رواية أزمة ثقه كامله جميع الفصول بقلم جمانه السعيدي
اني عشتار معلمه من الحله انفصلت عن زوجي سنة ٢٠٠٠
بعد زواج دام ست سنوات
اني عندي اخت اكبر وحده بلعائله نجوى
واخو ازغر منها اسمه علي
واني ازغر وحده بلعائله
بعد تخرجي بسنه وحده من معهد المعلمات ازوجت
زواجي كان زواج تقليدي
اختي الجبيره مزوجه بغداد مزوجه رجال تاجر وأموره الماديه كلش زينه عدها ٣ اطفال
واخوي علي ازوج اخت صديقه
عنده صديق كلوش معتز بي ويحبه من كد ما يتردد عليهم تعرف على اخته
صار بينهم علاقة حب
طلب ايدها من اخوها وافق وازوجو
من ازوج علي كان ابوي متوفي بس امي كانت موجوده
المهم البنيه خوش بنيه وبت حلال
وتحب زوجها تموت علي
بقيت اني كنت بوقتها ادرس معهد مرحله اخيره
بعد ما تخرجت كعدت بلبيت لمدة سنه كامله من بعدها
طلع التعيين
صح بوقتها كان حصار والراتب مايكفي الاي شي
بس احنا أمورنا الماديه زينه
عدنا راتب بابا وراتب علي مشينا أمورنا بيهن
وعدنا بيت مااجري
جمانه السعيدي
الحد ما فديوم اجتنا بنيه تقريبا عمرها ٣٦ سنه جايه ادور عروسه الاخوها هي وام احمد جيرانه
البنيه هاي موضفه وياا جيرانه
سائلته على عروس الاخوها
وجيرانه باقيه تمدح بيه وبااخلاقي و واهلي
عشتار....جنت نايمه واجت زوجه على تكعدني
احلام ....ولج عشتار اكعدي خطابه
عشتار...لا تتشاقين اطلعي واطكي الباب وراج راسي يوجعني من هوسه المدرسه
احلام....ولج احجي صدك وحده تخبل جايه تخطبج
اكيد اخوها حلو مثلها
عشتار....رفعت الغطى عن وجهي امي وين
احلام....موجوده هي دزتني حتى اكعدج من النوم
عشتار...ولله مو وكتهن اريد انام تعبانه
احلام...بكيفج اني راح ابدل واطلع واكول اني العروسه
عشتار...اي حتى علاوي يموتج
احلام.... حلو العرس اعرس كم يوم وارجع علي
عشتار...كومي منا خل ابدل واطلع اذا اني بعدني ما شفت العريس انتي خاله عينج علي
احلام....اصلا اني اريد احفزج حتى تكومين
اني ماابدل علاوي بكل املاك الدنيا ولج خمس سنيين منتضرته وعندي استعداد انتضره العمر كله
كومي لا تدلعين علينا على كولت المثل صحلها رجل كالت اعور كومي بسرعه
لا تمل البنيه وتروح
عشتار...يله جايه وراج
كمت غسلت وبدلت وطلعت
اني طولي ١٦٨ بيضه جسمي حلو الكل يشبهني باالاء حسين هاي الممثله العراقيه اني شكلي بعد احلى منها
بدلت ودخلت اسلم
اول سلمت على ام احمد جيرانه
بعد سلمت على اخت العريس
من شافتني اخت العريس بين على ملامحها الاعجاب
ام مصطفى....هلو عشتار شلونج
عشتار...الحمدلله
ام مصطفى....الي وصفج ضلمج ما شاء الله حلوه
عشتار...تسلمين
ام احمد....جمال كمال عشتار كامله من كلشي اصل وفصل
امي....تسلمين الله يحفظج ويسلمج
ام مصطفى....عيوني اني عجبتني العروسه بس لازم يشوفها العريس لان هو الي راح يزوج مو إني
جمانه السعيدي
امي....اي اكيد عشار هم لازم تشوفه وتقتنع ونريد نسئل
عنكم وإنشاء الله رب العالمين يقدم الي بي الخير للجميع
ام مصطفى...باجر انشاء الله بليل يجيكم
امي...اي بليل اخوها موجود حتى يستقبله
ام مصطفى ...انشاء الله خير
عشتار...طلعت ام مصطفى وام احمد
وصلناهن للباب ورجعنا
عشتار...امي سئلتيه شنو يشتغل
امي...تكول مخلص معهد اداره وقتصاد ويشتغل وياا ابن عمه بلبيع والشرا
شغلة اثاث مستعمل وهيج شي
عشتار....هاا تمام
ثاني يوم شسورت شعري ولبست ثوب اسود ضيك وطويله مكياج خفيف ومعطر
بعد العشى بساعه تقريبا اندكت الباب اجا العريس واخته
طبعا هو يتيم الام والاب وهاي اخته متكلفه بخطوبته وعرسه
دخلو جوا وامي راحت تسلم عليهم
كنت خايفه ومرتبكه
دخلت سلمت وكعدت بصف علاوي اول مارفعت عيني
شفته يباوع عليه
يحجي وياا علي بس عينه عليه
كعدت تقريبا خمس دقايق وطلعت
بعد ما طلعت بربع ساعه طلعو واسمع علي يكول اني
ارجعلك خبر
افتهمت هو عجبه شكلي وتمت الموافقه
