بدت تبادله نفس شعور الموده والرحمه الي اقرها رب العالمين بين اي اثنين متزوجين

وره شهرين جميله حملت ومنيره بعدهي الكل فرح بحمل جميله والعيون تتساءل ليش منيره ما حملت وخليل عادي 

ولا سالها او كللها اريد طفل خليل كان يحب منيره بشكل ودوم يطلع بالليل من يجي من الشغل يغيب ساعه او اكثر 

ويرجع جايب الها هديه لو قطعة قماش لو مجله لو حلويات هي تحب تقرا كتب ومجلات وخليل يجيب الها ما يقصر منها 

اما ابراهيم چان يراقب وهو وضعه متخربط يحاول يعيش ويه جميله الي دائما چانت تسوي مشاكل

من حملت جميله صارت تتحجج بالحمل وخلت الشغل كله على منيره الي كانت تشتغل وهي ساكته لان فرحانه الاختها

والي بنفس الوقت تشوف غيرة اختها منها وكانت دائما تسوي مشاكل ويه ابراهيم الي دووم كان بره البيت ومبين علي الحزن

منيره كانت تتحاشى تتكلم ويه ابراهيم ما عدا السلام وهي تشوفه شلون يراقبها لكن هي من يوم الي ارتبطت بخليل 

وشافت حبه وطيبة كلبه وشكد كان يتمنى يحقق الها كل الي تريده نست كل شي صار ويه ابراهيم وانتبهت الزوجها 

الي كان كل همه يسعدها وصار عد جميله ابنيه ابراهيم سماها شمس لان هذا اتفاقه ويه منيره من تصير ابنيه 

يسميها شمس واذا ولد يسمي سامي كان الكل فرحان لان صار عد ابراهيم طفله لكن يتمنون يصير عد خليل ومنيره 

الي كانت فرحتهم ما تقل عن فرحة اهلهم حتى خليل بيومها راح للصايغ واشترى تراجي وجاب هدايا للطفله ومنيره 

ما تخلي جميله تشتغل كله الشغل عليها وعلى عمتها وصارت منيره تراجع الطبيبه الي اكدت الها ما بيها شي ولا تشتكي 

من اي عارض

وخليل نفس الشي راجع طبيب بدون ما يعرفون اهله ونفس الكلام الي سمعته منيره من الطبيبه سمعه خليل من الطبيب 

منيره هي وخليل اقتنعوا بان هذا الشي مو طبي وانما ارادة الله سبحانه وصارت منيره تطلب من خليل ان يلزم 

ايده وما يبذر حتى يشترون بيت لان شغله زين وماشي خليل كلها ليش نشتري بيت اشو الاجار 

افلاس (بذاك الوكت )نكدر عليهن

لكن هي كلتله =احسن العقار واضمن واحنه اول وتالي راح يصير عدنا جهال وابراهيم همه ويرادلنه ببت  

خصوصا وهي تشوف انو خليل متكفل بامور البيت وابو ابد اي شي 

ما يصرف لاهو ولا ابراهيم

وفعلا صار خليل يضم فلوسه عد زوجته ومن ساله ابو وين فلوسك كلهم ضميتهن اريد افتح بيهن مشروع لان 

ابو خليل كان ياخذ كل الي يحصله ابنه ويخلي يمه بحجة اضمه الكم

وره سنه حملت جميله مره ثانيه ومنيره بقت بدون حمل

فد يوم ام خليل اجت العصر ولكت ابراهيم وجميله كاعدين يشربون جاي ومنيره بالمطبخ من شافتها جابت 

الماي واجت منيره ==الله يساعدج خاله 

ام خليل /:هلايمه 

ام خليل كعدت وجميله صبت الها جاي ام خليل وهي تشرب 

بالجاي كالت //خاله جميله من جنت بفاتحة ام علوان الله يرحمها شافتني جده مريم وسالتني وكتلها الحمد لله حملت 

بالثاني ومن سالتني علىمنيره كتلها ما صار عدها وراجعت طبيبه وكالت ما بيها شي 

جميله //خاله انا شعليه تحجيلي ذيج منيره واحجي وياها 

ام خليل //دا خليني اكمل عاد اخت ام علوان كالت يجوز منيره وخليل چابسيهم الجميله وابراهيم

