رواية علي اليتيم كامله جميع الفصول بقلم جمانه السعيدي
اني علي مواليد ٩٠ طولي ١٨٠ بشرتي حنطيه
اتميز بعيون حلوات ورموش كثيفه
عندي شامه بخدي امي دائما تكول انت تشبه ابوك
ابوي الي عمري ما شفته
اصلا حتى صوره اله ماعدنا بلبيت
الكل يسميني علي اليتيم وخاصه من جنت زغير
علي اليتيم من اجيت للدنيا وكله تسميني علي اليتيم
لان اني ماعندي اب
اصلا اني ماعندي غير امي بهاي الدنيا
ماعندي اهل او اقارب ماكنت اعرف شنو معنى اهل وأقارب
عمام وخوال محد يزورنا بيتنا ولا احد يسئل عنا
اني امي معوضتني عن كل الناس
حتى امي ماعدها اهل حتى نزورهم
ولا نزور اهل ابوي
يعني عائلتي بختصار امي وبس
احنا كاعدين بيت زغير اجار اني وامي
امي تشتغل عامله بمستشفى بغداد
من زمان تشتغل هاي الشغله
اذكر من جنت زغير جنا عايشين بلمستشفى اني وياها
الحد عمر اربع سنوات او اقل اني مااذكر بلضبط شكد
بقينا عايشين بلمستشفى
جمانه السعيدي
امي تاخذ شغل شفتين الصبح والعصر ومرات حتى بليل
علمود الراتب لان الراتب كان قليل بأيام النظام السابق
بس احنا كنا عايشين اكثر شي على المعونات
الي نحصلها من الموضفين بلمستشفى يعني هذا ملابس ابنه زغرن علي وهذا جايبلي قمصله من الباله
وهذا جايبلي حذاء من جهاله
كنت اشوف امي تفرح حيل بهاي المعونات
واني هم افرح وياها
كل الكادر بلمستشفى يعرفوني ويحبوني
كنت هادء وعاقل
الحد عمر اربع سنوات امي استاجرت هذا البيت
وكعدنا بي الموضفات تبرعلها كل وحده حاجه
اكو دكتوره اسمها سميره هاي الدكتوره زوجها حزبي جبير كانت اكثر وحده تساعدنا
امي تروح الهم للبيت تنضف بيتهم وتطبخلهم
بلاسبوع مره
امي دائما تكول لو ما دكتوره سميره جان ضعت
دائما تساعدني وتذكرني
المهم انتقلنا وسكنا بهذا البيت لان اجت اوامر ممنوع المبيت بلمستشفى
اله اذا كان عمل يعني خفاره
تعرفون التشدد قبل وخاصه بعد الضروف الي مر بيها البلد ب ٩٠
جمانه السعيدي
راتب امي يله ايجار وكم حاجه بسيطه
ملابسنا اني وامي من الموضفات والكادر يتبرعون النا بملابس مستعمله
لو امي تشتري شغلات من الباله
يعني شغلات ضروريه
امي جانت اجيبلنا اكل من المستشفى
اي قبل يوزعون اكل بلمستشفى ٣ وجبات على المرضى
امي كانت اجيبلنا اكل
يعني مدبرين أمورنا بلكوه
امي كلش تخاف عليه
وين ماتروح تاخذني وياها الاي مكان اني وياها
بلمستشفى كله تعرفني كبار وزغار
وحتى من تروح تنضف بيت دكتوره سميره
تاخذني وياها
بليل انام بحضنها تخاف عليه بشكل مو معقول
الحد ما سجلتني بلمدرسه
وهنا صارت الشغله صعبه عليه
مااريد اروح للمدرسه اله امي تجي وياي
وهي كانت كلش خايفه عليه
اول اسبوع توصلني للمدرسه وتبقى كاعده بلصف
منا لمن اخلص ونرجع سوا
كل يوم تاخذ اجازه علمودي
بعدين غيرت شفت الشغل ( وقت الشغل ) علمودي
الاسبوع الي بعدا كانت توصلني وتبقى الدرس الاول
وترجع للبيت
وترجع تاخذني من المدرسه
من اطلع من باب المدرسه تبقى عيوني ادور عليها
اني مااتخيل حياتي من دونها ابد
من كبرت شويه
كانت توصيني اروح بطريقي وارجع بطريقي
