رواية علي اليتيم الفصل الحادي عشر بقلم جمانه السعيدي
علي....انت فعلا اخ
مهدي...انت الي ماكو منك تربيت خاله ام علي رجال والنعم منك
علي...تسلم
مهدي....اني بخدمتك شنو تحتاج كدامك
علي....ولله مااعرف شلون حالي بدونك
مهدي....اني الي مااكدر بدونك
ودعت مهدي ورجعت الامي
دخلت الممرضه تنطيها ابره هاي الابره
بيها نسبت تخدير عاليه
شبه الابره الي تنطي المريض العمليات
لان الوجع بهيج حاله خصوصا مع تقدم المرض
يكون شي لا يطاق الله يكفيكم الشر
طلعت الممرضه امي اشرتلي
علي...اجيت قربت لزمت ايدي
امي....انت زعلان عليه
علي....دنكت بست ايدها بعمري مازعلت منج ولا راح ازعل
اتمنى شي واحد رب العالمين يطول عمرج
واخدمج بعيوني مثل ماانتي خدمتني وضحيتي علمودي
امي...مااريد تزعل مني اريد اموت مرتاحه
علي...تردين تموتين وتعوفيني هلمره صدك اصير يتيم
انتي موبس امي انتي اهلي كلهم وعشريتي
اني من اجيت للدنيا ومااعرف احد غيرج
ليش تردين تعوفيني
امي....قدر ومكتوب من رب العالمين
الحمد لله اني من اموت مراح اضوج لان ربيت رجال
يكدر يتحمل ويصبر
علي...لا تحجين بلموت ممكن
امي...الله يرضا عليك
علي....احبج يمه لاتعوفيني
راسا دموعي عيونها
علي....هااا رجعنا للبجي ممنوع البجي انت راح تصيرين زينه وتزوجيني اريد وحده على ذوقج
وتربين جهالي فهمتي لولا
امي...انشاء الله
نامت امي بعد مااخذت العلاج
جمانه السعيدي
الساعه ١٢ رنت عليه ريحانه
علي....هلو ريحانه شلونج
ريحانه....الحمد لله من امس ما سمعت صوتك
وكلما اربد اتصل اكول خاف مشغول
لان انت كلت اتصل وما اتصلت
علي....مافارغ اتصل لان كل النهار بلمستشفى
ريحانه...احس صوتك كلش حزين
علي...امي عدها سرطان وواصل لمراحل الاخيره
ريحانه...ياااعيوني ليش هيج ليش ما تعالجت من زمان
علي...كانت ضامه عليه خبر مرضها تخاف عليه
تخيلي تخاف عليه وما تخاف على نفسها
ريحانه...ياعيوني الله يساعدك ويساعدها
علي...عندي موضوع اريد احجي وياج
ريحانه....اي احجي اصلا من زمان ماحجينا اني وياك
اشتاقيت السوالفك الحلوه
علي...اني اسف على الشي الي راح اكوله بس اني وياج
مراح نكدر نكمل
ريحانه....يااا هاي شبيك علي
علي....هذا شي حقيقي اني ليش انطيج امل واخليج تنتضرين انت حلوه وزغيره وبت ناس ا وادم
اني ابد ماافيدج
ريحانه....انت تتشاقا مو
علي...لا مااشاقا احجي جد حرام عليه تبقين منتضرتني
ويضيع العمر منج
انت ماكو مثلج بلدنيا كله
بس اني وياج من سابع المستحيلات نكون البعض
ريحانه....ليش احجي الحقيقه من حقي اعرف السبب
اعرف ليش تريد تتخلى عني
ان اعرف انت تحبني واني احبك
ومتفاهمين ليش هيج فجئه تريد تعوف كلشي وتتخلى
خاف شفتلك وحده غيري
علي...ماكو غيرج انتي اول واخر حب
ريحانه...اذا هيج تحبني ليش تريد تعوفني
علي...من حقج تعرفين الحقيقه
يمكن اذا احجيلج تنصدمين بس لازم تعرفين
لان ماكو شي ينضم اريد اني احجيلج قبل ما تسمعين من غيري
اول سبب احنا مختلفين بلمسويات
انت مستواج عالي واني رجال فقير اذا ازوجنا راح اضلمج لان راح تنزلين المستواي
ومراح تكدرين تتحملين هذا الشي حتلو بلبدايه
كان عندج حماس بعدين من يروح هذا الحماس راح تفقدين الشغف وتحسين بلفرق بيني وبينج