انا ما عرفت شنو يعني چبسه وحتى امج سالتهن شنو يعني 

عاد فهمني النسوان الي بالفاتحه 

كالو من يتزوجون الاخوان بيوم واحد لازم واحد منهم ينظر يعني ما يصير عنده جهال

جميله جاوبت عمتها /:قصدج خاله انا چبست منيره 

اي خاله تصير 

منيره من سمعت اجت سالت ام خليل بلهفه ==وشسوي خاله 

ام خليل /:سهله كلش كللي لو حماج يسحك ظهرج ويخطرج سبع مرات 

لو اختج من تجيب تحلب على متنج 

منيره ==خاله شنو يخطرني 

يمه يشبخج من يم ظهرج يقدم رجل وانوب الثانيه ويرد عليج سبع مرات

جميله باستهزاء /: خاله شلج بهالخرافات 

ام خليل باوعت ل ابراهيم وكالت /: خاله حتى لو خرافات ما طول

ما بيها مضره انسويها خو مو يبقى ابني طول عمره بدون ظنى

لو نزوجه وحده ثانيه على منيره واحنه بصراحه 

ما نقبل لان منيره نحبها وما نفرط بيها

جميله وكفت وجاوبت /: انزين خاله اكيد منيره تستحي من ابراهيم عود

من اجيب احلب على متنها هههه والله خرافات

وهزت ايدها وراحت الغرفتها لحكها ابراهيم الي جان ميت من الحركه 

كلها بعصبيه /وج انتي ما تستحين تستهزئين بكلام امي 

جميله /: وانا شگلت امك دووم بس تطلع وجابت الها خبر 

ابراهيم /وشلون تجاوبين ابدالي 

شجاوبت انت بس تريد تسوي عركه 

ابراهيم صاك على سنونه /شجاوبتي هاا تكولين منيره تستحي

وابراهيم همه شنو انا شراح اسوي مجرد اخطرها بلكي

يصير عدها طفل خطيه

جميله تهز بايدها /:هاي عود انت المثقف هيج تفكر شخلينه للما يفتهمون 

اتقرب منها ولزمها من شعرها/ ولج انتي اليمته تبقين هيج الحقد كاتلج والغيره ليش ما تحاولين تبدلين اسلوبج 

لا ابدله الج بطريقتي الخاصه 

جميله بعصبيه /: اي لان سبينا العنب 

شقصدج حقيره 

انت فاهم قصدي

ابراهيم وهو يعض على ايده / والله صحيح انا صوجي المفروض من ليلة العرس ما اتقرب الج واخليج مثل الجلب وشهر 

واطلكج لكن انا واحد غبي خفت تفضحيني بعد ان هددتيني 

هي اتقربت وتحجي ويا بتهكم /:والهسه ابراهيم الهسه اكدر كل شي اسوي بس نصيحه اتقي شري 

ابراهيم /شوفي ولج لو تموتين ما احبج والي مصبرني عليج بتي والي ابطنج لا انتي ولا تهديدج اشتري بفلس لج 

شوفي شوفي منيره شكد دايره بالها ع زوجها وع البيت امي وابوي يحبوها وانتي كلمه ما تعرفين تحچيها شوفيها 

مو هذا اخوي ما عايز وشغله خير من الله بس بقت تضرب ابر وتضمد 

وانتي بس اتزوجنا ما شفتج خيطتيلج لو دشداشه الج من اكلج تكليلي 

عليمن راتبك كافي عليه وعلى بتك

جميله تحجي بتوعد /:شوف ابراهيم لا تقارني باي احد تره انت 

ما تعرفني انا مخبله وهسه افضح الاكو والماكو 

اتقرب منها ولزمها /تهددبني مو اتهدديني انا الج 

صار يضرب بيها بكل مكان وهي تصرخ وركضت ام خليل ومنيره هدنها منه 

منيره اخذتها الغرفتها وهي تحجي وياها

=كبري عقلج جميله لا تضيعين رجلج منج

ومشت الحياة واشترى خليل بيت بنفس المنطقه لكن بالشارع الثاني

يم بيت الكويتي كان حلو وجبير كلش وخليل بدا يعمر بي وفد يوم بالليل كاعد هو ومنيره بالغرفه كلها

منيره باجر الصبح حضري جنسيتج والشهاده نروح للطابو 

ليش خليل 

اريد اسجل البيت باسمج اريد اضمن مستقبلج 

لا خليل انت شتحچي 

اي هذا الكلام الي لازم ينحچي انا عمري كله اشتغل وابوي 

ياخذ شغلي ولا فد يوم سالته وين فلوسي وابراهيم رواتبه 

على كلبه فلس ما يطلع منهن 

منيره بابتسامه ==يا خليل غير فلوس شغلك جاي يكدوهن للبيت اكل وشرب او واجب وخطار وطبيب

هز راسه// لا منيره انتي بسنه ضميت عندج نص الي احصله اشترينه بيت وين فلوس شغلي الي چنت اجيبهن 