علي....مبين خوش ولد ومادام يشتغل ومعتمد على نفسه
يعني كلش زين
امي...هم اسئل عنه هذا زواج مو لعبه
الولد كان شكله كلش حلو ملامحها هادئه ومبين من كلامه ذكي يعرف يرد لبق كلامه منطقي
تحسه فاهم الدنيا من وكت
من ثاني يوم علي سئل عنه الكل كان يمدح اخلاقه
ساكن بيت اهله وحده
لان اخته مزوجه وطالعه
صح البيت زغير والبناء مو كلش حديث بس ماشي حاله
يعني اني راح اسكن اني وياا وحدنا
اتصلت على نجوى بلتليفون الارضي
عشتار... باركلي انخطبت
نجوى...الف الف مبروك منو سعيد الحظ
عشتار....ماتعرفي اجا عن طريق ام احمد جارتنا اسمه جواد
نجوى...الف مبروك تستاهلين كل خير بس كون علاوي سئل عنه زين
عشتار....اي سئل خوش ولد
نجوى....بيها الخير
عشتار...تجين للمهر
نجوى ...يمته العرس
عشتار...ايجوز بعد اسبوع اوعشر ايام لان مستعجل هو مجهز نفسه
نجوى....زين اني اجي للعرس مااكدر اجي كل يوم جهالي مدارس من يتحدد يوم العرس اجي
عشتار. وتعوفيني وحدي اهون عليج
نجوى....مااكدر اجي كل يوم الجهال كلهم مدارس
اجي بلعرس
عشتار...براحتج
بعد ٣ ايام اجت ام احمد تاخذ الرد
وامي انطتها الموافقه
تحدد يوم المهر قررنا تكون خطبه ومهر بسيطه
حتى لاتكون التكاليف هواي
طبعا هو مجهز نفسه مشتري غرفه مستعمله بس كلش حلوه
والبيت هو ماااثث
بقه بس تكاليف العرس
لان البيت كامل وهو مشتري غرفة نوم المهر كان
٥٠٠ الف ويعتبر مهر غالي بذاك الوقت
اشتريت ذهب ٣٠٠ وملابس ومكياج ونزلة جربايه بلباقي
علاوي كمل على الفلوس
بوقتها ماكو استيراد بسبب الحصار كل الأشياء محليه
بس اكو ملابس حلوه والمكياج زين
كطعنا مهر كانت هاي ثاني مره اشوفه بيها
من دخل حتى يلبسني الذهب كنت منبهره بي
سعيده هذا الشخص صار من قسمتي ونصيبي
لان شخصيه وحلو واحسه انسان واضح
يعرف هو شيربد
من بعدها ماشفته اله يوم عرسنا
اسبوع واحد بعد المهر وتحدد العرس
اغلب الأشياء اشتريتها جاهزه
لان هو مستعجل على العرس
بلمهر عندي ملابس كنت مجهزه نفسي علمود الدوام
صح مو هواي مثل ملابس البنات هذا الوكت
بس عندي عزيزات ضامتهن لان مايصحلي اشتري كل يوم
الناس حايره بعيشتها بذاك الوكت
جمانه السعيدي
قبل العرس بيوم رحت للصالون وسويت حنه بسيطه
يوم العرس طلعت الصبح طبعا اختى كانت حاضر عرسي
كملت من تجهيز الصالون مااسولفلكم على المكياج
بذاك الوكت حتى الحلوه تطلع مو حلوه
مجموعة اللوان على الوجه
رجعت للبيت اجت الزفه
دخل جواد لزمني من ايدي وطلعنا هاي كانت ثالث مره اشوفه ببها بس احس نفسي احبه من زمان
مااعرف شنو سر هذا التعلق
يمكن لان اول انسان يدخل حياتي
وصلنا للبيت كانو محضرين عشا بسيط دجاج وتمن
اني بس اختي واني وزوجت علي وياي
واخته وزوجه وجهاله وكم نفر غيرهم منوالاقارب
الناس اتعشت وكلمن راح البيته
بقينا اني وياا بس
اجا دخل للغرفه اني كمت باسني من راسي وسلم عليه
جواد...مبروك
عشتار...الله يبارك بيك
جواد...انشاء الله رب العالمين يمكني واكدر اسعدج
عشتار.. انشاء الله
كعد على الجربايه بصفي وكال اكعدي
جواد....من البدايه اريد احدد كلشي حتى اني وياج نتعاون
وماتكون اكو اي مشاكل بينا
عشتار. ...اي
جواد....اي شي يصير بلبيت لازم يكون عندي علم بي
اي موضوع نتناقش علي وارفضه خلاص اسدين الموضوع
اي تقصير بلمصرف من جهتي تصيرين علي
لان يمكن امر باازمه انشاء الله ماكو اي تقصير
أسرار بيتنا تبقى بينا ممنوع تطلع برا هذا البيت
نتعاون على الحياة اني وياج
اني ماعندي مجاملات انسان عملي احب للشغل
احب اطور نفسي
اكيد محتاجين وقت حتى نتعود على بعض اني وياج
بس اني استخارت وكلبي مطمن اللج
بنت الحلال تبين من اول مره
عشتار....من بعدها تعشينا ونمنا كان هدء وبسيط
وحنيين وياي
حبيته من اول ليله وتعلقت بي
وقررت اسوي اي شي هو يريده حتى حياتنا تستمر
وما نترك بعض
