رواية نبيلة ( جميع فصول الرواية كاملة ) بقلم مصطفى ايمن شحاتة

 

الجملة دي سمعتها من (عبد المنعم) حارس عمارة جدي الله يرحمه ، حياتي كلها كانت بارا  مصر سبتها من عشرين سنة كل اللي اعرفه عنها هي عمارة (الأمير) اللي هو أنا (امير عز الدين بيومي) زي ما قولتلك عشت طول حياتي بارا مصر، خدني ابويا بعد ولادتي بسنة و قرر يكمل شغله بارا كان مهندس كبير وكان بيتمنى اطلع دكتور وفعلا مرت سنين  لحد ما بقيت دكتور قد الدنيا بصراحة رغم شغلي الكتير اللي بارا بس أنا قررت تأجيل كل شئ من أجل زيارة بلدي اللي اتولدت فيها و على الاقل ازور عمارة جدي (حسنين) اللي كتبها بأسمي لأني اول حفيد لي، وصلت هناك بليل استقبلني عبد المنعم بالترحيب أنا معرفهوش لكن هو باين كدا يعرفني كويس اوي 

- يا مرحب يا بيه يا مرحب ليك وحشة والله اخر مرة شوفتك فيها كنت حتة لحمة حمرا 

امثال شعبية اول مرة تعدي على وداني خد مني عبد المنعم الشنط وطلعني شقة جدي اللي كان عايش فيها والي مضى فيها فترة حياته ، شقة واسعة وكبيرة على التراث القديم كلها متغطية بالملايات البيضة والتراب في كل ركن في المكان مسيطر على الشقة بالكامل 

- متقلقش يا بيه كل داه هخلي البت سعدية تروقه في ظرف ساعات عقبال ما تشرب قهوتك معايا تحت 

- لا لا يا عبد المنعم أنا هعمل كل حاجة بنفسي بس أنا عايز اريح في اي غرفة لحد بكرا لأني تعبان من السفر 

- اتفضل يا بيه ريح في غرفة حسنين بيه الله يرحمه كان مهتم بيها جداً 

وصلني عبد المنعم داخل غرفة جدي اللي كان باين عليها الاستخدام شوية طلبت منه يسيب الشنط و يتفضل على شغله لأني عايز ابقى لوحدي، كنت بحب العزلة جداً مش بحب الصحاب ولا اللمة ، فضلت اقلب في اغراض جدي هدومه اوراقه ذكرياته و صور  و حاجات كتير اوي موجودة في الشقة تفاصيل ممكن تفضل سنة قاعد فيها و متخلصش على الرغم ان الغرفة مش بنفس حجم الشقة لكن كان فيها اغراض كتير جداً ، فضلت ساعات على هذا الحال اتفرج شوية على هدومه القديمة و شوية على صوره مع ابويا و العائلة و شوية جوبات قديمة جداً كلها بتواريخ التسعينات لكن كان في من ضمنهم ظرف تحسه انه جديد 

فتحت الظرف دا ولاقيت في رسالة من جدي بيحذر أن أي حد يقرب من شقة (نبيلة) مين نبيلة وفين شقتها معرفش؟!!! 

كل اللي جه في دماغي ساعتها انه رسالة تهديد هيبعتها جدي لحد عشان يدافع عن حبيبته بس ازاي الرسالة دي مكتوبة بنفس تاريخ وفاة جدي من خمس سنين أنا فاكر بظبط انه اتوفى في اول سنة يومها ابويا حجز اول طيارة على مصر عشان يحضر الجنازة وبعد اسبوع رجع مهموم شايل الهم و مبقاش ياكل ولا لي نفسه لي أي شئ حتى شغله اللي كان بيحبه اكتر من أي شئ بقا يكره فضل على الحال دا سنة و بعديها  توفى مستحملش فراق جدي على الرغم انه كان بعيد عنه لكن هو كان بيحبه جداً 

قفلت الجواب الغريب دا وبدأت اركز على أني انظف المكان اللي هنام فيه بس معرفتش أنام من الخبط والهبد اللي جاي من الحيطة بتاعت الغرفة صوت يشبه الغسالة و هي شغالة  قمت من مكاني وفتحت باب الشقة وندهت على عبد المنعم عشان اقوله يكلم الجيران يقولهم محدش بيشغل غسالة في وقت زي دا ، طلع عبد المنعم جري و اول ما قولتله على مصدر الصوت قالي: 

- الصوت دا مش بنقدر نوقفه يا أمير بيه!!

- يعني أي مش بتقدر توقفه فين الجار دا و أنا اكلمه؟!

- مش عارف اجبهالك ازاي يا أمير بيه!! 

- قول في أي يا عبد المنعم 

- الصوت جاي من الشقة دي!!

شاور البواب على الشقة اللي قصادي على طول و اللي لاحظت عليها يافطة قديمة مكتوب (الدكتورة نبيلة فاروق)  

- طيب وفيها أي شكلها دكتورة محترمة نكلمها أكيد هتتفاهم الموقف و تكمل غسيل بكرا 

قلت جملتي و أنا متجه ناحية الباب بس عبد المنعم حاول يمنعني لكن أنا  وصلت قدام الشقة وأنا دماغي صدعت من كتر الهبد و صوت الغسالة الجامد رنيت الجرس و أول ما رنيته صوت الغسالة اختفى و لاقيت عبد المنعم بيقولي 

- بلاش يا بيه الشقة دي ابوس ايدك جدك حسنين محذرنا منها!!

- اشمعنا يعني؟!

- الست نبيلة اتوفت محدش هيفتحلك الشقة فاضية اصلا 

سمعت الجملة دي من عبد المنعم جالي ذهول ازاي ميتة والشقة فاضية أما الصوت دا طالع ازاي من جوا بس مش دا الغريب اللي شعري شاب منه أن باب الشقة فتح لوحده و ماكنش في حد واقف جوا المكان ضلمة بس صوت الغسالة رجع تاني!!

- يا أمير بيه بلاش اسمع مني اقفل باب الشقة وارجع 

- أي اللي بيحصل جوا يا عبد المنعم 

- اقفل باب الشقة وانا هقولك 

منطقتش كلمة ماكنش بمزاجي دا بسبب اللي شوفته جوا واحدة واقفة مش ظاهر منها وشها كل اللي ظاهر الجزء اللي تحت بس رجلها معضمة بشكل غريب لدرجة ان عروقها بارزة في نفس الثانية حسيت انها بتقرب رجلها جاية ناحيتي قفلت الباب بسرعة و رجعت لـ عبد المنعم 

- أي اللي بيحصل في الشقة دي يا عبد المنعم 

- دي شقة الدكتورة نبيلة 

- عرفت انها شقة الدكتورة مالها بقا و ازاي فاضية و في حد جوا أنا شايفه 

- دي روحها يا أمير بيه جدك الله يرحمه كشف امرها بس متأخر 

- كشف امرها ازاي يعني 

- كان شاكك في الست نبيلة كان حاسس انها بتعمل حاجة في شقتها مش كويسة في مرة طلب مني ندخل أنا و هو جوا نقتحم عليها وقت ما بتشغل الغسالة بليل ولما دخلنا اكتشفنا حاجة غريبة اوي يا أمير بيه 

- اكتشفت أي؟!!

- لاقينها واقفة عند الغسالة بطلع منها حاجة بتاكلها ماكنتش واخدة بالها من وجودنا 

- أي الشئ اللي بطلعه من الغسالة تاكله دا؟!!!