واخليهن بيد ابوي ليش ما ساعدوني بمشتراة البيت لو بدينار البيت بيتج واسجله باسمج 

اضمن بي مستقبلج وبلكي الله يرزقنه بجهال ها بس ما اريد احد يعرف

هذا الشي يبقى ابيناتنا كدام اهلي البيت باسمي افتهمتي 

منيره ==بكيفك خليل الي تشوفه

وثاني يوم رحت وصار البيت باسمي 

جابت جميله ولد وهالمره طلبت تولد عد اهلي وسمت الولد كرم رغم ابراهيم راده سامي لكن هي كالت اريده كرم 

اتذكر عمي وعمتي كلولها مو ابو يريده سامي 

كالت وهي تباوعلي /: ما اسمي واذا مصر على اسم سامي يطلكني 

سالوها ليش 

هي صارت تبجي وتكله /:تقبل عمي يريد يسمي الولد لان هذا 

الاسم جان متفق بي ويه حبيبته من يصير عدهم ولد يسمونه سامي 

كافي هو سمى البنيه وانا اسمي الولد

سكتو عمي وعمتي وانا بقيت يمها اخدم بيها لان امي ما تكدر بقت عشر تيام ورجعت للبيت وبيومها خليل ذبح 

خروف وعزم المنطقه وطبعا انا وحماتي نصره وخالتي طبخنا 

ثاني يوم الفجر كعدت اصلي واسمع خالتي تكل العمي

هاي جميله شكد خبيثه كتلها احلبي على متن اختج كالت اي حلبت 

على متنها ابيت اهلي ومن سالت منيره كالت ما قبلت تكول ابيتنا 

احسن ومن رجعت حجيت وياها تكلي ما احلب شنو تردون تكطعون

ظناي مني 

عمي /: احجي ويه ابنج ابراهيم خطيه خليل ومرته يرادلهم جاهل

وهو ما مقصر شايل الببيت على راسه ومرته النهاركله تفتر 

خالتي// انا چان حچيت ل ابراهيم بس ادري يكفر بيها وهي نفسه

تروح تموت ونبتلي

اجيتهم وصبحتهم بالخير كتلهاوالدمعه بعيني

== خاله لا تكليلهم النه الله يعطينا ويكفينا

كام عمي وباسني براسي وانا دموعي نزلن وهو يكلي 

الله كريم يابنيتي ما تضيج اله تفرج 

بعدين عرفت انو عمي معاتب ابراهيم الي اجه وسووا مشكله ويه جميله واسمعها تكله

-: لو اتطلكني ما اسوي الي تريده وعليه وعلى اعدائي

صرت اتجنب اختي وانا ما اعرف ليش هلكد تكرهني وشلنه للبيت الجديد جان بذاك الوكت خوش بيت وبي مساحه 

چبيره وطارمه نكعد بيها بالصيف 

ومكان نربي بي دجاج وبط

البيت چان بنفس المنطقه بالشارع الثاني ركن جوارينه بيت (فهد الكويتي ) سموهم بهذا الاسم لان ابوهم چان 

عايش بالكويت 

وهمه عدهم جوازات واقامه ويرحون ويردون بناتهم اثنين صديقاتي فهد بوكتها بعده ما متزوج حصه متزوجه 

ابن خالتها وساكنه هي واخوها وزوجها بهذا البيت لان ابوهم اتوفى قبل سنتين اما امهم فاتوفت من عشر سنين 

موضي صديقة عمري اتزوجت ابن عمتها بالكويت وتروح وتجي وطبعا ما تنساني من الهدايه والعطور 

  بيوم الي حطينه بي صارت المشاكل بين جميله وابراهيم 

عرفنا انو جميله تريد تعزل وجاي تضغط على ابراهيم وراحت زعلانه الاهلي وراح عمي وخليل وراها ما قبلت 

ترجع اله ابيت ابحدها 

هو قرر يطلك لكن خليل وابو كلوله شلون تطلك وجهالك  

ابراهيم جاوبهم  

ياناس ياعالم ما اريدها لو تجيبلي عشر ولد وحتى لو ترجع

صدكوني بيوم بسنه اطلكها

وبقوا يحجون علي وصار الاتفاق ياجرالها بيت واليدفع الاجار خليل

وهو يحاول يلزم ايده ويشتري قطعه ويبنيها 

وشالو ابراهيم وجميله الي شرطت على خليل البيت مو بنفسءالمنطقه 

ومن سالها جاوبته 

احسن ما تصير حزازات فهمت من خلال خليل انو هي مفهمته انا اغار منها وخليل اجر بيت بغير منطقه قريبه 

