رواية جدى الفصل الاول بقلم اسماعيل موسي
جدتى كانت غريبه جدا ،بعد موت جدى كانت مصره انه راجع تانى، وكل يوم تقعد قدام البيت تحت شجرة السسبان تبص على الحقول منتظرة تشوف جدى راجع من الغيط ذى عادته
ورغم اننا حاولنا نقنعها ان جدي مات وان الميت مستحيل يرجع ،كانت بتقول انتو مش عارفين حاجه ،انا اعرف جدكم اكتر منكم، كانت صعبانه علينا جدا، موت جدى اخد جزء من عقلها، وعشان كده والدى حذرنا نزعل جدتى ،واذا قالت ان جدى راجع نقلها تمام هيرجع، ومرت سنه وجدتى على نفس الحال ،كل ليله تقول جدكم راجع وتفضل منتظره قدام البيت لوقت متأخر، وفى يوم صحينا على خبر مصيبه، فيه شاب اختفى من القريه والناس كلها كانت زعلانه عليه، اختفى فى الحقول ومحدش عرف عنه حاجه ،كل القريه كانت فى حداد زعلانه إلا جدتى ،إلى كانت فرحانه بشكل غريب، وفى ليله كنت بذاكر وقت متأخر سمعت جدتى عند غرفة جدى واقفه قدام الباب بتقول، اهو إلى قلت عليه حصل ،امتا هترجع بقا ؟
انا مستنياك ذى ما وعدتنى يا كامل....... حسيت بحزن شديد لحظتها ،جدتى عقلها راح وكل مادا فى النازل ،مرضتش اتكلم معاها ولا اناقشها ورجعت اذاكر فى غرفتى مره تانيه وبعد اسبوع بالضبط حصل إلى مكنش حد ممكن يتخيله