ثانيا ...ابوج يريد ناس واصله يناسبهم وهذا الشي من حقه
مامعقول واحد مثله يناسب واحد مثلي
الناس شراح تكول علي لازم نسيبه يكشخ بي
الناس هلوكت الها الظاهر
واني رجال فقير بسيط عايش يومي وبس
ريحانه....هاي الاسباب تافه ماله معنى تريد تنسحب
علمود هاي الاسباب
علي...بعد اكو سبب كلش مهم اهم سبب
سكتت اتحسرت
ريحانه....احجي شنو هذا السبب لان تحسرت
يمكن يكون سبب مقنع
جمانه السعيدي
علي....اني طلعت ابن غير شرعي الامي
ريحانه....وين لكيت هاي السالفه تحجي هيج حتى ابطل
مو الهدرجه تنزل نفسك
علي....مجاي اكذب عليج اني امس يله عرفت هذا الشي
ومااكدر اضم عليج
اذا مو اليوم عرفتي باجر تعرفين
ابوج مستحيل يقبل بهاي الزواجه
مراح يقبل ينطي بنته الوحيده الواحد مثلي
ابوج من سمع ماعندي عمام انتفض ورفض
شلون من يعرف اني ابن حرام اكيد راح يرفض بدون اي نقاش
ريحانه.....انت مالك ذنب
توك كلت امس عرفت يعني ماتعرف من زمان
ولا غشيتنا وهاي الشغله انت مو طرف بيها
انت اجيت للدنيا ذوله اهلك
شلون تغيرهم ترجعهم تبدلهم
علي....زين انت احجي الابوج وشوفي شنو رده
اذا وافق عليه
اني اجيب مشيه واجيكم ومستعد الكل طلباته
سكتت ريحانه ماردت عليه
علي....شوفي انتي نفسج سكتي وماعندج رد
شلون ابوج اذا عرف هاي الحقيقه
اني ضايع صار يومين حتى مااكدر انام
كنت ضايج لان يتيم وماعندي اهل بس صار يومين
عرفت اني مو يتيم
صح طلعت مو يتيم بس طلعت ابن حرررام
لو باقي على شغلة اليتيم احسن بهووواي
اليوم الي عرفت بي ابوي عرفت هاي المصيبه
والي كمل عليه
امي راح تموت امي حالتها مااطمن
هم شفتي واحد اتعس مني واحد حظه نحس اكثر مني
ريحانه....هاي مصيبه شلون كدرت تتحمل هيج شي
جمانه السعيدي
علي....اني جاي اموت كل لحظه مااريد اضلمج يابت الناس وياي الف واحد يتمناج
شوفي نصيبج
اني مراح اكدر اسعدج شوفي حالج اذا تجيج قسمه زينه ازوجي
ريحانه....ليش هيج استسلمت بسرعه
ليش تريد تتخلى عني اني احبك ومستحيل احب واحد غيرك
علي....اقسم بلله احبج واموت عليج بس اليحب يضحي
اني مااريد تبقين منتضرتني
اذا اتقدملج ابوج راح ينبش سابع جد
وراح يعرف الحقيقه ومستحيل يقبل بواحد مثلي
ريحانه.....ميخالف انتضرك
علي...انتي هسه ماخذج الحماس ومجاي تكدرين تسيطرين
على مشاعرج
بس اني اكلج اذا اجت قسمه ازوجي
مراح ازعل منج ابد لان اني اعرف انتي شنو
روحي الله يسعدك ويهنيج يارب انتي ما قصرتي وياي
ازوجي وعيشي حياتج اذا مو علمودج
علمود جهالج بالمستقبل شنو ذنبهم ابوهم ابن حرام
شوفيلهم اب ابن اوادم يحملون اسمه ويفتخرون بي
طبكت التليفون وكمت ابجي
محد يكدر يتحمل الشي الي جاي اعيشه
امي راح تموت وتعوفني
وابوي موجود بس مايربدني
وحبيبتي مااكدر اتقدملها بسبب شغله مالي ايد بيها
زين اني انولدت هاي امي وهذا ابوي
اني مااختاريتهم ليش اعيش مهضوم وحزين بسببهم
ليش اني الي ادفع ثمن غلطه همه غلطوها
ليش امي ماسمعت الكلام ونزلتني ليش جابتني الهاي الدنيا حتى اتعذب
بقيت ابجي لمن حسيت راسي راح ينفجر
شيفيد البجي بعد الفأس وكع بلراس
بقت امي تعاني من هذا المرض لمدت ست اشهر