على مدرسة ابراهيم

بيومها اشوف عمي وعمتي مقهورين مو على جميله ولا حتى على

ابراهيم بس مقهورين على شمس وكرم لان تعودوا عليهم

صار عمر شمس تلث سنوات وكرم سنه ونص لمن ما اجه ابراهيم

جايبهم النه وهو يكول 

والله الي يكلي رجعها الخاطر جهالك اخذهم هسه للشط واغرگهم 

بعد ما اريدها ثقوا بس ارجعها اموتها وانسجن وذوله يتيتمون

صارت عمتي تهدي بي وهو خانكته العبره اخذت الجهال بدون ما اباوعله وبقوا عدنا يومين وانا شايلتهم واداري بيهم وبعدين 

عمتي وعمي راحو البيت ابراهيم وياهم الجهال بقوا اكثر من شهر وابراهيم مصر ع الطلاك وانا رحت الاهلي واشوف 

جميله شلون تبجي على جهالها وامي تلوم عليها وتكلها

انتي مو وجه نعمه انتي حقيره وغبيه وما تفتهمين 

انا اجيت خليت ايدي على چتفها الجميله او وجهت الكلام الامي 

==لا ماما والله جميله حبابه ما كو مثلها ليش هيج تحجين عليها 

امي باوعتلي وتتحسر //لا والله يووم مو حبابه انتي الحبابه 

حجيت ويه جميله ==جميله انا اريد افتهم ليش كل هذا الحمد لله 

رجلج وبيتج وبعد يومين يصير عدكم بيت ملك وابراهيم خوش ولد

جميله جاوبتنه /: شنو خوش ولد وين خوشيته انتي شتحجين 

امي /:لج جميله انجبي خوش ونص انتي الي مو خوش انسانه

وخبيثه ولج شكو بيها لو مخليته يخطر اختج لو حالبه على متن

اختج ليش ما تفرحين الاختج الي شايلتج وتخدمج بعيونها

جاوبت امي =يووم شنو هالحجي هذا رزق انا ما اقبل جميله تحلب 

على متني لو رجلها يخطرني

امي /:وهسه شحصلت من عنادها اشو بعيده عن بيتها وجهالها 

حميله/: انتو ما تدرون بابراهيم تره هذا خرف بشرفج منيره يكلي 

احملي والي يصير ننطي الخليل شنو نوزع مراد بالمجان

انا استهضمت كتلها ==لا خيه بزرج الج الي ما ينطي الله خسران وصدكيني يا اختي لو مو تحملين بواحد لو تحملين 

بعشره وهم تنطيني منهم واحد ما اخذه ولا اريده الله كاتبلي احمل احمل الله ما كاتبلي

الف الحمد لله خليل راضي وانا قابله بقسمت الله

امي غمتها وكلتلها //من يوم يومج خبيثه شنو عبالج ما ادري

شلون لعبتي علينه واخذتي ابراهيم تره بكل شي ادري وما ردت

احجي لان تصير مو حلوة والناس ما ترحم

هيه ما عقبت صارت تبجي وتگول // ما عليه اريد جهالي 

منير اخوي كان يتهدد على جميله رغم ازغر منها بس احس بي ما يحبها طلعت وانا مقهوره عرفت امي تعرف 

الي جان بيني وبين ابراهيم وسكتت لان جميله لعبت لعبتها بذكاء وخبث 

طلعت بالطريق كلت الخليل امشي خلي نجيب الجهال من ابراهيم الامهم طاك كلبها عليهم 

ورحنا البيت ابراهيم بالطريق خليل كلي

اسمعي منيره ابراهيم يسمع كلامج اريدج تقنعي يرجع اختج شوفي 

امي تعبانه ويه الجهال او حتى ويا 

لاتنسين امي مره جبيره وتالي عمرها تربي جهال وتشتغل بالبيت 

جاوبته والعبره خانكتني ==ان شالله 

خليل /:انا بس اوصل اخذ ابوي ونروح على بيت عمتي نشوفها 

ونشوف نصره وانتي حاولي تحجين ويا وتقنعي عود من نرجع

انا اجيب عشا وياي 

==صار تدلل

وصلنه واتلكتني عمتي وعمي سالت على ابراهيم عمتي كالت بغرفته 

خليل طلع هو وعمي وعمتي بقت بالهول متمدده وانا رحت للغرفه

دكيت الباب هو كال 

فوتي يمه 

دخلت اتفاجا صار اربع سنين عمري كله ما بقيت انا ويا ابحدنا لكيت

ابراهيم كاعد ع الجربايه ويمه شمس نايمه 

سلمت علي هو صار يدكم بقميص البجامه وسالني  

يمته اجيتي وينه خليل ؟

الفصل الثاني من هنا