ما تقبل اتعارك وي اي احد
توصيني حتلو اي احد يغلط عليك لا اجاوبه تعال
واني اروح وياك واحل المشكله
خايفه عليه بشكل مو معقول
تبالغ بخوفها وتعلقها بيه
اني مو جبان واكدر ادافع عن نفسي بس امي علمتني شي مهم
الحكمه بلتصرف علمتني مااتسرع
افكر قبل لا اقرر علمتني شنو الشي الصح من الغلط
بكل مرحله كل الاستاذه يحبوني
لان نضيف وعاقل كنت اطلع دائما من المتميزين
خطي كلش حلو واعرف القي خطابه حلو
لان كنت اغلب الوقت وحدي بلبيت
اتسلى بلكتابه واحسن خطي واحاول اقلد المذيعين قبل
واحفظ شعر بلفصحى
جمانه السعيدي
بلعطله عندي صديق واحد نفس خلقي وأخلاقي
كلش منسجمين اني وياااا
ما نلعب بلشارع
يدخل للبيت وياي نلعب داخل البيت
لو نكعد على التلفزيون
امي رتبت دوامها صباحي وياا دوامي
تطلع من الدوام وتاخذني وياها للمستشفى منا لمن تخلص دوام ونرجع سوا للبيت اني وياها
من خلصت ابتدائيه كمت افهم شنو معنى العائله
لمن صديقي مهدي يحجي كدامي
رحنا البيت عمي لو البيت خالي
لو اجتنا بيبي وجابتلي تراك
لو راح نروح للزياره كلنا عوائل
علي....شنو عوائل يعني
مهدي..يعني خالي وزوجته واطفاله وخالتي وجهاله
وعمتي وجهاله وبيبي تجي ويانه
علي....هاااا
مهدي...وانت وين بيت خالك هم تجيكم بيبي
علي...اني ماعندي عوائل كرايبي ماعندي بيت عم ولا عمه
مهدي...ليش وين راحووو
علي...مااعرف اسئل امي عليهم اخليها تاخذني الهم
هنا يله بديت افهم شنو العائله وقررت اسئل امي ليش احنا ماعدنا عائله
ليش ماعدنا بيت عم ولا بيت خال
ليش ماعدنا اهل
جمانه السعيدي
علي....ماما احنا عدنا بيت عم
امي...ليش تسئل
علي...لان مهدي وكل أصدقائي عدهم بيت عم وبيت خال
ويرحون البيت جدهم
امي...واحنا شعلينا بلناس
علي....اعرف معليه بيهم بس اريد اعرف همه وين
امي...ماعدنا لا عمام ولا خوال
علي...شلون ماعدنا زين انتي وين اهلج وين امج وابوج
امي...ماعندي اهل
علي...مايصير ماعندج اهل يعني شلون صرتي وكبرتي
اريد افهم
حتى اني صح ماعندي اب بس عندي ام
انتي حتى امج ماكو
امي....بعيد اهلي
علي...ليش مانروح عليهم ولا يجونا
امي...اكو خلافات بينا
علي...وين اهل ابوي هم بعيدين
امي...اي بعيدين
علي...زين احنا نروح عليهم حتلو بعيدين بلسياره ونروح عليهم
امي...لا مانكدر انروح عليهم
علي...ليش همه ما يجونا
امي... سكتت بقت تباوع عليه وعيونها كلها حزن
علي...ليش مايجونا احنا شسوينا حتى ما يحبونا
يعني ابوي متعارك وياهم
امي...اليوم انت شذكرك بهاي السالفه
صارت عصبيه وكامت من مكانها وكانهاتريد تشرد من اسئلتي
علي كمت مشيت وراها طلعت اتلم الملابس من الحبل اني وكفت وراها وكملت الحديث
علي...مو مهدي يسولف دائما بعمامه واني ابقه ضايج
ذاك اليوم بيبيته جابتله تراك
امي...انت تريد تراك
علي....اي اريد تراك بس مو انتي اجيبينه اريد بيبي اجيبه
تعرفين شنو بيبي اني سئلت مهدي
يكول ام امي اسمها بيبي
امي...اني اجيبلك تراك نفس تراك مهدي
علي....وبيبي
امي...شبيها
علي...مانروح نشوفها
امي....موكتلك بعيدين من تكبر عود نروح انشوفهم