واني مكابلها وكاعد
١٨٠ يوم مرن عليه اسوء ايام بحياتي
ضايع ومااندل دربي لا اكدر انام ولا اكدر اكعد
الحمل هواي عليه
صح مهدي ماعافني ابد حتى بلفلوس يصرف عليه
بس مع ذالك كنت اموت كل يوم موته
من اشوف امي تعاني كدامي ومااكدر اساعدها
لو ادفع عنها الوجع
واكف عاجز كدامها اشوفها تتعذب ومااكدر اساعدها
اموت بليوم الف مره علمودها
ماتت امي وعافتني وحدي بهاي الدنيا
مدري أحزن على وداعها
مدري اصبر نفسي لان جانت تتحمل وجع لا يطاق
مرات من اشوفها تتوجع اتمنى تموت
وترتاح صعب انسان عزيز عليك يتوجع وانت وأكف تتفرج علي
جمانه السعيدي
ماتت وهي لازمه ايدي
من ماتت حسيت نفسي طفل زغير
كلشي مااعرف وكلشي مااندل كعدت بلكاع وكمت ابجي
ولج يمه ليش عفتيني
مو اني عزيزج ليش عفتيني منو اليه من بعدج
بعدني زغير كلشي مااعرف
انتي اماني ليش عفيني
شلون راح اكمل حياتي من دونج
ماكدرت اوكف على حيلي كاعد وابجي مثل الاطفال
مهدي خلص كل الاجرائات
الي تخص الوفا بلمستشفى
كل الكادر انجمع عليه يواسيني على فقدان امي
مهدي راح وياي للنجف حتى ندفنها
رجعت للبيت بس دخلت سمعتها تصيح
علي يمه اجيت
علي...اي يمه اجيت انتي وينج لا تكولين ميته
اني جاي اسمع صوتج
كمت افتر بلبيت وادور عليها
كل مكان ادخله اشوفها واكفه تنتضرني
مهدي بقه يهدء بيه ويقرا ايات قرأ نيه عليه
ليليه يبات وياي بلبيت ما يقبل يعوفني ابد
يوم السابع رجعت الامي
كلبي طك عليها كل عمري ما مفاركها صار سبع ايام ما شايفها
اني شكد صاير قاسي هي ما تقبل تعوفني قبل ولا لحظه
وين ماتروح تاخذني وياها
واني صار سبع ايام ماشايفها
كعدت يمها وكمت احجي وياها ومهدي يقراها قرآن
علي....يمه شلونج مشتاقلج حبيبتي
اذا تردين تختبرين صبري اني خلاص ماعندي صبر
مااكدر هي كوه
فراكج صعب حبيبت كلبي
مااكدر اتحمل فراكج حبيبتي ارجعي
اذا زعلتي عليه اراضيج بس ارجعي
كلشي مااريد منج بس اشوفج
انتي جنتي تخافين عليه حتى ما تقبلين اشتغل
شلون هسه انطاج كلبج وعفتيني
بطلتي ما تخافين عليه
يمه البيت مو حلو مااكدر اكعد بي
مهدي يبات يمي اعرف انتي عينج عليه
لان اسمع صوتج كل يوم بلبيت
ساعه اسمعج تكولين هااا اجيت
ساعه تكولين يمه علي اكعد راح الوكت عليك
حتى من يضيع شي بلبيت وادور علي
بس اكول يمه وين قميصي يمه وين ملابسي كبل الكا كدامي اعرف انتي قريبه عليه وماعابفتني
ردت اطبخ امس وحتركت ايدي
هاج شوفي ايدي
يله كومي تعاي وياي ولج يمه مااكدر ادخل البيت
شلون مااكدر هاي شلون مشكله
شكد كلبي طاك عليج ليش هيج مو انتي الحنينه
مهدي...كافي موزين عليك وعليها اقرا قران
علي...اريدها ترجع وياي
مهدي...استغفر الله شنو ترجع وياك
ادعيلها بلرحمه ارتاحت من الوجع والالم
علي...مااكدر بدونها
مهدي....كول لا اله الا الله
علي.... يالله ارحم امي بكد ما تعبت عليه
واذا غلطت سامحها لان كلبها طيب وبسرعه تصدك الناس امي شريفه حافظت على نفسها
حتى تربيني ماكان قصدها تغلط
الاهي انت تعرفها اكثر مني سامحها يارب
الاهي امي امانه عندك لا تعذبها
امي لا لبست ولا عاشت مثل النسوان
اطلع اللكمه من حلكها وتخليه بحلكي
عاشت حتى تربيني وبس
انت ارحم الراحمين يارب
